Lo bloqueyo informativo se manifiesta de muitas maneras. Puet estar invisibilizando opinions u tractando-las como loquería impensables pa garra persona civilizada. Puet estar simplament negando lo debat. U esbarrando-lo enta qüestions que le intresen mas a los amos d'os medios. En iste programa prebamos de trencar ixe bloqueyo y asperamos conseguir-lo dende iste chiquet programa d'ista chiqueta radio libre feito en ista chiqueta luenga.
La propuesta de celebración en los Pirineus d'os chuegos olimpicos d'hibierno no ye cosa nueva en lo nuestro país. Venimos de decadas de ferrete y de arrienda candidaturas con millor u pior fortuna. Cada vegada que se preba de debatir sobre las conseqüencias d'acullir ixe evento, qui lo empenta y refirma amaga ixe debat u chuga lo siempre util comodín de Catalunya. Charramos con Arriel Domínguez, activista en desfensa d'a montanyas, que nos explica la problematica d'ixos chuegos y como se ye organizando la oposición a ista nueva enchaquia pa la especulación y la destrucción d'o nuestro patrimonio natural.
La invasión d'Ucraina, que no trayerá cosa buena, vien acompanyada d'un bloqueyo informativo explicito en forma de censura de medios y periodistas que ye cosustancial a los momentos belicos. Pero tamién i hai unatro bloqueyo en forma d'ataques, ridiculización y invisibilización de man de qui no abrazamos las posicions hechemonicas de cómo se ye chestinonando dende Europa iste conflicto. U de qui denunciamos las hipocresías y incoherencias. Antimás de bella reflexión propia, leigo un texto publicau en retz fa bell día por Pablo Hijar que asperaba que hese quedau viello en lo momento d'emisión d'o programa y que, desgraciadament, sigue vichent.
En la parte mosical, ubrimos de nuevas lo calaixo de cancions zapatistas pa trayer un tema d'una banda que presienta novedatz y empecipia chira. Las zapatistas, por cierto, han publicau tamién un manifiesto sobre la guerra en Ucraina. La suya voz siempre ye intresant. Lo programa se completa con convocatorias, lo convite a participar en lo siguient programa, especial sobre Ixo Rai, y la mosica de Siniestro Total, que celebran iste mes de mayo 40 anyos fendo cancions tant miticas como las que suenan en tot lo programa.
Recuerda que puetz ascuitar totz los programas en Ivoox, Spotify y la web de Radio Topo.
En empecipiando octubre Nuei presentó, en un vermut en Ordio Minero, lo suyo nuevo disco El viaje. Muitas yeranos en candeletas dende feba tiempo, aguardando poder sentir por a on tiraba un grupo que nos sorprendió con lo suyo primer disco, y mas encara con los suyos primers conciertos. Dimpués de tanto tiempo sin poder disfrutar d'a suya mosica en directo, y como cal, los podiemos veyer en lo concierto que organizó Caracol Zaragoza en lo marco d'a Chira Zapatista por la vida. No facioron burro falso y sobre lo scenario Nuei fació un concierto que nos remeró ixas emocions d'antes d'a pasa. Un poquet antes, tenié la oportunidat d'entrevistar a lo suyo frontman, Alex García.
TdB: Pa parar cuenta de que El viaje ye un disco internacional nomás cal veyer los titols d'as cancions. ¿Ye tamién un disco internacionalista?
Alex García: Prou que sí. Nusatros siempre hemos teniu l’internacionalismo como sinyal porque pensamos que los pueblos y las culturas han d’estar unidas y que no se puet desfender lo de difuera sin desfender lo propio y no se puet desfender lo propio sin desfender lo de difuera. Creyemos que ye fundamental la comunicación y fer vinclos mas firmes.
TdB: Iste verano publiquetz la Cumbia zapatista y agora sotz tocando en un acto de refirme a la chira zapatista. ¿Que representa pa tu y pa vusatros lo zapatismo?
AG: No sé si ye la que mas, pero sí que estió una d’as luitas que nos fació cambiar lo chip. Dende America veniba unatra cultura, una manera diferent de fer las cosas, con uns planteyamientos de chusticia social, de buen gubierno que la verdat ye que nos facioron a saber qué goyo. Nos pareixió que yeran tot un eixemplo de resistencia y sobre tot de creyar una alternativa en lo territorio, creyando los caracoles y fendo las cosas de maneras diferents. Asinas que en estar ixe eixemplo, siempre que podamos seguiremos refirmando-los.
TdB: ¿Por qué se te trenca lo corazón con Berlín?
AG: Hehehe. Bueno, Berlín ye una ciudat con que hemos teniu firme relación. Ya i estiemos con Mallacán tocando. Dimpués i he tornau cualques vegadas, tenemos chent conoixida, i hemos feito buens amigos, viviu buenas experiencias, buenas aventuras... Ye una sensación: siempre cal tornar ta Berlín. Tamién lo deciba Muguruza, que siempre cal tornar ta Berlín, y nos pasa parellano, que siempre nos fa ganas de tornar-ie.
TdB: Charratz de "a mosica d'a carrera, transmisora rebelde d'a cultura real". Hemos estau firme tiempo sin la experiencia d'o concierto en vivo. ¿I hai ganas de tornar? ¿Qué ye lo que mas hetz trobau a faltar?
AG: Muitas. A-saber-las ganas de tornar. La verdat ye que creigo que hemos estau los grans perdedors d'ista crisi: lo sector cultural y mas que mas la parte alternativa. Porque nusatros nos alimentamos de chuntar-nos, de comunicar, d'ir ta conciertos, d'ir t'actos, de poder publicitar por medios alternativos la nuestra manera de veyer lo mundo. Isto nos ha fotiu buen astralazo, porque los medios de comunicación de masas han seguiu espetando lo suyo y quasi no hemos teniu la ocasión de respostiar-les. Asinas que agora somos totz con firmes ganas. Y lo de hue en ye buen eixemplo. De tot.
TdB: ¿Iste disco afonda en lo viache que vatz empecipiar con l'anterior u ye un cambio de rumbo?
AG:: Ye una mica cambio. Siempre cal tener un filo que nos guie, pero siempre cal fer bell chiro. Lo primer yera un disco mas personal, mas en casa, mas simple, podríanos decir. Iste preba mas de salir ta difuera. Tamién a teniu que veyer la pandemia, que no nos hemos puesto mover, asinas que lo hemos feito con la esmachinación y con la mosica. Y prou que sí, se nota tamién la influyencia d'os mosicos, que han interveniu y han aportau buena patacada de cosas. Ye un viache que nos fa firmes ganas de que contine.
TdB: Tenetz una canción en aragonés tanto en iste disco como en l'anterior y hetz participau en O zaguer chilo, tamién con Casbas, atro prochecto mosical tuyo. ¿Cómo creyes que ye la salut d'a mosica en aragonés?
AG: Pues no sé. Tiengo sentimientos contradictorios. Porque agora mesmo la salut d'a mosica, en cheneral, creigo que ye malament, porque la pandemia l'ha feito a-saber-lo mal. D'atra man, confio en lo treballo que ha feito lo prochecto d'O Zaguer Chilo, que ye una pasada. Que tantismos grupos faigan una canción en aragonés y que agora, quan toquen, faigan ixa canción en aragonés ye brutal. I hai cient bandas que tienen, en lo suyo repertorio, una canción en aragonés. Ixo no ha pasau nunca en la historia. En ixe aspecto, creigo que somos millor que no nunca. I hai carencias, prou que sí, pero isto ha estau un cambio. Ye un antes y un dimpués.
TdB: Recomenda-nos atro grupo aragonés que siga intresant.
AG: No sé si por cercanía, pero me fa a-saber-las ganas d'ascuitar agora a Viki Lafuente, que nunca no la he ascuitada en directo. Tamién te diría Magnetophones, que soi muito de Magnetophones, pero la metat d'o grupo tamién i ye. Viki Lafuente ye una propuesta nueva con prou potencia. No sé... Tamién i hai uns zagals, que no sé cómo se dicen, que son cantando en lo Paseyo d'a Independencia y son una pasada. Uns zagals bien chovenons que fan mosica tranquileta, mas d'a mena de Casbas, con una voz espectacular. Y tendrán... que me sé yo... bells vintidos anyos, no pas mas. Pero no m'alcuerdo cómo se dicen. En lo Paseyo Independencia, i son los sabados de maitins.
"O primer diya de chinero baixoron d'a montanya guerrillers zapatistas ta chilar as suyas proclamas". Asinas prencipiaba una canta de Ismael Serrano, cantaire que de chiquet me feba firme goyo. A revolución zapatista, quasi sin saber-lo, me fue acompanyando dende chovenot, pero no estió dica que conoixié a Arale y a suya pasión por Chiapas que prencipié a conoixer-la.
Como digo en o programa de radio adedicau a ista repolida revolución, l'articlo que a mesma Arale escribió en Más rasmia, a revista que publicaba Chobenalla Aragonesista, estió un primer trango ta conoixer ista revolución que prencipió en 1994 y que encara contina. Muitos anyos dimpués se formó Caracol Zaragoza, o ret de personas por l'autonomía zapatista y gracias a ellas conoixié muito millor iste proceso revolucionario.
Conoixié a situación en Chiapas antes d'o devantamiento, en un rechimen quasifeudal y racista. Tamién o devantamiento armau, quan l'Exercito Zapatista de Liberación Nacional prenió bells lugars de l'Estau de Chiapas, y como decidioron dimpués quedar-se en a selva y no tornar a foter tiros. Conoixié como dende que Chiapas esbellugó, as condicions de vida d'a chent que i vive han amillorau tenendo acceso a sanidat y educación, chestionando a vida cutiana, as tierras, os treballos, .... Viyé a solidaridat que dende totz os cabos d'o mundo les plega por cada diya. Leyé, sintié y me gronxie con tot l'arte inspirau por a revolución zapatista.
Cosa no ye ideyal. As zapatistas han teniu muitas cosas en contra y, con tot y con ixo, han resistiu a lo mal gubierno mexicano, a os paramilitars, a la falta de bell recurso, a las contradiccions internas, .... amillorando en poco más de 20 anyos a vida de muitas y muitas personas y contrimostrando que se pueden fer experiencias d'autochestión con un exito más que acceptable.
Tamara y Pati, todas dos de Caracol Zaragoza, me facioron a honor de trayer totz os suyos conoiximientos ta Tierra de barrenaus Radio y recontar qué ye tot ixo que ye pasando por Chiapas, que tanto en hemos sentiu charrar, y que a soben tant poco conoixemos.
Puetz sentir-lo en o reproductor d'abaixo, u descargar-te-lo punchando en iste vinclo
"¿Ascuitoron? Ye o soniu d'o suyo mundo esvoldregando-se?". Con istas parolas que dicioron os zapatistas o pasau 21 d'avento quan se'n baixoron ta cinco ciudatz d'o sur mexicano, prencipiaba Daniel Rabanaque a presentación d'o V Festival de teatro solidario con Chiapas, organizau por o Caracol Zaragoza.
O festival, como todas as anyadas estió a-saber-lo de divertiu, con as actuacions de Teatro Arbolé, Nostraxladamus y Lü de Lürdes, en a sesión de maitins t'a catrinalla, y Wuatu, Nostraxladamus, Bufacalibos, China Chana, Juako Malavirgen y a Escuela Comica Suicida de tardis. Entre as actuacions Daniel Rabanaque nos leyó bells poemas suyos y d'otri, un d'ells en aragonés.
En ista edición convidoron a quatre luitas en Aragón a presentar-ie as suyas reivindicacions. A luita contra os transchenicos, a Coordinadera Antifaixista, l'aragonés y a luita contra o recreiximiento de Yesa estioron as esleixidas. Igual como todas as anyadas anteriors, o festival estió un espacio de borina, pero en ista edición o caracter politco y a reivindicación estioron muito más visteras que en anteriors anyadas.
As dos personas que representoron a las luitas por l'aragonés leyoron un chiquet texto y prochectoron un video. Os chovens d'Artieda tamién en prochectoron uno, dimpués d'explicar un poquet sitación suya y leyer un comunicau. Contino pencho o texto que se leyó en aragonés y bells videos d'as intervencions.
Deciba Galeano de “Los nadies” que no charran
luengas sino dialectos, que no tienen cultura sino folklore, y ixe ye o
mensache que quieren fer-nos creyer as administracions aragonesa y espanyola.
Que a nuestra luenga y a nuestra cultura no valen ta o mundo que quieren
creyar. Un mundo a on que nomás as luengas d’os imperios economicos tienen
dreito a existir, entre que a resta hemos de charrar as nuestras luengas
d’amagatons, acubillaus en un cado ta que dengún no pueda sentir-nos.
As rebaixadas que sufre a nuestra luenga son
continas y ya vienen de fa tiempos. Pero en zagueras somos vivindo como a luita
contra l’aragonés ye más fura que no nunca. Viyemos como lo gubierno aragonés
fa recular os pocos y chiquetz trangos enta debant que s’heban feito en as zaguers
anyadas. A zaguer modificación d’a lei de luengas imposa a luenga unica, o
castellano, ta todas. Sisquiá clama por o suyo nombre a las luengas d’Aragón,
pretendendo que no son que un “conchunto de fablas locals”.
Bien se vale que qui charramos l’aragonés ya
somos feitas a que l’administración no nos refirme. No asperamos cosa d’ells
que no siga o reconoiximiento d’unos dreitos que no tenemos porque lo diga tal
u qual gubierno, sino que son nuestros por o simple feito d’existir como
personas y como comunidat lingüistica. Por muito que a beluns no les faiga goi.
Asinas que, a tamás d’os suyos entrepuces, as y os aragonesofablants
continaremos fendo tot lo posible por que a nuestra luenga perviva, por que o
legau de cheneracions contine vivo y por poder vivir en aragonés.
Un desaloix...: Tot lo que ye pasando istos diyas en Zaragoza con as okupas me fa muito duelo y, más que más rabia. Un edificio de propiedat publica abandonau mientres muitas anyadas por l'administración que, de bote y boleyo s'imple de vida y d'actividatz t'o vecinamen y tot qui querese pasar-ie y, tamién de bote y boleyo, ye desaloixau ta tornar a estar abandonau y buedo. Igual como os tozuels d'as nuestras politicas y d'as cochas que fación posible o desaloix. O CSO El Adoquín estió desaloixau ista pasada semana, entre muitos refirmes de chent d'o bico y de toda Zaragoza. Agora una siede nazi s'ubre en o mesmo bico. Vecinas y as antifaixistas les dión una bienvenida como cal, entre que a policia les proteixeba (a las nazis). Mesmo Trasobares en da treslada en a suya columneta. Tos recomiendo de sentir en La Enredadera a entrevista que fación a tres d'os quatro okupas que resistión en o tellau quan a policia i dentró. Una entrevista muito intresant. Tamién tenetz a noticia en Alasbarricadas a on que tamién podetz sentir l'audio d'a rueda de prensa.
Aragón ateo: Ya caleba. Dimpués de tantos y tantos articlos sobre relichión y ateismo en iste blog, decidié de fer unatro blog nomás ta ixo. Como sabetz Tierra de barrenaus no ye tematico y quiero charrar d'o que m'agane en cada inte. Con tot y con ixo, creigo que tot lo tema de l'ateismo ye poco treballau y que a relichión ye un d'os más grans enemigos que tenemos tanto por a suya grandaria, como por as simpatias, compresión y aliaus que encara tien en buena parti d'a cucha anticapitalista. No voi a treballar-ie guaire por agora. A ideya ye nomás penchar-ie materials d'otri, que bi'n ha a patacs, asinas que Tierra de Barrenaus continará, si fa u no fa, igual de contenius. Y prou que aquí tamién bi habrá ateismo y canya contra as relichions y toda mena de supersticions, se digan como se digan. Tos presento Aragón Ateo (encara i soi obrando).
Fendo Orella: fa seis anyadas ya en as ondas y lo celebran con unas chornadas prou pinchas. Antimás de fer dos programas especials o 17 y o 24, o chueves 25 se ferá una prochección d'a cinta Maldaus Bordes, de Tarantino, en versión orichinal soztitolada en aragonés. O viernes, Xavi Sarrià, cantaire d'Obrint Pas, charrará sobre o libro suyo “Històries del paradís”. Dende Tierra de barrenaus, norabuena a toda la chent que ha conseguiu que Fendo Orella leve seis anyadas fendo-se y que contine bien rasmiudo emplindo d'aragonés as ondas zaragozanas (y mundials que ta ixo ye o podcast suyo).
A Clau Roya: Dimpués d'a presentación d'o colectivo muitas nos quedemos con ganas de tornar a viyer o video-presentación que i fación. A la fin ye penchau (u a la fin me'n he enterau). Ta vusatras...
Como cuento que ya sabretz, pues fa tiempo que se son fendo bellas campanyas en o mundo reyal y virtual, a situación en Chiapas ye critica. Dende colectivos de toda Europa se son organizando charradas y actos de toda mena ta refirmar a las comunidatz en resistencia. En Aragón, Caracol Zaragoza, se fotió bell par de meses peteniando o país (Chaca, Vall-de-Roures, Andorra, Zaragoza, Teruel …) ta explicar a situación. Agora organizan una semana d'actos, con a colaboración d'atros colectivos (d'abaixo y t'a cucha, en ixe luengache suyo tan poliu que fan servir), que ye bien pincha. Documentals, charradas, … y una fin de campanya con Lurte y Os Diaples d'a Uerba. Tenetz más información en o blog suyo y o programa completo lo podetz leyer contino:
Viernes 12. 19 horas. En A Enrestida.
Documental y charrada sobre Chiapas.
_
Sábado 13. Mañana y tarde, hasta las 19 hs. En A Enrestida.
Mercadillo solidario con el EZLN.
Organizan: RASH Aragón, A Enrestida y Caracol Zaragoza
Jueves 18. 19 hs. Aula Magna Facultad Filosofía y Letras de la Universidad.
Documental y charrada sobre Chiapas.
Organizan: Plataforma Antifascista Universitaria (PAU) y Caracol Zaragoza
_
Sábado 20. 21 hs. Vía Láctea.
Zine-zena por Chiapas. Estreno en Zaragoza de la película “Corazón del Tiempo”, grabada en las comunidades indígenas zapatistas en resistencia. Tapas y palomitas de maiz.
Organiza: Caracol Zaragoza.
_
Domingo 21. 12 hs. Plaza de España
Ascuita Chiapas (Escucha Chiapas). Concentración con las actuaciones de Lurte y Os Diaples d'a Uerba. Información y sorpresas.
Ista semana no podemos cuasi ni alentar de todas as movidas que se fan. De feito ye imposible ir ta tot. Ta prencipiar, totz os diyas de maitins, a las nueu, o CSO Adoquín demanda a nuestra aduya ta continar ubierto. A D.Ch.A, que t'atras cosas bien lenta que ye, ya ha dau orden de aventar a toda a chent que ye okupando-lo. Dende o lunes 15 a las 9 en l'Adoquín (bico d'As Fuents, Zaragoza), contrimuestra o tuyo refirme.
O lunes, Caracol Zaragoza (rete de personas por l'autonomía zapatista) convoca una concentración de refirme a las 20.30 debant d'a siede d'a DPZ, en Zaragoza. En zagueras as cosas parix que se son tornando prou furas en Chiapas. Cal que sepan que, dende Europa y dende tot lo mundo somos refirmando a luita zapatista y que no imos a dixar que ni as paramilitars ni o gubierno mexicano faigan lo que les pete.
De nueis, borina. O Crapula, mitico guariche an que tantas rematamos as nueis, fa diez anyadas ya. Ye fendo un sobrebuen programa de conciertos que prencipió o viernes pasau y que contina mientres toda a semana. O martes bi ha chenta popular y de nueis concierto de rap, o miercols, samba brasilenya con Vanessa Fagundes, o chueves Comando Cucaracha y o viernes “Kitate tú pa ponerme yo”. Tot a las 22:30 (hora teorica). Goyoso cabo d'anyo a o Crapula y que'n sigan muitos más!
Y o cabo de semana coinciden tantas cosas... En Teruel as Bodas d'Isabel y Diego, con concierto de Lurte incluyiu o viernes. A l'atro'l diya Lurte serán tamién en o concierto Buena Chen que arroclará a muitas collas en esfensa d'os dreitos d'as personas debant d'os dreitos d'o capital. De maitin cal remerar que tamién bi ha actividatz en a Plaza San Bruno. Y de baldes, ta todas as que vaigan pretetas de perras... Por si con ixo no'n estase prou, continan os carnavals pirinencos, como o d'A Fueva. Que no s'adube a tot, traduciu...
Por una vegada me va a salir un Ampraus sin charrar de relichión. Y ixo que de motivos en tendría un buen fascal (como malfurrian diners, as fateras d'o papa, lo de Belchite...) pero ixo ye que da ta fer un blog.... Ummmm Soi pensando que.... Bueno, prencipio con iste amprau y ya iremos charrando.
Os nuestros mons no s'ixublidan: Ye o nombre d'una nueva plataforma que se presenta o viernes 22 en Andorra. A plataforma s'ha creyau ta remerar os incendios que bi habió fa ya seis meses y que ni a ciudadanía ni as alministracions les ixubliden. Atra d'as razons ta creyar-la ye que a chent s'embrece y participe en a chestión d'os mons y o meyo natural suyo. Asinas que bienplegada ista plataforma que de seguras que ferá honra en aquellas tierras que tanta aduya les cal y en tot Aragón amostrando como s'han de fer as cosas.
A espelunga de Chaves: En iste caso no estió un maldau accident, ni a inevitabilidat. Estió a man humana en una d'as más grands muestras d'o cazurricos que somos en Aragón. Ta conoixer un poquet más lo que pasó y la importancia d'a espelunga de Chaves s'ha feito un video que podetz viyer en iste vinclo.Antimás se son movendo charradas ta viyer o video y charrar dimpués con expertos en o tema. A venien se ferá o miercols 27 en o centro Joaquín Roncal de Zaragoza (C / San Braulio, a o canto d'o Pilar). Podetz continar viyendo as novedats en o blog que han creyau.
Yo tampoco: Gracias a Adeban m'enteré d'ista iniciativa en contra d'a tortura de toros. Dimpués tamién en dió treslat Publico. As antitaurinas imos fendo trangos entabán. As taurinas son cada diya más carrañadas y ixorrontadas. Cada diya les queda menos... Itz puyando as vuestras fotos y dixando os vuestros mensaches de refirme. En l'inte que escribo isto somos 316 aragonesas as que hemos refirmau a iniciativa.
Fethi: Un caso que cuasi no me baga nian de charrar-ne de lo rapedo que ha pasau tot. Cuasi fan fuera de l'estau a un compañer d'o rete de refirme a os sinpapels y gracias, entre atrás cosas, a la movilización y a la solidaridat de muitas s'ha conseguiu que pueda continar vivindo con nusatras. Tot un eixemplo de que a movilización popular puede funcionar. Y tot montau vía correus y blogs! Podetz leyer tot lo que pasó aquí y aquí.
Graficament: Guarda si pencho cosas que creigo que creyarán polemica y pasan sin estar ni comentadas y talment ni leyidas. Pero be-te-me que o post sobre a grafía sí que ha estau bien comentau. Tos animo a alportar-ie a vuestra opinión, que no i hemos charrau que tres (más que más, dos, o neoarcaico y o paleomoderno, -que bien nos lo pasamos-). Y tamién en cualsiquier atro articlo que escriba, que me fa goi de viyer que se me lei!
Chiapas:Diz Arale que ista tardi vaigatz todas t'a charrada que fa o Caracol Zaragoza sobre a situación en Chiapas. Digo yo que ye bien intresant. Ye una charrada que ya s'ha iu movendo por muitos lugars d'Aragón y que a la fin plega en a Inmortal. Será en o CSO El adoquín (bico d'as Fuents), a las 19:00. A info la tenetz aqui.
De videos, no'n he trobau mica bueno, asinas que habré de tirar de l'archivo de mixins estalapizando-se y fendo o fato que tiengo. Muito bueno
Dimpuesas de Pilars cal tornar t’a bida cutiana y en os ratetz que tiengo libres escribir bel poquet por aquí. Como biyeretz he cambiau a frase d’o cartelón d’alto. L’alemán mío no ye mica bueno, asinas que a frase la he traduziu con un programa. Si beluna charra alemán de berdat que imbíe a frase a tierradebarrenaus@gmail.com.
Lei de luengas: Ya se fazió o ¿debat? sobre si de podría charrar u no pas sobre a Lei de luengas en as Cortes aragonesas. Continan os mesmos ¿argumentos?, as mesmas fateras, belunas continan enzerrinadas con que PI ye tres y asinas asinas. O debat ya m’aburre tanto... O PAR contina estando o canzer d’Aragón a tantos y tantos rans... Agora nomás han dezidiu que ban a charrar-ne. Cuan charren no sabremos sobre qué charrarán ni que chandrío nos ferán a la fin. Tenemos a suerte de bibir en un país de más d’un millón de filologos. Menos mal que a fisica u as matematicas les ne dixan a las zientificas, que sino no abríanos imbentau a rueda.
As mullers chitanas han zelebrau un congreso en Balenzia mientres o cabo de semana. Ista cultura ye asobent ixuplidada por todas. Mesmo por ellas mesmas. A suya luenga ye en serio periglo encara que bi ha muitismo lexico d’o caló que femos serbir asobent sin nian saber-lo. A situazión d’a chitanalla en cheneral a ran sozial ye mala, pero a d’as mullers ye difizil de tot. Asinas que iniziatibas como istas an que se puedan achuntar y charrar d’as suyas situazions y reyalidatz me parixen tot un trango entabán. Aspero que faiga buena onra .
Conziertazo o que organiza Caracol Zaragoza en solidaridat con Chiapas. Azero y Comando Cucaracha, dos d’as collas con millor directo d’Aragón, y con conziertos bien boriners. Asinas que a borina ye asegurada de tot. Antimás l’esquilmén irá tot dreito ent’os prochectos que se son fendo en Chiapas. Qué asperatz ta marcar ixe diya en l’achenda buestra?
Blogosfera: Feba tiempos que me’n yera fendo por o queda que yera a blogosfera. No feban que zarrar blogs u dixar-los amortar-se. Son os casos de blogs que gosaban estar sobrebuenos como Estricalla, O chemeco d’as parolas u Sozialista. Manimenos y afortunadament, atros i tornan, como o buenizo Labrándonos en la sombra que tantas aragonesistas trobabanos a faltar asabelo. Más personal, pero en un buenismo aragonés naixió fa poco Os repuis, o blog d’un emigrant aragonés en Euskal Herria a qui doi una buena abrazada. Antimás i podretz biyer bellas fotos y notizias sobre o Nafarroa Oinez an que l’aragonés estió present y bien representau.Ta despedir-me no he trobau un bideo de lemurs que me fese goi, pero he trobau o que pencho contino de un par de bebés sloths (chandros?). Aspero que tos faiga goi.
Una semana rariza a pasada. Pocos diyas de treballo, ziento de mobidas... Asinas que guaire no he puesto leyer. Prenzipión os actos o miercols de nueis con a XI Borina por l’aragonés. A tamás d’estar bispra de puen y de coinzidir con o conzierto de Tako, o Meta rebutió de chent. Se i penchoron todas as falordias presentadas t’o concurso d’a II Trobada de fabloggers. Una borina bien pincha que remató bien tardi. A l’atro’l diya, en rebellar-nos marchemos a fer una gambadeta por o Paseu Independenzia a biyer os puestos de libros. Pocas nobedatz intresans i biyemos. Con tot y con ixo bellas cosetas sí que i trobé. Y bien pinchas. O Diczionario de terminos cheograficos de Chesus Casaus y Pascual Miguel ye a primer. Ya lebaba muito tiempo asperando-lo y poder a la fin alparziar-lo me fazió firme goi.
Zaragoza, Ciudad sumergida, me sorprendió asabelo. Conoixeba a l’autor suyo, Eduardo Laborda, y parti d’a suya obra pictorica, pero no pas o libro suyo. Si podetz bel diya, fez-le una golladeta y, más que más, si tenetz a oportunidat de charrar con l’autor, que tos rezentará arrienda istorias curiosas. O terzer libro que me fazió goi lo presentoron de tardis en a debantadera d’a nueba siede intergalactica d’a Biblioteca Frida Kahlo en Cantín y Gamboa. Ye Zaragoza Rebelde y se composa de un buen fascal de testos sobre os mobimientos sozials en A Inmortal entre 1975 y 2000. Un pasau inmediato que cal conoixer u no ixuplidar. Iste libro, antimás, ye parti d’un prochecto que tamién incluye dos exposizions y una pachina web. En ixa mesma debantadera se presentó tamién a librería asoziatiba La Pantera Rossa, que’n he charrau ya bella begada y o “Rinconcico Zapatista”, un puesto en a siede nueba d’a Biblioteca adedicau de tot a la reboluzión zapatista de Chiapas. Entre os actos que programó a Frida Kahlo, podiemos trobar un chiquet ratet ta bisitar a barra organizada por o BIC, que dión bel poquet de conteniu a ixe esbafau San Chorche. Tot un luixo de poder biyer un cado independentista en a Pza San Bruno, firme bistero. Cada diya, l’independentismo s’amaga y s'abergüeña menos.
Tot isto y encara no yera plegau lo cabo de semana!. En rematar a chornada d’o biernes fuyiemos ent’o mont, t’as Chornadas d’o Galligo. O sabado de maitins dondiemos por a Galliguera y dimpués de chentar estiemos biyendo como feban a nabata en a placha de Morillo. Estiaño l’adibión unatro trampo asinas que bi eba bella poca de medrana por si s’entrascaba en bel puesto. De tardis tamién estiemos biyendo os mallos d’Agüero y a ermita d’o lugar con una portada majisma y muito bien coserbada. Iste lugar, que encara no conoixeba parix estar una alfaya de raso. Se i conserba l’aragonés alto u baixo bien, bi ha güeitres de diferens menas y atras abes y, amás d’a debandita ermita, os mallos suyos son firme impresionans. Una redolada repolida. En Ayerbe, en plegando a nueit, se feba una ferieta ta tastar os “liquidos d’o Mediterraneo”. Por 5 € podebas tastar tres menas de bin d’a redolada, un plato de mondongo y queso y azeite y miel. Sobrebuena ideya ta fer conoixer toz ixos productos. Ya o domingo, a nabata eba de baixar. Entre que feban os zaguers apaños, chent d’a organizazión nos esplanicó una mica a istoria y bellas istorietas de nabatas y nabaters. Como ye de dar tot se mezcloteyó con a reibindicazión d’a bida d’os ríos y prou que d’as riberas suyas y os suyos abitadors, umanos y no umanos. Podetz trobar unformazión sobre o prochecto d’entibo aquí, pero si de berdat queretz conoixer l’afer, pasatz-tos-ie y preguntatz porque de camín tos esplicarán bien tot lo que calga. Un buenizo pseudopuen ta remerar-lo. Unatro año torno a pensar-me de puyar tamién ta Laspuña que astí baixan por a Zinca. Será ta cabo Mayo asinas que talmén nos i trobemos. Y si no regular que l’año benién en a Galliguera.
En ista semana toca un poquet d’internazionalismo ta descansar-me de tanto ateismo. Y ixo que dixan bien fazil fer-les creticas. Sino lo creyez, nomás cal leyer iste articlo de El Periodico. No comments.
- Chiapas: O millor ratet d’a semana cal que le’n agradixca a Caracol Zaragoza. Organizón o biernes un festibal de teyatro an que actuaban solidariamen cualques collas y personas. Contafalordias, malabaristas, payasos y asinas asinas mientres cuasi tres oras. Risas y más risas, pues todas as actuazions me fazión firme goyo. A cambra, d’o Zentro Zibico Gara d’o Norte, yera a rebutir y muita chen mesmo abió de posar-se por tierra u estar-se quillaus mientres toda a funzión. Tot un exito que ferá que en Chiapas tiengan bels poquez más de meyos ta continar resistindo debán d’o mal gubierno mejicano y dando-nos ixas lizions de dignidat que tanto nos calen.
- Palestina: A rebutir de chen estió tamién a manifestazión d’ayer en solidaridat con o pueblo palestino. Mientres peteniabanos as carreras d’A Inmortal, l’estau d’Israel continaba matando ombres, mullers, ninos y ninas y fendo esclatar espitals, escuelas y edifizios d’a ONU. Mesmo he bisto en a TB que en Madrit -como no- se fazió una manifestazión refirmando a Israel plena de siñals d’o Estau chenozida y d’España... Como alparzeo d’a mani, biyemos a un ombre de bels 50 años que, en pasar a manifestazión por a carrera Alfonso enta a Plaza d’o Pilar, dizió, firme carrañau “que baiga Cerolo ta Palestina” con ixe tono de fachuz cremau de tot. Cuento que le sería bullindo a sangre de biyer tanto moro chunto y lo pagó un con sozialista omosecsual, siñal de tantas cosas que el odiará. Como documento aquí podez leyer una notizia de fa dos años, sobre confesions d’un soldau israelí, que a situazión no abrá cambiau guaire (u mica). A bueniza foto d'alto la he trobada en iste blog de fotos que tien cosas bien majas.
- Africa: A gran ixublidada. Ye de dar que cal estar a la tisba y refirmar de tot a palestinos y chiapanecos, pero tamién ye bueno remerar, de cabo ta cuan a lo menos, ixos conflictos, guerras y situazions menos populars. An que no bi ha politica, u la politica ye menos ebiden.... Ixe ye o caso de o Congo, que lo remeré, cosas d’a bida, por o blog “Los Monegros no se benden”, en un sobrebueno articlo que escribión ta primers d’año. Astí bi ha una situazión contina d’inestabilidat politica y confictos armaus por muitos intreses, un d’els a esplotazión d’as minas de coltán. En iste articlo publicau fa bels años en Diagonal podez trobar más informazión.
Con isto me despido, mozez y mozetas, dixando-tos con un bideo que he trobau d’a manifestazión d’ayer.
En Palestina as cosas continan malamen. O pior ye que contina sin biyer-se que as cosas baigan a cambiar guaire. Pero entremistanto no podemos remanir callaus. Si no estando-ne as cosas ban como ban, qué no fería l'Estau d'Israel si no tartisenos? Asinas que iste Sabado cal que a manifestazión que ha combocau o Foro Palestina Libre siga a rebutir de chen. A manifestazión prenzipiará a las 18:00 en a Glorieta Sasera (AKA os cañons d'o Corte Inglés) y o manifiesto suyo lo pencho más abaixo. Tamién tos remero que podez ir leyendo as notizias en o binclo de Rebelión que bi ha en a columna d'a dreita u en http://www.antimilistaristas.org/.
O diya d'antis, o biernes a las 20 en o Zentro Zibico d'a Estazión d'o Norte, Caracol Zaragoza organiza un festibal de teyatro an que replegarán diners t'a promozión d'a salut en Oventic (Chiapas). Antimás de poder biyer as sobrebuenas actuazions ye a oportunidat de conoixer y colaborar con ista chen que, en zagueras, son fendo un buenizo treballo. Podez trobar info y binclos a los actors y actrizes a dentrada d'o 10 de chinero d'o blog d'o programa de radio La Enredadera.
Combocatoria d'a Manifestazión:
El Foro Palestina Libre de Zaragoza convoca a todas las organizaciones y ciudadanos que denunciamos el genocidio y holocausto del Estado Sionista de Israel contra el pueblo palestino, exigiendo porque es de justicia hacerlo:
* Que todos los estados adopten las medidas necesarias para impedir la venta o suministro a Israel de armas de todo tipo, así como asistencia o capacitación técnica para su fabricación o mantenimiento.
* La puesta a disposición del Tribunal Penal Internacional de los gobernantes y mandos militares israelíes para ser juzgados por crímenes de guerra y contra la humanidad.
* El bloqueo económico a Israel y el fin de sus acuerdos comerciales preferenciales con la UE y con el Estado español, y la ruptura de relaciones diplomáticas, culturales, académicas y deportivas con el estado sionista.
* La liberación sin condiciones de las 11.000 personas palestinas presas en cárceles israelíes.
* El derribo del Muro de la Vergüenza, declarado ilegal por la Corte Internacional de Justicia (julio de 2004) y que convierte el territorio palestino en una cárcel a cielo abierto.
* El derecho al retorno de los 7 millones de palestinos refugiados expulsados por Israel desde 1948 (nº242 y 338).
* El reconocimiento del derecho legal y legítimo de un pueblo a responder a la invasión y a la ocupación (nº3236 y 476).
La gravedad de los acontecimientos exigen que todos y todas salgamos a la calle con un solo grito y una sola voz contra el invasor y asesino que es Israel. El Foro Palestina Libre ha decidido que las únicas banderas sean palestinas por lo que os pedimos que ninguna organización de cualquier tipo lleve sus propias banderas ni símbolos que puedan distorsionar el sentido unitario de la manifestación.
EL PUEBLO UNIDO JAMÁS SERÁ VENCIDO. PALESTINA VENCERÁ
.jpg)
