Fachas de finals de setiembre

En zagueras no he escrito guaire en lo blog asinas que pensé en reprener ixo que feba habe anyos de “Lo millor d’a semana”, una serie d’articlos que publicaba charrutiando sobre las noticias semanals. Ubrié la mía libreta y empecipié a apuntar l’actualidat mas comentable. En tres días ya no adubo. Lo facherío va varrenau, argüelloso y arramplando con tot. Y no sé quan les aturaremos, quánto nos costará ni quánto tiempo tardaremos a reconstruyir lo mas basico. Agora que tenemos lo gubierno-mas-progre-d’o-cosmos, tanto en Aragón como en Espanya, ye precisament quan la extrema dreita ye marcando la suya achenda de manera mas fura.

Diz Casado que totz los espanyols votoron a lo rei. Cuento que la sola sincusa pa ixa sanselada ye que lo referendum constitucional. Ixe que lo mesmo Adolfo Suárez reconoixió que i heban feito trampa, que yera pa unatro rei, pai de l’actual, que ha espipau d’o suyo reino con los nuestros diners, y que buena cosa d’a chent que lo votó ya ha muerto. No ye que no se permita un referendum sobre la monarquía, ye que sisquiá se permite preguntar por lo tema en las enqüestas d’o CIS. ¿Qué mena de problema tien Espanya con conoixer la opinión d’os suyos ciudadans? Ni con la monarquía, ni con la organización territorial de Catalunya y ni sisquiá con lo nombre d’a mascota d’a Expo.

Mas cerqueta, en la mía ciudat, PP y Cs, encantaus de tener a V0X como companyers de viache pa que esgramaquen lo que ells no s’atrivirían, le niegan estar fillo predilecto a Fernando Simón entre que le dan lo mesmo titol a un bispe y a la policía local. V0X ye veniu a fer petar mesmo consensos tant firmes - y de vez fatos - como lo nombramiento d’os fillos predilectos que siempre s’heba feito por unanimidat se proposase a qui se proposase. Y lo fan con un scientifico que teneba meritos muito antes d’estar portavoz de no cosa. Ya dició Millán-Astray, un d’os referents d’ista chent, ixo de “muera la intelectualidat” y mesmo en qüestions inocents como ista aplican la suya ideolochía.

A Rodrigo Lanza le repiten lo chuicio dica que salgan lo que ells quieren. Los medios siguen dando ferrete con los estirants que nunca no amaneixioron. La que no i amaneixe nunca, en los medios, ye la navalla que diz que fació servir. La suya ideolochía, que califican de “anti-sistema”, pareixe ya parte d’o suyo nombre. La de Víctor Laínez nunca no la sabremos por ixos mesmos medios. ¿Por qué ye important en un caso pero no pas en l’atro? Tanimientres, los de Bankia libres, a un abusador de menors de l’Opus los suyos companyers de secta le rebaixan la condena de 11 a 2 anyos y chovens d’Altsasu siguen en la garchola, dimpués de 1400 días, por una zaragata en un bar.

No i hai mas fachas que antes mas. Ni s’han radicalizau, me pienso. Son los de siempre y con las ideyas de siempre. Pero s’han sacau la mascareta - en tot los sentius -, las vergüenyas y los complexos y agora nos marcan l’achenda. Incluyiu iste mesmo post.

No tiengo la solución a isto, ni sé cómo fer pa que la izquierda organice una respuesta que nos permita cambiar la nuestra realidat cutiana y ganar la batalla cultural. Que las nuestras valors tornen a estar presents y que se charre menos d’okupacions inexistents y mas d’os inexistents dreitos laborals. Yo no lo sé, pero regular que i hai chent leyendo isto que sí. Aspero las vuestras aportacions.

Cursos d'aragonés y "Femos eventos". Tierra de barrenaus 7x01

Dimpués d'unas chiquetas vacacions, las primeras en mas de cinco anyos de programa, torno t'a radio con a-saber-la rasmia y las cosas bien claras. En ista nueva temporada - y en van siet! - aspero poder ofrir-tos buenos y intresants programas y dar voz a tot qui quiera aproveitar l'amplifiación d'as ondas y lo podcasting. Igual como l'anyo pasau, lo programa durará una hora si fa u no fa y tendrá la mesma mecanica. Siguen las seccions mosicals, las entrevistas y bell especial de cabo ta quan. Tot isto, si lo virus lo permite, prou que sí.

Como ye menester en istas calendatas, la primer entrevista le'n foi a Serchio Soriano, lo nuevo coordinador d'amostranza de Nogara, qui s'acerca t'os micros d'a radio pa explicar-nos como ha concarau l'asociación toda la emerchencia sanitaria, como s'han rematau los cursos 19/20 y, sobretot, cómo empecipia la escuela d'aragonés lo nuevo curso 20/21. Tot un placer tener en lo programa, antimás, a un blogger y escritor como Serchio que, antimás, leyió una d'as suyas creacions.

Lo sector d'eventos y espectaclos ha estau istos días, y será en los siguients, protestando por lo tracto que ye recibindo de l'administración. Lo treballo y la birolla de chent arrienda ye en firme periglo por la situación economica derivada d'a crisi sanitaria. I hai solucions y demandas bien concretas pa lo sector, que en charramos en la segundta parte d'o programa. Contino, tos explico las zaguers novedatz de Tierra de barrenaus, que no en son pocas.

En la canción d'o programa sentiremos un grupo aragonés que acaba d'editar lo suyo quarto disco. Firme borina y un album bien bueno d'una colla d'alicates que se fa querer a-saber-lo. Lo calaixo de cancions s'ubre por primer vegada en iste curso pa descubrir una canción que charra d'a historia recient d'Europa. ¿Endevinatz qué dos cancions sonarán?

Como totz los anyos, los micros de Radio Topo y de Tierra de barrenaus son ubiertos a toda la chent que tiengatz cosas a decir, que queratz fer servir l'aragonés y que desfendatz ista chiqueta luenga. Si creyes que yes una d'ixas personas y tiens una propuesta, no dubdes en escribir-me.

Programa #84

Lo concierto coronavirico de Roba estesa

Dimpués d'estar-nos encadaus quantos días, d'estaus d'alarma, fases y desescaladas, china-chana hemos iu reprenendo partes d'a nuestra vida d'antes. Hemos de portiar la mascareta terne que terne y parar cuenta de totz los protocolos d'a clamada nueva normalidat que, en muitas cosas, ye bien pareixida a la viella. Manimenos, en lo tocant a la cultura, y sobretot a la mosica, tot ha cambiau. Cuento que los zaguers conciertos que podié veyer en directo estioron los de Sick Brains en La López y Embers Path en un vermut de Las Armas. Allá ta febrero, ye claro. Yo, que yera de concierto por semana, como poco, levaba mas de meyo anyo aconhortando-me con emisions por Instagram y atros placebos. Asinas que quan m'enteré de que Roba Estesa tocaba en Cambrils chusto quan yo i yera de vacacions, me faltó tiempo pa prebar de mercar las entradas.

Isto d'os conciertos coronaviricos me feba una mica de galvana. Un concierto ye muito mas que lo que faigan los mosicos. Ye tot lo que pasa abaixo d'o scenario. Lo que se baila y lo que se chila. Los empentons y los pogos, si son menester. Las bieras, la sudor, tot ixo... ya sabetz. Ixo d'estar posadet, sin cantiar-te t'o tuyo puesto, sin poder fer-te un hordio, ni escacilar con los tuyos amigos dica fer periglar las tuyas cuerdas vocals feba que quasi hese preso la decisión de no tornar a ir de concierto dica la nueva-nueva normalidat. La d'antes mas. A la fin, la curiosidat, las ganas de mosica en vivo y sobretot la mía parella, facioron que decidise d'ir-ie. ¡Y qué buena decisión!

Lo concierto yera en lo Parc dels Pinarets, un parque en l'interior de Cambrils bien bonico. Yera de baldes y caleba apuntar-se-ie en una web. Quan lo vide, prebé de pillar las entradas pero ya no en quedaba. Por lo que nos heban dito de eventos pareixius en Zaragoza, por un regular no s'imple l'aforo porque siempre i hai chent que en reserva y dimpués no i va. Asinas que nos i plantemos mas d'una hora antes d'o concierto y preguntemos a la chent que i treballaba. Efectivament, nos dicioron que si pasau un quarto d'hora quedaba sillas libres, nos deixarían pasar-ie. Muita chent faltó, asinas que podiemos acceder-ie. Las sillas, afortunadament, yeran por parellas y podiemos estar chuntas tot lo concierto. Las midas de seguridat, impecables. Chel a la entrada, equipo de limpieza que escoscaba l'escusau cada vegada que belún lo feba servir y dos metros entre parella de sillas.

Roba estesa empecipioron con lo suyo Cant de lluita y a escape se minchoron lo scenario. La rasmia d'a banda me feba dificil no devantar-me a bailar. Me penaba a-saber-lo d'estar-me astí posau. Con tot y con ixo, la cantaire sabió animar-nos muito bien y fer-nos mover tot lo que ye posible en istas condicions. Un gran concierto d'una banda que, ya levando buena trachectoria, tien muito a decir y muito camín a fer. Aspero que en la siguient vegada que pueda veyer-las siga en millors condicions.

La cultura, y particularment la mosica en directo, ye lo que mas trobo a faltar dende que corre la pasa. Eventos como iste, y como muitos atros que s'han feito en lo verano contrimuestran que, si i hai voluntat politica se puet organizar conciertos seguros. Las mosicas y mosicos que tantas alegrías nos han dau toda la nuestra vida no se mereixen que les deixen a la bimbola en iste momento, asinas que a qui disfrutamos d'a suya obra nos toca d'aduyar-les en la busca de solucions pa lo suyo sector y d'exichir a los nuestros representants politicos que, igual como a tantas atras treballadoras, no las deixen abandonadas.