Viedan as corridas en Catalunya

A NOTICIA. Con mayusclas y tot. Puestar que sía a noticia de tot lo verano, con o permiso d'a reforma laboral que ya en estió d'a primavera. Viedan parti d'a tortura taurina en Catalunya que, como ye costumbre en tantas atras cosas, va trenta anyadas deban d'a resta de nacions d'a peninsula. Y digo parti, porque de traza vergüenyosa y hipocrita de tot, i quedan legals os correbous y atras trazas de tortura animal. Igual como fa anyadas remanioron legals as barallas de gallos en Canarias.

A noticia me plegó en A Flama y si i hesenos teniu champagne en hese ubierto una buena botella. O movimiento ecolochista, a cucha alternativa u como nos queramos decir no tenemos guaires diyas de noticias tan buenas como istas y cal celebrar-los ta continar con l'animo alto. A dreita espanyola y "aragonesa", a socialdemocracia y tantos y tantos atros son niervudos una atra vegada. Que Espanya se trenca, que no dixar-les torturar animals ye un atentau contra a libertat y tal y tal. Os titulars d'os suyos periodicos fan plorar u redir, seguntes como los pilles. As editorials lo mesmo. A de l'Heraldo habría de fer que Purnas tornase a ubrir Aragón colonial. Levamos una semana de sentir fateras como feba tiempo que no'n tenebanos.

Una d'as cosas buenas surtidas d'a noticia ye que muitas s'han retratau por si tenebanos bella dubda. IU, vía Llamazares u Barrena, refirman a tortura, tot respetando a decisión d'o Parlament. Decisión que no levarían ta Espanya u t'Aragón. Por si beluna pensaba en votar-les, ya sabetz lo que bi ha. Yuste, de CHA, no lo dixa guaire platero, encara que todas sabemos que ixe partiu nunca no ha feito guaires poders por refirmar a luita antitaurina en o pasau, ni en o present. O PSOE y o PSC en a suya muito gran mayoría han refirmau a tortura, con mayor u menor pasión, u con millors u piors argumentos.

Con iste panorama ye normal que tot iste proceso haiga prencipiau y haiga estau empetau dende alacetz socials. Dende una plataforma que ha habiu de fer una ILP (Iniciativa Lechislativa Popular ta qui no lo sepa), no habendo garra partiu que gosase asumir ista luita como suya. Y ye que, me pienso que continamos estando solos y trasversals. Dengún gran partiu (en numer de representants y/u militants) no nos aduyará en ista luita, como en tantas atras (como l'aragonés), asinas que habremos de continar apanyando-nos nusatras.

En a blogosfera, prou que bi ha habiu reaccions arrienda. Dende Banarús, o somarda Florencio, razonaba como Catalunya s'amana ta Espanya con ista decisión, con argumentos tan absurdos como os d'a dreita espanyola. Se felicitaba tamién El Barzal, Kale Borraja, A onsera u l'Esconxuradero. A colla antitaurina oscense, como no podeba estar d'atra traza feba un reportache prou completo con a saber-lo de videos d'as noticias. Inde feba una reflexión que as conclusions suya las comparto en parti, encara que creigo que ixublida toda a rabia contenida de sentir tan y tan asoben como nos criminalizan y mienten en os meyos de comunicación de masas, as esfensoras d'a tortura. Creigo que cal una respuesta, a lo menos, igual de fura. Y nomás cal viyer a respuesta de l'atra parti en forma de enrestida de man d'un torero a la siede d'ERC, u os titulars en periodicos como El Mundo an que saliba, baixo una foto de Carod-Rovira y Montilla o titular "Los animales triunfaron".

Quiero rematar con ixa buena sensación que me dixó a noticia. Con ixa frase d'Artur Mas que comparto de tot, quan deciba que el creyeba que heba deixau una Catalunya millor a la suya catrinalla. Prou que sí, Artur. Y como tamién ye costumbre en iste blog, con bell video mosical de cantas antitaurinas. Un tema que terne que terne tractan as millors y más reivindicativas collas de rock y de mosica de toda mena. Salut y Visca Catalunya! (a tamás d'os correbous). Un trango más entaban, garra trango entazaga.

S.A. Motxalo!

Comando Cucaracha. Medias rosas

Reincidentes. Grana y oro.

Una de vascas

Ahiere, viyendo con Arale o mitico video d'o capitol de McGyver y os vascos, prencipié a blincar mirando más videos de vascos. O de McGyver lo conoixeba fa tiempos, pero be-te-me que d'ixa mena, bi'n ha más en a factoría de Hollywood. Trobé un video, que pencho abaixo, de ETB2 charrando sobre atras vegadas que han apareixiu vascas en series y cintas d'os nuestros quiestos USA. Prou que tamién i sale McGyver.

Tamién pencho un video de Pirritx eta Porrotx, con a canta Maite zaitut que tantas y tantas vegadas habremos cantau capinas como canastos.

Os vascos seguntes Hollywood

Pirritx eta Porrotx. Maite zaitut.

microbarraneaus: Maldita

Pues sí... A yo me molesta, y muito, que suene o Bendita y alabada, que se ascuita perfectament dende casa mía, mientres soi escribindo ta iste blog.... Y no, no tiengo twitter. Por ixo invente la fatera ista de microbarrenaus.

Sentimientos nacionals

O debat sobre a identidat personal de cadaguna creigo que ye un d'os más intresants en iste prencipio de sieglo y milenio. En dentro d'ixa identidat bi ha muitas vesants y prou que una d'ellas, y muito important, ye a nacionalidat. Leyié fa bells meses un libro de Patricia Gabancho, El preu de ser catalans, a on que, entre atras cosas, feba una critica de parti d'a cultura feita en Catalunya decindo que yera cultura espanyola feita en Catalunya y no pas cultura catalana. Tenendo parti de razón, creigo que o suyo libro establia unas cletas masiau inamovibles. A producción cultural catalana ye chupida y esnavesada por culturas de muitos diferents orichens. Dende l'andaluza dica la cubana pasando por a occitana, l'aragonesa y que me se yo quantas más. Si en o mundo de hue ixo ye bien normal, en Catalunya que ye un país t'a on que son migradas personas de tantos diferents orichens y que, si fa u no fa, han teniu un buen proceso d'integración, ye mesmo más acusau. Creigo que a cultura que se fa en qualsiquier pais ubierto puede emplir-se d'elementos propios u tradicionals y adibir-ie elementos foranos sin perder ixa identidat nacional. Creigo que pende más en as intencions y sensibilidatz d'as creyadoras que no pas d'as características d'a cultura producida. Patricia no admitiba ixa compatibilidat y la meteba como un d'os grans periglos t'a supervivencia d'a cultura catalana.

D'atra man, y charrando, como no, d'a selección espanyola de fubol, Lolita Bosch escribiba un articlo en Publico, sobre o curioso fenomeno d'o cabo de semana en Barcelona. O sabado se fació una manifestación en esfensa de l'estatuto que implió as carreras d'a Ciudat Condat y o domingo ixas mesmas carreras diz que se plenaban d'as que celebraban o trunfo d'ixe equipe espanyol que tanto se parix a lo Barça. Muito PSOEista ella, deciba que ixa yera de verdat a representación d'a sociedat catalana, con un dople sentimiento catalán y espanyol, pero reivindicadera d'os dreitos suyos.

As dos tienen, en a mia opinión bella parti de razón. Ixe dople sentimiento nacional existe y ye muito más espardiu, en teyoría, que no pareix. O caso catalán ye menos dificil que l'aragonés, pues a más gran parti d'as catalanas son d'alcuerdo con definir Catalunya como nación. Manimenos Aragón ye más embolicau. Quan, en as encuestas sale ixe gran porcentache de "me siento aragonés y espanyol", bi ha tantas dubdas que me surten de camín... ¿Toda ixa chent se siente nacional d'Aragón? ¿Aragonés y espanyol a lo mesmo ran? ¿Aragonés como parti intrestallable d'Espanya? ¿Aragonés como anticatalán? Mesmo i puede cullir chent, como en conoixco muitas, que se siente más que más aragonesa, pero no l'importa masiau a pertenencia administrativa a l'Estau espanyol. Tot sin tener un sentimiento espanyol ni espanyolista.

O pior de tot isto ye a manipoliación espanyolista que fan de camín, como hemos puesto viyer istos diyas. En que se celebra o titol d'a selección espanyola todas as que i van son espanyolas y bien espanyolas. Manimenos, en a manifestación catalana, os meyos "moderaus" (no sé que dición en Intereconomía y cía) pretón a decir a escape que todas ixas no yeran independentistas (y prou que no'n yeran, sisquiá!).

O sentimiento nacional de cadaguna, ye de cadaguna. Puede estar muito esclatero y zarrau a influyencias de difuera, como en o caso d'as nacionalistas más zerrinas u quasi nian existir, como en o caso d'as ciudadanas d'o mundo. As de verdat, no las que lo dicen ta molar y dimpués son más espanyolas que ta qué. Y en meyo ye muitisma chent con un sentimiento nacional cruzau por as suyas experiencias vitals, por a conoixencia d'a cultura que tienga arredol, por os movimientos politicos y mesmo por modas. Un sentimiento nacional que no gosa d'estar absoluto ni en conteniu ni temporalment.

¿Quantas migrants tienen una nacionalidat "difusa"? ¿Quantas aragoneses que marchoron ta Catalunya tienen fillas meyocatalanas meyoaragonesas en bell grau? ¿Quantas latinoamericanas u africanas de orichen viyemos cada diya con a chambreta d'a selección espanyola sentindo-se de tot identificaus con Espanya? ¿Quantas han aprendiu catalán y se sienten bien identificadas con Catalunya? De seguras que en a zaguera manifestación bi'n habió buena cosa d'ellas... Mesmo en os movimientos independentistas de tot l'Estau, y cuento que de toda Europa, tenemos arrienda chent que no ye naixida d'ixe país u que remera os suyos orichens familiars con bien d'argüello y fan parti d'a suya nacionalidat u sentimiento nacional, como le queramos decir. O sentimiento nacional ye muito más embolicau que no nos quieren fer creyer y requerirá un analís y unas solucions más esmaixinativas d'as que se son prenendo o debatindo agora mesmo.

Mosica y manifas

Istas semanas he charrau un par de vegadas de manifestacions. Ixas cosas que femos, más que más os royos (y a Conferencia Episcopal en zagueras), ta poder expresar-nos politicament, no podendo fer-lo d'atra traza por un regular. Manifestacions que, a soben no sirven que ta achuntar-nos y charrutiar pero que, en bellas ocasions tienen fruitos. Y sobre tot, nos permite dormir todas as nueitz sentindo-nos coderents y sabendo que no nos hemos callau. Que no será por nusatras por las que os poders fan os zancochos que fan.

Pero no ye iste un post ta reflexionar sobre as manifestacions, o sentiu suyo y a suya utilidat. Nomás remeré bells videos sobre istas y he pensau de penchar-los aqui. O primer ye un impresionant video de Die Toten Hosen, colla alemana de punk, a on que salen sobrebuenas imachens de manifestacions y represión por tot lo mundo. O segundo, Sangre en la manifestación, d'os teruelanos Azero, que charra sobre l'asesinato de Carlo Giuliani, asesinau por un policia mientres una manifestación en chulio de 2001 en Génova, Estau d'Italia. As imachens son, más que más, d'ixa manifestación. Tamién i sale, dimpués d'o video una chicota seqüencia d'una manifestación que creigo que estió en Barcelona y que contrimuestra os criterios policials a l'hora de foter trucazos. O tercer no ye guaire bueno. Ye a canta Solo un día, d'os asturianos Fe de Ratas. A canta sí que me fa goi y charra sobre l'ataque t'o WTC aquel 11 de septiembre. As imachens son d'as manifestacions en contra d'a guerra d'Iraq que venió dimpués y contrimuestran tamién o buenrollismo que bi habió en quasi todas ixas manis. Que digo yo que podesen haber meso imachens muito más furas. Como as cargas que bi habió en Zaragoza, por meter nomás un eixemplo. Con tot y con ixo amuestra unatra reyalidat. La d'as manifiestacions friendlys que, porque no, tamién fan o suyo papel. No tot ha d'estar correr debant d'a policia... Que tos faigan buen prebo as cantas y os videos.

Pushed again. Die Toten Hosen

Sangre en la manifestación. Azero

Solo un día. Fe de ratas

Ampraus 046

Sciencia: Ixa repolida parola que agora nos cal escribir con ixa rariza "s" inicial, nos da goyosas noticias de cabo ta quan. En Xaraba, lugar t'a on que soi vinclau por qüestions familiars, i han trobau unas importants pinturas rupestres. De bellas 7000 anyadas d'antigas, diz que son. Fa 7000 anyadas bell personache surtiu d'as novelas de Lorenzo Mediano le dio por fer ixos graffiti en bell puesto amagau d'a ribera d'o Mesa. Hue encara podemos viyer-las. ¡Que'n sería d'argüellosa si lo podese saber! Un poquet más luen (u no tanto, pendendo de do viva a lectora), en Burgos, han ubierto un nuevo museu adedicau a la evolución d'a humanidat. En istos intes historicos, quan mesmo ixo ye qüestionau por as relichions, isto ye un chiquet rayo de luz. Un museu que me fería a saber de goi de visitar. Aspero fer-lo antis con antis.

D'o mundial no he charrau en iste blog. Ni lo feré. No quiero ni adedicar meya neurona a ixo, pues me carranya muito tot lo que ha pasau en istos diyas a tantos rans, que qualsiquier cosa que escribise u ya la habrían dito antis u sería fruito d'a rencor u d'o desespero. Con tot y con ixo, sí que tos meto bells vinclos a atros blogs que sí que han analizau o fenomeno. Muito millor que lo que hese puesto escribir yo mesmo. Desde Banarus, prou que en ha charrau, d'ixas trazas tan analiticas y con ixa uellada tan freda (en o buen sentiu d'a parola) que tien. Aragonando, con ixe estilo un poquet d'asunción d'a redota. Chulia Barrau escribiba tamién, bells diyas antis d'a final, a suya anvista sobre o mundial en un sobrebueno articlo publicau en o blog de Fendo Orella.

Manifestacions que han pasau sin pena ni gloria por os informativos, "aragoneses" u espanyols, mientres o mundial. La primer, contra a mina de Borobia. Doble en a convocatoria, pues i estión de maitins y de tardis. A luita contina por ixas redoladas. A la fin asperemos que se faiga chusticia. De la buena, ye de dar. L'atra, con muita más chent, en Barcelona, contra a decisión d'o Tribunal Constitucional yo-me-lo-guiso-yo-me-lo-mincho. Un flumen de chent, de senyeras y estreladas en contra d'o espanyolismo más rancio. En contra d'o canso anticatalanismo por tot l'arreu d'a "pelleta de toro". En Público, en Trinchera Digital, publicaban un articlo sobre ixa decisión y sobre nacions y estaus. Prou intresant que en diyarios espanyols i salgan articlos como iste. China chana, mesmo bi ha espanyols que entienden (encara que dimpués puedan no compartir) seguntes qué cosas.

Contar manifestants

A humanidat ha estau capable de avances impresionants en todas as dembas d'a sciencia. Conoixemos o funcionamiento, si fa u no fa, d'os atomos y d'as subparticlas que los fan. Sabemos como se naixen, creixen y mueren as estrelas y galaxias. Mesmo tenemos bellas ideyas sobre l'orichen de l'universo y o suyo futuro. Tecnolochicament hemos pasau en bellas pocas anyadas de dominar o fuego a viachar por l'espacio u clonar sers vivos. Y, dimpués de tot isto, ¡somos de tot incapables de contar quantas personas han iu ta una manifestación!

En l'articlo que publicó Público sobre a manifestación en contra d'a decisión d'o Tribunal Constitucional de retallar o estatuto de autonomía de Catalunya, charraban sobre iste afer. Por una vegada, meteban cómo heban conseguiu o dato de manifestants. Cómo feban ixe calculo. No voi a criticar o metodo pues no tiengo datos ta saber si ye bueno u no pas. Pero a lo menos meten cómo se calculó.

Pareix que todas tiengamos asumiu que se mentirá en as zifras d'as manifestacions (y de muitas atras cosas). Alavez ya sabemos o qué significa que ta una manifestación bi haigan iu "400.000 personas seguntes a organización". Qui vivimos en Zaragoza sabemos quanto ocupan ixas "400.000 personas seguntes a organización". Nunca no sabré si reyalment son 400.000 u 400 pues no voi a contar-las, pero sé lo que significa. Con tot y con ixo, me fería goi de saber quanta chent va reyalment t'as manifestacions. En un mundo pseudo ideyal todas feríanos tabula rasa y fixaríanos un criterio ta contabilizar a la chent que va t'as manifestacions (u t'as expos, u fa vadas...) y lo feríanos servir siempre. (En un mundo ideyal cuento que no caldría manifestacions). Manimenos nos estimamos más de auto enganyar-nos y d'enganyar a la resta de chent decindo que as nuestras convocatorias rebuten de chent y as d'a resta son vuedas de tot. Dengún no crei as zifras. Ni as oficials, ni as d'a policia ni denguna. ¡Quiento curiosas (de vez que absurdas) somos as humanas!

Ya en o caso d'a debandita manifestación no sé si bi habió numericament 50.000, 500.000 u más de un millón de personas. Rai. As fotos dende l'aire y l'ambient que diz que bi habió en Barcelona son prous datos ta poder decir que estió tot un exito. No cal garra zifra. Nomás calen os uellos ta viyer a movilización que bi habió. Y ixo que o estatuto no l'intresaba a dengún....

Hombres polius

Como ya he comentau bella vegada, ye a saber-lo de inquesto ta yo, ixa morfuga de masclos-masclos que se fa en muitos puestos. Ixa virilidat imposada, plena de topicos, que totz hemos de soportar más a ormino que no queresenos. Más que más en os treballos a on que bi ha mayoritariament u nomás que hombres.

Un d'os rasgos d'ixa definición social d'os hombres-hombres ye una suposada incapacidat total ta saber si bell atro hombre ye u no pas poliu. ¿Quantas vegadas habremos sentiu una charrada d'a siguient mena: "Muller: Chuan ye poliu, no creyes? Hombre: A yo no me preguntes, que soi un hombre."?O primer personache lo he feito muller, porque un hombre-hombre ¡nian se le pasaría por a esmaixinación de preguntar ixas cosas!

Cuento que, independientement d'o grau d'heterosexualidat d'un, u d'o identificau que se sienta con o suyo chenero, totz os hombres sabemos que George Clooney ye más poliu que no o Risitas. (Prou que tot isto estando a polideza una qualidat subchetiva. De seguras que bi habrá chent que o Risitas le parixca un anchel cayito d'o ciel, pero estadisticament, un 99,99% pensaremos que George Clooney le gana por bell poquet a lo menos.) Asumindo que totz podemos fer ixa diferenciación, podemos amugar un poquet más l'espacio entre as dos personas a contimparar. Y asinas china chana, femos a o masclo-masclo-hombre-hombre razonar, dica que plegue en reconoixer que, si tien un cerebro y unos sentius fisicos si fa u no fa "normals", puede decir si un hombre ye poliu u no pas, u a lo menos, si ye más poliu u no pas que no atro. ¡Y tot conservando a suya heterosexualidat!

Atra cosa ye que, en ixe analís d'os atributos d'atros hombres, coincidamos más a soben u no, con os criterios d'a más gran parti d'as mullers, pos hemos recibiu diferents educacions tamién en ixo.

A liberación de l'hombre (hombre como chenero) tamién pasa por esfer-se d'ixa esclavitut de trazas d'actuar, d'aluenyar-nos d'ixa imachen de grata-uegos minchadors de futbol y tocín y poder estar como queramos estar cadagún y respectar-nos totz.

Dixar de fumar

Prencipié a fumar con catorce anyadas. Dende alavez lo he dixau un par de vegadas mientres bell poco más d'una anyada. Fa poco he tornau a fumar de traza un poquet intermitent y quasi todas las semanas foi una prebatina de dixar-lo. Ye un mal vicio isto d'o tabaco. Ye de facil prener y dificil dixar. En escribindo isto levo 23 horas sin fumar. Ya viyeremos en que remata ista vegada...

O caso ye que quasi todas as campanyas anti-tabaco se centran en a salut de cadagún ta prebar de empachar que as chovens prencipiemos a fumar u que lo dixemos. No sé a la resta de chovens pero a yo m'importaba prou poco a mía salut quan teneba 14, 18 u 23 anyadas. Agora en tiengo bellas pocas más (hehehe)y contina importando-me prou poco. De feito a salut nunca no ye estau un d'os motivos que me fació dixar de fumar. Manimenos creigo que bi ha motivos que sí que nos han importau a muitas chovens y que pocas vegadas se fan servir. O primer ye l'economico. Mesmo quan costaba menos diners (yo mercaba paquetz de Celtas a 95 ptas) ye un vicio bien caro. Con tres euros que cuesta un paquet, si fa u no fa, podemos, si fumamos un paquet a o diya, mercarnos en una semana un par de libros en edición de pocha, quatro pozals de biera, cinco sobres de Magic, u foter-nos una buena cena con una amiga u con a nuestra parella en un bar o cabo de semana. Nomás con ixo ya sería un buen motivo ta dixar-lo.

L'atro ye a sensación de libertat. Siempre voi luitando por a libertat de poder fer tantas y tantas cosas que no son permitidas legal u socialment. Por a emancipación d'as humanas. Pero dimpués, be-te-me que, en buena mida, dependo d'una sustancia, la nicotina, que no m'alporta garra cosa t'a vida mía. Nomás dependencia d'ella. A resta de drogas que consumo sí que tienen efectos que deseyo (y atros que no pas, como o reseco). Manimenos o tabaco nomás tien l'efecto de sacar-me as ganas de fumar. Asinas que ixe ye o mio motivo ta dixar de fumar; a mía independencia como persona. A mía libertat de no depender de una sustancia que no me cal ta cosa. A mía libertat de no amenistar dar-les diners a las tabacaleras, interpresas que, como todas as grans no conoixen o significau d'a parola etica.

Con tot y con ixo, dimpués de más de quince anyadas fumando, dixando y tornando, a carne mía ye feble y no sé quanto aguantaré, que todas somos humanas... De todas trazas cada diya ye una nueva victoria, y con lo que cabide, me pillaré bell libro a semana venient, ta celebrar-lo.

En leyendo... Por qué no soy cristiano

Amprau de Por qué no soy cristiano. Bertrand Russel. Biblioteca de pensamiento crítico. Público y Edhasa 2010. Traducción t'o castellano de Josefina Martínez Alinani.

Fuentes de intolerancia:
La intolerancia que se extendió por el mundo con el advenimiento del cristianismo es uno de sus aspectos más curiosos, debido, a mi entender, a la creencia judía en la virtud y en la exclusiva realidad del Dios judío. No sé la razón por la cual los judíos adquirieron esas peculiaridades. Parecen haberse desarrollado durante el cautiverio, como una reacción contra la tentativa de absorción por pueblos extraños. Sea como fuere, los judíos, especialmente los profetas, hicieron hincapié en la virtud personal, y en que era malo tolerar cualquier religión, excepto una. Estas dos ideas han tenido un efecto extraordinariamente desastroso sobre la historia occidental. La Iglesia ha destacado la persecución de los cristianos por el Estado romano antes de Constantino. Sin embargo, esta persecución fue ligera, intermitente y enteramente política. En toda época, desde la de Constantino, hasta finales del siglo XVII fueron mucho más perseguidos por otros cristianos de lo que lo fueron por emperadores romanos. Antes del cristianismo, esta actitud de persecución era desconocida en el viejo mundo, excepto entre los judíos. Si se lee, por ejemplo, a Heródoto, se halla un relato tolerante de las costumbres de las naciones extranjeras que visitó. A veces, es cierto, lo escandalizaba una costumbre particularmente bárbara, pero en general es hospitalario con los dioses y la costumbres extrañas. No arde en deseos de probar que la gente que llama a Zeus por otro nombre sufrirá perdición eterna y debe dársele muerte a fin de que su castigo comience lo antes posible. Esta actitud se la han reservado los critianos. Es cierto que el cristiano moderno es menos tajante, pero no se debe al cristianismo; se debe a las generaciones de librepensadores que, desde el Renacimiento hasta el día de hoy, han conseguido avergonzar a los cristianos de muchas de sus creencias tradicionales. Es divertido oír al moderno cristiano comentar lo moderado y racionalista que es realmente el cristianismo, mientras ignora que el hecho de que toda su moderación y racionalismo se debe a las enseñanzas de los hombres que en su tiempo fueron perseguidos por lo cristianos ortodoxos. Hoy nadie cree que el mundo fue creado en el año 4004 a.C. (1), pero no hace mucho el escepticismo con respecto a ese punto se consideraba un crimen abominable. Mi tatarabuelo, depués de observar la profundidad de la lava de las laderas del Etna, llegó a la conclusión de que el mundo tenía que ser más viejo de lo que suponían los ortodoxos, y publicó su opinión en un libro. Por este crimen fue conjurado y condenado al ostracismo. Si se hubiera tratado de un hombre de posición más humilde, el castigo habría sido indudablemente peor. No es ningún mérito de los ortodoxos que no crean ahora en los absurdos en que se creía hace 150 años. La mutilación gradual de la doctrina cristiana ha sido realizada a pesar de su tremenda resistencia, y sólo como resultado de los ataques de los librepensadores.

_

(1) Una chiqueta noteta mía. Deciba Bertrand Russell quan escribió isto, en 1930, que dengún no creyeba que o mundo s'hese creyau en o 4004 a.C. Cuento que yera entibocau y que sí que bi'n heba de chent, y muita, que lo creyeba. A lo menos agora, 80 anyadas dimpués bi'n ha. No sé si o numer de chent que crei ixo ye creixendo u no pas, pero a lo menos ye ganando prestichio y, como sabretz, en bells puestos d'os USA, s'amuestra en as clases o creacionismo como alternativa valida ta explicar o mundo, con l'eufemismo de "disenyo intelichent". Seguntes diz Richard Dawkins en un d'os zaguers libros suyos, o 40 % d'a población de USA no crei en a evolución y crei que o mundo estió creyau en os zaguers 10,000 anyos. Asinas que Bertrand Russell estió masiau optimista. Bien se val que o pobrichón ye muerto y no puede viyer como o fanatismo relichioso torna a ganar espacios en l'unico puesto a on que los heba cacegaus, en o mundo cientifico.

Ampraus 045

Antis de marchar t'o PIR me veigo quasi obligau a dar bellas noticietas y convocatorias que aspero tos faigan goi.

Atenco: O pasau 30 de chunio estión declaraus inocents os 12 presos por os sucesos de Atenco que levaban en a garchola dende 2006. Ista noticia estió recibida por os colectivos zapatistas de tot lo mundo con muito enfuelgo pos ye a reconoixedura no ya d'a suya inocencia sino tamién de todas as irregularidatz d'os primers chuicios. A noticia ye penchada en Europa Zapatista. A la fin una victoria dimpués de tantas y tantas rebaixadas que os movimientos por a dignidat en Mexico.

L'aragonés contina vivo y os movimientos socials que lo esfienden no reblan. Mientres iste verano podetz aprender-lo, por eixemplo, en a escuela d'aragonés Nogara, que fa cursos intensivos de verano. Son tres horas cada diya mientres tot lo mes de chulio (y talment bell diya d'agosto). D'atra man, l'academia de l'aragonés a la fin ha publicau o listau d'esmiendas y a proposa ortografica final en a suya web. Podetz visitar-la punchando aqui, ta ir conoixendo-la y aplicando-la.

S'amana lo festival Esfendemos a tierra que será en Artieda lo venient 18 de chulio. ¿Cómo? ¿Que no tiens auto ta puyar-ie? No te'n faigas, moceta! A saputa organización ha meso un autobús que esnavesará o país, dende Calatayub dica Artieda, pasando por Zaragoza, Uesca y Chaca (creigo). Tos i podetz apuntar en a web u en A Flama, si vivitz en Zaragoza.

Fotos. Ya tos dicié que tos fería a tana con as fotos d'as vacanzas mías. Arale y yo estiemos bells diyas por a Vall de Benás y prou que bi faciemos arrienda fotos. Podetz viyer-ne cinco d'ellas en Flickr de Barrenaus y a d'a marmoteta aqui mesmo....