Parola de diaplerona. Nuevas aventuras de folletz y diaplerons

Parola de diaplerona, lo mío nuevo libro, se presentó iste miercres 29 en lo bar Pottoka d’a Madalena (Zaragoza). Decidié de fer-lo astí en estar un d’ixos puestos que se siente como casa, tanto por la suya ama y cambrera como por la parroquia de buena chent que se i chunta. Entre amigas, companyeras y amants d’os libros y l’aragonés, pasemos una tarde bien pincha y con firmes capazos. Astí podié recontar lo que i hai dezaga d'ista nueva publicación.

Lo libro ye publicau con Círculo Rojo y l’Asociación Cultural Nogara. Cherardo Callejón, un d’os suyos socios y mayestros me presentó repasando la mía fayena por l’aragonés y, como de cutio, con muito carinyo. Que l’asociación torne a confiar en yo vinclando lo suyo prestichio y imachen a la mía persona, ye tot un argüello. En un momento de crisi de l’asociacionismo como lo que somos vivindo dende fa lustros, Nogara amuestra una gran capacidat de supervivencia y de vitalidat que pocas organizacions pueden fer-se-ne la bamba. Ye, antimás, casa segura pa muitas de nusatras, un puesto a on que sabemos que siempre bi habrá belún pa aduyar-nos a tirar entabant con las nuestras iniciativas.

Deciba Rodrigo Cortés que l’estau natural d’una peli ye no existir. Ye aplicable tamién a los libros. Y Parola de diaplerona ha estau por muitos anyos en ixe estau.

A pesar d’estar lo mío quarto libro, lo tercer en aragonés, s’empecipió a escribir antes d’a publicación d’o primer. La historia iba a estar un d’os relatos d’aquell Parola de follet publicau en 2019. Manimenos, como en tantas atras ocacions, lo filo se fue embolicando y acabó feito un rebullo de doscientas pachinas. Los alazetz yeran mesos en 2019, pero no estió dica abril de 2020 que rematé de fer lo primer borrador. Una tarde a las 20:00. Lo remero perfectament porque a ixa hora empecipiaba l’aplauso a las sanitarias que febanos en aquellas envueltas totz los días en estar encadaus por la pasa. Por tot lo que significó tot ixo, he quiesto adedicar lo libro, lo primer que leva colofón, a toda la chent que nos cudió en la pandemia, a qui nunca no habríanos d’ixuplidar.

Los quasi tres anyos dende ixe primer borrador dica tener-lo en las mans, han estau ocupaus por la publicación de Penchada d’un filo y Hechos de tinta y, sobre tot, por un ciento de revisions dica deixar-lo como quereba, porgando-lo de partes de no me convenceban y afinando-ne atras.

Parola de diaplerona ixampla l’universo de Parola de follet. Tornamos a ixe mundo a on que, chunto a la humanidat, conviven fadas, diaplerons y folletz, cada ún con las suyas estrucias, machias, culturas y organización social. A diferencia d’o primer, iste no ye un libro de relatos si no una novela dividida, ixo sí, en dos partes. En la primer, una diaplerona y la suya escuela se concaran con un gubierno tiranico que quier espaldar-la. En la segunda, se une a un follet que acaba de descubrir un mensache misterioso en una boira y que totz dos han de descifrar. L’aventura d’istos dos personaches nos leva dende Baixo-La-Uerva, casa d’os diaplerons dica Chuslivol, pasando por lo Parque Bruil u lo Gancho, entre atros puestos.

En lo tiempo que levo publicando m’ha clamau muito l’atención la necesidat que i hai de calar los libros adintro d’un chenero. Saber en qué etiqueta heba de ficar lo que leyeba u escribiba nunca no ha estau cosa que me sacase lo suenio. Manimenos, como soi conscient de que no totz veyen, ni han de veyer, lo mundo como yo lo veigo, i pienso muito mas y miro de saber responder quan me preguntan de qué chenero ye tal u qual libro ya que pareixe estar important pa muitas. Fer-lo, manimenos, provoca que cambie a sobén la uellada sobre lo libro. I hai cheneros de primera y de segunda. Nomás cal veyer los escaparates d’as librerías comercials pa alufrar toda la patacada de novela historica u novela negra que los imple, deixando puesto a la sci-fi u fantasía, entre atros, nomás quan i hai adaptación existosa en tv u cine. No tiengo garra dubda sobre que Parola de diaplerona encaixe adintro d’a novela de fantasía u d’aventuras, totz dos cheneros “de segunda”. Pero i hai unatro chenero, tamién de segunda, a on que podría encaixar tot y no estar escrita a esprés pa ixo: la novela chovenil. Creigo que, d’adolescent, m’hese feito goyo una historia asinas. Y sobre tot, creigo que no i hai practicament literatura enfilada ta ixas edatz escrita en aragonés.Talment Parola de diaplerona no siga la mas adequada - no la escribié pensando-ie - pero me faría goyo que animase a atras escritoras a mirar d’emplir ixe forau que tien la nuestra literatura en aragonés.

Lo libro se podrá mercar en Nogara, en la siede de Plaza Asso u en la mesa de materials d’as Chornadas d’as luengas. Tamién en lo Día d’o libro, que se fará en lo Paseu Independencia iste 23 d’abril. Estatz-tos a la tisva d’os retes pa saber los horarios. Y si no puetz, u prefieres que te lo ninvie ta casa, escribe-me y charramos. Si te lo quiers leyer de baldes, en deixaré un exiemplar en la biblioteca de Nogara y, antes d’o verano, en la Biblioteca d’Aragón de Dr. Cerrada, a on que ya te puetz leyer Parola de follet y Penchada d’un filo.

La historia queda ubierta, muit ubierta, pa una continación. Tiengo mas istorias, borradors y mesmo bell relato escrito pa seguir emplindo l’universo d’os folletz. Ye bien probable que bell día bi haiga una tercer publicación. Pero no pas luego. Zarro una etapa de quatre anyos y quatre libros que han iu surtindo d’una manera un poquet caotica, y apreciso treballar de maneras diferents y peteniar atros camins. I hai nuevos libros en construcción y prochectos arrienda que luitan por fer-se con un troz d’o mio tiempo, pero no sé quan, cómo ni qué será lo siguient a veyer la luz. Tanimientres, seguiremos dando ferrete con los blogs y la radio y tot lo que se me vaiga ocurrindo. Aspero que lo leigatz y lo compartatz, que tos faiga muitismo goyo y que me recontetz qué tos ha pareixiu.

O zaguer chilo VI. Tierra de barrenaus 9x14

Ya tenemos unatra edición de O zaguer chilo, lo disco que edita totz los anyos l'Asociación Cultural Nogara y que replega vinte cancions de vinte bandas d'o país gravadas en aragonés. Se publica dimpués d'a polemica de l'anyo pasau quan los representants institucionals d'o faixismo censuroron lo disco por la suya portalada, una obra d'arte de Eva Cortés que acabó ganando lo premio d'a mosica aragonesa a millor disenyo.

O zaguer chilo sigue entabant gracias a tot lo treballo d'as mosicas que han quiesto participar-ie y fer asinas que l'aragonés ixample las suyas mugas arribando a muitas mas orellas. Y tamién gracias a toda la chent que l'ha feito posible. Entre ells, lo suyo coordinador, Cherardo Callejón, qui ye veniu t'o programa a explicar qué ye O zaguer chilo y que mosicas imos a trobar en ista nueva edición.

Lo disco ye un buenismo eixemplo d'a diversidat aragonesa. I hai diversidat mosical, con estilos que van d'o reggae t'o punk, pasando por lo folk, pop, hardcore u mosicas de mal clasificar. N'i hai tamién de cheneracional, chuntando collas chovens que tasament teneban nombre antes de gravar con atras con trachectorias tant largas como Ixo Rai! u Petisme. Y n'i hai d'orichens, con bandas de tot lo nuestro territorio. 

O zaguer chilo leva ya 120 aportacions a lo repertorio de cancions en aragonés. Un sobrebuen treballo que ha conseguiu embrecar en la desfensa d'o nuestro patrimonio lingüistico a cientos de personas. Y que, pa forro de bota, suena de pistón. Asinas que, si quiers conoixer lo conteniu d'ista nueva edición, no te pierdas lo programa.

Recuerda que puetz ascuitar totz los programas en Ivoox, Spotify y la web de Radio Topo.

Programa #143

Dica luego, Manel

Malfio d’os anuncios que fan los grupos quan “se prenen un descanso”. Siempre me pienso que no los tornaré a veyer sobre un scenario, que trobarán bell nuevo rumbo y deixarán morir la banda. Prou miedo teneba ya con Smoking Souls, a qui he de veyer iste anyo a tot trance, no siga que tienga razón, y van los Manel y dicen tamién que aturan un tiempo.

Plegué a Manel a traviés d’un amigo que nos los metió en l’auto en una visita a la parte de Vic, pa una castanyada. A l’inte me quedé enarcau con la mosica que feban. Yera un d’os suyos dos primers discos, no m’alcuerdo qual. Con Els millors professor europeus y 10 milles per veure una bona armadura Manel revolucionó la mosica en catalán, conseguindo estar un d’os pocos discos en catalán que se colocó en lo numero 1 de ventas en l’Estau. L’anterior heba estau Serrat ¡en 1996!. Lo suyo exito fació que surtise como fongos atras bandas que feban mosica pareixida.

D’aquellas envueltas ye Aniversari una d’as cancions mas evocaderas que haiga sentiu nunca. Tamién la versión d’o clasico de Pulp, Common people, que lo video lo graboron en lo mercau de Sant Antoni u atro orichinal video por las carreras de Barcelona que meteba imachens a En la que Bernat se’t troba. Tot petando-lo, en 2010 facioron un directo emplindo lo Palau de la música que retransmitió Canal 33.

Y alavez, quan se podeban haber estau vivindo d’as rentas pa lo que quedaba de vida, facioron un chiro mosical que dengún no asperaba. En 2013, con la canción Teresa Rampell presentaban lo disco Atletes baixin de l’escenari que suposaba un cambio de soniu prou fundo. Las fans febanos uellos. Como en toda decisión arrisgada, bi habió a saber qué hate y atras que aplaudiemos la sorpresa. Tardé a fer-me-ie, pero lo nuevo disco sonaba de pistón. Pareixeba un grupo diferent de tot, pero de vez, conservaba lo calitre d’os quatro mosicazos que forman la banda. Ixa apuesta, ixa falta de miedo a innovar, a cambiar, a mutar, la han conservada dica lo zaguer momento y, si nunca tornan, soi seguro de que nos tornarán a percutir-nos.

Si los discos sonaban bien, en directo no feban burro falso. En la primer vegada que podié veyer-los en Zaragoza, tasament yeranos meya centena de personas en lo Centro Civico Almozara. Habioron de fer lo concierto en ixe puesto dimpués de que lo vecindau fese zarrar la sala King Kong a on que yera previsto en primeras. La siguient vegada que los podié vier Zaragoza tampoco no estioron en una d’as localizacions clasicas. Pa Pilars de 2017 compartioron cartel con Bigott en un concierto de baldes en Los Chardins de Tosos. Pareixería que mesmo pa trigar scenario han d’estar orichinals. Lo zaguer d’os conciertos suyos que vide en Zaragoza ya estió en un puesto mas cutiano: la Oasis. En ista ocasión sí que yera ya con una sala plena de chent y un sold out sobre lo cartel. Aquí una cronica d'ixe concierto.

Manel ye una colla d’ixas que aguardo en candeletas las suyas novedatz porque sé que, tiren por a on que tiren, regular que fan qualcosa intresant. Sisquiá la pausa que diz que fan agora dure lo chusto pa que recarguen baterías u se descansen lo que aprecisen y tornen antes con antes a fer-nos disfrutar con las suyas cancions.

De presentación en Andorra

Tot y que soi feito ya a charrar en publico y a presentar los míos prochectos por totz los cabos, yera niervudo de tot. Quan bella cosa t’importa ye imposible no fer-te-ne. Y presentar dos libros tant querius pa yo como Penchada d’un filo y Hechos de tinta, en un lugar tant important como Andorra me zocegaba firme. Lo puesto, lo salón d’actos d’a biblioteca, yera muito mas gran que no m’hese pensau, y amás, d’ixos que van en costera, que pareixe que sigas fendo una clase machistral universitaria. Soi feito a mas horizontalidat y informalidat.

Manimenos, como l’andorralla ye amor, a escape pasé a estar-me bien comodo. Aduyaban las amigas, prou que sí. Por alto se veyeba entrar a l’alumnau d’aragonés d’o lugar. La tele tamién fació acto de presencia con una chiqueta entrevista a on que diz que facié buena estrolicadera. Ye lo periglo que tien acercar-me un micro.

I presenté Hechos de tinta y Penchada d’un filo, las mías dos primeras novelas en castellano y aragonés respectivament. Aproveité la oportunidat pa charrutiar bell poquet d’os dos blogs, iste Tierra de barrenaus y lo suyo chirmanet, encara borche, Entre cortesía y colofón. 

Las preguntas y lo debat, que a la fin ye lo millor d’ista mena d’eventos, chiroron prou arredol de l’aragonés. Charremos d’as diferencias d’escribir en una u atra luenga y, sobre tot, d’a situación arredol de l’aragonés. Bi habió mesmo bell momento pa fer una poqueta de terapia colectiva. En lo sur i hai firme intrés por la luenga y, como pa tantas atras cosas, pocos medios. Comentemos todas las clases d’aragonés que no se consiguen dar por falta de profesorau, ya que en a-saber-los lugars sí que i hai requesta de cursos, pero no qui los faiga. Toda una peneta en una luenga que ye en las tres pedretas y a on que los pocos recursos que i hai talment s’habrían d’adedicar prioritariament a qüestions como ista y no pas a atras de tant buen bambuquiar como de radida efectividat a la hora de conservar la luenga. 

Dimpués, en la firma, capacicos con la chent. Floretas de qui heba leyiu lo libro, que siempre ye d’agradeixer y, sobre tot, muitas ganas de leyer en aragonés. En la biblioteca deixé un eixemplar de Penchada d’un filo pa qui quiera amprar-lo. Y en Librería Papelería Macu se puet encargar qualsequier d’as mías publicacions. 

Una tarde rebonica rodiau de muitas personas con qui compartié inquietutz lingüisticas y literarias que me deixó con ganas arrienda de seguir levando los míos libros ta totz los lugars que m’acullan.

Podetz leyer aquí la noticia en Arainfo y El Diario de Teruel y veyer en iste video, a partir d'o minuto 11:30 la noticia en la Televisión local d'Andorra.

 

 

Transiberiano reedita En l'atro canto d'a buega, de Rubén Ramos

Quan bella persona que ye aprendendo aragonés me pregunta por libros pa leyer le’n recomiendo bella decena entre los que siempre n’i hai dos, d’o mesmo autor: Vidas crebazadas y En l’atro canto d’a buega de Rubén Ramos Antón. Totz dos son de buen leyer, tractan temas intresants y tienen un modelo de variedat estandar bien pincho y de lexico amplo. Con todas dos obras, Rubén ganó lo premio Arnal Cavero, en 2006 y 2008. Transiberiano publicó lo primer pa 2015. Iste pasau 11 de marzo presentó la nueva edición, revisada y adaptada a grafía EFA, en la siede de l’Asociación pa la recuperación d’a memoria historica d’Aragón. 

En l’atro canto d’a buega ye un libro ambientau en l’Aragón d’os anyos 30 y 40, a on que a traviés d’a historia d’os suyos protagonistas conoixemos como alentaba lo país en aquellas envueltas. En las suyas pachinas nos trobamos con la republica, la guerra y la dictadura y las conseqüencias que tenioron en la vida cutiana d’a población. Un viache pleno d’emocions de toda mena. Ye un d’ixos libros de mal deixar. Ye, antimás, bien curtet, asinas que en bell par de tardes libres se remata, deixando-te ixa agradable sabor de boca d’a buena literatura.

La presentación empecipió con Fernando Romanos parlando de Transiberiano edicions, una entidat que apuesta por la edición colaborativa a on que, pa cada libro, se i embrecan qualques socios, aportando las suyas ideyas arredol d’o modelo de luenga y mirando de que i haiga una corrección y un modelo util pa la supervivencia de l’aragonés. Una d’as virtutz, en la mía opinión, d’ista editorial, ha estau la edición d’obras que s’aluenyan d’os clichés de l’aragonés, d’ixos libros que describen l’entorno rural de fa anyos, las “cosas d’antes mas”, como si la nuestra luenga fuese qualcosa d’ixe pasau, incapable de recontar atras historias.

Chabier Crespo y Elena Martínez nos trayoron la suya voz y lo suyo curdión pa meter un poquet de mosica, con cancions en occitano, aragonés y francés. Una noteta orichinal pa ambientar lo libro que nos deixó con firmes ganas de sentir bell tema mas d’istos dos grans mosicos.

Entre lo publico, amás de personas intresadas por l’aragonés, bi’n heba d’atros con un perfil diferent, que i yeran mas por la tematica historica d’o libro. No ye casualidat que la presentación se fese en la siede de ARMHA. En lo turno de debat, se parló d’a necesidat de que no s’ixuplide toda la historia d’ixos anyos que marcoron tanto lo present y d’o que hese puesto cambiar lo país de no haber ganau la guerra lo faixismo. Se feba entre los panels explicativos d’una exposición sobre lo bombardeyo d’Alcanyiz, una de tantas fricaseras que quasi tot lo publico aragonés encara desconoixe.

Edicions transiberiano m’ha ufierto la enchaquia perfecta pa tornar a leyer En l’atro canto d’a buega. Tanto si lo hetz feito como si no, ye bien recomendable aproveitar ista reedición pa disfrutar con la historia de Miguelón y Marieta.

Carrileros y chinchorreyo. Tierra de barrenaus 9x13

Ya plega la primavera y en Tierra de barrenaus empecipiamos lo tretzeno programa d’a temporada celebrando ixe cambio d’estación que tant feliz me fa. Lo femos con una edición bien variada con a saber qué temas que tractar.

Empecipiamos con la canción d’o programa remerando los tres anyos dende que la pandemia plegó en las nuestras vidas. La Ronda de Boltaña ha publicau un disco sobre la pasa pleno de cancions bien emotivas. Tos proposo d’ascuitar una d’ellas. La ideya yera adedicar-le-ne a mai, que estió ATS, en representación de todas las personas que treballoron ixos meses por desfender-nos d’a malotía, pero la emoción fació que hese de tallar lo programa y editar-lo dimpués. Que sirva iste post pa ixa dedicatoria y pa que nunca no ixuplidemos a toda la chent que treballa en la sanidat día sin atro.

Torna lo tema d’as cadieras d’a Madalena, tot un eixemplo de cómo entiende la dreita zaragozana las ciudatz. Pa las chents de bien, cadieras y lo que calga. Pa carrileros, cinchorreyadors, cosa. Azcón, manimenos, s’ha trobau con un barrio como la Madalena, que se moviliza en un petén y que queremos achuntar-nos en las nuestras plazas y carreras, lo millor y insustituyible ret social.

Ubrimos lo calaixo d’a canción marxista una vegada mas pa trayer-tos tot un himno de EINA, antes mas conoixius como Inadaptatas, que adedicoron tot un disco a la obra “L’estau y la revolución”, de Lenin.

Pa acabar lo programa, charramos d’o 8 de marzo, día d’a muller, leyendo un texto ecofeminista feito por Ecologistas en acción a on que se fa tamién una reflexión sobre la situación derivada d’a guerra en Ucraína. Parlamos tamién d’a presentación d’o libro En l’atro canto d’a buega, de Rubén Ramos, que presentó Edicions Transiberiano en un acto en la siede de l’Asociación pa la recuperación d’a memoria historica d’Aragón. Acabamos lo programa charrando de Birosta que zarra las suyas puertas temporalment pa fer un cambio de dirección y con un tema de Rapsusklei queme desbloqueyoron en l’act de despedida d’ixe bar. 

Ya veyetz, bien variau, como la vida mesma. Que lo disfrutetz!

Recuerda que puetz ascuitar totz los programas en Ivoox, Spotify y la web de Radio Topo.

Programa #142

Birosta. 20 anyos fendo barrio y ciudat

No recuerdo la primer vegada que entré en Birosta. No estió un momento epifanico ni cosa pareixida. Estió, mas bien, una epoca d'a mía vida. Un tiempo a on que bi iba bien a sobén. No por estar vechetariano, que no'n soi. Ni por la birolla, que t'a part d'alavez las radidas perras que teneba iban destinadas de tot a lo zorruspiar. Yera sobre tot por estar siede d'a Biblioteca Frida Kahlo. A l'atro día de conoixer-la  me'n facié socio. Pa ixo no caleba diners, nomás levar-ie un libro. Lo merqué de propio. No quereba desfer-me-ne, de garra d'os mios. Yera La Fundación, d'Isaac Asimov. Cal que contine por astí, en beluna d'as siedes que tienga agora la BFK. Antimás d'os libros, gosaba leyer-me revistas como Viento Sur, y aproveitar pa enterar-me d'o ciento de convocatorias que penchaban d'o suyo zuro en un tiempo previo a los retz socials. No bi iba nomás porque tenese a man tantismas consas pa leyer. Bi heba, antimás, un buen ambient pa fer-lo.

Dimpués, con mas talento y presupuesto destinau tamién pa cenar de cabo ta quan, empecipié a ir-ie d'atra maneras. I he iu quantas vegadas con amigas, y beluna en los cabos de curso de Nogara, achuntando-me con l'alumnau pa celebrar que les deixaba de dar ferrete lo menos dica octubre. Yo, que no soi facil de satisfer en lo que pertoca a lo minchar, teneba en Birosta un d'os míos puestos favoritos d'a ciudat. Birostas, nachos, quesadillas, pizzas, chorivegano... En la mayoría de bars voi a sota-caballo-rei. Aquí teneba variedat. Y, pa forro de bota, sabeba que dezaga de cada bocau i heba un compromís etico. Bi heba una ufierta ampla, orichinal y en un entorno cudiau y amable. Quan quereba fer-me la bamba d'os puestos tant pinchos que tenemos en la mía ciudat debant de qualcún de difuera los levaba t'astí. Ye lo caso de Xavi Sarrià y Feliu Ventura, con qui tenié la suerte de chentar-ie l'anyo que nos visitoron adintro d'as Chornadas d'as luengas de Nogara.

Quan m'embrequé en la loquería de tener un bar en A Madalena, de camín trobemos en Birosta una aliada. Todas dos yeranos cooperativas y febanos parte de REAS, igual como Nabata, l'atra gran aduya que teniemos. Con la suya plantilla siempre trobabanos colaboración en qualsequier cosa que aprecisasenos, rai si yera un consello u un barral de biera. Exercebanos dia sin atro l'apoyo mutuo, contrimostrando que no cal competir pa ganar. 

A pesar d'estar bar, funcionaba a ormino como centro social. Acullió charradas, presentacions de libros y esxposicions arrienda, configurando un d'ixos espacios que i podebas contar a l'hora de buscar bell puesto a on que organizar actividatz. Birosta feba comunidat. Construyiba alternativas. Feba teixiu social.

Como chanadeta, y pa bella espisguardada que no haiga para cuenta d'a referencia, Birosta amaneixe en lo mío libro Penchada d'un filo. Un d'os pasaches, a on que la protagonista busca estar-se un ratet tranquileta, sucede en lo bar La Torrada que, como muitas endevinoron, ye lo nombre que facié servir pa Birosta. Tot lo libro ye pleno de chuegos asinas cada vegada que nombro un bar.

Agora diz que zarra. Siempre me fa pena que zarren bars en lo barrio. Como exhostelero sé toda la fayena que i hai dezaga d'una interpresa asinas y toda la ilusión que se i fica. Como client, siempre me fa miedo que en lo puesto d'ixe bar ubran qualsequier atra cosa que no'n siga y que, en estar declarada La Madalena "zona saturada", perdamos una licencia. Pero Birosta no ye qualsequier bar. Feba parte d'o scenario d'a mía vida en istos zaguers vinte anyos. Feba parte d'a vida de muitas, d'a vida d'a izquierda zaragozana y aragonesa. Tos trobaremos muito a faltar, birosteras y birosters, y asperamos que la vuestra rasmia se transmita pa los prochectos que tos embrequetz quan tos descansetz bell poquet. Antes de zarrar, queda pendient una zaguer biera astí, un zaguer bocau, y un brindis por que bi haiga muitas Birostas mas. Buena simient, n'hetz deixau.

Addenda: Birosta no zarra de tot. Quan escribié iste texto yera ixa la información que teneba. Birosta continará ubierto en mans d'otri, a partir d'abril, que diz que seguirá si fa u no fa con lo mesmo modelo, asinas que ye momento de fer-se contento y tant de buen nos i trobemos pa fer bell bocau y bell trago. ¡Suerte a las birosteras viellas y nuevas en lo vuestro camín!  

Nota: La foto ye d'un vermut pilarista que faciemos en Birosta, en un d'os días que millor me l'he pasau pa fiestas y acompanyau por una patacada d'amigas. Acabemos, ixe día, en un concierto de Los Draps en lo Parque Bruil. Gracias, Birosta, por istos raticos y tantos atros

Las que faltaban, de Cristina Oñoro

Recibir un present siempre fa ilusión. Si la estrena ye un libro, mesmo mas. Y si en rematar-lo sientes ixa placentera sensación que da una lectura satisfactoria, ye lo momento d’agradeixer a lo regalador que, antimás d’o propio obchecto, t’ha estrenau un buen rato de disfrute. Asinas que, Dabi, muitas gracias por haber-me regalau Las que faltaban, de Cristina Oñoro.

Iste asayo, escrito como tantos atros en la pandemia, replega la biografía de tretze mullers que no freqüentan aulas ni libros d’historia. Tretze eixemplos de vidas, bien diferents entre ellas, traviesadas por lo feito d’estar muller en sociedatz, diversas diversas en lo tiempo y l’espacio que, manimenos, tienen en común lo patriarcau.

N’i hai de relativament conoixidas, como Marie Curie u Chuana d’Arco. D’atras, como Mary Wollstonecaft u Victoria Kent, no’n sabeba que tasament lo nombre suyo. Y, en zagueras, son las que he descubierto entre istas intresantismas pachinas como Sofonisba Anguissola u Simone Weil. Todas ellas, apasionants relatos de realidatz invisibilizadas.

Cristina Oñoro no nomás sabe explicar de forma amena los pormenors de todas istas figuras historicas; lo fa, antimás, filando las relacions que tienen todas las protagonistas, ya siga porque s’encierten en lo espacio y tiempo, ya por lo que se pareixen las suyas vivencias.

Las que faltaban ye divulgación d’a millor, d’ixa que te traslada t’a realidat de cada epoca dillá d’a simpla enumeración de datos, cifras, calendatas y acontecimientos puntuals. D’a que te fa sentir como yera la vida cutiana de qui vivió en aquellas envueltas. Ye tamién un recordatorio de toda la Historia y historias que no gosan contar-se y sin las que ye imposible d’entender lo mundo nuestro actual. Y una invitación a seguir indagando y a rechirar, en bibliotecas y librerías, en busca d’atras tantas mullers que faltan en lo relato academico d’a historia.

Iste post se publicó orichinalment en castellano en lo blog Entre cortesía y colofón.