Insubmissio, espacios colectivos y desobediencia civil

Levo tiempo, como muitas atras personas, preocupau por la radida u nula capacidat movilizadera que tenemos en la izquierda alternativa, radical u como le queramos clamar. Talment siga nomás una sensación mía y no i hai datos obchectivos que refirmen ixa ideya, pero cuento que la comparto con a-saber-la chent y que qui sepa mas de sociolochía u politica probablement pueda aportar ixos datos. Por la mía parte, y dende fa bell tiempo, busco respuestas a ista situación en lo pasau, en luitas y teorizacions que han funcionau antes y que podrían tornar a funcionar, adaptando-se, prou que sí, a lo momentoactual.

Entre ixas lecturas se troba Insubmissió!. Quan joves desarmats van derrotar a un exèrcit, escrito por Joan Canela y publicau por Sembrallibres. Lo libro repasa tot lo movimiento contra lo servicio militar obligatorio y la prestación social sustitutoria centrau mas que mas en Catalunya, d’a on que ye l’autor. Cada capitol ye presentau con un texto de beluna d’as decenas de cancions que s’escribioron contra la mili y se incluyen tamién cartels arrienda d’as movilizacions. Una obra de buen leyer y bien intresant pa qualsequier a qui le intrese lo movimiento antimilitarista. D’entre tot lo que se i cuenta, i hai cosas aproveitables a boticiegas, pero me faría goyo de centrar-me en dos que considero esencials pa los movimientos socials.

La primer ye la importancia d’os locals. D’os espacios fisicos a on que chuntar-se, organizar-se y intercambiar ideyas. La cheneralización d’internet ha posibilitau dinamicas que fa no guaire yeran bien dificils. La difusión de campanyas y la coordinación difuera d’a ciudat, lugar u redolada a on que s’orichinan, por eixemplo. Pero de vez, n’ha traito atras que considero que nos son fendo prou mal. En no aprecisar de chuntar-nos fisicament ya que la mayoría d’as circumstancias cutianas d’os movimientos socials se pueden resolver online, y ixo incluye agora mesmo las reunions, s’ha deixau de dar importancia a los centros socials.

En Insubmissió! las referencias a los espacios a on que se chuntaban los diferents colectivos que dinamizaban la oposición a la mili y la PSS son una constant. No nomás como un puesto a on que fer asembleyas sino tamién como ixa referencia que teneba qualsequier persona que querese informar-se y trobar atras personas con los mesmos problemas y intreses.

Trobar-nos fisicament ye cada vegada mas raro y me pienso que ixo nos ye perchudicando. I hai dinamicas y intercambios d’ideyas que no se pueden dar en reunions virtuals. Ya nomás l’ausencia de tot lo luengache no verbal nos deixa d’aportar una serie de datos, a sobén bien importants, que aduyan a comprender a las nuestras companyeras. Pero i hai tamién, y creigo que ye mas vital, un cambio de rechistro entre la propia reunión y l’antes y dimpués d’a mesma. No parlamos igual mientras se desarrolla l’asembleya que quan ya hemos pasau lo tramite y nos relaxamos: deixamos la formalidat, charramos d’atras cosas, aportamos atras envistas, compartimos experiencias propias, confesamos optimismos y pesimismos… En ixe ambient, de tot diferent, ye a on que s’estableixen los vinclos emocionals y personals que van dillá d’una relación de simpla militancia. Uns vinclos que posibilitan bien a ormino una serie de dinamicas que pueden fer que una organización u colectivo treballe d’una manera mas eficaz y tienga mas posibilidatz, alavez, de conseguir los suyos obchectivos. A lo menos en la mía experiencia personal, lo funcionamiento d’as organizacions y lo suyo exito, creixe extraordinariament quan ixos vinclos son fuertes.

Tener un espacio propio en forma de centro social posibilita tamién atras qüestions mas lochisticas como l’almagacenamiento, la financiación a traviés d’a venda de materials u consumo de bebida y birolla u poder fer actividatz sin haber de pender d’a cesión d’espacios publicos u privaus. Pero ye sobre tot un sanismo exercicio d’autochestión. Creigo que en la izquierda somos asumindo practicas d’o capitalismo y lo neoliberalismo, como la ultraespecialización, masa facilment. Chestionar un local obliga a conoixer y exercer una serie de fayenas que proporcionan experiencias bien valiosas a nivel personal y colectivo. Creigo, encara que talment ixo siga una sensación personal, que ye tamién un exercicio d’autoestima. En un tiempo d’ausencia d’experiencias colectivas, fer funcionar un local ye un motivo d’argüello y d’identidat de grupo, dos cosas que influyen a-saber-lo en la percepción que tenemos de nusatras mesmas.

D’os anyos d’a insumisión dica agora, lo numbro d’ixos centros socials, lo menos en Zaragoza, ha iu baixando terne que terne. Hue, en la nuestra ciudat no en queda que bells pocos y en situacions precarias. Cada espacio que perdemos nos femos mas dependients, menos colectivos y mas desorganizaus. Desfender los centros socials que quedan ubiertos ye urchent y, a meyo plazo, caldría organizar-se pa ir ubrindo-ne de nuevos. 

Ye verdat que tienen problemas asociaus, como la cantidat de treballo pa simplament mantener-los ubiertos u que esdeviengan un fin en cuentas d’un medio, pero soi seguro de que aportan muitas mas solucions que problemas.

Antimás d’ixo, en Insubmissió se parla muito, como no podría estar d’atra traza, de desobedicencia civil. Tanto dende la envista teorica como en la descripción d’a practica cutiana d’alavez, las conseqüencias que teneba y los contorniellos que creyoron a l’estau espanyol.

Nusatras, las obreras, las d’abaixo u como queratz clamar-nos, no tenemos medios de comunicación potents, ni un exercito d’advogaus, ni chueces, ni cuerpos armaus. Nomás tenemos los nuestros cuerpos, la nuestra decisión y, sobre tot, que somos muitismas mas. La nuestra fuerza ye sobre tot en lo nuestro numbro, la nuestra determinación y la capacidat pa organizar-nos. Los insumisos consiguioron vulcar la mili y la PSS a pur de fer servir ixas ferramientas.

Ixe exercicio d’a desobediencia civil metió una vegada mas contra las cuerdas a l’estau en lo referendum de Catalunya d’o 1’octubre de 2017. Coincido con l’autor en que probablement fue la falta d’un plan solido pa dimpués d’ixe referendum lo que fació que no se consguise ir mas t’alla en la declaración d’independencia catalana. D’atros eixemplos menos polemicos tamién en charra. Lo movimiento en contra d’os esfuizamientos en ye lo mas vivo en los zaguers anyos. La suya acción ha permitiu que muitas personas haigan puesto vivir en las casas suyas y meten en lo debat cutiano lo problema de vivienda que seguimos tenendo en muitos puestos. La desobediencia civil ye efectiva y un exercicio que habríanos de fer a ormino.

I hai muito a aprender en la historia d’os movimientos socials.D’os suyos exitos y d’os suyos fracasos. Creigo que los centros socials siguen estando una ferramienta esencial pa la nuestra organización. Que en ixos centros ye a on que podemos aprender y exercer l’autochestión, valiosa a nivel filosofico y d’experiencia vital. Y que dende astí s’ha de pensar en las maneras mas efectivas de levar la desobediencia civil a las luitas a on que pueda conseguir resultaus, que me pienso que son quasi todas. Libros como Insubmissió! aduyan a no ixublidar d'a on venimos y fan que veigamos claro lo filo que nos une a las luitas pasadas, presents y futuras. Caldría, en Aragón, potenciar ixa investigación, replega, publicación y difusión d'a nuestra propia historia, en obras pareixidas a ista u a aquella sobrebuena iniciativa que estió Zaragoza Rebelde. ¿Voluntarias?

Trilerismo olimpico

Yera de vermut, rodiau de chent de dreitas. D’as que quiers, porque tiens vinclos con ells, y prebas d’evitar seguntes qué temas pa no tricolotiar-te. Una d’ellas decide trencar la paz y, sin venir a cuento, introduz lo tema d’o suyo mitin: “Mama mía, lo d’as olimpiadas y Lambán”. La estratechia mía en istas situacions ye d’esbarrar lo tema enta atro mas amable: bella serie u bell libro, l’orache, lo zaguer viache que haiga feito u qualsequier cosa asinas. Pero me pilla con la guardia baixa, asinas que respuleyo de camín con un “mira-te tu que proposar olimpiadas d’hivierno entre que has de portar cambions plenos de nieu artificial pa que funcionen las pistas que tiens ubiertas”. L’audiencia se me mira fendo uellos, como si charrase d’o zaguer numero d’os X-Men u d’os costumbres d’os cayubabas. “Ya, ya, ixo rai. ¿Pero lo de Catalunya? Cal que los nombres vaigan, como poco, a ran. Aragón y Catalunya. Yo me niego a que no i amaneixca Aragón. Ya dimpués si se fan mas u menos prebas se puet charrar, pero que lo nombre i siga”. Me pensaba que lo debat yeran sobre olimpiadas, no pas sobre complexos. Tantos anyos en politica y sigo sin aprender lo d'a prevalencia d’o simbolico sobre lo material.

Lambán ye experto en ista mena d’estratechias y, por lo que veigo, le funcionan de pistón. Se proposa un chuegos olimpicos d’hivierno en una tierra que sabe y pateixe de primera man lo que ye la especulación y la corrupción asociada a ixa mena de grans eventos. Viviemos la Expo, estiemos a pocas d’acullir aquella ida de flama que yera Gran Scala, cremamos diners a boticiegas en lo forau de Motorland y me pasé toda la mia nineza y adolescencia sentindo la faloria d’a Chaca olimpica. Si ya no i hai nieu, si mesmo en atras latitutz mas propicias pa uns chuegos d’hivierno han de fer-se con artificial, ¿qué sostenibilidat puet haber-ie aquí? No cal ixuplidar que lo nuestro president, lo dr. Lambán, niega lo cambio climatico y considera que toda la comunidat scientifica internacional fa parte d’o que ell clama radicalismo ecolochista.

Sabe don Javier que l’ecolochista ye un d’os pocos movimientos socials que conserva musclo y prou numbro d’activista pa chafar-le lo suyo suenio-negocio olimpico. Asinas que, en un nuevo exercicio de trilerismo, como si fuese un d’ixos perillans d’as Ramblas barcelonesas, amaga la bola d’o ecolochismo y t’amuestra la de l’espanyolismo, sabedor de que en l’actual ambient identitario, la mayoría d’o electorau ye capable de refirmar la mayor loquería que se diga si leva una estanquera. Ya no se charra d’impacto medioambiental, cosas de fanaticos anti-extinción. Ni d’o impacto social u economico -pa mal - que tamién tendría y que a sobén pasa quasi d’amagatons en l’argumentario de qui nos oposamos a las olimpiadas y atras grans sanseladas. No se charra tampoco de qui se beneficia d’as olimpiadas y d’as obras que caldría fer, u simplament d’o negocio que la sola posibilidat de que se celebren significa pa belún. Arredol d’os chuegos lo solo tema de debat posible ye la toponimia d’a denominación.

Acusaban, tiempo habe y bella vegada con razón, a lo nacionalismo catalán y vasco d’amagar con sinyals los problemas socials d’os paises suyos. Lambán en ye experto, igual como la suya admirada Ayuso.

Mesmo pareixería, de quan en vez, que a Lambán le importa igual lo d’as olimpiadas. Pues si querese que se fesen prebaría de fer pacha con lo president de Catalunya, ni que fuese por l’intrés común. Aparcaría los anyos y anyos de faltadas enta lo país vecín, ixe trilerismo que cada vegada que tien problemas aquí fa servir, y complegaría en una candidatura conchunta. Soi seguro de que no ye mica dificil alcordar-lo con Aragonès si de verdat se deseya. Talment se la bufe lo d’os chuegos olimpicos y nomás quiera fer-lo servir de cortina de fumo entre que desmonta trens, ambulancias y atros servicios publicos con los suyos companyers de gubierno, a tuertas y dreitas, quedos u mesmo aplaudindo.

Cal que no se celebren aquí, los chuegos, por muitos, diferents y contudents motivos. Talment sisquiera se faiga una candidatura. Se’n charrará, y muito, y tanimientres bi habrá chent fendo negocio con las simplas alufras, arramplando con parte d’os presupuestos publicos nuestros. Si como en tantas atras ocasions m’entivoco, y a la fin se fesen, proposo que lo trilerismo entre como nueva disciplina y que Lambán nos i represente. Ye medalla d’oro segura.

Mallatas y pupas. Tierra de barrenaus 8x12

Plegamos en la metat d'a temporada y lo foi acompanyado por una convidada que me fa firme goyo de tornar a tener en lo programa. Lucía López, la persona que i hai dezaga d'o prochecto Mallata, ha estau premiada en istos zaguers meses por lo treballo que leva a-saber-los anyos fendo. Una sobrebuena fayena comunicativa arredol d'a agroecolochía y lo mundo rural. Igual como Tierra de barrenaus, pero muito millor feito, empecipió como un blog que, china-chana ha iu creixendo. De totz los prochectos pasaus, presents y futuros, nos ne charra en iste nuevo programa.

Tendremos tamién una miqueta de narrativa. En iste caso, un relato escrito por un conoixiu escritor y cantaire d'ixo que le dicen indie-pop, amprau d'un d'as suyas obras. Una choyeta d'un autor que vale muito la pena tanto por las letras d'as suyas cancions como por los suyos libros. 

Ta l'apartau mosical traigo lo primer single d'o nuevo disco d'un grupo catalán de rap que, en lo suyo video incluye imachens de Zaragoza. En ista ciudat ya los hemos puesto veyer bella vegada y en mayo, si la covid lo permite, tornarán t'A Immortal. Tamién tornan con un nuevo disco, y concierto en marzo, los protagonistas d'a canción d'o calaixo friki, que torna a tener antimás una tematica espacial. 

Programa #119

Lo dia que lo liberal se devanto tarde

La Gadsden chistavina

A pesar d’estar limpio dar ferrete con lo d’a “Espanya que madruga” guaire luego no se debeba de devantar lo lider liberal Albert Rivera pa que le haigan feito fuera, sin fer-ne ni dos anyos dende que l’achustoron, d’o estudiet d’advogaus a on que treballaba. U, millor dito, a on que le pagaban lo chornal, pues pareixe que de fochar, poco u mica, seguntes la interpresa.

Bi habió un tiempo, no en fa tanto, que Rivera yera la gran asperanza d’o liberalismo. Griso y Motos le feban entrevistas que yeran morisquetas, mirando-se-lo con uellos d’enamorau y dando-le lo tracto presidencial que le barruntaban. En El País, l’adedicaban articlos plenos de floretas a on que le dibuixaban un futuro briloso. Talment, mesmo i yera pensando Tatiana Ballesteros quan charraba d’o “gran capitán que aprecisa Espanya” en aquell video viral de cabo de 2021.

Dende ixe liberalismo, que ell prebó de representar aluenyando-se d’a imachen de chuntamanetas y fachas de PP y Vox, se nos acusa a sobén a las royas de galvans, de vivir d’os diners d’otri, de prebar de que nos paguen por no fer cosa y, sobre tot d’hipocritas, veyendo incompatible estar comunista con tener mobil, auto, casa u fer-te un hordio dimpués d’a chornada laboral. Lo suyo discurso, manimenos, nos charran d’a cultura de l’esfuerzo, de que si fochamos firme totz los días, mesmo por dencima d’ixas ueito horas, sin asperar que nos paguen las extras, y independientement d’os nuestros orichens socials y de toda la reata de condicionants, veyeremos un día, prou que sí, los fruitos d’ixa patacada d’horas adedicadas a la fayena y tendremos un chornal de pistón. No debió d’aplicar-se lo cuento lo sinyor Rivera u no le han reconoixiu lo suyo esfuerzo que regular que ha feito.

Charran tamién los liberals que s’esfuerzan y amaitinan, d’a meritocracia. De que los buens treballos s’han de conseguir a pur de titols y experiencia laboral y no porque te lo regalen u te monten un chiringuito d’ixos que tanto goyo nos fan a la izquierda. D’ixo en sabe muito atro liberal como Toni Cantó que, gracias a la suya funda formación filolochica consiguió que s’ubrise, a la fin, la tant aprecisada y reclamada por las madrilenyas oficina d’o espanyol, en una tierra a on que totz iban por la carrera debatindo sobre la tilla de “solo”. Rivera entró en lo bufet que le ha feito fuera con una radida experiencia en lo campo a on que se formó, lo dreito. Todas y totz tenemos claro, y ni sisquiá s’han molestau en amagar-lo u fer-nos creyer lo contrario, que no yera por la suya formación, prestichio laboral, u calitre que lo i achustoron. Teneba mas a veyer con l’achenda de contactos d’o suyo mobil, por eixemplo. No heban achustau un advogau, heban mercau una excel. Asinas que meritos, pocos. Saber guardar los numeros de telefono, en tot caso.

Las valors son qualcosa eterea y interpretable. ¿Qué ye la cultura de l’esfuerzo? ¿Qué ye la meritocracia? No son cosas que podamos tocar y, de feito, son tant indefinibles que mesmo yo las podría desfender seguntes lo concepto que le demos a “esfuerzo” y “merito”. Mas terrenal ye lo concepto de indemnización por despido. Ixe que lo liberalismo preba siempre de sacar u d’achiquir tot lo que se pueda. Que quan lo chefe considere que ya no fas falta te’n vaigas ta casa con la pocha vueda a esforzar-te mas u ir fendo meritos pa la siguient fayena. U que, como deciba ixe atro liberal, empresario y cociner, faigas ixos meritos pagando por treballar en una cocina. La salida de Don Albert d’a politica institucional le ha debiu de fer reflexionar-ie y tornar-se comunista, porque agora reclama a lo bufet que le fa fuera 4 anyos de chornal, bien luen d’ixos 20 dias por mes treballau que proposaba en los suyos tiempos de lider liberal.

Diz que las royas nos femos la bamba d’una pretendida superioridat moral. Diz que tener un mobil caro, u una buena casa, u fer servir l’auto ye hipocrita, encara que garra comunista que yo conoixca haiga feito voto de pobreza. D'hipocresía n'i hai en totz los puestos. Tamién en la izquierda. Pero que dende lo liberalismo se nos n'acuse ye, como poco, curioso. Dende lo conservadurismo cristiano tamién, pero ixo me lo deixo pa atro día.

Abusos narrativos en X-Men: Phoenix Warsong

En una d’ixas campanyas curiosas que fan de cabo ta quan los supermercaus se publicoron dos coleccions de comics de propio pa vender en un d’ixos centros comercials. Son tomos grans, de mas de 200 pachinas, que replegan material muit random de Marvel, enfilau en primeras a chent no guaire fan. Me pienso que, mas que mas, ye una manera de fer-nos ir-ie a los frikis y de que la cachimalla concietera se pille un tebeo bien gran por quatre perras. Porque ixa ye la principal – y sola – virtut d’iste material: lo pre. Han replegau en ixos tomos arcos argumentals con filos alto u baixo relacionaus, con un chiquet articlo introductorio y lo han meso a un pre bien competitivo. Un d’ixos tomos, titulau Fenix, adintro d’a colección «El renacimiento de Marvel. Los años 2000» replega dos sagas: «X-Men: Phoenix Endsong» y «X-Men: Phoenix Warsong». Garra d’as dos la teneba asinas que por 2,99 pasó de camín a fer parte d’a mía colección.

La primer historia ye bien. No asperetz la saga definitiva, porque no’n ye, pero son cinco numeros USA entretenius, de buen leyer y, en bell momento, mesmo emocionants. La segunda, que escribió lo mesmo autor, Greg Pak, ye de pior calidat. Repetitiva, aburrida y con un dramatismo masa impostau que no consigue fer-te sentir cosa. La parte grafica, con Greg Land en la primer saga y Tyler Kirkham a cargo d’a segunda, ye pan d’atro furno encara que aquí tamién torna a estar millor la primer parte.

Consigue, ixa segunda parte, chunta en una sola pachina belún d’os vicios piors d’a narrativa superheroica en cheneral y marvelita en particular. En charraré de bell par.

Los cataticos. Las pocas vegadas que he leyiu Los Quatre Fantasticos, que por un regular yeran comics d’as etapas mas clasicas, teneba la mesma sensación. Dimpués de barallas y baralletas, la sola solución yera que Reed Richards entrase en lo laboratorio y, un tiempo dimpués, en salise con una maquinota disenyada pa redotar a l’enemigo que pertocase. Lo remero d’a Primera Familia, pero lo mesmo podríanos decir d’os Vengadors con Tony Stark u Hank Pym. Siempre que se fa servir ixe recurso m’alcuerdo d’o bat-spray repelent de tiburons d’a serie de televisión clasica de Batman. Ye acompanyau, por un regular, de charrameca tecnolochica sin garra sentiu.

En lo caso d’os mutants qui gosa construyir los cataticos pa solucionar la tarde ye, prou que sí, Hank McCoy, la Bestia, que pa ixo ye lo chenio local. Ye curioso que, quan yera en los Vengadors, nian programaba lo video, pero ixo lo deixamos pa atro día. En la pachina que en charro Hank se declara lo mayor experto en aparatos de contención d’a Fuerza Fenix y diz haber millorau uno que fació fa anyos, que lo ha miniaturizau pa que i culla en un dardo y que antimás evita que se pueda alimentar con la enerchía d’os rayos opticos de Ciclope, que yera un problema. Tot en un ratico que ha teniu entre que las chirmanas Cucut vivas resucitaban a las muertas y aculliban la Fuerza Fenix. En cuentas d’a debantdita charrameca tecnolochica podeba haber dito: «Tranquilo, Ciclope, m’he trayiu lo mio Beast-Spray repelent de Fuerzas Fenix» y quedaría igual.

L’atro defecto narrativo d’a pachina nos lo trobamos en la zaguer vinyeta, ya combinada con la primer d’a siguient pachina. Bestia ha conseguiu ficar lo suyo repelent machico de Fenix en un dardo. ¿Que le’n pueden tirar con un fusil, una cerbatana u un «aventador de dardos repelents de Fenix»? Prou que sí. Pero deciden que no, que talment lo millor ye fer una bola rapeda especial de Coloso con un achent random de SHIELD que ye por astí. Foi parentesi pa explicar lo d’a bola rapeda especial.

En los 70 Coloso y Wolverine entroron en los X-Men y facioron pacha. En ixos anyos, que los comics yeran muito mas fatons, se feban muitas estratechias absurdas de luita que, me pienso, tienen la suya fuga en la Catapulta infernal d’os bezons Derrick de Campions. Una d’ellas, la bola rapeda especial, consistiba en que Coloso pillaba a Wolverine y lo aventaba, literalment, enta l’enemigo. Iste quitaba las zarpas, que ye lo que millor fa, y plegaba con muita fuerza. No teneba guaire sentiu la mayoría d’as vegadas, pero yera una cosa que estió muit repetida en los 70 y 80. En la narrativa comiquera de 2007, que ye quan se publicó ista historia, queda de tot ridiculo. No nomás por l’anyo, sino por lo contexto. ¿Por qué la bola especial quan ye la manera mas embolicada de fer plegar un dardo en una persona? ¿Por qué la fa coloso con un sinyor que ni conoixemos ni nos importa a dengún? Mesmo, si se quier fer servir ixe recurso, mete-lo que siga espectacular y no en una cantonadeta como si s’avergonyase de fer-lo, que razons en tien.

Contraeixemplo d’isto mesmo lo tenemos en lo numer 6 de Astonishing X-Men d’aviento de 2004, adintro d’a saga Gifted (una choya, en la mía opinión). Asinas ye como, si se quier, se puet fer servir bien ixe recurso mesmo en un anyo que ya pareixeba que heba deixau de tener sentiu. Lo primer, tien un sentiu. Aprecisan plegar en un avión y no tienen garra personache volador. La sola manera de fer-lo ye aventar a Logan pa que se i enganche. Lo segundo, i hai un vinclo emocional entre los personaches y con lo lector. Coloso levaba tiempo muerto por razons absurdas y bell par de numeros antes ha tornau t’a vida. Wolverine se’n fa contento y nusatros tamién. Nos fa ganas de tornar a veyer-los en acción. Ye una manera de decir-le a lo lector que acaba de recuperar a un viello personache con las suyas caracteristicas de cutio. Antimás, historicament, ye un momento de tornada t’os pillamas superheroicos de coloretas dimpués d’os anyos de vestir de cuer negro motivaus por l’exito d’as cintas de X-Men, asinas que tien tot lo sentiu d’o mundo: back to classics. Y en tercer puesto, en l’apartau grafico, le da la entidat que le cal: una doble splash page. Por cosas asinas, iste Gifted de Joss Whedom y John Cassaday ye un gran tebeo que creigo que ha de figurar entre las 15 u 20 millors historias de X-Men mientras que lo de Fenix me pienso que no tornaré a leyer-lo en lustros, si ye que nunca lo foi.

Cuento que a la fin lo problema ye en la mesma historia. Resucitar a Fenix unatra vegada no ye una buena ideya. Ye un recurso sobreexplotau, un enemigo invencible pa qui te cal inventar una maquinota – quasi todas las vegadas se le acaba ganando asinas – y una historia que s’ha contau cien vegadas. Si se fa, que no digo que no se faiga, cal fer-lo bien. Eixemplos n’i hai: Avengers vs X-Men u Excalibur: La tornada de Fenix (Excalibur vol.1 61-68, por Alan Davis y Mark Farmer: miel).

¿I hai cosas rescatables en X-Men: Phoenix warsong? Prou que sí. L’apartau grafico, como ya he dito, ye bien bueno. Pa qui quiera saber un poquet mas sobre las chirmanas Cucut, ye un must-have. Y, en qualsequier caso, ye parte d’a historia d’os X-Men lo que, pa un completista como yo, ye prou razón.

Viache mosical ta 2022. Tierra de barrenaus 8x11

Talment l'encadamiento provocau por la pasa, talment la falta de conciertos u talment las musas y lo treballo. Lo que siga, ha provocau que quantas artistas haigan estau bien activas en la zaguer parte de 2021 y lo que levamos de 2022. En istos meses quasi no he adubiu a sentir todas las novedatz que han iu presentando muitas d'as mías mosicas favoritas. China-chana, en que las feban publicas, las iba anotando pa punchar-las bell día en lo programa. Pero ya en yeran masa. Asinas que en replego bellas quantas - no han entrau todas las que teneba prestas - en iste nuevo Tierra de barrenaus que fa un viache mosical por belunas d'as mosicas que sentiremos en 2022.

Como ye quasi dogma en iste prochecto comunicativo, la diversidat ye bien present en lo programa. En lo mosical, a on que sentiremos reggeaton, ska, rap, rock y mosicas de mal clasificar dica lo lingüistico, con presencia de catalán, aragonés, euskera y castellano. Tot a traviés de propuestas bien disfrutables y, la mayoría, bailables .

Agora nomás queda que todas ixas chiras que se van programando y anunciando tiengan buena cosa de presencia en la nuestra tierra aragonesa, a on que en zagueras ye bien dificil fer conciertos y festivals, mas que en atros puestos a on que la pasa ye igual de grieu. Pa ixo, nos cal refirmar a ixas salas y programadors que apuestan por la mosica en directo, asinas que ¡pilla los tuyos diners y inverti-los en cultura!

Programa #118