L'aragonés medieval y Ninogara. Tierra de barrenaus 6x22

En la luita por l'aragonés y por los dreitos d'as personas que lo charramos, a sobén pareixe que no bi haiga que pleitinas, egos y ixa morfuga espantosa que Twitter heredó d'as ziberrufiertas y atros foros de primers de sieglo. Manimenos, i hai muita mas chent que luita en positivo. Que china-chana y sin mica estrapalucio construye ferramientas que fan honra a la chent que treballamos porque la nuestra luenga tienga un futuro. En iste programa entrevisto a dos d'ixas personas que han feito fayena de diferents arias d'a luenga.



Una d'as qüestions mas importants a la hora de desfender l'aragonés ye conoixer la suya historia. Informando-se bell poquet  se pueden desmontar buena parte d'os topicos, cunyadadas y falsedatz que sentimos de cutio arredol d'a historia lingüistica peninsular. "El aragonés medieval. Lengua y estado en el reino de Aragón", escrito por Guillermo Tomás Faci y publicau por Prensas Universitarias de Zaragoza ye un libro bien intresant pa toda la chent que le faiga goyo la nuestra historia y la nuestra luenga. Lectura fundamental pa conoixer millor Aragón, l'aragonés y trobar en ixos sieglos que marcoron tanto la nuestra historia, explicacions pa muitos problemas que agora patimos.

Un d'ixos problemas ye, sin dubda, la transmisión cheneracional de l'aragonés. Mesmo en atras luengas minorizadas muito mas fuertes, con a-saber-los recursos, autoridatz lingüisticas, norma culta y toda mena de ferramientas, ye dificil conseguir que la cachimalla s'exprese en ixa luenga. En lo caso de l'aragonés, ye quasi un miraglo, lograu a pur de voluntat paciencia que las crías y críos fablen y se relacionen con atras personas. Ninogara ye una iniciativa naixida de man de mais y pais aragonesofablants que preban de que la suya catrinalla creixca en aragonés. Charramos con Chuserra, un d'ixos pais, que nos la explica.

En la parte mosical, tos convido a ascuitar una canción relativament nueva d'un de tantos grupos que ye aproveitando ista falta de conciertos pa grabar lo suyo nuevo disco. Un lamín pa fer boca d'ixe nuevo treballo que muitas aguardamos en candeletas. En lo calaixo de cancions, i ficaremos una "Canción d'Antes mas" d'una d'as bandas mas sinyaleras d'os 90, y d'un d'os discos historicos d'aquellas envueltas.

The Gifted u X-Mal

De todas las series que consumo, bi'n ha una categoría que les digo "series de fer fregote". Son ixas que puetz veyer entre que fas la chenta, doblas la ropa destendida u fas fregote. No cal guaire atención pa seguir l'argumento ni tienen una calidat que disfrutes a cada fotograma. Pero que, con tot y con ixo, tienen bella cosa positiva y que te fa continar veyendo-las. Una d'ixas ye The Gifted, una serie basada en los comics de X-Men, pero prou aleixada d'as cintas. Dimpués de dos temporadas prou floixas, las audiencias no han refirmau un prochecto que, por la suya propia naturaleza, aprecisaba deixar-se diners en efectos especials. Uns diners que no plegaban ni por los espectadors ni por lo nulo merchandising. Con tot y con ixo, como en tantas atras ocasions, nos trobamos con que la serie acaba con buen cliffhanger que nunca no resolverán ya que no i hai garra intención de rematar-la con bell capitol zaguer u bella cinta, como s'ha feito en atras series.

The Gifted ye ambientada en un universo a on que los X-Men ha dispareixiu (nunca no explican cómo ni por qué) y los mutants siguen estando perseguius y odiaus por lo simple feito d'estar-ne. La serie la protagoniza bell personache bien conoixiu d'os comics como Polaris, Fenris, Thunderbird u Blink, de conchunta con atros creyaus de propio. Son 29 capitols mas que millorables y actuacions que demandan una segunda toma. Un d'os grans problemas probablement haiga estau prebar de fer una serie pa totz los publicos. Ye una cosa cheneralizada en lo mercau espanyol y prou común en lo yankee. Los guions tienen poquisma credibilidat y tiran de topicazo terne que terne. Pa rematar con la critica destroy, la parte tecnica ye unatra d'as feblezas. Los poders, que en la metat d'os personaches consisten en fer lucetas y fer petar cosas a distancia, tienen unos efectos especials zaborrericos pa lo que se podría asperar d'una producción d'ista grandaria. Las actrices y actors se foten la metat d'o tiempo movendo las manetas fendo que, a lo que levas diez capitols, faigan mas risa que atra cosa.

Con tot y con ixo, y dimpués d'haber-le dau tot iste ferrete, The Gifted tien cosas positivas. Encara que he de decir que quasi todas son producto d'haber leyiu los comics de X-Men y estar deseyando veyer en "lo mundo real" a los suyos personaches. Trigar a Polaris como lider d'a colla me pareixe bien acertau. Una mutant a saber que poderosa, que recuerda pa forro de bota a lo gran Magneto. Qualsiquier que haiga leyiu la primer etapa d'o X-Factor de Peter David, la tendrá como un d'os personaches mas querius. Atras, como las chirmanas Cuckoos, ye d'o millor que se troba en istos 29 capitols. Fer servir a Los Purificadors en un momento como lo que somos vivindo ye bien intresant y fa buena honra pa planteyar lo conflicto racista d'a serie. Detalles como que Polaris y Eclipse faigan auroras boreals quan se besan, son divertius. Y Thunderbird, en cheneral, salva mas d'un capitol.

Entre lo malo y lo bueno, tamién i hai atras decisions que podrían haber saliu bien, pero no. Lo siguient parrafo ye tot SPOILERS. Asinas que si quiers veyer la serie, blinca-te-lo y pasa dreita t'o zaguer.

Blink, atro d'os míos personaches favoritos, resulta aquí una d'as mayors errors. Una superheroina carismatica de tot, que en los comics se te gana en dos vinyetas, se queda convertida en un catenazo sin rasmia. La suya muerte en X-Men #37 quasi me fació plorar. Quan "muere" en la serie, antiparte d'haber levau un luminoso anunciando-lo tot lo capitol, te quedas fredo de tot. Stephen Moyer, un actor que me heba feito firme goyo en True Blood, tien en ista serie un d'os papels mas importants que, manimenos, queda como un pan sin sal. Atro que sabes que si muere tampoco no lo trobarás a faltar. Sage, a pesar d'apareixer en la serie, ye practicament irreconoixible pa las lectoras de comics. Ni fisicament ni de caracter. Un personache desnaturalizau de tot que se'n hese puesto sacar prou mas treslada. Pa rematar, la idea de que los centinelas sigan policías en cuenta de robots chigants, cuento que sería motivada por qüestions economicas, pero le saca prou intrés. Entre atras cosas tamién porque lo suyo lider interpretau por Coby Bell, ye probablement lo pior personache d'a serie. Y no ye facil.

Ye una pena haber perdiu los diners y la oportunidat de fer una buena serie de X-Men pa televisión. Argumentos y personaches, n'i hai a trompicuesco. Beluna d'as ideyas que se levoron ta The Gifted no yera mala, pero s'executó prou malament. He visto cosas muito piors, prou que sí. Con totz los suyos defectos, la serie tien los suyos buenos momentos y, dimpués de las ueito horas de treballo, las pandemias y las movidas internas que cadaún tiengamos, a sobén t'agana mas de veyer una serie sin pretensions que no pas un capitol d'as grans series que quasi s'ha de prener apunts. Lo dito, una buena serie de fer fregote.

Nuevas voces d'Aragón y l'albergue d'Acumuer. Tierra de barrenaus 6x21

Albergue d'Acumuer
Foto: Ana Pelegay

La parte final d'a temporada de Tierra de barrenaus ya ye aquí. Queda nomás quatre programas que plegan con contenius que aspero que tos faigan firme goyo y que servirán pa rematar un anyo raro. Ya soi treballando en la sietena, prou que sí, y aspero las vuestras ideyas, propuestas y aportacions. Pero tanimientres no tos perdatz istos zaguers TdBradio, porque no tos farán burro falso.



En la primer parte charramos de l'aragonés. Qui amamos y estudiamos ista luenga gosamos d'aguardar en candeletas novedatz editorials como la que traigo en iste programa. Nuevas voces de Aragón, escrito por Brian Mott y publicau por Edicions Transiberiano ye un libro que disfrutará qualsiquier persona que tienga intrés por la nuestra luenga. Replega textos y grabacions en aragonés dende Ansó dica Benás y en catalán de norte a sud, antimás de beluna d'as parlas de transición. Juan Pablo Martínez ye miembro d'a editorial y un d'os que treballó en la edición. En la entrevista nos explica bell detalle sobre lo libro, las grabacions, feitas entre 1968 y 2018, u lo propio autor. Un nuevo volumen que anyadir a la nuestra biblioteca d'imprescindibles de l'aragonés.

Lo viache d'o programa nos leva enta Acumuer, un lugar de l'Alta Galliguera a on que Ana Pelegay y dos companyeras chestionan l'albergue d'Acumuer. Un puesto bien desconoixiu pa muitas aragonesas, pero pleno de paisaches y cultura. L'edificio ye l'antiga escuela d'o lugar y dende astí podremos disfrutar d'una zona rebonica. Ana nos recuenta tot lo que podemos fer-ie y nos convida a pasar-ie bell día iste verano.

En la parte mosical, rap y reivindicación se chuntan una vegada mas, pa desfender la sanidat publica debant d'a enrestida de l'alcalde de Zaragoza que planteya un nuevo negocio sanitario pa los suyos amigos. Quatre voces que se devantan contra la privatización d'a salut. D'o calaixo de cancions, en quitamos una versión que se fació fa bells pocos anyos d'un tema que en tien mas de quaranta. Un clasico valenciano que reversionó un d'os grupos mas boriners d'a scena valenciana.

Programa #80

En leyendo... Anatomía de la lengua, de Elena Álvarez

No sé si le pasará a mas chent u si ye cosa d'as mías inquietutz y intreses, pero de tot lo profesorau que he teniu en la mía etapa escolar, lo que millor recuerdo, pa bien y pa mal, ye lo de luenga. Por un regular, pa mal. Ye evident que la materia m'intresa, y muito. En l'instituto tenié la que estió la millor profesora mía de totz ixos anyos, ya tos lo reconté. Pero toda la resta estioron prou penibles.

En Corazonistas en tenié un d'os primers. Feba de l'asignatura un catenazo. Una d'as cosas que hebanos de fer yera unas fichetas d'ixas blancas que bi heba antes mas, con una doble ringlera roya alto que amugaba l'espacio d'o titol d'a ficha, y bella ringlera simpla azula abaixo. Las hebanos d'emplir con parolas y la suya definición. En casa teneba un diccionario Iter Sopena que le foteba buen ferrete. M'encantaba ixe libret. Asinas que de todas la ixautadas que febanos en clase, lo menos con ixa pasaba lo rato. Aquell anyo vide Ghostbusters, tornando-se a l'inte una d'as mías cintas favoritas. Asinas que a aquell mosén le facié ficha de toda parola que i amaneixese. 

En l'instituto, en iste aspecto, la cosa no milloró guaire. Las dos primeras personas que me facioron clase de luenga tornaban con toda ixa retolica de l'analí sintactico que tanta bola se me feba. Sisquiá yera que me pareixese embolicau. De feito se me daba alto u baixo bien adedicando-le muito menos tiempo que a atras materias. Aquello, antimás d'aburriu como quasi tot lo que aprendebanos, se me feba inutil de tot. No le trobaba sentiu. 

Me calió deixar l'instituto, empecipiar a intresar-me por las luengas - en plural - yo mesmo, trobar chent que de verdat le apasionase lo tema y, sobre tot, haber d'explicar-las yo quan prencipié a fer clases en Nogara pa trobar pa qué valeba tot ixo de l'analís sintactico. Y pocos anyos mas pa parar cuenta de que, pedagochicament, tien una utilidat prou radida a la hora d'explicar las luengas a la mayoría de chent.

Fa bell día, acabé de leyer Anatomía de la lengua, de Elena Álvarez Mellado. En la contraportalada amaneixe lo siguient texto "¿Por qué en el cole no nos contaban estas cosas" Esta pregunta retórica se la hace la autora cuando está a punto de terminar el libro que ha escrito. Se la hace ella y también se la formulará todo aquel que lea esta obra. ¿Por qué? No puedo trobar millor texto pa resumir lo que pensé en rematar-lo. 

Anatomía de la lengua fa un recorriu por tot lo funcionamiento basico d'as luengas d'una manera bien entretenida y fendo que no podamos zarrar un libro que se leye en un petén. Parte d'o texto se centra en lo castellano, pero con la proximidat lingüistica que tenemos, muito ye aplicable a l'aragonés. L'autora espalda muitos d'os puestos comuns en las conversas sobre luenga que amaneixen de cabo ta quan en las rufiertas de televisión, a on que lo convidau d'o día igual t'opina sobre l'euskera que sobre hidrolochía, y que dimpués se reproducen memeticament en cenas familiars, puestos de treballo y barras de bar.

Igual como aprendié mas fisica con Asimov y Sagan que en las endormisquiaderas practicas d'a universidat, los articlos y libros de divulgación lingüistica d'Elena Álvarez y atras autoras me dispiertan muito mas intrés que aquells horribles libros de texto. Y sobre tot dan una buena envista a qui quiera fer un paso mas dimpués ent'os manuals mas tecnicos a on que sí que caldrá aguantar toda la terminolochía tecnica y la condescendencia de tantos autors.

Lo libro ye mas que recomendable pa qui quiera ficar-se en lo mundo d'as luengas y no tienga guaires conoiximientos. A qui ya en tienga, no le descubrirá masa de nuevo, pero disfrutará de curiosidatz que talment no sabese y, sobre tot, trobará una sobrebuena manera de comunicar la luenga y de fer-la intresant. En lo caso de que no hese leyiu nunca a l'autora, conoixerá antimás a una d'as millors divulgadoras lingüisticas d'o momento. Muitos d'os suyos articlos publicaus en Eldiario.es fan buena honra de tener-los a man pa quan lo cunyau d'o día diz sanseladas por retz u en lo mundo fisico. En un tema tant polemico y que tanto se'n charra, y con tant pocos conoiximientos, caldría muita mas divulgación lingüistica pa crebar tantos mitos que se repiten terne que terne y que son de facil vulcar si sabemos cómo. 

Que m'entivoqué d'estudios universitarios ye qualcosa que tiengo bien claro fa anyos. Que en lo costau d'as "letras" tampoco no trobaba guaire que me clamase l'atención, tamién. Talment si hese leyiu de chiquet libros como iste, y quantos atros que he conoixiu ya de gran, las cosas hesen cambiau. Nunca no lo sabré.