Muerte d'un follet (Microrrelato de Rocher)

Los muesos d'as fornigas dispertoron a Rocher. Prebó de mover-se pero garra parte d'o cuerpo no respondeba a las suyas ordens. Lo gai psicopata le heba deixau en las tres pedretas. Sentiba sangre salindo d’a boca, eslisando-se por lo peito, fuyindo por los foraus que lo muixón le heba feito. Manimenos, y por bella razón que no entendeba, continaba vivo. Immobil, notaba como se sumaban mas y mas fornigas a la lifara que s'heba empecipiau en ixe bosque. Cada bocau que feban le provocaba un agudo mal que le recorreba tot lo sistema niervoso. La muerte tardaría a arribar. Se miró arredol y no reconoixió lo puesto a on que chaceba. Lo gai l’heba tastau y espicociau y, en cansar-se d’a suya sabor, heba aventau ixe repui de follet dillá d'os suyos dominios. Sisquiá moriría en casa.

Empecipio con Rocher una serie de microrrelatos de folletz, que irán protagonizando a daria qualques d'os protagonistas y secundarios d'o libro Parola de follet. Me ha pareixiu una buena manera de seguir afundindo en toda la ripa de personaches que i creyié y de dar mas videta a lo libro. Aspero que tos faigan goyo.

Como vide... Acte de violència, de Manuel de Pedrolo

En un mundo desmemoriau como lo que vivimos agora, ye una fayena bien important recuperar lo sentiu d'os nuestros dreitos. Saber cómo hemos conseguiu lo poco que tenemos y que nos preban de sacar cada dia. Acte de violència, de Manuel de Pedrolo, ye un libro bien intresant pa ixe obchectivo.

En ye, porque leyer a De Pedrolo ye reivindicar una parte bien important d'a literatura en catalán. Un d'os mas grans productors que no por fer mas cantidat d'obras baixó la suya calidat. La esfugada que se ye fendo dende editorials como Sembrallibres pa difundir la suya figura consiguen que personas como yo sigamos disfrutando d'unas novelas bien escritas, entretenidas y con muito suco. 

En ye tamién por la propia historia de Acte de violència, una novela escrita en 1961 en lo preto d'a dictadura franquista, que no deixó que veyese la luz. Le calió aguardar dica 1975 pa poder publicar-la tot y que en 1968 mesmo heba ganau bell premio. 

Lo libro describe una vaga convocada baixo un lema que s'ha ixemenau por toda una ciudat en las suyas paretz y en papelotz que han iu pasando de man en man por comercios y fabricas. Toda la suya población tien una consigna: "És molt senzill: quedeu-vos tots a casa" (Ye bien sencillo: quedatz-tos totz en casa). Lo dia sinyalau quasi totz los habitants obedeixen y la ciudat se queda vueda. Nomás parte d'a policia ye en las carreras prebando de levar a la chent t'os suyos puestos de treballo. Cada capitol ye protagonizau por un personache diferent que nos va recontando la suya envista d'ista vaga, en una ciudat que no se nombra y con l'obchectivo d'acabar con la dictadura d'un chuche inventau clamau Llor Domina.

Pero lo mas intresant d'o libro, en la mia opinión, ye lo recuerdo que nos fa d'o poder que tien la movilización popular y masiva y la desobeciencia civil. Quan s'escribió, encara yera recient la clamada "vaga de tramvias" de 1951 que provocó un aumento d'o pre d'o billet. Por dos semanas, los barceloneses decidioron deixar de fer servir ixe medio de transporte, conseguindo a pur de presión que se tornase a baixar. Tamién Barcelona estió lo scenario, quantos anyos antes, en 1919, d'a vaga d'a canadiense, a on que la luita obrera consiguió la chornada laboral de 8 horas.

Las treballadoras no tenemos guaires atras ferramientas que lo nuestro numbro y la determinación que tiengamos pa conseguir los nuestros obchectivos y reivindicacions asumindo que ixo no ye mica facil y que l'enemigo que tenemos debant fará servir todas las suyas armas, literalment si cal, contra nusatras. Acte de violència, antimás d'una novela bien entretenida, nos recuerda ixo. Y por istas razons creigo que ye una obra bien recomendable pa qualsiquier persona d'izquierdas.

Los personaches de Daniel Higiénico

I hai muitas artistas que han permaneixiu en la mia vida, d'una manera u atra por muito tiempo. No son las mias favoritas, ni las que mas lo han petau, pero m'han acompanyau de siempre y se les arriba a prener firme carinyo. Ye lo caso de Daniel Higiénico. Le clamo artista, en chenerico, porque ye d'ixos de mal ubicar. Canta, sí, pero lo suyo espectaclo tien bella mica de teatro, y las suyas letras muito de literatura. Asinas que yera bien normal que antes u dimpués editase bell libro. En lo suyo zaguer paso por Zaragoza, me'n pillé un d'os que ha publicau: Personajes y su hígado.

Se tracta d'una replega de vintidos relatos que se van publicar en 2002, replegando los relatos publicaus en la revista La Nau de Palma de Mallorca y dimpués en la edición mallorquina de Mondo Sonoro. Igual como la suya mosica, todas las historias tienen ixa humor blanca que le caracteriza. La suya manera de veyer la vida, parando cuenta d'os chicotz detalles y preixinando la historia que i hai dezaga de cada chiquet obchecto que nos rodeya. Los protagonistas van d'un caragol a un auto viello u una maquina d'escribir, siempre recontaus en primer persona. Ye un libro de muit buen leyer y con lo qual farás la riseta bien a ormino. Antimás de Personajes y su hígado, Daniel ha publicau bell par de libros mas: Club Columbia, con cinquanta microrelatos de tematica negra, y El paseo infinito, la suya primer novela. Tot, sin deixar de fer discos.

Lo suyo nombre me fa venir siempre a la memoria un local: La Campana de los perdidos, agora clamada La Campana Underground.  Habré visto a Daniel una dotzena de vegadas, y quasi todas en ixe scenario tant acullidor que ye lo cobaixo d'ixe local. La programación de La Campana ha trayiu por muitos anyos t'a nuestra ciudat collas y artistas que no intresaban en atros puestos pero que teneban un publico fixo, como ye lo suyo caso. Por ixo, cada sala de conciertos que zarra ye un desastre pa la cultura d'a nuestra ciudat. Quan m'enteré de que La Campana cambiaba de duenyos, un d'os mios primers pensamientos estió que no tornaría a veyer a Daniel Higiénico en Zaragoza.

Pero una vegada mas m'entivocaba. La sala Juan Sebastian Bar, especializada en humor, lo trayió fa bella semaneta. Daniel, una vegada mas, puyó solo t'o chiquet scenario y empecipió a recontar-nos todas ixas historias que tien por lo tozuel luitando por salir. Tot ixe mundo de personaches, chupius de fantasía y de vez de cotidianidat, que mantienen a sobén un dialogo, y mesmo bella baralla, con lo suyo creador. A l'atro canto, pasemos unatra vegada mas, un rato sobrebueno alufrando a un d'ixos chicotz chenios que te fan la vida mas bonica y divertida.

I fue con Arale, con qui he compartiu a-saber-los conciertos suyos, y con unatro amigo que nunca no lo heba visto. Que nian le sonaba. Como Daniel ha feito parte d'a mia vida por tantos anyos, se me fa raro quan bella persona no lo conoixe. Quan nos preguntó por bella canción famoseta d'ell, no sabiemos ni responder-le. Le'n pasemos bell par d'as que mas goyo nos feban. No sé si le pasará como a tantos atros artistas que acaban fartos y odiando la canta que les levó a la fama, pero con ixa, que yo nian me'n alcordaba d'ella, remató lo concierto: Lo bar de moda.

Sentir-la, antimás de recordar-me que habe anyos se le sentiba mesmo en radio formulas, me trayió alcordanzas d'o primer concierto suyo que veyié. Yera arredol de 1997, y en la Multiusos actuoron ell con la suya banda, Ixo Rai! y Tako. Yo ya yera fan de Tako dende lo colechio, y yera la primer vegada que veyeba a Daniel. A los Ixo Rai! nos lo conoixeba que de bell amigo que me n'heba charrau y creigo que ixa estió la primer vegada que los sintié, encara que iba como un cesto por lo que lo tiengo tot una mica nublo. Quasi a cada canción Daniel s'iba calando accesorios u cambiando de disvraz, pa ambientar la canción que tocaba. Tocaba en aquellas envueltas con la suya banda, la Quartet de baño band, antes de pasar-se a lo show solenco. Lo publico tien lo mal costumbre de ignorar a los teloneros, asinas que toda la chent que bi fue nomás por Tako u Ixo Rai! se perdió un concierto a saber qué divertiu y que pocas vegadas mas se tenió la oportunidat de veyer en Zaragoza.

Daniel, como tantos atros artistas, ye un gran contador d'historias. Las suyas cancions a sobén son microrelatos que scenifica en cada actuación. Y antimás tamién se puet disfrutar en papel, soporte a on que lo fa rebien. Sisquiá los locals de Zaragoza continen apostando por ell y lo tiengamos por aquí muitas mas vegadas.

L'arbol de Cambrils

Cada viache que he feito d'adulto ta Cambrils m'ha traito a-saber-los recuerdos de nineza. Son anyos arrienda pasando-ie ixos estius de ninón que duraban dos meses y, encara que fa no tanto lo ignoraba, me deixoron mas bayo que no pensaba. Muitos d'ixos recuerdos m'arriban, lochicament, quan paso por seguntes que puestos. Por tot lo lugar trobo qualque historieta pa dar-le ferrete a la pacient Arale que gosa d'acompanyar-me. Pero i hai un puesto a on que se chunta en muit pocos metros un puntal d'ixas acordanzas. Ye lo cruce d'a Rambla Jaume I con l'Avinguda de la Diputació.

En la placha, bien cerqueta d'ixa rotonda, ye agora lo Denver, un chiringuito de placha bien normal. D'os que se fan agora, con una estructura bien simpla y desmontable, sin ocupar guaire puesto. Pero antes mas, n'i heba unatro a on que yo pasé firmes horas: lo Copacabana. Yera bien gran, con mesas a embute, u lo menos asinas lo remero yo. Mis pais gosaban d'estar-se-ie fendo bella biera entre que yo chugaba a futbol con qualsiquier clica de zagals que s'hese chuntau por astí cerca. Quan no en trobaba, de zagals pa chugar, lo Copacabana teneba siempre bella maquineta d'arcade que m'embacilaba. ¡Guarda si no chitaría monedas de 25 en lo traste aquell! Amás, lo chiringuito teneba un piano y, muitas nueitz, un pianista. Yera un hombre que tocaba los clasicos plachers y que de cabo ta quan i levaba a la suya filleta que nos feba ixo de “Baixant de la font del gat”, probablement las primers parolas que memoricé en catalán. A yo me feba firme goyo asinas que, encara que no yeranos que borches, la mia familia siempre feba chanza con que en yera enamorisquiau.

En frent, ya salindo d'a placha, bi ha agora un restaurant. No be d'estar guaire bueno lo puesto ixe porque a cada anyo que bi imos le han cambiau lo nombre y la mena de cocina. Por qualques anyos lo debeba levar bell aragonés, porque yera decorau con a-saber-la simbolochía d'o Reyal Zaragoza. A lo canto i hai una replaceta. Quan yera chiquet, ixe espacio yera muito mas amplo que no agora y no teneba gudrón ni recholas. Yera suelo de tierra y se i meteba una churrería: La Caspolina. Como podetz endevinar por lo nombre suyo, la menaba una familia de Caspe, con qui a escape faciemos pacha. Lo fillo que teneban ye lo mas pareixiu que tenié a un amigo “fixo” en Cambrils y gosabanos d'ir chunto t'os recreativos que en aquellas envueltas tanto abundaban. En la churrería, amás de churros, porras y tot lo tipico, i vendeban tamién ixas crostas de trigo, que las heban feitas ells mesmos, en la suya freyidora chigant, y que mica tienen a veyer con los Boca Bits. Yeran bien grans, y te caleba fer qualques muesos a cada una pa acabar-te-la. En una bolseta puet estar que no n'i cullisen que cinco u seis. Teneban aceite a embute y a cada bocau que le febas, en surtiba bell poquet, deixando-te los didos prestos pa laminar-te-los dimpués. Ixas crostas no yeran de mal trobar antes mas, pero china-chana fueron deixando paso a las industrials que cuento que serán mas baratas y a fe que mas comodas pa las churreras. Con tot y con ixo, siempre que puyo t'a Feria d'o Libro Aragonés de Monzón, chunto a la nau a on que se fa, se gosa d'instalar una churrería que encara en fa. Prou que sí, no puedo deixar de permitir-me ixe concieto que me transporta de camín a ixa churrería y a la mia nineza. Con la reforma d'o paseyo, la Caspolina habió d'espipar-ne. S'estió bell anyo en atro emplazamiento y arribó un verano que simplament heba dispareixiu de Cambrils.

Muit cerqueta d'a Caspolina se trobaba un d'os mios arbols favoritos. Ye un Phitolacca, una especie que, que yo sepa, no he tornau a veyer nunca. Las suyas radices son a saber qué grans y sobreixen d'a tierra. Teneba pa yo dos grans virtutz. La una, que feba mosquera, y l'atra que ixas grans radices teneban l'altaria perfecta pa que un nino se i posase. Entre que mis pais feban ringlera en la Caspolina, yo les i aguardaba leyendo bell libro, u puyando por los camals mas baixos. Quan baixabanos t'a placha, y iba correndo tant atarrantau que i arribaba qualques minutos antes que no ells, me i posaba tamién bell rato. Las formas que feban las radices, lo tronco y las brancas me dispertaban la esmachinación y me pensaba que yeran tal u qual cosa. De revés, quan tornabanos d'a placha enta casa, l'arbol me serviba pa agarrapizar-me-ie y prebar de fer-les venir a plego pa quedar-nos un ratet mas con una rabieta de crío chiquet. Los ploros y los chilos nunca no funcionoron, lochicament. Una vegada, tant fuerte debié estirar pa no salir d'a placha que, astí debaixo d'ixe arbol y probablement por las fuerzas en contra de mi mai y yo, se me salió lo brazo y habiemos d'ir t'a casa de salut. No estió la primer vegada, pero sí la zaguera, y la sola que recuerdo, tot y que muit malament. D'as tres referencias, lo Copacabana, la Caspolina y l'arbol, iste ye lo solo que encara i contina.

Agora veigo Cambrils con unos uellos de tot diferents. Por la edat, por las experiencias vividas, por la consciencia de que ye un lugar con la suya historia y lo suyo pueblo y no pas un simple puesto a on que pasamos lo verano lo cheposamen, y por tantas y tantas cosas. No soi de gronxiar-me guaire con lo recosiro. En los zaguers anyos he trobau muitos atros puestos a on que he viviu atras experiencias que me deixarán ixe bayo que comentaba en empecipiar. Pero regular que ixos no los ixuplidaré en la vida.

Libros y mosicas pa lo verano. Tierra de barrenaus 5x11

Quasi acabando ya la temporada, de vez que empecipiamos lo verano, tos traigo un programa rebutient de recomendacions. Una vegada mas, facié un clamamiento por retz pa que me ninviasetz propuestas de lectura. Me n'han arribau por totz quasi totz los medios posibles: twitter, facebook, whatsapp y en persona. Y todas bien intresants. Asinas que lo primer de tot, cal que agradeixca a toda la chent que hetz colaborau en iste programa.



Tener tiempo libre ye qualcosa rara en istos tiempos. Las vacacions son un momento sobrebueno pa fer baixar toda la pila de libros que qualsiquier lectora tenemos en casa pendients de leyer. Lo menos yo, ye una d'as pocas temporadas de l'anyo a on que consigo achiquir ixe muntón que tanto turmento me provoca. Con iste programa pretendo tot lo contrario: anyadir material a lo vuestro muntón personal. 

Antimás, cada propuesta literaria va acompanyada d'una canción de bella colla. Quasi todas ellas, bien recients, y muitas con bell concierto u festival en istos meses, pa que podatz disfrutar-las en directo. 

Con iste onceno programa de l'anyo, la cinquena temporada de Tierra de barrenaus ye a pocas de rematar. La seisena arribará pa l'agüerro. Y lo fará con bell cambio sustancial que iré anunciando. Entre que arriba ixa nueva etapa d'o programa, tos animo a ninviar-me todas las sucherencias, consellos, propuestas y ideyas que se tos ocurran. Todas serán bienvenidas.

Como vide... El hambre invisible, de Santi Balmes

La mosica y la escritura, bien a sobén, son chirmanetas separadas nomás por las melodías que la primera anyade a la segunda, u que la segunda suchiere a la primera. Los viaches d'autors entre una y atra son cutianos, y todas dos troban inspiración entre ellas. En lo caso de Santi Balmes, conoixiu por estar lo cantaire de Love of lesbian, la linia que fa de buega entre los suyos libros y las suyas cancions ye a saber qué difusa. Fa cancions como libros y libros como cancions, y tot lo fa bien.

Una estrena d'Arale va trayer t'as mias mans El hambre invisible, lo suyo zaguer libro, que teneba firmes ganas d'empecipiar. Fan confeso d'a suya mosica, heba preso bell anyo antes “La doble vida de les fades” con delera y miedo de vez. Siempre que un mosico trescruza la debantdita buega d'a literatura me trobo con ixa inquietut por si lo que leigo me fará burro falso, emporquiando de bella manera la suya obra anterior u, de revés, complementará la suya chenialidat contrimostrando que literatura y mosica no son que diferents soportes pa l'arte de contar historias.

Una vegada mas, puedo sentir-me afortunau d'haber puesto disfrutar d'un libro asinas. Dende la primer pachina me vide agarrapizau por lo viache onirico que nos planteya Santi t'a suya ment. Un trachecto por lo país imachinario de Bruma a on que va conoixendo las diferents partes d'a suya personalidat, pasada, present y futura, que i conviven. Lo libro ye bella mena de biografía – confesión a on que reflexiona sobre diferents aspectos d'a vida de qualsiquier de nusatras: se i tracta la creatividat, lo sexo, lo miedo a creixer, la responsabilidat, l'asunción d'errors... Belún que no lo entendese guaire bien, u que prebase de fer negocio con Balmes, mesmo lo podría calar en ixe horrible repalmar de “Autoayuda” que tienen todas las piors librerías y bibliotecas. Toca qüestions que todas hemos viviu y se fa preguntas que todas nos hemos feito, pero dende una envista y con un luengache machico y realista de vez, como a ormino te trobas en las cancions suyas.

En lo charrazo con las suyas diferents partes d'identidat gosa charrar mesmo con un hipotetico Santi Balmes aburguesau. Parlan de politica, de cómo perderá ixa capacidat esmachinativa en pro d'una vida comoda y aburrida, de l'herencio ideolochico familiar... Fa la parola con lo suyo choven yo poeta y con lo verriondo y mesmo con lo suyo nino, pa amostrar-nos todas las dubdas que ha teniu y encara tien, sin ufrir-nos respuestas chamanicas, marcar-nos camins, ni ufrir-nos un discurso que nos cambie la vida. Simplament reflexiona y, creigo, t'aduya a reflexionar sobre afers que no son los mas importants pa la nuestra sociedat, pero a fe que sí que pa muitas de nusatras en ixe camín perén que siempre femos enta l'autoconoiximiento.

Sin estar un libro sobre Love of lesbian, qui i busque referencias, en trobará quantas. A la suya mosica y tamién a la de muitos d'os que les han inspirau en totz istos anyos: Suede, The Cure, The Velvet Underground y, prou que sí, David Bowie, qui tien mesmo un chiquet cameo.

El Hambre Invisible ye un libro d'ixos que te deixa una sensación placentera d'haber leyiu buena literatura. D'ixos que sabes que tornarás a leyer bell diya, d'os que leyes fendo momos con lo que te trobas en cada pachina, establindo de bella manera un dialogo con l'autor. En la mia opinión, Santi Balmes ye un d'os grans creadors d'istos anyos, y se troba en un momento de mal millorar, pero mesmo ell puet fer-lo. Sisquiá contine por muito tiempo con iste libel.

La luenga no aprecisa chustificar-se

Articlo orichinal, de Xavier Aliaga, publicau en El Temps.cat

¿Por qué hemos de leyer libros? Iste interrogant sería bien alto en un hipotetico ranking de preguntas presuntament retoricas. De cutio, por inercia, s'argumenta que leyer nos fa mas sabios y libres, millor personas. Y etc. Los argumentos de manual, manimenos, s'erosionan con lo paso d'o tiempo, pierden valura persuasiva.

Por ixo, quan he de parlar debant d'un auditorio con chent choven, de vegadas fuigo d'os puestos comuns y foi servir argumentos utilitaristas: miratz-tos, sotz personetas de viache a la edat adulta que antes u dimpués menaretz equipos, faretz entrevistas de treballo, habretz de vender crabas y motocicletas diversas y habretz d'ubrir-tos paso en una selva con chent que sabrá mas idiomas, tendrá mas cultura y mas recursos expresivos y discursivos que no vusatros. No pateixcatz por ixo. Sotz bien chovens y no ye cosa que no pueda amillorar-se viachando y tenendo uns buens costumbres de lectura. De lectura de libros, si puet estar, lo millor puesto pa entender la complexidat d'o mundo.Talment bell diya, belun de vusatros m'agradeixerá iste consello... 

Y bla, bla, bla. Porque lo mas seguro ye que garra d'as criaturas no recuerde nunca lo consello d'ixe sinyor. La hipotesi mas factible ye que ista mena d'elechías los impresionen bien poco. De feito, son discursos a los que sigue la punyetera pregunta – cada vegada menos freqüent, cal decir-lo – de “¿por qué no escribes en castellano?”.

A la finitiva, un adulto me fació la observación de que iste argumentario le sacaba grandeza y misterio a la literatura y los libros. M'acusaba de chustificar con razons materialistas qualcosa que no cal que se chustifique, que tien valuras intrinsecas. Los buenos libros, ciertament, no aprecisan demandar disculpas: leyer-los nos fa millors. No habríanos d'acotraciar y atrapaciar lo feito de leyer. I hai diyas  que lo remordimiento me rosiga por adintro. Por lo mesmo pre, manimenos, m'entero de que una escuela de negocios asociada a la Universidat Pompeu Fabra, la School Barcelona Management (SBM), edita y distribuye entre alumnos y profesors libros como Candido u l'optimismo, de Voltaire u Bartleby, l'escribient, de Herman Melville. Con la bienintencionada intención de enfortir la formación humanistica y, por tanto, las capacidatz d'os futuros dirichents d'organizacions. Nomás que preben de fer-lo, provoca ternura y optimismo.

Lo tema d'a luenga suchiere reflexions pareixidas. Fa bell dia, l'Instituto d'Investigacions Economicas, a propuesta d'a Consellería d'Educación y Cultura, publicaba un informe sobre l'impacto d'o catalán en la economía valenciana. Cifras mica despreciables quanto a lo PIB y la creación d'ocupación. Ye muito bien fer istas cosas, recordar que l'emplego d'a luenga tien tamién un impacto economico, pero no deixa d'estar un argumento utilitarista, una autoreivindicación que no toca la fibra d'a chent que no se'n siente implicada u concernida. Pasa la mesmo con la (necesaria) capacitación lingüistica: pa normalizar l'administración y guarenciar los dreitos de tot los ciudadanos, istas midas habrían d'estar innegociables. Pero tampoco no podemos fer-nos masa contentos por las lechions de funcionarios y mesmo treballadors d'a interpresa privada que s'apuntan a cursos pa conseguir dimpués certificacions de competencia lingüistica. Ixo ye muito bien. Con tot y con ixo, la immensa mayoría lo fan por obligación, y segurament, a retepelo.

No me soi posicionando a favor de l'argumentación eteria y tramposa de que la luenga “no s'ha d'imposar”. I hai cooficialidat, ye una qüestión de respecto, de dreitos y de sentiu común. Mesmo de buena convivencia: ¿Por qué hemos de respectar a qui no ye capable de fer-lo? La buena qüestión ye que los argumentos y procedimientos utilitaristas no son prou, la luenga propia d'os valencianos se salvará en la mida que i haiga una conexión mental, una convicción. A la luenga no li cal chustificar-se pa vivir: ye un patrimonio legau d'as cheneracions que nos han precediu que, a pesar de totz los entrepuces, s'ha manteniu vivo y con una vitalidat que los pesimistas de guardia no podeban esmachinar.

Un tresoro cultural que no s'ha de desfender de l'acusación zaborrera, fata y intelectualment miseriosisma que “no vale pa cosa”. Conoixco muita chent que se i ha incorporau, que ha trencau ixa barrera mental y que ya ye capable de percebir como propia una luenga que no ye la luenga materna. Personas que no lis cal estimar-se-la en termins d'utilidat profesional u d'impacto en lo PIB. Bellas vegadas nomás cal una purna, una amistat, una relación, una canción, un libro, un programa televisivo infantil (¡en ye d'important ixo!), pa fer espaldar los muros d'a chent de buena voluntat. Por ixo, cal estar buenos profesors, mayestros, companyers y vecins, estar pacients, producir cancions, programas y textos literarios de gran libel. Chenerar impresions esteticas, empatía, complicidat.

Sabemos, ixo sí, que qui ye intolerant y irreductible, en será siempre.