Deixatz a las vuestras novias

Me plega un mensache a la sola colla de WhatsApp que tiengo a on que nomás somos tíos. Miedo me fa cada vegada que veigo mensaches sin leyer astí. Con razón. Ye un video. I amaneixe un hombre, de bells cinquanta anyos, y diz:

"A ver, pregunta: Si ahora cuando acabe la desescalada y termine todo esto, te dan a elegir entre irte con tu parienta, tu novia, tu mujer, tu esposa a un lugar soñado durante una semana o irte con tus colegas a hartarte de vino y a comerte un buen chuletón, ¿qué escogerías? a) poco hecho, b) al punto, o c) muy hecho"

Sé que qui lo ninvia no tien garra mala intención. Que, de feito, adora a la suya muller y le fa goyo de pasar tiempo con ella. Lo ninvia porque fa parte d'ixe imachinario colectivo imperant a on que los hombres somos uns menors d'edat que nomás queremos pasar-nos-lo bien con los nuestros amigotz y las mullers son unas bruixas que no nos deixan fer-lo, que nomás quieren que faigamos cosas "de tías", veyer pelis "de besos" u charrar de sentimientos, ¡qué catenazo!

Un relato prou ixemenau y que, quan no i participas, se te miran como si fueses bell marciano. "A iste lo tien bien ligau la parella", se piensa mas d'un. No entienden que no quieras estar-te rodiau de nomás hombres, comentando lo que piensan sobre lo fisico de toda zagala que traviese lo suyo campo visual u las fetas esportivas d'a semana. No entienden bella cosa tant basica y de buen entender como que he esleixiu compartir la mía vida con la mía parella porque, antimás de querer-la, me lo paso bien con ella. Me fa goyo de pasar tiempo a lo suyo costau.

Quan veyeba lo video, talment porque m'entrefilaba la fin, no quereba deixar-lo acabar. Sin saber la segunda opción, la respuesta ye "sí". Quan acabe la desescalada quiero marchar con la mía parella ta bell cabo que nos faiga goyo. Estar-nos chuntas dillá d'as quatre paretz de casa nuestra, y d'as mugas d'a ciudat u lo país. Fer-nos bella cursa, conoixer mundo, compartir ratos diferents a los d'a rutina d'o días de cada día. Porque una d'as cosas buenas d'istos días de confinamiento precisament ye estau lo tiempo que hemos disfrutau chuntas: los podcasts grabaus, las partidas con la consola u a chuegos de mesa, las cintas, las bieras en la balconada...

Prou que de cabo ta quan a las dos nos fa goyo d'ir-nos-ne con atras personas. U mesmo d'estar-nos solas. Que no ye incompatible. Disfruto a-saber-lo los ratos con las mías amistatz, masculinas y femeninas, quan ye ella, y quan no i ye. Apreciso, de cabo ta quan, que no i sía, porque tamién tenemos los nuestros problemas y circumstancias y me cal charrar-los con belún, prou que sí.

Hombres que queretz estar-tos tot lo tiempo con los vuestros amigotz fendo bieras y veyendo lo futbol sin que denguna tos faiga estorbo: he trobau la solución. Deixatz a las vuestras novias, parientas, contrarias, mullers, esposas, chorbas, chochos... Deixatz-las ya y no habretz de patir todas ixas incomodidatz que fican en la vuestra vida cutiana. Podretz estar-tos tot lo día minchando chuletons y chugando a la Play u veyendo lo futbol en coritatis. Talment sisquiá haigatz de seguir todas ixas indicacions absurdas sobre la vuestra hichiene. Ye tant facil como ixo: deixatz a las vuestras novias. En istos tiempos y en istas latitutz, a dengún  se le obliga a casar-se u a convivir con dengún. Lo fetz voluntariament. No bi ha habiu suegro con escopeta apuntando-tos entre que pronunciabatz los vuestros votos. Sotz amos d'o vuestro destín. Podetz deixar a las vuestras mullers y, si no adubitz a pagar lo loguer, siempre podetz compartir casa con bell amigo. U mesmo con bells quantos. ¡Qué palacio de borinas y chuegos tos podríatz montar!

Sé que son gromas "innocents". Que pocas vegadas i hai mala intención en qui fa circular ista mena de mensaches. ¡Pero en son de penibles! Por la parte que nos toca, hombres que me leyetz, ¿hetz parau cuenta bella vegada d'o nuestro papel en ixe relato? ¿de verdat creyetz que las vuestras mullers son "mais 2.0", con las suyas fayenas socialment asignadas? ¿de verdat queretz que en sigan? ¿Sotz argüellosos d'as vuestras incapacidatz? ¿de preferir la companyía de qualsiquier a la d'a persona con qui has trigau vivir? Si ye en serio, repito: deixatz a las vuestras novias. Si no en ye, deixatz d'ixemenar mensaches que las deixan a ellas como unas gripias y a nusatros como un desucaus.

Ah, y pa forro de bota, no me fa goyo lo chuletón. A la mía parella sí, por cierto.

Los chardins rapers de Krevi. Tierra de barrenaus 6x20

Krevi y Gaire actuando en la
presentación d'o libro "A Escuchetes"

Dimpués de totz istos meses tant ratos y de quatre programas condicionaus de tot por la crisi sanitaria, torna lo Tierra de barrenaus mas canonico de toda ista temporada. Torna l'estudio, las falcas, lo calaixo de cancions y, prou que sí, tornan las entrevistas, que ya en feba de ganas!

Estar en estau d'alarma no evitar que muitas haigamos continau treballando en los nuestros prochectos. Un d'os que le ha supliu firme ye lo raper Krevi que acaba de publicar lo suyo disco Os chardins de Shalimar, de tot en aragonés. Con colaboracions bien especials, una producción a saber qué treballada y la calidat de cutio, dende fa bella semana podemos disfrutar d'iste discazo suyo que ya ye disponible en plataformas. Feba tiempo que garra artista no se decidiba a fer un disco de raso en ista luenga y, antimás, le ha quedau de pistón. En la entrevista que le facié podretz saber mas sobre lo disco y conoixer millor a lo mosico.

En la segunda parte, tornan los relatos. En locuto un, La hora de l'aplauso, ambientau en istos días de confinamiento y balcons, a on que la policía empecipió metendo pinyoras a bando con enchaquias de toda mena. En una carrera bien especial d'a parte viella de Zaragoza, lo vecindau asiste a ista chiqueta historia con un policía y un malabarista como protagonistas.

D'o calaixo de cancions en quito una nueva Canción blasfema. Un tema d'un d'os míos grupos favoritos que torna a sonar en Tierra de barrenaus radio, d'un disco que remera cómo matoron a lo zaguer hereche en 1826. Como canción d'o programa n'he trigau una que odiaretz u amaretz, pero que a fe a fe que no tos deixará sin opinión.

Queda pocos programas d'a temporada y ya los tiengo quasi zarraus, pero encara sotz a tiempo de ninviar-me todas las propuestas, cancions, preguntas y sucherencias que queratz. Siempre serán bienvenidas.

Programa #79

En leyendo... La mano invisible, de Isaac Rosa

I pasamos ueito horas, u mas, cada día. I pensamos terne que terne. Si no en tenemos, nos anguniamos, y si en tenemos, lo patimos. Diz que dignifica y que no querer-ne ye de galvans. Ye una d'as partes mas importants d'as nuestras vidas y manimenos, qué poco pensamos en la naturaleza d'o treballo.

Las relacions laborals condicionan la manera en qué vivimos y todas querríanos millorar-las. Pero los debatz publicos, las rufiertas en los medios y en los bars, las polemicas en los retz socials son atras. D'o treballo, se'n charra bien poco y en termins poco fundos. Se prenen como naturals u inevitables qüestions que no'n son u no habrían d'estar-ne. Y quan queremos charrar-ne nos trobamos con toda una literatura de manuals economicos y socials de mal leyer con los uellos de qui no ye docto en la materia. Asinas que un libro como La mano invisible de Isaac Rosa, me pareixe esencial.

En ista obra, los protagonistas son una colla de treballadors, quasi totz "de baixa qualificación", que empecipian a fer la suya fayena en una nau con publico. I hai un mecanico, una administrativa, una teleoperadora, un piquer y asinas-asinas. Lo suyo treballo no saben pa qué vale. Lo piquer, por eixemplo, ha de devantar un muro y dimpués espaldar-lo, pagando-le por fer-lo. A traviés d'os suyos uellos, conoixemos los mundos laborals de cadaún, cómo han viviu las suyas fayenas anteriors, cómo ye la relación con los mainates y entre ells, quals son las suyas aspiracions...

Isaac Rosa, articulista en medios como Eldiario.es, Publico u El Jueves, ha publicau tamién a-saber-las novelas que han conseguiu premios arrienda. Ista ye una chiqueta choya que s'habría d'ixemenar por tot. Una reflexión sobre lo mundo d'o treballo bien valiosas y de muit buen leyer. En lo Tierra de barrenaus radio 6x19 en leyié iste trocet que me plegó en un momento a on que yera pasando por una situación laboral bien pareixida. Qualsiquier que haigatz treballau mas d'un mes en la vuestra vida, regular que trobaretz a-saber-los trozos que tos i podretz sentir identificadas.

Ella s’obligaba a pensar, porque le ixorrontaba la ment en blanco, sabeba que no existiba, que siempre se piensa en qualcosa, tot y que siga la seqüencia, trianglo, rectanglo, trianglo, rectanglo, pero le deprimiba quan dimpués de siet horas y meya plegaba en casa suya y, en la ducha, miraba de remerar en qué heba pensau ixe día, miraba de recuperar un solo pensamiento y no en yera capable, s’heba estau una día entero sin pensar-ie, concentrada en lo cenyo, prener la tola, meter-la en la maquina, preta lo botón, taladrar, chitar t’o contenedor, redonda, quadrada, redonda, quadrada, por ixo s’obligaba a pensar entre que treballaba, planeyaba lo que iba a fer en salir d’a fabrica, pensaba en lo cabo de semana, organizaba fayenas de casa, repasaba la lista d’a crompa, u remeraba, s’encerrinaba en fer memoria, igual recuerdos importants como banals, remeraba momentos d’a vida suya, s’obligaba a pensar y remerar porque ixo teneba muito d’obligau, d’aforzau, de decir-se a si mesma voi a pensar en isto u ixo, por contra no i pensaba, u nomás pensaba lo movimiento, agafar, amanar, aparar, taladrar, triangular, rectangular, triangular, rectangular y tot y que s’obligaba, lo pensamiento s’iba afeblindo, se disipaba u se tornaba repetitivo, se quedaba entrascada en un mesmo pensamiento circular, sin abanzar. Yera como nadar en una piscina: bi habió un tiempo que bi iba dos dias por semana, le feba honra pa la suya esquena, siempre menazada de ciatica por la postura en lo treballo: yera una piscina chiqueta, sisanta largos, y entre que feba brazadas, paraba cuenta de que lo suyo tozuel funcionaba como en la fabrica, nadar yera la mesma mena d’automatismo que taladrar piezas de tola, brazo dreito abanza, brazo cucho abanza entre que brazo dreito torna ta zaga, redonda, quadrada, redonda, quadrada; uno no piensa en los movimientos entre que nada, no diz agora voi a pasar debant lo brazo dreito, agora lo cucho, lo cuerpo nadaba solo y lo tozuel se desentendeba, acababa tamién calculando, contando largos, multiplicando pa saber quántos metros nadaba y en quánto tiempo lo feba, a qué velocidat, qué distancia heba recorriu en un mes, en una anyada, porque pensar baixo l’augua yera como pensar entre que treballaba, si cantaba se quedaba entrascada en l’estribillo, planificaba qualcosa que heba de fer y tampoco no abanzaba, triangular, rectangular, triangular, rectangular. Bella vegada le’n preguntó a un companyer en salir, lo solo momento pa charrar ya que las pausas en la fabrica yeran programadas pa que los treballadors no s’encertasen, no podesen parlar entre ells, los incheniers explicaban que yera la manera de que no s’aturase la producción, que las maquinas pateixen d’amortar-las y enchegar-las y tampoco no se pueden deixar tanto tiempo en marcha sin actividat, pero ella barruntaba que en realidat yera pa escusar-se que compartisen queixas y acabasen organizando asembleyas, seccions sindicals y vacas. Redonda, quadrada, redonda, quadrada. En l’autobús enta casa le’n preguntó a un companyer, en qué piensas entre que treballas, y l’atro se fació la riseta, dubdó, no entendeba la pregunta, en qué pienso me preguntas en qué pienso. Sí, qué tiens en lo tozuel entre que i yes, repetindo los mesmos movimientos terne que terne, t’alcuerdas de bella cosa u de belún, piensas en las cosas que farás quan en salgas, cantas, fas la cuenta d’o que has produciu, te cagas en los muertos d’a dirección u nomás te concentras en lo que yes fendo, di-me: pero l’atro, sin sacar-se la riseta que le deixaba cara d’apamplau se salvó porque plegó la suya aturada, y si no en yera eslampó igual, dica manyana. Triangular, rectangular, triangular, rectangular. Atra companyera que feba lo mesmo que ella pero seqüenciando manillas de puerta y tapes de deposito en cuenta de retrovisors, le contó en salir que ella no pensaba en cosa, que simplament feba la suya fayena, pero que no le importaba no pensar, ella sabeba que ixo yera un treballo y que heba de fer-lo pa ganar diners, pero no deixaba que le amargase la vida, difuera d’allí teneba maneras d’entretener-se, de curar-se la cansera y l’aburrimiento, yera feliz con lo suyo novio, lo pasaba bien los cabos de semana, veyeba a-saber-las cintas, y antimás yera estudiando a distancia puericultura, le encantaban los ninos, asinas que no le importaba fer siet u ueito horas astí adintro, no yera infeliz, no baruquiaba, asinas lo dició, yo no baruqueyo, ye un treballo y prou, y antimás no le feba goyo de charrar-ne, no yera disposada a dedicar-le un minuto d’o suyo tiempo difuera d’a fabrica, sabeba que bi heba chent que plegaba en casa y contaba como le heba iu, lo que heba feito en lo dia, los problemas que heba teniu, pero yera porque teneban cosas intresants que contar, treballaban en cosas mas intresants que no ista, como lo suyo novio, por eixemplo, que yera comercial y siempre teneba bella cosa a contar, pero ella no, no teneba cosa que responder si lo novio suyo le preguntaba como heba iu lo día, como siempre, igual como ahiere y como manyana, cada chornada yera identica a la anterior y nunca no bi heba novedatz, asinas que pa qué charrar-ne, la fabrica que mereixeba que ella le dedicase ni un segundo d’a vida suya, ni un sacre de preocupación adintro u difuera d’allí. Se despidioron, y ella no le dició lo que le pareixeba, pa no emprenyar-la, pero le habría feito goyo d’explicar-le que lo suyo yera una trachedia, que lo suyo embrutecimiento yera total y que yera la maquina perfecta, la maquina de carne que la interpresa buscaba.

Tierra de barrenaus 6x19. Programa en desescalada

Pa plegar en la nueva normalidat falta bien poco. China-chana la ciudat va recuperando los sonius y las imachens de siempre, a las que cal anyadir-les agora los bozos - como les dicen por astí a ixos trozos de tela que nos tapan la boca en istos días - y las ringleras en totz los comercios. A monico, y con buen son, aspero que torne l'actividat cultural, editorial, asociativa, mosical, etc que furne de contenius iste programa de radio. Y que podamos fer viaches que recontar dimpués en antena, prou que sí.



Entremistanto, tos pencho un nuevo programa feito gracias a las vuestras aportacions. Los mensaches de Elena, Fernando, Dabi y Tamara m'han permitiu emplir de buena mosica ista edición de Tierra de barrenaus radio. Una vegada mas, m'hetz sorprendiu con las propuestas que van d'o folk t'o rap y d'Asturias a Hawai. 

En la parte d'os textos, n'he trigau tres, de Eduardo Galeano, Elena Álvarez y Isaac Rosa. Totz tres que disfruto a-saber-lo leyendo y que tos recomiendo conoixer la suya obra si ye que no lo fetz. Tamién cal anyadir-les un texto de Dulce Chacón proposau por Tamara, que ye bien bonico. 

Aspero recuperar lo formato cutiano en lo siguient programa, lo vinteno d'ista accidentada temporada. Pero las ganas de recibir propuestas vuestras y lo goyo que m'ha feito tener la respuesta que he teniu siguen astí. Las puertas d'o programa son ubiertas pataleras pa tot lo que me faigatz plegar, asinas que no dubdetz en contactar con yo pa lo que queratz.

Programa #78

Robots, zombis y alta literatura

En lo que claman "lo mundo d'a cultura" siempre bi ha habiu una actitut fachendosa y bambosa de refús a seguntes que cheneros literarios u audiovisuals. Las declaracions de Trueba clamando "imbecilidad" a lo cine de superherois son un eixemplo d'o sentir d'una parte bien important d'o culturetismo espanyol y forano. A monico, ixo va cambiando, pero encara queda firme camín por recorrer. Los libros de robots y zombis siguen considerando-se hue baixa literatura, simple entretenimiento que no aporta cosa. Que mesmo nos anestesia d'os problemas que se consideran reals u d'as grans preguntas d'a vida. Cuento que podríanos estar d'alcuerdo, Trueba y yo, en que una obra que nos fese reflexionar sobre belunas d'as qüestions mas fundas d'a nuestra existencia, y que lo faiga con un buen luengache literario u audiovisual, podría considerar-se alta literatura, cine u lo formato que siga. En la mía opinión, buena parte d'as obras de robots y zombis, son adintro d'ixa definición.

Simplifico con "robots" tot un chenero a on que la humanidat, d'una manera u d'atra, creya vida intelichent u preba de fer-lo. Iste, abracaría dende los golems d'a mitolochía chodiga dica los robots asimovianos, pasando por lo Frankenstein de Mary Shelley. Rai si l'orichen ye machico, tecnolochico u de qualsiquier atra mena, lo important ye lo feito de que la humanidat se mete a ran d'os dioses creyando vida y dando-le bell grau d'intelichencia. Las conseqüencias que ixo tien pa creyador y creyación son un d'os grans temas de toda ista literatura. Pero mesmo mas intresant me pareixe tot lo debat que gosan de tener istas obras arredol de quáls son las cosas que definen la vida, la humanidat y la intelichencia. Si queremos creyar vida artificial intelichent y a la nuestra imachen, lochicament habremos de definir la intelichencia y nos habremos de definir a nusatras mesmas pa poder asemellar ixa vida a la nuestra. La vida creada d'ixa manera artificial, en a-saber-las ocasions plega en un momento que deseya estar humana u que en ye considerada por parte d'a sociedat a on que vive. ¿Qué conseqüencias tien ixo? ¿Quan consideramos a un ser "intelichent"? ¿Quan empecipia a tener dreitos y de qué naturaleza serían? Fer-se y responder istas preguntas son reflexions que nos levan muito mas alla d'as aplicacions que puedan tener en la obra en qúestión. Nos aduyan a pensar sobre la nuestra propia existencia.

En los "zombis" torno a simplificar toda la ripa d'obras apocalipiticas y post-apocalipticas que bi ha. Dende George A. Romero dica Walking dead, pasando por Mad Max, los morlocks de La maquina d'o tiempo u lo Mecanoscrit del segon origen. Astí nos trobamos lo ser humano levau a los suyos limites. La sociedat como la conoixemos ha dispareixiu y nos hemos liberau, pa bien y pa mal, d'os vinclos que tenebanos con ella. Cómo actuaríanos si no tenesenos mugas legals u socials nos define a muitos como personas. Cómo funcionarían los grupos humans sin ixos cletaus mentals, social y mesmo fisicos nos define como sociedatz. ¿Trunfarían qui  practicasen l'apoyo mutuo u, por contra, lo militarismo y la violencia? ¿Cómo nos organizaríanos en situacions extremas? ¿Qué sobreviviría d'as nuestras sociedatz actual? ¿Qué entrepuces habríanos de concarar? ¿Qué querríanos salvar u recuperar d'as culturas pre-apocalipticas, y por tanto d'a vida d'o lector? ¿Qué ye lo realment valioso d'a nuestra vida? En la mayoría d'as obras, de nuevas, importa muit poco l'orichen de l'apocalipsi, como importaba poco l'orichen d'a vida artificial en las de robots. Rai si ye una pasa, un meteorito u bell armageddon relichioso. Lo important son las relacions entre los humanos que queda, una vegada desprovistos de todas las construccions socials y culturals fillas de milenios d'historia.

Bi ha de tot en istos cheneros, como en totz los cheneros. Qui no conoixca novelas de chenero negro, social u historico -totz tres muit bien consideraus- que sigan un catenazo u mesmo vasuera, pocas n'habrá leyiu. De zombis y robots, se'n ha escrito obras a boticiegas. De buenas y de mals, de fundas y de superficials, puro entretenimiento u que te plateyan preguntas que te deixan pensando-ie pa meses. Los artificios u los efectos especials bella vegada no deixan veyer tot lo que bi ha dezaga d'ells. Y d'atra man, buscar simplament pasar un buen rato no nomás no me pareixe cosa mala si no que no ye mica incompatible con difrutar d'ixa atra literatura que si se considera "alta".

Conservar la biodiversidat tamién ye protecher la salut humana

Escrito por Jaume Grau i Lopez. Biologo y miembro de Ecologistas en Acción

Publicau en La Directa lo 21 d’abril de 2020. Traducción de Tierra de barrenaus.

A sobén dende la sociedat s’ha visto a las personas que estudean y cudian la naturaleza (sigan professionals como biologos, ambientologos, cheologos u naturalistas y ecolochistas voluntarios) como chent idealista que se preocupa d’os animals salvaches y las plantas, pero aluenyaus d’os problemas reals d’a mayoría d’as personas. L’actual crisi orichinada por lo SARS-CoV-2 desmitifica en un petén ixa envista bell poquet despectiva d’a conservación d’a naturaleza y nos amuestra con una crudeza brutal como biodiversidat y salut humana son elementos de tot relacionaus

La comunidat scientifica fa anyos que alerta d’o risgo de que amaneixca una malotía d’istas caracteristicas. La OMS incluyió en 2018 en la lista de patochens infecciosos mas periglosos pa la salut global la clamada malotía X, que represienta una malotía encada desconoixida con la capacidat de causar una infección global descontrolada. En setiembre de 2019, un organismo vinclau a la OMS tornaba a alertar d’a seriosa posibilidat de que un nuevo patocheno provocase una grieu crisi mundial. A las malotías causadas por virus, bacterias, parasitos u fungos provenients d’animals que infectan a humans se les diz «zoonoticos». Lo 60 % d’as malotías infecciosas humanas rechistradas son zoonoticas y lo 75% d’as malotías infecciosas nuevas u emerchents tamién tienen orichen animal.

Pa que una malotía infecciosa se transmita cal la intervención d’a-saber-los factors. Como minimo intervienen lo patocheno y lo suyo huespede, pero en ocasions arrienda fa falta una especie intermeya, como los mosquitos, las caparras u las pulces, a la que se le clama vector, que ye la que transmite la malotía infecciosa dica lo suyo huespede final.

A-saber-los scientificos y scientificas coinciden en que la perdua de biodiversidat implica en la mayoría d’os casos un augmento en lo risgo de transmisión d’istas malotías. Que dispareixcan especies adintro d’un ecosistema altera lo suyo funcionamiento, influyindo en la transmisión de patochenos. Las especies que tienden a sobrevivir en istos casos gosan de tener mayor predisposición a aloixar y transmitir malotías infecciosas. Una mayor diversidat d’especies implica un efecto de dilución, ya siga por l’augmento de numero d’especie en la cadena de contachio y por l’efecto tallafuegos naturals que provoca una alta diversidat chenetica, entre atros factors.

La especie huespede orichinal d’a covid-19 no ye estada identificada encara, y tot y que los estudios apunten ent’o moriciego Rhinolophus u ent’o pangolín como orichens probables d’a cadena, los resultaus no son concluyents. Con tot y con ixo, sinyalar a la especie animal como causant u responsable d’a pandemia ye una error, como en ye culpar-ne a lo mesmo virus. Los virus ocupan dende fa millons d’anyadas una armiella esencial en los procesos y equilibrios ecolochicos, regulando las poblacions d’as especies. Quan lo correcto funcionamiento d’un ecosistema queda afectau, l’equilibrio se trenca y augmentan las posibilidatz de que virus potencialment patochenos traviesen la muga d’a especie y puedan infectar a atras especies animals incluyindo lo ser human. Ye l’acción humana la que ye dezaga d’a mayoría d’istas perturbacions.

Bi ha firmes eixemplos de malotías zoonoticas que nos han afectau en los zaguers anyos. Veigamos-ne qualqunas: lo virus d’o Nilo Occidental s’esparraficó con immensa facilidat en los Estaus Unius gracias a un paisache dominau por l’agricultura intensiva a on que s’ixemena la torda capezinegra (Turdus migratorius), huespede preferent d’o virus. La caza furtiva y venda de chimpancés como birolla en los anyos 1920 dió orichen a la SIDA. La desforestación de l’Amazonas provoca un gran augmento d’as poblacions de mosquitos a causa d’a exposición mas gran a la luz solar y la humedat propia de zonas recientement deforestadas, favoriando que s’ixemene la malaria. Abocar fosfatos y sulfatos emplegaus como nutrients en tierra agricola en zonas deforestadas d’as muntanyas de Belice fa que acaben en las planas baixas, transformando la flora local, favoriando lo progreso d’a especie de mosquito Anopheles vestipennis, vector mas eficient d’a malaria, en frent de l’Anopheles albimanu. La pesca incontrolada ha minguau las poblacions de peixes en Malawi, depredadors naturals d’os caragols acuaticos que acullen los parasitos responsables d’a esquistosomiasi, favoriando que s’ixemenen.

No se conoixe que un 1% d’os virus que viven en animals silvestres, y s’estima que podría haber-ie 1,7 millons de virus desconoixius que podrían fer lo blinco dica la especie humana. Con tot y con ixo, la manca de recursos economicos y la poca atención que recibe la comunidat scientifica fa que no bi haiga mayors abances en ista endrecera. La naturaleza no ye un enemigo desconoixiu, sino un aliau necesario. Los servicios ecosistemicos son aquellas funcions con las que la naturaleza contribuye a lo bienestar d’o ser humán, tanto fisicament como mental. La biodivesidat ye lo mayor furnidor de substancias y compuestos quimicos pa curar malotías arrienda. Seguntes la OMS, mas d’a metat d’a humanidat en los países d’o Sud pende dreitament pa la suya asistencia primaria d’as plantas localizadas en los suyos puestos d’orichen. En los países d’o Norte, lo 25 % d’os farmacos, proceden d’as plantas, lo 13% d’os microorganismos y lo 3% d’os animals. Las especies que actualment son en periglo podrían estar bien utils en tener una gran variedat de compuestos natural que permitirían continar desarrollando nuevas merecinas y talment estar imprescindibles pa curar malotías grieus. Se calcula que lo 21% d’as plantas merecinals conoixidas son menazadas d’extinción.

Organizacions de desfensa ambiental como Ecologistas en Acción desfienden como vía pa escusar-nos futuras crisis d’ista mena la restauración d’os territorios degradaus por l’acción humana, la protección d’as tierras salvaches y la biodiversidat, l’albandono d’as practicas abusivas d’o medio natural y un cambio de paradigma enta una economía que respecte la naturaleza. Lo mantenimiento d’os servicios ecosistemicos ye la millor guarencia de supervivencia.

Escrito por Jaume Grau i Lopez. Biologo y miembro de Ecolochistas en Acción

Publicau en La Directa lo 21 d’abril de 2020

Locutau adintro d'o Tierra de barrenaus radio 6x17