Capitans A Priori (Editorial de TdB 11x05)

Durant la pandemia d’a COVID 19 se popularizó un capitol d’a serie South Park emitiu en 2010. I amaneixeba un personache clamau Capitán A Posteriori, un superheroi que siempre arribaba en los conflictos y catastrofes cuan tot heba pasau y que s’adedicaba a sinyalar lo que s’heba habiu de fer antes pa que no plegase a ocurrir lo zancocho en cuestión. A escape, lo Capitán A Posteriori esdevenió un meme pa responder a toda la chent que, días, semanas, u meses dimpués s’adedicaba a decir tot lo que s’heba feito malament y que, de bote y voleyo, teneba una solución caboliosa que l’administración heba ignorau.

Bi heba muita razón en acumular-les ixe aposteriorismo. Dengún no se podeba entrefilar, cuan lo virus empecipió a fer pasa allá ta China, la dimensión que podría prener, ni que la solución pasase por encadar-nos d’ixas maneras. U cuasi dengún, porque la verdat yera que sí que bi heba habiu chent que levaba tiempo avisando de que una pandemia yera asperable vistos los nivels de población, los movimientos internacionals de personas, lo cambio climatico y cuantos atros factors que feban que una pasa mundial fuese no nomás asperable sino cuasi inevitable. Agora ya hemos asumiu que, antes u dimpués, belatra pandemia arribará y asperamos que, en ixe momento, las administracions publicas y la sociedat sepamos responder millor que en la d’a COVID.

Ixos que avisoron son los mesmos que barruntaban cualcosa como la dana que arrampló con buena parte d’o País Valenciano y fació atras esferras mas chicotas en Aragón, Catalunya y Castiella: la comunidat cientifica y lo movimiento ecolochista. Levan anyos, decadas, avisando d’as consecuencias d’o cambio climatico. D’as suyas causas, que los gubiernos continan ignorando y d’as suyas consecuencias, que agora patimos en la suya versión mas cruel y esgarrifadera. Cientificas, urbanistas y ecolochistas habe tiempo que advierten d’as zonas a on que no s’habría de construyir, d’a imposibilidat de domar a la naturaleza pa cutio, de que los ríos tienen los papels d’os suyos cauces. Cientificas y ecolochistas amuntonan datos y datos sobre lo calentamiento d’a Mediterrania y lo que ixo puet causar en las costas d’o sur europeu. I hai un ciento de capitans a priori que, si se les fese caso, se podría evitar, u lo menos amerar, las consecuencias d’istos desastres. 

Cientificas y ecolochistas leva decadas acertando. Vaticinando un por un toz los acontecimientos que son ocurrindo, fendo prediccions que, a la fin, s’han contrimostrau ciertas y mesmo masa optimistas. 

Prou que ye dificil, mesmo imposible, acertar con los detalles. Cuán, a ón, cómo, con qué intensidat sucederán istos fenomenos. Pero sí se puet decir, a fe, que pasarán y que, como no deixan de dar-ne ferrete ecolochistas y cientificas, la sola solución ye adaptar-se, prevenir y estar-se a la tisva.

Manimenos, la respuesta dende las administracions, va en la dirección contraria. S’ignora a lo movimiento ecolochista, se le perigue, criminaliza y engarcho-la. En bella parte d’o mundo, dreitament se les asesina. Los diners pa la ciencia se retallan u s’adedican nomás a la investigación empresarial u d’as universidaz privadas, mas preocupadas por los rendimientos economicos que por lo futuro d’o planeta y los suyos habitants. Los presupuestos pa unidaz d’emerchencia y mantenimiento d’infraestructuras s’achiquen u dispareixen entre que una parte, minoritaria pero muit motivada, d’a sociedat aplaude a lo chilo de ¡menos ciencia y mas toreros!

A l’atro cabo de l’Atlantico s’acaba de votar como president d’o mundo a un criminal golpista que niega las evidencias cientificas, financiau por los principals culpables d’o cambio climatico y de que no se implementen las politicas d’adaptación que podrían salvar-nos-ne. Un faixista refirmau por las elites d’a comunicación que le consiguen que los suyos mensaches arriben a cada chiquet cantón d’o mundo.

¿Qué fer-ne? Sisquiá tenese la respuesta. I hai libros, articlos, teorías a trompicuesco. Que cada ún busque la suya y, si la trobaz, fez-me-la saber. Cuento que en istos somos muitas las personas perdidas. Dende ixa desorientación absoluta, seguiré fendo lo que puedo y treballando a on que creigo que puedo aportar mas: en la comunicación. En lo blog, en los míos libros, allá a on que me deixen parlar.

Popurri a priori. Tierra de barrenaus 11x05

Nuevo programa popurri a on que tornamos con buena cosa de contenius, que empecipian con una editorial relacionada con la dana d’o País Valenciano, lo cambio climatico y lo papel d’a comunidat cientifica y los movimientos ecolochistas.

En la parte mas creativa, trayemos poesía y narrativa. Pa la primera contamos con Cardelina un poema bien bonico escrito por la Ángeles Marto que nos presienta y recita ella mesma. En l’apartau d’os relatos, en locuto un d’o reto Inktober de 2020: Amagar. Una historia a on que, igual como en la poesía, tamién i hai presencia de muixons.

Ye tamién un programa a saber qué mosical. Empecipiamos con mosica de Los Bengala que han anunciau nuevo disco que se presentará en iste mesmo mes. Seguimos con una ida de flama que me dio por una canción de Biznaga que se me fa masa pareixida a unatra de Aviadro DRO como pa que siga coincidencia. ¿Qué’n opinaz? En lo calaixo de cancions, charraremos de sexo y de Tino Casal. Tos proposo tamién una nueva canción traducida pa que la endevinez y zarramos con mosica valenciana, mas necesaria que no nunca.

En la parte de convocatorias, Anchel nos charra d’una exposición que tenez pa visitar en Gares / Puente la Reina (Nafarroa) sobre las luengas d’os Pirineus y a on que l’aragonés, como no podría estar d’atra manera, tien firme presencia.

Ya sabez que sigue ubierto lo plazo pa que nos ninviez las vuestras historias sobre Mallacán. ¡Nos seguimos trobando!

Recuerda que puez ascuitar toz los programas en Ivoox, Spotify y la web de Radio Topo.

Programa #178

La oficialidat, como poco. (Editorial de TdBradio 11x04)

La lechislación sobre l’aragonés ha iu fendo culebretas por cada modificación estatutaria, por cada prochecto y lei de luengas y por cada lechislatura. Cambiando de vez que lo feban los nuestros politicos, pero no con lo ritmo que lo feba la sociedat.

Entre los primers, en lo que encara me resisto a clamar clase politica, la defensa de l’aragonés ha iu achiquindo-se en cheneral. Los pocos que en PSOE y PP gosaban tratar las nuestras luengas como patrimonio por cada día tienen menos voz, fruito d’o ultraespanyolismo pepero y d’o chiro lambanista que cambió de tot la uellada mas ubierta y aragonesista que teneba lo marcelinismo. Lo PAR, que habe a-saber-los anyos sí que apostaba por l’aragonés -no pas por lo catalán, fueras de bel alcalde u conceller d’a zona- se fa agora de tot indistinguible d’os nazis verdoz. La chuntica, tot y que por los suyos propios y sectarios intereses, ye lo solo partiu que apuesta de firme por prener l’aragonés y lo catalán como una cuestión important adintro d’o suyo discurso cuanto a cultura, identidat y patrimonio. Y entre IU y Podemos i hai sensibilidat y receptividat a los colectivos y activistas d’a luenga. Libres, antimás, d’o debantdito sectarismo. Manimenos, ni ye entre las suyas prioridaz ni tienen prou representación agora mesmo como pa poder fer ceprén enta cambiar las politicas nacionals.

En contra d’ixas culebretas, la sociedat aragonesa sí que ha seguiu un camín mas dreito. I hai muito mas interés y sensibilidat por las nuestras luengas agora que no fa diez, vinte u trenta anyos. Ya ye raro que bi haiga chent que nian sepa que existen, como pasaba cuan yera chovenón. Los cursos d’as asociacions se plenan, los programas de televisión son un exito, lo Pilar tremola sentindo mils de voces cantando S’ha feito de nuei.

Y ixo, sin oficialidat. Sin tot lo prestichio y todas las puertas que ubre ixa simpla declaración.

Que l’aragonés siga oficial no ye la fin, ye lo prencipio. Por una simpla cuestión de reconoiximiento d’a realidat. La Constitución espanyola, que tanto le preocupa a belún diz que “La resta de luengas espanyolas [antimás d’o castellano] serán tamién oficials en las repectivas Comunidaz Autonomas d’acuerdo con los suyos Estatutos”. Si l’aragonés no ye oficial u se ye incumplindo la Constitución u ye que no se considera una luenga. Todas las recomendacions europeas y mundials arredol d’a protección d’o patrimonio cultural y lingüistico sinyalan en la mesma dirección: que la oficialidat ye lo dreito mas basico pa toda comunidat de fabladors. Renunciar a la oficialidat ye renunciar a la propia existencia de l’aragonés y permitir que qui dicen que no existe u que no ye una luenga afunden en la suya razón lechislativa.

La oficialidat ye antimás prestichio. Las luengas pueden pervivir sin ixo, igual como pueden fer-lo sin una norma culta, sin grafía y mesmo sin escribir-se. Pero las que no n’han teniu, mica de tot ixo, se la han visto bien dificils. En las dinamicas culturals globals actuals, a on que las luengas dispareixen a embute, ye menester cada una d’as ferramientas que puedan fer-se servir. Lo prestichio ye imprescindible en la pervivencia d’una luenga como dicen toz los estudios sociolingüisticos. Mesmo en la popularización d’unas formas lexicas u atras, en la difusión de solucions y en que s’ixemenen mas u menos uns rasgos u variedaz. Lo prestichio, nos faiga u no goyo, ye basico. Y ixo se consigue, entre atras muitas maneras, a traviés d’ixa oficialidat.

Lo Consello d’Europa demanda, unatra vegada, que Aragón reconoixca la existencia d’as suyas luengas y los dreitos que los fabladors d’ellas tenemos por lo solo feito de fablar-las y de formar una comunidat lingüistica propia. Demanda la oficialidat, de facto. No son uns royos varrenaus, ni uns indepes, ye lo Consello d’Europa. Un organismo que ya se creye mas los dreitos lingüisticos individuals y colectivos que muitas d’as personas que habitan ixa malauda y dividida Fablilandia.

Nomás si tenemos las bases y los obchetivos claros podremos reconstruyir un movimiento en desfensa d’as nuestras luengas digno d’ixe nombre y fer que l’aragonés arribe en lo sieglo XXII.

Popurri oficial. Tierra de barrenaus 11x04

Dimpués de tanto especial, ya tocaba un programa normal, un a on que presentar-tos beluna d'as novedaz y seccions que quereba trayer en ista temporada que nos enfila ent'os 10 anyos de programa. Tot un popurri de contenius que arriba precediu por una editorial adedicada a la oficidalidat de l'aragonés.

Empecipiamos con una nueva sección-concurso a on que tos proposamos endevinar una canción que he traduciu a l'aragonés. La respuesta, a la fin d'o programa, pa que tos quedez tot lo rato. Continamos con unatra sección que ya me feba muitas ganas d'empecipiar: un espacio poetico. La primer convidada ye Lucía López, ganadora d'o Premio Arnal Cavero por "Cuan plegue o colapso", que nos traye un d'os poemas publicaus en ixa obra. 

En Pase de prensa, damos treslau de noticias sobre la Espluca de Chaves u lo Consello d'Europa que carranya a Aragón por no tener en lo suyo estatuto la oficialidat d'aragonés y catalán. Tamién sobre lo CSO Kike Mur que fació 14 anyos y lo celebró con unas chornadas bien interesants. En la parte de cronicas, tocamos lo concierto de Mallacán y Los Draps en l'Argilaga de Massalió y la presentación de "Borbollas a l'aire", lo nuevo libro de Jose María Satué, ilustrau por Elena Moncayo y publicau por Transiberiano edicions, que se va presentar fa uns días en lo Centro d'Historias de Zaragoza.

Zarramos lo programa con mosica a-saber-la. Obrimos lo primer calaixo de cancions, un que nos proposó un oyent fiel, seguimos con la resolución d'o concurso d'Endevina la canción y rematamos con un tema de Dr. Calypso que visitoron la ciudat en iste mes d'octubre.

Recordaz que continamos aguardando las vuestras historietas sobre Mallacán y que lo programa siempre ye ubierto a las vuestras colaboracions.

Recuerda que puez ascuitar toz los programas en Ivoox, Spotify y la web de Radio Topo.

Programa #177

 

 

Baixo lo casco de l'orco

The rings of power (Los anillos de poder) s’ha criticau a-saber-lo. No voi a entrar agora a comentar la serie que, personalment, me fa prou goyo. No soi un gran conoixedor de l’universo tolkieniano ni una persona purista cuanto a las adaptacions cinematogramicas de libros. Lo caso ye que en la primer temporada i hai una escena que m’encantó: (chiquet y previsible spoiler). I hai un lugar, habitau por humanos - y un elfo no tan blanco como pa que lo tolere lo facherío - que les ha menazau un exercito d’orcos. Organizan una desfensa estratechica que funciona de pistón y consiguen vencer a l’invasor. La batalla se fa de nueiz asinas que golpiaban a escuras, sin veyer-ie guaire. Cuan tot acaba quitan los cascos d’os orcos pa descubrir que, en realidat, no’n yeran, que heban estau luitando contra humans. Los ganadors se quedan espantaus, horrorizaus de comprebar que los suyos vecins, d’os lugars cercanos, s’heban uniu a l’antihumano enemigo.

I empaticé de camín. Cualsequier activista ye feito a la luita contra los orcos. Contra ixos sers que represientan tot lo contrario a los tuyos ideyals, que quieren fer un mundo fosco, a on que no se veiga lo sol ni se pueda sentir la suya calor en la piel, y que lo mal pueda campar por a on que deseye. Tenemos las ferramientas, las armas, los discursos prestos y aprendius. Tenemos remango, estrucias y experiencia. Sabemos que ye lo que toca. Pero cuan comprebamos que a l’enemigo l’emparan los nuestros, u mesmo que l’enemigo no yera un ser malfarchau, un mostrenco abominable, que nomás l’hebanos percibiu como ixo, tot lo que creyebanos cimbaleya.

M’espanta, como a ixos pobrons, cuan veigo a cualcuna d’as personas que considero d’o costau mío, que comparte valors, ideolochía, compromisos, que mesmo puestar que admire, compartir trinchera con los orcos. Me pregunto quí d’os dos ye l’entivocau, si ella u yo. Talment Adar, ixe que los lidera y que en sindarín lo suyo nombre significa “pai”, tien razón en las suyas reivindicacions. U lo menos no ye tan diabolico como me pensaba. Lo sentimiento ye de traición, d’una man, y d'incertidumbre, d’atra. Dos d’as piors sensacions que existen.

Tamién, pendendo d’o mío estau d’animo, me fan pena. Porque a la fin, los orcos son orcos y arramplan con tot. Los humanos, pa la suya causa, no son que ferramientas que cumplen una fin puntual y, cuan haigan conqueriu la Tierra Media y lo Sinyor Escuro gubierne sobre tot, a ixos folangos los matarán u esclavizarán igual como a los que resisitioron dica la fin.

¿Qué le fa a un humano confraternizar con los orcos? ¿Qué le fa corromper-se, unir-se a l’enemigo, participar en lo suyo propio exterminio? Talment, la suya condición d’humano. Si mesmo los elfos pueden cayer en lo mal, ¿qué no nos va a pasar a nusatras, angluciosas y melampas mortals? Remero, alavez, que yo en soi, d’humano, y que, como toz, bella vegada m’he trobau en lo costau entivocau, u que he feito piculins en la suya muga. Que m’he vistiu d’orco sin parar-ne cuenta y mesmo he brandiu belún d’ixos fieros fierros que portan. Asinas que me miro de tener compasión y mirar de fer-les venir a plego en cuenta de enrestir-los. Prebo de rechirar en la suya humanidat ferida y escoscar la ponzonya orca d’o suyo interior.

I hai ocasions que ya no se puet recular, que lo proceso ye completo y que d’un humán s’ha feito un nuevo orco. En ixos casos me vien t’o tozuelo unatra escena, ista vegada d’as pelis, bien trasladada dende lo libro de The lord of the rings. Ixa a on que los orcos se tricoloteyan y acaban barallando-se por la cota de mithril de Frodo. Unatro d’ixos granizos pasaches que fan honra a Tolkien pa describir-nos la miseria d’ixos sers.

Cuento que ye bueno dudar de cabo ta cuan d’as tuyas conviccions. Remerar qué ye lo que te fa humano, por qué odias a los orcos, quí ye l’enemigo y por qué has de combatir-lo. Si ixas conviccions tienen alacez, no i hai qué temer. Tot y que descubras espantau, de cabo ta cuan, que i hai humanos que, sabendo-lo u no pas, i colaboran, con els.

Pilars de culicaiga (editorial de TdB11x03)

Me fa goyo la Fiesta Mayor de Zaragoza, tamién conoixida como los Pilars. Soi d’aquí y he creixiu disfrutando-la. Dende bien chiquet, con los chuegos d’o Parque Bruil, dica lo zaguer vermú que se prolarga dica la nueit. Dende las corridas debant d’os capezutos dica los escenarios folkis. Dende la Penya Borina, que montaba Nogara, dica cada Asalto Contracultural pasando por las miticas barras d’o BIC.

Cuento que por ixo m’encarranyo tantismo cuan veigo cómo evoluciona la fiesta y cómo l’actual corporación municipal ye desnaturalizando de tot ixos diez días a on que la ciudat cambea de raso.

Gosa decir-se que los Pilars son un gran festival y asinas ye. U en yera. Dica no fa guaire, lo día que a la fin se conoixeba toda la programación, me la miraba con ficancia, buscando a qué conciertos ir. No yera raro que s’encertasen dos u tres bandas en escenarios diferents, obligando-me a esleixir. Por cada anyo dispareixe bel escenario. Por cada anyo la ufierta ye menos variada. Ya en van cuantos que muitos días no i hai garra grupo que m’agrade prou y que acabe aconhortando-me con bel tributo.

Los Pilars son, u yeran, gambadetas por las carreras d’a ciudat, alparciando por lo ciento de paradetas a on que se vendeban jautadas y pasando buenos ratos con las actuacions que bi heba en cada cantonada. En iste anyo, Independencia se quedó cuasi vuedo, sin mosica, sin bureo, sin las casas rechionals… nomás l’ausencia de trafico nos recordaba que yeranos de fiestas.

Los Pilars son, u yeran, aragoneses. Un momento a on que la nuestra ciudat recibiba visitants de tot lo país y, por una vegada, yera pa divertir-se y no pa mirar treballo porque las suyas comarcas moriban. Uns días a on que las nuestras tradicions, lo vestuache, la mosica y muitas atras partes d’a nuestra identidat empliban espacios. La Hispanidat se celebraba dillá d’as nuestras mugas. Aquí yera Pilars. 

Los Pilars son, u yeran, populars, en la carrera, capaceros. Bi’n ha habiu, habe anyos, que no he entrau en un bar ni un día. Diez días de centro social en centro social. Los entrepuces administrativos, las pinyoras y l’acoso policial fan por cada anyo mas dificil fer actividaz pa lo teixiu asociativo d’a ciudat. Nomás qui puet y quier chugar-se-la s’atrive a montar bella cosa. A-saber-los centros socials han zarrau las suyas puertas y los que sobreviven veyen la craba roya pa fer visteras las suyas propuestas culturas, reivindicativas y d’ocio pa ixos días.

No ye tarde. Recuperemos las fiestas. Faigamos-las nuestras, porque nuestras son. Cal emplir eventos populars, culturals y autochestionaus como la pasavilla de chiflo y salterio u l’antipregón de Radio Topo. Cal fer presión pa que lo concello elimine los entrepuces y que faiga la suya parte, que los Pilars tiengan propuestas pa toz y no nomás un ocio mercantilizau, dirichiu, comercializau y en a-cascar-la d’a ciudat consolidada, con toz los problemas que ixo chenera.

L’ocio tamién ye politico y que en la nuestra fiesta mayor, en la que todas y toz pagamos, i haiga una buena parte d’a ciudat que no tienga lo suyo puesto y que no se le permita chestionar las suyas alternativas ye una negación mas d’os dreitos nuestros. Por uns Pilars participativos, diversos, plurals y pa todas y toz.

Ista ye la editorial d'o programa 11x03 de Tierra de barrenaus radio. Puez ascuitar lo programa completo aquí.

Especial Pilars. Tierra de barrenaus 11x03

Ni unas fiestas sabe organizar lo facherío. Que guarda si ye sota-caballo-rei, que los Pilars levan fendo-se anyos arrienda y con formulas que ya se sabe que funcionan. Pero los mayordomos d’os amos de Zaragoza han quiesto zancochiar mesmo cualcosa tan simpla como la nuestra Fiesta Gran d’a ciudat.

Nos hemos trobau con uns Pilars jautos, sin morfuga fiestera por las carreras, con una ufierta cultural radida, monotona y menos plural que no nunca. En l’atro costau, un teixiu social y cultural que sabe fer-se valer y imple de conteniu y borina istos días a pesar d’a parrafiquera d’entrepuces administrativos y lochisticos y de l’acoso policial.

En lo nuevo programa en charramos, d’istas fiestas, d’os eventos que i hemos iu y de muitas cuestions relacionadas con la manera que i hai d’entender la cultura y l’ocio en Zaragoza. Antimás tendremos tamién la primera d’as historietas mallacaneras a on que Rubén nos recuenta muitas cosas. Anima-te a participar y ninvia-nos la tuya.

Por unas fiestas populars, plurals, diversas, libres y autochestionadas!

Recuerda que puez ascuitar toz los programas en Ivoox, Spotify y la web de Radio Topo.

Programa #176

 

Fer-lo facil (Cantando Manifiesto delirista, de Love of lesbian)

"Qué suerte que aún hay gente que lo hace fácil / Aquellos que consiguen que fluya bien". Manifiesto delirista. Love of lesbian.

Cada vegada que he de treballar con bella persona nueva, rai si ye por fayena u por activismo, me pregunto qué me trobaré y ruego a Rosendo que me toque una d’ixas personas que lo fan facil que’n charra Love of lesbian en lo suyo manifiesto delirista.

En l’atro cabo d’ixas personas, son los que lo fan tot dificil, que pareixe que les cueste vivir. Tot son entrepuces pa ixa chent. Entrepuces pa los que no proposan garra solución y chemecan cada vegada que i das alternativas. Rai como planteyes la fayena. Puez haber pensau mesmo en lo zaguer detalle, que trobarán cualque problema de mal apanyo. A sobén, acaban aceptando lo que siga pero no sin antes queixar-se, ploriconiar y fer-te pasar uns niervols innecesarios de tot. Son tamién vampiros enercheticos. Ixa mena de personas que te desmoralizan, que te cansan mas en diez minutos que en toda la chornada de treballo.

En abunda, d’ixa chent. Por ixo m’estimo tanto a las que lo fan facil, que son bien poquetas y de mal trobar. A ixas personas me las mincharía. No significa que sigan docils, que tot les importe igual u que tiengan una obediencia ciega, si no que fan d’os problemas circunstancias, proposan solucions, empatizan con la fayena de cada persona que fa parte d’a movida que sigas planteyando y, tamién como diz la canción, fan que tot fluiga.

N’i hai de grises, como cuasi tot en ista vida. Chent que ni fo ni fa, que seguntes lo día, como lo pilles, la rasmia que traiga u la pacha que faigaz. Y d’o momento vital de cada ún. Que cuan tiens un mal día u una mala temporada, te metes “repunante” -que diría lo chavalín Xuacu- y pareixe que tot te prebe malament. U a l’inversa, que si lo cierzo sofla a favor, tot se t’imple de flors y no i hai problema grieu ni cleta que no se pueda blincar.

La chent que lo fa facil ye la graseta ixa que le chitamos a la cadena d’a bici, que fa que deixe de esgarrillar y fer rudios y que tot lo mecanismo carrule suau. Ya que podese fer-me-ne la bamba, d’estar yo un d’ixos que lo fa facil y que Love of lesbian m’hese adedicau un tema. Manimenos, la verdat ye que no siempre ha estau asinas. Sé que a sobén m’he meso niquitoso y politicoso. Pero como dició un gran escritor, d’errors en femos todas, lo important ye qué en faigamos, d’els.

Asinas que dende habe tiempo que miro de fer fluyir millor la fayena, de dar importancia a las cosas que en veras en tienen y enfocar-me antes en la solución d’os problemas que en la busca de responsables y mesmo d’aivar-me si barrunto que foi estorbo. Dengún no ye esencial.

Si funciona, si soi una persona que lo fa facil u fa la trabeta, l’habrá de decir lo tiempo y las compas.

Nota: Iste post fa parte d'una serie clamada "Cantando" a on que pencho posts inspiraus por cancions de toda mena. Si tiens bella sucherencia, no dudes en escribir-me.
 

Especial cursos d'aragonés 24/25. Tierra de barrenaus 11x02

L’acto de Devantadera de Nogara marca la fin d’un curso y l’empecipiar d’o siguient. L’alumnau que ha pasau por las nuestras clases presienta los suyos prochectos, replega los titols y, sobre tot, se chunta pa alparciar lo que s’ha feito en ixe vrano y fer plans pa lo nuevo curso. De cutio, antimás, se fa bella actividat y en ista edición me permitioron fer la gravación d’un programa con publico. Ixe que ya leva bel anyo y que ye l’especial sobre los cursos d’aragonés de Nogara.

En lo local de Treziclo, un repoliu centro social que ye mirando nuevos colectivos y asociacions que l’ocupen, nos chuntemos buena cosa d’alumnas, socias y amigas de l’aragonés. Faciemos un programa, como los que mas goyo me fan, con voces a-saber-las, los micros ubiertos y participación arrienda. Hora y meya dimpués, meteba la zaguer canción, empecipiaba a replegar cataticos y feba la comprebación de rutina pa descubrir que no s’heba gravau ni pon. Los electrofollez m’heban traicionau.

Superada la carranya, decidiemos de tornar a gravar-lo. En estudio, con l’aduya de toda la chent que pasó por los micros ixe sabado y, si fa u no fa, los mesmo contenius. En ista segunda emisión de TdB trobarás toda la programación de Pilars en aragonés que fa Nogara, una cronica d’a Devantadera, charrando d’os prochectos que se i presentoron y, prou que sí, la ufierta docent pa iste curso 24/25.

Nomás me queda agradeixer a toda la chent que s'estió en la gravación, a qui pasez por los micros y a las que tos quedez de publico, a Nogara por permitir-me compartir ixos raticos buenos y a Jorge y Antón por la suya colaboración en toda la fayenada que ye la organización d'a devantadera y los cursos.

Asinas que tanto si quiers aprender aragonés como si quiers fer-lo servir en un ambient seguro y amable, en Nogara tiens lo tuyo puesto. Ascuita, comparte y difunde!

Recuerda que puez ascuitar toz los programas en Ivoox, Spotify y la web de Radio Topo.

Programa #175

 

Chutes pilaristas

No sé si por lo cinismo que diz que t’entra con la edat u por que la situación politica ye en veras tan malisma como pareixe, en zagueras voi por la vida con prou pesimismo, caminando por ista ciudat que pierde personalidat por cada día, veyendo como las franquicias implen tot lo suyo centro esborrando comercios con decadas de tradición, peteniando por ixos barrios que han visto zarrar lo suyos centros socials con un teixiu asociativo bien feble, vivindo unas fiestas que han perdiu buena parte d’o suyo caracter popular.

Arriba Pilars con las ganas chustas y, de rapiconté, recibo en dos días dos chutes d’optimismo que me fan revilcar y pensar que encara i hai asperanza, que por muitas milongas que nos recuenten los medios somos un ciento las que treballamos terne que terne pa transformar lo nuestro mundo y lo nuestro país.

Lo primer chute vinió de man de l’antipregón de Radio Topo. Empecipió con una pasavilla por las carreras madaleneras. Aturando en los bars, recibius con buena amabilidat y simpatía por clients y treballadoras d’a hostelería fuemos arrocegando a la chent ent’o puesto a on que se feba la fiesta. Y astí, en aquella replaceta, fue plegando chent y mas chent, emplindo cada metro cuadrau. Bi habió firme borina, prou que sí, pero tamién reivindicación. Contra las infiltracions policials, por eixemplo, y por la libertat d’información, como pertocaba en un acto organizau por una radio libre. “El telediario es una mierda pinchada en un palo”, rezaba una viella pancarta con lo luengache claro y contundent propio d’a Radio. Los punyos se devantoron y las gargamelas patioron por los chilos que cantoron lo Canto a la Libertad de Labordeta. Por los altavoces sonoron cancions que no i cullen en las radioformulas y en luengas que tampoco no i troban puesto.

Radio Topo y toda la chent que s’acercó ta l’antipregón me furnioron d’ixa sensación, que ixuplido de cabo ta cuan, de que l’autochestión funciona, de que la organización horizontal y asemblearia ye capable de tot. Una nueit mas se sintió tot lo carinyo que centenars de personas amostroron a qui luitamos cada día por fer arribar atros mensaches y atras envistas.

Encara con lo chute -y lo reseco- de l’antipregón, se barruntaba lo concierto de La Ronda. Se’n charraba por los rez socials y las primers prebatinas de quedada se preixinaban por las colletas de whatsapp. La Ronda de Botaña, en Pilars, me fa siempre un poquet de galvana. M’estimo mas de veyer-los en bel lugar, en un ambient mas tranquilet y intimo. Pero cal estar-ie. Un ratet antes d’o concierto los bars d’a redolada rebuten aragonesismo. Capazos y amiguez, compas, excompas y a fe que bel futuro compa, fendo hordios y canturriando las favoritas. En la Plaza d’o Pilar, chent a boticiegas aguardando a que empecipie. Los rondadors son figuretas a lo fundo y he de mirar-me ent’as pantallas chigants pa enterar-me d’o que pasa sobre l’escenario. Cuatro cuatribarradas baldaneyan por devant. Beluna, con estrela. La mía, en casa, en bel calaixo be d’estar.

Con las primers notas, en un petén, recuerdo por qué La Ronda ye tan gran y por qué importa igual en qué formato vienga. Siempre emociona. Pa una vegada que no iba como un cesto, decidié de paladiar con ficancia las suyas letras.

Si se nos cae la casa se vuelve a levantar. El camino que unos hacen otros lo han de deshacer. Resistir es ganar. Cruzad ya los puertos viejos guerrilleros reconquistemos el país… 

En unas, glarimeta. En atras, rabia. En cualcuna, asperanza. Y en todas, amor por la tierra y la suya chent. Un mensache, que tot y tirar prou de recosiro, s’imple d’optimismo y de ganas de luitar. Charran de l’aragonés, d’a despoblación, d’a explotación d’os recursos naturals, de l’exilio, d’a migración, d’a nuestra historia y lo nuestro futuro, charra d’o que ye important, meten lo foco en lo que nos toca, en lo país real. Charran de tu, de yo y de todas nusatras.

Me quedo con lo de ¡No añoréis lo que ya fuimos!...¡Soñad lo que aún seremos! y a seguir fochando por l’Aragón que queremos.

En rematar lo concierto, la mayoría en jopa, d’a Plaza. Lo d’o Jotalent interesa prou menos. ¿Y Aragón? No es el Pilar ni la jota ni Torrero.

A pesar de toz los esfuerzos d’o Heraldo y atros medios y de toda l’aculturación espanyolista, La Ronda sigue movendo masas, Radio Topo arrocla a una patacada de chent que amenista d’atra información y a yo, en dos días, m’alegran los Pilars con dos chutes d’activismo que me motivan prou. Gracias.

Toros en aragonés

Un medio de comunicación publico habría de fer honra pa l’acceso a lo dreito a la cultura d’as personas a las que se diriche. Habría de reflexar, tamién, ixa sociedat, en toz los suyos aspectos, sin deixar-se-ne a dengún. Nomás por ixas razons sería prou pa exichir que en Aragón TV, y en tot CARTV, bi hese una presencia important d’aragonés y catalán. Mas que en lo suyo millor momento, con Charrín charrán y A escampar la boira emitindo-se. Pero ye que, antimás, dende una envista de simplas audiencias y interés cheneral, s’habría d’apostar firme por ixa mena de contenius.

Muitas activistas por la luenga repetimos dende habe anyos que la sociedat aragonesa tien interés arrienda por lo suyo patrimonio lingüistico y ixo que a sobén desconoixe la suya amplaria. Isto no ye nomás una sensación u un lema propagandistico. Se puet veyer en datos obchetivos y en la experiencia personal de cualsequier que s'embreque en ista luita. Toz los anyos Nogara imple las suyas aulas d’alumnau. No s’adube a fer mas clases, a amostrar la luenga a mas chent. Toz los cursos recibimos clamadas de concellos y asociacions d’adintro y difuera de Zaragoza que nos demandan cursos pa la suya chent. Y toz los cursos nos quedamos sin poder cubrir ixa demanda. L’asociación ya fa cualcosa que habría de fer l’administración, pero, pa forro de bota, lo gubierno aragonés leva decadas sin atender una demanda popular d’acceso a la cultura aragonesa y a lo suyo patrimonio lingüistico y negando, por tanto, parte d’os dreito lingüisticos d’a suya ciudadanía.

Por a-saber-los lugars d’o país, cada vegada que se fa una charradeta, una presentación, un concierto, cualsequier acto en u sobre l’aragonés, l’exito ye total. Salas plenas y firme interés. Preguntas, reivindicación, ganas de saber-ne mas. L’aragonés ye amagau de tot y, malas que acucuta una miqueta, se troba un pueblo que quier conoixer-lo. 

Los datos d’audiencia de Charrín charrán yera bien buenos. De mal millorar pa un programa que s’emitiba en horarios caoticos y que yera de tot en aragonés y, por tanto, en teoría enfilau nomás pa bels mils de personas. Lo suyo exito ye unatra preba d’ixa sete de luenga que tien lo pueblo aragonés.

Lo prochecto de O zaguer chilo leva seis edicions y una sietena en gravación. Ixo suposa que han pasau 120 bandas mosicals pa fer las suyas 120 cancions en aragonés. La mayoría, sin tener ixa luenga por transmisión familiar. Artistas de toda mena y de toz los libels. Lo mundo de l’arte y la mosica amuestra asinas firme sensibilidat por l’aragonés.

Manimenos, en ista lechislatura, s’ha acabau con lo poco que bi heba, con ixos primers pasez que s’heban feito ent’a normalización lingüistica en los medios publicos aragoneses y, pa forro de bota, s’apuesta por que tornen a emitir-se corridas de toros. 

Igual como l’interés por la luenga se puet comprebar por toz los cabos, las tendencias sobre los toros son contundents. Por cada día ye mas radida la chent que le sigue fendo goyo ixa tortura animal que, en la mayoría d’as suyas manifestacions, nomás se mantien por una inercia historica. Porque ye "lo que s'ha feito siempre", sin cuestionar si se podrían fer unas fiestas millors. Los toros, las vaquillas y toda ixa mena d’actos, sin entrar en valoracions eticas, son un catenazo que aburre a la mayoría d’a población. En los puestos a on que, por bella razón, se deixan de celebrar, pocas vegadas i hai demanda pa que tornen. Cuasi dengún no los troba a faltar. Son, antimás, bien caros, comprometendo los presupuestos festivos. Como deciba Ixo Rai!: faltarán perras para otras cosas, pero aquí gastan un millón. Con los diners d’a tortura se podría financiar toda mena d’actos culturals y festivos u, simplament, achustar orquestas millors, mas animación infantil y un ciento de cosas.

No i hai garra motivo pa promocionar los toros en la TV publica aragonesa si tenemos en cuenta l’acceso a la cultura y l’interés d’a ciudadanía. Si que n’i hai si l’obchetivo ye indentitario, y en ye. Si lo que se quiere ye esborrar la cultura aragonesa y asimilar-la a ixa mala traza, decadent y cazurra, d’entender la espanyola.

S’habrá d’exichir que CARTV torne a apostar por la cultura. S’habrá de recuperar pa lo pueblo los medios publicos. Tanimientres, y tamién cuan lo consigamos, nos acubillaremos en la cultura popular, de base, en asociacions y medios de comunicación que no le debemos cosa a dengún, y que construimos y treballamos por desfender y difundir lo nuestro patrimonio cultural y lingüistico. Ixo, nunca no nos lo podrán sacar.

Contra las mías cunyadadas (Editorial de TdB 11x01)

Panxo, cantaire de Zoo (y Orxata sound system, y Rawpublik…) parlaba en la canción Correfoc de matar a eixe fatxa que portem endins. Cuento que no pas un facha, pero sí un cunyau, yera qui me poseyó cuan, en rematando l’anterior temporada, criticaba y maldeciba lo saxofón, un simple instrumento que a dengún no le ha feito mal. Que talment, pa lo mío criterio, se’n abusase en bella epoca, u millor dito, que lo incluyisen en seguntes que oblidables collas, no ye chustificación pa la quimera que i amostré. No ye tanto lo feito de criticar lo saxofón, que ya veyes tu la trascendencia, que nian pateixe en estar un ente inanimau, sino las trazas. Lo feito de soltar una opinión de mierda en un programa que se’n queixa terne que terne, d’ixo mesmo. Las mas viellas d’o lugar remerarán aquello de Si yes farto de cunyaus, ascuita Tierra de barrenaus.

A modo de chusticia divina, viengo d’un vrano de grans y buens saxofons. Dende la patacada que circuloron por Mezquita d’Exarc en lo Tamborilé dica los dos que sonoron en lo concierto de Iseo & Dodosound en Pirineos Sur. Dende TdB, respeto y admiración enta todas y toz los que buforon ixas notas.

Viengo, venimos, d’un vrano pleno de saxofons y de mosica. Viengo d’a millor epoca de l’anyo, ixa que Carolina Durante califica de perfecta y que, de tanto que’n ye te fan goyo mesmo “las putas gaviotas”, Viengo de vacacions, d’ixuplidar en buena mida la maquinaria capitalista, la chefa, los clients y los malos companyers. Viengo de no ubrir ni una excel en semanas. Viengo de desconectar de tot, de tener lo mobil meyodía en modo avión, d’amortar alarmas y dedicar-me a querer-me. Viengo de baixar pinyón y roda a monico, de gustiar paisaches y chupir-me d’ulors, de correr nomás por esporte, d’escribir a lo viello, en libreta y con boli. Viengo de no imposar-me quefers, de no autoexplotar-me, de deixar aganau, mesmo fambrudo, a l’algoritmo y que se joda buen rato. Diz, digo, que emitir nos fará vencer. Y callar-nos de cabo ta cuan y ascuitar lo mundo un ratet, nos fará emitir millor.

Agora, ya s’ha acabau. Toca tornar a producir, de vez pa y contra la maquina. Trenco lo silencio estiver y torno a dar mal. Ya callaré a l’atro chulio.

Una nueva temporada. Tierra de barrenaus 11x01

Ya somos tornaus. Dimpués d’o mereixiu descanso estiver nos fiquemos en lo cado d’o taboner pa empecipiar una nueva temporada, la oncena, d’ista aventura radiofonica que ye Tierra de barrenaus. Ye una tornada con ganas a embute, de fer radio, de colaborar a la difusión y dignificación de l’aragonés y de ascuitar y dar voz a todas las iniciativas d’a buena chent que treballaz por la nuestra cultura y los nuestros dreitos colectivos.

Y precisament ixa queremos que siga lo sinyal d’ista nueva temporada: la vuestra colaboración. Aguardamos en candeletas que nos faigaz arribar todas las vuestras inquietuz: convocatorias, noticias, propuestas, cancions… Tenemos los micros ubiertos pa tot lo que nos contez. Contactaz-nos a traviés d’os rez u en tierradebarrenaus@gmail.com.

En iste primer programa hemos quiesto empecipiar con una d’as nuevas seccions, Pase de prensa, a on que comentaremos noticias de rusient actualidat u no pas tanto. Trayemos tamién una patacada de convocatorias, borineras y luitaderas, pa que no tos perdaz cosa. Beluna d’ellas, locutada por ixas primers personas que fez parte d’a Loquería d’iste curso 24/25, a on que lo programa fará lo suyo deceno aniversario.

Seguindo con las iniciativas participativas, queremos celebrar la tornada t'os escenarios de Mallacán, lo grupo que tanto fació por l'aragonés y que, en ista chiqueta nueva etapa, tantas alegrías nos ye dando. Pa ixo, tos proposamos que nos faigaz arribar los vuestros mensaches sobre lo grupo, recontando como los conoixiez, cuals son los vuestro temas favoritos, cosas que haigaz viviu en los suyos conciertos, qué tos han feito sentir u lo que tos pete.

Asperamos que tos faiga firme goyo y que prencipiez a dar-nos feedback de camín. Tendrez la oportunidat de fer-lo en persona iste siguient día 28, en la Devantadera de Nogara, a on que faremos un programa especial, gravau con publico, en l’espacio Treziclo d’a Madalena.

Recuerda que puez ascuitar toz los programas en Ivoox, Spotify y la web de Radio Topo.

Programa #174

Lo silencio d'o vrano

Nota: La primer versión d'iste post s'escribió en la mía libreta de vrano, boli sobre papel, lo 9 de chulio de 2024 en Morillo de Galligo (Aragón)

Fa uns días un compa que s’adedica a l’amostranza deciba que en ixos momentos d’o curso (finals de chunyo) i arribaba muit canso. Los zaguers meses de docencia ben d’estar bien furos, por lo que veigo en todas las amigas y conoixidas d’o sector. Deciba iste zagal, con una mica de desaspero, que amenistaba silencio. Que la cachimalla feba masa estrapalucio. Deciba, con voz floixeta, cuasi una mormor, que no deseyaba que una mica de silencio.

En ixo chustament consistiba lo mío primer plan d’o vrano. En buscar lo silencio. En ixa busca amaneixié aquí dende a on que escribo isto, lo camping Armalygal de Morillo de Galligo. Un puesto cerqueta de Zaragoza, troz d’ixe paradiso que ye Aragón, parafraseando a Silvia Cebolla.

Si nos metemos niquitosas, u literals, de silencio, tampoco no n’i hai aquí. Las carcanetas cantan de contino. No deixan de dar ferrete, como las alparceras d’a carrera a on que vivo en Zaragoza cuan las suyas fayenas les dan treugua y aduben a chuntar-se debant de casa mía. I hai ninos tamién, que, por muito educaus que sigan y por muito que tasament s’esten en lo camping porque tienen plans millors, son ninos, y los ninos fan rudio y cuento que ye bien que en faigan. Tamién i hai autos, claro. Porque en la nuestra sociedat siempre i hai autos. Tot y que, aquí, poquez y cuasi siempre aturaus. Belún mesmo electrico, que fa ixe sorollet cuasi imperceptible y diferent d’os de combustión que por cada día pareixen mas antigallas. D’aquí a no guaire en serán, d’antigallas, tanto como los carros de caballos u las casetes y amaneixerá bel carnuz que los reivindique.

No ye silencio sensu stricto lo que miro. Fuigo, barrunto que igual que ixe compa que’n charraba antes, d’o rudio en lo sentiu comunicativo, d’as interferencias. D’ixas que tiengo adintro, que a sobén m’empachan de poder decidir qué ye lo que quiero fer. D’ixas que no me permiten charrar con yo mesmo, preguntar-me cuals son los míos deseyos, t’a ón quiero ir, cómo, con quí. D’as que no me deixan conoixer-me, cuestionar-me cómo me va la vida, si ye tot bien u aceptable, que no ye poco, u me soi aconortando u b’habe que yera tot un zancocho y no heba puesto parar-ne cuenta.

No sé si ixe compa me leye pero creigo que lo rudio no lo feba lo suyo alumnau. Que sisquiá yera silencio lo que miraba. U no nomás silencio. Que lo que el y yo querebanos yera fer callar por un tiempo a los chefes y chefas que nos dan mal toz los días, a lo cunyadamen faixista encarranyau por l’amnistía, la Begoña, los mena-vampiros de l’IRA u ves-te-ne tu a saber qué invento. Quereba, por uns días, deixar d’estar-se en los rez, limpio producir, limpio consumir contenius. Que lo catatico mobil fese honra nomás pa saber l’horario d’a cafetería, l’orache de manyana y pa preguntar-le a ixe colega que tiens abandonau que cómo le va y mentir-le churando-le que d’iste vrano no pasa que t’acercas a visitar-lo.

No sé tu, compa, pero a yo m’ha funcionau. Levo tasament 24 horas aquí. Leyer, escribir, una mica d’esporte y poco mas. Y charrutiar con yo, que igual como a lo colega ixe que iste vrano a fe que visito, me teneba muit abandonau.

Bunburizau en la Romareda

Estié en lo concierto de Bunbury d’a Romareda, lo día d’antes de que las maquinas empecipiasen a enronar l’estadio pa goyo y lucro de constructoras y amiguicos peperos.

¿Como i plegué? Contextualizaré una miqueta. No me fa mica vergüenya reconoixer-me como fan de Héroes del silencio. En ista immortal ciudat, en seguntes que ambients en los que me muevo, pareixeba y pareixe encara que admirar a HdS ye un pecau, que ixo yera mosica comercial que no valeba res. Creigo que i hai muito de postureyo en ixa actitut y que a muitas d’ixas personas que tanto los refusan, en lo fundo, les feban goyo d’amagatons.

Cuan s’esfació lo grupo, siguié a Bunbury. Me torré lo Radical Sonora y mesmo me merqué Pequeño. Y astí acabó la mía relación con lo cantaire. Garra d’os dos discos me pareixió masa bueno, tot y tener bella canción resenyable. Teneba un rollo prou diferent a Héroes y deixó d’interesar-me. No pas a la mía cuadrilla de l’insti, todas fans que iban a sobén t’os conciertos suyos. Un d’els me regaló la entrada y lo plan d’ir-nos-ne toz de borina se me feba bien majo. Asinas que t’alla que fuemos.

Que la mosica de Bunbury m’interese poco no significa que me pareixca mal mosico u que no creiga que fa buenas cancions. Simplament no me truca ni m’alticama ni m’emociona ni me provoca todas ixas sensacions que atras mosicas sí que consiguen.

I hai muitas bandas que tampoco me provocan todas ixas sensacions, pero que sí que voi t’os conciertos suyos, por lo solo feito de que me son asequibles. No m’importa pagar 10, 15 u 20 euros por un bolo cualsequier nomás por lo placer de disfrutar de bel par d’horas de buena mosica. La cosa cambea si en son 80 euros. D’atra man, las mías bandas favoritas no gosan tocar a ixos pres.

No soi feito, pues, a los grans conciertos, multitudinarios, en estadios, con las autoridaz presents, que acaban con fuegos artificials.

Pero he de reconoixer que tienen lo suyo punto.

Nomás lo feito de trobar-me en la Romareda me provocaba ixa sensación de grandeza y epica d’os estadios. En baixar t’o verdete chiré trescientos sisanta graus, mirando-me entalto, esmachinando cómo lo veyerían y lo sentirían los futbolistas en salir a chugar, con ixas decenas de mils de personas mirando-se-te, pendients de que cumplas con las suyas alufras.

Bunbury salió t’a escena con un publico entregau de tot que se sabeba punto por agulla las suyas cancions. Y, como siempre que i hai buenos mosicos sobre los escenarios, me deixé chupir de l’arte suyo. Separé persona d’obra, ixuplidé las suyas barucas sobre conspiranioas, le chilé que se vacunase cuan recordó ixo de que los nacionalismos le feban miedo, y esbramegué en las cancions que conoixeba y me feban goyo. Limpio chilar en la davidbowieana Lady blue, en la dignisima versión de Apuesta por el rock ‘m’ roll y en muitas atras. De feito, las de Héroes, tocadas mas por compromís que por pasión, estioron cuasi lo mas jauto.

Enrique ye un astralica mano sobre las tablas. Un showman que se quiere, se siente  y actua como una rockstar: farute, fachendoso, d’ixas que te fa falta toneladas d’ego pa poder estar-ne. A la segunda canción me teneba ganau pa la causa suya. Disfruté muitismo d’un concierto d’ixos que no ixuplidaré, entre atras razons porque no creigo que pueda tornar a veyer-lo en directo.

M’alcordé, días dimpués, d’un video que penchó Diego, de Veintiuno en rez. Charraba de varias cosas en un discurso muit contundent. Critica a qui dicen amar la mosica pero dimpués se zarran de tot a bandas y estilos nuevos, charraba d’os prechuicios, d’o recosiro y d’a hipocresía, y convidaba a interesar-se de verdat por tot lo ampla que ye la mosica. Cuento que me fació tanto goyo ixe video por lo sesgo de confirmación que me reafirmaba en las mías ideyas arredol d’a mosica, tot y que tamién ye verdat que ye una mica un discurso de mimimi que se podría responder con un “let people enjoy things”. En cualsequier caso, lo que pa yo ye imperdonable pa una persona que diga que le fa goyo la mosica ye que se zarre a lo disfrute que puet haber-ie en toda mena de bandas y en toda la diversidat que i hai en lo fenomeno mosical. Dende la mas chiqueta dica la mas gran, dende los estilos mas de vantguardia dica los clasicos.

Confieso que teneba prechuicios pa los macroconciertos y rockstars como Bunbury. Soi mas de sala chiqueta, qué le voi a fer. Pero a la fin, la buena mosica ye buena mosica y qui la amamos la podemos disfrutar en cualsequier formato. Lo que m’encantaría ye que muitas d’ixas personas que yeran en Bunbury y que nomás viven los conciertos asinas, de rockstars en estadios, fesen lo camín a la inversa y s’ubrisen a los chicoz, a los que empecipian, a los guariches a on que empecipioron los Héroes u Amaral, a que disfruten de tot lo calitre que i hai buscando-se las manyas en ixe mundet tan dificil. Si belún d’ixos me leye, espolsa-te prechuicios, rechira por las programacions de salas, centro civicos, bars y centros socials, alparceya por las radios libres y podcast alternativos y sorprende-te con las sobrebuenas propuestas que i hai por tot y que talment nunca no sientas en radioformulas. Vale la pena.

Addenda: La primer versión d'iste post s'escribió en la mía libreta de vrano, boli sobre papel, lo 10 de chulio de 2024 en Morillo de Galligo (Aragón)

Vrano desconectau

Un d'os  obchetivos que me proposé pa iste vrano estió desenchegar-me, en la mida d'o posible, d'a tecnolochía. No pas como un nuevo dogma en la mía relichión personal ni como cualque churamento sagrau, simplament no estar-ne tot lo día pendient. Ni de rez ni de l'actualidat ni de res. Una uelladeta de cabo ta cuan y prou.

Ixo incluyiba l'actividat publica y mesmo la privada. No quereba mirar-me Whatsapp terne que terne, ni compartir-ie los reels que me fesen gracia ni comentar noticias u eventos nian reaccionar con lo didet entalto a lo que me decisen.

En iste curso 23/24 paré cuenta de que teneba una miqueta d'adicción a lo mobil. Me sentiba como cuan fumaba que, siempre que podeba, heba de fer-lo como si isen a verdar-lo u si bel contorniello m'ise a privar de poder fumarriar a saber qué rato. Lo feba tamién por un poquet d'ansiedat social  que veniba sentindo en lo segundo trimestre y que va acabar en una mini-crisi pa cabo de chulio. Cosa d'importancia pero barrunto d'un problema que podeba creixer.

Asinas que, como qui me seguiz habrez puesto comprebar, la mía actividat estivera ha estau radida de  tot. Bel par de videos en TikTok sobre l'Aplec dels Ports y lo nuestro viache en bici por la Vía Verda de Val de Zafán, y prou.

Pa cerca d'a Virchen, ya andaba meyo curau. Zero ansiedat social, lo mobil en modo avión la metat d'o día y yo disfrutando d'o present.  Ixo con que tanto ferrete dan las psicologas. Ahiere, en ixe disfrute, pasemos d'o codetazo que feba empecipiar las fiestas de Zarautz y marchemos a fer una cursa por Pagoeta, un puesto rebonico, pleno de vida, a on que la color verda lo imple tot y entiendes por qué las vascas aman tanto lo suyo país. 

De tornada, ya en lo camping, Tamara me pasó beluna d'as fotos que heba feito por lo camín. En una, i amaneixeba yo, rodiau d'arbols d'ixos que nunca no acaban, pingaus dica lo ciel. Yera en lo bel meyo d'o camín, en buena postura, riso majo y sin que se me notase guaire la pancha de cuaranteno. Por una vegada no feba momos ni saliba con los uellos zarraus. Una foto de diez. Cuasi por instinto la ubrié, cambié la dimensions a 1:1 pa fer-la instagrameable, toquitié los libels de contraste, brilo, nitidez, etc, retalle por aquí, retalle por allá y lista pa compartir. "Afegir titol", me demandó la app (tiengo lo mobil en catalán). ¿Qué le meto? Que me sé yo: "desconectando". Y en ixe inte, un segundo antes de dar-le a ninviar, bel electrón cambió de napa u cualcosa pasó que me fació parar-ne cuenta. Dimpués de semanas de desconexión real, un momentet de relax, un despiste de no res y la mecanica aprendida en los zaguers anyos actua cuasi como un imperativo biolochico. "He de fer veyer lo feliz que soi. He de creyar conteniu. He de dar de minchar a los putos algoritmos". Preté lo trianglet que indica t'a cucha. "Recula amigo. No pasa res porque la chent no sepa a ón yes, ni qué fas, lo que has minchau u l'actividat superinteresant que te ye cambiando la vida", me dicié. Desconectar no ye ir t'o mont y fer-te-ne la bamba malas que arribas ta bel cabo con cobertura.

Reconectaré, deixaré d'escribir en libreta, compartiré estaus de WhatsApp, alimentaré a l'algoritmo y daré muito ferrete, dica fer-me canso, dica sentir ixe "joer, Carlos, que no aturas", que, en lo fundo, tanto goyo me fa y tanto m'imple l'ego. Prou que lo faré, Si leyes isto, ye que ya lo soi fendo, de feito. La vida en 2024 ye asinas, cal asumir-lo, y mas encara pa los apasionaus d'a comunicación como yo.

Pero, ixo sí, iste vrano m'ha feito firme honra pa fer-me a vivir sin mobil, sin angunias, sin quefers tecnolochicos autoimposaus. Ha estau una experiencia tan satisfactoria que a fe que a l'atro anyo lo faré y mesmo en un grau mayor. Prebaz-lo, si no lo hez feito ya.

Addenda: La primer versión d'iste post s'escribió en la mía libreta de vrano, boli sobre papel, lo 15 d'agosto de 2024 en Zarautz (Euskal Herria).

Temazos 2024. Tierra de barrenaus 10x22

Las circunstancias d'as aqueferadas vidas nuestras facioron que, dende 2021 no nos chuntasenos pa fer lo tradicional programa de cabo de temporada. Afortunadament y fendo puzzles con las nuestras fayenas y responsabilidaz variadas, en iste 2024 torna l'especial Temazos pa rematar la temporada y marchar de vacaciones, que ya toca.

Dabi, Tamara y Rubén tornan a acompanyar-me trayendo cada ún tres temazos diferents. Muita y diversa mosica a la que damos lo premio a posteriori, mirando de trobar cuál ye lo que mereixe. Como de cutio, muitas cancions de toz los estilos y, sobre tot, muitas risas y somardería a patacadas. 

Acaba asinas ista temporada 23/24 a on que aspero haber-tos trayito temas interesants y buenas propuestas mosicals, antimás d'haber aduyau a la difusión y promoción de l'aragonés, una d'as principals intencions d'iste programa. A l'atro anyo empecipia una nueva temporada, la oncena. Se fará  tamién lo deceno aniversario de Tierra de barrenaus radio, allá t'abril. Y aspero, pa ixo, contar con la complicidat de todas las oyents. Aspero las vuestras propuestas de tematicas y cancions y las vuestras cronicas d'o que queraz que amaneixca en las ondas.

Tanimientres aquí tiens dos nuevas horas de programa y una nueva temporada completa que anyadir a l'archivo sonoro de l'aragonés. Nos tornaremos a trobar en setiempre, en Radio Topo, Radio Espiritrompa y toz los rez socials.

Recuerda que puez ascuitar toz los programas en Ivoox, Spotify y la web de Radio Topo.

Programa #173

L'hombre que ya no le feban goyo los gatos, d'Isabelle Aupy

Cuan presiento Arroyuelo a soben me preguntan por las mías influencias u por los referents pa ixe libro. No me fa goyo contimparar-me con grans, pero a la fin trobo que, si quiero que s’entienda cual ye lo tono d’o libro, no me’n queda atra. D’atra man, personas que lo leyoron sin que les dase ixas referencias, a escape me comentan que les n’ha recordau a cualcuna d’ellas u mesmo a atras que nian i heba pensau. Son bien evidents: Amanece que no es poco y atras de Cuerda, los Monty Python, Terry Pratchett, Rodrigo Cortés…

Dende fa bel día podría anyadir-ne un. Un libro que no ye d’humor pero que en tien, d’humor, bella miqueta. Y sobre tot, muito absurdo. El hombre al que ya no le gustaban los gatos, de Isabelle Aupy, ye la histora d’una isla plena de mixins que, de bote y voleyo, en dispareixen. Chunto a lo protagonista, que nos recuenta la historia en primer persona, nos trobamos a cuantos personaches bien curiosos que concaran de diferents maneras ixa perda d’os gatos.

Lo libro tien firme medolla. Ye d’ixos de mal soltar, que yes deseyando de saber qué pasa contino, d’os que repasas lo que acabas de leyer terne que terne porque tien suco pa saboriar. D’os que, dimpués d’a primer lectura, te quedas con ganas de fer-ne una segunda pa sacar-le mesmo mas treslada.

I hai cuantas reflexions sobre la importancia de decir-le a las cosas por lo suyo nombre, contra la imposicions, arredol d’o poder d’os medios pa cambiar las ideyas… Le puez dar vueltas dica que te’n fartes. Un libro pa pensar y compartir capazos. Ideyal pa clubs de lectura.

Una d’as cosas que tenemos en común ye que la reacción d’os protagonistas no ye la que la persona lectora aspera. Debant d’un suceso trachico lo asumen con parsimonia, como si la cosa no fuese con els. No i hai ira, carranya ni rabia. Dengún no s’alticama u, qui lo fan, son una minoría incomprendida. Isto, que truca y fa muita gracia, ye una envista d’o mundo que comparto con Isabelle, l’autora. Ixe no comprender por qué no penchamos d’a forca, u guillotinamos, u a lo menos denunciamos todas ixas barbaridaz que nos fan. Cuento que i hai una perplechidat compartida en no entender por qué no se reacciona debant de seguntes que cosas.

El hombre al que ya no le gustaban los gatos ye publicau por Rayo Verde, en castellano y catalán y ha esdeveniu a l’inte un d’os libros favoritos d’os que levo leyius en iste 2024.

Calaixera 2024. Tierra de barrenaus 10x21

Ha pasau la millor semana de l'anyo u, como poco, una d'as millors. Ixa que empecipia con la pastera d'o verano y lo Tamborilé, las fiestas d'a Madalena, la semana cultural que nos deixa acotolaus, que contina con lo viache ent'o Poborina Folk y que remata pretando-le fuego a la chera de Sant Chuan. Y de rematadera, bien escamalladas, gravamos lo programa que tos trayemos hue.

Como ya s'ha feito costumbre, tenemos un programa mosical a on que zarramos los calaixos mosicals que hemos iu ubrindo durant l'anyo. Cuatre nuevos calaixos que suman repertorio mosical diverso en estilos, procedencias y luengas.

Lo primer, lo d'a psicocanción, con temas que fan referencia de bella manera a la salut mental. Seguimos con la canción-relato, prenendo como criterio que tiengan ixa estructura narrativa de planteyamiento, nudo y desenlace que nos amostraban en lo cole. D'a escuela, en charran las cancions d'o tercer calaixo. Y lo cuarto, d'as drogas, tot y que cuasi nos sale un monotematico sobre la heroina.

Pa l'atro anyo, ye bien probable que torne ista dinamica, asinas que si quiers proposar calaixos u cancions, no dudes en escribir-nos. Tanimientres, te convido a disfrutar d'istas dos horetas de mosica y capazo. Y lo 8 de chulio emitimos lo zaguer programa d'a temporada antes de marchar de vacacions. 

Recuerda que puez ascuitar toz los programas en Ivoox, Spotify y la web de Radio Topo.

Programa #172

 

Los libros y Obrint Pas. Tierra de barrenaus 10x20

Fa bella semaneta se republicaba Totes les cançons parlen de tu, la primer -y, por agora, unica- novela de Xavi Sarrià, ex-cantaire d’Obrint Pas. Sembrallibres la tornaba a publicar cuan fa diez anyos que amaneixió, como un d’os primers libros d’a, en aquellas envueltas, recien naixida editorial. Con ista enchaquia, reprengo un programa que teneba en ment dende habe tiempo y que completa una trilochía de especials sobre Obrint Pas. 

En iste programa repasaremos las relacions literarias d’a banda y d’os suyos components, a traviés d’obras bien diferents. Empecipiamos con un asayo sobre la historia d’o grupo. Tendremos narrativa, de man de Xavi Sarrià, con un libro de relatos y la debantdita novela. Tamién un libro ilustrau basau en una d’as zaguers cancions d’Obrint Pas y unatro asayo, un sobrebuen treballo periodistico de Miquel Ramos. Y bella curiosidat mas, prou que sí, con a-saber-as mosica d’a colla. 

Siempre fa pena que un grupo que te fa goyo se separe. Queda dezaga la suya obra pa poder disfrutar-la cuan quieras. Pero en iste caso, la fayena d’Obrint Pas contina de muitas maneras, entre atras, la de publicar todas istas choyetas que hue tos traigo.

Como deciba, iste ye lo tercer programa especial sobre la banda. En lo primerprimer, repasemos la suya discografía. En lo segundosegundo, beluna d’as cancions y colaboracions no tant conoixidas. ¿N’i habrá cuarto programa? Bien podría estar. Tanimientres, viacharemos ent’o Poborina Folk pa veyer a Xavi Sarrià unatra vegada por tierras aragonesas.

Recuerda que puez ascuitar toz los programas en Ivoox, Spotify y la web de Radio Topo.

Programa #171

La pastera d'o verano

Hue me mincharé la pastera que, en lo mío calendario personal, marca lo prencipio d’o verano. Ye una d’ixas tradicions chicotas, de nomás dos personas, Arale y yo, y bien recient, de fa pocos anyos. Pero que pa yo significa a-saber-lo.

La pastera d’o verano se mincha en lo mercau medieval de Zaragoza, en un puesto que i hai en la Plaza Sant Bruno, baixo la uellada d’a Seu. Ye la chenta d’a vispra d’o Tamborilé. Ixe día, en salir d’os nuestros treballos, quedamos astí, en la paradeta d’as pasteras. Nos la pretamos, pasada con bella biera que vendan cerqueta, y jopamos enta Mezquita d’Exarc a disfrutar d’o nuestro festival favorito, lo primer d’o verano.

No ye una pastera millor que cualsequier atra que te puedas minchar cuan siga. Nos la hemos de minchar posaus en las escaleretas d’a plaza, por un regular con firme caloraza y a tot meter, que i hai viache por debant. Pero sabe de pistón, millor que todas las exquisitezas de finores que dan en los restaurants de perras y millor que las chullas ixas que tanto goyo tos fan.

Tot y que no tenemos encara vacacions, se barruntan. Ixe día empecipia tamién las fiestas d’o barrio. De tardes la cachimalla fará la suya corrida de pollos arredol d’a ilesia d’a Madalena entre que nusatras pasamos la muga provincial. Cuan en tornemos, escamalladas dimpués d’haber-lo bailau tot, nos aguardará lo Mercau de Carrera -u Street Market que le dicen- con buena borina y una xarramata de propuestas d’as artesanas d’o barrio.

Y dimpués continan las fiestas d’o barrio, y vienen mas festivals y conciertos. Y, a la fin, las vacacions. Y viaches y tardes de no fer ni pon y libros pa leyer y banyicos en las pozas y en las mars. Y ixuplidar mesmo lo nombre d’a mía chefa y lo cansos que son los clients y las caixetas d’as putas excels.

Toda ixa liberación empecipia hue, de meyodías, con lo gusto d’una pastera.

Cancions de cancions. Tierra de barrenaus 10x19

Enfilamos los zaguers programas d’a temporada y en queda cuatre de bien mosicals. Toz adedicaus d’una manera u d’atra a charrar de cancions y autors que comparten lo suyo arte. Lo tema central d’iste programa son las cancions de cancions: temas que charran de bandas, influencias, himnos y cantaires. Lo femos con un viache por Galiza, lo País Valenciano y Castiella de man de tres grupos con firme calitre.

Completamos lo programa con la locución de Capturar, un d’os relatos d’o Inktober de 2019 que se replegó adintro d’o fanzine Tintubre. Ixe fazine, los atros dos, que replegan los relatos de 2020 y 2021, y toz los míos libros los podrez trobar en la Feria d’o Libro de Zaragoza que se celebra entre lo 1 y lo 9 de chunyo en lo Parque Gran. La tarde d’o 3 de chunyo tendré toda la mía obra en la paradeta de l’Asociación Aragonesa de Escritores. Antimás, lo 1 y lo 9 seré en la paradeta d’Imperium con los míos libros en castellano.

Encara queda tiempo pa dos cancions mas: la primer, d’o calaixo d’as drogas, arribada dende tierras gallegas. La segunda, que zarra lo programa, un tema sobre Palestina de El corazón del sapo. La resta d’o programa contará con la banda sonora d’os participants d’o Borina! Festa! Fest!, lo festival que ha organizau Arainfo pa responder a las enrestidas que ye patindo y celebrar lo suyo treballo de contrainformación.

Recuerda que puez ascuitar toz los programas en Ivoox, Spotify y la web de Radio Topo.

Programa #170

 

 

Parques faunisticos. Tierra de barrenaus 10x18

Un d’os alacez pa la conservación de bel patrimonio ye conoixer-lo. Ye de mal apreciar y d’entender lo que no se conoixe. Por ixo ye tan important la divulgación lingüistica. Y por ixo en ye tamién la medioambiental. En un mundo por cada día mas urbanita, s’amenista prou saber qué ye lo que tenemos arredol y cómo hemos de fer pa chestionar-lo de manera correcta y que conserve la biodiversidat.

Una d’ixas ferramientas educativas pueden estar los parques faunisticos. En Aragón en tenemos dos: Lacuniacha, en Piedrafita de Tena, y La Maleza en Tramacastilla, en la Sarra d’Albarracín. Tamara nos charra hue d’ixos dos parques y d’as diferencias con los zoos u con atros centros como Cabárceno, en Cantabria que, tot y que puedan pareixer parellanos, tienen una filosofía y unas practicas opuestas a tot lo recomendable.

En la parte mosical d’o programa, trayemos un mosico polemico y provocador que nos ha visitau en zagueras y remeramos un d’os suyos discos mas sinyalers. D’o calaixo d’a canción d’a escuela, en quitamos una d’un rockeros exeyanos que debeban de suspender todas por lo que cantaban. Y antimás, un taste de Xavi Sarrià, que visitará Aragón pa actuar en Lo Poborina Folk, y de Fermín Muguruza, que torna t’os escenarios, encara que no hemos quedau sin entrada, asinas que si a belún le’n sobra, que nos dé un toque.

Recuerda que puez ascuitar toz los programas en Ivoox, Spotify y la web de Radio Topo.

Programa #169

 

Perrosanxe, la dentista y un bardo enano

La boca levaba fendo-me mal bella semaneta. Uns días mas, atros menos. Ixe miercres de tardes ya no’n podié mas. Habié de marchar d’una asembleya porque ya ni me’n enteraba, d’o que charrabanos. A l’altro día, a punto d’o maitín, grité a la dentista y tenié la suerte de que me dio hora pa lo mediodía. Pa isto d’os dientes, igual como pa muitas atras cosas, soi un cagoso. Por ixo heba tardau tanto a gritar. Por ixo yera de tot acollonau en ir-ie.

La primer buena noticia estió que la moza de recepción heba estau alumna mía anyos habe. “Me febas clases los viernes”, me dició. “Vai, pues d’ixo si que en fa anyos. Ya sería en lo local viello de Nogara”, le respondié, remerando, con una mica de recosiro, aquels tiempos que feba de mayestro, que tan buenos ratos pasaba y tanta buena chent conoixeba. 

Contino pasé ent’a cambra d’aspera. En una uellada alufré todas ixas caras d’angunia y dolor propias d’espacios asinas. En ixe momento no me feba mal cosa, pero remeraba la tarde que heba pasau, tot y ir dica las cellas d’ibuprofeno y paracetamol, y refusaba la ideya de jopar d’astí como si nunca no hese gritau, de fer volito como Homer cuan le ha de donar un d’os suyos rinyons a su pai. “Au, va, esta-te valient por una puta vegada en la tuya vida”, me repetiba. Quité lo libro d’a mochila. “Leyer te fará bien pa ixublidar lo que ye a venir”, pensaba. Yera Los Salvajes, una novela de fantasía, buena cosa pa evadir-me. La ubrié y me capucé en  Brahma, lo mundo de fantasía creyau por Raúl Lahoz. Astí me chunté con la druida y lo bardo enano en las suyas aventuras y, de rapiconté, toda ixa aseptica sala dispareixió d’o mío arredol. 

De bote y voleyo, un incante me fació abandonar Brahma. Una muller heba decidiu que la millor manera d’aguardar a que le tocase lo redoldín yera veyer videos en lo mobil con lo volumen puyau. No guaire alto, he de decir, pero prou como pa que se me fese dificil concentrar-me en la lectura. No ye la primer vegada que me pasa en asperando consultas medicas. Y siempre me pregunto qué clase d’educación y empatía tien ixa chent. Que, en todas las ocasions, yeran mas grans que no yo, que no charramos de chovenardos zetas enganchaus a lo mobil, que ni ista ni los atros iban a fer-ne ya los sisanta. 

“Pasa, Carlos. Tu a lo tuyo, que Edric, lo bardo enano, va a aventar una granada machica u no sé qué costodias”. Tanimientres, la sala heba iu vuedando-se y nomás i quedabanos la sinyora d’o mobil, una yaya con farcha de vivir en León XIII, los habitadors de Brahma y yo. La de León XIII decidió d’intervenir.

- ¿Quí ye ixa? - sinyalando-le lo mobil

- Una periodista.

- ¿Y de qui? - Como en los lugars, quereba saber la casa.

- Ista no sale en garra medio. No sé, a yo me plegan los videos istos que fa ella y son bien majos

- ¿Y de qué charra?

- De la Ana Rosa. Que be d’estar mal bicho. Cosas puercas, ya sabe.

- Vai, ixo lo dirá ella. 

- Pues prou que lo diz.

Y yo limpio prebar d’ignorar-las y de tornar a lo libro. Lo día d’antes, lo Perro heba feito la suya zaguer perrería, anunciando que se preneba uns moscosos pa fer mindfulness, veyer-se la cuarta temporada de Shingeki no Kyojin u que me sé yo. Asinas que, veyendo lo camín d’a conversa, yera contando los segundos pa que salise lo tema entre que Edric decidiba qué conye feba con la granada machica.

- Y qué me diz de lo Cocho Sanxe, que s’ha encarranyau, ha pillau una chirrintela y nos ha deixau sin gubierno cinco días. Como un borche.

Ya tardaba. La d’o mobil, charrando-le d’os medios mierder que s’inventan noticias. Se teneba estudiada la lición.

- No se las inventan, que i hai papels. ¿Vusté sabe quí ye Barrabés? Pues la Begoña buens negocios foscos teneba con el, que aquí en Aragón conoixemos muit bien a Barrabés. Cal informar-se, cal informar-se.

Y yo pensando si los mios piez de gato, que me los mercoron en ixa botiga, levarían rastro de psoecialismo y por ixo la escalada se me da tan malament. Me mordeba la luenga de contino entre que leyeba, releyeba y tornaba a releyer lo mesmo paragrafo con Edric ya mirando-se-me con cenyo de “¿pero me vas a deixar abanzar en la mía aventura u no? Que me tiens aquí que pareixco lo CinExín, entabant y entazaga terne que terne”,

La d’o mobil, contrataca con un “¿Y la Ayuso, qué?”

- La Ayuso no ha feito cosa, lo suyo novio ye unatra persona.

A cascar-la. Lo siento, Edric, pero t’aparco. Zarro lo libro, foi aparatos y respulio un “¡hombre ya parfabar! La Bego sí, pero no pas lo pijauto, no? U semos u nos semos. Que yo no quereba decir ni pon, que yera mirando de leyer tranquilament, pero ye que me fez fablar”

La d’o mobil, que se vei refirmada, s’une a la enrestida. 

- Ixo, sinyora, que cal estar coherent 

- Ya veigo de que coda son vustés - diz la facha que suposo que, como Andy u Lucas, ni será de zurdas, ni de dreitas: normal.

- Pues sí - y yo ya pensando en meter l’himno d’a URSS, que lo levo en lo mobil pa ocasions asinas y devantar-me con lo punyo en lo tozuel. Pa joder nomás. 

La de León XIII se fa chiqueta y se calla. Torno t’o libro en un silencio absoluto que nomás trenca, de cabo ta cuan, la d’o mobil, pa recordar-le a Mrs. León XIII “cal estar coherent”.

¿Milagros? ¿Dolores? Buens nombres pa ir t'a dentista. La enfermera les va anunciando que pasen y me quedo solo de nuevas con los míos fantasiosos companyers dica que me toca. ¿Carlos? Si, soi yo. 

“Que no m’haigan de quitar cosa, que no m’haigan de quitar cosa”, iba rezando a las deidaz de Brahma entre que recorreba lo corredor d’a clinica. D’empastes, me’n han feito cuantos, asinas que ya no me fan miedo, pero encara teneba toz los dients, asinas que m’aterrorizaba que me’n hesen de quitar garra. Lo desconoixiu, ya sabez. 

“Posa-te, ubre la boca patalera, a veyer… bufff”. ¿Buff? ¿Qué ye buff? ¿Buff me muero? ¿Buff qué? Frases, sinyora dentista, con sucheto, verbo y predicau, que las onomatopeyas nomás trayen confusión y medrana. “Tiens un caixal superquerau, caldrá quitar-lo”

Como en lo meme de Sailor Moon, las glarimas me surten a maracantón. 

- ¿Y no se puet empastar? - pregunto fendo la ploramica.

- No vale la pena. Isto te puet dar muitos problemas. Y ye una negrilla, que no te vale pa res.

Y me cago en la evolución que nos deixó astí las negrillas pa no cosa. Pa que dasen mal, t’empenten a la resta de caixals u se te queren y te’n haigas de sentir lo mitín d’a de León XIII, que regular que nomás yera venida pa una limpieza de boca y se’n va d’a clinica con los mesmos dients que i ha entrau.

- ¿Te la foi ya u viens belatro día?

Me conoxico y sé que si salgo d’astí ya no i torno que en ambulancia. “Da-le”, y la muller agafa una cheringa con una agulla que me pareixe lo palitroque de Serguei Bubka. 

Bels vinte minutos dimpués, salgo tot aliviau. No ha estau pa tanto. Le pago lo que pertoca a la mía ex-alumna entre que la enfermera me recuerda que he de fer servir un colutorio bel par de días. “Preta-te agora un chelau, que te fará bien”. Dito y feito. Un ratico dimpués, ya en casa, le doi a una tarrina de Vainilla con nueces de Macadamia, que mama mía que gustos de chelau mas raricos fan en zagueras, pero que sabe de pistón, entre que leigo, ya tranquilo sin mobils ni fachas, lo mío libro. 

M’esmachino a la d’o mobil veyendo youtubes en lo tramvía y a la de León XIII enchegando a la Ana Rosa y me caciego en lo mundo de Brahma, que pa ixo s’inventó la literatura fantastica.