Lo filo d'a borina (Microrrelato de Katrina)

La doblaranya Katrina, a pesar d'a suya naturaleza aracnida, nomás treballó de filadora tres vegadas. La primer, fació lo filo argumental d'una serie de televisión. En estar la suya opera prima, se le enreligaba terne que terne, fendo-se nyudos de mal desembolicar. Se barafundió tanto que, en arribar la season finale, dengún ya no la veyeba y totz se quedoron sin saber qui yera l'asesino.

La segunda, estió un filo de Twitter, pero entre tuit y tuit, s'iba calando trolls respuliando, hashtags luitando por trendingtopicar-se y vinclos a paragrafos galvans que prebaban de ganar-se la vida fendo-se pasar por noticias. S'acabó trencando en un amiro d'inconexos conchuntos de parolas.

A la tercer, le adedicó mas tiempo. Heba aprendiu buenas licions d'os suyos dos primers fracasos. Filó y filó, prenendo los millors materials que teneba arredol: las mosicas mas populars - que no las mas conoixidas -, la risas mas ristoleras, las historias que recorreban las carreras de portal en portal y las bebidas millor barrachadas en espuertas plenas de fruita de temporada. Unió la veleta d'o gallo d’a ilesia con cada una d'as casas d'o barrio con ixe filo invisible y aguardó dica lo diya chusto. Un rusient quintidi de mesidor lo fació vibrar por primer vegada. Una imperceptible nota fue arribando a los oyius d'a población. A qui lo sentiba, se le empliba lo cuerpo de borina. Los clavillars empecipiaban a secutir-se, transmitindo lo baile dica lo tozuel, en una pasa que a escape s'ixemenó por toda carrerota, bar, botiga y plaza. La Madalena bailó y cantó dica que lo sol, farto d'estar-se iluminando lo costau aburriu d'a planeta, se'n vinió a mirar-se-los. Y lo barrio fue recuperando china-chana la calma. Katrina quedó dende alavez encargada de fer vibrar lo Filo d'a borina. Una vegada cada anyo, como poco. Pero la verdat ye que la nota d'a Madalena, como le claman dende aquella nueit, torna a sonar siempre que cal.

Iste microrrelato ye protagonizau por Katrina, un d'os personaches d'o mio libro Parola de follet. Si quiers saber-ne mas clica aquí.

Escribir como terapia (Cantando Líquid, de Smoking souls)

"Farem dels versos un vaixell per transportar totes les nostres miséries i enfonsar-lo a l'oceà". Líquid. Smoking souls.

Aprender a leyer y escribir, antimás d'estar una graniza ferramienta d'o ser humano, ye probablement lo conoiximiento mas important que haiga adquiriu en la mía vida. Pero antiparte d'a vesant purament utilitarista, la escritura me permite totz los diyas vivir muito millor.

No sé si escribir será tant terapeutico como dicen, pero no fer-lo ye qualcosa que no quiero nian concebir. Igual como me cuesta pensar en un mundo sin mosica, se me fa anguniant uno a on que no podese disfrutar d'iste arte. Como consumidor y como productor, toda dos maneras fan que la mia vida siga muito millor.

Haber d'escribir un texto aduya a pensar sobre lo que queremos transmitir. A diferencia d'a interacción oral, mas espontania, las ideyas en lo luengache escrito han d'ordenar-se, prescidindo de toda la información que puet aportar lo tono u los cenyos. En ixe proceso, a sobén, nos trobamos con reflexions que no faríanos si no nos hesenos atriviu a escribir lo que pensamos.

Quan concaro una fuella u una pantalla en blanco, con ganas d'escribir u bella ideya que transmitir, me fa goyo de contimparar lo mio tozuel con bella aula de crios d'escuela. Por defecto, totz nos movebanos a la bimbola, como las moleculas d'un gas. Asinas van las mias ideyas, por l'aula atarrantadas, topetando-se con belatras, amagando-se baixo un pupitre, u timidas en un rinconet. En empecipiar a escribir, i entra la mayestra y se mete a ordenar ixe caos. "Fuleno, ves t'o puesto tuyo. Zuteno, deixa d'abatanar a lo tuyo companyer. Mengueno, replega los libros que has deixau por tierra". Y asinas-asinas lo texto va prenendo forma. Talment a la fin d'a clase las alumnas no sigan exactament como quereba la mayestra, pero a lo menos s'ha acabau toda la titabola previa.

Lo mundo agora va a tot meter. La mayoría d'os mensaches han de cullir-ie en los 280 caracters de Twitter, en los vinte segundos d'os anuncios de TV y radio u en las buegas d'as stories d'os retz socials. Todas istas ferramientas son la fast food d'a comunicación: fan honra, funcionan, cumplen la suya función, pero les falta ensundia. Y igual como pa fer buena cocina, cal tiempo y dedicación, pa comunicar cosas que valgan la pena s'aprecisa lo mesmo.

Asinas que talment una d'as propiedatz terapeuticas d'a escritura, compartida con la cocina, siga derivada d'o feito de que no se puet escribir a tot meter, de que cal aturar con tot lo que yes fendo, fer firme ficancia d'a fayena que vas a encetar y executar-la a monico porque igual como un pasa con una buena receta de cocina, deixar-se levar por las prisas puet malmeter lo texto.

A ixe tatoneyo d'o mundo, propio d'a escritura, cal anyadir-le unatra dimensión en lo caso d'a ficción. Astí, antimás de cambiar la velocidat se cambea tamién l'espacio. Has d'ixopar ent'o mundo que yes leyendo u creando y deixar en tierra tot lo que no te cal pa ixe viache. Que en bells casos, ye simplament TOT.  Ixa abstracción ye muit evident en lo caso d'a fantasía heroica u d'a sciencia ficción, pero cuento que ocurre en bella mida en qualsiquier buena obra.

Leyendo y escribindo te trobas con muitas cosas que yeran en la tuya ment dondiando y que sisquiá lo sabebas. Te trobas con tu mesmo, con los tuyos pensamientos y las tuyas miserias. Y como dicen los Smoking Souls, fas con las tuyas parolas un barco que se leve ixas zagueras, y lo fundes en l'ociano. Ixa ye la sensación que tiengo quan remato de leyer un buen libro u d'escribir bella historia.

Tierra de barrenaus: Cinquena temporada

Dibuixo: XCAR

Iste anyo radiofonico ha caminau una mica a entrepuzons. Por qüestions lochisticas, asociativas y vitals, lo prochecto que levaba en lo tozuelo quan empecipié a planear la cinquena temporada d'o programa lo habié de modificar y adaptar-me. A la fin cuento que ha quedau un anyo prou digno. En tot caso, abaixo tenetz totz los programas d'a temporada pa chuzgar-los vusatras mesmas y opinar-ne.

I ha habiu quantos contenius que filan con atros anyos: los pilars, los premios d'a mosica aragonesa, lo cabo de temporada con l'especial temazos... Tamién programas monotematicos, que yera la ideya orichinal de TdBradio, como lo especial comics, lo de viaches de D'estrela a estrela u lo que adediqué a las Chornadas d'as luengas d'Aragón. Y pa rematar, atros con qualques temas y seccions.

Iste zaguer modelo será basicament lo que aplique en la nueva temporada, que vendrá con bell cambio. La ideya - ya veyeremos dimpués l'aplicación como será - ye fer seccions y entrevistas mas curtas. Lo programa, antimás, pasará a durar una hora en cuenta de dos, en la suya emisión radiofonica. Encara que pa las que lo sentitz por podcast lo d'a duración irá entre la hora y lo que me agane, como siempre. En tot caso, la periodicidat d'a seisena temporada se duplicará, pasando a estar quincenal, asinas que tendretz como minimo, la mesma dosi mensual de TdBradio.

Lo que sí que creigo que ha teniu ista temporada ye mas colaboracions y mas diversas que no atros anyos. S'ha puesto sentir a-saber-las voces. Como siempre, muitas menos de mullers que no m'hese feito goyo. Asinas que tos animo a participar, a ninviar-me totz los audios, textos, videos, preguntas y lo que queratz. Ya sabetz que podetz contactar con yo a traviés d'Instagram, Twitter, Facebook, Youtube u en lo correu tierradebarrenaus@gmail.com.

La temporada completa la puetz ascuitar en los vinclos que tiens abaixo, que te levan ta cada entrada d'o blog. Pero tamién puetz fer servir la plataforma de Podcasting Ivoox, u sentir-los dende la web de Radio Topo.

Como siempre, quiero agradeixer a toda la chent que hetz feito posible la temporada. Disculpatz sin m'en deixo garra: Mario G., Cherardo, Santi, Tamara, Juan Pablo, Rubén, Armando, Mario S., David, Diego, Chorche, Elena T., Fernando C., Fernando E., Chabier, Guillén, Mullers y Cordials, Aneta, Silvia, Isidro, Anchel, Inaciu, Dabi F., Dabi L., Serchio, Elena M., Carrachinas y Edu.

L'aragonés de sangre puerca no reblará y tos asperará un anyo mas a l'atro canto d'o dial y la pantalla dende metat de setiembre. Tanimientres, puetz repasar la cinquena temporada contino.

Nogara, O zaguer chilo 2, Krevi y Las Almunias. Tierra de barrenaus 5x01

Pilar 18 y los quantificadors en aragonés. Tierra de barrenaus 5x02

Viaches d'estrela a estrela. Tierra de barrenaus 5x03

Lo Sur resiste y la Republica catalana fa un anyo. Tierra de barrenaus 5x04

Tierra de barrenaus 5x05. Especial comics

Lo vedau de Penyaflor y la negación en aragonés. Tierra de barrenaus 5x06

La Corona d'Aragón y lo Diya Internacional d'a Luenga Materna. Tierra de barrenaus 5x07

XXVI Chornadas d'as luengas d'Aragón. Tierra de barrenaus 5x08

Premios d'a mosica aragonesa 2019. Tierra de barrenaus 5x09

Qué diz ixa mesacha? y Moncayo 900. Tierra de barrenaus 5x10

Libros y mosicas pa lo verano. Tierra de barrenaus 5x11

Temazos 5. Tierra de barrenaus 5x12

Dividius y sin dar batalla (Lo inexistent MDA)

Quan digo que a l’aragonés le queda tasament bellas decadas de vida, gosan de decir-me pesimista y demandar-me lo porqué d’ixa afirmación. Las causas son variadas: la presión d’o castellano, la perda d’a transmisión cheneracional, la falta de refirme institucional... Pero todas ixas causas ya existen dende fa anyos arrienda. Lo que m’ha feito cambiar la mia previsión ye atro factor que ha arribau fa poco: lo feito de que no tiengamos un movimiento en defensa de l’aragonés (MDA entabant).

Pa que bi haiga qualcosa digna de clamar-se movimiento, creigo que cal que exista diferents asociacions y personas que, dende las suyas envistas, treballen por la causa común. L’aragonés, en iste caso. Y d’ixo, a diya de hue, no en tenemos. Fayena por l’aragonés, se'n fa, y no poca. Libros, radio, cursos, televisión, difusión... pero no bi ha garra reivindicación política. ¿La comunidat aragonesofona quiere la oficialidat? ¿Qué modelo d’amostranza queremos? ¿Qué dreitos han de tener las fablants a uno y atro canto d’a buega d'as famosas "zonas d’uso predominant"? Seguimos con l’activismo cultural, que no ye poco y ye un treballo necesario de tot, pero hemos perdiu tot l’activismo politico.

En lo MDA, historicament, no podemos charrar de guaire cohesión interna. En lo tiempo que levo en istos empandullos, siempre hemos teniu unas tensions prou furas. Pero con tot y con ixo, hemos adubiu a meter-nos d’alcuerdo bella vegada. Preba en ye las dos Coordinadoras Aragón Trilingüe, lo movimiento de Chuntos por l’aragonés, la PEA, lo II Congreso y mesmo bella iniciativa que achuntó a parte d’ixe MDA dica no en fa tanto. Siempre i ha faltau belún. Siempre hemos teniu las nuestras divisions internas. Pero s’ha conseguiu superar-las pa treballar por los nuestros obchectivos politicos. Siempre, con todas las tensions d’o mundo, bi ha habiu reunions multilaterals. Talment m’entivoque y m’haiga perdiu bell capitol, pero ixo fa tiempo que no se fa, y cuento que tardaremos prou a veyer-ne, de nuevas.

¿Belún puet esmachinar hue un acto conchunto de mas de dos asociacions (que no sían las "pantasma" d’a CHA) en defensa de bella reivindicación política de l’aragonés? Recuerdo quan empecipiaba en isto, quan nian heba prencipiau lo mio primer curso d’aragonés, una manifestación que se convocó en Plaza Aragón. Creigo que yera convocada por Ligallo de Fablans que, t’a part d’alavez, yera bien fuerte como asociación. Tasament i estiemos bella trentena de personas. La Coordinadora Aragón Trilingüe, en 2009, arroclaba a mils de personas por las carreras de Zaragoza. Una decada dimpués, probablement tiengamos la mesma capacidat movilizadera que aquella primera.

¿Ye porque bi ha menos intrés por l’aragonés? Cal que no. De feito, creigo que ye de revés. Los actos culturals que se fan, que n’i hai a embute, implen las salas. Las presentacions de libros, los teatros, los conciertos... tienen una asistencia prou digna pa lo que ye lo nuestro país. Manimenos, dengún no charra de modelo educativo, dreitos d’as fablants, autoridat lingüistica, lei de luengas, oficialidat... y tot lo listau de reivindicacions historicas.

La creación d'a DGPL de man de l'anterior gubierno Lambán fació mover-se muitas posicions. Una parte, aliniada de tot con Susín, a on que tendríanos a Fablans y quantas chiquetas asociacions con mayors u menors vinclos con CHA. Ixe sector ha deixau de tot qualsiquier reivindicación política que tenese. No charrarán de modificación d’a Lei de no-luengas, dreitos d’as fablants, oficialidat ni garra cosa que pueda molestar ni un sacre a lo suyo Director Cheneral. Son temas vedaus de tot y que han delegau las suyas reivindicacions historicas a la voluntat de l’administrador. CFA no s'ha amostrau critico que con bella decisión como la prebatina de grafía u la propuesta de pseudo-academia. En frent, nomás teneba a los entornos de EFA, Nogara y SLA como se scenificó en diferents actos y comunicaus entre 2015 y 2017. Ixo, que yera lo mas pareixiu a un MDA critico y independient, se trencó l'anyo pasau quan la SLA chiró la suya posición enta una serie d'enrestidas contra todas y tot lo que no siga la suya envista de l'aragonés.

¿Cómo d’important ye isto? En la mia opinión, vital. Sin MDA, totz los nuestros dreitos lingüisticos quedan a la voluntat de l’administración. Lo que, pa la DGPL y lo gubierno Lambán, ye un scenario perfecto, prou que sí. Un tema menos que preocupar-se-ne. Las fablants d’aragonés no daremos mica mal en toda la lechislatura. Sin los movimientos socials en defensa d’as suyas propias luengas, hue l’euskera y lo catalán no serían recuperando zonas, l’asturiano no sería a pocas de fer-se oficial u en Valencia y Navarra la ensenyanza en las suyas luengas sería prou mas radida.

¿Esmachinamos que porque bi hese un miembro de Podemos-Equo en la consellería de Medio Ambient las asociacions ecolochistas deixasen las suyas reivindicacions? ¿U las feministas, si fuese la consellería d'Igualdat?

Podremos seguir fendo los nuestros libros, obras de teatro, vocabularios locals, charradas y tallers, pero sin un movimiento asociativo fuerte, que arrocle las diferents sensibilidatz de l’aragonés, que siga independient d’os partius politicos y de l’administración, etc. somos perdidas. Y, quan escribo isto, en agosto de 2019, veigo de tot impossible que ixo cambie en, minimo, un lustro. Sisquiá m'entivoque.

Piratas mosicals (Cantando Anticanción, de Skalariak)

"Todos fuimos piratas alguna vez, desde el vinilo al mp3" Anticanción. Skalariak

Confieso que he pirateau. Ye peccata minuta. Una d'ixas cosas que son ilegals, pero socialment acceptadas y normalizadas. Afortunadament pa yo, y pa qualsiquier persona que ame la mosica. Si no por la piratería, no conoixería ni la metat de mosicas que conoixco agora mesmo, ni m'hese deixau tantos chanfles en conciertos. Sisquiá hese puesto pagar tamién los orichinals.

Entiendo la postura d'as creadoras. A la chent gosa de fer-nos goyo cobrar por lo nuestro treballo. A muitas mosicas que no tienen atra que adedicar-se-ie en lo suyo tiempo libre, les faría goyo de poder fer-lo profesionalment. Pero creigo que la piratería ye lo menor d'os suyos problemas. La mia experiencia talment no siga la mayoritaria, pero ye bien común.

Dende criet he consumiu mosica a-saber-la. En un porcentache altismo, pirateada. Dende las casetes que nos ibanos pasando y que a cada gravación y reproducción sonaban pior, dica agora mesmo que tiengo una dotzena de discos baixando-se dende eMule (sí, eMule sigue funcionando). La revolución d'o CD me pilló choven y la mayoría d'os discos los ascuité ya en ixe formato. Antiparte d'os que en febanos partache la colleta d'amigos, las bibliotecas publicas y bella botiga a on que logaban cds orichinals me furniban de tot lo que no podeba mercar. Porque sí, de quan en vez mercaba discos orichinals. Mas que mas, los que pillaba a buen pre u yeran de bandas que me fesen firme goyo. Pero la mia economía - basicament la semanada de mis pais - no adubiba a mercar ni sisquiá un chiquet porcentache d'a mosica que ascuitaba. En casa, en lo camín ta l'instituto, en l'auto quan a la fin en tenié... prebo de que la mia vida siempre vaiga acompanyada de buena y variada mosica y pa que ixa cantidat fuese nomás d'orichinals hese aprecisau tres u quatre chornals.

Toda ixa ripa de mosica que ascuitaba gracias a la piratería me permitió conoixer grupos a embute. Y como siempre he pensau que lo millor ye fer-lo en directo a on que la experiencia ye de tot diferent, ye estau raro lo cabo de semana d'a mia vida que no he iu ta bell concierto. Talment m'escusaba bella perra d'os discos pero a fe que qualsiquier grupo que en siga fan será bien contento de que, gracias a ixo, haiga iu a veyer-los un ciento de vegadas.

Tot ha cambiau muito en istos zaguers anyos. L'acceso ye muito mas libre si tiens conexión a internet. Puedo ascuitar qualsiquier canción de qualsiquier colla vía Youtube, Spotify u la plataforma que siga. Muitas penchan los suyos discos pa descarga directa. Y no entiendo a qui no lo fa. Las mias listas de reproducción pa correr, pa fer gambadas u pa l'auto son muito mas freqüentadas por qui me facilitan l'acceso a los suyos archivos mosicals. Lo que fa que los ascuite mas a soben. Que siga mas a la tisva d'o suyo siguient treballo y de a ón podré veyer-los en directo. Muitos d'os zaguers discos que me he mercau fisicament ya los teneba baixaus d'antes. La crompa ha respondiu a lo mio fetichismo u a la voluntat de refirmar economicament lo prochecto mosical.

Hue, con pleno acceso a la mosica, contino mercando discos, he feito parte de quantos crowdfundings pa gravar-ne y, sobre tot, voi ta totz los conciertos que me permite lo mio chornal. Un porcentache prou important d'os mios diners "pa vicios" van t'a mosica de manera dreitament u indirecta. Y tot ixo gracias a la piratería.

Nota: Iste ye lo primer post d'una nueva serie, que clamaré "Cantando...". I meteré posts que tiengan como inspiración bella frase de bella canta, incluyindo a la fin de cada ún lo video, si n'i hai. Si tiens bella propuesta de canción, mete-te en contacto con yo.

Temazos 5. Tierra de barrenaus 5x12

Acaba la temporada de Tierra de barrenaus radio y lo fa, como todas las anyadas con un especial Temazos. Dabi, Rubén y yo mesmo tos proposamos cinco cantas cada ún pa disfrutar iste verano. Un total de quince propuestas mosicals bien variadas. Catorce, en realidat, que una no vagó de meter-la.



En ista edición queriemos chugarriar una miqueta y proposemos un bingo. A cada canción le hemos meso un numero entre 1 y 15 y, fendo una tarcheta de 3x3, tos animamos a que vaigatz chugando con nusatros entre que sentitz lo programa. 

Como totz los anyos, aproveitemos pa charrar bella mica sobre mosicas que nos fan goyo u que odiamos. Y como totz los anyos, en grabar-se de verano lo programa, la calor nos fació haber de consumir buena cantidat de biera. Sentimos los problemas, tecnicos y no, derivaus d'ixa circumstancia.

A l'atro anyo tornará Tierra de barrenaus, con muitas novedatz que anuncio a la fin d'iste programa y asperando que continetz a l'atro canto d'a radio, mp3, streaming u la que siga la manera que sintatz lo programa. Tanimientres, tos animo, una vegada mas, a que me ninvietz todas las vuestras propuestas y opinions pa la nueva temporada.

Viachando por la Sarra d'Algarbe

Que pa desfender lo país cal conoixer-lo ye una maxima que levo prebando de practicar dende que tenié autonomía pa viachar t'a on que querese. Ixa convicción m'ha levau por muitos lugars d'Aragón pa mirar d'entender bien lo territorio y disfrutar de toda la suya polideza. Me queda en la mia achenda bell puesto bien sinyalero, ye verdat, pero creigo que tiengo un conoiximiento prou fundo d'a nuestra tierra. Asinas que agradeixco prou trobar-me sorpresas como lo puesto que conoixié fa bell dia: l'Algarbe.

Lo municipio de Terrient ye en lo cabo sur d'o país, en la comarca d'a Sarra d'Albarrazín. Bien cerqueta d'o lugar ye lo camping Algarbe, a on que nos estiemos lo cabo de semana, y una ampla aria recreativa que ye una choyeta. Se troba a mas de 1400 metros d'altaria - no ixuplidetz la chaqueta ni en lo verano mas rusient - y se tracta d'una graniza pineta. Dende lo camping se puet fer qualques cursas. Una d'ellas, ta l'Alto de l'Algarbe, a quasi 1600 metros.

Rodiando lo camping tenemos mont pa aburrir. Qualsiquier persona, independientement d'a suya forma fisica, puet fer-se una bonica gambadeta por toda ixa parte. Un aria a on que, mesmo con lo camping a rebutir, puetz gronxiar-te con lo silencio que nomás los paixariquetz tienen permiso pa crebar. Pa fer un bocau, antimás de bell bar restaurant, bi ha zona pa fer barbacoa y si la cachimalla no tien prou con tot lo campo que tienen pa correr, i tienen un parque con bandiadors y estructuras d'ixas de fierros que cada vegada son de pior trobar y que tantas buenas horas dioron a la mia cheneración quan yeranos crias.

La redolada ofreix posibilidatz arrienda. Culturalment, ye a tocar d'Albarrazín, sin dubda un d'os lugars mas polius d'Aragón y tien firme riqueza arqueolochica dende las pinturas rupestres dica lo rastro fisico que i deixó la Guerra Civil. Zoolochimanet, en las radidas 48 horas que i pasé, podie veyer una ripa de variedatz de blincamonts y paixarelas, antiparte de muixons a embute: pinzans, codalbetz, falcillas, verderolicos... Lo pin ye lo rei d'un paisache a on que tamién se puet disfrutar d'una cheolochia d'ixa que siempre me fa pensar que malfurrié las horas que pasé sin fer ni puto caso a la profe que me la dió en Secundaria.

L'Algarbe me ha feito recordar que siempre me queda país por conoixer, por muito que haiga peteniau. Regular que i tornaré, con mas tiempo, ta ixa redolada que tant ixuplidada tenemos a sobén las de Tierra Plana y que tantos tresoros amaga. ¡Ah, y pa forro de bota, se i chuga a morra!