Chornadas "De rizio"

En una dentrada de fa tiempo charraba d'o Matarranya como una redolada que nos ye dando a os cheposos una lizión de dinnidat y de saber organizar sobrebuenas autibidaz con muitos menos meyos d'os que tenemos en Zaragoza. Bi ha unatra redolada que, dende fa tiempo tamién, ye fendo una ripa d'autibidaz culturals, grazias a la suya Área de Juventud - u demba de chobenalla, como sé que a beluna l'ese feito goyo que se dezise - y que ye l'Alto Galligo (u Alta Galliguera). Ista begada son promozionando as Chornadas ta chobens creyatibos "De Rizio". Bi abrá charradas y tallers con chen que conoxe tan bien a cultura aragonesa como Roberto Serrano u Eugenio Arnao. Amás se ferá un pasabillas con Lurte o biernes y un conzierto d'o Comando Cucaracha o Sabado. Rufiertas y charradas implen a resta d'un buenismo programa que, de seguras, ferá muita onra ta l'aragonés y t'a cultura aragonesa, en cheneral.

As chornadas se zilebrarán os beniens 20, 21 y 22 de Abril en Panticosa. Podez leyer o programa, beyer os pres y apuntar-tos-ie aqui.

Muitas felizitazions t'a chen de l'Alta Galliguera que, como he dito alto, fez una faina sobrebuena.

Esbarrando

Como ya dizié fa tiempo, no sé guaire catalán y, antimás, sé muito menos sobre a suya istoria y espardidura, asinas que puestar que en lo que boi a escribir bi aiga bellas errors u suposizions que no sigan esautas. Si en beyez beluna diziz-lo. De todas trazas iste articlo ba a charrar sobre l’aragonés, a soziedat aragonesa y a pulitizazión d’as luengas asinas que o catalán no lo foi serbir que como exemplo.

Cuan, con familiars u amigos charro sobre o "balenzian" y o catalán, muitos, a penar d'estar tan filologos como yo – ye dizir, mica – y de saber muito menos que no yo sobre lingüística u istoria d’as luengas, aseguran, sin dandaliar, que o balenzian y o catalán son de raso diferens. Cuasi como si estasen chino y anglés. Una d’as cosas – a unica, de feito – an que se refirman ye o feito que cuan i son ius – ta Balenzia – en as carreteras mete "eixida" en cuentas de "sortida", que ye lo que mete en os cartels catalans. Y, por ixa paroleta, ya son de raso diferens. Alto u baxo fan o mesmo razonamiento ta esfender que, lo que se fabla en as redoladas catalanofablans d’Aragón ye atra cosa que no o catalán que se charra quinze quilometros dillá, dezaga d’a muga con Cataluña.

A ormino pienso en, si bel diya l’aragonés tira entabán y se prenzipian a fer cartels de l’almenistrazión bilingües, cómo se normalizarían bels terminos. Como l’exemplo d’antis me lo han meso tantismas begadas prenzipié a pensar-ie. Se m’ocurrión tres posibilidaz: salida, surtida y esbarre. Creigo que as tres podrían estar correutas. Salida porque se sale d’una carretera ta dentrar en unatra. Surtida tamién, a penar d’o chiquet cambio de sinnificau con salida. A carretera secundaria surte d’a prenzipal. Y esbarre tamién sería bien porque simplamen ye lo que ye. Un esbarre d’un camín. Pero, con cualsiquier d’as tres opzions bi abría polemica. Con a primera, toz os castellanofobos, y toz os que quieran fer bisteras as esferenzias entre l’aragonés y o castellano, s’encarrañarían. Con a segunda pasaría lo mesmo con os catalanofobos, y d’istos bi’n ha arrienda en iste chiquet país nuestro. En zagueras, con a terzera, toda a chentota que fan a mofla de l’aragonés por "sonar furo" diría que ye una baturrada u bella cosa parellana, alazetada en a gran incultura lingüística que tamién bi’n ha a camatons en Aragón. En a mía opinión, que no conta ta cosa, y que no se refirma en garra atra cosa que no siga una preferenzia personal, esbarre sería a millor opzión.

Asinas que, se faiga lo que se faiga, si bel diya podemos meter os cartels en aragonés, bi abrá ambute de chen que los creticará dende l’ambiesta pulitica. En primeras no trobo garra problema lingüistico ta azeptar cualsiquier d’as tres parolas, pero as tres tienen problemas puliticos. Y, como en tantas atras cosas, a pulitica pesa muito más que no as custions zientificas – u lingüisticas, en iste caso.

Si belún d’os que leye isto creye que beluna d’as parolas debanditas no sería correuta ta dezir-le a las "salidas" castellanas, as "sortidas" catalanas u as "eixidas" balenzianas que lo meta como comentario en o blog, que le’n agradixeré muitismo. Sobre iste tema bi ha un testo sobrebueno que se diz L’aragonés, nieu zanzera, escrito por Juanjo Segura – miembro de l’academia de l’aragonés – en a pachina web de Chuntos por l'aragonés.

Bosando (más) por a cultura

Diz que agora, dende Europa, ban a imposar-nos que calga bosar por os libros que ampremos en as bibliotecas. Leban ya tiempo menazando con fer-lo y, china chana, nos n’emos librau dica agora. A lo menos de bosar por os libros y en as bibliotecas. Si a cultura ye un d’os dreitos umanos –y en ye – se suposa que abría d’estar aczesible ta tot lo mundo. Iste yera un d’os pocos dreitos que se rispetaban en buena parti d’oczidén.
Agora, os que femos serbir as bibliotecas asoben abremos de fer pocha ta pillar bel libro. Os que no las fan serbir asoben dixarán d’ir-ie y, qui nunca no ha teniu a intenzión d’ir-ie dreitamen nunca no leyerá garra libro como no siga que bel familiar u amigo le’n regale. Siempre he feito serbir as bibliotecas a ormino. Si ese de bosar por cada libro que he leyiu prebablemen sería pior que no a mía ipoteca (y ixo ya ye muito malo). Pero ye que, dende que soi fendo lo prochecto de fin de carrera foi serbir tres bibliotecas diferens de bez y en quito dos u tres libros de cadaguna cada semana u dos semanas. Tampoco no podremos fer os prochectos de fin de carrera?. U simplamen bel treballo ta cualsiquier clase d’a escuela u d’a Unibersidat an que calga fer serbir bella cosa que no siga a enziclopedia que toz tenemos en casa?
Si ista mida plega a fer-se reyalidat abremos amortau l’esprito d’as bibliotecas: a cultura unibersal y de baldes ta tot lo mundo. Caldrá, allora, fer un Emule de libros? S'encarrañará CEDRO (a bersión en libro de SGAE) y nos ferá bosar por si bel diya leyemos un libro de baldes? Antiparti, ye de dar, que as bibliotecas nomás mercarán os libros que pueden dar diners. Dixaremos de beyer as cacanas – pero esistens – seczions en aragonés, os libros d’ensayos zientificos, os matracos d’istoria que nomás os muito afizionaus leyemos y asinas asinas. Os repalmars se plenarán d’a basuera d’os Jimenez Losantos, Cesar Vidal, Pío Moa y atros manipoliadors istoricos u d’atros best sellers – millors u piors – pero que muitas begadas no alportan guaire cosa nueba.
Cal que, no solo qui femos serbir as bibliotecas, sino toda a chen que creiga que a cultura no puede tener un pre, nos achuntemos ta prebar que ista mena de midas no nos sigan imposadas. Que l’Estau bose as piñoras europeas u que cambeen as leis si cal. Pobrichons ixos que biben en países an que ya no se puede ni leyer de baldes….

Chornadas por una economía sostenible, solidaria y etica

Unibersidá - Coleutibo Aragonesista (UCA) organiza os beniens diyas 27 y 28 de Marzo en a Facultat d'Economicas de Zaragoza as Chornadas por una economía sostenible, solidaria y etica. Se i ferán dos charradas. O diya 27, miembros de Fiare y Coop 57 charrarán sobre Finanzas alternatibas y o diya 28 bi irán o Grupo La Veloz Cooperativa que charrarán sobre o suyo procheuto. Con istas chornadas UCA preba de contrimostrar como se puede fer unatro modelo economico que funzione con un minimo de etica, sostenibilidat y biabilidat.

En una Facultat como ye Economicas ye asabelo importán que os alunnos partizipen en iniziatibas como ista si de berdat queremos que o mundo pueda cambiar bel diya. Asperemos que a chornadas plenen as salas y que qui bi baiga quite buenas ideyas cara ta la suya futura autibidat en o mundo d'o treballo. As dos charradas serán en o salón d'actos d'a Facultat a las 19:30.

Contina a criminalizazión

A criminalizazión contra as collas de mosica contina. En l'Estau ya s'enristió contra S.A., Fermín Muguruza u mesmo Reincidentes y Boikot. En Aragón tenemos tamién a nuestra chicota istoria d'a criminalizazión de ixas collas que denunzian seguntes que situazions. Fa años, Fernando Martín y os suyos conzellers fazión a tana a Objetos Perdidos u Opción Cero por as suyas cantas en contra d'o conzello PPero. No guaire tiempo dimpués yera a mesma Corona Espanjola qui enrestiban contra GEN por fer un fotoshop de bella infanta con o conde Lecquio (si no remero mal. d'isto en fa ya muito...). Güe aparixeba en os papers que o PP ye estudiando denunziar a Los Draps por as suyas letras. Tamién se quexa de que les aigan dau o premio a la millor canta en luenga minorizata, binclando ixa dezisión con o PSOE.
Parixe platero que os d'o PP no ban a reblar con a suya estratechia de criminalizazión d'as ideyas nian en a oposizión. O suyo delegau de Gubierno en Aragón, Sr. Ameijide, no solo permitió que Zaragoza se combertise en zentro de reunión y sala de conziertos de collas faxistas sino que, mientres asabelo meses y, atamás d'as continas protestas de coleutibos ziudadans y bezinals, os nazis tenión en funzionamiento un local. O nuebo delegau apañó isto zaguero, encara que no toda la resta. Y o PP nunca no ha dito cosa.
Quienta medrana tienen! Creigo que son bien consziens d'o poder d'a mosica y d'as collas reibindicatibas. Y ye que, afortunadamen, cada diya aparixen en Aragón más collas como Los Draps, Mallacán, Prau... Dende aquí solidaridat y muito refirme t'os Draps y ta todas as collas encorridas y criminalizadas de lo mundo. Entalto Los Draps! STOP criminalizazión!

Sin zero

Con tanto estrapaluzio d’os meyos con os fueros tabarros y atrás fateras, ha pasau como una chiqueta boladeta que nian s’ha notau a notizia finitiba de l’amostranza. O Ministerio d’Educazión ha conseguiu apañar, de bote y boleyo, toz os problemas d’o sistema educatibo: Ya no bi abrá zeros en as notas d’as escuelas. Bieeeeeen! O nuebo sistema de puntuazión será de 1 a 10. Ye dizir, en neoluenga, “zero” ye “uno”. Asinas, os zagals no pillarán ixas depresions que diz que pillan. S’han quedau sin tastar ixe redoncho que toz emos sufriu bella begada. En un desamen de Filosofía de Bachillerato yo mesmo plegué a tener un -1 de nota (en reyalidat teneba un 1 pero me i sacón dos puntos por dixar copiar a un amigo).
Iste repoliu numero que tantismos problemas dio a os matematicos antigos disaparixe, asinas, d’o sistema educatibo. Si les n’esen dito que sería tan dispreziau, talmén no esen malfurriau tantismo tiempo prebando d’escubrir os resultaus d’as operazions con o nuestro amigo “0”.
Cuan leyié a notizia, amás de fer-me unas buenas rialletas por lo ababols que pueden estar los d’o Ministerio, remeré que, en bella ocasión eba leyiu un articlo sobreintresán sobre a istoria d’o zero. Punchaz aquí si tos intresa. Ixe articlo lo trobé en una pachina sobre as matematicas que fan unos profesors de Zaragoza an que se pueden trobar atros contenius como chanzas matematicas, rutas matematicas por Zaragoza y asinas asinas. Muito entretenida, de berdat. En zagueras, rechirando por o rete, tamién he trobau una pachina sobre as matematicas y Futurama. Parixe estar que os guionistas d’os Simpsons y Futurama son toz matematicos y fisicos asinas que, de cabo cuan, fan bella chanzota en as suyas series que, ta qui no siga a la tisba y conoxca bella cosa de zienzia no en para cuenta. Si, como yo, tos fan goyo ista mena de temas, tos recomiendo muito que punchez en os binclos porque pasarez un ratet sobrebueno.
Y dende aquí, un abrazo a o zero!

Cronica d'o cabo de semana

O cabo de semana en aragonés prenzipaba con a presentazión de Ucronía, o libro de Dabi Lahiguera, con que Nogara prenzipia a suya faina publicadera. En a sala Ambito Cultural d’o Corte Inglés cuasi no se i culliba. Nos i chuntemos asabelo aragonesofablans, más que más de Zaragoza, pero tamién de a redolada de Tarazona y mesmo de Bielsa. Dabi, escoltau por Fernando Sánchez (secretario de l’Academia de l’aragonés) y Ruben Ramos, esplicó como eba pensau en escribir sobre Tomás Moro, qué quereba rezentar-ie y reibindicó a posibilidat d’escribir en aragonés sobre cualsiquier tema. Ye bien poliu beyer como a una presentazión d’un libro en aragonés i ba tanto chen que, antimás, de seguras leyerá o libro.

Cuasi sin tiempo marchabanos t’o conzierto de Dechusban. Poqueta chen – encara que cuasi no bi eba abiu publizidat – pero un conzierto bien pincho que aspero siga un buen siñal cara t’a suya partizipazión en A tot estrús. Dimpués de Dechusban, i tañón “La comodidad de anillo” que, por o nombre, me pensaba que yera bella mena de colla tipo Los Gandules. Pero me trobé con una apuesta riesgosa por un rock instrumental que a yo me remeró a las collas setanters que ascuitaba un buen amigo de yo (ola, Bizén!), y que me fazió muitismo goyo. Puestar que no siga a millor mosica ta sentir un Biernes de borina pero, ye una colla que cualsiquier qui aime a mosica bien feita cal que l’ascuite.

O Sabado caleba rebellar-se bien luego ta poder plegar en o taller d’edizión de bideo que organizaba l’Asoziazión Bente d’Abiento con a colaborazión de Charrando TB. Cuasi sin poder alentar por o poder que abié de fer con a bizi y o zierzo firme en contra, conseguié plegar-ie nomás que bels menutos tardi. En o taller nos esplicón bellas custions alazetals sobre edizión de bideo y atrás cosetas (puyar bideos ta YouTube, penchar-los en blogs y webs…). Una pena que no se podese fer un seminario en cuenta de un taller, porque cuasi no bagó de fer tot lo que m’ese cuacau aprender-ie.

Dimpués d’una tardi aqueferada, dentrabanos en a nueba Arrebato an que ibanos a conoxer o nuevo disco d’Ulut y a tornar a sentir a os matarranyencos “Los Draps”. Cal agradixer os apaños que han feito en l’Arrebato encara que contina estando un chiquet guariche con muita carisma. D’Ulut cal dezir que, china chana, ban amillorando y que ye una d’as collas que promete plegar a estar una d’ixas collas miticas de l’aragonesismo. De Los Draps no cal dezir cosa. Tan grans como siempre. Asperemos que enduren muitos años y que ascape publiquen un nuebo disco.
A nuei continó bellas oras más, pero ixo ye atra istoria.

Malas que he rematau d'escribir isto m'he enterau que Dechusban no yera estau trigau t'a benien fase de A tot Estrus. Lo siento por toda la chen que de seguras les esen feito goyo. Dende aquí tos nimbio un fortal abrazo y no tos ne faigaz que soz de puta mai!

Nos pichan y dizen que plebe

Ayer s’aprebó o nuebo estatuto de Aragón S.L. (beyer anteriors temas). Que penica de País! Quiento traidors os de siempre! Deziban en o Periodico que Zaplana y ZP mesmo se cucón un güello. En meyo d’a tronada por De Juana y cía istos dos se quieren, se buscan, se cucan güellos y quemisió ferán por l’Estatuto S.L. Xe, que lindo! (leyer con azento bonaerense). Y qué dezir d’a delegazión aragonesa. U millor dito a delegazión d’Aragón, que no ye lo mesmo. Marcelino (agora M.I.) y Gustavo (agora G.A.) acarrazaus como chirmans. Xublidando as suyas diferenzias ta que o nuestro estatuto S.L. tire entabán…. Penica de País!

Y tanimientres, Labordeta pretando l’unico botón en contra. O discurso d’ERC m’han dito que estió de puta mai. Y ixo ye tot. Un boto en contra, bel discurso pincho y Aragón estricallau.
En a mía opinión, un Estatuto nuebo no ye a soluzión t’os nuestros problemas, encara que ye de dar que aduya. Lo malo no ye lo que nos han feito, que tamién. Lo pior ye que, como diz o titol, nos pichan y dizen que plebe. Las trazas. Garra persona que tienga un ran normal de lectura comprensiba puede leyer l’estatuto, contimparar-lo con cualsiquier atro y dizir que ixo no ye una güeña. Garra persona que quiera una mica a ista Tierra de Barrenaus puede beyer tot o prozeso que remató ayer, pero prenzipió fa muito y dezir que en Aragón nos queda una miquirrina dinnidat. Nos la han sacada. Nos han borrau o pasau. No han esistiu os Decretos de Nueva Planta. Aragón nunca no ye estau independién, no se fazió o congreso de Caspe en o 36 y nian saliemos t’a carrera a desichir autonomía en a Transizión (u relebo?).

Y os culpables no son en Madrí. Ista begada no ye estau l’Estau español qui nos ha feito a tana. Son os d’aquí. Os nuestros mainates que, con tot y con ixo, tornarán a estar eslexius. Y los piors, como siempre, los d’o PAR. Simplamén porque els no deben obediencia a garra partiu estatal. Istos lo han feito porque sí. Y tornarán a estar eslexius…

Balons curtos u ¡a rujiar tocan!

Fartico que me tienen os diseñadors de moda! Parixe que a fatera d’iste año son os balons curtos ixos que portan agora la metat (u mas) d’as zagalas y mullers zaragozanas (y suposo que aragonesas y españolas). Fa bels meses nian conoxeba ista prenda y agora cada diya en beyes diez, quinze, bente mullers con ixo. Ta yo ridiculos. Mira-te que quedan fierizos y, como más d’un m’ha dito, parixe que, en meyo d’a Gran Bía zaragozana sigan prestas ta ir a rujiar ta l’ortal. Si no estase porque los portan con botas altas de tacón que tamién son de moda….

Como iste ye un blog serioso que no charra de fateras (ejem!) caldrá fer bel comentario millor que no istos. En iste caso ha tocau que a nueba moda no me fa goyo. Atros años sí que me’n ha feito. A qui metió de moda os balons de zentura baxa y os tangas cal dar-le un Nobel!. O caso ye que nunca no he entendiu dos cosas. Qui dezide que ban a portar todas as zagalas l’año benién y consultando-lo con quí? y porque as zagalas le fan caso? Prou que puestar que siga porque en as botigas dixan de bender cualsiquier atra cosa que no siga la moda de turno. (Yo mesmo beyé fa bels años como dixaban de bender balons con cremallera en toz os puestos)

U lo que ye pior y creigo que ye o berdader motibo ta tot isto. Y ye que en ista soziedat de consumo, no somos capables de estar criticos nian con bella cosa tan chorra como ye a ropa. Mesmo en isto nos imposan qué emos de fer. Qué emos de portar.

Atro tema ye a obligazión d’ir bestiu de seguntes que trazas en seguntes que treballos pero ixo millor t’atro diya….
En resumen: NO a los rujiaders! Que pasen de moda luego, por fabor!

Campaña por os dreitos zibils

Dende fa bels meses os coleutibos y asoziazions ziudadanas somos sufrindo una campaña de man d’a polizía de l’Estau de continas identificazions y, en cheneral, d’una represión que no se conoxeba dende os tiempos d’a Guerra d’Iraq u d’a cumbre de Ministros d’a Guerra. O socalze por l’aragonés que fazió Nogara, as masas críticas de Pedalea , os manifestans de CNT en a manifestazión contra la OTAN u toz los que estión en a manifestazión “dengún estatuto nos ferá libres” d’o pasau 6 d’Otubre son nomás bels ejemplos d’ista pulitica que ye fendo o nuestro quiesto Delegau d’o Gobierno.

Muitas d’istas asoziazions prenzipian a estar fartas d’iste ambién de criminalizazión d’os mobimientos zíbicos y han presto un manifiesto por os dreitos zibils. Tamién se son parando atros autos que iré comentando malas que baigan fendo-se. O testo d’o manifiesto lo puez leyer, entre atros puestos, punchando aquí.

O bispe bendize a manifestación d’os fachas

Como siempre. A ilesia no cambea. A ilesia catolica española siempre con o facherío más chungo. Si Chesús tornase los abentaba a toz a trucazos. Merdaders…

La zaguera (por agora) ye a pastoral d’a diózesis de Uesca, debán d’a que Marzelino ha amostrau sorpresa. ¿Porqué? No t’asperabas ixo dimpués de colaborar tantismo con els? Dimpués de continar permitindo que controlen a metat d’o sistema d’amostranza? Pobrichón. S’ha sorprendiu. Mira-te si m’apena…

Y qué pastoral! No ye un articlo de El Mundo, ni de La Razón, nian de La COPE u Libertad Digital. Ye a opinión d’o mainate d’os catolicos fatos (de Uesca, quiero dezir). Son d’alcuerdo con ixo toz os catolicos fatos (de Uesca)? Y si no ye asinas, a qué asperan ta protestar?

En a pastoral, o bispe clama traidors a los d’o PSOE por o tema de De Juana Chaos, bendize a manifestazión contra o gubierno y charra d’o que encara manca por saber de l’onze M achuntando-se asinas con os barrenaus d’as teorías conspiraderas. Bien! Por si en estase poco, relaziona tot isto con “a libertat d’amostranza” (libertat ta que o gubierno bose a os pais catolicos as suyas escuelas, s’entiende), l’aborto y a eutanasia. Pero continaremos soltando a pasta porque antis d’a “democrazia” se siñó un concordato con ista chentota que nunca no se crebará.

Cabo de semana en aragonés

Encara ye cuasi imposible bibir en aragonés en Zaragoza, pero iste cabo de semana nos lo han dixau bien fazil. Y ye que, como deziba fa bels diyas, as asoziazions en esfensa d’a luenga y cultura aragonesa fan que os aragonesofablans no adubamos.

Mientres a semana podemos ir t’as II Chornadas d’a luenga y cultura aragonesa que fa o Patronato de Bibliotecas en o Zentro Zibico Teodoro Sánchez Púnter (bico de San Chusé). Ista tardi bi abrá una rufierta sobre l’aragonés, maitín una charrada sobre os repuis de l’aragonés en a fabla zaragozana que ferá Dabi Lahiguera (l’autor d’Ucronía) y o chuebes i ferá una charrada con mosica Guillermo Laseca que yera parti d’a colla Renaxer (la puez ascuitar en http://www.radiocharrando.com).

O biernes de tardis podemos ir ta la prensentazión d’Ucronía, o primer libro en una faina publicadera que prenzipia Nogara. A las 19:30 en l’Ambito Cultural d’El Corte Inglés soi seguro que nos trobaremos ambute de sozios, alunnos y amigos de Nogara. Dimpués caldrá marchar a beyer o conzierto an que tañe Dechusban drento d'a iniziatiba Muévete en Directo. Será a las 21:00 en o Zentro Zibico Unibersidat chunto a Insulina Morgan y Staff. Cal remerar que podez ascuitar a canta de Dechusban que partizipa en o concurso A tot estrús en www.popyorck.com.
Y dimpués de borina, pero no masiada, porque o Sabado cal estar bien dispierto. Y ye que, o Sabado y o Domingo, se fa la que ye, ta yo, una d'as millors ideyas arredol de l'aragonés en os zaguers tiempos: A I trobada de produzión audiobisual en aragonés. Prenzipia o Sabado de maitins con un taller d'edizión de bideo en aragonés. Puez apuntar-te-ie en bideoedizion@hotmail.com. A las 18:00 d'as tardis d'o sabado y domindo se meterán bideos en aragonés en o Zentro Zibico l'Almozara. Istas chornadas las ha organizadas l'Asoziazión Cultural 20 d'abiento y www.charrandotb.com.

Y ta rematar, y como comentaba fa poco, o conzierto de Los Draps y Ulut, an que por siete euros, podremos mercar o CD d'Ulut, fer-nos un Daikiri y, prou que si, ascuitar o conzierto en o Z.S.A Arrebato.

Preta achenda, la d'iste cabo de semana...

PPeros sin alma (ni memoria)

Dimpués de dezirnos a toz de tot por manifestar-nos contra els, a os PPeros parixe que les ha dentrau una basemia con as manifestazions que dixan a os royos a l'altaria d'o bardo. Ista d'o cabo de semana -que seguntes els, ye la primer que combocan (jajaja) - promete tornar-se un exemplo ya no de facherío, que d'ixo en son todas as suyas manifestazions, pero tamién de sinbergüeña y de total manca de memoria.

Serían rediculos sino estase porque tantisma chen ba dezaga d'els y se creye, sin mica esprito critico u chicorrona capazidat de lectura comprensiba, lo que dizen els y os suyos bozeros. Afortunadamen a istoria, ta qui se bi intresa, no s'esbafa como atras cosas y remane en os papers y en l'esmo de muitos. En o Periodico, que ye fendo un sobrebueno treballo sobre iste afer, aparixe güe un articlo sobre a pulitica de garcholas d'Aznar y os suyos acolitos que fería tremolar os alazez de tot lo discurso PPero sin les importa-se bella cosa a berdat. Prou que tamién estricalla ixe discurso o chuizio de l'onze-M (talmén por ixo en zagueras den mal con ETA?) pero tampoco no les importa mica.

Tos recomiendo que leigaz l'articlo punchando aqui y, si podez, miraz-tos a edizión de paper que i sale un documento d'a pulitica gubernamental (en a edizión eleutronica no se i beye guaire bien) que ye buenismo.

Combocatorias t’aragonesofablans

Puestar que siga por l’asperanza creyada por l’academia, porque cada diya somos más u qui sabe, pero en zagueras bi ha ambute de combocatorias ta qui aimamos ista polida luenga. Ta prenzipiar, iste cabo de semana, Nogara organiza unatra mesa informatiba en a Plaza Espa?a o Sabado dende as 11:30. Y cuan digo unatra ye porque ya se’n fazió una. Podez leyer información sobre ixa mesa informatiba y lo que i pasó en cuasi toz os blogs que bi ha en aragonés (u fablogs como les dizen agora). Tamién bi ha un bideo penchau en Charrando TB que creigo que ya lo ha bisto más chen que l'arribada de l’ombre en a Luna (u lo bideo de Luis Aguilé).

Continaremos o biernes 16 a las 19:30 en a cambra Ambito Cultural de El Corte Inglés, con a presentación de Ucronía, o primer libro publicau por Nogara, escrito por Dabi Lahiguera, mayestro de tantos y tantos d’os que agora charramos aragonés y, por lo que he leyiu dica agora, un gran escritor.

A l’atro diya, o Sabado 17 a las 21:00 en a Sala Arrebato (C / Palafox, Zaragoza) bi abrá un conzierto de Ulut y Los Draps an que se benderá o primer CD de Ulut (qui cantan en aragonés).
Pos parixe que soplan buenos aires ta l’aragonés. Asperemos que ista autibidat contine…

Una rialleta

Con tot lo mundo tan carrañau politicamen, con tanto facha chilando tot lo diya, con toz os afers que tenemos de cutio... ixos intes an que xublidas tot y te rides un poquet son un berdader oasis. De maitins goso ascuitar No somos nadie en M80 (no somos dengún) menau por Pablo Motos ta concarar lo diya. No m'esplico como se puede treballar sin aber prenzipiau lo maitin redindo un poquet. No se me fa raro que qui ascuita a Jimenez Losantos remate carrañau y barrenau...

Atro programa que siempre que quita una rialleta ye Sé lo que hicisteis la última semana (Sé qué faziez a semana pasada) en La Sexta (A seisena) os miercols de nueis. Ayer i aparexió un bideo, bosau por a deputazión de Castellón ta promozionar a probinzia turisticamén an que o protagonista ye... (redoble de tabals) Luis Aguilé. Cal que lo beigaz: http://www.youtube.com/watch?v=3de26Ch-hxA. Dimpués i metiónn unatro bideo de Borja Thyssen - a qui yo no conoxeba dica ayer - cuan teneba quinze años. Encara no ye en YouTube pero estoi que ascape lo i puyarán porque ye impresionan. Si no beyez o programa en YouTube tenez ambute de bideos. Nomás cal que escribaz se lo que hicisteis la ultima semana y tos i aparixerán un buen fascal.

Bellas cosas d'a Zincomarzada

Cuan creyes que a chen no te puede arrapar ya guaire, a reyalidat s'encarga de contrimostrar-te que no ye asinas. Cuan bels amigos y yo fuemos ayer, en a Zincomarzada, a beyer o conzierto de Biella Nuei en o Parque Oriente, encara no eba prenzipiau. Yera alto u baxo a ora d'empezipie asinas que suposemos que simplamen iban una mica tardi. A o canto nuestro yera a barra de PSOE - UGT - EDU con un espactaclo de drag queens que eban achustau. Bueno - pensé - no me fan guaire goyo istas cosas, pero a lo menos beyes bella cosa mientres escompenzipia o conzierto. Cuan i lebabanos un ratet, o cantante de Biella Nuei puyó ta l'eszenario y dizió que prenzipiarían a tañer cuan rematase l'autuazión d'a barra d'o PSOE.

Y nusatros creyendo que no tañeban porque encara no eban montau! Prou que ya yeran prestos pero no podeban tañer porque UGT & co no quereban! Fuemos a charrar con os d'a barra (por desgrazia son biellos conoxius) y nos dizión - con as malas trazas que fan serbir de cutio - que les bufaba la pocha que toda la chen que yeranos asperando a que prenzipiase o conzierto, que yera en o programa ofizial, queresenos beyer-lo. Que ellos iban a continar con o suyo "show" dica que queresen. (Isto ya yera cuasi a las 14:00). A la fin, no sé si porque rematón u porque a chen se prenzipiaba a carrañar, o conzierto prenzipió y podiemos sentir una bez más a Biella Nuei con o suyo nuebo disco, Sol d'ibierno.

O caso ye que ista chentota d'UGT (u d'o PSOE, ixo rai) siempre tienen ixa autitut de fer cualsiquier cosa escachando a qui se meta por debán d'els. EDU, que ye a suya bersión chobena, y que los conoxco como si los ese pariu, ha feito a tana a toz os mobimientos sozials de Zaragoza y Aragón siempre que ha puesto. Lo fazión cuan as manifestazions contra a LOU. Continón con as mobilizazions contra la guerra, cuan - entre tantas atras cosas - se negón a cambiar o recorriu d'una manifestazión probocando una menaza de piñora a siete representans de coleutibos anti-guerra (ista istoria tamién la contaré bel diya). Y tornan a fer-lo siempre que tienen bella ocasión.

Nian os ababols de Nuebas Chenerazions plegón a fer manifestazions a fabor d'as leis de Aznar (creigo). Cuan salió a LOE (que ye una mierda bien parellana a la LOCE) EDU fazió una conzentrazión de refirme. Patetico.

Sobre a resta d'a Zincomarzada, lo millor l'ambién borinero y as reibindicazions. Iste año estión bien bisteras a campaña contra a OTAN y la d'Aragón no se vende. O parque estoi que se quedó una mica chicorrón ta la chen que bi fué por libre (sin estar en garra tenderete). Ta las asoziazions, me pienso que, alto u baxo, igual como atras añadas. O millor puesto, en a mía opinión, o d'a plataforma antiexpo con o suyo disco (ta esmelicar-se-ne) y o nuestro quiesto moñaco d'Especulín.

En resumen. A penar que a fiesta estió muito bien, sisquiá l'añada benién torne t'o parque Tío Chorche y sisquiá o PSOE-UGT-EDU dixen d'amolar-nos terne que terne.

Articlo de Trasobares

Güe quereba charrar de barias cosetas y ye de dar que no me bagaba. Pero he leyiu - como foi toz os diyas y tos combido a fer - a colunna que fa Trasobares ta o Periodico d'Aragón y, como charra de tot lo que quereba charrar, millor la copio aquí, que seguro que yo no lo amilloraría:

Del embudo
02/03/2007 JOSÉ LUIS Trasobares
Lo que ha hecho el Gobierno con De Juana Chaos es de puro sentido común. Hubiera sido tremendo que el ya viejo asesino muriese bajo custodia del Estado, atado a la camilla y con la sonda metida. ¡Lo bien que le hubiera venido a ETA!
Ahora bien, que el desenlace de este peliagudo caso haya provocado la ira de la derecha españolista, y que diera lugar ayer a unas declaraciones de Rajoy y Acebes acusando a Zapatero de rendirse a los terroristas, no es sino la evidencia de que en España llevamos tres años de locura; tres años con los conservadores pretendiendo imponer (e imponiendo a veces) la Ley del Embudo. Porque cuando mandaba Aznar los criminales también salían a la calle con menos de veinte años de cárcel cumplidos (es la Ley), y el propio De Juana recibió justo entonces abundantes y extraordinarios beneficios penitenciarios. Sólo que en dicho momento la AVT no convocaba manifestaciones y Rajoy y Acebes firmaban las órdenes de excarcelación. Tiene guasa.
Aplicando el embudo a rajatabla, si manda el señorito todo está bien; si manda el otro, todo mal. Lo que entonces era normal; ahora es una traición al Estado. Cambiando de tercio, pasa lo mismo con los avatares bursátiles de Endesa: que si son los alemanes de E. On los que se llevan el gato al agua (en amistoso acuerdo con nuestro Manuel Pizarro y con toda la onda derechista), es un desenlace cojonudo; pero si el pastel se lo meriendan los italianos (en obvio cambalache con los socios españoles y con el ministro Clos), es la ruina caracolera. Y semejante ejercicio de jeta político-financiera se hace en nombre de los pequeños accionistas, de los consumidores y de los intereses españoles. Como si a quienes manejan estos cotarros les importasen algo los inversores, los usuarios y la Madre Patria. ¡Por favor!
Adoctrinar a los niños en la escuela con profesores pagados por el Estado pero sometidos al dictado de los obispos es un acto de libertad. Introducir la Educación Cívica como asignatura, una injerencia cuasi soviética. Detener a un alcalde sociata por corrupto honra a la Justicia; enchiquerar a un cargo público del PP por idéntica razón es una sucia maniobra electoral. Si los jueces fallan lo que conviene a la de gente orden, genial; si no lo hacen con prontitud, mal, muy mal. Esto del embudo, se lo juro, me parece un soberbia tomadura de pelo.

11-M y a noballa d'Occam

Cada diya que pasa de chuizio de l’onze-M ye un astralazo más t’as teorías d’a conspirazión Al-Qaeda – ETA – PSOE – Polanco – ERC – Jara y Sedal - Quemisió. A zaguer notizia nos fabla d’o DNT (Dinitrotolueno) que eban trobau en os esplosibos y que, seguntes os peons negros (una mena de secta que achunta a toz os que creyen en istas fateras), relazionaba a ETA con l’atentau. Ayer, en o chuizio, quedó platero que, tanto a Goma 2-Eco (con TNT) como a Goma 2-Ec (con DNT) se podeban furtar sin mica problema en unas minas asturianas – isto sí que me alticama una mica más-.

Y ye que, en cheneral, as teorías conspiraderas (as de cuchas, as de dreitas, as de frikis y todas) s’alazetan en intreses puliticos, casualidaz u mesmo imbenzions. A bida, por un regular, ye muito más simpla que no se creye. Si charra como un pato, anda como un pato y parixe un pato, será porque ye un pato; que ye atra traza d’enunziar a lei d’a noballa d’Occam (http://es.wikipedia.org/wiki/Navaja_de_Occam).

Con isto tampoco no quiero dezir que creiga que, por exemplo, Oswald mató a Kennedy, ni que me creiga as bersions ofizials. Bi ha muitas begadas que a esplicazión más simpla ye una conspirazión, pero a de l’onze M ye tan en as tres pedretas y dixa beyer tantismos prechuizios de qui la esfienden que no ye que ta redir-se-ne (u plorar, porque bi ha asabelo chen que la creye)

Zincomarzada contra la OTAN

O lema eslexíu ta la Zincomarzada d'iste año ye "Zaragoza, ziudat de paz" ta amostrar o refusamiento d'os coleutibos ziudadans a la nueba base d'a OTAN que nos quieren costruyir. Con a medrana de que pase bella cosa como l'año pasau bi ha una total esteria y s'han preso toda mena de midas: han tallau as brancas d'os arbols, s'amugará o rezinto, no i dentrarán autos, no se i podrán fer cheras.... Con tot y con ixo, o PAR ha dito que no bi irá - a penar que han alzau un puesto an que meter-se - por o periglo que bi ha y la manca de seguranza. Os suyos mainates sí que ferán a gambada de besita d’os puestos. Puestar que siga ta contrimostrar que baliens que son, si tanto periglo bi ha. Istos ya no saben que fer... Se presentará Biel a presiden d'a FABZ tamién?

Como toz os años s'han programau conziertos en l'eszenario y bel pasabillas. Entre atros, Biella Nuei tañerá a las 13:00. A resta d'actuazions las podez beyer en a paxina d'a FABZ (http://www.fabz.org/). En una chornada tan reibindicatiba como ye ista, no i mancarán os puestos d’asoziazions. Recomiendo que bisitez os de a plataforma "Aragón no se vende" y los de Chobenalla y UCA. Pero, más que más, podez aprofeitar ta pasar por o puesto de Nogara y mercar o libro Ucronía de Dabi Lahiguera (y prou que charrar un ratet en aragonés).
Nos i beyemos!