O Dichital y capezutos en luita. Tierra de barrenaus 11x13

Amanau a los diez anyos de comunicación radiofonica en aragonés, de cabo ta cuan he sentiu una sensación de soledat en tener poqueta chent arredol que faiga lo mesmo. Por ixo, cada vegada que naixe una nueva iniciativa que mira de trencar ixa comunicación y d’ixamplar las canals en aragonés, me foi bien contento de caminar mas acompanyau. En lo programa nuevo entrevistamos a Lorien, un d’os miembros de O dichital, un nuevo medio en aragonés d’información cheneralista que naixió fa bel mes.

Tanimientres, la mía ciudat pateixe una alcaldesa encerrinada en acotolar cualsequier forma de cultura y borina popular. Entre que regala la ciudat a franquicias y eventos absurdos, l’autochestión y la iniciativa ciudadana no se troba que entrepuces, pinyoras u prohibicions. La zaguer, la tasa que se miró de cobrar a una comparsa de capezutos, ha provocau las criticas de toda una ciudat que creixió con ixos monyacos encorrendo-los. Sisquiá faiga honra pa empecipiar a debatir sobre l’uso publico d’as carreras.

Y, como de cutio, buena mosica y convocatorias arrienda con una patacada de conciertos por debant. Ixo, entre que nos enfilamos t’o deceno aniversario de Tierra de barrenaus radio que se fará en iste mes d’abril. ¡Nos ascuitamos!

Recuerda que puez ascuitar toz los programas en Ivoox, Spotify y la web de Radio Topo.

Programa #186

 

Cincomarzada popular y con birolla (Editorial TdB 11x12)

En empecipiar l’anyo, los colectivos y tot lo teixiu asociativo zaragozano escomenza a aprestar la suya presencia en la Cincomarzada, ixa fiesta que, cuasi ixuplidau lo suyo sentiu historico, s’ha resignificau como una trobada y amostranza de l’asociacionismo d’a nuestra ciudat. Una festividat laica a on que organizacions de toda mena pueden difundir los suyos mensaches, reivindicacions y actividaz, fer pocha pa autofinanciar-se y prener contacto con la ciudadanía y atras entidaz.

Una fiesta popular, una celebración de l’autochestión, un eixemplo d’a fuerza d’as organizacions de base… que prou que lo capitalismo no puet deixar sin malmeter, emporcar y esbafar.

Y ye que, dende habe anyos, de man d’o Concello de Zaragoza, s’ha mirau de meter entrepuces a l’esprito d’a fiesta y a tot lo suyo potencial. Soi convenciu de que, si no s’ha sacau dreitament d’o calendario festivo encara ye por la pitera que encara tenemos los colectivos socials y vecinals, por la presencia d’as penyas y por la impresionant respuesta d’a ciudadanía que imple los parques toz los anyos.

S’empecipió con los cambios continos de parque, en ixos anyos de Belloch, qui s’acollonó por la branca que le cayió cerqueta y nos tenió anyos fendo turismo por lo Parque d’Orient y lo Luis Buñuel. Mesmo arribó a contraprogramar-la con unas fiestas goyescas y costodias parellanas. Dimpués, y gracias entre atras cosas a la absurda Lei de Festellos Lambanista, mirar de vender un pincho de tortilla en lo parque s’ha feito cosa imposible.

La birolla yera una d’as partes esencials d’a fiesta. D’una man, porque muitos d’os colectivos de personas migrants lo feban servir pa amostrar la suya cultura gastronomica. D’atra man, porque tanto ixas organizacions como muitas atras, podeban financiar parte d’a suya actividat a traviés d’a venda d’ixa minchaga. Isto ya fa tiempo que no ye posible. ¿U sí?

Si i hai negocio, prou que ye posible. Tot ye posible si se pasa por caixa en ista rebonica sociedat que se nos ye quedando. Y ye que no se puet vender birolla a no estar que tiengas un negocio d’hostelería dezaga. Ye decir, la sola alternativa que se deixa a las organizacions socials ye subcontratar la barra, convertindo a la fin la cincomarzada en una d’ixas ferias de foodtrucks que tanto goyo fan a Chuecas y Bellochs. Una politica, prou que sí, refirmada por los empresarios locals d’a hostelería, siempre dando ferrete con que nomás se pueda consumir birolla y bebida en los suyos locals.

Igual pasó con las chentas d’a Semana Cultural d’a Madalena, vedadas dende fa anyos, con la enchaquia d’a seguridat alimentaria. Una seguridat que nomás importa cuan qui organiza ye un colectivo social u politico. Ixos a los que se les aplican las leis contra rudios que no operan pa las organizacions cristianas u a las carpas y ferietas pa las que i hai alfombra roya y mesmo privatización de parques.

Muitas y muitos creixiemos veyendo en la Cincomarzada a-saber-los colectivos y organización que nos daban información d’a suya fayena de vez que nos furniban de biera, minchanga y borina pa financiar-se. Muitas ibanos dimpués t’os suyos centros socials u nos embrecabanos en los suyos prochectos y luitas. La cultura y la fiesta popular ye un periglo pa los intereses d’o capitalismo como toda forma d’organización autochestionada que s’eslampe d’o control suyo. Por ixo fiestas como la cincomarzada u las fiestas d’a Madalena son modelos a exterminar.

Fa falta una respuesta colectiva en defensa d’as nuestras fiestas, de man d’as organizaderas, prou que sí, pero tamién de todas las personas que i participan.

¡Y garra fiesta sin gaiter!

Lo carlismo y la Cincomarzada. Tierra de barrenaus 4x07

Lo primer pasquin que facié, en Chobenalla Aragonesista, estió sobre la Cincomarzada. Igual como tantas atras cosas, nunca no m'heba planteyau guaire por qué se celebraba aquello. Pa yo, yera una d'as mias borinas favoritas. Siempre m'ha feito goyo lo d'enzorriar-me en un parque. Pero no estió dica que habié de fer aquell pasquin, que me documenté bien. Descubrié, alavez, un troz d'a nuestra historia, a soben prou amagau, y como tantos atros apasionant.

Dende la envista d'o sieglo XXI, lo carlismo no deixa d'estar una mica bizarro y de mal entender. Ye d'ixas cosas que has d'estar una mica friki d'a historia pa intresar-te-ie. Afortunadament, tiengo cerca a chent que sabe tanto d'historia como Dani, que vinió t'a radio a charrar-ne y explicar como estió lo carlismo en Aragón. D'una victoria liberal en Zaragoza, sobre ixe carlismo, naixió la Cincomarzada, fiesta que se vedó en los anyos d'o franquismo, y que se recuperó con lo rechimen d'o 78.

Con Ruben, muit buen conoixedor d'ixa epoca historica, charremos d'ixa recuperación y resignificación d'a fiesta d'a Cincomarzada. Tamién d'as dificultatz que ha pasau y de como a lo poder nunca no l'ha feito guaire goyo una fiesta autochestionada, laica y reivindicativa.



Iste ye un d'ixos programas que yera en la lista de "programas a fer" dende lo primer diya que esmachiné Tierra de barrenaus radio. Lo resultau creigo que ye muit bueno, asinas que aspero que lo disfrutetz tantismo como yo.

Cincomarzada zancochera

Montando un puesto en a
"Cincomarzada" de 2015

Que o concello de Zaragoza quiere acotolar a Cincomarzada, más que una rumor, ya ye una evidencia. Que a FABZ colabore en ixa faina de traza tant entusiasta u inchenua, seguntes quieras pensar mal u no, ya ye más nuevo. A lo menos ta yo. Talment haiga plegau o momento de qüestionar si hemos de deixar en mans d'a FABZ y d'o concello a celebración de una fiesta de caracter tant popular como a Cincomarzada. Talment haigamos de planteyar un modelo asambleyario y participativo. U bien diferent a l'actual como poco.

Ya dende fa bell anyo, o concello decidió que a estratechia de ir cambiando de parque a Cincomarzada anyo par d'atro podría funcionar. Asinas pasemos por bella mica de parques millor u pior adequaus a todas as necesidatz d'a fiesta. En totz os casos, pior que no o Tío Chorche. A enchaquia y a complicidat d'as vecinas d'o parque estió prou ta que no nos alticamasenos masiau. Encara que a popularidat (en totz os sentius d'a parola) d'a fiesta baixó, no podioron acotolar-la y totz os anyos tirabanos alto u baixo entabant. Mesmo si pleveba, s'apanyaba qualcosa y febanos buens ratetz.

Iste anyo plego la rematadera. Totz os despropositos posibles se concentroron arredol d'a Cincomarzada en un clarismo eixemplo de cómo no chestionar una fiesta. A culpa ye d'o concello, prou que sí, pero bi habió atros embrecaus en o zancocho, como a FABZ u os penyistas. Complices involuntarios, u no? Ixo ya lo sabrán decir millor atros que conoixcan millor as familias, mafias y collas d'afinidat d'ista Inmortal y, de cabo ta quan, ababola ciudat.

Ya d'antes d'a creixida apocaliptica de l'Ebro, o Concello prencipiaba con o suyo mini-boicot programando actos paralelos. Antiparte de fer competencia a la propia Cincomarzada, creigo que fer una recreación de los Sitios, en una calendata que se ye remerando unatra fita historica leva, como poco, a la confusión. Pero en o país que s'inventó a exposición de "Fernando II o rei que imachinó Espanya", a rigor historica no ye so que una groma. Tampoco no me voi a meter niquitoso con o tema historico d'a cincomarzada, pues creigo que ha sobreciu o motivo historico que levó a celebrar-la y agora se tracta d'atra mena de celebración. O concello podría no programar cosa en a Cincomarzada y convidar a las ciudadanas a ir-ie y conoixer o treballo de tantas y tantas entidatz socials y aprofeitar os parques ta lo que son: vivir-los y disfrutar-los. Mesmo ta fer educación ambiental, fendo campanyas de respeto a las zonas verdes urbanas. Pero dende fa anyos decidió d'amarguinar-la, amagar-a y mesmo fer-le a "competencia".

Con a creixida, plegó a enchaquia. No soi cheologo ni tiengo prous conoiximientos ta saber si bi heba bell periglo. Sí que sé, pues paso totz os diyas por astí, que en o parque no se viyeba garra problema. Con tot y con ixo, confiaré en a buena fe d'o Concello y suposaré que sí que existiba ixe periglo y que caleba sacar a celebración d'o parque. Como de feito se fació con as penyas que fuoron t'o Parque Torreramona, que pareixe que han privatizau, u con a recreación d'a guerra d'o francés que tanto goyo fa a l'espanyolamen. Ye curioso que chusto, as unicas que yeran imposibles de reubicar yeran os colectivos, asociacions y organizacions que pareixe que tanto estorbo fan a lo concello, no?. Se podeba reubicar a las Penyas, ixas que nomás se tricolotean con o Concello quan preba de sacar-les o negocio que tant mafiosament manullan. Se podeba reubicar a recreación, que tanto tocaría os corazons d'o espanyolismo, que tant furament refusoron a invasión d'ixos malcaraus que nos quereban imposar a civilización. Manimenos no bi heba traza humana, pareixe estar, de reubicar a las asociacions, a tot ixe teixiu social que fa que por cada diya, ista ciudat tienga vida. Ni o Parque Gran, u lo d'a Paz, u tantos atros que tenemos a suerte de tener en Zaragoza, pareixeban querer a nuestra presencia. 

Pancartas en a Cincomarzada de 2004

A FABZ no nomás ni tartió sino que colaboró en ruedas de prensa con o concello anunciando a imposibilidat de celebrar-lo en a calendata y mentindo quan se dició que se celebraría o primer domingo que se podese. Atro desproposito, por cierto. Ya que a cincomarzada no se celebraba o 5 de marzo, se podeba cambiar a qualsiquier atro diya. ¿Por qué a un domingo? Ye bella cosa que dengún no me ha sabiu responder encara. 

Con tot y con ixo, y como muitas ya nos barruntabanos, continoron as cagarruciadas. ¿Qual yera lo pior diya ta meter a Cincomarzada? Uno que bi hese atras cosas que fer en Zaragoza, que parte d'a ciudat tenese puent y hopase bien luen, y si antimás se celebraba belatra fiesta tanto en Zaragoza como en a resta d'Aragón ta que un amiro de chent se'n tornase t'os suyos lugars, millor. Ixe diya yera Sant Chorche. Con más diyas que fornigas, s'heba de trigar ixe. Qui prenió ixa decisión? Con qué criterios?

O 23 d'abril se chuntoron asinas a feria d'o libro, una feria d'artesanía alimentaria en a Plaza d'os Sitios, y dos cincomarzadas, la d'as penyas y la d'os colectivos. La una en o parque penyista de Torreramona y l'atra en o Tío Chorche. Os diyas d'antes, a mayoría d'as mias amigas, companyeras de treballo, familiars, etc... que no yeran embrecadas en garra asociación nian sabeban que se fería o 23 d'abril, y prou que tampoco no a on. O concello y a FABZ no facioron mica publicidat, encara que por a radio se sentiba terne que terne anuncios d'o Diya d'Aragón, cuento que pagaus por a DChA. Por qué as penyas no fuoron t'o Parque d'o Tío Chorche encara ye un misterio ta yo. Pero ye claro que tenendo un parque en rechimen de semipropiedat, ta que vas a marchar t'atro cabo. Ye normal.

Plegó o 23 d'abril. Ya contabanos que bi habría muita menos chent. Bien se valeba que Los Gandules yeran anunciaus a las 17:30 en o parque y una patacada de chent vendría a viyer-los. Pero ups! O concello, a FABZ u qui fuese o responsable, ixublidó de sacar-los d'as webs u d'anunciar que, ixe diya, Los Gandules ya teneban concierto en Calamocha y que, alavez, no podeban venir t'o parque. Mirar d'afirmar unatra colla que trayese una cantidat de publico parellana, cuento que yera imposible, porque total, como yera nomás t'os colectivos, ....

Montemos os nuestros puestos, entre que viyebanos como a o nuestro costau una colla de personas s'apanyaban una barra firme pincha. Extracción de fumos, un chenerador granizo como un güei, una decena de personas treballando-ie d'uniforme,... quasi pareixeban profesionals.... Probablemente porque en yeran. Talloron, por cierto, bell par de brancas d'o pin que teneba en a suya parcela mientres montaban, lo que cuento que tampoco no ye guaire legal. Les preguntemos de qué colectivo yeran, porque ya nos prencipiaba a pareixer una mica raras as trazas que teneban de treballar y que todas isen con chambretas de publicidat d'un ron. Nos dicioron que yeran d'un caterin que les heban "subafirmau" a barra. 

Faciemos uellos de caparra quan nos lo dicioron, pues ni se nos heba pasau por o tozuelo, como ye normal, que se permitise "subafirmar" barras a interpresas en una fiesta popular que se suposa que ye ta empentar que as asociacions y colectivos d'o teixiu social zaragozano pueda fer bell par de perretas con que sobrevivir tot l'anyo. Avisemos a las autoridatz d'a FABZ y a respuesta estió mesmo más penible. A barra en qüestion yera d'una asociación de penyistas que la heban adchudicau a o caterin ixe. Penyistas que siquiá yeran en o parque. Yera un negocio. Mica motivación social. Siquiá de diversión. Puro NEGOCIO. Ixo se permitiba? Sí. Ixa estió a respuesta d'a FABZ. Dende feba anyos, ta forro de bota, seguntes nos informoron ellas mesmas. Pero en ista edición d'a Cincomarzada, antimás, fendo competencia dreita a toda la resta de colectivos que teneban arredol. Atronando-nos con a suya mosica de Melendi y reggaeton, por cierto, y sin deixar ascuitar a mosica d'a resta.

Bella persona decidió que, ya que a FABZ no iba a aturar o desproposito y no nomás no feba cosa, sino que chutificaba feriar os puestos d'a cincomarzada, caleba que s'informase a las clients de a on yeran consumindo. Una d'as cosas que fa muita d'a chent que va t'a cincomarzada ye aprofeitar ta refirmar a os colectivos. Por defecto, ixas personas entre as que soi yo mesmo, suposamos que todas as barras representan colectivos y organizacions ciudadanas. S'informó alavez a os clients que ixa barra yera de una interpresa y que decidisen, con toda la información, si quereban fer-se a biera astí u en belatro puesto. Beluns i continoron tant tranquiletz y bells atros decidioron de marchar. Dica que plegó un encargau "cunyau" que se concaró de muit malas trazas con a persona que yera informando. Le convidemos a que fese lo mesmo y que informase de qué yeran a resta de barras. No caleba porque a resta yera bien claro a qui perteneixeban. Nomas ell quereba amagar l'orichen d'a barra y o destino d'os diners que se i deixaba la chent. Nos "informó" chilando que a FABZ feba lo mesmo, subafirmando o suyo puesto. Si ixo ye asinas me pareixe mesmo más denunciable, y tos convido a que tos n'informetz y me lo escribatz como comentario u tos metatz en contacto con yo.

A cincomarzada, dende bien choven, ye una d'as mias fiestas favoritas d'o calendario zaragozano. Un diya a l'aire libre, con borina, reivindicación, mosica,... conoixendo atras luitas y atras luitadoras y compartindo experiencias con muita chent. Ye tamién, ta muitas d'as asociacions que i van, una d'as principals fuents d'ingresos que tienen en tot l'anyo. Manimenos, u precisament por ixo, o concello quiere acotolar a fiesta d'a cincomarzada. Os motivos por os que a FABZ i colabora voluntariament u involuntaria me son desconoixius.

Cuanto a las penyistas mica no aspero d'ellas. Nunca no s'han preocupau que d'ellas mesmas y d'o cazurrismo que amuestran en un grandismo porcentache. Ye una pena que una ideya tant buena como la d'as penyas acabe en un negocio ta uns pocos, seguius por un ciento de capins millor u pior intencionaus.

Aspero que cambeen as cosas luego en o Concello de Zaragoza, pero en qualsiquier caso y pase lo que pase, ya ye hora de cambiar a traza de pensar y chestionar a Cincomarzada. No podemos tolerar que contine en mans d'una ineficaz y poco participativa chestión d'a Federación de Vicos. Talment ye hora de prencipiar a pensar en una Cincomarzada chestionada dreitament por as organizacions que sí que nos intresa que a Cincomarzada siga en veras popular.

Dios ye carlista. MdaS 014

Entre unas cosas u atras, no he aturau en istos zaguers cuatro diyas. Asinas me trobo güe, escamallau y con una galbana que ta qué...

Zincomarzada: Dios be d’estar carlista, porque en zagueras parix imposible de fer una zincomarzada como as de más d’antis. Soi estau en ziento zincomarzadas. Dende que teneba catorze años si fa u no fa. Y remero que por un regular l’orache yera bueno. Manimenos dende l’ataque d’o camal ta l’alcalde tenemos unas zincomarzadas con bien de zierzo y mesmo plebia. Agora diz o PP de fer una consulta popular por si a chen querese cambiar-lo de calendata. Ta fateras siempre bi ha diners. No se consulta sobre la Expo u lo siñal español chigan, pero sí ta cambiar a calendata d’a zincomarzada. De todas trazas cuento que será una bomberada de tantas atras que se dizen. Lo que caldría sería reprener o Parque d'o Tío Jorge y dixar de ir dondiando por toda a ziudat.

Diya d’a muller treballadera: Con un socalze se zelebraba en a plaza Asso o diya d’a muller treballadera. S’aprofitaba tamién ta presentar un nuebo portal www.unahabitacionpropia.org, que de seguras que plenarán ascape de buenos contenius. Se i ha feito una obreta de teyatro con as actrizes puyadas en as balconadas y en o tarabidau d’as obras d’a Plaza. A tamás de l’azento andaluz de beluns d’os personaches, que no yera menister, a obra ye estada bien pincha y nos n’emos rediu asabelo. Mientres implen o portal nuevo en iste blog podrez trobar tamién cosas sobre o feminismo.

Conzierto de Mularroya: Que’n son de buenos Los Draps!!! Conziertazo que fazión. A resta de collas tamién sonón asabelo bien. Sorpresa ta yo, os Alkol 96, que no los conoixeba y me fazión muito goyo. Asperemos que faigan antis con antis o suyo disco ta poder tornar a sentir a bersión punk de l’abanera trista. (Sí, ez leyiu bien. Fazión una bersión punk de l’abanera trista).

Conzierto contra o entibo de Mularroya

Dimpués d'a prebatina de Zincomarzada, cal que tiengamos una buena borina ta que o nuestro figau no se creiga que puede salir bibo. D'ixo se'n han encargau os de COAGRET que han organizau un sobrebueno -y largo- conzierto. Ista tardi, en o zentro zibico de l'Almozara, bi serán Dechusban, Los Draps, Os Chotos, Chundarata, ... O conzierto ye en contra d'o entibo de Mularroya. Si quiers más informaziçon sobre ixe entibo, puez trobar-ne en a web de COAGRET. T'a charrada ye masiau tardi, pero t'a exposizión de fotos que bi ha en Torrero encara se i puede ir. Ta ir calentando, pencho un bideo de Dechusban bien majo.

Puyando por o Galligo...

Prenzipia bien fura a primabera! Por agora, iste cabo de semana ya m'ha caliu eslexir entre as chornadas d'o rio Galligo y o conzierto en BCN d'o Comando Cucaracha y Chundarata. T'o benién, plega d'arribar-me a programazión d'as chornadas De Rizio que se tornan a fer. Estiaño a tematica se zentra en a produzión audiobisual. Asinas que parix que nos foteremos un par de cabos de semana por iste río tan poliu... Me ban plegando tamién notizietas d'atras istorietas mientres Mayo que iré penchando por aqui, en que sepa cualcosa más....

Con tot isto, me pienso que, a tamás de que l'aragonesismo pulitico ye en un inte malizo de tot (en a mía opinión), l'aragonesismo cultural - u a cultura aragonesa, si preferiz- ye en uno sobrebueno. Conziertos, chornadas, actibidaz, ziento de mesas en a zincomarzada bis...y prochectos que boi sentindo por asti que pueden fer buena onra t'Aragón.

Zincomarzada... u no

Zincomarzada ye una d’ixas borinas populars que nos fan buena onra a qui treballamos en asoziazions y/u mobimientos ziudadans y sozials. Pero tamién ye un diya an que cal treballar firme. Debantar-te bien de maitins, montar o puesto, atender-lo tot o diya, desmontar o puesto, alzar-lo tot bien... y si en baga y quedan ganas, marchar de borineta.

Con tot y con ixo, ye una borina que me fa asabelo de goyo. Asinas que, como toz os años, quedemos a las 9 ta montar o puesto. Por si un caso, enchegué a tele en a nuestra ta bier que orache feba y por si deziban cualcosa sobre a posibilidat de que se suspendese, que ya’n eban charrau o diya d’antis en os papers. No. Parix que tot iba bien. Soflaba l’aire con rasmia, pero en as imachens que meteban en a TB as asoziazions que teneban barras las teneban montadas. Imos ent’allá!

Pleguemos, montemos, encorriemos os papers que, a cada chuflada d’o rasmiudo aire marchaban por tot lo parque, tornemos a montar, unatro ruello de zelo nos ba a caler, mete zaborros denzima d’ixas rebistas, marcha a escar más zaborros que con istos no bi’n ha prous, mete astí un cartel que quedará bien pincho, pilla os papels que se les han bolau a los d’a Plataforma d’as Montañas, a bier si rematamos luego y marcho a desayunar-me.... y asinas asinas, mientres una oreta y meya. A la fin, o resultau bien majo. Una mesa bien mesa. Pincha, con tot lo material bien bistero. ¡Que pena que con iste orache no baiga a benir guaire chen, e?. Mira-te ya bien uno d’azul.

Y yo que creyeba que nos iba a demandar os papels d’o puesto, pos no. Nos diz que a zincomarzada ye suspendida. Bels minutos antis d’as onze. Cuan lo tenebanos tot presto y marchabanos a desayunar-nos.... Asperemos un ratet a bier si replegaban os partius puliticos. Dende an que yeranos beyebanos a CHA y a PSOE. Prenzipión a replegar y alabez dezidiemos de replegar tamién nusatros. Si os partius replegan, aquí no i queda dengún en dos oras....

Nusatros perdiemos bella cosa más de tres oras montando, desmontando y encorrendo papels. Muitas más parando o puesto y as darias t’atender-lo os diyas d’antis. Pero ye a nuestra faina voluntaria y rai. Atros perdión diners. Barrils rezién punchaus que abión de zorriar-se de camín. Birolla que se iba a malmeter a puyals en muitos puestos.

Lo que sabión a las onze, no lo sabeban a las nueu? U mesmo a las siete? La Zaragozana si que fazió buen negozio, que bendió un camatón de barrils. A la resta no nos fazión que a tana. Y, de rematadera, a Zincomarzada bis se ferá o 23 d’Abril... Ta que qui treballamos ixe diya no podamos visitar a Feria d’o Libro y os ziudadans aigan de eslexir u prebar d’ir de bella traza a las dos cosas. Y si ixe diya fa airera u plebe, aspero que, a lo menos, nos lo digan antis de fer o fato en o parque....

X Borina por l'aragonés

Un clasico torna como toz os años. A X Borina por l’aragonés se ferá o benién 8 de Marzo. Ta qui pentinamos bella caneta, talmén con un poquet de reseco, encara, d’a quiesta zincomarzada, pero s’abrá de fer un poder...

Ista dezena edizión torna a estar organizada por Nogara y o Ligallo de Fablans de l’Aragonés. A las siete un pasabillas saldrá dende a Plaza Asso y ferá una gambada por as carreras d’a Madalena. Dimpués bi abrá mesas informatibas dende las güeito en a Carrera Mayor, a o canto d’o Crápula. Ta rematar, como no, borina en o Dispierta Fierro. Astí se ferá un sorteu de cursos d’aragonés de baldes, chambretas, libros y material en aragonés....

A borina por l’aragonés chunta toz os años a buena cosa de fablans y neofablans ta pasar un buen ratet y poder charrutiar a nuestra luenga en o millor ambién: a borina. Deziba o mio mayestro d’aragonés que a luenga moriría, pero de zirrosis. Y ye bella cosa que he puesto beyer mientres muitos años. Cuantisma chen, que por un regular no charra guaire, en encapinar-se bella mica, parix que dixa a medrana en bel puesto y preta a charrar. Millor u pior, rai. A seguntes qué oras y en seguntes que condizions dengún charra bien mica luenga.

Bels diyas antis, en a Zincomarzada d’o Parque d’Oriente, podremos besitar tamién os puestos de LFA y Nogara. Dende a organizazión s’ha achustau a Los Dulzaineros del Bajo Aragón y a Timbalao t’animar o diya. Parix que a la fin, ferá más fredor que no nos creyebanos, pero con buen bin y entropans resistiremos lo que calga. Asinas que paraz os figaus que los amenistarez.... A! Y tamién bi abrá atros puestos intresans que caldrá ir-ie como o d’o BIC u los Anti-especulazión (Gran Scala, Expo y asinas asinas...)

Bellas cosas d'a Zincomarzada

Cuan creyes que a chen no te puede arrapar ya guaire, a reyalidat s'encarga de contrimostrar-te que no ye asinas. Cuan bels amigos y yo fuemos ayer, en a Zincomarzada, a beyer o conzierto de Biella Nuei en o Parque Oriente, encara no eba prenzipiau. Yera alto u baxo a ora d'empezipie asinas que suposemos que simplamen iban una mica tardi. A o canto nuestro yera a barra de PSOE - UGT - EDU con un espactaclo de drag queens que eban achustau. Bueno - pensé - no me fan guaire goyo istas cosas, pero a lo menos beyes bella cosa mientres escompenzipia o conzierto. Cuan i lebabanos un ratet, o cantante de Biella Nuei puyó ta l'eszenario y dizió que prenzipiarían a tañer cuan rematase l'autuazión d'a barra d'o PSOE.

Y nusatros creyendo que no tañeban porque encara no eban montau! Prou que ya yeran prestos pero no podeban tañer porque UGT & co no quereban! Fuemos a charrar con os d'a barra (por desgrazia son biellos conoxius) y nos dizión - con as malas trazas que fan serbir de cutio - que les bufaba la pocha que toda la chen que yeranos asperando a que prenzipiase o conzierto, que yera en o programa ofizial, queresenos beyer-lo. Que ellos iban a continar con o suyo "show" dica que queresen. (Isto ya yera cuasi a las 14:00). A la fin, no sé si porque rematón u porque a chen se prenzipiaba a carrañar, o conzierto prenzipió y podiemos sentir una bez más a Biella Nuei con o suyo nuebo disco, Sol d'ibierno.

O caso ye que ista chentota d'UGT (u d'o PSOE, ixo rai) siempre tienen ixa autitut de fer cualsiquier cosa escachando a qui se meta por debán d'els. EDU, que ye a suya bersión chobena, y que los conoxco como si los ese pariu, ha feito a tana a toz os mobimientos sozials de Zaragoza y Aragón siempre que ha puesto. Lo fazión cuan as manifestazions contra a LOU. Continón con as mobilizazions contra la guerra, cuan - entre tantas atras cosas - se negón a cambiar o recorriu d'una manifestazión probocando una menaza de piñora a siete representans de coleutibos anti-guerra (ista istoria tamién la contaré bel diya). Y tornan a fer-lo siempre que tienen bella ocasión.

Nian os ababols de Nuebas Chenerazions plegón a fer manifestazions a fabor d'as leis de Aznar (creigo). Cuan salió a LOE (que ye una mierda bien parellana a la LOCE) EDU fazió una conzentrazión de refirme. Patetico.

Sobre a resta d'a Zincomarzada, lo millor l'ambién borinero y as reibindicazions. Iste año estión bien bisteras a campaña contra a OTAN y la d'Aragón no se vende. O parque estoi que se quedó una mica chicorrón ta la chen que bi fué por libre (sin estar en garra tenderete). Ta las asoziazions, me pienso que, alto u baxo, igual como atras añadas. O millor puesto, en a mía opinión, o d'a plataforma antiexpo con o suyo disco (ta esmelicar-se-ne) y o nuestro quiesto moñaco d'Especulín.

En resumen. A penar que a fiesta estió muito bien, sisquiá l'añada benién torne t'o parque Tío Chorche y sisquiá o PSOE-UGT-EDU dixen d'amolar-nos terne que terne.

Zincomarzada contra la OTAN

O lema eslexíu ta la Zincomarzada d'iste año ye "Zaragoza, ziudat de paz" ta amostrar o refusamiento d'os coleutibos ziudadans a la nueba base d'a OTAN que nos quieren costruyir. Con a medrana de que pase bella cosa como l'año pasau bi ha una total esteria y s'han preso toda mena de midas: han tallau as brancas d'os arbols, s'amugará o rezinto, no i dentrarán autos, no se i podrán fer cheras.... Con tot y con ixo, o PAR ha dito que no bi irá - a penar que han alzau un puesto an que meter-se - por o periglo que bi ha y la manca de seguranza. Os suyos mainates sí que ferán a gambada de besita d’os puestos. Puestar que siga ta contrimostrar que baliens que son, si tanto periglo bi ha. Istos ya no saben que fer... Se presentará Biel a presiden d'a FABZ tamién?

Como toz os años s'han programau conziertos en l'eszenario y bel pasabillas. Entre atros, Biella Nuei tañerá a las 13:00. A resta d'actuazions las podez beyer en a paxina d'a FABZ (http://www.fabz.org/). En una chornada tan reibindicatiba como ye ista, no i mancarán os puestos d’asoziazions. Recomiendo que bisitez os de a plataforma "Aragón no se vende" y los de Chobenalla y UCA. Pero, más que más, podez aprofeitar ta pasar por o puesto de Nogara y mercar o libro Ucronía de Dabi Lahiguera (y prou que charrar un ratet en aragonés).
Nos i beyemos!

Nobedaz editorials en Nogara

Dende Nogara plegan dos nobedaz editorials. La una, o nuebo numer de l'Espiello con bels cambios chiquez en a maquetazión pero con os contenius de siempre. Ya son 20 os numers que leba ista rebista de raso en aragonés, y cada diya con más calidat. Encara no la he leyida entera pero tos recomiendo por agora l'articlo que firma Guillén Tomás sobre l'Archibo d'a Corona d'Aragón. Muito bueno ta qui no conoxebanos toda a istoria y muitismo más t'aclarir bellas cosas a muita chen.

L'atra nobedat ye a publicazión de o primer libro de Nogara. O suyo titol ye "Ucronía" y l'autor Dabi Lahiguera. Como he dito, ista nobela ye o primer libro que publica Nogara, con a intenzión de publicar-ne más si funzionan as bendas. Asinas que, dende aquí, deseyo tot lo millor a Nogara y a Dabi ta que continen publicando os primers y escribindo o segundo. Podez mercar o Espiello y Ucronía en o local de Nogara (C / Gavín, 6, Zaragoza). Qui bibaz en Zaragoza podrez mercar-lo tamién si tos amanaz por o puesto que meterá Nogara en a Zincomarzada.

Zincomarzada, an?

Iste año se torna a ubrir a rufierta sobre an se ferá a Zincomarzada. Con o Tío Chorche en obras, parixe que no queda atra que marchar enta atro parque. Mira-te que no podrían aber asperau un par de meses! Se charra d’o Parque Gran y d’o Parque Delizias (parixe que iste ya ye cuasi seguro que no). Os d’a Cartuxa dizen de lebar-lo t’allá y l’alcalde ta Baldespartera. Por agora denguno no ha dito de fer-lo en Uesca pero tot ye posible...
Escribiban una carta en bel periodico de güe an que se deziba que más d’un lo que de berdat quereba yera que s’acotolase ista fiesta por o suyo carácter ziudadán y reibindicatiu. Ixa mesma ye a medrana que yo tiengo. Ta yo, a zincomarzada ye un d’os siñals d’ista ziudat. Un espazio feito por y ta os mobimientos sozials de toda mena. Un espazio de combibenzia d’ixos que cuasi no en quedan. Y, prou que sí, una d’as millors borinas de tot l’año.
Zincomarzada an que siga, pero que bi’n aiga! (Y si puede continar en o Tio Chorche, millor que millor)