Emitindo un aragonés ecolochico. Tierra de barrenaus 10x08

Programa popurrí de tot que, como s'emite lo nadal, empecipia con la millor canción de nadal que s'haiga escrito nunca y, probablement, la unica buena: Fairy tale of New York, escrita por lo feneixiu Shane MacGowan, cantaire de The Pogues. Pero como odeo lo nadal, a escape me torno Mr Scrooge y voi con l'atra millor pieza que i hai pa istos días.

 

Empecipiamos con bella reflexión sobre los días que estié visitando la Feria d'o Libro Aragonés de Monzón, a on que podié presentar Parola de diaplerona y compartir con qui me visitez muit buenos raticos charrutiando en aragonés. 

Seguimos dando notorio d'uns companyers andaluces que son veyendo menazada la suya voz. Radio Almaina ye patindo la censura d'o gubierno suyo y dende la resta de l'estau no podemos fer que refirmar la suya luita que ye la nuestra. Si nos tocan a una, nos tocan a todas. Las radios libres tenemos un papel fundamental pa trencar la incomunicación y l'oligopolio informativo y, por ixo, nos quieren calladetas, asinas que dende Tierra de barrenaus, firme solidaridat y un abrazo pa las compas andaluzas y la suya campanya.

Tornamos t'Aragón pa charrar d'o zaguer Congreso d'Ecologistas en Acción a on que, entre atras cosas, s'apreb´ço un documento a favor d'as luengas propias d'Aragón, que demandaba la tornada d'a Dirección Cheneral de Politica Lingüistica, d'as subvencions a las organizacions en desfensa d'a diversidat lingüistica y, sobre tot, la oficialidat d'aragonés y catalán. Iniciativa muit bienvenida que s'encierta en lo tiempo con una campanya por la recuperación d'a espluca de Chaves que son empentando de conchunta con APUDEPA y atras entidaz.

 Lo cutiano viache mosical d'o programa va de Fe de ratas u La raíz, dica Vinos Chueca, protagonistas d'a canción d'a calaixera u Daniel Higiénico, qui estió fa poco en Zaragoza presentando lo suyo zaguer disco Demasiado viajo para el reaggaeton.

Recuerda que puez ascuitar toz los programas en Ivoox, Spotify y la web de Radio Topo.

Programa #159

 

Libros afalagadors

Permitiz-me estar una mica nyonyo. Soi un sentimental. Y agora mismo voi en una boireta, empecipiando con un amplo riso en la cara lo cabo de semana. ¿Qué m’ha provocau iste estau? De nuevas, un libro.

Si i piensas fundo, ye increible como una parrafiquera de fuellos tacaus de tinta puet dispertar-te sentimientos y sensacions tan autenticas y potents como las que fan los buens libros. Ixe ye lo poder d’a parola escrita, d’a parola en cheneral. Por ixo, entre atras razons, las luengas son muito mas que no una simpla ferramienta comunicativa. En los zaguers días m’he leyiu dos libros que, por razons diferents, m’han feito sentir “en casa”. Ixa calideza que te fa buen estar, que t'afalaga, como si t’arrebullases baixo una manteta con la persona querida, sonando la tuya canción favorita y fendo ulor d’a birolla que mas t’estimas.

Lo primer, que he zarrau fa bel minuto, ye Jim Botón y Lucas el maquinista. En iste caso yera una relectura. Estió un d’os míos libros favoritos de chiquet. Lo teneba en la casa de Cambrils y, de chiquet, cada anyo, pa vacacions, tornaba a leyer-lo. Me lo sabeba de corazón, de barra a barra, cada pachina, dibuixo y aventura que aculliban ixas pachinas. En bel momento va dispareixer d’os repalmars cambrilencos. No sé si bel parient se lo quedó, si lo cacegarían en bella cursa t’a placha u que me sé yo. Lo caso ye que me va quedar sin el. Habe bel anyo, la mía parella me lo va regalar y pasó a fer parte d’a muntonera de “pa leyer”. A la fin trobé lo momento pa leyer-lo, cosa mica facil, y me va trobar, dende la primer pachina, un flumen de remeranzas y emocions. Me sentiba como de criet, tornaba a vivir con Lucas, Jim y Emma todas las suyas historietas.

Lo libro se escribió en 1960. Estió lo primer que va publicar Michael Ende, l’autor de La historia interminable u Momo. Leyiu en 2023, tien a saber qué contenius que nos resultan sexistas y racistas. Ye lo que tien un libro de 63 anyos. Barrunto que Michael Ende, que de chovenón militó en l’antifaixismo de l’Alemanya d’os 40, no escribiría agora Jim Botón como lo fació en aquellas envueltas. Cuento que ista sensación que he experimentau no la tendría de leyer-lo agora por primer vegada, que ye mas recosiro que no atra cosa. Por bel día he tornau t’a mía nineza, ta ixa sorpresa que te levas con cada capitol d’as primers lecturas, cuan tot ye nuevo. Si lo leyez agora, de grans, ya me contarez que tos pareixe.

L’atro libro-manteta va venir dende lo club de lectura de ciencia ficción que en foi parte; Monje y robot, de Becky Chambers. Ye la replega de dos noveletas que va publicar l’autora en 2022 y que ganoron un Locus, un Hugo y estioron nominadas a un Nébula. La historia, ye escrita en luengache no binario y protagonizada por dos personaches que tamién en son, de no binaries. Antiparte d’isto que, en realidat tien poca trascendencia en la novela dillá d’a normalización d’ixe feito, la historia s’enmarca en una sociedat utopica que ha superau la transición ecolochica y a on que la chent vive en una arcadia social y natural.

Dicen los manuals de narrativa que en toda historia fa falta un conflicto pa que abance. Somos tan feitas a ixo que me pasé buena parte d’os primers capitols aguardando que en bel momento, le monche se trobase con bel problema irresoluble, u que lo robot resultase una menaza u en avisase d’una. Manimenos lo conflicto ye bien ausent en ista novela y, con tot y con ixo, t’agarrapiza a escape. Dex y Onfalina, les protas, viven en ixe mundet con la sola inquietut, que no ye poca, de trobar-le sentiu a la suya existencia.

¿Resulta inchenuo y mesmo naïf? Sí pas. Pero s’agradeixe de cabo ta cuan una historia que t’aluenye de l’angunia, que te parle d’un mundo ideyal, un puesto que probablement ye inalcanzable, pero que fixa un buen destin enta do caminar.

Entre las suyas pachinas he trobau tranquilidat a capazos y una paz interior de mal trobar en las lecturas que goso fer. Pero tamién muitas reflexions interesants sobre las motivacions vitals, sobre las metas que nos imposamos a nusatras mesmas, sobre lo sentiu d’a vida u la suya ausencia. Y ratos de fer-me buenas risas, en especial con la manera que tien lo robot de veyer lo mundo.

Si i creyese, en la machia, me pensaría que los libros tienen bel esconchuro, que i hai bel encante que fa d’a tinta y lo papel un artefacto mistico que nos torna varrenadas. A fe que s’ha feito estudios sobre lo que provoca en lo cerebro la lectura y como las nuestras neuronas ordenan la producción de qué me sé yo que productos que nos fan tener todas ixas sensacions. Siga como siga, gracias a Becky y a Michael por fer-me sentir asinas, tot calentet, debaixo d’a manteta que fan los suyos libros.

Chiflo y salterio. Tierra de barrenaus 10x07

De todas las manifestacions culturals que tenemos en Aragón, una d'as que mas interés i tiengo ye la mosica. Luent d'a jota, y sin fer-la mica de menos, i hai una riqueza y variedat bien ampla. Como tantas atras d'ixas manifestacions culturals, remaneixen amagadas, difuera d'os medios de comunicación y d'as aulas, asinas que un s'ha de buscar las manyas pa enterar-se d'a suya simpla existencia.

A sobén ixe ye lo caso d'instrumentos como lo chiflo y lo salterio que buena parte d'a población aragonesa desconoixe u en sabe bien poco. Lo nuevo episodio de Tierra de barrenaus l'adedicamos, de tot, a conoixer-lo de man de Diego Escolano y Armando Occon. 

Toz dos nos charran d'a suya historia, de cómo ha iu evolucionando lo suyo conoiximiento en zagueras y de beluna d'as iniciativas que s'han feito pa difundir-lo y mesmo conseguir mas mosicos que lo faigan servir. 

Recuerda que puez ascuitar toz los programas en Ivoox, Spotify y la web de Radio Topo.

Programa #158

 

Carta a la sinyora facha que chila

Yo le entiendo, sinyora facha esverrecadera. Ye vusté un d’os mios memes favoritos de tot lo que s’ha visto en istos días de orchía espanyolista. Pobrona. Astí, en lo preto de Barcelona, con lo suyo bolso de sinyora gran y la estanquera mercada en lo bazar la vispra d’a suya gambadeta manifestadera. Entiendo de tot ixa frustración, ixe sentimiento de que tiens toda la razón d’o mundo y lo gubierno fa tot lo contrario, de que los tuyos argumentos no se sienten. Yo la he sentida a-saber-las vegadas. Dende que tiengo memoria politica. Me facié a perder batallas de bien choven, asinas que ya aprendié a chestionar ixa rabia y ixa carranya. Si no, hese escrabutau, m’hese petau la trunfa. U sería engarcholau, que me sé yo. Ya deciban los Zoo ixo de que no serà per ganes de ficar les bombes, que serà per la por a perdre el que tenim.

Vusté, sinyora facha esverrecadera, ha sentiu una redota politica por primer vegada en la vida. Que no’n ye. Tan de buen que en fuese, que de verdat lo gubierno espanyol fuese tot lo que le acusan d’estar. Que fese politicas socialcomunistas, instaurase la republica y trencase d’una maldita vegada Espanyita. No han perdiu vustés, las fachas, pero ixo ye lo que sienten. No pueden asumir que belún que no ye “d’os suyos” ocupe nian un trocet d’o poder. Una miquirrina nomás. Porque tienen los chueces, la poli, l’exercito, los medios, la ilesia, lo senau, cuantos gubiernos autonomicos y muitas d’as principals ciudaz. Pero lo gubierno espanyol y lo congreso son en mans d’otri. Y ixo sí que no. Una clica de hippies, pa forro de bota, seguntes la suya envista d’o mundo.

Esverreca de puro odio. Que no ye pa tanto, ya le digo. Vusté ni se’n enterará, d’os efectos d’ista amnistía. L’atra, la d’os bancos, d’ixa sí que nos n’enteremos. Buena patacada de diners que perdiemos toz, que podrían haber iu pa escuelas, hespitals u mesmo pinganillos pa traducir, a las que charramos basto, a l’universal espanyol, pero se los han quedau en la buchaca los executivos de banca. La’atra amnistía, la d’agora va a deixar que Puigdemont pueda fer-se una gambadeta por l’estau espanyol, lo solo estau d’o planeta a on que no puede fer-la agora. Ye decir, que ye libre d’estar-se en 500.000 km2 mas que no antes. Contando que las tierras emerchidas son 150.000.000 de km2, nomás le han ixamplau un 3% la garchola que ye iste mundo. Tamién l’amnistía toca a directoras d’escuela, que cometioron lo terrible delito de ubrir los centros pa que la chent votase. Y a atros que estioron acusaus d’atentaus y cosas piors con prebas terribles como la posesión d’un chiflet amariello. L’alferez que se levó la pistola ta Ferraz, manimenos, tornará tranquilament t’o suyo treballo de veilar por la nuestra seguridat. Diz que la mía tamién. 

Le consello, sinyora facha esverrecadera, que deixe de veyer la telefacha ixa, por muito western que i metan. Que astí sale chent verenosa. Y no ubra los videos ixos que le ninvia lo nieto, que estudia ADE en la Rey Juan Carlos, que allí la fan en castellano. Que antimás a Vito ya le han empecipiau a deixar de responder y ni la policía le permite fer lo que le pete. Ay, si Meritxell en hese parau cuenta antes, lo que nos hesenos puesto escusar. Que no será que no le’n avisase dengún.

Le confieso, sinyora facha esverrecadera, que a yo tampoco no me fa goyo Perro Sanxe. Que ye un veleta, que las pocas vegadas que fa cosas de zurdo ye de casualidat u porque le obligan las circunstancias, los numeros u las socias. Que ni ha derogau ni derogará la lei mordaza, que mantiene en lo puesto a lo suyo psicopata d’interior, que fa una politica exterior de vergüenya y un ciento de cosas mas. Pero tamién le digo que, en veyendo a sinyoras fachas esverrecaderas como vusté y a la clica que s’achuntó ixos días cada nueit por Madrit, da-me bien de Perro, que buena bala hemos esquivau. D’ixo s’aproveita, que si no, de qué iba a salir. Lo día que deixen d’esverrecar asinas, igual ganan. Pero de verdat, de lo de ganar y dimpués gubernar. 

Talment s’haiga encarranyau tantismo, sinyora facha esverrecadera, por lo de veyer a la policía abataniando a los suyos amigos, familiars y companyers. Vusté, que chiló ixo de “A por ellos” en 2017, que se i solidarizó porque la birolla d’os barcos de Piolín yera muit mala y los suyos - porque son SUYOS - no se mereixeban ixa mala minchanga, que desfiende a tot trance la lei mordaza y las balas de goma, que de verdat se creye que las camaras d’as comisarías d’esmarchinan terne que terne… No se’n faiga, sinyora facha esverrecadera. Yo tamién me creyeba, de bien chiquet, la faloria que me recontaban en la tele, lo cole y la familia. Lo de “pa servir y protecher”, que toz somos iguals debant d’a lei y tot ixo. A la tercer mani ya comprebé que d’ixo, ni pon. Que ni servir ni protecher y que, de bien choven, la poli ya m’heba creyau muitos mas problemas d’os que m’heba resuelto. Ye la novedat, sinyora, pero ya le digo yo que, por desgracia, uno se i fa.

No han cambiau tanto las cosas, sinyora facha esverrecadera. Puigdemont s’iba a fer la gambadeta por las Ramblas igual. Isto nomás ha acelerau un poquet las cosas. Lo gubierno no será socialcomunista. Socialdemocrata como muito, y no guaire. Marlaska tornará a ninviar a la poli contra las royas, las treballadoras que fan vaga, las que protestan contra los CIEs u las yayas que quieren seguir habitando lo suyo piso pero no tienen 88 euros pa pagar-le a lo banco amnistiau de turno. Las mugas d’Espanya, la suya quiesta Espanya, continarán estando las mesmas. Si peta unatro volcán, talment s’ixamplen un poquet, pero ixo ye tot. Los chueces continarán estando suyos, como siempre. ¿Que no ha visto las facultaz de dreito? Ixo tien mal cambiar.

Pero chile, sinyora facha esverrecadera. Chile muito, que ye terapeutico, que libera. Lo sé porque levo muitos anyos chilando, de rabia y frustración, de veyer como discursos que creyeba superaus en los 90 tornan y s’ixemenan por tot, que mesmo plegan a chent que considero bien agudica. Chilo a traviés d’un blog, de libros, de pogos, de nueis de borina, d’un programa de radio y, bella vegada, tamién chilando. En casa, d’amagatons, faltando a la tele y a los fachas que i salen, que por ixo no se me grava ni protagonizo un meme. Chile, sinyora, faiga-se una camomila, y disfrute de que, talment, lo gubierno socialcomunista filoetarra jihadista y no sé cuantas cosas mas no le deixará morir en la residencia con 7000 viellos mas cuan arribe la siguient pandemia.

Relatos de correr, aragonés y mas. Tierra de barrenaus 10x06

Ubrimos lo programa con una patacada de noticias sobre l'aragonés: chornadas, presentacions, manifestacions, actividaz.... La luenga no rebla y la buena chent que la desfendemos no aturamos ni un día. Dende Monzón dica Bilbao pasando por Zaragoza u Moncayo. 

Lo mes de noviembre ye bien sinyaler pa las runners. Se celebra la Behobia - Sant Sanbastián, la corrida mas bonica y emocionant que he corriu. Toz los anyos se publica una revista y, en ista edición bi incluyoron un relato protagonizau por la llebre d'as dos horas, escrito por Alber Vázquez. Podrez ascuitar-lo en lo programa, adintro d'a sección de running que levaba 4 anyos sin fer y que aproveito pa charra d'a Ebrovida, la preba que se fació en iste mesmo mes en La Cartuixa Baixa y los galachos de l'Alfranca.

En l'apartau mosical, nos despedimos d'un d'os millors grupos d'a zaguer decada de mosica aragonesa que han anunciau que deixarán los escenarios luego. Toda una peneta y una sincusa perfecta pa no deixar d'ir ta garra d'os conciertos que faigan d'aquí a la fin.

La calaixera ubre lo suyo tercer calaixo pa trayer cancions con estructura de relato. Ficaremos astí historietas cantadas. La primer, d'una colla catalana de rap que va visitar Zaragoza fa bien poquet. Zarramos lo programa, prou que sí, con unatra canción sobre Palestina, denunciando lo chenocidio que leva decada fendo-ie l'estau d'Israel.

Recuerda que puez ascuitar toz los programas en Ivoox, Spotify y la web de Radio Topo.

Programa #157

Mosica de primers de noviembre. Tierra de barrenaus 10x05

Toca programa continación dreita de l'anterior. Feito con lo material que teneba presto y que no i cullió porque siempre foi conteniu de mas. Mas mosicas, bien variadas, pa concarar l'agorrada.

Empecipiamos con una novedat valenciano-euskalduna: lo nuevo tema de Los Chikos del Maíz que han gravau con motivo d'o deceno aniversario d'a librería pamplonesa Katakrak. Un homenache a los orichens d'o rap que se incluye en un disco que publica ista librería pa celebrar ixos diez anyos de sobrebuena fayena literaria. Una visita obligada si pasas por la capital navarra.

Pasada ya la nueit d'almetas, con tot lo ferrete d'ixos días sobre cómo clamar-le y las diferents -y tan pareixidas, de vez - tradicions, arriban dos cancions. La primer, fendo remeranza a la imachinería mexicana. La segunda, un clasico d'o metal, plena de satanismo.

Lo zaguer bloque mosical le'n adedico a Léonor, filla de Félipe, mercadora de pintes y minchadora d'entrepans. Tres cancions republicanas de man de tres clasicos d'a mosicas reivindicativa en castellano. Dos que pentinan canas d'habe anyos ya y atros que antes de fer-lo, s'estimoron de disolver-se. 

Recuerda que puez ascuitar toz los programas en Ivoox, Spotify y la web de Radio Topo.

Programa #156

 

Un día cualsequier en Independencia, 29

Tiengo un ratico libre lo maitín y pocas ideyas pa escribir, asinas que cometo la error de fer-le una uellada a la prensa local. No m’agrada de dar-le visitas pero, como fa tiempo que no lo feba, cuasi heba ixuplidau lo que yera leyer Heraldo.

Ye lo día que la nieta d’o Rei fuyiu chura la Constitución espanyola y, en la suya tradición, lo periodico s’imple d’afalagos y floretas. Ya nos ha veniu contando en los zaguers meses como la “dama cadete” mercaba pintes, se minchaba un entrepan u feba gymkanas con los suyos compis de simulación de G.I.Joses. Asinas que, en un día tant gran, no falta los titulars que nos recuerdan cuánto la quieren: “La princesa recibe una ovación”. “Los reis plegan en lo Palacio arropaus por milenta ciudadans”. Y asinas-asinas.

Lo feito de que prebe de pasar por un medio respetable, no significa que no reblen debant d’a tentación de fer una mica de papel couché: “la princesa triga un trache de pantalón y la reina repite vistiu de Carolina Herrera”. Lo Rei, Froilán y la resta de mastos ben d’ir en coritatis. Bien se vale que la princesa ye tot un eixemplo de feminismo seguntes los lectors d’o pasquín.

Scrolleo una mica, cuan me farto de veyer como se malfurria en medievalismos los diners que se podrían adedicar a pinganillos, y me trobo con noticias d’o país, que ye lo suyo en un medio que s’apellida “d’Aragón”.

Herida una joven atropellada cuando iba en un patinete eléctrico en Zaragoza, diz la noticia. No indica qué vehiclo la ha atropellada. Por bel motivo, nomás se diz en qué iba la victima. Decido ubrir la noticia pa enterar-me-ne. Yera un auto, como de cutio. Comentan que la moza iba a treballar. Se m’ocurre que la noticia se podría haber titulau “Un auto atropella a una muller que iba a treballar”. U mesmo “Unatra victima d’os autos por ir t’o treballo”. U, si nos metemos una mica demagogos “Los autos y treballar se cobran unatra victima en las carreras zaragozanas. ¿Dica cuan?” acompanyau d’una encuesta sobre la prohibición d’a circulación d’autos privaus y unatra sobre l’abolición d’o treballo. Pero no, la noticia sigue indicando que la victima no levaba casco, sin explicar qué relevancia tien ixa información, si ixe casco podría haber evitau l’accident u si ha teniu bella lesión que no hese teniu si lo hese levau. 

Contino la lectura, una mica canso ya. Veigo una entrevista con Ana Botín, una muller que por ixo d’a meritocracia plegó a estar presidenta d’o Banco Santander sin que bi influyise mica lo feita d’estar filla de l’anterior president y d’una marquesa. Diz lo titular d’a entrevista que “Si se pagan masa impuestos, la chent jopa”. No sé d’a ón joparán, ni a qué chent se refiere. No pas ella. Cuan se diz “la chent”, se quier decir “atros, no pas yo”. ¿U no? 

Yo no puedo jopar ta garra cabo ni conoixco dengún que marche ta un puesto u t’atro seguntes los impuestos que se paguen. Lo mas, belún que se’avecinda en lo lugar pa fer vulto u pagar menos por las pagamentas de circulación. Que pa yo que les sale la perra capada, pero els sabrán.

Si los impuestos son “masa” u “masa pocos” tamién lo be de decidir ella. U los amigos suyos, ixos que jopan cuan creyen que pagan muito. Abaixo, como de cutio, i hai noticias relacionadas, d’ixas que te claman a clicar-ie si t’interesa lo tema. Lo primer diz “La gran banca española pulveriza un nuevo récord tras ganar 19,761 millones, un 24% más”. No me cal rechirar en prensa alternativa anticapitalista. Ni sisquiá en garra atro periodico. Chusto en la siguient ringlera d’o mesmo medio a on que se publica la suya queixa por los impuestos diz que ye ganando uns beneficios record. Un 24% mas que l’anyo anterior. A yo me puyó lo chornal 30 euros a lo mes y feba blincos. Bueno, cuento que con ixe esquimen no se le ocurrirá jopar con la chent ixa que creye que i hai masa impuestos a la banca.

Entra un client y he de deixar lo mío descanso. La zaguer vegada que lo foi, porque no nomás no m’he descansau sino que m’estresau mas. Hue no he aplaudiu a la ¿futura? reina, ni m’he meso casco en la bici, convidando a que bel vehiclo m’atropelle y me queda pendient pa ista nueit decidir si i hai muitos u pocos impuestos y, en lo primer caso, mirar t’a on me’n voi.

Mosicas de cabo d'octubre. Tierra de barrenaus 10x04

Arriba un nuevo programa de Tierra de barrenaus pleno de propuestas mosicals, unas mas nuevas, atras no pas tanto, distribuyidas en dos bloques. En lo primer, repasamos bel evento que bi ha habiu en Zaragoza en zagueras. Empecipiamos con lo concierto presentación de O zaguer chilo VI que se fació adintro d'a Fiesta Gran de Zaragoza. Seguimos con unatra presentación, en iste caso, la d'o libro "Las ausencias, las ciudades y el mar" de Álex García Jaimerena, mosico de collas como Nuei y Casbas, a qui entrevisté fa bel par d'anyos. Lo bloque se completa con la mosica de Periferia, banda catalana que visitó la nuestra ciudat fa bella semana, fendo conoixer lo suyo primer disco en la Sala Z.

En lo segundo bloque de canción viachamos t'o País Valenciano, que ya sabez que i hai bel grupo por astí que suena de cabo ta cuan en lo programa. La primer novedat arriba de man de Pupil·les que nos charran sobre las suyas yayas -y todas - en un nuevo tema bien bonico y emotivo. Seguimos con un nuevo single d'o futuro disco de Valira, que tenebanos pendient charrar-ne dende lo verano. Zarra lo bloque la voz singular d'Alexandre Seguí, qui tantas alegrías nos daba en La Gossa Sorda y que torna agora con un prochecto propio que marca de pistón.

Aspero que tos faigan goyo todas istas cancions y que m'escribaz pa decir que tos pareixe y proposar-me-ne atros pa los siguients programas.

Recuerda que puez ascuitar toz los programas en Ivoox, Spotify y la web de Radio Topo.

Programa #155

 

 

Suenio (Relato TdB)

“Suenio con un mundo mas chusto y menos alleno”. Asinas empecipiaba la poesía con que gané lo mío primer premio literario, si ye que se le puet decir asinas a la sanselada que feban en l’instituto, a on que competiba con composicions d’a mena de Mas te quiero / que a lo mundo entero y La tarde / en los uellos tuyos arde. Yera un criet y ixo no fació que animar-me a seguir con lo d’escribir. Los mayestros me deciban que teneba talento, que no heba de reblar, que podeba fer lo que querese. Con decinueu, en lo verano d’antes d’a universidat, publiqué la mía primer novela. Un catenazo infumable que, manimenos, en dioron treslada en los periodicos locals. De l’argumento, se’n charraba poco. Lo important yera la mía edat. Amaneixeba en toz los titulars. Las preguntas d’os periodistas culturals iban siempre enfiladas a ixe dato, prebando de que servise d’eixemplo pa que me sé yo quí. Suposo que feba tiempo que heban abandonau l’instituto y no remeraban que l’afición por escribir no te fa precisament popular en ixas edaz.

Muito reportache. Pocas vendas. Con lo que gané por lo libro, dimpués de que cada ún d’a cadena comercial se levase la parte suya, tasament me daba pa pagar una asignatura d’a carrera de filolochía que acababa d’empecipiar. Una carrera impartida por yayos que leleaban incapables de recomendar un libro que no fuese una buenya con pretensions. De tardes prebaba de construyir la mía siguient obra, la que confirmaría que no yera un autor d’una sola novela. La que nunca no arribó. Tot lo que escribiba, cada frase, cada parola, seguiba sonando a repatán, a ixas historias sin suco que firmaban los míos companyers de clase y que no m’adubiba a fer-me-ne la mofla.

Deixé los estudios cuan m’afirmoron en ista mierda de treballo. Vendedor en una d’as botigas d’a mas gran franquicia d’ocio y cultura. Ocio y cultura. Diz que la muga entre todas dos ye de mal trobar. Yo la tiengo bien clara. Si se vende aquí, lo mas facil ye que siga ocio. La cultura ye en los almagazens aguardando a los cuatre frikis que, rechirando en la web, troban en lo nuestro catalogo las pocas cosetas que valen la pena d’o que se publica hue. ¿Qué cultura puet representar ixa parrafiquera de fuellas d’o zaguer best-seller sobre bella parte d’a historia poco conoixida, u sobre un detective que investiga cualsequier fatera que a dengún no mporta? ¿En qué va a cambiar ixo la nuestra manera de mirar-nos lo mundo? Ixo sí, pachinas a embute, que la inversión salga a cuenta. Si dividimos los euros por pachina, que se chustifique. “30 euros, Manolo, pero tiengo pa tot lo verano”. Que se veiga bien en lo repalmar, que tiens toda la colección. Qué vicio le has pillau. A veyer si en fan serie y puez fer-te la bamba d’haber-te-lo leyiu antes: “en los libros no ye asinas”.

¿Pa qué iba yo a escribir? Pa malfurriar tiempo y imachinación. No me sale cosa interesant. No se publica cosa interesant. La literatura ye muerta. Se franquició. Como lo cine, como la birolla, como lo comercio a on que treballo. Todas las historias son la mesma, todas las birollas son la mesma, tot lo que consumes lo producen cuatro ricos. Toda la uniformidat que menazaban que trayería lo comunismo global ha arribau d’a man d’o capitalismo salvache.

M’acabo lo fumarro d’o descanso en lo callizo de dezaga d’a botiga. I hai un cartel d’un concurso literario. “Esmola lo tuyo lapiz y ninvia-nos una historia”. ¿Lo lapiz? ¿En 2023? Si quiers te lo ninvio en cuneiforme. ¿En qué tiempos vive ista chent? Nian cuan escribié la fatera ixa de “suenio con un mundo mas chusto” lo facié a lapiz. Piqué cada frase en lo teclau, como la chent civilizada, pa no emplir de parramacos una fuella de papel. Pa esborrar las errors y que no se me mirasen fito-fito dende la fuella.

Paso por la sección de papelería. Furto un lapiz y una libreta. Dengún no me dirá cosa. A toz nos la bufa que furten en la botiga, fuera de l’encargau que be de creyer que va a heredar la franquicia cuan lo mas probable ye que le’n vendan a unatra marca mas gran u que acabe en mans de bel país d’a peninsula arabiga.

Ye de maitins y ye tot cuasi vuego. Me’n voi t’un cantonet d’a sección de literatura en francés. Astí nunca no i entra dengún. Siento lo lapiz en la mía man. Me l’acerco t’o naso. Dimpués, la libreta. Fan ulor d’historias. Fan ulor de literatura. Talment pueda recuperar belún d’os argumentos que preixiné. I hai un par d’ideyas, en un cabo d’o mío tozuel, que podrían desarrollar-se. Me refirmo en un libro de Baudelaire. Escribo un par de frases. M’entivoco. Quiero esborrar pero si torno t’a papelería a furtar una goma talment la ixuplide. Foi un parramaco. Sigo escribindo.

Mierda. La ideya ye buena. Va creixendo. Fa fractals. De cada filo de pensamiento en salen tres. Me foto tot lo día gravando-me mensaches en lo mobil con personaches, paisaches, escenas, propuestas. Acabo la chornada y voi t’a casa a tot meter. Ixa nueit remato lo primer capitol. Bel día la mía novela será en los repalmars d’o mas vendius.

Iste relato se va locutar en lo programa 10x03 de Tierra de barrenaus a partir d'o minuto 16:30. 

 

Individualismo, d'Extremoduro a Suu

“No quiero ser como tú” chilaba Robe, lo cantaire de Extremoduro en lo concierto que gravoron en 1997 y que s’acabó editanto baixo lo titol “Iros todos a tomar por culo”. Qui lo ascuitabanos en aquellas envueltas coriabanos a tot estrús. Personalment me lo preneba como un chilo contra tot lo que no quereba estar u esdevenir, contra ixos burgueses con truqueta que representaban tot lo que odiaba en la mía adolescencia. Yo nunca no sería asinas. En ixe mesmo disco sonaba tamién “Ama, ama, ama y ensancha el alma”, a on que lo deixaba bien claro: “Prefiero ser un indio que un importante abogado”.

“No quiero ser como tú”. “Ni como nadie”, anyadiba en ixa versión. En fación chambretas. Poco dimpués insistiba sobre ixa ideya d’individualidat extrema titulando un disco “Yo, minoría absoluta”. Feba asinas, intencionadament u no, un clamamiento a l’individualismo, a la negación d’as identidaz colectivas. Un pensamiento que me pienso chupió a la nuestra cheneración muito mas que no nos pensamos. Ixe individualismo ye un d’os piors mals d’as sociedaz y no tiengo guaire claro si va a mas u lo siento asinas por ixe aviellar-se que te leva a creyer que las chovens d’agora lo fan tot pior que no antes.

Todas somos unicas. Creigo que ixo ye una evidencia, ya dende la mesma envista biolochica, que nos fa a todas diferents, pero tamién dende las culturals y socials. De vez, todas somos muito menos unicas que no nos pensamos. Y muito menos que no querríanos. Compartimos un ciento de cosas con tot qui tenemos arredol. Nomás si femos a-saber-la ficancia en las pocas cosetas que nos ne diferencian ye cuan prenemos conciencia d’a nuestra unicidat. Precisament fer ficancia en ixo, en lo que nos diferencia y no en lo que compartimos, ye lo que trenca a sobén los vinclos de solidaridat con atras personas que fan parte d’as nuestras identidaz colectivas.

En lo suyo libro Walkaway, Cory Doctorow, (resenya aquí) entre atros muitos temas charra d’ixe individualismo como un d’os gran problemas d’a sociedat que los protagonistas quieren deixar dezaga. En la suya novela, un grupo de chent por cada día mas numbrosos, clamaus los caminants, construyen un sistema alternativo y diferent a “pordefecto” como le dicen a lo capitalismo extremo a on que viven. Doctorow fabla d’as personas que se fan la bamba d’estar unicas como los flocos de nieu especials. Lo fan en cuantas ocasions, como en ista:

Tot lo mundo charraba d’os flocos de nieu especials y yera la mena de comentario que suposaba una faltada cuan veniba d’un desconoixiu, pero no pas si lo deciba un amigo. S’entendeba que no amenistabas estar un floco de nieu especial porque la realidat obchetiva yera que, por muit important que fueses pa tu mesma y pa las personas mas cercanas yera poco prebable que cosa d’o que feses fuese insustituyible. En que te considerabas un floco de nieu especial t’enfilabas enta l’autoenganyo de que habrías de tener mas que no garra atra persona pues la tuya condición de floco de nieu lo exichiba. Si bi heba cosa que yera de tot difuera de onda entre los caminants, yera l’autoenganyo.

Focalizar-nos en lo común ye un d’os quefers pendients d’a izquierda alternativa u como le queramos decir. Y en cheneral de cualsequier persona que no quiera cayer en la trampa capitalista de creyer que mereixe mas que no atras y que la resta no son que rivals por recursos.

Una miqueta d’humildat - no trafucar con subestimación - nos faría muita honra. Como he dito antes, no sé si las cheneracions d’agora son mas individualistas que las d’antes - ¿bella sociologa que m’aduye? - pero sí d’una canción que, cuento que sin intención, va en contra de tot ixe sentimiento “no soi como tu ni como dengún”. Suu, una d’as cantaires mas naif que conoixco, le canta a sobén a l’amor y a las relacions personals. En lo disco Ventura, de 2020, incluye la suya canción “No eres tan especial”, a on que le diz a un amigo: “no yes tant especial / conoixco a muitos mas que son de tot igual / Estar como la resta ye la tuya sola especialidat”.

Vivimos rodiadas de flocos de nieu especials, que niegan tener identidaz coletivas, que se fan a bamba de no fer parte de garra organización, que son “ciudadanas d’o mundo”, que piensan “de manera libre”, que no les manipoleya dengún y que tienen referents culturals que creyen superunderground. Cada vegada que en veigo a un d’ixos, la mía vesant pesimista piensa en lo fracaso cultural d’a izquierda. La positiva, la chuzona, se’n fa la mofla y canturreya “no, no eres tan especial”.

Iste texto se va locutar en lo programa 10x03 de Tierra de barrenaus radio, fendo sonar las cancions nombradas. Si quiers sentir-lo, puez fer-lo aquí, a partir d'o minuto 8.

Individualismo, suenio y escuela. Tierra de barrenaus 10x03

Foto: Asembleya vecinal en La Madalena

Torna Tierra de barrenaus con un programa gravau en lo preto d'a Fiesta Gran de Zaragoza a on que NO charraremos de Pilars. Bueno, cuasi. Empecipiamos con un texto que sobre l'individualismo con banda sonora d'Extremoduro y Suu y referencia a lo libro Walkaway de Cory Doctorow, que resenyé fa poco en lo blog chirmán Entre cortesía y colofón. 

Tot y que iste 2023 no faré inktober, como en 2019, 2020 y 2021, ni sisquiá Zaratober, como l'anyo pasau, no deixo d'escribir y tos locuto un relato escrito de fa poco, con la segunda parola d'o inktober d'estianyo: Suenio. Una historia sobre un aficionau a la literatura que, con los anyos, s'ha tornau un cinico.

En la sección d'a calaixera, ubriremos lo segundo calaixo, adedicau a la educación y la escuela, con un tema de 1979 reversionau en 2013, protagonizau por dos clasicos d'o rock en castellano y a on que reivindicico un disco prou desconoixiu, mesmo entre lo fandom d'a banda.

Lo programa se completa, como de cutio, con bella convocatoria, informacions y cancions, acabando con un tema adedicau a Palestina, como no podría estar d'atra manera.

Recuerda que puez ascuitar toz los programas en Ivoox, Spotify y la web de Radio Topo.

Programa #154

Cosas que me farían goyo (un lunes de tardes)

Ye lunes de tardes, de cansera y poca fayena, y me da por pensar...

Remero l’antipregón, que estió tot un exito. Un ciento de personas, de toda mena y edaz, cuasi todas buena chent, s’arrocloron en la carrera Sant Agustín pa empecipiar bien la Fiesta Gran de Zaragoza, en la borina que organizó Radio Topo. Como parte d’a radio, facié lo mio redolín de barra. Iba atarrantau, servindo a tot meter, y una persona se m’acercó. L’absurda conversa estió alto u baixo asinas:

- Una biera y un libro

- ¿Litro de qué?

- No, no. Una biera y un libro - marcando la B.

- ¿Ein? - me quedo mirando entazaga un momentet por si tenebanos bel libro que se vendese y no me’n heba enterau - Lo siento, pero no t’entiendo.

- Un libro - se me mira un poquet desesperada - Rai, la biera nomás.

Rato dimpués, muito rato dimpués, barrunto que, qui fuese, sabeba que escribo u mesmo m’ha leyiu y simplament quereba compartir-lo, como tantas vegadas demando por rez. ¿Y qué le voi a fer si soi lentico? ¡Bi ha habiu tantas vegadas que he entendiu las cosas cuan ya no valeba pa cosa entender-las! Me siento como Homer cuan se fa feriant y Wiggum preba de sobornar-lo.

 

Me faría goyo d’estar mas agudico y centrar-me mas en lo que m’ocurre arredol y no estar tot lo día pensando en siet cosas de vez. Me faría goyo de poder viachar en lo tiempo, ista y muitas atras vegadas, y tener la oportunidat de responder lo que en veras pertocaba.

 

En la radio charran de libros. Ye una sección semanal d’una emisora de prestichio. Bi va la saputalla a fer la retolica, fan un concurso de relatos que i participo - con poco exito, por agora - y entrevistan a autoras. Lo tema de debat ye cómo organiza la chent las suyas bibliotecas personals. Cuantos s’encarranyan porque i hai chent que fa doble ringlera de libros por repalmar, amagando con los de debant los de dezaga. U mesmo ¡blasfemia! que aproveita los espacios vuedos d’os libros chicoz pa calar-ne en horizontal. I hai cuasi unanimidat en que ixo ye barbarie y que los suyos millars de libros son toz en ringlera unica, verticals, y ordenaus por autors, tematicas y atros criterios de buena lectora.

 

A los cuatre días d’entrar a vivir en lo mío piso de 51 metros cuadraus, ya no i culliba mas libros, en los repalmars. M’habié de buscar las manyas pa ir calando tot lo que m’he mercau u m’han regalau en istos anyos: la casa d’o lugar, un traster que tenemos dende habe bel anyo y, prou que sí, segundas ringleras y libros en horizontal, en caixas, calaixos, almariez y en cualsequier puesto que se m’ocurra. Bendigo las bibliotecas, que m’ufreixen lectura que no ocupa espacio, y lo libro electronico por la mesma razón.

 

Me faría goyo de poder pontificar sobre cómo ordeno la mía librería. U ya no pontificar, sino mesmo poder ordenar-la, cosa que no he conseguiu fer que dos vegadas en quince anyos. Y poder decir que poseyo toz los libros que he leyiu y que ixo d’o libro electronico ye una modernez y que como buen lector leigo en papel y ni pensaría en piratear un libro.

 

Se me queda un ratico libre y me meto a aprestar contenius pa lo programa de radio. Tiengo un archivo a on que voi anotando ideyas pa seccions, cancions, temas pa charrar-ne, notas pa programas especials y asinas-asinas. Voi trigando-ne. “No me vaga de fer-lo. Masa embolique. Convidau de mal quedar porque ye aqueferau u vive luent u lo que siga.” A la fin, sota, caballo y rei: meto unas cancions, leigo un relato, charro de bel tema d’actualidat y, arredol d’ixo, basteixo una nueva edición de TdB que aspero que faiga honra pa l’aragonés y qui l’ascuita, pero que ye bien luent d’o que querría fer.

 

Me faría goyo de tener mas tiempo y recursos, de conoixer millor todas las posibilidaz tecnicas que da la radio y los medios informaticos que i hai y que, dimpués, en la edición, quedase lo soniu mas limpio, y poder desarrollar todas las ideyas que he iu anotando en archivos y libretas por tantos anyos.

 

Chusto en acabando iste post m’escribo con la mía parella y charramos de aprender a renunciar, a aconortar-se, a aceptar que i hai cosas de mal cambiar. Tot y que talment bel día tienga una casa gran, que i cullan toz los libros, bien ordenadicos. U tiempo pa gravar cualsequier sanselada que se m’ocurra. Lo d’os viaches en lo tiempo y fer-me mas agudo, ya lo veigo mas embolicau.

Cursos y fiestas. Tierra de barrenaus 10x02

Foto: Serchio

Con lo mes d'octubre empecipian tamién los cursos d'aragonés. Debant d'as enrestidas contra la nuestra luenga que imos a tener de man d'o gubierno aragonés y d'o concello zaragozano, las personas que sí que valuramos lo nuestro patrimonio cultural y lingüistico tenemos la oportunidat de fer servir todas las ferramientas que podamos pa conservar-lo y desfender-lo. 

Entre atras, los cursos d'aragonés d'a Escuela Nogara que, como leva fendo mas de trenta anyos, torna a ufrir cursos de toda mena. N'i hai presencials y a distancia, de maitins y de tardes, de tres nivels, en Zaragoza y en bel lugar... De tot ixo nos ne da treslada una representación bien ampla de l'asociación que implioron l'estudio d'a radio como feba tiempo que no lo veyeba. Antimás d'os cursos tamién teniemos tiempo pa charrar de beluna d'as actividaz que organizan cada anyo y, sobre tot, d'as que tienen prestas pa fer uns Pilars en aragonés.

Precisament de convocatorias arredol d'a Fiesta Gran de Zaragoza (aka Pilars) va la segunda parte d'o programa. Charramos d'o antipregón que organiza Radio Topo lo día 7 d'octubre, d'o concierto de Gaire lo 10, d'a pasavilla de chiflo y salterio d'o 11 y d'o concierto presentación d'a seisena edición de O zaguer chilo lo día 13. Muita cultura, luenga y autochestión en unas fiestas que han d'estar populars.

Recuerda que puez ascuitar toz los programas en Ivoox, Spotify y la web de Radio Topo.

Programa #153

 

¿Qué vale lo Pilar?

¿Qué vale lo Pilar? ¿Cuánto por Ordesa? ¿La maja desnuda, cual ye lo pre? Qué me sé yo. ¿Qué faríanos pa conservar-los? No quiero nian pensar en que a La Seu u a l’Alfacharía le pasase lo mesmo que le pasó a Notre Dame. Me fació firme duelo lo fuego d’a Sierra d’Exulve, lo zancocho d’a espluca de Chaves, la enrona d’Averly… Aragón ye una maquina de destruyir patrimonio, como hemos contrimostrau tantas vegadas. La zaguera, con l’esvoldregue d’a Central Termica d’Andorra que agora tanto se pena y habe bel mes dengún no quereba conservar. Pero creigo que todas las personas podemos entender lo concepto de patrimonio ya que todas tenemos bel paisache, edificio, obra d’arte, etc que amamos y queremos que dure pa cutio.

Lo patrimonio immaterial no en ye menos. Tot lo mundo tien tradicions, relatos orals, festividaz… que quieren que no se pierdan. Los documentals de Monesma lo petan en la nuestra televisión. Las ferias d’oficios artesanos embelecan a a-saber-las personas cada anyo. La sensibilidat existe y ye (cuasi) universal.

Y en tot ixo, una d’as fayenas mas importants que hemos de fer qui amamos las luengas, mas que mas las minorizadas como l’aragonés, ye fer entender que tamién son patrimonio immaterial y que, pa conservar-lo, cal, entre atras cosas, diners.

Porque ixe, l’economico, ye lo principal argumento que s’ha feito servir en contra de que en lo Congreso espanyol d’os diputaus y diputadas se puedan emplegar luengas diferents d’o castellano sin que te clame l’atención la presidencia d’a cambra. Diz que vale perricas los famosos pinganillos y ye verdat. Que se podrían entender todas y toz en castellano. Y ye verdat. 

Criterios nomás economicos y utilitarios que, si s’aplicasen a atras formas de patrimonio, no s’entendería. ¿Cuantos diners vale conservar lo Pilar? ¿Discutimos si pa conservar-lo cal ista u atra actuación u lo deixamos en mans d’os expertos en conservación y arquitectura? ¿No sería mas util, en una plaza tant centrica y gran, un bloque d’edificios, un parking, un hotel u tot chunto? Si s’espaldase una parte, ¿lo deixaríanos enronau u lo tornaríanos a devantar? ¿Prebaríanos d’escusar-nos cuatre duros u invertiríanos tot lo que fese falta con tal de que quedase tant pincho u mas como antes?

La conservación d’o patrimonio ye una cuestión de debat publico y politico. Yo, por eixemplo, m’estimo mas de que s’inverta diners en actuacions que refirmen la conservación d’o patrimonio lingüistico - y lo d’o Congreso d’istos días en ye - que no pas en sinyals chigants d’Espanya que valen mas diners que toz los pinganillos de l’atro día y que no valen pa cosa. M’estimo mas que sobreviva una luenga que s’ha veniu parlando un milenio y que ha teniu la rasmia pa arribar en lo sieglo XXI a pesar de todas las dificultaz d’a represión, la uniformización cultural y nacional y la globalización a que s’adediquen los radius presupuestos culturals d’os lugars a la tortura de vacas. M’estimo mas que s’afirme profesorau pa que la cachimalla pueda fer servir en la escuela la suya luenga a que se faiga un desfile militar pa fer-se la bamba d’os carismos avionez que se trusquen los presupuestos estatals. ¿Vale mas lo pinganillo de Feijóo u lo sable de Leonor? ¿Aporta mas l’uno u l’atro?

Ye un problema social que tot se mida seguntes valura economica. Pero cuento que la mayoría d’as personas entendemos que i hai cosas que no tienen pre. Que la polideza y los sentimientos que provoca son incalculables. Fer veyer que las luengas son muito mas que una simple ferramienta comunicativa ye una d’as mas importants fayenas que tenemos las que las amamos y me pienso que no ye tan dificil si qui tenemos debant tien nomás una miqueta de sensibilidat. 

La siguient fayena, una vegada que qui siga entiende que las luengas son patrimonio, ye que la suya conservación, igual como la d’os edificios, paisaches, cuadros, esculturas… exiche d’actuacions y que, a sobén, ixas actuacions cuestan diners. No vale con deixar lo patrimonio a la bimbola: los edificios s’espaldan, las colors d’os cuadros se malmeten… y tot ixo nomás por lo paso d’o tiempo. Si antimás, i hai agresions continas a ixe patrimonio, lo proceso s’accelera. Si s’entiende que la luenga ye cualcosa a conservar a escape s’entiende que cal actuacions y diners pa conseguir-lo. Y, contino, que ixas actuacions las habrían de decidir personas con la formación y los conoiximientos adecuaus.

Si por lo pre de bel pinganillo se consigue fer entender a la parte d’a sociedat que no lo fa lo que son las luengas antimás de ferramientas comunicativas, bienveniu siga cada euro que se bi invierta. Cada paso fa camín. Agora, a seguir ixamplando los dreitos d’as fablants.

Muito aragonés pa empecipiar lo curso. Tierra de barrenaus 10x01

En acabar lo vrano empecipia Tierra de barrenaus y torna con la suya decena temporada, con firme rasmia y ganas de compartir con todas vusatras las mías basemias, historias y luitas. Han estau meses d'a-saber-las noticias y polemicas. De festivals, conciertos y viaches que darían pa una temporada completa. Pero me quiero mirar ent'o nuevo curso pa prencipiar a treballar antes con antes por la nuestra luenga.

Empecipiamos con un chiquet analís d'a nueva situación comentando l'articlo que publiqué fa bel día aquí mesmo. L'escenario institucional pa l'aragonés ha cambiau prou y lo poco refirme que podebanos asperar-ne no pareixe que vaiga a existir en ista lechislatura, asinas que caldrá treballar en las atras vías.

Ixas que peteniamos muitas terne que terne, encerrinadas en fochar por que los dreitos d'as personas que parlamos aragonés sigan reconoixius. Asinas que doi treslada de cualcunas d'ixas iniciativas: la feria d'o libro aragonés de l'Almozara, la jornada lingüistica d'o Sur d'Aragón y la devantadera d'os cursos de Nogara. Todas convocatorias pa iste mesmo mes de setiembre y bien interesants. 

Torna tamién la sección d'a calaixera y ubrimos lo primer d'os cuatre nuevos calaixos tematicos. En iste caso lo d'a psicocanción, a on que ficaremos temas que charren d'a salut mental. Empecipiamos con uns grans d'o rap que en lo suyo nuevo disco se ubren a tot lo suyo fandom, reconoixendo las suyas errors y recontando-nos como lo pasoron. 

Tierra de barrenaus ya ye aquí un anyo mas pa concarar a qui quieren destruyir la nuestra luenga, ya siga dende l'odio espanyolista, ya siga dende lo blaverismo disvrazau.

Recuerda que puez ascuitar toz los programas en Ivoox, Spotify y la web de Radio Topo.

Programa #152

 

Valar dohaeris

La versión televisiva de Canción de chelo y fuego, Game of thrones, popularizó entre los suyos fans la frase Valar morghulis, que en alto valyrio, una d'as luengas inventadas de propio pa la obra, significa "toz los hombres han de morir". No soi seguro de si la traducción correcta en realidat sería "todas las personas han de morir" ya que, por eixemplo en la profecía de Azor Ahai se diz que se podría interpretar malament, por la diferencia de tratamiento de chenero en la luenga de Ponient y en valyrio y que, en cuentas de parlar d'o "principe que nos prometioron", se podría referir a "la princesa que nos prometioron" en referencia a Daenerys Targaryen. Ixo rai pa lo proposito d'iste post, pero lo deixo por aquí por aquello d'a inclusión, tamién en valyrio. 

La frasecica implió de camín lo repertorio d'os intensos que correban a decir-la con cenyo serio, la tuiteaban y mesmo se la tatuaban. Belún la deciba como sincusa pa chustificar asesinatos. Belatro pa interpretar-lo como una nueva versión d'o Carpe diem y fartar-se de farlopa. Yo siempre lo he visto como un clamamiento a la humildat, mas sabendo que Martin en la suya obra, lo mete en boca d'os hombres sin rostro, que no se puet decir que sigan tot lo día de borina.

La parte menos famosa, tuiteada y tatuada ye la respuesta a ixe Valar morghulis, que ye Valar dohaeris y que significa "toz los hombres han de servir". U "todas las personas" si la mía teoría ye cierta. Lo de servir, a los debantditos intensos, no les fa tanto goyo. Sí que lo he visto, bella vegada, referindo-se a la milicia. Entendendo ixe servir como lo que fan los soldaus u, en cheneral, cualsequier militar debant d'un mando superior. Confunden servir con obedeixer, cuan son conceptos bien diferents.

Levo toda la vida treballando cara a o publico. Prebando siempre de fer la vida un poquet mas facil a qui arriba a la mía fayena buscando lo servicio que dase en cada caso. Pa yo ye bien important ixe Valar dohaeris como lema de vida. Creigo que todas habríanos de pasar por treballos d'ixa mena en veyendo como tratan belunas a las personas que femos ixas fayenas, mas que mas a las cambreras, epitome d'o que parlo.

Dimpués, manimenos, pienso en la educación emocional que recibimos, en tot l'individualismo que tenemos arredol y creigo que talment ixo tampoco no funcionaría. I hai muitas personas poco feitas u disposadas a sentir empatía. Pasa con la mili, a on que los fans d'o Valar morghulis que la patioron, deseyan que la chovenalla d'agora la faiga pa que se joda como se jodioron els. Si s'obligase, por eixemplo, a que todas pasasenos por un "servicio hostelero obligatorio", soi seguro de que pocas aprenderían cosa y que se les seguiría tratando como a la mierda. Deciban que la pasa d'a covid nos faría millors personas y que aprenderíanos la valura d'a salut publica y ya veyez.

M'encantela lo de Valar morghulis / Valar dohaeris, que tanto s'asocia a ixos hombres sin rostro: silenciosos asesinos con toda una filosofía y background creyaus por un d'os millors escritors de literatura fantastica. Creigo que, como en toda buena obra de fantasía, i hai muito que pensar-ie, y ista ye una d'ixas cuestions. Pero i hai vegadas que me foi cruces de cómo entienden beluns lo que yo leigo d'una manera bien diferent. Asinas que valar dohaeris y amabilidat con lo sector servicios, por favor.

Institucions y futuro de l'aragonés debant d'o nuevo escenario. Bella nota

Lo pior escenario electoral se va fer realidat en Aragón y PP gubernará de conchunta con VOX. Sin entrar en atros temas, que atros lo farán muito millor que no yo, creigo que caldría fer bella reflexión sobre lo futuro de l’aragonés y d’os dreitos d’as suyas fabladoras y fabladors. Sobre tot pa que, si la situación ye breu – ¡tan de buen! - no repetir errors.

La magnitut d’o refús.

Me clamó l’atención, de primeras, que las nuestras luengas propias fuesen tant presents en l’alcuerdo de gubierno. Los diners adedicaus a las mesmas son bien pocos, asinas que la enchaquia economica nomás puet convencer a qui se creye toda la faloria de que i hai milenta personas vivindo de l’aragonés u qui desconoixe, por eixemplo, que las academicas d’as nuestras autoridaz lingüisticas no cobran ni un euro por estar-ne. Diz que la luenga no ye de dreitas ni d’izquierdas, y en un plano teorico, asinas ye. Pero la realidat ye que cada vegada que la dreita en Aragón toca lo poder, una d’as primeras cosas que fa ye arramplar con cualsequier paso entabant que s’haiga feito tocant a la desfensa d’as nuestras luengas. Ya pasó con la derogación d’a lei de luengas y la suya sutitución por la lei d’o LAPAO y lo LAPAPYP que los gubiernos de Lambán – con u sin Podemos y CHA – no han quiesto tocar-ne ni una coma.

Entiendo que lo capital politico plega mas por la parte d’o catalán y de tot l’anticatalanimo que i hai entre las militancias y los votants de toz dos partius, porque se me fa que l’aragonés no creya tanto refús. L’argumentario, de feito ye bien diferent. Si en lo caso d’a Francha parlan de que los catalans imposan lo suyo modelo, la mentira que fan servir pa l’aragonés ye que en Zaragoza s’ha creyau una versión «de laboratorio» que no sé quí quiere imposar en l’Alto Aragón, acotolando las modalidaz locals. Argumentos d'un espanyolismo que, bien luent de querer preservar garra variedat local, lo que fa ye trencar cualsequier ferramienta que podamos tener pa desfender-las, refirmaus en iste punto por mas d’un impresentable alleno a ixos partius, por cierto.

Lo zancocho institucional.

Una d’as cosas que mas nos temebanos las activistas ye lo futuro de l’AAL y los suyos institutos. Tasament leva un anyo d’existencia, tot y que s’hese puesto formar y nombrar a los suyos representants fa a saber qué tiempo. Encara no s’ha dau explicacions de porqué se tardó tantismo, pero lo cierto ye que se fació y a la fin tenemos una autoridat lingüistica, refirmada antimás por sectors amplos y diversos. La grafía oficial, lo primer paso que fació, ya ye una realidat a pesar d’as prebatinas d’o Director Cheneral por deixar-la sin efecto, en un d’os movimientos politicos mas vergüenyosos, egoistas y revanchistas que le haiga visto fer a un – teoricament – aragonesista, y n’he vistos muitos. Tenemos dos nuevas ferramientas, autoridat y grafía, que caldrá desfender a tot trance pa que arriben dica una lechislatura con personas decents en los cargos institucionals y no haber de tornar a bastir tot dende los alazez.

Queda tamién en l’aire qué se fará d’as plazas d’as mayestras y mayestros d’aragonés en coles y institutos. Asperemos que lo suyo odio no arribe tant luent, que les pueda mas la galvana u la incompetencia, u que la organización d’as mais y pais de l’alumnau faiga que no les compense.

Doi por perdida cualsequier opción de que programas de tot, u en parte, en aragonés, como Charrín charrán u A escampar la boira continen u reprengan las suyas emisions en Aragón TV. Faría falta prochectos autochestionaus y independients de comunicación audiovisual en aragonés pa que situacions como istas no nos deixen sin referencias d’ixa mena.

De radio, que dengún no se’n faiga, que entre que tiengamos radios libres como Radio Topo u Radio Espiritrompa, astí seremos Tierra de barrenaus, O zaguer ibierno de l’alma y qui quiera y s’anime.

L’activismo organizau

Una d’as mas grans feblezas que tien agora la nuestra luenga ye no tener un activismo organizau, uniu y con capacidat de movilización. Las causas son variadas, embolicadas y ya en he charrau antes, asinas que no entraré en ixo.

Con ixe mal escenario, la buena noticia ye que poco mas puet fer lo gubierno pa acotolar-nos. Ye un problema que tenemos dende habe mas d’una decada y que en istos anyos de DGPL ni s’ha quiesto ni probablement s’hese puesto fer guaire por solucionar-lo. De feito, lo sectarismo d’o Director Cheneral cuento que ha afundau en las nuestras divisions internas como un factor mas d’os muitismos que i hai agora mesmo.

Diz, lo nuevo gubierno, que no i habrá un euro pa las asociacions de l’aragonés y lo catalán. En lo caso de Nogara, igual como atras organizacions, la nuestra dependencia institucional ye cuasi nula. Los nuestros ingresos proceden sobre tot de socias y alumnas, asinas que poco mal nos puet fer en ixe sentiu. Peno por atras asociacions, naixidas u creixidas en istos zaguers ueito anyos que sí que recibiban una parte muit important d’o suyo presupuesto d’ixas subvencions que agora dispareixen. Sisquiá puedan sobrevivir y continar con la suya importantisma fayena.

Lo futuro de l’aragonés.

No me quiero fer canso con un argumentario que he repetiu tantas vegadas que ya m’aburro mesmo d’escribir-lo, pero la clau pa que l’aragonés sobreviva ni ye ni ha d’estar en las institucions. L’administración no va a venir a salvar l’aragonés. Lo fará si las personas que lo fablamos y lo amamos le’n obligamos. Fa falta todas y cada una d’as ferramientas que existen en las luengas, en todas, pa la suya supervivencia. Hemos de desfender las conquistadas: academia, grafía, ensenyanza y mesmo la presencia en la televisión publica. Y hemos de reteixir – no me preguntez cómo porque no lo sé, tot y que bella ideya en tienga – lo ret asociativo y organizativo que fa anyos consiguió levar procesos como Chuntos por l’aragonés u la Coordinadora Aragón Trilingüe, que arroclaba a decenas d’organizacions y millars de personas por los dreitos y las luitas comuns de todas las que queremos que se reconoixca, dignifique y difunda la nuestra realidat trilingüe y los dreitos d’as personas que parlamos las nuestras luengas propias.

Toca no malfurriar tiempos en batallas perdidas, enfortir las organizacions de base, ixamplar l'activismo y la militancia y, con ixo feito, ya arribarán tiempos millors a on que podamos fer servir las institucions pa que en veras represienten la realidat d’o nuestro Aragón, tamién en lo lingüistico.

La chepa d'o puma

Arribau lo verano, vien, en chunto, las polemicas sobre lo turismo, tant masificau en zagueras. Visitadoras y visitadas se concaran en rez. Las primeras, farutes, amuestran lo suyo poder economico, decindo-les a las segundas que viven gracias a lo cauquerré que portan en istos días t’os lugars suyos. Las locals les recuerdan que ixo no da dreito a fer lo que a cada ún le pete, que las campanas suenan a la hora que suenan y que la luenga d’a tierra ye la que ye.

En Sallent, en lo Pirineos Sur, videmos una actuación. Una moceta, de Madrit, presentó una canción destacando lo suyo mesetario orichen y con un discurso, victimista de tot, sobre cuánto se odiaba a las de Madrit difuera de Madrit. Penando por que «en provincias» fuesenos asinas, que ella no se sentiba de garra cabo, que qué yera ixo de «las radices» y cosas asinas. Toda la replega de topicos cosmopaletos. Por empatizar un poquet, cosa que ella no pareixeba disposada a fer con las baturricas que l’ascuitabanos, prebé de solidarizar-me.

A lo cabo y a la fin, no lo tiengo tant difícil, en estar puma y cheposo. La primer condición ye por tener casa en Cambrils, un d’ixos lugarons d’a Costa Daurada catalana que malas que arriban las primeras calors rebuteixe de manyos que, beluns d’os cambrilenses, califican como Putos Manyos y, d’astí, Pumas. Ixe lugar a on que tampoco no he sentiu ixe refús que, de cabo ta cuan, en charran en l’Heraldo. Talment, entre atras razons, porque no soi d’os que entra en la botiga exichindo que le atiendan en castellano. La segunda, la de cheposo, me la dicen en puyar ta Uesca u t’o norte d’o país. Ista sí que la he sentida mas, tot y que bellas poquetas vegadas.

En veyendo las actituz d’os mios conciudadans en viachar, no se me fa raro. Reproducimos, punto por agulla, los comportamientos que en atras partes acumulan a los madrilenyos. Que aquí, en tener tant poco turismo d’a capital espanyola, les gosamos enguerar a vascos y catalans, que d’ixos sí que en tenemos a trompicuesco. No ye una cuestión d’orichen, en ye d’actitut. Ababols, por desgracia, n’i hai por tot. En Madrit, Euskal Herria, Catalunya y, prou que sí, en Zaragoza. De chent que creye que deixar cuatre perretas en bel puesto le da dreito a tratar a tot lo mundo como le pete. Chent que, por un regular, tamién trata a la resta igual en lo suyo puesto d’orichen.

Entiendo los problemas que causamos los turistas. Entiendo lo que i hai dezaga de que me digan puma u cheposo. Prebo, cuan viacho, d’estar un visitant mas que no un turista. De no dar guaire mal y adaptar-me a lo que i haiga, me faiga mas u menos goyo. De que lo nombre d’a mía quiesta y immortal ciudat no s’asocie con la purria que de cabo ta cuan veigo por astí. ¿Lo conseguiré? A fe que no de tot, pero faré tot lo que pueda.

Fa falta muita empatía, cal cambiar ixa ideya tant ixemenada de que si pago tiengo dreito a cualsequier loquería que se t’ocurra. Y cal tamién que s’entienda que, en la mayoría d’os casos no i hai garra motivación xenofoba sino una rebelión contra lo sentimiento – y a sobén realidat – de que mientras la temporada turistica la chent d’os lugars de destino deixa d’estar ama d’a tierra suya.

¿Qué nos pasa a los de cuaranta-y?

Sobre l’escenario de Lanuza un mozo fa beatbox entre que imos entrando en lo recinto. Ye un crack, un maquina, un titán. A lo canto suyo, Rapsusklei aguarda, mirando-se-lo entre que se preta una copa acoflau en un sillón. A l’arreu, va el. Feba sieglos que no l’ascuitaba y me deixa enarcau. ¡Ya que l’hese visto mas vegadas! Tot un espectaclo de rimas y mesmo de baile. «¿Querez ascuitar lo nino d’a selva?» nos pregunta, y lo publico responde con firme estrapalucio. Quita de bel cabo una casqueta d’a on que penchan las suyas miticas rastas, ixas que tiempo habe le furniban d’a inconfundible farcha con que dondiaba por lo barrio. Fa cancions d’antes mas, de cuan el, y yo, y muitas d’as presents yeranos empecipiando a abandonar l’adolescencia. A sobén agarrapizando-la de firme, mirando de que no’n eslampase. Sigue con lo repertorio y nos recuenta que lo pasó malament. Drogas, ansiedat, depresión. Avienta la casqueta con las rastas, remeranza d’un tiempo que ha quiesto deixar astí, en lo pasau, y mirar-se ent’o futuro con la suya nueva manera d’afrontar la vida. Un conciertazo. Tot un trobo.

Los pipas invaden l’escenario y aprestan los cataticos de Los Chikos Del Maíz. Amaneixen con las primers notas d’a canción que ubre lo suyo zaguer disco Yes, future: Ecos de un futuro pasado. I cuentan la mesma historia. Drogas, ansiedat, depresión, sentir que no vales. Sindrome de l’impostor, que le dicen agora. Abaixo me trobo con amigos d’aquí, d’astí y d’allá. Muitos compartimos historias parellanas, con diferents proporcions d’a mesma receta, con lo mesmo agradeiximiento a las terapeutas de a las que mas d’un le debe la vida mesma.

Tornando t’a furgo en charramos y me pregunto por qué tantos d’a mía cheneración imos asinas. ¿Ye por la edat? La crisi d’os 40 ye jodida y no sé si los míos cincuentenos chirmans pasoron por cualcosa pareixida fa diez anyos. ¿Ye cheneracional? ¿Teniemos una choventut y tenemos un present que nos leva ta isto? ¿I hai una component política? A la fin, toz levamos una patacada d’anyos d’antifaixismo pa acabar cremaus y veyendo a la chovenalla fendo-se la bamba de portiar la estanquera en lo maniquiello. La definición grafica de fracaso.

Arribamos en la furgo sin garra conclusión, como de cutio. A nonón, que s’ha feito tarde y manyana i hai día de borina fura. Tament soneye con los días d’a mía varrenada y borinera adolescencia. U talment con los días a venir que, d’una manera u atra, conseguiremos que brilen muito mas que no lo pasau.

Vrano galvanot

Si yes d’as personas que leye a sobén iste blog, que ascuita lo programa de radio u que me sigue en rez, ya habrás notau que en zagueras he publicau bien poco. Podría decir que he iu a saber qué aqueferau con prochectos y costodias. U que yera fendo treballo asociativo que no me deixaba tiempo pa las mías movidas personals. La realidat, manimenos, ye que m’he estau tocando la figa como nunca antes en la mía vida.

Por circunstancias laborals, iste anyo, y pareixe que toz a venir, he teniu seis semanas de vacacions. Que lo maximo que heba teniu dica agora no heba pasau d’os vinte días. Malas que lo sabié, prencipioron a fochar las mías neuronas en lo ciento de fayenas que podría aproveitar pa fer. Me veyeba rematando lo libro que empecipié a escribir fa bel mes, u fendo ixa web que siempre he quiesto fer a on que s’arroclase blog, radio, video, venda de libros y lo que vaiga fendo, u escribindo un ciento de nuevos articlos con que dar ferrete tot l’agüerro, u gravando recursos radiofonicos pa no ir esparpellau tot l’anyo. 

Miau.

Los primers días, que no feba ni pon, m’aturmentaba. Me sentiba un galván, un malfurriador de tiempo, teneba buen rau-rau por no aproveitar toda ixa patacada de tiempo que las vacacions m’ofriban. En una d’as mías frecuents uelladas por instagram me trobé con una publicación d’una dibuixant (lo siento, no la he trobada y no remero quí yera) a on que deciba «normalicemos no fer cosa en vacacions». Por bel día me resistié. No tiengo guaire claro en qué momento, ni por qué razons, pero poco dimpués lo normalicé. Decidié deixar de pensar en los mil prochectos, en lo capitol siguient d’o libro y en lo programa de radio. Me fixé la zaguer semana antes de tornar t’o treballo pa fer lo que se podese y m’adediqué a disfrutar d’o tiempo libre. Tanimientres, a folgazar.

Sisquiá puedo decir que haiga leyiu un ciento de libros, u vistas mil series ni ascuitaus no sé cuantos podcasts. La verdat ye que simplament he aproveitau lo tiempo estando-me con la mía parella, compartindo buenos ratez, en viaches no guaires aluenyaus y tamién por la rusient ciudat.

Cuento que isto tamién tos pasa a muitas d’as que leyez lo blog. Mas que mas a las activistas, que siempre somos pensando en fer «ixa fayena» que imos deixando pa cuan lo treballo nos ampre una miqueta de tiempo. Pero tamién a las que, malas que tenemos un ratico libre, aproveitan pa fer una nyapa de casa u entrenar como si tenesen las olimpiadas a l’atra semana, u emplir de contenius los suyos rez socials.

D’iste vrano me levo muitas cosas buenas: conciertos, libros, viaches y muitos buens ratos compartius con Arale. Pero cuento que no ixublidaré nunca lo vrano que aprendié a estar-me tranquilo zanganiando y sin penar.

Voté, voto y votaré

Nota: Escribié iste post lo 23 J de maitins cuan acababan d'ubrir-se los colechios electorals. Por agora hemos ganau, como poco, tiempo. Ya veyeremos lo que pasa a la fin. En las siguients eleccions, pase lo que pase, tornaré a votar.

Un cartel en lo barrio anuncia una charrada. Lo suyo titol, “Avance de la derecha y crisis del progresismo: ¿cómo hemos llegado hasta aquí?”. Abaixo, los nombres d'os ponents. Mas abaixo, un lema diz “Este 23 J voto nulo o abstención.” Me pienso un rato si ye groma y me fa tentera d'agafar un rotu y relacionar con una flecheta la pregunta y lo lema. “¿Cómo i hemos arribau? Pues votando nulo u abstenendo-nos.”

Sé que ye una falacia y que nomás ixo no responde a la pregunta. Sé que nomás l'acto de votar cambea poco u cosa. Pero tamién sé que votar nulo u abstener-se ye de tot inutil y nomás se consigue, precisament, que la dreita pueda ixamplar lo poder que tien. No podemos, u ye bien dificil de fer, actuar en atrás arias de poder como la mediatica u la chudicial. Manimenos en lo poder politico-institucional sí que podemos influir en que las personas que ocupen ixos cargos, si no decents, a lo menos no sigan nazis.

La batalla por la civilización se libra toz los días y en toz los cabos. Pero en la chornadas electorals no se m'ocurre garra acción que cambee mas la nuestra realidat y la d'a sociedat en conchunto que votar. Lo voto nulo u l'abstención no cambea cosa. No cuenta pa cosa. No se gana res. ¿Qué pasaría si lo porcentache puya tres, cinco, diez puntos? Cosa. A l'atro día lo narco y lo nazi se meten d'alcuerdo pa joder-te la vida un poquet mas entre que leyes, en ixas ringleras que s'adedican en toz los comicios a las curiosidaz que ha puyau lo voto nulo.

Cal desacralizar lo voto. No ye un achuste ni un churamento de fidelidat. No cal asperar a la candidata perfecta y mesianica que nos represiente a lo 100%. Ni sisquiá a lo 90. Como s'ha repetiu tanto en ista campanya, pa ilusionar-te, ves ta Disneyland. Voto siempre. Con ilusión, tasament lo he feito dos vegadas. En istas zagueras, con prou pampurria, la verdat. Por muitas razons que no fa falta que explique porque no aporta res. Voto porque creigo que, estratechicament, nos conviene. Porque qui siga en ixos puestos de poder y chestión me puet fer la vida una mica menos dificil. Voto porque los politicos nomás te fan burro falso si asperas bella cosa d'els. Nomás aspiro a que no me emboliquen mas la vida que prou empandullo tiengo ya. Voto porque lo día d'as votacions ye la cosa mas util que puedo fer, porque no votar no tien mica utilidat. Voto tranquilo, porque si m'entivoco de candidatura u d'estratechia no tiengo garra problema en reconoixer-lo y no voi a pasar mica vergüenya en decir “pues sí, pues m'entivoqué y talment hese caliu que votase a otri. Prebaré d'aprender pa las siguients”.

Escribo isto en la chornada electoral, de maitins, cuan acaban d'ubrir los colechios electorals. Voté fa días, por correu. La ringlera yera bien larga. Creigo que, en cheneral, la izquierda ha feito una buena campanya pa unas eleccions que veniban perdidas, con pocas alufras. Levo los zaguers meses prebando de fer venir a buenas a una patacada d'abstencionistas que dudaban si votar en ista ocasión en veyendo la situación. Sisquiá les haigamos convenciu y cuan leigas isto tiengamos la posibilidat d'un gubierno que no nos embolique mas la vida, que prou empandullo tenemos ya.

Fin de temporada con tamborinada. Tierra de barrenaus 9x22.

Entre las cosas que jodió la tamborinada de l'atro día en Zaragoza, la menos important estió la fin de temporada de Tierra de barrenaus que gravabanos ixe chueves a las 19:00. A los problema pa que arribasen las convidadas se sumó la baseta que s'heba formau en los estudios d'a radio, asinas que calió polargar la gravación. Bien se vale que lo lunes tot fue bien, si fa u no fa y podiemos trayer-tos lo programa que zarra ista novena temporada y con lo que me despido dica setiembre u octubre.

Por lo cambio de calendata bella convidada se quedó sin poder venir t'o programa, pero contemos con la presencia de Tamara, Cherardo y Vero qui, chunto con los audios y solicituz de cancions de Edu, Serchio, Dabi y Cris plenoron iste episodio con una patacada de temazos. Charremos tamién d'os millors momentos personals d'iste curso 22/23 y, por cuestions de tiempo, se nos quedoron difuera muitas atras cosas que querebanos haber feito.

Ya en va mas de 150 gravacions de Tierra de barrenaus. Un programa que en 2024 fará nueu anyos en emisión y que aspero que consiga fer la decada y blincar los 200. Pa despedir, nomás me queda agradeixer a toda la chent que fez parte d'o programa, a las que respondez cada vegada que foi un clamamiento pa que colaborez, a las que lo ascuitaz en cualsequier d'as plataformas y a las que me escribiz pa contar-me lo que tos pareixe. Y, prou que sí, animar-tos a que, a l'atro anyo no nomás lo sigaz fendo sino que gosez fer un programa propio en aragonés, que soi muit solet en las ondas. Fa falta muita mas producción en la nuestra luenga y, lo menos en Radio Topo, las puertas son ubiertas pa cualsequier que quiera embrecar-se en ista aventureta. No cal conoiximientos tecnicos, nomás pasión y ganas.

Recuerda que puez ascuitar toz los programas en Ivoox, Spotify y la web de Radio Topo.

Programa #151

Zarrando la calaixera. Tierra de barrenaus 9x21

Fatin-fatiand van 150 programas de Tierra de barrenaus. Mas de 200 horas d'emisión en aragonés, hereuas de La Enredadera, a on que aprendié a fer radio, de programas como Fendo Orella y A hora charrante que facioron tranya y de todas las companyeras y companyers de Radio Topo que m'aduyan por cada día y de qui contino aprendendo a-saber-lo, no nomás sobre radio.

Iste programa, como ya ye tradición d'as zagueras temporadas l'adedicamos a completar con la cuarta canción los calaixos de cancions que s'han iu ubrindo en la vintena de programas anteriors. Un total de deciseis temas bien variaus en estilos que aspero que tos faigan goyo. Tos convido a participar en ista triga y aportar-me cuals atras cancions hesez esleixiu y tamién, prou que sí, a proposar calaixos pa la decena temporada que, si no i hai garra problema de zaguer hora, empecipiará iste agüerro. 

De calaixos, bi'n ha habiu cuatre. Lo primer, pa la canción buen rollera, ixa que te devanta l'animo en sentir-la, que pretas a bailar y que fa salir lo sol en un día triste. Lo segundo ye pa la canción movilizadera, ixa que parla de manifestacions y luitas y de las personas que las fan. Seguimos lo rolde con la canción pifola, la que charra d'ixa droga legal tant normalizada que ye l'alcohol y d'os suyos efectos. Pa rematar, tenemos lo cuarto calaixo con cancions marxistas a on que replegamos temas que tocan de bella manera lo marxismo, l'anarquismo y las suyas historias. 

La novena temporada no ye rematada. En queda un programa que gravaremos lo 6 de chulio y s'emitirá lo 17. Si quiers venir-te-ne t'a gravación u proposar-nos bella canción, bel tema pa charrar u cualsequier cosa que se t'ocurra, no dudes a fer-lo. Toda la chent que ascuitaz Tierra de barrenaus fez parte d'o programa y queremos que i participez pa aduyar a que l'aragonés contine vivo y se sienta por tot.

Recuerda que puez ascuitar toz los programas en Ivoox, Spotify y la web de Radio Topo.

Programa #150