Finestras aragonesistas

I hai un anuncio en la radio que me clama l’atención cada vegada que lo ascuito. Ye la publicidat menos agresiva que nunca no heba sentiu. No ye nomás que no recurra a las mentiras u que prebe d’asociar con la marca conceptos como “libertat” u “tranquilidat”. Ye que sisquiá informa d’as suyas ufiertas u avantaches sobre la competencia. Ye lo menos publicitario que he sentiu en a saber qué tiempo. Sin slogans, ni claims, ni costodias. L’anuncio diz qualcosa asinas como “si ye pensando en cambiar las suyas finestras, considere la nuestra interpresa como una d’as suyas opcions”. ¿Qué diferencia ufren? ¿Qué tienen millor que la resta? Nunca no lo sabremos. Le falta demandar perdón por molestar a la fin d’a falca publicitaria.

Iste pasau día d’Aragón parte de l’aragonesismo convocaba una concentración baixo la estatua d’o Chusticia de Zaragoza. Lo 23 d’abril ye un d’ixos momentos a on que, con bendición institucional, salimos de l’almario, prenemos la quatribarrada y nos permitimos ixe luxo de amostrar-la un poquet por las carreras d’as nuestras ciudatz y lugars a on que pierde presencia por cada día. Ye un día de remerar lo país, de reivindicar la nación que estiemos, seguimos estando a pesar de tot, y queremos estar. Un d’ixos pocos días a on que nos espolsamos lo miedo de decir que Aragón y las suyas habitants tenemos una serie de dreitos colectivos socials, culturals y nacionals y que no i renunciaremos.

Quan vide, bell día antes, lo cartel a on que se convocaba a ixa concentración, tenié la mesma sensación que con l’anuncio d’as finestras: que les faltaba demandar perdón por l’acto. En letras grans, un “Más autogobierno”. En chiqueta, y antes “A 40 años del estatuto hoy más que nunca”.

Que l’aragonesismo ha reculau bella decada en refirme popular ye indiscutible. Las razons son variadas y dan pa firme debat, que sobrece a-saber-lo la intención d’iste post. Lo que me pregunto ye si rebaixar lo mensache tantismo tien garra utilidat. Levo mas de dos decadas de militancia y ixe mensache de “mas autogubierno” yera viello y feble ya quan empecipié. En Chobenalla, quan nos feba mas vergüenya u prudencia lo d’a independencia, apostabanos por eufemismos como soberanía u autodeterminación que, antimás, sensu stricto, no son lo mesmo. La resta d’organizacions que se definiban como soberanistas tamién feban servir ixe mesmo luengache. Aragón yera un país, una nación. Entiendo, que pa ixo encara me da, que los tiempos son diferents, y que agora lo sentimiento identitario de moda ye “la españita”, que las estanqueras s'ixemenan en los maniquiellos d’a mozardalla y que si convocasenos la mani ixa de “espanyola, au d’astí”, talment no en salisenos vivos. Pero en ixa parte de l’aragonesismo que convocó la mani d’o 23A, y en buena parte d’a que no la convocó (divididos y sin dar batalla, te fuimos perdiendo, país), se ye cometendo la mesma error d’a izquierda de mirar de rebaixar los mensaches pa atrayer mas chent conseguindo en tot caso que la que ya i hai, en marche.

“Autogubierno” ye un concepto tant feble y estirable que lo puet desfender - y asinas lo fa de cabo ta quan - mesmo lo PP. Ye puro rechionalismo d’ixe que demanda infraestructuras viarias y poco mas. Ye lo vasallache que s’aconhorta con chestionar lo que a l’amo no le importe deixar y en la proporción que le permita. Ye un porcentache de curriculo educativo, la competencia de puertos maritimos, la menudalla, los sobradizos…

Astí ye tamién ixa referencia a l’estatuto d’autonomía y lo suyo 40 aniversario. Atra concesión que sisquiá fue por la vía d’as nacionalidatz gracias a Biel y UCD. Un aniversario a on que no i hai cosa a celebrar y muito en qué pensar. Un estatuto que a pesar d’as modificacions, sigue sin reflexar la nuestra realidat en qüestions tant basicas como las luengas.

Soi un aragonesista popiello d’organización. Fa anyos que la mia militancia ye nomás cultural y que no foi parte de colectivos estrictament politicos. Asinas que soi lo target d’ixe cartel, d’ixa concentración, d’ixa convocatoria. Lo de “Mas autogubierno” me deixa tant fredo como l’anuncio d’as finestras y, si no me mirase la parrafiquera de logos d’entidatz que firman lo cartel (beluna quasi unipersonal), mesmo me podría pensar que ye bella mena de convocatoria d’o PSOE que se autodenomina aragonesista entre besada de bandera y desfile militar sin que los suyos socios de gubierno s’alticamen guaire.

Sé que ye dificil, que no son buenos tiempos pa las aragonesistas que nos encerrinamos en estar-ne, que las nuestras diferencias personals y politicas fan quasi imposible que nos chuntemos ni a fer un hordio. Y no tiengo formulas ni elixirs machicos que lo solucionen. Pero me pienso que sí que ye menester ufrir alternativas, con uns mensaches minimos que no nos conviertan en qualcosa folklorica, y a on que la disidencia a la hechemonía d’o espanyolismo ya-no-banal trobe un espacio y una identidat a on que vivir y treballar por un Aragón digno y vivo.

Compatibilizar lo mensache con la emoción ye basico en la comunicación politica. No conoixco a garra persona que la parola “autogubierno”le provoque la mas chicota reacción. Si no se quieren fer servir las debantditas y talment sobreemplegadas soberanía, autodeterminación u independencia, n’i hai d’atras como “dreito a decidir”, y lemas a brozuecos de l’estilo de “un poble en moviment” que, antiparte d’ixa emoción, anyaden un component de clamamiento a la participación popular.

L’aragonesismo no consiguió creixer qüestionando quántos hectometros se trasvasaban si no oposando-se a lo trasvase y a los pantanos que lo permitiban.

De Luco ta Benás y muito cicloturismo mas. Tierra de barrenaus 8x19

En iste nuevo Tierra de barrenaus nos puyamos en la bici y nos n'imos de viache a conoixer una miqueta millor lo país. Pa ixo, nos visita Diego, que feba bell anyo que no pasaba por los nuestros micros, y nos recuenta lo viache que le levó lo verano pasau dende Luco de Xiloca dica Benás - y tornada -en tretze chornadas. Paisaches, chanadas y consellos de man d'un gran aficionau a la bici. Tamién torna t'o programa Tamara, que ha feito viaches arrienda sobre ixas dos ruedas, mas que mas en vías verdas, y que aportará buena cosa d'a suya experiencia.

La bici ye una sobrebuena ferramienta pa conoixer mundo y de man d'as nuestras convidadas sabremos cómo aprestar las cursas, qué levar, cómo funcionan los trens, qué podemos asperar... y nos recontarán las suyas experiencias pa animar-nos a que iste verano faigamos chirar los pedals por los camins, carreteras y pistas d'Aragón.

En la parte mosical tos convido a conoixer Mural sonor, una iniciativa que plega de man de Acción Cultural del País Valencià pa celebrar lo suyo 40 aniversario. Quatre discos que recorren la mosica feita allá y que valen muito la pena. Como eixemplo, la canción que sonará ye una versión d'una canción de Orxata Sound System que charra d'o cooperativismo. 

Recuerda que puetz ascuitar totz los programas en Ivoox, Spotify y la web de Radio Topo.

Programa #126

Filtrar los sonius

Tot leyendo lo zaguer articlo de Carles Terès me vienen t'o tozuel dos fenomenos que se dan en la mía vida arredol d'ixo que charra de sentir y ascuitar. Ye curioso cómo funcionan, u cómo femos funcionar a los nuestros sentius, en iste caso a l'oyiu, y me faría goyo de saber quánto influye ixo en la nuestra personalidat, que cuento que será prou.

Diz Carles que be d'escamallar ascuitar tot lo que pasa a lo tuyo redol. Y no puedo fer que pensar en ixas ocasions a on que me chunto con muitas personas, quan ye imposible que todas sigan en la mesma conversa y, como poco, n'i hai dos u tres en lo mesmo rolde de chent. Me pasa a sobén que no puedo filtrar la resta de dialogos que me rodeyan. Goso estar a la tisva de qualsequier cosa que sienta y me siento incapable de concentrar-me en lo que me diz lo mio interlocutor, por muito que me pueda intresar. La cosa ye mas grieu, prou que sí, si qui me charra me ye fotendo bell tocho. No sería la primer vegada que m'he de disculpar quan qui tiengo a l'endrecho me interpela con un "¿no creyes?" y yo, mirando-me-lo con uellos de "lo he tornau a fer" y royo como un ababol, le he de demandar que me repita lo que deciba, que no m'he enterau. Soi disperso. ¡Qué le voi a fer! Ye un sinyal involuntario de mala educación ixo de no ascuitar, pero ye mesmo pior quan no m'adubo y he d'entrar en l'atra conversa, en la que ye en ixe atro scenario a on que no m'ha convidau dengún, y doi la mía opinión precedida d'un "perdona, pero no he puesto evitar ascuitar-te". Me pasa mesmo quan prebo de leyer y lo mio vecindau, mas d'estar-se por la carrera chugarriando u de capazo que d'a introspección u las actividatz d'interior, creye que ye bueno expresar-se a pur de barruquiar. Igual como quan te vas sondormindo, m'he de leyer lo mesmo paragrafo quantas vegadas pa enterar-me d'o que le pasa a lo protagonista y no pas a lo vecín, y me esmachino a lo personache que siga, entre las pachinas, farto d'haber de repetir la mesma acción, culpando-me d'o suyo déjà vu. Ixo que diz lo mindfulness de focalizar-te en lo present y en lo que se ye fendo se me fa imposible. Si nunca conseguise filtrar tot ixe estrapalucio y todas ixas conversas allenas, ¡tot lo bien que quedaría con las amistatz y quántos libros mas me leyería!

Charra tamién en l'articlo de dos menas de rudios que siente entre que lo escribe. Un, lo d'os muixonetz que, pifolos de primavera, fan los suyos cantars. L'atro, lo d'una moto de montanya que trenca de manera violenta la paz y la calma d'o mont. M'identifico a-saber-lo con ixe refús a las motos y los suyos sonius escatumbadors. En lo mont, y tamién en la ciudat, a on que se barrachan con los innecesarios chiflos d'os autos que fan sonar chent que, por un regular, los pretan por problemas que mica tienen a veyer con lo trafico. No creigo que i haga guaires personas a qui les agrade ixe escatapurcio. Pero descubrié, charrando con la mía parella, naixida y creixida en lo mundo rural, que las diferencias entre ella y yo quanto a los sonius d'a ciudat, yeran bien funda. Tiengo, en lo mio sistema de percepción, bella mena de filtro que fa que, por un regular, no sienta la mormor d'os autos. Que pa que lo trafico me moleste haiga de tener una intensidat difuera d'o normal. Me tien igual estar-me en un velador con totz los autos pasando-me a un metro. No los siento. No me fan estorbo. Nian m'entero de que i son. Manimenos ella siempre se va mirando bell puesto en una peatonal u parque a on que los motors sigan tot lo luent que se pueda. De revés, quan pasa-mos bella nueit de camping, u dormindo por astí en lo mont, ye lo suyo oyiu lo que filtra. Me pasa a sobén que me devanto de maitins y, quan prebo de tornar a dormir-me, ixe ratet mas que totz queremos fer de vacacions, no foi que ascuitar a bell muixonet que ha decidiu d'estar-se piulando a lo canto d'a on que dormimos. Con las cholibetas, ixe bubón chicorronet que fa un piu con bella cadencia de nueitz, me torno varrenau. Me pienso que me cal dormir-me entre dos pius porque cada ún que fa se me clava en lo tozuelo entre que la mía parella ya va, toda tranquileta, por lo tercer suenio.

Cuento que, como tantas atras cosas, tot ixo se puet entrenar. De feito, con la primer qüestión, levo tiempo prebando de concentrar-me nomás en lo que soi fendo y no en tot lo que pasa arredol de yo. Manimenos no sé si garra día podría cambiar-le a Arale lo mío filtro pasabanda y que podese obviar yo lo piular d'os paixariquetz y ella l'estrapalucio d'os motors.

Os fillos d'o Sobrarbe y mas. Tierra de barrenaus 8x18

Las vodas d'Isabel podioron, dimpués d'istos tiempos de pasa, celebrar-se con bella miqueta de normalidat. A la fin las carreras de Teruel tornaban t'o sieglo XIV y tornaban totz los personaches que tanto hemos trobau a faltar. Y entre ixos personaches, prou que sí, todas las gaiteras que tanto nos fan bailar por la ciudat seguindo las suyas pasavillas. Os fillos d'o Sobrarbe levan ya quantos anyos con presencia cutiana en ista y atras fiestas pareixidas. Fa poco, las suyas cancions han pasau a disco baixo lo titol de O camín d'o dragón, un treballo que a escape nos leva ta ixos scenarios. Charramos con Dani, un d'os suyos components, que nos presienta iste album.

Antimás, la tornada de l'actividat s'ha notau a-saber-lo en la vida cultural y asociativa d'a ciudat y lo país. Asinas que completamos lo programa con cronicas d'as noticias que bi ha habiu y quantas convocatorias que vendrán. La parte mosical, sin tener-lo planeau, m'ha saliu bien valenciana, pa no variar. Ascuitaremos cancions d'os nuevos discos de dos d'as mías bandas favoritas d'ixe país. Y mesmo en la canción d'o calaixo friki, se cuela unatra d'ixas bandas con una canción distopica, robotica y socialista.

Recuerda que puetz ascuitar totz los programas en Ivoox, Spotify y la web de Radio Topo.

Programa #125

 

Mosica, rabia y amor con Fongo y Xavi Sarrià

Foto: Chuan León

Yera un dia que rebutiba convocatorias antifaixistas y culturals. Lo maitín heba arroclau a a-saber-la chent pa celebrar en Torrero una Fiesta d'o sol que ya feba firmes ganas dimpués de tot iste tiempo. Luent d'astí, en La Granja, atra patacada de personas se chuntaba pa lo Mundialito Antirracista que feba la suya XIV edición. Con muitas d'as asistents nos chuntabanos de tardes pa asistir a lo tercer gran evento d'o día: lo concierto de Fongo y Xavi Sarrià adintro d'o ciclo "Vagón de lujo".

Un concierto que me feba ganas arrienda. D'una man, Fongo ye una banda que m'encantó dende lo primer momento que los sintié y que, manimenos, nunca no heba puesto veyer-los en directo por diferents razons. D'atra, lo nuevo disco de Xavi Sarrià ye unatra chesta en la ya ampla carrera d'o mosico y escritor que yera en candeletas por ascuitar. Un treballazo que, tot y seguindo la continidat d'os suyos anteriors discos, fa evolucionar lo suyo soniu, que en cada chira introduz nuevos elementos.

Fongo ubrioron lo scenario d'o Centro Civico Delicias con lo suyo soniu barrachau d'un ciento de mosicas. Sobre las tablas, una decena larga de grans mosicos nos trayeban la suya propuesta. Letras reivindicativas, sonius mestizos y muitas ganas de minchar-se lo mundo. Los uescanos nos devantoron y faciemos los primers bailes d'a nueit entre que barruntabanos que son los necesarios hereus d'atras bandas como Ixo Rai u Mallacán. Fongo ye una d'as collas mas prometedoras d'a scena aragonesa y los dos suyos primers discos son buen eixemplo d'o que pueden fer.

Dimpués d'a radida horeta que tocó Fongo yera lo turno de Xavi Sarrià. Entre las suyas fans mas furas bi heba niervols a embute. No soi feito a veyer-lo en Zaragoza tot y haber estau present en las dos vegadas que vinió con Obrint Pas de man de A Enrestida y la que vinió chunto con Feliu Ventura de man de Nogara pa las Chornadas d'as Luengas d'Aragón. 

La fredor d'o publico zaragozano eslampó de camín con la primer canción d'o concierto. La nueva banda prochecta enerchía pa iluminar la ciudat entera. En lo suyo centro un Xavi Sarrià que fa muitos anyos que domina la scena y que nos fació blincar terne que terne. En lo repertorio temas nuevos y viellos, d'a colla d'agora y beluna d'Obrint Pas. Las cancions nuevas suenan de pistón. Beluna entró de camín en lo mío listau personal d'himnos. Lo material audiovisual d'a chira anterior torna en ista en un formato mas chiquet que anyade potencia a los mensaches que sentimos en las letras d'o valenciano. Xavi tenió parolas pa las nuestras luitas, alcordando-se d'os seis antifas, chilando qualques Entalto Aragón, fendo referencia a l'aragonés y a Nogara y remerando a Ixo Rai, Mallacán y mesmo El corazón del sapo. I habió momenticos d'emoción, quedando-se solo sobre lo scenario pa fer la primer parte de No tingues por. Y acabó, como en tantas atras ocasions, con ixa Flama de tot un poble en moviment que nunca no s'amortará.

En Causa, lo suyo nuevo disco, i hai uns versos que dicen "... y sentimos que la vida ye ixo: mosica, rabia y amor, los nuestros refuchios en los días de foscor". Iste sabado sintiemos precisament ixo: la mosica, la rabia y l'amor que se transmitió dende ixe Centro Civico y que nos aduya por cada día a seguir luitando por lo mundo que queremos. Las aragonesistas y las antifaixistas aprecisamos mas nueitz como ixa, a on que los nuestros mensaches y la nuestra manera de sentir la tierra se sientan, y a on que podamos trobar-nos y compartir experiencias y vivencias.

Adios a los setiembres

En los anyos que pasé en la universidat, muitos mas d'ixos en los que se suposa que habría d'haber rematau la mía carrera, pocas cosas movilizaban mas a l'alumnau que que les tocasen las convocatorias. T'a part d'alavez luitabanos porque se mantenese la tercer convocatoria que, en lo caso d'a mía escuela - la EUITIZ, que dimpués formaría chunto con lo CPS l'actual EINA - yera en lo mes d'aviento. Sí, tenebanos una tercer convocatoria a metat d'o primer quatrimestre, lo que sí que yera buen empandullo administrativo. Como con tantas atras cosas, las nuestras movilizacions no consiguioron lo suyo obchectivo y ixa tercer convocatoria ya ye nomás en la memoria de qui pasemos por las aulas universitarias en aquellas envueltas. Con tot y con ixo, las campanyas en la suya desfensa arrocloron a muitas alumnas que no gosaban protestar por res.

Fa bell día, unatra convocatoria d'examen se vulcaba. Los setiembres pasan a chulio por decisión d'o Consello de Gubierno d'a Universidat de Zaragoza y en contra d'a opinión d'a immensa mayoría d'estudiants. Las declaracions d'o rectorau, ixa condescendencia de "ye por lo vuestro bien", me recuerdan tantismo a ixe lema d'o despotismo ilustrau, que se podría reversionar como "tot pa los estudiants pero sin los estudiants". Sabemos, y saben, que en son en contra, d'ixa decisión. Y lo sabemos, y lo saben, porque no en fa tanto, en 2014, se fació una consulta popular en la universidat que perdioron tot y estar trucada. Se exichiba un minimo de participación d'o 30% quan en la mayoría de procesos electorals (claustro, rector, etc.) ista no gosa blincar ni d'un 10%. S'aprecisaba un voto a favor de mas d'un 60% pa mantener la convocatoria, pero no pas pa sacar-la. La campanya de propaganda que se fació dende rectorau estió bien fura. En la web "informativa" institucional amaneixeba un eterno listau de razons pa votar en contra de mantener los setiembre a lo costau d'una breu enumeración de bellas poquetas razons a favor de que seguisen. Con tot y con ixo, las estudiants respondioron a la convocatoria y votoron masivament. La participación quasi duplicó lo minimo quedando en un 53% y lo voto a favor d'os setiembres pasó d'o 80%. Lo rectorau perdió por goleada y habió de reblar y aguardar dica 2022. Agora ya heban aprendiu y decidioron quitar-se la careta de democraticos y participativos y gubernar como lo fan con toda la resta de decisions que se prenen en la universidat, ignorando de tot a lo suyo alumnau.

Lo día d'antes, bella centena d'estudiants pasaban nueit en l'Interfacultatz pa protestar. Ixe mesmo día interrumpioron lo Consello de Gubierno. Todas dos accions visteras y chustas pero que no consiguioron fer cambiar d'opinión a un organo que no les tien ni miedo ni respeto. Una vegada mas los estudiants no son - como no en yeranos nusatros - conscients d'o poder que tienen. En la universidat "viven" bellas 40.000 personas d'as que lo 90 % son alumnau. Si deciden que qualcosa no se fa, NO SE FA. Una vaga estudiantil de tres días, con prou seguimiento, hese estau prou pa vulcar las intencions d'o rectorau. Pero ¿qui la convoca y cómo se consigue ixe seguimiento? Me pienso que, por desgracia, ye agora mesmo imposible igual como en yera quan estudiaba yo.

I hai dos condicionants basicos. Lo primer ye lo perfil cheneral de l'estudiant universitario. En lo caso d'a publica i hai muitismos integrants d'ixo que claman clase meya aspiracional, que s'han creyiu toda la charrameca sobre la meritocracia y l'ascensor social. Que creyen que si faltan un día t'as clases perderán ixe saber tant important que les separará d'a purria que nos aconhortamos con treballos de rango inferior. Chicotz AlbertRiveras y InésArrimadas que no paran cuenta de que son ferramientas en mans d'as elites. Ixas elites que, manimenos, ya tienen lo suyo propio circuito d'estudios, por un regular bien aluenyau d'as universidatz publicas. L'individualismo en la universidat ye mesmo mas furo que en la resta d'a sociedat, habendo convertiu una institución que s'habría de caracterizar por la colaboración pa la creación de conoiximiento en bella mena de Chuegos d'a fambre a on que, si cal, se chafa a qui tiens a lo tuyo costau. N'i hai excepcions, prou que sí. Y muitisma solidaridat, refirme mutuo y organización. Pero ixo ye, como digo, la excepción, no pas la norma.

L'atro condicionant son las caracteristicas d'as organizacions estudiantils mas grans. Quan yo estudiaba, y ixo veniba de muitos anyos antes, la principal y que mas representación teneba yera EDU, lo brazo estudiantil d'o sindicato UGT. Lo suyo papel yera vergüenyoso a tantos nivels que se podría fer un blog nomás pa recontar historias d'a pampurria que feban. Cuento que ixo no habrá cambiau guaire. La suya actividat se pareixeba mas a un club d'ocio y tiempo libre que a la d'un sindicato estudiantil. Un poquet como lo suyo homologo laboral, d'atra man. Lo suyo programa electoral, copia y pega d'as mesmas demandas anyo sin atro, se podeba resumir en "mas cosas buenas, menos cosas malas" (mas becas, menor pre d'as fotocopias, p.e.) sin prebar de fer garra cambio estructural. Lo suyo caracter de PSOE estudiantil plegó a lo nivel de fer concentracions a favor d'o gubierno en los tiempos de ZP. Lo suyo exito veniba d'ixe caracter de club de tiempo libre a on que se formaba una gran familia estudiantil que s'adedicaban a la borina y a on que, en tener una ideolochía practicament nula, totz en podeban fer parte sin mica compromís. Chunto a ixe EDU, la resta de sindicatos nunca no tenebanos la mesma presencia mediatica ni muito menos lo refirme economico y lochistico d'as nuestras organizacions referents. Febanos lo que podebanos con uns medios radius y minima atención mediatica. I heba un terger grupo d'organizacions que yeran agrupacions de facultat u independients con un mensache mesmo mas esbafau y sin mica recorriu ni capacidat d'acción dillá de conseguir bella reivindicación puntual de bell problema local y que gosaban meter-se de costau en que se parlaba de problemas mas amplos.

La participación estudiantil en las eleccions d'os suyos representants ye radida y pocas vegadas supera lo 10%. Pero, pa forro de bota, la mayoría d'ixos votos no son en conciencia, sino que votas a fuleno u mengueno porque i ye una amiga tuya que te leva d'a orella a que fiques lo papelot en la urna. Lo sé de primer man porque m'ha tocau de fer-lo. 

Con ixos vimbres, que cuento que no habrán cambiau mica, ye imposible d'endrezar una movilización masiva en la universidat. Me clamó l'atención -pa mal - en la noticia d'o Heraldo, la reacción de dos organizacions d'a dreita estudiantil. Todas dos teneban representación en lo Consello de Gubierno, que ye bien dificil d'entrar-ie asinas que m'entrefilo que habrán teniu buen capazo de votos. Que i haiga dos sindicatos fachas en lo CdG ya ye pa preocupar. Sobre la entrada d'os estudiants en la votación pa protestar deciban que "no yeran trazas". La representación estudiantil en la universidat ye de tot cosmetica, un teatret pa que la institución pareixca una mica mas democratica. Lo porcentache d'alumnau en totz los organos siempre ye minimo, fendo obligatorio que pa fer qualsequier cambio haigan de contar con lo profesorau ya que ni sisquiá con lo refirme d'o Personal d'Administración y Servicios pueden tener mayoría. Pero ye que antimás se ye perfectament conscient de que no tienen un poder real de movilización por lo que las demandas d'as organizacions d'estudiants muit pocas vegadas s'ascuitan. Decir que "no son trazas" ye la rematadera pa uns suposaus representants d'uns estudiants que no tienen atra manera de fer que la suya protesta tienga la minima positibilidat d'ascuitar-se.

Ye dificil calar en la educación superior seguntes que mensaches, adintro d'una sociedat despolitizada, desmovilizada y individualista que malfia d'as organizacions politicas y sindicals. Pero una cosa tant caboliosa como los setiembres, con una utilidat que garra alumno no discute, me pensaba que yera una sobrebuena oportunidat pa que l'alumnau se movilizase y contrimostrase lo suyo poder real, que no ye en un porcentache d'os claustrals ni en las perras d'as muyas matriculas, sino en lo suyo numbro y potencial capacidat organizativa. L'estudiantau ye, y siempre será por definición, lo colectivo mayoritario en la universidat, pero sin ixa organización siempre fará lo que le pete a ixa chicota elite que decide lo que ye millor pa ells sin contar con ells. Y tanimientres, la quinceemera consellera d'universidatz a atras cosas. Talment ella l'aprebase tot en chunyo.