Liderazgos en Aragón

No sé si pasará en todas as cuchas, pero en l'aragonesa, que ye la que me conoixco bell poquet, bi ha una liderfobia que, en ocasions ye preocupant. No seré yo qui esfienda os liderazgos ni os personalismos, pero creigo que a soben nos somos entivocando y fallamos l'enemigo. As liders y os personalismos tienen avantallas y inconvenients. Hemos de saber como sacar treslada d'as primers y minimizas os mals derivaus d'os segundos.

Ta prencipiar, creigo que garra movimiento social u organización puede alazetar-se en una u bellas poquetas personas si quier medrar. Encara que siempre cal, u ye inevitable, que bi haiga tozuels más visters, os movimientos socials han de tener una base gran y firme y saber arroclar chent arredol suya. O caso d'as prebatinas de partius aragonesistas difuera de CHA ye un eixemplo. Puyalón ye l'unico que ha sabiu creixer, en tener ya d'antes una base de militancia y simpatizancia important. Tierra Aragonesa u Estau Aragonés, astí continan.

Bi ha, antimás, problemas derivaus d'una dependencia masiau fuerte d'una cara u d'una lider. O caso d'a CHA labordetiana en ye tamién un eixemplo. Una parte muito important d'os votos de CHA veniban d'un liderazgo (no organico, ta forro de bota) exerciu por Labordeta (avantalla), pero de vez, íste, se pasaba a soben por l'arco d'o triumfo lo que deciba lo partiu u bellas partes d'o mensache politico que se suposaba que esfendeba CHA (autodeterminación, luengas u mesmo a reforma educativa de Zapatero, ...). Mientres totz os anyos de dependencia labordetiana, CHA no sabió construyir un atro liderazgo "carismatico". Bernal, que estió lo más parellano, teneba firmes problemas en o suyo discurso. D'una man yera masiau "intelectual" en seguntes que temas y, d'atra masiau feble, en o socialdemocrata y o rechionalista, ta muita d'a base electoral d'o partiu. Talment pasaba masiau tiempo aintro d'as Cortes y no viyeba lo que se cocinaba dillá de l'Alfachería.

Charrando ya de cucha más alternativa, qualsiquier que leve militando quatre diyas en Zaragoza u Aragón, conoixerá tres, quatre, cinco u una dotzena de caras bien visteras, que son por tot. Muitas, en viyer seguntes que acción u convocatoria, ya sabemos de qui estió a ideya, sin mirar-nos ni qui convoca. A soben istas personas no son guaire vincladas a un prochecto concreto, u son estadas en (u amán de) arrienda d'ells. Precisament son istas personas as que, quan prencipian procesos de compleganza d'a cucha, gosan postular-se como portavoces, caras visteras u, si ye un proceso electoral, capezas de lista.

As avantallas d'un liderazgo "carismatico" son, en a mia opinión, evidents. A la fin, por muito razonables que sigamos todas, as grans manifestacions y movilizacions plegan quan bi ha elementos simbolicos, emocionants u sentimentals. ¿Yera más grieu o trasvase de l'Ebro que muitas atras cosas que nos han feito en Aragón? ¿Estió más grieu l'asesinato de Miguel Blanco que qualsiquier atro? No, pero tocoron elementos simbolicos u sentimentals. ¿Sería lo mesmo a revolución zapatista y hese conseguiu tantos refirmes arredol d'o mundo sin a poesía d'o Subcomandante Marcos?

Un buen carisma y un buen liderazgo carismatico precisament ha de adhibir a las razons que tienga lo movimiento politico, cultural, ideyolochico,... l'elemento simbolico-sentimental. Saber comunicar ye a soben tant u más important como lo conteniu d'o que se comunica. Eixemplificando, en una d'as manifestacions d'as vagas chenerals que feban os sindicatos no-d'o-rechimen, salioron 5 u 6 representants de cadagun d'as organizacions que convocaban a recontar a suya peli. Totz os discursos deciban si fa u no fa, lo mesmo. Pero de totz, o d'a CNT lo fació como cal fer-lo. Sin papels, con rasmia, con emoción, sabendo fer as pausas, sabendo inviar un mensache de victoria y rebeldía sin autocomplacencia. En sentir-le, tenebas ganas de continar luitando a l'atro diya y no pas a impresión de rutina que bi ha en tantas y tantas manifestacions, que más que una mani pareixe una procesión. A resta, en mayor u menor mida, yeran a scenificación de "lo que siempre femos".

Un discurso emocionant pero vuedo no ye cosa, prou que sí. Igual como un discurso perfectament estructurau, lochico, racional, etc... no plegará ta garra cabo sin ixe component simbolico-emocional. En saber tener os dos elementos en a suya chusta mida, i ye a virtut.

A lo que iba, antes d'esbarrar-me en iste post tant desordenau, yera ta l'actitut que tenemos en Aragón ent'os "liders socials", u a sola cosa que se m'ocurre que podríanos clamar "liders socials" (y todas as que sotz "en l'allo" sabetz de qui charro). Ixas personas, igual como toda la resta, son de tot imperfectas y tienen os suyos defectos y virtutz. Simplament, no tienen miedo u mesmo les fa goyo dar la cara si cal debant d'os meyos u menar as reunions, u empentar iniciativas de compleganza. U mesmo les fa goyo. No veigo qual ye o problema en ixo. Prou que qualsiquier lider, u prebatina de lider, ye criticable. Pero con razons. Veigo masiau a soben como se les critica por egocentrismo u por un suposau "afán de protagonismo". Y sin garra razón más. ¿Fulanica u menganica ha feito cosa mal? Critiquemos-le alavez. Yo seré lo primer. Yo he estau lo primer en fer-lo. Pero criticar a un portavoz, capeza de lista, lider mediatico u como queramos clamar-lo, precisament por exercer ixe papel me pareixe, antimás d'una error, una entivocación estratechica. Todas, en os movimientos socials, tenemos un papel qué fer, cosas que nos fan goyo de fer y cosas que, por aptitutz y actitutz podemos y/u debemos fer. Cadagún ha de trobar a on ye millor personalment y a on fa más honra a os obchectivos d'ixe movimiento social.

Coordinar, dirichir, menar u como lo queramos clamar, una organización, movimiento, plataforma, etc... ye una faina prou poco agradeixida. Prou que da bella satisfacción de cabo ta quan, pero por un regular no fa que embolicar-te a vida. Estar a cara vistera d'ixo ye un doble marrón, porque antimás d'o treballo "normal", bi ha, a lo menos por lo que yo he visto, toda una plevia de criticas de baldes. Ta forro de bota, antimás ixas criticas plegan de qui nunca no sería dispuesto a fer-se vistero u a encapezar un movimiento, u, pior encara, de qui le cuacaría de fer-lo, pero no le deixan.

Creigo que habríanos de cudiar más a las nuestras liders. Aprofeitar tot lo que tienen de bueno, que'n tienen y muito, sin permitir-les ixublidar que son astí simplament ta levar a voz de todas y totz t'a on que calga y ta fer ixe rol, tant incomodo por un regular, de dar la cara. A lo menos, caldría que les n'agradeixcamos a chent que no nos fa tanto goi u que no somos tant capacitadas ta fer-lo.

Creigo que o capitalismo y o neoliberalismo son agora mesmo en un d'os suyos millors intes. Son implantando toda una revolución con muitos menos problemas d'os que habrían de tener. D'ixo, y d'as razons por lo que creigo que son ganando, en charraré si consigo organizar as mias ideyas. Pero una d'as razons ye porque, a soben, refirman muito más a "los suyos", liders y bases, d'o que femos en "as cuchas transformaderas" (u como lo quieratz clamar). No podemos estar terne que terne chitando mierda a qualsiquier que devante o tozuelo ta prebar de liderar cambios, ni cacegar-nos en debatz absurdos sobre, por eixemplo, a solidaridat que habríanos de tener con qui le preta fuego a un contenedor u estricalla o veire d'un banco. ¿Autocritica? Prou que sí, muita y perén. Pero con talento y estratechia. Entre o "KimJongIlismo" y o lidercidio, bi ha una patacada de camins intermedios.

Top fateras: Holosintesis, orgonitas y 432 Hz

Dende fa un tiempo me cuaca de fer "colección" d'as fatezas más grans que me voi trobando u me van recontando as mias amistatz magufas u escepticas, u qui simplament saben que me fan goyo istas cosetas. A ormino me quedo sin sangre en a pocha en viyer a cantidat de fatezas que se puede plegar a creyer a chent, y a graniza cantidat de timadoras que bi ha por tot. A mayoría d'ellas se viyen que'n son a kilometros y bi'n ha belatras que no pas tanto, pero que no aguantan ni dos minutos d'analís. Ixe menester que tien a chent de creyer en cosas, que nunca no he entendiu, y o feito de que a mayoría d'a chent no tien uns minimos conoiximientos d'os fundamentos scientificos, unius a la falta de capacidat critica a l'hora de leyer qualsiquier noticia u texto, fan que istas cosas continen espardindo-se.

De todas las que he replegau en zagueras, en he trigau istas que tos comento, ta que nos podamos fer unas risas, u unos ploros, pendendo de l'estau d'animo que tiengatz quan lo leigatz.

Holosintesis: A homeopatia en imachens. Ya nomás o titols tira fuerte. O timo d'o timo. A definición tien totz os elementos propios d'istas fatezas: "Holosintesis ye una mena de medicina vibracional basada en disenyos, que fa servir imachens d'elementos d'a naturaleza, components bioquimicos, principios activos de fitoterapia y de farmacolochía, tractadas matematicament con estructura de cheometría sagrada". Analizar a frase tranquilament. Aturatz-tos en cada parola. No tien mica sentiu. ¿Cheometría sagrada? ¿Medicina vibracional? Muito gran. Completan a descripción con atras expresions que pareixen scientificas a tot qui no ha leyiu un libro de sciencia en a suya vida: "efecto de bioresonancia sobre a memoria celular" "patrón natural d'equilibrio", "sanación de estructuras", "paquetz d'información", "ambito fisico-celular", "nexo entre lo fisico y lo psicoenerchetico", "reequilibrio bioenerchetico" y asinas asinas.

Basicament, s'adedican a vender apegallos, alfombretas ta ixoriguetz y cosas asinas con unas colors muito pinchas. Tamién fan videos absurdos con ixos disenyos a on que "limpian l'augua d'a nuestra planeta" (basau, por cierto, en Masaru Emoto, inventor d'a memoria de l'augua), y te "tractan con o dibuixo basau en a Estevia y atras plantas. (a estevia ye pegando fuerte estianyo, eh?). Basicament ye una traza de vivir a pur de vender uns dibuixetz feitos con o spirografo y bell poco de photoshop.

Tamién lo barrachan ¡como no!, con o budismo y os mandalas, atra fateza que'n charraré bell diya.

Orgonitas: (No trafucar-se con os Gorgonitas, sers que saliban en a cinta Small soldiers) Ista la conoixié fa poco, pero m'encantó tamién por o suyo potencial comercial. A historia ye que un psicoanalista d'os anyos 30, Wilhem Reich, se inventó bella mena de Fuerza (igual como a "Force" de Star Wars u a lo que mientres muitos sieglos se creyó que yera l'eter, que no tien masa y ye omnipresent y que nos influye a todas. Ixa enerchía-substancia clamada orgón (que vien de vez de as parolas orgasmo y organismo), puede estar mala, pero con uns dispositivos, clamaus orgonitas, se transforman as malas vibracions en orgón nuevo que fa que a enerchía siga buena y tal. A orgonita se fa basicament con cuarzo, filo de cobre, raspaus de aluminio, una resina y poco más, y se vende muito bien, por lo que se viye. Prou que dengún no ha trobau nunca garra indicio de que ixo valga ta cosa, pero ¿qui quiere a verdat dimpués de gastar-se 90 euros en una piramide de colors que te saca o mal rollo de l'ordinador?. 

A parti graciosa ye que, por eixemplo, sirve ta luitar contra os chemtrails (y contra os unicornios vampiro cuento que tamién). A parte no tant graciosa ye que tamién meten que puede curar o cancer, asinas que en a mia opinión, cada vegada que una pachina asegure u insinue sisquiá ixo, qui lo haiga escrito habría d'estar imputau por un delito contra la salut publica.

LA a 432 Hz: Ista zaguer la descubrié fa poco y ye la que me ha feito escribir iste post. Ye una teoría conspirativa que diz que Goebbels (sí, o nazi) fació cambiar o standard d'a nota LA ta que pasase d'estar afinada a 432 Hz a 440 Hz. T'as enfensoras d'ista teoría, o feito de que a mosica se afine a 440 Hz fa que nos sintamos cansadas y tiengamos malestar "porque os armonicos d'a mosica no encaixan con a frecuencia vibratoria d'o ser humano". A frecuencia d'a Tierra ye, seguntes ellas, 8 Hz. 440 Hz no ye multiplo de 8, pero sí 432, asinas que prometen que, si afinas os instrumentos mosicals prenendo un LA de 432 Hz "os tuyos atomos y l'ADN prencipian a resonar en armonía con a espiral de PHI d'a naturaleza".

Conspiracions nazis, frecuencias de vibracions y a naturaleza. Teneba totz os elementos, pero ista historia yera bien curiosa, porque yo tampoco no teneba guaires conoiximientos de mosica y de cómo s'afinaba. Bien se vale que, en tres pachinas serias ya te trobas con a historia de l'afinación. A frecuencia de 432 Hz no nomás no s'ha feito servir nunca como afinación t'o LA, sino que sisquiá se fa servir agora, a efectos practicos a de 440 Hz, encara que siga la oficial a efectos scientificos y legals. A finals d'o XIX y prencipios d'o XX yera fixau en 430.55 Hz. Prou que totz ixos efectos malos ta sociedat no los ha comprobau dengún nunca y Goebbels prebablement ni estió en a conferencia que decidió estandarizar o LA a 440 Hz en 1939.

As reptialianas son entre
nusatras...

No soi un gran scientifico. No soi ni scientifico. Soi un simple auxiliar administrativo que le fan goyo istas cosas y que tien una mica de sentiu común, curiosidat y capacidat t'alufrar as cosas. Siempre que veigatz qualsiquier cosa que sone bella mica raro, que charre de sciencia dende una pachina no scientifica, que prometa curar cosas que se suposa que no tienen cura u que charre d'una embolicada conspiración, aturatz-tos un inte un pensar en a lochica d'ixo. Miratz bella pachina más, preguntatz a las vuestras amigas scientificas, etc... Por un regular, si metes en google o nombre d'o timo en qüestion y as parolas "esceptico" u "timo", tos apareixerán as atras anvistas. Por desgracia, por un regular, si meter en google nomás o nombre d'o timo te apareixen os cientos de pachinas que copian a la primer fuent u que venden os hologramas, as orgonitas u lo que sía...

Tos deixo bells vinclos ta que les fayatz una uellada:
Holosintesis
Sobre as orgonitas 
A conspiranoia d'os 432 Hz, y as explicacions historicas en Cienciarte y La mentira está ahí fuera.

Cuento que iste ye o primer post d'una serie a on que iré penchando atras fateras y enganyufas que veigo por astí. Si queretz inviar-me-ne beluna podetz escribir-me a tierradebarrenaus@gmail.com. Si tenetz prebas de que sirven ta bella cosa, escribitz-le millor a James Randi, qui ufre 1.000.000 de dolars a qui lo faya.

Exercendo lo pasquinismo 010: Heraldo catalanofobo, naipes y libros de texto

O Heraldo ye tot un clasico en o pasquinismo. Talment truquen más o ficacio as portaladas de ABC u La Razón, pero Heraldo, encara que muito más sutil, ye un d'os reis d'o pasquinismo. Ixo sí, siempre contra Catalunya y lo catalán, y por a indisoluble unidat d'Espanya. Heraldo y o nuestro gubierno aragonés tienen como doctrina cultural y lingüistica a la FACAO, que ye como tener a Hitler d'asesor t'a convivencia u a la ilesia cristiana fendo a politica sexual y reproductiva (oh wait!). Asinas que de cabo ta quan, nos regalan (u torturan) con articlos tan vergonyosos como iste. Articlos que, por cierto, as chunteras penchan a escape bien carranyadas en os suyos FB, malmetendo contra os catalans. 

Feré, pues, un chiquet analís d'iste articlo, como podría fer de tantos y tantos que fa l'Heraldo acusando, ta forro de bota, de manipoliación, a atros:

- "Unas cartas desatan a polemica": Si l'Heraldo no'n da treslada, no. Uns particlars (Caramba publicitat) fan unas cartas y, si no estase por os barrenaus d'a FACAO, ixo no da ni ta una noticieta curta. Muito menos ta media pachina a toda color. 

- Chaime I: No estió o monarca soberano d'os territorio catalans? Qual ye o problema de que os catalans faigan servir a Chaime I como o suyo soberano? Chaime I naixió en Montpelier, que no ye Aragón, estió Rei d'Aragón y Conte de Barcelona y, alavez, soberano de Aragón y Catalunya, antimás de Valencia, Mallorca y Montpelier. Por as suyas obras los conoixeretz, y tanto por o testamento, como por as mugas establidas, pareixe que Chaime I, tampoco no le feba guaire aprecio a Aragón, no? En qualsiquier caso, as nacions y a identidat nacional d'o sieglo XXI, mica tien a viyer con as d'o sieglo XIII y nunca no sabremos si Chaime, soberano tanto d'Aragón como de Catalunya, se sentiba más u menos aragonés u catalán u si se sentiba aragonés Y catalán, igual como agora bi ha chent que se siente espanyola en estar bella mica de cada puesto. A identidat ye una cosa muito complexa y decir, con os uellos d'o sieglo XXI, lo que yera u deixaba d'estar ye, como poco, arriscau.

- Sobre l'orichen d'as quatre barras: O mesmo Heraldo se contradiz. En o titular diz que as cartas catalanas "s'apropian" d'o sinyal ta dimpués charrar d'a hipotesi de Wilfredo y d'o siello de Ramón Berenguer IV. Ells mesmos reconoixen que ye una "hipotesi discutida", ye decir, que no ye falsa. L'orichen d'as barras ye, a diya de hue, incierto. Lo que ye seguro ye que representoron a una Casa reyal y que se facioron servir como sinyal en totz os territorios d'a Corona d'Aragón. Decir que o sinyal ye catalán no ye mentir. Decir que ye aragonés no ye mentir. Decir que ye SOLO aragonés u catalán sí. Distingamos, por favor. Decir en o titular que os catalans "s'apropian d'o sinyal" y en o texto que "esfienden una hipotesi no comprebada" ye pasquinismo y d'o malo.

- Els Països Catalans. Ya he dito, y si no lo digo, que esfender un prochecto de estau basau exclusivament en a identidat lingüistica, me pareixe una error. Pende como s'estructure ixe prochecto una error grieu. Con tot y con ixo, cadagún tien tot lo dreito d'o mundo a esfender o suyo prochecto nacional. Y si trunfa y ye lo que la chent quiere, entabant. Dito isto, que no caldría pero lo digo, por un regular "os países catalans" ye un termino ta denominar un aria LINGÜISTICA y no pas nacional. Y no lo digo yo, ni lo mio profe de catalán, que tamién, lo diz Caramba Publicitat y lo reproduce l'Heraldo "Chuego pensau ta fer una amistosa partida de cartas en qualsiquier puesto d'a zona conoixida como los países catalans entendius como los puestos a on que a chent charra u entiende o catalán". ¿Qual ye o problema d'isto? Son charrando de luenga y en totz os puestos d'ixe mapa se charra catalán. Ah, no! Aspera... Ye una nota de prensa d'a FACAO / PNHC, que tanto goyo les fa a lo Gubierno y l'Heralgo y que sostienen que en Fraga y Soses se charrran dos luengas diferents, pero en Buenos Aires y Santander la mesma.

- Ta forro de bota, continan o texto d'antes con a lista de territorio de parla catalana, que son marcaus en royo en as cartetas, y adhiben: "Con una color diferent han marcau a Val d'Arán, a on que se charra l'aranés, y tamién la de Benasc, como extensión de l'anterior". ¡Y dimpués os enemigos son os catalans! Preba de que ye un mapa LINGÜISTICO, como deciba antis, ye isto. A parte más occidental de Valencia no i sale. Tampoco no se i incluye a Val d'Arán a on que, como bien diz l'Heraldo se charra occitano, en a suya modalidat propia. Y no sale Benasc, no porque siga a o canto d'Arán, sino porque SE I CHARRA ARAGONÉS, so fillos de! Istos son los que esfienden Aragón d'os catalans? Hodo!

- Guillermo Fatás y la FACAO fan declaracions muito carranyaus a l'Heraldo y o profesor universitario, exdirector de l'Heraldo y cutiano escritor de columnas en contra de Catalunya y Euskal Herria y por a sacrosanta unidat d'Espanya diz que ye "ignorancia intresada" lo d'os Países Catalans, "como sería clamar "país espanyol a Mexico u a Archentina". Me foi contento de sentir que bella persona critica a la fin as cumbres hispanoamericanas y que apuesta por sacar totz ixos sinyals d'a Fuent d'a Hispanidat d'a nuestra ciudat, territorios a los que nomás une una d'as luengas que se i charra. Se me ocurre que se les podría clamar Hispanoamerica, pero ixo sería una faltada igual como la de Països Catalans. Suerte que a dengún se le ha ocurriu ixo! Modo somarda MAX.

Iste articlo ya lo quereba haber escrito quan, fa bells meses, Heraldo se carranyaba tamién porque en un libro catalán de texto feban servir o termino "corona catalano-aragonesa". Termino que, en a mia opinión, ye desafortunau de tot y, encara que lo razonen tot lo que quieran, ye forzar masiau o luengache historico. Que pesase tanto os territorios y a nobleza catalana como l'aragonesa ye una cosa, fer servir un termino que no tien mica rigor y menos quan existe unatro que si que'n tien (Corona d'Aragón) ta yo, ye una error y talment un complexo d'inferioridat que no les cal. 

Aclarida por enesima vegada a mia opinión sobre a corona catalanoaragonesa y os Países catalans, l'Heraldo subrayaba ixo y, en a mesma imachen, se i deciban cosas como que d'o casorio d'Isabel y Fernando "naixió Espanya, o primer estau-nación d'Europa". ¡Y istos son separatistas! Antiparte de que en ixe casorio faltaba, por eixemplo o Reino de Navarra, u lo de Granada, encara no conqueriu, d'astí no naixió que a unión de dos coronas y prou. No aburriré contando que Aragón y Castilla continoron con as suyas propias leis, cortes, patatin patatán dica lo XVIII, porque qui no sabe ixo, ha deixau de leyer fa rato. Antimás de charrar d'estaus nación en o sieglo XV, lo que metería royo como un ababol a qualsiquier historiador, esfiende ixe libro "tant catalanista" que o naiximiento de "Espanya como estau moderno y centralizau [¡En o sieglo XV, remeratz-lo!] exichiba fer desapareixer o sistema feudal: por ixo os reis catolicos se concaroron con os nobles y les sacoron os suyos poders". Sin sangre en a pocha que me deixan, de verdat. 

Y ista ye, sinyors, l'anvista que tien o Heraldo, un tal I. Ara y, por desgracia, buena cosa d'aragoneses, sobre a historia d'Aragón y Catalunya y as nuestras relacions. Heraldo contina clamando a lo pueblo aragonés a l'odio sin sentiu y a la xenofobia.

Si en iste canto d'a muga no aturamos antes con antes con istas fateras y ixe odio sin sentiu que tant bien fa servir l'espanyolismo, y si en l'atro canto d'a muga, no s'alcuerdan de nusatros y a nuestra historia común más a soben y nos tractan con o respeto que mereixemos como pueblo, mal iremos.

Impresions sobre a 4ª temporada de Chuego de Tronos (1?)

AVISO: SPOILERS DE TODA LA SAGA DE CANTA DE CHELO Y FUEGO Y D'A SERIE CHUEGO DE TRONOS. LEYE BAIXO A TUYA RESPONSABILIDAT

Encara ye rusient o trailer d'a 4ª temporada de Chuego de tronos quan prencipio a escribir isto. D'analisis, ya se'n han prencipiau a fer y, como ya dicié, dimpués de leyer muitas d'as cosas que s'escriben sobre Canta de chelo y fuego, me veigo autorizau de tot ta escribir-ne y dar a mia opinión. Estianyo, quiero compartir con as lectoras d'o blog y fans de CdChyF, as impresions d'a serie y d'o que vaiga escribindo Martin, como The princess and the queen, que me soi leyendo agora mesmo (bien a monico, en estar en anglés....). Asinas que sin más retolica, prencipio con l'analís, por partes.

OBERYN MARTELL: As poquetas imachens que i han apareixiu m'han feito bien goyoso. O personache ye igual como lo heba esmaixiu y mesmo a chiqueta scena d'a luita contra Gregor Clegane debuixa ixe estilo de luita tan particlar que tienen os dornienses. Oberyn estió un d'os mios personaches favoritos y teneba prou miedo de como lo isen a tractar.Trobo a faltar bella imachen de Dorne, que no en he trobau. Pero cuento que sí que podremos visitar o sur de Ponient en ista temporada. En o trailer, pareixe que sí que le fan bella mena d'accento dorniense, encara que no cal ixublidar que l'actor ye chileno y talment no lo faya a esprés. Caldrá viyer como fan o doblau a o castellano.

Where have all the Greyjoys gone?: Parafraseando a Paula Cole, me pregunto a on pegan os Greyjoys "protagonistas" de "Lifara de cuervos" en ista quartena temporada. Igual como a Oberyn, teneba prous ganas de viyer a Euron y Victarion, pero ni una sola imachen d'ells. Ni de Balon. D'atra man, a Asha-Yara la meten por os ríos de Ponient, pareixe, indo a rescatar a lo suyo chirmán, en un d'os esbarres más raros que ha preso a serie respecto a lo libro. No sé guaire bien por do irán os tiros, pero veigo dificil que puedan cotinar a historia sin Euron y Victarion, sin o cuerno de dragón, etc... Encara que se m'ocurren bellas trazas ta pasar sin fer l'asambleya d'as Islas d'o Fierro, creigo que sería una error, y que deixaría "desnaturalizada" toda la trama Greyjoy. Más encara.

THEON - PUDENCO: L'atro Greyjoy que sí i apareixe ye Theon. Y antimás, pareixe que ye Theon y no pas Pudenco. Cuento que o trailer mete imachens de TODA la temporada, porque aspero que ixe Theon siga como saldrá ent'os zaguers capitols. Estando como ye un personache que tien tanto que sufrir, no me fería goi que a transformación en Pudenco, se quedase en que Ramsay le talló bell poco os didos y a suya "salchicha". Igual como facioron que a perda d'o naso de Tyrion quedase en un tallo en a cara, no asperaba que a Theon le sacasen o pel, os dients y os didos, pero un poquet pior sí que habría de quedar, ¿no? Y sino, no ye pudenco, que rima con mayenco.

JAIME FASHION: Tot lo goi que me fa como han feito a Oberyn, no me lo fan os nuevos pels de Jaime. Ya me pareixió una error prou gran fer-le plegar antis en Arribada d'o Rei. Nos hemos quedau, por agora, sin o millor "polvo" d'os cinco libros, en a mia opinión. Ixe polvo yera gran por dos razons: l'inte que lo fan y o puesto a on que lo fan. As dos cosas no van a pasar de vez en a serie, asinas que, si sale, será prou más light. Jaime, en ista parti, ye un personache torturau y feito micazas. Encara que ye de dar que no le podeban deixar con a farcha de carrilano que feba, meter-le ixe look Backstreet boys, por muito Lannister que siga, me pareixe pixautizar-lo masiau. Antiparti de que os pels largos, a Nikolaj, le quedan de pistón. Ya sabetz que creigo que tien un papel prou important que cumplir, y ixos pels no son d'heroe. ¡Queremos cerras!

L'ORACHE: Pareixe que l'hibierno no plega en Ponient. Nomás t'o Norte d'o muro. Trobé a faltar todas ixas plevias y creixidas d'os rios que describe Martin en Choque de Reis y Tronada d'espadas. Viyer a Asha puyando un río, con una solana que ta qué, sin nieu ni plevia ni cosa, en ista parti d'a historia, me truca lo ficacio a-saber-lo. A Val sí que ye bien ambientada con tot ixe fascal de nieu que tanto cal t'a scena Currín - Alayne. Ta Arribada d'o Rei, tampoco no i ye plegada l'agorrada. Ixas cosetas talment caldría cudiar-las más, encara que a más gran parte d'as que viyen a serie ni en pararán cuenta ni les importará guaire.

AS AUSENCIAS: Antiparte d'os Greyjoy "grans", que ye ta yo l'ausencia más important en o trailer, tamién i he trobau a faltar bells personaches importants, que cuento que no i culliban en ixos dos minutos, pero que habrán de salir: Brienne, os Reed, Mance Rayder, Barristan, Shae ... por eixemplo, y Mansfredas, si ye que a la fin, i sale. D'a resta de Martells y Tyrells tampoco no se i veye guaire. Tamién son personaches que, a qui nomás viye a serie, le importan prou poco, asinas que cuento que simplament s'han estimau más de dar-le minutos a los Lannister, Jon y Daenerys, que son los que venden. Ya charrando de Mansfredas apuesto que si bi apareixe, irá montau sobre un caballo. Meter-lo dencima d'un reno, antimás de caro, por os FX, ye una bizarrada como a barba de Daario Naharis, que nunca no ferán en a TV.

A L'ATRO CANTO D'O MURO: ¿Un "cuervo" portiando un nino t'os atros? Ixo pareixeba a scena con o borche,  ¿no? En ixe caso, pareixe que a serie afundará sobre lo que pasó a l'atro canto d'o muro, dimpués de morir Craster, quan nos quedemos sin POV's en ixa parte d'o mundo. Me pareixe que ye un complemento bien intresant a lo libro y a on que más libertat pueden tener Benioff y Weiss. Si seguisen ixa linia, podrían tener, antimás, muitas cosas que recontar en una hipotetica "temporada de repleno" que les tocará fer, si Martin contina escribindo tant a monico. Talment mesmo nos sigan fendo un spoiler (autorizau u no pas) de Winds of Winter, que o propio Martin dició que nos fería conoixer as tierras dillá d'o Muro.

DRAGONS EN PONIENT?: Un Dragon sobrevolando Arribada d'o Rei? Nomás tiengo dos respuestas posibles: ye un suenio, visión, profecía, flashback u parellano u ye un efecto feito a esprés t'o trailer y dimpués en a serie saldrá o plano de Arribada d'o Rei sin dragón. Bi'n ha una tercer que sería que, efectivament, un dragón sobrevolase Arribada d'o Rei, pero no quiero nian pensar-lo... 

ATRAS COSAS: A boda de Joffrey y Margaery pareixe que va a estar tant gran y bambosa como en ye en os libros. Nos aspera un segundo capitol que lo va a petar, tanto a libel tecnico como de argumento. O efecto sorpresa de Stannis en o Muro se va a perder quasi de tot, me pienso. Pero fer desapareixer a tres personaches como Stannis, Melisandre y Davos mientres quasi una temporada, ye verdat que teneba mala explicación t'as no-lectoras. Quemisió, talment tiengan belatra sorpresa presta en ixe arco argumental.... Meereen muito bien y poco más que comentar. Ye una trama que m'aburre prou. ¡Daenerys, deixa de fer l'ababola y tira ta Ponient! A baralla en o Muro tamién promete prou, estando a "gran baralla" d'a quartena temporada, encara que por as imachens que he visto cambiarán bellas quantas cosas.

BRAN FLASBACKEANDO?: A la HBO le va a caler replenar minutos de serie como siga. No creigo que Martin tienga remataus os libros a tiempo. Bellas tramas pareixe que no enantan guaire, entre que belatras pareixe que quasi plegan a la fin de Danza de Dragons. Bran no tien guaire recorriu más y me pareixe que pueden aprofeitar prou os poders que ye en momentos de conseguir ta, talment no en ista pero sí en a venient temporada, fer toda una serie de Flashbacks a on que veigamos partes importants y claus d'o pasau de Ponient. A yo me pareixería millor solución que no inventar-se una fin.

Ixo ye tot, por agora. Aspero escribir más cosas quan vaigamos tenendo más noticias y quan remate o catenazo de "The princess and the queen".

En ascuitando: Sois ejemplo, de Habeas Corpus

Marcha contra la macrogarchola de Zuera
(Foto: Arainfo)

Fa bells diyas, La Enredadera feba un especial bien pincho sobre as garcholas. Ta ixe programa me tocaba de fer a sección de L'aragonés ye bien vivo. En ista temporada, y como Fendo Orella ye de vacanzas, decidié de traducir una canta cada mes y, de casualidat, a tematica coincidiba porque levaba ista canta de Habeas Corpus sobre as presas y presos. A la fin no podió salir por qüestions de tiempo, pero salió a l'atro mes. Ye un tema de dificil tractar, y muitas vegadas me trobo con muita incomprensión mesmo de chent que se suposa de cuchas, y de cuchas "alternativas".Tos recomiendo muito o programa que facioron, a on que se replegan muitos testimonios muito intresants (y a soben emocionants), y prou que sí, ista graniza canta que facioron Habeas Corpus, colla que cada diya me fa más goyo y que retrobé gracias a lo prochecto Riot Propaganda que facioron de conchunta con Los Chikos del Maíz.

Sotz eixemplo:

Toda una vida en prisión, concarando a terror
luitando contra o silencio, l’ixubliu y a represión
someso a la pior traza de rebaixada
sin acochar o tozuelo ni porqué demandar perdón

Chusto astí a on que a dolor fa más mal
a on que o corazón s’achica
pero la dignidat no pas
y hue por ixo sotz eixemplo y sotz lición
sotz eixemplo de corache, sotz lición contra la horror

Anyos que penar lo que no ye escrito y más
anyos y anyos invertius en querer-nos achenullar
como estase importaba igual
lo important yera ganar la baralla a lo compromís
y a la solidaridat

[Si me preguntasetz que ye a garchola tos respondería
sin dubdar que ye o vasuerer
d’un prochecto socioeconómico determinau
a on que avientan a todas ixas personas
que fan estorbo aintro d’a sociedat]

Sotz a voz d’un acotole pando
pero decidiu, que nunca le’n ye prou
o más gran d’os sacrificios.

Sotz a voz d’un acotole implacable consentiu
pero también l’asperanza
a deleria, a fé y a rabia
o vuestro eixemplo ye a millor lición