Lo mundo sigue chirando. Tierra de barrenaus 6x16

Ficau en casa, prebando d'asumir totz los cambios que ha patiu la nuestra vida de rapiconté, habendo d'improvisar con tantas cosas, lo programa de radio quedó en un segundo (u tercer u quarto...) plano. Pa dar-le minchanga a lo cuco de fer radio, de recontar-tos las mías movidas (y las d'Arale), montemos Tierra de varrenadas, un formato podcast quasi-diario, que ya leva trenta y muitos edicions, incluyindo-ie una adintro d'o existoso #Nogarafest. Toda una nueva experiencia, bien divertida y que m'ha feito honra pa muitas cosas.



Pero Tierra de barrenaus ye Tierra de barrenaus y caleba que tornase. Dimpués de bell tiempo pensando en cómo fer-lo tornar, tanto a nivel creativo como tecnico, creigo que trobé una manera con que he conseguiu fer un programa bien digno. Pa fer-lo demandé l'aduya d'a-saber-las colaboradoras y amigas d'o programa que m'han respondiu bien. He recibiu firmes respuestas proposando-me cancions arrienda. Con tot ixe material, y bella cosa de cullida propia, he montau iste nuevo programa a on que s'alternan textos que m'han pareixiu intresants con la mosica que m'hetz ninviau.

De material, n'ha sobrau buena cosa, asinas que lo siguient programa (y talment mesmo unatro mas) seguirá la mesma dinamica. Si dimpués de sentir iste, quiesta/o TdBeliever, tiens bell texto u canción que proposar pa #TdBradio, contacta con yo a traviés de qualsiquier d'os retz que foi servir y t'ascuitaré atento.

Una d'as sorpresas que m'he levau ye la diversidat d'as propuestas mosicals recibidas. I hai de tot. Mosica actual y clasicos en estilos pa toda mena d'orellas. Nomás me queda agradeixer a toda la chent que m'ha feito plegar las suyas cancions y asperar que iste programa tos faiga mas agradables istos dias tant raros.

La hora de l'aplauso (relato TdB)

A las ueito, en la hora d’os aplausos, toda la carrera saliba t’o balcón a fer la suya cutiana performance. N’i heba un que bailaba bachata a ritmo de Kortatu.Atro que, con lo suyo can, leyeba a Neruda. Un fakir feba dispareixer por lo suyo garganchón un ciento de lamins baixos en zucre. U la maravillosa maga que acertaba en un 50% d’as ocasions lo numero que pensaba lo vecín binario. Pero lo mas quiesto, a qui totz adoraban, qui siempre culliba los millors aplausos, ixos que empecipian en mormor y acaban en estrapalucio, yera lo malabarista d’o cinqueno B. Puyau sobre lo barandau d’a balconada, aparau nomás en lo dido gran d’o suyo peu cucho, feba chirar un gran aro en cadaúna d’as suyas orellas. Aventaba lo diavolo tant luent que tot lo vecindau s’heba d’aguardar dica la hora de l’aplauso de l’atro día pa veyer-lo tornar. L’agafaba con ixa cordeta que, de tant fina que yera, se feba invisible mesmo pa los suyos vecins mas cercanos. Si la nueit cayeba, trayendo la foscor t’a carrera, empecipiaba con las tiedas que, en las suyas mans, esdeveniban dragons que feban acrobacias aerias sobre ixe viello callizo zaragozano.

La tarde d’ixe martes, como todas las tardes dende lo confinamiento decretau por lo fastioso virus, de cada balcón, finestra y forau feito de propio en las paretz d’as casas, en salió lo representant de cada vivienda. Manimenos, por lo cabo d’a carrera, amaneixeba las fuerzas de l’orden. Un policia municipal, con lo suyo uniforme y las colors fosforitas que empecipiaban a reflexar las luces artificials que s’enchegaban en lo cabotarde. Caminaba concentrau en la libreta d’as pinyoras, sin devantar lo tozuel. En las casas, apurau tot lo vecindau, se miraba las posibles “actividatz no permitidas” que podese estar fendo. L’achent podría estar nomás fendo una gambada, indo a mercar lo pan, u mesmo trobar-se cacegau por lo laberintico barrio viello. Pero tamién podría venir-le lo concieto y empecipiar a multar a bando. “Ixe balcón ye masa tuerto. Maceta poco ruixiada, contravien la directiva de vechetación domestica. Porro mal embolicau, torne-lo a fer y traiga-lo manyana t’a comisaria. Tres faltas d’ortografía en l’Arco Sant Chuan d’o suyo fillo: ¿qué tien vusté en contra d’a sociedat occidental?” Todas ixas ya las heban sentidas en la carrera. Los d’azul nunca no i pasaban pa cosa buena.

Con l’aliento en los polmons, aguardando acochau en una decena d’alviolos pa no fer guaire estorbo, los vecins asperaban a que lo policía petenase dica lo cabo d’a carrera. Demandando a los espritos, dioses y folletz que no le fesen devantar lo tozuel d’a suya libreteta. Totz, fueras d’un. Lo malabarista d’o cinqueno B que seguiba limpio chirar los suyos cataticos entre que sonaba Rimsky-Korsakov. Chusto en pasar por debaixo d’o suyo balcón, y debant d’os uellos expectants d’a resta, l’achent aturó. Fació un paso enta dezaga, prenendo perspectiva, y se miró fito-fito a lo malabarista d’o cinqueno B.

-  Perdone vusté. Quan remate ixe numero querría fablar-le.
- Ya mesmo voi - recibió l’aplauso d’os vecins, que ya no s’adubiban, y dimpués de bell par de reverencias, fació un cenyo con la man pa que lo policía le charrase - diga-me vusté, sinyor achent.
-  Me le he estau mirando y me pareixe que tien un arte como en pocas ocasions he puesto veyer. Talment en bell derviche haiga puesto trobar un talento parellano, u en lo canto d’os delfins d’a coral d’o Pacifico Sur. Pero asinas, en un zaragozano tant de barrio, tant co-vecín, tant de trobar-me-lo en lo videoclub, tot y que faiga anyos que zarró lo zaguer… Ye de mal trobar, vusté comprenderá.
- No sabe lo contento que me foi de recibir ixos afalagos. Yo, como tot buen artista, m’alimento d’os aplausos, d’as floretas, de que me digan que tot lo que he treballau pa fer istos numeretz ha valiu la pena. En tot lo confinamiento no he habiu de baixar t’o mercau porque con lo d’as ueito ya me da pa tot lo dia. No sé quan acabe isto si podré mantener-me con lo poco que se m’apreciaba antes d’o virus.
- ¿Y no podría vusté fer bella cosa con platos chirando? Ye que a yo lo de veyer platos chirando, por bell motivo que ni yo ni lo mío psicologo entendemos, ye una cosa que m’embacila. Me da una paz interior, que dimpués veigo una falta administrativa y me tiene igual. Ni me canteo.
- Prou que sí. Pero agora, con la quarentena, ¿isto no será ilegal, inmoral u enreciará? Que isto ya me lo he visto yo en bella cinta. “Faiga vusté isto”, y lo fa y t’a garchola.
- No se preocupe. Tien vusté la parola mía, que m’he visto quatre vegadas todas las temporadas de “El hombre y la tierra”.
- No se diga mas. Voi a por platos

Lo malabarista d’o cinqueno B yera amanau a fer chirar los platos, quan lo policía le aturó con un “chst”.

- Soi pensando, sinyor malabarista, que talment podría aduyar-le en lo suyo numero. 
- ¿Vusté sabe fer malabars?
- ¡Por favor! ¿Qué se creye que nos amuestran en la academia?
- Cierto ye. ¿Y no le preocupa lo contachio? Le puedo churar que m’he lavau las mans, pero con tot y con ixo, de risgo, siempre n’i hai.
- ¿Pa qué vivimos si no? 
- ¡A rabelle lo diaple! ¡Qué hombre mas garrispo! No charremos mas. Que lo faigan los platos y las nuestras estrucias.

Cierto ye que lo policía contrimostró bella habilidat en las artes d’o circo. Igual como en ye que no en estioron prous. Dende lo balcón baixaban los platos dica lo suelo, a on que, dimpués de pasar por las mans de l’autoridat municipal, tornaban a puyar. Lo menos en un primer chiro ya que, malas que n’arribó lo segundo, empecipioron a cayer-se-le, trecando-se por tierra en un ciento de micazas.

- Lo siento, lo siento, lo siento  - repetiba lo policía replegando los trocetz d’o suelo - Ye cabolioso que soi enrobinau en isto d’os malabarismos.

Dende la resta de balcons s’empecipió a protestar. Aquello deixaba malament la reputación d’a carrera. Tot lo confinamiento con un gran nivel de spectaclos pa que lo malmetese un achent que quereba bambiar-se d’un arte que no teneba.

- Lo siento, lo siento, lo siento - seguiba terne que terne, no sabendo a on amagar-se d’o refús colectivo.
- Bien se vale que no apreciso los vaixiellos pa alimentar-me - penaba lo malabarista d’o cinqueno B.

De nuevas, la dinamica vecinal se trencó por lo mesmo cabo d’a carrera por a on que heba amaneixiu lo policía bell rato antes. Un gran autobús, de qualques plantas y d’a grandaria chusta pa traviesar la carrera sin rancar los balcons mas baixos, se disposaba a entrar-ie. L’achent, en viyer-lo, deixó de rapiconté toda la vergüenya, que se le esmicazó en tantos trocetz como los platos que encara remaniban por tierra. Se levó t‘a boca lo chifló y lo fació sonar.

- Tranquilo achent, tranquilo. Ye l’autobús d’o reparto d’a secuela de V, que pasa por aquí todas las tardes a prebar de vender-nos los DVDs - le explicaban dende las casas.

La suya color roya como un ababol de vergüenya heba pasau a estar roya como un ababol, pero de carranya. 

- ¡Cómo s’atrive a pasar por aquí un autobús asinas! ¡Y d’una serie tant mala, pa forro de bota!

Parando cuenta d’o problema, l’autobús d’o reparto d’a secuela de V empecipió a recular a toda vitesa. D’os balcons no saliba que “marche, marche”, “au d’aquí, trenca-platos”, “encorre autobuses, chafa-shows” y faltadas pareixidas. 

Lo confinamiento acabó tiempo dimpués, como acaban todas las cosas, mesmo las eternas. Lo policía no tornó t’a carrera. Ni l’autobús d’o reparto d’a secuela de V. A lo malabarista d’o cinqueno B, a l’atro día, ya le heban furniu d’a-saber-los platos pa que continase con los suyos numeretz. Y los vecins mas creativos de tot lo barrio viello de Zaragoza montoron la mayor cooperativa de spectaclos que nunca haiga existiu en ista parte d’a Vía Lactia.

La teorica superioridat moral d'a izquierda

S'acusa a sobén a las militants d'a cucha politica de bambiar-nos d'una suposada superioridat moral. D'eixemplos, n'i hai bells quantos, y no poco vergonyosos. Ye verdat que puet estar que siga un d'os nuestros defectos, que tamién en tenemos. Pero no'n ye menos que dende lo facherío deixan bien facil situar-se en ixos planos quan contrimuestran que la manca de moral ye un exe principal d'a suya ideolochía.

Dende la man invisible d'Adam Smith qui ya reconoixeba lo "natural egoísmo y anglucia" d'os ricos, dica ixa ilustradera "ye lo mercau, amigo" de Rodrigo Rato, ye de tot asumiu y instalau en la conciencia colectiva que lo nuestro sistema capitalista ye de tot amoral. Que las interpresas, y los suyos chefes no tienen por qué amostrar garra mena de comportamiento etico ent'as suyas plantillas. Tot vale, a qualsequier pre, si ye pa que la interpresa creixca y lo caporal amontine mas diners en la suya cuenta. Si dimpués le da por repartir-ne bella micaza, pa forro de bota, se le aplaude porque se considera que no tien porqué. Que tot ixo que ha ganau ye por bell toque divino u un inchenio supremo. Ye verdat, en ocasions, que ixos interpresarios han arrisgau los suyos diners y, por tanto, medios de subsistencia. Pero que les haiga saliu bien, por un regular, no pende d'ixa suposada visión estratechica sino de factors a-saber-los que poco u mica tienen a veyer con las suyas capacidatz. Mesmo si las tenesen, ixo tampoco no les faría mereixedors d'un tracto legal u social diferenciau.

Las leis, pa qui tien diners y recursos a man, se doblan como chuncos. S'adaptan a la manca d'etica suya y d'o propio sistema. Pa qui no en tien, manimenos, son duras, inflexibles y mesmo absurdas. Asinas se torna a confundir "legal" con "etico" y veteme que qui, legalment, explota a las suyas plantillas, paga impuestos a on que millor le convienga y produce a on que le agana, ye bien visto. Entremistanto qui, por circumstancias a on que la mayoría podemos trobar-nos en qualsequier momento, deixa de pagar una factura, le caye tot lo peso d'o sistema en forma d'os cuerpos y fuerzas de seguridat de l'estau que no dubdarán en abatanar-le a no estar que "quiera ir ta misa" u "siga companyer".

La sociedat capitalista, la nuestra, ixa a on que femos la nuestra vida, podría exichir comportamientos eticos, dillá d'a legalidat, a los suyos mainates y liders que ye mas la clase empresarial que no pas la politica. Podría demandar-les que los chornals s'adapten a las necesidatz d'as treballadoras, que se millorasen las condicions de vida, que deixasen d'amontinar bells pocos diners, no guaires, pa que todas en difrutasenos d'un troz mas de tarta. "Legal" no ye "obligatorio". Tot empresario puet esleixir pagar por dencima de convenio a la suya plantilla. U no levar-se la producción ta paises d'o tercer mundo u pagar los impuestos en paradisos fiscals. Que pueda fer-lo no significa que haiga de fer-lo y en ixa elección ye la suya moralidat. Se puet demandar comportamientos morals y eticos a los empresarios, mesmo adintro d'o capitalismo. Pero no se fa. Porque i hai muitos que son deseyando estar en ixe costau egoista d'a sociedat y tener los mesmos comportamientos. Pero sobre tot porque a lo propio sistema le cal ixa falta de moral y etica pa sobrevivir.

Ye cabolioso que no parlo de personas individuals. Chent de mierda, n'i hai a bando en totz dos costaus d'a contienda politica. Me refiero a los prencipios que richen la suya ideolochía y practica politica. Las que fan humor relichioso gosan desfender-se d'a ira d'o fanatismo decindo que "si no quiers que nos faigamos la mofla d'as tuyas creyencias, no tiengas creyencias tant ridiculas". Bella cosa pareixida se i podría aplicar a ista qüestión: si no quieren que nos bambiemos d'una hipotetica superioridat moral, que no tiengan un sistema moral tant infimo".

No sotz herois

(Traducción de l'articlo "No sois héroes", de C. Pueyo, publicado en Cierzo Digital lo 12/04/2020. Articlo orichinal en iste vinclo)

Bi habió un consenso automatico en la sociedat quan empecipioron a clamar "herois" a los sanitarios. Se les calificó d'herois porque tot lo mundo sabeba que los treballadors d'a sanidat publica yeran atendendo a los nuestros malaudos en un contexto a on que cal personal, i hai chornadas inhumanas y precariedat de medios, proteccions y material. Sabebanos que, con tot y con ixo, yeran dando lo millor tracto y en ocasions acompanyando a morir a los mayors solos. Pareixe lochico que los que salvan las nuestras vidas, u preban de fer-lo, sigan los herois d'a nuestra sociedat.

Pero de rapiconté amaneixen uns policías que no nomas van buscando l'aplauso sino que agradeixen los aplausos d'as ueito d'a tarde. Te feban ganas de salir por la finestra y decir "perdone, que no le soi aplaudindo a vusté", pero si no en paran cuenta fa pena sacar-le la ilusión. A l'atro dia en la tele tamién belún les clama herois y poco dimpués los videmos por astí con las suyas sirenas aplaudindo-se a sí mesmos. En los suyos retz socials se fan floretas y s'afalagan. Asinas que ye inevitable de pensar ¿Pero que han feito vustés pa proclamar-se herois?

Lo que definiba a un heroi en l'antigüedat yera fer fetas quasi imposibles pa un ser humán corrient y dende Chesucristo, l'heroi ye qui sacrifica la suya vida por la resta. Veigo isto en los sanitarios que se deixan mesmo la salut pa curar u acompanyar a los nuestro malaudos. Y he visto isto en la policía quan s'ha chugau la vida pa aturar a belún d'ixos yihadistas que asesinaban civils por la carrera. Manimenos, no veigo mica heroicidat en meter pinyoras a qui se blinca lo confinamiento, cusirar que no se cometan delitos y, a la finitiva, fer lo treballo policial cutiano d'antes d'a pandemia. Menos heroico encara ye ir con l'himno nacional a tot estrús por los altavoces de l'auto patrulla u fer comedia entre que suena l'Ave María de Hendel mirando l'aplauso d'o vecindau. No nomas no ye heroico sino que banaliza la situación y fa pensar en qué mena de personalidat infantil tien la chent a qui hemos concediu lo monopolio d'a violencia y portar armas. D'os que levan uniforme y pistola, n'asperamos mas seriedat y mas respecto a la pluralidat politica consagrada en la Constitución. Ye cabolioso que no aporta mica tranquilidat conoixer a qué sindicatos policials ultras han dau refirme mayoritario en las suyas eleccions sindicals, tanto policía nacional como local.

Asunto aparte ye que de siempre estió de buen gusto refusar ovacions quan un pensaba que nomás yera fendo lo suyo deber. Isto en tiempo d'o narcisismo brila por la suya ausencia pero lo menos lo hemos visto en sanitarios arrienda. No lo hemos visto encara en ixas collas d'hombres musculosos que van por astí fendo sonar las suyas sirenas como si la ciudat fuese lo suyo patio de recreo. Belún habría de recordar-les que son una institución d'un estau social y democratico de dreito y que como tal han de mantener neutralidat, eficacia, eficiencia y todas ixas cosas que les pertocan.

Ni yes heroi por portar un uniforme ni yes heroi por quedar-te en casa tuya durant la pandemia como preba de decir-te un anuncio d'a tele. "Heroi" habría de reservar-se pa qui de verdat fan un sacrificio por la resta porque si totz somos herois, alavaez dengún no en ye. Pero mesmo millor sería que no calese herois, millor sería fer una inversión historica en sanidat publica pa que los sanitarios no haigan de fer heroicidatz y puedan atender-nos con prous medios.

En leyendo... Los desposeídos, de Ursula K. Le Guin

Con la enchaquia d'o COVID 19 se son cumplindo los suenios humidos de muitas que les encanta lo feito de tener a l'exercito y a las fuerzas policials controlando las carreras de contino. En zagueras, d'enchaquias, en troban a-saber-las. Los cuerpos y fuerzas "de seguridat" de l'estau van prenendo cada vegada mas poder, controlaus a sobén por los suyos elementos mas faixistas y alticamaus. Y las pocas personas con bella mentalidat mas democratica d'os cuerpos son incapables de meter-les freno en estar tant minoritarios. Iste ye un periglo que antes u dimpués, pagaremos todas. Tamién las que hue les aplauden dende los suyos balcons.

Sin estar yo una persona que qüestione terne que terne la ordens que m'han dau los míos chefes, profesors y en cheneral personas d'autoridat, nunca no he entendiu las virtutz d'ixa obediencia ciega. Pa qui obedeixe. Pa qui manda, son caboliosas. Que belún presuma d'una falta absoluta de critica, d'a falta de miedo, d'estar disposau a tot... Son conductas de tot psicopaticas y me preocupan a-saber-lo quan las veigo en atras personas. L'exercito y en cheneral qualsiquier cuerpo de seguridat, publico u privau, ye una maquinaria destinada a deshumanizar los suyos integrants, porque si no, no funciona. Entiendo que una persona pique piedra sin planteyar-se pa qué. Con que le paguen, qué importa t'a on vaiga ixa piedra. Pero qualcosa tant grieu como foter un sobo u prebar de matar a atro, por la simpla razón de que te lo han ordenau... Pa ixo, cal que t'haigan esborrau qualsiquier mena d'empatía que se pueda tener.

Isto que pienso dende fa muito, lo explica muito millor Ursula K. Le Guin en lo suyo libro de sciencia ficción social The Dispossessed: an ambiguous utopia (Los desposeídos: una ambigua utopía, en la suya edición en castellano) charra de dos mundos, Anarres y Urras, con dos sistemas politicos bien diferents. Un con una sociedat anarquista y l'atro con una capitalista. Shevek, lo protagonista, viacha dende lo suyo mundo anarquista dica l'atra planeta, y bi descubre la suya sociedat. Lochicament, muitas d'as cosas que conoixe le claman a-saber-lo l'atención. Una d'ellas, la organización de l'exercito. Tot y que yo sí que conoixco ixe sistema dende bien chiquet, me sintié bien identificau en leyer ista parte d'iste libro, que antimás en tien muitas atras que son verdaderas choyas. 

Atro le’n heba explicau una vegada: cómo los sarchentos podeban dar ordens a los soldaus rasos, cómo los tenients podeban dar ordens a los soldaus rasos y a los sarchentos, como los capitans... y asinas en escala ascendent dica los chenerals, , que podeban dar ordens a toda la resta y no heban de recibir-ne de dengún, fueras d’o comandant en chefe. Shevek lo heba ascuitau fendo-se cruces y con firme refús.

- ¿A ixo le dicen vustés organización? - heba preguntau -. ¿Y tamién lo claman disciplina? Ni una cosa ni l’atra. Ye un mecanismo coercitivo de extraordinaria ineficacia, ¡bella mena de maquina de vapor d’o Sieteno Milenio! Con un estructura tant richida y tant bronce, ¿qué cosa que valga la pena se puet fer?- Isto le dió la enchaquia a Atro pa emponderar las virtutz d’a guerra, que da corache y hombría y elimina a los ineptos, pero los mesmos argumentos lo heban obligau a admitir la efectividat d’as guerrillas, organizadas dende abaixo, auto-disciplinadas. Pero ixo nomás funciona quan la chent piensa que ye luitando por qualcosa propia, casa suya, u bella ideya – heba dito lo viello. Shevek heba renunciau a la zaragata. Agora la continaba en la foscor creixent d’o cobaixo, entre ripas de caixons de productos quimicos no retulaus. Le explicaba a Atro que agora entendeba por qué l’exercito yera organizau d’ixa manera. Yera sin dubda una mena d’organización ineludible. Garra organización racional hese feito honra en iste caso. Shevek no heba comprendiu dica agora que la finalidat yera permitir que uns hombres provistos d’ametralladoras matasen a hombres y mullers desarmaus facilment y en grans cantidatz, quan les ordenaban de fer-lo. Pero no entendeba encara qué relación teneba tot isto con lo corache, u la hombría u l’aptitut.

Un lustro de TdBradio

Fa hue cinco anyos sonaba en Radio Topo, una vegada mas, Avui com ahir, la canción d'Obrint Pas que ubrió quantos programas de Fendo Orella. Lo feba en ixa ocasión pa presentar un nuevo programa en aragonés. Naixeba Tierra de barrenaus radio, la versión radiofonica d'iste blog a on que levo tantos anyos escribindo ya. Dengún, t'a part d'alavez, hese puesto barruntar que faría los cinco anyos con mas de setanta programas emitius y aguardando salir d'un confinamiento pa poder seguir con la fayena.

Lo programa pasó de mensual a quincenal, ha cambiau de diya d'emisión que me se yo quantas vegadas, a lo formato le he dau un ciento de vueltas, y las que le'n queda... Lo blog y lo programa de radio son bien reflexo de qui escribe, que ye bien disperso. Por los suyos micros han pasau a-saber-las personas y atros sers. Con belun he pasau momentos sobrebuens y belatro, sería feliz si no tornase a amaneixer nunca por la mía vida. Como en lo blog, he charrau d'historia, politica, frikadas, mosica, luengas, medio ambient... y nos hemos rediu pa tres u quatre reencarnacions.

La vida querió que s'encertase lo primer diya d'emisión, lo 2 d'abril de 2015, con l'aniversario d'a mía parella y yo. Tamién ha quiesto que iste 2020 ixe aniversario lo haigamos de celebrar en casa y que lo programa no vaiga a emitir-se. Pero veteme que no ye mal plan. Por la parte personal, por las nuestras circumstancias, probablement no hesenos puesto celebrar los 18 anyos que levamos chuntos. Por la parte radiofonica, encara que Tierra de barrenaus no s'emita, tien un sobrebuen sustituto que ye Tierra de varrenadas y que, antimás, tiengo la suerte de fer con Arale cada nueit. Una experiencia repolida.

Teneba pensadas bella cosa pa compartir con vusatras, las que me leyetz y las que me sentitz, istos cinco anyos. Ye una calendata especial y quereba quitar la radio, lo blog, los libros y tot lo que foi t'a carrera. No ye posible, ye cabolioso. Pero malas que pase tot isto, bella cosa s'organizará pa poder chuntar-me con todas las que cada diya me datz enerchias pa continar emitindo y escribindo. 

5 anyos de radio no serían posible sin vusatras. Gracias por ascuitar, gracias por compartir, gracias por luitar!