Juako Malavirgen

En istos intes d'a istoria d'a mosica, cuan parixe que toda la chen ye a fabor d'a SGAE, cuan toz os partius refirman as suyas prauticas mafiosas, cuan toz bosamos (queramos u no) impuestos ta que Alejandro Sanz, Carlos Goñi, Ramoncín y Bisbal enamplen a suya piszina.... fa goyo beyer como encara quedan iniziatibas de mosicos de berdat que resisten.
Iste ye o caso de Juako Malavirgen (www.malavirgen.com), cantautor aragonés, que fa mosica de cachondeo y borina ta pasar un buen ratet y redir-te-ne. Si quiers ascuitar-lo no has de descargar as suyas cantas del'emule. Puez fer-lo simplemén en a suya paxina web porque asinas lo ha quiesto y d'isto en presume en os suyos conziertos.
Tos combido a toz a que tos descarguez as cantas y que baigaz a os suyos conziertos y a os de toda la chen que, como él, creye en a mosica como arte y no como industria.

Narbona, toros y taurinos

Dizió Narbona que no caleba matar a o toro en as plazas (torturar-lo sí) y s'armó o Belén en istas fiestas nadalencas. Una mida que ye lo menimo - menimo que se puede fer ta prebar de suabizar ixa barbaridat que son os "espeutaclos" taurinos ha meso nierbudas a asabelo chen. Prou que os fachetas d'o PP ya yeran chilando porque se tornaba a crebar Xpaña, pero tamién ixos royez d'o PSOE, tan ecolochistas els, marchón (Pepiño Blanco lo primer) ascape a dezir que no, que continarían as torturas y que se mataría a o toro como Dios manda. Faltaría!
Mesmo en TeleZinco salió o royo-royo de Llamazares charrando en contra d'a supuesta mida. Nomás que un deputau de Iniciativa per Catalunya - els Verds esfendió midas d'ista mena.
Que penible! A la fin, os taurinos tornan a ganar. A lo menos trancan a plaza de Barzelona encara que nomás siga porque no da diners...

Tronca de nadal

Como todas as añadas, Ligallo de Fablans de l'aragonés (http://www.fablans.org/) organiza a suya tronca de nadal. Con isto se preba de recuperar y espardir ista tradizión nadalenca que encara se fa en bels lugars de Aragón, encara que ya en quedan pocos an que bi aiga fogarils y chamineras...
Ista añada lo fan en a Plaza d'o Pilar de Zaragoza o 24 y 25 d'Abientode 17:00 a 19:00, o 27 d'Abiento en Uesca en o Pabellón d'esportes de 17:30 a 19:30, o 4 de Chinero en Billamayor en o zentro cultural de 18:00 a 20:00 y en o poliesportiu de Canfran o 30 d'Abiento de 18:00 a 20:00.

V muestra d'o comic en Zaragoza

Os beniens diyas 22 y 23 d'Abiento en Zaragoza se zelebrará a V muestra d'o comic de Zaragoza. Ista añada se ferá en a Sala Multiusos de l'Auditorio y bi serán l'asoziazión Malavida (www.asociacionmalavida.com), Freakland (www.freaklangames.com), Taj Mahal (www.tajmahalcomics.com), El hombre mosca...

Bi abrá tamién concurso de cosplay (de disfrazar-se de personaches d'as series de debuxos chaponesas), bideochuegos y autibidaz de toda mena.

La dentrada ye de baldes y l'orario ye:
diya 22 de 17,00 a 22,00 oras
diya 23 de 10,00 a 14,00 oras y de 17,00 a 22,00 oras

Omenaches a Chuan de Lanuza

O mobimiento aragonesista no puede dixar pasar a calendata d'o 20 d'abiento sin remerar l'asesinato de Chuan de Lanuza, Chustizia d'Aragón y as suyas consecuenzias t'Aragón. Asinas lo han feito Unibersidá - Coleutibo Aragonesista y Chobenalla Aragonesista con as VI Chornadas por os dreitos y libertaz nazionals d'Aragón, sobre as que puez trobar informazión más entabaxo.

Amás d'istas chornadas, a clamada Plataforma Chustizia, fazió o pasau Sabado 16 un conzierto con Dechusban (Aragón) y Ruxe ruxe (Galiza) d'omenache a o Chustizia. Tamién a Fundazión Gaspar Torrente (www.gaspartorrente.org) fazió autos d'omenache en Zaragoza y Uesca (de conchunta con CHA) amás d'unas chornadas sobre o modelo d'Estau.

Suposo que bi abrá más coleutibos y personas que faigan atros autos y omenaches pero por agora no sé de denguno más.

Paxina de l'academia

L'academia de l'aragones ya tien paxina web. A suya adreza ye www.academiadelaragones.org. Encara la son fendo asinas que no bi ha guaire informazión pero asperemos que china chana baigan fincado-ne.
Sobre ista nueba paxina y sobre atras custions de l'academia se ferán una charrada o Chuebes 21 d'Abiento a las 19:30 en a Casa de l'estudian en a Carrera Corona d'Aragón, 42 de Zaragoza an que bi abrá representans de l'academia.

VI Chornadas por os dreitos y libertaz nazionals d'Aragón

Por seisena añada Unibersidá Coleutibo Aragonesista y Chobenalla Aragonesita fan as Chornadas por os dreitos y libertaz nazionals d'Aragón entre os diyas 18 y 22 d'Abiento remerando o cabo d'año de l'asesinato de Chuan de Lanuza, Chustizia de Aragón en 1591. O programa lo puez trobar en as paxinas web d'as organizazions (www.unizar.es/unibersida y www.chobenalla.org)

Feria d'o Libro Aragonés

Como todas as añadas en istas calendatas se fa en Monzón a Feria d'o Libro Aragonés an que se chuntan editorials y asoziazions d'a cultura aragonesa ta amostrar o suyo treballo. Como l'añada pasada se troba a faltar o conzierto que se gosaba fer o Sabado de nueis y o tren que i puyaba dende Zaragoza.

Con tot y con ixo, a FLA ye un puesto sobrebueno ta beyer as zaguers nobedaz editorials, charrar con os autors y pasar un buen ratet.

Ista añada a tematica zentral d'a Feria ye "Literatura y Cine en Aragón" asinas que antiparti d'as presentazions de libros tamién podremos beyer bellas zintas.

T'os aragonesofablans y ta cualsiquier que le faiga goyo l'aragonés cal que sepaz que bi abrá espositors de cuasi todas as organizazions que fan bella cosa por l'aragonés (Nogara, Ligallo de Fablans, Consello d'a Fabla, Gara d'Edizions....). Si quiers beyer que editorials i ban y que actos bi abrá puez besitar a paxina web: www.ifm.es/libroaragones06

Debantadera

Esprisions!
Yes dentrau en "Tierra de Barrenaus", o blog de Barrenau. Aquí iré metendo lo que me baiga aganando (soi nuebo en istos d'os blogs). Más que más notizias, articlos y combocatorias sobre ista Tierra de Barrenaus que ye Aragón, pero tamién sobre as mías afizions u sobre cualsiquier cosa que me pete.

Aspero que tos faiga goyo...