XXVI Chornadas d'as luengas d'Aragón. Tierra de barrenaus 5x08

Las Chornadas d'as luengas d'Aragón, que organiza l'Asociación Cultural Nogara totz los anyos, fan la suya 26ena edición, y arriban como siempre bien intresants y con actividatz a saber qué variadas. Istos diyas son totz los anyos una sincusa perfecta pa que buena parte d'a comunidatz aragonesofona de Zaragoza nos trobemos y aproveitemos las chornadas pa reflexionar, socializar y, prou que sí, capaciar firme.



Iste 2019 podremos disfrutar de charradas bien intresants que nos parlarán de iniciativas en defensa d'os dreitos lingüisticos por diferents puntos d'a nuestra cheografía. Dende lo Xiloca, dica las vals pirinencas, pasando por lo Matarranya y viachando dica Asturies. Representants d'o Centro d'Estudios d'o Xiloca, de Trobada, Clarió y Iniciativa pol asturianu recontarán las suyas experiencias. En l'apartau lambroto, como va estando cutiano en las zaguers edicions, lo furno de Tolosana trayerá un taste de trena y besos d'Aragón. Lo primer sabado tendremos una(tra)  chornada historica, podendo fer la visita d'o bus turistico en aragonés, por primer vegada, y asperemos que no pas por zaguer. Dimpués nos asperará una actividat bien especial: un vermut radiofonico de man d'Elena, creadora de "Qué diz ixa mesacha?", lo programa transfeminista y antiespecista en aragonés de Radio Montalbán. Lo diya d'antes, lo viernes, s'habrá feito la parte mas borinera d'as chornada. L'Arrebato servirá de scenario pa las collas Koakzión y Orbita, todas dos parte d'o disco O zaguer chilo II, publicau tamién por Nogara. Si no tenetz encara lo CD, ye una sobrebuena ocasión pa fer-te con ell. Por 10 euros, la entrada a lo concierto lo incluye.

Con las protagonistas d'as charradas, hemos charrau en iste nuevo Tierra de barrenaus que arriba dreitament en formato podcast antes de pasar por las ondas de Radio Topo. Representants de todas las organizacions y personas que fan posible totz istos actos nos recuentan en que consistirá cada actividat y nos transmiten toda ixa rasmia que aprecisamos las que nos dedicamos en la nuestra vida cutiana a desfender lo nuestro patrimonio y los nuestros dreitos lingüisticos. Nos veyemos en las chornadas!

Lo peduco royo (Relato TdB)

S’heba estau una hora mirando lo peduco royo. Entre que conduciba ent’a cena d’antigos alumnos de l’instituto se feba cruces de cómo podeba haber-lo cacegau. Primer de tot, heba mirau en la suya caixa de recuerdos. Astí i culliba toda mena de memorias: entradas de conciertos, pasquins de manifestacions, bella foto… Yera plena a rebutir, asinas que cada vegada que la ubriba pa mirar bella cosa iba seguida d’un rato eterno prebando de recolocar cadaún d’ixos testigos d’a suya vida pa poder tornar a zarrar-la. Toda aquella xarramata de papelotz no yera que una parte d’as cosas que heba iu amuntonando dende bien chiquet. En no trobar-la, baixó t’a falsa, a on que bell contenedor de plastico, d’ixos que diz la propaganda que t’organizan la vida, aculliba atros repuis fisicos d’a suya choventut. Con la poca luz d’una viella bombilla a pocas de doblar-se, rechiró por tot sin mica exito. A cada cosa que quitaba d’ixos atabuls d’alcordanzas, lo calivo d’o pasau que teneba por la capeza tornaba a pretar-se fuego y fer-se viva flama. Pero lo peduco royo no amaneixeba.

Eva le’n heba regalau en una Cincomarzada. Ell teneba un mobil “almecha”, que le deciban alavez. Un d’ixos que teneba una alguaza entre la parte d’o teclau y la chiqueta pantalleta monocromo, y que en ubrir-lo, se pareixeba a bell bivalvo que, en cuenta d’un estranio y minchable bichet, amagaba la machica posibilidat de charrar con qualsiquier persona d’a planeta. D’ixos diyas que la competición tecnolochica entre las diferents interpresas teneba como obchectivo fer d’os dispositivos qualcosa mas diminuta por cada nuevo modelo. La suya naturaleza espiguardada heba provocau quantas cayidas y tastarrazos que heban deixau un bayo de rasmiazos y trucazos por lo valioso terminal. Eva gosaba de fer-se-ne la mofla: “como lo cudies tot igual, no tiengas nunca un cocho”, y contino feba ixe riso tant suyo que le embacilaba. Ixe diya, entre biera y biera, le’n dio: “tiene, t’he pillau una cosa. Ye una fatera, pero quan la he vista no m’he puesto privar de pensar en tu”. Veniba embolicada en un papel con a-saber-las colors, un poquet arrebullau d’haber-se estau en la suya pocha ixe maitín. Lo ubrió y adintro yera aquell peduco royo. Les deciban peducos, pero no d’adaptaban a la grandaria ni a la forma d’un peu, ni sisquiá lo d’un borche. Estioron bien populars por bell par d’anyos, vendendo-se por tot. A-saber-las interpresas en facioron, a modo de publicidat. Tamién partius politicos, organizacions socials y culturals, u mesmo collas de crios pa pagar-se lo viache de cabo curso. Lo suyo, que aparaba en las mans alavez, teneba un debuixo d’un can verde sobre fundo royo que hese espantau a lo miedo. Yera probablement la cosa mas horrible que heba visto en qualques anyos. Si l’hese chitau adintro d’a facultatz d’artes, probablement hese feito fuyir a la metat d’o suyo alumnau. A la cara de sorpresa suya le acompanyó a escape buen esmelique d’Eva. No se’n heba puesto adubir. “Pues agora te hodes, que la pienso fer servir”, le dició. Totz dos se’n ridioron y siguioron la suya cursa buscando bell puesto a on que fer un bocau en ixe fredo diya de marzo.

Pa quan Eva marchó ta Praga a vivir, deixando la relación que heban teniu dende tres anyos antes, ya feba muito tiempo que los peducos heban deixau de protecher garra mobil. Los telefonos s’heban iu engrandando dica prener las dimensions actual, que sobrecen las pochas de qualsiquier pantalón. Las fundas personalizadas, adaptadas de tot y con dibuixos de toda mena, sustituyoron a ixa horror estetica, barucadera d’o sector d’o disenyo grafico, que tanto heba sufierto en ixos anyos. D’os recuerdos d’a vida chuntos, n’heba aventau quantas cosas, pero lo peduco no yera entre ellas. Yera un espanto, ye verdat, pero cada vegada que lo veyeba podeba sentir la ulor a chera que empliba lo parque lo maitín que le’n regaló. Podeba recordar los primers besos, ixa mesma nueit, en la carrera d’o bar de moda, entre chilos y gromas d’os suyos pifolos amigos comuns. L’encomience d’un tiempo talment agora idealizau.

Lo mobil heba estau sincusa pa aquell present, y tamién la electronica les fació mantener lo contacto en los anyos que heba viviu tant luent. A traviés d’os retz socials, podió veyer como Eva conseguiba cada vegada millors puestos en la Universidat Carolina. Conoixió a las suyas nuevas amigas en la ciudat, y belún que barruntaba que heba estau parella suya por bell breu tiempo. Lo suyo estau continaba siempre igual: “soleta y completa”. Siempre chuzona. Nunca no podeba simplament marcar la caixeta, heba d’anyadir-le bella chanza, qualcosa que aportase un poquet de polideza a lo que pa la mayoría consistiba en completar un formulario. Quan vido la marca de “bi asistiré” a lo convite que le heba feito a la cena de antigos alumnos, quasi le dio un mal. Ubrió l’evento y podió veyer lo suyo estau: “Eva ye escribindo…”. Dispareixeba y tornaba a apareixer. “Eva ye escribindo...”. Un esparpellar y astí yera lo mensache suyo: “Qué bien, chusto ixos diyas seré por Zaragoza! Contatz con yo!”.

La baruca de tornar a veyer-la le fació revisar las conversas que heban teniu en ixos anyos. La mayoría empecipiadas por ell, buscando bella sincusa pa tornar a disfrutar d’as suyas parolas. D’a suya presencia, encara que fuese telematica. Atras, las que heba empecipiau ella, miraban sobre tot noticias d’a suya ciudat, lo suyo país y la suya clica. De tot lo que heba deixau pa poder tener un futuro profesional en un campo sin mica prochección en ixa Espanya de cambreras y teleoperadoras. Quereba confirmar lo que le arribaba por los medios de comunicación, u a lo menos tener una envista mas real, mas cercana a lo que pasaba en ixe atro troz d’Europa que tanto trobaba a faltar de cabo ta quan.

No s’heban tornau a veyer, pero aquello yera a pocas de cambiar. Eva yera igual como la recordaba. Levaba los suyos pels arrebullaus en un monyo con bell churro que cayeba, bandoliando-se sobre la suya foyeta. Un vistiu royo - “a chuego con lo peduco”, pensó - que le heba visto ya en bella foto d’as ceremonias universitarias. Yera cabolioso que ixa cena yera important tamién pa ella. Se saludoron con un abrazo digno de dos amigos que tanto tiempo levaban sin trobar-se. Si existisen los chueces d’os abrazos entre amigos, unas personas que calificasen si lo contacto fisico ye una pura convención social u i hai un flumen de sentimientos y emocions transmitindo-se, no hesen dau una punctuación por debaixo d’un 9.5. Estió quasi una Nadia Comaneci d’os abrazos. Se posoron en la mesa la un a lo canto de l’atra, y quan habioron demandau lo menú, se decidió.

Ixe peduco faría revilcar en ella las mesmas remeranzas que heba sentiu ell mirando-se-lo. Rechiró por la suya pocha. Yera a-saber-lo chiquet. Apartó las claus, y lo quitó. Aguardó a que Eva acabase la historia que le yera contando y lo metió dencima d’a mesa.

- He traito una cosa, Eva. A fe que te quedas sin sangre en la pocha. No te creyerás que encara tienga iste present que me faciés. Mira-te.

Metió lo peduco entre las suyas dos copas, y a monico devantó la man que lo amagaba, prebando d’aumentar la tensión d’a sorpresa. Se miró ent’os uellos suyos, ent’a cara siempre tant expresiva que feba, a on que no caleba endevinar los sentimientos en estar evidents mesmo pa la persona menos empatica que se podese concebir. Manimenos, en ista ocasión, los suyos rasgos reflexaban marcaban una sensación estrania, como si veyese bell ser d’os bestiarios medievals, d’ixos salius d’a ment de bell mosén farto de fungos. Por lo que podeba leyer en los microcenyos d’Eva, que tant bien conoixeba, aquell obchecto que uniba las dos cuberterías suyas le pareixeba tant familiar como las ecuacions diferencials a un estudiant d’Infantil.

- ¿Qué ye isto? No lo heba visto en la mía vida - dició Eva. Y totz dos paroron cuenta d’a suya error.

Descarga-te iste relato en formato PDF dende aqui

La Corona d'Aragón y lo Diya Internacional d'a Luenga Materna. Tierra de barrenaus 5x07

Estatua a Chaime I en Salou

Los dos temas que mas lo petan en lo programa y en lo blog son la historia y la luenga. Asinas que, en chuntar los dos, probablement haiga feito un d'os capitols que tendrá mas descargas. Sisquiá, porque creigo que ha quedau bien pincho.



Empecipiamos con un d'ixos temas que levo querendo charrar-ne dende la primer temporada: la organización interna d'a Corona d'Aragón. L'historiador Guillén Tomás comparte los suyos conoiximientos explicando-nos como s'organizoron los diferents territorios que en facioron parte dende que la voda de Ramón de Berenguer IV y Peironela d'Aragón, dica los Decretos de Conquista que acaboron con la independencia d'ixos paises. Un tema apasionant tractau con rigor, luent d'as pasions que belun podría asperar.

L'atro gran tema ye lo Diya Internacional d'a Luenga Materna, que se celebró lo pasau 21 de febrer en toda la planeta. Iste anyo tos demandé que compartisetz con yo experiencias positivas que hesetz viviu relacionadas con l'aragonés. Me'n ninvietz bellas quantas y con ixe material he feito ista sección que aspero que reflexe lo que querebatz transmitir. Muitas gracias a toda la chent que hetz colaborau. A la fin d'o post, podetz trobar los videos d'as personas que me lo ninvioron en ixe formato y que han quedau a-saber-lo polius.

Como en totz los programas, u quasi, isto se completa con lo resumen d'o blog, y bell par de temazos, de man de Xavi Sarrià y Koers. A bailar-los! Aspero los vuestro comentarios!

Historias d'un nogarer (1): Las primers risas

Cuento que quasi todas las personas que nos hemos meso a estudiar aragonés hemos teniu una serie d'experiencias comuns, independientement d'a ón lo haigamos feito, quán u cómo. Una d'ellas son las moflas y las risas. Qualcosa que levo vivindo dende lo primer diya que tenié bell intrés de verdat por ista luenga dica lo momento que soi escribindo isto. Aprender a vivir con ello ye parte de l'aprendizache d'o idioma tant dificil, u mas, que las qüestions gramaticals mas embolicadas. Ixas rechiflas vienen por un regular por dos motivos: la uno, lo nacionalismo lingüistico que opina que l'aragonés no ye una luenga, en ye una de segunda u simplament no vale la pena estudiar-lo. La otro, de qui tien, u creye tener mas conoiximientos que no tu y en cuenta d'aduyar-te creye que lo millor ye ridiculizar las tuyas errors u opcions.

D'as primeras, tardé poco a tener-ne. Heba empecipiau a estudiar aragonés por la mia cuenta, con bell material que me heba deixau una amiga. Lochicament, abanzaba bien poco, asinas que decidié d'apuntar-me a clases. Malas que empecipié a decir-lo entre las mias amistatz d'alavez, la mayoría d'as uelladas yeran de incomprensión, pero de vez con a-saber-lo respecto. Pa ixo son las mias amigas y que no lo entendesen no significaba que no lo respectasen. Estió un companyer d'a FP lo primer en redir-se-ne de manera platera. "Agora que somos en Europa, ¿vas a aprender aragonés?" - isto yera t'a part de finals d'os novanta - y continó con una retolica sobre que caleba estudiar anglés - luenga que parlaba muito millor que no ell - y que ixo yera provinciano, pero sobre tot, inutil.

Aquell mozo teneba, como tantisma atra chent, ixa concepción utilitarista d'o conoiximiento que nunca no he entendiu. Ixe pensamiento de que la sola motivación pa aprender qualcosa ye que tienga una utilidat economica inmediata. Que l'aragonés podese u no fer-se servir pa sacar-ne treslada economica yera qualcosa que me la bufaba. Que nian i heba pensau. Como con tantas atras cosas que feba y foi en la mia vida, aprendeba por aprender, por lo simple goyo de saber mas sobre lo mundo que tenemos arredol, de conoixer todas-lo tot, salga u no en los medios de comunicación de masas.

Dimpués d'ell, en vinió un ciento mas de chent que se ridió d'as mias inquietutz lingüisticas. En los estudios y lo treballo, en roldes d'amigas, en la familia y por tot. "Guarda si t'iría millor emplegar ixe tiempo en aprender anglés", yera lo ferrete contino, "que ya charro anglés", "pues francés", "que tamién...". Si hese sabiu todas las luengas d'o mundo talment hesen continau por lo macramé. Lo que fuese, millor que malfurriar lo tiempo con ixa luenga sin futuro. Quan empecipié a treballar de profe d'aragonés, y la utilidat economica yera caboliosa, se feban cruces de que yo no fuese lo solo varrenau que en iste chiquet país quereba conoixer millor una parte d'o suyo patrimonio. Y como de feito viviba de l'aragonés - qualcosa inconcebible pa ellas - las criticas s'enfilaban enta la concesión d'as subvencions que pagaban parte d'o mio chornal u ent'a temporalidat d'o treballo.

De risas y moflas, n'i heba d'atra mena. Si istas veniban de qui no fan mica aprecio a lo nuestro patrimonio lingüistico, las segundas teneban lo suyo orichen en qui dicen estar los suyos defensors mas furos. 

Quan empecipié en isto, tasament conoixeba tres u quatre personas que lo charrasen, asinas que yeran tot lo mio universo lingüistico en aragonés. Tot lo que podese saber veniba d'ellas u d'os materials que m'hesen amprau y ellas yeran toda la chent con qui podeba practicar. Dende lo primer diya que empecipié a aprender me convidoron a fer servir las parolas que iba aprendendo y a ir calando china-chana tot lo que sabese. Y asinas lo facié. 

Como lo mio universo lingüistico yera tant chiquet, cada vegada que podeba charrar aragonés con belún yera un momento bien especial, y una oportunidat de dar-le un poquet de vida a ixa luenga que quasi tot lo tiempo nomás existiba en los libros y apuntes que teneba. Una nueit me trobé en l'Atrio con unos mozos que iban dando uns pegallos d'una asociación que acababa de naixer: "Astí l'aragonés". No duró guaire y no sé qué fayena facioron en la suya curta vida. Ixo l'habrán de documentar los suyos miembros. A un d'os mozos lo teneba visto d'o bar y de bell concierto. Hebanos charrau bella vegada en castellano, asinas que m'enfilé enta ell y le empecipié a parlar en l'aragonés zaborrero que teneba yo a finals d'os novanta - primers d'os 2000. En una d'ixas, bell verbo debié de conchugar malament, que pretó a esmelicar-se, chunto con un amigo suyo, de yo y d'o mio aragonés. Le pregunté qué heba dito mal y me corrichió y siguiemos la conversa en imperfecto castellano.

Ixa estió la primer vegada, pero no pas la zaguer. En tot lo proceso d'aprendizache que levo, bells vinte anyos ya, no bi ha habiu ni un solo momento que no m'haiga trobau chent que se me redise por charrar como charro, por no saber prou u por fer bella error. Ha importau igual lo nivel que haiga teniu en tot iste tiempo, los conoiximientos u formación mia u de l'interlocutor. En toda la chent que ha feito ixo, las razons no yeran aduyar-me a tener un millor aragonés u a ixamplar la mia base lingüistica. Si hesen quiesto ixo, los modos y los puestos son atros. Yera fer-se la bamba debant d'a resta d'a comunidat aragonesofona, ya fuese composada por lo suyo amigo de l'atro, l'asociación X u Y, u los retz socials dende los foros d'antes mas dica lo Twitter de hue. 

Todas dos menas de mofla tienen orichens diferents, pero todas dos contribuyen de manera notable a que l'aragonés muera por cada diya. Las primeras, con ixe nacionalismo lingüistico que ha iu matando toda luenga que ha teniu la suerte y la desgracia de convivir con lo castellano. Las segundas, con ixe egoismo absurdo de qui s'estima mas lo suyo ego que la luenga que diz amar. Ixos Gollums de l'aragonés que quieren que lo suyo tresoro no lo comparta dengún. 

Qui s'acerca a l'aragonés ya leva tot un proceso d'aprendizache interior previo a lo conoiximiento d'a luenga. Un proceso de fer-se fuerte debant de todas las criticas y moflas que recibe antes de ubrir un libro u pisar una clase. Se troba, antimás, con todas las dificultatz pa aprender-lo derivadas d'o feito de no tener una norma culta, ni materials dignos, ni autoridat que normativice iste sindios. Dimpués empecipia, pa forro de bota, una segunda tongada de criticas y moflas por no haber aprendiu, de camín, tot l'aragonés y antimás concretament d'a manera que le agrade a lo saputo que pertoque. 

Aprender aragonés ye repoliu, prou que sí, pero cal tener muita decisión y personalidat pa seguir en isto quan has d'aguantar tot ixo. Si lo tenesenos tot a favor, talment podese la luenga permitir-se luxos asinas, encara que fuese igual d'inchusto. Tenendo-lo tot en contra, habríanos de planteyar-nos todas las actititutz enta qui gosa empecipiar a aprender aragonés. Cada nuevo fablant habría de considerar-se una choya que ir treballando a monico y con firme cudiau, no pas un ignorant que preba de emporquiar casa nuestra.