Los controls de Radio Topo sobreviven por agora a la frescor zaragozana que somos patindo los winter-haters en istas semanas. Aspero que los partidarios d'ista estación tos lo sigatz pasando de pistón arrebullaus en las vuestras mantetas. Pero entre que aguardamos a que lo buen orache arribe, Tierra de barrenaus no atura y tos traye nuevas propuestas pa estar-nos mas entretenidas en las nuestras casicas. Empecipiamos con Comanchería, lo nuevo disco de Los Chikos del Maíz. Rubén torna t'o programa pa charrar-nos d'iste nuevo album, de toda la trachectoria d'a banda y d'o concierto que facioron fa bella semana en Zaragoza, adintro d'a chira de presentación que los levará por puestos arrienda. Un analís a on que conoixeremos muitas cosas sobre iste grupo y toda la patacada d'artistas que ha colaborau en lo nuevo treballo. En la segunda parte, me permito recomendar-tos cinco cosetas a fer en istos diyas d'hibierno. Tos proposo una cinta, una serie, un libro, un comic y una exposición que m'han feito goyo y que talment tos ne faiga tamién a vusatras. I hai de tot, pero mas que mas, frikismo. En la parte mosical, la canción d'o programa vien una vegada mas de man d'una banda aragonesa. Una gran canción d'un gran disco editau iste 2019, con la colaboración d'una d'as millors cantaires d'o hardcore d'agora mesmo. Tamién tendretz una nueva Canción blasfema que fa parte d'a banda sonora d'una famosa cinta que tamién estió perseguida por qüestionar los dogmas relichiosos. Tos recuerdo que si queretz proposar qualsiquier tema, mosica, sección u lo que siga, lo programa tien las puertas pataleras pa tot lo que, educadament, me faigatz arribar. Y, prou que sí, pa las vuestras opinions sobre lo programa. Aspero los vuestros mensaches, TdBelievers!
La vispra d’o concierto de Manel, en lo perfil suyo d’Instagram amaneixeba una foto d’o cantaire en El pequeño catalán, una botiga zaragozana a pocos metros d’a sala Oasis, que acullió lo suyo concierto lo pasau 10 de chinero. Lo morro se m’iba calentando a mesura que s’acercaba lo diya. Ye una d’as mías bandas favoritas y teneba a-saber-las ganas de tornar a sentir-los en directo.
Per la bona gent, lo suyo nuevo disco, ye unatro chiro de chenialidat d’istos quatre catalans que son contrimostrando que pueden fer lo que quieran y lo farán bien. A qualsiquier que no los conoixca le costará a-saber-lo creyer que qui facioron Els millors professors europeus son los mesmo que graboron iste zaguer treballo. Lo suyo soniu ha evolucionau tanto en ista zaguer decada que perfectament podrían haber iu cambiando de nombre en estar prochectos tant diferents. Ixo sí, siempre fendo-lo de pistón, innovando y mantenendo bells poquetz sinyals d’identidat que les fan reconoixibles.
A pesar d’a cantidat de copias que han vendiu d’os suyos cinco discos, las visitas por istas tierras no son guaire cutianas, asinas que s’ha d’aproveitar toda oportunidat que se tienga pa veyer-los. Y ixo he feito siempre que he puesto.
La primer vegada estió en los Pilars de 2013. La historica sala King Kong iba a ubrir las suyas puertas y Manel yera un d’os grupos estrela pa la nueva devantadera. Manimenos a zaguer hora les denegoron lo permiso por problemas con lo vecindau y lo concierto s’habió de fer en lo Centro Civico Almozara. I estiemos muit poqueta chent. Cuento que no arribaría ni a ciento cinquanta personas. Un luxo poder disfrutar en petit comité d’una colla que empliba salas en Catalunya a chococientos euros la entrada.
La segunda estió en lo scenario de Los Jardines de Tosos que se metió en 2017 y que lo PP decidió de sacar en istas zaguers fiestas d’o Pilar. Un concierto en horario de vermut, de baldes y a l’aire libre, en un entorno repincho y que tenió como resultau una experiencia prou diferent a lo que somos feitas a veyer en salas y teatros. Con tot y con ixo, i fue menos chent que en ista zaguer ocasión.
La tercer, fa bella semaneta. Bell rato antes d’a hora d’encomience, la sala rebutiba ya de chent. Por tot lo publico, s’ascuitaba a-saber-lo catalán. No deixa de sorprender-me la cantidat de personas d’ixe país que vive en Zaragoza. Antiparte, bell pifolo dando mal, muita moderna y quantas caras conoixidas d’a scena mosical d’a ciudat que tan buen gusto tienen.
Con Formigues, un d’os temas mas raros y alavez marabillosos d’o suyo zaguer disco, empecipió lo concierto. Continoron a l’arreu buena cosa de cancions de toda la suya discografía. La potencia d’o directo suyo compensó de tot lo mal soniu d’a sala. Sobre lo scenario, lo chuego de luces feba que los mosicos pareixesen brembas d’un teatro chino, bailando y fendo figuras que, en bell momento, recordaban a una paranoia DavidLynchiana. Personalment me quedo con Teresa Rampell, una d’as mías cancions favoritas y que, en lo concierto, fue pa yo un d’ixos extasis mosicals a on que arribas a levitar devantando-te un poquet de tierra.
Antes d’os bises, lo cantaire dedicó unas parolas a la sala Oasis, remerando l’asesinato que bi habió en 1928 y que sobre ixe scenario heba feito lo suyo debut Lita Claver La Maña, figura bien important d’os teatros de El Paral·lel de Barcelona. Por bell motivo que desconoixco, pues no me pareixe un d’os millors temas suyos, lo publico demandó Benvolgut y los catalans acceptoron, servindo pa rematar un concierto sobrebueno.
Sisquiá sirvan bandas y conciertos como istos pa que tanta chent en Zaragoza y Aragón se saque toda la patacada de prechuicios que puedan tener contra grupos que fan servir luengas que no son lo castellano y l’anglés. Sisquiá sirvan de vesque pa unir mas dos pueblos, lo catalán y l’aragonés, que caminoron chuntos por muitos sieglos y que habrían de seguir fendo-lo. Y, prou que sí, sisquiá Manel contine por muitos anyos fendo mosica y deixando-nos enarcadas con los chiros que faiga en cada nuevo disco.
A pesar d'o nombre d'a sección, en realidat isto la historia de DOS IES publicos. En lo primer que estudié, lo Medina Albaida, facié 3º y 4º de ESO y lo Bachillerato. Veniba d'o 8º d'EGB y yera d'os primers d'a mía cheneración que prebabanos la reforma educativa. La famosa LOGSE. Dimpués me tocó tamién prebar la reforma d'a FP, que tamién suposó un cambio bien gran. Lo segundo IES a on que estudié estió l'Andalán, a on que facié una FP d'Electronica que, con lo cambio educativo que s'heba feito heba pasau a tener lo bamboso nombre de Grau Superior en Desarrollo de Productos Electronicos. Quan deciba lo nombre oficial pareixeba que hese estudiau en lo MIT. Pero no. Estioron dos anyos bien buenos d'a mía vida. Con bell profesor sobrebueno y belatro mas zalapastro, unas maneras d'amostrar a saber qué diferents d'o que heba experimentau dica alavez y con un ambient que poco teneba a veyer con lo que heba conoixiu. Tornaba, por desgracia, a estar acompanyau nomás por hombres, en haber-ie nomás una zagala en clase que, antimás, no veniba guaire. De tot isto, iré charrando-ne, pero en iste post me quiero centrar chusto en los zaguers meses d'ixos estudios: las practicas en interpresa. Heba acabau lo prochecto de fin d'a FP. Un calorimetro que n'heba desarrollau practicament tot lo software. Me diposaba a tener la mía primer experiencia pseudolaboral seria. Ya me pensaba que, malas que rematase ixos tres meses de treballar de baldes, trobaría una fayena rebuena que me permitiría independizar-me, qualcosa que yera lo mío obchectivo dende habe anyos. Heba de presentar-me en Raxon, una interpresa a lo canto d'o Campus Sant Francho d'a Universidat. Astí yera yo, vistiu con la ropa d'as vodas, que en casa mía m'heban dito que me caleba ir bien atrapaciau. Presto a empecipiar en un mundo laboral que me yera bien desconoixiu. Raxon feba a-saber-las cosas. Cuento que viviría sobre tot d'uns cursos que impartiba, pero la parte que me tocaría a yo yera la d'un servicio tecnico que teneban. Sería aduyando en lo taller a apanyar ordinadors, impresoras y cosas asinas. En las primers semanas aprendié cosas arrienda. Muitas d'as averías que trayeban se solucionaban con formateus y reinstalacions d'os sistemas operativos. Atras, buscando lo component que daba mal y cambiando-lo. Mesmo, de cabo ta quan, nos tocaba fer bell apanyo "artesano" con bell puntico de soldadura y tot. Conoixié buena cosa de modelos d'ordinador con todas las suyas particularidatz. No heba tocau un Mac ni con un palo y me'n farté, d'ateclar-ne. Estioron unas semanas bien pinchas. A l'arreu vinió la segunda parte d'as practicas. Memory Set yera una gran interpresa que yera a lo canto de Pikolin. Yera naixida en lo cobalto d'as oficinas de Raxon, seguntes deciba lo suyo mainate, y teneban muit buena relación. Me proposoron d'acabar las practicas treballando-ie y accepté. Yera bien belulo y talment creyeba que fer-les ixa "favor" me daría mas puntos pa quedar-me en un treballo que dica alavez me heba feito goyo. S'acabó treballar una chornada "normal" a vinte minutos de casa. No lo sabeba, pero con lo cambio de treballo empecipiaba una d'as etapas d'a mía vida a on que menos "vida" he teniu. Heba d'amaitinar pa prener lo casetero que me levaba dica lo poligono. Encara que entrabanos bien luego de maitins, los horarios de l'autobús me i deixaban un rato antes, lo que aproveitaba pa fer-me un café en lo restaurant que bi heba a lo canto. A l'arreu veniba entre diez y dozte horas en Memory, mas lo tiempo de tornada ta Zaragoza en l'autobús. Bellas dotze u tretze horas sin vida propia. En la interpresa nos daban un vale pa chentar lo menú d'o diya en lo restaurant, que no yera garra marabilla, pero que con la gana que tenena me importaba prou poco. A truca, malas que rematabanos de chentar, hebanos de tornar t'a fayena. Quan facié pacha con bell companyer que veniba en auto, deixé de tornar ta Zaragoza en lo bus, con lo que recuperaba bells 15 minutos diyarios d'a mía vida. Lo treballo yera bien facil pero teneba poca relación con lo que heba estudiau yo. Basicament consistiba en fer modificacions en equipos que nos veniban de fabrica. Instalar sistemas operativos, ixamplar memorias, fer cambios de hardware y asinas-asinas. Te veniban con un palet d'ordinadors, les febas las modificacions que calese y los tornabas t'o client. En lo mío departamento, en los momentos de mas fayena, arribemos a treballar tretze personas de vez. D'ixos tretze, nomás tres teneban un contracto laboral. Toda la resta yeranos chent de practicas de diferents FPs u chent que veniba d'atros cursos. Un d'ells, pobrichón, veniba d'un curso de programación en C++ que heba feito en la propia Raxon. Creyeba, por que le'n habrían dito u por simpla lochica que ixo sería lo que faría. Quan le dioron lo cutter y lo destornillador se quedó sin sangre en la pocha, aguardando a que venise l'encargau creyendo que s'heban entivocau. No pas. Astí yeranos quantos chovenotz arredols d'os vinte anyos treballando de baldes pa una interpresa que nos yera formando en la no cosa. Mesmo en bell momento pilloron chent d'ETTs que nian teneba mica formación relacionada con la informatica u la electronica. Un d'ells, que con qui m'encerté treballando en una furnada de Macs que nos vinió, me dició que le heban achustau porque "le feban goyo los videochuegos". L'encargau, entre que nusatros yeranos limpio treballar, s'adedicaba a chugar a los solitarios que veniban con lo Windows 98. Diz que teneba bella relación familiar con lo gran mainate d'a interpresa y totz suposabanos que asinas yera ya que nos febanos cruces de cómo podeba estar ixe mozo d'encargau de cosa. Quasi una decada dimpués, me lo trobé de profesor de seguridat informatica en la Expo, asinas que raro se me fa que se conseguise acabar sin garra chandrío de bell virus. En los zaguers diyas que i estié, la puyada de producción que heba motivau que bi ise s'heba pasau de tot. Tenebanos poca fayena y tiempo pa fer corridas de traspaletas por las naus d'arredol d'o nuestro departamento. En un d'ixos diyas, chusto dimpués de chentar, nos avisoron de que veniban "los americanos", que yeran uns mainates de l'atro canto de l'Atlantico con qui cuento que se chugaban bell contracto sucoso. Pero veteme que no tenebanos garra pediu pendient. Lo que heba entrau ixe maitín lo hebanos puesto rematar a tiempo y yeranos aguardando a que venise lo siguient mandau. Asinas que, pa que los americanos nos veyesen treballando, habiemos de fer momenazas. Pillemos cadaún un d'os paletz que hebanos montau ixe mesmo maitín y nos estiemos desmontando y tornando a montar piezas d'os servidors tot lo tiempo que duró la visita. Un d'os momentos mas surrealistas que vivié en Memory Set. Las practicas me deixoron escamallau. Me feba cruces de cómo se podeba mantener ixe ritmo de treballo. Encara viviba con mis pais, asinas que no heba de preocupar-me de fer la casa ni de muitas atras costodias que teneba la chent que s'heba independizau, asinas que se me feba imposible emancipar-me asinas. Conoixeba, antimás, lo chornal de qui i treballaba y yera bien luent d'o que yo consideraba que valdría la pena lo sobo d''estar-se tantas horas difuera de casa. Con tot y con ixo, torné ta Raxon a veyer "qué bi heba d'o mío". Me pensaba que talment, como heba accediu a marchar ta Memory, me tendrían en cuenta pa quedar-me en lo taller con los ordinadors. Ixe treballo no yera tant malo y, sobre tot, no m'ocupaba tot lo diya. Quan charré con lo chefe quasi se m'esmelicó en la cara. No teneba garra intención d'achustar-me. Nunca no la heban tenida. No aprecisaban a dengún mas mientres podesen tener man d'obra de gufanya a pur de trayer estudiants de FP.
Encara que no lo pregunté, en Memory tampoco no les intresaba. La producción heba baixau y ya pagaban a tres personas, antimás de tener un fluixo contino de chent que i feba practicas de toda mena de cursos, cursetz y cursichons. Me dioron 10.000 pecetas (60 €) "porque heba feito muitas extras" que tasament cubriban lo que m'heba gastau en lo casetero. Dende bell mes antes ya iba remugando la ideya d'empecipiar estudios universitarios. La familia siempre m'heba animau a fer-lo y la mayoría d'as mías amigas, que heban repetiu 2º de bachillerato, los heban empecipiaus ixe anyo. La mía experiencia en las practicas no estioron lo factor decisivo, pero sí un d'ells. Creyeba, babieco como yera, que lo treballo que trobase con un titol d'universidat sería bien diferent.
Prou que no tot estió negativo. Yera bien choven y encara podeba con ixos ritmos de vida. En ixos meses conoixié tot un mundo nuevo pa yo y pasé muit buens ratos tanto en lo taller de Raxon como en la nau de Memory. Aprendié muito, pero no pas d'electronica u informatica sino d'o mundo laboral que dica alavez me yera desconoixiu. Y tot y que no lo sabeba, encara tendría temporadas en la mía vida a on que treballaría mas horas a la semana.
Empecipia 2020. L'anyo a on que yera ambientau lo chuego de rol Cyberpunk y tantas atras ficcions. Muitas d'as cosas que pasan hue se predicioron fa anyos. No pas muitas atras. Y cuento que dengún pronosticó l'arribada d'o reggaeton u lo trap. Saber, a largo plazo, qué modas s'imposarán en la mosica ye quasi imposible. Manimenos, sí que podemos barruntar, alto u baixo, qué ascuitaremos iste anyo que empecipia. Y d'ixo va iste programa.
En una horeta repaso beluna d'as bandas que sonarán iste anyo. Poquetas, porque una hora suple lo que suple. Pero todas ellas farán disco y/u chira en los meses que tenemos por debant. En qualsiquier caso, son collas que tienen muito a decir. Beluna con tasament bella canción publicada y atras con decadas de treballo dezaga. Con iste programa inauguro tamién un nuevo formato que faré servir de cabo ta quan. Programas mosicals a on que tos presiente cancions que me fan goyo con bell filo conductor. Como siempre, si tenetz bella propuesta de temas, contenius, mosicas u lo que siga, fetz-me-lo saber. TdBradio tamién lo fetz vusatras! Programa #69
Las alufras que cada un se fa determinan muitismo las reaccions a los acontecimientos. Dende lo 15M y lo naiximiento de Podemos y las compleganzas, cada vegada que s'arriba a lo poder institucional arriba una euforia extrema a on que pareixe que la revolución que muitas deseyamos siga a tocar. De manera paralela i hai una patacada de haters que siempre avisan de que cosa no sirve pa cosa y de que lo que cal fer ye lo que dicen ells dende lo teclau d'o PC. La realidat gosa d'estar muito menos dichital. I hai muit pocos zeros y unos en politica, tenendo infinitos numeros en meyo pa fer servir. Clamatz-me varrenau, pero personalment me foi contento de que, en cuenta de tener a Casado de president y a Abascal de vicepresident, tiengamos a Sánchez y Iglesias. Nomás de veyer los aparatos que ha feito lo facherío y los suyos voceros, ye un buen indicador de que s'han ixorrontau una miqueta y, encara que poco, los suyos privilechios son menazaus. Dimpués de todas las victorias que han teniu en zagueras caleba baixar-les los fumos. Yeran, y son, muit creixius, y ixo ye perigloso mesmo a nivel fisico, como bien saben qui han estau victimas d'os suyos sobos y menazas en zagueras que tant poco amaneixen por las televisions. Lo nuevo gubierno espanyol lo tien muit dificil pa fer-me burro falso por un simple motivo: no n'aspero cosa. No m'he feito guaires alufras. Podemos pasó d'asaltar los ciels a una socialdemocracia floixeta en qüestión de meses. Los chandríos internos, los pactos a sobén vergonyosos con lo PSOE en atras administracions, la ruptura de compleganzas y muitas atras d'as suyas decisions me fan tener muit poca asperanza en que consigan cambios de guaire entidat. Muito menos, revolucionarios. D'o PSOE espanyolista d'os GAL, la reforma laboral, lo 155, d'os pantanos, lo lambanismo, Grande Marlaska y Borrell, ya ni te cuento. Pero sí que aspero, y ixo ye bien important, que lo que dure iste gubierno sirva pa dos cosas. La primer, baixar lo libel d'o rancioespanyolismo que va prenendo cada vegada mas presencia. Me preocupa la cantidat de diputaus que tien, encara que probablement sobrerepresente a la ultradreita sociolochica. Pero muito mas la normalización que he viviu en zagueras d'os suyos discursos en la carrera. La falta de vergüenya que tien ya muita chent pa expresar ideyas que antes mas nomás se deciban a escuchetes, y en los suyos entornos. La segunda, que aproveitemos que lo viento va a favor, u lo menos no sofla en contra, pa reconstruir los discursos d'a izquierda a ran de carrera. Y prou que sí, de l'aragonesismo, que buena falta nos fa. Como siempre, la luita yera, ye y continará en la carrera. Pero la cantidat d'entrepuces que te metan los gubiernos pa fer la tuya vida social, cultural y politica cambea muitismo la realidat y la posibilidat de conseguir cambios reals. Asinas que aproveitemos que arriba un periodo a on que en tendremos menos, d'entrepuces, y sigamos empentando las alternativas politicas que fan d'o mundo un puesto millor a on que vivir.
La decisión de Teruel Existe de presentar-se a las eleccions me pareixió una error bien gran. Nunca no soi estau a favor de partius "tematicos" como PACMA. Ni tampoco d'o que goso de clamar "partius gudrón" como PRC que, por un regular, tienen como tot programa politico un mapa d'infraestructuras y poco mas. D'os que evitan posicionar-se politicament, pero quieren entrar en una cambra lechislativa a on que habrán de fer-lo terne que terne. Y abstener-se tamién ye una manera de posicionar-se politicament. Asinas que me pareixen una mentira ya dende lo suyo mesmo planteamiento. Lo caso de Teruel Existe me tocaba mas de cerca. Ye una organización que i simpaticé muito en los suyos orichens, por qüestions tanto politicas como personals. Creigo que dimpués fue tenendo qualques errors y en zaguers me n'heba distanciau prou ya que me pareixeba que heba perdiu buena parte d'a suya utilidat como ferramienta movilizadera y transformadera d'o territorio. La presentación a las eleccions espanyolas me pareixió la error definitiva ya que convertiba lo que yera, y en la mía opinión, heba de seguir estando, un movimiento social, en un partiu que habría de posicionar-se, querese u no, en toda mena d'afers que no habrían de pertocar-le. Arriboron las eleccions y Teruel Existe consiguió lo diputau sacando-le-ne a V0X, lo que ye sin dubda una buena noticia. Qualsiquier manera de sacar-le representación a V0X me va a pareixer bien a priori. Teruel Existe ya heba feito mas por aturar lo faixismo que Mas País. Muitas d'as mías amigas, conoixidas y familiars d'o sur se feban bien contentas d'a noticia, encara que yo continaba prou esceptico. Las declaracions de Tomás Guitarte antes y dimpués d'eleccions en contra d'os movimientos independentistas y soberanistas, la suya reunión con faixistas y la propia naturaleza d'o partiu, me feban barruntar que faría estorbo pa lo gubierno PSOE-Podemos, pero vetemé que una vegada mas m'entivocaba. L'anuncio de que votaría a favor, cumplindo la suya promesa electoral de facilitar lo gubierno espanyol me sorprendió prou. Lo que pasó dimpués, con tot l'acoso d'o facherío ent'o suyo diputau, mesmo mas. Muitas d'as personas que le heban votau, u que dende atras partes d'Aragón y de l'estau simpatizaban con ixe teruelano que clamaba ricos a los "nacionalistas perifericos" en Salvados, yeran encarranyaus de tot, clamando-le independentista, comunista, satanico y que me se yo que mas. Pintadas, menazas y la vispra d'a votación decisiva habendo-se d'amagar por las carreras madrilenyas completan una historia una mica surrealista y bien propia d'a democracia bananera que ye l'Estau espanyol. Agora Guitarte amaneixe agora como un heroi d'a izquierda, habendo estau decisivo pa que hue tiengamos lo gubierno espanyol mas royo d'a historia recient. A priori, a lo menos. Manimenos, igual como votó a favor, podría haber-se absteniu u mesmo votau en contra. U, en lo caso de que la dreita hese conseguiu un pacto viable, haber votau a favor d'a suya gubernabilidat. ¿Convertiría ixo a Guitarte a l'inte en un perigloso faixista? Ixe ye precisament lo gran problema de prochectos como Teruel Existe (partiu). Un d'os avantaches d'o sistema partitocratico ye la teorica predictivilidat d'o sentiu de voto en la mayoría de qüestions d'os representants politicos. Teruel Existe habrá agora de seguir retrantando-se terne que terne y, como he dito antes, abstener-se tamién ye una posición politica. Dirá belún que ye una posición lechitima en tot lo que no afecte a la provincia, pero ye de muit mal determinar qué ye exactament ixo. ¿Qué postura tendrán quanto a politicas lingüisticas? ¿Quál debant d'a memoria historica? Todas dos son cosas muit politizadas y que afectan dreitament -¡ y cómo!- a una provincia con una luenga minorizada y scenario de muitas d'as piors esferras que se facioron en la Guerra Civil y que encara son por investigar. Que la suya simpla existencia ya ha conseguiu cosas ye indubdable. Muitas mas que no m'hese pensau. Lo sur aragonés s'ha visibilizau y pareixe que se van a prener midas politicas y d'infraestructuras necesarias y importants. Muitos defensors d'os boicots a los cavas y cosas pareixidas han sentiu lo que ye un boicot absurdo en carnes propias. S'ha charrau de Teruel mas en istas zaguers semanas que en las zaguers decadas. Y ixo ya ye muito. En no tener una ideolochía de partiu, ni sisquiera de movimiento politico, la manera en que Teruel Existe pase a la historia y cambee lo territorio penderá en buena mida d'a capacidat politica de Guitarte, pa bien u pa mal. Lo potencial ye bien gran y sisquiá me faiga cambiar d'ideya de tot lo que he pensau en totz istos meses dende que decidioron blincar a la politica institucional.
En 2001, quasi toda l'actualidat politica chiraba arredol d'o trasvase previsto en lo Plan Hidrolochico Nacional (PHN) y los entibos que lo feban posible. Prou que sí, l'actividat de Chobenalla Aragonesista, tamién. Yeran tiempos de muitismo creiximiento de l'aragonesismo. Levaba poquismo tiempo militando-ie y cada semana entraba chent nueva. Totz los lunes se feba reunión y caleba empecipiar-la con un rolde de presentacions ya que nos adubibanos a aprender-nos los nombres de toda ixa chent que acababanos de conoixer. La movilización contra lo trasvase yera constant. Practicament todas las semanas se feba bella cosa de mayor u menor entidat. Una d'as mas grans movilizacions que bi habió en ixos diyas estió la manifestación en Madrit contra lo PHN que achuntó a una patacada d'opositoras a lo travase, mas que mas, aragonesas. La manifestación prometeba estar historica y qualsiquier entidat, dende partius politicos dica asociacions de vecins, s'organizó pa fer arribar a Madrit a toda la suya chent. No recuerdo quántos autobuses montó CHA, pero en yera buen fascal. D'ells, lo menos uno yera organizau por Chobenalla. Los billetz los vendiemos a escape. Nomás la chent que yeranos activos en aquellas envueltas ya en plenabanos quasi uno. A nusatras se sumoron muitas atras personas que no yeran d'a organización. Muita chent que no heba militau en cosa y beluns que hue siguen sin haber-lo feito. Astí nos chuntabanos personas muit compromesas que hebanos estau en un ciento de movilizacions y atras que quasi yera la primer manifestación que iban. La media d'edat yera bien baixa estando yo un d'os mas viellos con los vintidos anyos que teneba alavez. Lo maitín empecipió bien luego. Faltaba buen rato pa que amaneixese quan ocupemos los nuestros posientos en l'autobús. Con tot y con ixo, belún ya heba ubierto la botella de pacharán a ixas horas. Los primers ratos estioron de muitas presentacions y d'as primers cancions aragonesistas, que continarían dica arribar a Madrit. Ya en la metropoli espanyola, empecipiemos a (des)organizar-nos. La manifestación la feban en directo Antena Aragón, predecesora de l'actual Aragón TV .Muitas creyebanos que yera una sobrebuena oportunidat pa fer-nos bien visteras. Parte de nusatras decidiemos d'alcorzar y tirar dreitament t'a fin d'o recorriu, que remataba en la Puerta del Sol. Pillemos la pancarta y empecipiemos lo nuestro viache por astí. Por lo camín ibanos dando pasquins informativos a qui nos trobabanos. Muitos d'os receptors nian sabeban guaire bien de qué iba tot ixo y, prou que quasi denguno no sabeba nian que existise l'aragonés, la luenga en que yeran escritos por un d'os dos costaus. Atra d'as cosas que gosabanos de fer t'a part d'alavez yera bella mena de pirotecnia zaborrera que personalment no le trobaba mica sentiu, pero que a muitas compas les encantaba. Mezclabanos no se qué producto que mercabanos en Gilca con zucre y ixo feba un fumo que nos creyebanos que yeranos en los conflictos d'a minería asturiana. A ixo s'anyadiba buena cosa d'ixos petardos que tanto odiaba y odio. Con lo poco talento que tenebanos, encara me foi cruces de que no hesenos de rematar bella manifestación en l'hespital con bell cremau. La ropa y los sinyals, ixo sí, siempre acababan con bell forau. La primer anecdota vinió en lo Congreso d'os Diputaus a on que un d'os companyers creyió que yera buena ideya de pintar una estrelada. Los dos antidistubrios que yeran a lo canto no compartioron lo suyo criterio y, quan le pilloron fendo-la le metió una pinyora que habió de pagar bell mes dimpués. Prou que sí, le confiscoron los tres kilos d'o "polvo de fer fumo" y las dos botellas de pacharán que levaba en la mochila. Dimpués de firme rato dondiando por las carreras madrilenyas a la fin arribemos a la Puerta del Sol. Nueva performance con lo fumo y tiempo pa unatra d'as cosas sin guaire sentiu que febanos alavez: chitar un colorant en las fuents pa que l'augua prense una color d'un morau fosco. En la televisión bell saputo comentó que i hebanos chitau tinto. ¡Pa malfurriar vin que yeranos en aquellas envueltas! L'obchectivo de fer-nos visteros, a lo menos en TV, se consiguió. Antena Aragón heba d'emplir la programación con bella cosa y entre que arribaba la resta d'a manifestación nos fació planos a embute. La manifestación yera en contra d'o PHN, pero no pas de pantanos como Yesa, Santaliestra y Biscarrués a los que nos oposabanos tamién. Asinas que i acudió a-saber-la representación pantanera. Entre ells, prou que sí, Marcelino Iglesias y Jose Angel Biel, president y vicepresident d'Aragón. Bi heba un scenario d'a TV a on que se facioron actuacions mosicals (recuerdo a Petisme y Labordeta, entre atros). En bell momento, totz dos i puyoron a que les fesen una entrevista. Un d'os chobenallos, con una puntería envidiable, quasi encierta con un uego a Marcelino, y ixo que yeranos bien luent. De tornada, chentaus y mas d'una una mica pifola, nos trobemos con la chent que heba feito tot lo recorriu, recontando-nos tot lo que nos heba pasau a unas y atras. Las chobenallas, prou que sí, aproveitabanos pa fer una mica de proselitismo, a mirar si belún se uniba a la organización. Y, de feito, con beluna lo consiguiemos. A muitas atras, manimenos, no tornemos a veyer-las por garra cabo. Pa yo, y pa muitas d'a mía cheneración politica, ixa estió una d'as manifestacions mas intensas d'a nuestra vida. Nos pilló en una edat muit choven, quan vivencias asinas te marcan pa cutio. Y en un momento historico a on que l'aragonesismo yera bien fuerte y las organizacions creixebanos muito en muit poco tiempo. Dimpués arribaría lo tiempo de perder a un porcentache muit gran d'ixa militancia poco ideolochizada, ye cabolioso. Pero muitas d'as que nos i quedemos no yeranos conscient de tot lo recorriu que tenebanos por debant. La sincusa d'o PHN feba muita honra pa prebar de "colocar" la resta d'o "paquet aragonesista". Muitismas d'as personas que se nos acercaban en ixos anyos, lo feban simplament por la oposición a lo trasvase que yera en la tele y los medios 24/7. Nusatras prebabanos d'explicar-les atras d'as nuestras reivindicacions: la luita contra las grans obras hidraulicas, l'aragonés, los dreitos historicos u mesmo la luita antitaurina u la despenalización d'o cannabis que tant presents yeran en Chobenalla. Si lo consiguiemos u no pas, y en qué grau, le pertocaría a atro que faiga servir bella metodolochía que vaiga dillá d'os míos recuerdos y opinions. Vendría en los meses de dimpués mas manifestacions d'ixa mena. La siguient, en Barcelona, a on que, lochicament, la presencia d'as organizacions antitrasvase catalanas estió muito mas important.. Valencia y Mallorca tamién n'acullioron las suyas propias. Muitas atras, adintro d'un Aragón que, antimás d'o trasvase, vivió un tiempo de muito debat social sobre un ciento de temas que la mayoría continan sin solucionar-se. Muitas de nusatras tenebanos poca u mica experiencia ni formación politica y en istas movilizacions empecipiabanos a conoixer atras envistas que no se gosaban de trobar en los medios de comunicación de masas. NOTA: Tot lo que recuento aquí son recuerdos de fa quasi vinte anyos, pasaus por lo recosiro y ruixiaus con pozals d'alcohol, asinas que probablement bi haiga mas d'una inexactitut y omisions arrienda. Teneba grabau tot lo programa d'a retransmisión d'a mani, pero lo he cacegau, asinas que tampoco no he puesto repasar las imachens. Senti-te libre de, con la educación que sin dubda tendrás, comentar-las y anyadir lo que creigas.
