Chornadas Frida Kahlo

A Biblioteca Frida Kahlo que prenzipió en o bar A Birosta ha iu china chana enamplando-se grazias a muitisma chen y agora ya tien cuatro siedes diferens. Ta qui no la conoxca ye una biblioteca que ta fer-se sozio d'ella nomás cal que lebar-les bel libro. Asinas, con l'aduya d'os sozios t'os fundos suyos se ban adibindo libros con cada nuebo sozio. Antiparti de donazions feitas por chens u asoziazions.

Agora, prenzipian un ziclo d'actos que, baxo o nombre de Jornadas Frida Kahlo: Lecturas disidentes para mentes inquietas", arroclarán buena cosa de chen de toda mena. Bi abrá conziertos, charradas, peformances, leuturas de poesías y asinas asinas. Ta bier o programa completo no ha de fer que punchar en o cartel que bi ha alto ta beyer-lo más gran. L'aragonés bi será presén en a charradeta de o 16 de Febrero, en A Enrestida, an que se charrará sobre que se lei en Aragón y an que son combidaus Xordica y Nogara entre atros. O Sabado 1 de Marzo, en A Birosta, Santiago Alba ferá una charrada rufierta. Si no lo ez sentiu charrar nunca, iz-ie porque ye un gran charrador y de seguras que'n aprenderez cualcosa.

Dende aqui felizitar a la Biblioteca Frida Kahlo por organizar istas chornadas y deseyar-les a millor suerte. A lo menos ya tenez un asisten ta bels d'os actos programaus....

Carnabals

Prenzipia Febrero y con iste mes os carnabals. Os sobrarbencos y atros que no m’intresan tanto. Os carnabals son tot un exemplo de borina pagana (como a canta de Lurte) y d’imbersión de l’orden sozial. An que toz son, u parixen iguals. Os sobrarbencos, antimás, alzan en os suyos lugars, una tradizión que china chana ha sobrebibiu a milenta afers mientres a istoria. A o catolizismo y a o franquismo. Dos d’as más faxistas corriens de ¿pensamiento? que bi ha abiu en Aragón y que han prebau que disaparixesen terne que terne. Manimenos os carnabals han endurau y continan estando una d’as más grans fiestas de muitas bals.

Dixando a un costau o sinnificau pulitico y relichioso (u antirelichioso, millor dito) d’os carnabals, son un borinon como pocos bi’n ha. Os d’A Fueba que son os que conoxco millor y os unicos que he bibiu, son bella cosa que cal bibir-la. Ta endizcar-tos un poquet tos contaré alto u baxo que se i fa.

Prenzipian o Sabado a ixo d’as 10 d’o maitín, en Tierrantona, an que se troba o conzello de o monezipio d’A Fueba. Astí dan de baldes una tazeta de chicolate u café y un poquet de coca (la de minchar). Dimpués se ba marchando (en autos) d’un lugar t’atro y en cadagún puez fer-te bella cosa diferén. En Palo bi ha un socalzet con pernil y sardinetas. En Elumo (en castellano El Humo de Muro) fan chiretas. En atros lugars entropans, ganchitos y atras potras, pastels, arañons, costiellas... Un poquet de tot. Cal dizir que si yes bechetarian ye mala cosa, pos i trobarás pocos lugars an que no aigan muerto bels pocos bichos ta fer a birolla....

Tot isto con una charanga y toda la bal y os turistas disbrazaus de cualsiquier cosa. Mochos de fregona, Calico Electrónico, Duffmen, San Pancracios, Payasos, Che Guevaras, capezas d’allo, gambas, sotas y asinas asinas. Una ripa de disbrazes por un regular bien orichinals y treballaus que, cuan plega a nuei los conoxes toz.

En rematar bi ha un ratet ta escansar, pero no guaire. Porque a ixo d’a meyanuei prenzipia una orquesta en Tierrantona an que cal endebinar qui ye cadagún, pos, por un regular a chen ya no i ban disbrazaus.

A os zaragozetas o conzello nos ha organizau bels actos no guaire entretenius, como gosan fer. Manimenos bels barrenaus d’ixos que ban contra a Expo ferán iste Biernes un carnabal en plan pasabillas que saldrá a las 18:00 d’a Plaza d’as Canteras y continará a ixo d’as 19:00 en a Plaza San Miguel. Cuento que dimpués irán por A Madalena, pero d’ixo no’n sé mica. O lema “Por un fin del mundo ecológicamente sostenible” (Por una fin d’o mundo ecoloxicamen sostenible) ye una d’as ideyas más incheniosas que nunca no eba bisto y, de seguras que, qui pueda ir-ie (beluns treballamos a ixa ora) pasará un buen rato. Que tiengaz toz un sobrebueno carnabal sigaz an que sigaz...

+ info en: http://www.pirineodigital.com/2008/reportajes/carnaval/carnaval-pirineo.htm sobre os carnabals pirinencos y en http://saludamoryrebeldia.blogspot.com sobre o carnabal alternatibo zaragozano.

Es de España y sus regiones...

ExpoFlufi no dixa d’enfolgar-me a bida. Iste maitin, ascuitando Aragón Radio, “la nuestra d’els”, deziban que ya yera presta a programación de mosica tradicional aragonesa que bi abría en a Expo. "Fote!" Me pensé mientres bel par de segundos. "A la fin sí que parix que a cultura aragonesa tendrá en a Expo bella chisleta (jejeje) de presenzia". Pero cal continar ascuitando todas as noticias dica la fin. Y dimpués d’ixe par de segundez, a locutora ha continau dizindo que Fulanico s’encargaba d’a programazión y que bi podríamos ascuitar cosas como ista que beniba contino. Y preta una jotera a cantar quemisió d’un lión (ya no sé si o zaragozano u lo de León que aparix en o escudo español) y que España entera se enardece al oir la jota. No conozco a resta d’a programación de ¿folk? ¿aragonés? que bi abrá en a Expo, pero si ixo ye o exemplo... Pos como en o Pilar. Joticas patrioticas que deziban los de Gomaespuma u Jotas Coloniales que’n podez leyer arrienda en Aragón Colonial.

Y asinas continamos, cada begada Aragón más S.L. y más chusmeso. Y aplaudindo as bondaz d’a Expo y Gran Stafa (que darán treballlo a toz!).

Jotas colonials en a Expo y t’a Feria d’Amostranza, ni brenca ni meya, que ixo ye cultura española y no cal dar-le diners como a la Feria d’Andaluzía, que, conzellera de Cultura mediante, s’ha independizau culturalmen d’España. Tanimientres, a lo menos, podremos ir siñando o manifiesto que han presentau un trapazil d’asoziazions a fabor de Amostranza ta que nos sientan (que no “ascuiten”...) una mica y que beigan que, a tamás de que a colonización cultural ye talmén a más fortal que se ye fendo dende o conzello en muitos años, a soziedat aragonesa no se dixa engañuflar y demanda Cultura Aragonesa con mayusclas.

Isto d'alto lo he escrito iste maitin sin mirar-me a web ni saber qué eba pasau en a pregunta que se fazió en o Conzello d'A Inmortal o pasau Biernes. Suerte que bi abió una camara ta grabar a bergüeñosa autitut d'os puliticos que bi eba y o caso que nos ferán.... Tos dixo penchau o bideo que cuento que ya abrez bisto en Purnas, Estricalla u Aragón Colonial...

Zienzia VS Relichión

Me rezentón un diya que en un lugar d’o Baxo Aragón un mosén metió en as fuellas d’a parroquia un testo an que deziba “Dios nos libre de los enemigos de la religión, que no son otros que la ciencia, el sexo y el socialismo”. Fote! A uno, que ye de zienzias y sozialista y que, como a toz, le fa goyo de cabo cuan fer foriquetas, isto le podría encarrañar asabelo, pero como ya i ye feito y sabe qui ye l’enemigo suyo, pos más bien rai.

Y ye que, a tamás de que bels zientificos relichiosos, que de tot ha d’aber-ie, s’enzerrinen con que a relichión y a zienzia no han d’estar enemigos, en son. En han estau siempre y en serán ta cutio. Y ye simplamén porque a relichión ye, por definizión, antizientifica. L’esprito d’an que surte cadaguna ye de raso diferén, enfrontinau. A relichión surte d’a irrazionalidat, d’os deseus y medranas d’os umanos debán d’a muerte y d’a esconoxedura d’o suyo esdebenidero. A zienzia, manimenos, surte d’o menister de bels umanos por conoxer as mecanicas que fan funzionar o mundo, d’a balura d’o conoximiento per sé. D’a creyenzia en que tot ye esplicable.

Un d’os alazez de todas as relichions ye a “fe”, que mesmo dizen que ye birtut y que definen como “creyer sin o menister de beyer-ie”. A zienzia, de rebés, aplica o metodo zientifico. Os “dogmas” zientificos no en son sino son comprobables en todas as situazions posibles. Surte de mirar-se o mundo y de beyer como ta una mesma aizión siempre bi ha una mesma reaizión. Siempre que dixamos cayer un ocheto más denso que no l’aire en a planeta Tierra, iste cayerá t’a tierra. Dengún no ha puesto fer lo contrario.Os zientificos son siempre esbiellando as teorías suyas con os datos que ban replegando sobre l’uniberso. Os relichiosos nunca no lo fan u lo fan masiau de cabo ta cuan. Mesmo fa poco que demandón perdón por lo de Galileo (qui, por zierto, teneba razón). Isto creba unatra begada de raso a filosofía de os zientificos debán d’a filosofía d’os relichiosos. Os primers se custionan terne que tener. Os zaguers no se custionan mica. No les cal. Como tienen fe, simplamen han de creyer lo que os gurús suyos dizen y au!. Mesmo si belún aintro d’as estruturas suyas custiona cualcosa, ascape lo forachitan u dizen que ye entibocau.

Tot isto lo pensaba por un programa de TB que he bisto mientres me desayunaba y an que charraban d’a teoría d’o creazionismo que agora l’han dibrazada de zienzia con o titol de “Teoría d’o diseño intelichén” y que preban de que se dé en as escuelas en cuenta u antimás de a Teoría d’a Eboluzión. Bi entrebistaban a un esfensor d’o creazionismo y a un biologo. Como yera un programa d’ixos que fan de maitins no han charrau cuasi cosa, pero de bez que les entrebistaban, se feba una encuesta imbiando mensaches y os resultaus me fan arrienda pena. Un 66% (2/3 d’a poblazión que no tien garra atra cosa millor que fer!!!) deziba que l’ombre no bien d’o mono. Si les dixamos prenzipiar con fateras d’ixas, talmen bel diya quieran que en as escuelas s’amuestre que a Tierra ye plana. Con tot y con ixo, si fesen unatra encuesta con os mobils sobre iste afer, de seguras que os resultaus suyos serían penibles tamién.

Always look...

Bels diyas dimpués y grazias a la mosica, qui escribe ye más animau (encara que igual de carrañau). Güe rasurando-me, he sentiu una canta que nunca no se cansa uno d'ascuitar-la...

Omenache a Chobenalla

Fa muitas añadas, un choben de tasamen bente añadas gosaba ir ta conziertos, manifestazions y charradas an que siempre biyeba a mesma chen. Toz ixos que bi iban yeran chobenallos. Ixe mozet, que güe escribe en blogs y foros baxo lo nombre de Barrenau, se afilió a Chobenalla un poquet dimpués de a cuarta Asambleya Nazional de Chobenalla Aragonesista. Astí enzetó tot un camín de luita pulitica y d’aprendizache que güe encara contina. Bi conoxió a la que güe ye a parella suya y a buena parti de os suyos Amigos (a mayuscla no ye una error) y, porque no dezir-lo, a bel enemigo. Bels meses antis d’a VI Asambleya Nazional y de que Chobenalla estase forachitada de CHA, marché d’a organizazión creyendo que podeba treballar en atras dembas millor que no an que yeran treballando t’a par d’alabez. Cuan los forachitón yo ya no yera chobenallo, pero me sentié tan forachitau como els. Igual como muita atra chen que sisquiá conoxeba a Chobenalla.

Prenzipió alabez toda mena de comentarios en prensa y difuera d’o microfonos y camaras, criminalizando a Chobenalla u, dreitamén, MENTINDO. Ixas mentiras que güe continan sentindo-se y dizindo-se en muitos puestos. Ixas mentiras que dengún en ha pediu perdón.

Pero, a tamás de tot, Chobenalla continó, contina y continará esistindo. Han pasau tres años, sin mica meyo economico ni cuasi lochistico y no solo continan bibos, sino que, en a zaguer Asambleya Nazional de CHA ufrión toda un lizión de coderenzia de ideyolochía, de savoir fer y d’estar prestos ta lo que calga. S’han concarau con una chen que d’o suyo orario de treballo pueden adedicar-ne parti ta fer-les a bida imposible y o Sabado de tardis, les ganón. 179 delegaus botón a fabor de que Chobenalla Aragonesista tornase a estar a organizazión choben de CHA, dimpués de que os suyos mainates prebasen ziento y una trazas de que sisquiá bi ese rufierta y milenta truquez legals, d’ixos que tantismo goyo les fan. Muitos, de feito, interpretemos ixo, como que de berdat yera posible un cambeo en CHA, que ya sabrez que no’n ye estau.

Mientres un buen ratet, diferens personas de Chobenalla y de CHA puyón t’o tarabidau ta esfender a faina de Chobenalla. Con unas charradas más que emozionans y a rebutir de conteniu. De l’atra parti, puyó nomás que un militante de Chobentú ta dizir que “las juventudes debían estar SOMETIDAS al partido”. Y ixo estió tot. Semisión, que ye lo que quiere Chobentú, y prou que tamién os mainates de CHA. Rufierta? No. Ideyas? No. Iniziatiba? No. Rasmia? No. Quieren Semisión. Y que se faigan fotos con a prensa. Ixo tamién.

Mientres tres años Chobenalla ha feito tot un proyeuto de partiu, de organizazión choben y mesmo de país y lo presentón a CHA. Me fería muitismo goyo de biyer como muita chen ese treballau en as condizions que lo ha feito Chobenalla. Chobentú, con toz os meyos d’un partiu que t’a par d’alabez yera a terzer fuerza d’Aragón, s’ha feito fotos y no presentó endrezamientos que t’abentar a Chobenalla. Chobenalla ha ganau una baralla. En ha perdiu unatra. Sé que pueden endurar muitismos años más. Como deziba un gran amigo: Sería poliu que Chobenalla bel diya fese 100 años, e?

GRAZIAS PER TOT. CHOBENALLA ENTADEBÁN!!!

Nos han timado

Nos han timado dizió Arale en a zena d’o biernes pasau charrando sobre o conteniu d’un menú ta siete personas en un restaurán chino. Tres diyas dimpués parix de raso una premonizión. Arale charraba de dos ensaladas pero perfeutamen podese aber charrau d’a güeitena Asambleya Nazional de CHA.

Renovación, compromiso, país. Iste yera o triple lema monolingüe de a zaguer Asambleya de CHA. D’esbielle no bi’n ha abiu cosa. As mesmas caras, os mesmos zeños, que deziba Barricada. Y l’amigo mudo (u no tanto), os delegaus que abión de beyer y estomacar ixe zirco.Qué esbielle ye un Consello Nazional an que, entre atros, se i troban Chesús Bernal, Bizén Fuster, Ángel Sánchez, Victor Fatás u Salvador Ariste, toz ellos con diferens y muito importans cargos antis d’o tozolón eleutoral? Nieves Ibeas, a nueba presidenta, estió eslexida con un refirme d’o 56%. L’atra opzión, Lola Giménez en tenió un 44%. S’ha tresladau isto ta la direzión de CHA? No pas. Dizen que os porzentaches en Comité Nazional son diferens y ye asinas, pero, con tot y con ixo, si de berdat creyen que ye menister esbiellar o partiu, porqué meten en o Consello a la mesma chen que antismás? No bi ha garra atro ofizialista presto ta concarar ixas fainas? No paran cuenta de que o partiu yera demandando un Consello d’entre TOZ? Pos que pena…

Se charra tamién d’integrazión y ufren zinco cacanos puestos en o Consello. Mica chenerosidat y, lo que ye pior, os güellos trancaus de raso. Agafaus os parpiellos ta no bier que muitos, talmén a más gran parti d’o partiu, quiere un cambeo. Amenista un cambeo, igual como lo amenista o partiu. Y qui creticamos dende dentro y dende difuera a CHA, por un regular somos muito menos biszerals y no tenemos tantismo odio aintro como parix que’n tienen atros… Ni ganas de ruellos u benganzas. Simplamen de que nos dixen treballar y proposar. Y que cuan lo faigamos trobemos as orellas ubiertas ta sentir-nos y ascuitar-nos porque, igual como os ofizialistas, de cabo ta cuan, fan cosas bien y les ne reconoxemos, a resta tamién en femos.

Muitos, que emos confitau, talmén por zaguer begada, en iste partiu, nos emos sentiu de raso traizinaus. Traizionaus por parolas que nos han dito. Por ixa renovación, ixe compromiso y ixe país , que cuento que ya no remeran ni cual ye. Nos emos sentiu más que traizionaus. Tamién dispreziaus. Con un conzeuto de democrazia que ni o PP. A democrazia no ye simplamen “que t’eslixan” como dizió bel personache…

Qui emos perdiu siempre y en toz os puestos ya i somos feitos. Pero parix que ye más fazil fer-se a perder que a ganar. Porque ye platero que bi ha qui nunca no aprende a ganar si no ye por goleada.

Aragón amenista un partiu diferén. Aragón amenista una CHA. No amenista un PSOE con cachirulo. No amenistamos Biels en o Consello Nazional. Ya no soi “chen como els” u talmén els no sigan “chen como yo” u nunca no en han estau.
Contino bels articlos alto u baxo intresans. Como istos bi’n ha arrienda más en a web y encara no he pasau por o foro de Chobenalla...

Unatra begada más: ENTALTO ARAGÓN LIBRE Y SOZIALISTA!!!!

http://www.radiohuesca.com/asp/noticias.asp?codcat=13&cod=359268

http://www.elperiodicodearagon.com/noticias/noticia.asp?pkid=378610
http://www.elperiodicodearagon.com/noticias/noticia.asp?pkid=378998

http://www.abc.es/20080115/nacional-nacional/renueva-division_200801150248.html

http://daroca-lorien.blogspot.com/2008_01_01_archive.html#5167962600046949344

Renovar

Me fa duelo aber d'escribir en castellano, pero ye de dar que beluns nian saben charrar bien ixa luenga. D'o Dizionario d'a RAE:

renovar.
(Del lat. renovāre).
1. tr. Hacer como de nuevo algo, o volverlo a su primer estado. U. t. c. prnl.
2. tr. Restablecer o reanudar una relación u otra cosa que se había interrumpido. U. t. c. prnl.
3. tr. Remudar, poner de nuevo o reemplazar algo.
4. tr. Sustituir una cosa vieja, o que ya ha servido, por otra nueva de la misma clase. Renovar la cera, la plata.
5. tr. Dar nueva energía a algo, transformarlo. Este autor renovó el teatro de la época.
6. tr. Reiterar o publicar de nuevo.
7. tr. Dicho de un sacerdote: Consumir las formas antiguas y consagrar otras de nuevo.
8. tr. ant. novar.

Bellas risetas

Por si un caso, prenzipiemos o cabo de semana con bel poquet d'umor. O primer bideo ye uno d'os millors que'n he bisto de El Sobrino del Diablo y o segundo d'una nina bien maja (y ta que lo diga yo...) en Aragón TV:

Soluzions fatas

Leigo, beigo y ascuito en o meyos de masas como Rajoy ha dito que, si gana, creyará un Ministerio d'a Familia. No en han dito guaire más, pero cuento que ye porque no bi ha más medolla. Y no bi'n ha porque ye una d'ixas soluzions fatas que tan de moda son en zagueras... Que bi ha problemas con a familia? Pos se creya un Ministerio d'a Familia y apañau. Puestar que iste mozo tienga problemas con a suya, yo con la mía, prou bien, grazias... Paso prou de charrar unatra bez sobre o conzeuto que tienen os cristianos sobre lo que ye a familia que me parix simplamen penible u sobre qué ye a familia dende una ambiesta más filosofica y razionalista (bel diya lo feré). D'o que quiero charrar ye d'a soluzión que se proposa a un problema: a creyazión d'un Ministerio. Deziba bel saputo que si quiers que bella cosa no se faiga creyes una comisión. Como ixo ya lo dizió bel saputo ya no lo fan tan asoben. Encara que en bels casos, como en a Comisión de l'augua d'as Cortes Aragonesas si que lo han feito, u en o caso d'a comisión de CHA sobre Gran Stafa.

Agora la moda ye unatra. Si bi ha bel problema bi ha dos posibles soluzions: a creyazión d'un Ministerio u a d'una asignatura de secundaria, pende d'o caso. Emos bisto, por exemplo, o Ministerio de Bibienda de Zapatero, que no puede fer cuasi cosa, porque as competenzias son d'os conzellos. En tot caso, podrá fer bel alcuerdo con els. Diners publicos malfurriaus. Tamién o gubierno español de ZP fazió ixa marabiella de "Educación para la ciudadanía" que ye como a Formazión de l'esprito nazional, pero en progre. A os pais y mais no les educa ni dios y a los ninos y ninas parix que con leyer-les a Constituzión (espanjola, prou que sí) ban a tornar-se unos buenos mozez y dixarán de foter-se tot o diya con a Play ta poder ir a os campamentos-picaderos de l'EDU.

Y la zaguera, la de Rajoy. Con o suyo Ministerio d'a Familia, soluzionando un problema que sisquiá esiste, y que no sé guaire bien si s'adedicará a punchar os condons d'a chen, a encorrer manfloritas u a fer-nos buquir terne que terne. (Si fese isto zaguero muitos se pensarían de botar-le).

Siñors puliticos, por fabor, no faigan cosas tan penibles. Que fan pena.

Conziertismo

Me calió marchar t’o leito una miqueta tardi, pero a la fin o Chuebes 3 remanié debán d’a TB con os güellos pataleros ta poder bier o resumen d’o conzierto d’os 25 años de Fablans. “Prenzipian bien!” – me pensé cuan, a “Salud País!” de La Ronda de Boltaña le metión de soztitol “Días de albahaca”. Pero cal dezir que a triga de cantas estió prou buena. Ta qui no lo biese, fazión dos cantas de cada colla, fueras de La Ronda, que’n fazión tres. De zensura, me’n asperaba más. Mesmo metión “nomás ta sentir” de Prau. Qui no l’aiga sentiu en os discos que no la i mire que no bi ye. Ye una d’as nuebas cantas y ye buenisma. Y ta rematar o conzierto País Perdido de La Ronda.

Tot isto ye lo que fazión bien, pero prou que cal charrar tamién de tot lo que fazión mal: L’orario, por exemplo. Cuasi a la una d’o maitin d’un chuebes sin fer cuasi publizidat (si se’n fazió). O soniu, que yera penible. Feba asabela pena sentir “Soy gaitero” sin sentir a gaita, u bier como os tabals de Lurte, a tamás de que les enfocaban prou asoben no se sentiban mica. O publico, que yera disaparexiu y cuan feban un plano gran, por un regular, a foscor no dixaba bier-lo. Con tot y con ixo, de siñals d’Aragón se’n bieban arrienda, más que más, en a zaguer canta d’a Ronda. Y ta rematar la error más gran. Si yo no i ese estau, si no ese sabiu de qué iba ixo, lo mesmo podeba pensar que yera un conzierto feito por Aragón Radio, Intermon Oxfam u la parroquia de Santa Engracia ta replegar fundos ta la Expo u quemisió. Nomás se beyió un cartel d’a Federazión de Fablans en prenzipiar y en rematar o conzierto. Ni se sabeba que yera por o 25 cabo d’año suyo ni dizión cosa de l’aragonés. Ixo, y que a metat d’as cantas estión en castellano, sacó prou de conteniu a lo programa.

Asperemos que lo repitan en millor orario y que faigan una chicota presentazión de dos minutez an que digan tot ixo que “xublidón”. Tampoco no les demandamos tanto, no?

Nabidat TB

Primer de tot, goyoso año 2008 ta toz. Ha pasau buena cosa de diyas dende o zaguer articlo, pero ye que o treballo y os compromís de toda mena no dixan guaire tiempo ta escribir.

Ya charraba antis que no prenzipiase isto d'a nabidat, que me fa asabelo fastio por arrienda razons. Una d'ellas ye a programazión d'a TB. Cal dizir que soi un gran consumidor de TB. Malas que tiengo bel ratet la enchego y beigo cualcosa asinas que no soi guaire desichen con o ran de os programas. Pero en istos diyas ixe ran, que ya ye baxo de normal, plega en un fosco forau que fa que mesmo a yo m'agane de amortar "a caxa fata". Un buen exemplo estió a nuei de cabo d'año an que as TB's trigón a os piors treballadors que'n tienen ta fer a orterada de l'año. Ramonchu, Igartiburu, os de matrimoniadas (chelaus en a freda Inmortal) y asinas asinas ta presentar un d'os programas más penibles de tot l'año an que siempre aspero que belún trasque mal bella uga y prete a gomecar... Contino se fazió un zarpau de programas basuera con mosica patrozinada por a SGAE y os de siempre fendo lo de siempre. Bisbal y cía chilando y blincando. Muito regueton, "abadexo" y pop d'o pior. Penible.

Tamién paré firme cuenta en a programazión d'a nuei d'o 24, pero por atras custions. Fendo zappin a mía suegra, pasó por as TBs gallega y basca an que feban programas con mosica tradizional d'ixas tierras. Plegó en Aragón TB an que asperaba trobar-me con bel zappin d'a canal con o millor de l'año y ixas cosas, pero be-te-me que yeran fendo-ie una zinta d'ixas biellas que fan tan asoben. Sisquiá as "joticas d'o Pilar", tan españolas y catolicas ellas....

Prenzipia l'año ixa mesma canal, "A nuestra" que le dizen, con o conzierto, ista nuei de o 25 cabo d'año de Ligallo de Fablans. Ixo sí, a las 0.30 y dimpués d'o bamboso programa d'Antón Castro, por si belún remane dispierto. Asinas que metez os bideos a grabar y penchaz-lo dimpués en YouTube, por fabor... Y asperemos que Aragón TB contine fendo ixa mena de contenius. Como, tanimientres, l'aragonés cuento que continará desaparexiu en "A suya" (l'aragonesa, y no guaire, d'os castellanofablans) tos pencho contino o bideo que cuento que ya abrez bisto en Chemeco u Estricalla de Manolo García cantando en aragonés.