L'aragonés ye bien vivo (noviembre 2012)

De tornada ta La Enredadera de Radio Topo, que tos remero podetz sentir dende o suyo blog, dimpués de una chiqueta colaboración con atro programa, El Kantamañanas, a on que estié charrando bell poquet sobre a homeopatía. Contino tenetz o resumen de contenius d’ista edición de “L’aragonés ye bien vivo”.

Peli d’o Bandiu Cucaracha
O primer largometrache aragonés d’animación podría fer-se en aragonés. A historia de Mariano Gavín, o bandiu Cucaracha podría blincar t’a gran pantalla si os suyos creyadors, Hector Pisa y Juan Alonso consiguen os diners ta fer-la. A financiación se ye fendo a traviés de micromecenazgo u crowdfunding. Ta qui no sepa qui ye, se tracta d’una traza muito emplegada en zagueras ta financiar obras d’arte como discos u pelis. Qui quiera refirmar a financiación dentra en una web y ingresa una cantidat. Ixa cantidat dimpués da dreito a una copia d’o disco, por eixemplo, u entradas t’o concierto presentación u t’a devantadera d’a cinta y asinas asinas.
A cinta será rodada de raso en aragonés y dimpués traducida t’o castellano, l’anglés y o francés. Contará con a colaboración de personaches conoixius d’o mundo d’a scena como Javier Coronas, Pepín Banzo, Joaquín Sorribas, Sho Hai, Isidro Ferrer, Francisco Palomares u Fran Fraguas.
A peli promete accion y aventuras con muito ficacio en o tractamiento estetico y visual d’a epoca y será feita con monyacos de latex movius por os creyadors.
Ta qui encara no conoixca a Mariano Gavín, o Bandiu Cucaracha, remerar que estió un bandoler d’o sieglo XIX que, en a Sierra d’Alcubierre, diz que furtaba a os ricos ta dar-les-ne a los pobres, como un Robin Hood aragonés, y que remató muerto por balazos d’a Guardia Civil, de conchunta con a resta d’a banda suya. Y si queretz conoixer a suya historia lo millor ye sentir a sobrebuena canta que fació fa muitas anyadas La Orquestina del Fabirol.
A mosica d’a cinta tamién será de luxo con nombres como Moby, Lurte u Trivium Klezmer.

La cursa del submarino
La cursa del submarino ye o nombre d’un curtometrache feito por os ninos d’a Escuela de Sant Chuan o curso pasau y que participará en o “Certamen Nacional de Encuentro de Escolares”. Bi participan ueito curtos aragoneses más, pero iste ye l’unico feito de raso en aragonés.
O curto reconta a historia d’o capitán Pifolo y os suyos repatans a bordo d’un submarino y d’as aventuras que les pasan. O resultau ye una falordieta de quatre minutos bien pincha y muito bien montada. Sobrebuena iniciativa d’a Clica del Cinca-Cinqueta y asperemos que ganen!       

 

Zaragoza sinya o manifiesto por un Aragón trilingüe
Fa bellas pocas semanas conoixebanos o refirme d’o concello de Zaragoza a lo manifiesto Aragón Trilingue, a iniciativa de CHA. Ista refirme ye aintro d’una politica de mover ixe manifiesto en as institucions a on que ixe partiu ye present. S’ha conseguiu en bells poquetz, como en Zaragoza, a on que a suma de CHA, IU y PSOE lo ha feito posible. En atras institucions con mayorías PP-PAR u a on que lo PSOE ha dau libertat de voto, no ye estau posible.
Cal remerar que o debandito manifiesto sale d’a Coordinadera por un Aragón Trilingüe que se ye tornando a achuntar dende ista primavera y a on que bi ha organizacions de toda mena: politicas, culturals, sindicals, … O manifiesto denuncia o tracto que son tenendo as luengas de man d’o nuestro gubierno y apuesta por continar treballando ent’a oficialidat que ordena la UNESCO y por a suya amostranza y refirme dende as institucions.
L’anterior vegada que se fació qualcosa parellana estió quan se fació o manifiesto “Chuntos por l’aragonés” que levó t’o II Congreso por l’aragonés, y que lo refirmoron buena cosa de concellos, diputacions provincials y organizacions que iban dende penyas dica l’IEA pasando por asociacions, partius, sindicatos, collas de mosica, miles de personas a ran individual...

 

D’estrela a estrela

Ya plega a segunda edición de D’estrela a estrela, una chornada a on que toda a emisión de Radio Ropo será de raso en aragonés. L’anyo pasau estió a primer edición con más de 10 horas de emisión en aragonés a on que participoron programas como La Enredadera, El Kantamañanas, Rueda libre, Hijos del agobio y, prou que sí, a chent de Fendo Orella.

Ista anyada a respuesta ye estada mesmo millor y son bells 17 programas los que se ferán en más de 15 horas que bi ha programadas. Como novedat, antimás, tamién se ferá servir o catalán en belun d’os programas.

O venient diya 1 d’aviento a las 8 d’o maitin prencipia a emisión, que rematará con una fiesta en l’Arrebato a on que podremos chuntar-nos totz los que encara continemos de piet y enteros.

 

 

 

Día del patués
A val de Benás contina contrimostrando as suyas ganas d’esfender o patrimonio lingüistico y lo fa con o día del patués, una iniciativa que chuntó a lo lugar en esfensa d’iste dialecto de l’aragonés tan particlar.
Os actos, que se facioron en o Palacio d’os Condes d’a Ribagorza, prencipioron con una chicolatada con torta, continoron con una actuación de man de l’alumnalla d’o CRA (Centro Rural Agrupau) Alta Ribagorza y d’a suya profesora Carmen Castán. Dimpués, a las ueito, se fació prochección d’un curtometrache realizau por l’alumnalla d’o CES “Valle de Benasque”. A chornada remató con a lectura de bellas partis d’as obras ganaderas d’a sección “Poesía y Narrativa en Patués” d’o premio literario “Villa de Benasque”.

 

Feria d’o Libro Aragonés de Monzón
Plega ya a Feria d’o Libro Aragonés, una d’as primers cosas que’n charré en iste blog, fa ya quasi seis anyadas, y una d’as fitas fixas de todas as anyadas.Se fa a XVIII edición y han trigau como tema central “As escritoras aragonesas” qui protagonizarán dos exposicions en a parti d’abaixo d’a zucrera de Monzón.
Entre os expositors, como todas as anyadas, bi serán asociacions, editor y botiguers con arrienda materials en aragonés y sobre a cultura aragonesa. Por un regular gosan d’estar-ie Nogara, Fablans, Consello d’a Fabla, Xordica, Gara d’Edizions, Mira editores, Rolde d’Estudios Aragoneses / Aladrada, Asociación de Gaiters d’Aragón, Editorial Pirineos, y muitos atros, que encara que no tocan o tema de l’aragonés fan cosas bien pinchas: Eclipsados, GP Ediciones, Onagro, Malavida, …
No s’ha anunciau encara si ista anyada bi habrá o tren d’a cultura que gosa de puyar-ie dende Zaragoza. O cambio de dirección en o Patronato a trayiu cambios tamién en a Feria. Se ferán menos presentacions ixamplando o tiempo de cadaguna. Bi habrá una pregonera d’a Feria que iste anyo será Luz Gabás y se ferá a entrega de dos premios, que encara no se conoix a ganadora.
Tamién s’ha feito promocionar a feria mientres iste mes con un ciclo de trobadas con autoras por a on que son pasadas Ángeles de Irisarri, Patricia Esteban, José Antono Adell u Ros Beret. A novedat, talment buena t’atros, pero penible ta yo, que me l’habré de trusquir, ye a coincidencia d’a FLA con atra feria, Navideas, a on que os comerciants locals prebarán de sacar treslada vendendo cosas de nadal. Ixo sí, caldrá prebar a pista de chelo, que no se tien a oportunidat guaire asoben...

Rematemos con o reto de que bella colla faiga una canta en aragonés, que ista vegada, puet estar que tienga exito. Ta ixo remeremos a versión que fació Ángel Petisme de Ixo Rai de "Te debo una canción" y que s'editó en o disco tributo Nueba Cozina.

Y ta despedir-nos tos deixo con o video promocional de D'estrela a estrela d'ista anyada.

 

 

Zarrau por vada

Poco puedo alportar que no s'haiga dito ya sobre a vada que bi ha o 14 de noviembre. Talment me quede con a frase de Javier Gallego en a suya Declaración de vada, que escribiba hue en El Diario: "Ista vada ye un deber porque de dreitos, no nos ne queda".

 

Asinas que simplament remerar a todas as lectoras d'iste quiesto blog que maitin tenetz a oportunidat de concarar-tos con todas as inchusticias que sotz viyendo arredol vuestra. Maitín podetz esleixir a luita contra qui han esfendiu os desahucios dica ahiere y que no han prencipiau a reblar dica que tres personas han muerto. Podetz esleixir luitar contra qui tos quieren sacar o dreito a la sanidat y a la educación, contra qui quiere que nunca no podatz tener un treballo digno y seguro ta que siempre pendatz de l'amo. Contra qui retalla d'a necesidatz más alazetals entre que financia relichions, torturas animals y campanyas nacionalistas en esfensa d'o castellano. Maitin mesmo podetz esleixir fer vistera ixa critica que tanto cal a los sindicatos mayoritarios espanyols, participando en toda a graniza cantidat d'actos que han programau organizacions de toda mena y que mica no'n tienen que viyer con as suyas malas trazas. Maitin podetz dar un trango enta debant y, sí, cambiar o mundo.

Porque as vadas fan honra. Porque as vadas pueden cambiar y han cambiau as cosas mientres toda a nuestra historia. Porque a vada ye l'arma más poderosa de qui no tenemos atra arma que lo treballo nuestro. Pero sobre tot porque o chueves, y o viernes, y a resta de diyas d'a tuya vida podrás estar argüelloso d'haber teniu dignidat y haber estau parti d'a luita por os nuestros dreitos. Y, si yes como yo, simplament porque no te'n queda atra,  porque no sabes vivir d'atra traza.

A info la tenetz por tot, pero tos deixo bellas pachinas y articlos que tos ferán honra:
Arredol
Arainfo
Radio Topo

Vada en La Enredadera 
Vada en Fendo Orella

Ampraus 063: Fendo orella, transchenicos, extraterrestres y Chicote

Fendo Orella. 
Como ya comenté charrando de La Enredadera, he prencipiau una serie de colaboracions en o programa Fendo Orella de Radio Topo, a on que charraré, igual como aquí, d'o que me vaiga aganando. Iste primer programa prencipié charrutiando y enamplando un poco l’afer d’os fusos horarios que'n charraba fa poco y, a o filo d’a noticia publicada por Arredol, charrando de Sicilia, o suyo movimiento independentista y os suyos vinclos con a Corona d’Aragón, remerando bells capitols importants como o d’as Vispras Sicilianas. T'ascuitar-lo, puncha aquí.

Transchenicos en El Periodico
En leyendo El Periódico de Aragón me trobé con iste intresant articlo charrando d’a "SGAE agricola", a on que os agricultors y a UAGA se queixan de que les cobren dreitos d’autos por as simients que fan servir y que mercoron en o suyo diya. Ista ye una d’as tantas conseqüencias economicas que tien l’actual politica agricola y a espardidura d’os cultivos transchenicos y que, en una grau error estratechica, menos se’n charra. O discurso arredol d’os transchenicos, u a lo menos los que goso sentir yo, se centran masiau en a demba d’a salut. Asoben dende o mundo scientifico (y no soi charrando de chent mercada por Monsanto y cía), se vulcan u a lo menos se meten en dubda os argumentos d’os antitranschenicos con mayor u menor fortuna. Manimenos as conseqüencias t’a biodiversidat y t’a economía son brutals y incontestables. Y agora muitos d’os agricultors que, en o suyo diya, y no sin as suyas razons lochicas, apostoron por a cantidat y a dependencia d’atros contra a calidat y a soberanía propia, son viyendo como qui creyó y vendió ixa tecnolochía quiere replegar l’esquilmen. Y lo que nos queda por viyer... Bien se vale que, en zagueras, iniciativas como o Rete de Simients y muitas atras son luitando por una traza d’entender l’agricultura diferent y aluenyada d’as grans transnacionals y d’as trazas de producción ultracapitalistas.

Un president extraterrestre
Magonia, o blog de Luis Alfonso Gámez, un d’os dinamizadors d’o movimiento sceptico en l’Estau, ha publicau fa poco a curiosa historia d’un candidato t’a presidencia d’os EE.UU. refirmau por o lobby extraterrestre. Gabriel Green, qui aseguraba que os extraterrestres son”buena chent”. Deciba tamién que as mullers extraterrestres yeran “polidas de tot” y que, encara que os extraterrestres podeban conquerir a tierra en un petén, no lo feban porque “iba en contra d’os suyos prencipios”.

En as presidencials se minchó os cagarros pero, quan se presentó t’o Senau por California consiguió 171.000 votos. Masiaus ta estar una conya marinera, ¿no?. Dimpués d’o fracaso en a suya carrera politica, barrachó as paranoias extraterrestres con a relichión y dició que Chesús (o de Nazaret) tornaría t’a Tierra en un platet volador. Un nuevo heroe t’a mia achenda que compite con o guardián d’as estrelas.

Pesadilla en la cocina
No soi mica amigo d’os realities. De feito, a más gran parti me fan muito fastio. Asinas que quan viyé que anunciaban “Pesadilla en la cocina”, decidié de no viyer-lo, encara que o tema d’a hostelería me fa muito goi y que a promoción yera una d’as millors que he visto en muito tiempo (increyible o “inte churi”). O caso ye que a la fin reblé a los deseyos d’Arale y viyemos o primer episodio d’un restaurant de Pinto que teneba como amo a un carnuz quasi alcoholico y qui, como totz os galvans, no feba que acusar de galvana a toda la chent que teneba arredol treballando firme. En o segundo episodio, o perfil yera parellano, con un pai alcoholico rodiau de fillos profesionals y casau con una muller con muito más exito que no ell.

O programa me pilló dende primeras y me pareix que ye sobrebueno ta que toda la chent que nunca no ha treballau en a hostelería pueda apreciar lo duro y dificil que ye ixa repolida profesión. Tamién me fa muito goi que, entre tanto reality apolocheta d’a galvana y d’a polideza malentendida, a la fin un programa meta en valor l’orden, a responsabilidat y a profesionalidat.

En contra d’o programa, que tamién tien cosas malas, ye a parti d’o show emocional. Me sobran as glarimas y chilos d’as treballaderas, u d’a mainate, quan bi ha un pleito d’o copón. Entiendo que ye parti d’o show y que cale ta pillar a la chent que a parti lochistica y profesional les bufa la pocha, pero a yo me sobra. Y prou que cal decir que con perricas, chufletz. Que a más gran parti d’as indicacions que da Chicote son profesionals, pero ya de paso le foten unas transformacions a los guariches que no se las puet permitir quasi dengún. Y menos agora.

Resumindo, a tamás d’estar un reality y d’os chicotz defectos que tien, aspero que “Pesadilla en la cocina” contine en ista mesma linia y que tiengamos Chicote ta rato...

PD: Y tot isto lo escribié antis de conoixer a la Yoli d’o tercer episodio...

Entrevista con Dawkins: relichión, sciencia, evolución...

Vilaweb me fació fa bells diyas un repoliu present en forma d'una entrevista a Richard Dawkins, de qui ya he charrau bellas quantas vegadas en iste blog. Ta qui no lo conoixca breument diré que ye un brillant biologo evolutivo qui s'ha adedicau, antiparti de a las suyas investigacions, a fer una important faina d'espardidura d'a Teoría d'a evolución. En zagueras ha pillau bella relevancia meyatica por concarar-se con a relichión, tanto a ran d'a suya demba luitando contra l'amostranza d'o creacionismo en EE.UU., como a atro rans fendo parti d'o movimiento ateo y sceptico por o que pasan nombres como James Randi, Paul Kurtz, Carl Sagan, Isaac Asimov, Daniel Dennett u Bertrand Rusell, por decir-ne bells quantos.

Jacques Monod deciba que un aspecto curioso d’a teoría d’a evolución ye que totz creyen entender-la. ¿Porqué piensa que a evolución ye tan dificil d’entender? ¿Ye nomás a dificultat que tenemos t’asimilar a inmensidat d’a escala cheolochica de tiempos?
Yo gosaba pensar que yera ixo, pero agora creigo que realment bi ha bella cosa más. Pienso que a dificultat ye relichiosa, pero en un sentiu muito especial d’o termino. Muita chent piensa que si creyese en a evolución sería estando desleyal a la suya relichión, y que no se puet estar a o mesmo tiempo relichioso y evolucionista. Tamién pienso que bi ha una dificultat real ta entender como ye que as leis d’a fsica pueden haber feito plegar ta bella cosa tan embolicada como nusatras mesmas sin aduya de garra mena de disenyador. A muitas nos pareix de raso obvio que un organo tan complexo como un corazón u un rinyón u un uello ha de tener un disenyador, y costa tiempo asumir a ideya de que a evolución por triga natural ye una fuerza con prou potencia ta fer chusto ixo. Pero ixo nos leva a lo tuyo comentario sobre o tiempo: a la evolución le cal una cantidat inmensa de tiempo y no somos feitos a pensar en terminos de cantidatz de tiempo tan grans.

En una ocasión afirmó que s’heba sentiu atrayiu ent’a biolochía por o suyo intrés por qüestions filosoficas profundas d’a mena “qui somos” u “que femos aquí”. En o suyo pareixer, ista ye a motivación que atrate a la mayoría d’os estudiants ent’a biolochía?
Pasé muitas anyadas entrevistando estudiants que quereban venir ta Oxford y, naturalment, una d’as preguntas que les feba yera porque quereban fer biolochía. Y quasi totz yeran ornitologos, coleccionistas de bichos... yeran naturalistas. Ista no yera a mia motivación, por ixo pienso que as tazons más filosoficas, que me levoron a intresar-me por a biolochía son esferents d’os d’a mas gran parti d’a chent. Pero realment ye una pena porque a biolochía tien muitismo que contribuyir a istas qüestions más fundas.

¿Por qué l’intresa a comprensión publica d’a sciencia, antiparti d’o feito que mientres más de dotze anyadas ocupó a prestichiosa catedra Charles Simonyi t’a Comprensión Publica d’a Sciencia d’a Universidat d’Oxford?
Pienso que a comprensión scientifica d’o mundo, de l’universo - y en o caso mía, especialment d’a vida- ye tan inmensament excitant, emocionant, poetica y maravillosa, que sería una pena enorme si belun se’n ise t’a fuesa sin haber puesto apreciar-la. Por ixo siento un deseyo enorme d’amostrar a la chent como de maravillosa ye a sciencia. Si no quieren ascuitar, me pareix bien, pero pienso que ye trachico que a chent no siga expuesta a la sciencia.

¿Os scientificos son, por un regular, buens comunicados?
Muitos scientificos en son, encara que tamién bi’n ha muitos que nian preban de fer-lo u que no se les da ista oportunidat. Ye prou triste, pero ya me i he feito: cada vegada que apareix en as depeixas una noticia sobre sciencia, os periodistas de camín me gritan por telefono. Una vegada les dicié: “¿Por qué me gritatz a yo? Bi ha muita atra chent... ¿Por qué no gritatz a un brillant estudiant de doctorau que conoixca l’afer, que regular que será encantau de salir por a radio?” O motivo ye que muitos periodistas y editors de depeixas son uns galvans y no se fan o poder de parar una lista de buens comunicadors. Continan endrezando-se una vegada dimpués d’atra a la mesma meya dotzena de personas que ya conoixen y que’n confitan ta dar-les una buena historia. Habrían de dar una oportunidat a la chent nueva.

¿Una divulgación scientifica correcta ye prou t’amerar os recels que bi ha enta os  trangos enta debant d’a sciencia y a tecnolochía?
Bueno, no sé que atra cosa podríanos fer. No sé si en ye prou, pero quiero pensar que sí que’n ye. No veigo que podemos fer dillá d’amostrar o que sabemos y animar a la chent a pensar por si mesma. No se tracta de decir a la chent o qué ye verdat: o que queremos decir-les ye como hemos descubierto isto u ixo, como resolver os problemas por ells mesmos, como evalguar a evidencia, como fer ta no deixar-nos espantar por a medrana d’entibocar-nos...

Pero bi ha muitos y buens libros de divulgación sobre evolución y con tot y con ixo...
Puet estar que a chent no los leiga. Bi ha muita chent que merca libros, pero muita más que no pas. O millor que podemos fer ye continar escribindo libros y animar a la chent a discutir as qüestions con atros. No podemos fer cosa más.
 

Con bella freqüencia me veigo forzau a excusar-me porque no foi investigación aplicada, nomás investigación basica. ¿Como concibe a relación entre sciencia basica y sciencia aplicada? ¿Ha d’estar siempre util a sciencia?
Pienso que la sciencia sufre as conseqüencias d’estar, por un regular, util, lo que leva a muita chent a pensar que a unica cosa que cal asperar d’a sciencia ye  a utilidat. De bella traza os scientificos nos beneficiaríanos si recibisenos o mesmo tractamiento que atros especialistas como, por exemplo os poetas... dengún no aspera que a literatura tienga un beneficio practico, y alavez se les permite estudiar-la por si mesma. A sciencia habría de prener a mesma posición. No soi decindo que a sciencia con utilidat practica no haiga d’estudiar-se, pero pienso que no ye l’unico motivo ta fer sciencia, ni sisquiá o más important. Bellas vegadas he feito servir l’analochía d’as sartainas de superficie no adherent. Bi ha chent que chustifica a exploración espacial decindo que as sartainas no adherents estioron un subproducto d’a exploración espacial, pero ye de dar que se tracta d’una trivialidat. Una atra comparación que he feito pende en afirmar que o beneficio d’a mosica ye que constituye con buen exercicio t’o brazo dreito d’o violiner... ye esclater que ista no ye a qüestión. De nuevas ye una conseqüencia trivial... lo que quiero decir ye que a utilidat d’a sciencia ye important, pero que cal meter-la en o puesto que le pertoca, cal tener as prioridatz esclateras.

Puet un creyent estar darwinista como afirma Michael Ruse en o suyo libro ‘Can a Darwinian be a Christian?: The Relationship between Science and Religion’ (2004)?
Muitos en son... bueno, a lo menos beluns en son!. Pienso que ye muito dificil pero beluns, ye de dar que lo consiguen. Michael Ruse y atros afirman que relichión y evolución son perfectament compatibles, pero me pareix que se tracta d’un cenyo de pacificación politica. Cal entender-lo en o contexto d’os Estaus Unius, a on que bi ha en marcha un proceso politico que resulta muito dificil d’aturar: a subversión d’a educación biolochica. Ta muita chent, incluyius Michael Ruse, Eugenie Scott y mesmo a posición oficial d’a National Academy os Sciences lo que cal fer ye animar a la chent a pensar que relichión y sciencia son de tot compatibles y que se pueden practicar as dos, que no existe absolutament garra conexión entre ellas: a relichión tracta sobre qüestions morals y.... no sé que más... sobre qüestions profundas relativas a la nuestra existencia, entre que a sciencia s’ocupa d’as pregunta d’o cómo. Pero pienso que ye una traza gabacha d’evadir o problema. Con tot y con ixo, puedo entender a motivación politica que bi ha dezaga d’ista posición.

Muitos probablement son d’alcuerdo con as suyas ideyas sobre a relación entre sicencia y relichión, pero s’alzan as opinions suyas ta ells mesmo. ¿Quan y como decidió salir de l’almario?
Me preocupa la verdat, no me fa goi o fraude deliberau, no me’n fa la hipocresía, pienso que cal clamar a las cosas por o nombre suyo, pero de trazas educadas, no pas agresivas. Se fa una inchusticia con yo quan se diz que soi francament agresivo. Siempre soi estau educau. Pero tamién considero que habríanos de decir lo que de verdat pensamos en cuenta de simular.

¿Podria explicar-nos os problemas que ha teniu fa poco en Oklahoma?
Facié una charrada en Oklahoma en marzo y un congresista [o republicano Todd Thomsen] presentó una moción en o congreso estatal ta que se condenase a la Universidat d’Oklahoma por convidar-me con a enchaquía d’o que i diría. Realment no sabeba lo que i diría, pero yera convenciu que diría cosas contrarias a la opinión d’a más gran parti d’os ciudadans d’Oklahoma. Contesté decindo: ¿Ta qué se piensa que existen as universidatz?”. Ye de dar que no ta enfortir as opinions d’os ciudadans de l’estau d’Oklahoma. Dimpués, ell mesmo u belatro congresista preboron de sucherir que a Universidat yera malversando fundos publicos y denuncioron que se tractaba d’un gasto ilechitimo. Exichioron una copia de toda la correspondencia entre a mia oficina y a Univesidat ta prebar d’establir quantos diners me heba pagau. Lo bueno de tot ye que no me heban pagau ni un centimo. De feito, renuncié a qualsiquier mena de remuneración, ya que yera una charrada endrezada t’os estudiants y yo quereba ufrir os mios servicios de baldes. A la fin, ista chent remató escaldada, encara que, ye por demás que no lo reconoixerán. Dimpués preboron d’enrestir contra o profesor de cheolochía que m’heba convidau, pero afortunadament a suya plaza ye consolidada y ye difuera de periglo d’as enrestidas suyas.

¿Que nos puet decir d’o suyo venient libro?
Ye simplament una exposición d’a evidencia a favor d’a evolución. Sorprendentement, ye una cosa que no heba feito nunca porque, encara que he escrito ueito u nueu libros sobre evolución, dengún d’ells presenta l’evidencia que ye cierta. “O chen egoísta” ye una traza nueva d’entender a evolución; “O relocher ciego” y “Escalanado a montanya improbable” son trazas diferents de contrarrestar as mugas que empachan que s’accepte; “O recontamiento de l’abantpasau” ye sobre a historia d’a vida. Pero en realidat no he escrito nunca antis sobre a evidencia a favor d’a evolución, y d’ixo charra o nuevo libro.

A entrevista entera en: http://www.metode.cat/revistes/entrevista-monografic/richard-dawkins