De tornada por l'IES Andalan

Fa bella semana me convidoron a charrar en l'Instituto d'Educación Secundaria Andalán sobre o periodismo en aragonés. Ixe instituto de l'Almozara m'acullió en dos d'os anyos que remero con más carinyo d'a mia vida: os que estudié FP.

Yo veniba de fer Bachillerato en l'IES Medina Albaida. I colaboré con a revista de l'instituto, estié de representant estudiantil y participé como podié en tot lo que se proposaba. En Andalán, m'embrequé menos, pues las de FP febanos poca "vida d'instituto", pero con tot y con ixo sí que participé en bella coseta. Ya me tocó d'experimentar con a LOGSE, estando un d'os primers que feba ESO y Bachillerato. En a FP me pasó lo mesmo. O nuestro grau levaba nomás un anyo implantau y nusatras estiemos a segunda fornada en rematar-lo. En ixos anyos aprendié quasi tot lo que sé de Electronica que dimpués ixublidé mientres a carrera universitaria y conoixié a belun d'os millors profesors que nunca no he teniu. Talment siga por recosiro u por as borinas que nos febanos dimpués de clase. U porque en ixas envueltas yo yera tot un gigoló. Pero regular que tiengo un recuerdo d'aquells anyos imborrable de tot.

Tornar-ie me trayó un fascal d'alcordanzas. Pareixe mentira como puetz ixublidar seguntes qué cosas, que te tornan ta l'esmo quan viyes qualcosa tant simpla como una recholeta. Dondiando por os pasillos de l'instituto recordaba os capazos en os descansos entre clases, fer fuina ta marchar t'as fiestas universitarias, as resistencias cremadas en o laboratorio, os amigos y compas, a sola moza que tenebanos en clase, os sobos de seis horas de contino debant d'o monitor programando en C, o mio companyer cremando-se con o soldador, os "fumarros" en o recreu, as brendas en l'Alameda, ... D'os profesors que tenié, belun encara i contina. D'os alumnos que compartiban aula con yo, no contino en contacto con garra.

En plegar-ie, antimás de con todas ixas remeranzas, me trobé con un zuro bien gran sobre l'aragonés. I yera penchau bell articlo d'Arredol, poesías, convocatorias, ... y sobre tot, a revista que fa a zaragalla d'o centro, coordinada por o profesor que me convidó y que podetz leyer en o suyo blog. A charrada les ne facié a zagalas de 4º d'ESO que se me miraban con diferents actitutz. Belun, cuento que repasaba mentalment l'alineación d'o Real Madrid d'ixe cabo de semana. Atras, me facioron más caso y, lo menos, s'estioron mientres quasi una hora sentindo a un tipo charrar en aragonés. Ya no pueden decir que nunca no lo han ascuitau. En a charrada facié referencia a diferents medios. No asperaba, lochicament, que conoixesen Vilaweb u Argia, pero que quedé percutiu de que nian hesen sentiu charrar de Eldiario.es. Una vegada más, salir d'o mio chiquet mundo, me fació estozolar-me contra a realidat. A información contina consumindo-se masivament por a televisión y os mass media. Antimás de d'a luenga charré, aprofitando que teneba a parola, de atros conceptos como o Creative Commons, o conoiximiento libre, a soberanía d'a información u a etica periodistica.

Por o feedback que'n recibié, quiero creyer que a beluna d'as presents le fació goyo lo que i reconté y que en salioron habendo recibiu unatra anvista sobre o periodismo, as luengas y a comunicación. Como siempre, lo important ye fer que tiengan inquietutz.

Tamién me'n levé, d'a mia tornada ta Andalán, a luita d'iste profesor por fer plegar l'aragonés en as suyas alumnas y alumnos. Como de cutio, con poco u mica refirme de man de companyeras y d'o centro. Me charró d'a revista que i fan y d'o debantdito panel an que va penchando cosas sobre l'aragonés. Ye un eixemplo d'as chiquetas cosas que se pueden fer en qualsiquier centro d'estudio y que, encara que chicotas, pueden tener una gran trascendencia ta personetas en unas edatz que son formando as suyas ideyas y valors. Fer present l'aragonés en o centros d'amostranza ye a saber que important y cada espacio conqueriu ye una pedreta más en o muro que ha d'aparar a luenga.

Aspero que toda ixas ganas y ixa rasmia continen fendo fruitos y que l'eixemplo s'ixemene y en cada IES d'Aragón se faiga qualcosa por l'aragonés. Por muito menos, me prencipié a intresar por a luenga y aqui soi bell par de decadas dimpués dando ferrete en aragonés.

Cronicas Pilaristas (6) Por as carreras

Si por bella cosa me pillo siempre vacanzas ta Pilars, ye por poder disfrutar de toda la ufierta: oficial, contraoficial, alteroficial, espontanea, programada, etc.... A soben, simplament fendo una gambada por a ciudat te trobas con as millors cosas de totz os Pilars. 

A caseta de Ordio Minero, en os puestos que se meten en Echegaray y Caballero, esdevinió a escape una visita obligada diya par d'atro. I teneban siempre punchadas dos chetas de Ordio Minero y atras dos de Castel, unatra biera artesana feita en LoPobo (Comunidat de Teruel). Todas dos bien buenas. 

A companyía de Chesús (a qui entrevistoron fa poco en Arredol), Quique, y a chent de Castel a qui bi conoixié, estió antimás siempre prou buena. Con una riseta en a cara, encara que levasen un trapacil d'horas de faina. Os primers antimás en penchar o cartel de "viedau l'alcohol a menors" en aragonés. Cartel que, gracias a la faina d'Arale, s'espardió por tot lo mercau d'Echegaray y parte d'as barras d'a Madalena.

Ta forro de bota, y por si a companyía d'os bierers no yera prou, te trobabas totz os meyodiyas con mosicos fendo pasavilla. Chent de Ixera, Gaire, Los Jaques, La Libertina, ... que nos deixoron sobrebuenos ratetz.

O mercau d'Echegaray s'ha tornau china chana un puesto de referencia ta fer o socalce. Antimás d'os mosicos d'a pasavilla, o feito de estar a l'aire libre, a o canto de l'Ebro y con mosica tradicional aragonesa terne que terne me fa estar-me-ie bien contento. Un poquet más de variedat gastronomica y uns pres más populars y ya sería quasi perfecto.

En atro puesto no guaire luen, en a carrera Alfonso, me trobé con una colla de mosicos de Bordeus, Los Teoporos, que me facioron firme goyo. M'aturé un inte ta viyer-los una miqueta y rematé viyendo dos tongadas d'a sesión que feban. O video lo penché a l'atro diya en Youtube, y aspero que as organizadoras de Tamborilé en prengan nota ta si quieren achustar-los. Pasemos un ratico buenismo!

L'aragonés ye bien vivo (abril 2013)

Penica que fa, pero cal prencipiar una atra vegada “L’aragonés ye bien vivo” con noticias de lingüicidas. Bien se vale que en l’atro cabo continamos as que luitamos por l’aragonés sin minar a dengún y prebando de pensar en a luenga y no pas en os concietos y delerias personals que tiengamos. Remeratz que L'aragonés ye bien vivo ye una sección d'o programa La Enredadera de Radio Topo y que podetz ascuitar-lo en iste vinclo.

Subvencion ta “l’aragonés oriental”Arredol daba la noticia d’a concesión d’una subvención ta un libro de l’asociación FACAOista Lo timó (no feré o chiste facil...). O libro, titulau Antolochía Lliteraria en Aragonés Oriental II” ye editau por ista asociación que esfiende que lo que charran en Altorricón (Aragón) ye una luenga diferent a lo que se charra en Almacelles (Catalunya) nomás porque en o meyo bi ha una muga administrativa (sisquiá estatal). A lo catalán charrau astí le claman aragonés oriental en contra de qualsiquier criterio scientifico y filolochico. En realidat no ye que una cortina de fumo ta lo pior espanyolismo que s’alimenta y muito d’a catalanofobia que bi ha tan estendillada en iste país.

O gubierno fa asinas más esclatero encara o suyo refirme ta ista mena d’asociacions y ta ixe discurso espanyolista, antiscientifico y catalanofobo que ye o que a inspirau a suya quiesta lei de no luengas. Cal decir, ta estar chustos, que l’anterior gubierno ya subvencionó a primer parti d’o libro, asinas que Marcelino y cía tampoco no son libres de culpa. En ixa mesma subvención, ya prou retallada bi heba atra mena de prochectos, como os de Rolde d’Estudios Aragoneses que sí se levoron subvencion, u muitas atras asociacions en esfensa d’a luenga que se’n quedoron difuera.

Como siempre, recomiendo o blog Lo cacao de la FACAO ta qui no conoixca guaire qui ye ista chentucia.

"L’afer Ferrando"
En Arredol tamién veniba a reacción t’as parolas de Ferrando. Ta qui no lo sepa, Maria Jose Ferrando ye qui coordina la ponencia d’a lei de no luengas. Ye decir ye a persona encargada de coordinar o debat y as esmiendas en un foro a on que son representants d’os cinco partius politicos con representación en as Cortz. En presentar as esmiendas a oposición, a diputada d’o PP, fació unas declaracions decindo que ixas esmiendas plenarían de “pinganillos” Aragón y que a lei de luengas que quereba PSOE-CHA-IU costaría decenas de millons d’euros. No alportó garra dato ni estudio de como heba plegau en ixas cifras, ni en la d’os 1500 traductors que caldría (quasi dos por cada municipio aragonés).

Dende a oposiciónas criticas no tardoron guaire. Totz os partius demandoron sincusas y CHA, IU y Puyalón a dimisión d’a diputada como coordinadera d’a ponencia. Prou que ista no dimitió y fa poco PSOE, CHA y IU deixoron a ponencia. Isto no sirve que ta conservar a dignidat, que ya ye prou, pero a lei de no luengas continará o suyo curso. De feito, en eixemplos como lo d’os premios literarios ya se vei como han prencipiau a aplicar-lo.

Diya de l’argüello diaple
O pasau 6 d'abril se fació o diya de l’argüello diaple, una chornada ta conoixer y reconoixer a faina d’ista colla de diaples que han levau a polvora, a mosica y l’espectaclo por tot Aragón y dillá d’as nuestras mugas. Vinte anyadas son fendo en 2013. Mientres tot lo diya facioron chuegos tradicionals en a ribera de l’Ebro, charradas en o local social Treziclo, recontando a suya historia y os suyos prochectos, entre os que bi ye a producción d’un video sobre istas 20 anyadas.

Chornadas arredol de l’aragonés
En a Casa Aragonesa de Barcelona bi ha prou movimiento en as zaguers anyadas. No ye raro que totz os anyos bi haiga dos, tres u quatre chornadetas con mosica, presentacions. En ista ocasión, en as chornadas "Luenga biba" (sic), organizada por a Colla de charradors “O Corrinche”, o Rolde Aragonés de Barcelona y Can Basté – TASC se fació se tractaba d’una lectura de poemas, a prochección de Cosetas d’adentro (curtometrache en aragonés ribagorzano) y o concierto de Prau y Gaire, con una sesión de DJ Valle Nato. Grandisma programación ta una borina en qualsiquier puesto y cuento que t’os aragoneses que i viven, tot un luxo. Por lo que me han contau, antimás, bi habió un ambient sobrebueno y muita muita borina.

Chornadas en Graus

En Graus y redolada tamién ye a luenga prou viva y entre o 18 y o 20 d’abril celebran as Chornadas d’as luengas d’o Pirineu, antismas Chornadas d’as luengas d’a Ribagorza. En ista edición bi habrá un taller de lectura, se presentará o numer 4-5 de De Lingua Aragonensi y o Metodo de Gaita de boto, se ferá a entrega de premios d’o XII concurso Condau de Ribagorza y rematarán con un concierto de man de Carbonell y Eduardo Paz, aprofeitando-se, como siempre, d’a figura de Labordeta, en lo que entienden como un homenache. 

Que se faigan istas chornadas dignificando a luenga en os lugars a on que se charra vale un valer. Asperemos que continen muitas anyadas y que en totz os lugars a on que no se fan, s’enceten iniciativas parellanas.

Concurso de cuentetz y falordias ta ninos

L’asociación O Trango, que fa cursos d’aragonés en Zaragoza, organiza por primer anyada, un concurso prou orichinal, en estar, que yo sepa, o primer endrezau ta ninas y ninos, d’entre 6 y 12 anyadas. Cal ninviar un texto chiquet, de nomas 2 a 6 pachinas, en aragonés. Os premios son dentradas ta Parques d’Atraccions que a mainada se gronxiará a-saber-lo. Me pareix una traza sobrebuena d’acostumbrar a las zagalas dende chicotas a escribir y a fer-lo en aragonés.

A canta en aragonés

O programa lo querié rematar con Ixo Rai. Ya han pasau por “L’aragonés ye bien vivo” arrienda collas que han feito bella canta en aragonés y encara no heba charrau d’uns d’os pioners. No cal presentar-los, cuento que tot lo mundo los conoix, pero si que cal remerar que estioron d’os primers en reivindicar as particularidatz d’o castellano d’Aragón y con “A fuesa universal” nos facioron conoixer l’aragonés a muitismas personas. Encara beluna más en aragonés y una atra “Molt de soroll”, en catalán. Mesmo les vagó de traducir María ta l’asturiano, que ye como la sintié yo en muitos d’os suyos conciertos, amostrando ixa sensibilidat por a cultura y as luengas minorizatas que teneban. Entalto Ixo Rai! Como tos trobamos a faltar.....

Remero que ista anyada o reto de L'aragonés ye bien vivo ye que bella colla faiga una canta en aragonés. Qualsiquier colla, de qualsiquier puesto, en qualsiquier estilo. Si tos cal aduya, contatz con la mía ta traducir u adaptar lo que calga.

L'aragonés ye bien vivo (febrero 2013)

Segundo "L'aragonés ye bien vivo" de l'anyada que prencipia con malas noticias de man de l'administración, como no. En l'atro cabo somos a chent que continamos luitando por a dignidat de l'aragonés. Contino pencho o resumen de contenius de ista segunda sesión, y aprofeito ta penchar iste vinclo a lo programa de Fendo Orella, a on que estié fa bellas semanas charrando sobre l'apostasía.

 
Sacan o premio Arnal Cavero


Como informaba Heraldo, o blog de Fablans y Arredol, a D.Ch.A. contina con a suya enrestida contra l’aragonés, o catalán, a sciencia y o sentiu común. Talment a enrestida (simbolica y no simbolica) más gran que nunca no haiga conoixiu l’aragonés en as zaguer decadas. A zaguera ye que os premios Arnal Cavero y Guillem Nicolau t’a literatura en aragonés y catalán, una d’as pocas cosetas que feba o gubierno por as nuestras luengas, se fusionarán en uno solo. Un rebullo a on que i cullirá tot lo que no siga castellano. U talment lo castellano tamién, ves-te-ne tu a saber.


Continan pues, esfendendo as tesis d’a extrema dreita y de dengún más, pues garra filologo meyo serio esfiende as suyas posicions que no son que o sinyal d’un nacionalismo extremo (iste sí) que preba d’acotoloar tot lo que no sía la patria, cultura, luenga y pensamiento unico (que no común).

L’aragonés present en o V Festival de teatro solidario con Chiapas


Ista anyada, a buena chent de Caracol Zaragoza querió convidar a bellas luitas d’aquí a compartir o Festival de teatro solidario con Chiapas que organizan dende fa cinco anyadas. Bi estioron a luita contra os transchenicos, l’antifaixismo, a luita d’Artieda contra o recreiximiento de Yesa y tamién l’aragonés. Entre dos actuacions representants de cadaguna d’as luitas puyaban a fer-las visteras. En o caso de l’aragonés, dos personas leyoron un comunicau y dimpués se prochectó un video a on que se replegaban imachens de todas as formas de luitar por l’aragonés. Tamién nos sorprendió Daniel Rabanaque, qui feba de mayestro de ceremonias, leyendo-se un poema en aragonés. Tenetz cronica y videos en iste mesmo blog.


Cal agradeixer a lo Caracol que haigan teniu ista iniciativa y que contrimuestren a tanta chent que luitar por cosas aluenyadas cheograficament no significa ixublidar as que tenemos amanadas que, a soben, son las mesmas.

Coleccionable en El Periodico de Aragón


Talment a noticia (buena) d’o mes haiga estau a publicación de “El aragonés: una lengua románica”, un coleccionable que darán cada domingo de baldes con El periodico de Aragón. Ye una sobrebuena traza de fer plegar ista luenga nuestra ta un fascal de chent que no se’n intresaría d’atra traza, u que ye masiau galvana ta ir a informar-se ta qualsiquiera d’as asociacions. U que no puet por qualsiquier razón, que tamién bi’n habrá.


Nomás he puesto fer-le una uelladeta, pues me niego a mercar coleccionables, encara que me mercaré o libro quan lo editen encuadernau. Os textos son en castellano y pareix que tampoco no meterá guaire “canya”, pero prou que cuento que ferá buena honra ta la espardidura de l’aragonés u, a lo menos, ta que a chent sepa que existe. ¿Que se podría haber feito millor? Prou que sí. Y pior tamién. Y lo pior de tot, que no s’hese feito. L’emplego d’a grafía d’o 87 tampoco no ye raro, venindo de qui vien (Consello y REA), asinas que no en feré más comentarios ta no fer sangre.


O coleccionable bi incluye un diccionario, que por lo que he visto ye o Vocabulario Martínez, ta qui lo conoixcatz. As ventas, por lo que he puesto sentir son muito buenas y en El Periodico de Aragón han habiu de fer una atra tongada d’o primer numer por a demanda que bi ha habiu, lo que confirma que sí que bi ha intrés en Aragón por as nuestras luengas.


Bienplegada siga ista obra y sisquiá más prochectos editorials de masas apostasen por l’aragonés que bien que le cal.

 
Chornadas de meyos de comunicación en luengas minorizatas


Entre os diyas 10 y 12 de chiner se facioron en A Enrestida, en Zaragoza as chornadas sobre meyos de comunicación en luengas minorizatas a on que mientres os tres diyas se i facioron conoixer prochectos comunicativos d’Aragón y de Euskal Herria.


A chornada prencipió con Fendo Orella que fació un repaso d’a suya trachectoria y que tenió una introducción a cargo de Marshall qui contó como s’ha visto historicament a l’aragonés en Radio Topo. Os audios y una breu cronica se pueden sentir y leyer en Arredol.

Continoron as chornadas con Arredol y Arainfo, que presentoron os suyos respectivos prochectos. D’Arredol cuento que no cal charrar-ne más. Si yes leyendo iste blog y no conoixes Arredol, visita a suya web y no tornes dica que no sigas farto de leyer as suyas noticias.


Arainfo explicó a suya historia y filosofía y esfendió l’emplego de l’aragonés en un meyo que por un regular fa servir o castellano y a comunicación d’as noticias arredol d’as luitas por l’aragonés y o catalán en Aragón.


As chornadas rematoron con Radio Matarranya, qui levan ya bellas quantas anyadas emitindo en a suya redolada y tamién por internet de tot en catalán, Comunica’n Roll y Magofermín, dos prochectos quasi chirmans que empentan a los mosicos y a la mosica en aragonés y catalán y con Kafe Antzokia qui, entre muitas atras cosas, estioron a primer radio en euskera de tot Bilbau. As chornadas rematoron a nueit d’o sabado con una borina en La Botica, como ye costumbre.
 
A cronica d’o primer y o tercer diya la podetz leyer en o blog d’A Enrestida a on que tamién podetz viyer bella foto.

O gallego y l’asturiano en luita
Dende atros países nos plegan tamién noticias de luita. A lei Wert y os gubiernos espanyolistas por tot l’estau no son fendo que zancochos igual como nos ne fan por aquí.


Ye o caso de Asturias, como informaba Arredol, a on que L’academia de l’asturiano (Academia de la Llingua) s’ha uniu a la comunidat educativa, asociacions de pais y d’alumnos y sindicatos de profesors y treballadors de l’amostranza ta reivindicar os suyos dreitos lingüisticos. Debant d’as enrestidas d’a Lei Wert y d’a espanyolización anunciada por o ministro y as suyas retalladas (en lo que quier retallar), dende Asturias demandan a oficialidat de l’asturiano y a cheneralización d’a ufierta en totz os centros de l’asignatura de asturiano.


Cal remerar que ista luenga no tien caracter oficial agora mesmo, encara que l’administración asturiana sí que reconoix a suya existencia a la suya academia y bi fan clases d’asturiano en os centros publicos, encara que no ye por agora que una optativa más.

D’atra man en Galicia, a plataforma Queremos Galego se manifestoron en Santiago contra o malclamau “Decreto d’o plurilingüismo” que preba de que o gallego tienga menos presencia en as aulas escolars. A manifestación implió as carreras a tamás d’as plevias que bi habió y facioron vistero o refirme d’iste pueblo a la suya luenga. 

Camille presenta “Xuto”

A la fin, dimpués de muito tiempo, una atra colla se decide a fer servir l'aragonés en as suyas cantas. Ye Camille, qui presentan o suyo soniu como "sauna-core" fendo-se a mofla d'a calor que pasaban en o local d'ensayo. Iste mes presentoron en Arrebato o suyo nuevo EP conceptual sobre l'augua a on que dos d'as quatre cantas tienen a letra en aragonés. A noticia la podetz leyer en Arredol y antimás podetz sentir-los en a entrevista que les facioron en Fendo Orella bells diyas antis d'o concierto.

O EP ye de baldes, con licencia Creative Commons, editau por Magofermin y lo podetz ascuitar en o bandcamp de Camille.

Carnavals

Carnaval ya ye arribau t'os Pirineus!!! Iste mesmo cabo de semana se fació en Agüero a Fiesta d'as mascaretas, recuperada en 2008. Entre o 7 y o 10 Bielsa será la protagonista con totz os suyos personaches. T'a Val d'a Fueva, o carnaval plegará o 16 con un cartel en aragonés a on que marcan o recorriu y as horas que se pasará por cada lugar. Tamién bi habrá carnavals en Chistén, Nerín, Sant Chuan de Plan, Boltanya, Graus, Fiscal, Plan, Broto u Torla, por eixemplo.

Canta d'o mes: O cauz, de Camille.

A canta d'o mes ye, como no, de Camille, que'n he charrau más alto. Han feito antimás un video grabau "quasi-artesanalment" por ells mesmos que tos deixo penchau contino:

L'aragonés ye bien vivo (chinero 2013)

Prencipio l'anyada de buen implaz, dimpués d'unas chicotas vacanzas y un chiquet proceso de reflexión asociativo y personal. Y qué millor traza de prencipiar que repasando as noticias de l'aragonés ta La Enredadera, que me convidó tamién ta fer un balanz de l'anyada en o especial cabo d'anyo que facioron.

 Chornadas sobre prochectos de comunicación en luengas minorizatas: 
A Enrestida organiza entre o 10 y o 12 de chiner unas chornadas sobre prochectos de comunicación en luengas minorizatas. Bi habrá representants de meyos de comunicación en aragonés, catalán y euskera, qui presentarán mientres os tres diyas os suyas prochectos y ideyas.

En as chornadas i serán Fendo Orella, Arredol, Arainfo, Kafé Antzokia, Magofermín, Comunica N'roll y Radio Matarranya. Unas sobrebuenas chornadas a on que se ferá analís d'ista nueva realidat que os meyos tecnolochicos nos han permitiu creyar a on que todas podemos participar d'a información y compartir-la de trazas que fa tasament diez anyadas ni hesenos pensau.

Como ye cada vegada más costumbre, tamién se i ferá una chenta popular en o local d'A Enrestida y de nueitz, bi habrá borina en La Botica con mosica trayida dende Euskal Herria de man de DJ Elepunto de Kafé Antzokia.

Chornadas Prochectos comunicación en luengas minoritarias from aenrestida on Vimeo.
 


Zaguers novedatz politicas:
A lei de no-luengas ha pasau un atro trango en as Cortes Aragonesas. PSOE, CHA y IU i presentoron as suyas esmiendas, entre que o PP y o PAR esfendeban as suyas tesis a-scientificas y coincidents con as d’as extrema dreita. Una d’as sorpresas que nos deixó iste proceso ye l’alternativa de lei de luengas que presentó IU a on que se demandaba a cooficialidat d’aragonés y catalán, ixo sí, en as “zonas de parla predominant” y en bellas zonas de “transición - recepción”. A tamás d’as esmiendas presentadas, no s’acceptoron cambios y a lei contina mirando de fer a fuesa t’as nuestras dos luengas y imposando lo castellano como luenga unica ta todas nusatras.
 
Tant y mientres, Puyalón ha decidiu de marchar d’a Coordinadera Aragón Trilingüe por os motivos que explican en un comunicau feito publico fa bellas semanas. Más que más cretican o seguidismo d’as politicas de CHA y a febleza d’os planteyamientos d’a mesma.  A verdat ye que o manifiesto ya naixió prou gabacho y no pareix, por agora que a Coordinadera tienga guaire recorriu. Caldrá viyer enta do va agora, sin o partiu independentista.

Nuevos miebros d'o EFA:
O Estudio  de Filolochía Aragonesa - Academia de l'aragonés, ha incorporau a seis nuevas personas t'as filas suyas. Istos nuevos miembros serán "correspondients" y se incorporan más que más, t'as fainas de codificación lingüistica que son desembolicando y que asperemos que faigan fruitos antis con antis. 

As incoporacions son: Miguel Anghel Barcos, lexicografo, traductor y fagotano; Chuan Pavlo Martínez, doctor en telecomunicacions y desembolicador de ferramientas informaticas t'a luenga; Santiago Paricio, filologo, investigador d'as variedatz vivas de l'aragonés y ganador de l'Arnal Cavero de 2009; Chorche Díaz, filologo y investigador de l'aragonés benasqués y d'as parlas d'a Ribagorza; Mª Teresa Moret, de Mequinenza y doctora en filolochía y investigadora d'o catalán en Aragón y Guillermo Tomás, historiador, investigador d'as parlas vivas y de l'aragonés meyeval.

Son, si no remero mal, os primers nuevos miembros que se bi incorporan dende a creyación de l'academia, fueras d'os academicos d'honor. Todas ellas de gran valura y que regular que ferán muitisma honra ta l'academia, antimás de trayer aire fresco. 

Colección Yalliq en PDF:
A comarca de l'Alto Galligo nos fació un chiquet present de nadal en publicando en PDF una ripa de materials d'a colección Yalliq que han veniu editando mientres as zaguers anyadas. Belunas d'as publicacions ya yeran bien dificils de trobar, por cierto. Regular que ferán buena honra ta todas las enamoradas d'a nuestra luenga y a nuestra tierra y antimás ye un sobrebuen recurso, sobre tot si paramos cuenta en todas las que no nos podemos permitir mercar tot lo que se publica. Os materials son más que más de tradición oral y toponimia, pero tamién bi ha una caracterización lingüistica d'a redolada, de Chabier Lozano y una replega de materials t'aprender aragonés de Maria Pilar Benítez, dos alfayetas. Muitas gracias a qui haiga teniu a iniciativa y asperemos que l'eixemplo cunda y, a lo menos as institucions, faigan publico y descargable de baldes totz ixos materials que a soben no fan que acumular polvo en bell fosco almagacén. 

Cosetas d'adentro:
Fa bells pocos diyas se presentaba o libro-DVD "Cosetas d'adentro" que ya en hebanos charrau bell diya en La Enredadera, quan se presentó o curto. Ista edición leva o DVD d'o curto, o suyo guión y o relato que lo prencipió tot.

Cosetas d'adentro estió ganador d'un accesit en a edición de 2009 d'o concurso Condau de Ribagorza y dimpués se'n fació un curtometrache grabau en Graus y Montanyana. Reconta a historieta d'un pastor d'a redolada en as anyadas 50 y d'a suya relación con una zagaleta  Ye publicau por Gara d'edizions y se puet mercar en a suya web.

"Mesaches", de Chuse Inazio Nabarro:
Chuse Inazio Nabarro presento ent'a fin de noviembre o suyo nuevo libro "Mesaches" que estió lo ganador d'o premio "Ziudá de Barbastro". O libro reconta l'adolescencia d'un zagal mientres a clamada "transición politica espanyola". Iste premio ha publicau ya libros sobrebuenos como "Reloch de pocha", tamién de Chuse Inazio Nabarro, que ye estau traduciu a castellano, francés y ruso u "Alas de Papel", de Fernando Romanos. A novela, como ye costumbre, tamién la ha editada Gara d'edizions y se puet mercar en a suya web u en a botiga de Fablans.

A colla d'o mes:
Remero que contina o reto que diciemos en a primer sección d'iste curso: que bella colla de mosica faiga una nueva canta en aragonés. Sabetz que tenetz toda l'aduya que tos calga ta traducir u asesorar en lo que quieratz. Ya hemos recibiu bella propuesta pero encara no tenemos canta ta ufrir-tos. Tant y mientres, continaremos repasando ixas collas de mosica que, encara que no faigan servir l'aragonés de cutio, decidioron un diya de fer una canta en ista luenga nuestra.
Hue, os esleixius son Atland, una colla zaragozana de (seguntes la wiki) power metal, qui levan dos discos editaus: Opera prima y Marboré y que estió a primer colla de l'estau en fer un video mosical en 3D. A suya mosica la podetz sentir en www.atland-metal.com. A canta que meto abaixo ye "Marboré", que en o disco apareix en versión en castellano y en aragonés.

Zarrau por vada

Poco puedo alportar que no s'haiga dito ya sobre a vada que bi ha o 14 de noviembre. Talment me quede con a frase de Javier Gallego en a suya Declaración de vada, que escribiba hue en El Diario: "Ista vada ye un deber porque de dreitos, no nos ne queda".

 

Asinas que simplament remerar a todas as lectoras d'iste quiesto blog que maitin tenetz a oportunidat de concarar-tos con todas as inchusticias que sotz viyendo arredol vuestra. Maitín podetz esleixir a luita contra qui han esfendiu os desahucios dica ahiere y que no han prencipiau a reblar dica que tres personas han muerto. Podetz esleixir luitar contra qui tos quieren sacar o dreito a la sanidat y a la educación, contra qui quiere que nunca no podatz tener un treballo digno y seguro ta que siempre pendatz de l'amo. Contra qui retalla d'a necesidatz más alazetals entre que financia relichions, torturas animals y campanyas nacionalistas en esfensa d'o castellano. Maitin mesmo podetz esleixir fer vistera ixa critica que tanto cal a los sindicatos mayoritarios espanyols, participando en toda a graniza cantidat d'actos que han programau organizacions de toda mena y que mica no'n tienen que viyer con as suyas malas trazas. Maitin podetz dar un trango enta debant y, sí, cambiar o mundo.

Porque as vadas fan honra. Porque as vadas pueden cambiar y han cambiau as cosas mientres toda a nuestra historia. Porque a vada ye l'arma más poderosa de qui no tenemos atra arma que lo treballo nuestro. Pero sobre tot porque o chueves, y o viernes, y a resta de diyas d'a tuya vida podrás estar argüelloso d'haber teniu dignidat y haber estau parti d'a luita por os nuestros dreitos. Y, si yes como yo, simplament porque no te'n queda atra,  porque no sabes vivir d'atra traza.

A info la tenetz por tot, pero tos deixo bellas pachinas y articlos que tos ferán honra:
Arredol
Arainfo
Radio Topo

Vada en La Enredadera 
Vada en Fendo Orella

Ampraus 063: Fendo orella, transchenicos, extraterrestres y Chicote

Fendo Orella. 
Como ya comenté charrando de La Enredadera, he prencipiau una serie de colaboracions en o programa Fendo Orella de Radio Topo, a on que charraré, igual como aquí, d'o que me vaiga aganando. Iste primer programa prencipié charrutiando y enamplando un poco l’afer d’os fusos horarios que'n charraba fa poco y, a o filo d’a noticia publicada por Arredol, charrando de Sicilia, o suyo movimiento independentista y os suyos vinclos con a Corona d’Aragón, remerando bells capitols importants como o d’as Vispras Sicilianas. T'ascuitar-lo, puncha aquí.

Transchenicos en El Periodico
En leyendo El Periódico de Aragón me trobé con iste intresant articlo charrando d’a "SGAE agricola", a on que os agricultors y a UAGA se queixan de que les cobren dreitos d’autos por as simients que fan servir y que mercoron en o suyo diya. Ista ye una d’as tantas conseqüencias economicas que tien l’actual politica agricola y a espardidura d’os cultivos transchenicos y que, en una grau error estratechica, menos se’n charra. O discurso arredol d’os transchenicos, u a lo menos los que goso sentir yo, se centran masiau en a demba d’a salut. Asoben dende o mundo scientifico (y no soi charrando de chent mercada por Monsanto y cía), se vulcan u a lo menos se meten en dubda os argumentos d’os antitranschenicos con mayor u menor fortuna. Manimenos as conseqüencias t’a biodiversidat y t’a economía son brutals y incontestables. Y agora muitos d’os agricultors que, en o suyo diya, y no sin as suyas razons lochicas, apostoron por a cantidat y a dependencia d’atros contra a calidat y a soberanía propia, son viyendo como qui creyó y vendió ixa tecnolochía quiere replegar l’esquilmen. Y lo que nos queda por viyer... Bien se vale que, en zagueras, iniciativas como o Rete de Simients y muitas atras son luitando por una traza d’entender l’agricultura diferent y aluenyada d’as grans transnacionals y d’as trazas de producción ultracapitalistas.

Un president extraterrestre
Magonia, o blog de Luis Alfonso Gámez, un d’os dinamizadors d’o movimiento sceptico en l’Estau, ha publicau fa poco a curiosa historia d’un candidato t’a presidencia d’os EE.UU. refirmau por o lobby extraterrestre. Gabriel Green, qui aseguraba que os extraterrestres son”buena chent”. Deciba tamién que as mullers extraterrestres yeran “polidas de tot” y que, encara que os extraterrestres podeban conquerir a tierra en un petén, no lo feban porque “iba en contra d’os suyos prencipios”.

En as presidencials se minchó os cagarros pero, quan se presentó t’o Senau por California consiguió 171.000 votos. Masiaus ta estar una conya marinera, ¿no?. Dimpués d’o fracaso en a suya carrera politica, barrachó as paranoias extraterrestres con a relichión y dició que Chesús (o de Nazaret) tornaría t’a Tierra en un platet volador. Un nuevo heroe t’a mia achenda que compite con o guardián d’as estrelas.

Pesadilla en la cocina
No soi mica amigo d’os realities. De feito, a más gran parti me fan muito fastio. Asinas que quan viyé que anunciaban “Pesadilla en la cocina”, decidié de no viyer-lo, encara que o tema d’a hostelería me fa muito goi y que a promoción yera una d’as millors que he visto en muito tiempo (increyible o “inte churi”). O caso ye que a la fin reblé a los deseyos d’Arale y viyemos o primer episodio d’un restaurant de Pinto que teneba como amo a un carnuz quasi alcoholico y qui, como totz os galvans, no feba que acusar de galvana a toda la chent que teneba arredol treballando firme. En o segundo episodio, o perfil yera parellano, con un pai alcoholico rodiau de fillos profesionals y casau con una muller con muito más exito que no ell.

O programa me pilló dende primeras y me pareix que ye sobrebueno ta que toda la chent que nunca no ha treballau en a hostelería pueda apreciar lo duro y dificil que ye ixa repolida profesión. Tamién me fa muito goi que, entre tanto reality apolocheta d’a galvana y d’a polideza malentendida, a la fin un programa meta en valor l’orden, a responsabilidat y a profesionalidat.

En contra d’o programa, que tamién tien cosas malas, ye a parti d’o show emocional. Me sobran as glarimas y chilos d’as treballaderas, u d’a mainate, quan bi ha un pleito d’o copón. Entiendo que ye parti d’o show y que cale ta pillar a la chent que a parti lochistica y profesional les bufa la pocha, pero a yo me sobra. Y prou que cal decir que con perricas, chufletz. Que a más gran parti d’as indicacions que da Chicote son profesionals, pero ya de paso le foten unas transformacions a los guariches que no se las puet permitir quasi dengún. Y menos agora.

Resumindo, a tamás d’estar un reality y d’os chicotz defectos que tien, aspero que “Pesadilla en la cocina” contine en ista mesma linia y que tiengamos Chicote ta rato...

PD: Y tot isto lo escribié antis de conoixer a la Yoli d’o tercer episodio...

L'aragonés ye bien vivo (setiembre 2012)

Talment bella lectora no sabe qui soi. Talment queda beluna que me conoixca en a vida real y no pas en a virtual y de revés. Antismas prebaba de deseparar-lo y amagar-lo, pero creigo que cada vegada tien menos sentiu. Asinas que voi a confesar ta ixa hipotetica lectora que no sabe qui soi, que tamién foi una chicota sección en La Enredadera de Radio Topo una vegada a lo menos. En ixa sección, que se diz “L’aragonés ye bien vivo” charro de l’aragonés y d’as zaguers noticias y, a partir d’iste curso, tamién pencharé os contenius en iste blog.

Remerando d’a on venimos
Torna "L’aragonés ye bien vivo" asperando poder decir-lo mientres muitas anyadas pues bi ha belunas encerrinadas en que s’amorte.
Remeremos que prencipiabanos lo verano con l’anuncio de l’abantprochecto de reforma d’a lei de luengas de man de Dolores Serrat (PP, catalanofablant materna)y Javier Callizo (PAR, aragonesofablant materno). En iste abantprochecto, os timidos trangos enta debant que s’heban feito con a lei aprebada por PSOE - CHA, se tiraban enta abaixo. Toda a parti d’as academias y de l’autoridat lingüistica de l’aragonés s’esborra u s’esbafa y antimás se deixa de reconoixer-se a realidat trilingüe d’Aragón, unindo-se a las tesis a-scientificas d’a FACAO, a PNHC y a extrema dreita en cheneral. Aragonés y catalán pasan a estar, ta lo gubierno d’Aragón, uns parlaches sin reconoiximiento y mesmo sin nombre, convertindo Aragón en una singularidat mundial cuanto a lo suyo comportamiento sociolingüistico. L’unico país a on que en cada lugar se charra una luenga diferent. A no estar que charres castellano, que tien una unidat indisoluble y indiscutible.
O 29 de setiembre se continó fendo publico o refús de muitas personas a ista mida. En Fraga a Coordinadera Aragón Trilingüe, que rebilca dimpués de qualques anyadas sondormida, fació publico un manifiesto ubierto ta tot qui quiera refirmar-lo. O manifiesto lo puetz leyer en Arredol.

Ufierta de cursos d'aragonés
En l’atro cabo, i somos a chent que no reblamos, que queremos protecher iste patrimonio de todas as aragonesas y de toda a humanidat. Y qué millor traza de fer-lo que aprender ista luenga en qualsiquier d’as escuelas que l’amuestran y fer-la servir de contino. Tenetz toda la info en un nuevo blog que ha naixiu fa poco: cursosdaragones.blogspot.com. Pero antimás tos lo resumo bell poquet contino:

Nogara:Cursos presencials y online. Horarios a esleixir. T’apuntar-se-ie en A Flama (C / Mayor, 53), en a siede de Plaza Asso s/n, Zaragoza, os miercols de 19 a 21 y por mail en asoziazion@nogara-religada.org.

Fablans: Cursos de toda mena. Escribir a amostranza.zgz@fablans.org u gritar a 976 231 299 (contestador) u a 692 637 391 en horario comercial.

O trango:Curso viernes de 19:00 a 21:00 en a Casa de Chovenalla d’o Centro Civico Universidat (Zaragoza). Pre 10 euros. T’apuntar-se-ie, en Casa de Chovenalla Universidat cjuniversidad@gmail.com, 976559052. + info en: http://otrango.blogspot.com.es/

UPZ: (Encara que en o programa charré d’os cursos, dimpués m’han confirmau que no se’n impartirá garra en no haber-se-ie apuntau prou chent)

Consello d’a Fabla: Curso impartiu por Chuse Inazio Nabarro os lunes y miercols a las 20:00 dende o 15 d’octobre. As clases de ferán en a siede de l’asociación en l’Avenida d’os Danzants, 34 de Uesca.

Diploma d’especialización en filolochia aragonesa:
Endrezau ta titulaus universitarios.+ Info en: Facultad de Ciencias Humanas y de la Educación C/ Valentín Carderera, 4. 22003, Uesca.Tel. de Secretaría: 974 239350 E-mail: umanh@unizar.es, fnagore@unizar.es

Cabo d’anyo d’Arredol
O 19 de setiembre fació una anyada que va naixer Arredol, o primer meyo (alto u baixo) de información cheneralista de raso en aragonés. Más de 1000 articlos y bellas 10.000 visitas a o mes. Se i ha charrau de tot: dende as fiestas d’o Pilar dica as expropiacions d’Artieda, o debat d’as Cortes sobre l’estau d’Aragón, noticias d’astronomía, de todas as cantonadas d’Aragón, u os torneus de Ping pong y con a colaboración d’os zagalons que fan Cados Radio y de muitas opinadoras y columnistas que i escriben de cabo ta quan. A zaguer incorporación estió a de Ruben Hervás como vinyetista. Y dende Arredol nos remeran que ye una finestra ubierta ta todas y totz y demandan a colaboración de todas as aragonesofablans y d’as que no’n sigan tamién. Invia las tuyas noticias u fotos ta redaccion@arredol.com y si quiers que publiquen qualcosa no dubdes en decir-les-ne. Y si no sabes aragonés, te traducen la noticia.

Cabo d’anyo y Exposición Fablans
Fablans fa 30 anyadas y lo celebra con arrienda d’actos que se prolargarán mientres tot l’anyo. Prencipioron o pasau 24 de setiembre con a debantadera d’una exposición en a Casa d’os Morlans (CIPAJ) y una charrada de Fernando Romanos sobre a fundación de l’asociación. Continó o diya 1 Chusé Aragüés charrando sobre as primers ayadas y rematará Ricardo Párraga o diya 20 con una charrada titolada: “Esnavesada pirinenca ta esfender o Pirineu”. A exposición de cartels, chambretas, pegallos y materials de toda mena bi continará dica o 20 d’octobre.

Nuevo CD de Prau
Ya tenemos nuevo disco de Prau que tantos yeranos asperando. Se diz “Os pietz en a tierra” y se presentará o venient sabado diya 6 en la sala Arena Rock en un concierto de conchunta con Los olvidados de la Morgue. Ta calentar-nos o morro nos han feito un video muito pincho a on que se fan a mofla d’os modernos charrando en anglés y dicindo que han grabau en Nueva York entre que los doblan a l’aragonés y meten imachens de Zaragoza. No te lo pierdas. En o concierto, de conchunta con a dentrada te dan o disco.por nomas 8 euros.

Fe una canta en aragonés
Dende a sección de La Enredadera “L’aragonés ye bien vivo” queremos proposar-tos bella cosa. L’anyada pasada, a la fin de cada sección, presentabanos una luenga minorizata y una colla de mosica que la feba servir. Ista anyada tamién feremos servir a mosica, pero nos centraremos en l’aragonés. L’obchetivo: que bella colla u mosico que nos ascuite faiga una canta en aragonés. No cal que se sepa aragonés. Si quiers que te faigamos l’adaptación d’una letra no te cal que inviar-la ta laenredadera@nodo50.org u ta tierradebarrenaus@gmail.com y te la tornaremos traducida malas que podamos. Y ta meter eixemplos, mientres iste curso de “L’aragonés ye bien vivo”, a la fin de cada sección, presentaremos una canta de una colla que, por un regular, canta en castellano, pero que ha feito una canta en aragonés. Son más que no’n pareix.!!! Prencipiamos o curso con Augua que amorta a set de María José Hernández.

Ta ascuitar a sección, y tot lo programa, puetz fer-lo punchando aquí mesmo.

Ampraus 061

En tener bien de faina en o treballo, y que dure, poco tiempo me queda ta poder escribir. Manimenos, en estar d’oficina quasi tot ixe treballo, sí que me vaga d’ascuitar muita mosica y muitos podcasts. Y de cabo ta quan mesmo de leyer u escribir bella coseta. Con tot y con ixo, he d’escribir iste post dende Andorra en istas minivacanzas que m’he pillau ta Semana Santa.

Charrandode tebeos ye o nombre d’un d’os podcasts debanditos que más asoben siento. De lo millor que he sentiu dende fa muito O programa charra, como diz o nombre, sobre o mundo d’os tebeos. Cada programa tien un tema central y antimás charran de qualsiquier cosa que se les pase por l’esmo. M’han feito intresar-me por tebeos que nunca no hese leyiu, conoixer autors que nian sabeba que existiban y viyer d’atra traza, personaches que no me trucaban guaire o ficacio. As trazas de fer-lo, con muita humor y chorradas recurrents en totz os programas fan que cadagún siga millor que no l’anterior. Muito recomendable mesmo ta chent que no seigatz guaire lectoras de comics.

Aragón sin transchenicos: Como informa Arredol, se van a fer en Zaragoza y Nuez unas chornadas contra os transchenicos. Debatz, tallers, asambleyas, procheccions, un poquet de tot... y mesmo un festival, EcoNuez, que pinta prou bien. Una sobrebuena oportunidat de conoixer qué son exactament os transchenicos, que bi ha dezaga d’ells y, más que más, d’as interpresas y intreses que los comercializan, y de viyer atrás trazas de fer agricultura y de consumir. Quasi tot ye en Zaragoza, pero o cabo de semana en Nuez toca a parti borinera con un conciertazo de China Chana, Comando Cucaracha, Motarrika y Samba d’a Praça. Apuntatz-tos-ie si no queretz quedar-tos sin chentar!!!

A vada nos deixó buena cosa de noticias, imachens y reflexions. A belunas les deixó tamién bell morau. U feridas ta cutio. As estalentadas violentas tornaron a fer servir as suyas armas contra a población que reivindicaba os dreitos que tantas decadas hemos tardau en fer que se nos reconoixesen. Una d’as personas que conoixié en istos diyas personalment, adedicó una dentrada en o suyo blog a istas ababolas. Una uellada sin rabia ni rencor. Una uellada d’un fotografo que s’ha fotiu muitas anyadas en movidas d’istas y encara le sorprenden. L’entiendo perfectament porque por muito que les veiga fer lo que fan, y conoixer de primer man d’as suyas torturas, contina sorprendendo-me, contino sin entender, que bella persona pueda fer ixo. Traduzco contino dentrada que fació El Ventano y que podetz leyer en castellano en o suyo blog:

L'odio d'os uellos tuyos:

'Nunca no heba publicau cosa sobre yo en as quasi ueito mil dentradas que he penchau en as seis anyadas de vida d'ista blog. Pero unos uellos plens d'odio me han feito crebar ixe regle, a lo menos por una vegada.

Los viyé en a maitinada d'ahiere en Mercazaragoza, a un palmo d'a mia cara, en prenendo imachens d'a enrestida policial a los vaders que meteban entrepuces a un cambión.

Un antidisturbios me trucó con a porra en a garra. "Soi grabando', le chilé sosprendiu, creyendo que no heba visto a camara de fotos en o peito mio y a videocamara en as mias mans. Y alavez los voi viyer. Se me miró bellas decimas de segundo y viyé tot l'odio d'o mundo acumulau en os uellos suyos entre que me chilaba "¡Au d'aqui! " y se paraba t'atro zurriagazo.
 

No remero a tuya cara, pero tendrías poco más de 30 anyadas. No me queda mica rencor, simplament una tristura amarga que se me ha apegau a l'alma chunto a la uellada tuya.

Porque ¿como puetz trucar con ixa violencia a un tipo que puet estar tu pai, con canas y antiparras de miope? ¿Cómo puetz trucar con ixa rabia a un tipo arguellau y feble que lo podrías vulcar con un d'os tuyos didos esguantaus? ¿Un tipo que no porta más armas que unas camaras penchadas d'o cuello?

¿Siempre yes estau asinas u yes fruito d'o que tos fican en o tozuelo en ixos siniestros quartels? Si fas istas barbaridatz en un rechimen 'democratico' ¿que serías capable de fer en una dictadura?

Y ista cosas, ¿le'n recentas a lo fillo tuyo, a la tuya parella, a tu mai, a lo tuyo chirmán? ¿Las recentas en a mesa entre que sotz minchando y le'n recentas de nueitz a la filleta tuya entre que se duerme? ¿Le describes entre rialletas como trucas a qui t'agana?

Como tantos atros d'a edat mia, tenié a los 'grisos' muito amán muitas vegadas, mesmo pasé bella nueit engarcholau. Pero nunca no heba visto unos uellos con tanto odio como los tuyos. Me fas pena, porque yes un desgraciau. Y a tamás de tot, continaré prenendo imachens ta que a tu tampoco no te furten a vida. Encara que me implas o cuerpo de moraus.