Roscón Rock

Iste Lunes as carreras de Zaragoza tendrán una mica de mosiqueta de baldes, dillá d'o rudio d'os autos. Se torna a fer o Roscón Rock que no ye que meter mosicos de toda mena tañendo por as carreras d'a ziudat. Bella cosa tan simpla, que se fa en ziudaz de toda Europa toz os diyas y porque sí, en ista ziudat resulta que ye un festibal.
Aragón musical (que ye l'organizador) quiere reibindicar con isto una mayor presenzia d'os mosicos aragoneses. O lema d'iste año ye "NECESITAMOS MÁS SITIOS PARA TOCAR" (AMENISTAMOS MÁS PUESTOS AN QUE TAÑER") Ta fomentar que la chen i baiga, entre as actuazions tañerán Amaral y Distrito 14 encara que a organizazión no ha quiesto (y mui bien feito) dezir cuan ni an. Antimás d'ixos i tañerán Sed, Malayerba, Juako Malavirgen, Vírgenes Suicidas, Travelling Band, A Malagana, Baskerville, Lagarto Jarto.... y asinas dica bellas 60 collas.

Tenez info de todas as collas, reibindicazions y demás en http://www.aragonmusical.com/noticias/leer-noticia/0/1237/.

Os conziertos serán en Plaza de Xpaña, Sas, Ariño, José Sinués, San Felipe y San Pedro Nolasco, de 11.30 a 14 oras y en o Paseu Independenzia, 18.30 a 21 oras

Carnabals sobrarbencos

Ya prenzipian o benién cabo de semana os carnabals sobrarbencos. Istos fan parti d'as más polidas (y borineras) tradizions aragonesas. Enzetará a ruta carnabalera en Chistén (3 y 4 Febrero ta continar en San Chuan dePlan os diyas 10 y 11. D'o 16 t'o 18 se ferá en Bielsa o que y, prebablemen o carnabal más famoso d'o Pirineu. Y ye os personaches que i aparixen (más que más as trangas) son bien curiosos.

A l'atro cabo semana (o diya 24) a bal d'a Fueba zelebra o suyo carnabal d'una traza particlar. A diferenzia d'atros, en A Fueba no bi ha personaches tradizionals pero ye bien diferén. Y ye que, como os lugars son chicorrons, ta que se achunte prou chen, o carnabal prenzipia en Tierrantona y con l'auto s'ha de ir de lugar en lugar minchando y zorriando. Gran carnabals que recomiendo dende aquí a tot lo mundo. Pero cal disbrazar-se!!!!

O chuizio a o carnuz, en os carnabals de Nerín (3 y 4 de Marzo) siñalarán a fin d'a temporada carnabalenca d'o Sobrarbe. Si quiers saber más d'os carnabals tiens informazión en www.pirineodigital.com y en muitas atras paxinas. Nos beyemos en A Fueba!

Soi tornau

Soi tornau!!!. Dimpués de zinco diyas en casa con bronquitis y contra as apuestas que no creyeban que plegase en o cabo de semana, torno a escribir en o blog. Y en zinco diyas tot lo que ha pasau! A mani anti-OTAN, o conzierto d'A Enrestida (que sisquiá me bagó de charrar-ne), a presentazión de Caos Planar.... y yo en casa en momentos de morir....
A la fin ya tenemos parque ta la Zincomarzada (O Parque Oriente¿?) y Spoiler ofizial de Caos Planar (cualsiquier pachina de Magic).
Ye impresionán lo que se aprende a apreziar salir de casa, fer una biera con os amigos, fer una gambada por o bico u mesmo ir a treballar cuan has de foter-te tot lo diya en casa. Y lo malisma que ye a programazión d'a TB! No sabeba yo que fesen programas mesmo piors que los que yo beigo!
Bueno, esprisions y ya irémos charrando sobre todas istas cosetas y sobre dixar de fumar.

Más notizias de Magic

No aturan as notizias sobre Magic. O Spoiler de Caos Planar ya ye cuasi completo. En iste inte se'n conoxen 116 d'as 165 cartas d'a nueba colezión (www.rebellion.org/magicrebel). A la fin Ocio Joven de Zaragoza ferá a presentazión o Sabado 20. Promete muito, pos as cartas que he conoxiu dica agora pueden reboluzionar o chuego. Como diz o cartel d'as presentazions: "Y si una presentazión podese cambiar-lo tot?" ("Et si une avant premiere pouvait tout changer?") (www.magicmadrid.es/blog/?p=167). Aquí a o canto podez beyer o nuebo Akroma que no ye que un exemplo d'a filosofía de Caos Planar: cartas biellas u clasicas cambiadas de color (un giant growth royo, una ira de dios negra, akroma royo, un fungus blanco y asinas asinas...)

Freakland, que en primeras no ferá presentazión, a lo menos en Chinero, ha conseguiu organizar un PTQ ta l'onze de Febrero. O formato será Extended (por desgrazia ta yo, que nunca no i he chugau) y ya son parando una minipaxina web sobre o PTQ. Qué mes! Astí nos beyeremos....

Biñarock 2007

Ya bi ha calendata ta o Biñarock 2007. Se ferá os diyas 27, 28 y 29 d’Abril en Billarobledo (Albazete). Iste año as calendatas son piors ta pillar puen (l’uno de Mayo ye Martes) pero, con tot y con ixo, feremos un poder ta ir-ie. O cartel ofizial ye en a paxina web d’a organizazión (http://www.vinarock.com/) y podez trobar rumors y un puesto an que platiquiar sobre o Biña en http://www.vinarock.tk/. Encara no se'n sabe guaire. Nomás o pre (65 euros) y que bi ha botifuera si mercas as dentradas antis d’o diya 31 de Chinero. Por un regular as botigas Tipo (http://www.tipo.es/) organizan biaches dende Zaragoza. L’año pasau por bels 100 euros febas o biache con dentrada incluyida.
D’as collas no se’n sabe mica. Nomás que rumors. Asperemos que, en ista edizión, bi aiga más collas aragonesas. Y, por pedir, que i baigan os Obrint Pas (http://www.obrintpas.com)/.
Ta os que no i sigaz estaus nunca y sigaz pensando d’ir-ie, ¡dixaz de dudar-lo! Dimpués de muitas añadas querendo ir-ie l’año pasau lo consiguié (grazias, churri!) y, siempre que pueda, i tornaré. Ta qui le faiga goyo a buena mosica, a borina y no tienga garra problema en emporcar-se un poquet no puede dixar pasar ista oportunidat. Si querez beyer l’ambién (que ye lo millor) bi ha un fascal de bideos en http://www.youtube.com/ an que i aparixe a chen fendo fateras, trozos de conziertos, chen chilando a Ramonzín y tiendas de campaña bolando por os zielos...

Zincomarzada, an?

Iste año se torna a ubrir a rufierta sobre an se ferá a Zincomarzada. Con o Tío Chorche en obras, parixe que no queda atra que marchar enta atro parque. Mira-te que no podrían aber asperau un par de meses! Se charra d’o Parque Gran y d’o Parque Delizias (parixe que iste ya ye cuasi seguro que no). Os d’a Cartuxa dizen de lebar-lo t’allá y l’alcalde ta Baldespartera. Por agora denguno no ha dito de fer-lo en Uesca pero tot ye posible...
Escribiban una carta en bel periodico de güe an que se deziba que más d’un lo que de berdat quereba yera que s’acotolase ista fiesta por o suyo carácter ziudadán y reibindicatiu. Ixa mesma ye a medrana que yo tiengo. Ta yo, a zincomarzada ye un d’os siñals d’ista ziudat. Un espazio feito por y ta os mobimientos sozials de toda mena. Un espazio de combibenzia d’ixos que cuasi no en quedan. Y, prou que sí, una d’as millors borinas de tot l’año.
Zincomarzada an que siga, pero que bi’n aiga! (Y si puede continar en o Tio Chorche, millor que millor)

Microscopio Titán

A la fin trayen bella cosa buena t'Aragón. Ni "Tigres", ni bases d'a OTAN, ni zimenterios nuclears... O microscopio Titán. Iste d'Aragón será o cuarto d'o mundo (os atros tres son en Estaus Chunius, Inglaterra y Alemania). Seguntes a prensa local iste microscopio tien a más gran resoluzión posible por agora, permitindo beyer estruturas por debaxo d'a grandaria d'un atomo. As aplicazions son esclateras: biomedizina, eleutronica...

Lo ferán serbir os zientificos locals (estoi que, más que más, os de l'Instituto de Nanozienzia d'Aragón) pero tamién zientificos de toda la resta d'o mundo.

Sisquiá ista mena de notizias continene y Aragón siga conoxiu en o mundo por o suyo ran zientifico. Qui sabe? Talmén rematemos creyando a primer Intelichenzia artifizial, como en a zinta de Spielberg. Y talmén lo pueda fer bel zientifico aragonés sino continan abendo de marchar toz por as condizions "laborals" d'os becarios d'a Unibersidat de Zaragoza...

Manifestazión contra a base d'a OTAN

O benien 21 de Chinero a las 12:00 d'o meyodiya en a siede d'a D.Ch.A (edifizio Pignatelli) prenzipiará unatra manifestazión contra a nueba base d'a OTAN que preban d'instalar en Zaragoza. A combocatoria ye d'a "Plataforma contra la instalación de la base de la OTAN en Zaragoza" formada por asoziazions y coleutibos de toda mena. Qui somos por a cultura d'a paz, contra a guerra y l'imperialismo (d'ozidente en cheneral y d'os yankis en particlar) no podemos dixar que os de siempre continen imposando o suyo control sobre o mundo. Esparde ista combocatoria y bes-ie!

Puez trobar más informazión en cuasi todas as webs antimilitaristas u "royas" en cheneral. Aquí en tiens bels: www.antimilitaristas.org, www.nodo50.org, www.alabarricadas.org, www.cgt.es/aragon.

Siñals estrelaus

Dende fa bels pocos meses ya se pueden tornar a mercar siñals d’Aragón con a estrela roya en meyo (as clasicas d’o mobimiento nazionalista aragonés). Dimpués de muitismo tiempo (un par d’años si fa u no fa) sin siñals, tornamos a poder terner-ne ta portiar-las en manifestazions, conziertos... Y nuebetas!, que os siñals de belunos ya yeran puerquizos de raso.... Puez encargar o tuyo siñal por nomás 8 euros en l’adreza: estrelada_aragon@hotmail.com.

Caos Planar: a nueba colezión de Magic

Ya ye plegando... Ya cuasi ye aquí a nueba colezión de Magic, Planar Chaos (segunda d’o bloque "Espiral d’o tiempo"). Os foros ya son a rebutir de rumors y ya se conoxen bellas cartas que i aparixeran (como una bersión negra d’a "Ira de Dios"). En Zaragoza encara no sé si bi abrá presentazión. Seguntes a paxina de WotC (www.wizards.com) bi abrá una en OcioJoven (www.tiendaociojoven.com/zaragoza) o diya 20 (encara que no sé como i cullirá a chen) y se diz que bi’n abra unatra en Freakland (www.freaklandgames.com) o diya 28. Asperamos que a colezión siga tan buena como en parixe y que se faigan as dos presentazions (u más). Tan y mientres podez mirar-tos os spoilers parzials en www.magicmadrid.es u en www.rebellion.es/magicrebel.