La presera d'as presentacions

Cada vegada que voi ta bella presentación de libros me siento como un animalet desvaliu y indefenso que va cara t’a suya presera sin dudar. Un que no puet escusar deixar-se cayer-ie, en la trampa, como un gurrión. Guarda que, dende habe tiempo, me decidié por una politica de no mercar mas libros d’os que adubo a leyer. Una politica que queda nomás en un plano teorico y que nunca no he plegau a cumplir. Entre atras razons, porque sigo indo ta presentacions.

Asinas me pasó con La huella vikinga, un libro que, a priori, m’interesaba bien poco, pero que, a los cinco minutos d’empecipiar la presentación, heba decidiu mercar. No nomás ixo: Laia San José sabió vender-lo tan bien que se blincó lo riguroso orden de lectura que teneba estableixiu pa la montonera de libros d’o repalmar de “por leyer” y se caló entre los primer puestos d’a ringlera (podrez leyer la resenya en Entre cortesía y colofón en los siguients días).

Ayer tornó a ocurrir. Me sintié como Ignatius Farray en aquel running gag que feba, penando por repetir las suyas errors: “M’ha tornau a pasar, no aprendo, no doi una”. La vispra heba visto en Insta que Samanta Schweblin visitaba Zaragoza pa presentar lo suyo nuevo libro de relatos en lo Paraninfo Universitario. La conoixié a traviés d’o taller de Sci Fi feminista que organiza La Montonera dende fa bel anyo. Astí leyiemos Kentukis, una d’as dos novelas que tien publicadas. Una historia sobre tecnolochía, soledat y atras cuestions bien rusients que sabe creyar una atmosfera amuinadera, preocupant y a sobén anguniant a on que antimás se cruzan a-saber-las microhistorias. Me fació goyo, pero no pas tanto como pa correr a repetir autora. M’estimo mas d’ir blincando cheneros y escritoras que no encerrinar-me en trusquir-me las obras completas de cualcún, por buena que siga. Asinas que no heba tornau a saber d’ista autora dica que vide la convocatoria d’a presentación.

“Vai, Carlos, tu puez. Sabes que lo puez fer. Ye nomás una presentación, dengún no t’obliga a mercar cosa. I vas, veyes lo que tienga a decir Samanta, prenes notas d’as ideyas suyas, aprendes d’o que puedas aplicar cuan te pertoque a tu fer presentación y te’n vas con los mesmos libros que i arribés”, m’iba repetindo por lo camín t’o Paraninfo. “19,90 euros. Jibo con lo pre. Y febrer, que lo pasé en royo. Nanis, que no me lo merco. Ya me l’ampraré de bella biblioteca si me fese goyo” me dicié en veyer los libros sobre la mesa antes d’entrar-ie. “U, a una mala, me lo pillo mas adebant, cuan haiga baixau la muntonera de pendients”.

Una buena escritora ye a sobén una buena comunicadora, y Samanta tardó un tres y no res en ganar-se-me. A los cinco minutos ya heba quitau la libreta d’a mochila pa apuntar un par d’ideyas que dio y una frase que me trucó. Pa forro de bota, la entrevistadora, Eva Cosculluela, sabió menar prou bien l’acto y conseguir de l’autora a saber qué reflexions. Muita medolla en menos d’una hora d’evento. ¡Qué important ye tener una buena presentadora, que conoixca obra y autora y sepa trasmitir!

A la fin, prou que sí, me merqué El buen mal. Dreito t’a muntonera. I tiengo cuantos que irán antes, m’entrefilo. U no pas. Por que lo de leyer ye de mal saber que lectura t’aganará en rematar la que tiens entre mans. Lo que ye de seguro ye que, en la siguient presentación que i vaiga (iste mesmo sabado en tiengo una), cayeré en la presera y acabaré mercando lo libro. Pa ixo se fan.

Parola de diaplerona. Nuevas aventuras de folletz y diaplerons

Parola de diaplerona, lo mío nuevo libro, se presentó iste miercres 29 en lo bar Pottoka d’a Madalena (Zaragoza). Decidié de fer-lo astí en estar un d’ixos puestos que se siente como casa, tanto por la suya ama y cambrera como por la parroquia de buena chent que se i chunta. Entre amigas, companyeras y amants d’os libros y l’aragonés, pasemos una tarde bien pincha y con firmes capazos. Astí podié recontar lo que i hai dezaga d'ista nueva publicación.

Lo libro ye publicau con Círculo Rojo y l’Asociación Cultural Nogara. Cherardo Callejón, un d’os suyos socios y mayestros me presentó repasando la mía fayena por l’aragonés y, como de cutio, con muito carinyo. Que l’asociación torne a confiar en yo vinclando lo suyo prestichio y imachen a la mía persona, ye tot un argüello. En un momento de crisi de l’asociacionismo como lo que somos vivindo dende fa lustros, Nogara amuestra una gran capacidat de supervivencia y de vitalidat que pocas organizacions pueden fer-se-ne la bamba. Ye, antimás, casa segura pa muitas de nusatras, un puesto a on que sabemos que siempre bi habrá belún pa aduyar-nos a tirar entabant con las nuestras iniciativas.

Deciba Rodrigo Cortés que l’estau natural d’una peli ye no existir. Ye aplicable tamién a los libros. Y Parola de diaplerona ha estau por muitos anyos en ixe estau.

A pesar d’estar lo mío quarto libro, lo tercer en aragonés, s’empecipió a escribir antes d’a publicación d’o primer. La historia iba a estar un d’os relatos d’aquell Parola de follet publicau en 2019. Manimenos, como en tantas atras ocacions, lo filo se fue embolicando y acabó feito un rebullo de doscientas pachinas. Los alazetz yeran mesos en 2019, pero no estió dica abril de 2020 que rematé de fer lo primer borrador. Una tarde a las 20:00. Lo remero perfectament porque a ixa hora empecipiaba l’aplauso a las sanitarias que febanos en aquellas envueltas totz los días en estar encadaus por la pasa. Por tot lo que significó tot ixo, he quiesto adedicar lo libro, lo primer que leva colofón, a toda la chent que nos cudió en la pandemia, a qui nunca no habríanos d’ixuplidar.

Los quasi tres anyos dende ixe primer borrador dica tener-lo en las mans, han estau ocupaus por la publicación de Penchada d’un filo y Hechos de tinta y, sobre tot, por un ciento de revisions dica deixar-lo como quereba, porgando-lo de partes de no me convenceban y afinando-ne atras.

Parola de diaplerona ixampla l’universo de Parola de follet. Tornamos a ixe mundo a on que, chunto a la humanidat, conviven fadas, diaplerons y folletz, cada ún con las suyas estrucias, machias, culturas y organización social. A diferencia d’o primer, iste no ye un libro de relatos si no una novela dividida, ixo sí, en dos partes. En la primer, una diaplerona y la suya escuela se concaran con un gubierno tiranico que quier espaldar-la. En la segunda, se une a un follet que acaba de descubrir un mensache misterioso en una boira y que totz dos han de descifrar. L’aventura d’istos dos personaches nos leva dende Baixo-La-Uerva, casa d’os diaplerons dica Chuslivol, pasando por lo Parque Bruil u lo Gancho, entre atros puestos.

En lo tiempo que levo publicando m’ha clamau muito l’atención la necesidat que i hai de calar los libros adintro d’un chenero. Saber en qué etiqueta heba de ficar lo que leyeba u escribiba nunca no ha estau cosa que me sacase lo suenio. Manimenos, como soi conscient de que no totz veyen, ni han de veyer, lo mundo como yo lo veigo, i pienso muito mas y miro de saber responder quan me preguntan de qué chenero ye tal u qual libro ya que pareixe estar important pa muitas. Fer-lo, manimenos, provoca que cambie a sobén la uellada sobre lo libro. I hai cheneros de primera y de segunda. Nomás cal veyer los escaparates d’as librerías comercials pa alufrar toda la patacada de novela historica u novela negra que los imple, deixando puesto a la sci-fi u fantasía, entre atros, nomás quan i hai adaptación existosa en tv u cine. No tiengo garra dubda sobre que Parola de diaplerona encaixe adintro d’a novela de fantasía u d’aventuras, totz dos cheneros “de segunda”. Pero i hai unatro chenero, tamién de segunda, a on que podría encaixar tot y no estar escrita a esprés pa ixo: la novela chovenil. Creigo que, d’adolescent, m’hese feito goyo una historia asinas. Y sobre tot, creigo que no i hai practicament literatura enfilada ta ixas edatz escrita en aragonés.Talment Parola de diaplerona no siga la mas adequada - no la escribié pensando-ie - pero me faría goyo que animase a atras escritoras a mirar d’emplir ixe forau que tien la nuestra literatura en aragonés.

Lo libro se podrá mercar en Nogara, en la siede de Plaza Asso u en la mesa de materials d’as Chornadas d’as luengas. Tamién en lo Día d’o libro, que se fará en lo Paseu Independencia iste 23 d’abril. Estatz-tos a la tisva d’os retes pa saber los horarios. Y si no puetz, u prefieres que te lo ninvie ta casa, escribe-me y charramos. Si te lo quiers leyer de baldes, en deixaré un exiemplar en la biblioteca de Nogara y, antes d’o verano, en la Biblioteca d’Aragón de Dr. Cerrada, a on que ya te puetz leyer Parola de follet y Penchada d’un filo.

La historia queda ubierta, muit ubierta, pa una continación. Tiengo mas istorias, borradors y mesmo bell relato escrito pa seguir emplindo l’universo d’os folletz. Ye bien probable que bell día bi haiga una tercer publicación. Pero no pas luego. Zarro una etapa de quatre anyos y quatre libros que han iu surtindo d’una manera un poquet caotica, y apreciso treballar de maneras diferents y peteniar atros camins. I hai nuevos libros en construcción y prochectos arrienda que luitan por fer-se con un troz d’o mio tiempo, pero no sé quan, cómo ni qué será lo siguient a veyer la luz. Tanimientres, seguiremos dando ferrete con los blogs y la radio y tot lo que se me vaiga ocurrindo. Aspero que lo leigatz y lo compartatz, que tos faiga muitismo goyo y que me recontetz qué tos ha pareixiu.

De presentación en Andorra

Tot y que soi feito ya a charrar en publico y a presentar los míos prochectos por totz los cabos, yera niervudo de tot. Quan bella cosa t’importa ye imposible no fer-te-ne. Y presentar dos libros tant querius pa yo como Penchada d’un filo y Hechos de tinta, en un lugar tant important como Andorra me zocegaba firme. Lo puesto, lo salón d’actos d’a biblioteca, yera muito mas gran que no m’hese pensau, y amás, d’ixos que van en costera, que pareixe que sigas fendo una clase machistral universitaria. Soi feito a mas horizontalidat y informalidat.

Manimenos, como l’andorralla ye amor, a escape pasé a estar-me bien comodo. Aduyaban las amigas, prou que sí. Por alto se veyeba entrar a l’alumnau d’aragonés d’o lugar. La tele tamién fació acto de presencia con una chiqueta entrevista a on que diz que facié buena estrolicadera. Ye lo periglo que tien acercar-me un micro.

I presenté Hechos de tinta y Penchada d’un filo, las mías dos primeras novelas en castellano y aragonés respectivament. Aproveité la oportunidat pa charrutiar bell poquet d’os dos blogs, iste Tierra de barrenaus y lo suyo chirmanet, encara borche, Entre cortesía y colofón. 

Las preguntas y lo debat, que a la fin ye lo millor d’ista mena d’eventos, chiroron prou arredol de l’aragonés. Charremos d’as diferencias d’escribir en una u atra luenga y, sobre tot, d’a situación arredol de l’aragonés. Bi habió mesmo bell momento pa fer una poqueta de terapia colectiva. En lo sur i hai firme intrés por la luenga y, como pa tantas atras cosas, pocos medios. Comentemos todas las clases d’aragonés que no se consiguen dar por falta de profesorau, ya que en a-saber-los lugars sí que i hai requesta de cursos, pero no qui los faiga. Toda una peneta en una luenga que ye en las tres pedretas y a on que los pocos recursos que i hai talment s’habrían d’adedicar prioritariament a qüestions como ista y no pas a atras de tant buen bambuquiar como de radida efectividat a la hora de conservar la luenga. 

Dimpués, en la firma, capacicos con la chent. Floretas de qui heba leyiu lo libro, que siempre ye d’agradeixer y, sobre tot, muitas ganas de leyer en aragonés. En la biblioteca deixé un eixemplar de Penchada d’un filo pa qui quiera amprar-lo. Y en Librería Papelería Macu se puet encargar qualsequier d’as mías publicacions. 

Una tarde rebonica rodiau de muitas personas con qui compartié inquietutz lingüisticas y literarias que me deixó con ganas arrienda de seguir levando los míos libros ta totz los lugars que m’acullan.

Podetz leyer aquí la noticia en Arainfo y El Diario de Teruel y veyer en iste video, a partir d'o minuto 11:30 la noticia en la Televisión local d'Andorra.

 

 

Charrando de Parola de follet

Foto: Pati

Parola de follet, lo primer libro que publico en solitario, ya se presentó lo pasau 15 de mayo en una chornada prou especial pa yo. Amigas, alumnas, compas, familia... y muito amor por l'aragonés implió l'aula Mirador d'o Centro d'historias. En la presentación aproveité pa charrar d'iste blog, d'o programa de radio y de quantas atras d'as cosas que he iu fendo en los zaguers anyos de treballo por la nuestra luenga. Bella reflexión, bella falca publicitaria y, prou que sí, charrar bell poquet d'o libro, prebando de fer que no nomás lo merquetz, sino que lo leigatz que pa yo ye muito mas important.

Parola de follet se puet mercar, por agora, en l'Asociación Cultural Nogara, en la Plaza Asso, y en Vía Láctea, lo local de l'Asociación de Vecins Barrio Verde, en la Carrera Doctor Palomar, 25. Totz dos, en Zaragoza. Antimás, podetz fer-le una uellada u amprar-lo en la biblioteca de Nogara. La ideya ye de ir fendo mas presentacions por lo país, y mesmo dillá d'as nuestras mugas, asinas que si quiers lo libro u tiens bella propuesta pa que lo presiente en bell cabo, ya sabes como contactar con yo.

T'a debantdita presentación, muita chent no podió ir-ie. Por ixos marabillosos horarios laborals que tenemos, por las obligacions familiars, por vivir difuera d'o país, u por lo ciento de compromisos vitals que todas tenemos. Asinas que pa ellas, pa toda la chent que le pueda intresar y pa chenerar mas material audiovisual en aragonés, gravé l'audio d'a presentación, que podetz sentir y descargar-tos d'Ivoox, u aqui mesmo. 



Bell diya antes d'a presentación, Lorenzo Río d'Aragón Radio me fació una entrevista en lo programa Despierta Aragón, a on que, en castellano, expliqué muit breument bella coseta sobre lo libro. Podetz ascuitar-lo y descargar-tos-lo aqui.



A l'atra semana, y con Parola de follet ya presentau, charré con Sara Lambán d'o programa El tranvía verde, con muito mas tiempo, y en aragonés, como gosa de fer en lo suyo espacio con la chent que parlamos ista luenga. Estió tot un luxo d'entrevista en un d'os programas que mas ascuito d'a nuestra radio publica y una sobrebuena oportunidat pa dar-le minutos y presencia a l'aragonés en ixe medio. Podetz ascuitar la entrevista y descargar-tos-la aqui.



Aspero que, si no hetz mercau u leyiu lo libro encara, totz istos audios tos animen a fer-lo. Y prou que sí, que me faigatz arribar antes con antes las vuestras opinions. Los folletz y toda la resta de companyers fantasticos que conviven con ells tienen a-saber-las ganas de compartir las suyas historias con todas vusatras!

Un fanzine pa diez anyos de blog

A menos d'un mes de fer os diez anyos de Tierra de barrenaus, caleba pensar en bella celebración. De entre todas as opcions que teneba, que iban dende publicar un triste post, dica fer o tant asperau TdBFest (sentir Tierra de barrenaus radio 1x06), a la fin me decidié por fer un fanzine, que ye lo que lo peta.

O fanzine, que presiento iste sabado a las 12:00 en Treziclo (C / Liñán, 8, Zaragoza), ye una replega de bells articlos publicaus aquí. No sé si i son os millors, u los que más goyo fan, u os que más visitas han teniu. He prebau, ixo sí, de que estasen representativos d'o blog. I son quantas d'as mias basemias: l'aragonés, a relichión, a borina, ...tot recontau en aragonés. Pareixe metira que en 2016 calga continar con o discurso de que en aragonés, como en qualsiquier atra luenga, se puet charrar de tot. Pero ye asinas. Y como millor que decir-lo, ye fer-lo, aqui ye o testimonio de más de 700 entradas d'o blog sin haber charrau nunca de fainas agroganaderas, ni d'as cosas d'antes más. Que ye muit bien charrar-ne, pero lochicament, soi incapable de fer-lo.

O fanzine preba de cumplir qualques funcions. A primer, tener en soporte fisico una memoria d'istos diez anyos. Que no ye poco. Soi d'os que encara se fa copias en papel d'as fotos. Que nunca no se sabe quan puet petar internet! Segundo, ye financiar o programa de radio. No tien guaires gastos, pero cal pagar bella coseta, asinas que os diners d'o fanzine irán pa poder continar con o programa. A tercer función ye la de prebar de colar-me en as mesas de ferias y puestos chunto a atras obras en aragonés. Encara bi ha muita chent que no fa servir retz socials, u que no se navega guaire con internet. Aspero que o formato fisico le sirva a belun pa conoixer o blog. Tamién ye una traza, en ista primer presentación, y en os eventos que se vaigan fendo, de trobar-me con as lectoras. As que conoixco y as que no. De tener ixe feedback que tanto goyo me fa y, prou que sí, de capaciar un ratet.

Cal agradeixer, prou que sí, a toda la chent que tien a culpa de que o sabado pueda compartir con vusatras iste fanzine. A XCAR, de Malavida, que fació una portalada repincha, y a Juan Pablo que revisó los textos y con qui tanto aprendo cada dia. A toda la chent que bella vez me hetz leyiu y escrito, a qui sentitz o programa de radio, a qui viyetz os videos u as fotos, a las que interactuatz en os retes socials. A todas las que facioron tranya en isto de l'aragonés en internet, con as suyas webs y blogs. Y en a radio, prou que sí. A Arale, que me aguanta 24/7 ixas basemias, y que de cabo ta quan le toca d'opinar si qualcosa ye publicable u no pas. Y a toda la chent que me deixo, que no en serán pocas.

Asinas que convidadas sotz a compartir ixe ratet o sabado de maitins y a pillar-tos o fanzine pa tener ixa memoria d'istos diez anyos. Besichons, lectoras, que sotz as millors!

Debantadera de Future Sight

O Domingo de maitins yera o diya: a debantadera de Future Sight, a colezión que remata con o bloque de Espiral d’o Tiempo. Como en as atrás dos colezions marché ta Freakland – cuasi a unica botiga que fa istas cosas en Zaragoza – asperando ubrir bel Akroma u, a lo menos, Engendros de Bogardan, Lajas de Trokair, Vengadora de Serra… Bella coseta que poder cambiar y/u chugar.

As nobedaz en a organizazión me fazión asabelo goyo. Una redometa d’augua ta cada chugador, una carta foil aleatoria ta cadagún y l’aire acondizionau. Antimás no se fazió a fatera de cambiar de mazo y asinas rematemos antis y no nos lebemos o tipico chasco de ubrir cosas buenas y aber-las de pasar. D’o mazo poco bueno en surtió: una Noble fada que nian sabeba que esistiba pero que me fazió buena onra y un Yacimiento de Gemas (prebablemen a millor carta que i pillé). Bella común que m’intresaba y poco más.

En os sobres (tres, de Future Sight) se repitió un diaplerón 2/2 que buela y teneba prisa. L’incombenien, un eco de descartar-se una que tampoco no empreñaba masiau. Tamién i pillé tres bichos (berde, azul y negro) que fan que as tuyas cartas sigan trasgos purulentos, elfos de llanowar u 1/1 boladors. Istas cuatro, chugando con más cartas con demenzia son prou periglosas (si en ese teniu...)

O mazo lo fazié pensando en meter-ie criaturas chicorronas con buelo u desbanezer-se prebando de tener un mazo agresibo. A estratechia, por os resultaus estió entibocada. En que quillaban un pin denzima d’a mesa os míos cucos pretaban a correr u s’esmortezeban por as purnas d’a nueba tierra roya que fote tiros. A millor carta, amás d’o Yacimiento de gemas que me permitió chugar as tres colors en cualques partidas, os diaplez que, de conchunta con o Magofuerza primordial feban asabelo mal. Atrás buenas que chugué o brutal Saqueador il-Kor y a dríada del bosque gusano y o Kraken d’o mar profundo que, si conseguiba pisar a mesa estricallaba a l’oponen en dos enrestidas. A pior, Presagio de Llanowar, que dende a terzer ronda banquileé en que podeba.

Remató o diya con un 2-3, seis puntez, un seizeno puesto (de bentitres que rematemos) y un sobre de Future Sight que me tocó en o sorteu.
Tos dixo con o listau d’o mazo por si querez fer bella soxerenzia u simplamen redir-tos-ne:
1 Draco joven colapúa
1 Sabio de epityr
1 Rayanube ala agrietada
1 Errante il-dal
1 Magofuerza primordial
1 lente prismático
3 diablillo de caverna profunda
2 presagio de llanowar
1 buscar el mañana
1 siembranubes
1 espada de los mansos
1 noble hada
1 exhumador de la cordillera skirk
2 presagio de craneos
1 llamar al submundo
1 driada del bosque gusano
1 mentor de llanowar
1 funerario
1 saqueador il-kor
1 presagio aven
1 blindaje petrificado
1 kraken del mar profundo
1 yacimiento de gemas
4 pantano
4 bosque
5 isla

Primers cartas de Future Sight (II)

Contino con os comentarios sobre as cartas, encara que a la belozidat que aparixen nuebas notizias, isto se queda biello en un par d'oras.

- Korlash, Heir to Blackcblade: Atra d'as millors cartas que i aparixerán. En monoblack ya ye colluta, pero con Urborg, tierra aparexida en Caos Planar ya se puede fer serbir en mazos multicolors. Antimás se rechenera y, en estar un zombie tien puesto en mazos tribals (encara que nunca no he bisto garra mazo de zombies. As copias que no podamos fer serbir por tener-ne uno en chuego nos fan onra ta mirar un par de pantanos , si con tot ixto no en estase prou, la dan de baldes en as presentazions! TOTAL! (prenunziau en madaleniense).

- Tombstalker: Ta qui no faiga serbir o zimenterio ta cosa (lo que cada diya ye más raro, y más en os mazos negros) ye un 5/5 bolador por poquismo mana, más que más si emplega fetchs.

- Yixlid Jailer: Ta o banquillo ta poder estricallar os mazos que no fan que tornar-te cosas d'o zimenterio (como ixa Blink que me fazió a tana en o zaguer torneu).

- Arc Razor: En primeras parix prou feble, pero estoi que en una control royo-azul puede fer buena onra. Si a partida dura prou mata china-chana a l'atro chugador.

- Bogardan Lancer: En una Boros podría cullir-ie, encara que me pienso que bi ha millors bichos por ixe pre.

- Homig Sliver: En os mazos de Sliver beyerá chuego de seguras. Puez mirar os millors Slivers contra cada estratechia.

- Llanowar Mentor: Fa que todas as tuyas cartas sigan elfos de llanowar potenzials. Nunca no te quedarás sin mana u bichos 1/1 u elfos (en mazos tribals). Ta yo, una d'as millors infrecuens. Y ta qui en tienga, podrá fer serbir os suyos tokens d'os miticos elfos de llanowar.

- Magus of the Vineyard: Minicombo de seguras y, si l'atro chugador no puede fer cosa con o mana, le ferá un cremau de dos toz os turnos...

- Nacatl War Band: Buenisma per sé si no estase tan cara. Contra os mazos que plenan a mesa de bichos chicorrons muito millor y ta qui yeranos chugando mazos de saprolins (qué pasa?, cadagún pierde como quiere, no?) seremos tremolando cuan nos lo chuguen.

- Tarmogoyf: Con todas as cartas que salen en ista colezión que tienen dos tipos (tierra -criatura y atras cosas más marzianas) iste bicho se puede fer un 3/4 u un 4/5 en o turno dos u tres.

- Virulent Sliver: Con ista m'he feito buena rialleta remerando os mazos de bereno que me feba de chicorrón. Beyerá chuego? Ganará a la fin bel mazo de berenosos bichos?

- Veilstone amulet: Buena traza de continar tenendo toz os tuyos bichos en chuego.

- Tolaria West: Con ista tiengo a duda de si te puez mirar unatra tierra. Si ye asinas, ya podremos completar l'Urzatron, mirar a tierra d'a color que nos manca u ixa que te fa o combo (a Urborg ta Kolash, por exemplo...)

- Nimbus Maze: Una doble que nomás nos fa onra ta bosar os costes dobles. Chugada con dobles ye unatra doble. Intresán y, de seguras, carisma.

Con isto ya he rematau de comentar o primer spoiler parzial, encara que en MagicMadrid ya han publicau o segundo spoiler parzial con atras 75 cartas. Parix que a nueba colezión trayerá muitas nobedaz ta o bloque y o chuego, en cheneral ubrindo-se a nuebas estratechias. Jolio, que bloque, s'han fotiu los de Wizards! Ta tornarnos barrenaus! Nos beyemos en as presentazions, que se suposa que bi abrá en Freakland.

Más notizias de Magic

No aturan as notizias sobre Magic. O Spoiler de Caos Planar ya ye cuasi completo. En iste inte se'n conoxen 116 d'as 165 cartas d'a nueba colezión (www.rebellion.org/magicrebel). A la fin Ocio Joven de Zaragoza ferá a presentazión o Sabado 20. Promete muito, pos as cartas que he conoxiu dica agora pueden reboluzionar o chuego. Como diz o cartel d'as presentazions: "Y si una presentazión podese cambiar-lo tot?" ("Et si une avant premiere pouvait tout changer?") (www.magicmadrid.es/blog/?p=167). Aquí a o canto podez beyer o nuebo Akroma que no ye que un exemplo d'a filosofía de Caos Planar: cartas biellas u clasicas cambiadas de color (un giant growth royo, una ira de dios negra, akroma royo, un fungus blanco y asinas asinas...)

Freakland, que en primeras no ferá presentazión, a lo menos en Chinero, ha conseguiu organizar un PTQ ta l'onze de Febrero. O formato será Extended (por desgrazia ta yo, que nunca no i he chugau) y ya son parando una minipaxina web sobre o PTQ. Qué mes! Astí nos beyeremos....

Caos Planar: a nueba colezión de Magic

Ya ye plegando... Ya cuasi ye aquí a nueba colezión de Magic, Planar Chaos (segunda d’o bloque "Espiral d’o tiempo"). Os foros ya son a rebutir de rumors y ya se conoxen bellas cartas que i aparixeran (como una bersión negra d’a "Ira de Dios"). En Zaragoza encara no sé si bi abrá presentazión. Seguntes a paxina de WotC (www.wizards.com) bi abrá una en OcioJoven (www.tiendaociojoven.com/zaragoza) o diya 20 (encara que no sé como i cullirá a chen) y se diz que bi’n abra unatra en Freakland (www.freaklandgames.com) o diya 28. Asperamos que a colezión siga tan buena como en parixe y que se faigan as dos presentazions (u más). Tan y mientres podez mirar-tos os spoilers parzials en www.magicmadrid.es u en www.rebellion.es/magicrebel.