Fer-lo facil (Cantando Manifiesto delirista, de Love of lesbian)

"Qué suerte que aún hay gente que lo hace fácil / Aquellos que consiguen que fluya bien". Manifiesto delirista. Love of lesbian.

Cada vegada que he de treballar con bella persona nueva, rai si ye por fayena u por activismo, me pregunto qué me trobaré y ruego a Rosendo que me toque una d’ixas personas que lo fan facil que’n charra Love of lesbian en lo suyo manifiesto delirista.

En l’atro cabo d’ixas personas, son los que lo fan tot dificil, que pareixe que les cueste vivir. Tot son entrepuces pa ixa chent. Entrepuces pa los que no proposan garra solución y chemecan cada vegada que i das alternativas. Rai como planteyes la fayena. Puez haber pensau mesmo en lo zaguer detalle, que trobarán cualque problema de mal apanyo. A sobén, acaban aceptando lo que siga pero no sin antes queixar-se, ploriconiar y fer-te pasar uns niervols innecesarios de tot. Son tamién vampiros enercheticos. Ixa mena de personas que te desmoralizan, que te cansan mas en diez minutos que en toda la chornada de treballo.

En abunda, d’ixa chent. Por ixo m’estimo tanto a las que lo fan facil, que son bien poquetas y de mal trobar. A ixas personas me las mincharía. No significa que sigan docils, que tot les importe igual u que tiengan una obediencia ciega, si no que fan d’os problemas circunstancias, proposan solucions, empatizan con la fayena de cada persona que fa parte d’a movida que sigas planteyando y, tamién como diz la canción, fan que tot fluiga.

N’i hai de grises, como cuasi tot en ista vida. Chent que ni fo ni fa, que seguntes lo día, como lo pilles, la rasmia que traiga u la pacha que faigaz. Y d’o momento vital de cada ún. Que cuan tiens un mal día u una mala temporada, te metes “repunante” -que diría lo chavalín Xuacu- y pareixe que tot te prebe malament. U a l’inversa, que si lo cierzo sofla a favor, tot se t’imple de flors y no i hai problema grieu ni cleta que no se pueda blincar.

La chent que lo fa facil ye la graseta ixa que le chitamos a la cadena d’a bici, que fa que deixe de esgarrillar y fer rudios y que tot lo mecanismo carrule suau. Ya que podese fer-me-ne la bamba, d’estar yo un d’ixos que lo fa facil y que Love of lesbian m’hese adedicau un tema. Manimenos, la verdat ye que no siempre ha estau asinas. Sé que a sobén m’he meso niquitoso y politicoso. Pero como dició un gran escritor, d’errors en femos todas, lo important ye qué en faigamos, d’els.

Asinas que dende habe tiempo que miro de fer fluyir millor la fayena, de dar importancia a las cosas que en veras en tienen y enfocar-me antes en la solución d’os problemas que en la busca de responsables y mesmo d’aivar-me si barrunto que foi estorbo. Dengún no ye esencial.

Si funciona, si soi una persona que lo fa facil u fa la trabeta, l’habrá de decir lo tiempo y las compas.

Nota: Iste post fa parte d'una serie clamada "Cantando" a on que pencho posts inspiraus por cancions de toda mena. Si tiens bella sucherencia, no dudes en escribir-me.
 

Naixiu d'Aragón (Cantando No puc deixar-te, de Auxili)

"Ací no em pariren, però ací estic, ací visc orgullós i agraït de que em volgueres acollir". (No puc deixar-te. Auxili)

I hai, en l'imachinario colectivo, bella mena d'autoridat que te da naixer d'un puesto. Pareixe como si ixos primers dias d'a vida tuya marcasen pa cutio la tuya existencia. Como si imprentasen en lo tuyo ADN una serie de caracteristicas imborrables y inmutables que definirán la tuya identidat la resta d'a tuya existencia. Pa estar "d'un puesto", no ye prou con haber viviu astí, con desfender-lo u con pagar-ie impuestos. S'aprecisa ixe certificau de naiximiento, u mesmo que los tuyos antepasaus tamién sigan d'o lugar, barrio u ciudat. Los famosos ueito apellius acumulaus a lo nacionalismo vasco.

D'eixemplos en tenemos a pirol en lo país nuestro cada vegada que se parla de Catalunya. ¿Quantas vegadas habremos sentiu desacreditar a Carod Rovira u a muitos atros politicos independentistas por tener orichens en Aragón? Las radices d'una tienen la importancia que cada ún les quiera dar. Y la identidat no ha d'estar vinclada necesariament a lo puesto d'a on que se naixió. Ni sisquiá a on que se creixió.

Tornando ta l'eixemplo catalán, tenemos toda una cheneración d'independentistas con una graniza variedat de circumstancias personals. Fillas y nietas de chent venida d'atras partes de l'estau y d'o mundo, comparten militancia con milenta personas que pareixen descendients d'o mesmo Rafael Casanova. Muitas d'ixas migradas troboron en Catalunya un puesto que las acubilló, con una cultura que talment no tetasen en casa, pero que acarrazoron con rasmia. A sobén, con muito mas carinyo que las propias d'o lugar.

En Aragón, ixe fenomeno tien atras coordenadas. Dos d'as personas que conoixco que mas han treballau por lo país, no tienen las suyas radices familiars aqui. Por las aulas de Nogara, i ha pasau chent de procedencias bien diversas, con a-saber-las ganas d'aprender aragonés y de chupir-se d'a nuestra cultura tradicional.  Bien a ormino son la chent "de difuera" las que mas s'intresan por tot lo nuestro y lo fan suyo tamién.

Un compa de l'instituto se casó t'Andalucía. La suya parella vinió a visitar Albarrazín. Embacilada por la polideza d'o lugar, le'n comentó a la suya suegra, qui respondió con un breu: "Bueno, sí, ye mahico". La zagala se feba cruces por lo poco que valuramos lo nuestro patrimonio. Talment si se'n venise a vivir t'aquí, se tornaría una d'ixas defensoras de l'aragonés que, arribadas dende difuera, aprecian lo que nusatras tant a sobén veyemos como poco important.

Talment lo nuestro saldo migratorio negativo ye un mas d'os tantos entrepuces que hemos teniu pa la construcción d'una identidat aragonesa que valure lo suyo patrimonio historico, cultural y lingüistico. Talment las personas que han habiu d'ixopar son fendo ixe treballo difuera, y no en tenemos prou de difuera que viengan a trucar-nos y avisar-nos d'as cosas tant repolidas que tenemos aquí.

Pa forro de bota, muitas siguen tenendo ixa envista tant negativa de que si no yes de bell puesto pareixes tener menos dreito - u mesmo no tener-ne - a desfender la suya cultura, patrimonio u tradicions. ¡Guarda si nos femos la bamba las aragonesas d'estar acullidoras! Pero encara en 2019 i hai qui demanda lo libro de familia a la hora de considerar-te "autentica" de tal u qual causa.

Soi naixiu d'aqui, igual como pai, mai, y totz los yayos mios. No conoixco garra ascendent mio naixiu de difuera d'o país, y mesmo muit pocos de difuera de Zaragoza. Y no por ixo tiengo mas u menos dreito que garra atra persona a lo nuestro patrimonio, luenga, identidat, cultura y historia. Sisquiá bi hese mas "recient arribaus" como belún d'os que conoixco, y menos "argüellosos d'estar aragoneses" de culicaiga.

Semper victi (Cantando Vete a Cuba, de Sons of Aguirre)

"La izquierda es como el Córdoba, derrota tras derrota". Vete a Cuba. Sons of Aguirre

Igual como la banca siempre gana, la izquierda siempre pierde. La redota ye un concepto que todas las militants d'a izquierda hemos aprendiu a asimilar como qualcosa cutiana. Estioron bien aplaudidas las parolas de Gabriel Rufián quan deciba "Yo soi d'izquierdas y levo en lo mio ADN la redota". Pareixe una condena biblica, una maldición chitana, cosas de fuerzas que no controlamos. Pero como antimás lo "redotismo" ye antirevolucionario, quasi nian podemos charrar-ne. ¿U sí?

Bella vegadas pareixe que sí, que ganamos, pero alavez las nuestras pantasmas nos fan cayer y perdemos, como siempre. Entramos en ixe estau mental que tant bien describiba A. Córdoba en lo suyo articlo pa El Salto “No pudimos”. En Aragón mesmo prenió forma de partiu, la Izquierda Depresiva Aragonesa. Y acabamos con las nuestras purgas, la chent salindo d’os partius a boticiegas y las consultas d’as psicologas a rebutir de ex-militants demandando las suyas recetas d’antidrepresivos.

Una d’as virtutz acumuladas tradicionalment a la izquierda ye la exichencia con los suyos quadros y con los cumplimientos programaticos. Ixo, que como he dito ye virtut, puet esdevenir un gran problema quan, angluciosas pa cambiar-lo tot, empecipiamos a criticar publicament y de manera bien fura a los nuestros representants, en lo minuto zero de gubierno. Muitas vegadas mesmo con mas rasmia d’a que tenemos contra lo faixismo u lo PSOE. Saber moderar las nuestras criticar y levar-las por los camins adequaus ye qualcosa que habríanos de treballar-nos prou.

Las activistas d’a cucha pareixemos a sobén dichitals. Entendemos la victoria y la redota como 1 y 0. No bi ha garra valor entre ixos dos. U ganamos de tot u perdemos de tot. Y como ganar de tot, por un regular, ye imposible, consideramos toda la resta d’estaus como un zero. Definimos como redota qualsiquier cumplimiento programatico por debaixo d’o 100 %, tot y sabendo que los programas son en muitos aspectos ambiguos precisament pa replegar lo ciento de sensibilidatz diferents que tenemos adintro.

Pa forro de bota, ixe “1”, ixa victoria total, la queremos YA. No concebimos que calga asperar. Nos sentimos tant cargadas de razón que creyemos que toda la resta d’a población veyerá con los nuestros uellos la Verdat de manera tant caboliosa como la veyemos nusatras. No cal aprestar ni dar pasos intermeyos pa arribar a fer que los nuestros cambios no sigan tant efimeros como gosan d’estar.

Ya sé que no tenemos costumbre. Diz que a la izquierda, quan ye izquierda de verdat, le deixan gubernar poco tiempo. L’enemigo ye gran y poderoso. Tien lo cauquerré y los medios de comunicación. La ilesia pa fer-le mitins totz los domingos y lo discurso hechemonico en los zaguers 80 anyos. Asinas que ganamos poco y por poco tiempo. Pero creigo que un d’os retos que habríanos de plantear-nos mas a sobén ye qué fer con las victorias. Cómo chestionar-las mediaticament, pero sobre tot, como chestionar-las internament. Pa no matar-nos, pa no escindir-nos cada diez días, pa no haber de renaixer y fer absurdos procesos de compleganza cada decada.

Escribir como terapia (Cantando Líquid, de Smoking souls)

"Farem dels versos un vaixell per transportar totes les nostres miséries i enfonsar-lo a l'oceà". Líquid. Smoking souls.

Aprender a leyer y escribir, antimás d'estar una graniza ferramienta d'o ser humano, ye probablement lo conoiximiento mas important que haiga adquiriu en la mía vida. Pero antiparte d'a vesant purament utilitarista, la escritura me permite totz los diyas vivir muito millor.

No sé si escribir será tant terapeutico como dicen, pero no fer-lo ye qualcosa que no quiero nian concebir. Igual como me cuesta pensar en un mundo sin mosica, se me fa anguniant uno a on que no podese disfrutar d'iste arte. Como consumidor y como productor, toda dos maneras fan que la mia vida siga muito millor.

Haber d'escribir un texto aduya a pensar sobre lo que queremos transmitir. A diferencia d'a interacción oral, mas espontania, las ideyas en lo luengache escrito han d'ordenar-se, prescidindo de toda la información que puet aportar lo tono u los cenyos. En ixe proceso, a sobén, nos trobamos con reflexions que no faríanos si no nos hesenos atriviu a escribir lo que pensamos.

Quan concaro una fuella u una pantalla en blanco, con ganas d'escribir u bella ideya que transmitir, me fa goyo de contimparar lo mio tozuel con bella aula de crios d'escuela. Por defecto, totz nos movebanos a la bimbola, como las moleculas d'un gas. Asinas van las mias ideyas, por l'aula atarrantadas, topetando-se con belatras, amagando-se baixo un pupitre, u timidas en un rinconet. En empecipiar a escribir, i entra la mayestra y se mete a ordenar ixe caos. "Fuleno, ves t'o puesto tuyo. Zuteno, deixa d'abatanar a lo tuyo companyer. Mengueno, replega los libros que has deixau por tierra". Y asinas-asinas lo texto va prenendo forma. Talment a la fin d'a clase las alumnas no sigan exactament como quereba la mayestra, pero a lo menos s'ha acabau toda la titabola previa.

Lo mundo agora va a tot meter. La mayoría d'os mensaches han de cullir-ie en los 280 caracters de Twitter, en los vinte segundos d'os anuncios de TV y radio u en las buegas d'as stories d'os retz socials. Todas istas ferramientas son la fast food d'a comunicación: fan honra, funcionan, cumplen la suya función, pero les falta ensundia. Y igual como pa fer buena cocina, cal tiempo y dedicación, pa comunicar cosas que valgan la pena s'aprecisa lo mesmo.

Asinas que talment una d'as propiedatz terapeuticas d'a escritura, compartida con la cocina, siga derivada d'o feito de que no se puet escribir a tot meter, de que cal aturar con tot lo que yes fendo, fer firme ficancia d'a fayena que vas a encetar y executar-la a monico porque igual como un pasa con una buena receta de cocina, deixar-se levar por las prisas puet malmeter lo texto.

A ixe tatoneyo d'o mundo, propio d'a escritura, cal anyadir-le unatra dimensión en lo caso d'a ficción. Astí, antimás de cambiar la velocidat se cambea tamién l'espacio. Has d'ixopar ent'o mundo que yes leyendo u creando y deixar en tierra tot lo que no te cal pa ixe viache. Que en bells casos, ye simplament TOT.  Ixa abstracción ye muit evident en lo caso d'a fantasía heroica u d'a sciencia ficción, pero cuento que ocurre en bella mida en qualsiquier buena obra.

Leyendo y escribindo te trobas con muitas cosas que yeran en la tuya ment dondiando y que sisquiá lo sabebas. Te trobas con tu mesmo, con los tuyos pensamientos y las tuyas miserias. Y como dicen los Smoking Souls, fas con las tuyas parolas un barco que se leve ixas zagueras, y lo fundes en l'ociano. Ixa ye la sensación que tiengo quan remato de leyer un buen libro u d'escribir bella historia.

Piratas mosicals (Cantando Anticanción, de Skalariak)

"Todos fuimos piratas alguna vez, desde el vinilo al mp3" Anticanción. Skalariak

Confieso que he pirateau. Ye peccata minuta. Una d'ixas cosas que son ilegals, pero socialment acceptadas y normalizadas. Afortunadament pa yo, y pa qualsiquier persona que ame la mosica. Si no por la piratería, no conoixería ni la metat de mosicas que conoixco agora mesmo, ni m'hese deixau tantos chanfles en conciertos. Sisquiá hese puesto pagar tamién los orichinals.

Entiendo la postura d'as creadoras. A la chent gosa de fer-nos goyo cobrar por lo nuestro treballo. A muitas mosicas que no tienen atra que adedicar-se-ie en lo suyo tiempo libre, les faría goyo de poder fer-lo profesionalment. Pero creigo que la piratería ye lo menor d'os suyos problemas. La mia experiencia talment no siga la mayoritaria, pero ye bien común.

Dende criet he consumiu mosica a-saber-la. En un porcentache altismo, pirateada. Dende las casetes que nos ibanos pasando y que a cada gravación y reproducción sonaban pior, dica agora mesmo que tiengo una dotzena de discos baixando-se dende eMule (sí, eMule sigue funcionando). La revolución d'o CD me pilló choven y la mayoría d'os discos los ascuité ya en ixe formato. Antiparte d'os que en febanos partache la colleta d'amigos, las bibliotecas publicas y bella botiga a on que logaban cds orichinals me furniban de tot lo que no podeba mercar. Porque sí, de quan en vez mercaba discos orichinals. Mas que mas, los que pillaba a buen pre u yeran de bandas que me fesen firme goyo. Pero la mia economía - basicament la semanada de mis pais - no adubiba a mercar ni sisquiá un chiquet porcentache d'a mosica que ascuitaba. En casa, en lo camín ta l'instituto, en l'auto quan a la fin en tenié... prebo de que la mia vida siempre vaiga acompanyada de buena y variada mosica y pa que ixa cantidat fuese nomás d'orichinals hese aprecisau tres u quatre chornals.

Toda ixa ripa de mosica que ascuitaba gracias a la piratería me permitió conoixer grupos a embute. Y como siempre he pensau que lo millor ye fer-lo en directo a on que la experiencia ye de tot diferent, ye estau raro lo cabo de semana d'a mia vida que no he iu ta bell concierto. Talment m'escusaba bella perra d'os discos pero a fe que qualsiquier grupo que en siga fan será bien contento de que, gracias a ixo, haiga iu a veyer-los un ciento de vegadas.

Tot ha cambiau muito en istos zaguers anyos. L'acceso ye muito mas libre si tiens conexión a internet. Puedo ascuitar qualsiquier canción de qualsiquier colla vía Youtube, Spotify u la plataforma que siga. Muitas penchan los suyos discos pa descarga directa. Y no entiendo a qui no lo fa. Las mias listas de reproducción pa correr, pa fer gambadas u pa l'auto son muito mas freqüentadas por qui me facilitan l'acceso a los suyos archivos mosicals. Lo que fa que los ascuite mas a soben. Que siga mas a la tisva d'o suyo siguient treballo y de a ón podré veyer-los en directo. Muitos d'os zaguers discos que me he mercau fisicament ya los teneba baixaus d'antes. La crompa ha respondiu a lo mio fetichismo u a la voluntat de refirmar economicament lo prochecto mosical.

Hue, con pleno acceso a la mosica, contino mercando discos, he feito parte de quantos crowdfundings pa gravar-ne y, sobre tot, voi ta totz los conciertos que me permite lo mio chornal. Un porcentache prou important d'os mios diners "pa vicios" van t'a mosica de manera dreitament u indirecta. Y tot ixo gracias a la piratería.

Nota: Iste ye lo primer post d'una nueva serie, que clamaré "Cantando...". I meteré posts que tiengan como inspiración bella frase de bella canta, incluyindo a la fin de cada ún lo video, si n'i hai. Si tiens bella propuesta de canción, mete-te en contacto con yo.