martes, 29 de noviembre de 2022

Historietas de lunetas

No remero no portar lunetas. Empecipié a fer-las servir con seis anyetz. T’a part d’alavez ya teneba la mía primer dioptría de muitas atras que vendrían a l’arreu, seguntes iba creixendo. Con ixas primeras lunetas vendrían las moflas de qui no en portaba, que en aquellas envueltas yera la mas gran parte d’a clase. Tamién las embotadas, la tipica de quatre-uellos, y belatra que me metió un ababol por unas lunetas en concreto que le pareixeban graciosas. Yo, que soi pacifico de siempre, debié fartar-me-ne bell día y respondié a aquella nueva embotada con una punyada en la fonsera que lo deixó por tierra. No en soi argüelloso, pero lo caso ye que no tornó a meter-me garra embotada.

Portar lunetas estió causa de muitas gromas a lo mío redol en los anyos de colechio. Aquellas antiparras yeran, antimás, a saber qué fieras. Bien aluenyadas d’as lunetas modernetas que vinioron quantos anyos dimpués. Ixas que la montura quasi ni se veyeba. Beluna que nian en teneba, que agafaba los cristals d’un puntico. Las modas, que siempre me sorprenden, han feito que agora i haiga una patacada de chent que fa servir aquells horribles modelos de lunetas, grans, de plastico, visteros, con colors marronas, con monturas que habe anyos nos hesen espantau a qui no nos quedaba atra que portar-las.

Pasar ta l’instituto, antiparte de muitas atras alegrías, fació que a la fin sustituyise las lunetas por lentillas. Ixo suposaba abandonar moflas y embotadas y la comodidat de no levar lo zarrio ixe debant d’os mios uellos. Que antimás, y debiu a la cantidat de dioptrías que ya teneba, empecipiaba a pesar y molestar. Ya siga porque l’abandono d’as lunetas me feba mas bonico a los uellos d’as zagalas, porque teneba mas confianza en yo mesmo u porque, simplament, tocaba por edat, empecipié a tener mas exito con las mesachas que, dica alavez, yera quasi nulo.

A sobén me preguntan por qué no me opero la vista. Soi tant feito a las lunetas y las lentillas que fa muito tiempo que no me suposan garra estorbo. Me las saco y me las meto de manera mecanica, sin pensar-ie. Mesmo en acampadas de festivals, quan torno como un cesto t’a tienda, que quasi no adubo ni a caminar, bella cosa en las partes mas institivas d’o mio cerebro consiguen que deixe bien adrezadas lentillas y lunetas adintro d’o mío neceser, la sola cosa en orden en toda la caotica parte mía d’a nuestra circumstancial casa. Asinas que ixa operación, pa yo y por agora, me pareixe malfurriar diners.

La presbicia, ixa filla de mil diaples, amaneixió en la mía vida en la zaguer revisión medica d’o treballo. “¿Levas lentillas?” me preguntó la medica. Asintié. “Pues las siguients, progresivas”. A la miopía he sumau bella mica d’astigmatismo fa bell par d’anyos. Y agora s’anyadiba ixo, respondendo a la pregunta de porqué heba d’estirar lo brazo pa leyer. Yo, que lo de pentinar canas fa lustros que no m’afecta, torné a sentir-me gran, chaquiento, decadent. Lo mío complexo de Peter Pan fa que me prenga muit malament istos sinyals d’a mía edat. Poco tiempo dimpués d’o diagnostico fue t’a optica. “Ola, m’acaban de decir que tiengo presbicia”, les dicié, asperando que me metesen bell catatico d’ixos que tienen pa medir lo que pertocase. A la pregunta de qué graduación heba de portar, me respondioron “¿Qué anyos tiens?” y descubrié que la presbicia se gradua por edat y no pas por dioptrías, por lo que veigo (u por lo que no). Atro trucazo pa ixa vida de chovenón que no quiero deixar marchar. En salié bien encarranyau. No pas con las opticas, pobrichonas, que facioron muit bien lo treballo suyo. Yera encarranyau con la vida, con haber de tornar a portar lunetas, con fer-me viello, con barruntar totz los mals que m’han d’arribar sí u sí, porque la nuestra biolochía ye asinas. Y pa forro de bota, no me’n puedo queixar, que bien sano soi pa los anyos que tiengo.

Istos días, precisament pa fer-me ixas progresivas, m’ha tocau d’estar-me sin lentillas. Tornar a portar lunetas. I hai muitisma chent que nunca no m’heba visto con lunetas, que nian sabeba que soi un top, que no i veigo sin aduya. ¡Quánto han cambiau las cosas dende ixos anyos de colechio! Las mías lunetas d’agora son bien pinchas, tot cal decir-lo, pero la ripa d’afalagos que m’ha veniu en istos días m’ha feito bien contento. Entre la cachimalla, por lo que veigo y lo que me’n recuentan mais y pais, lo de portar lunetas ye mas ixemenau y normalizau. Ya no i hai “quatre-uellos” en las clases porque, de feito, en muitas aulas, en son mayoría. Qui diz que tot tiempo d’antes mas yera millor, s’entivoca por muitas razons. Pero a fé que, miope, no en ye. Ya nomás manca que se incluigan en la Seguridat Social, que igual que no puedo treballar con una garra trencada, sin lunetas, no puedo ni salir de casa.

lunes, 21 de noviembre de 2022

La X Trobada Vivir en aragonés. Tierra de barrenaus 9x05

Pa qualsequier que quiera aprender, de verdat, una luenga ye fundamental la socialización en ixa luenga. Ye qualcosa que siempre hemos teniu claro en belunas d'as asociacions en desfensa de l'aragonés y que ha contrimostrau funcionar, aduyando a chenerar nuevos fablants activos. Lo contacto entre las personas que lo fablan por transmisión familiar y las que lo han aprendiu d'adultas ye vital pa que todas dos comunidatz se conoixcan y compartan inquietutz, realidatz y envistas y que talment s'habría de treballar mas pa crebar totz ixos mitos que ixemenan qui les intresa que no i haiga entendimiento. Istos dos afers son precisament los que treballan iniciativas como la Trobada Vivir en aragonés que protagoniza iste nuevo programa de Tierra de barrenaus.

De man de Cristina, una d'as organizadoras, conoixeremos un poquet lo naiximiento y la filosofía d'a Trobada que fa en pocos días la suya decena edición. Ciresa y Echo acullirán una vegada mas a una patacada de personas intresadas por la nuestra luenga los días 25, 26 y 27 de noviembre. S'ha organizau quantas actividatz bien variadas y pa tot lo mundo, asinas que no i hai garra enchaquia pa no ir-ie. Puetz trobar información y apuntar-te-ie aqui.

Antimás d'a Trobada tamién charraremos de nuevas d'o caso d'os 6 de Zaragoza, que han empecipiau con una campanya de firmas. Te convido a informar-te-ne si no conoixes iste nuevo caso de montache policial y de criminalización de l'antifaixismo y, prou que sí, a adhibir-te a ixa campanya.

En la parte mosical punchamos la zaguer canción de Valira, qui pasoron por Zaragoza presentando-nos lo suyo directo en La Casa del Loco, en un concierto que resenyamos. Ubrimos tamién un nuevo calaixo de cancions con un tema en aragonés sobre zorruspiar.

Programa #134

viernes, 11 de noviembre de 2022

Libros que "nomás levan una cosa"

I hai un topico, quasi un meme en lo sentiu Dawkinsiano, que ye ixe d’a sinyora fendo ringlera en lo supermercau con un pote de qualcosa y que sabes que acabará pasando por caixa antes que no tu. N’i hai de directas, que en que te veyen, rai si ye con un carro rebutient u con un cesto con quatre productos, te demandan de camín ¿t’importa que pase primera, que no levo so que una cosa?. N’i hai d’atras que no son tant garrispas y antes de fer LA pregunta se te meten cerqueta, amostrando lo suyo solo paquet de garbanzos y mirando-se-te de vislai como si con la uellada fuese prou pa saber d’as suyas intencions. En iste grupo n’i hai mesmo de qui aproveitan bell momento que te miras lo mobil u que yes pensando en los Targaryen u que me sé yo, y sin parar cuenta las tiens debant. Personalment, ye bien raro que tienga tantisma prisa como pa no deixar que pasen debant. A sobén, antes de que me lo pregunten, les escuso la hipotetica vergüenya de fer-lo y les ufreixco lo mío puesto. “Pase, si quier vusté, que yo levo mas cosas”. Tot un personache, ixa "sinyora d’una sola cosa".

D’a mesma manera, i hai “libros d’una sola cosa”. No porque sigan monotematicos, que ixo rai, sino porque tienen lo mesmo comportamiento. La caixa d’o super podría asemellar-se a la muntonera de libros que las aficionadas a la lectura gosamos tener. Seguntes en mercas, la muntonera puya, seguntes en leyes, baixa. Y no sé vusatras, pero yo por un regular voi en orden. Ye cutiano, mas que no me faría goyo d’admitir, que amaneixca un libro que “nomás leva una cosa” y se blinque tot ixe orden. Que se cale, de rapiconté, por debant de toda ixas resta d’obras que levabas aguardando leyer en que rematases la lectura actual. Belún, levaba tiempo acucutando. Surtindo, por eixemplo, en los rets socials, con ixa portalada que te truca l’atención, u estando la zaguer obra d’a tuya escritora favorita a qui le demandas que, por favor, aspere un poquet a que te leigas lo que tenebas por debant. Puet estar que siga una d’ixas desalopadas que son amor a l’inte, que lo veyes y no te’n puetz adubir, que te l’has de leyer sí u sí, que te miras la muntonera y les dices “lo siento, pero isto ye prioritario, ¿que no veyetz que no porta que una cosa? Cal que se blinque la ringlera”.

Igual como en lo super, me pienso que lo normal ye deixar-los pasar, que no pasa cosa por alterar l’orden de l’universo. En escribir isto levaba tres decepcions seguidas, tres libros que deixé a metat de tant malos que yeran. Me pasa poco. Tiengo gustos amplos y m’he trusquiu catenazos infumables a trompicuesco. Talment yera lo momento vital, que me sé yo. Puet estar que mas entabant le dé una oportunidat a un d’ells que, me pienso que tampoco no yera tant-tant malo. En la mía muntonera, n’i heba quatre u cinco que aguardaban lo suyo turno dende fa bell mes. Pero vivir cerqueta d’una biblioteca municipal te da acceso en un tres y no res a un catalogo muito mas amplo, asinas que bi heba, en ixos repalmars, un “libros que nomás portaba una cosa” demandando, suplicando, chilando que se podese blincar l’orden d’a coda, que pasase debant y que la resta aguardasen un poquet, que no pasaba cosa, que la muntonera continaría baixando, encara que fuese una miqueta mas tarde. Lo resultau: un d’os millors libros que m’he leyiu iste anyo, un disfrute dende la primer pachina, con una historia que m’ha teniu en candeletas y buena cosa de temas pa pensar-ie.

Asinas que lo mio consello, que dengún no ha demandau pero que me permito lo luxo de dar-tos, ye que deixetz pasar a las sinyoras que levan “nomás una cosa” y tamién a los libros. Vale la pena.

martes, 8 de noviembre de 2022

Lo Diccionario ortografico de l'aragonés. Tierra de barrenaus 9x04

Lo Estudio de Filología Aragonesa empecipió en 2006 una fayena tant important como chigant y, quasi, inabracable. Lo primer paso yera lochico, alcordar una grafía pa poder codificar tot lo que vendría a l’arreu. Facioron una propuesta razonada y ampla que mira de solucionar todas las qüestions mas problematicas de l’aragonés. Contino vinió la Gramatica Basica de l’Aragonés, que publicoron en la suya web y dende fa poco podemos disfrutar y fer servir tamién en papel gracias a la edición de Prensas de la Universidad de Zaragoza. En istos días, han feito unatro important paso publicando a la fin lo suyo Diccionario Ortografico de l’Aragonés, con mas de dos mil pachinas. Una ferramienta que fará firme honra a qualsequier que treballe con la nuestra luenga. En iste quarto programa d’a temporada tendremos a Francho Rodés, director d’ista obra, charrando-nos-ne.

En la parte de resenyas, inauguramos una nueva sección de Libros varrenaus, a on que tos proposaré bella lectura. La que traigo en lo programa de hue ye Fuego frío, la zaguer novela de l’escritor belchitano Félix Teira

La mosica d’iste programa torna a tirar de recosiro. En la canción d’o programa tendremos a Los Enemigos con un tema de Nada, un d’os suyos millors discos. Ubrimos un nuevo calaixo de cancions: la canción movilizadera, que ubre Skalariak con un tema de 2001. Lo programa empecipia con un clasico d’Eskorbuto y acaba con ixe mesmo temazo versionau por La MODA.

Recuerda que los micros d’o programa son a la tuya disposición y que si quiers recontar u difundir qualsequier cosa, puetz contactar con yo a traviés d’os retz socials.

Programa #133

viernes, 4 de noviembre de 2022

Anillos, poder y falta de paciencia

M’he visto Los anillos de poder y coincido con la mayoría d’as criticas:  ye lenta, con tramas que pareixen no tener guaire sentiu y poco emocionant. Ye decir, perfectament tolkieniana. Quan de chiquet leyeba El señor de los anillos, me costó varias prebatinas pasar tot lo catenazo de Tom Bombadil y aguantar las aburridismas descripcions de paisaches. Valió la pena. A l’arreu de tot ixo veniba la graniza aventura que nos recuenta, la emoción d’o viache de cada personache, la visita a la milenta de scenarios miticos habitaus por sers terribles… tot lo que tanto amamos d’a obra alazetal d’a fantasía heroica. No bi heba, t’a part d’alavez, una parrafiquera de fans que, en rematar lo primer tercio d’a obra exichisen que bi hese mas batallas, que no tornase a salir Tom Bombadil, que resucitasen a Boromir u que le dasen mas profundidat de personache a Pippin a qui no troban las suyas motivacions. Si Tolkien escribise hue LOTR, sería un fracaso comercial seguro y no arribaría a publicar Las dos torres, u pasaría d’amagatons por los repalmars d’a botiga de Gigamesh.

Nos febanos a-saber-las alufras con l’anuncio d’a serie. Talment masa. Cuento que ixe ye estau lo gran problema. Asperabanos que me sé yo y nos hemos trobau con un ritmo masa pando pero que me pienso que yera construyindo una historia verdaderament gran. U no pas, pero agora ya nunca no lo sabremos, ya que lo fandom ha venciu y Amazon, la que paga la fiesta, ha anunciau que fa fuera a los suyos showrunners y que baixará lo presupuesto d’as siguients temporadas. Dos grans errors, en la mía opinión. Sí, la primer temporada no ye la gran historia epica que barruntabanos, pero ye una buena historia. No nos deixa en candeletas con grans cliffhangers, pero sí que va deixando simients que podrían fer buenos fruitos. Yera una temporada correcta. Cosa que no ye tant facil.

Yera, antimás, una primer temporada, que por un regular no puet fer que presentar los personaches y l’entorno. Si la historia que quiers recontar en tien tantos, de personaches y de scenarios, aprecisas muito mas que istas ueito primeras horas. Con unatra serie de raso diferent tenié la mesma sensación que con ista. La primer temporada yera lenta, aburrida y mica emocionant. Manimenos aguanté, ya que tot lo mundo me deciba que valeba la pena, que m’acabaría fendo goyo. Hue ye una d’as mías series favoritas: Breaking bad. Sin ixa primer temporada, la resta, las que fan gran a la serie en conchunto, no serían posibles. Ye verdat que con lo presupuesto de toda la primer temporada de Breaking bad no da ni pa pagar lo CGI de tres minutos de Númenor, y tamién ye astí buena parte d’o problema.

En lo fundo de tot isto i hai un problema mas gran, que ye lo caso que se les fa a las fans d’as obras de ficción. Los anillos de poder ha teniu unas audiencias sobrebuenas, pero que no yeran las asperadas. Pero me pienso que lo que mas ha influyiu en las decisions de Amazon son las furas criticas d’o publico y d’o fandom. Han reblau y agora qui escriba los nuevos episodios habrá de fer-lo parando cuenta d’o que quereba ixe fandom. No sabremos si isto yera lo primer y aburriu paso d’un viache pleno de sorpresas. Si la primer temporada me recordaba a Breaking bad, la decisión de fer chirar la historia me recuerda a Star Wars. Lo capitol VIII m’encantó. Trencaba de tot con los piors clichés d’a saga, afundaba en lo personache de Rey y teneba prou acción y epica. Por razons que contino desconoixendo, i habió muito encarranyau con ixa cinta y decidioron cambiar cosas cara a la novena entrega. Lo resultau lo conoixemos todas: una d’as piors pelis de Star Wars, en la mía opinión, que, antimás trenca con tot lo feito en la ueitena y torna a los debantditos clichés fendo que Rey solo valga lo que la suya chenetica. Igual como con Los anillos de poder, nunca no sabremos como hese estau un hipotetico episodio IX que desarrollase los planteamientos d’o VIII.

No vivimos tiempos propicios a la paciencia. Aprecisamos estimulos terne que terne y si pasamos mas de trenta pachinas u tres capitols sin chiros argumentals hipersorprendents u efectos especials a trompicuesco femos zapping, no sin antes escribir lo nuestro tuit de condena y dar-le nomas dos estreletas en las webs de resenyas. Me pienso que Los anillos del poder mereixeba una oportunidat, que i hai historias a embute que la mereixen y que no les ne dan, que no pasa cosa por quedar segundo - la inchusta competencia y comparanzas con House of the dragon, que ni sisquiá me pareixen que sigan d’o mesmo chenero, ye unatro d’os motivos pa calificar de fracaso las audiencias de Los anillos de poder - y que tant culpables son los bocatobas d’os cansos fans como los cagosos executivos que no confian en los suyos creativos y les deixan fer. Talment la resta de temporadas no hesen feito burro falso. U talment nos hemos perdiu una gran historia que, simplament, empecipiaba a moniquet. Nunca no lo sabremos.

lunes, 31 de octubre de 2022

L'Ebro. Zaratober 31


Traviesando lo país de barra a barra, dividindo entre lo norte y lo sur, l’Ebro ye un d’os poco simbolos que consiguió unir-nos. Las menazas d’os trasvases de PSOE y PP nos levoron t’as carreras, nos facioron remerar la nuestra historia y planteyar-nos una rebelión y mesmo desobediencia colectiva. Los anyos d’ixas movilizacions estioron los zaguers que la rasmia aragonesa ocupaba las carreras y la vida publica dende las nuestras mas altas institucions dica lo zaguer guariche d’Aragón.

Talla tamién, lo nuestro Ebro, la ciudat en dos: la marguin dreita, a on que se construyó la urbe romana y se fue ixamplando ent’o sur, y la cucha, que en engaronar-se en cada creixida d’o riu, habió d’aguardar a que la tecnolochía u la inconsciencia, fesen posible poblar ixa parte. De cabo ta quan, las suyas auguas tornan a ocupar lo suyo espacio remerando-nos que i somos porque nos deixa estar-ie y que qualsequier día, si le agana, nos fa fuera.

L’Ebro va cambiando con las estacions. Vivir a lo suyo costau, traviesar-lo dos vegadas lo menos dos vegadas cad día, ye veyer como va evolucionando l’anyo: los bichos que i arriban y en marchan, lo puyar y baixar d’o suyo nivel, las boiras que se pretan d’hivierno y que te privan de veyer l’atra orilla, l’esclatiu d’a primavera con lo suyo surtir de plantas, flors, runners y pasiants, los pescataires, las piraguas, lo sirulos…

En las envueltas d’o trasvase aprendiemos a-saber-lo sobre lo funcionamiento d’un riu y pareixeba que empecipiabanos a entender que caleba respectar-los. Hue pareixemos haber-lo ixublidau, y seguimos sentindo terne que terne fateras sobre limpiar lo cauz, fer entibos y azutes sinsentiu, y toda mena de zancochos. Zaragoza ye la ciudat de l’Ebro. Aragón ye un país de rius que, quasi en la suya totalidat, i puntabocan. Por tot lo que ixo significa tanto a nivel medioambiental, como simbolico y identitario, ye bien important conoixer-lo, entender-lo y protecher-lo.

domingo, 30 de octubre de 2022

Chuslivol. Zaratober 30


La diferencia entre barrio y lugar ye mas administrativa que no atra cosa. Chuslivol ye un lugar, nomás cal visitar-lo pa parar-ne cuenta, pero ye tamién bien integrau ya en una ciudat que ye a pocas de absorber-lo. Lo bus fa anyos que i plega y mesmo bell estudiant d’incheniería s’estima mas de vivir astí que no en la ciudat.

Chuslivol ye la cursa clasica de toda escuela y instituto, lo entorno natural a tocar d’a ciudat que ye tot un lamín pa qualsequier profesor de biolochía u cheolochía. ¡I hai tantas cosas a recontar! Y tamién d’historia. Lo suyo nombre evoca necesariament ixa historia d’a conquista de Zaragoza por las tropas d’Alifonso lo Batallero. Ye inevitable puyar t’as antenas y, en veyendo la ciudat entera dende alto, no pensar en cómo sería en ixe sieglo XII ixa mesma polida envista.

Chuslivol ye tamién remeranza d’a presencia militar en una ciudat a on que un porcentache bien gran d’o nuestro suelo ye en mans de l’exercito espanyol fendo que, por eixemplo, no podamos visitar legalment lo Castiello de Miranda u que haigamos d’aguantar terne que terne los pepinazos d’os suyos chuegos, las maquinotas sobrevolando-nos u que de cabo ta quan le preten fuego a lo mont.

Un bubón t’aspera en las suyas penyas y un ciento de conellos en las pinetas d’alto. Una biera y un buen bocau, en los suyos bars, a on que la presencia ciclista ye bienvenida. Y una cabo tranquilo a on que ixuplidar un ratet los tuyos problemas y disfrutar d’un lugar sin salir d’a ciudat.

sábado, 29 de octubre de 2022

Sant Cayetano. Zaratober 29


Tot y que lo nombre oficial ye la Ilesia de Santa Isabel de Portugal, quasi todas la conoixemos por St. Cayetano u por la Ilesia d’o Chusticia. Lo nombre de Sant Cayetano ye por la orden que s’encargó de chestionar una ilesia que construyó la Diputación d’o Reino d’Aragón. La ilesia ye en la plaza d’o Chusticia y adintro podemos trobar las cenisas de Chuan de Lanuza V, lo Mozo, asesinau por orden de Felipe II en estar un d’os liders d’a Rebelión Aragonesa de 1591. La portalada d’a ilesia, d’estilo barroco, ye rebutient de simbolochía aragonesa, ocupando l’escudo d’o país lo puesto central y mas vistero.

La plaza ye en una ubicación de luxo en lo bell meyo d’a parte viella d’a ciudat. A lo suyo canto tien la Plaza Sant Felipe, lo Mercau Central, las murallas romanas y no guaire luent la Plaza d’o Pilar. Dica iste zaguer anyo acullió un d’os scenarios mas intresants d’as fiestas mayors, tenendo una programación alternativa que a sobén empliba la plaza con propuestas como Iseo & Dodo Sound, Roy Ellis u Talco antimás d’arrienda grupos locals como Sick Brains u Magnetophones.

Por toda ixa simbolochía aragonesa y por tot lo significau que tien, ye un d’os puestos de referencia pa lo soberanismo aragonés a on que pa lo 20 d’aviento gosa fer-se actos en memoria d’a Rebelión, alternativos a los institucionals que se fan debant d’o monumento a lo Chusticiazgo d’a Plaza Aragón. Aquí rematoron qualcunas d’as manifestacions aragonesistas mas numbrosas en tiempos de compleganza y cuento que, si bell día i hai un reviscolar de l’aragonesismo, será aquí a on que se scenifique.

viernes, 28 de octubre de 2022

Nogara. Zaratober 28


Mas de trenta anyos d’asociación de desfensa de l’aragonés. En tiempos de crisi de l’asociacionismo, a on que Aragón s’esfa por cada día y la suya cultura y patrimonio no se valuran mica, y a pesar de todas las pleitinas internas de Fablilandia, Nogara contina viva y tirando entabant, amostrando la nuestra luenga a decenas de personas cada anyada. De locals, n’ha pasau por qualquns, quedando-se en iste dende ya fa bell lustro. Dimpués de que zarrase la escuela de tango que bi heba, y con un local masa viello y gran (a on que hue ye La Ciclería), l’asociación fació casa muda ta la suya ubicación actual en la Plaza Asso. S’han feito qualques reformas internas, pero la que mas clama l’atención ye probablement la externa, quan l’artista Julsen Moos fació ixe mural que hue da tanta vida y color a la plaza, y que tant bien combina con los dibuixetz de la Gusantina.

En Nogará aprendié, aprendo y seguiré aprendendo, por cada día, aragonés. Me pienso que la suya filosofía quanto a l’amostranza y a la socialización d’a luenga dende la primer clase ye la que ha conseguiu que l’asociación sobreviva y que contine tenendo vida a-saber-la. Nogara ye una manera de veyer la luenga, d’acercar-se-ie, d’entender la desfensa d’o patrimonio y tamién d’os dreitos lingüisticos y culturals, tanto colectivos como individuals. Y gracias a ixa envista muitas que habe anyos nos fizó lo cuco de l’aragonés seguimos hue dando ferrete pa que la luenga faiga bell sieglo mas charrando-se por las carreras d’os nuestros lugars y ciudatz.

jueves, 27 de octubre de 2022

CSC Luis Buñuel. Zaratober 27


Muito antes d’o mío programa en Radio Topo, heba estau en Radio La Granja de convidau en lo programa de El Hombre Mosca. Pero mesmo antes, tenié una chiqueta experiencia radiofonica en lo programa que feba una amiga en lo suyo instituto. Ixe insti yera lo Luis Buñuel, y aquella experiencia me fació tantismo goyo que no puedo escusar-me remerar - y recontar-le-ne a qui tienga cerca- que en ixe edificio facié radio por primer vegada.

Dende fa bell anyo aculle un prochecto de dinamización social y cultural que buena falta le feba a lo barrio d’o Gancho y a toda Zaragoza. Lo Centro Social Comunitario Luis Buñuel s’ha convertiu en l’espacio común de muitos movimientos socials y organizacions zaragozanas, antimás de un sobrebuen puesto pa que las vecinas puedan fer mover las suyas iniciativas. Dende cursos dica presentacions de libros, teatro u conciertos… en los anyos que leva ubierto he puesto disfrutar d’as suyas instalacions en arrienda ocasions. Y prou que sí, de reunions y trobadas, a on que hemos debatiu y pensau en cómo cambiar ista ciudat, iste país y iste mundo.

En tiempos a on que lo virtual ha deixau a un costau atras menas d’organización, entrar en lo Buñuel ye tornar a lo contacto real, a la filosofía d’ixa parrafiquera de locals socials a on que nos chuntabanos habe anyos. Aprecisamos contacto y realidat. Aprecisamos sentir-nos sin que bi haiga electronica por meyo. Aprecisamos vivir-nos. Y pa ixo y pa muitas cosas,, lo Buñuel, fa firme honra. ¡Desfendamos-lo!

miércoles, 26 de octubre de 2022

Lo soto de Cantalobos. Zaratober 26


A pesar de tot lo suyo creiximiento Zaragoza sigue rodiada por entornos naturals de firmes valors. Tenemos la suerte de poder disfrutar-los, qui sabe por quánto tiempo, y de tener-los bien a man. Un d’ixos ye lo Soto de Cantalobos por a on que tantas zaragozanas gosamos de fer gambadas u esporte.

Tot seguindo Echegaray y Caballero, pasau l’azute de l’Ebro, la ciudat dispareixe de bote y voleyo baixo lo puent d’o tercer cinglo, dando paso a un paisache pleno de huertas a la dreita y con l’Ebro a la cucha. En un petén podemos veyer como lo Galligo, dimpués de traviesar tot lo norte d’o país, une las suyas auguas con las d’o gran ríu. Alto ye de facil veyer bell esparber mirando la minchanga d’o día. De verano, falcillas y codalbetz se’n fartan, por los campos d’alfalz y hordio, d’os bichetz que los pueblan. En l’augua, pescairetz, garras, gallos marinos, bernatz y toda mena de muixons aproveitan un entorno bien favorable pa la vida suya.

Lo camín, dimpués de pasar por bell puent, arriba dica l’Alfranca por una cursa de muit buen fer en bici. Astí tenemos, antimás d’o Centro d’Interpretación, lo palacio de Palafox, a on que diz que la población d’a ciudat fueron a escar-le pa que luitase contra los franceses. Antes, habremos pasau por quantos miradors que fan firme honra pa qualsequier que le faiga goyo alufrar a tot ixe vecindau con alas con qui compartimos ciudat.

martes, 25 de octubre de 2022

La Biblioteca d'Aragón. Zaratober 25


Yera bien chiquirrín quan entré por primer vegada en la Biblioteca d’Aragón, en la Carrera de Dr. Cerrada. Iba d’a man d’a mía chirmana. Baixemos unas escaleras que levaban t’a parte infantil. Pasemos la puerta y tot un mundo s’ubrió debant d’os uellos míos. Los repalmars rebutiban de libros de El barco de vapor, de Los Cinco, d’os Siete Secretos y mesmo d’os Hollister, que tampoco no me feban guaire goyo, pero como me leyeba qualsequier cosa, igual me teneba. Tamién teneban tebeos d’Astérix u Mortadelos. Yera un chiquet paradiso.

China-chana empecipié a puyar t’a parte d’adultos, a on que m’aguardaban una patacada d’os millors libros que m’he leyiu nunca. Asinas ampré tot lo d’Asimov que no tenebanos por casa. Conoixié tamién, quan empecipié a intresar-me por la nuestra luenga, los primers poemarios y bella novela en aragonés que bi heba en una chiqueta sección que teneban. Me leyeba, en la suya hemeroteca, lo Siete d’Aragón, Rolde u Qriterio, revistas que parlaban de temas, personas y puestos que nomás astí podebas trobar. Pa acabar lo Prochecto de Fin de Carrera, heba d’estar-me-ie a-saber-las vegadas, consultando obras arrienda. Chusto lo verano que le iba a dar lo zaguer empentón decidioron de fer una reforma y deixoron amprar trenta libros dica que rematasen. Ixo yera quasi toda la bibliografía que aprecisaba pa presentar a la fin lo treballo que acabaría con los míos estudios universitarios, asinas que ixos meses podié disfrutar d’aquellos trenta volumens en casa mía, sentindo quasi que poseyeba un chiquet troz d’a biblioteca.

En lo mesmo edificio ye lo rechistro d’a propiedat intelectual a on que has de levar copias de qualsequier obra que se publique y a on que tienen eixemplars d’os mios libros, asinas que agora tamién amaneixco en lo suyo catalogo.

Leyer ye una d’as pocas cosas que encara podemos fer de baldes. No i hai garra sincusa pa no leyer. Y barrunto que bell día nos tocará desfender lo modelo de bibliotecas publicas. Tanimientres, disfrutemos-las.

lunes, 24 de octubre de 2022

Pedretas y truquetas. Tierra de barrenaus 9x03

Pasadas las fiestas d'o Pilar y la empecipiadura d'o curso, plega lo primer programa "normal" d'a temporada. Lo adedicaremos a la truqueta, ixa prenda absurda que en iste verano esdevinió obchecto de polemica por la recomendación de Pedro Sánchez de no fer-la servir, una decada dimpués de que ya bi hese polemica entre José Bono y Miguel Sebastián por lo mesmo motivo. Sentiremos dos cancions, en asturiano y catalán, que adedicoron a iste complemento Dixebra y Feliu Ventura. Tamién ye elemento central en un relato en aragonés que tos presiento.
 

Aleixando-nos d'a truqueta, Tamara torna t'o programa, en ista ocasión como Educadora ambiental que ye, a charrar-nos sobre un costumbre bien ixemenau en zagueras que ye a saber qué perchudicial pa l'entorno natural y muitos ecosistemas: los muntonetz de pedretas feitos por las turistas. Conoixeremos d'a suya voz los argumentos pa oposar-se a ista practica.

Tendremos tamién la primer canción d'a sección d'os calaixos de cancions. Bailaremos una miqueta de reggae arribau dende lo País Valenciano y con muit buena vibra. Y, prou que sí, bella convocatoria y resenya. Una nueva hora de radio en aragonés, varrenada, pilarista y sin truqueta.

Programa #132

Radio Topo. Zaratober 24


Se devanta la persiana, s’ubre la pesada puerta de metal y amaneixe la escalera que baixa t’a espluca que ye Radio Topo. Aquí baixo, dende los vodiellos d’a ciudat, quantas varrenadas y varrenaus nos adedicamos a decir las cosas que no se sienten en atros medios y a ascuitar las mosicas que en garra atra emisora no punchan.

Video didn't killed the radio star. Tampoco no lo farán los podcasts, ni las plataformas, ni Twitch u lo ciento de tecnolochías que vaigan amaneixendo. La radio, a pesar d’o rudimentaria que ye, u precisament por ixo, sobrevive a tot. Y la Radio Libre, en un paisache a on que los medios s’han concentrau en mans de quatre ricos, ye ixe chiquet sinyal que fa tranya entre tot l’estrapalucio pa contar la vida d’una manera diferent. En un paisache asociativo cada vegada mas dificil, Radio Topo ha pasau d'a trentena d'anyos con muit buena salut, contrimostrando que lo modelo organizativo ye funcional y puet guaranciar la supervivencia y mesmo lo creiximiento d'a emisora.

Empecipié con La Enredadera, con ixa chiqueta sección de L’aragonés ye bien vivo. Pasé bella vegada por Fendo Orella y L’acorazado Topemkin, participé en los D’estrela a estrela y levo nueu temporadas d’o mio propio programa Tierra de barrenaus, fendo que l’aragonés siga present en lo dial zaragozano. ¡I hai Radio Topo pa muitos anyos y astí seré pa vivir-los y recontar-tos-lo!

domingo, 23 de octubre de 2022

Fuent d'os incredulos. Zaratober 23


D’a ciudat d’o tres rius, Ebro, Uerva y Galligo, se gosa decir que n’i hai, antimás, un quarto: La Canal Imperial d’Aragón. La ideya d’a obra, que tenió a Ramón Pignatelli como protector, yera de comunicar lo Cantabrico y la Mediterrania a traviés d’a Canal y l’Ebro, posibilitando lo comercio por toda la ribera y dica la mar. Las dificultatz pa conseguir-lo yeran tant grans que se dubdaba que nunca no se rematase. Asinas que quan la Canal plegó dende El Bocal dica Zaragoza y se fació una fuent d’estilo neoclasico pa celebrar-lo, en la suya inscripción se metió “Incredulorum convictioni et viatorum commodo. Anno MDCCLXXXVI“ (Pa convencer a qui no se lo creyeban y que se decansen los viachers. Anyo 1786). Hue puet estar que s’hese meso un “Zas, en toda la boca” u “Y agora qué, payasos?”. Yeran atros tiempos, no sé si mas elegants u mas somardas.

Lo feito ye que l’obchectivo no se consiguió nunca y la Canal no pasó de Fuents d’Ebro, pero deixó construyidas una patacada d’estructuras que, antimás d’a suya utilidat pa lo regano, son sobrebuenas muertas d’a incheniería y arquitectura d’o XVIII. Lo suyo curso por la ciudat nos ufreixe unatra d’as clasicas gambadas zaragozanas.

La canal ye tamién lo scenario pa la suya famosa Baixada d’a Canal, evento que se fa en setiembre y que arrocla a centenars de zaragozanas con las suyas improvisadas - u no pas tanto - naus, esnavesando bell kilometro urbano d’a obra. Ye una chornada reivindicativa y festiva que acaba con mosica y una chenta en lo Parque d’a Paz y que, como tot lo que ye autochestionau y reinvidicativo, no fa mica goyo a las autoridatz.

sábado, 22 de octubre de 2022

Lo Gancho. Zaratober 22


Si no vivise en La Madalena, la mía segunda opción sería Lo Gancho. Ixe atro barrio chirmán, que en tiempos medievals yera rival, y que agora comparte tantas cosas con lo mío. D’una man, la suya composición etnica y social, barrachando etnias y orichens bien diferents. D’atra, la chentifricación, la pasa d’os centros viellos urbanos de tantas y tantas ciudatz. Ye barrio de vivir-se en las carreras, de botigas d’antes mas y de zaguer moda, de bars chics chunto a tabiernas clasicas, d’historias antigas en cada una d’as suyas cantonadas, de fiestas populars, dances y mosicas.

Lo conoixié porque con las mías amigas de l’instituto montemos en Las Armas, una d’as suyas carreras principals, una penya. Un guariche en un cobaixo que nian escusau teneba. Astí zorriabanos un poquet antes de marchar de borina.

Dende aquellas envueltas lo barrio ha cambiau a-saber-lo, pero entre mercaus de modernas y vermuts mosicals, por las suyas carreras, tabiernas y botigas, se sigue sentindo l’alentar d’un barrio vivo, con arrienda d’iniciativas de movilización y vitalización y con firme rasmia pa reivindicar los dreitos d’as suyas vecinas. ¡Gancho y Gallo, Sant Pablo y Madalena, barrios chirmans pa cutio

viernes, 21 de octubre de 2022

Parque Bruil. Zaratober 21


Muitas tenemos un bar que ye LO bar. Ixe que quan dices me’n voi t’o bar no te cal especificar qual. Cuento que tamién somos muitas las que tenemos un parque que ye LO parque. En lo Bruil pasaba de chiquet, con la mía chirmana, firmes horas pa Pilars, con la programación infantil que se i feba. Ya de mas gran s’ha convertiu en una d’as partes mas importants d’o mio barrio.

Astí baixemos pa lo nevazo d’a Filomena, a pasar lo maitín limpio chugarriar con la nieu. Astí me’n he baixau en los mios piors momentos vitals, a fer-me una gambada y consultar-les a los arbols y a la Uerva qué fer con los míos problemas. Astí nos chuntamos vecinas y vecins a cremar las cosas malas pa lo solsticio, Sant Chuan u como le queratz decir. Astí capaciamos con las amigas en que fa bueno. Astí m’he feito la biera de dimpués d’as presentacions d’os mios tres libros.

Lo parque Bruil tien tamién tot un catalogo de muitas especies d’arbols, beluna d’ellas unica en la ciudat y con mas d’un eixemplar singular. Y por si no ye prou, ye testigo privilechiau d’a historia zaragozana, como un d’os scenarios d’os sitios u acubillando un minizoo que hue nos espantaría.

jueves, 20 de octubre de 2022

La Ciclería. Zaratober 20


En la Madalena, cada local puet almagacenar parte d’o movimiento asociativo zaragozano. Entre la carrera Gavín y la carrera Palafox estió por muitos anyos la siede de Nogara y la suya penya Borina a on que tantas personas aprendiemos aragonés. Antes heba estau una d’as siedes d’A Espelunga d’os capins, local aragonesista que acullió buena cosa de zorreras.

Dende fa ya bell anyo, i ye la siede de La Ciclería, un puesto a on que podemos trobar toda la cultura ciclista que aprecisamos: bicis pa logar, un taller pa fer-te las tuyas nyapas, una biblioteca, un bar a on que fer-te un café entre que aprestas la tuya ruta y, sobre tot, una colla de profesionals que t’asesoran de pistón en tot lo relacionau con la bicicleta.

I entré un día pa fer-me un hordio, aprendié y amostré aragonés, tenié un d’os mios primers treballos y he acabau apanyando-me la bici y aprendendo sobre lo suyo funcionamiento. Tot en iste mesmo espacio que tantismo ha cambiau.

miércoles, 19 de octubre de 2022

La Quiteria. Zaratober 19


Abaixo de casa mía bi heba una papelería. Totz los días en tornar d’o cole, i pasaba un ratet a alparciar las revistas, las depeixas, los tebeos y lo chuguetes. Los amos conoixeban a toda la cachimalla. Astí mercaba la prensa Andoni Cedrún, portero historico d’o Reyal Zaragoza, y cada vegada que nos encertabanos feba uellos mirando-me los suyos quasi dos metros de zaragocismo. Aquella papelería zarró fa a-saber-los anyos.

Quan facié casa muda habié de buscar-me-ne una nueva. En Quiteria me mercaba lo periodico quan encara teneba lo costumbre de leyer-me-lo en papel. A l’ama u a lo fillo les encargaba que me guardasen tal u qual coleccionable, d’ixos que s’acotolan de camín. Agora ya fa tiempo que no i entro que a pillar bella lata de cabo ta quan porque de revistas y papels no se’n leye. Cuento que d’aquí a poco no’n quedará, de papelerías, asinas que no sé qué futuro puet tener la Quiteria. Sisquiá no faigamos como ye costumbre en Zaragoza y deixemos que dispareixca una d’as botigas mas sinyaleras d’o barrio y patrimonio suyo inqüestionable.

martes, 18 de octubre de 2022

Plaza La Bullonera. Zaratober 18


La ixota no tien la culpa d’o que lo franquismo le fació. Ye mosica popular en estau puro que, a pur de propaganda y aculturación han prebau de convertir en unatra cosa de tot diferent. Con la ixota se puet y s’ha de fer de tot. Bailar-la y cantar-la, prou que sí, y barrachar-la, actualizar-la, espullar-la d’o trache nacionalcatolico que le caloron a la fuerza y tornar-la a lo pueblo d’a on que nunca no se’n fue. Me declaro fan d’a ixota. D’a que se canta de manera espontania, talment con bell trago, en los bars y tabiernas d’a ciudat. D’a que sale de l’alma en las ceremonias y ocasions especials. D’a que acompanya a las rondallas y pasavillas por las nuestras fiestas. D’a que se baila sin haber d’estudiar catorce anyos y con la ropa que tiengas, sin deixar-te la pocha de tot un anyo en un trache.

 Una d’as mas bonicas experiencias que he teniu en la vida mía estió l’anyo que m’estié con Somerondón aprendendo bailes tradicionals. La ixota no en yera que uno mas. I aprendié a-saber-lo. Lo primer de tot, a sacar-me muitos d’os prechuicios que teneba.

 En lo barrio de l’ACTUR, chusto antes de pasar lo puent de l’autovía y entrar en lo Campus Río Ebro, i ye lo monumento a la ixota, un cochunto de figuras en bronce que represientan bailadors y mosicos d’iste estilo. Se i metió en 1993, pagau por la Ibercaja y donau a la ciudat. Lo nombre de Plaza de la Bullonera ye de prou dimpués, de 2018, meso a propuesta de l’Asociación de vecins “ACTUR - Puente Santiago”, en homenache y reconoiximiento a la mitica banda aragonesa que tantas ixotas reivindicativas cantó, contrimostrando lo poder que tien ista mosica en buenas mans.

lunes, 17 de octubre de 2022

La Torre nueva. Zaratober 17


La escultura d’un nino, posau por tierra, en lo bell medio d’a Plaza Sant Felipe, truca l’atención a qualsequier que siga un poquet alparcer. Astí, abrazando los suyos chenullos, se mira la ya inexistent Torre Nueva, d’estilo mudexar y que se devantó en lo sieglo XVI pa que la acabasen espaldando en lo XIX. Siempre que i paso me lo miro y pienso en lo que be de patir lo pobrichón, tot lo día mirando-se una d’as fricaseras d’a nuestra ciudat.

Un zagalet, posau por tierra, abrazando-se las garras, en podríanos meter tamién debant d’Averly pa que alufrase como esvoldregan una d’as partes mas importants d’o patrimonio industrial zaragozano. Unatro se podría estar en Independencia, caricacho y esmachinando tot lo barrio musulmán que i hai baixo la gran avenida d’a Immortal. Se podría fer un viache t’Andorra, y aguardar posau a que se salve la zaguer chaminera d’a suya central termica, dimpués de que vulcasen entre aplausos de belún y ploros tardanos d’atros, los tres grupos. Tamién posau habría d’asperar a que se fese chusticia y lo sinyoret que convirtió en enrona la espluca de Chaves pagase por lo zancocho.

Zaragoza y Aragón, si en qualcosa somos expertas ye en destuyir lo nuestro patrimonio, en deixar-lo morir. Ya siga material, como totz ixos edificios que ya nunca podremos tornar a veyer ni disfrutar, u immaterial como ista luenga que talment ya no se pueda sentir en bella decada.

domingo, 16 de octubre de 2022

Fuents ixutas. Zaratober 16


Tiengo tendencia a deshidratar-me. Soi terne que terne bebendo augua u lo que tienga a man. Zaragoza ye un furno malas que plega lo verano y iste siempre lo fa de rapiconté, sin que tiengamos una primavera que nos avise. L’urbanismo d’as zaguers decadas ha sacau arbols a patacadas, deixando plazas y carreras sin garra brempa que nos aconhorte quan lo sol menaza con regalar-nos las neuronas. Y pa forro de bota, de fuents ya quasi no en queda, y las que i hai, s’esmarchinan terne que terne sin que a lo concello le pareixca una urchencia apanyar-las.

Por la boca d’o peix que apara l’anchelot en la Plaza d’o Pilar no surtiba lo churret d’augua y yo, asetegau, me cagaba en l’evento que feba d’enchaquia pa que ixe día hesen chirau la clau privando-me d’o liquido elemento. Un banco a on que descansar-se, una fuent d’a on que beber, una brempa a on que acubillar-se… son lo minimo que aprecisa una ciudat pa decir-se civilizada. En Zaragoza, de tot ixo, cada vegada en queda menos. “¡Qui quiera vivir, que se lo pague!”, diz lo dogma neoliberal.

sábado, 15 de octubre de 2022

Lo puent de Sant Miguel. Zaratober 15


Yayo y yaya, por parte de mai, son d’a parte de Daroca. De Villarreal y Mainar, concretament. La mía casa familiar ye en la carrera Coímbra, perpendicular a Miguel Servet y paralela si fa u no fa a Paseu de La Mina. Casa mía ye en La Madalena, bien cerqueta d’o Parque Bruil. Pareixería que la Uerva, la mía familia y yo, hemos d’ir en chunto. Dende lo balcón de casa mía, de chovenet, me saliba todas las nueitz con mai a fer-nos un fumarro y alufrabanos la ciudat, con lo riu baixo los nuestros peus.

Por lo puent de Sant Miguel, quan voi a visitar a pai, no puedo evitar aturar-me un poquet a alparciar que pasa por debaixo. Siempre i hai bell pato y bell yayo u bell crío chitando-les birolla, blincando-se la prohibición d'alimentar a la fauna urbana y provocando-les toda ixa ripa de malotías de qui no mincha que pan y Jumpers. Miro de trobar bella rata, que antes mas n’i heba a patacadas, y un poquet mas t’alla, en lo Joaquín Roncal, se columbra bell gato d’os que dondían por los chardins d’o centro de chubilaus los días que no fan baile.

Ixe puent blinca la Uerva y une la mía vida de chiquet, casa, cole y instituto, con la mía d’adulto, en la Madalena. Son nomás bella decena de metros pero, pa yo, dos mundos diferents adintro d’a mesma ciudat y, siempre, con la Uerva present.

viernes, 14 de octubre de 2022

Lo taller de Pedalea. Zaratober 14


Quan empecipié a funcionar en bici por la ciudat, de carrils no n’i heba guaires. Las ciclistas yeranos muitas menos, pero todas, u quasi, conoixebanos lo colectivo de referencia a on que acudir pa qualsiquier aduya que aprecisasenos: Pedalea. Dende lo suyo local - taller adintro d’o Campus de San Francisco, Pedalea leva decadas luitando por fer d’a nuestra ciudat un puesto millor y mas sano pa todas. Pa las ciclistas, prou que sí, pero tamién pa toda la población, porque contra mas personas faigamos servir de cutio iste medio de locomoción, mas habitable será la ciudat.

En ixe taller, muito antes de decidir-me a convertir la bici en una parte central d’a mía vida, conoixié a belún d'os que ya entendeban la suya importancia y teneban toda la paciencia d’o mundo pa explicar-me-la, tot y que t’a part d’alavez, yo nomás yera un cochista con bella mica de tolerancia. Me pienso que lo millor treballo que puet fer un colectivo ye cambiar la realidat y deixar buen herencio pa las siguients cheneracions. Pedalea, como parte pionera d’o movimiento ciclista zaragozano, cambió la realidat y d’ixe guariche pleno de piezas de bicicleta, naixioron atras organizacions que hue continan cambiando-la. ¡Ya pueden fer-se-ne argüellosas!

jueves, 13 de octubre de 2022

La Carrera Estudios. Zaratober 13


Quan quedaba con bell amigo por primer vegada en lo Dispierta Fierro heba de decir-le “en lo barrio d’a Madalena, en la carrera que fa ulor de queso”. De camín sabeba de qual le yera charrando. Entrando dende Cortesías, a dreita y cucha podemos tastar belún d’os millors quesos y embutius d’a ciudat en los historicos Estudios y Portón, que agora mesmo ye zarrau, asperemos que por poco tiempo. En lo cabo d’a carrera, con la puerta en Sant Chorche nos trobamos con L’Albada y lo suyo lema “Ye gran saber estar chiquet”. Birolla y vins de calidat y d’o país y probabibilidatz d’acabar con una jam de mosica tradicional. Lo Barrio Sur, en l’atra cantonada que fan Estudios y Sant Chorche, t’aculle en un agradable ambient y con una ufierta culinaria de tot diferent.

Unatro bar, en lo bell meyo d'a carrera, ha pasau por diferents mans, con millor u pior suerte. Ye un carrerón estreito y curtet que, manimenos, tien mas vida que bell barrio entero. I falta agora, en la carrera, ixe Dispierta Fierro, centro social que estió casa de muitas y muitos a saber qué anyos y que zarró las suyas puertas fa tiempo deixando-nos en busca d’un nuevo puesto a on que poder chilar un BIEEEEEEN cada vegada que sonaba La Ronda de Boltaña.

miércoles, 12 de octubre de 2022

Lo Campus de S. Francisco. Zaratober 12


Antes d’empecipiar en la universidat facié FP, asinas que por dos anyos, t’o campus nomás bi iba a veyer a las amigas que i estudiaban. Quan i entraba m’envacilaba la morfuga que bi heba. Me pensaba que ixo yera tot un centro de saber, me l’esmachinaba como la Universidat de Streeling, d’as novelas d’Asimov. Tot ixo se fue desmitificando dende lo primer día que i entré. Tot y que lo conoiximiento, la investigación y la cultura bi yeran, s’amostraban d’una manera muito mas simpla y terrenal que no m’heba entrefilau. Con tot y con ixo la Universidat, y en concreto, lo Campus de San Francisco siguen estando un puesto referencial pa muitas. 

En lo bell meyo d’o Campus ye la baseta que siempre m’ha pareixiu un puesto bien bonico. Con lo buen orache, a sobén me chuntaba con la mía parella u bell amigo y nos estabanos un ratet fendo un hordio en los bancos u mesmo con los peus en l’augua. Mesmo plegué a dormir-ie bell día quan se fació l’acampada contra la guerra, la d’Iraq, la de Bush, Blair y Aznar. 

La viella universidat ha visto como la ciudat se l’ha minchada, habendo d’ixamplar-se por atros cabos d’a ciudat. Ha visto como lo gubierno la traiciona dia sin atro, dando los diners de todas y totz a la privada catolica que nomás beluns pueden pagar entre que lo presupuesto que asigna a la publica no da ni pa la calefacción. Y miedo me fa lo que le quede por veyer.

martes, 11 de octubre de 2022

Lo Rollo. Zaratober 11


A finals d’os novanta la zona de Moncasi, conoixida como Lo Rollo, cuento que por lo nombre d'un d'os suyos piors bars, yera rusient de tot. Cada cabo de semana nos chuntabanos astí meya ciudat pa empifolar-nos y pasar un buen rato. De bars n’i heba a trompicuesco. Hue, no’n queda que bella decena. Entre los supervivients, Atrio y Posturas, dos d’os pocos que teneban un prochecto mosical y d’ocio coherent, diferent y no dependient de modas. Entre ixas paretz pasé buena parte d’a mía adolescencia y firmes horas de borina con los mios millors amigos. Astí conoixié un ciento de mosicas y vivié conciertos en salas con DeVizio u Piramys.

Lo modelo yera insostenible y a la fin s’espaldó, pa descanso d’o vecincau. Astí continan Posturas y Atrio, testigos de decadas de borina, pa seguir disfrutando d’una ufierta mosical que no se troba en guaires puestos d’a ciudat y d’un ambient sobrebueno.

A l'Atrio ya le adediqué un post fa tiempos. Aquí lo tiens pa leyer-lo.

Cursos d'aragonés 22/23. Tierra de barrenaus9x02

Un curso mas la chent de l'Asociación Cultural Nogara - Religada ubre las puertas d'a suya escuela pa empecipiar los cursos d'aragonés 22/23. Contamos en l'estudio con Serchio, Jorge y Antón qui nos charrarán d'a ufierta formativa d'estianyo, d'a chornada de Devantadera d'os cursos y de tot lo que se fa en l'asociación. Tamién tendremos la experiencia de Vero y Aimar, que nos han deixau las suyas aportacions sobre los cursos.

Tamara nos charrará d'o 15 aniversario d'a Ciclería, ista cooperativa d'a bicicleta que se celebró con una chornada a on que bi habió de tot. David nos recontará cómo se lo pasó en lo festival d'humor Enluquecidos, que se fació lo pasau mes en Luco de Xiloca. Y pa rematar tos trayemos un festival pa iste agüerro que fa muit buena mina: lo Festival contra la despoblación d'Allepuz.Como lo concello no quier que se sienta la mosica tradicional aragonesa, tot lo programa ye ruixiau con buena cosa de folk, prou que sí.

Ya sabes que si quiers participar en Tierra de barrenaus, ninviando la tuya resenya, publicitando bella actividat u recontando-me lo que quieras, los microfonos d'a radio siempre son ubiertos. Contacta con yo y fe parte d'a loquería.

Recuerda que puetz ascuitar totz los programas en Ivoox, Spotify y la web de Radio Topo.

Programa #131

lunes, 10 de octubre de 2022

Lo Paraninfo. Zaratober 10


Lo Paraninfo ye un d’os mios edificios favoritos d’a ciudat. En ye por la suya polideza y valura arquitectonica. Tamién por toda la historia que i hai entre los suyos muros. Trescruzas lo branquil flanquiau por Servet y Asso. Alto, a l’endrecho, dende lo replano d’una escalera de piedra, cusira Ramón y Cajal. Cada cantonada recuenta un trocer d’a nuestra herencia como ciudat y como pueblo. Por ixos corredors han tramenau a-saber-las d’as capezas mas agudas d’o país.

Antimás, pa yo y pa muitas atras personas que han pasau por la militancia en organizacions universitarias ye lo puesto que presenció una parte important d’a luita por los dreitos estudiantils. Astí se gosan reunir los principals organos de gubiernos y representación universitarios como lo Claustro y lo Consello de Gubierno que en facié parte bell anyo. Astí s’han preso quantas d’as decisions que hue definen la Universidat de Zaragoza. Y astí chilemos muitas vegadas que querebanos atro modelo universitario sin que dengún nos fese guaire caso.

domingo, 9 de octubre de 2022

Lo Taj Mahal. Zaratober 09


En los primers tebeos de superherois que pasoron por las mías mans veniba un listau de “librerías especializadas”. En Madrit y Barcelona bi’n heba bella decena. En Zaragoza no’n tenebanos que una: lo Taj Mahal. I entré por primer vegada de bien chiquet. Feba ulor de tebeo, prou que sí. En ixos repalmars s’amuntonaban un trapacil d’historias que no adubiba a leyer. Con lo mio radiu presupuesto tasament me daba pa coleccionar-ne bell par. La resta d’as nuestras lecturas nos las amprabanos los amigos u las pillabanos d’as bibliotecas.

La botiga se’n fue un poquet mas t’alto en la mesma carrera, ta un local mas amplo y luminoso a on que sigo trobando ixas historias que me feban y me fan soniar tantismo. Lo simpatico hombre que me vendió ixos primers tebeos y las mías primeras cartas de Magic escrabutó fa bell anyo deixando un herencio bien bonico y muitas remeranzas. Trenta anyos dimpués la mía cita mensual con lo Taj Mahal ye un d’os mios días favoritos d’os mes.

sábado, 8 de octubre de 2022

Lo callizo Sant Cristobal. Zaratober 08


Lo chiquet callizo de Sant Cristobal ye una d’ixas carrerotas que quasi dengún no conoixe en Zaragoza. Nian en la Madalena te lo sabe ubicar la mayoría d’a chent. Manimenos, pa muitas, ye unatro d’ixos puestos especials. En ye porque, por muitos anyos, acullió la siede de A Enrestida, una d’as asociacions que mas historia de l’aragonesismo fació. Lo suyo primer local estió en una replaceta entre D. Juan de Aragón y Pedro Liñán, pero poco tiempo dimpués, por bell vecín una mica boque, habió de fer casa muda ta iste carrerón a on que remanió dica esfer-se.

Las paretz d’ixe guariche acullioron charradas, conciertos, chentas, cenas, exposicions y sobre tot, muita vida. Centro lochistico pa manifestacions y movilizacions, puesto a on que achuntar-se, a on que trobar material, una d’as siedes d’a Biblioteca Frida Kahlo, rebutient de libros d’historia y cultura aragonesa… A Enrestida estió tantas cosas que ye de mal resumir. La suya historia habrá de replegar-se bell día por la importancia que tenió pa l'aragonesismo y l'asociacionismo zaragozano. ¿Lo callizo Sant Cristobal? Dengún no sabe a on ye ixo. ¿La carrera d’A Enrestida? Oi, ixa, sí pas.

viernes, 7 de octubre de 2022

La Seu. Zaratober 07


Ye prou común que qui menos conoixca los monumentos d’a suya ciudat sigan los suyos ciudadanos. Ye lo que me pasó a yo con la Seu d'o Salvador, a on que tardé a entrar quasi trenta anyos porque “total, ya bi iré belatro día”. Yera un 29 de chinero, día de Sant Valer, patrón d’a ciudat quan, en veyer que bi heba entrada libre, decidié de visitar-la por primer vegada en la mía vida. Astí yera la ringlera de chuntamanetas aguardando a besar la reliquia d’o santo. Yo iba mas intresau por trobar rastro de l’asesinato de Pedro Arbués, historia que heba conoixiu poco tiempo antes.

Si l’exterior de “l’atra catedral” de Zaragoza siempre m’heba feito goyo, l’interior no feba burro falso. M’habié d’estar-ie firme tiempo pa veyer-la con un poquet de ficancia, con la minima que aprecisa una choya como ista que tenemos en la nuestra ciudat. Dimpués he tornau bella vegada mas. La una, pa una visita interpretativa bien intresant. La segunda, pa unatra que faciemos organizada por Nogara y, prou que sí, en aragonés.

En vivir tant cerqueta i paso a ormino. Quan veigo la parrafiquera de turistas mirando t’alto entre que la guía les explica l’arte mudechar, la importancia d’os Luna, la polemica portalada neoclasica u lo que pertoque, no puedo evitar sentir-me afortunau de poder veyer-la y visitar-la quan quiera y me los miro con un cenyo de “¿mola, eh?”. De vez, pienso en las maravillas que tendrán en las suyas respectivas ciudatz y lugars y en si habrán tardau trenta anyos en visitar-las.

jueves, 6 de octubre de 2022

Plaza Asso. Zaratober 06


La Plaza Asso ye pa yo un d’os puntos centrals d’o barrio. En lo suyo redol nos trobamos con Nogara, La Gusantina, La Ciclería, Desmontando a la Pili y lo Pottoka, espacios que definen, cada un d’a manera suya, lo que ye hue la Madalena. La preside un palacio renacentista rebonico que creyebanos que las obras no acabarían nunca y que, a la fin, lo facioron fa bell anyo. Siempre que i pasaba, que ye quasi totz los días, me preguntaba qué pre tendría una casa astí y si bell día podría permitir-me-la. Por la situación, por la polideza de l’edificio y, sobre tot, porque astí vivió Ignacio Jordán de Asso, una d’as figuras mas intresants d’a historia aragonesa y que la plaza leva lo suyo nombre.

Crebando ixa fatera de mugas entre sciencias y letras que tantos problemas sigue dando hue, Jordán de Asso se dedicó a lo dreito, la historia, la economía, la botanica u la zoolochía entre atras muitas disciplinas. La suya obra “Historia de la economía política de Aragón”, de 1798, ye un must-have pa qualsequier que estudie la historia d’o nuestro país. En lo tocant a la flora y fauna, estió un d’os primers scientificos en aplicar lo sistema de Linneo, catalogando a saber qué especies d’a tierra. Ye, con razón, una d’os quatre estatuas que cusiran la puerta d’o Paraninfo Universitario. Un personache con un calitre inqüestionable y figura que habría de conoixer qualsequier aragonés intresau por lo país.

miércoles, 5 de octubre de 2022

Lo Medina Albaida. Zaratober 05


Dimpués de bell anyo demandando a mis pais que me quitasen de Corazonistas, a on que facié la EGB, consiguié que m’apuntasen a un nuevo instituto, en ista ocasión publico. L’edificio sisquiá existiba t’a part d’alavez. La matricla la habié de fer en lo cercano IES Pedro de Luna, a on que heban estudiau antes los míos chirmans. En lo Medina Albaida descubrié atra manera de fer clases, la d’a publica, a on que se me permitiba opinar y discutir, a on que no bi heba violencia de man d’os profesors y a on que compartiba clases con mesachas (Corazonistas en aquellas envueltas no yera mixto).

En ixos anyos estió lo mio dispertar politico y cultural. Estió lo tiempo tamién que facié amistatz que encara hue continan. De buena parte d’o que soi agora en tien culpa - u la responsabilidat - ixe centro y toda las personas que me rodioron en ixos quatre anyos.

L’edificio no ye bonico, ni falta que fa, ya que lo que ha d’estar ye funcional, pero las remeranzas que amaga son repolidas. Lo suyo nombre, manimenos, ye un d'os mas polius d'os de Zaragoza. Qui tenié la ideya, un d'os millors profesors que bi heba en la plantilla de l'instituto, morió poco dimpués de meter-lo. Fa referencia a lo pasau musulmán d'a ciudat y sustituyiba a lo popular Gasómetro que ye como le decibanos en primeras en estar construyiu en lo puesto a on que antes bi'n heba un.

Las mías historias de part d'alavez, las recuento en istos posts.


martes, 4 de octubre de 2022

Sant Miguel d'os navarros. Zaratober 04


Antes de que yo entendese que lo cristianismo no yera obligatorio y que, en conseqüencia, abrazase l’ateísmo, acompanyaba a los mios catolicos pais cada domingo ta misa. La parroquia nuestra yera Sant Miguel d’os navarros. Cusira la entrada l’Arcanchel que le da nombre, como siempre, bien guerrer. Debaixo d’o suyo peu, chafa a lo mal, portiando en la man la espada que imparte la chusticia d’un dios que diz que ye tot amor.

L’apelliu d’iste Sant Miguel -“d’os navarros”- diz que ye porque astí estió un campamento de navarros que aduyó a Alifonso I en la conquista d’a ciudat y que Sant Miguel diz que tamién deixó las suyas cosas d’arcanchel pa, con la suya espada, cargar-se bell mulsulmán. Adintro estió la mitica Campana d'os cacegaus, que amostraba con lo suyo soniu lo camín de tornada t'a ciudat los días que bi heba boira preta que, en Zaragoza, no en son pocos.

Adintro, de chicorrón, lo cristianismo me pareixeba nomás aburriu. Tot y no tener lo tarabidau ideolochico que tiengo agora, nunca no le trobé garra sentiu a tot aquel ritual y a lo mormor d‘o mosén. Pa que no dase mal, mai y pai me deixaban levar-me bell libro, asinas que me foteba tot lo servicio limpio leyer, sin fer caso a los sermons que, como nino que yera, no adubiba a entender, y devantando-me y tornando-me a posar mecanicament quan sentiba que lo feba la resta d’a chent. Porque pa yo lo catolicismo, y la resta de relichions, nunca no han teniu guaire sentiu.

lunes, 3 de octubre de 2022

Ed. Agustín de Betancourt. Zaratober 03


Lo de estar-me en la universidat me debió de fer goyo porque me i fotié firmes anyadas. Tantas, que lo primer anyo feba clases en l’Interfacultatz, lo segundo en lo Corona y lo Cervantes, edificio que s’esvoldregaba y que dimpués d’una buena reforma aculliría la Casa de l’estudiant, y acabé en l’Agustín de Betancourt, primer siede d’a EUITIZ en lo Campus Río Ebro. A los que febanos Incheniería Tecnica Electronica nos ninivioron los primers t’alla. Yeranos poquetz en un edificio disenyau pa milenta alumnos, asinas que febanos eco por los corredors. Los cafés nos los hebanos de fer en lo vecín Torres Quevedo a on que los incheniers “superiors” se nos miraban malfiaus. Aquello, a quasi totz, nos pillaba luent de casa y hebanos de pillar autobuses u fer redoldín d’autos, los que en tenebanos. 

La EINA actual ye lo resultau d'a fusión d'o CPS (Centro Politécnico Superior) y la EUITIZ (Escuela Universitaria de Ingeniería Técnica de Zaragoza) que s'habió de fer quan se reformó la Lei Universitaria y dispareixioron la distinción entre Incheniería sin apellius y las Inchenierías Tecnicas. Pa meter-les nombres a los edificios, que no en teneban dica que i fuemos los d'a EUITIZ, se fació un concurso. I participé, con poco exito. Hue se dicen Ada Byron, Torres Quevedo y Agustín de Betancourt, en memoria de tres figuras ilustres d'o conoiximiento scientifico-tecnico. A la biblioteca le dicioron Hypatia y, con lo mesmo buen criterio, baltizoron con lo nombre d'o grandismo y quiesto profesor Tomás Pollán a la Sala d'estudios principal.

A la fin, l’Agustín de Betancourt quedo de pistón y acullió laboratorios y clases dignas pa las estudiants que, poco tiempo antes, estudiabanos en lo Corona, que yera mas centrico, pero teneba muitas d'as instalacions en las tres pedretas. La vida querió que acabase treballando bien cerqueta y que haiga de visitar-lo a sobén. En tornar-ie, foi alcordanza de todas las chornadas en Delegación, de todas las fiestas de Sant Pepe, d’as sesions de Claustro que se i celebroron, d’as suyas chornadas culturals, d’as horas en la cafetería y mesmo de beluna d’ixas pocas asignaturas que sí que me facioron goyo. Y prou que sí, de que astí la mía parella y yo nos besemos por primer vegada.

domingo, 2 de octubre de 2022

Lo Parque de Villafeliche #Zaratober 02


Cerqueta d’a casa a on que creixié ye lo Parque de Villafeliche, que se diz asinas dende habe ya bell anyo, pero que totz los que tenemos bella edat lo conoixemos como lo Canodromo, que encara existiba quan naixié. Ya yera enronau quan prencipié a ir-ie a fer gambadetas con bell par d’amigos y lo can d’un d’ells, a qui febanos servir d’enchaquia pa chuntar-nos de nueitz y fer-nos los nuestros primers fumarros. Yeran los anyos d’a heroína, asinas que no yera mica raro, en un puesto tant amagau, de trobar-nos bell yonqui.

Hue ye un parque repincho, bien ateclau y agradable, chunto a la mía quiesta Uerva. En lo bell meyo, una terraceta pa fer-te bell hordio. Hue, los cans que van t’astí, son tranquilos, chugarriando con atros cans, u disfrutando d’iste chiquet parque. La muller-alica, la escultura en bronce que da la bienvenida a lo parque a qui entra por Miguel Servet, cusira que nos los maltracten.

sábado, 1 de octubre de 2022

Caesar Augusta #Zaratober 01

Zaragoza ye historia
. Cada vegada que pienso que fa mas de dos mil anyos ya bi heba chent vivindo en los mesmos puestos por a on que transito diya sin atro pienso en todas las historias que han viviu las nuestras carreras. Pienso en cómo sería aquella Salduie pre-romana, probablement un lugarón bien chiquet. En cómo sería l’arribada d’os romanos y la fundación de Caesar Augusta, en si qualcún d’os presents plegaría a esmachinar que dos mil anyos dimpués la ciudat i continaría, con las murallas, las termas, lo teatro u lo puerto como testigos.

Diz que una d’as razons pa fundar aquí una ciudat estioron los suyos rius. En muit poco espacio tiens l’Ebro, la Uerva y lo Galligo. Y no guaire luent, mesmo lo Xalón. Aquí diz que medraba de tot. Una envidia de huerta que tasament en queda bell repui, agora convertiu en explotacions chiquetas u en hobbie d’urbanita que deseya reconectar con la tierra.

M’encantaría poder viachar en lo tiempo y veyer-la en aquellas envueltas, con una parte muit chiqueta construyida de tot lo que ye hue. Con lo riu salvache, antes de que dengún l’entibase. Y charrar con toda la chent que ha viviu aquí en istos dos milenios, preguntar-les si sienten por la ciudat lo mesmo que yo, que me levasen t’os suyos puestos favoritos, que m’amostrasen cómo se viviba. A fe que no se creyerían lo que les recontase yo.

Zaratober va un poquet d’ixo tamién, de contar a lo varrenau que siga vivindo aquí en l’atro 4000, cómo yera la mía ciudat y lo que la quereba.

viernes, 30 de septiembre de 2022

(D)Escribindo Zaragoza. Zaratober #00

"Zaragoza, la romana, mora d'a morería, cristiana y tamién chodiga, mosica de muitas chents..." canta Carmen París en una repolida canción adedicada a la mía ciudat. Aquí he naixiu, he creixiu, sigo vivindo y m'agradaría de morir. Nunca no he pasau mas d'un mes difuera d'as suyas mugas. Asinas ye la mía vida. Cuento que ni millor ni pior que la de dengún atro. Simplament asinas. Talment por ixo, porque no conoixco garra atra cosa, ye porque la quiero tanto. U talment porque la quiero tanto ye por lo que no he quiesto u no m'he atreviu a conoixer garra atra cosa.

"La amo, la odio, le tiengo un cariño ancestral", le deciba Jose Antonio Labordeta en lo suyo Zarajota blues. Bi habió un tiempo, no guaire largo, que la Immortal m'angunió, que pensé en deixar-la, en buscar en atros puestos un cubil a on que las mías pantasmas no podesen entrar, a on que fuyir d'os monstruos que habitaban las carreras d'a ciudat. No marché, entre atras razons porque ni sisquiá podeba, pero tiempo dimpués entendié que ixos monstruos yeran adintro de yo y que tot y que ixopase, m'acompanyarían. Asinas que, en realidat, sisquiá plegué a odiar-la. Creigo que no puedo.

Asinas, mas de quaranta y tres anyos dimpués de sentir-la por primer vegada, arribaba iste octubre. Y con ell, lo inktober, ixe mes que en los zaguers tres anyos m'ha teniu limpio escribir. Un relato cada día d'o mes, plegando a fer-ne novanta y tres que publiqué, en formato papel, en los fanzines Tintubre, Inkventos d'octubre y L'aragoMés. Iste anyo no me veyeba con fuerzas, tiempo ni inspiración pa fer-me unatro inktober de relatos. Ni m'aganaba. Pero como no me puedo estar ni quieto ni callau, empecipié a preixinar qualque alternativa. 

A partir de manyana empecipia Zaratober. Cada día iré penchando una foto d'a mía amada ciudat de Zaragoza y tos recontaré bella historieta. Por un regular, remeranzas de yayo. De cabo ta quan, curiosidatz historicas. Bi habrá espacio pa la reivindicación, no lo dubdetz. Y lo que no faltará, en garra d'os posts, ye carinyo por la bimilenaria ciudat que tiengo la suerte d'habitar.