miércoles, 15 de mayo de 2013

Chiqueta cronica d'as XX Chornadas de Nogara

Pasoron ya as XX Chornadas d'as luengas d'Aragón, organizadas por Nogara entre os diyas 4 y 10 de mayo. Tot un luxo de ponents y d'actividatz, en o mell meyo d'o ¿debat? y l'aprebación d'a lei de no-luengas. Por qüestions laborals no podeba ir-ie dende feba ya tres anyadas, y heba ixublidau lo bien organizadas y los sobrebuenos ratos que te pueden fer pasar istas chornadas, asinas que feré una chiqueta cronica ta totz qui no querietz u podietz estar-ie t'animar-tos a que i viengatz l'anyada venient.

Actividatz y conciertos: O sabado quatre estiemos dende lo maitin en a plaza d'o CMA Las Armas, un espacio repincho que quasi no conoixeba y que me pareix sobrebueno ta organizar-ie eventos. L'orache a la fin nos respetó, que yera a l'aire libre y tenebanos bien de medrana. De maitins, teniemos animación t'a catrinalla, l'actuación d'o dance d'o Gancho, que "chugaban en casa" y una clase d'aragonés que nos fació Dabi Lahiguera bien intresant. I charró d'a prenuncia de l'aragonés, por eixemplo, u bella mica de fraseolochía. A charrada se titolaba "L'esprito d'a luenga" y prebaba de fer-nos conscients de bells rasgos muito definitorios de l'aragonés y que a soben ixublidamos.

De tardis, prencipiaba lo concierto, l'acto mas ludico boriner d'as chornadas. La Vidriera Irreverente i presentó a suya nueva canta en aragonés, en un inte que nunca no ixublidaré, entre atras cosas por o chiquet papel que tenié en aduyando a adaptar a canta. La podetz sentir aqui. O suyo concierto ubrió a nueit con as suyas letras reivindicativas y comprometidas. Continoron Vietato Pensare, una colla de zagaletz y zagaletas muito chovens, pero con prou rasmia sobre o scenario. Yera a primer vegada que tanyeban difuera d'Euskal Herria y no se perdioron ni un inte d'a tardi nueit. Dende o concierto de La Vidriera, a on que lo dioron tot en primer ringlera, dica la borina en La Botica, a on que continemos a nueit. Zarró lo concierto, como no podría estar d'atra traza Prau, con os suyos himnos, que no cantas y con un publico entregau y, porque no decir-lo, prou zorro ya.



Una nueit que continó en La Botica con DJs d'aqui y d'Euskal Herria y a on que muita chent de l'aragonés nos i trobemos. Alumnalla, socios d'as organizacions en esfensa d'a luenga y a cultura, companyers de luitas, ... Beluns que feba tiempos que no viyeba, por cierto...

A parti mas saputa prencipiaba o lunes con a charrada de l'imprescindible Chorche Paniello, qui charró d'o primer censo lingüistico feito en Monzón t'o cabo d'a decada d'os 90 y a creyación dimpués d'un centro lingüistico en ixa ciudat. O censo deixó esclatero a graniza riqueza lingüistica que bi heba t'a part d'alavez, a on que muitisma chent sinyaló charrar aragonés, venius d'a redolada, d'o Sobrarbe y mesmo d'atras partis de l'Alto Aragón más aluenyadas. Demandó que hese caliu empentar iniciativas parellanas en Graus, Chaca, u Samianigo, por eixemplo y que con ixo hesenos teniu más datos y argumentos ta esfender a nuestra luenga y contrimostrar que sí que bi ha una voluntat popular por mantener-la y aprender-la. 

Cuanto a lo centro lingüistico, encara que a experiencia estió positiva, remató como tantas cosas, con pleitinas entre personas y con o zarre d'a cheta economica de man d'Europa y d'o concello que yeran qui pagaban. Paniello fació una exposición sobrebuena y esclatera, sin eufemismo, ni amagar cosa. Más Paniellos en caldría, y tendríanos un Aragón muito millor.


O martes se presentó "Tradiciones, costumbres y lengua en Fuencalderas", de man de Chuse Raúl Usón, editor de Xordica, Fernando Romanos, investigador de l'aragonés qui ha feito arrienda treballos en ixa redolada y José Arbués Possat, naixiu de Fuencalderas. A sala rebutió con a chent plegada d'ixa redolada dica haber-se de quedar chent de piet, en no quedar sillas. Romanos fació una remeranza d'as caracteristicas chenerals y locals d'a fabla de Fuencalderas y redolada. Tanto ell como Usón coincidioron en recomendat a lectura d'atro libro de José Arbués, Fuencalderas en mi recuerdo, autoeditau en Girona en 1980 (cuento que descatalogau fa muito) y que t'os dos dió a conoixer os costumbre y fabla d'astí. José sabió transmitir-nos toda la pasión que tien por esfender y fer replega de tot lo rico vocabulario d'a redolada. Tamién se i charró d'a cantidat de frases feitas que i teneban y d'a importancia d'istas en a construcción d'un estandar entendible de vez que rico.


O miercols se presentaba o largometrache en euskera, subtitulau en aragonés, entre atras luengas, clamau Gartxot. No podié estar en a prochección, por o treballo mio, pero sí que m'amané dimpués d'a charrada a viyer a los directors y guionistas d'a cinta. Enlucerné quan, en marchando d'a sala a on que se feban as charradas, un d'os directors quitó o suyo chicotén y prencipió a cantar y a fer-lo sonar en pasavillas dica Nogara. Deixando sin sangre en a pocha a meyo casco viello, cal decir. Ya en a siede de l'asociación, nos recontoron en un ambient familiar de tot, como facioron a cinta, os premios que han ganau, l'acullida que ha teniu y un poquet d'a realidat euskalduna. Tot mientres o debantdito chicotener, feba chiflius de muixons y d'a naturaleza, tanyeba bell traste u recitaba y cantaba versos en euskera (y mesmo uno en aragonés). Una nueit machica que nos fació pasar un sobrebuen rato a todas las presents.

O chueves tocaba ir-nos-ne bien luen y, de vez, bien amán, ta charrar de multilingüismo. As asociacions Zarabene de Senegal y Raíces Andinas de Bolivia, recontoron a suya realidat lingüistica y los problemas derivaus d'a mesma. En os dos países se charran u se han charrau más de trenta luengas. En o caso de Senegal, antimás d'a luenga colonial que ye o francés, se i charra wolof mayoritariament, pero tamién muitas atras luengas con muita vitalidat. Asinas, muita chent en o sur d'o país charra francés, anglés (Gambia, ex-colonia anglesa, ye en o mell meyo d'o país), wólof y una u dos luengas d'asti. Sin mayors problemas. 

Cuanto a Bolivia, nos explicoron como todas as luengas indichenas son nombradas y protechidas por a constitución. 37 si no remero mal. Seguntes os ponents, a metat d'ellas no se charran u quasi no tienen parladors por lo que podrían perder-se en bell par de cheneracions. As más vitals, como o quechua, o guaraní u lo aimara, pareix que van tirando enta debant y que sí que s'ixamplan y protechen os dreitos lingüisticos d'as suyas fablants. Ya en Aragón, explicoron a diferencia entre a migración d'una primer epoca, que veniban charrando castellano, con a plegada más dimpués, que veniban de redoladas rurals de Bolivia, a on que no se charraba castellano. Charroron de bella mena "ghettización" que son tenendo por enchaquia d'a luenga y d'as dificultatz que han trobau en no saber castellano.



Remataba la semana, y las chornadas, con una d'as charradas que más me aganaba de viyer a priori. L'asturiano, luenga chirmana de l'aragonés, con Carlos Pulgar, d'a Xunta Pola Defensa de laLlingua Asturiana. En poco más d'una hora, habió de resumir as trenta anyadas que leva luitando por a luenga a suya organización. Con un fascal de fotos, apegallos y cartels amostró una sociedat que sí que luita de una traza muito más multitudinaria por a suya luenga, conseguindo muitas cosas que no nos ferá o morro cló de tener-las aquí. Prou que les falta muito (no ye oficial, por eixemplo), pero a monico y con buena faina, tot plegará. Qui bi estiemos, prenebanos notas ta posibles accions a fer en Aragón. Bi dioron muita importancia por eixemplo a la toponimia y charró tamién d'a iniciativa d'o Topu fartón, una "chozna" que meteban ta fiestas y que les feba prou honra ta fer conoixer l'asturiano y as suyas reivindicacions.

Imposible yera rematar ixa charrada sin charrar de Pita, a pirina que encorrió mientres una decada (y que contina encorrendo) a os politicos d'alli ta remerar-les a esfensa de l'asturiano. Agora se conoixería como escrache, como dició Pulgar, pero ya lo inventoron fa muitas anyadas. Mesmo estió en momentos de replegar un premio d'a SGAE por un disco que editó a Xunta. Pena que a la fin no ganase o premio, pues hese estau un inte ta remerar...

En resumen, unas granizas chornadas con arrienda momentos buenismos y bien intresants a on que teniemos variedat de temas y de anvistas. A on que tamién aprendiemos d'atras luitas por a dignidat cultural y lingüistica y a on que pasemos muito buens intes. Tot ixo, mientres lo gubierno d'Aragón nos sacaba mesmo lo nombre en una d'as chornadas a on que más verguenya de fació perteneixer a ista Tierra de barrenaus (y carnuces).





martes, 14 de mayo de 2013

Debatz que (probablement) no bi habría en un Aragón independient (II)

Dengún no naix independentista aragonés. Creigo. Por agora. Conoixco muita chent que ye d'o PSOE, PP u IU, u de dreitas u de cuchas, "por tradición familiar" u porque le "han educau asinas". En a mia opinión ye penible tener una ideyolochía -u relichión, u mesmo equipo de futbol- porque en casa tuya "ye asinas". Que no ye o parchís, por favor.... 

Manimenos cuento que muitos pocos d'os que hue somos indepes haigamos naixiu d'indepes. Como muito serán de casas aragonesistas, u con ambients favorables a los procesos d'emancipación nacional.

Asinas que yo, como a más gran parti, habié de "fer-me" independentista. Que yo en siga, ye tot un proceso de construcción d'o mio esmo, a radiz d'os debatz tenius con as personas que esfendeban l'independentismo u atras opcions como a Espanya federal de diferents menas u un "afundamiento en l'autonomía". Tamién de parar cuenta de como os mios obchetivos ideyolochicos y nacionals no se podrían fer realidat si no yera a traviés d'un Aragón independient. A independencia, ta yo, ye una ferramienta ta poder conseguir uns obchetivos de fer una sociedat, una cultura y un país como a yo me fa goi y a on que creigo que todas y totz podríanos convivir con cierta armonía y en plen exercicio d'os nuestros dreitos individuals y colectivos.

Una d'as razons ta plegar a estar independentista, y aquí conecto con a primer parti d'iste post, ye l'aragonés. Deciba, en ixe post, que bi ha debatz que no tendríanos en un Aragón independient en achustar-se as leis nuestras a lo nuestro territorio y a la suya realidat poblacional. En fer-se leis parando cuenta d'a realidat aragonesa y no pas aplicando en Aragón leis feitas ta Espanya. Remataba o post remerando que, a tamás d'estar una lei feita en Aragón, a lei de no luengas, antimás d'estar una esferra, desconoix a realidat aragonesa de tot, l'amaga, le falta y creba de tot a nuestra cultura, identidat y luengas.

¿Quals son las razons que han levau t'aprebación d'ista lei? Ye esclatero que as suyas promotoras exercen un nacionalismo espanyol cultural y politico dillá de toda dubda. Ixe espanyolismo que, en Aragón, muit a soben prene a forma de catalanofobia, tan estendillada mesmo en ambients aragonesistas. Ixe nacionalismo, ixa catalanofobia vienen d'una aculturación y d'un colonialismo cultural y politico de sieglos ya. En zagueras muito más fundo gracias a la mediamasificación d'a información y, sobre tot, a lo colaboracionismo interior y, porque no decir-lo, a un papel más que qüestionable d'as organizacions historicas aragonesistas que cacegoron en bell punto o mensache nacional en pro d'un "cuchismo progre-guay" que estase mayoritariament votable (pero que no'n estió).

No cal enganyar-se. L'aragonés se la bufa a todas. Pero no pas o catalán, porque Catalunya sí que ye una menaza ta Espanya y t'a suya uniformidat uniformizadera cultural  lingüistica. Qualsiquier chisla de poder (y luenga ye poder) que pueda tener Catalunya, ye una seria menaza ta Espanya. As espanyolas lo saben y no van a deixar medrar una ideyolochía ni una cultura que les pueda fer a tana. 



Que en Aragón se charren atras luengas tamién ye una menaza ta l'espanyolismo. A más gran parti d'as nacions tienen una luenga d'a que fan argüello y sinyal d'a suya identidat nacional. Qualsiquier estau independient no refusa a estar-ne y no refusa d'a suya luenga de traza voluntaria, como fa agora Aragón. Una vegada feito o proceso d'independencia intresa mantener a identidat nacional que ha levau ta ixe proceso. A luenga ye un d'os elementos más importants a ran identitario. Talment o más important. En muitas ocasions por dencima d'a relichión, historia u etnia d'un país. Ye mesmo una riqueza economica, antimás de cultural. Totz os estaus d'o mundo preban de que a suya luenga se charre tot lo que se pueda aintro y difuera d'as suyas mugas. En o caso d'os estaus imperialistas mesmo a pur de estricallar toda la resta de luengas que contacten con ell.


En un Aragón independient, mesmo en o caso de que continase con un modelo capitalista de sociedat, tendríanos qualques factors que ferían que a pervivencia de l'aragonés tenese muitas más posibilidatz:


1. A educación: Qualsiquier estau independient amuestra a historia d'ixe estau y, si un caso, a d'o continent u civilización d'arredol. Si ixe estau antimás s'independiza d'unatro estau colonialista como ye l'espanyol, l'amuestra parando especial cuenta en os "mitos fundacionals" y en os sinyals d'identidat propios. En una educación aragonesa sería impensable amostrar como s'amuestra agora os "Decretos de conquista" (tamién conoixius como de Nueva Planta), l'asesinato d'o chusticia y a invasión castellana d'Aragón, u o Compromís de Casp, .... y sería impensable no conoixer, de vez, a historia de l'aragonés, enreligada tan preta a la historia d'Aragón.

2. Menor intromisión de l'espanyolismo politico y cultural: En ixe Aragón independient esmaixinau, se suposa que bi ha habiu un proceso a on que se ha crebau con Espanya, por lo que l'espanyolismo politico ye, como poco, minoritario. Como he dito antis, a ideyolochía nacionalista espanyola ye a que inspira de tot a lei de noluengas y, en cheneral, toda la politica lengüicida d'as zaguers decadas. En a suya versión aragonesa a on que se manifiesta tan a soben como catalanofobia que, ta no reconoixer a realidat, estricalla tot lo que calga. Mesmo l'aragonés. Sin tener (tanta) presión de l'espanyolismo politico - cultural, no bi habría tantos entrepuces a unas politicas favorables a l'aragonés. A realidat ye que poca chent s'oposa a que se esparda l'aragonés u a que se i adediquen recursos hue mesmo. O problema vien de bellas poquetas personas, vincladas como totz sabemos a l'espanyolismo y, a soben, a la extrema dreita.

3. Ubridura t'o mundo: O pueblo aragonés ye culturalment asimilau a l'ideyal revolucionario francés que tan buen funcionó en Espanya, de una nación, un estau, una cultura, una luenga. Agora mesmo, ixe esquema de mundo se ye esvoldregando en Europa y en tot lo mundo. A pertenencia t'o Reino d'Espanya y o debantdito espanyolismo politico cultural, nos fan esconoixer ixas realidatz u prener-las a soben como "rarezas". En Aragón nos miramos enta Espanya, no pas enta Europa u a resta d'o mundo, muito más respestuoso y conscient d'a pluralidat lengüistica y cultural. ¿Quanta chent en Aragón (a o sur de Ayerbe, si queretz) conoix a existencia de l'Occitano si no ye como parti d'u crucigrama? Lo unico más penible que no conoixer a existencia d'a luenga que tenemos en o norte d'as nuestras mugas, ye no conoixer y valurar as nuestras. Viyer ixas realidatz, nos fería no trobar-nos como "aberrants" (;-)) sino como parti d'un mundo prurilingüe, pluricultural y plurinacional.

4. Meyos de comunicación propios: Ista ye una d'as pocas cosas que tenemos, ¿no?. Heraldo, CARTV y Periodico de Aragón son mass media aragoneses. U como deciba o companyer Purnas, ¿son meyos aragoneses u meyos espanyols en Aragón? A colonización mental y l'espanyolismo banal, si bi ha bell puesto a on que son presents, ye en os meyos de comunicación de masas. Ye de dar que si bell diya se plega en un Aragón independient será por dencima d'istos meyos, que, agora mesmo, fan o chuego a o colonialismo. Lochicament, si se dan totz os procesos anteriors, buena parti d'os meyos de comunicación, pasarían a enfortir a identidat aragonesa y, alavez, l'aragonés.

Resumindo: Un proceso politico de independencia levaría (en a mia opinión) obligatoriament un proceso de descolonización de l'esmo colectivo aragonés y una valuración d'os sinyals d'identidatz aragoneses. Un d'os más importants ye l'aragonés. A luenga sería empentada dende a educación, a politica, os meyos de comunicación, y mesmo a economía y sería valurada, respetada y conoixida difuera d'as nuestras mugas y contaría con menos enemigos interiors. 

Si con tot ixo, l'aragonés morise, a lo menos no podríanos decir que no faciemos tot lo posible.

Nomás anotar ta rematar iste catenazo, que siempre he establiu que yera charrando de un Aragón independient, mesmo con un sistema capitalista. Por si bi ha belun que lo dubda, ixe no ye o mio prochecto personal. Como dicen los Riot Propaganda: L'independència és un fàstic si no és de classe i vermella (A independencia ye un fastio si no ye de clase y roya).


lunes, 13 de mayo de 2013

Debatz que (probablement) no bi habría en un Aragón independient

Ye cutiano trobar-me pensando en como sería un Aragón independient. Qué problemas y debatz bi tendríanos y como se organizaría a sociedat. Qual sería a presencia real d'as nuestras luengas, qué relacions tendríanos con os país d'arredol y asinas asinas. Prou que ixe Aragón independient que yo quiero no sería un Aragón capitalista, pero si en estase, bi habría dos debatz, que se son fendo istos diyas, que no los tendríanos. U a lo menos ixo creigo.

Parti d'os inconvenients, y no pas una parti menor, de perteneixer a un estau como ye o Reino d'Espanya, tan gran y tan incapable de reconoixer as realidatz que bi ha dillá de Madrit, ye que as leis no se fan pensando en a realidat actual aragonesa. No digo ya en os nuestros dreitos historicos nacionals, culturals u lingüisticos que ixo ye atro tema. Digo en a nuestra realidat poblacional. En quantos vivimos aquí, en qué territorio, con qué densidatz de población y con que distribución.

A primer lei ye evident, y mesmo o PP en Aragón y o PAR se han oposau a la nueva lei de rechimen local. Una lei feita dende Espanya a on que se quieren sacar totz os concellos de menos de 20.000 habitadors, lo que en o nuestro país suposaría totz fueras de Zaragoza, Uesca, Teruel y Calatayu. Ye impensable de aplicar ixa lei en Aragón. Dengún ye estau capable d'esfender-la aquí. Manimenos si Espanya querese, y no se me fería mica raro, s'aplicaría. O PP se la trusquiría y au. Y qui nos i oposasenos sentiríanos a retolica d'etarras independentistas nazis "can-chiflos" de cutio.

Igualment, y tamién sobre o territorio, en os movimientos alternativos d'a mena d'o 15M, más que más urbanos, se debate sobre sacar as diputacions provincials. A primer vegada que sintié iste debat me pareixió evident "oh claro!", me dicié. Bells diyas dimpués, sintié un debat en a SER sobre o tema a on que no sé qui esfendeba a utilidat d'as diputacions ta fer-se-ne d'as qüestions d'os lugars, más que más d'os más chicotz. Alavez paré cuenta de que yera viyendo lo problema dende l'anvista aragonesa, a on que as competencias "utils" d'as diputacions son estadas presas por atro ran administrativo como son as comarcas.

En Aragón ye de dar que cal sacar as diputacions. Una vegada que as comarcas han preso as competencias importants que as diputacions provincials teneban, ya no calen ta cosa. Agora mesmo son a placha a on que mueren as politicas que no valen t'atra cosa u que os suyos partius han de recompensar-les por os servicios feitos. Prou que en as comarcas tamién bi ha corrupción y inutilidat y que, de feito, son una d'as grans fuents de treballo t'os más carnuzos d'o PAR, pero o modelo, conceptualment, ye muito más amanau t'a realidat poblacional aragonesa que no o "diputacional". En Espanya, manimenos, no bi ha comarcas. Ixe ran administrativo, entre o nacional y o local, creigo que cal que exista en bella mida, y en Espanya, ixe papel lo fan as diputacions.


L'atro problema ye o que se ye tenendo agora con as escuelas de l'Alto Aragón. Ta qui no lo conoixca, lo explicaré breument. L'actual lei d'amostranza distribuye o trampo obligatorio en dos, primaria (EP) y secundaria (ESO), con una durada de seis y quatre anyadas respectivament. O primer trampo va d'as seis dica las dotze anyadas y o segundo d'as dotze dica las deciseis. A primaria, en teoría, s'ha de cursar en un CEIP (Escuela d'Educación Infantil y Primaria) y a secundaria en un IES (Instituto d'Educación Secundaria). Con l'anterior lei, os zagals dica catorce anyadas feban a EGB en una escuela y dimpués, si quereban, marchaban ta un instituto a resta de l'amostranza, ista ya no obligatoria.

A nueva lei fació iste trestallo sin viyer as conseqüencias que isto podría tener en o mundo rural. Prou que tampoco no paró cuenta d'a realidat poblacional - contino deixando a un costau a nacional, historica y cultural - d'Aragón. Dende que prencipió a aplicar-se dica agora, l'alumnalla de dotze anyos habría d'haber iu ta IES, cosa que no bi ha en muitos lugars d'Aragón, a on que nomás bi ha CEIPs. 

A D.Ch.A., por una vegada razonablement, decidió de blincar-se a lei, y deixar a la zaragalla fendo 1º y 2º d'ESO en os suyos lugars, no habendo de mover-se dica o 3º curso d'ESO, con ya catorce anyadas. Agora Dolores Serrat - siempre Dolores Serrat, ay.... - quier fer mover-se a alumnalla de tot l'Alto Aragón difuera de casa suya, en muitos casos, buena ripa de kilometros t'aplicar una lei que no paró cuenta d'a nuestra realidat. Que se la bufaba, de feito, a nuestra realidat. Una lei feita, en o millor d'os casos, t'as ciudatz y ta Espanya.

En un Aragón independient, encara que estase capitalista, cuento que tanto a lei educativa, como a lei de rechimen local, no s'hesen feito asinas. Ni o pior d'os fachas fería leis tan absurdas en aplicar-se nomás en o nuestro país y en estar pensadas t'o nuestro país. Prou que ferían leis malas y buenas. A independencia no ye "o país d'a chocolata" a on que todas seremos felices y andaremos por as carreras fotendo blincos. Pero en un Aragón independient, no habríanos d'estar contando qual ye a nuestra realidat porque la vivimos. 

Me diretz que, con tot y con ixo, y estando un debat d'Aragón, en Aragón y feito por chent administrativament aragonesa, se ha aprebau a lei de no luengas.... Y tenetz razón. En charraré proximament sobre porque as "aragonesas" apreban leis antiaragonesas, si ye que cal.