lunes, 29 de octubre de 2012

L'aragonés ye bien vivo (octobre 2012)

Dimpués d’os Pilars, d’o reseco, y de una colaboración en Fendo Orella (que continará)  torna L’aragonés ye bien vivo, con falca y tot, ta La Enredadera. Aquí tenetz o resumen de contenius:

Pilars en aragonés:
[Si queretz leyer una cronica más ampla d’os Pilars, tenets totz istos posts ta fer-lo: 1,2,3,4 y 5]. Ya rematadas as fiestas d’o Pilar, cal repasar a presencia de l’aragonés en as fiestas. O primer concierto estió o de Prau, en a Sala Arena Rock que presentaba o suyo nuevo disco, “Con os pietz en a tierra”, que ya podetz descargar-tos en Jamendo u Magofermin.org y mercar en os suyoa conciertos y en os puestos de siempre. O concierto presentación estió a rebutir de chent y pasemos un rato sobrebueno con as viellas y as nuevas cantas d’un disco que le feba muita falta a l’aragonés y a la mosica aragonesa.
O diya 8, a Coordinadera Aragón Trilingüe organizó tamién un concierto a on que se leyó o nuevo manifiesto por un Aragón Trilingüe y a on que se podió sentir a mosica de La Chaminera, Bufacalibos, Ya babé, Pasatrés, Zarrakatralla folk y Pepín y Chuanón en a Plaza Sant Felipe.
O diya 9 tornaba a actuar Biella Nuei, acompanyau por La Ronda de Boltaña en a Plaza d’o Pilar que, como todas as anyadas d’implió de chent.
Ta rematar, o diya 10 l’A.C. Nogara fació una brendeta con tot qui querió amanar-se-ie a on que nos podiemos pillar un buen capazo en aragonés.


Nuevos cursos en aragonés
A ufierta de cursos d’aragonés ye bien ampla ista anyada y encara sotz a tiempo d’apuntar-tos t’os cursos d’aragonés que, u levan nomas dos semanas, u mesmo encara no son prencipiaus. Remeramos que o mes pasau ya comentemos os cursos de Fablans, Nogara, O Trango y Consello d’a Fabla y que tos diemos una adreza a on que salen totz: cursosdaragones.blogspot.com.

Dende ixe diya en han saliu tres más:

Cursos d’aragonés 20 d’abiento
Horarios 1er ran: martes de 19:00 a 21:00. C.C. La Almozara
Horarios 2º ran: lunes de 19:00 a 21:00. C.C. La Almozara
Prencipian a semana d'o 15 d'octobre. Incripcions: bentedeabiento@gmail.com.

Curso d’aragonés A.VV. La Paz
Horarios: Lunes de 17 a 19. Prencipia en noviembre. Pre: 70 euros por tot o curso + materiales.
Incripcions en avvlapaz@gmail.com

Curso d’aragonés Universidat
Organizau por Sindicato Universidat. Endrezau ta  estudiants y treballadors d'a Universidat. Horarios: Viernes de 19 a 21. O 9 de noviembre bi habrá una reunión informativa en a Casa de l'Estudiant (C / Corona, 42). Pre: 10 euros en concepto de materials. Incripcions en o correu electronico uca@unizar.es u en o telefono 695500618

Antimás Nogara ya confirma os horarios d’os cursos suyos. Se’n ferá uno o martes de 19 a 22 y un atro os miercols de 20 a 22, adhibindo más diyas que alcordarán entre l’alumnalla y o mayestro.Tamién se ferá un curso de segundo ran os martes de tardes y encara quedan plazas en os cursos on line ta qui no pueda ir t’os presencials.

X concurso de relatos ta leyer en tres minutos Luis del Val.
Ya ye convocau o X concurso de relatos ta leyer en tres minutos Luis del Val que fa o concello de Sallent de Galligo todas as anyadas. Ye un concurso ta relatos chicotz (nomas dos fuelletas), asinas que ye un concurso ideyal ta qui no tienga guaire tiempo ta escribir pero tienga bella ideya buena dondiando-le por o tozuelo. Tenetz dica o 28 de febrero ta inviar os relatos y podetz ganar un premio de 400 euros (700 si lo fas en aragonés). As bases d’o concuso las podetz leyer aqui.

Un curto sobre a perdida de l’aragonés gana o II Premio sobre a identidat aragonesa
Como informaba Arredol, o pasau 21 de setiembre se daba o segundo premio d’o III concurso escolar de videos sobre “A identidat aragonesa sieglo a sieglo” a la colla d’alumnos de 4eno d’ESO de l’asignatura d’informatica coordinaus por o suyo profesor Dabi Lahiguera. O premio ye de 50 € ta cadagun d’os alumnos y de 1500 euros ta l’instituto
O video fa un repaso a las fitas historicas de l’aragonés repasando a personaches importants como Jean-Joseph Saroïhandy, Francho Nagore, Ánchel Conte, Juan José Segura, etc...



Nueva temporada de Fendo Orella
O pasau 15 d’octobre prencipió a nueva temporada d’o programa Fendo Orella de Radio Topo. Ya ye a novena, con tot lo dificil que ye fer un programa en aragonés, semanal y en una radio libre (u siga sin patrocinadors, publicidat, chornals, ...) y con sobrebuenos contenius.
En ista edición se tornan viellos companers y antimás se i convida a nuevos personaches ta fer colaboracions, como a que podiemos sentir en o zaguer programa “Charrutiando con tío Vadiello” a on que iste personache nos ufre a suya particlar anvista d’a cultura aragonesa.
Totz os lunes de 22 a 23 en Radio Topo y siempre que quieras en o podcast de Fendo Orella.

Entrega de diplomas y devantadera d’o curso de Nogara
O pasau viernes se fació a entrega de diplomas y a devantadera d’o nuevo curso de Nogara. Iste acto se repite todas as anyadas. L’alumnalla que fació curso mientres l’anyo pasau bi va a replegar os titols suyos y trobar-se con as companyeras y antimás ye un sobrebuen inte ta que socias, mayestras, y alumnas pasadas, presents y futuras. Como quasi siempre que Nogara fa qualcosa, bi habió brenda y contemos con a presencia d’o Dance de Sant Chusé que fació bellas quantas cantas. Bi estiemos buenas cosa de chent aprendendo a bailar, fendo un buen bocau y, sobre tot, charrando buen ratet ista luenga que tanto queremos.

Canta en aragonés
Continamos con o reto que lancemos o mes pasau ta totz os mosicos de Zaragoza, Aragón y d’o mundo. Y no ye atra que fer una canta en aragonés. Remeramos que ista anyada iremos repasando cantas feitas en aragonés por mosicos que no gosan de fer-ne. O mes pasau presentemos Augua que amorta la set, de Maria José Hernández qui, por un regular, canta en castellano. Hue imos a presentar una canta d’una colla que cantaba (s’han retirau, por si belún no lo sabe) en catalán: Los Draps. Ista colla aragonesa d’o Matarranya ha feito bell par de cantas en aragonés en colaboración con a colla que levamos ascuitando tot lo programa: Prau, y ista ye o sobrebueno resultau Entalto lo pueblo d’o disco “No mos fareu callar”” de Los Draps.

martes, 23 de octubre de 2012

Adoptar un atro fuso horario

Traducción de l’articlo “Una altra vegada a la taula: Deixar l’horari feixista de Berlín i adoptar el fus horari local” publicau en Sirius.


A ideya no ye nueva, pero cada vegada que Núria Chinchilla, profesora d’o departamento Dirección de Personas en as Organizacions y directora d’o Centro Internacional Treball i Familia de l’IESE Business School lo explica, o debat rebilca. En poquetas parolas, a suya proposa se basa en que Espanya adopte l’horario de Gran Bretanya y Portugal, tal y como le correspondería por a suya situación respecto a lo meridiano de Greenwich y deixar l’horario que o castrau y subnormal Franco nos va a colocar seguntes a hora de Berlín y d’o suyo tamién impotent y oligofrenico führer.

Pero, ¿ye posible aliniar-se con l’horario britanico? “Prou que sí, de feito estió l’horario espanyol dende 1884, anyo a on que se celebró una conferencia internacional a on que se alcordó que o meridiano de Greenwich sería o de referencia ta establir o diya universal”, sinyala Chinchilla. Pero iste fuso horario se modificó o 1942, quan a Espanya de Franco decidió meter-se en o fuso horario d’Europa central por o suyo refirme a l’Alemanya de Hitler, como se recontó en o VII congreso nacional ta racionalizar os horarios espanyols celebrau ista semana [8-14 d’octobre] en Madrid y a on que participoron 200 personas d’o mundo economico, meyatico, politico, sindical, social y d’a sociedat civil.

Por ixo, y encara que o meridiano de Greenwich pasa por Castellón, Espanya tien l’horario de países tan aluenyaus como Suecia, Dinamarca, Alemanya u Chequia y nos rechimos por unas horas aluenyadas d’a solar, de traza que en Valencia bi ha una hora d’esferencia respecto a la que le pertocaría d’hibierno y dos d’estiu, y que en Galicia plegue a haber-ie dica dos horas d’hibierno y tres d’estiu.

Ixo tien conseqüencias penibles t’o normal desembolique d’a vida d’os espanyols, más que más, laboral. ¿Por qué? “Porque si chentamos entre las dos y as tres d’a tardi y imos a dormir entre as 21 y as 22, habríanos de prencipiar a treballar entre as 10 y as 11. Ixo sería lo más lochico. Pero no lo femos, sino que nos devantamos luego, prolargando o maitin de traza eterna dando como resultau una chornada inrematable”, sinyala a profesora de l’IESE.

O resultau d’ista situación ye bien conoixiu: chornadas laborals que no tienen fin, que imposibilitan que o ciudadan pueda tener una vida dillá d’o treballo, que le fa anguniar y le cremay que, sobre tot, no se traduz en un beneficio t’a interpresa, de revés. Preba d’ixo ye a baixa productividat d’as interpresas espanyolas, como repiten terne que terne os estudios internacionals.

¿Qual ye a solución? Seguntes Chinchilla, que o Gubierno no modifique o reloch en o venient cambio d’hora d’estiu, 31 de marzo de 2013 “de tal traza que no meteríanos con a hora d’estiu d’Europa Occidental, ¡a nuestra! La mesma que Portugal, Gran Bretanya y Marruecos”, sinyala a profesora Chinchilla. Seguntes os suyos calculos ixo permitiría ganar una hora t’a vida familiar y personal. “Si a ista mida, que tien coste zero, se une l’achiquir d’os tiempos de chentar d’as dos horas d’agora a nomas una, se ganaría muito más... De traza que os espanyols tendrían más tiempos ta ells mesmos, serían más satisfeitos con a suya vida y o suyo treballo, menos stressaus y as intepresas puyarían a suya productividat.

Ista ye a teoría d’ista experta, pero ¿qué’n piensan os interpresarios? Por lo que pareix, a unanimidat ye absoluta en que cal racionalizar os horarios laborals porque son “inhumans” y porque son lastrando a productividat d’as interpresas. Ixo indicoron os ponents d’o debandito congreso, entre qui yeran directivos d’interpresas como La  Caixa, Vueling, Onze, Euskaltel, asinas como representants d'asociacions de mayors (Cecoma), de consumidors (OCU), de grans superficies comercials (Anged ), de minoristas (Cecoma), autonomos (ATA), interpresarios, periodistas (FAPE)... Totz ells afalagoron as avantallas de racionalizar os horarios, incluyiu a tornada ta l’horario de Greenwich, más que más en un inte de crisi.

O interpresario Juan Pablo Lázaro, vicepresident d’a Confederación Espanyola de Chicotas y Meyanas Interpresas (Cepime), lo explica de traza esclatera: “Porque unos horarios racionals, humanos, retienen o talento, permiten a formación d’o treballador, achiquen os costes estructurals d’as interpresas, achiquen l’absentismo, amillora a organización d’a interpresa, ye una buena ferramienta de marketing y, sobre tot, harmonizar os horarios espanyols con os europeus leva un cabidar considerable”. Porque, seguntes Lázaro, os costes interpresarials en Alemanya son un 33 % más baratos que en Espanya por tener uns horarios laborals más compactos.

En a mesma linia se manifestó María José Marinar, presidenta d’a Federación Espanyola d’Interpresarios BPV Spain, qui amostró a suya perplechidat porque, a tamás d’as evidencias y os datos obchetivos, Espanya contina apostando por uns horarios que perchudican esclaterament o país.

Bi metió sobre a mesa bellas cifras que deixan en evidancia a una clase politica, interpresarial y a una sociedat que a tamás d’a reyalidat pareix encerrinada en continar con un fuso horario perchudicial: encara que Espanya ye d’os países a on que más horas se treballan (1.663 horas anyals, frent a las 1.419 d’os alemans, por eixemplo) a suya productividat deixa muito que deseyar. “Un recient informe realizau en 142 países nos mete en o puesto 36. ¿Y queremos estar a ueitena potencia economica d’o mundo?”, se pregunta Marinar.

A presidenta d’a Federación Espanyola d’Interpresarios BPV insiste que se prolarguen en extremo unos horarios, empachando o descanso (os espanyols duermen de meya bells 50 minutos menos que a resta d’europeus) y o mantenimiento d’una vida personal y familiar optima encara que ye contrimostrau que nomas son efectivas “a metat d’as horas adedicada a la faina”, sinyala. “Os estudios charran de que a conciliación puya en un 19% a productividat”, insiste Mainar que reitera como una d’as causas de l’ausencia de mullers en os puestos directivos interpresarials se debe a istos horarios irracionals. “Encara que os datos avalan que a presencia de mullers puya a productividat continamos ignorando a la metat d’a población... ¿Como podemos continar fendo as cosas d’a mesma traza?

Ta Luiz Bolz, director de recursos humans de La Caixa en Madrid, insite que cal revisar os horarios agora más que no nunca ta prebar de salir d’a crisi, porque “se ye primando a presencia debant d’a eficiencia” ¿Como fer-lo? Bolz ye partidario de tornar a o fuso horario de Greenwich, pero tamién “abordar cambios culturals”.

Y debant d’os que puedan amostrar-se criticos sobre o cambio de reloch, Chinchilla fa una zaguer reflexión: “os espanyols somos desfasaus respecto a Europa: quan ells chentan, nusatros treballamos, y viceversa”.

viernes, 19 de octubre de 2012

De Pilars: 11-14 d'octobre


 11 octobre

Prencipiaba a parti más fura d’os Pilars. O zaguer cabo de semana, a on que se da tot lo que’n queda, se recibe a las foranas, se visita a la familia y se queda una escruixinada ta toda la semana venient. Como Arale treballaba y yo ya prencipiaba a estar-me bien canso, pasé a tardi en casa viyendo-me Prometheus que, dimpués d’haber sentiu tantas vegadas que pudiba (u talment chusto por ixo), no me pareixió una mala cinta. No ta tirar codetes, pero se puet viyer.

Más tranquilet me’n baixé a trobar-me con as chents d’Artieda, que baixoron a estar-se por aquí bell ratet y con a resta de buenas chents que yeran por as barras d’o BIC. A las 23:00 prencipiaba o concierto de Rojo Cancionero qui repasoron bells quantos temas de muitos cantautors y bells quantos suyos prou pinchos. Sobrebuena traza d’empecipiar una nueit que apuntaba iba a estar epica. Y en estió. Poco que recontar, porque estió d’ixas nueitz que no fas que charrutiar y apanyar lo mundo con l’uno y con l’atro y capaciando con tot qui te trobas. Rematemos en o Lambrote, que rebutiba y a on que, encara no se guaire bien como, nos chuntemos de quaranta collas d’amigas diferents, barrachando-nos y rematando una rebuena nueit. Arale encara cundió un ratet más con as visitants fatas y asturianoaragoneses que rematoron por casa minchando uegos fritos.

12 octobre

Escruixinadas de tot, nos debantemos chustet ta plegar ta chenta obligatoria d’istos diyas con a familia. A tot estrús chentemos, nos recontemos lo que hebanos viviu y visto en as fiestas y malas que podiemos nos ne tornemos t’o leito a viyer si nos descansabanos bell porquet antis d’a que se nos veniba...

Siempre me deixo un diya de fiestas ta mirar de socializar con amigos de normal-landia (que ye ixa tierra a on no somos todas indepes y/u anticapitalistas) y iste anyo nos chuntemos buena cosa de chent de dos u tres colletas ta ir t’a Fiesta d’a biera que se fa en Val d’Espartera. A verdat ye que quan i fue por primer vegada l’anyo pasau no me atrayeba ni brenca ni meya, pero reblé y bi fué y he de decir que pasé una nueit rebuena. Ista anyada, os mosicos no yeran tan divertius, ni bi heba tantas chetas (u siga, caleba fer más ringleras...) pero con tot y con ixo pasemos una atra sobrebuena nueit entre amigos, ein prosit, juchifrins y a resta de fateras que se fan en ixos puestos. Si nunca no bi sotz estadas y tos fa bien de goi a biera, no tos quedetz sin tastar-lo bella anyada. En salir-ne, como canasticos, marchemos ta casa, no sin fer una aturadeta en un kebab ta que Arale fese esponcha.

13 d’octobre

Prencipiabanos o maitin en as tres pedretas... Un suco y una birosta con mermelada dimpués nos ne baixabanos t’o nuevo local pedalaire que bi ha a on que yera d’antismas Nogara (C / Palafox con C / Gavín). Se i feba un socalce y nos i trobemos con una Jam Session de Txalaparta con o chenio Euchenio y atros compas que acompanyoron a Txalaparta con saxo, donzaina, darbuca y lo que se pillaba por astí. En una d’as paretz, o cartel t’apuntar-se t’o GoldSprint, una corrida en bici estatica a viyer qui feba en menos tiempo 300 metros. Ixo, dimpués de ueito diyas de fiesta be d’estar mortal. Con tot y con ixo bi heba arrienda de chent apuntada. Pena de no haber-lo visto. Dimpués gambadeta con a familia y ta casa que caleba despertar a escape.

Y ye que no viyemos o Goldsprint porque a las 19:00 prencipiaba o Kabaret Dada. Cinco euros por quasi siet horas de mosica, clown, teyatro, vedette, monologos, humor, rock... qué más se puet demandar? Pues un ambient granizo, una borina total, buena cosa d’amigos alto y abaixo d’o scenario, risetas, biera, y una final apoteosica como nomas Dada puet fer-la con a fiesta scientifica!!! Grans Don Nadie, Jorge Asín, Juako Malavirgen, Marian Nadal, Dada... y toda a chent que pasó por astí, que me’n deixo a la metat. Tot isto a tamás d’un chiquet problema en a fonsera que tenié y que fació que me pasase bellas quantas actuacions en l’escusau.

Encara que remató a una hora decent (as 1:30 si fa u no fa), de capazo en capazo, a lo que pleguemos t’as barras d’o BIC yeran zarrando ta pena nuestra. Habiemos de fer-nos una(s) zaguera(s) en un local a on que nos fotiemos buenas risas bailando y prebando de apanyar una maquineta estricallada.

Ta rematar a nueit faciemos a error de dentrar en un bar. En Pilars! Concretament, en a Botica, que ye muito bien, pero rebutiba y quasi no se podeba ni alentar. Ni fotos decents podié fer-ie. Aguantemos lo que podiemos y, dimpués d’una aturadeta en o puesto ixe en a carrera Manifestación que fan panpizzas tan rebuenas y que siempre ye trancau, pleguemos en casa.

14 d’octobre

O día yayo. Ya escruixinadas y sin poder ni alentar, lo unico que quedaba yera fer una gambadeta por os puestos de Gran Vía. Lo de todas as anyadas. A lo menos nos ixoriemos un poquet y rematemos fendo-nos un chicolate con churricos en La Fama (C / Prudencio). Ta cenar nos metiemos Sombras tenebrosas y asinas despidiemos os Pilars dica l’anyada venient. No sé si por que se remataban os Pilars u porque hebanos visto a 14ena versión de Bitelchús (una atraTimburtonada) a Arale le dió una d’as suyas terrors de nueitz y nos fació foter un blinco a Kurt y a moi que ta qué.

A la fin lo he conseguiu. Totz os Pilars cronicaus. Aspero que muestras d’ego como istas no se tornen a repetir en iste blog. Tos deixo con bells videos... Dica os Pilars venients!!!

Rojo Cancionero. Banderas rotas



Txalaparta Jam Session



Dadá y Diego Peña Reggae lechionario




jueves, 11 de octubre de 2012

De Pilars: 8, 9 y 10 d'octobre

 
8 d'octobre
En o diya más heavy marchemos t'o concierto d'Azero, Metalurgica y Iron Maños. En plegar t'o Ternasco chusto yeran empecipiando Azero con Cona repela y nusatras creyendo que yera a prebatina de soniu porque yeran as 19:30 y creyebanos que prencipiaba a las 20:00. Bien se vale que i estiemos antis, porque viyemos o que, en a mia opinión, ye o millor concierto que ha feito Azero en as zaguers anyadas. U que le haiga visto yo, a lo menos. Y ixo que feba una calor ta morir-se. Temazos de totz os discos, que ya'n tienen prous y dedicatorias t'Artieda u t'os miners. Dimpués, Metalurgica y Iron Maños, floixetz... Encara que de los Iron Maños tampoco no'n remero guaire pues, gracias a los mios companyers de l'instituto que me i trobé, me la pillé monumental. En rematar o concierto m'han dito que estiemos por as barras y o Pottoka, pero ixo no tos lo puedo guaranciar....
 

9 d'octobre

Prencipiemos con Nafarroako fendo un buen socalce en El Coscurro y viyendo a exposición que tien Fablans en a Casa d'os Morlans. Muitos recosiros de conciertos y chambretas. De nueitz, decidiemos a la fin d'ir ta Los Artistas del gremio. Ya sé que tanyeba La Ronda, pero en Pilars, con tantisma chent, pasabanos un poco. En o Ternasco de nuevas tornemos a viyer un gran concierto. A charanga d'Os Artistas estió prou divertida en un primer pase que facioron antis de fer un show con artistas d'o rollo de circo. Un mozo con un diavolo fendo de tot, un par de zagalas puyando por unas cintas y fendo figuretas, ... muito espectacular, a verdat. En rematar un atro pase de Los Artistas del gremio, que remató con "churro, media manga, manga entera", ta goi d'Arale. Como a l'atro'l diya caleba amaitinar ta ir t'Artieda, nos faciemos a zaguera en Erzo y t'o leito.

10 d'octobre
Como cuento que ya todas lo hetz leyiu y visto, en Arredol, Arainfo, Heraldo, el Periodico, u Aragón Televisión, no cuento que calga adhibir cosa sobre lo d'Artieda. Bi estiemos, esfendendo con ellas a dignidat d'un pueblo y resistindo-nos a la suya "democracia" que no ye que dar palos a lo pueblo que s'esfiende contra o suyos intreses capitalistas y absurdos.

De tornada ta Zaragoza caleba parar a brenda de Nogara. Bocaus de choriceta, hummus, tortiella de trunfas y bella coseta más ta celebrar de conchunta os Pilars con un(atro) capazo en aragonés. I pasemos un buen ratet charrando d'o que heba pasau de maitins, d'os Pilars y de todas as cosas que imos a fer en iste curso 2012-2013.

Con a plevia heban zarrau as barras d'o BIC, asinas que nos faciemos buena rondeta por Pottoka, A Flama, el Detalle y a barra d'o PCE ta rematar marchando ta casica, que ya no yeran horas y bi heba cansera de tanta faina. Un diya que a fe a fe no ixublidaré nunca... Gracias Artieda





lunes, 8 de octubre de 2012

De Pilars: 6 y 7 d'octobre

Ya voi de dos en dos, pero contino cumplindo.

6 d’octobre

Prometeba estar un d’os diyas más furos de Pilars. Y de furo, no’n estió guaire, pero de divertiu muitismo. Prencipiaba con una chenta en A Enrestida rodiau de amigas y companyeras, fendo-ie buenas risas y tastando sidrica y aranyons casers. Tamién bi habió minicampionatos de chitar por tierra a sidra, morra, aplausos sin sentiu y atras disciplinas que feremos olimpicas en declarar a independencia.

Dimpués d’a obligatoria-en-istos-diyas clucadeta, baixemos t’as barras ta trobar-nos-ie con a chent que iba t’o millor concierto de todas as fiestas: Prau y Los olvidados de la morgue. Dimpués de bella biereta y de pasar por o chino d’o Coso a mercar bragas t’aventar-le-ne a os mozos más sexys de o concierto, pleitiemos por qué camín yera o más curto ta plegar en l’Arena dende a Plaza d’a Madalena: Compromís de Casp, Florentino Ballesteros, carreras ixas d’as Fuents y salir si fa u no fa a l’altura d’o BBK u baixar ent’a Plaza Sant Miguel y tirar tot dreito por Miguel Servet. Nos trestallemos debiu a la manca d’alcuerdo (a cucha siempre igual), y o comando Miguelservetista (p-m) plegó bells segundos antis. Pero a fe a fe que ferían bell zancocho por o camín, porque ye de dar que ye más curto por As Fuents.

O caso ye que bi pleguemos, cenemos en o turco y, bell poquet tardi, prencipioron Los Olvidados de la Morgue (Os ixublidaus d’a morgue) con o suyo conciertazo: versions de La Polla, Parálisis Permanente, Los fresones rebeldes, Tenessee entre atros y, prou que sí, os suyo temas con una versión en aragonés de Sant Chorche buco! y un manifiesto en contra d’o brachiluro. Cutrepunk baturro en esencia y sobrebuena borina. En rematar, pichadica y los Prau sobre o scenario, presentando o nuevo disco que daban con a dentrada de 8 euros (ya podeban aprender atros...). Sonando cada diya millor, engueroron en directo beluns d’os temas d’o nuevo disco sin ixublidar os suyos ya miticos. Divertius, reivindicativos, buena mosica y en aragonés. Poco más se puet demandar-ne...

A nueit tampoco no daba guaire más t’a bodega que portiabanos, asinas que, dimpués d’un ratet por as barras d’o BIC, marchemos ta casa, que ya caleba... Nos quedemos sin viyer o pregón, que me han dito que estió muito bien, no? (modo somarda ON)

7 d’octobre

Como a nueit d’o 6 no remató masiau tardi, encara teniemos rasmias ta fer una gambadeta de maitins. Baixemos a viyer o mercau aragonés. Bi yeran Pepín y Arnao de pasavillas y un fascal de puestos ta minchar y mercar artesanía. Entre atros, o Choripan (bien de carnaca bien), a pinchería (u como fer un sobrebuen negocio con a ideya más chorra d’o mundo) y la Pijería como podríanos clamar a o puesto ixe que bi ha a la fin, que bi ha vin ta tastar y se i vende “alfayas d’a garnacha” (atiende, amante!).

En indo por o mercau nos quedemos enlucernaus d’a cantidat de tocineras d’a poli espanyola que bi heba por tot. Y ye que, no sé como lo hebanos ixublidau, yera l’acto ixe d’a Guardia Civil que le daban un sinyal d’Espanya de 5000 euros (qui lo ha teixiu, Dolce & Gabanna?) a la virchen u no se qué. Que foticos que nos ha deixau l’acto d’a nuestra presidenta, eh? Que leyal que ye a ciudat de Zaragoza! A glarimeta se me cayeba por tot d’a emoción! Teniemos susto gran quan sintiemos dende a carrea Alifonso o Vivaspanya Vivalrei que chilo o que feba o discurso y decidiemos de pasar un ratet viyendo a unos mozos fer movidas de break dance. Muito mahos os zagals, que diz que son d’a mesma especie que yo, pero o mio cuerpo no ye asinas, ni parellano. De tornada ta casa capazos en La Tranquera, que ha tornau a ubrir y en as barras d’o BIC, a on que yera toda l’alicatalla buena.

De tardes tocaba fer o viello, porque ya no plegabanos t’a mani antitaurina. Gambadetas por o centro, a on yera a rebutir de tocineras por a debandita mani (en contemos siet). Viyemos o “trusqueninos” a on que nos dicioron que caleba fer una hora de ringlera t’aventar a un nino por un esbarizaculos tuneau (que guarda si no bi’n ha en totz os parque de Zaragoza!). Dimpués a poli, que cundió muito, le demandó os papels a uns zagalotz que yeran fendo un show en a Plaza Aragón y visita t’as “casas rechionals”, o ternasco y La Otra a on que rematemos a tardi pues me feban mal os uellos por as lentetas y o lunes caleba treballar. Tardi de viellas ta una viella como yo. Ai, con lo que yo yera!

Sant Chorche buco!


Street flow blincando

sábado, 6 de octubre de 2012

De Pilars: 5 d'octobre

Poca coseta que recontar d'ahiere. Teneba a ideya de ir t'o ternasco a viyer l'homenache a Mas Birras, pero charrin charrran me quedé capaziando en as barras d'o BIC, que ubrioron por primer diya d'os diez que se i foterán... Miedo me fa!

Asinas que no facié cosa que charrar, apanyar lo mundo, meter-me a o diya con a chent que feba tiempos que no viyeba y zorriar como si no bi hese un maitin. Y lo bien que se ye zorriando en a carrera! Que yo no sé porque me fa tanto goi, pero ye ciento vegadas millor que fer-lo en un bar. Cenica en o Manisero, bar que recomiendo a tot lo mundo: ye en a carrera mayor a o canto d'o Meli Melo, chusto en pasar Sant Vicent de Paul, y fan entropans, pinchos y toda mena que virolla recia. Sonero s'alimenta quasi nomas d'as suyas almondigas...

Y como una ratica, me'n torné ta casa, que ya caleba....

Hue Prau presenta o suyo nuevo disco tanyendo en l'Arena con Los Olvidados de la morgue (cutrepunk baturro a tope!), asinas que la nueit se ye parando fura-fura. Y tamién ye o pregón. Creigo.

Tos deixo con a canta que charra de lo millor que se puet fer en istas fiestas. O video ye horrible, pero no'n he trobau garra atro millor.... Felices fiestas!


viernes, 5 de octubre de 2012

De Pilars: 4 d'octobre

Me reto a yo mesmo, con a seguridat plena de que no cumpliré, a fer una dentrada cada diya de Pilars contando lo que haiga feito u lo que m’agane d’ixe diya. Asinas que prencipio con a cronica d’o 4 d’octobre, dos diyas antis d’o Pilar oficial. Pero como siempre digo, os Pilars son un estau mental, no pas unas fiestas....
4 d’octobre

Dimpués de treballar y d’una reunión ta ir parando bellas actividatz que publicitaré quan pertoque, marché t’o concierto de China Chan y Comando Cucaracha en a carpa d’o Ternasco d’Aragón. Me paraba t’o primer concierto de Pilars con un par de latas de 50 cl de Aurum y un fascal de cartels en a mochila. En plegar-ie me trobé con a carpa a rebutir de chent y una calorina aintro que ta qué.
As dos collas tanyon cantas nuevas, que ya’n teneba de ganas yo. En a parti final d’o concierto quedó esclatero que, encara que no yera anunciau bi heba una tercer colla en o cartel: Ixo Rai!. Primer Juanito y dimpués Jota i puyoron a cantar con os cucarachers y a la fin remató lo concierto con intes prou especials, con todas as mosicas en o scenario y buena cosa d’emoción. No faltoron os chilos contra o recreiximiento de Yesa en cantas como Isla Aneto, as versions de Labordeta, as gaitas y chuflainas, a pancarta d'a Marea Verda ni o sinyal (d’os oficials, ixo sí) d’Aragón ondiando.

Me trucó lo ficacio a cantidat de chent que bi heba, y más que más de chovens... Antiparti de as de siempre, prou que sí, bi heba muita chent que no sé a on pega en a resta de l’anyada (bienplegadas sigan),  participando en o concierto de traza bien activa y con chambretas “d’o palo”. Mesmo i viyé a uno con una chambreta de l’Aplec dels ports hiper pincha.

Como a l’atro’l diya treballaba, habiemos de marchar ta casa, con bella biereta de más, pero sin fer cullebretas encara. Parabiens a los cucarachinachaners por a borina que montetz!


jueves, 4 de octubre de 2012

L'aragonés ye bien vivo (setiembre 2012)

Talment bella lectora no sabe qui soi. Talment queda beluna que me conoixca en a vida real y no pas en a virtual y de revés. Antismas prebaba de deseparar-lo y amagar-lo, pero creigo que cada vegada tien menos sentiu. Asinas que voi a confesar ta ixa hipotetica lectora que no sabe qui soi, que tamién foi una chicota sección en La Enredadera de Radio Topo una vegada a lo menos. En ixa sección, que se diz “L’aragonés ye bien vivo” charro de l’aragonés y d’as zaguers noticias y, a partir d’iste curso, tamién pencharé os contenius en iste blog.

Remerando d’a on venimos
Torna "L’aragonés ye bien vivo" asperando poder decir-lo mientres muitas anyadas pues bi ha belunas encerrinadas en que s’amorte.
Remeremos que prencipiabanos lo verano con l’anuncio de l’abantprochecto de reforma d’a lei de luengas de man de Dolores Serrat (PP, catalanofablant materna)y Javier Callizo (PAR, aragonesofablant materno). En iste abantprochecto, os timidos trangos enta debant que s’heban feito con a lei aprebada por PSOE - CHA, se tiraban enta abaixo. Toda a parti d’as academias y de l’autoridat lingüistica de l’aragonés s’esborra u s’esbafa y antimás se deixa de reconoixer-se a realidat trilingüe d’Aragón, unindo-se a las tesis a-scientificas d’a FACAO, a PNHC y a extrema dreita en cheneral. Aragonés y catalán pasan a estar, ta lo gubierno d’Aragón, uns parlaches sin reconoiximiento y mesmo sin nombre, convertindo Aragón en una singularidat mundial cuanto a lo suyo comportamiento sociolingüistico. L’unico país a on que en cada lugar se charra una luenga diferent. A no estar que charres castellano, que tien una unidat indisoluble y indiscutible.
O 29 de setiembre se continó fendo publico o refús de muitas personas a ista mida. En Fraga a Coordinadera Aragón Trilingüe, que rebilca dimpués de qualques anyadas sondormida, fació publico un manifiesto ubierto ta tot qui quiera refirmar-lo. O manifiesto lo puetz leyer en Arredol.

Ufierta de cursos d'aragonés
En l’atro cabo, i somos a chent que no reblamos, que queremos protecher iste patrimonio de todas as aragonesas y de toda a humanidat. Y qué millor traza de fer-lo que aprender ista luenga en qualsiquier d’as escuelas que l’amuestran y fer-la servir de contino. Tenetz toda la info en un nuevo blog que ha naixiu fa poco: cursosdaragones.blogspot.com. Pero antimás tos lo resumo bell poquet contino:

Nogara:Cursos presencials y online. Horarios a esleixir. T’apuntar-se-ie en A Flama (C / Mayor, 53), en a siede de Plaza Asso s/n, Zaragoza, os miercols de 19 a 21 y por mail en asoziazion@nogara-religada.org.

Fablans: Cursos de toda mena. Escribir a amostranza.zgz@fablans.org u gritar a 976 231 299 (contestador) u a 692 637 391 en horario comercial.

O trango:Curso viernes de 19:00 a 21:00 en a Casa de Chovenalla d’o Centro Civico Universidat (Zaragoza). Pre 10 euros. T’apuntar-se-ie, en Casa de Chovenalla Universidat cjuniversidad@gmail.com, 976559052. + info en: http://otrango.blogspot.com.es/

UPZ: (Encara que en o programa charré d’os cursos, dimpués m’han confirmau que no se’n impartirá garra en no haber-se-ie apuntau prou chent)

Consello d’a Fabla: Curso impartiu por Chuse Inazio Nabarro os lunes y miercols a las 20:00 dende o 15 d’octobre. As clases de ferán en a siede de l’asociación en l’Avenida d’os Danzants, 34 de Uesca.

Diploma d’especialización en filolochia aragonesa:
Endrezau ta titulaus universitarios.+ Info en: Facultad de Ciencias Humanas y de la Educación C/ Valentín Carderera, 4. 22003, Uesca.Tel. de Secretaría: 974 239350 E-mail: umanh@unizar.es, fnagore@unizar.es

Cabo d’anyo d’Arredol
O 19 de setiembre fació una anyada que va naixer Arredol, o primer meyo (alto u baixo) de información cheneralista de raso en aragonés. Más de 1000 articlos y bellas 10.000 visitas a o mes. Se i ha charrau de tot: dende as fiestas d’o Pilar dica as expropiacions d’Artieda, o debat d’as Cortes sobre l’estau d’Aragón, noticias d’astronomía, de todas as cantonadas d’Aragón, u os torneus de Ping pong y con a colaboración d’os zagalons que fan Cados Radio y de muitas opinadoras y columnistas que i escriben de cabo ta quan. A zaguer incorporación estió a de Ruben Hervás como vinyetista. Y dende Arredol nos remeran que ye una finestra ubierta ta todas y totz y demandan a colaboración de todas as aragonesofablans y d’as que no’n sigan tamién. Invia las tuyas noticias u fotos ta redaccion@arredol.com y si quiers que publiquen qualcosa no dubdes en decir-les-ne. Y si no sabes aragonés, te traducen la noticia.

Cabo d’anyo y Exposición Fablans
Fablans fa 30 anyadas y lo celebra con arrienda d’actos que se prolargarán mientres tot l’anyo. Prencipioron o pasau 24 de setiembre con a debantadera d’una exposición en a Casa d’os Morlans (CIPAJ) y una charrada de Fernando Romanos sobre a fundación de l’asociación. Continó o diya 1 Chusé Aragüés charrando sobre as primers ayadas y rematará Ricardo Párraga o diya 20 con una charrada titolada: “Esnavesada pirinenca ta esfender o Pirineu”. A exposición de cartels, chambretas, pegallos y materials de toda mena bi continará dica o 20 d’octobre.

Nuevo CD de Prau
Ya tenemos nuevo disco de Prau que tantos yeranos asperando. Se diz “Os pietz en a tierra” y se presentará o venient sabado diya 6 en la sala Arena Rock en un concierto de conchunta con Los olvidados de la Morgue. Ta calentar-nos o morro nos han feito un video muito pincho a on que se fan a mofla d’os modernos charrando en anglés y dicindo que han grabau en Nueva York entre que los doblan a l’aragonés y meten imachens de Zaragoza. No te lo pierdas. En o concierto, de conchunta con a dentrada te dan o disco.por nomas 8 euros.

Fe una canta en aragonés
Dende a sección de La Enredadera “L’aragonés ye bien vivo” queremos proposar-tos bella cosa. L’anyada pasada, a la fin de cada sección, presentabanos una luenga minorizata y una colla de mosica que la feba servir. Ista anyada tamién feremos servir a mosica, pero nos centraremos en l’aragonés. L’obchetivo: que bella colla u mosico que nos ascuite faiga una canta en aragonés. No cal que se sepa aragonés. Si quiers que te faigamos l’adaptación d’una letra no te cal que inviar-la ta laenredadera@nodo50.org u ta tierradebarrenaus@gmail.com y te la tornaremos traducida malas que podamos. Y ta meter eixemplos, mientres iste curso de “L’aragonés ye bien vivo”, a la fin de cada sección, presentaremos una canta de una colla que, por un regular, canta en castellano, pero que ha feito una canta en aragonés. Son más que no’n pareix.!!! Prencipiamos o curso con Augua que amorta a set de María José Hernández.

Ta ascuitar a sección, y tot lo programa, puetz fer-lo punchando aquí mesmo.