Torno a treballar

Engancho. S’acabó las vacacions. Lo verano deixa de tener los suyos significaus positivos. Ya no bi habrá mar ni viaches ni rius ni cursas. Ni siestas eternas ni largas sesions de lectura. Ni galbaniar por galbaniar. Como muito, bel cabo de semana una escapadeta a tot meter.

Los días d’antes, milenta plans. Belún de bueno. Empecipia nuevo curso y me foi los propositos de cada anyo. Mas calma mental. Minchar millor. Pior ye dificil. Ordenar-me la vida. No encarranyar-me cuan me la desordenen. Escribir tal, cual y Pascual. Promocionar millor los libros. Levar Mas que catorce por los lugars d’Aragón. Decidir qué fer con os míos tiempos de militancia. Baixar tiempos correndo en gudrón. Puyar desnivels en trail.

La resta, lo malo. Me foi la mochila pa la chornada d’o lunes. L’achenda, un cuadernet, bolis y un libro pa los ratos d’asperar. Lo pocillo pa los tes que me foi porque soi mirando de no beber tanto café. Reviso la bici. Torno a meter-le la cesteta, que le’n heba sacau pa calar-le alforchas y marchar de cicloturismo por Euskal Herria. Puyo lo sillín, comprebo ruedas. Son una mica floixas. Quito de l’almario la ropa de vistir pa treballar. Lo compromís entre comodidat y no pareixer un hippie como de cutio. Una d’as mierdas de tener una fayena cara a o publico. Ficar las claus d’o treballo en o clavero. Guarda si pesan.

De nueits, soniadera. Ye cuasi un rito. Suenio que la chefa me jode, que fa cambios absurdos, mesmo que tornando ta casa m’esconyo con a bici en ixe cruce que no respeta ni Blas. Sisquiá no siga una premonición. Si leyes isto, soi bien. Me dispierto anguniau. Por ixo escribié Tronus. A falta d’espritos y sers misticos, que me receten cualcosa pa las soniaderas, por favor. Pa no tener-ne u pa no recordar-las, igual me tien.

La ciudat encara no ha preso velocidat. Ha de quedar manyos por Salou pues. Los tramvías no levan estudiants t’a universidat. La oficina sigue cuasi igual. M’aguardan las mesmas fuellas de calculo, lo correu a rebutir de mensaches demandando información. Sé que m’estaré cuasi toda la chornada respondendo-los. Enchego la radio con as noticias. Qué bien viviba en a ignorancia, sin enterar-me de cosa. Ayuso diz ayusadas y Azcón, azconadas. “No pasa nada, tenemos azconadas” como lema pepero pa la campanya a Cortes d’aquí a ¿cuatre? anyos. Fico meyo euro en a maquina. Lo primer y lo zaguer café d’o día. Jus de chaussette. Vai, no soi guaire exichent, con que me dispierte bella mica, prou.

De tardes, la vida torna a estar de yo. He de fer bel mandau y mercar birolla pa la resta d’a semana, que m’habré de quedar a chentar en a fayena. La resta, libre. No me decido si invertir ixe tiempo en escribir u en entrenar. Tiengo una novela que acabar. Sí, unatra. Tardará muito a publicar-se si ye que consigo acabar-la. Redios que tocho me soi fotendo. Ya i pensaré en o treballo.

Acabaré lo día con Arale. Lo millor d'a chornada. Un ratet de tele, una buena charradeta y a nonón. Sisquiá no tienga soniaderas ista nueit tamién.

Tu mal, nusatros bien. Foi mimimi (01)

La luenga ye la manera que tenemos de transmitir lo nuestro pensamiento. Lo conscient y tamién lo inconscient. Asinas que, d’o que se diz, podemos conseguir a sobén información que qui charra no tien la intención de dar. Por eixemplo, la responsabilidat sobre una acción. Hue empecipio ista sección «Mimimi» —que talment tamién remate hue— an que faré mimimi.

Diz lo treballador A a lo treballador B, deixando-le una nota porque treballan a daria y no se troban: «A Fuleno le pasés mal lo presupuesto y ha pagau trenta euros menos. ¿Le demandamos las perras?».

La clau ye en cómo l’emplego d’os suchetos —elipticos— refleixa la concepción d’o treballo en equipo y la responsabilidat compartida. Será que soi un comunista u simplament un buen companyer, pero cuan se fa una error en un equipo siempre foi servir l’impersonal «se l’ha pasau mal lo presupuesto» u la primer d’o plural «l’hemos pasau mal lo presupuesto», encara que sepa quí le’n ha pasau. Bella vegada me pasará a yo, bella vegada a otri. Y si i hai cualcún que la caga de contino, pues se le diz. Atro día charraremos de cómo.

Se podría defender que lo treballador A no tien garra razón pa acumular-se las culpas d’ixe incompetent que ha pasau malament lo presupuesto y que mesmo ye bueno sinyalar quí ha feito la error. Sería un buen argumento si no fuese por la segunda parte, cuan de botivoleyo, ixa falta personal troba una solución colectiva: «¿Le demandamos (nusatros, l’equipo) las perras?». No pas «¿Le demando las perras (y apanyo la tuya cagada)?» ni «¿Le demandas las perras (y te minchas la engulema)?». Si antimás, lo treballador A sabe que se trobará la debantdita engulema solucionada cuan i torne—en un u atro sentiu, ixo rai—, la frasecica ye bien sinyalera d’ixa manera de pensar, rapeda en espolsar-se culpas y que s’apunta de camín a compartir los exitos.

Lo treballador A no ha feito cosa. Ni la error ni la solución. Nomás una pregunta escrita en una nota, un pensamiento, una reflexión, un pareixer, un interrogant, una inquietut, pero si cualcún se i interesase —lo chefe, por eixemplo— barrunto un informe que diría: «lo treballador B pasó mal un presupuesto, pero ya l’hemos solucionau».

Días dimpués d’aquel contornillo, lo mozo no ha pagau los trenta euros tot y que ixe mesmo día se le demandoron los diners. Lo treballador B rezó tres avemarias pa no tornar a pasar un presupuesto mal. Lo treballador A ye satisfeito por lo deber cumpliu. Lo sistema carrula y yo foi mimimi.

Treballar, ¿pa qué? 3. Vida furtada

Empecipié ista serie de posts con unas declaracions de Yolanda Díaz sobre la identidat laboral. Astí aclariba que treballamos pa vivir y no pas de revés. Lo siguié con un articlo sobre lo teatret que a sobén nos toca de fer, sobre tot en oficinas, porque la chornada ye de cuaranta horas tot y que la fayena pueda fer-se en muito menos tiempo. I feba referencia, en toz dos, a la nueva lechilación archentina, que implementa condicions draconianas pa las treballadoras d’ixe país. Y hue me devanto con unatra noticia sobre un posible futuro laboral que, si no nos ne guardamos, nos tocará de patir.

La protagonista ye una zagala d’Estaus Unius de vintiún anyos, una treballadora de banca que fichó una interpresa de fusions y adquisicions. Kathryn, que asinas se diz, teneba diagnosticada ansiedat y fació un achuste con os suyos chefes: le respetarían nueu horas de descanso pa dormir-ne ueito a truca d’estar disponible las atras quince d’o día, toda la semana, de luns a domingo. Bella semana dimpués de l’achuste la interpresa miró de fer-la fuera porque les pareixeba que ixa disponibilidat no’n yera prou. La cosa acabó en chuicio y s’ha resuelto con un acuerdo economico. 

Diz que ye cutiano en ixe sector, lo d’a banca, disponibilidat 24/7 y chornadas eternas. A los mainates no les pareixeba prou que «nomás» fuese quince horas disponible cada día. Ye decir que vivise pa treballar, sin sisquiá poder dormir como cal. Que ixo s'haiga normalizau, que siga debatible, ye la mayor victoria d'o capitalismo. 

En l’atro cabo d’a escala laboral, a on que no se gana garra chanflonada, i ye lo cambreramen. Manimenos, las exichencias horarias son parellanas y la patronal mesmo se’n fa argüellosa. Remeremos cómo normalizaba José Luis Yzuel, president d’os hostelers, las 12 horas con aquella chanza cunyada de «toda la vida en hostelería, meya chornada: de doce a doce». En o mesmo negocio, Jordi Cruz, presentador de Master Chef en Perro TV, defendeba que fer catorce horas d’una tongada yera «cualcosa bonica».

Con referents asinas, la consecuencia lochica de veyer la vida (la d'otri, no pas la de qui lechisla) como una serie de chornadas a l’arreu, sin garra atra actividat que minchar y dormir lo chusto pa enganchar a l’atro’l día, ye la debantdita lechislación archentina, la d’as doce horas de chornada laboral con que aquel Secretario de treballo se preguntaba ¿pa qué querebanos fer-ne menos? U la manca de regulación laboral d’os yankees que por cada día va a mas.

Las personas que viven pa treballar y no l’han eslechiu son arrienda. En agricultura y hostelería las cuaranta horas semanals son minoritarias. Las condicions laborals en ixos sectors y en muitas interpresas d’atros, se pasan por l’arco d’o triunfo toda la lechislación laboral. La inspección laboral no adube. Los chueces y la mayoría d’os politicos protechen lo sistema. Nomás cal veyer como trató Azcón a FCC dimpués de que Zaragoza en Común y Cubero deixasen visteras las malas practicas d’a interpresa y les fotesen bella pinyora.

Ixa semiesclavitut que, de feito, ya se permite por istas tierras, quieren levar-la a toda la clase treballadora. Vulcar los pocos controls que i hai. Tener-nos ocupaus tot lo día, que no podamos vivir y muito menos organizar-nos. Y no ye cualcosa que yo barrunte porque soi un chenial analista politico. Lo dicen claro y raso. No fa tanto d’aquella declaración d’Abascal en Libertad Digital: «Quiero que los espanyols sepan que si podemos fer-lo en solitario somos disposaus a fer las cosas punto por agulla como las son fendo en Estaus Unius y como las son fendo en Archentina». Avisadas somos.

Treballar ¿pa qué? 2: La historia d'os americanos

En o post d’ahiere, lo Secretario de Treballo archentino se preguntaba pa qué querebanos treballar menos, sin trobar-le sentiu ni utilidat a las nuestras actividaz extralaborals. Pero ¿cuántas vegadas nos hemos preguntau qué hostias febanos en o treballo?

Empecipiaré con una chanada, que ixo gosa fer goyo. 

En as practicas de FP, que como cuasi todas no teneba mica a veyer con lo que hebanos aprendiu los dos anyos d’antes, un d’os treballos que estié fendo por bel mes yera montar u modificar ordinadors. Nos veniban palets de maquinas, les cambiabanos u anyadibanos components, talment instalabanos bel software y los re-empaquetabanos con destín a qué me sé yo a ón. Por un regular tenebanos fayena arrienda. Pocos días febanos menos de diez horas de chornada, chentabanos en o treballo y acababanos escamallaus. Pero de cabo ta cuan, no entraba material. Ixos días febanos fayenas de control u, si l'encargau no heba veniu, montabanos corridas de traspaleta por la nau u nos posabanos en bella caixa y simplament charrutiabanos dica que arribase bel mandau. Un d’ixos días vinioron «los americans», que cuento que serían los que pagaban aquello. No tenebanos mica fayena a fer. L’encargau, que se foteba horas y horas chugando a lo solitario de l’ordinador, yera que no sabeba qué fer. Le caleba impresionar a «los americans» y a lo parient que le heba colocau en ixe puesto. Asinas que nos dició de desfer un d’os palets que hebanos montau lo día d’antes y que, mientras «los americans» feban la gambadeta por la nuestra parte, metesenos y quitasenos bel component de l’ordinador que tenesenos debant. Estió poco rato. Bels vinte minutos a on que l’encargau explicaba, con o suyo anglés de academia barateta de finals d’os novanta, cómo treballabanos y a on que me vagó de montar y desmontar cuantas vegadas los dos discos duros d’un servidor entre risetas y complicidat de toda la plantilla.

Ixe momento l’he remerau un ciento de vegadas dimpués en a mía vida laboral. En toz los treballos que he teniu i hai momentos que «vienen los americanos», ye decir, que no tiens fayena, ni brenca ni meya, pero que has de fer como que sí porque ye mal visto reconoixer que no i hai treballo. Porque encargaus y chefes no pueden aguantar que te descanses u t'adediques a las cosas tuyas en horario laboral cuan no i hai labor que fer. 

Pende muito d’as caracteristicas d’o puesto, ye claro, pero ixe fenomeno ye bien común. La pandemia, que obligó a tanta chent a teletreballar, sin que los chefes podesen cusirar la fayena, deixó claro pa muitas que los quefers en que ocupamos ueito horas, a sobén se pueden ventilar en muito menos tiempo. Que sin controls, la mayoría de treballadoras no nomás cumplimos, sino que lo femos mas contentas y en menos tiempo.

¿Cuántas rutinas absurdas? ¿Cuántas reunions que podrían haber-se solucionau con un mail? ¿Cuánta papelamenta sin sentiu? ¿Cuántas horas de mover mouses, de emplir caixetas d'excel pa vuedar-las dimpués, de scrollear pdfs fendo como si los leyeses? ¿Cuántas horas malfurriadas nomás pa que lo caporal se sienta realizau?

«¿Qué conyo foi aquí?» ye cualcosa que m’he preguntau a saber-las vegadas. Calentar siellas ye un d’os quefers que mantiene la chornada laboral en ixas malditas cuaranta horas que muitos treballos no amenistan. Asinas que la mía pregunta pa lo carnuz archentino sería «treballar cuaranta horas semanals, ¿pa qué? Enganchar a las nosecuantas d’o maitín ¿pa fer qué? ¿Pa que nos veigan los americanos?».

Treballar ¿pa qué?

Habe si fa u no fa un anyo, Yolanda Díaz fació una rueda de prensa sobre la desconexión dichital. Astí, con un tono prou —talment masiau— pedagochico aclariba «No vivimos pa treballar. Treballamos pa vivir». Pareixería tan evident que no caldría explicar-lo, pero ya sabemos que no ye asinas. Anyadiba dimpués una reflexión que me pareixe bien interesant:

«Lo treballo (...) nos define tanto (...) que nos definimos a traviés d’a nuestra profesión: yo soi avogada, vustés son periodistas. Cuan, lochicament, lo important son as nuestras vidas. No’n ye lo tiempo que ocupamos en una actividat profesional».

No puedo estar-ie mas d’acuerdo. Pero me temo que ixo no ye tan cheneralizable como nos faría goyo.

D’o ciento de napas d’identidat que tenemos todas, la laboral no deixa d’estar-ne una, y de bien important. No pas en o caso mío, por eixemplo. A la pregunta «¿qué yes?» nunca no respondería, de manera espontania, «administrativo». Ni sisquiera «inchenier», que ye la titulación academia que tiengo. La mía profesión, en no tener mica vocación, nunca no m’ha definiu. Pero sí a muitas personas. A la fin pasamos la mayor parte d’o día en a nuestra fayena y ixo nos influye queramos u no.

Regular que en conoixez, de chent que se define a traviés d’o treballo suyo. Mesmo puet estar que sigaz una d’ixas personas, que la suya identidat principal ye la suya profesión. Y ixo no ye malo per sé. Lo topico diz que qui treballa en lo que le fa goyo, ye como si no treballase. Pero mesmo lo mas apasionau por la suya fayena, lo mas vocacional, tendrá días que no le agane, que siga murria u malauda u cansa y que, manimenos, no le quede atra que enganchar pa pagar las facturas.

Atro caso son qui, vocacionals u no pas, acaban tan adictas a lo suyo treballo, tan alienadas, que se torna la suya vida. Las suyas relacions socials chiran arredol d’a oficina, la suya conversa no conoixe atro tema, tot lo que pasa dillá d’a chornada laboral no tien mica importancia. Talment porque a pur d’horas no conciben atra manera de vivir. Talment porque l’alternativa, la suya vida no laboral, ye mesmo pior. Lo caso ye que la suya identidat ye nomás la laboral. Son avogadas u periodistas, en l’eixemplo d’a ministra, y nomás ixo.

Que cadaún viva la suya identidat como quiera. Por misteriosos que se me faigan los mecanismos, no he d’entender-los, nomás respetar-los. De vez, caldría que ixo se fese de revés y que se respetase y protechese legalment a la mayoría amplisma de chent que no tenemos la nuestra identidat laboral como principal u que dreitament, no’n tenemos, d’ixa identidat. Los que treballamos pa vivir y nomás pa vivir. Y no queremos adedicar-le-ie ni un solo minuto mas d’o que calga pa la nuestra supervivencia.

En l’atro cabo de Yolanda Díaz, tanto cheograficament como politica, i ye Julio Cordero, lo Secretario de Treballo d’o gubierno archentino. En rueda de prensa sobre la nueva lechislación laboral que meteba midas esclavistas se preguntaba:

«Vusté quier treballar menos ¿pa qué? ¿pa ir difuera a fer qué?»

U ye un actor de pistón u planteyaba la pregunta, en veras, como un enigma indescifrable. Se feba cruces de que cualcún podese tener una vida difuera d’o treballo. Descansar-se, tener vida cultural u familiar, relacions socials… ¡conye, mesmo consumir pa seguir fendo chirar la maquinaria capitalista que le ha levau ta ixe puesto!: tot ixo no entra en o suyo tozuel de fanatico d’a superstición neoliberal.

Si no fuese porque tien responsabilidaz, porque ixe pensamiento joderá la vida de millons d’archentinas, porque aquí tenemos chent que opina lo mesmo con posibilidaz de gubernar (u gubernando), sentiría pena. Pena de que cualcún pueda tener lo cerebro tan esmarchinau, tan incapable de veyer las realidaz a lo suyo arredol, d’empatizar con a immensa mayoría de personas que nomás treballamos pa vivir.

U talment sí que siga un buen actor y l’entienda perfectament y se toque las bolas tot lo día y no siga adicto a lo treballo y lo que quier, precisament, ye que la resta treballemos d’estrela a estrela pa mantener lo suyo status.

Queixar-se como cal

Escribiba fa uns días sobre los bancos y las queixas que, como usuarias, habríanos de fer-les. Remataba lo post fendo un friendly reminder de que, encara que ye chusto que te queixes por un mal servicio, siempre cal parar cuenta de que yes parlando, por un regular, con una companyera de clase, una treballadora, que no va a heredar lo banco, que no ha decidiu meter-te ixa comisión u que no puedas ingresar diners que los martes impars de luna en mingua y que no gosa poder fer cosa pa cambiar-lo que puyar la queixa a una persona a qui nunca no conoixerás.

En lo mío treballo, entre atras funcions, tiengo la de recibir las queixas d’as usuarias. Beluna mas razonada, belatra mas concietera y unas poquetas sin mica razón. He de decir que, la mayoría d’as vegadas, las queixas son razonables y la chent educada y que, charrín-charrand, tot se puet solucionar. Pasa a sobén que soi d’alcuerdo con la posición d’a clienta en contra d’a interpresa a on que treballo pero que, en no estar la decisión en las mías mans, no me queda atra que fer un protocolario «paso la queixa a dirección» y asperar unas horas pa decir-le por mail u whatsapp lo mesmo que le he explicau ya en persona u por telefono.

I hai un zaguer grupo, bien se vale que a saber que minoritario, de carnuzas que vienen a solucionar los suyos problemas mentals u vitals t’as fayenas d’otri. Dende lo primer momento amuestran una total falta de modos, t’explican cómo fer lo treballo tuyo y te menazan con un ciento de cosas d’as quals sabes que no pueden u no s’atrivirán a fer. Lo millor, si no quiers que lo suyo vereno te chupeixca, ye deixar-les charrar. No quieren solucionar lo suyo problema. Se la bufa lo suyo problema. Quieren chilar-te, contrimostrar la suya posición de poder, sentir-se superiors a belatro por un momento en la suya vida. Asinas que ascuito las suyas faltadas, anyado la información que calga, les digo que prengo nota y poco mas. Quan se cansan, torno t’a fayena y tal día en fará un anyo. Plegar a tener ista actitut me costó un tiempo, ya que antes, como muitas atras, he pasau por las fases de prebar de fer-les venir a plego, de solucionar lo problema suyo a pesar d'os malos modos u mesmo de desfender los intreses d'a interpresas y las suyas normas tot y que no en siga d'alcuerdo.

D’ixa falta de respecto a lo treballo d’otri, d’ixa mala manera d’entender la chusta queixa por un servicio mal recibiu, n’i ha habiu dos eixemplos bien caboliosos en zagueras. L’un, lo de l’ababol pixauto que se metió a grabar a un cambrer d’un kebab pa queixar-se de fateras, fendo-le chantache con que lo yera retransmitindo en directo por lo suyo TikTok. Pa que yo recuperase la fe en la humanidat, y porque a lo zagal se le veye que ye un carafiemo dende lo primer segundo, la reacción d’a chent estió dar-le a lo kebab, a l’atro día, un fascal d’estrelas en las valoracions de Google.

La segunda tien relación con la polemica demanda d’o pasaporte covid en bars d’ocio nocturno. Una d’as conseqüencias buenas d’ixa decisión, nomás d’anunciar-la, ya que en muitos casos sisquiá ha plegau a implementar-se, ye que a-saber-la personas que no quereban vacunar-se por un fuertes principios politicos y morals, los han deixau aparcaus por una de bravas y dos bieras. En l’atro costau ye meter-les un entrepuz a muitos bars chicotz que ya prou tienen con aguantar a seguntes qué parroquianos, que les ha costau fer-les venir a plego pa que no fumen en las mesas y se metan la careta. La compresión d’os clients, igual como en lo mio treballo, cuento que ha estau la norma cheneral. Independientement de que se siga d’alcuerdo con lo pasaporte covid u no, la cambrera no tien la culpa. Ni decidió la lei, ni se la puet blincar y, en lo caso de bars chicotz, se chuega la supervivencia mesma d’o negocio si le meten una pinyora. La reacción, manimenos, de belún estió bien fura, acusando a las hosteleras de faixismo, de colaboración con Bill Gates u de que me sé yo. Plegando mesmo a lo caso de bell lugar d’o País Valenciano a on que, organizadas, van menazando a los bars que lo demandan. Quan s’enteren de que i hai bars que no te deixan entrar-ie si portas vambas, ¿qué no farán? Dimpués de tot lo que han habiu y encara han de pasar las hosteleras, pa forro de bota, les vien una clica a embolicar-les mas la vida y a queixar-se a qui, probablement, nunca no hese meso una mida asinas.

Prou pena ye ya haber de treballar, como p’aguantar cretinos. Si tiens cosas a queixar-te, no te calles pero recuerda que, por un regular, qui ascuita la tuya queixa ye treballadora como tu y como yo. Que ye en lo suyo treballo en ixe momento – probablement no pas tu – y que si no fuese asinas talment no t’atrivirías a tractar-le como le tractas. ¿A que lo tiktoker no le charraría asinas a lo mozo d’o kebab si no fuesen cambrero y client? Porque bell día pillas a bell treballador que leva tot lo día fochando, farto de no arribar a cabo de mes y le vas con ixas costodias y te fote un lapo como lo que le dioron a lo caraanchoa con qui tantos nos hemos identificau bella vegada.

Repartir precariedat

Amaneixe por lo mío timeline un executivo d’os d’agora. D’ixos que ya no levan ni truqueta y s’aluenyan d’a imachen d’antes mas. Coleguita, con una chambra de quadros, barba y un pomo de biera. Cuento que ixo, la imachen, ye la parte “neo” d’o neoliberalismo. Estió un d’os fundadors d’una interpresa de reparto que prebó de fer pasar por autonomos a los suyos treballadors y que, afortunadament, los chuzgaus le dicioron fa bell mes que no colaba. Que ixos teneban d’autonomos lo que yo d’inuit.

Lo troz de entrevista, de tasament un minuto de durada, ye una choya a nivel d’entender cómo funciona lo mundo laboral d’istos zaguers anyos, y cómo farán que funcione si no lo evitamos.

Empecipia fablando de flexibilidat. Lo luengache nunca no ye inocent. Las treballadoras gosamos de querer flexibilidat y, como l’empresariau lo saber, no deixa d’incluyir ixe concepto en las suyas ufiertas de treballo. Ye cabolioso que no nos referimos a lo mesmo. Pa que dimpués digan que no i hai conflicto de clases, quan lo veyemos mesmo en la interpretación d’una paroleta. Pa una treballadora la flexibilidat ye poder modificar horarios u turnos si lo aprecisa por las suyas necesidatz extralaborals. U mesmo laborals, tamién. Pa los suyos chefes, que siga las vintiquatre horas disposada a treballar quan creigan que la interpresa lo aprecisa. U quan les rote, l’aprecise la interpresa u no. Si en cuenta de charrar d’horarios flexibles charramos d’autonomía laboral, la cosa cambea a-saber-lo. ¿Qué capacidat tien la treballadora pa chestionar lo suyo tiempo? Ixa ye la flexibilidat que queremos, no pas l’atra.

Diz que ye bueno que qualsequier persona pueda fer comandas a qualsequier hora, y en primeras cuela, claro. ¿Qui se va a oposar a que puedas fer comandas quan quieras? Pues qualsequier que sienta solidaridat y empatía por los suyos concheners. Me vienen t’a memoria las imachens d’os repartidors en bici portiando pizzas d’un cabo t’atro d’as ciudatz plenas de nieu d’istos días d’o plomazo de Filomena. Pero ¿dica que punto podemos culpar a los consumidors? Nos bombardeyan terne que terne con que tenemos lo dreito a tener lo que queramos, quan queramos, a tot trance, sin mover un dido. Toda la resta d’o mundo ye astí pa cumplir los tuyos deseyos si pagas prou. Ye tant comodo que ye de mal adubir-se-ne. D’atra man, ye precisament la precariedat laboral y ixa malentendida flexibilidat horaria interpresarial - u millor dito, falta d’autonomía en la chestión d’o tiempo propio - la que nos obliga a sobén a fer comandas en horarios absurdos. A chenta qualsequier minchanga a metat tarde posau en un banco en un ratet que tiens libre entre un treballo y atro.

La tendencia ye de tener dos u tres treballos, sigue comentando con cenyo de creyer-se-lo de verdat. La mayor tendencia d’a humanidat, dende siempre, ye la de prebar de no treballar. Yo no treballo porque me faiga goyo. Lo puedo detestar mas u menos, y prou que prebaré de tener una fayena que m’agrade lo maximo posible. Pero lo solo motivo pa treballar ye la subsistencia. Si puedo tener las mías necesidatz cubiertas con un treballo de ueito horas, no en preneré dos. Y, personalment, si las podese tener con nomás quatre, tampoco no en prenería unatro. Qui combina dos u tres treballos, por un regular, ye porque con uno, tot y que siga de quaranta horas semanals, no adube a pagar casa y birolla. Lo sé, entre atras cosas, porque a diferencia d’o executivo, yo sí he combinau tres treballos fendo mas de sisanta horas semanals, y conoixco quantas atras personas arredol mío que han pasau por la mesma circumstancia. Dos u tres treballos, prou que sí, con las suyas dos u tres flexibilidatz interpresarials y los suyos tiempos no remuneraus de desplazamiento d’un t’atro. Ye decir, estar-te tot lo día pendient de dos u tres chefes. No, sinyor d’a chambra a quadros: las treballadoras no queremos tener dos u tres fayenas “pa no aburrir-nos”. Las tenemos porque con una no podemos pagar lo loguero.

Remata ista choyeta de troz d’entrevista con atro d’os mitos que, en iste caso, le conecta de tot con la no-pas-tant-colegui CEOE quan en l’anterior crisi nos ninviaba a las treballadoras ta Laponia si nos i ufriban bella fayena. Lo capitalismo ye culpable de l’exodo rural. Ye culpable de que las treballadoras con mayor qualificación profesional(1) haigan ixopau ta qualsequier puesto d’o mundo en no trobar treballo aquí. Y ixo lo venden, de nuevas y como toda la resta de conceptos - la flexibilidat, la combinación de treballos…- como qualcosa voluntaria. La mayoría d’as personas queremos vivir en un puesto. La nuestra ciudat u lugar, la redolada, como muito. Lo de viachar nos fa goyo, prou que sí, pero quan decidamos y pa lo que queramos, no pas t’a on que la interpresa aprecise ni pa fer lo que calga. ¿Por qué iba a querer yo tener luent a la chent que quiero? ¿A la mía familia u amigas?

Un d’os que creigo que ye d’os grans problemas que tenemos en la sociedat actual ye l’individualismo derivau d’a falta de sentimiento - y experiencia vital- de comunidat. Desenradigar a las personas d’o suyo entorno, antiparte d’os contrimostraus problemas de salut fisica y mental, contribuye prou a ixe individualismo que tanta honra le fa a lo sistema.

La estabilidat laboral, tanto en qüestions de tiempos - horarios - como d’espacios - sin cambiar de localización terne que terne - ye periglosa pa lo chiringuito que tienen montau. L’autonomía d’horarios y la creación de comunidat nos permite conoixer los problemas comuns d’as nuestras companyeras y vecinas y sobre tot, nos permite organizar-nos pa combatir-los. Y por ixo no quieren que en tiengamos.

I hai una obsesión dende fa tiempo con la seguridat. Personalment, he sentiu inseguridat por muitos anyos. Pero no pas por vivir en un d’os barrios mas periglosos d’a ciudat, seguntes remeran los medios de cabo ta quan. Ye por pender de tot d’os concietos d’una clase interpresarial que decide quántas horas he de fer y en qué ciudat pa poder minchar totz los días. La seguridat no ye instalar una alarma en casa tuya. La seguridat ye no haber de mirar cada día la tuya cuenta bancaria. Ye saber que a l’atro mes, y a l’atro anyo, tendrás unas condicions previsibles d’horarios y puesto de treballo. Ye poder chestionar lo tuyo tiempo, laboral y extralaboral.

Desgraciadament, lo cuento modernet d’a libertat laboral ye colando. Tenemos a la prensa importando terne que terne parolas en anglés pa conceptualizar de forma cuqui no poder independizar-te u no poder fer cosa en lo cabo de semana. De cabo ta quan, conseguimos ficar con falca los debatz que sí que nos intresan y que habrían d’estar la prioridat absoluta de qualsequier partiu u organización que prebe de representar los intreseses d’a clase treballadora. La reducción d’as chornadas laborals, d’os días de fayena, d’a edat de chubilación u la necesidat d’una inspección laboral masiva que acabe con todas las practicas ilegals tant ixemenadas son reivindicacions basicas y que dengún no puet estar-ne en contra.

Ye prioritario que chentucia como lo modernet d’a chambra a quadros no imposen los termens d’o debat y que recuperemos la iniciativa. Quiero treballar menos horas, menos días y menos anyos, quiero que una chornada laboral y un chornal standard guarencien que puedo pagar loguero y birolla comodament. Quiero que los míos dreitos laborals sigan cusiraus por l’estau y que garra intepresario pueda tener sisquiá la tentación de blincar-se las leis. Lo treballo, sinyor moderno, ye una obligación que prebaré de vivir lo millor posible y de disfrutar en la mida que pueda. No ye una “aventura” ni una “experiencia”. No preben de convencer-nos de que somos chugando u fendo turismo. Ixo lo faré como quiera y con qui quiera en lo tiempo que no tos siga vendendo.

(1) Tal como s’entiende popularment lo concepto de qualificación profesional, que no i soi d’alcuerdo, pero no ye lo debat que pertoca en iste post.

En leyendo... La mano invisible, de Isaac Rosa

I pasamos ueito horas, u mas, cada día. I pensamos terne que terne. Si no en tenemos, nos anguniamos, y si en tenemos, lo patimos. Diz que dignifica y que no querer-ne ye de galvans. Ye una d'as partes mas importants d'as nuestras vidas y manimenos, qué poco pensamos en la naturaleza d'o treballo.

Las relacions laborals condicionan la manera en qué vivimos y todas querríanos millorar-las. Pero los debatz publicos, las rufiertas en los medios y en los bars, las polemicas en los retz socials son atras. D'o treballo, se'n charra bien poco y en termins poco fundos. Se prenen como naturals u inevitables qüestions que no'n son u no habrían d'estar-ne. Y quan queremos charrar-ne nos trobamos con toda una literatura de manuals economicos y socials de mal leyer con los uellos de qui no ye docto en la materia. Asinas que un libro como La mano invisible de Isaac Rosa, me pareixe esencial.

En ista obra, los protagonistas son una colla de treballadors, quasi totz "de baixa qualificación", que empecipian a fer la suya fayena en una nau con publico. I hai un mecanico, una administrativa, una teleoperadora, un piquer y asinas-asinas. Lo suyo treballo no saben pa qué vale. Lo piquer, por eixemplo, ha de devantar un muro y dimpués espaldar-lo, pagando-le por fer-lo. A traviés d'os suyos uellos, conoixemos los mundos laborals de cadaún, cómo han viviu las suyas fayenas anteriors, cómo ye la relación con los mainates y entre ells, quals son las suyas aspiracions...

Isaac Rosa, articulista en medios como Eldiario.es, Publico u El Jueves, ha publicau tamién a-saber-las novelas que han conseguiu premios arrienda. Ista ye una chiqueta choya que s'habría d'ixemenar por tot. Una reflexión sobre lo mundo d'o treballo bien valiosas y de muit buen leyer. En lo Tierra de barrenaus radio 6x19 en leyié iste trocet que me plegó en un momento a on que yera pasando por una situación laboral bien pareixida. Qualsiquier que haigatz treballau mas d'un mes en la vuestra vida, regular que trobaretz a-saber-los trozos que tos i podretz sentir identificadas.

Ella s’obligaba a pensar, porque le ixorrontaba la ment en blanco, sabeba que no existiba, que siempre se piensa en qualcosa, tot y que siga la seqüencia, trianglo, rectanglo, trianglo, rectanglo, pero le deprimiba quan dimpués de siet horas y meya plegaba en casa suya y, en la ducha, miraba de remerar en qué heba pensau ixe día, miraba de recuperar un solo pensamiento y no en yera capable, s’heba estau una día entero sin pensar-ie, concentrada en lo cenyo, prener la tola, meter-la en la maquina, preta lo botón, taladrar, chitar t’o contenedor, redonda, quadrada, redonda, quadrada, por ixo s’obligaba a pensar entre que treballaba, planeyaba lo que iba a fer en salir d’a fabrica, pensaba en lo cabo de semana, organizaba fayenas de casa, repasaba la lista d’a crompa, u remeraba, s’encerrinaba en fer memoria, igual recuerdos importants como banals, remeraba momentos d’a vida suya, s’obligaba a pensar y remerar porque ixo teneba muito d’obligau, d’aforzau, de decir-se a si mesma voi a pensar en isto u ixo, por contra no i pensaba, u nomás pensaba lo movimiento, agafar, amanar, aparar, taladrar, triangular, rectangular, triangular, rectangular y tot y que s’obligaba, lo pensamiento s’iba afeblindo, se disipaba u se tornaba repetitivo, se quedaba entrascada en un mesmo pensamiento circular, sin abanzar. Yera como nadar en una piscina: bi habió un tiempo que bi iba dos dias por semana, le feba honra pa la suya esquena, siempre menazada de ciatica por la postura en lo treballo: yera una piscina chiqueta, sisanta largos, y entre que feba brazadas, paraba cuenta de que lo suyo tozuel funcionaba como en la fabrica, nadar yera la mesma mena d’automatismo que taladrar piezas de tola, brazo dreito abanza, brazo cucho abanza entre que brazo dreito torna ta zaga, redonda, quadrada, redonda, quadrada; uno no piensa en los movimientos entre que nada, no diz agora voi a pasar debant lo brazo dreito, agora lo cucho, lo cuerpo nadaba solo y lo tozuel se desentendeba, acababa tamién calculando, contando largos, multiplicando pa saber quántos metros nadaba y en quánto tiempo lo feba, a qué velocidat, qué distancia heba recorriu en un mes, en una anyada, porque pensar baixo l’augua yera como pensar entre que treballaba, si cantaba se quedaba entrascada en l’estribillo, planificaba qualcosa que heba de fer y tampoco no abanzaba, triangular, rectangular, triangular, rectangular. Bella vegada le’n preguntó a un companyer en salir, lo solo momento pa charrar ya que las pausas en la fabrica yeran programadas pa que los treballadors no s’encertasen, no podesen parlar entre ells, los incheniers explicaban que yera la manera de que no s’aturase la producción, que las maquinas pateixen d’amortar-las y enchegar-las y tampoco no se pueden deixar tanto tiempo en marcha sin actividat, pero ella barruntaba que en realidat yera pa escusar-se que compartisen queixas y acabasen organizando asembleyas, seccions sindicals y vacas. Redonda, quadrada, redonda, quadrada. En l’autobús enta casa le’n preguntó a un companyer, en qué piensas entre que treballas, y l’atro se fació la riseta, dubdó, no entendeba la pregunta, en qué pienso me preguntas en qué pienso. Sí, qué tiens en lo tozuel entre que i yes, repetindo los mesmos movimientos terne que terne, t’alcuerdas de bella cosa u de belún, piensas en las cosas que farás quan en salgas, cantas, fas la cuenta d’o que has produciu, te cagas en los muertos d’a dirección u nomás te concentras en lo que yes fendo, di-me: pero l’atro, sin sacar-se la riseta que le deixaba cara d’apamplau se salvó porque plegó la suya aturada, y si no en yera eslampó igual, dica manyana. Triangular, rectangular, triangular, rectangular. Atra companyera que feba lo mesmo que ella pero seqüenciando manillas de puerta y tapes de deposito en cuenta de retrovisors, le contó en salir que ella no pensaba en cosa, que simplament feba la suya fayena, pero que no le importaba no pensar, ella sabeba que ixo yera un treballo y que heba de fer-lo pa ganar diners, pero no deixaba que le amargase la vida, difuera d’allí teneba maneras d’entretener-se, de curar-se la cansera y l’aburrimiento, yera feliz con lo suyo novio, lo pasaba bien los cabos de semana, veyeba a-saber-las cintas, y antimás yera estudiando a distancia puericultura, le encantaban los ninos, asinas que no le importaba fer siet u ueito horas astí adintro, no yera infeliz, no baruquiaba, asinas lo dició, yo no baruqueyo, ye un treballo y prou, y antimás no le feba goyo de charrar-ne, no yera disposada a dedicar-le un minuto d’o suyo tiempo difuera d’a fabrica, sabeba que bi heba chent que plegaba en casa y contaba como le heba iu, lo que heba feito en lo dia, los problemas que heba teniu, pero yera porque teneban cosas intresants que contar, treballaban en cosas mas intresants que no ista, como lo suyo novio, por eixemplo, que yera comercial y siempre teneba bella cosa a contar, pero ella no, no teneba cosa que responder si lo novio suyo le preguntaba como heba iu lo día, como siempre, igual como ahiere y como manyana, cada chornada yera identica a la anterior y nunca no bi heba novedatz, asinas que pa qué charrar-ne, la fabrica que mereixeba que ella le dedicase ni un segundo d’a vida suya, ni un sacre de preocupación adintro u difuera d’allí. Se despidioron, y ella no le dició lo que le pareixeba, pa no emprenyar-la, pero le habría feito goyo d’explicar-le que lo suyo yera una trachedia, que lo suyo embrutecimiento yera total y que yera la maquina perfecta, la maquina de carne que la interpresa buscaba.

Las practicas d'a FP. Historias d'un IES publico VII

A pesar d'o nombre d'a sección, en realidat isto la historia de DOS IES publicos. En lo primer que estudié, lo Medina Albaida, facié 3º y 4º de ESO y lo Bachillerato. Veniba d'o 8º d'EGB y yera d'os primers d'a mía cheneración que prebabanos la reforma educativa. La famosa LOGSE. Dimpués me tocó tamién prebar la reforma d'a FP, que tamién suposó un cambio bien gran. Lo segundo IES a on que estudié estió l'Andalán, a on que facié una FP d'Electronica que, con lo cambio educativo que s'heba feito heba pasau a tener lo bamboso nombre de Grau Superior en Desarrollo de Productos Electronicos. Quan deciba lo nombre oficial pareixeba que hese estudiau en lo MIT. Pero no.

Estioron dos anyos bien buenos d'a mía vida. Con bell profesor sobrebueno  y belatro mas zalapastro, unas maneras d'amostrar a saber qué diferents d'o que heba experimentau dica alavez y con un ambient que poco teneba a veyer con lo que heba conoixiu. Tornaba, por desgracia, a estar acompanyau nomás por hombres, en haber-ie nomás una zagala en clase que, antimás, no veniba guaire. De tot isto, iré charrando-ne, pero en iste post me quiero centrar chusto en los zaguers meses d'ixos estudios: las practicas en interpresa.

Heba acabau lo prochecto de fin d'a FP. Un calorimetro que n'heba desarrollau practicament tot lo software. Me diposaba a tener la mía primer experiencia pseudolaboral seria. Ya me pensaba que, malas que rematase ixos tres meses de treballar de baldes, trobaría una fayena rebuena que me permitiría independizar-me, qualcosa que yera lo mío obchectivo dende habe anyos.

Heba de presentar-me en Raxon, una interpresa a lo canto d'o Campus Sant Francho d'a Universidat. Astí yera yo, vistiu con la ropa d'as vodas, que en casa mía m'heban dito que me caleba ir bien atrapaciau. Presto a empecipiar en un mundo laboral que me yera bien desconoixiu. Raxon feba a-saber-las cosas. Cuento que viviría sobre tot d'uns cursos que impartiba, pero la parte que me tocaría a yo yera la d'un servicio tecnico que teneban. Sería aduyando en lo taller a apanyar ordinadors, impresoras y cosas asinas. En las primers semanas aprendié cosas arrienda. Muitas d'as averías que trayeban se solucionaban con formateus y reinstalacions d'os sistemas operativos. Atras, buscando lo component que daba mal y cambiando-lo. Mesmo, de cabo ta quan, nos tocaba fer bell apanyo "artesano" con bell puntico de soldadura y tot. Conoixié buena cosa de modelos d'ordinador con todas las suyas particularidatz. No heba tocau un Mac ni con un palo y me'n farté, d'ateclar-ne. Estioron unas semanas bien pinchas. A l'arreu vinió la segunda parte d'as practicas.

Memory Set yera una gran interpresa que yera a lo canto de Pikolin. Yera naixida en lo cobalto d'as oficinas de Raxon, seguntes deciba lo suyo mainate, y teneban muit buena relación. Me proposoron d'acabar las practicas treballando-ie y accepté. Yera bien belulo y talment creyeba que fer-les ixa "favor" me daría mas puntos pa quedar-me en un treballo que dica alavez me heba feito goyo.

S'acabó treballar una chornada "normal" a vinte minutos de casa. No lo sabeba, pero con lo cambio de treballo empecipiaba una d'as etapas d'a mía vida a on que menos "vida" he teniu. Heba d'amaitinar pa prener lo casetero que me levaba dica lo poligono. Encara que entrabanos bien luego de maitins, los horarios de l'autobús me i deixaban un rato antes, lo que aproveitaba pa fer-me un café en lo restaurant que bi heba a lo canto. A l'arreu veniba entre diez y dozte horas en Memory, mas lo tiempo de tornada ta Zaragoza en l'autobús. Bellas dotze u tretze horas sin vida propia. En la interpresa nos daban un vale pa chentar lo menú d'o diya en lo restaurant, que no yera garra marabilla, pero que con la gana que tenena me importaba prou poco. A truca, malas que rematabanos de chentar, hebanos de tornar t'a fayena. Quan facié pacha con bell companyer que veniba en auto, deixé de tornar ta Zaragoza en lo bus, con lo que recuperaba bells 15 minutos diyarios d'a mía vida.

Lo treballo yera bien facil pero teneba poca relación con lo que heba estudiau yo. Basicament consistiba en fer modificacions en equipos que nos veniban de fabrica. Instalar sistemas operativos, ixamplar memorias, fer cambios de hardware y asinas-asinas. Te veniban con un palet d'ordinadors, les febas las modificacions que calese y los tornabas t'o client. En lo mío departamento, en los momentos de mas fayena, arribemos a treballar tretze personas de vez. D'ixos tretze, nomás tres teneban un contracto laboral. Toda la resta yeranos chent de practicas de diferents FPs u chent que veniba d'atros cursos. Un d'ells, pobrichón, veniba d'un curso de programación en C++ que heba feito en la propia Raxon. Creyeba, por que le'n habrían dito u por simpla lochica que ixo sería lo que faría. Quan le dioron lo cutter y lo destornillador se quedó sin sangre en la pocha, aguardando a que venise l'encargau creyendo que s'heban entivocau. No pas. Astí yeranos quantos chovenotz arredols d'os vinte anyos treballando de baldes pa una interpresa que nos yera formando en la no cosa. Mesmo en bell momento pilloron chent d'ETTs que nian teneba mica formación relacionada con la informatica u la electronica. Un d'ells, que con qui m'encerté treballando en una furnada de Macs que nos vinió, me dició que le heban achustau porque "le feban goyo los videochuegos".

L'encargau, entre que nusatros yeranos limpio treballar, s'adedicaba a chugar a los solitarios que veniban con lo Windows 98. Diz que teneba bella relación familiar con lo gran mainate d'a interpresa y totz suposabanos que asinas yera ya que nos febanos cruces de cómo podeba estar ixe mozo d'encargau de cosa. Quasi una decada dimpués, me lo trobé de profesor de seguridat informatica en la Expo, asinas que raro se me fa que se conseguise acabar sin garra chandrío de bell virus.

En los zaguers diyas que i estié, la puyada de producción que heba motivau que bi ise s'heba pasau de tot. Tenebanos poca fayena y tiempo pa fer corridas de traspaletas por las naus d'arredol d'o nuestro departamento. En un d'ixos diyas, chusto dimpués de chentar, nos avisoron de que veniban "los americanos", que yeran uns mainates de l'atro canto de l'Atlantico con qui cuento que se chugaban bell contracto sucoso. Pero veteme que no tenebanos garra pediu pendient. Lo que heba entrau ixe maitín lo hebanos puesto rematar a tiempo y yeranos aguardando a que venise lo siguient mandau. Asinas que, pa que los americanos nos veyesen treballando, habiemos de fer momenazas. Pillemos cadaún un d'os paletz que hebanos montau ixe mesmo maitín y nos estiemos desmontando y tornando a montar piezas d'os servidors tot lo tiempo que duró la visita. Un d'os momentos mas surrealistas que vivié en Memory Set.

Las practicas me deixoron escamallau. Me feba cruces de cómo se podeba mantener ixe ritmo de treballo. Encara viviba con mis pais, asinas que no heba de preocupar-me de fer la casa ni de muitas atras costodias que teneba la chent que s'heba independizau, asinas que se me feba imposible emancipar-me asinas. Conoixeba, antimás, lo chornal de qui i treballaba y yera bien luent d'o que yo consideraba que valdría la pena lo sobo d''estar-se tantas horas difuera de casa. Con tot y con ixo, torné ta Raxon a veyer "qué bi heba d'o mío". Me pensaba que talment, como heba accediu a marchar ta Memory, me tendrían en cuenta pa quedar-me en lo taller con los ordinadors. Ixe treballo no yera tant malo y, sobre tot, no m'ocupaba tot lo diya. Quan charré con lo chefe quasi se m'esmelicó en la cara. No teneba garra intención d'achustar-me. Nunca no la heban tenida. No aprecisaban a dengún mas mientres podesen tener man d'obra de gufanya a pur de trayer estudiants de FP.

Encara que no lo pregunté, en Memory tampoco no les intresaba. La producción heba baixau y ya pagaban a tres personas, antimás de tener un fluixo contino de chent que i feba practicas de toda mena de cursos, cursetz y cursichons. Me dioron 10.000 pecetas (60 €) "porque heba feito muitas extras" que tasament cubriban lo que m'heba gastau en lo casetero.

Dende bell mes antes ya iba remugando la ideya d'empecipiar estudios universitarios. La familia siempre m'heba animau a fer-lo y la mayoría d'as mías amigas, que heban repetiu 2º de bachillerato, los heban empecipiaus ixe anyo. La mía experiencia en las practicas no estioron lo factor decisivo, pero sí un d'ells. Creyeba, babieco como yera, que lo treballo que trobase con un titol d'universidat sería bien diferent.

Prou que no tot estió negativo. Yera bien choven y encara podeba con ixos ritmos de vida. En ixos meses conoixié tot un mundo nuevo pa yo y pasé muit buens ratos tanto en lo taller de Raxon como en la nau de Memory. Aprendié muito, pero no pas d'electronica u informatica sino d'o mundo laboral que dica alavez me yera desconoixiu. Y tot y que no lo sabeba, encara tendría temporadas en la mía vida a on que treballaría mas horas a la semana.

Abolir a Semana santa?

Fa poco Pablo Echenique, de Podemos,  tornaba a asegurar por Twitter que en o programa de Podemos no ye l'abolición d'a Semana Santa. Tornaba a fer-lo dimpués de que ixe partiu en Andalucía hese d'aclarir lo mesmo fa bell mes, por unas declaracions de Begoña Gutiérrez, una d'as personas d'a executiva podemita d'alla. Ixas declaracions deciban que "si gubernamos, y se planteya sacar a Semana Santa, os ciudadanos decidirán". Ye decir, que caleba, primero, que gubernasen, lo que nomás pasaría si han conseguiu un refirme popular muito important. Segundo, que belun planteyase sacar a Semana Santa. Ye decir, que una parte d'a población, dreitament u vía representación institucional, planteyase cambios u l'abolición d'a Semana Santa. Y tercer que, en un hipotetico referendum, proceso de consulta, u como lo quieratz clamar, a población decidise fer-lo asinas. ¿Quál ye o problema en ixo?

Prou que, como de cutio, o catolicismo s'alticamó, prencipió a fer aparatos y dedució, d'ixas declaracions, que os malvaus comunistas, podemitas, minchaninos y cremailesias, iban a vedar as celebracions semanasantils. En Andalucía ta forro de bota! Faro catolico d'a Tierra!. O mensache, rebutient de demagochia, s'espardió en os medios de masas y, ta sopresa mia, chupió más que no creyeba. En ista Semana Santa pasada, en dos conversas allenas que yera fendo orella sentié decir "agora que los de Podemos van a sacar la Semana Santa...". Ignorando, prou que sí, que Podemos sisquiá gubierna en Aragón u en Espanya.

Ye una pena que o catolicismo tienga tantismo poder mediatico como ta silenciar un debat que habríanos de tener antes con antes y que no ye atro que os criterios t'as vancazas laborals. Como ateu y ateista, una d'as cunyadadas que más a soben m'he de sentir, ye ixa de "Sí, sí, ateu, pero bien que fas as vacanzas de Nadal" (u Semana Santa, Sant Valero, u qualsiquier atra). Antes feba o poder d'explicar-les que yo, igual como a resta de chent, no puedo trigar as mias vacanzas. Que si podese, de feito, no tendría vacanzas en Semana Santa ni en Nadal, dos calendatas que me fan prou pampurria. Les prebaba d'explicar que a chent tenemos vacanzas no gracias a o catolicismo, sino a la luita obrera que dimpués de muitos anyos consiguió que tenesenos os diyas de vacanzas pagadas que hue tenemos. Cada vegada lo foi menos, pues me resulta prou canso.

As treballadoras tenemos, gracias a ixa debantdita luita, un numer de diyas de treballo y de vacanzas a l'anyo. A mayoría d'ixas vacanzas vienen imposadas por un calendario festivo controlau, en una parte muit important, por as fiestas que celebra una parte d'a sociedat. Ixe calendario, antimás, ye de tot ilochico y a Semana Santa ye o maximo exponent d'ixa manca de lochica. Una fiesta que cambea de calendata cada anyo, dependendo d'a luna y que condiciona estudios, treballo u mesmo os ingresos de buena parte d'o sector turistico que, pendendo d'a calendata que toque, puet dar-le perras ta sobrevivir, u fer-le zarrar o negocio.

As fiestas patronals d'os lugars son atro claro eixemplo de falta de lochica en as fiestas. En Andorra se celebran, por eixemplo d'o 7 t'o 11 de setiembre, toque como toque. En iste 2015, como cada cierto tiempo, cayó de lunes a viernes, empachando que muitas d'as personas vincladas a iste lugar podesen disfrutar d'as fiestas y que fuesen economicament menos viables. En iste caso, a culpa no ye d'a relichión ya que as calendatas sisquiá vienen dadas por o santo d'o lugar, que ye ta chinero.

M'alcuerdo tamién de quan yera universitario y todas as fiestas patronals d'as facultatz tocaban ta primavera. En estar a l'aire libre, porque las febanos encara en a plana que bi heba a la fin de Miguel Servet, nos caleba buen orache. Manimenos as pobretas de Dreito la celebraban en lo preto de l'hibierno porque o suyo santo les tocaba en ixas calendatas. Si en as facultatz más "d'izquierdas" ni se planteyaban cambiar o diya de celebración d'o centro d'estudio, como ta fer-lo en Dreito, bastión d'o facherío universitario.

Tiengo a suerte de vivir en Zaragoza y de que as fiestas mayors d'a mia ciudat tocan en Octubre. Encara fa bueno y se pueden disfrutar. Pero con tot y con ixo, yo soi partidario de cambios. No m'importaría mica, por eixemplo, que s'adelantase bell par de semanas y fer-las a la fin de setiembre ta guarenciar-nos millor orache, sin pisar guaire a las fiestas d'atros lugars aragoneses. Tamién creigo que s'habría de zarrar más diyas tanto a universidat como en os centros de treballo. D'an se pueden pillar ixos diyas? Tenemos calendatas ultraabsurdas como a Concepción u Sant Valer an que m'atrevería a decir que o 95% d'a sociedat no celebra cosa. ¿Por qué no se pueden trasladar ixos dos diyas, por eixemplo, t'as fiestas mayors?

¿Por qué no podemos a ciudadanía decidir quan queremos celebrar as fiestas d'a nuestra ciudat, d'o nuestro país, de l'estau, ....? En qué momento se dio por supuesto que todas hemos de tener as fiestas quan lo decida la ilesia catolica? No soi charrando de vedar ni suspender as celebracions d'as cristianas. Soi charrando de qüestionar que todas haigamos de tener fiesta en ixos diyas y no pas en atros. A resta de confesions relichiosas y prou que as ateas, no tenemos fiesta os diyas que queremos y ixo no nos empacha de celebrar as nuestras festividatz como podemos.

Se pueden quitar os pasos, se pueden fer todas as cosas que quiera que faigan as cristianas ixos diyas, sin que a resta haigamos de condicionar o nuestro ocio a ixos costumbres. Cuento que as personas que van o diya de Sant Valer a besar o troz de calavre, pueden fer-lo de tardes, no? Asinas, a resta podríanos tener un diya más de vancanzas en unas calendatas que nos cuacasen más.

As fiestas han de decidir-se con razons lochicas y de conchunta entre todas as ciudadanas. Soi seguro que, de fer-se un debat publico y participativo sobre as calendatas d'as vacanzas, as cosas no cambiarían guaire. Ye muit dificil de cambiar costumbres y ritos de fa sieglos. Pero ye un debat que nos han furtau y que, malas que insinuas d'ubrir-lo, bi ha qui s'alticama y t'acusa d'os mil mals d'o mundo. Regular que a Semana Santa, por eixemplo, sobreviviría, pero a atras como os debantditos Sant Valer y a Concepción, no les daría tanta fortuna.

El Corte Inglés y yo

A soben soi treballando en arrienda articlos de vez, y los deixo totz a un costau ta fer-ne unatro que siga de actualidat de tot. Ixe ye o caso de hue, quan a muerte de Isidoro Álvarez, mainates d'os mainates de El Corte Inglés, ye muerto, con toda la rosca que l'han feito medios y periodistas de todas as colors (azulas).

Si en bella cosa tienen razón ye que El Corte Inglés ha influyiu y influye en a cultura en l'estau espanyol y en a mercadotecnia. Muitismo. Y en estar tant present, mesmo yo remero buena cosa d'historias y de opinions sobre iste eixemplo d'o capitalismo más furo. D'experiencias personals y belatra cosa charraré pues, siempre arredol de El Corte Inglés.

Nino

De chicot, El Corte Inglés yera bella mena de paradiso. Encara que me pareixeba que yera a-saber-lo luen de casa mía, os nadals, y t'os cabos d'anyos mios, gosaba de visitar-lo ta viyer totz ixos repalmars plens de chuguetes. A soben mis pais me deixaban en a planta de chuguetes entre que se miraban ropa u simplament alparceaban. Ixe ye o zaguer buen recosiro que tiengo d'o centro comercial.

Preadolescent

Un poquet más mayor, yera en a preadolescencia. Como totz os "rebeldes" d'o mio cole catolico, nos feba goyo d'ir ta botigas a prebar de furtar bella cosa. Yera más bella traza de "paso t'a vida adulta" que furtar porque nos mancase bella cosa. De feito yo particularment furtaba cosas prou inutils. Un d'os puestos favoritos nuestros yera El Corte Inglés, porque teneba de tot, y yera de facil furtar. Encara que tenebanos a los seguratas siempre a la tisva, te les amagabas de camín. U se feban os fatos, nunca no lo he sabiu.

O caso ye que un diya, con uns amigos, hebanos furtau bells rotuladors. Viyé uns altavoces t'a Game Boy y pensé en furtar-los ta revender-los en o patio, pues en casa mia mala explicación teneba que m'hese feito con ixo de baldes. Malas que me lo amagué en a chaqueta, una man me dio en o huembro. Un segurata de paisano, d'os que sí que disimulaban bien m'heba pillau. Tot y estando acollonau de tot, pues siempre soi estau bien gabacho ta istas cosas, me vagó de deixar os altavoces en o repalmar en un inte que lo guardia se chiró a preguntar-les a los mios companyers si ells heban furtau qualcosa. 

Me dentroron en una cambra y habié de deixar totz os rotus. No plegaba ni a 500 ptas y me dicioron que heba de tornar a pagar-lo u charrarían con mis pais. Torné a l'atro diya con os diners, pero sin mis pais y me dicioron que no valeba si no veniban ells. Asinas que decidié fuyir entabant, No les dicié cosa a mis pais y no torné os diners.

Dos u tres diyas dimpués, sono o "telefonillo" en casa mia. Quan pregunté qui yera, una voz respondió "El Corte Inglés". A sangre se me cheló. Yo, que yerrea más bueno que o pan, que en casa mia totz se creyeban que yera un santo, iba a haber de responder por un furto. Y por mentir. Caricacho, m'endrecé ta mai y le dicié "mai, vienen uns sinyors de El Corte Inglés". Sin deixar-me continar, ¡y bien se vale!, mi mai me dició "ah sí, que vienen a prener midas d'as finestras". En ixe inte alenté fundo y marché t'a cambra mia a leyer-me ya bien tranquilo un tebeo, que probablement les hese furtau tamién a ells.

Adulto

El Corte Inglés, dende aquello no teneba ya guaire intrés ta yo. Cosas caras, un segurata siempre dezaga dando mal, ...asinas que la mia relación con o centro comercial practicament desapareixió.

Dica que prencipié a intresar-me por a politica y se facioron vagas chenerals. En as primers no entendeba guaire bien porque yera tant important que El Corte Inglés zarrase. Dimpués lo comprendié perfectament. 

El Corte Inglés ye tot un sinyal d'o capitalismo espanyol. Ye o primer centro comercial "patrio" gran, con condicions de treballo que se adebantoron quasi decadas a las doctrinas más neoliberals. Os dreitos sindicals menos que nulos, o sexismo en l'achuste y condicions laborals d'as treballadoras, a uniformidat absurda, ... 

Remero muitas enrestidas d'a policia. Una policia espanyola que ninvia efectivos por decenas ta guarenciar que ubre. Ta guarenciar que todas ixas Sinyoras y Sinyors (asinas, con mayusclas) plens de laca y gomina pueden tener o concieto de ir a mercar ixe diya, "porque ye o suyo dreito". Remero ixos cenyos de complicidat entre os mainates de El Corte Inglés de Independencia y o chefe d'a policía espanyola, mesmo fendo-se a riseta un ratet dimpués de foter buenos trucazos a qui bi yeranos ta prebar de guarenciar os dreitos d'a plantilla.

Cada vegada que, en acercar-se una vaga cheneral, me charran d'a hipotetica presión d'os sendicatos t'os treballadors ta que no vaigan a treballar, u d'ixas "coaccions", l'eixemplo de El Corte Inglés me vien ta l'esmo. Un puesto a on que SABES que no puetz fer vaga. Que mesmo ixe diya te i has d'estar un ratet antes ta escusar-te os piquetes. Sin cobrar-lo, prou que no. Isidoro Álvarez y totz os mainates de El Corte Inglés, habrían d'estar chuzgaus por extorsión y coacción a la suya plantilla en todas y cadaguna d'as vagas que s'han feito en l'Estau espanyol.

Porque El Corte Inglés, ixe centro que tanto pareixe que ha feito por Espanya y por dar treballo a la chent, seguntes podemos leyer istos diyas, ye o paradigma d'a explotación. Ye o mirallo a on que se miran a resta d'interpresarios ta viyer si pueden explotar bell poquet más a las treballadoras que les permiten levar o tren de vida que levan.

Cada vegada que siento ixas falcas de radio que me informan de totz os centros de El Corte Inglés que ubren os domingos (¿Por qué nunca no ubre o de Ademuz, por cierto?), pienso en toda la pobra chent que les toca de treballar, y en totz os interpresarios que piensan en fer-les lo mesmo a las suyas plantillas. 

Clasista, explotador, animador y complice necesario de enrestidas policials, sinyal d'o capitalismo, estricallador de dreitos laborals, .... El Corte Inglés ye un d'os contraeixemplos perfectos d'a sociedat que yo quiero.

Qüestions d'autoridat

¿D'a on surte l'autoridat? Siempre m'he pensau y prebo de funcionar asinas que l'autoridat ha de proceder de dos fuents. La una "academica", ye decir, de que tienga u no los conoiximientos sobre bella materia que a yo me'n falta. M'importa igual si tien un titol u no pas, encara que goso fiar-me más siempre d'a formación reglada. L'atra, ye l'autoridat por representación, ye decir, que bella colla de personas haigan esleixiu a una u varias como representants d'a suya voluntat.

Me trobo a soben con que tiengo una falta d'autoridat que me fa muito que pensar. No me siento autoridat en quasi cosa, pero sé más que muita chent sobre muitas cosas. Ixo lo tiengo claro. Y si tiengo bella cualidat ye que m'estimo más de callar quan no sé de bella cosa que de charrar-ne y entivocar-me. Asinas que, quan digo, quan afirmo, bella cosa, por un regular ye porque sé de qué charro. Por ixo no viyeretz que charre aquí, por eixemplo, de Siria, qüestión que me considero un iletrau de tot, encara que prou que tiengo la mia opinión.

A soben, mesmo as afirmacions sobre as cosas que'n sé, las foi con bella uembra de dubda, pues soi de naturaleza insegura, y talment siga por ixo por lo que me cuesta de fer venir a plego a la chent. Y quiero ilustrar-lo con dos casos, l'uno que me pasa totz os anyos y l'atro de fa poco.

En o treballo mío, a una companyera le plegó por FB o ferrete iste que surte cada bells meses de que en os tetrabriks bi ha abaixo uns numers que t'indican quantas vegadas han repasteurizau a leit que tien aintro. Ista historia data de 2007, creigo, y ya se ha desmentiu arrienda vegadas. Ixos numers no son que o numer d'a cinta que fa os tetrabriks. Cuento que ixolomo istas chorradas a kilometros, pero quan lo viyé por primer vegada, lo primero que pensé estió "isto fa más farcha d'estar una numeración industrial que una repasteurización".

Escandalizada por bella cosa que tampoco no entendeba, pues dubdo que sepa lo que ye la pasteurización, a mia companyera me lo amostró, y le dicié que yera una falordia que correba por internet dende 2007 y que ya se sabeba fa muito que ixo no yera asinas. Que heba seguiu o caso, dende fa muito y no bi heba garra preba a favor d'a "conspiración d'a repasteurización" y manimenos bi heba prous explicacions lochicas, consistents y comprebables. No tornemos a charrar-ne y pasoron os diyas. Bell par de semana dimpués, la sintié charrando con atro companyer, recontando-le, escandalizada prou que sí, a falordia d'a repasteurización. Un mensache de FB de un anonimo, basau en no cosa pesaba más que a mia parola. A mesma que le dició que a Power Balance yera una fatera y que no funcionaba meses antis que no se fese publico que yera una fatera y que no funcionaba.

Entiendo que a "conspiración repasteurizadera" ye prou más emocionant de contar que a marca d'un proceso industrial, y que te quedas un poco con cara d'ababol quan paras cuenta de que has malfurriau decenas d'euros en una pulsera de plastico que vale dos perras y que no tien garra machia en o suyo interior. ¿Tan dificil ye reconoixer que a vida ye más lochica y normal que no pareixe, u que t'han timau? A yo m'han timau arrienda vegadas y no por ixo soi más fato u menos. D'inocent, muito, lo reconoixco.

L'atra, la que he de aguantar-me todas las anyadas ye la de aqui-asti-alli. Todas las anyadas que foi clase, en a tercer u quartena sesión charramos d'os locativos y, foi especial ficacio en explicar prou bien l'emplego de aqui, asti y alli. Quan prencipié a amostrar aragonés simplament lo explicaba, l'alumnalla lo ascuitaba y dimpués buena parti lo feban servir bien... una semana. A escape, prencipiaban a fer servir astí como traducción dreita y unica de "aquí" en castellano. Como he dito, dubdo muito, asinas que me miré os manuals que tiengo por casa. Mesmo facié materials de propio ta explicar isto en clase. Y ta que dengún no viyese conspiracions u quimeras antinagorianas u anticonselleras, mesmo bi incluyié a explicación que fa o propio Nagore d'istas tres parolas en a suya "Gramatica de l'aragonés". Lo podetz consultar aquí (Lozano, Barcos, Nagore)

Ya no yera la mia autoridat. Agora yera l'autoridat de Lozano, Barcos y Nagore. Tres figuras de l'aragonés. Tres sinyalers estudiosos de l'aragonés que m'ampraban a suya autoridat ta espardir-la entre a mia alumnalla que, d'atra man, si ye en primer ran, habría de confitar en yo.

Manimenos, encara que o resultau amilloró, buena parti de l'alumnalla, sobre tot quan ya han rematau lo curso, tornan ta la "astifilia". Antismás creyeba que yera por aquella canta de Mallacán de "Astí y agora", u por l'asociación de vida breu "Astí l'aragonés", pero d'ixo en fa ya masiau como ta que a suya influyencia contine. ¿Por qué pasa isto? No tiengo respuesta.

Ye ta yo un misterio como funciona isto de l'autoridat t'a mas gran parti de chent. Como he dito en o prencipio, tiengo muito claras las mias fuents d'autoridat, pero no entiendo las d'a resta. ¿M'aduyatz?

Teleoperadoras, LOMCE y Educación

En 2009 nomás teneba un treballo de meya chornada, con un chornal baixo y pseudocomercial, ye decir, que cobraba un fixo más un variable seguntes vendeba. Como en vendeba poco, por un regular cobraba nomás o fixo. Levaba bells meses en ixa situación y me clamoron ta un d'os mayors negocios y zancochos organizau en os zaguers anyos y que creigo que ye un sinyal d'a nuestra cheneración: as teleoperadoras.  Ta conseguir-ie un puesto de treballo heba de fer antis un curso de 12 diyas, seis horas a lo diya, que dimpués nos achustarían a un 80% u asinas. No concretaban ta qué fainas, porque nian ellas lo sabeban.

Mientres os diyas que bi estié (a metat curso trobé lo treballo que tiengo agora), nos cambioron de destino final como cinco vegadas. Lo poco que nos amostraban yera ta fer servir un programa d'ordinador que feba honra nomás ta un puesto de treballo. Ye decir, que ixa formación, ya no en qualsiquier atra interpresa, sino mesmo en qualsiquier atro puesto de treballo, sería de tot inaplicable. Pero lo pior de tot estió quan m'enteré que ixe curso yera subvencionau por o Ministerio de Treballo.

O negocio ye brutal. Privatizas a telefonía, consigues un oligopolio mafioso que pacta precios, empioras o servicio dica que esdevien en un laberinto que pasa por dencima de totz os dreitos d'as consumidoras, consigues que as suyas treballaderas sigan o paradigma d'a treballadera con baixa formación y precariedat maxima y, ta forro de bota, les subvencionas cursos ta una formación de tot inutil ta qualsiquier treballadera.

As trazas de treballar son tamién o cenit d'ixas trazas de producción. En cubillars, fendo caso nomás a lo que l'ordinador mete y deixando d'un costau qualsiquier posibilidat d'empatizar con a client, de poder solucionar os suyos problemas. 

Iste ye o modelo social que esfiende o neoliberalismo. Obreras ultraespecializadas, que dependan  de traza absoluta d'a voluntat d'o patrón de tornar a achustar-las u no pas, en no tener garra conoiximiento especializau dillá d'o puesto de treballo que le i han feito a formación privada subvencionada con os diners de todas.

O ideyal renacentista de saber una mica de tot, u de a lo menos, no meter mugas a lo conoiximiento, ye hue cosa de bohemios u frikis. Leonardo da Vinci sería hue un becario de 35 anyadas que practicament no ha cotizau.

Reflexo d'isto en son as leis educativas. As peperas y as que no tamién, pero Wert lo ha feito sinyal. Con as declaracions aquellas de que caleba estudiar pensando en as salidas y en o mercau y no pas en lo que cadagún quiera, se mercantiliza o conoiximiento y s'enanta en ixa ultraespecialización absurda que ye l'alienación finitiva d'o treballo ta otri.

Cal trigar l'alumnalla antis con antis, no vaiga a estar que los de sciencias aprendan qualcosa de letras u de revés. U d'artes, que ixo ye de hippis y no leva ta garra cabo, encara que bi ha millars y millars de personas que viven u malviven d'a pintura u a mosica, igual de malament que os millars y millars d'economistas y advogaus que vomecan todas las anyadas as facultatz.

Bi ha un consenso social alto u baixo mayoritario en que ye bueno que a zaragalla faya totz os anyos que pueda en l'instituto y que tienga bella formación especializada, siga FP, universidat u qualsiquier cosa que le de conoiximientos en bella disciplina u en bella branca d'o conoiximiento. ¿Porque ixe consenso social tamién asume que ye inevitable que bi haiga zagalas "que no quieren fer cosa"? ¿Y que a ixas zagalas cal levar-las enta treballos de mega baixa qualificación? Bi ha casos inevitables, pero creigo que masiau a soben se rebla a escape. 

O sindrome d'o mayestro deprimiu por a falta d'autoridat en clase, por a falta d'autoridat debant d'as mais y pais ye una pasa que cal curar, ye de dar, pero ixo pasa por una concienciación social y por unas campanyas masivas de valuración d'o treballo que fan diya par d'atro. Ixo ye una qüestion de, probablement, decadas. Dar-le mayor u menor capacidat punitiva legal ye, como gosa de fer siempre o neoliberalismo, una prebatina de parche, que talment dé bell resultau en bell contexto por bell tiempo, pero que no va a solucionar mica. O problema d'a educación ye más en Gandía Shore, Cristiano Ronaldo, Amancio Ortega  u Luis Bárcenas que no pas en que un profesor pueda u no sacar de clase a una alumna d'a suya cada vegada más rebutient clase.

Fa poco, en una charrada, explicaban unos okupas como se autoformaban uns a atros en bells aspectos basicos de fontanería, electricidat u como compartiban os conoiximientos que cadagún teneba en cada aria de conoiximiento. En istos diyas tamién me he habiu de formar un poquet en piquería y en apanyos casers, y terne que terne he d'explicar conceptos muito basicos (masiau, de feito) de matematicas, fisica, electronica u quimica a muita chent.

Ye imposible que todas nos formemos en tot. No tiengo ni ideya de economía, por eixemplo, y tampoco no m'intresa guaire. Pero creigo que, dende totz os puestos, administración, familias, colectivos socials, roldes d'afinidat, etc, ... d'ha d'enfortir a ideya d'a curiosidat por tot como motor de conoiximiento y d'a co-formación como traza de compartir os conoiximientos adquirius en a formación formal y no formal. Tot siempre conscients d'as nuestras propias mugas, de que no qualsiquier puede amostrar u pretender tener conoiximiento prou de qualsiquier disciplina, y de que o treballo academico "de toda la vida" ye basico.

Zarrau por vada

Poco puedo alportar que no s'haiga dito ya sobre a vada que bi ha o 14 de noviembre. Talment me quede con a frase de Javier Gallego en a suya Declaración de vada, que escribiba hue en El Diario: "Ista vada ye un deber porque de dreitos, no nos ne queda".

 

Asinas que simplament remerar a todas as lectoras d'iste quiesto blog que maitin tenetz a oportunidat de concarar-tos con todas as inchusticias que sotz viyendo arredol vuestra. Maitín podetz esleixir a luita contra qui han esfendiu os desahucios dica ahiere y que no han prencipiau a reblar dica que tres personas han muerto. Podetz esleixir luitar contra qui tos quieren sacar o dreito a la sanidat y a la educación, contra qui quiere que nunca no podatz tener un treballo digno y seguro ta que siempre pendatz de l'amo. Contra qui retalla d'a necesidatz más alazetals entre que financia relichions, torturas animals y campanyas nacionalistas en esfensa d'o castellano. Maitin mesmo podetz esleixir fer vistera ixa critica que tanto cal a los sindicatos mayoritarios espanyols, participando en toda a graniza cantidat d'actos que han programau organizacions de toda mena y que mica no'n tienen que viyer con as suyas malas trazas. Maitin podetz dar un trango enta debant y, sí, cambiar o mundo.

Porque as vadas fan honra. Porque as vadas pueden cambiar y han cambiau as cosas mientres toda a nuestra historia. Porque a vada ye l'arma más poderosa de qui no tenemos atra arma que lo treballo nuestro. Pero sobre tot porque o chueves, y o viernes, y a resta de diyas d'a tuya vida podrás estar argüelloso d'haber teniu dignidat y haber estau parti d'a luita por os nuestros dreitos. Y, si yes como yo, simplament porque no te'n queda atra,  porque no sabes vivir d'atra traza.

A info la tenetz por tot, pero tos deixo bellas pachinas y articlos que tos ferán honra:
Arredol
Arainfo
Radio Topo

Vada en La Enredadera 
Vada en Fendo Orella