viernes, 30 de septiembre de 2022

(D)Escribindo Zaragoza. Zaratober #00

"Zaragoza, la romana, mora d'a morería, cristiana y tamién chodiga, mosica de muitas chents..." canta Carmen París en una repolida canción adedicada a la mía ciudat. Aquí he naixiu, he creixiu, sigo vivindo y m'agradaría de morir. Nunca no he pasau mas d'un mes difuera d'as suyas mugas. Asinas ye la mía vida. Cuento que ni millor ni pior que la de dengún atro. Simplament asinas. Talment por ixo, porque no conoixco garra atra cosa, ye porque la quiero tanto. U talment porque la quiero tanto ye por lo que no he quiesto u no m'he atreviu a conoixer garra atra cosa.

"La amo, la odio, le tiengo un cariño ancestral", le deciba Jose Antonio Labordeta en lo suyo Zarajota blues. Bi habió un tiempo, no guaire largo, que la Immortal m'angunió, que pensé en deixar-la, en buscar en atros puestos un cubil a on que las mías pantasmas no podesen entrar, a on que fuyir d'os monstruos que habitaban las carreras d'a ciudat. No marché, entre atras razons porque ni sisquiá podeba, pero tiempo dimpués entendié que ixos monstruos yeran adintro de yo y que tot y que ixopase, m'acompanyarían. Asinas que, en realidat, sisquiá plegué a odiar-la. Creigo que no puedo.

Asinas, mas de quaranta y tres anyos dimpués de sentir-la por primer vegada, arribaba iste octubre. Y con ell, lo inktober, ixe mes que en los zaguers tres anyos m'ha teniu limpio escribir. Un relato cada día d'o mes, plegando a fer-ne novanta y tres que publiqué, en formato papel, en los fanzines Tintubre, Inkventos d'octubre y L'aragoMés. Iste anyo no me veyeba con fuerzas, tiempo ni inspiración pa fer-me unatro inktober de relatos. Ni m'aganaba. Pero como no me puedo estar ni quieto ni callau, empecipié a preixinar qualque alternativa. 

A partir de manyana empecipia Zaratober. Cada día iré penchando una foto d'a mía amada ciudat de Zaragoza y tos recontaré bella historieta. Por un regular, remeranzas de yayo. De cabo ta quan, curiosidatz historicas. Bi habrá espacio pa la reivindicación, no lo dubdetz. Y lo que no faltará, en garra d'os posts, ye carinyo por la bimilenaria ciudat que tiengo la suerte d'habitar.


jueves, 29 de septiembre de 2022

La gaita de l'autochestión (y viceversa)

Las fiestas d'o Pilar me fan goyo, y no, no soi penyista. Ye una opinión impopular, mas que mas entre un amplo sector d'a intelectualidat y lo culturetismo local, pero ye la mía. Explico a sobén, a qui se me mira como si fuese un marciano quan digo ixas cosas, que istas son las mías fiestas mayors, que soi zaragozano, sin un lugar referencial, y las fiestas que siento como las mías, como LAS FIESTAS son istas, las d'o Pilar. No cal que me digan que i hai cazurrismo a embute, que la programación siempre, con gubiernos de todas las colors, ye chusteta, y que me faigan toda la retolica de que son espanyolistas y relichiosas. Cada un triga las suyas contradiccions y ista, si fa falta, será una d'as mías. 

Pero una d'ixas cosas que me feba argüelloso d'as mías fiestas yera que ye un d'os pocos momentos de l'anyo a on que lo folk tien un espacio central y vistero en la ciudat. Por un regular, en la Plaza Sant Felipe, pero tamién en la d'o Pilar y en Sant Bruno. Aquí pa fiestas, la mosica tradicional aragonesa suena, y muito. U, millor dito, sonaba. Dimpués d'os anyos de pasa, las fiestas tornan a poder-se celebrar como siempre y las amants d'a cultura aragonesa, en candeletas aguardando la programación mosical d'estianyo, nos trobamos con que lo folk ye dispareixiu. Lo nuestro patrimonio mosical mas autentico s'esborra, de rapiconté, d'a ufierta cultural pa istos días. Remaneixe, ixo sí, una parrafiquera d'actuacions de grupos tributo y de bandas que, sin tener-ne yo mica en contra, no aportan cosa que no pueda sentir-se qualsequier atro día en la ciudat.

La mosica tradicional ye la que da personalidat a las fiestas d'un lugar u ciudat. Sin ella nos quedamos con una ufierta mosical que podría tener-se igual en Alicante, Badajoz u Santander. De feito, a fe que en qualsequier d'as fiestas mayors d'ixas ciudatz sí que i hai bella representación d'a cultura mosical tradicional local. Azcón y lo suyo gubierno apuestan unatra vegada por enrestir contra lo patrimonio aragonés. Lo que quieren ye uniformidat cultural que no i haiga mica diversidat. Son cazurros que s'avergüenyan d'una d'as choyas que tenemos en Aragón, que ye la nuestra mosica, y que nomás conciben una d'as suyas expresions, la ixota como digna de tener espacio. Ixo sí, en la suya pior y mas elitista versión, aluenyada d'o canto popular que estió y encara ye pa muitas.

Manimenos, si qualcosa tien la mosica tradicional ye lo suyo caracter de popular. Las folkis somos pocas, pero tenemos -tienen, que lo talento pa lo de tocar trastes a yo ni se m'acerca - ferramientas pa sobrevivir a ababols y carnuces muito piors que lo fan de Taburete y la suya clica mafiosa. Baixo la etiqueta de #PilarSinFolk m'han arribau en istos días iniciativas arrienda pa fer rondas y quedadas pa bailar y chuflar las gaitas, tanyer los chicotens y dar mal con las donzainas, entre trago y trago y prenendo las carreras d'a ciudat, que son nuestras. Porque si no quieren que se nos sienta, bufaremos mas fuerte. Las gaitas s'autochestionarán y la mosica tradicional aragonesa, ixa que tant argüellosas habría de fer-nos y que tant d'amagatons amaneixe en los medios d'o país, tornarán en istos días a emplir Zaragoza, a pesar d'o suyo concello. ¡Garra fiesta sin gaiter!

martes, 27 de septiembre de 2022

De festival en festival. Tierra de barrenaus 9x01

Empecipia lo curso y con ell la nueva temporada de Tierra de barrenaus. Tornamos dimpués d'o descanso que nos hemos pretau iste verano... u no. Porque la verdat ye que repasando tot lo que hemos feito, descansar-nos, descansar-nos... pues no guaire. Y precisament d'ixo va la primer parte d'o programa.

Nos femos una uellada entazaga, enta totz los festivals por a on que Tamara y yo hemos pasau en istos zaguers meses: Tamborilé, Poborina folk, PIR, Pirineos Sur, Aplec dels Ports y Vive Latino, totz bien diferents a libel organizativo, d'ufierta programatica y d'ambient. Chorche Paniello torna t'o programa pa recontar-nos como se vivió la zaguer edición de Replega, la feria de coleccionismo que se fa totz los anyos en Monzón.

Ya mirando ent'o futuro tos charramos de quantas citas pa lo cabo de semana d'o 1 d'octubre. En Fonz se celebra lo Ixufrina Rock, un festival por l'aragonés con presencia d'a-saber-los grupos que dende lo scenario farán sonar las suyas cancions en aragonés, catalán y occitano. En Zaragoza, Nogara celebrará la suya tradicional Devantadera que nos anuncia Edu, y La Ciclería fa 15 anyos con una chornada plena d'actividatz que nos recuenta Tamara.

Asinas empecipiamos ista nueva temporada de Tierra de barrenaus radio, a on que aspero poder contar con toda la vuestra colaboración. Recuerda que tiens los micros d'iste programa ubiertos pa tot lo que quieras recontart y que la voz varrenada no será silenciada. Tos leigo.

Programa #130

viernes, 23 de septiembre de 2022

Superman no paga impuestos (Clark Kent sí)

¿Quántas vegadas ha salvau lo mundo Superman? ¿Quánta chent de l'universo DC le debe la vida suya? ¿De quántas menazas nos habrá librau? A qualsiquier que gosase ir t'a Fortaleza d'a Soledat a trucar a la puerta y demandar-le que pague los trimestres se lo mincharía la sociedat. ¿Como s'atrive un burocrata, un funcionario, a exichir-le tributo a lo salvador d'a humanidat? No, Superman no paga impuestos si no quiere. Atra qüestión ye Clark Kent, que nomás ye un periodista, que va ta l'oficina d'o Daily Planet, fa las suyas 8 (u 9, u 10, u ....) horetas, que probablement siga como falso autonomo y, como ciudadan que ye, ha de pagar como todas y totz. Son la mesma persona. La sola diferencia entre ells ye lo trache y, sobre tot, la manera en que los percibe la sociedat.

En lo nuestro universo, ixe a on que dengún no vuela, ni fa rayos con los uellos, ni controla l'orache, lo magnetismo u garra atra fuerza d'a naturaleza, no tenemos superherois. No i hai dengún que repeleixca las enrestidas alienichenas ni las invasions infernals. Asinas que pa que seguntes que personas no paguen impuestos cal fer-les lo trache de superheroi, cal dar-les lo superpoder d'o capitalismo, que consiste en creyar d'a no-cosa un elemento machico que se diz "puestos de treballo" y que, tamién por artes arcanas, produz diners. Con ixe poder SuperAmancioOrtega u JeffBezosMan consiguen la mesma licencia que tien Superman en lo suyo universo: no estar sucheto a las leis humanas ni haber de pagar impuestos ni costodias si no quieren. Las suyas capas y armaduras no las fa Reed Richards con traches de moleculas inestables, ni son teixius con tecnolochía d'atros planetas. Las fan los suyos medios de comunicación que financian, por eixemplo, con los diners que s'escusan de no pagar ixos impuestos. 

Mesmo n'i hai de superherois mas afortunaus. Porque a la fin, Superman y Clark Kent son la mesma persona y, a lo menos un d'ells, ha de presentar lo 303, pero antimás de que Batman salve lo mundo, barrunto que Bruce Wayne ye tant evasor d'impuestos como qualsequier miembro d'a reyaleza d'as monarquías terrestres. Porque si yes un Wayne, u un Stark, nos dicen que la tuya riqueza tien lo suyo orichen en que yes un "chenio d'a tecnolochía" y no pas en tener una familia con mas cauquerré que PIB tien bell país chicot, como s'encargan de recontar-nos en los comics d'una y atra d'as casas d'o mainstream. Y si les pilla hicienda, ya trobarán bella manera d'enguerar-les lo marrón a Alfred u a Jarvis, que los ricos, de leyaltat, la chusta. Ni lo Capitán America con lo Mjolnir, ni Thor clavando-le l'astral a Thanos, ni garra atra scena d'o Universo Cinematografico Marvel puet competir con la sinceridat de Tony Stark declarando debant d'o mundo que "ha privatizau con exito la paz mundial".

Asinas que, quan salga en la tele lo rico de turno explicando quánto aporta a la sociedat u que va a donar no se qué equipos a un hespital, u que van a plantar una parrafiquera d'arbols pa compensar lo CO2 que fan las suyas interpresas, nos cal fer servir la kriptonita, sacar-le los suyos poders y lo vestuache de coloretas, y convertir-lo en un simple Clark Kent que, como totz, ha de contribuyir con la parte que le pertoque a la vida en común.

martes, 20 de septiembre de 2022

La oficialidat, como poco

En lo tiempo que levo d’activista en desfensa de l’aragonés he visto a-saber-los cambios d’estratechias y alianzas, he visto lo movimiento por l’aragonés abanzar y recular, unir-se y esmicazar-se de tot, he visto asociacions naixer y morir chunto a diferents coordinadoras y plataformas… La sola cosa que no cambiaba yera una serie de reivindicacions y obchectivos que todas tenebanos claros como horizont y demandas a fer-le a las diferents administracions. Ixo empecipió a cambiar en bell momento y acumulo a ixa falta d’obchectivos comuns buena parte d’os problemas que tenemos como (no) movimiento politico-cultural. Un d’ixos cambios, lo que mas me deixó sin sangre en la pocha, ye que en bell sector s’empecipió a decir que la oficialidat no yera important, que espantaba a la chent y que s’asociaba con imposición, renunciando asinas a la demanda mas basica. Porque ixa oficialidat no ye l’obchectivo final, ye lo primer. Ye lo minimo.

Istos dias Heraldo “informaba” de que “Lo Ministerio [espanyol d’Educación] atura que l’aragonés siga una especialidat docent en no estar luenga cooficial.” Con ixa decisión los ventiún docents que hue treballan en lo país fendo clases d’a materia continarán en una situación de precariau y irregularidat. Ye una d’as sincusas mas comuns que nos trobamos cada vegada que queremos fer qualsequier tramite oficial en aragonés: no ye luenga oficial. Cuento que, tot y que no en siga, si bi hese voluntat politica, la ministra d’Educación y ciudadana aragonesa Pilar Alegría hese feito lo posible y apanyau la papelamenta que calese pa que ixo no fuese un entrepuz. Que si quieren, seguro que troban la manera churidica de fer-lo, que pa atras cosas bien que se i fan. Pero la sincusa d’a no oficialidat ye tant a man y tant facileta que quasi no han d’adedicar ni un minuto a buscar-ne garra atra.

Somos en lo mundo occidental y burocratizau y pa que la luenga nuestra tienga futuro ha de tener las mesmas ferramientas que toda la resta. Mas que mas que las luengas que tenemos arredol. Será triste y inchusto, y toda una pena que la resta d’a humanidat y d’a chent con qui convivimos no entienda la importancia d’o patrimonio lingüistico, pero ye asinas. Tot y podendo fer servir todas ixas ferramientas (autoridat lingüistica, amostranza de y en la luenga, norma culta, medios de comunicación….) l’aragonés lo tien prou dificil pa arribar en lo sieglo XXII como qualcosa que no siga propia de museu etnolochico. Cada una que nos ne falte será un entrepuz mas pa ixe obchectivo. Asinas que no, no podemos renunciar a denguna d’ellas.

Deciba belún, quan se va creyar la DGPL y va empecipiar lo suyo desarrollo normativo d’a Lei de no-luengas, ixa que contina sin nombrar a l’aragonés y lo catalán con los suyos nombres, que l’aragonés ya yera oficial de facto. Antiparte d’estar una gran mentira, como qualsequier que no siga un hooligan d’o debantdito organismo publico entiende, la oficialidat, por definición, ha d’estar de iure. Porque ye ixo y nomas ixo (y no menos) lo que significa la oficialidat: un reconoiximiento churidico d’una realidat social, que ye que existe una luenga, que se diz aragonés, que conecta dreitament con la luenga historica que se charró en quasi tot Aragón y que hue encara la continamos charrando bellas personas que, alavez, tenemos una serie de dreitos lingüisticos individuals y colectivos como ciudadanas y ciudadanos aragoneses que somos.

Tot lo que se fa en desfensa de l’aragonés ye important. Tota pedra fa paret, que dicen en catalán. Cuento que en aragonés tamién existirá ixa mazada u en tendremos de belatra parellana. Pero, centrando-nos en atras qüestions, importants, sin dubda, s’ha deixau, por impopular, por cansa, por fé en las institucions, por la imposibilidat de chuntar-nos en una cambra sin acabar a lapos u por lo que siga, toda luita y reivindicación politica. Entre ellas, la luita por la oficialidat. Asinas que sisquiá siga iste curso 22/23 lo que recuperemos ixa viella y vital demanda. Nomás con tener ixo claro, ya s’empecipiaría un nuevo camín.

miércoles, 7 de septiembre de 2022

Opinions dichitals

Quan estudiaba electronica bi heba dos brancas que, a primer vista, teneban poco a veyer: l’analochica y la dichital. La diferencia mas basica ye en las valors que pueden prener las magnitutz medidas. En dichital tot se mide seguntes dos valors: zero y uno. Asinas que qualsequier atro numero cal construyir-lo a traviés de combinacions d’ixos zeros y unos, que son la representación, en realidat, d’atros parametros como lo voltache. Un valor entre 4 y 5 voltios en un circuito, por eixemplo, representaría un uno, y uno d’entre 0 y 2 voltios un zero. No i hai atras posibilidatz. ON/OFF. Funciona/no funciona. En analochica, manimenos, cada valor tien un resultau diferent. Un eixemplo cutiano serían las luces. Un interruptor “dichital” puet estar activau u no y tendremos luz u no en tendremos. Un “analochico” sería una d’ixas ruedetas que fan que la luz d’a lampa tienga mayor u menor intensidat. I hai infinitos valors entre la “luz total” y la “foscor total”. Ya podetz entrefilar-tos que ye mas embolicau que isto, pero cuento que la explicación ye prou pa la intención d’o post.

Quan se diz que vivimos en una sociedat dichital se gosa fer referencia a la cantidat de cataticos que fan servir la electronica dichital y la informatica en la nuestra vida cutiana. Pero antimás creigo que tamién nos hemos creyau una sociedat dichital quanto a la manera d’opinar de quasi tot: con zeros y unos, sin toda la infinitidat de valors que i hai entre ixos dos numeros.

En zagueras nomás se puet amar u odiar lo que siga. No puetz estar-te indiferent. No te puet fer simplament una mica de goyo, u creyer que tien cosas buenas y malas. Isto s’aplica en politica, prou que sí, pero tamién en qualsequier atro campo: cultura, aficions, moda…

Un comercial, quan nos daba la maldita enqüesta de satisfacción que imposan agora las interpresas, nos avisaba a escuchetes de que nomás valeba lo 9 y lo 10 como “bien” y que toda la resta de notas yeran “mal” y no cobraría no se qué plus. Describe perfectament la dichitalización social que en charro, en pasar d’ixa escala mas cercana a l’analochica - encara que no pas sensu stricto - a la binaria.

En electronica i hai circuitos que responden a l’inte a l’estimulo d’entrada. Malas que s’activa una tecla, por eixemplo, s’enchega la luz. N’i hai d’atros que van a moniquet. En ixos, la luz iría puyando la suya intensidat poquet a poquet dica plegar en la valor final que se deseya. Ista sociedat dichital, en iste sentiu, tien tendencia a estar d’os primers.

Asinas que malas que se publica la zaguer canción d’o grupo de moda, amaneixe lo trailer d’a siguient serie de l’anyo, s’informa d’a mida politica que siga… de camín totz hemos de estar en lo zero u l’uno. A l’inte y sin pasar por garra valor meyo. Sin tiempo pa poder analisar con calma lo que i hai u puet haber-ie de bueno y de malo.

Amo y odeo cosas. Prou que sí. Soi una persona muit apasionada y quan bella cosa m’emociona, pa bien u pa mal, me hooliganizo una miqueta, he de reconoixer-lo. Tampoco no me pienso que siga malo. De feito, tiengo tendencia a desconfiar d’as personas mielsudas. Pero chunto a ixas pasions y opinions radicals, en convive una patacada d’atras que traviesan totz ixos valors meyos. De muitas novedatz tardo a saber qué tiempo en formar-me una ideya, habendo de pensar-ie, repensar-ie y remugar las suyas virtutz y defectos. Y en veyendo las opinions d’otri, i hai vegadas que cambeo d’opinión. Porque sí, ixo ye posible y mesmo sano. No entiendo que bi haiga tanta chent que siempre, tot y a l’inte, le pareixca u una choya u una mierda.

Sí que ye verdat que tamién en ista sociedat dichital i hai una tercera valor antiparte d’o zero y l’uno, d’o fav y lo hate: lo meh. Ixa expresión popularizada pa expresar que una cosa ni t’emociona ni t’encarranya, ni fredor ni calor. Ixos mehs tienen lo problema de condensar tot lo rango d’opinions intermeyas, pero la virtut de dar una salida a ixe maniqueismo tant ixemenau. Asinas que a yo, como expresión, lo meh me pareixe una mica meh.

Una vegada mas me pareixe un problema derivau d’a velocidat que nos exiche iste sieglo XXI. Si tardamos en opinar d’una cosa, quan lo faigamos no i habrá dengún a qui le importe un sacre. No pasa - u no habría de pasar - cosa por reconoixer que no s’ha teniu tiempo pa formar-se una opinión. No se nos habría de demandar de camín un chuicio global sobre lo que tien virtutz y defectos. 

Iste post se puet chuzgar baixo muitos parametros. En tres segundos y sin releyer, ¿que’n opinatz? Pa yo: meh.