viernes, 31 de julio de 2015

Podemos, CHA, IU y as collas parlamentarias

Articlo de Maru Díaz, diputada de
Podemos, en Heraldo
De polemicas, en vivimos terne que terne en ista tierra. De grans y chicotas, de serias y d’absurdas, como a zaguera d’a fresquera municipal. Heraldo gosa d’estar o patrocinador d’istas segundas. Una, que se queda en un punto medio, ye la alcurrida fa bell diya arredol d’a formación d’as collas parlamentarias y de que CHA y IU s’haigan quedau sin colla parlamentaria propia.


Como talment bi haiga bella lectora que no siga guaire feita a la politica institucional, talment cal explicar lo d’as collas parlamentarias. As diputadas d’as Cortz d’Aragón s’organizan en collas parlamentarias. Cada colla ha d’estar formada por, lo menos, tres diputadas. A cada colla se l’asigna un espacio en Cortes, proporcional a las diputadas que tien, uns diners, una representación en as collas sectorials, etc… Todas as diputadas que no sigan en garra colla quedan en o clamau “Grupo Mixto”. Dica agora, siempre pasaba que as diputadas que se quedaban en ixe grupo mixto yeran d’o mesmo partiu. IU u CHA, por un regular. Pero en ista lechislatura, ni IU ni CHA podeban fer Colla Parlamentaria propia en no plegar en as tres diputadas que cal ta fer-la.


Dende a creyación d’o parlamento aragonés moderno, como muito bi ha habiu cinco partius y, alavez cinco collas parlamentarias. Bella vez ha pasau que bell partiu s’ha quedau por debaixo d’ixe minimo de tres, pero como no yera que uno, o “grupo mixto” yera de tot ocupau por un partiu y, a efectos practicos, teneba colla propia. En ista lechislatura, tanto IU como CHA han quedau por debaixo, lo que les fa haber de compartir ixa Colla Mixta.


Dica astí, lo que ha pasau y o reglamento. Lo que demandaban CHA y IU yera de cambiar-lo de propio ta baixar a muga de tres a dos, que CHA tenese colla propia y IU se quedase con a mixta entera ta ellas.


Ya dende un prencipio lo de cambiar leis u reglamentos seguntes convienga ye, como poco, zaborrero. Ye alto u baixo lo que quiere fer o PP con a lechislación electoral. Como con a lei actual pierde concellos encara que siga o partiu más votau, cambea a lei ta que o partiu más votau siga qui gubierne. Con tot y con ixo tampoco no creigo que siga un cambio inchusto ni un apocalipsi ni cosa parellana. No tiengo garra problema filosofico u etico por o feito de que se constituiga colla parlamentaria con dos u con tres diputadas.


Pero ¿por qué cal cambiar-lo?. Porque os tiempos d’intervención son menors? Bueno, se puede ixamplar ixos tiempos ta que tiengan mayor visibilidat. Por una mayor representatividat en as comisions sectorials? Ummm, talment siga una sobrerepresentación, pero cuento que tampoco no bi habría mayor problema. Agora bien, si ye porque s’ha feito un calculo masiau optimista d’os hipoteticos resultaus y s’ha malfurriau en una campanya electoral uns diners que no se tienen…. pues lo siento muito, pero no. A crisi economica por a que ye pasando CHA le ye levando a prener prous decisions más penibles, en a mia opinión, que de cutio. Talment habrían de reendrezar a traza de chestionar o partiu, en cuentas de fer seguntes que shows culpando a atros d’haber perdiu a gran base social (y electoral) que un diya tenioron.


Ye curioso que dimpués de foter-se quatre anyos presumindo de levar “a voz d’Aragón” t’o Congreso espanyol, agora digan que “se quedan sin voz” por no tener colla propia. En o Congreso espanyol, Yuste yera un d’os 11 diputaus d’una colla parlamentaria minoritaria. Bi heba un total de 350 diputaus y sisquiá estió toda la lechislatura, pero levaba “a voz d’Aragón”. En o Parlamento aragonés, serán dos d’as tres diputadas d’una d’as seis collas parlamentarias. Tienen dos de 68 diputaus. Y se quedan sin voz por no tener colla propia? U antes u agora mienten. U simplament, exacheran en ambas situacions.


Articlo de Gregorio Briz (CHA) y
Patricia Luquin (IU) en Heraldo
Ye normal que CHA presumise d’a faina de Yuste en Madrit. De feito, reconoixco que muitas d’as intervencions que tenió estioron prou bien. Pero pintaba lo que pintaba. Ni menos ni más. En as nuevas Cortes aragonesas, CHA no va a estar sin voz por o feito de no tener colla parlamentaria. No han teniu garra problema en compartir colla con IU en Espanya, pero agora pareixe una trachedia.


A rematadera d’a sobreactuación ye o feito de contimparar-lo con a “Lei Mordaza” pepera. De verdat me son contimparando una d’as mayors enrestidas contra as libertatz d’expresión, prensa y asociación que bi ha habiu en a “democracia” moderna, con que les saquen bells diners d’a suya asignación? Por favor, sigamos serios.


Os chunters se feban cruces istos diyas y feban por tuiter una campanya ploricona con o hashtag #HayTiempoHastaElMartes. Una d’as campanyas más furas que les he visto en zagueras. Y tot por dos razons: continar cremando a Podemos y os diners. Quan digo continar ye porque, sobre tot dende a suya militancia, bi ha habiu, quasi dende o naiximiento d’a formación, una quimera contra Podemos, quasi mayor que contra o PAR. Muito más que la que le pueda tener IU. Pero istos diyas, con a coda preta, baixoron o discurso ta emparar as negociacions y, en perder, tornoron con a rasmia de cutio y as debantditas barbaridatz d’a Lei Mordaza.

Tiengo antimás o barrunto, más que fundau, de que si a situación hese estau de revés, si de CHA hese pendiu de dar-le colla propia a Podemos, hesen feito exactament lo mesmo, con os mesmos argumentos.


Con tot y con ixo, creigo que aquí ye Podemos qui ha perdiu la partida. De feito, creigo que la partida la hemos perdida muita más chent. A mayoría d’o publico no entiende os motivos de Podemos, y l’importan igual. Con lo que s’ha quedau ye con que Podemos ha rebaixau a capacidat d’expresión parlamentaria de CHA y de IU. Ixe ye o mensache que ha plegau. Tamién gracias a Heraldo y cía que no deixan pasar-ne una. Talment as motivacions fuesen buenas, pero Podemos ha chugau mal as cartas suyas. Barrunto que bi heba muitas cosas en as negociacions d’a Colla Parlamentaria y Podemos podría haber revlau en iste afer, conseguindo atras cosas a truca. Talment son por esmaliciar. U talment son esmaliciaus y m’he perdiu bell espisodio. Quemisio. O feito ye que creigo que, cara t’as votants de cuchas han dau una imachen y bamba. ¿Quantas sabemos lo que realment bi heba dezaga d’ixe Briz alticamau, d’ixos hooligans fendo aparatos por o ret? As que no nos cal tot iste show ta fer-nos una ideya d’os vientos que soflan en cada partiu. A resta viyen lo que viyen y no sé si Podemos sabrá sacar treslada d’iste episodio. Podemos no perdeba guaire permitindo a Colla Parlamentaria propia de CHA y, manimenos, pierde muita imachen (y atras cosas) no permitindo-la.


IU s’ha queixau, con as mesmas razons que CHA, pero sin fer tanto aparato. D'una man, cuento que os vinclos que tien, y os que ye prebando de creyar con Podemos, influyen en ixa menor belicherancia que amuetra. D'atra man, probablement no les cal tanto os diners, porque IU ya fació a suya “travesía por o desierto” fa una decada y sabe como salir-ne. Una “travesía por o desierto” que asperaba sincerament que prencipiase ta CHA en istas eleccions y que, desafortunadament ta ells, ta yo, y ta tot Aragón no les ha plegau. Encara.

Bi ha tiempo ta tot, que son quatre anyos de lechislatura. Ta modificar o reglamento d'as Cortz y permitir que CHA tienga Colla Parlamentaria. Ta que a cucha complegue en muitas atras arias. Ta que as cupulas d'os partius respondan a ixos consensos que as bases ya tenemos en as carreras. Ta sacar-nos todas, as d'a politica viella y as d'as nueva y as que somos en o bell meyo, o carnet d'autenticidat revolucionaria, prener un pozal d'humildat y posar-nos a charrar con l'otri sin pensar en a maniobra que nos son fendo por dezaga. Cuento que tot ixo ye imposible dica aviento. Bi ha muitos niervols por l'anyo que hemos pasau y por lo que nos viene. Pero talment en aviento, ya siga masiau tarde.




martes, 28 de julio de 2015

A importancia d'una buena guida turistica

Ent'o naixedero d'o rio Pitarc
Un recient viache t’Asturias m’ha feito recordar lo important que ye tener una buena información turistica y, sobre tot, una buena guida turistica. A soben, s’ixublida a importancia y a formación que caldría pa que una persona pueda menar una visita u informar a una persona que visita bell puesto. Bellas vegadas pareixe que qualsiquier d’a redolada puede fer de guida y ixo no ye asinas. L’anvista que te quedará pa cutio d’un museu, ilesia, ciudat, monumento, etc… ye de tot diferent seguntes qui te lo explique. En o caso d’o turismo natural mesmo te puede causar un problema bien gran. As guidas turisticas son un treballo muit mal valurau que hue quiero mirar d’esfender y de fer vistera a suya importancia.


Aprestando o viache t’Asturias, demandemos información a la Oficina de Turismo suya. Prou amables, nos ninvioron bell cuadernet tematico sobre lo que querebanos viyer. Un d’os diyas, querebanos visitar bella ciudat, pero no sabebanos si Oviedo, Xixón u Avilés. En leyendo as guidas, pareixeban escritas por una de Xixón, pues cosa convidaba a visitar Oviedo. A la fin, nos deciciemos por a capital asturiana porque i querebanos viyer a un amigo, y nos trobemos con una ciudat bien pincha, con prous puestos que visitar y que nos quedemos con firmes ganas de tornar-ie.


Valurar lo que cadagún tien, en a suya mida, ye important. A soben te trobas con infra y sobrevaluracions. En Sigüenza, ya en fa bell anyo, nos yeran amostrando a catedral. Ye una d’as que más goyo m’han feito, y en he visto quantas. Puet estar que precisament por lo impresionant que ye, que infravaluren seguntes qué cosas. Nos chocó a-saber-lo quan, en una d’as salas, o guida, sin cambiar ni un sacre o tono de voz dició “... astí alto un cuadro de El Greco, y astí dezaga pueden viyer…”. Arale y yo nos miremos enarcaus. - “¿Ha dito El Greco, verdat?” - nos preguntemos telepaticament. Quan a visita continó nos quedemos meyo minutet pa poder viyer un poquet más a monico o cuadro, La Anunciación, que, como tantas atras cosas suyas, ye una maravilla. Por cómo lo dició o guía, ixe cuadro pintaba lo mesmo en a ilesia que Pichorras en Pastriz. Podeba haber habiu un poster de Pokemon, que lo hese dito con a mesma emoción.


O caso contrario, a sobresaturación d’información de tot irrelevant, lo viviemos en a Catedral d’Oviedo. Sisquiá nos dioron a opción de visita guidada, asinas que pillemos una audioguida, que yera de baldes y creyiemos que nos fería honra. A catedral ye bien gran y l’audioguida teneba información de cada raconet. Pero ixa información, en a mia opinión, yera de tot mal organizada. D’una man en todas as capillas, racons, cuadros y figuretas t’explicaba qui heba estau l’autor u restaurador. Encara que prou que cal valurar o treballo de todas ixas personas, talment s’haiga de fer d’atras trazas. No puet estar que de dos minutos de audio, meyo se malfurrie en dar-me nombres de tot irrelevants y que ixublidaba a l’inte. Alto en a ilesia, bi heba un museu catedralicio. En cada sala, l’audioguida feba una explicación, an que, atra vegada, s’aturaba en nombres u datos que no alportan cosa, como as dimensions d'os cuadros. En una d’as salas, nomás me chocaban dos cuadros, de dos apostols, que me pareixioron prou curiosos en estar muito diferents a lo que se fa por un regular con istos personaches. Los amostraba dando a esquena, pero chiraus ent’o pintor. Me metié l’audioguida que me comentó tot lo que bi heba en a sala, incluyiu bell zarrio que no sé encara que i pintaba. Tot, fueras d’os dos cuadros, que me quedé sin saber-ne más.


Santa María de Naranco
Ni cal decir que lo de as audioguidas me pareixe un mal sustituto de una guida humana. Si no bi ha atra cosa, fa honra, prou que sí, pero no fa que sacar puestos de treballo y fer que una visita se quede baqueando. A cantidat de preguntas que se me quedoron en a boca en a debantdita catedral! Y en muitas atras, prou que sí. As guidas electronicas habrían de fer-se servir nomás t’as visitas en luengas que no controle garra guida humana y poco más. A excepción, no pas a norma.


Atras d’as situacions d’a falta de consideración d’o treballo d’as guidas turisticas ye a que se da con a intromisión d’a ilesia catolica en o turismo eclesiastico. Ya m’ha pasau quantas vegadas de plegar en un monumento d’orichen relichioso y que, en cuentas d’una guida turistica, te lo explique un mosén u moncha. Con resultaus de toda mena. Buens y malos. En a visita ta Santa María d'o Naranco, en Oviedo tamién, o mosen nos lo explicó tot muito bien. U millor dito, muito correctament. No teneba garra fallo, no se deixaba garra detalle, … y no teneba mica emoción. Pareixeba una audioguida pues charraba como si l’hesenos dau a o “play”, repetindo una cantinela como si estase recitando o Credo. No gosabas preguntar-le cosa, no sía que le quitases d’ixe estau entre hipnotico y mistico.


Cuento que buena parte d’os mosens y monchas que fan ixe treballo, antimás de sacar-les-ne a guidas profesionals, que tampoco no les ne sobra, no tienen garra titulación relacionada con o tema. Y encara que la tiengan, a soben les falta tamién as capacidatz pedagochicas que ha de tener una guida. A sola razón ta tener ixe treballo son relichiosas, en un nuevo caso de tractamiento de favor a la ilesia catolica y de intrusismo profesional.


A información turistica no se queda en as ilesias y monumentos, prou que no. P’as amants d’o senderismo como yo, aprestar a cursa ye prou important. Pa ixo ye menester muitas cosas. Entre atras, que bella persona que conoixca o terreno te reconte lo que te i trobarás. En o caso d’o turismo natural estar bien guidau ye mesmo más important ya que, encara que por un regular no pasa cosa, una error chiqueta puede meter-te en un empandullo bien furo.


Dos eixemplos de buena y mala guida los teniemos en iste viache asturiano. O bueno, o primer. En o Parque de Picos d’Europa bi ha un centro de recepción y información en Cangas d’Onís. Querebanos fer bella cursa por a redolada. En primeras hebanos pensau en o Cares, que ye famoso y que nos lo heba recomendau un amigo. Quan pleguemos en a oficina, a persona que nos atendió a escape entendió lo que querebanos: una ruta exichent pero no matadora. Nos explicó que Cares yera una mica o “Coda de caballo” asturiano. Una ruta “que fan mesmo as viellas” y an que “te trobas meyo Vicaya”, seguntes as suyas parolas. Afortunadas as parolas u no, o feito ye que l’entendiemos a l’inte y eslixiemos de fer-ne unatra que pareixeba una mica más fura. Nos explicó cada detalle. A on bi heba fuents y refuchios, quals yeran as pendients, o tiempo que nos prenería fer-la, etc… Una persona que conoixeba perfectament o medio.


La Farrapona (muga Asturias - Leyón)
O contrario que lo que viviemos en Somiedo. Quan i fuemos nos endrecemos, como de cutio, t’o centro informativo de Pola de Somiedo. Le expliquemos a la persona que nos atendió que querebanos fer una cursa, no guaire fura, de bellas 4 u 5 horas, sin costeras prou bestias. Nos dio bella opción y en triguemos una que se suposaba facileta. Feba prou calor y en l’anterior cursa, lo heba pasau una mica malament por a posibilidat de quedar-nos sin augua, ya que soi de facil deshidratar. Asinas que le preguntemos si bi heba fuents por o camín, con respuesta afirmativa. Un "prou que sí, sin problemas!", concretament. O camín teneba dos partes. Una, alto u baixo facileta, dica un sinyal. L’atra, prou más dificil, por un camín esborrau, con prous costeras, y con una solana que pa qué. O camín remataba en un ibón repoliu, pero que teneba una repolida carretera por an que plegar-ie sin problemas. A sola fuent que trobemos, y dimpués de preguntar, yera ya bien pasau l’ibón t’an que ibanos. Y en cuenta de 4 u 5 horas por un caminet facil, nos trobemos con una cursa de quasi 8 horas, parte d’ellas por un camin prou malo, y que habiemos de fer campo a través en qualques ocasions, en haber-lo cacegau. D’augua, bien se vale que trobemos a fuent, porque nos la hebanos acotolada en a puyada y, con tot y con ixo, pleguemos en l’auto sin una chisla. Hebanos calculau de plegar en Pola sobre as 18, pa poder mercar bell queso que trayer-nos ta Zaragoza ya que yera o zaguer diya d’o viache. Prou que quan i pleguemos ya yera tot zarrau. Fueras d’o bar, an que nos pretemos firmes sidras pa brindar por a cursa, que a la fin estió prou maha, y maldecir a la moza que nos heba informau.


Somos feitas a cursas más furas que no ixa. A puyar piors costeras y ir por piors camins. Pero no nos lo asperabanos. L’augua se nos acotoló muito antes d’a fin d’o camin ya que no la racionabanos. O camín lo hebanos prencipiau tarde, confiando en que durase as 4 u 5 horas que hebanos demandau. No sabebanos que se podeba acceder en auto a l’ibon. A zaguer parte d’o camín no yera bien indicau. Si hesenos prencipiau más tarde, si no hesenos trobau a fuent, si no estasenos feitas a andar por o mont, …. podesenos haber teniu bell problema bien gran. No lo teniemos y disfrutemos d’o paisache y d’o camín, pero ixe yera o prencipio d’as tipicas historias que rematan con un rescate en montanya y tú pensando “putos dominguers, que no tienen ni ideya de cosa!”.


Cuento que a persona que nos informó no gosa de puyar guaire por astí, ni conoixe en qué estau ye ixa segunda parte d’o camín, ni recordaba si bi heba fuents ni do yeran. Pero quasi m’estimo más de que no me informen a confiar en una información erronia.


Nomás puedo rematar iste post remerando una d’as millors guidas que tenié en a vida mia. Estió en un viache que faciemos por a vesant norte d’os Pirineus y que, de tornada, aturemos en Roncesvals. Yera un puesto que, a priori, no me deciba guaire. Pero a muller que nos fació a visita yera tot pasión. Como recontaba cada pieza, cada edificio, tot metendo-lo en o contexto historico… No nomás te deciba o sieglo u te lo enmarcaba sino que te feba imachinar como estió a vida de l’obcheto que’n charraba, como se viviba en cadagun d’os puestos que bi heba, como s’heba construyiu, tot…. Quan s’ama una cosa de verdat, ixo se transmite y ixa persona amaba Roncesvales y amaba contar-le-ne a la resta d’a chent. Sisquiá bi’n hese más como ella y sisquiá o suyo treballo estase más valurau socialment y economica.

sábado, 25 de julio de 2015

Complegar u no complegar?

Acto de Ahora en Común (Foto: Arainfo)
Pa leyer iste post cal prencipiar dende bell supuesto. D’una man suposaré que Podemos, IU, CHA y atras organizacions politicas son fuerzas transformaderas d’a sociedat en a endrecera que todas as lectoras d’iste blog cuento que queremos. Tamién suposaré que o solo feito de que a plegada en o poder de una u todas istas fuerzas, chuntas u separadas ye un feito deseyable. Tot isto ye discutible, prou que sí, pero no ye l’obchectivo d’iste post.

Aqui quiero charrar d’a millor traza de conseguir que gubiernen ixas fuerzas. “A cucha, ezquierda, zurda” u lo que quieratz, “as d’abaixo”, “alternativas”, “ecosocialistas”,... lo que más tos agane. Cuento que o debat, o gran debat, que ye habendo-ie agora mesmo ye si, t’as eleccions espanyolas, se i va de conchunta u no pas, con un nombre u unatro, y de qué trazas. Si creyes que aquí trobarás una respuesta, deixa de leyer. Lo confieso en iste segundo parrafo: no tiengo ni ideya de qué ye lo millor.

Se critica muito, y con razón, a Pablo Iglesias y o suyo sector podemita, de no querer nian prencipiar a negociar una compleganza que diese un “Ahora en común”. Muitas d’as personas que lo fan, pareixen haber ixublidau lo que deciban quan Iglesias demandó lo mesmo a Izquierda Unida y se’n esmelicoron, pero rai ixo agora, que cal mirar-se entabant. O caso ye que, todas as declaracions d’a cupula podemita sinyalan enta razons estratechicas pa refusar ixa hipotetica compleganza. Nunca no ideyolochicas. En tot caso, las deixan en un segundismo plano. Se pierde asinas, una oportunidat historica pa que toda la cucha “de verdat” vaiga chunta ta unas espanyolas, mesmo con oportunidatz de ganar as eleccions.

Dende as partidarias d’a compleganza estilo “Ahora en común”, recuerdan os buenismos resultaus que han teniu plataformas parellanas en as municipals d’as grans ciudatz, conseguindo quedar-se con Madrit, Barcelona u Zaragoza, entre atras. Tamién que Podemos no ha conseguiu en muitos d’os parlamentos que se presentaba uns resultaus tant buenos como asperaban.

Qual ye a estratechia que fería que ganasenos as eleccions? Ye verdat que a compleganza en Zaragoza, por eixemplo, ha estau tot un exito. En 9 meses s’ha conseguiu plegar en o poder municipal pero tamién creigo que cal considerar bell dato. O proceso de compleganza, ha costau muitos meses. Entre chent que ya se conoixeba, que veniba treballando de conchunta dende feba muito tiempo en l’activismo social. Con ideyas muito parellanas sobre cómo gubernar Zaragoza. Vivindo todas a menos de meya hora as unas d’as atras. Y con tot y con ixo costó a-saber-lo.

Compleganzas puntuals
(Foto: Arainfo)
Se consiguió prou más presencia en radio y televisión que nunca no m’hese pensau. Se fació un debat cara a cara entre o candidato de ZeC y o d’o PP. Se metió una carpa en o Pilar por an que pasoron cientos de personas. Se informó por toda la ciudat. Y dimpués de tot ixo, o diya d’as eleccions, arrienda personas encara no sabeban qué yera ZeC ni si lo refirmaba Podemos u no pas. (As razons, dan t'atro post) Probablement ixa circunstancia nos fació perder votos como ta conseguir un u dos concellers más. Lo que hese significau ganar as eleccions u no pender d’o voto chuntero. Yo mesmo conoixco chent, votant de Podemos, que leye periodicos, y que a politica l’intresa bella miqueta que, a l’atro diya d’as eleccions no sabeba guaire bien qué yera ixo de “Zaragoza en común”.

Podemos, en as primers eleccions que se presentó, optó por a opción contraria. Meter a cara de Iglesias en cuenta d’o logo que, en ixas envueltas, pocas conoixeban. Tiengo un amigo que diz que no les votó por ixo, encara que cuento que son atros os motivos que le levoron a no votar-les. Pero ¿quantos votos perdioron por a supuesta bamba de Iglesias? ¿Y quantos ganoron d'a chent que reconoixió a papeleta a l’inte? Creigo que nunca no sabremos a respuesta a ixo.

Podemos ha creixiu muito, ye verdat, en istos meses. Se i ha uniu muita chent con gran experiencia politica intra y extrainstitucional. Ixo, de conchunta con as nuevas ideyas, propuestas y trazas de treballar d’as “virchens politicas”, fa una barracha que da cosas d’o millor y d’o pior. Pero cuento que encara les cal un emparo externo si quieren ganar. Y no digamos ya si lo que quieren ye verdaderament “representar a las d’abaixo” u “levar a voz d’os movimientos socials”. Buena parte d’ixos movimientos socials y d’ixas “d’abaixo” no son adintro de Podemos, ni ganas. Por os motivos que sían. En bells territorios como Euskal Herria u Catalunya, lo que preba de fer Podemos, ya lo feba Bildu u as CUP fa lustros. Asinas que Podemos no puede deixar a un costau a toda ixa atra “cucha transformadera” u como le quieratz decir.

A estratechia de “Ahora en Común” ye a que eticament creigo que ye la correcta. Una compleganza de verdat entre todas as fuerzas que calga, revlando todas en lo que no podamos apachar-nos, y que prencipie a cambiar as cosas en l’estau. Pero no sé si ixe “Ahora en común” quitaría más votos que simplament Podemos. Y ixe ye o miedo que tiengo. Que se creye una "cosa ideyal" que pierda as eleccions.

Muita chent le tien quimera a IU, y no digamos ya a las cuchas territorials tipo CHA, lo que sacaría votos a ixe posible pacto. Podemos ya fa tiempos que no ye “inmaculau” a os uellos d’a sociedat, pero contina estando muito menos “tacau” que a resta de partius. No entro si ixo ye chusto u inchusto. Simplament ye asinas. O mesmo razonamiento funciona d’o revés. Entre os votants de CHA u IU bi ha qui odian a Podemos y probablement deixarían de votar una lista conchunta. Asinas que todas ixas sumas que se fan, achuntando os votos que han teniu os partius por separau, en a mia opinión, no valen pa cascar-la.

Os resultaus electorals no se pueden prevenir ni interpretar, a priori ni a posteriori, fendo simplas sumas. O solo feito d’haber planteyau un “Ahora en común” y que Podemos lo haiga refusau como lo ha refusau, sin guaire debat y con una actitut una mica farute, ya habrá moviu bell voto enta un puesto u unatro. Si a la fin bi hese proceso, cómo se fese y dica do se plegase podrían cambiar muito os votos. Pa bien u pa mal.

Podemos emparando a Santisteve
(Foto: Arainfo)
Atro entrepuz, y bien gran, ye o metodo. Como ya he dito, costó nueu meses (en realidat muitos mas) conseguir a compleganza a libel local, y se fación muitos poders ta que no fuese un pacto entre cupulas. Repito, en una sola ciudat, no masiau gran, y conoixendo-nos todas dende fa tiempo. Pretender que en cinco meses se plegue en una compleganza a libel de l’estau sin que siga un pacto entre cupulas ye inchenuo, absurdo u una enganyufla. Yo no tendría garra problema en que se fese asinas, pero bi’n ha atros que sí, y entiendo as suyas obchecions.

Totz istos argumentos se podeban emplegar, y de feito s’emplegoron, contra as compleganzas municipals. Manimenos, a la fin funcionoron de bitibomba. Muito millor que no creyeba yo mesmo, partidario ilusionau d’ixas listas. Cuento que muito millor que no se pensaban qui bi treballoron más firme. Por ixo, creigo que un “Ahora en común”, bien chestionau, sí que tien o potencial ta ganar as eleccions espanyolas y cambiar-lo tot. Son Iglesias y Garzón as personas adecuadas ta menar ixe proceso? Hue, yo creigo que no. Y me pienso que ye de mal cambiar ixo. Talment más entabant siga posible.

Queda por valurar adecuadament o impacto d’o voto rural. Cuento que Podemos no i tien guaire implantación, pero tampoco no sé si un “Ahora en común” pillaría guaire voto, u a movilización que pueden fer en ixe entorno. Pero, como de cutio, os lugars son ixublidaus de tot en as estratechias electorals.

Podemos no ganará istas eleccions. No nos ferá o morro clo. Quedar-se por debaixo d’un 20 % de voto, ta yo, sería un fracaso. Talment a compleganza haiga de prencipiar iste aviento cara t’as venients eleccions, con as cartas sobre a mesa y a relación de fuerzas bien platera. Talment s’haiga de construyir con bell “rodache” d’as experiencias municipalistas y surtindo dende ellas. Talment, talment, talment, …

Lo que sí que soi seguro ye que ta que qualsiquier cosa funcione hemos de superar todas y totz, ixas quimeras que nos tenemos. A la fin, todas, ciudadanistas, comunistas, indepes, etc… hemos compartiu luitas, pancartas, plataformas, asambleyas, .... y tricolotiar-nos por detalles u puestos ye lo que son deseyando que faigamos a mafia que nos gubierna.

Como ya he dito en prencipiar, no tiengo garra respuesta en iste post. Tiengo masiaus argumentos a favor y en contra d’a compleganza, tot pendendo de como y qui la faiga y d’o proceso y o resultau. Bi ha qui esfiende a tot trance una u l’atra opción y d’os dos costaus siento muitas cosas sensatas, asinas que aspero as vuestras argumentacions. 






martes, 7 de julio de 2015

En un lugar de Cantabria. Una historia no nacionalista

A nueit s’acercaba y se feba fosco. Levabanos ya qualques horas guiando y a cansera prencipiaba a apoderar-se-nos. Bell kilometro antes, ha hebanos preso a decisión de dormir en l’auto en bell lugar que trobasenos un puesto t’aturar. Una pancarta traviesaba o lugarón por an que pasabanos. “Feria del pincho”, i meteba, en una maquetación d’ixas que s’aprenden en os cursos de WordArt que se dan pa tener a os buelos entretenius os maitins d’hibierno u a os ninos de verano. A gana y a falta de qualsiquier criterio a priori ta refusar ixe lugar, nos facioron decidior de quedar-nos-ie.


Deixemos l’auto en una carrera que no pareixeba guaire transitada. Nos cambiemos una miqueta de ropa, pues ibanos sudadas y d’aforro, y ya feba una miqueta de frescor. Una carrera nos levaba dende l’auto, pasando por un quartel d’a Guardia Civil y una retonda con un sinyal d’Espanya, dica un prau, an que se feba la debantdita “Feria del pincho”. Baixemos a carrera. O lugar yera o tipico lugar "de carretera". Mas poliu que muitos atros. Casas baixas y muitas de piedra, con amplos chardins. En rematar a carrera, chiremos ta trobar-nos con a Feria. Pero yera más que una Feria del pincho. Yera, en realidat, a Feria de l’espanyolismo.


O centro d’o prau yera ocupau por una ampla carpa. D’o teito penchaba un gran sinyal espanyol, a o canto d’atro sinyal de Cantabria. En cadaguna d’as vintidos columnas que aparaban a carpa, dos sinyals chiquetz d’Espanya decoraban a estructura metalica. Arredol d’a carpa, bella decena de casetas ufriban as suyas delicatessen culinarias a qui bi yeranos. Unas casetas prou pinchas, feitas de fusta, con una chiqueta pero apanyada cocina. Prou que sí, baixo l’alero, un sinyal d’Espanya recorreba a parte d’alto d’a caseta. A mayoría antimás yeran decoradas con fileras de sinyals d’Espanya, u con sinyals d’Espanya chiquetas en as cantonadas.


Os pinchos yeran bien variaus. Bi heba de tot. Chiquetz kebabs, embitius, hamburguesetas, banderillas, tacos, … Totz ells decoraus con un “palillo” que, en a punteta que no puncha, yera decorau por ¿lo endevinaría dengún? Sí, un sinyal d’Espanya!


Quan i pleguemos, yera rematando una chiquet demostración d’una colla de bailes latinos que heban feito baixo la carpa. En un troz de suelo de fusta pa que se i podese bailar bien. Entre que minchabanos bell bocau prencipió la orquesta. Yera una orquesta d’as tipicas. Garra extravagancia. Mocetas con os vestius bien preticos, amostrando toda la carne posible, fendo forzadismas coreografías, propias de una versión alzheimerica de Paula Abdul. Os mozos, mas abrigaus pa no resfriar-se, teneban un repertorio clasico. Pasodoble y vals, como no, ta prencipiar. Y entre as cinco primers cantas, “Suspiros de España” y “Que viva España”.



Apanyemos as cosas de l’auto, chiremos a clau d’o contacto y saliemos t’a carretera enta Asturias. Dixemos dezaga un repoliu lugarón de Cantabria, pleno de personas y sinyals no nacionalistas.


Entre que sonaban tant conoixius y respetaus himnos, apolochía “d’a raza”, minchabanos con uellos de caparra os nuestros bocaus, pasaus con bella mica de biera. U millor dito, una bebida castellana parellana que le dicen “Mahou”. Tenebanos tamién, porqué no decir-lo una mica de miedo, pero os habitants no pareixeban agresivos en ixa etapa d’a nueit.


Tanto entre os cambrers como entre o publico, nos trucó lo ficacio que tanta chent levase chapers de tant variadas trazas. “Costumbre local” - pensemos. A l’atro diya, nos enteremos de que bi heba concurso de chapers. Nos quedemos con a incognita de saber si a ganadora heba estau beluna d’as personas que portiaba un chaper con o sinyal d’Espanya.


Pasadas las dotze, ya yeranos una mica cansas y as garras nuestras no s’adubiban a bailar beluna d’as coplas u productos mosicals d’os 40 que sonaban. Decidiemos de marchar a dormir. Asinas podríanos amaitinar y continar enta Asturias, o nuestro destino.


A uembra d’os arbols nos permitió de dormir un rato largo. Encara que l’auto no ye una mansión, pa pasar-ie una nueit ye prou. Con tot y con ixo, de maitins siempre cal un escusau an que atrapaciar-te una miqueta y fer as necesidatz que tenemos todas quan dispertamos. Dentremos en o primer bar que trobemos. Por o camin viyemos a siede d’o PP y bell cartel d’o PRC, o partiu de l’escritor intelectual Miguel Angel Revilla, president y un gran eixemplo d’o sano cantabrismo.


O bar yera un bar normal de lugarón. Una barra altera y de fusta recorreba o canto cucho d’o local. En dentrar, alto, una televisión crebaba o silencio d’una clientalla inexistent. Una tortiella de trunfas bien gorda y bella lata de musclos yeran o solo minchar que ufriba un cambrero que pareixeba un clon (más) chonflo de Jose Ramón Marcuello. En o fundo, un sinyal d’Espanya bien gran, feba de cantonada. En cuenta de l’escudo, a silueta d’un toro cambiaba o monarquico y viello argüello espanyol por a modernidat de l’argüello d’a tortura animal asociada a una mara de brandy, o más cunyau d’os alcohols. Dencima, bell calendario de ferias ganaderas, tres calendarios de mozas espulladas y un de mozos, no se diga d'ixe bar que ye masclista.


Os periodicos locals siempre me fa goyo de leyer-los, pues informan d’o que “de verdat importa” a la sociedat. En iste caso, antiparte d’as pachinas de politica an que o PRC repartiba os puestos de poder entre os suyos, me trobé con titulars que me trucoron o ficacio. El diario montañés titulaba con un “Marihuana a paladas” una noticia d’un trobo de canyimo y informaba sobre o naiximiento d’un vediello con dos tozuels en un lugar. Pareixe que en Santander no bi ha carril bici ni tramvía, u que no son tant conflictivos como Heraldo informa que son en Aragón. O mapa de l’orache incluyiba lugars de Castiella, Asturias y Euskal Herria. Cuento que os tres territorios tendrán continas pleitinas con o gubierno cantabro y El diario montañés por “apropiar-se d’o que no ye suyo”. A lo menos asinas funcionan as cosas por a mia tierra, asinas que cuento que por astí andará parellano.


Ya prencipiaba a fer-se-nos tarde, asinas que fuemos t’o furno local. I merquemos bell poco de pan y bell lamín, que yeranos morrudas y de vacanzas. A furnera, una moza bien amable, nos dio o croissant que me heba mercau en una d’ixas bolsetas de papel con o logo d’a botiga. Me lo leyié, como tot lo que caye en as mans mias, y viyé l’adreza d’o furno: Calle del Generalísimo. Con a dubda de si se referiba a o Cheneral Zod, personache de Superman, ya que no creyeba que en ixe lugar no cumplisen a Lei de Memoria Historica, prencipié a minchar-me o bollo.


lunes, 6 de julio de 2015

Rivera, o Papa y Echenique. Bulos que trunforon en o rete

Con a proliferación d'os retz socials tecnolochicos, l'alparceo ha plegau a momentos bien intresants. Antes mas no sabebanos como prencipiaba una rumor u un bulo. Manimenos, agora poder seguir o suyo recorriu, alto u baixo, dica fer-nos una imachen clara de qui ixemenó qué información y mesmo por qué.

Dende aquel programa an que o can Ricky le minchaba la totera a una moza, y que un trapacil de chent heba visto, o tema d'os bulos m'ha fascinau. ¿Cómo podeba plegar a chent a decir que heba visto qualcosa que no heba visto? Mesmo a creyer de verdat que lo heba visto!!!!

En ixas envueltas u no bi heba internet u yera encara fendo garras. No sé si nunca se consiguió saber como prencipió tot. Hue, regular que lo sabríanos. Con tot y con ixo, os bulos continan ixemenando-se por tot y muestra en son istos tres, que tos recuerdo hue.

O primer, ye uno que me lo minché de tot. Que me plegó por diferents puestos y que reproducié a xarramata en os retz, dica que un compa me dició que yera falso. Ye una imachen d'un mozo choven fendo o saludo faixista, con estetica nazi, y que deciban que yera Albert Rivera, president de Ciudadanos, de chovenon. En iste articlo, explican que ixe mozo no yera Albert Rivera, sino Juan Parejo, un dirichent d'o PP d'Extremadura. Antes de a Rivera, l'adchudicoron a imachen tamién a o PPero Pablo Casado. O caso ye que, antes de que iste compa me decise que yera falsa, m'heba plegau como autentica muitas vegadas y nunca dengún heba dubdau d'a suya veracidat.


A segunda, estié en momentos de trusquir-me-la tamién. Quan o chefe d'os catolicos anterior dimitió, en trigoron a atro que teneba una historia, como totz os mosens, plena de partes foscas. En ixas envueltas yo feba unas colaboracions radiofonicas en Fendo Orella y o tema de l'ateismo les feba firme goyo, asinas que malas que nombroron a Bergoglio chefe d'os catolicos, rechiré tot lo ret en busca de porquería y d'a suya historia. Me plegó no pocas vegadas un "quote" masclistas de tot, que le atribuyiban a Bergoglio charrando sobre o matrimonio Kirchner. Bien se vale que, en estar fendo una faina meyo seria, consulté as fuents y a escape me trobé con que yeran declaracions falsas. Con tot y con ixo, hue encara contino viyendo de cabo ta quan ixe fotomontache.

D'a zaguer en fa bien poco. Fa bell diya Pablo Echenique, qui estió candidato a president d'Aragón por Podemos, tenió una entrevista en a radio. A l'atro diya os mios timelines apareixioron plenos de criticas porque heba dito que Catalunya yera nación historica y no pas Aragón. Yo mesmo facié bell tweet y retweet d'ixa info, dica que belun, con buen criterio, preguntó a on yeran as fuents, o video orichinal u que metesen bella preba d'ixas declaracions. No nomás dengún no dió as fuents (porque no existiban), sino que, a l'atro diya, apareixió un meme con una frase inventada entrecomillada. D'as declaracions orichinals, con prou imachinacion, se podeba deducir que Echenique heba teniu un lapsus linguae, y que en realidat pensaba ixo (cal imachinación, ya lo he dito). Pero entrecomillar unas declaracions que no ha feito ya me pareixe tot un desproposito. A polemica continaba quan escribo isto. Dende que m'enteré d'a verdat, me dediqué a penchar as declaracions de verdat en os foros, pero a mayoría de comentarios ignoraban de tot os nuevos datos y s'estimaban más d'enrestir contra Echenique, contra que siga naixiu d'Archentina y, prou que sí, contra Catalunya. En as argumentacions, por clamar-las de bella traza, ya se viyeba de qué coda yera a mayoría d'os que lo espardiban.

Totz istos tres bulos me los he creyiu por un tiempo mas u menos largo. Bell minuto en o caso d'o papa, un diya en o caso d'Echenique, meses en o caso de Rivera. Quan una información confirma bella cosa que pensamos, tendemos a creyer-la. Ixa actitut ye tant común que mesmo tien un nombre: sesgo de confirmación. Pensaba y pienso, que Rivera ye un faixista, Bergoglio un masclista y que Echenique no tien guaire ideya d'a historia d'Aragón. Asinas que como todas ixas "noticias" iban en ixa endrecera, me las trusquiba goyoso.


Rivera, Bergoglio y mesmo Echenique son criticables y muito. Pero no por mentiras, por favor. Critiquemos a Rivera por a suya ideyolochía espanyolista, por haber teniu, y tener encara, a un mafioso corrupto como Jordi Canyas en Ciudadanos, por ir ta manis con faixistas de los que no s'amagan, etc.... Critiquemos a Bergoglio por as declaracions homofobas que sí que fació en o suyo diya, u por l'actitut que tenió con a dictadura, u por continar estando masclista de facto. Critiquemos a Echenique por as declaracions que sí que fació sobre o catalán en Aragón, por haber deixau l'Europarlamento u por lo que tos agane. Pero no los critiquemos por falsedatz, porque perdemos toda autoridat y no femos que a risa.



viernes, 3 de julio de 2015

Locals aragonesistas. Tierra de barrenaus radio 1x04

De como plegué a tener a ideyolochía que agora tiengo y a intresar-me por a cultura y a luenga aragonesa, d'a mia identidat politica, cultural lingüistica y nacional, bi ha muitas cosas que han influyiu. Una d'ellas, y bien important, ye estada os locals y bars que i soi estau. A la fin, i he pasau horas a trompicuesco, asinas que bella cosas siempre s'apega.

Con bellas personas que empentoron ixos locals aragonesistas y que los facioron funcionar charremos en o 4º Tierra de barrenaus radio, que ya puetz ascuitar u descargar-te.



Borina, conciertos, apegallos, fanzines, revistas, amigas, parellas, mosica, trobadas, charradas, reunions, pleitos, problemas con a poli u as vecinas, charradas, zorreras, "blancazos", accidents, virolla, chentas, cenas, socalces, vermuts eternos, cabos d'anyo, .... de tot pasaba en ixos locals....

De bien chicorrón, conoixié as dos Espelungas. A primer quasi de casualidat y a segunda por pocas pero intensas nueit. En ixa segunda Espelunga ya prencipiaba a viyer como bi heba atras muitas personas con parellanas inquietutz a las mias, pero que'n sabeban muito más que no yo.

A Penya Borina de Nogara y o Dispierta Fierro estioron os scenarios d'as mias nueitz de cutio por muitas anyadas. En Borina, yera increyible de viyer a cantidat de chent que podeba chuntar-se-ie en una nueit de Pilars charrando aragonés. D'o Fierro, que dimpués esdevendría Casa Lambrote ya en charré fa poco. Tenió un papel central entre una parte muito important d'os movimientos por a soberanía politica y cultural en Zaragoza, como punto de trobada y, prou que sí, de borina.

A Enrestida, que naixió tamién con un esprito más bien boriner, se tornó a escape en una alternativa prou seria como centro social. Ye ixe espacio que sabes que siempre puetz contar con ell y que ferán tot lo posible ta meter-te facils as cosas que quieras organizar. Antimás d'haber feito actos de toda mena y de firme intrés.

No cal ixublidar a Chobenalla, atro important achent aintro de "l'aragonesismo" (sia lo que sía ixo), y que tenió dos locals. Uno en Uesca, a finals d'o sieglo XX, y atro en Zaragoza chusto dimpués de que los fesen fuera de CHA.

Aspero que en istas dos horas, que las pasemos tant bien, tos faigan tamién goyo y tos animen a ubrir un local u a colaborar con a chent que treballa firme ta que podamos disfrutar-los.