jueves, 30 de septiembre de 2021

Sano y seguro

A la mía parella, que tien un treballo con muitos mas dreitos reconoixius que no lo mío, le subvecionan parte d’os gastos medicos d’a familia. Pa ixo, lochicament, ha de presentar las facturas y dimpués d’un procedimiento se decide si vale u no y qué parte le pagan. Asinas que, en istos zaguers días he habiu d’ir fendo alcordanza d’ixos gastos y buscando las facturas correspondients. Ye verdat que no ye estau precisament lo mío millor anyo quanto a salut pero, resumindo, las facturas blincan los mil euros.

Mil euros invertius en salut que, u la seguridat social dreitament no cubre, u a lo que me podese dar lo tractamiento, probablement ya no faría falta y, alavez, recurrié a consultas privadas. ¿Seguiría vivo de no haber gastau ixos mas de mil euros? Cal que sí. La mayoría no yera cosas grieus. Seguiría alentando y metabolizando l’aire y la birolla. ¿Tendría salut, en lo sentiu que la OMS y qualsequier con una mica de talento, define como salut (l’estau completo de bienestar fisico, mental y social y no nomás l’ausencia d’afeccions u malotías)? No pas. 

Agora me lo he puesto permitir. Fa uns anyos, no pas tantos, m’hese habiu de hoder y aguantar como podese, u demandar aduya economica a la familia u las amistatz. I hai personas, no pas pocas, que no pueden permitir-se-lo en toda la suya vida, que no tienen familia u amistatz que puedan amprar-les diners. Y en iste scenario, la chent charrar de libertat como lo dreito a fer-se bieras en un bar tot y que bi haiga una pandemia que mata cientos de personas cada día. U de seguridat por una baruca de que de bote y voleyo i hai milenta okupas aguardando a que baixes a mercar lo pan pa entrar en casa tuya.

La libertat y la seguridat pa yo son muito mas relacionadas con lo feito de que pueda permitir-me ixos gastos medicos u, millor encara, que bi haiga una sanidat publica que se’n encargue con eficiencia. La mía vida diaria sería muito mas dificil de no haber puesto fer ixe gasto y pienso a sobén en toda la chent que no lo puet fer y en que sisquiá nunca no plegue lo día que yo torne a no poder. Estar libre y estar seguro significa no haber de preocupar-te por meter-te malaudo u por tener problemas medicos porque sabes que totz los medios humanos y tecnolochicos que se puedan fer servir pa aduyar-te serán a lo tuyo alcance.

jueves, 23 de septiembre de 2021

Nanotunels, electrolitos y publicidat

Entre la patacada d'anuncios que financian las decadents emisoras de televisión, uno me trucó l'atención fa bell día. D'as diferents tecnicas de venta que se gosan de fer servir, no en emplegaba una innovadera precisament, pero lo nivel yera prou gran como pa adedicar-le iste chiquet post. Pa vender una aspiradora, un simple catatico que absorbe polvo, nos charraba d'os suyos "nano túneles catalíticos que destruyen el formaldehído". No yera adintro d'un congreso sobre tecnolochía d'aspiración, si ye que ixo existe, ni se feba en una canal tematica adedicada a la sciencia. Yera una cadena cheneralista, en ubierto y a la hora de chentar.

Sin entrar si ixa tecnolochía ye millor u pior pa acabar con la porquería de casa nuestra, ¿quántas personas entre lo publico destinatario podrían comprender-la? ¿Quantos realment entienden los conceptos de catalisi u formaldehido? Ni sisquiá lo prefixo "nano". Tiengo un titol de incheniería, que no me fa ni millor ni pior pero sí me ubica entre un segmento de población que potencialment entendería toda ixa charrameca y no tiengo ni ideya de que son charrando. Asinas que, ¿pa qué me cuentan que l'aspiradora ista tien los nanotunels? ¿por qué ye important que sigan cataliticos? ¿qué intrés i hai en destruyir lo formaldehído?

Fer servir terminolochía tecnica a pirol ye una d'as tecnicas comercials mas cutianas y que mas risa me fan. Si paratz cuenta, en qualsequier pausa publicitaria d'ixas eternas d'os grans grupos de comunicacions, en trobaretz buena cosa, d'anuncios parellanos. Gosan ir acompanyadas de dibuixos u animacions tant inutils como la locución. S'aproveitan de l'analfabetismo scientifico y tecnolochico d'a mayoría d'a población. Si l'intrés fuese comunicar a l'espectador meyo las bondatz d'a tecnolochía asociada a ixe aspirador, se faría en un luengache que podese entender. A fe que en ixa multinacional tienen chent - u chanfles pa achustar-ne- que pueda "traducir" los avantaches tecnolochicos. Como ixa no ye la intención lo spot fa servir una terminolochía difuera d'o suyo alcance precisament porque sabe que en ye. L'anuncio en qüestión podría decir-me tranquilament que l'aparatet tien "pico tunels esplumfirricos que destruyen los catrubios metagolmicos" y me proporcionaría la mesma cantidat d'información util si fuese pensando en mercar una aspiradora. 

En Idiocracia, cinta d'humor distopico que dibuixa un mundo futuro a on que toda la humanidat s'ha quedau ababolada, en dan notorio, d'ixa tendencia. Lo protagonista preba de convencer a uns personaches bien papis  de que ruixiar las plantas con un refresco no las fa creixer y que talment siga millor fer-lo con augua. La resta le responden con los slogans publicitarios d'o refresco que diz que "tien electrolitos, que ye lo que las plantas quieren". La scena (abaixo la tenetz) ye buen reflexo d'ixa falta de reflexión que acompanya a l'espectador meyo en veyer y analisar la publicidat y de como nos cambean uellos por coda a pur de retolica pseudo scientifica.

La publicidat, que como tantas atras cosas ye desregulada de tot, habría de fer-se servir pa indicar las propiedatz y caracteristicas de l'obchecto u servicio publicitau. Pa destacar las qualidatz que lo fan millor u diferent d'atros pareixius. No pas pa vender conceptos como libertat, participación u alegría asociaus a ubrir-te una cuenta corrient, por eixemplo. Y lo ha de fer en un luengache que lo publico destinatario pueda entender. Igual como pasaba con las hipotecas, que dengún no entendebanos, ni entendemos, qué costodias yeranos firmando, la mayoría no entendemos las caracteristicas tecnicas d'a mayoría d'obchectos que mercamos dia sin atro. Cuento que demandar qualcosa asinas será comunista, bolivariano u cosas asinas.

Por agora seguiré, dica que s'esmarchine, con la mía aspiradora, que consiste en un tubo gran que se trusque lo que i hai por tierra. Tien un botón de on/off y una ruedeta que, si la chiras, puyas u baixas la pitera d'o tubo. Lo d'ir cambiando la bolsa de cabo ta quan ye una mica molestoso - y antiecolochico - pero dica que no m'estudie si los nano tunels cataliticos son millors u piors y qué le ha feito lo formaldehído a la humanidat -u a lo mío gato- pa que calga destruyir-lo, tiraré con isto. 



martes, 21 de septiembre de 2021

Colectiviza y invents lingüisticos. Tierra de barrenaus 8x01

Con l'agüerro torna lo curso y, prou que sí, Tierra de barrenaus. Dimpués d'iste descanset que tant buen prebo m'ha feito, reprengo la mesa de mezclas, lo micro y los auriculars y, un anyo mas, prencipio una temporada de radio en aragonés, asperando que tos faiga goyo lo que sentitz y interactuetz con lo programa pa contar-me las vuestras propuestas y ideyas.

Empecipiamos con una entrevista a Chabi Gimeno, una d'as personas de Apoyo Mutuo que organiza iste mes de setiembre lo foro Colectiviza! en lo lugar d'Andorra. En istos meses previos han editau antimás lo boletín Colectividad, una intresant iniciativa a on que podemos leyer articlos de diferents tematicas. 

Tractamos tamién d'un d'os trending topic d'iste verano, la historia de Julen, que ye un eixemplo bien claro d'o espanyolismo lingüistico. Remeramos atros invents, como lo de Victoria, y traduzco l'articlo que se publicó en lo blog Societat Anonima.

La parte mosical ye protagonizada por dos bandas aragonesas. La una, ubre lo primer calaixo de cancions que iste anyo acullirá quatre temas sobre lo zapatismo, en un anyo a on las zapatistas visitarán lo nuestro continent en una chira pa explicar-nos la suya realidat. De man d'a segunda conoixeremos un d'os exitos d'o verano que malament tos quitaretz dimpués d'o tozuel.

Queda tot un curso por debant que asperemos que traiga buenas noticias pa l'aragonés y pa las radios libres y que podamos celebrar-las de conchunta. Empecipia la 8ena temporada de Tierra de barrenaus radio

Programa #108

miércoles, 1 de septiembre de 2021

Unatro lupo que charra aragonés

Fa quatre anyos escribiba un post por la presencia d'o lupo en Monegros y la esferra que le acumulaban haber feito a quantas uellas. En ixos días, entre qui desfendeba la muerte d'o lupo como solución yera bien ixemenau l'argumento de que "lo lupo no yera animal autoctono d'Aragón, que aquí nunca no bi'n heba habiu". Feba, alavez, un paralelismo con qui diz que l'aragonés no se charra, ni s'ha charrau nunca, difuera d'os lugars a on que encara ye vivo y comentaba que las experiencias personals no pueden servir como sola fuent fiable de datos. Yo sé que existe Australia, encara que no i haiga estau. I hai datos a brozuecos pa que dengún no pueda decir - sin mentir, claro - que l'aragonés no se charró en quasi tot Aragón u que lo lupo no tien una presencia historica en lo país.

Quatre anyos dimpués, sigue morindo uellas, sigue cayendo lo numero d'aragonesofablants y sigue habendo-ie lupo por Aragón. Y siguen, tamién, los paralelismos entre analisi d'a causa y solución pa totz dos problemas: lo lupo y l'aragonés.

Lo zaguer teorico ataque de lupo estió en lo lugar d'Arrés, en la Chacetania. De titulars de prensa, n'i heba de mas aparateros, que le'n acumuloron sin dubda y d'atros que a lo menos charraban d'a hipotesi de cans salvaches. A la fin, y como en tantismos atros casos anteriors, ista zaguer hipotesi ye la mas prebable y pareixe que unatra vegada s'entivocó lo culpable.

Lo problema d'a ganadería no ye lo lupo. Ni los cans salvaches sisquiá. I hai tot un problema d'a estructura socioeconomica. Ixo ye de pior resolver y, antimás, cal muito mas tiempo tot y que empecipiasenos agora mesmo. Pero ye que mesmo si nos centramos en l'immediato problema d'as uellas muertas, que en ye, y bien grieu pa qui lo pateixe, prener midas contra lo lupo tampoco no solucionaría cosa. Los cans salvaches y lo lupo son animals diferents, y diferents son los suyos orichens y las solucions a los problemas que les cheneran a los ganaders. Luitar contra un, quan son los atros qui protagonizan los ataques -fueras de bell caso - ye perder fuerzas, diners, tiempo y recursos pa no solucionar cosa. La patrulla anti-onso d'o mitico capitol d'os Simpsons. Si manyana los pocos lupos que pueda haber-ie en Aragón dispareixesen, lo problema seguiría astí. Si un medico diagnostica mal una malotía, lo que siga que faiga no curará a lo pacient. Pa solucionar lo problema d'as uellas muertas cal una serie de midas que s'han experimentau con exito en atros cabos d'Europa. No nos cal inventar cosa nueva.

Somos perdius, en cheneral, en la vida, si nos entivocamos d'enemigos y de diagnosticos d'os problemas. Y aquí ye a on que se vincla, una vegada mas, lupo y aragonés.

Lo problema de l'aragonés, y lo digo en singular, ye l'espanyolismo lingüistico. Prou. No cal inventar-se cosa mas. Iste problema se manifiesta con diferents vestius y en diferents argumentacions, basicament negando-le a l'aragonés lo que tien l'espanyol y atras luengas imperials y no minorizadas: unidat d'a luenga, autoridatz academicas, norma culta, literatura propia, dreito a fer-la servir en administración, participación politica y educación, estatus d'oficialidat, medios de comunicación publicos... Ixe, y no pas atro, ye lo problema de l'aragonés y ixas son las expresions practicas d'una ideolochía hechemonica tamién en lo nuestro país. Cal combatir l'espanyolismo lingüistico. Quan ye evident, como en los partius de dreita y ultradreita, y tamién quan va d'amagatons, desfendendo las mesmas tesis dende posicions de teorica conservación d'unas esencias lingüisticas, lo que tant bien conoixen en lo País Valenciano u en casa nuestra, en la zona catalanofona. Si femos mal lo diagnostico, si luitamos contra enemigos invisibles u anecdoticos, somos malfurriando fuerzas, diners, tiempo y recursos pa no solucionar cosa. Pa solucionar lo problema de l'aragonés cal una serie de midas que s'han experimentau con exito en atros cabos d'Europa. No nos cal inventar cosa nueva.

L'aragonés y los ganaders tienen problemas, y no pocos. Belún, mesmo ye común. Sinyalar a enemigos invisibles u anecdoticos no los solucionarán. Servirá, ixo sí,  pa no concarar los problemas reals.