lunes, 29 de febrero de 2016

Saber aibar-se

Lo que pasó fa bella semana(1) en Catalunya, pasará t’a historia por muitismas razons. D’a que charro hue cuento que no será una d’ellas, pues ye un fenomeno a saber que cutiano. Ye ixa deleria que tien muita chent por personalizar en un individuo una luita y por agarrapizar-se a un puesto como si no bi hese vida sin ell.


Ta yo, y ta muitas, Artur Mas estió qui metió en periglo o procés. Ya d’antes, conoixedors Junts pel sí d’o refús que causaba a suya persona, lo metioron no segundo ni tercer, sino quarto en a lista. En una negociación totz han de revlar. A CUP revló dende o primer minuto admitindo a posibilidat d’un president de CDC, siempre que no fuese Mas. CDC asperó dica o zaguer inte a revlar en un asunto tan personalista y poco important como qui sería president en una transición ent’a independencia.


Mas no yera, ye, ni será vital t’a independencia de Catalunya. A independencia se prencipió a construyir muito antes que no ell, que emparó ixa luita más obligau por as circunstancias y a presión popular que no atra cosa. A independencia contina construyindo-se agora, sin ell de president. Y plegará, quan plegue, probablement sin ell.


Nunca no he entendiu ixe encerrinamiento que tienen muitos en creyer-se indispensables en procesos, movimientos u organizacions más u menos amplas. A poco rato que pensemos se nos ne ocurre bell eixemplo más cerqueta d’as nuestras tierras. O movimiento en desfensa d’a lengua en ye eixemplo bien claro. As mesmas personas levan en as mesmas organizacions si fa u no fa, encapezando totz os procesos, con tot un equipache de historias, basemias, concaramientos, exitos y fracasos. Prou que d’aibar-se y permitir que sigan atras personas qui menen hipoteticos procesos de compleganza u de reconstrucción d’o movimiento, pareixe impensable hue. Pero habrá de plegar ixe relevo, u fosco futuro se le veye a la nuestra lengua.


M’alcuerdo tamién d’aquella asambleya de CHA an que se prebó de fer un buen esvielle, y que remató en un cambio de caras, pero no pas d’ideyas ni de procedimientos. Toda una cheneración luitaba en una zaguer prebatina agonica, por fer rebilcar o partiu dende lo que a buena parte nos heba ilusionau a participar-ie. Curiosament, un d’os lemas emplegaus por as “disidents” yera “deixen pasar”. En un sentiu figurau, pero tamién en uno literal, pues a belun d’os que i yeranos se nos privó de dentrar-ie, en un episodio prou triste d’a historia de l’aragonesismo.


Estar-se masiau tiempo fendo lo mesmo ye malo en cheneral. Si charramos de politica, mesmo pior. Y no digamos si charramos de avantguardia politica. Muit pocas vegadas se ye indispensable. Pero ye que antimás si un prochecto politico, u de qualsiquier atra mena, pende d’una persona, u d’una colleta, lo que tien ye una febleza extrema. Si os alazetz son firmes, no pasa cosa por espaldar un muro.


En muitos d’istos casos, a persona que s’agarrapiza a lo puesto, ye rodiada por una crica que l’empara y que mesmo plega a desfender o cargo suyo con más rasmia. Amuestran, por un regular, una leyaltat quasi patolochica que, antimás, gosa de cambiar de rapiconté si finalment gana la disidencia y l’amo fa casa muda. Por a experiencia que he teniu, istos son piors que os suyos dioses y o suyo deseyo zaguer ye estar “o califa en cuenta d’o califa”.

En os prochectos y organizacions que he participau, a soben he preso responsabilidatz organizativas u organicas. Cosa m’ha feito más goyo que deixar ixas responsabilidatz sabendo que tot ixo iba a continar funcionando perfectament sin yo mesmo. En atras ocasions, dimpués d’un tiempo con unas funcions, he parau cuenta de que a mia anvista ya no feba honra, u no yera la que a organización u prochecto aprecisaba. En ixos inte cal saber aibar-se y deixar pasar a qui faiga más honra a las ideyas. A la fin lo important ye ixo: as ideyas. No pas as siglas, organizacions u procesos. Puet estar que siga duro emocionalment, pero quan cal, cal.

Nota: (1) Prencipé a escribir isto antes d'o pacto JxS - CUP. Lo rematé dimpués, cambiando bella cosa. Por no ferir susceptibilidatz, he iu deixando-lo ta mas adebant dende alavez porque ha iu coincidindo con diferents procesos an que amigas y/u companyeras i yeran embrecadas. Pero como veigo que ixo va a continar asinas d'una u atra traza mientres muito tiempo, he decidiu de publicar-lo ya.

martes, 23 de febrero de 2016

Estudiando catalán

Feba tiempos que quereba tornar a estudiar atra lengua que no fuese l’aragonés. Unas companyeras s’apuntoron a estudiar en a Escuela Oficial d’Idiomas LFC de Zaragoza y trayoron unas fuellas informativas t’o treballo. Asinas m’enteré de que tamién se i feba clase de catalán. A la fin teneba uns horarios meyo decents y me decidié a estudiar-lo. Agora levo ya tres cursos y soi bien contento aprendendo una lengua repolida que me da muitas satisfaccions. Pero como con tot lo que se sale d’o pensamiento hechemonico, m’he trobau con muitas anecdotas.

As primers plegoron quan prencipié a decir que yera pensando en estudiar catalán. O refús que causó entre muitas d’as personas que me rodian me deixó entre ixorrontau y preocupau. Mesmo chent “de l’aragonesismo” se me miró raro. Igual como quan prencipié con l’aragonés, muitas me preguntoron o cutiano “y pa qué?” con ixa concepción utilitarista d’as lenguas, y asumindo ixa falacia d’a ultrautilidat d’as lenguas imperials y a suposada inutilidat d’as minorizadas. Entre todas as preguntas absurdas que me facioron, la que más me trucó estió la d’una companyera. Le’n dicié y fendo uellos de caparra, me respondió: “y en Zaragoza fan clases de catalán? como idioma?”. No sé si quereba que me lo amostrasen como esporte, cocina u filosofía, pero quan bell rato dimpués me dició “yo en tot caso sé una mica de valenciano”, deixó plateros os suyos conoiximientos filolochicos.

Muitas atras, ye claro, no entendeban que me querese comunicar en catalán con chent que charra castellano. Cuento que ye de muit mal explicar a qui s’ha educau en un monolingüismo tant hostil enta qualsiquier atra lengua y más que más, enta las que que charran en l’estau espanyol. Cal encara muitisma educación SOBRE lenguas y patrimonio inmaterial, antimás de EN lenguas.

Fer de menos a las lenguas “chiquetas” se traduce en muitas cosas. Una d’ellas ye pensar que son de millor aprender que as lenguas “de verdat”. Por ixo tampoco no me trucó guaire a pregunta d’una companyera que, sorprendida de que o catalán tamién tenese 6 cursos, me preguntó que qué ferianos en cinqueno y seiseno. Estié por fer-le una somardería y decir-le que nos amostraban a fer catellers, a bailar la sardana y a untar lo pan con tomate, pero m’estimé más de responder con un simple “pues aprender catalán, preixino”. Qui sabe? Talment en cinqueno me leve una sorpresa!

Ye gracioso, curioso u mesmo ironico que muita d’a chent que se le fa raro que yo aprenda catalán, ye aprendendo anglés, francés u alemán, por eixemplo. Muitas d’ellas ta no fer-lo servir nunca u quasi nunca. Nomás t’adornar un Curriculum Vitae que deixar en interpresas que ni lo demandan ni les cal. Una lengua que quasi nunca ferán servir ta comunicar-se con dengún, ta leyer, ta ascuitar mosica, … Ya heba prencipiau a aprender catalán por a mia cuenta, asinas que en bell mes de clase ya yera charrutiando con belun, leyendo bell blog u periodico y, a la fin, entendendo todas ixas collas de mosica que tanto goyo me fan y que son fendo cosas bien intresants.

En l’atro costau, tiengo buena ripa d’experiencias positivas. Quan digo que estudeo catalán, quasi lo foi a escuchetes, asperando os “pa que?” u os “y ixo?” que no aspera garra estudiant d’anglés, aleman, chinés, u mesmo arabe. Pero siempre bi ha chent que te diz un “que guay!” y, quan no te lo asperas, fa mesmo más ilusión. Prou que, como pasa en todas as lenguas, cada vegada que m’he puesto comunicar con belun en catalán, ha estau tot un goyo. Os festivals, con l’ambient de borina y a dosi d’alcohol aduyando, son un sobrebuen puesto ta practicar. Dende l’Aplec dels ports, dica l’Esperanzah WMF, pasando por o Viña, que ye plen de catalanofablants, comunicar-me en catalán m’ha permitiu foter-me bell capazo bien intresant. Sobre lenguas, identidatz, mosica y de tot. Y fer-les conoixer una miqueta iste país tant ixublidau que ye Aragón.

Una d’as cosas que se valuran menos a l’hora de decidir aprender una lengua, ye poder leyer a literatura que siga en a lengua que s’escribió. Encara no tiengo prou nivel, ni tiempo como t’haber leyiu guaire en catalán, pero ya podié disfrutar de Licantropia de Carles Terés, un libro bien intresant y que lo ye petando. Agora en tiengo dos más empecipiaus y o solo feito de tener un nuevo mundo literario a mán ya ye bien ilusionant ta yo.

Desgraciadament hue ye mas facil aprender catalán en muitos puestos d’Europa que no pas en a mayoría de l’Estau espanyol. En Aragón, tanto por patrimonio propio, como por comunicación y convivencia cultural con os países vecins, lo lochico sería que bi hese muitismos más puestos an que aprender catalán y muitisma más chent intresada en fer-lo. As razons ta que isto no siga asinas son ta yo evidents, pero dan ta unatro articlo. Asinas que lo deixaré t’atra vegada y remataré animando a aprender lenguas, a aprender-ne de minorizadas y, prou que sí a aprender aragonés y catalán, parte importantisma d’o nuestro patrimonio.

martes, 9 de febrero de 2016

De viache por Mataró y Barcelona

Como cada vegada que se nos chuntan tres diyas de fiesta a l’arreu, iste puent de Sant Valer yera ideyal ta fer bell viache chiquet. Quan no tiengo un destino claro, lo que foi ye mirar a on toca beluna d’as collas que no gosan de pasar por Aragón y asinas, de vez que viacho, me veigo un buen concierto. En ista ocasión, y con a enchaquia d’o cabo d’anyo d’Arale, decidiemos de marchar ta Mataró, an que se celebraba o 16eno cabo d’anyo d’a discoteca clap con dos conciertos de Els Catarres y Zoo con EAM. Como de cutio, o tiempo nos cundió ta fer muitas más cosas.


O primer diya marchemos dreitos ta Barcelona. Ya dende feba tiempo quereba visitar o conoixiu como “Triangulo friki” y ista yera una oportunidat sobre buena. Ye una zona d’a ciudat an que se chunta un amiro de botigas frikis. Chuegos de cartas, de mesa, literatura de fantasía y sci-fi, comics, manga, …. tot en muit poco espacio. A grandaria de Norma u de Gigamesh nos deixó sin sangre en a pocha. Y con ixa impresión perén de que te caldría muitismo más tiempo y diners ta poder leyer y disfrutar tot lo que quiers. Bien intresant ye o fundo de novelas de sciencia ficción que tienen en Gigamesh. Belunas d’ellas de mal trobar. Encara que bella botiga ya ha zarrau dende que s’escribió l’articlo que nos feba de guida, a mayoría continan ubiertas y con muit buena salut. Con tot y con ixo, no faciemos guaire chirgo dica que, cosas que pasan, entremos en una botiga d’escambio an que me trobé con toda la colección de Xtreme X-Men por nomás 30 euros en buen estau. Una choyeta que soi leyendo con firme anglucia. A tarde la rematemos en Play, un bar friki an que tienen un almario pleno de chuegos frikis que t’ampran ta que chugues. Tamién i tienen carta de bieras y o puesto ye bien pincho, asinas que ye más que recomendable ta rematar-ie a tuya tarde de compras.


O sabado tornemos ta Barcelona a viyer El Born. Baixo l’edificio d’un mercau tipico de l’arquitectura de fierro, bi ha tot un chacimiento d’a Barcelona d’o sieglo XVIII. Ixe espacio, antimás d’amostrar o trazau d’a ciudat en ixas envueltas, en un estau de conservación bien bueno, s’ha aprofitau ta acullir exposicions. En viyemos dos. La una, sobre a Catalunya d’alavez, a traviés d’os vaixiellos, chuegos, ferramientas, etc.. que troboron en a enrona que bi heba. L’atra, titolada, "Fins a aconseguir-ho! El setge de 1714", charraba d’a guerra de Sucesión y, sobre tot, d’o sitio de Barcelona y d’a batalla de l’Once de setiembre. Una exposición que, como tantas atras vegadas, me fació tener ixa sana envidia d’o pueblo catalán. ¡Quánto se troba a faltar una mica más d’información sobre a Guerra de Sucesión en Aragón! Ni una exposición, quatre libros, garra celebración fueras d’una scenificación d’a batalla de Zaragoza, … Ya en as zaguers visitas que hemos feito a lo país vecín, hemos iu viyendo partes d’a ruta 1714, una iniciativa bien intresant que nunca no viyeremos en Aragón encara que ixa parte d’a nuestra historia ye igual d’intresant.


A parte no borinera d’o viache, la completemos con una visita t’o castiello de Burriac. Ye en o municipio de Cabrera, tocando con Mataró. Una puyadeta de tasament meya hora, nos leva ta un castiello que se devantó en a edat meya, pero que, en ixe puesto se i ha trobau restos de muito antes. O camín ye entre un boscache poliu y agradable que fa de buen fer a costera. O castiello ye muit bien conservau y l’anvista dende alto t’explica por qué se fació en ixe puesto. Dende astí se puede columbrar toda la redolada y buen troz de mar. Cuenta tamién con panels explicativos sobre a historia d’o castiello y d’a comarca de Maresme ta poder entender lo que se ye viyendo. Lo que ye lochico, pero no pas tant freqüent como habría d’estar-ne en os puestos turisticos.


A parte borinera, y o principal motivo ta ir ta una ciudat tant poco turistica como Mataró yeran os debantditos conciertos. A discoteca Clap ye un puesto pincho de tot. Por una escalereta de fierro que bi ha dimpués d’o guardaropa y o -ya quasi obligatorio - photocall, se baixa ta una sala ampla y diafana con buena capacidat. Os pres son caros, pero no masiau. 3,50 o vaso de 1/2 litro de biera ta que tos ne faigatz una ideya. Dimpués d’os conciertos, no sé si s’encertó que pillemos buenos DJs u ye a mosica cutiana, pero sisquiá tenesenos un puesto asinas en Zaragoza. Tot temazos, y sin deixar de bailar. Nomas a zaguer hora, quan igual nos teneba ueito que ueitanta, prencipió o ferrete más electronico. Dica alavez La Gossa Sorda, Obrint Pas, La Troba Kung Fu, Aspencat, Zoo, …


En Els Catarres comprobemos o tirón que tienen entre o publico más choven. Arale y yo, que ya deixemos os trenta dezaga en fa muito, puyabanos a media d’edat prou. As zagaletas se sabeban de corazón todas as letras d’una colla que charra más de sentimientos y vivencias que de reivindicación politica. Pero con tot y con ixo, una d’as pocas cantas con mensache politico, Seguirem lluitant, remató con un sonoro In-Inde-Independencia en as bocas de tot lo publico. Dende as mas chiquetas dica las cambreras, pasando por as foranas que nos i solidarizabanos. O concierto, d’os millors que en he viviu. Con tiempo ta fer o suyo repertorio sin que dimpués venise atra colla, chugando en casa y con un publico entregau, Els Catarres contrimostró lo dominio que tienen d’o scenario. O buen rollo transmitiu no nomás veniba por as letras sino tamién por a complicidat entre os miembros d’a colla, y por o creixient protagonismo, mosical y personal, d’a sección de vientos.


L’atro concierto prencipió con uns esconoixius ta nusatros EAM: Exercit d’Alliberament Musical. Uns rappers que fan servir catalán y castellano en as suyas cantas, que recitan tres hombres y una muller que, con un estilo bien diferent, marca una mica o punto orichinal d’a colla. O soniu suyo tien bell punto “Rage against the machine”. Sin estar una colla que conoixesenos nian una canta, o concierto nos fació blincar y no nos aburrió ni un minuto, asinas que aprebau con nota. Una colla a seguir, sin dubda.


Pero a lo que hebanos iu yera a viyer a Zoo. A colla de l’anyo. Con nomás un disco editau ya tienen ta un show bien digno. Gracias tamién a las versions libres que han feito d’Esbarzes de La Gossa Sorda y Camins, de Obrint Pas, y a las escenes quotidianes que fan en La Tuerka y que ya suenan tamién en os conciertos. Sin un segundo t’alentar, Zoo lo tocó tot. Y nusatras lo diemos tot tamién. O publico, de tot diferent a qui yeranos o diya d’antes en Els Catarres, y con as entradas acotoladas dende feba una semana, blinquemos, bailemos y chilemos todas as propuestas d’os valencians. Panxo y os suyos lo petoron bien petau, con uns pogos sobrebuenos y una prebatina, fracasada pero muit bien intencionada, de Wall of death. Deseyando somos ya de sentir o nuevo disco y, prou que sí, d’una chira por Aragón.


Un gran cabo de semana de mosica, frikismo y cultura, en una tierra siempre acullidera como ye Catalunya, y que aspero tornar a visitar antes con antes.

miércoles, 3 de febrero de 2016

A mosica en Aragón(es). Tierra de barrenaus radio 2x05

Ta bien u ta mal, soi negau ta creyar mosica. Nunca no he consegiu fer sonar garra traste ni un poquet bien. Ixo contrasta con lo goyo que me fa ascuitar mosica. Malas que tiengo bell ratet me fa goyo de meter-me o zaguer disco que he descubierto u rechiro por o rete en busca de nuevos sonius. Si leyetz con bella freqüencia o blog, ya sabetz que lo d’os festivals y conciertos, más que una afición ye una forma de vida ta yo.


Por ixo admiro muitismo a qui fan mosica. Más encara si lo que fan ye orichinal u m’alporta bella cosa nueva. Ixe ye o caso d’as cinco personas que pasoron por o zaguer #TdBradio, que han participau en collas tant diferents como Gaire, Prau, Mallacán, La orquestina del fabirol, Comando Cucaracha u Los Draps.


Aragón ye un país de muitas y buenas mosicas. En da fe todas as que han teniu exito dillá d’as mugas nuestras, pero tamién muitas atras que no en han teniu por diferents razons. Tenemos muito potencial y muita calidat y por un regular quasi tot feito a pur d’a rasmia, o treballo, o tiempo y os diners de chent con pasión por a mosica.


A sola mala noticia en tot isto ye a quasi ausencia, dende fa ya bell anyo, de referents en a mosica en aragonés. Fueras d’o folk, ye de mal trobar una colla que faiga servir ista lengua como principal. Nomás Gaire contina apostando de tot por l’aragonés. De cabo ta quan collas como Comando Cucaracha, Lurte, Ixera, Cachirulos XL y bells atros fan bell cenyo, escribindo u traducindo bell tema. Por ixo, muitas trobamos a faltar, y muito, a Mallacán y Prau, qui nos acercoron a lengua a tantas y tantas personas, dende una mosica innovadera, combativa y de calidat.

En istas dos horetas de programa, prebemos de charrar d’istos temas y de muitos atros. Puetz ascuitar-lo en a barra que tiens contino u punchar aqui con o boton dreito y baixar-te-lo, dando-le a “Guardar enlace como…”.