martes, 28 de febrero de 2023

Todas las mosicas, todas las luengas, todas las mullers. Tierra de barrenaus 9x12

S'acerca lo 8M y la parrafiquera de programas, actividatz y movilizacions feministas d'a-saber-las formas. Radio Topo, como totz los anyos, fará una programación especial ixe día y muitos d'os programas tamién tendremos bell capitol especial pa una calendata tant important. En lo caso mío, decidié de centrar-lo en la mosica feita por mullers.

Fa anyos, en un Esperanzah, fuemos a veyer lo concierto d'Amparanoia. En ixa edición bi heba tot un cartelazo. Dubioza Kolektiv, Fermín Muguruza, Manu Chao, Zoo... una borinaza, ya podetz contar. Amparo nos fació notar, dende lo scenario, que ella yera la sola representant femenina de tot lo cartel. Nian en heba parau cuenta. Ni d'ixe ni de muitos atros festivals a on que ixa presencia ye radida u mesmo nula. Las mullers en iste, como en la resta de treballos, pateixen una discriminación caboliosa. 

Va cambiando, prou que sí, pero bien a monico y sabendo que toda conquista d'espacios ye temporal y cal luitar-la por cada día. Asinas que dende iste programa prebaré de fer la mía parte fendo sonar las suyas parolas y mosicas en iste capitol especial. Traigo bellas quantas bandas lideradas u formadas de tot por mullers. Lo he feito, antimás, dende la envista d'a desfensa d'o patrimonio lingüistico, punchando cancions en occitano, aragonés, catalán, castellano, euskera y gallego. Y tamién con atra d'as valors d'o programa como ye la diversidat mosical: folk, electronica, rap, mestizache... tot ye bienveniu si tien calidat y mensache. Me'n deixo firme patacada de grupos y cantaires en la lista, que seguirán sonando, como siempre, mientras dure Tierra de barrenaus radio.

Aspero que tos faiga goyo ista replega d'artistazas y que, si no i yeran, s'anyadan de camín a las vuestras playlists y a todas las programacions culturals. 

Recuerda que puetz ascuitar totz los programas en Ivoox, Spotify y la web de Radio Topo.

Programa #141

viernes, 24 de febrero de 2023

La reforma d'a Plaza d'a Madalena

¡Con tot lo viello que me siento de cabo ta quan y guarda que contino sin aprender a malfiar d'os poders publicos! La zaguera ye la d'a reforma d'a Plaza d'a Madalena. Quan vide que se i feba obra me facié bien contento. Yera farto d'as recholas blancas que bi heba, que esbarizaban a-saber-lo y malas que pleveba quatre gotas hebas de pasar-ie con ficancia a-saber-la pa no estozolar-te. Quan devantoron la tierra, me facioron temer por los arbols, ixas alcacias granizas que tant buena brempa nos fan pa lo verano. Por lo que se veyeba, les heban tallau quantas venas. Me dicié que ya los de parques y chardins serían a la tisva pa que no se las cargasen. Prou que dimpués quan vide las placas de metal en lo Buñuel, sin que a los de patrimonio les deixasen ni tartir, pensé que como fucionase tot igual, a las alcacias les quedaba quatre días. La obra arribó a la fin y ya se fació la devantadera d'a plaza. ¿Resultau? Unatra azconada, neolochismo que habría de trobar un puesto en lo diccionario d'aragonés como sinonimo de zancochada.

La plaza d'a Madalena ye lo centro d'o barrio nuestro. Astí quedamos, femos fiesta, nos chuntamos, nos escunzamos, nos pretamos buenos capazos... Ye un tramenar contino de chent indo y venindo y tamién un espacio pa estar-te-ie. Dica agora, a lo menos. La reforma ha sacau las recholas esbarizosas, bien se vale, pero chunto con ellas han ixopau los bancos y la fuent. Tot lo que feba d'a plaza un puesto a on que estar-se-ie, a on que descansar-se, a on que trobar-se y capaciar. Tot cosas que se feban, ye claro, sin consumir. Y ixo, lo PP no lo puet permitir. La respuesta OFICIAL d'o concello, a la pregunta de si tornarán los bancos ye que no, que los bancos se feban servir pa lo chinchorreyo de droga y pa los carrileros y que "la chent" se'n ha queixau.

La chent d'o barrio lo que queremos ye los bancos, las papereras y la fuent. Poder disfrutar d'ixe barrio que, de tant bonico que ye, nos tien tot lo día en la carrera y no pas en casa. L'azconato torna a gubernar sin contar con las habitants d'o barrio. La Madalena somos de tercera y no quieren que faigamos fiestas ni que tiengamos lo barrio como queremos. Y prou que no quieren que nos organicemos. Lo van a tener dificil, porque imos a continar dando ferrete, chestionando lo nuestro ocio y los nuestros espacios sin entrar en los suyos marcos consumistas y capitalistas. Lo miercres 1 de marzo improvisaremos cadieras y baixaremos pa exichir que las ciudatz sigan humanas y habitables y no un catalogo de franquicias y puestos pa turistas. Y a l'atro día nos chuntaremos pa seguir organizando las nuestras fiestas. Y a l'atro ves-te-ne tu a saber. Que la Madalena ye un barrio vivo y por ixo no mos estamos quietas ni un segundo. Tos comparto contino lo manifiesto de l'acto d'o miercres:

Manifiesto ¿A ón son las nuestras cadieras? Por unas plazas y carreras pa vivir-las

La semana pasada, l’equipo de gubierno d’o Concello de Zaragoza inauguraba, dando-se firme bamba, la plaza d’a Madalena. Una reforma feita, como de cutio, sin contar con nusatras, las vecinas d’o barrio, qui bi vivimos y bi convivimos. Lo resultau fa burro falso de tot. Lo que yera lo bell meyo d’o barrio nuestro, a on que nos chuntabanos pa charrar, chugar, compartir… ha esdeveniu una zona de paso sin vida. Hemos pasau de tener una plaza a tener un vago bien enrecholau que fa imposible la convivencia, un puesto de paso, una carrera ampla.

Nos han deixau sin papereras, fendo dificil las buenas practicas de hichiene, salur y convivencia que suposa no deixar por tierra los repuis u los excrementos d’os cochos nuestros. Han sacau las fuents, obligando a las personas a consumir en establimientos d’hostelería u a fer servir augua en botella, con la consiguient cheneración de repuis. Antimás de que resulta paradochico que, en plena emerchencia climatica y a pocas d’aprebar un Plan d’adaptación a lo cambio climatico, no se facilite l’acceso d’as personas a un bien basico como ye l’augua. Y han dispareixiu las cadieras, las nuestras cadieras. Lo puesto que fan servir los zagals y zagalas d’o IES Pedro de Luna pa minchar-se l’entropan en lo recreu. Lo puesto a on que la chent gran se posa a charrutiar, a fuyir d’a soledat y solaniar-se. La parte a on que pais y mais se miran como chugan los fillos suyos. Y, en cheneral, l’espacio que fer servir pa estar-ie, pa trobar-nos, pa compartir, pa cudiar-nos, pa fer comunicat. Vivir la carrera ye un activo en salut que afavoreixe la calidat de vida y lo bienestar. ¿Ye que a iste Gubierno le fa miedo isto?

En respuesta a las queixas formuladas por las vecinas, dende lo concello dicen que s’ha sacau tot ixe mobiliario urbano porque “se feba servir por carrileros y pa chinchorreyo” (sic). Una respuesta que, amás de fer pudor de clasismo y prechuicios, nos deixa enarcadas, ya que atras reformas de fa poquet, como la d’a carrera Sant Miguel no s’ha teniu en cuenta ixos risgos y se i ha instalau cadieras y atros elementos urbanos. ¿Que la Madalena ye menos barrio que no atros? Pa iste Gubierno, ye cabolioso que sí. Que se sobreentiende que ye millor que no faigamos servir las carreras porque femos estorbo y porque no somos soque delinqüents. Ye mas que ofensivo, fa de menos a las personas que vivimos aquí y estigmatiza la pobreza.

Por desgracia, ista situación no ye nueva pa nusatras. Levamos anyos denunciando l’estau de qualques infraviviendas, la chentrificación d’o barrio u la enrona d’os vagos nuestros

Exichimos a lo gubierno d’o Concello de Zaragoza que instale de nuevas lo mobiliario que faiga d’as nuestras carreras espacios pa vivir-los. Lo nuestro ye un barrio diverso y de convivencia a on que i culle tot lo mundo y queremos que contine asinas.

Vecinas y vecins d'a Madalena

martes, 21 de febrero de 2023

Penchada d'un filo en libro dichital

Penchada d'un filo, la mía primer novela, ya se puet leyer en formato libro electronico. Ha pasau mas de dos anyos dende la suya publicación en papel y, si no no i hai garra problema de zaguer hora, en bell mes podretz disfrutar (u patir) lo mío nuevo libro. Asinas que me pareixe buen momento pa fer memoria d'iste libro que considero la mía millor obra dica agora. 

La historia empecipia con la protagonista, Tatiana, buscando-se la vida pa pagar lo loguero. Fa de mayestra d'aragonés y, en lo zuro de l'Interfacultatz troba un anuncio d'una zagala que querría recibir clases particulars. En conoixer-se, arredol de Tatiana encomienzan a pasar cosas que le fan anguniar. Satanismo, aragonés, bars de Zaragoza y gatos implen una novela de suspense que te tien en candeletas por todas las suyas pachinas. 

La portalada y la maquetación ye obra de Terès i Antolín, que facioron un sobrebuen treballo, como ha puesto comprebar tot qui l'ha teniu entre las suyas mans. Con ixe gato en la portalada que, por pura casualidat, tien firme retrai a lo mío.

Se presentó en lo Centro d'Historias en aviento de 2020. Los eixemplars levaba nya bell mes en caixas en casa mía, aguardando que lo momento pandemico fuese mas favorable pa chuntar bellas decenas de personas en un espacio zarrau. Como ixo no pasaba decidié de presentar-lo a tot trance y asperar la favor d'as diosas. Talment por ixo d'estar ateu, las diosas decidioron que lo día d'a presentación fuese lo mas fredo de tot ixe hivierno, con una boira preta emplindo la ciudat que no nos deixaba ni veyer-nos las caras en la terraza a on que nos faciemos la biera de dimpués.

La pandemia y lo feito d'estar capuzau en la escritura y/u revisión d'os míos siguients libros, Hechos de tinta y Parola de diaplerona (proximament), fació que en bell mes no tenese mas recorriu. Iste aviento, a la fin, lo podié levar t'a Feria d'o Libro Aragonés de Monzón y en marzo visitará Andorra. Sisquiá no sigan que las dos primers aturadas d'una segunda vida que aprecisa y mereixe Penchada d'un filo.

Agora se publica, a la fin, en dichital. Polemicas y debatz con los ebooks, n'i hai a patacadas. No me trobo en garra d'os dos bandos concaraus. M'estimo mas lo papel pero no tiengo garra problema en leyer en dichital. De feito, pa libros incomodos por la suya grandaria, goso tirar d'o catatico pa no acabar con lo maniquiello tuerto. Ni soi tampoco d'ixos que dende que s'invento la tinta dichital refusa lo molestoso papel imple-repalmars. 

Pa radicals d'o ebook y pa usuarias ocasionals, aquí lo tenetz. Aspero que tos faiga goyo.

Y pa qui contine refusando istas moderneces, tot y que ya fa decadas que funcionan, tos recuerdo que podetz mercar-lo en Nogara en horarios de tardes, que si vivitz difuera de Zaragoza, tos lo puedo ninviar por correu y que pa lo día d'o libro seré en mas d'una paradeta ofrindo-tos todas las mías publicacions. ¡Estatz-tos a la tisva!

lunes, 13 de febrero de 2023

Autochestión cultural y de l'ocio y centros socials. Tierra de barrenaus 9x11

Plegamos en la metat, si fa u no fa, d'a temporada con un programa a on que charramos d'un tema que sisquiá no tenese tantisma actualidat: las enrestidas d'o sistema contra tot lo que supose autochestión y ocupación y visibilización d'os espacios publicos. En ista nueva edición femos un repaso por belunas d'ixas enrestidas que venimos patindo en la nuestra ciudat dende habe anyos y por diferents gubiernos y institucions.

Empecipiamos con las fiestas d'a Madalena, eixemplo d'autochestión y d'organización popular que vive por cada anyo mas problemas institucionals pa celebrar los suyos actos mas sinyalers. Se prohibioron las chentas populars, ya va bell anyo que no se deixa fer la chera d'o solsticio, con decadas d'historia, y los actos que encara se permiten reciben pinyoras arrienda y acoso policial como respuesta.

Seguimos con lo Buñuel que, en grabar-se lo programa, no s'heba desaloixau encara. Lo Centro Social Comunitario yera lo centro social mas amplo y funcional de toda la ciudat y precisament por ixo, Azcón y los suyos complices han quiesto acotolar-lo. No quieren que sigamos contrimostrando lo que somos capables de fer y que i hai solucions alternativas y millors a lo suyo modelo capitalista, institucionalizau y aluenyau d'as necesidatz reals d'as personas y los barrios.

Repasamos, breument, por qüestions de tiempo, belatro eixemplos d'enrestidas contra ixa organización popular: la cincomarzada, la baixada d'a canal, las cheras de Sant Antón y Sant Chuan, l'acoso a centros socials... i hai muitos eixemplos d'a suya fobia a que lo pueblo tienga alternativas d'ocio que no pasen por lo consumo seguntes las suyas reglas.

En la parte mosical, tos convido a ascuitar cancions que parlan de barrios, de centros socials y d'a suya vida cutiana con tres temazos de grupos aragoneses, valencianos y vascos.

Ya hemos reblau masa. Ye l'hora de recuperar las nuestras fiestas y los nuestros centros socials.

Recuerda que puetz ascuitar totz los programas en Ivoox, Spotify y la web de Radio Topo.

Programa #140


miércoles, 8 de febrero de 2023

Lo Buñuel no rebla

El Buñuel no se rinde
se coriaba iste cabo de semana en lo concierto de Los chikos del maíz. Dende que los chueces decidioron dar-le la razón a los suyos amigos d'o PP, la menaza d'o desaloixo fació movilizar-se a lo barrio d'o Gancho y a toda la resta de personas de Zaragoza que desfendemos lo modelo de Centro Social Comunitario que tant bien ha funcionau en istos anyos. La respuesta en la carrera estió eixemplar y masiva. Hue, manimenos, y deixando claro la nula intención de dialogo que tien lo gubierno municipal, s'ha feito l'anunciau desaloixo. Quieren que lo Buñuel torne a estar un edificio vuedo, enronando-se por cada día, aguardando a que, talment, en bell momento d'o siguient anyos se faiga un Centro Civico incapable de sustituyir ni una chiqueta parte d'a vida y actividatz que se i dinamizaban. Tot por puro odio -y miedo- a la organización popular, a las personas que contrimuestran por cada día que se puet treballar d'atra manera, dende l'autochestión, creyando alternativas a las institucions y los modelos capitalistas.

Los espacios fisicos colectivos son bien importants. No seré yo, que levo los zaguers anyos dando ferrete con ixo día sin atro, qui diga lo contrario. Pero si lo Buñuel acaba efectivament desaloixau, si perdemos ixe espacio, lo que no podrán espaldar ye lo que s'ha construyiu en tot iste tiempo. Plegarán nuevos espacio, u recuperaremos ixe, nos trobaremos en las carreras u empliremos los centros socials ya existents. Lo que ye seguro ye que d'una manera u atra Lo Buñuel seguirá vivo.

En lo siguient programa de Tierra de barrenaus charramos d'as fiestas d'a Madalena, d'o CSC Luis Buñuel y de tantas y tantas atras enrestidas contra l'autochestión de l'ocio y las fiestas y d'os centros socials. La mía intención yera compartir lo texto d'o manifiesto de desfensa d'o Buñuel hue, sin saber que, por desgracia s'iba a encertar con lo día d'o suyo desaloix. Aquí tenetz ixe texto que preba d'explicar lo que ye lo Buñuel y por qué cal desfender-lo. Las movilizacions no han feito que empecipiar, asinas que vaigamos-ie y desfendamos tot lo que ixe Centro Social ha suposau y suposará. Lo texto orichinal y todas las novedatz lo puetz consultar en la suya web.

MANIFIESTO “YO REFIRMO LO BUÑUEL”

En 2011 bellas vecinas d’o zaragozano barrio d’o Gancho empecipioron a dar-le vida a l’edificio abandonau de l’antigo instituto Luis Buñuel. Naixió asinas lo Centro Social Comunitario Luis Buñuel. Un espacio chenerau por y pa lo barrio, de manera comunitaria y asembleyaria, y que ha constituyiu un verdader centro cultural d’un d’os barrios mas populosos de Zaragoza.

¿Conoixes lo Buñuel? Te lo presentamos

Lo Centro Social Comunitario Luis Buñuel ye un prochecto colectivo chestionau por personas voluntarias que ofreixen lo suyo tiempo de manera altruista pa treballar por lo común organizando un ciento d’actividatz ubiertas a toda la ciudadanía.

¿A on ye? En Zaragoza, en la plaza Santo Domingo numero 15, encara que tamién tien una entreada por lo paseyo d’Echegaray (una puerta de color amariella). Ye en lo bell meyo d’o barrio zaragozano d’o Gancho. L’edificio ye de cabo d’o sieglo XIX, estió museu de Bellas Artes dica 1911 y siede d’o concello de Zaragoza dica 1965. Entre 1986 y 2005 fació d’instituto.

¿Dende quan? Lo CSC Luis Buñuel naixió en 2011 y dende alavez se i han sumau collas y colectivos que i fan un ciento d’actividatz pa los vecins d’o barrio d’o Gancho y pa toda la ciudadanía.

¿Qual ye la suya filosofía? 1. L’AUTOCHESTIÓN, aduyar a personas y colectivos a creyar, experimentar y transformar. 2: Ye un espacio UBIERTO a lo barrio y a toda la ciudat, sin mirar-se color ni ideolochía. 3. La enerchía d’o SOCIAL, enfilada pa lograr lo bien común, que plega en meta increyibles. 4: Lo Buñuel ye un espacio COMÚN pa prochecto y actividatz integraderas.

¿Cómo funciona? I participan mas de quaranta entidatz ciudadanas de caracter social y de voluntariau civil, incluyidas cooperativas d’iniciativa social sin animo de lucro. Qualsequier persona con una ideya de caracter social puet proposar-la a l’asembleya de l’asociación pa que s’aprebe por consenso y se faiga funcionar.

¿Qué actividatz se i fan? Arrienda. Por eixemplo, ye la siede d’a banda mosical de L’Almozara; cuenta con biblioteca y ludoteca; ofreixe espacio pa bailes en linia y ye la siede d’Artistas por la Paz; los suyos muros acullen una asesoría socio-churidica; se i fa clases de yoga, teatro, chimnasia pa mayors y danza; s’organiza un “mercau d’o tiempo” y i hai un “espacio pa lo silencio”, sin ixuplidar la chardinería u lo taller de clown. Totz los sabados la cocina solidaria reparte bellas 300 chentas y qui l’aprecise puet acudir a lo roper de baldes y a la botiga solidaria. S’organiza conferencias, tallers educativos, procheccions, mosica en directo, eventos solidarios.. y a-saber-las actividatz mas pa un publico de todas las edatz y procedencias.

¿Por qué nos movilizamos? Lo Gubierno d’a ciudat de Zaragoza pretende desaloixar a l’Asociación CSC Luis Buñuel lo venient 23 de chinero. Con la mida, iste puesto deixará d’estar un espacio verdaderament social y comunitario autochestionau, con tot lo que ixo suposa.

Han “promeso” a los vecins un centro civico de chestión municipal, promesa que pareixe de mal cumplir. Con tot y con ixo, si a la fin se convierte en un espacio que contine dando servicio a lo barrio, no será por atra razón que por lo esfuerzo de todas las vecinas que han estau istos anyos mantenendo-lo vivo y en uso.

Manimenos, muitas cosas se perderían con iste cambio. Por eixemplo, en un centro civico no son las vecinas qui deciden qué actividatz aprecisan ni puet esdevenir de rapiconté en un espacio de refirme mutuo y autocudiau pa las mas vulnerables, como ocurrió entre lo encadamiento. Tampoco no podría deixar-se como espacio pa las necesidatz que no lo mercau ni l’estau cubreixen como lo Rastro d’a Plataforma Social u la Olla comunitaria. I hai quantos atros eixemplos como istos. Lo modelo d’o Buñuel constituye un proceso d’experimentación social, refirme mutuo y integración radical, imposible de remedar en espacios de chestión municipal.

Los centros socials y los espacios vecinals son una realidat en ciudatz tant importants como Barcelona, Malaga u Madrit y alportan vida cultural, artistica y social alternativa. Pero, sobre tot, lo CSC Luis Buñuel ye un espacio integrador pa todas las personas que arriban nuevas a lo barrio y que troban, entre las actividatz que se i organizan, un puesto de convivencia imprescindible pa creyar retz vecinals con los habitadors d’o barrio y de toda la ciudat.

Lo CSC Luis Buñuel ha feito un centro civido a mida d’o barrio de Lo Gancho, un centro a peu de carrera intercheneracional y intercultural que fa barrio y fa vida. Lo CSC Luis Buñuel ye en lo corazón d’o barrio y en lo corazón de millars de personas que dende fa mas d’una decada i troban lo suyo espacio. Nomás en los zaguers quatre anyos s’ha feito 192.000 usos comunitarios.

Pero lo Gubierno d’a ciudat aprecisa tener lo control y decidir de manera unilateral qué se i fa y qué no pas. Lo proximo 23 de chinero procesderá a esfuizar-lo pa instalar un suposau centro civico. Lo centro actual cubre de sobra la demanda cultural d’o barrio que antimás ya disposa d’a Casa de Choventut Sant Pablo, la Casa d’Amparo, lo Centro de día Sant Blás, Zona Choven Ramóny Cajal…

Queremos una ciudat con diversidat d’espacios. Ye sano tener puesto con filosofías comunitarias y autochestionadas, mesmo mas quan contribuyen a millorar lo bienestar social d’a comunidat. Espacios libres a on que lo propio barrio chenera vida, con las suyas iniciativas, creya la suya realidat artistica y cultural. No siempre ye menester lo control institucional mientras se respete y beneficie a la sociedat. ¡Queremos lo nuestro Buñuel!

Por istas razons, qui firmamos abaixo, MANIFESTAMOS LO NUESTRO REFIRME A LO CSC Luis Buñuel como recurso social y que pueda asinas continar lo treballo suyo pa todas las personas que viven en lo barrio de Lo Gancho y en toda Zaragoza

lunes, 6 de febrero de 2023

Luitas, futuro y panizo. Cronica d'o concierto de LCDM

Otro disco, Y he perdido la cuenta, Winona, Nirvana, Yo crecí en los 90 deciban Nega y Toni en salindo t’o scenario. Dezaga d’ells, un gran 13:12 en la mesa d’o DJ. La Oasis a rebutir. Sold out dende fa días. Y Los chikos del maíz empecipiaban un concierto pa petar-lo firme.

Con ixos Ecos de un futuro pasado entroron en scena los rapers comunistas presentando lo suyo nuevo disco YES, future. Una evolución d’o ya mitico Comanchería a on que tanto mosicalidat como mensaches han cambiau una miqueta mantenendo, ixo sí, toda la contundencia y reivindicación. Dende lo titol nos trobamos con un treballo mas positivo que se mira entaban y que torna a parlar d’as personas que luitamos por los nuestros dreitos socials.

Que sí, que vale, que la hemos cagado / Con letras llenas de patriarcado / Gracias a quién nos hizo aprender / Y reconocer lo malo. La primer canción ye toda una declaración, una confesión d’as suyas errors, una sesión de terapia a on que nos recuentan tamién las angunias que han teniu en toda la suya trachectoria. Las letras y lo soniu d’iste nuevo disco s’aluenyan prou de bell topico raper.

Lo concierto sigue con temas de toda la suya discografía. Abaixo, morfuga de revolución. Los versos mas furos se sienten por toda la sala. La rabia contra la maquina nos fa bullir la sangre. En lo primer charrazo, entre dos temas, reconoixen y nos fan remerar lo papel d’a nuestra Zaragoza en lo rap estatal. Bella canción dimpués plega lo turno d’o CSC Luis Buñuel. Nega y Toni s’aladeyan y lo scenario s’imple con la pancarta d’o Buñuel entre que una d’as suyas representants leye lo manifiesto con toda la sala chilando que lo Buñuel no rebla. En atra mena de reivindicación bien diferent, DJ Plan B se quedó bell rato punchando ell solet, amostrando lo que puet fer un buen DJ con dos platos y firme calitre.

En la presentación de Nómadas, un d’os singles d’iste nuevo disco, remeroron que, de cabo ta quan, tenemos victorias y que no nos gronxiamos prou, que siempre pareixe que perdamos. Por las huelgas del metal o de Tubacex / Que demuestran al luchar se puede vencer. "Lo titol d’o disco no ye somarda. Sí que i hai futuro" dicen dende alto antes d’empecipiar una lista de victorias obreras. Somos tant feitas a perder que nian sabemos reconoixer quan ganamos. Tamién ye verdat que los medios ya s’encargan de no dar guaire treslada d’ixas victorias, no siga que paremos cuenta d’o nuestro poder real. En ista canción se nombra, antimás, a los seis de Zaragoza, probablement lo verso que mas fuerte se sintió en toda la nueit.

Venimos de muy lejos soñando la utopía / Obreras orgullosas, ni esquirol ni policía / A muerte por la vida y la belleza de las cosas / Es por ello que luchamos, por el pan y por las rosas. Lo concierto se zarró con Pan y rosas, con los punyos alto y las pilas revolucionarias cargadas pa tot lo mes. Un tema que charra d’arrienda luitas, d’un ciento de batallas d’o movimiento obrer y de que queremos tot, no nomás las micazas. Me faltó COPS y belatra mas. Por yo, s’hesen fotiu una horica mas astí alto fendo-nos bailar, pero con tot y con ixo LCDM firmó un conciertazo a on que asistibanos chent de todas las cheneracions y todas las tribus. A lo menos en isto, i somos d’alcuerdo. Los zaguers versos d’ixe Ecos de un futuro pasado con que empecipiaban dicen que Lo mejor está por venir / Así que os jodan, hay cuerda para rato. Con ixa promesa aguardaremos los nuevos discos por venir entre que disfrutamos los ya feitos.