domingo, 25 de marzo de 2018

La revolución no será biodanzada

Fa ya quasi meyo sieglo dende la publicación de "The revolution will not be televised", de Gill Scott-Heron, una obra mayestra que fa ya parte d'a cultura popular. Talment muitas d'as lectoras d'iste blog, lo habrán sentiu en las actuacions que feba Daniel Rabanaque, gran poeta aragonés. Ell adaptó lo poema orichinal y antimás le anyadió una segunda parte, actualizando-lo a la tecnolochía y mundo d'agora.

Como ixo d'a humildat, entre los bloggers no existe, me he permitiu lo luxo de fer lo mesmo, pero con muito menos talento, y criticando unatra parte d'o mundo actual, que me fa prou pampurria y que considero un gran problema d'a izquierda actual: la proliferación d'as pseudosciencias, newageismos, supersticions y espiritualidatz de toda mena. Belunas mas periglosas y atras menos, pero todas, en la mia modesta opinion, un entrepuz pa lo pensamiento revolucionario.

Como isto d'as creyencias ye delicau, y lo entiendo, demando ya disculpas a tot qui se pueda sentir ofendida y le convido a charrar-ne civilizadament. Lo texto ye en castellano, porque asinas sonaba en la mia ment. Abaixo, meto traducción a l'aragonés.

La revolución no será biodanzada

No podrás ir a Yoga
no podrás sentarte, meditar y respirar
no podrás abrir tus chakras
en la postura del loto
porque la revolución no será biodanzada

La revolución no será biodanzada
La revolución no será patrocionada por Boiron
en sucesivas diluciones homeopáticas dinamizadas

La revolución no te rociará con chemtrails,
ni vendrá por una conspiración del universo
para satisfacer tu desmesurado ego

La revolución no será biodanzada.
La revolución no vendrá por influjo de la Luna,
de los astros, los mayas, los hindúes,
o cualquier otra cultura que consideres exótica

La revolución no será aromática, ni terapéutica
La revolución no abrazará árboles
La revolución no dará abrazos gratis

No tendrá orgonitas, ni flores de Bach,
ni predecirá tu futuro con el Tarot
No te biodescodificará,
ni culpará a tus ancestros de tus problemas actuales

La revolución no te hará introducirte cosas por los orificios
que un psicomago violador te indique
La revolución no te exigirá felicidad perpetua,
ni achacará a tu tristeza, tu tumor en el cerebro

No te pinchará con agujas, ni te presionará la planta del pie,
no vendrá en garrafas de agua de mar
no será ayurbedica, ni te impondrá las manos

La revolución no vendrá rezando a Dios,
ni a Alá, Yahvé o Jehova
ni a Buda, Jodorowsky, la pachamama,
o la última encarnación pueril de tus miedos.

La revolución se sabrá la tabla periódica, hermana,
La revolución entenderá las leyes físicas, hermano
Y las aplicarán para la libertad de la humanidad
porque la revolución, hermana y hermano, será racional y científica

La revolución no será biodanzada
No podrás ir ta Yoga
no podrás posar-te, meditar y alentar
no podrás ubrir los tuyos chakras
en la postura d'o loto
porque la revolución no será biodanzada

La revolución no será biodanzada
La revolución no será patrocionada por Boiron
en sucesivas dilucions homeopaticas dinamizadas

La revolución no te ruixiará con chemtrails,
ni vendrá por una conspiración de l'universo
pa satisfer lo tuyo granizo ego

La revolución no será biodanzada.
La revolución no vendrá por influxo d'a Luna,
d'os astros, los mayas, los hindus,
u qualsiquier atra cultura que consideres exotica

La revolución no será aromatica, ni terapeutica
La revolución no abrazará árbols
La revolución no ferá abrazos de baldes

No tendrá orgonitas, ni flors de Bach,
ni predecirá lo tuyo futuro con lo Tarot
No te biodescodificará,
ni culpará a los tuyos antepasaus d'os tuyos problemas actuals

La revolución no te fará ficar-te cosas por los foraus
que un psicomago violador te indique
La revolución no te exichirá felicidat perpetua,
ni acumulará a la tuya tristura, lo tuyo tumor en lo tozuelo

No te punchará con agujas, ni te pretará en la planta d'o piet,
no vendrá en barrals d'augua de mar
no será ayurbedica, ni te imposará las mans

La revolución no vendrá rezando a Dios,
ni a Alá, Yahvé o Jehova
ni a Buda, Jodorowsky, la pachamama,
u la zaguer encarnación pueril d'os tuyos miedos.

La revolución se sabrá la tabla periodica, chirmana,
La revolución entenderá las leis fisicas, chirman
Y las aplicarán pa la libertat d'a humanidat
porque la revolución, chirmana y chirman, será racional y scientifica






viernes, 16 de marzo de 2018

Lo reguetón nos aviella quaranta anyos

Cada cheneración tien una serie d'himnos y mosicas que la marcan. Quan yo creixeba yera lo grunge lo que lo petaba pa que, poco tiempo dimpués, quasi dengún en faiga alcordanza d'aquella moda que nos deixó cosas bien buenas, y d'atras que talment faigan una mica de vergüenya agora mesmo.

Cada cheneración gosa de pensar-se tamién que la suya banda sonora ye la millor. Insuperable en calidat y que perdurará por los sieglos d'os sieglos. Cuento que todas seremos d'alcuerdo en que a la cheneración mas choven d'agora l'ha tocau -u ha trigau- lo reguetón, cumbia y ritmos pareixius, como la suya manera d'expresar-se mosicalment. No en soi guaire fan d'ista mosica, sobre tot, por que quasi ni la conoixco, pero tien cosas mas que intresants, en lo poco que yo sé.

Manimenos, nos trobamos unatra vegada con la incomprensión d'os que maniamos agora mesmo lo mainstream d'a "cultura oficial". Los quarentons somos encantaus de conoixer-nos y reivindicamos a Smashing Pumpkings y Radiohead, u a Más Birras y Las Novias, si nos quedamos en casa, como lo millor d'a historia mosical. De vez, y como no podría estar d'atra forma en ixe razonamiento absurdo de que "si lo mio ye bueno, lo tuyo ha d'estar malo", refusamos como cheneración tot lo reguetón que imple las nuestras emisoras, bars, discotecas y verbenas. 

Eixemplo en son las zaguers galas d'os Premios d'a Mosica Aragonesa, an que, terne que terne, se feba mofla d'ixas mosicas, con l'aplauso y complicidat d'os asistents. Cuento que no en fa tanto, las mesmas gromas se farían con lo rap, chenero que feba esmelicar-se a mas d'un a finals d'os 80 y que tant poco tiempo dimpués, meter un d'os suyos representants como pregonero d'as nuestras fiestas. Bella decada antes sería inconcebible haber galardonau a un rockero por fer mosica.

No sé si lo reguetón será una pasa temporal, como en estió lo grunge, u si ye plegau pa quedar-se-ie. En qualsiquier caso, habríanos d'estar-nos mas prudents y no correr tanto a fer chistes facils sobre la mosica que "ascuitan las chovens". ¿No paratz cuenta de que ixos comentarios nos aviellan bella quarantena d'anyadas? En lo poco que he charrau d'isto con chent mas choven que yo, m'amuestran unatra envista prou diferent d'ixa mosica d'a que tien la mia cheneración.

¿Las letras son heteropatriarcals? Tanto como pueden estar-ne las d'os prestichiosos, premiadismos, y incontestables Loquillo, Amaral u Sabina. Se puet fer reguetón feminista, como contrimuestra Tremenda Jauría que talment siga l'eixemplo mas conoixiu, pero a fe que no ye l'unico. ¿Han feito que no s'ascuite atra cosa? Igual como fa cada moda. U creyetz que si no existise lo reguetón, en los bars d'o casco iban a meter Kortatu? Cal que no. Bi habría belatra moda absurda. No tornaría la tuya, siga qual siga.

La luita ye contra lo masclismo, no contra lo masclismo en una mosica concreta que no entiendas. La luita ye contra lo monocultivo cultural oportunista, no solament quan ixe monocultivo no ye lo tuyo. Creyer que tot lo reguetón ye Maluma, ye como pensar que tot lo rock ye Revolver, lo punk Offspring u lo rap John Cobra.

Muita d'a chent que ye ascuitando agora reguetón, en cinco anyos será fendo-lo y en vinte anyos serán personas con uns ingresos adequaus como pa mandar en ixe debantdito mainstream cultural. Asinas que totz nusatros, trentanyers y quarentons habremos de viyer en no tanto tiempo como en los PMA, beluna d'as ganadoras s'adedica a lo reguetón, y como dende instancias publicas y d'a elite cultural se reivindica la mosica d'istos anyos. Y regular que ixa mesma chent refusará y se fará la mofla d'o que ascuiten las chovens d'alavez. Itz parando-tos-ie.



domingo, 11 de marzo de 2018

Lo gaiter d'o lugar toca... de pistón

Diz lo refrán que "Lo gaiter d'o lugar u toca lo mesmo u toca mal" fendo referencia a ixa tendencia que muitas tienen que les fa infravalurar lo propio y glorificar lo forano, de manera independient d'a suya calidat obchectiva. Ye ixa una malotía aragonesa, y cuento que de muitos atros pueblos con baixa autoestima, como en ye l'aragonés.

Los Premios d'a Mosica Aragonesa, que se celebran dende fa decinueu anyadas, son un exercicio de tot lo contrario. Prebar de fer viyer a las aragonesas que ixos gaiters d'aqui tocan muit bien y fan una mosica a saber que intresant. Mosica que no viye que entrepuces ta salir d'o país, entre atras razons por lo suyo orichen. Todas las mosicas nuestras que trunfan (en lo sentiu capitalista d'a parola), acaban vivindo dillá d'as nuestras mugas.

Sergio Falces, un d'os organizadors d'os Premios, n'entregó en ista gala un a Las Novias, por la suya trachectoria. En la entrega, remeró como, quan yera mas chovenón, le enarcaba que, antimas d'a suya buena mosica, ixos artistas fuesen vecins. Ell d'o Rabalete, ells de Las Fuents, barrios vecins. Se sentiba a saber que afortunau y emocionau de poder dar-les un premio a unas personas tant admiradas y de vez tant cercanas. En la replega d'o premio, Las Novias se facioron argüellosos d'os suyos orichens de clase y puesto.

Igual como Sergio, tamién he teniu siempre ixa tendencia a valurar mas lo propio, lo cercano. Quan una colla fa mosica que me intresa, que me emociona, si son de casa, sé que los voi a poder vivir d'una manera bien diferent a si fuesen foranas. Podré sentir-los en directo muito mas a ormino, podré acercar-me a las artistas y comprebar cómo son personalment. Charrarán en las suyas cancions, probablement, de cosas cercanas. La experiencia mosical será, a la finitiva, muito mas completa.

Pero antimás ye una qüestión de chusticia. Aragón ye un país con un patrimonio mosical, historico y present, impresionant. Las artistas que han teniu repercusión difuera, como Bunbury, Pecker, Kase O u Amaral no son que una chicota representación de tot lo bueno que da ista tierra por cada diya. Ignorau por l'administración, pero tamién por las propias aragonesas que muitas vegadas nos estimamos mas de gastar-nos buena parrafiquera de diners en bell concierto "gran", que ir ta los quatre u cinco que podríanos disfrutar con ixas mesmas perras si fuesen artistas locals.

En estar ignoraus por administración y medios, a soben las buenas mosicas aragonesas son de mal trobar. Pero si rechiramos bella miquirrina por lo circuito de conciertos u iniciativas como los premios d'a mosica, nos trobamos con una riquisma cultura mosical aragonesa que, ta forro de bota, ye ixemenada por tot lo nuestro territorio, y que tien una continidat historica a traviés d'as decadas.

Y contino, bell par de videos que lo contrimuestran.








lunes, 5 de marzo de 2018

Lo carlismo y la Cincomarzada. Tierra de barrenaus 4x07

Lo primer pasquin que facié, en Chobenalla Aragonesista, estió sobre la Cincomarzada. Igual como tantas atras cosas, nunca no m'heba planteyau guaire por qué se celebraba aquello. Pa yo, yera una d'as mias borinas favoritas. Siempre m'ha feito goyo lo d'enzorriar-me en un parque. Pero no estió dica que habié de fer aquell pasquin, que me documenté bien. Descubrié, alavez, un troz d'a nuestra historia, a soben prou amagau, y como tantos atros apasionant.

Dende la envista d'o sieglo XXI, lo carlismo no deixa d'estar una mica bizarro y de mal entender. Ye d'ixas cosas que has d'estar una mica friki d'a historia pa intresar-te-ie. Afortunadament, tiengo cerca a chent que sabe tanto d'historia como Dani, que vinió t'a radio a charrar-ne y explicar como estió lo carlismo en Aragón. D'una victoria liberal en Zaragoza, sobre ixe carlismo, naixió la Cincomarzada, fiesta que se vedó en los anyos d'o franquismo, y que se recuperó con lo rechimen d'o 78.

Con Ruben, muit buen conoixedor d'ixa epoca historica, charremos d'ixa recuperación y resignificación d'a fiesta d'a Cincomarzada. Tamién d'as dificultatz que ha pasau y de como a lo poder nunca no l'ha feito guaire goyo una fiesta autochestionada, laica y reivindicativa.



Iste ye un d'ixos programas que yera en la lista de "programas a fer" dende lo primer diya que esmachiné Tierra de barrenaus radio. Lo resultau creigo que ye muit bueno, asinas que aspero que lo disfrutetz tantismo como yo.

jueves, 1 de marzo de 2018

Enta la vaga feminista. Tierra de barrenaus radio 4x06

Encara que nunca no he planteyau lo programa de radio como d'actualidat, bi ha momentos tant importants que me fan blincar-me totz los plazos, reglas y demás que me he autoimposau, y que fan que grabe un especial sobre lo tema. Lo primer, estió lo proceso d'independencia de Catalunya. Lo segundo, la vaga feminista.

Dende fa anyos, pareixe que lo movimiento feminista ha pretau l'accelerador d'a historia. Las reivindicacions s'ha feito mas radicals (en tot lo buen sentiu d'a parola) y, sobre tot, s'ha ixemenau por tot. De todas las luitas que levo anyos participando u compartindo, la feminista ye la que mas exitos ye conseguindo en zagueras, y la que mas m'ha feito pensar y replanteyar-me cosas.

En iste programa charro con tres mullers, Elena, Laura y Silvia, que faran vaga lo ueito de marzo. D'as suyas razons y envistas personals y de como han treballau en ista convocatoria. Sobra motivos, ta aturar lo venient 8 de marzo. Si dimpués d'istas entrevistas, encara te queda dubdas, informa-te-ne. Tiens medios a-saber-los ta fer-lo.



NOTA: La ideya ye completar iste programa con una cronica d'a vaga, pero me ha pareixiu que fa mas honra t'a conovcatoria publicar ista primer parte antes d'o 8 de marzo.