Especial Premios d'a mosica aragonesa. Tierra de barrenaus 7x03

S'embolicó prou la cosa de fer una gala en lo preto d'a pasa, pero a la fin se podió fer. La chent d'Aragón musical, que teneba previsto entregar los Premios d'a Mosica Aragonesa lo 14 de marzo habió de suspender-los, en primeras sin tener ni ideya dica quan. La primer edición que s'iba a celebrar en Uesca, habió de deixar-se pa mas entabant y, a la fin, iste pasau 5 d'octubre, las premiadas pasoron por lo scenario d'o Palacio de Congresos pa replegar los suyos galardons.

Como ya ye tradición, Tierra de barrenaus ha seguiu de bien cerca tot lo que pertoca a istos premios. Dende lo programa especial a on que se presentoron las nominacions a cada categoría, quan encara nos febanos la mofla d'o virus, dica la gala retransmitida en directo por Aragón Cultura. L'equipo que nos hemos chuntau somos las de siempre: Tamara, Rubén, Dabi y yo. En iste anyo, entre los problemas por l'aforo y las obligacions d'os integrants d'o equipo, dengún no podiemos asistir a la gala, asinas que habiemos d'aconhortar-nos con veyer-la en la tele.

La gala estió la mas curta dende fa tiempo a-saber-lo, baixando d'as dos horas de duración. Pero como en TdBradio tenemos ferrete pa rato, nos hemos fotiu un programa que blinca las dos horas y a on que charramos de tot lo que i paso. Siempre, prou que sí, dando la nuestra envista sobre tot. Subchectiva, personal y a sobén desinformada. Pero si quiers leyer u ascuitar debatz saputaces, habrás de buscar en belatro cabo.

Por cada día que i hai noticias arredol d'istos premios se charra un poquet d'a mosica aragonesa y de buena parte d'as suyas protagonistas que, por un regular, son ignoradas en la suya propia tierra. Dende lo programa torno a desfender la gran calidat y variedat mosical que tenemos en lo país y lo gran papel que fa pa la suya difusión iniciativas como ista. Como dicen los Fongo Royo, ganadors d'o Premio a la millor canción en aragonés por Luengas religadas: Nunca no amas lo que no conoixes. Asinas que conoixcamos la mosica que se fa en Aragón pa poder amar-la.

Y norabuena a las premiadas y nominadas, prou que sí!

Programa #86

Nominacions a los Premios d'a mosica aragonesa. Tierra de barrenaus 6x13

Lo pasau 11 de febrero se conoixioron las personas y collas nominadas a los XXI Premios d'a Mosica Aragonesa que organiza totz los anyos Aragón Musical. Un anyo mas, Tierra de barrenaus fará un seguimiento de tot lo proceso, pero en iste anyo lo faré una miqueta diferent por simplas qüestions lochisticas. En anteriors edicions (XVIII, XIX y XX), hemos comentau dreitament la gala y las suyas premiadas. Iste anyo, por agora, tos traigo un programa centrau en las nominacions, sin saber encara quí se levará cada premio ta casa suya. 



Como totz los anyos, los Premios d'a Mosica Aragonesa han de fer servir pa que, a lo menos por bell diya, los medios de comunicación cheneralistas le faigan una miqueta de caso a parte d'o talento mosical que se cautiva por iste país. Nian yo, que prebo d'estar a la tisva de tot lo que se fa en Aragón a nivel mosical, conoixco muitas d'as propuestas que en cada edición implen las candidaturas a istos premios. Asinas que lo ciudadano meyo cuento que no en conoixerá que bellas poquetas. Con que ixo se consiga ya vale la pena tot lo esfuerzo d'a organización.

La entrega de nominacions se fació un anyo mas en la fabrica viella de La Zaragozana, un puesto repoliu que ye de buen visitar con sincusas como ista. Y qualsiquier atra. Si no lo hetz feito, ya tardatz. Astí se veyeba a muita d'a chent que protagoniza dende fa decadas la scena mosical aragonesa de conchunta con atras que son fendo los primers pasetz de carreras bien prometederas. Ixas mesmas serán lo 13 de marzo en lo Teatro Olimpia de Uesca a on que se fará la gala, por primer vegada difuera de Zaragoza.

En ista edición tornan a estar-ie muitas d'as mías bandas favoritas, chunto a atras que he habiu d'ascuitar de propio pa aprestar iste programa. Tos convido a todas a que faigatz orella a lo programa y que invirtatz un poquet de tiempo en conoixer ixas nominadas. Regular que trobaretz cosas que tos soprenderán. Y ya que foi lo programa antes d'os Premios, tamién tos proposo de chugar a endevinar quí ganará qué. Fetz-me arribar las vuestras propuestas por los retz!

Programa #72

Premios d'a mosica aragonesa 2019. Tierra de barrenaus 5x09

Con tres vegadas que se faiga una cosa, ya se torna tradición, asinas que l'especial Tierra de barrenaus radio sobre los premios d'a mosica aragonesa ya ye tot un clasico, igual como la Ofrenda de Pilars u las escisions de Podemos. Iste anyo se feba la vintena edición d'istos galardons que centran por bells diyas la información mosical d'o país, asinas que ye un buen momento pa tornar a felicitar a Aragón musical por organizar-los y por conseguir fer mas vistera la nuestra mosica.



Iste anyo tornemos a estar-ie toda la plantilla. Ruben, Dabi, Tamara y yo comentamos en un programa de mas de dos horas tot lo que viyemos en la gala celebrada lo pasau 2 d'abril en lo Teatro Principal. No busques analisi rigurosa ni comentarios saputaces sobre tot lo que i pasó porque no lo trobarás. Pero reflexions sobre la scena mosical aragonesa, la gala y sobre tot, muitas risas, en tendrás a brozuecos. 

Una gala que empecipió y acabó en aragonés, luenga que tenió a-saber-la presencia. Dende la versión de Soniando que cantó Sergio Sanz dica l'actuación de Nuei, colla que se levó lo premio a la millor canción en luenga autoctona (sic) por lo suyo tema "Mil parolas". Entre las millors novedatz, lo nuevo duo de presentadoras que sustituyioron a Starkytch pinchadiscos, qui s'heban encargau de guiar la nueit en las zaguers edicions. 

Si quiers saber qui ganó cadaún d'os premios, puetz consultar-lo en la suya web, y si quiers veyer la gala, la farán lo 17 en Aragón TV. Tanimientres aqui tiens la noticia que dioron en los informativos, y prou que sí, lo podcast pa que t'enteres de tot lo que i pasó (u no).

Premios d'a mosica aragonesa 2018. Tierra de barrenaus 4x08

Un anyo mas, iste 6 de marzo s'entregoron los Premios d'a mosica aragonesa. Y con lo bien que nos lo pasemos l'anyo pasau, tornemos a estar en la gala, pa viyer-la, admirar-la, criticar-la y, a la fin, fer-ne cronica y opinar d'o que i viyemos. Sin tener ni ideya, prou que sí, ya que ixo pareixe estar l'estilo d'istos zaguers anyos.



La gala entregó decinueu premios en tasament dos horas de durada, asinas que fue a tot meter. Entre los premiaus, Sho Hai, Maria Jose Hernández, Lady Banana, Kleejos Band, Vegetal Jam, La Ronda de Boltaña, y muitas atras artistas y profesionals que treballan pa fer-nos la vida muito mas bonica. En ixas dos horas, como ye normal, bi habió de tot. Emoción, risas, bell momento vergonyoso, glamour, reivindicación, ... De tot ello, prebamos de dar-ne treslada Dabi, Ruben y yo mesmo en poco mas de dos horas de programa.

No contemos con la presencia d'Arale, que ye estudiando, pero que somos seguros de que tornará a estar present a l'atro anyo. Si no hetz visto la gala encara, ya tardatz. Ye un d'os momentos mas importants pa la mosica aragonesa de tot l'anyo. Y si la hetz vista, ascuitatz-tos lo programa y deixatz la vuestra opinión en los comentarios.

Dende iste blog, quiero agradeixer, ¡como no!, toda la fayenada de la chent d'Aragón musical, que consigue fer una gala tant digna como la d'os Premios d'a Mosica Aragonesa y que antimás fa que por bell diya, se charre en las noticias y depeixas d'as mosicas aragonesas, tant inchustament ixublidadas a soben.

Lo reguetón nos aviella quaranta anyos

Cada cheneración tien una serie d'himnos y mosicas que la marcan. Quan yo creixeba yera lo grunge lo que lo petaba pa que, poco tiempo dimpués, quasi dengún en faiga alcordanza d'aquella moda que nos deixó cosas bien buenas, y d'atras que talment faigan una mica de vergüenya agora mesmo.

Cada cheneración gosa de pensar-se tamién que la suya banda sonora ye la millor. Insuperable en calidat y que perdurará por los sieglos d'os sieglos. Cuento que todas seremos d'alcuerdo en que a la cheneración mas choven d'agora l'ha tocau -u ha trigau- lo reguetón, cumbia y ritmos pareixius, como la suya manera d'expresar-se mosicalment. No en soi guaire fan d'ista mosica, sobre tot, por que quasi ni la conoixco, pero tien cosas mas que intresants, en lo poco que yo sé.

Manimenos, nos trobamos unatra vegada con la incomprensión d'os que maniamos agora mesmo lo mainstream d'a "cultura oficial". Los quarentons somos encantaus de conoixer-nos y reivindicamos a Smashing Pumpkings y Radiohead, u a Más Birras y Las Novias, si nos quedamos en casa, como lo millor d'a historia mosical. De vez, y como no podría estar d'atra forma en ixe razonamiento absurdo de que "si lo mio ye bueno, lo tuyo ha d'estar malo", refusamos como cheneración tot lo reguetón que imple las nuestras emisoras, bars, discotecas y verbenas. 

Eixemplo en son las zaguers galas d'os Premios d'a Mosica Aragonesa, an que, terne que terne, se feba mofla d'ixas mosicas, con l'aplauso y complicidat d'os asistents. Cuento que no en fa tanto, las mesmas gromas se farían con lo rap, chenero que feba esmelicar-se a mas d'un a finals d'os 80 y que tant poco tiempo dimpués, meter un d'os suyos representants como pregonero d'as nuestras fiestas. Bella decada antes sería inconcebible haber galardonau a un rockero por fer mosica.

No sé si lo reguetón será una pasa temporal, como en estió lo grunge, u si ye plegau pa quedar-se-ie. En qualsiquier caso, habríanos d'estar-nos mas prudents y no correr tanto a fer chistes facils sobre la mosica que "ascuitan las chovens". ¿No paratz cuenta de que ixos comentarios nos aviellan bella quarantena d'anyadas? En lo poco que he charrau d'isto con chent mas choven que yo, m'amuestran unatra envista prou diferent d'ixa mosica d'a que tien la mia cheneración.

¿Las letras son heteropatriarcals? Tanto como pueden estar-ne las d'os prestichiosos, premiadismos, y incontestables Loquillo, Amaral u Sabina. Se puet fer reguetón feminista, como contrimuestra Tremenda Jauría que talment siga l'eixemplo mas conoixiu, pero a fe que no ye l'unico. ¿Han feito que no s'ascuite atra cosa? Igual como fa cada moda. U creyetz que si no existise lo reguetón, en los bars d'o casco iban a meter Kortatu? Cal que no. Bi habría belatra moda absurda. No tornaría la tuya, siga qual siga.

La luita ye contra lo masclismo, no contra lo masclismo en una mosica concreta que no entiendas. La luita ye contra lo monocultivo cultural oportunista, no solament quan ixe monocultivo no ye lo tuyo. Creyer que tot lo reguetón ye Maluma, ye como pensar que tot lo rock ye Revolver, lo punk Offspring u lo rap John Cobra.

Muita d'a chent que ye ascuitando agora reguetón, en cinco anyos será fendo-lo y en vinte anyos serán personas con uns ingresos adequaus como pa mandar en ixe debantdito mainstream cultural. Asinas que totz nusatros, trentanyers y quarentons habremos de viyer en no tanto tiempo como en los PMA, beluna d'as ganadoras s'adedica a lo reguetón, y como dende instancias publicas y d'a elite cultural se reivindica la mosica d'istos anyos. Y regular que ixa mesma chent refusará y se fará la mofla d'o que ascuiten las chovens d'alavez. Itz parando-tos-ie.

Lo gaiter d'o lugar toca... de pistón

Diz lo refrán que "Lo gaiter d'o lugar u toca lo mesmo u toca mal" fendo referencia a ixa tendencia que muitas tienen que les fa infravalurar lo propio y glorificar lo forano, de manera independient d'a suya calidat obchectiva. Ye ixa una malotía aragonesa, y cuento que de muitos atros pueblos con baixa autoestima, como en ye l'aragonés.

Los Premios d'a Mosica Aragonesa, que se celebran dende fa decinueu anyadas, son un exercicio de tot lo contrario. Prebar de fer viyer a las aragonesas que ixos gaiters d'aqui tocan muit bien y fan una mosica a saber que intresant. Mosica que no viye que entrepuces ta salir d'o país, entre atras razons por lo suyo orichen. Todas las mosicas nuestras que trunfan (en lo sentiu capitalista d'a parola), acaban vivindo dillá d'as nuestras mugas.

Sergio Falces, un d'os organizadors d'os Premios, n'entregó en ista gala un a Las Novias, por la suya trachectoria. En la entrega, remeró como, quan yera mas chovenón, le enarcaba que, antimas d'a suya buena mosica, ixos artistas fuesen vecins. Ell d'o Rabalete, ells de Las Fuents, barrios vecins. Se sentiba a saber que afortunau y emocionau de poder dar-les un premio a unas personas tant admiradas y de vez tant cercanas. En la replega d'o premio, Las Novias se facioron argüellosos d'os suyos orichens de clase y puesto.

Igual como Sergio, tamién he teniu siempre ixa tendencia a valurar mas lo propio, lo cercano. Quan una colla fa mosica que me intresa, que me emociona, si son de casa, sé que los voi a poder vivir d'una manera bien diferent a si fuesen foranas. Podré sentir-los en directo muito mas a ormino, podré acercar-me a las artistas y comprebar cómo son personalment. Charrarán en las suyas cancions, probablement, de cosas cercanas. La experiencia mosical será, a la finitiva, muito mas completa.

Pero antimás ye una qüestión de chusticia. Aragón ye un país con un patrimonio mosical, historico y present, impresionant. Las artistas que han teniu repercusión difuera, como Bunbury, Pecker, Kase O u Amaral no son que una chicota representación de tot lo bueno que da ista tierra por cada diya. Ignorau por l'administración, pero tamién por las propias aragonesas que muitas vegadas nos estimamos mas de gastar-nos buena parrafiquera de diners en bell concierto "gran", que ir ta los quatre u cinco que podríanos disfrutar con ixas mesmas perras si fuesen artistas locals.

En estar ignoraus por administración y medios, a soben las buenas mosicas aragonesas son de mal trobar. Pero si rechiramos bella miquirrina por lo circuito de conciertos u iniciativas como los premios d'a mosica, nos trobamos con una riquisma cultura mosical aragonesa que, ta forro de bota, ye ixemenada por tot lo nuestro territorio, y que tien una continidat historica a traviés d'as decadas.

Y contino, bell par de videos que lo contrimuestran.

XVIII Premios d'a Mosica Aragonesa. Tierra de barrenaus radio 3x08

Kase O en l'actuación d'a gala

Vivimos en un pais prou mosical. Si beluna d'as nuestras expresions culturals tien buena vida, ye precisament la mosical. Dende a tradicional, que contina con firme rasmia, chuntando historia con innovación, dica os ritmos mas modernos, an que Aragón ye estada avantguarda bien a ormino.

Manimenos, isto no siempre se viye reflexau en a sociedat aragonesa, y muito menos en os nuestros medios de comunicación de masas. Son pocos os rincons conquerius por as nuestras mosicas, siempre habendo de superar entrepuces arrienda. Muitas, hemos prebau de luitar contra ixe ixubliu ent'as mosicas aragonesa, pero si bi ha un colectivo que lo ha sabiu fer ¡y cómo! ye Aragón Musical.

Prencipiar a racontar todas las suyas iniciativas y conquistas me levaría muito espacio. Tos recomiendo que faigatz una uellada a la suya web y que les sigatz en os retes socials, ya que trobaretz muita info intresant y muitas iniciativas importantistmas pa empentar a creación mosical en Aragón. Pero si una d'ellas ha conseguiu una trascendencia social por dencima d'atras, son os Premios d'a Mosica Aragonesa, que han feito estianyo a suya XVIII edición. Se celebró con una gala en o Teatro Principal que, por primer vez, ha retransmitiu Aragón TV. Podetz viyer-la aqui. Como bien bi remeroron, ta plegar-ie, habioron de prencipiar fendo una cosa muito mas chiqueta en a mitica sala Morrissey.

Hue, os premios son bien implantaus y a gala ye tot un acontecimiento social y cultural. Teniemos a suerte de poder asistir a la gala en directo, precisament ta grabar iste programa, an que hemos analizau toda la gala, os premios, as entregadoras, etc... con o tono cutiano de Tierra de barrenaus. Ye decir, somarda, y en iste caso, con una mica de ida de flama. Como siempre, aspero que tos faiga goyo y aguardo los vuestros comentarios. 

L'aragonés ye bien vivo (marzo 2013)

Presentación de Cosetas d'adentro,
 en La Pantera Rossa de Zaragoza

Torna L'aragonés ye bien vivo, d'o mes de marzo a bells pocos diyas d'a cincomarzada a on que, si a plevia nos deixa, serán Nogara, Fablans y atras asociacions que treballan por l'aragonés, espardindo a suya faina.

Diya internacional d’a luenga materna
Sin pena ni gloria pasó o diya internacional d’a luenga materna, o 21 de febrero, por Aragón. Garra refirme institucional y nomás bellas poquetas actividatz de man de REA y Consello facioron vistero iste diya. 

En Zaragoza, se presentó en La Pantera Rossa, o libro y DVD de Cosetas d’Adentro, curtometrache y relato de Lola García. Una atra vegada más La Pantera Rossa se quedó chicota ta acullir-ie a tantisma chent. Ta que dimpués digan que l’aragonés no intresa. Me fería goi de saber quantos libros en castellano fa rebutir tantismo a sala. O viernes en Taust se tornó a presentar “Mesaches” de Chuse Inazio Nabarro, que’n he charrau ya qualques vegadas y o lunes 25 en Uesca se fació una mesa redonda sobre “La biblioteca d’as luengas d’Aragón” con a presencia de Ignacio López Susín, Pilar Benítez, Óscar Latas, Francho Nagore y Rafel Vidaller.


Programa Nieus Lucia Dueso
Se ha presentau ya as actividatz incluyidas en o Programa Nieus Lucía Dueso t’a promoción de l’aragonés en os centros educativos “sostenius con fundos publicos”, ye decir, os publicos y os privaus que reciben dreitament diners de l’administración. Iste programa permite a los centros demandar actividatz relacionadas con l’aragonés y conta con a colaboración de Nogara, Fablans, CFA, REA, Gara d’edizions y Xordica. As actividatz, las podetz consultar en o folleto informativo que han penchau y ya viyeretz que bi ha muitisma variedat: cine, charradas, esporte, mosica, ...


Junto al fogaril y Condau de Ribagorza
Continan as convocatorias de premios literarios a tamás d’a crisi y d’o penible eixemplo que da o Gubierno d’Aragón, matando los premios en as luengas minorizatas d’Aragón. Os concellos de L’Aínsa, Graus, Fonz y Estadilla no continan por ixa endrecera y sí que convocan os suyos premios.
Un d’ells, Junto al fogaril, certamen de cuentos y relatos breus organizau por o concello de L’Aínsa. As bases se pueden consultar aqui. As obras inviadas han de tener entre 3 y 12 fuellas, asinas que qualsiquier que escriba bell poco en aragonés, puet presentar-se-ie. O primer premio ye de 800 €, que siempre fan honra. O plazo remata o 15 de marzo.
L’atro ye O condau de Ribagorza, re relatos curtos y poemas en baixoribagorzano. As bases son prou parellanas. En iste caso, lo organizan los concellos de Graus, Estadilla y Fonz, a extensión ye d’entre 4 y 6 fuellas, y o plazo remata o 22 de marzo. Bi ha 600 euros de premio t’o millor relato y 300 t’o ganador d’o concurso de poemas

Seminario t’o profesorau de luenga aragonesa
O CPR de Uesca organiza un seminario t’o profesorau de luenga aragonesa prou pincho. Mientres tres sesions se i charrará de temas muito utils t’o profesorau y se compartirán experiencias y recursos como as nuevas tecnolochías u os recursos bibliograficos de man d’as principals editorials (Xordica, Gara d’edizions y CFA). T’apuntar-se-ie, cal fer-lo a traviés d’a web d’o CPR. No cal estar funcionario, simplament estar profesor d’aragonés u profesor de lo que siga, intresau en l’aragonés.

El catalá de La Codonyera
Iste 13 de febrero se presentaba en Zaragoza El catalá de La Codonyera, libro publicau por Gara d’edizions y escrito por Artur Quintana i Font. O libro, que surtió dende a tesi de l’autor, y que se publicó por primer vegada en 1986 en Barcelona, plega agora enamplau y con una nueva edición pincha de tot que incluye toponimia, atlas lingüistico, literatura popular y asinas asinas. Un sobrebuen libro ta qui quiera conoixer o catalán d’ixa parti d’Aragón y a realidat bilingüe d’a redolada.

Premios d’a mosica. Prau
Os Premios d’a mosica estioron entregaus en a gala d’o pasau 18 de febrer. Entre os premios, un d’ells ye adedicau a las luengas minorizatas aragonesa que, ista anyada, l’han baltizau como “millor canta en luenga autoctona”. Os nominaus estioron Prau con as cantas Mosica, parola y movimiento y Os pietz en a tierra, Angel Villalba por Olivera d’Aragó y Jesús Viñas por “A mía tierra”. O ganador, muito chusto en a mia opinión, estioron Prau por Os pietz en a tierra, sobrebuena canta que da titol a o disco. En replegando o premio, Chavi, baixista d’a colla, agradeixió a las collas de mosica que fan servir l’aragonés, a bells prochectos culturals como A Enrestida, Nogara u Arrebato y de traza somarda a Rudi, Biel y Belloch por “a suya esfensa de l’aragonés”.

Canta en aragonés. Comando Cucaracha
Contina o reto de que nos invien cantas en aragonés, cantas en qualsiquier luenga ta que les ne traduzcamos, … de que os mosicos apuesten por l’aragonés. Una d’as collas que, dende o primer disco lo fació, estió Comando Cucaracha qui han incluyiu cantas en aragonés en los dos discos publicaus dica agora y qui fan servir arrienda parolas en aragonés en toda la resta de cantas que fan. M’ha dito, antimás, un muixonet, que son parando ya un nuevo disco que asperemos graven antis con antis. A canta trigada ta iste mes ye d’o primer disco y se diz Balbino Pedo, una historia etilica con a colaboración de Juanito Ferrández de Ixo Rai!.