martes, 29 de julio de 2008

Publico y as luengas

Prenzipié a mercar o diario Publico más que más, por cambiar un poquet. O Periodico d'Aragón me parixeba poco, pos en zinco minutez t'ha leyiu lo poco intresán que bi ha. O País ye un catenazo y son más españols que Losantos. Publico, sin estar una marabilla, tien bellas cosas que fan que no m'importe dixar-me os zincuenta zentimos en mercar-lo: un trestallo sobre zienzias muito intresán, no informan sobre as torturas de animals y, si lo fan, ye ta denunziar-las, se creman con a SGAE y, en zagueras, s'han posizionau de traza platera contra o nazionalismo lingüistico español. Con meter "lenguas" en o suyo propio buscador i surten arrienda articlos bien majos. Entre atros i escribe de cabo ta cuan Juan Carlos Moreno, qui fazió a charrada en as quinzenas chornadas sobre as luengas d'Aragón que fazión Nogara estiaño.

Agora son fendo un reportache an que un periodista preba d'espresar-se en a luenga propia de cada comunidat y beyer si puede bibir-ie un diya entero sin fer serbir o castellano. Tos recomiendo que lo leigaz. Güe ye en Barcelona. Tanimientres tos pencho bels articlos como exemplos:

http://www.publico.es/espana/129452/nacionalismo/espanol/nuevo/politica/lenguas

Tamién i leyé, con cuasi una glarimeta o siguién articlo, publicau l'onze de chulio:

México D.F. // Un indígena de 72 años que vive en el estado mexicano de Tabasco se comprometió ayer a salvar su lengua nativa, el zoque ayapaneco, que en la actualidad sólo lo hablan dos personas en el mundo, él y un vecino de 66 años. Para lograr popularizar el uso de este dialecto prehispánico en la comunidad rural en la que reside, el anciano bilingüe explicó que ya ha habilitado su casa como una escuela.

Suerte, mozet!

Un bideo y un binclo

Continando con A Enrestida, en a borina d'o suyo zinqueno cabo d'año nos amostrón por primer begada, o bideo que pencho abaxo. Que ye muito majo, que sino l'autor no dixará de dar mal... (he,he,he).
Iste binclo que pencho contino ye una rispuesta ta toz os cansos istos d'o periglo d'o catalán y ixas fateras. Buenisma y somarda rispuesta en forma demanifiesto y plataforma (cuento que birtual...): http://nohablamoscastellano.blogspot.com/

Zine de berano...

A Enrestida ya ha feito zinco añez... Que biellos que nos femos! Manimenos ista chicorrona y de bez gran asoziazión se troba bien choben. Con o local rezién esbiellau y pintau y buena cosa d'ideyas que de seguras tendrán. Ta los que no nos queda atra opzión que remanir en Zaragoza mientres istos meses de calor y Flufis, nos enfolgarán un poquet as tardis con o ziclo que han prenzipiau ya de zine. Toz os martes y chuebes dende as 19:30 (bueno, ya conoxemos toz os orarios aragonesistas...) ferán una zinta. Lo programa encara no ye penchau en o blog suyo pero de seguras que lo ferán ascape. Y si no rai, que lo importán ye chuntar-nos y fer-ie unas charradetas y unas bieras.

Si belún quiere bier tamién una zinteta os sabados de tardis-nueis, o conzello en fa en a plaza San Agustín a ixo d'as 22:00 (istos son mesmo masiau puntuals). Lo programa lo tenez en iste binclo, pero no le faigaz mica caso, porque las dos que he bistas no han coinzidiu...


Que tos faiga buen prebo y no tos dixez los güellos con tanto flin!

lunes, 14 de julio de 2008

Pi ye tres?

Por si a Expo no pudise prou per sé y por si o suyo carauter zientifico no ese quedau contrimostrau de raso leigo ista notizia en Publico. En zagueras no soi guaire informau d'o que pasa difuera d'o guariche an que treballo y os suyos arredols, pero cuento que isto no ha teniu garra rispuesta dende garra asoziazión u coleutibo. Isto d'a zienzia no l'importa a dengún...

O pior d'ista chentota creazionista ye que se disbrazan de bella mena de zientifismo y parix que no les ba mal de tot. En l'Imperio (o de berdat, no l'español, que ixos son os encargaus) ya ye asinnatura en bels estaus y os que creyen que l'ombre ye creyazión dibina son muitos más que no parix. De feito caldría que salisenos bel diya t'a carrera y ir preguntando. U no, que beluns tenemos fé en a umanidat.


A beluns, por fer-se un baño en o río suyo suyo les identifican como periglosos bes-te-ne tú a saber qué. A belatros, que esparden mentiras de raso azientificas ta chustificar a toda una colla d'ababols que biben d'otris, les fan un congreso ta els en a marabillosa Expo de l'augua o meyo ambién y l'allolio... Sr. Belloch, ta cuan un congreso de o Flying Spaghetti Monster? Somos muitos os que, como FSM diz, creyemos que o cambeo de l'orache ye dreitamen relazionau con a disaparizión d'os piratas.


O titol de l'articlo, ta qui no lo sepa, ye porque en un estau de os USA, demandón que PI - sí, o numero Pi, alto u baxo 3,141592.... - estase 3. En fan a mofla os Simpsons en un d'os capitols suyos, que os más frikis de seguras remerarán.

sábado, 12 de julio de 2008

O diya que sonó dos begadas l'Abanera

Poco dimpués de rematar l'articlo sobre a Ronda Sr. Berzimuelles -muitas grazias, mozet- me imbió iste bideo. Ista estió a segunda begada que tañón l'Abanera triste en a mesma nuei, cantada ista begada por o publico. Más d'un tos i reconoxerez.

Adeu Yonkimobil

Siempre he teniu bella mena de sindrome de Diogenes u cualcosa parellana que fa que me faiga muitismo duelo abentar as cosas biellas. Boi alzando zarrios por toz os cabos, encara que, en zagueras, con ixo de bibir de traza independien en un piso no guaire gran he d'abentar cosas que antismas ese alzau. Manimenos en iste caso sí que teneba muitas razons ta no abentar un ocheto: o Yonkimobil (que ye uno d'os nombres que ha teniu lo que yera dica fa dos diyas l'auto mio). Yera un repoliu Seat Ibiza de 1988. Bente años que ha conseguiu fer! S'ha estricallau en tot Aragón y l'he cambiau quemisió de piezas, pero los intes que he pasau chunto a él... Artieda, Ayerbe, o Matarranya, San Chuan d'a Peña, Uesca, Santa Zilia, Monzón, Andorra, Alcorisa, A Fueba, tot ixo antimás de fer a carrera con yo y con muitos atros que puyaban t'o Campus t'aprofeitar lo biache.

Cuan lo lebaba t'o deposito teneba una glarimeta en momentos de cayer. De seguras que toz os que i son puyaus bella bez tamién lo trobarán a falta. Y ye que o Yonkimobil teneba muito carisma. Y muitas alcordanzas que nos dixa ta cutio.


Agora as suyas partis se ferán serbir ta atros autos u quemisió ta qué. Ta que me remere le dixo ista canta de Daniel Higienico que siempre que la sienta me'n alcordaré.

Yonkimobil RIP 10 de Chunio de 2008





domingo, 6 de julio de 2008

La Rondaaaaaaaaaaaa!!!!

En iste cabo de semana he conseguiu sentir a La Ronda dos begadas en menos de benticuatro oras: la una en Ansó y o Sabado en Zaragoza. No lo he feito como un reto ni cosa parellana. Simplamen o Domingo he treballau y no he puesto quedar-me en o PIR. Talmén sía por a empapuzada de Ronda. Talmén por as zaguers notizias sobre Chanobas, pero iste cabo de semana m'ha dixau ixa sensazión de que encara ye posible que iste país bel diya cambee. Dimpués de tantismos malos intes y de que parixca que l'aragonesismo tien menos futuro que Windows Vista, tornar a sentir toz ixos imnos y beyer a milenta personas fendo os coros, puño entalto y mesmo con bel siñal, pos s'agradeix.

La Ronda, a tamás de toz os años que han pasau, continan estando, como dizió o presentador d'ayer, unos titans. Os titans d'o Sobrarbe. Grans d'entre os grans. Y as cantas suyas continan estando berdaders imnos aragoneses. (A bier si bel diya podemos sentir ixa Rebolandera como Imno d'Aragón).