miércoles, 21 de julio de 2021

Barucas universitarias

Veteme que en los zaguers meses se me repite una soniadera que nunca no heba teniu. Mas d'una decada dimpués d'haber presentau lo mio Prochecto de Cabo de Carrera, ixo que agora sería lo Treballo de Fin de Grau, suenio que me falta bella asignatura por aprebar. Por un regular mesmo de primer curso. Me meto bien niervudo y pienso en cómo se m'ha puesto olvidar que no teneba aprebau Expresión Grafica u Electrotenia u lo que siga. He de tornar a fer ixas eternas listas d'exercicios y problemas, mirar-me la teoría por si un caso, buscar examens d'atros anyos... tot ixe catenazo. Quan lo he comentau en retz socials, en las virtuals y las fisicas, m'ha respondiu a-saber-la chent que ixo ye normalismo. Pareixe que ye una soniadera compartida entre todas, u muitas, d'as que hemos pasau por lo sistema educativo. 

Pero se me fa raro que, dimpués de tantos anyos, se me viengan ixas cosas t'o tozuel. En los anyos universitarios, los estudios yeran la zaguer d'as mías prioridatz. Yera embrecau de tot en l'activismo cultural y politico, y antimás teneba edat de bureo y festellar, asinas que lo d'os examens no me teneba masa niervudo. Teneba ya una FP, y treballaba a chornada parcial, asinas que no m'apuraba rematar la carrera antes u dimpués. Con tot y con ixo, si t'a part d'alavez hese teniu istas soniaderas m'hese pareixiu bien normal, pero ¿agora?. 

Talment, quiero pensar, lo faiga por empatía. Por lo mio treballo, soi tot lo día rodiau d'universitarias. Quan s'acerca examens, ixo ye un barambán d'emocions; niervols, chilos, ploros... Me las miro, dando gracias por haber acabau con ixa etapa d'a mía vida, y sin trobar mica a faltar la universidat.

Por lo que veigo, las cosas han cambiau y, en muitas asignaturas, los examens son una parte bien chiqueta d'a evaluación de l'alumna. Ixo tien una parte mala y ye que muitas personas no podrían fer los graus d'agora por no poder asistir a las clases de presencia obligatoria u entregar los treballos quan pertoca. Lo mío tiempo me lo organizaba yo y iba dreito ta l'examen final sin fer ni parcials ni costodias. Pero sí que tien una parte buena pa lo que suposo que ye la mayoría d'as estudiants, que ye sacar-le importancia a los examens. Y ye que evaluar, en una sola preba, un solo día, los conoiximientos de tot un cuatrimestre u mesmo d'un anyo de treballo no nomás ye inchusto, tamién ye ineficaz. He aprebau examens si entender ni una letra d'a materia y n'he suspendiu conoixendo-la perfectament. No tiengo ni ideya de quál ye lo metodo perfecto, ni pa la universidat ni pa atros nivels educativos, ni pa la milenta d'oposicions de toda mena y nivel que i hai por tot. A fe que no pas los examens, a lo menos planteyaus como por un regular son.

No aduya, pa cambiar a millor, la situación hiperprecaria d'o profesorau asociau, ni la masificación de muitas asignaturas, ni la endogamia universitaria, ni muitas atras cosas que pasan en la eduación superior y que, a pesar d'estar la consellería y lo ministerio en megaprogres mans no fan mina de solucionar-se a curto plazo. Ista nueit tornaré a chitar-me. Talment me vienga la soniadera que m'estozolo dende bell balcón, u la de que se me caye bell nino u lo gato, u la de que pierdo los dients. U talment soneye que no m'entivoqué de carrera y que n'estudié una d'ixas que dicen "de letras", y que astí sí que te amostraban cosas intresants y no nomás a aprebar examens. No me fará lo morro clo.

martes, 20 de julio de 2021

Especial XXII Premios d'a Mosica Aragonesa. Tierra de barrenaus 7x22

Cosas de pasas y calendarios, por segunda vegada en ista temporada de Tierra de barrenaus, l'equipo titular d'os Premios d'a Mosica Aragonesa nos tornamos a chuntar pa comentar una gala. Lo femos de veranet, con la gala encara recient y entre punchada y punchada de vacunas. Y, como de cutio, con toda la buena intención d'o mundo y prebando de que no bi haiga masa hate. Lo important, como siempre se diz en istos premios, ye que se charre d'a mosica aragonesa y ixo ye lo que hemos feito por mas de dos horas de programa. Unatra vegada que nos sale mas largo que la propia gala.

Ista edición, seguindo lo camín de l'anyo pasau, salió de Zaragoza. Si la XXI se feba en Uesca, ista vegada se chiroron ent'o sur y estió Alcanyiz la ciudat trigada pa acullir l'evento. L'auditorio Pui Pinós recibiba lo pasau 20 de chunyo toda la ripa de mosicas, artistas, criticas y chent de toda mena que i yeranos convidadas. Bell poco mas de dos horas dimpués, en salibanos. Beluna con premio, belatra sin, pero cuento que todas contentas por haber-nos retrobau, en bell caso, dimpués de muitismo tiempo.

En unatro anyo a on que yera imposible no charrar d'a pasa, la poca reivindicación que bi habió estió enfilada sobre tot a que las salas y los eventos tornen a funcionar antes con antes y con la mayor normalidat y seguridat posible. Ista edición contó con menos actuacions que atras vegadas, lo que trobemos a faltar a-saber-lo. Probablement, un d'os motivos estió la gran cantidat de premios entregaus y de patrocinadors de l'evento que heban de salir a fer bella parola. Nos quedan momentos bien pinchos y muitas mosicas que ascuitar dica la siguient edición.

martes, 13 de julio de 2021

La segunda dosi

Mai morió fa quatre anyos dimpués de meya vida fendo d'ATS en la MAZ de Zaragoza. Se quedó sin vivir la pasa que nos ye tenendo acollonadas istos dos zaguers anyos y quí sabe quantos mas. No sé si por la suya profesión, porque simplament yera la suya manera d'estar u por bella mica d'as dos, a mai le feban miedo a-saber-las cosas. Cada vegada que sentiba una sirena, rai si d'ambulancia, bombers u policía, s'estremoleceba pensando qué pasaría. Patiba si marchabanos bell fillo de viache, u de conciertos u si febanos esporte. Siempre se pensaba que ibanos a tener bell problema, accident u lesión. No quiero ni pensar cómo lo hese pasau d'haber viviu ista pandemia que tanto nos ha acotolau.

En marzo y abril ixe miedo -heredau de mai, innato u aprendiu, nunca no lo sabré- m'invadió de tot y me deixó paralisau. Marchaba de casa t'o treballo y d'o treballo ta casa por una ciudat vueda de chent. No me deixoron teletreballar ni un solo día mas d'o que obligó la lei y cada minuto que pasaba difuera d'os 50 metros quadraus de casa mía yera cagau de tot, como si lo virus fuese amagau en cada cantonada aguardando pa apegar-se-me. Entre que los retz de solidaridat medraban por lo barrio mío, con quantas companyeras y amigas chugando-se-la pa aduyar a otri, me quedaba en lo sofá mirando-me las noticias asperando que las graficas amostrasen bella millora que m'asperanzase.

China-chana y a pur de normalización d'una situación que nunca no hese pensau de vivir, la vida tornó a ixo que le dicen la nueva normalidat, con los bozos omnipresents y fendo-nos a estar posadetz en bars, conciertos y eventos. Lo miedo, en buena parte, se me pasó, y a la fin empecipió la vacunación. Beluna d'o mio entorno refusaba en los primers momentos, y por diferents razons, punchar-se-la. Les deciba que si i renunciaban que me pasasen la suya dosi, que yo m'arrisgaba por ellas. Dende que anuncioron que bi heba vacuna yera deseyando de tener-la correndo por lo mio organismo. Y a la fin me plegó lo turno fa tres semanetas. Yo, que atra d'as mías fobias ye las agullas, que entre 2006 y 2018 no me facié ni un solo analís por miedo a que me punchasen, i fue encantau d'a vida y con lo huembro bien vister ta ixa primer cita. Una mica de mal en lo brazo y prou. Ni un paracetamol m'habié de fer. Hue, a la fin, m'acaban de punchar la segunda dosi, con lo que completo la pauta. Ya soi vacunau.

He conseguiu pasar istos quince meses largos sin haber-me de fer ni una PCR ni confinar-me por contacto. Cudiando-me y cudiando tot lo posible a la resta. N'i ha habiu d'atros que, fendo muita mas ficancia que no yo, s'han contachiau, como perfectament m'hese puesto pasar a yo mesmo. A la fin i hai factors aleatorios que dengún no puet controlar. Queda muita pasa, me pienso, y los bozos y los punchazos tardarán en salir d'a vida nuestra si ye que nunca lo fan. Pero lo paso que hue he feito, ixe segundo punchazo, ye tot un trango entabant pa que tot isto acabe. La diferencia ye chigant como se ye contrimostrando entre los sectors d'a población ya vacunaus.

Tot gracias a las personas que han investigau y desarrollau ista vacuna, prou que sí. Por un regular con infrafinanciación y muito menos prestichio social que no les caldría. Y gracias tamién a todas las treballadoras d'a sanidat que tantas vidas han salvau en istos días, que con la suya fayena cutiana nos acompanyan en los momentos mas hodius d'as nuestras vidas y que, pa forro de bota, han d'aguantar faltadas y carranyas de cabo ta quan. Hue, entre que aguardaba ixos diez minutetz de dimpués d'a punchada, me miraba las dos enfermeras que iban emplindo las agullas con la vacuna. Atra tercera se moveba discretament a lo ritmo d'a mosica que entraba por lo filo mosical que teneban. Todas tres con un cenyo d'alegría, charrutiando entre ellas. Fendo pareixer quasi rutinario un treballo tant important como lo que yeran fendo. M'he alcordau, como cada vegada que he de visitar un hespital u centro de salut, de mai; d'o suyo treballo, d'os días que veniba caricacha por que le'n heba pasau beluna de mala en la MAZ, d'as guardias que feba por quatre perras, d'o espanto que le veniba cada vegada que sentiba ixas sirenas, d'o miedo que le teneba a tantas cosas y d'o mal que l'hese pasau en istos meses. Soi lo caganiedos, asinas que, por edat, soi lo zaguer fillo en vacunar-me. Hue mai, tot y saber como yo que la pasa no ye rematada, hese sospirau aliviada.

domingo, 11 de julio de 2021

Ent'a ueitena temporada. Tierra de Barrenaus 7x 21

La sietena temporada va rematando y toca prebar nuevos formatos pa la ueitena, asinas que en iste programa faremos bella mena de magazine con muito conteniu, como siempre, en aragonés. En l'apartau tecnico nos acercaremos mas t'o formato de falso directo con que empecipió lo programa, grabando-lo tot d'una tongada, asinas que la probabilidat de fallos ye muito mas gran. Aspero que me los sincusetz.

Empecipiaremos con un texto de Juan Carlos Moreno Cabrera, amprau d'o suyo libro Errores y horrores del españolismo lingüístico. Ni ye la primer vegada que charramos d'iste profesor en lo programa ni será probablement la zaguera.  En l'achenda tos recontaré belún d'os festivals que sí que podremos disfrutar iste verano, gracias entre atras cosas, a la buena fayena de replega que ha feito Aragón musical.  Relacionau con ixo, ya podetz entrefilar-tos que, antimás somos a pocas de grabar lo programa sobre la gala d'os Premios d'a Mosica Aragonesa, que asperamos puyar antes con antes.

Los CSAs tamién son tornando t'actividat y A ixena, de Teruel ye fendo a-saber-los eventos bien intresants. Ya charremos fa poquet, con Chorche Paniello, sobre las movilizacions por l'autodeterminación d'o Sahara Occidental. La gran manifestación que i charrabanos ya se celebró en Madrit y en damos treslau. Atras movilizacions recients, d'una mena de tot diferent, estioron las que se facioron en a-saber-las ciudatz con motivo d'o Día d'a bicicleta. Y pa rematar con noticias buenas, gracias a Cima Norte, conoixiemos lo naiximiento de tres nuevos onsetz que comparten ya con nusatras lo Pirineu.

En la parte mosical empecipiamos y rematamos con dos collas valencianas. Aspencat ubre lo programa, con totz los nuestros deseyos de tener novedatz sobre los prochectos a on que s'embrecoron los suyos miembros. Zarra Zoo con un d'os temas d'o suyo zaguer album, un pepino de l'hortal destinau a sonar a-saber-lo iste verano. Adintro d'o programa tendremos un nuevo tema de Los Enemigos, d'o suyo disco Bestieza, aguardando a que metan nueva calendata pa lo concierto que s'anuló en Zaragoza ya fa mas d'un anyo. Y antimás sonará una d'as ganadoras d'os Premios d'a Mosica Aragonesa y colaboradora d'o disco en aragonés O Zaguer Chilo: l'alcorisana Isabel Marco.

Todas ixas cosas en aragonés y en poco mas d'una hora. Tanto si lo formato tos fa goyo como si no, aspero las vuestras aportacions y sucherencias. Queda tres programas nomás, que ya son quasi prestos, y totz fan buena mina. 

Programa #104

martes, 22 de junio de 2021

Cancions de verano. Tierra de barrenaus 7x20

Un d'os sinyals de que arriba lo verano ye lo cambio mosical que s'experimenta por tot. Nuevas mosicas, quasi dispareixidas la resta de l'anyo, amaneixen. Atras s'ixuplidan por bell mes. Y la mosica, en directo u "en lata" imple plazas y recintos por tot. Agora, con lo d'a pasa, queda por debant un verano raro. Con conciertos, sí, pero feitos d'una manera bien diferent a lo que tenebanos costumbre. 

En qualsequier caso, lo verano nos traye, con pasa u sin ella, una banda sonora bien reconoixible. A sobén horrible, con los videos y cancions que todas tenetz agora en la vuestra ment. Pero tamién con temazos que se'n fan la mofla, u que plateyan unatra uellada d'ista estación.

En iste programa tos n'he proposau vinte cancions d'o verano que no son las que gosan sonar en las radioformulas. D'Aragón y de por aquí cerqueta. De toda mena d'estilos mosicals. Y todas, u a lo menos ixo me pienso, que te fan firmes ganas de bailar y de disfrutar de todas las posibilidatz que tienen istos meses de caloreta y vacacions. En la pocha, en i quedan atras quantas que no i cullioron en lo programa por qüestión de tiempo, asinas que, si tos fa goyo lo programa, pa 2022 en foi unatr. Entalto lo verano y las buenas cancions!

Programa #103

martes, 8 de junio de 2021

Lo Sahara Occidental. Tierra de barrenaus 7x19

I hai tierras bien luent que centran l'actualidat informativa d'os medios de masas, como Venezuela, Siria u Bolivia, quan intresa. D'atras, mas cercanas tanto cheograficament como historica, pasan d'amagatons por ixos mesmos medios. Una d'ellas ye lo Sahara Occidental que, manimenos, ha conseguiu una miqueta d'atención nuestra dimpués de que un hespital riochano acullise a lo lider d'o Frent Polisario, contachiau de covid. La historia d'iste pueblo ocupau ye prou desconoixida tot y tener caboliosos vinclos con l'Estau espanyol. 

En iste nuevo programa charramos con Chorche Paniello, historico activista internacionalista, que conoixe bien lo problema d'a ocupación d'o Sahara Occidental. Nos remera una miqueta d'a historia d'o conflicto y d'a organización que i ha habiu en lo país nuestro pa crebar la incomunicación y desfender, solidariamente, los dreitos d'ixe pueblo. Las convocatorias continan en istos días y s'anuncia nuevas movilizacions. No deixemos que, pasada l'actualidat, la realidat d'iste pueblo que resiste torne a ixuplidar-se.

Pa la parte mosical, ubrimos y despedimos lo programa con mosica arribada dende Rusia. Una colla de varrenadas que, antimás de buens temazos, fan videos bien orichinals y divertius. Remeraremos tamién un cantaire siciliano que escrabutó en istas semanas y que he ascuitau dende que tiengo memoria. Y remataremos ubrindo lo calaixo d'a canción en unatra luenga con una colla de rap-metal que decidió versionar en gallego, catalán y euskera un d'os suyos mayors exitos.

Programa #102

viernes, 4 de junio de 2021

Bicis, informativos y transformacions

Pasó lo día d'as bicis. Una chornada que s'aproveita pa remerar las reivindicacions de qui la femos servir de cutio. S'encertó que teneba la tarde alto u baixo libre pa poder asistir a la manifestación y, tot y que la plevia espantó a buena cosa de chent, nos chuntemos buena clica pa pedaliar por la ciudat. Astí yeran, como en convocatorias anteriors, quantas personas que levan anyos arrienda en l'activismo ciclista compartindo bicifestación con una patacada de chovenastras que tamién quieren poder disfrutar d'iste medio de transporte. La presencia policial  sirvió, como de cutio, pa creyar bell problema a on que no bi'n hese habiu. Con tot y con ixo, la mani recorrió las carreras zaragozanas recullindo la solidaridat d'a-saber-los ciudadans que nos animaban dende las aceras, los carrils bici y los autos. 

Ya dimpués, en casa, tenié la error d'enchegar la televisión. Feban un noticiario estatal y charroron d'o Día Internacional. Lo reportache empecipió charrando de l'augmento de vendas de bicicletas en los zaguers meses y d'os problemas que tienen fabricas y botigas pa adubir a fer todas la que se demanda. La gran puyada d'o uso d'a bici lo acumulaban a una hipotetica mayor conciendia medioambiental y a las millors infraestructuras ciclistas urbanas. Lo que, obviament, ye verdat. Pero ixuplidoron un d'os factors que influyó, y firme, dende que empecipió la pasa, y ye la cerina a fer servir los transportes publicos. Somos muitas las personas que nos obligoron a treballar de manera presencial, ignorando de tot las recomendacions sanitarias y metendo en periglo la nuestra salut. Muitas d'ixas personas feban servir de cutio metro, tramvía u bus pa ir t'os puestos de treballo y troboron en la bicicleta una alternativa muito mas segura. Lo treballo ha estau un d'os grans vectors de contachio que, manimenos, no se'n ha charrau mica, centrando lo debat en botelladas y borinas.

Me clamó mas l'atención una segunda frase que facioron servir y que me remeró a qui da gracias a bell dios quan las advogadas les libran d'a garchola u las medicas d'a muerte u de bella malotía. Dició lo presentador que "Por suerte, las ciudatz cada vegada acullen millor las bicicletas", como si los plans urbanisticos los dictase bell chuego d'azar y en los zaguers anyos hese saliu la tarcheta d'o carril bici u d'a pacificación viaria. Ye claro que no ye asinas. Las ciclistas hemos habiu de ganar-nos cada centimetro de carril bici y cada dreito conseguiu a pur de dar ferrete en administracions y medios de comunicación, con lo refús d'un sector d'a sociedat que s'encerrina en una urbanidat cochecentrista y, en lo caso de Zaragoza, campanyas continas en contra de l'Heraldo .

Como en quasi tot, ye l'acción colectiva la que fa cambiar la realidat. Rai si charramos d'os dreitos d'as mullers, las aragonesofablants u, como ye lo caso, las ciclistas. Y tot abance conseguiu cal desfender-lo con firme rasmia porque, malas que t'espiguardas un inte, pueden vulcar-te lo treballo de decadas. Lo numbro ye un factor importantismo en toda luita colectiva y, a diferencia d'atras, la ciclista cada vegada arrocla a mas chent. Asinas que seguiremos transformando la ciudat pa fer-la millor pa todas, ciclistas y no ciclistas.

miércoles, 26 de mayo de 2021

Friki-evolución

En una d'as edicions d'as Jornaicas d'anime y manga, que arroclaba un ciento de personas en l'entorno d'o Centro d'Historias, tenié un d'ixos momentos a on que t'aturas a mirar-te fito-fito lo que ye pasando a lo tuyo redol y podié pensar-ie. Astí yera una parrafiquera de zagalas y zagals disfrutando d'ixa cultura que quan yo teneba los suyos anyos yera un fenomeno conoixiu por muit poqueta chent. Se les veyeba gronxiando-se como l'hese feito yo si qualcosa asinas hese existiu. U como, de feito, lo feba yo con los eventos frikis que s'organizaba en la Zaragoza d'alavez.

Friki ye una parola que ha iu evolucionando y cambiando de sentiu dende que entró en lo vocabulario cutiano d'o castellano. Remero cómo me quede de percutiu en sentir-le a un decir "yo ye que soi muit friki de Friends". Friends ye, en la mía opinión, una d'as mayors mierdas que ha produciu la televisión d'as zaguers decadas. Nunca no m'ha feito gracia, ni he trobau por garra cabo cosa que me podese fer goyo en ixa serie. Pero isto no deixa d'estar una opinión mía tant respetable como la de qui la adora. Lo que nunca no hese pensau ye que "friki" podese chuntar-se a ixa serie. Friends ye lo mas mainstream que existe. Los suyos personaches y argumentos son lo mas cutiano que existe. Ye una formula de sitcom clasica, sin guaire innovación, y sin garra d'os elementos que definiban lo frikismo "clasico". La parola "friki", que habe tiempo se feba servir como faltada u como manera de menospreciar las preferencias culturals de belún, ha preso prestichio y agora se fa servir con atros significaus. Ye lo que tien lo lexico de qualsequier luenga, que va evolucionando seguntes las comunidatz de fabladors aprecisan, encara que i haiga qui ixo le pareixe una blasfemia.

Lo friki "de toda la vida" s'asociaba a una serie de aficions: rol, comics, narrativa de fantasía u sci-fi, ya siga literaria u audiovisual, chuegos mas embolicaus que lo parchís... cosas asinas. Totz tenemos en lo tozuel ixa definición. Yeranos pocos y yeranos amarguinaus. La cultura hechemonica tiraba por atros camins: futbol, series de polis y cosas asinas. China-chana se fue popularizando beluna d'ixas aficions que tenebanos. Qui creixioron con Star Wars u Star Trek sumoron anyos y, por tanto, prestichio social pa imposar los suyos gustos. L'anime y lo manga entroron con pitera a traviés d'o Dragon Ball de TV3. Lo rol se fue ixemenando por chornadas que s'organizaban en las casas de choventut. Los comics de superherois blincoron t'as salas de cine a traviés d'os X-Men y los Spiderman de Raimi. Ya antes hebanos viviu en TV las suyas mas que potables series de dibuixos. En los zaguers anyos fenomenos como l'universo cinematografico Marvel u la serie The Big Bang Theory han feito que conceptos d'os frikis, en los sentiu clasico d'a parola, fuesen conoixius y populars a tot arreu. Ya no ye raro charrar de superherois. La sciencia ficción y la fantasía medieval implen las ufiertas de contenius d'as plataformas audiovisuals y los repalmars d'as librerías y bibliotecas. No ye mica dificil trobar chuegos de rol en los catalogos de nadal. Si existe qualcosa como la cultura friki, ye agora, sin dubda, en la fuga d'a suya historia.

Pero prou que no siempre estió asinas. Los frikis vienen de decadas d'estar marguinaus por tener aficions minoritarias. Por considerar-se que lo que a ellas y ells les feba goyo no mereixeba atención, que yera cultura de segunda, cosas de belulos. Tenié suerte de no vivir-lo asinas y de haber puesto compartir ixa cultura con una clica ampla en todas las etapas d'a mía vida. Pero conoixco chent a brozuecos que ha patiu ixa incomprensión. Por ixo ye important lo Día de l'argüello friki pa reivindicar-nos, pa remerar totz los anyos que todas y totz tenemos dreito a que no s'arrigan de nusatras por las cosas que nos fan felices. Pa querer-nos como somos y sentir-nos-ne argüellosas. Porque lo que hue ye motivo de mofla, manyana puet estar parte d'a tuya cultura propia. Y si no que le'n digan a totz los que s'esmelicaban en veyer-me leyendo comics y hue fan ringlera pa veyer la zaguer de Guardians d'a Galaxia.

Lo friki yera lo "raro". Lo que no s'entendeba. Lo que no se quereba ni prebar d'entender. No yera una qüestión de tener mayor u menor intrés. Yera friki qui se sabeba los nombres propios d'os integrants d'os X-Men, no pas qui conoixeba l'alineación de l'Atletico de Madrit de 1978, tot y que los procesos fuesen parellanos.

Como tot en popularizar-se, hue la identidat friki s'ha esbafau y plega a muitisma mas chent. Tanto que ha preso atros significaus. Lo friki ya no tien porqué estar underground u minoritario. S'entiende que lo cine superheroico ye friki por la suya tematica, tot y que siga mainstream. Pero antimás se considera friki qualsequier afición cultivada con rasmia, langaria u encerrinamiento. Por ixo,  me pienso que sí que se puet estar friki de productos tant populars - y poco frikis en lo planteamiento clasico - como Friends u los Simpsons si los vives con ixa mesma pasión que las frikis d'antes mas vivibanos las Battlestar Galactica, Silver Surfer u lo Runequest.

Talment calga buscar una nueva parola pa qui nos consideramos adintro d'aquella primer definición de friki. Talment, simplament, calga explicar qué modalidat de frikismo practicamos cada una. Talment importe igual y nomás haigamos de continar disfrutando con las nuestras historias y deixar-nos de tanto etiquetache. Lo que seguro que cal, ye aprender y no fer-nos la mofla d'o que agora podamos considerar infantil u una fatera, porque las frikis d'agora son las que marcarán la cultura d'o manyana, y talment te quedes sin entrada pa l'estreno d'a versión cinematografica d'o comics que hue te'n esmelicas. Y porque las personas que tienen / tenemos ixos gustos mereixen / mereixemos tanto respeto como qualsequier atra.

martes, 25 de mayo de 2021

Falcillas. Tierra de barrenaus 7x18

Con la primavera plegan muitas cosas y la mayoría bien buenas. En lo caso mío lo solo conflicto que tiengo con iste tiempo ye l'alerchia que me da bell día malo de cabo ta quan. Pero toda la resta, de bitibomba. Un d'ixos fenomenos primaverals ye la visita d'a-saber-los paixariquetz que pasan aquí lo verano y parte d'a primavera y l'agüerro. Tenemos a las volandrinas y los codalbetz dende fa semanas y, un poquet mas tarde, arriboron las protagonistas d'o programa de hue: las falcillas.

Torna ta Tierra de barrenaus Tamara Marzo Rins pa charrar d'iste muixón tant chicorrón que se fote, por cada anyo, un viache dende Sudafrica dica aquí. Un au con quantos records y una manera de vivir bien curiosa que a fe que tos percutirá firme. En Zaragoza podemos trobar-las bien facil y tamién en la resta d'Aragón a on que, antimás, tenemos belatra especie pareixida. 

En la parte mosical, pertoca ubrir lo calaixo d'a canción historica pa, de man d'un grupo valenciano conoixer un poquet d'a historia que tenemos en común con ells y con la resta de terrotorios d'a Corona aragonesa. Antimás, conoixeremos lo nuevo single d'una mosica que visitó Zaragoza por primer vegada en istos días y que nos deixó un sobrebuen concierto y la promesa de que tornará quan s'acabe la pasa.

viernes, 14 de mayo de 2021

De codetas y cerras

Agora que Pablo Iglesias se talla la codeta, rinflo las velas y aproveito lo viento d'o trending topic pa charrar-ne d'a mía. Y ye que quan iste personache arribó a la politica, antiparte d'atras consideracions, facié uellos porque un tío que levaba los pels exactament como yo podese bell día acabar de vicepresident, por poco tiempo que fuese. 

Igual como ell, empecipié a deixar-me creixer los pels con tretze anyos y, dende alavez, nunca no me lo he tornau a deixar curto. En primeras yeran las cerretas ixas que tasament t'arriban a los huembros y que te fan tener un look raro, como de prebatina de heavy. Luego consiguié tener buenas grenyas y asinas he seguiu dica hue. En l'instituto no yera tant raro. En la mía colleta d'amigas yeranos nueu mesachas y cinco mesaches y, d'ixos cinco, totz portiemos los pels largos durant qualques anyos. En los anyos d'universidat fueron dispareixendo las cerras d'os tozuels d'os míos companyers y, con la vida laboral, cayioron las zagueras. Agora nomás yo las conservo y talment por ixo gosan repetir-me, quan nos chuntamos, que no he cambiau mica y sigo como en l'instituto. 

Tot y que de mas choven lo flipaba con los Maiden y Manowar, no m'he considerau heavy nunca, ni ye una mosica que me faiga mas goyo que atros muitos estilos. De feito no goso sentir-la encara que tienga qualques discos d'ixas y atras bandas metaleras. Manimenos, por la mía farcha, m'han acumulau ixa militancia mosical bien a sobén. Muitos lo dan por suposau y m'amuestran argüellosos bell disco, u tatu, u me parlan de tal u qual colla que nian conoixco. Yo, me quedo con la cara d'ababol que se me queda quan me charran de cosas que no entiendo y prebo d'explicar-les que me va mas Depeche Mode que Megadeth. U, si ixe día me trobo con ganas, les miro de fer entender que no tot cerrudo ye heavy, ni tot heavy ye cerrudo.

Lo mayor entrepuz vital que barruntaba en levar las cerras, y mas en tener-las como parte important d'a mía identidat, yera los que podese tener pa trobar treballo. Dimpués de quasi dos decadas cotizadas y fayenas arrienda, afortunadament no m'he trobau con ixe problema nunca. Sisquiá s'ha atreviu, garra d'os caporals que he teniu en totz istos anyos, a insinuar que me tallase la codeta. Lo pior que m'ha puesto pasar ye quan una viella lesbofoba nos chiló a la mía parella y a yo mientras nos besuquiabanos, pensando-se que yo tamién yera una zagala. 

Sí que m'han dau firme ferrete con las razons. ¿Por qué te deixas cerras? ¿Y no has pensau en tallar-te-las? Isto lo fas agora de choven, pero quan creixcas, ya veyerás... y toda ixa retolica que, si son hombres cerrudos habretz patiu de seguro. A yo, que los pels largos m'encantan, tanto en ells como en ellas, lo que nunca no he entendiu ye por qué dengún, voluntariament, leva los pells curtos. Me pareixe un elemento tant important y con tantismo potencial y personalidat que no entiendo no aproveitar-lo. Pero no voi - porque no soi asinas y porque no adubiría - preguntando a tot lo mundo quan se va a deixar los pels largos u decindo-le que ye una fase. 

Ni lo "codetas" ni lo "rastas" son ya en la politica institucional, y lo parlamento se queda una mica mas aburriu a nivel estetico. La estetica tamién ye important y pa qui compartimos look, y por lo tanto una imachen social derivada d'ixe feito, ye estau sinyalera la reacción que bi ha habiu. Nos han deixau claro que un sector bien gran d'a población contina con ixe clasismo que imposa una farcha pa poder entrar en seguntes que nivels d'a representación politica. Haber feito tranya en ixo, a muitas personas tos pareixerá una fatera. No pas a yo.

Las cerras no son una relichión ni un equipo de futbol, y si cal renunciar-ne se fa, sin dramas, y prou. Pero cal que no lo faiga, y si la mía salut capilar me lo permite, cuento que continaré portiando-las fachendoso, mas blanquinosas por cada día, dica que escrabute.

jueves, 13 de mayo de 2021

De cursa por los mallos

Dimpués de tanto tiempo sin poder salir d'a provincia, y habendo feito la obligada visita a lo lugar, nos feba ganas a-saber-las una miqueta de mont, asinas que fa bell día estiemos por la parte d'os mallos, fendo dominguerismo. Por si servise de consello u ideyas a las lectoras de Tierra de barrenaus, tos deixo aquí la nuestra experiencia que, como siempre que imos por ixa contornada, estió bien buena.

Lo principal, y lo motivo basico pa ir-ie, estió la cursa que nos faciemos lo sabado. Una d'as mas bonicas que he feito en la vida mía. Y ye que los paisaches d'os mallos son uns d'ixos que nos recuerdan lo privilechio que tenemos de vivir en iste país. Empecipiemos la marcheta dende lo lugar de Riglos, acercando-nos t'os mallos. Dende abaixo ya podebanos columbrar la patacada d'escaladors que china-chana iban puyando. Alto, los vueitres chiraban cusirando la redolada. La ideya d'a cursa yera plegar en lo pantano d'A Penya por la foz d'Escalete. Lo camín s'encomienza con firme puyada. En arribar t'alto comprobemos lo cambio de vechetación que i hai entre las dos altarias. Las envistas dende iste punto son de tot impresionants. Lo camín sigue plano con lo que la cansera d'a puyada se recupera de camín. Encara queda rastro de l'incendio d'habe anyos tot y que la vechetación va reconquerindo lo mont a buena marcheta. A las colors d'os buixos se sumaban las d'un ciento de flors que la primavera heba traito, y de buena cosa de paixarelas que esvolastriaban por tot. Pasada la foz, fuemos por lo pantano ent'a central de Carcavilla. Astí se puet veyer tot l'entibo y las obras asociadas que, pa las aficionadas a la incheniería como yo, se tos fará bien curiosa. D'augua n'i heba arrienda, cuento que por las plevidas d'as zaguers semanas, asinas que fuemos camín-camín entre las vía d'o tren y la orilla d'o pantano. La ruta de tornada ta Riglos ye menos plana, pero las costeras no son guaire furas. Aquí empecipiemos a tener bell problema y ye que mesmo  la cursa mas facileta se te puet embolicar. Feba buena caloraza y los dos litros d'augua que portabanos se quedoron curtos pa la seteguera que tenebanos asinas que habiemos de racionar-la. Tot y que no ye un sendero guaire exichent, yera de meyodías y nos deshidratabanos con cada paso. La envista d'os dos mallos, los d'Agüero y los de Riglos, en tornando t'o punto de salida, nos fació bien contentos. Yeranos cerqueta y lo paisache que veyebanos yera tot un present pa los nuestros uellos. Quan a la fin Riglos amaneixió hebanos acotolau l'augua feba tiempo, asinas que sospiremos bien tranquilas en veyer ixas casas. En la fuent, solucionemos la nuestra seteguera pa dimpués acabar lo treballo con unas buenas picheras d'hordio en un d'os bars d'o lugar. A paso tranquilo salioron quatre horas de camín mas los ratos que aturabanos pa veyer bell paixarico u fer un bocau. Una cursa bien recomendable, con intrés cheolochico, botanico y ornitolochico, plena de paisaches que te deixan enarcau.

L'aloix lo tenebanos en Agüero, a on que heba pasau parte d'as mías vacanzas de setiempre y que, de tant bien que estié, me feba firmes ganas tornar-ie. Lo Peña Sola ye un camping muit chicot, con tasament una trentena de parcelas. No i hai garra luxo, pero tien totz los servicios que nos caleba: escusaus y un bar a on que pillar pan, chelo y mesmo fer-nos bell café u biera. Dende chunyo tien una piscina ubierta a on que te puetz capuzar entre que alufras los mallos d'Agüero y te sobrevuelan los vueitres. Un puesto rebonico pa qui no aprecisa toda la parrafiquera de ixautadas que i hai - y lochicament, te cobran - en atros puestos. Lo camping ye a tocar d'o lugar, asinas que ye freqüentau por lo vecindau y, si fas orella, de cabo ta quan se siente encara bella conversa en l'aragonés que i sobrevive malament u en un castellano con a-saber-las parolas y expresions aragonesas.

Pa cenar nos permitiemos lo concieto de baixar ta Morillo. Fuemos t'a Terraza de Yeste, un bar-restaurant aleixau d'a carretera y con un puesto bien agradable pa cenar. En entrar-ie con trobemos con dos personas, de diferents entornos, y que todas dos charran aragonés, asinas que ya nos estiemos de buen capazo antes de empecipiar sisquiá a leyer la carta. La carta ye ampla y tien de tot. Sin embolicar-nos guaire nos demandemos dos entrepan que yeran de pistón. Bell día he d'escribir sobre lo dificil que ye fer-se un buen entropan de bacon y queso, una cosa a priori bien simpla, y lo que disfruto quan lo fan bien, como ye lo caso. Nos quedemos con ganas de tastar las pizzas y las ensaladas, que feban muit buena mina, asinas que habremos de tornar-ie. Regular que trobaremos bella enchaquia. 

Tener a poco mas d'una hora de casa una choya como los Mallos ye toda una suerte y, tot y que ya i hemos estau quantas vegadas, encara nos queda muito a fer-ie. No creigo que tardemos guaire a visitar ixa parte. ¿Talment con cuerda?





 

 

martes, 11 de mayo de 2021

Almugavars. Tierra de barrenaus 7x17

Quan empecipié a barruntar de fer un programa de radio propio, escribié un listau de temas que quereba charrar-ne. Programas que teneba claro que quereba fer, ideyas que desarrollar, chent que entrevistar y asinas-asinas. Un d'ells ha tardau siet temporadas, pero a la fin ye aquí: los almugavars.

Chusé Bolea ye una d'as personas que mas sabe sobre lo tema. En 2010 publicó Almugávares, vía sus!, un sobrebuen treballo a on que analiza punto por agulla totz los aspectos arredol d'a companyía de mercenarios. Agora, fa tasament bella semana, acaba de publicar Almugávares. Una aventura medieval de conquistas y traiciones, una versión mas divulgativa y visualment atractiva d'a historia d'istos guerrers medievals. Lo libro ye una choyeta tanto por los suyos rigurosos y entretenius contenius como por las ilustracions que los acompanyan y que fan d'ista obra una d'as que qualsequier amant d'a historia aragonesa habría de tener. En lo programa, nos charra d'as razons que facioron que los almugavars pasasen a fer parte d'a nuestra identidat colectiva y d'ixe libro recient publicau.

La mosica vendrá de man d'una nueva banda valenciana, a qui tos convido a ascuitar libres de prechuicios - qui en tiengatz - y a visitar tamién los suyos videos. En lo calaixo de cancions, tornamos con una canción literaria, que mosica un d'os poemas mas rebonicos d'o castellano. La banda, disuelta fa poco, ye tamién parte d'a historia d'o rock en ixa luenga.

Con iste, Tierra de barrenaus fa 100 programas emitius, muito mas que no m'asperaba quan empecipié ista aventureta. Cien emisions dimpués, y tot y que bella vegada se fa dificil estar de vez guionista, director, productor y tecnico de soniu, contino baixando a grabar con a-saber-las ganas y contento de recibir las vuestras opinions y aportacions a lo programa. Aspero poder fer lo menos 100 programas mas y que sigatz a l'atro canto d'os cataticos pa ascuitar-los. TdB no se cancela! Emitir nos fará vencer!


miércoles, 28 de abril de 2021

Un día d'o libro pandemico

Dimpués d'un anyo de pasa una d'as cosas que mas se troba a faltar son las ferias y mercaus de toda mena. Ya en fa bella semana de que se recuperase una ferieta que se feba en lo Gancho, con artesanas y creyadoras diversas. Prou que sí, toca de fer-las con las midas sanitarias que i somos feitas: aforos, distancias, hidrochel... ya sabetz. Lo 23 d'abril, día d'Aragón y d'o libro, yera tot incertidumbre fa bell mes. Con la cinquena ola fendo puyar los contachios y, pa forro de bota, l'orache de plever, tot yera en contra de poder celebrar como caleba ixe día d'o libro. Manimenos, a la fin, se fació.

De maitins luego plegabanos en lo parque con las caixas de libros. Entre ellas, la novedat de Inkventos d'octubre, lo fanzine a on que replego los 31 relatos d'o Inktober d'estianyo y un mas, escrito tamién en ixos días, que heba quedau inedito. Astí yera un ciento de viellos conoixius d'o mundo literario y editorial. Ya bi heba ganas a-saber-las de veyer-nos. En montando los puestos ya ibanos pillando los primers capazos. ¿Qué tal tot iste tiempo? ¿Totz bien de salut?, A veyer si no nos pleve, No sé yo si vendrá la chent... Los clasicos d'istas ferias. Personalment yera encantau por lo cambio d'ubicación. Lo Parque Gran m'agrada -asaber-lo y lo visito muito menos d'o que querría. En salir a por un café, poco antes de que s'ubrisen las puertas, ya se barruntaba lo que vendría dimpués y marcaría lo día: la primer patacada de lectoras fendo ringlera pa entrar-ie. Poco tiempo dimpués los mensaches d'as amigas nos iban avisando: i hai ringlera dica la estatua d'o Batallero, ya arriba dica Las Ocas... Adintro, manimenos, bi heba momentos a on que practicament no atendebanos a dengún. En l'interior d'o cletau sobraba metros de distancia entre personas. Difuera, la chent s'amuntonaba baixo lo sol, que pretaba firme. A muitas les acabemos vendendo los libros a traviés d'ixa cleta. Atras nos avisoron de que, en sentir las noticias que avisaban d'os tiempos d'aspera de mas d'una hora pa entrar-ie, heban decidiu de ixopar ta casa y que ya nos veyeríanos en atro evento.

Con tot y con ixo, no aturemos. A uno y atro canto d'a cleta, una burguilada de chent visitó lo puesto de Nogara, s'intresó por l'aragonés y por los libros que i tenebanos y, prou que sí, en mercó belún. Quasi no adubiemos ni a fer-nos la obligada gambadeta por la resta de puestos pa alparciar la suya ufierta. P'articlos venients queda dar treslada d'o que i merquemos. Por primer vegada, compartié un rato con la chent de l'Asociación Aragonesa de Escritores, organización que en foi parte dende fa bell mes. Una horeta que se me fació bien curteta entre visitas y charradetas con la resta d'escritoras que firmaban eixemplars a la mesma hora. Lo resumen d'a parte buena: libros y capazos a brozuecos. Chent a embute que feba tiempo que no veyebanos, aproveitando la ocasión pa mercar los libros que, en lo suyo día, no podioron asistir t'as presentacions. Muito carinyo recibiu y aspero que, por la nuestra parte, muito repartiu tamién.

La debandita gambada que podié fer a tot meter por la feria, me deixó nuevos titols en la mía lista de "pa leyer". Una lista tant larga como poco disciplinada a on que qualsequier novedat que me truque se blinca de rapiconté tot l'orden y entra farute en lo primer puesto fendo-se la mofla d'ixe libro que i leva un lustro aguardando lo suyo momento. Sin tiempo ni chanfles pa leyer tot lo que querría, m'habré d'aconhortar con la ideya de que, lo menos, nunca en la mía vida tendré tiempo pa aburrir-me.

En la parte mala, una organización caotica, que metió uns aforos masa baixos que provocoron que muitas chent no podese disfrutar d'a feria. Que tenió, antimás, muitas atras errors, como la inexistencia d'escusaus pa las clients (y nomás un pa las expositoras) u una caotica organización a la hora de zarrar. Entiendo las dificultatz d'organizar un evento d'istas dimensions, por primer vegada y en la situación que vivimos. Talment no tornemos a vivir un Día d'o libro "pandemico", asinas que las licions que quitemos d'isto no farán honra pa cosa. Sisquiá. Pero muitas d'as decisions organizativas que se prenioron no teneban mica sentiu, con u sin pasa.

Con tot y con ixo, y como deciba bell editor por astí, la feria estió infinitament millor que en la edición de 2020, quan yeranos todas encadadas y sin poder trobar-nos. De ferias, ferietas y mercaus, en vendrán a trompicuesco con la flexibilización d'as midas sanitarias gracias a la vacunación, asinas que aspero que nos podamos trobar-ie y compartir libros y charradetas.


lunes, 26 de abril de 2021

De viache por la mosica aragonesa. Tierra de barrenaus 7x16

Se fa lo Día d'Aragón y torna lo nombre d'o país ta las nuestras bocas encara que no siga que por bell día. Ya he charrau qualques vegadas d'o mío refús a que lo 23 d'abril siga la nuestro día, pero tot lo que siga tornar los uellos ent'as nuestras realidatz, va bien en tiempos a on que nos miramos mas enta difuera. Una d'as conseqüencias de que ixas uelladas se miren t'alla ye que las nuestras mosicas pasan a sobén sin pena ni gloria por los nuestros scenarios, ixuplidando y fendo de menos una ripa de talento que tenemos en casa.

Lo programa de hue preba de fer un chiquet viache por la mosica aragonesa. Tos proposo quantas cancions de toda mena. D'antes mas y d'agora y d'estilos bien diferents. Punk, electronica, reggae, hardcore... tenemos la suerte de tener a-saber-la variedat en la nuestra tierra. Pa esleixir, n'i hai de tot. Asinas que a fe que en ista nueva hora larga de programa trobas bella pieza que te faiga goyo. 

Conoixer lo paisache mosical nuestro ye la sola manera de valurar-lo y, alavez, de refirmar ixos prochectos, conseguindo que tiengamos un futuro cultural y mosical. S'ha quedau difuera d'o programa un ciento de collas y personas que i cullirían, porque tenemos tiempos y recursos limitaus. Pero como Tierra de barrenaus no se cancela, queda programas de sobra pa seguir conoixendo y difundindo la nuestra mosica. Asinas que si tiens bella banda u quiers que se conoixca bella canción, contacta con yo a traviés de qualsequier ret y charramos pa que suene en lo programa.

miércoles, 21 de abril de 2021

Herois de casa

Ringlera pa las entradas (2007)
De Zaragoza, difuera d'a ciudat, me pienso que no se conoixen guaires cosetas: lo Pilar, la Seu, l'Ebro, lo cierzo y la Expo, suposo. Ni l'Alchafaría cuento que siga guaire famosa difuera d'Aragón. Afortunadament, las nuestras mosicas sí que han traviesau firme las nuestras mugas. Doble V, Amaral u Manolo Kabezabolo en son buen eixemplo. Pero sin dubda estioron los Héroes del Silencio la colla mas conoixida y por la que siempre me preguntaban quan saliba por astí. En zagueras, la emision d'un documental sobre lo grupo u la edición d'un libro que preba de deixar a lo suyo cantaire como un simple copista, han traito ta l'actualidat una banda que levaba anyos arrienda sin que se'n charrase guaire. Como me pienso que todas las zaragozanas, yo tamién tiengo las mías anecdotas y historietas con Héroes del Silencio.

En la nuestra ciudat HdS dispertaba amor y odio con pocos matices intermeyos. N'i heba qui yeran fans de tot y qui lo refusabanos dende lo que me pienso que a sobén yera lo que hue le decimos postureo. Yo yera d'os segundos. Alex, lo mío millor amigo de preescolar y buena parte d'a EGB, manimenos, yera d'os primers. En casa mía, los míos chirmans tamién compartiban con ell ixa pasión. Asinas que creixié ronyando cada vegada que sonaba Héroes de vez que conoixendo punto por agulla toda la suya discografía. Lo mío chirmán heba compartiu colechio con totz los miembros d'a banda y mesmo mili con un. Cardiel saliba por lo parque que teneba a lo canto de casa mía a pasiar un can que teneba, un bicho immenso, mas gran que la mayoría d'os críos que i chugaban y Bunbury yera socio d'un videoclub d'o barrio, asinas que gosaba de veyer-los a ormino, sin fer-les nunca guaire caso. Pero yera imposible ignorar la suya existencia. Talment estió por ixo de que el roce hace el cariño. Talment, como dicen las Ginebras en La típica canción, a la fin sintié placer por cosas que odiaba pero reconoixié que yeran bien. U talment se me pasó la edat d'o postureo y empecipié a deixar-me levar por mosicas que simplament me feban goyo, fuesen u no populars u acordes con la identidat mosical que heba preso como propia. 

Asinas que, ya en l'instituto, acarracé las cancions de Héroes y lo que empecipió como un reconoiximiento d'o buenos que me pareixeban aquellos temas, acabó esdevenindo una pasión. Antes de que se disolvesen podié veyer dos d'os suyos conciertos, en lo Uego y en la Plaza de toros. Yera lo tiempo de Avalancha y Parasiempre. En la fuga d'a suya carrera empliban ixos puestos de chent que mesmo veniba de bien luent. Asinas, fendo ringlera pa conseguir estar-nos bien debant, estiemos charrando con uns mozos que heban veniu de Cadiz de propio ta ixe concierto porque quereban aproveitar pa conoixer la ciudat que les heba visto naixer. La clica nuestra les estiemos recontando anecdotas, fendo-nos la bamba de escunzar-nos con los miembros d'a banda terne que terne. Nos preguntoron, prou que sí, por La estación del silencio, a on que pensaban ir malas que rematase lo show. Tamién por Linacero, a on que heban sentiu que se vendeban discos piratas d'a colla, con grabacions de conciertos y bella rareza. Aquello m'aduyaba a valurar lo que pa yo dica alavez heba estau mas parte d'o paisache mosical de casa que lo que en realidat yeran: una banda con prochección mundial y un fenomeno fan bien furo.

En ixos dos conciertos me lo pasé de pistón. Teneban un directo brutal que no te deixaba descansar-te ni un segundo. Me sabeba de corazón quasi totz los suyos temas y, como en ixos anyos me foteba tot lo concierto escacilando-los, rematé con la voz en las tres pedretas. Yo, que no la perdeba quasi ni pa Pilars. Teneban bella cosa de gran. De fer-te sentir como si fueses veyendo a beluna d'ixas bandas anglesas u estadounidenses que trunfaban t'a part d'alavez. Porque de feito yeras veyendo, sentindo y vivindo qualcosa bien parellana. 

En 2007 una decada dimpués, tornoron, organizando-se buena loquería arredol d'a chira suya. M'estié firme rato fendo ringlera en la puerta d'a botiga Tipo, quan fer ringlera consistiba en aguardar en la carrera Rufas y no pas debant d'una pantalla d'ordinador. Pillemos lo maximo d'entradas que se podeba. Ya nos encargaríanos de revender las que nos sobrasen. Yera una parrafiquera d'euros pa ixos anyos y sobre tot pa lo nivel economico que teneba alavez. Pero muit probablement yera la zaguer oportunidat que tendría en la mía vida pa poder disfrutar de Héroes en directo. La mía parella, pa forro de bota, sisquiá heba viviu garra d'os suyos conciertos. Asinas que no ir-ie, no yera una opción.

Lo día arribó y entremos en la Romareda. Lo primer y, dica hue, lo solo concierto que he asistiu en ixe scenario. Chent a trompicuesco. La biera a pre de caviar y, dencima d'o scenario, los mosicos que nos prometeban bella hora de viellas sensacions, de buena mosica y de Bunbury movendo-se por toda la resta d'a banda. No nos fació burro falso. En salié bien contento, conscient d'haber viviu un momento historico y de que heba valiu la pena cada euro d'a entrada. De Joaquín, Pedro y Juan, poco sé. Cuento que son d'a mena de chent que les fa mas goyo que lo suyo treballo parle por ells que parlar-ne. A Bunbury lo goso meter como eixemplo de que una persona puet tener un talento como un mallo y estar un carnuz. Y por muito que ampre d'otri sin referenciar, por farute que siga u por las suyas idas de flama con la pasa, Enrique sabe fer mosica y saber fer-la bien.

Héroes del silencio ye pa yo una colla de choventut. D'ixas que, de cabo ta quan, recupero pa las mías playlist por bell mes. Que las disfruto tanto por la mosica como por las remeranzas que portan en cada acorde. Y que dimpués dispareixen dica que bell día los torno a sentir en bell puesto y remero lo buenos que estioron. Talment m'entivoque, pero barrunto que HdS ye una d'ixas bandas que pasarán decadas, modas y estilos y seguirán sonando tant potents y con tanta personalidat como tenioron en lo suyo día. Probablement una d'as cosas mas dificils en lo mundo d'a mosica.

jueves, 15 de abril de 2021

Filla de gata, vegana

La noticia, fa bella semana, de que la filla d'Almudena Grandes iba en las listas electorals de Falange se ficó en las conversas de quantos d'os míos grupos de whatsapp. La tarde que se conoixió, una amiga penaba en lo bar por Almudena y Luis, los pais d'a faixista que, pa forro de bota, heban estau totz dos candidatos bella vegada por Izquierda Unida en procesos electorals. Se preguntaba qué fer si los suyos fillos, encara borches, les daba por fer-se fachas. Pero sobre tot, se preguntaba cómo heba puesto pasar ixo, en tener la moza uns prochenitors tant intelectuals y royos y de tanto prestichio adintro d'a izquierda.

Las influencias que una persona tien son infinitas. Los pais en ye una. Bien important, sin dubda, pero nomás una. La escuela ye unatra d'as mas importants. Adintro d'as suyas aulas, s'ha de proporcionar una educación en una serie de valors que las escolars no siempre tienen a lo suyo redol. A sobén, ye astí lo solo puesto a on que sienten charrar de dreitos humans u de respecto a la diversidat. Con tot y con ixo, pa miraglos cal marchar ta Lorda y, por muito que se i faiga, en la escuela, sigue estando nomás una d'ixas debantditas influencias. Pocas cosas se pueden solucionar con una asignatura nueva u anyadendo cosas a un curriclo educativo que ya fa tiempo que rebute contenius. Chunto a la familia y la escuela, tenemos a los medios de comunicación, lo vecindau, las amigas, los retz socials y un ciento de factors de toda mena que fan d'inputs en la educación, socialización y formación d'o pensamiento d'una persona. 

Tornando t'a noticia, tot y que me clamó l'atención como a todas, no me facié cruces por lo suyo conteniu. Si mis pais fuesen famosos, podría fer-se lo mesmo titular con yo mesmo. Soi la sola persona d'izquierdas d'a mia familia cercana. Si ixamplamos lo nuclio familiar, n'i hai belatro miembro que comparte tendencia politica, pero en somos bien minoritarias. Cuento que por ixo, nunca no m'ha percutiu que, contradecindo lo de "fillo de fato, cazaratons", bi haiga críos que no nomás no compartamos l'ideario de pai y mai, sino que nos n'haigamos iu chusto ta l'atro cabo. Ni en casa ni en la escuela, un cole no mixto de mosens, me dioron nunca garra influencia pa fer-me royo. Muito menos, independentista. Asinas que lo feito de que la filla de Almudena Grandes siga de Falange me pareixe triste en la mesma mida que me'n pareixe que simplament exista Falange.

La ideolochía no ye qualcosa chenetica. Siempre he creyiu que ixo de "Somos los fillos d'os obrers que nunca no podietz matar" - u la nueva versión de "somos las nietas d'as bruixas que nunca no podietz cremar" - charraba d'os pais y mais ideolochicos, no pas biolochicos. Prou que me siento fillo ideolochico de qui luitoron antes que no yo por las mesmas causas. La familia biolochica influye, pero no determina. Quiero pensar que las personas con qui comparto militancias no i son porque simplament pai y mai les dicioron d'estar-ne. Lo pensamiento politico no ye como las relichions, que en lo 99,9 % se tien u la d'a familia, u denguna. Las ideyas politicas vienen, en lo mío caso y aspero que en lo de muitas mas, d'un proceso de analisi d'a realidat, formación y reflexión interna y d'una busca de solucions pa los problemas individuals y colectivos. Deixemos una vegada mas prechuicios y topicos a un costau y faigamos mas porque i haiga mas fillas de gatas que, en cuenta de cazar ratons, se faigan veganas, fendo en sentiu contrario lo viache ideolochico d'a filla d'Almudena Grandes.

martes, 13 de abril de 2021

Un anyo de Tierra de varrenadas. Tierra de barrenaus 7x15

Ya s'ha feito un anyo dende que empecipiemos a convivir con la pasa y, prou que sí, un anyo d'ixos días a on que empecipiemos a fer toda mena de fateras pa pasar lo tiempo que hesenos d'estar encadadas. En lo nuestro caso, antiparte d'atras cosas, ocupemos un ratet cada tarde en fer un podcast, que clamemos Tierra de varrenadas y que fació mas de quaranta programas prebando de compartir con todas vusatras meya horeta divertida cada día.

Lo programa lo febanos en casa nuestra, a on que nos chuntabanos en rematando lo día, con bella cosa de minchanga y un hordio. Asinas que ixe ye lo sistema que hemos feito servir pa iste programa d'aniversario a on que Arale y yo nos hemos tornau a chuntar pa charrar d'a pasa y d'atras cosas. En iste programa charramos d'a pasa, d'as cosas que han cambiau en istos dotze meses y d'o que se nos va ocurrindo.

Aproveitamos tamién pa anunciar bella coseta important, como que seremos lo día d'Aragón, d'o libro y de Sant Chorche en lo Parque Gran Jose Antonio Labordeta con un puesto a on que podretz mercar todas las mías publicacions (Parola de follet, Penchada d'un filo, Tintubre y Inkventos d'octubre) y Prou, prou luen, lo libro que publiquemos fa ya una decada y que tien quatre cuentos d'Educación ambiental.

Aspero que tos faiga muito goyo y que pasetz por lo parque lo viernes 23 a fer-nos una visiteta! 

Programa #98


jueves, 8 de abril de 2021

Zombis, ayusos y atros personaches

I hai un debat arredol de Isabel Díaz Ayuso sobre si ye varrenada u ye una aguda politica con una achenda neoliberal y faixista que va aplicando. Como si fuesen cosas excluyents. No sé si ye una, l'atra u todas dos. Lo que sí que me pienso ye que s'ha creyau un personache. Rai si aproveita la suya propia personalidat, u ye un teatret feito a esprés pa conseguir lo que he quiesto clamar "efecto Negan". M'explico.

Por si bella lectora no ha visto The Walking Dead, en la cinquena temporada la serie pierde prou intrés. I hai tot un arco argumental aburriu de tot, sin sentiu, que no nos leva ta garra cabo. La resta de filos tampoco no tienen guaire suco. Un catenazo, resumindo. Pero la voluntat d'un friki ye de fierro y aguanta muito capazo de fiemo antes de reblar, asinas que continé veyendo-la. La seisena temporada tasament remonta bell poquet. Dimpués de quantos capitols yera a pocas de deixar-lo. Dica que plegó Negan, en lo zaguer momento d'a temporada, quasi en los creditos. 

En un d'os millors cliffhangers d'a historia d'a TV, lo zaguer capitol nos presentaba un nuevo personache destinau a esdevenir lo villano d'as siguients dos temporadas. No un villano circumstancial, transitorio u simplament inquesto. Un VILLANO. Negan ye un personache que deixa un bayo de terror por a on que pasa. Que, tot y tenendo las suyas motivacions de protecher a los suyos -como totz los liders en teoría- lo fa con uns metodos que te fan tener-le quimera de camín. Soi seguro que ye l'idolo de milenta cunyaus que son en contra d'ixo que claman "buenismo" y que yo goso considerar simplament civilización. Regular que yera l'heroi de Barney Stinson.

Ixas dos temporadas me las trusquié a tot meter. The Walking Dead tornó a estar qualcosa intresant pa yo. Odiaba a Negan, como qualsequier persona civilizada, pero de vez quereba saber-ne mas. ¿Por qué yera cómo yera? ¿De verdat no sentiba cosa quan feba las fricaseras que feba? ¿Yera imposible de fer-le venir a plego? ¿Se podeba trobar una solución a lo conflicto entre ixe psicopata y las comunidatz que someteba?

L'exito de Negan ye l'exito d'Ayuso. En lo sistema politico-electoral actual lo mas important ye movilizar voto. Los parlamentos no reflexan la realidat social quasi nunca. La izquierda se gosa suposar mayoritaria a nivel social pero minoritaria a nivel parlamentario precisament por ixa incapacidat movilizadera. Ayuso consigue que la serie d'a politica madrilenya torne a prener intrés por lo intresant d'o personache que fa, u que ye. Proteche a los suyos, y fa sentir a muitos que fan parte d'ixe conchunto, tot y que no siga asinas. U que quieran medrar prou pa fer-ne parte. Fa servir qualsequier metodo, por inchusto u immoral que siga, pa conseguir los suyos obchectivos. Arrampla con qui y lo que calga sin importar-le mica las conseqüencias. Conseguindo antimás que toda l'atención se centre en ella. Y, seguindo con simils frikis, igual como en Mundo Mojo, aquí tamién gosa gubernar qui mas audiencia consigue. Lambán u Beamonte, manimenos, y por trayer eixemplos de casa, serían ixos ixautos personaches d'a cinquena temporada.

Aviso de Spoiler. Negan acabó redotau. Y a l'arreu vinió unatra menaza pa las protas d'a serie. No sé si IDA acabará redotada. Aspero que sí por las amigas y compas que viven por ixas tierras. Veyeremos, si caye, si la dreita espanyola le da mas capitols u busca belatro personache nuevo que le dé audiencia.

No sé si ye deseyable ixa politica de personaches y aparaterismo, pero ye la que nos ha tocau de vivir. No sé si la solución ye fer servir las mesmas ferramientas y construyir en la izquierda los nuestros propios personaches. No sé si ye ixo lo que preba de fer en bella mida Pablo Iglesias. Y, sobre tot, no sé las conseqüencias que tendría fer-lo.

martes, 30 de marzo de 2021

Gramatica basica de l'aragonés y atros libros. Tierra de barrenaus 7x14

Fa quatre anyos que se publicaba, en la pachina web de l'Estudio de Filolochía Aragonesa, una primer versión d'a Gramatica basica de l'aragonés. Ixe treballo, fruito dreito d'o resultau d'o historico II Congreso de l'aragonés, fació firme honra pa todas las personas que estudiamos y femos servir ista luenga. Agora, antimás, podemos disfrutar-lo en papel, en un volumen de mas de 500 pachinas publicau por Prensas d'a Universidat de Zaragoza. Una obra bien completa que fa una descripción de toda la nuestra luenga y que ha conseguiu un buen compromís entre usabilidat y rigor. En lo programa entrevisto a Juan Pablo Martínez, una d'as personas que ha feito parte d'iste prochecto, que nos recuenta cómo estió lo proceso y que nos i trobaremos.

En istos meses, afortunadament, he teniu tiempo pa leyer cosas bien intresants y, como quiero compartir-las con vusatras, tos traigo cinco propuestas literarias. De beluna, ya tos n'he charrau, como Podem abolir les presons? u El golpe de estado del general Palafox. De l'auto d'atra, Juan Carlos Moreno Cabrera, tos recomiendo ascuitar los audios de dos charradas que fació en Zaragoza convidau por Nogara, en 2008 y 2017

Lo programa se completa, como de cutio, con buena mosica. En la canción d'o programa, sentiremos una colla que ya leva mas de vinte anyos fendo-nos bailar con los suyos ritmos y que acaba de fer un nuevo disco. En lo calaixo de cancions, ficaremos un nuevo tema sobre la garchola d'un grupo aragonés bien present en ista temporada. Y pa empecipiar y rematar lo programa la mosica d'una banda valenciana que nos visitará iste mayo pa presentar lo suyo nuevo disco. 

Programa #97

 

jueves, 18 de marzo de 2021

Candidaturas, protagonismos, partitocracia y sentius de voto

Lo n-eno tierratremol plega en la politica espanyola con tot l’empandullo de Murcia, fendo remerar ixa canción de Cistits & the pajer. En una d’as replicas, Pablo Iglesias amaneixe de rapiconté y se presienta pa president de Madrit, que como vale un valer, igual le tiene una administración que atra. Que vicepresidida una, vicepresididas todas. Como a tantas atras personas, la maniobra m’ha pareixiu intelichent, conseguindo fer revilcar lo partiu en un puesto a on que yera en las tres pedretas y esbarrando lo debat ent’os intreses de Podemos, que bien dificil yera. Precisament ixe feito, lo cambio de tendencia derivau d’un simple cambio de candidato, ye una d’as cosas que m’ha trucau mas l’atención dende fa muito. En ista ocasión por no identificar-me-ie, y entender malament ixos cambios tant radicals en lo sentiu de voto porque i haiga un candidato u atro. No recuerdo haber cambiau nunca en la mía vida lo voto porque lo primer puesto d’a lista lo ocupase fuleno u mengueno. Manimenos, ye qualcosa bien común y que puet fer chirar de tot lo panorama politico. De reflexions sobre lo tema, no me’n falta.

¿Qué ye lo que importa, la candidata u lo programa? Si lo que votamos son unas ideyas, un prochecto politico, que la papelamenta la faiga una u atra persona, a priori, habría de tener-nos igual. En lo sistema partitocratico que tenemos - u patimos - se suposa que se treballa en equipos. Por un regular asesoraus por tecnicas que conoixen l’aria de treballo. Ixo fa posible que chent sin relación profesional son la medicina pueda estar consellera u ministra de sanidat sin que ixo signifique que lo faiga millor u pior que una sanitaria. ¿Qué aporta alavez la primer persona d’a lista electoral? ¿Ye nomás una imachen? ¿Bella mena d’actriz? ¿Una comercial encargada de vender un producto? ¿Una comunicadora, una divulgadora que simplifique lo embolicau luengache politico a termins que l’espectador meyo de Sálvames, Ana Rosas y Hormigueros pueda entender?

Lo debantdito sistema, lo partitocratico, tien como totz virtutz y defectos. Una d’as primeras, en la mía opinión, ye precisament que tienga igual qui represiente a lo partiu, ya que i hai una ideolochía y una linia politica dezaga. Las personas pueden cambiar d’opinión en un petén, se pueden mercar, u simplament, reblar debant d’as dificultatz d’a politica. Las personas que representan a los partius han de (u habrían de) respectar la voluntat d’a organización y d’as votants y aplicar lo programa. Manimenos, en ixe mesmo sistema, lo cargo perteneixe a la persona y no pas a la organización. Isto provoca problemas como lo transfuguismo que tant bien conoixen tanto en Madrit con Tamayo como en Aragón con Gomáriz, y que agora entre Ciudadants ye una pasa que s’apega mas que la covid anglesa. Las listas ubiertas se proposan a ormino como solución, ya que sí que votaríamos a la persona candidata. Con lo mas que probable periglo que ixo esdevenise un concurso de popularidat. Pocas vegadas, no sé porqué, se proposa un cambio a l'inversa, que los puestos perteneixcan a lo partiu y no pas a la persona. Tamién tendría conseqüencias indeseyebales, asinas que talment ista siga una solución de compromís.

Baixando t’a realidat, a on que la teoría empecipia a fallar, nos trobamos con la estructura interna d’os partius, organizaus en familias, corrients u como se le quieran clamar. Astí ye a on que empecipia a prener mas forma la importancia d’a candidata, representando por un regular a la famiglia que tienga la mayoría interna, habendo ganau lo congreso, asembleya u lo que cada organización tienga. Lo PSOE ye particularment curioso en iste aspecto, tenendo una variación ideolochica interna prou gran, tanto a nivel discursivo como estetico. A sobén me foi cruces de que Javier Lambán, Roberto Fernández u Grande-Marlaska compartan organización con Ximo Puig, Cristina Narbona u Marcelino Iglesias que, sin tener-les mica aprecio, tienen perfils bien diferents a los tres primers. En la izquierda a la zurda d’o PSOE, que la familia que gane lo proceso siga una u atra puet mesmo trencar la organización y orichinar una nueva opción que pareixe radicalment diferent pero actua estraniament igual en quasi tot.

Izquierdas y dreitas se diferencian en lo suyo comportamiento electoral de muitas maneras. Una d’ellas, la disciplina de voto. Lo blog de societat anonima escribió fa anyos un articlo a on que postulaba que la dreita espanyola votaría a un ornitorrinco y i soi d’alcuerdo de tot. Lo PP podría meter de candidato a lo mesmo Bárcenas u a una inanimada barra de carbono que tendría, si fa u no fa, lo mesmo resultau. La izquierda, manimenos, nos la pillamos con papel de fumar una vegada mas, y nos cal una candidata immaculada, que vienga refirmada por un proceso participativo alto u baixo representativo, que arrocle a toda la militancia y que traiga sangre d’unicornio d’a tuca mas alta de Mont Excelencia. Y si, en cuentas d'a primera ye la segunda tuca en altaria, ya nos pensamos si votar-le u no.

Asinas que, encara que no lo entienda, l’afer d’una candidata potent ye important. Bien important. En la izquierda mas que no en la dreita. Y por ixo, porque los partius lo saben, s’ha feito servir arrienda lo recurso de meter en los primers puestos d’as listas a personas y personaches independients, con reputación, fama y/u trascendencia, que puedan movilizar ixe dificil voto de l’exquisito votant cucho. Las campanyas se centran alavez en la persona y no pas en lo partiu u lo prochecto ideolochico. Y ya no votas a CHA, que votas a Labordeta. Ni a Podemos u a Mas País, que votas a “lo codetas” u a Errejón. Mesmo las siglas mutan de PSOE a ZP quan lo nombre d’o partiu ye una mica por tierra. Bella vegada, ixas candidaturas estrela sisquiá son militants d’o partiu, con la lochica carranya d’a chent que i leva treballando a saber qué anyos. ¿Qué diz d’una organización haber d’ir a escar a la persona que la represiente difuera d’as suyas filas? ¿Cómo le parla ixe comportamiento a la suya militancia?

Que a mes y meyo d’unas eleccions, un simple cambio de candidatura pueda fer chirar lo scenario electoral ye qualcosa que me cuesta entender pero que pareixe prou cutiano. Lo mundo politico d’agora funciona a una velocidat prou mayor que no antes. La trachectoria de Ciudadanos en ye buen eixemplo. Las enqüestas no valen ni brenca ni meya debant d’un electorau que, a ritmo de twitter, fa trending topic una u atra opción politica d’un día t’atro. Los candidatos y candidatas son mas influencers que ideologas, mas presentadoras que teoricas, mas show-women que chestoras.

Talment isto no siga ni bueno ni malo, sino simplement una circumstancia que cal asumir. Si l’equipo, las personas que prenerían las responsabilidatz de chestión, son las adequadas, ¿qué importa si se destina a una d’as personas d’a candidatura a un papel nomás mediatico? ¿No ye nomás unatra especialización mas en ixa tendencia antirenacentista que vivimos habe tiempo? Levando-lo un poquet mas enta alla, ¿no se podría profesionalizar de tot y que la candidata sisquiá plegase a tener cargo politico? ¿Que s’ocupase de fer mitins y entrevistas pero no ocupase lo suyo posiento en l’administración que la trigase?

Seguiré sin entender ni compartir que s’apueste tanto por los personalismos en los partius, ni por candidatas estrela. Pero lo feito ye que ye una manera de movilizar voto que funciona muito y bien. Las personas que militamos en organizacions d’izquierdas habríanos de preguntar-nos cómo y por qué. Y si queremos cambiar-lo, por coherencia u estratechia, cómo habríanos de fer-lo, u mesmo si ixo ye posible. Tanimientres, entre que trobamos atras ferramientas millors, habremos de fer servir las que tenemos.

martes, 16 de marzo de 2021

Barricada y la guerra civil. Tierra de barrenaus 7x13

Barricada ha feito tantas cosas y tant buenas, que podríanos dedicar-les una temporada completa. Pero una d'as mas importants y curiosas, antimás de relativament desconoixidas, ye lo suyo disco La tierra está sorda. Publicau en 2009, l'album replegaba 18 cancions que charraban d'a guerra civil espanyola y de muitos d'os suyos sucesos, belún d'ells, ambientau en Aragón. Mario torna t'o programa pa charrar-nos d'iste disco y de totz ixos temas, forigando un poquet en las historias que recuentan.

Antes d'empecipiar con l'analisi d'o disco, adedico un ratet a aclarir un tema que me'n preguntoron por Twitter. Dende lo prencipio d'a temporada, recuerdo en lo texto d'a entradeta que la Lei d'o LAPAPYP sigue vichent. Isto puet sorprender a belún que creyeba que s'heba derogau, como se repite de cabo ta quan en retz socials. Manimenos ixa lei ye de tot vichent y lo que se modificó fue unatra lei que i feba mención. Lo nombre d'as luengas ye nomás un d'os problemas d'ixa Lei de no-luengas que no pareixe que se vaiga a vulcar en ista lechislatura.

La mosica, lochicament, será centrada de tot en Barricada. Tos recuerdo tamién que podetz ninviar dende fa semanas las vuestras "historias d'o puto treballo" pa fer un programa especial. Tiengas muita u poca vida laboral, regular que i hai bella historieta que quieras compartir con l'audiencia de TdBradio.

Aspero que tos faiga goyo iste programa, pero sobre tot aspero que tos anime a intresar-tos por la nuestra historia no tant aluenyada y, por desgracia, bien protagonista d'o present.

Programa #96


miércoles, 10 de marzo de 2021

Gabinas, recosiro, patrimonio y literatura

Lo recosiro ye de tot antirrevolucionario. Ye un peso que nos n’hemos de librar a escape pa seguir construyindo lo mundo que queremos. Pero si funciona tant bien ye porque ye a saber qué enchugardiu. Hue toca un d’ixos posts a on que tiro una mica d’ixe recurso que en zagueras emplego tant a sobén.

La noticia me plega a traviés d’a radio. En Barcelona sacan la zaguer gabina de telefonos publica clasica. D’ixas que te i podebas ficar de tot, isolando-te un poquet de l’estrapalucio d’a ciudat y, con monedas en primeras, y con tarchetas en los suyos zaguers días, clamar a qui fuese. I hai vecins que quieren que se quede, como una remeranza d’ixos tiempos que siempre son millors que no los d’agora, basicament porque yeranos mas chovens. N’i hai d’atros, bien contentos, porque la gabina tornará convertida en un punto d’intercambio de libros. Ixe nuevo uso, diz que se decidió en una votación y cosa no me puet pareixer millor. ¡Tant de buen que la iniciativa s’ixemenase por istas tierras y d’ixos puntos se’n fese buen puyal!

Diz una corrient d’o conservacionismo que a lo patrimonio cal dar-le uso pa que sobreviva. Que lo que no tien una utilidat, u en ye nomás estetica, gosa rematar espaldau, vulcau u esmarchinau. Las ilesias que no tienen culto son las primeras en cayer. Los castiellos que quedoron a escape en la retaguardia no son que enrona. Y asinas-asinas. Pa conservar las gabinas telefonicas, si ye que ixo ye lo que queremos por recosiro u por amor por lo patrimonio industrial y urbano, me pareixe de pistón mirar de trobar-les ixe nuevo uso. Si no ye asinas, me pienso que acabarían por dispareixer. Que, en lo mío caso, no las trobaría guaire a faltar, pero entiendo que bi haiga chent que les tienga aprecio.

Lo entiendo porque soi tamién d’enamorar-me de zarrios y cataticos d’antes mas. La exposición d’historia informatica que i hai en l’edificio Ada Byron d’o Campus Río Ebro, por eixemplo, me pareixe una choya que fa valurar un pasau recient y que, en poco espacio, describe muit bien la evolución tecnolochica d’as zagueras decadas.

Isto d'o recosiro, pa lo que vale ye pa fer-nos viachar t'o pasau nuestro con ixa napa de romanticismo que lo mete tot de color mas polidas que no'n yeran de veras. Concretament, en l’afer d’as cabinas telefonicas, tiengo dos recuerdos bien presents. Lo primer d’ells, de quan yeranos ixos chiquetz delinqüents que fabricaba l’odio a los mosens de Corazonistas. Aprendié, de man d’un companyer d’escuela, a fer entrascar la porteta por a on que se replegaba lo cambio d’as gabinas telefonicas. Con una moneda de duro, creigo remerar, se bozaba lo mecanismo de quantas gabinas. Feba-nos un tour metendo las nuestras trampas de cazataires de monedas por tot lo barrio. Tornabanos a pasar-ie bella hora dimpués con un atornillador y replegabanos lo botín. Por un regular no daba que pa bella partideta en los recreativos, pero nos sentibanos como chenios d’o crimen y compensaba una miqueta los diners que te furtaban en los cutianos atracos que te feban los mayors.

L’atra, mas amable, ye vinclada a Cambrils, lo lugar a on que estivabanos. Pai teneba mas vacacions que mai, asinas que bell anyo bi ibanos antes que no ella. Como en casa no tenebanos telefono, de tardes siempre baixabanos ta una gabina que bi heba cerqueta y le recontabanos lo que hebanos feito durant lo día. Basicament, estar-nos en la placha, chugar a futbol y ir a pescar, que ye tot lo que i feba yo de crío. Tiengo muit mala memoria y pocas remeranzas de quan yera chiquet. Manimenos, no sé bien por qué, remero perfectament ixas gritadas que le febanos dende ixa gabina que, ye claro, fa anyos que no existe.

Las gabinas no fan falta ya. Ye la pura definición de tecnolochía obsoleta y no las trobo mica a faltar. Pero la iniciativa d’ixe barrio de Barcelona me pareixe de pistón como tot lo que faiga d’as ciudatz un puesto mas amable y culto a on que vivir.

martes, 2 de marzo de 2021

O zaguer chilo 4 y Sant Pasqual Bailón. Tierra de barrenaus 7x12

Si i hai un prochecto que por cada anyo me fa mas goyo de charrar-ne, ixe ye O zaguer chilo. Ista iniciativa, promovida por l'Asociación Cultural Nogara, chunta en cada edición a vinte bandas aragonesas de tot lo territorio que graban cada una bella canción en aragonés. Asinas que en iste tiempo ya han conseguiu anyadir a lo repertorio d'a mosica en aragonés ueitanta nuevos temas y, sobre tot, embrecar en la desfensa d'o nuestro patrimonio lingüistico a una patacada de personas de vez que dar una oportunidat a todas ixas bandas d'arribar a un nuevo publico. T'o programa, se'n ye veniu Cherardo Callejón, qui leva menando lo prochecto tot iste tiempo y que nos charra de cómo estió la grabación en istos embolicaus tiempos de pasa. 

En la segunda parte leigo bell par d'os relatos publicaus con motivo d'o Inktober de 2020. Totz dos, tot y estar publicaus en diferents días, tienen relación y fan parte d'a mesma historia dende dos envistas distintas. Un cociner y Sant Pasqual Bailón son los suyos dos protagonistas.

La parte mosical la ubre, como no podría estar d'atra manera, Pablo Hasel, un de tantos mosicos y artistas que ha patiu la persecución por las suyas letras. Lo suyo engarcholamiento escribe una nueva pachina en una historia que ya dura masa. La canción que ficaremos en lo calaixo d'a canción en unatra luenga ye cantada en asturiano, y de man d'una dispareixida banda aragonesa. Y antimás, prou que sí, sentiremos belún d'os temas incluyius en lo nuevo O Zaguer chilo.

Programa #95

martes, 23 de febrero de 2021

Obviedatz que talment no has leyiu istos días, por Gerardo Tecé

Foto orichinal: Cherardo Callejón
(Traducción de l'articlo de Gerardo Tecé publicau lo 22/02/2021 en ctxt)

Iste país tendrá los suyos deficits, pero tamién ofreixe grans oportunidatz en bell ambito. Si en lo sector turistico trobamos posibilidatz arrienda de sol y placha u en lo gastronomico la birolla mas rica y saludable con que disenyar una buena dieta, l’ambito d’o periodismo espanyol brinda a día de hue la oportunidat de que qualsequier que meta sobre la mesa quatre u cinco obviedatz firme un articlo diferenciable d’a resta d’os publicaus cada día. En un país que mas que en Estau de Dreito vive en estau de propaganda, decir lo obvio en lo sector d’o periodismo ye garantía de ofrir un producto orichinal. La polemica dimpués d’os disturbios a radiz de que s’engarchole a lo raper Pablo Hasél en ye un buen eixemplo.

La fayena d’a policía ye la de guarenciar l’orden. Por ixo, quan belún en una protesta, no importa lo motivo, creba un escaparate a cantalazos u crema mobiliario urbano, las fuerzas de seguridat astí presents tienen la obligación de detener a ixa persona y meter-la a disposición d’un chuez. Manimenos, no ye fayena d’a policía empecipiar disturbios. No ye función d’a policía enrestir sin chustificación contra collas de manifestants en actitut pacifica, ni foter balazos de goma contra los uellos d’as chicas que pasen por la carrera. Menos encara fer-se la mofla en retz socials d’a chica dimpués d’haber perdiu un uello. Tampoco no ha d’estar la policía un actor politico que faiga servir la fuerza de manera diferent seguntes lo perfil ideolochico que tienga debant. Como tampoco no ye función d’a policía adchectivar lo ciudadano durant lo suyo servicio. No ha de clamar la policía puta a una manifestant, ni calificar como antisistema debant d’a prensa a qui van a manifestar-se. Un adchectivo tant subchectivo que entre que la policía piensa en un encaperuchau yo pienso en Rodrigo Rato con truqueta quan l’ascuito. A la policía se le demanda profesionalidat en las suyas actuacions, no pas comentarios de texto en las depeixas.

La fayena d’o Gubierno ye la de guarenciar la seguridat y la de controlar la calidat d’as actuacions d’os suyos funcionarios. La fayena d’o Gubierno, en iste caso la fayena d’o Ministerio d’Interior menau por Grande-Marlaska, no ye la d’aplaudir acriticament todas y cada una d’as actuacions d’os suyos policías subordinaus, ni la de mirar-se enta atro cabo quan se cometen abusos d’autoridat contra ciudadans que pagan los chornals de policías y ministros. Fer isto, no investigar posibles abusos y malas praxis, ye un atentau contra los dreitos civils. Esmachinen isto mesmo aplicau a atros ambitos. Esmachinen un chuez negando-se a investigar denuncias de torturas de detenius en comisarías. ¿Se lo esmachinan?

La fayena d’a oposición ye la de exichir-le a lo gubierno, en iste caso a lo de Pedro Sánchez, que guarencie l’orden en las carreras y que guarencie tamién l’atento cumplimiento d’as funcions policials. La oposición ye astí pa sinyalar y criticar a lo Gubierno que permita actuacions policials que caigan en la brutalidat u en lo inchustificau. La oposición no cumpliría con las suyas funcions si aplaudise las malas praxis policials pa ganar votos y, en cuenta de fer lo suyo treballo como oposición, s’adedicase a montar campanyas partidistas prebando d’apropiar-se d’un cuerpo de l’Estau que pagamos totz, sigamos d’izquierdas u dreitas.

La fayena d’os medios de comunicación ye de cusirar que las actuacions d’a policía a las ordens d’o Gubierno y l’actividat d’a oposición sigan las adequadas. No ye fayena d’os medios perseguir vía telediario u tertulia a los manifestants violentos. Pa ixo ya i son la policía y los chueces. Como tampoco no ye función d’o periodismo de fer una triga a la carta que amuestren actos violentos contra mobiliario urbano y eliminen d’as suyas informacions los actos violentos perpetraus por la policía contra manifestants que no fan actividatz violentas. Antimas de cusirar a lo poder - y recordemos que lo poder no lo tien qui crema una papelera, sino lo policía que represienta a l’Estau - ye fayena d’os medios d’informar y dar contexto, nunca no d’intoxicar a la población, eslizando ideyas como que qui protesta por l’engarcholamiento d’o raper Hasél, ye un desfensor d’a violencia. No ye cierto. Habrían los medios de recordar que las protestas, con y sin violencia puntual, se dan a sobén en totz los países con libertatz. Y que no se dan en paradisos de tranquilidat y pacifismo como Arabia Saudí.

Ye fayena d’os columnistas d’opinión de deixar claro que atros companyers de profesión mienten sabiendo que lo fan porque viven en un contino estau de propaganda bien financiada. Ye fayena de qui opina en los medios de recordar que puet fer mal prebo un tipo de letras faciletas y violentas, tant felalo como pa calificar de complice d’o faixismo a Julio Anguita lo mesmo día d’a suya muerte. Pero nunca no puedes, si quiers vivir en un país que respete los dreitos civils mas basicos, permitir que belun entre en la garchola condenau por las letras d’as suyas cancions u por los suyos tuits infantils.