Lo rarizo fandom d'o UCM

Lo fandom de l’Universo Cinematografico de Marvel me tien fendo uellos dende habe tiempo. Y he arribau a la conclusión de que a una parte bien important d’ixas espectadoras en realidat no les fa goyo Marvel. Lo menos no Marvel Comics.

Dende Avengers: Endgame la producción d’o cine superheroico d’a Casa d’as Ideyas se multiplicó. Con historias buenas, malas y meh. Bi ha habiu de tot, ye verdat. Pero una d’as linias d’actuación que mas d’acuerdo soi sobre lo que s’ha feito en istos anyos ye la variedat y diversificación de cheneros. Una politica que transporta t’as pantallas lo que se fa en os comics. Dimpués d’a saga de l’infinito, con un malo como Thanos y lo destín de l’universo en chuego, feba falta historias mas chiquetas. Yera imposible puyar l’apuesta. Lo lochico yera presentar nuevos personaches, desarrollar-ne atros, explorar ideyas innovaderas y aproveitar lo material ya escrito. I hai milenta guions aproveitables y adaptables pa series y pelis, no cal inventar guaire.

Soi d’ixos pocos que le fació goyo la segunda d’a Capitana Marvel (sí, la d’as cancions), la serie de She-Hulk, la de Ms. Marvel y mesmo Quantumania. Garra d’ixas ye una epica y trascendental como Infinity War. Ni falta que fa. Los comics Marvel son plenos a boticiegas d’historias que no van ta garra cabo, de fantesía sin mas, que nomás busca fer-te pasar un buen rato con relatos varrenaus. Las cuatre citadas me pareixen buenas adaptacions. De feito, lo mío problema con os comics Marvel actuals ye lo contrario: que miran de levar lo cine t'o papel. Tot son historias hiper-epicas. L’universo ye en periglo terne que terne sin que la población d’a Tierra acabe histerica y suicidando-se en masa por a contina tensión que soportan. Los personaches tienen unos nivels de poder absurdos. Storm yera una ladrona que amagaba ganchinas en a suya diadema y agora ye un ente cosmico. S’ha de puyar la escala de contino. No i hai espacio pa que los personaches evolucionen y cuan lo fan, ye de rapiconté y sin mica sentiu, como lo caso de Rictor que, en a saga X of swords, se fació mago d’una pachina a la siguient «porque trunfas».

En a etapa australiana d’os X-Men (UXM #244) bi heba un numero que las chicas s’iban de compras. Una enchaquia pa presentar a Jubilee en una historia a on que Dazzler, Psylocke, Storm y Rogue se relaixaban dimpués d’Inferno. En l’epilogo de X-Cutioner’s song (UXM #297) la mesma Jubilee amostraba cómo patinar a un Profesor Xavier que podeba fer servir las suyas garras por nomás bella hora. Numeros como ixe yeran cutianos. Bi’n heba prous cada anyo. Bi heba tiempo entre grans sagas pa que los personaches fuesen creixendo y que vivisen aventuras mas normaletas, se relacionaban entre els a monico, no caleba que tot fuese espectacular tot lo tiempo.

La zaguera sospresa d’o fandom estió las criticas positivas a la serie de Wonder Man. Ueito capitols d’una historia que ye correcta y entretenida. Y prou. Una serie que se me fació muito mas aburrida que la debantdita Ms. Marvel y no digamos ya que Wandavision, Hawkeye u Moon Knight. Tampoco no ye epica ni conecta con atros eventos Marvel. No m’emocionó en garra minuto y lo millor capitol me pareixe lo de Doorman a on que lo protagonista tasament i amaneix. Me foi cruces de que isto le pareixca a dengún la solución a la suposada crisi d’o cine Marvel.

Por yo, quedaz-tos con ixa serie tan seria y adulta de vez que le fez floretas a las gracietas de caca-culo-pedo-pis de Deadpool, pero no dez mal cada vegada que se fa una chorrada como Quantumania que nomás por veyer a MODOK me valió lo pre d’a entrada t’o Palafox. Ixo ye puro Marvel, igual como lo Thor capín y chonflo y She-Hulk somardiando sobre la presencia d’o suyo primo en a suya serie. A chent como yo, que leigo Marvel dende los nueu anyos, nos encanta ixa mierda.

Baixo lo casco de l'orco

The rings of power (Los anillos de poder) s’ha criticau a-saber-lo. No voi a entrar agora a comentar la serie que, personalment, me fa prou goyo. No soi un gran conoixedor de l’universo tolkieniano ni una persona purista cuanto a las adaptacions cinematogramicas de libros. Lo caso ye que en la primer temporada i hai una escena que m’encantó: (chiquet y previsible spoiler). I hai un lugar, habitau por humanos - y un elfo no tan blanco como pa que lo tolere lo facherío - que les ha menazau un exercito d’orcos. Organizan una desfensa estratechica que funciona de pistón y consiguen vencer a l’invasor. La batalla se fa de nueiz asinas que golpiaban a escuras, sin veyer-ie guaire. Cuan tot acaba quitan los cascos d’os orcos pa descubrir que, en realidat, no’n yeran, que heban estau luitando contra humans. Los ganadors se quedan espantaus, horrorizaus de comprebar que los suyos vecins, d’os lugars cercanos, s’heban uniu a l’antihumano enemigo.

I empaticé de camín. Cualsequier activista ye feito a la luita contra los orcos. Contra ixos sers que represientan tot lo contrario a los tuyos ideyals, que quieren fer un mundo fosco, a on que no se veiga lo sol ni se pueda sentir la suya calor en la piel, y que lo mal pueda campar por a on que deseye. Tenemos las ferramientas, las armas, los discursos prestos y aprendius. Tenemos remango, estrucias y experiencia. Sabemos que ye lo que toca. Pero cuan comprebamos que a l’enemigo l’emparan los nuestros, u mesmo que l’enemigo no yera un ser malfarchau, un mostrenco abominable, que nomás l’hebanos percibiu como ixo, tot lo que creyebanos cimbaleya.

M’espanta, como a ixos pobrons, cuan veigo a cualcuna d’as personas que considero d’o costau mío, que comparte valors, ideolochía, compromisos, que mesmo puestar que admire, compartir trinchera con los orcos. Me pregunto quí d’os dos ye l’entivocau, si ella u yo. Talment Adar, ixe que los lidera y que en sindarín lo suyo nombre significa “pai”, tien razón en las suyas reivindicacions. U lo menos no ye tan diabolico como me pensaba. Lo sentimiento ye de traición, d’una man, y d'incertidumbre, d’atra. Dos d’as piors sensacions que existen.

Tamién, pendendo d’o mío estau d’animo, me fan pena. Porque a la fin, los orcos son orcos y arramplan con tot. Los humanos, pa la suya causa, no son que ferramientas que cumplen una fin puntual y, cuan haigan conqueriu la Tierra Media y lo Sinyor Escuro gubierne sobre tot, a ixos folangos los matarán u esclavizarán igual como a los que resisitioron dica la fin.

¿Qué le fa a un humano confraternizar con los orcos? ¿Qué le fa corromper-se, unir-se a l’enemigo, participar en lo suyo propio exterminio? Talment, la suya condición d’humano. Si mesmo los elfos pueden cayer en lo mal, ¿qué no nos va a pasar a nusatras, angluciosas y melampas mortals? Remero, alavez, que yo en soi, d’humano, y que, como toz, bella vegada m’he trobau en lo costau entivocau, u que he feito piculins en la suya muga. Que m’he vistiu d’orco sin parar-ne cuenta y mesmo he brandiu belún d’ixos fieros fierros que portan. Asinas que me miro de tener compasión y mirar de fer-les venir a plego en cuenta de enrestir-los. Prebo de rechirar en la suya humanidat ferida y escoscar la ponzonya orca d’o suyo interior.

I hai ocasions que ya no se puet recular, que lo proceso ye completo y que d’un humán s’ha feito un nuevo orco. En ixos casos me vien t’o tozuelo unatra escena, ista vegada d’as pelis, bien trasladada dende lo libro de The lord of the rings. Ixa a on que los orcos se tricoloteyan y acaban barallando-se por la cota de mithril de Frodo. Unatro d’ixos granizos pasaches que fan honra a Tolkien pa describir-nos la miseria d’ixos sers.

Cuento que ye bueno dudar de cabo ta cuan d’as tuyas conviccions. Remerar qué ye lo que te fa humano, por qué odias a los orcos, quí ye l’enemigo y por qué has de combatir-lo. Si ixas conviccions tienen alacez, no i hai qué temer. Tot y que descubras espantau, de cabo ta cuan, que i hai humanos que, sabendo-lo u no pas, i colaboran, con els.

Visita a Barcelona Comic 2023

A las 10:00 s'ubriban las puertas de Barcelona comic, asinas que, como nos conoixemos, cuasi una hora antes ya i yeranos, fendo ringlera, aguardando a entrar en ixe país machico que ye cualsequier feria d'ista mena, y mas una tant gran y important como la de Barcelona.Nos feba firmes ganas de tornar a ir-ie dimpués de cualques anyos sin poder fer-lo, asinas que querebanos aproveitar cada minuto que podesenos.

Un d'os protagonistas, sin duda, d'ista feria, estió Zerocalcare. L'artista italiano acaba de publicar No sleep till Shengal, unatro libro que recupera la tematica internacionalista que teneba lo suyo exito Kobane calling. Tot y que no heba leyiu cosa d'el, tot lo que me'n heban charrau y lo feito de que compartise mesa con Fermín Muguruza en lo Salón yeran sobrebuenas referencias. En ixa mesa, dos cheneracions d'activistas culturals compartioron chanadas varias sobre la militancia y los suyos viaches. De tardes, firmaba en Penguin. Una hora antes ya le asperaba una docena de personas, asinas que, con lo mío eixemplar de Kobane Calling que tantas vegadas m'heban recomendau de leyer, me i posé. Bella pachina dimpués ya m'heba enganchau de tot a la historia d'as suyas visitas a lo Kurdistán, recontadas dende la envista suya, bien cercana a la que pueda fer cualsequier activista internacionalista d'a Europa occidental. 

Antes nos heba vagau de fer la gran cursa por la mayoría de paradas d'o salón. Entre las propuestas que mas me trucoron estió la de Lapislatzuli, que nunca no n'heba sentiu parlar y que con la persona que atendeba lo stand pillé firme capazo. Entre atros libros, vendeban una colección de diez clasicos d'a literatura chaponesa traducius dreitament t'o catalán, que me los hese mercaus totz, pero como los recursos son limitaus, me decidié por Sota un bosc de cirereres plenament florit.

En la cacera de firmas, pasemos tamién por las mans de María Hesse, que me fació un dibuixo en lo mío eixemplar d'a biografía de David Bowie, escrita por Fran Ruiz. Una manera bien bonica d'acercar-se a la vida d'iste chenio disfrutando de l'arte de María. Tanimientres, Arale s'encargaba de que David López fese lo mesmo con lo suyo segundo volumen de Backhand Ironhead, una secuela que levabanos a-saber-lo tiempo aguardando pa conoixer las nuevas aventuras d'Alexia y Amy.

La curiosidat nos levaba de barra a barra d'a feria. En las paradas prebaban d'agarrapizar-nos con la suya retolica. Y la historia de Jiujitsufragistas, las amazonas de Londres, no nos deixó eslampar. Un relato real sobre sufrachistas que aprendioron l'arte marcial chaponés d'o Jiu jitsu pa desfender-se d'a policía, publicau por Garbuix Books. 

En lo listau de "pendients", una parrafiquera de futuras crompas. Entre atras las d'os dos stands aragoneses. En Malavida, El contador de personas, una nueva historia de Roberto Malo, l'autor de tebeos tant chenials como Veo por ti, con Chema Cebolla u Supermala, con XCAR, que en ista ocasión conta con Javi Blanco como ilustrador. D'atra man, en GP Ediciones, me quedó por mercar l'adaptación a comic de Camí de sirga, que ilustrada por Roberto Morote, leva a lo comic la graniza novela de Jesús Moncada y que s'ha editau en catalán, aragonés y castellano.

Una d'as zonas favoritas d'iste salón y de cualsequier ye la d'o fanzinamen. Talment ye mala memoria pero me pienso que en ista edición s'heba cudiau un poquet mas lo espacio adedicau a ixas propuestas que son empecipiando y que tienen tantismo a ufrir-nos. Sisquiá contine asinas en lo futuro y s'ixample mesmo mas.

En la parte organizativa, chuga bien a favor que se deixe entrar birolla y bebida de difuera. Bi heba, como en anyos anteriors, food trucks - u cambirollas, como proposo belún de decir-les en aragonés - pero pa qui no queremos deixar-nos-ie meyo chornal y haber de fer unatra eterna ringlera, s'agradeixe que no nos metan mas entrepuces. 

D'exposicions nos vagó de veyer-ne tres. La primer, la de magas de l'humor, un repaso por muitas d'as mas sinyaladas dibuixants d'as zaguers decadas. Muitas que ya conoixebanos y beluna que no pas, pero que apuntemos pa lo futuro. Un reconoiximiento, tamién, a las que habe anyos y en un contexto mas dificil facioron tranya. Siguiemos con la de David López, dibuixant zaragozano que l'ha dau a totz los palos: superherois de Marvel, DC y atras casas, de Star Wars, los suyos propios comics... y que tot lo fa bien. La zaguer, la mas trista: l'homenache a Carlos Pacheco, que feneixió fa poco. Cuantos autors amostroron lo suyo respeto por iste autor con los suyos dibuixos que se vendeban pa replegar diners contra la ELA.

Una chornada fantastica entre comics, libros, cosplayers -menos que en edicions anteriors, no sé porqué - y muitas aficionadas a iste mundo tant diverso y divertiu. Barcelona como ciudat y lo salón como evento, siempre me deixan con ganas de mas, de tornar-ie y descubrir tot lo que no m'ha vagau de fer. Asinas que i tornaremos.

Abusos narrativos en X-Men: Phoenix Warsong

En una d’ixas campanyas curiosas que fan de cabo ta quan los supermercaus se publicoron dos coleccions de comics de propio pa vender en un d’ixos centros comercials. Son tomos grans, de mas de 200 pachinas, que replegan material muit random de Marvel, enfilau en primeras a chent no guaire fan. Me pienso que, mas que mas, ye una manera de fer-nos ir-ie a los frikis y de que la cachimalla concietera se pille un tebeo bien gran por quatre perras. Porque ixa ye la principal – y sola – virtut d’iste material: lo pre. Han replegau en ixos tomos arcos argumentals con filos alto u baixo relacionaus, con un chiquet articlo introductorio y lo han meso a un pre bien competitivo. Un d’ixos tomos, titulau Fenix, adintro d’a colección «El renacimiento de Marvel. Los años 2000» replega dos sagas: «X-Men: Phoenix Endsong» y «X-Men: Phoenix Warsong». Garra d’as dos la teneba asinas que por 2,99 pasó de camín a fer parte d’a mía colección.

La primer historia ye bien. No asperetz la saga definitiva, porque no’n ye, pero son cinco numeros USA entretenius, de buen leyer y, en bell momento, mesmo emocionants. La segunda, que escribió lo mesmo autor, Greg Pak, ye de pior calidat. Repetitiva, aburrida y con un dramatismo masa impostau que no consigue fer-te sentir cosa. La parte grafica, con Greg Land en la primer saga y Tyler Kirkham a cargo d’a segunda, ye pan d’atro furno encara que aquí tamién torna a estar millor la primer parte.

Consigue, ixa segunda parte, chunta en una sola pachina belún d’os vicios piors d’a narrativa superheroica en cheneral y marvelita en particular. En charraré de bell par.

Los cataticos. Las pocas vegadas que he leyiu Los Quatre Fantasticos, que por un regular yeran comics d’as etapas mas clasicas, teneba la mesma sensación. Dimpués de barallas y baralletas, la sola solución yera que Reed Richards entrase en lo laboratorio y, un tiempo dimpués, en salise con una maquinota disenyada pa redotar a l’enemigo que pertocase. Lo remero d’a Primera Familia, pero lo mesmo podríanos decir d’os Vengadors con Tony Stark u Hank Pym. Siempre que se fa servir ixe recurso m’alcuerdo d’o bat-spray repelent de tiburons d’a serie de televisión clasica de Batman. Ye acompanyau, por un regular, de charrameca tecnolochica sin garra sentiu.

En lo caso d’os mutants qui gosa construyir los cataticos pa solucionar la tarde ye, prou que sí, Hank McCoy, la Bestia, que pa ixo ye lo chenio local. Ye curioso que, quan yera en los Vengadors, nian programaba lo video, pero ixo lo deixamos pa atro día. En la pachina que en charro Hank se declara lo mayor experto en aparatos de contención d’a Fuerza Fenix y diz haber millorau uno que fació fa anyos, que lo ha miniaturizau pa que i culla en un dardo y que antimás evita que se pueda alimentar con la enerchía d’os rayos opticos de Ciclope, que yera un problema. Tot en un ratico que ha teniu entre que las chirmanas Cucut vivas resucitaban a las muertas y aculliban la Fuerza Fenix. En cuentas d’a debantdita charrameca tecnolochica podeba haber dito: «Tranquilo, Ciclope, m’he trayiu lo mio Beast-Spray repelent de Fuerzas Fenix» y quedaría igual.

L’atro defecto narrativo d’a pachina nos lo trobamos en la zaguer vinyeta, ya combinada con la primer d’a siguient pachina. Bestia ha conseguiu ficar lo suyo repelent machico de Fenix en un dardo. ¿Que le’n pueden tirar con un fusil, una cerbatana u un «aventador de dardos repelents de Fenix»? Prou que sí. Pero deciden que no, que talment lo millor ye fer una bola rapeda especial de Coloso con un achent random de SHIELD que ye por astí. Foi parentesi pa explicar lo d’a bola rapeda especial.

En los 70 Coloso y Wolverine entroron en los X-Men y facioron pacha. En ixos anyos, que los comics yeran muito mas fatons, se feban muitas estratechias absurdas de luita que, me pienso, tienen la suya fuga en la Catapulta infernal d’os bezons Derrick de Campions. Una d’ellas, la bola rapeda especial, consistiba en que Coloso pillaba a Wolverine y lo aventaba, literalment, enta l’enemigo. Iste quitaba las zarpas, que ye lo que millor fa, y plegaba con muita fuerza. No teneba guaire sentiu la mayoría d’as vegadas, pero yera una cosa que estió muit repetida en los 70 y 80. En la narrativa comiquera de 2007, que ye quan se publicó ista historia, queda de tot ridiculo. No nomás por l’anyo, sino por lo contexto. ¿Por qué la bola especial quan ye la manera mas embolicada de fer plegar un dardo en una persona? ¿Por qué la fa coloso con un sinyor que ni conoixemos ni nos importa a dengún? Mesmo, si se quier fer servir ixe recurso, mete-lo que siga espectacular y no en una cantonadeta como si s’avergonyase de fer-lo, que razons en tien.

Contraeixemplo d’isto mesmo lo tenemos en lo numer 6 de Astonishing X-Men d’aviento de 2004, adintro d’a saga Gifted (una choya, en la mía opinión). Asinas ye como, si se quier, se puet fer servir bien ixe recurso mesmo en un anyo que ya pareixeba que heba deixau de tener sentiu. Lo primer, tien un sentiu. Aprecisan plegar en un avión y no tienen garra personache volador. La sola manera de fer-lo ye aventar a Logan pa que se i enganche. Lo segundo, i hai un vinclo emocional entre los personaches y con lo lector. Coloso levaba tiempo muerto por razons absurdas y bell par de numeros antes ha tornau t’a vida. Wolverine se’n fa contento y nusatros tamién. Nos fa ganas de tornar a veyer-los en acción. Ye una manera de decir-le a lo lector que acaba de recuperar a un viello personache con las suyas caracteristicas de cutio. Antimás, historicament, ye un momento de tornada t’os pillamas superheroicos de coloretas dimpués d’os anyos de vestir de cuer negro motivaus por l’exito d’as cintas de X-Men, asinas que tien tot lo sentiu d’o mundo: back to classics. Y en tercer puesto, en l’apartau grafico, le da la entidat que le cal: una doble splash page. Por cosas asinas, iste Gifted de Joss Whedom y John Cassaday ye un gran tebeo que creigo que ha de figurar entre las 15 u 20 millors historias de X-Men mientras que lo de Fenix me pienso que no tornaré a leyer-lo en lustros, si ye que nunca lo foi.

Cuento que a la fin lo problema ye en la mesma historia. Resucitar a Fenix unatra vegada no ye una buena ideya. Ye un recurso sobreexplotau, un enemigo invencible pa qui te cal inventar una maquinota – quasi todas las vegadas se le acaba ganando asinas – y una historia que s’ha contau cien vegadas. Si se fa, que no digo que no se faiga, cal fer-lo bien. Eixemplos n’i hai: Avengers vs X-Men u Excalibur: La tornada de Fenix (Excalibur vol.1 61-68, por Alan Davis y Mark Farmer: miel).

¿I hai cosas rescatables en X-Men: Phoenix warsong? Prou que sí. L’apartau grafico, como ya he dito, ye bien bueno. Pa qui quiera saber un poquet mas sobre las chirmanas Cucut, ye un must-have. Y, en qualsequier caso, ye parte d’a historia d’os X-Men lo que, pa un completista como yo, ye prou razón.

Friki-evolución

En una d'as edicions d'as Jornaicas d'anime y manga, que arroclaba un ciento de personas en l'entorno d'o Centro d'Historias, tenié un d'ixos momentos a on que t'aturas a mirar-te fito-fito lo que ye pasando a lo tuyo redol y podié pensar-ie. Astí yera una parrafiquera de zagalas y zagals disfrutando d'ixa cultura que quan yo teneba los suyos anyos yera un fenomeno conoixiu por muit poqueta chent. Se les veyeba gronxiando-se como l'hese feito yo si qualcosa asinas hese existiu. U como, de feito, lo feba yo con los eventos frikis que s'organizaba en la Zaragoza d'alavez.

Friki ye una parola que ha iu evolucionando y cambiando de sentiu dende que entró en lo vocabulario cutiano d'o castellano. Remero cómo me quede de percutiu en sentir-le a un decir "yo ye que soi muit friki de Friends". Friends ye, en la mía opinión, una d'as mayors mierdas que ha produciu la televisión d'as zaguers decadas. Nunca no m'ha feito gracia, ni he trobau por garra cabo cosa que me podese fer goyo en ixa serie. Pero isto no deixa d'estar una opinión mía tant respetable como la de qui la adora. Lo que nunca no hese pensau ye que "friki" podese chuntar-se a ixa serie. Friends ye lo mas mainstream que existe. Los suyos personaches y argumentos son lo mas cutiano que existe. Ye una formula de sitcom clasica, sin guaire innovación, y sin garra d'os elementos que definiban lo frikismo "clasico". La parola "friki", que habe tiempo se feba servir como faltada u como manera de menospreciar las preferencias culturals de belún, ha preso prestichio y agora se fa servir con atros significaus. Ye lo que tien lo lexico de qualsequier luenga, que va evolucionando seguntes las comunidatz de fabladors aprecisan, encara que i haiga qui ixo le pareixe una blasfemia.

Lo friki "de toda la vida" s'asociaba a una serie de aficions: rol, comics, narrativa de fantasía u sci-fi, ya siga literaria u audiovisual, chuegos mas embolicaus que lo parchís... cosas asinas. Totz tenemos en lo tozuel ixa definición. Yeranos pocos y yeranos amarguinaus. La cultura hechemonica tiraba por atros camins: futbol, series de polis y cosas asinas. China-chana se fue popularizando beluna d'ixas aficions que tenebanos. Qui creixioron con Star Wars u Star Trek sumoron anyos y, por tanto, prestichio social pa imposar los suyos gustos. L'anime y lo manga entroron con pitera a traviés d'o Dragon Ball de TV3. Lo rol se fue ixemenando por chornadas que s'organizaban en las casas de choventut. Los comics de superherois blincoron t'as salas de cine a traviés d'os X-Men y los Spiderman de Raimi. Ya antes hebanos viviu en TV las suyas mas que potables series de dibuixos. En los zaguers anyos fenomenos como l'universo cinematografico Marvel u la serie The Big Bang Theory han feito que conceptos d'os frikis, en los sentiu clasico d'a parola, fuesen conoixius y populars a tot arreu. Ya no ye raro charrar de superherois. La sciencia ficción y la fantasía medieval implen las ufiertas de contenius d'as plataformas audiovisuals y los repalmars d'as librerías y bibliotecas. No ye mica dificil trobar chuegos de rol en los catalogos de nadal. Si existe qualcosa como la cultura friki, ye agora, sin dubda, en la fuga d'a suya historia.

Pero prou que no siempre estió asinas. Los frikis vienen de decadas d'estar marguinaus por tener aficions minoritarias. Por considerar-se que lo que a ellas y ells les feba goyo no mereixeba atención, que yera cultura de segunda, cosas de belulos. Tenié suerte de no vivir-lo asinas y de haber puesto compartir ixa cultura con una clica ampla en todas las etapas d'a mía vida. Pero conoixco chent a brozuecos que ha patiu ixa incomprensión. Por ixo ye important lo Día de l'argüello friki pa reivindicar-nos, pa remerar totz los anyos que todas y totz tenemos dreito a que no s'arrigan de nusatras por las cosas que nos fan felices. Pa querer-nos como somos y sentir-nos-ne argüellosas. Porque lo que hue ye motivo de mofla, manyana puet estar parte d'a tuya cultura propia. Y si no que le'n digan a totz los que s'esmelicaban en veyer-me leyendo comics y hue fan ringlera pa veyer la zaguer de Guardians d'a Galaxia.

Lo friki yera lo "raro". Lo que no s'entendeba. Lo que no se quereba ni prebar d'entender. No yera una qüestión de tener mayor u menor intrés. Yera friki qui se sabeba los nombres propios d'os integrants d'os X-Men, no pas qui conoixeba l'alineación de l'Atletico de Madrit de 1978, tot y que los procesos fuesen parellanos.

Como tot en popularizar-se, hue la identidat friki s'ha esbafau y plega a muitisma mas chent. Tanto que ha preso atros significaus. Lo friki ya no tien porqué estar underground u minoritario. S'entiende que lo cine superheroico ye friki por la suya tematica, tot y que siga mainstream. Pero antimás se considera friki qualsequier afición cultivada con rasmia, langaria u encerrinamiento. Por ixo,  me pienso que sí que se puet estar friki de productos tant populars - y poco frikis en lo planteamiento clasico - como Friends u los Simpsons si los vives con ixa mesma pasión que las frikis d'antes mas vivibanos las Battlestar Galactica, Silver Surfer u lo Runequest.

Talment calga buscar una nueva parola pa qui nos consideramos adintro d'aquella primer definición de friki. Talment, simplament, calga explicar qué modalidat de frikismo practicamos cada una. Talment importe igual y nomás haigamos de continar disfrutando con las nuestras historias y deixar-nos de tanto etiquetache. Lo que seguro que cal, ye aprender y no fer-nos la mofla d'o que agora podamos considerar infantil u una fatera, porque las frikis d'agora son las que marcarán la cultura d'o manyana, y talment te quedes sin entrada pa l'estreno d'a versión cinematografica d'o comics que hue te'n esmelicas. Y porque las personas que tienen / tenemos ixos gustos mereixen / mereixemos tanto respeto como qualsequier atra.

Lo rol. Historias d'un cole de mosens XII

No tiengo guaire claro qui, quán ni cómo arribó t'a mia vida lo rol, pero se i estió quantos anyos, ocupando muitas horas d'o mio entretenimiento. Empecipié a chugar en Corazonistas, con los amigos que teneba alavez, y la cosa duró dica l'instituto quan dos factors acaboron con ixa afición: Magic y l'alcohol. ¿En qué grau? No sabría decir-lo.

Agora ye una mena de chuegos prou popular y conoixida, pero en la Zaragoza de zaguers d'os 80 y primers d'os 90, chugar a rol yera qualcosa bien rara. Cuento que la primera partida, me la faría a Lord of the rings, que yera d'os pocos que existiban en castellano en aquellas envueltas, y que le feba a saber qué goyo a un d'os mios amigos. Pero quan de verdat me i aficioné estió con lo Runequest. No porque lo chuego fuese millor u pior, encara que en la mia opinión yera prous nivels por dencima de Lord of the rings, sino sobre tot, porque empecipié a fer de master. Lo rol me feba a-saber-la honra pa dar salida a una d'as mias grans falagueras: esmachinar historias fantasticas. L'universo Runequest teneba un ciento de razas, monstruos, armas, fetizos, .... y un sistema de chuego bien dinamico. ¡La d'historias que viviemos chugando-ie! Si tenese millor memoria, u hese guardau por bell cabo totz los argumentos d'ixas aventuras, ¡quántas cosas i trobaría!.

Con ixe Runequest entré en lo mundo rolero. T'a part d'alavez quasi no bi heba manuals de rol en castellano. Lo poco que s'heba traduciu yera, antimás, bien caro pa las pochas vuedas de zagalons de tasament una decena d'anyos. Asinas que lo que mas febanos yera tirar d'os libros que bi heba en las bibliotecas zaragozanas. Siempre bi heba bell pai u mai que treballaba con una fotocopiadora cercana y nos copiaba las partes que nos fesen falta. U mesmo manuals enteros. Encara en conservo belún d'ixos, feito a pur de chirar fuellas d'un libro amprau en los ratos libres d'uns amants pais de frikis.

S'iba metendo de moda y no sé cómo, pero mesmo nos faciemos con bell manual en anglés. La primer vegada que chugué a Vampire u a Cyperpunk encara tenebanos las fichas de personache en ixa luenga. Lo nuestro radiu conoiximiento en ista tierra de argüellosa ignorancia monolingüe, feba que a soben nos hesenos d'inventar, u "interpretar librement", tal u qual regla de chuego.

Ixos chuegos los conoixié sobre tot en las primeras chornadas de rol que se feban en la ciudat. Por las casas de choventut y centros civicos se'n iba organizando por cada diya mas. Yeran los nuestros momentos de trobada de muita chent de totz los barrios, que compartibanos la pasión por superherois, monstruos, sers fantasiosos, naus galacticas y distopías futuristas. Lo mas friki que saliba por la tele yera los Cazafantasmas, asinas que encara yeranos raros de verdat. En ixas chornadas, prebé chuegos a embute: Star Wars, Marvel Cthulhu, Stormbringer, Blood & bowl, Warhammer, ... En unas que se facioron en Sant Chusé vide por primer vegada un capitol de Bola de drac en catalán, entre atras cosas porque no los tenebanos en garra atra luenga. Belún los heba grabau, porque pillaba lo sinyal de TV3, y nusatros nos quedabanos embabiecaus veyendo por primer vegada a Son Goku fendo un Kame Hame Ha.

Taj Mahal, la botiga de comics que encara contina ubierta, yera la que nos furniba de material las pocas vegadas que en mercabanos. Y de dados, claro. Yera d'os pocos puestos a on que podebas mercar-ne. Totz prebabanos de tener-ne de bien pinchos. Poco dimpués d'empecipiar a chugar, ubrioron Ludo-Z, botiga especializada nomás en rol. Belatra vinió dimpués. Todas de curta vida. No debeba d'estar guaire rendible, ixo de tener-nos horas arrienda chugando en los espacios que nos habilitaban, pero sin gastar ni una perra.

Chugabanos a rol en las casas de cadaún de nusatros, y tamién en los recreyos. Siempre que tenebanos bell rato, encara que no fuese que la meya hora d'o descanso, i chugabanos. A la fin faciemos lo paso lochico que fa qualsiquier rolero que de verdat s'emocione con los chuegos: fundemos un club de rol. Lo local, nos lo consiguió un mozo que viviba en Reina Fabiola. En la parroquia d'a ilesia se feban qualques actividatz. I heba mesmo un local d'ensayo pa collas de mosica. En una d'as salas, bien gran, teneban montau un taller de costura, u bella cosa pareixida, pero que lo heban albandonau. Lo mosen d'a ilesia nos deixaría lo local a truca de que lo escocasenos y lo deixasenos bien presto.

Como tot lo nuevo, lo rol alarmaba a los sectors mas conservadors d'a sociedat. A traviés d'articlos en revistas y de reportaches en televisión, los medios de comunicación espantaviellas ixorrontaban a las nuestras familias decindo-les que nos creyebanos las partidas y que remataríanos totz alunaus de vivir en ixe universo ficticio. Nusatros nos desfendebanos explicando-les que en atros puestos d'o mundo ixos chuegos heban arribau a saber qué anyos antes, que no heban suposau garra problema, que mesmo se potenciaban qüestions como la empatía, ... En ixe ambient fundemos lo club. 

Lo mosen heba amostrau una mica de preocupación por tot lo que heba sentiu por la tele, pero hebanos feito bien lo nuestro treballo y le hebanos feito venir a plego. Ya tenebanos local. Quedemos, pillemos bell par d'escopallos y badils y nos metiemos a deixar tot aquello bien pincho. Mesmo un vecín mio se baixó un radiocasete y metiemos una cinta d'os Manowar a tot estrús entre que apanyabanos lo local. L'alegría de tener un puesto pa chugar, lo heavy sonando entre ixe paradiso que yeranos escobando y lo feito d'estar preadolescents fació que en bell momento las nuestras escobas esdevenisen espadas y pretasenos a blincar por toda la cambra barallando-nos como caballers. Yeranos Lancelots, Aragorns, Luke Skywalkers,... de mesa en mesa desfendendo Camelot, Gondor u la Nueva Republica. Quan, de bote y voleyo, lo mosen ubrió la puerta y nos trobó asinas. Con capa casco y espada u trapo, pozal y escoba, seguntes la envista. Nos quedemos chelaus, pensando en como tornar a explicar-le que no nos creyebanos las aventuras que chugabanos y que no nos yeranos tornando varrenaus. Y baixemos la radio, claro.

A la fin, no pasó cosa aquella vegada. Lo club existió qualques anyos. Se dició Excalibur en primeras y Darkhold dimpués. Nos chuntabanos totz los domingos de maitins pa chugar a tot lo que se nos ocurriba. A soben febanos tarde en casa a la hora de chentar tot y que quasi totz vivibanos bien cerca. 

En ixe tiempo fuemos creixendo y, como he dito en empecipiar, arriboron los dos factors que facioron que s'acabase lo club de rol y la mia afición a ixa mena de chuegos. D'una man, Magic. Aquell chuego de cartas lo implió tot. De nuevas, las primers versions las chuguemos en anglés. Por bella BBS (lo mas pareixiu a un foro d'internet que existiba alavez) heba leyiu sobre la suya existencia. Un chuego que yera revolucionando los USA y que moveba a saber que diners. Me pillé un primer faixo en Taj Mahal, que continaba estando la botiga de referencia pa tot isto. China-chana totz acabemos aprendendo a chugar y participando en los primers torneus que se facioron en Zaragoza. Lo primer d'ells, a on que tenié la suerte de participar, se celebró en l'Hotel Palafox. Debant d'as eternas partidas de qualsiquier chuego de rol, que nos podeban levar meses y que exichiban que fuesenos totz presents, Magic levaba bells minutos y no te feba falta que unatra persona.

Ixo se combinó con l'adolescencia. Ya hebanos pasau ueiteno y muitos hebanos empecipiau a zorriar. Yeranos chovens y agora firmaría por tener las resacas d'alavez, pero a nusatros nos pareixeban horribles. Los domingos de maitins ya no tenebanos ganas de rol. Febanos tarde, baixabanos lo faixo de Magic, nos febanos bell par de partidas, y ta casa a aguardar a que bell amigo nos gritase pa alparciar de tot lo que heba pasau la nueit d'antes.

Lo club de rol duró poco mas. Encara, de cabo ta quan, me trobo con belún d'os que febanos parte y recordamos las nuestras partidas como si fuesen cosas que nos hesen pasau de verdat: "la vegada aquella que prebés de disparar dos flechas de vez y faciés pifia", "quan t'habiés de buquir a un orco pa que nos deixase pasar", "aquell master que vinió convidau y que s'encarranyaba porque le matabanos totz los personaches principals",... ya podetz contar. Historias de lolos frikis. 

Lo rol ocupó una parte muit important d'a mia vida y estió la primer manera que tenié de contar historias fantasticas. Lo recuerdo con muito carinyo, pero con ixa sensación d'incomprensión de man d'un adultos que reaccionaban con refús debant d'as cosas nuevas. Hue lo rol ye mas conoixiu y no tien tantos tabús como alavez, pero la reacción d'os adultos debant d'as novedatz sigue estando la mesma.

Una chaqueta de crisi

Ya yes amanau a los quaranta. Pero no tiens ni perras pa un auto gran y rapedo, de color roya, y sin teito, con que fer estrapalucio por os cinturons de circumvalación. Lo que de verdat te va, lo que un diya te truca, ye una chaqueta inspirada en l'uniforme de Wolverine. La has vista quantas vegadas ya, anunciada en o Facebook. Cada vegada que i dentras, a alparciar u a compartir beluna d'as tuyas fateras, un banner te chila que la merques. O carnuz d'a foto ye un crianzon que le preba de bitibomba. Con as zarpas de Wolverine. En una scena con nieu cayendo en o fundo. Un poquet achenullau, y como pillando vencida, pa blincar dencima d'un hipotetico enemigo difuera de plano.

Y te decides. Y malas que t'ingresan a nomina,dentras en ixa web con nombre de chilo d'as Tortugas Ninja, y la mercas. No siga que, en que te pasen as facturas, se te quede en royo la cuenta, y a responsabilidat d'adulto te prive de fer ixe chirgo. Asinas, decides, concararás a crisi d'os quaranta. Con un concieto responsable. Con un malfurrie de tasament bella decena d'euros.

En bell par de clics, os diners esnavesan l'Atlantico y un choven chonflo y pecotoso, que se ye minchando un hot dog d'an que se sobrece untos por tot, recibe una alarma en o suyo mobil. Les cal fer un paquet. "Awesome Logan Zipper Jacket. Size XL. Zaragoza, Spain". Fa un cenyo de sorpresa. No le gosan de demandar cosas dende Espanya. Se quita l'unto d'as mans, deixa la minchanga sobre o repalmar, y prencipia a aprestar la comanda.

A l'atro cabo d'a mar ociana, asperas en candeletas a plegada d'a chaqueta. No la has vista que en fotos. No sabes ni o material de que ye feita, ni si habrás acertau con a grandaria. Te puetz permitir malfurriar ixos diners, pero con tot y con ixo contina fendo-te duelo gastar-los. Bien se vale que a sociedat tuya s'ha ocupau de deixar-te esbotar por astí. Tiens una edat an que has comprobau que tot lo que o capitalismo te prometió ye falso. Que os mensaches d'o cine, d'a escuela, d'a familia y todas as personas que admirabas, no yeran que idealizacions incumplibles. Nunca no serás ixe trunfador. O treballo tuyo, ni te imple, ni le trobas guaire sentiu. Os ababols ocupan os puestos más alteros d'a escala social, armaus con un tocho pa trucar-te en que prebes d'acucutar por os suyos dominios. Te vendioron una moto y no yera la de Wolverine. A lo menos tiens la suya chaqueta.

Pero "ei! te deixamos que te merques una chaqueta absurda!", te diz Facebook, entre anuncios d'oposicions a policía, y videos que celebran amistatz con chent que nian conoixes. A libertat a los quaranta, ye fer-te de cabo ta quan una pinta de biera "de la cara", vestiu con una chaqueta que recuerda a un superheroi.

O diya plega. A furgoneta de Correus aparca en a puerta d'o tuyo treballo. Te la levan t'asti porque por casa, no i yes nunca. Ye un paquet de plastico, zarrau con ixa mena de vesque termico. Lo ubres a moniquet, parando cuenta de no fer garra zancocho. Le ha costau mas d'un mes d'arribar dende os USA. La quitas d'o plastico. Astí ye. As colors azulas y amarillas son correctas. Baixas as dos cremalleras y te la calas. Va bien de grandaria. Te miras en l'espiello d'o escusau. Astí yes. Molas. Guarda si molas! Molas muito. Yes o puto Wolverine. Si teneses tres cutiellos salindo d'as mans, supersentius y factor curativo, no te caleba cosa mas. Porque l'uniforme lo tiens. Y cómo mola!

Ficas en a mochila a chaqueta que hebas traito. Encara que fa calor, vas a tornar-te-ne ta casa con a chaqueta de Wolverine. Prou que sí. Puyas t'a bici y prencipias a pedaliar. A chent se te mira, sí.... Son pensando: "Cómo puet prebar-le tant bien una chaqueta a belun?". Síiiii. Totz reconoixen l'uniforme de Wolverine d'os comics. L'uniforme que feba goyo, no ixe marrón mierda que le metioron tantos anyos. L'uniforme mitico de Wolverine. S'eslucernan en viyer a imachen d'un trasunto de l'heroi canadiense, circulando en una BH, por o carril bici d'a marguin cucha. Sabes que lo vas a petar. No puet haber-ie una chaqueta más molona en toda la ciudat.

Lo sol brila alto, en un cielo azul de tot. Ni un nyublo s'atrive a apareixer hue en Zaragoza. Ni en o cielo ni en a tuya humor. Hue tiens quasi quaranta, pero te sientes como quan en tenebas vinte, y encara le febas goyo a las zagaletas d'os bars, y salibas de chueves a domingo, y capaciabas con os amigos tot lo diya, y te pasabas os videochuegos, y cada libro yera una troballa, y no atro calco de bella cosa ya leyida antes.

Un auto de policia s'atura chunto a tu en o semaforo y te preguntas si te podrían aturar por "exceso de flow". "Lo siento sinyor" - diz con voz infantil l'achent en la tuya ment - "ye vusté fendo que a resta d'a ciudat s'avergüenye. Hemos recibiu queixas de tot lo vecinamen dende Chuslivol dica Val d'Espartera". "Pero sienta, sinyor achent" - le respondes en a conversa virtual que aspera la luceta verda - "me lo mereixco, soi a pocas de fer-ne quaranta. Y lo de salir a correr ye bien, pero no me acaba de satisfer". "Lo entiendo, lo entiendo, pero a lei..." Y deixando-le con a parola en a boca, a luceta se torna verda, y limpio pedaliar, continas lo camin.

Plegas en casa. Fas repaso. Te cal ordenar unas cosas, limpiar l'escusau, que tiens visita lo cabo de semana, y dimpués has de pasar a viyer a la familia, que los tiens albandonaus. Deixas la chaqueta en una percha. A molonidat se'n va con ella. Qué efimero ye o goyo que furneixen os placers materials! Ya ye plegada, sí. Dimpués de tantos diyas d'aspera. Deseyas que cada diya que te la metas te sientas como en iste ratet que has pasau. Beroyo. Choven. Poderoso. Encara que barruntas que no. Que atro diya petarás por atro cabo, y te mercarás una nueva fatera, que te traiga ixos sentimientos de tornada. Asinas son as cosas aqui. Asinas son as cosas con a tuya edat.

Pero cómo mola la chaqueta...

A cinta que me moló. Tierra de barrenaus radio 3x05

Sin estar precisament un saputo d'o cine, ye una d'as mias pasions. Os medios actuals permiten, antimás, levar t'a gran pantalla historias que de chiquet nomas yeran posibles en o comic u a literatura de Sciencia Ficción u Fantasía.

China chana as frikis nos imos fendo con o mundo, y hemos aconseguiu emplir d'as nuestras basemias os cines. Como en tot, bi'n ha de buenas y de malas, de millors y pior feitas. Cintas que pareixen salidas d'a ment d'un politoxicomano en un d'os suyos viaches y ideyas que de puro chenial son incomprensibles. Y atras cintas que simplament fan goyo, pero no sabes por qué.

A ufierta audiovisual d'agora ye tant gran y variada, y o tiempo libre tant radiu, que me cal trigar muito. Por ixo, recurro a la chent que tien gustos pareixius pa que me recomiende qué viyer u qué leyer. En iste programa nos chuntemos quatre amigas y charremos de cintas que nos heban feito goyo. Sin garra criterio a priori. A triga no podeba salir mas variada. Cintas que replegoron arrienda diners en taquilla contra atras que s'estrenoron dreitament en TV. Presupuesto multimillornarios contra cintas feitas con a pocha que heba feito lo suyo director. De tot, y muita diversión, como siempre, en iste Tierra de barrenaus radio, que prencipió con una videofatera, y que ya podetz ascuitar y descargar-tos.

Barrenaus de chelo y fuego. Tierra de barrenaus radio 2x11

Prebar de fer un programa de radio cheneralista sobre Canta de chelo y fuego y la suya adaptación a televisión, Chuego de tronos, ye bien dificil. Quan tres fans d'a saga nos chuntamos, tenemos ferrete pa horas. Nomás con qualsiquier d'os temas que'n charramos en iste podcast, podríanos foter-nos tot lo programa. Pero prebemos d'abreviar y cuento que o resultau ye prou bueno.

Ista saga, como ya sabetz si visitatz a ormino lo blog, ye una d'as mias pasions. En he feito buena cosa d'articlos. Asinas que fer-ne un podcast yera qüestion de tiempo y oportunidat. En iste programa prebamos de transmitir ixa pasión por a saga que nos une a las tres personas que i participamos. En una primer parte, nos endrezamos t'a chent que ni ha leyiu os libros ni ha visto a serie. Dimpués, t'as que nomás viyen a serie, y ta rematar, lo que más goyo nos fa, charrar de tot: serie, libros, teorías,....

O programa, como barruntabanos, se nos quedó curtet. Dimpués de quasi tres horas, nos quedaba guión pa lo menos hora u hora y meya, asinas que ye más que posible que se'n faiga una segunda parte, pero ixo ya pa la temporada venient.

Compartir con buena chent as buenas aficions ye qualcosa que siempre m'ha feito goyo. Asinas que pa qui encara dubdatz de si viyer a serie u leyer os libros, aspero que consigamos fer-tos venir a plego y que le pretetz fuego a l'Emule pa baixar os ebooks u os episodios, u que vaigatz a toda vitesa t'a vuestra biblioteca a fer-tos con os libros. Por muit mainstream que haiga esdeveniu, Canta de chelo y fuego ye una saga increyible, plena de lecturas dende muitas anvistas diferents, funda de vez que divertida, y creyadora d'emocions de toda mena. Precisament ixo zaguer ye pa yo una d'as cosas que distingue a buena literatura.

Como siempre, aspero que tos faiga muito goyo lo programa, agradeixco la participación d'as compas de podcast y aspero as vuestras criticas, sucherencias, faltadas, etc...

De viache por Mataró y Barcelona

Como cada vegada que se nos chuntan tres diyas de fiesta a l’arreu, iste puent de Sant Valer yera ideyal ta fer bell viache chiquet. Quan no tiengo un destino claro, lo que foi ye mirar a on toca beluna d’as collas que no gosan de pasar por Aragón y asinas, de vez que viacho, me veigo un buen concierto. En ista ocasión, y con a enchaquia d’o cabo d’anyo d’Arale, decidiemos de marchar ta Mataró, an que se celebraba o 16eno cabo d’anyo d’a discoteca clap con dos conciertos de Els Catarres y Zoo con EAM. Como de cutio, o tiempo nos cundió ta fer muitas más cosas.

O primer diya marchemos dreitos ta Barcelona. Ya dende feba tiempo quereba visitar o conoixiu como “Triangulo friki” y ista yera una oportunidat sobre buena. Ye una zona d’a ciudat an que se chunta un amiro de botigas frikis. Chuegos de cartas, de mesa, literatura de fantasía y sci-fi, comics, manga, …. tot en muit poco espacio. A grandaria de Norma u de Gigamesh nos deixó sin sangre en a pocha. Y con ixa impresión perén de que te caldría muitismo más tiempo y diners ta poder leyer y disfrutar tot lo que quiers. Bien intresant ye o fundo de novelas de sciencia ficción que tienen en Gigamesh. Belunas d’ellas de mal trobar. Encara que bella botiga ya ha zarrau dende que s’escribió l’articlo que nos feba de guida, a mayoría continan ubiertas y con muit buena salut. Con tot y con ixo, no faciemos guaire chirgo dica que, cosas que pasan, entremos en una botiga d’escambio an que me trobé con toda la colección de Xtreme X-Men por nomás 30 euros en buen estau. Una choyeta que soi leyendo con firme anglucia. A tarde la rematemos en Play, un bar friki an que tienen un almario pleno de chuegos frikis que t’ampran ta que chugues. Tamién i tienen carta de bieras y o puesto ye bien pincho, asinas que ye más que recomendable ta rematar-ie a tuya tarde de compras.

O sabado tornemos ta Barcelona a viyer El Born. Baixo l’edificio d’un mercau tipico de l’arquitectura de fierro, bi ha tot un chacimiento d’a Barcelona d’o sieglo XVIII. Ixe espacio, antimás d’amostrar o trazau d’a ciudat en ixas envueltas, en un estau de conservación bien bueno, s’ha aprofitau ta acullir exposicions. En viyemos dos. La una, sobre a Catalunya d’alavez, a traviés d’os vaixiellos, chuegos, ferramientas, etc.. que troboron en a enrona que bi heba. L’atra, titolada, "Fins a aconseguir-ho! El setge de 1714", charraba d’a guerra de Sucesión y, sobre tot, d’o sitio de Barcelona y d’a batalla de l’Once de setiembre. Una exposición que, como tantas atras vegadas, me fació tener ixa sana envidia d’o pueblo catalán. ¡Quánto se troba a faltar una mica más d’información sobre a Guerra de Sucesión en Aragón! Ni una exposición, quatre libros, garra celebración fueras d’una scenificación d’a batalla de Zaragoza, … Ya en as zaguers visitas que hemos feito a lo país vecín, hemos iu viyendo partes d’a ruta 1714, una iniciativa bien intresant que nunca no viyeremos en Aragón encara que ixa parte d’a nuestra historia ye igual d’intresant.

A parte no borinera d’o viache, la completemos con una visita t’o castiello de Burriac. Ye en o municipio de Cabrera, tocando con Mataró. Una puyadeta de tasament meya hora, nos leva ta un castiello que se devantó en a edat meya, pero que, en ixe puesto se i ha trobau restos de muito antes. O camín ye entre un boscache poliu y agradable que fa de buen fer a costera. O castiello ye muit bien conservau y l’anvista dende alto t’explica por qué se fació en ixe puesto. Dende astí se puede columbrar toda la redolada y buen troz de mar. Cuenta tamién con panels explicativos sobre a historia d’o castiello y d’a comarca de Maresme ta poder entender lo que se ye viyendo. Lo que ye lochico, pero no pas tant freqüent como habría d’estar-ne en os puestos turisticos.

A parte borinera, y o principal motivo ta ir ta una ciudat tant poco turistica como Mataró yeran os debantditos conciertos. A discoteca Clap ye un puesto pincho de tot. Por una escalereta de fierro que bi ha dimpués d’o guardaropa y o -ya quasi obligatorio - photocall, se baixa ta una sala ampla y diafana con buena capacidat. Os pres son caros, pero no masiau. 3,50 o vaso de 1/2 litro de biera ta que tos ne faigatz una ideya. Dimpués d’os conciertos, no sé si s’encertó que pillemos buenos DJs u ye a mosica cutiana, pero sisquiá tenesenos un puesto asinas en Zaragoza. Tot temazos, y sin deixar de bailar. Nomas a zaguer hora, quan igual nos teneba ueito que ueitanta, prencipió o ferrete más electronico. Dica alavez La Gossa Sorda, Obrint Pas, La Troba Kung Fu, Aspencat, Zoo, …

En Els Catarres comprobemos o tirón que tienen entre o publico más choven. Arale y yo, que ya deixemos os trenta dezaga en fa muito, puyabanos a media d’edat prou. As zagaletas se sabeban de corazón todas as letras d’una colla que charra más de sentimientos y vivencias que de reivindicación politica. Pero con tot y con ixo, una d’as pocas cantas con mensache politico, Seguirem lluitant, remató con un sonoro In-Inde-Independencia en as bocas de tot lo publico. Dende as mas chiquetas dica las cambreras, pasando por as foranas que nos i solidarizabanos. O concierto, d’os millors que en he viviu. Con tiempo ta fer o suyo repertorio sin que dimpués venise atra colla, chugando en casa y con un publico entregau, Els Catarres contrimostró lo dominio que tienen d’o scenario. O buen rollo transmitiu no nomás veniba por as letras sino tamién por a complicidat entre os miembros d’a colla, y por o creixient protagonismo, mosical y personal, d’a sección de vientos.

L’atro concierto prencipió con uns esconoixius ta nusatros EAM: Exercit d’Alliberament Musical. Uns rappers que fan servir catalán y castellano en as suyas cantas, que recitan tres hombres y una muller que, con un estilo bien diferent, marca una mica o punto orichinal d’a colla. O soniu suyo tien bell punto “Rage against the machine”. Sin estar una colla que conoixesenos nian una canta, o concierto nos fació blincar y no nos aburrió ni un minuto, asinas que aprebau con nota. Una colla a seguir, sin dubda.

Pero a lo que hebanos iu yera a viyer a Zoo. A colla de l’anyo. Con nomás un disco editau ya tienen ta un show bien digno. Gracias tamién a las versions libres que han feito d’Esbarzes de La Gossa Sorda y Camins, de Obrint Pas, y a las escenes quotidianes que fan en La Tuerka y que ya suenan tamién en os conciertos. Sin un segundo t’alentar, Zoo lo tocó tot. Y nusatras lo diemos tot tamién. O publico, de tot diferent a qui yeranos o diya d’antes en Els Catarres, y con as entradas acotoladas dende feba una semana, blinquemos, bailemos y chilemos todas as propuestas d’os valencians. Panxo y os suyos lo petoron bien petau, con uns pogos sobrebuenos y una prebatina, fracasada pero muit bien intencionada, de Wall of death. Deseyando somos ya de sentir o nuevo disco y, prou que sí, d’una chira por Aragón.

Un gran cabo de semana de mosica, frikismo y cultura, en una tierra siempre acullidera como ye Catalunya, y que aspero tornar a visitar antes con antes.

Cacegadas (Lost) Tierra de barrenaus radio 2x02

Si bi ha una serie que, en as zaguers decadas, cambió as trazas de fer televisión, ixa ye Lost. No descubro cosa decindo que bi habió un antes y un dimpués d'a suya emisión. O boom d'as series prencipió con ista, y muit pocas han conseguiu meter-se a ran de calidat y de exito. Dimpués de Lost bi habió muitas prebatinas de "nuevas Lost" como FlashForward que se quedoron en no cosa. Bi'n habió d'atras que sin prebar d'estar-ne si plegoron a un gran nivel de calidat u d'exito: a primer temporada d'Heroes, True Detective, Game of Thrones, The Wire, The Soprano, Breaking bad, ... Pero denguna nos tocó tanto como Lost.



Facié tarde en Lost. Ya yeran fendo a segunda temporada en a TV. Pero como cuento que todas as que faciemos tarde, me trusquié totz os capitols d'a primer temporada a l'arreu. Lost ye d'ixas series que cada episodio te deixa con l'angunia de querer saber qué pasará contino. Guarda si soi puntual, que ye una d'as mias basemias, pero en os anyos que feban Lost, feba tarde terne que terne en pensar que me vagaba de viyer-me un capitol más.

"Lost ye una serie de personaches" estió un d'os mantras gafapasters más repetius en ixas envueltas. Tot un #ranciofact que, como tantos atros, ye verdat. En tener tanto tiempo ta costruyir os personaches, consiguioron fer-ne de bien buenos. L'actuación de muitos d'ells aduyó. Y charro en masculino porque, como podretz sentir en o podcast, tanto os papels, como l'actuación d'ellas, me pareixió prou floixa. Fueras de Julliet y, talment, Claire, os personaches femeninos son o punto más feble d'una serie rebutient de mastos alfa y fundament masclista. As mullers quedan, quasi todas as vegadas, en "novia, mai u filla de".

Con tot y con ixo, os personaches masculinos sí que yeran muit bien feitos, como deciba. John, Jack, Sawyer, Sayyid, Ben, Charlie, Desmond, Faraday  .... totz tienen intresants historias que les fan estar como son. Totz evolucionan de traza lochica y bien motivada, sin guaires d'ixos chiros absurdos que tanto nos i tiene feitas a ficción televisiva.

4, 8, 15, 16, 23, 42.... os numers que nos tenioron a todas en candeletas. Misterios que apareixeban por tot. Onsos polars en oraches tropicals, fumos negros asesinos, Una lucana iluminada por tierra en o preto d'a selva, uns habitants misteriosos... totz china chana aclarius, u no pas tanto.

Muitas vegadas se critican as tres zaguers temporadas, pero o feito ye que Lost ye d'as series que millor sobrevivió a la vaga de guionistas. Heroes, por eixemplo, no sabió salir-ne. Lost no nomás en salió, sino que lo fació muit dignament. As tres zaguers temporadas ye verdat que trencan una mica la dinamica d'as primers, afundando más en argumentos mas propios d'a fantasía u d'a sciencia ficción y aluenyando-se d'o "culebron" amoroso. Puet estar que por ixo precisament me pareixcan d'a mesma calidat que as tres primers. Ixo, y que tot lo que tienga viaches y paradochas temporals, siempre fa goyo.

Nos quedemos en o programa sin charrar d'o que facioron os actors dimpués. Juliet (Elizabeth Mitchell), que me pareixe a millor actriz d'a serie, tenió prou mala suerte con os suyos prochectos. O remake de V, que la teneba de protagonista, se canceló en a segunda temporada, deixando-nos a las pocas fans que teneba, en candeletas. Series muito piors continan fendo-se y tenendo exito, inesplicablement. Dimpués fació Revolution, un d'os piors catenazos que he visto en muito tiempo y l'eixemplo de cómo malmeter de tot una buena ideya. Revolution pasará t'a historia de como no fer una serie de televisión. Jacob tenió un chiquet papel en Dexter, an que, como en Lost, pasó sin pena ni gloria. O papel de Charlie (Dominic Monaghan) en FlashForward no yera malo pero, igual como con V, a serie estió cancelada antes de tiempo. Y muit mal zarrada argumentalment. A primer cinta de Wolverine, an que fa atro papelot, quasi millor ixublidar-la de tot. Kate (Evangeline Lilly) fa un papel en O Hobbit tant ixauto como o que fació en Lost, y antimás blasfemo, seguntes as fans tolkienianas. Hugo Reyes tamién tenió mala suerte con Alcatraz, una serie mediocre, pero entretenida. Ixo sí, fació un sobrebueno y divertidismo papel en aquell capitol de How I met your mother. Como no veigo ni Person of Interest ni o remake de Hawai 5.0 an que salen Benjamin Linus y Ji-Soo Kwon, no en opinaré. Y asinas cuento que podríanos continar con quantos más....

Si estiés fan d'a serie, en iste programa no trobarás garra analís saputo. Nomás a tres fans charrando-ne apasionadament y pasando un buen rato. Regular que lo sentirás asentindo u carranyando-te con nusatras. Fe-me-lo saber en os comentarios! Si no la has vista, ya tardas. Yes perdendo-te Historia d'a televisión y una sobrebuena serie. En o programa te vas a minchar spoilers a bando, pero regular que disfrutarás y vivirás a serie como todas las que la han vista. Aspero a fans y a no fans tos faiga firme goyo iste programa... y que nos lo comentetz!

Ascuita u baixa-te o programa clicando aqui

Universos de ficción

Una d’as criticas que más se gosa de fer sobre os comics Marvel, ye que pareixe imposible de seguir as suyas series sin saber tot lo que ha pasau en as decadas que levan escribindo-se u todas as relacions entre as diferents series. En lo que se clama l’Universo Marvel. Isto ye aplicable tamién a muitas atras obras de fantasía, superheroes u sciencia ficción: l’universo DC, Canta de chelo y fuego, Star Wars u mesmo L’amo d’os anillos son completos y complexos universos.

Ye verdat que pa entender completament qualsiquier d’istos universos cal leyer-lo tot, u a lo menos buena parte. Pero precisament en ixo ye an que tienen parte d’a suya gloria. O feito de que s’haiga creyau tot un universo ta una obra proporciona un scenario fascinant an que desenrollar aventuras y historias de toda mena. Un universo que as fans gosamos de pasar horas imachinando-ie aventuras y fendo-nos preguntas sobre ell. En a mia opinión, o feito de que ixas obras sigan tant angluciosas no nomás no ye un problema sino que me pareixe una parte muito important d’o suyo atractivo.

L’universo Marvel, por eixemplo, s’ha iu ixamplando dende que naixese en os 60 con bella serie y bell crossover (1) chiquet, dica las decenas de series que s’editan agora mesmo con crossovers cutianos, macroeventos y mesmo un universo alternativo clamau Ultimate, con una dinamica parellana. En os primers anyos no yera tant dificil seguir a continidat de tot l’universo. Os crossover y macroeventos yeran radius y, en tot caso, no afectaban a guaires series. Pero con o tiempo a cosa s’embolicó a-saber-lo. Hue ye practicament imposible conoixer de tot l’universo Marvel actual. Siempre que tiengas una vida normal, ye platero.

Pero ¿realment cal estar a o diya de tot lo que pasa en cada chiquet racón de l’universo Marvel ta poder disfrutar-lo? No pas. Personalment nomás merco cada mes as cinco series principals d’os X-Men. Tot un miniuniverso adintro de Marvel. Beluna ye practicament independient de tot y a resta tampoco no tienen tanta relación, ni entre ellas, ni con a resta de l’universo Marvel. A sola vez que sí que realment te podrías perder ye en os debantditos crossovers y macroeventos. Lochicament, si quiers enterar-te de por qué Cyclops se carranya con Wolverine y se montan cadagún un equipo, te cal leyer Scisma. Si quiers saber porque de bote y boleyo se pasó de que bi hese mutantes por tot a que no’n quedase que bella centena, te cal leyer Dinastía de M. Y asinas asinas. Pero as historias cutianas, te las puedes leyer tranquilament, y disfrutar-las prou, sin que te calga haber leyiu istas sagas ni as atras series. A etapa de Whedon y Cassaday en Astonishing X Men u a de Aaron y Bachalo en Wolverine & the X Men son eixemplos de historias bien buenas, divertidas, con calidat y que mantienen a conexión con a resta de l’universo Marvel, sin que calga ni estar a o diya de tot, ni haber leyiu as decadas anteriors de comics.

Os “universos complexos” (por clamar-les de bella traza), me dan a yo un alicient pa dentrar en una obra. O feito de que una autora (u autoras) construiga tot un mundo (u mundos) con bella coderencia me pareixe impresionant y creigo que enriqueixe a-saber-lo a obra, ubrindo un ciento de posibilidatz. Istos universos por un regular son ubiertos a que nuevas autoras adhiban personaches, creyen aventuras en a linia temporal principal u atras, reinterpreten etapas, etc… fendo-lo evolucionar y esdevenindo en un granizo exercicio imachinativo que muitas amamos. Star Wars prencipió como una cinta de sciencia ficción sin guaires anglucias. Por sí mesma yera una buena cinta, pero tot l’universo creyau dimpués, con decenas de comics, libros, chuegos de rol, videochuegos y cintas, me pareixe muito millor. Quedar-se nomás con a trilochía orichinal, antimás de un culturetismo gafapastil, creigo que ye perder-se voluntariament bella cosa más “trascendent” que no una simpla buena cinta.

En o caso de Canta de chelo y fuego, muitas tamién se queixan d’a cantidat de personaches y d’a complexidat d’as tramas. A yo ye precisament ixe feito lo que m’empenta cada bell tiempo a tornar a leyer bell espisodio d’a saga. Remerar aquella batalla, mirar de trobar ixa cita que diz Tyrion que puet estar que me de a pista finitiva sobre a identidat de Azor Ahai, fer alcordanza de qui yera ixe sacerdote que nombra Missandei y que me sonaba que en heban charrau antes, … Qui quiera historias simplas, curtas y autoconclusivas puede leyer Os cuentos de Dunk y Egg. Los disfrutará, sin dubda, porque son buenas historias. Pero qui los leyemos conoixendo todas as relacions con a resta de l’universo de Chelo y fuego trobamos sentiu a ixos chiquetz detalles que deixa a ixambre Martin por os libros y que tanto goyo nos fan. Iste caso de ye buen contimparar. A serie de televisión ye muito más simpla que no os libros y, precisament por ixo, muito pior en a mia opinión. Qui viyen nomás a serie de TV se pierden uns personaches muito millors costruyius y una tramas muito más coderents que, en TV, talment no funcionarían.

Diz Martin que no quiere que dengún que no siga ell escriba u contine a Canta de chelo y fuego. Se puede autoenganyar tot lo que quiera, pero internet ya ye rebutient de fanfics (2) (yo mesmo soi treballando-ne en una) y soi seguro de que quan se canse u se muera, lo que pase primero, ell u os suyos hereus, venderán os dreitos u, simplament, deixarán fer.

A complexidat ye un punto a favor, no pas en contra. Con Arale tenemos un pleito perén. A ella no le fan goyo os chuegos embolicaus como Magic y a yo os simples como o Parchís. Con o Parchís me aburro de tot. Cal nomás quatre normas basicas ta chugar y no bi ha guaires opcions estratechicas. De feito qualsiquier chuego más simple que o Risk me resulta un catenazo. Cuesta d’aprender a chugar a Magic, prou que sí. De feito nunca no se deixa d’aprender a chugar. Igual como en l’Universo Marvel, Star Wars u lo que sía, nunca no se deixa de descubrir nuevas historias. A complexidat ye maravillosa encara que calga fer más poders ta disfrutar d’a suya polideza.

Asimov, en bell inte, debió fer-le aprecio a ixa complexidat. De la trilochía orichinal de Fundación, que ya yera prou angluciosa, s’ixampló a cinco y dimpués siet libros. Pero lo chenial de tot, estió quan consiguió conectar-los con as sagas de Robots y Imperio que tamién heba escrito, creyando asinas tot un relato d’a historia futura d’a humanidat. No sé como estioron os detalles legals, pero bell anyo dimpués d’a muerte d’o escritor, atros autors creyoron una Segunda trilochía d’a Fundación. No los he leyiu. No sé si son buenos u no pas, u si se considerarán canonicos (3). Pero adhiben nuevos datos y anvistas sobre una parte d’a historia d’a Saga de Fundación, que siempre ye bien. Sisquiá atras autoras continasen escribindo historias ambientadas en ixe universo que Asimov nos deixó. Y si son una mierda, con no considerar-los canonicos, prou.

Que, de cabo ta quan, calga reinterpretar-lo tot, como s’ha feito con Star Wars Legends, as cintas de Batman u se ferá o mes venient con tot l’Universo Marvel, tampoco no me pareixe mal. Ye lochico que dimpués de tantas anyadas, l’orichen de Hulk, u as primers aventuras de Avengers u d’os 4F queden desfasadas tanto tecnolochicament como social, cultural y en muitos atros sentius. U que calga reordenar tot lo material que se publicó sobre Star Wars sin brenca coordinación. Con Star Trek se fació muito bien en o reboot (4) d’a serie, asinas que cuento que a nueva trilochía galactica tamién lo ferá bien.

Asinas que bienvenidan sigan todas ixas autoras que miran de creyar ixos nuevos universos y emplir-los de personaches intresants. A las frikis nos proporcionatz horas y horas y horas de diversión, buenos ratos y debatz bien entretenius. 

NOTAS:

1. Un crossover ye una historia compartida entre dos u más series de comics. Por eixemplo, a historia titolada “Vortice Negro”, publicada en istos zaguers meses, chunta personaches de Guardians d’a Galaxia (Guardians of the galaxy), Os nuevos hombres - X (New X-Men) y atras series en una aventura común que se publica un episodio en cadaguna d’as series.
2. Fanfics: historias feitas por fans ambientadas en l’universo de bella obra. Por un regular, no oficials.
3. O canon, en as obras frikis, se consideran os materials que recontan a historia oficial. Por eixemplo, en Star Wars, agora mesmo nomás son canonicas as seis cintas y bella serie de TV. Toda la resta de materials de comics, libros, etc… se consideran difuera d’a continidat y parte d’un universo paralelo clamau “Star Wars Legends” con a suya propia continidat.
4. Un reboot ye tornar a prencipiar una serie sin tener en cuenta tot lo material anterior u dando-le una nueva interpretación. En a nueva Star Trek, por eixemplo, un viache en o tiempo fa que cambie bella condición d’a historia que bi heba dica agora de Star Trek y prencipien nuevas historias sin que calga respetar o material feito. Atro viache en o tiempo, o de X-Men: Diyas d’o futuro pasau, probablement provoque unatro reboot d’as cintas de X-Men, en haber creyau unas condicions que facioron que no morisen Jean Grey ni Scott Summers.