Visita a Barcelona Comic 2023

A las 10:00 s'ubriban las puertas de Barcelona comic, asinas que, como nos conoixemos, cuasi una hora antes ya i yeranos, fendo ringlera, aguardando a entrar en ixe país machico que ye cualsequier feria d'ista mena, y mas una tant gran y important como la de Barcelona.Nos feba firmes ganas de tornar a ir-ie dimpués de cualques anyos sin poder fer-lo, asinas que querebanos aproveitar cada minuto que podesenos.

Un d'os protagonistas, sin duda, d'ista feria, estió Zerocalcare. L'artista italiano acaba de publicar No sleep till Shengal, unatro libro que recupera la tematica internacionalista que teneba lo suyo exito Kobane calling. Tot y que no heba leyiu cosa d'el, tot lo que me'n heban charrau y lo feito de que compartise mesa con Fermín Muguruza en lo Salón yeran sobrebuenas referencias. En ixa mesa, dos cheneracions d'activistas culturals compartioron chanadas varias sobre la militancia y los suyos viaches. De tardes, firmaba en Penguin. Una hora antes ya le asperaba una docena de personas, asinas que, con lo mío eixemplar de Kobane Calling que tantas vegadas m'heban recomendau de leyer, me i posé. Bella pachina dimpués ya m'heba enganchau de tot a la historia d'as suyas visitas a lo Kurdistán, recontadas dende la envista suya, bien cercana a la que pueda fer cualsequier activista internacionalista d'a Europa occidental. 

Antes nos heba vagau de fer la gran cursa por la mayoría de paradas d'o salón. Entre las propuestas que mas me trucoron estió la de Lapislatzuli, que nunca no n'heba sentiu parlar y que con la persona que atendeba lo stand pillé firme capazo. Entre atros libros, vendeban una colección de diez clasicos d'a literatura chaponesa traducius dreitament t'o catalán, que me los hese mercaus totz, pero como los recursos son limitaus, me decidié por Sota un bosc de cirereres plenament florit.

En la cacera de firmas, pasemos tamién por las mans de María Hesse, que me fació un dibuixo en lo mío eixemplar d'a biografía de David Bowie, escrita por Fran Ruiz. Una manera bien bonica d'acercar-se a la vida d'iste chenio disfrutando de l'arte de María. Tanimientres, Arale s'encargaba de que David López fese lo mesmo con lo suyo segundo volumen de Backhand Ironhead, una secuela que levabanos a-saber-lo tiempo aguardando pa conoixer las nuevas aventuras d'Alexia y Amy.

La curiosidat nos levaba de barra a barra d'a feria. En las paradas prebaban d'agarrapizar-nos con la suya retolica. Y la historia de Jiujitsufragistas, las amazonas de Londres, no nos deixó eslampar. Un relato real sobre sufrachistas que aprendioron l'arte marcial chaponés d'o Jiu jitsu pa desfender-se d'a policía, publicau por Garbuix Books. 

En lo listau de "pendients", una parrafiquera de futuras crompas. Entre atras las d'os dos stands aragoneses. En Malavida, El contador de personas, una nueva historia de Roberto Malo, l'autor de tebeos tant chenials como Veo por ti, con Chema Cebolla u Supermala, con XCAR, que en ista ocasión conta con Javi Blanco como ilustrador. D'atra man, en GP Ediciones, me quedó por mercar l'adaptación a comic de Camí de sirga, que ilustrada por Roberto Morote, leva a lo comic la graniza novela de Jesús Moncada y que s'ha editau en catalán, aragonés y castellano.

Una d'as zonas favoritas d'iste salón y de cualsequier ye la d'o fanzinamen. Talment ye mala memoria pero me pienso que en ista edición s'heba cudiau un poquet mas lo espacio adedicau a ixas propuestas que son empecipiando y que tienen tantismo a ufrir-nos. Sisquiá contine asinas en lo futuro y s'ixample mesmo mas.

En la parte organizativa, chuga bien a favor que se deixe entrar birolla y bebida de difuera. Bi heba, como en anyos anteriors, food trucks - u cambirollas, como proposo belún de decir-les en aragonés - pero pa qui no queremos deixar-nos-ie meyo chornal y haber de fer unatra eterna ringlera, s'agradeixe que no nos metan mas entrepuces. 

D'exposicions nos vagó de veyer-ne tres. La primer, la de magas de l'humor, un repaso por muitas d'as mas sinyaladas dibuixants d'as zaguers decadas. Muitas que ya conoixebanos y beluna que no pas, pero que apuntemos pa lo futuro. Un reconoiximiento, tamién, a las que habe anyos y en un contexto mas dificil facioron tranya. Siguiemos con la de David López, dibuixant zaragozano que l'ha dau a totz los palos: superherois de Marvel, DC y atras casas, de Star Wars, los suyos propios comics... y que tot lo fa bien. La zaguer, la mas trista: l'homenache a Carlos Pacheco, que feneixió fa poco. Cuantos autors amostroron lo suyo respeto por iste autor con los suyos dibuixos que se vendeban pa replegar diners contra la ELA.

Una chornada fantastica entre comics, libros, cosplayers -menos que en edicions anteriors, no sé porqué - y muitas aficionadas a iste mundo tant diverso y divertiu. Barcelona como ciudat y lo salón como evento, siempre me deixan con ganas de mas, de tornar-ie y descubrir tot lo que no m'ha vagau de fer. Asinas que i tornaremos.

Gabinas, recosiro, patrimonio y literatura

Lo recosiro ye de tot antirrevolucionario. Ye un peso que nos n’hemos de librar a escape pa seguir construyindo lo mundo que queremos. Pero si funciona tant bien ye porque ye a saber qué enchugardiu. Hue toca un d’ixos posts a on que tiro una mica d’ixe recurso que en zagueras emplego tant a sobén.

La noticia me plega a traviés d’a radio. En Barcelona sacan la zaguer gabina de telefonos publica clasica. D’ixas que te i podebas ficar de tot, isolando-te un poquet de l’estrapalucio d’a ciudat y, con monedas en primeras, y con tarchetas en los suyos zaguers días, clamar a qui fuese. I hai vecins que quieren que se quede, como una remeranza d’ixos tiempos que siempre son millors que no los d’agora, basicament porque yeranos mas chovens. N’i hai d’atros, bien contentos, porque la gabina tornará convertida en un punto d’intercambio de libros. Ixe nuevo uso, diz que se decidió en una votación y cosa no me puet pareixer millor. ¡Tant de buen que la iniciativa s’ixemenase por istas tierras y d’ixos puntos se’n fese buen puyal!

Diz una corrient d’o conservacionismo que a lo patrimonio cal dar-le uso pa que sobreviva. Que lo que no tien una utilidat, u en ye nomás estetica, gosa rematar espaldau, vulcau u esmarchinau. Las ilesias que no tienen culto son las primeras en cayer. Los castiellos que quedoron a escape en la retaguardia no son que enrona. Y asinas-asinas. Pa conservar las gabinas telefonicas, si ye que ixo ye lo que queremos por recosiro u por amor por lo patrimonio industrial y urbano, me pareixe de pistón mirar de trobar-les ixe nuevo uso. Si no ye asinas, me pienso que acabarían por dispareixer. Que, en lo mío caso, no las trobaría guaire a faltar, pero entiendo que bi haiga chent que les tienga aprecio.

Lo entiendo porque soi tamién d’enamorar-me de zarrios y cataticos d’antes mas. La exposición d’historia informatica que i hai en l’edificio Ada Byron d’o Campus Río Ebro, por eixemplo, me pareixe una choya que fa valurar un pasau recient y que, en poco espacio, describe muit bien la evolución tecnolochica d’as zagueras decadas.

Isto d'o recosiro, pa lo que vale ye pa fer-nos viachar t'o pasau nuestro con ixa napa de romanticismo que lo mete tot de color mas polidas que no'n yeran de veras. Concretament, en l’afer d’as cabinas telefonicas, tiengo dos recuerdos bien presents. Lo primer d’ells, de quan yeranos ixos chiquetz delinqüents que fabricaba l’odio a los mosens de Corazonistas. Aprendié, de man d’un companyer d’escuela, a fer entrascar la porteta por a on que se replegaba lo cambio d’as gabinas telefonicas. Con una moneda de duro, creigo remerar, se bozaba lo mecanismo de quantas gabinas. Feba-nos un tour metendo las nuestras trampas de cazataires de monedas por tot lo barrio. Tornabanos a pasar-ie bella hora dimpués con un atornillador y replegabanos lo botín. Por un regular no daba que pa bella partideta en los recreativos, pero nos sentibanos como chenios d’o crimen y compensaba una miqueta los diners que te furtaban en los cutianos atracos que te feban los mayors.

L’atra, mas amable, ye vinclada a Cambrils, lo lugar a on que estivabanos. Pai teneba mas vacacions que mai, asinas que bell anyo bi ibanos antes que no ella. Como en casa no tenebanos telefono, de tardes siempre baixabanos ta una gabina que bi heba cerqueta y le recontabanos lo que hebanos feito durant lo día. Basicament, estar-nos en la placha, chugar a futbol y ir a pescar, que ye tot lo que i feba yo de crío. Tiengo muit mala memoria y pocas remeranzas de quan yera chiquet. Manimenos, no sé bien por qué, remero perfectament ixas gritadas que le febanos dende ixa gabina que, ye claro, fa anyos que no existe.

Las gabinas no fan falta ya. Ye la pura definición de tecnolochía obsoleta y no las trobo mica a faltar. Pero la iniciativa d’ixe barrio de Barcelona me pareixe de pistón como tot lo que faiga d’as ciudatz un puesto mas amable y culto a on que vivir.

En ascuitando... Renaixem, de Xavi Sarrià

S'ha encertau que lo disco de Xavi Sarrià, cantaire d'Obrint Pas, va editar-se lo mes de setiembre. Malas que salió, prou que va baixar-me-lo y ficar-me-lo en lo MP3 pa escuitar-me-lo terne que terne, como foi con todas ixas mosicas que entrarían en la banda sonora d'a mia vida. Pero antimás, setiembre de 2017 ha esdeveniu un mes muit intenso politicament y personal. Lo suyo disco L'esperança entre les dents, lo va mercar un 30 de setiembre, la vispra d'o refererendum, en la botiga Partisano de Barcelona. Lo mesmo 1 d'octubre, en la gara d'o tren que me levaba de Barcelona ta Zaragoza, entre que ordenaba los mios pensamientos y sentimientos por tot lo que yera pasando arredol de yo, Xavi Sarrià sonaba en lo MP3. 

En totz istos diyas, lo disco s'ha iu fendo parte d'a mia vida, con ixas letras tant plenas de optimismo y luita que ya escribiba en Obrint Pas. Ista, la traducié ta lo especial de Tierra de barrenaus que facié sobre lo Proceso independentista de Catalunya, y aquí la tenetz. 

Renaixemos:
Renaixemos de la luz de l’albada

y lo sol que nos crema cada diya

l’instinto d’a fieras feroches

lo vuelo d’os muixons

las furas olas.

Renaixemos de creyer en nusatros

d’as radices que sostienen los arbols

La leyenda d’una resistencia que nunca no vencerán

Renaixemos de l’antiga sabiduría

d’as mans que treballan la siembra

Renaixemos d’a tuya calida riseta

l’audacia de sentir-nos libres

Fillos de l’augua, la tierra y lo fuego

renaixemos con tu

y con tu venceremos

Renaixemos d’as tardadas royas

en las carreras d’a nuestra nineza

L’alegría humilde en las caras

la emoción cantada con la voz trencada

Renaixemos d’as chestas d’o pueblo

celebradas con ploros y abrazadas

La polideza de vivir la vida

sin reblar

Renaixemos de todas las feridas

escritas en las piels mestizas

Renaixemos d’a perseverancia

de luitar con la viella asperanza

Fillos de l’augua, la tierra y lo fuego

renaixemos con tu

y con tu venceremos

Renaixemos d’o ciel cubierto d’estrelas

la luna grisa entre las brancas

Lo viento que se leva los miedos

la clamada salvache, la rumor d’o bosque

Renaixemos d’os nuestros orichens

Las parolas que mantenemos vivas

Los versos que recuentan la historia

d’un antigo legau

Renaixemos d’as guerras que se libran

en las vals foscas d’as nuestras vidas

Renaixemos de todas las redotas

Si hemos cayiu, nos devantaremos mil vegadas

Fillos de l’augua, la tierra y lo fuego

renaixemos con tu

y con tu venceremos

De viache por Mataró y Barcelona

Como cada vegada que se nos chuntan tres diyas de fiesta a l’arreu, iste puent de Sant Valer yera ideyal ta fer bell viache chiquet. Quan no tiengo un destino claro, lo que foi ye mirar a on toca beluna d’as collas que no gosan de pasar por Aragón y asinas, de vez que viacho, me veigo un buen concierto. En ista ocasión, y con a enchaquia d’o cabo d’anyo d’Arale, decidiemos de marchar ta Mataró, an que se celebraba o 16eno cabo d’anyo d’a discoteca clap con dos conciertos de Els Catarres y Zoo con EAM. Como de cutio, o tiempo nos cundió ta fer muitas más cosas.

O primer diya marchemos dreitos ta Barcelona. Ya dende feba tiempo quereba visitar o conoixiu como “Triangulo friki” y ista yera una oportunidat sobre buena. Ye una zona d’a ciudat an que se chunta un amiro de botigas frikis. Chuegos de cartas, de mesa, literatura de fantasía y sci-fi, comics, manga, …. tot en muit poco espacio. A grandaria de Norma u de Gigamesh nos deixó sin sangre en a pocha. Y con ixa impresión perén de que te caldría muitismo más tiempo y diners ta poder leyer y disfrutar tot lo que quiers. Bien intresant ye o fundo de novelas de sciencia ficción que tienen en Gigamesh. Belunas d’ellas de mal trobar. Encara que bella botiga ya ha zarrau dende que s’escribió l’articlo que nos feba de guida, a mayoría continan ubiertas y con muit buena salut. Con tot y con ixo, no faciemos guaire chirgo dica que, cosas que pasan, entremos en una botiga d’escambio an que me trobé con toda la colección de Xtreme X-Men por nomás 30 euros en buen estau. Una choyeta que soi leyendo con firme anglucia. A tarde la rematemos en Play, un bar friki an que tienen un almario pleno de chuegos frikis que t’ampran ta que chugues. Tamién i tienen carta de bieras y o puesto ye bien pincho, asinas que ye más que recomendable ta rematar-ie a tuya tarde de compras.

O sabado tornemos ta Barcelona a viyer El Born. Baixo l’edificio d’un mercau tipico de l’arquitectura de fierro, bi ha tot un chacimiento d’a Barcelona d’o sieglo XVIII. Ixe espacio, antimás d’amostrar o trazau d’a ciudat en ixas envueltas, en un estau de conservación bien bueno, s’ha aprofitau ta acullir exposicions. En viyemos dos. La una, sobre a Catalunya d’alavez, a traviés d’os vaixiellos, chuegos, ferramientas, etc.. que troboron en a enrona que bi heba. L’atra, titolada, "Fins a aconseguir-ho! El setge de 1714", charraba d’a guerra de Sucesión y, sobre tot, d’o sitio de Barcelona y d’a batalla de l’Once de setiembre. Una exposición que, como tantas atras vegadas, me fació tener ixa sana envidia d’o pueblo catalán. ¡Quánto se troba a faltar una mica más d’información sobre a Guerra de Sucesión en Aragón! Ni una exposición, quatre libros, garra celebración fueras d’una scenificación d’a batalla de Zaragoza, … Ya en as zaguers visitas que hemos feito a lo país vecín, hemos iu viyendo partes d’a ruta 1714, una iniciativa bien intresant que nunca no viyeremos en Aragón encara que ixa parte d’a nuestra historia ye igual d’intresant.

A parte no borinera d’o viache, la completemos con una visita t’o castiello de Burriac. Ye en o municipio de Cabrera, tocando con Mataró. Una puyadeta de tasament meya hora, nos leva ta un castiello que se devantó en a edat meya, pero que, en ixe puesto se i ha trobau restos de muito antes. O camín ye entre un boscache poliu y agradable que fa de buen fer a costera. O castiello ye muit bien conservau y l’anvista dende alto t’explica por qué se fació en ixe puesto. Dende astí se puede columbrar toda la redolada y buen troz de mar. Cuenta tamién con panels explicativos sobre a historia d’o castiello y d’a comarca de Maresme ta poder entender lo que se ye viyendo. Lo que ye lochico, pero no pas tant freqüent como habría d’estar-ne en os puestos turisticos.

A parte borinera, y o principal motivo ta ir ta una ciudat tant poco turistica como Mataró yeran os debantditos conciertos. A discoteca Clap ye un puesto pincho de tot. Por una escalereta de fierro que bi ha dimpués d’o guardaropa y o -ya quasi obligatorio - photocall, se baixa ta una sala ampla y diafana con buena capacidat. Os pres son caros, pero no masiau. 3,50 o vaso de 1/2 litro de biera ta que tos ne faigatz una ideya. Dimpués d’os conciertos, no sé si s’encertó que pillemos buenos DJs u ye a mosica cutiana, pero sisquiá tenesenos un puesto asinas en Zaragoza. Tot temazos, y sin deixar de bailar. Nomas a zaguer hora, quan igual nos teneba ueito que ueitanta, prencipió o ferrete más electronico. Dica alavez La Gossa Sorda, Obrint Pas, La Troba Kung Fu, Aspencat, Zoo, …

En Els Catarres comprobemos o tirón que tienen entre o publico más choven. Arale y yo, que ya deixemos os trenta dezaga en fa muito, puyabanos a media d’edat prou. As zagaletas se sabeban de corazón todas as letras d’una colla que charra más de sentimientos y vivencias que de reivindicación politica. Pero con tot y con ixo, una d’as pocas cantas con mensache politico, Seguirem lluitant, remató con un sonoro In-Inde-Independencia en as bocas de tot lo publico. Dende as mas chiquetas dica las cambreras, pasando por as foranas que nos i solidarizabanos. O concierto, d’os millors que en he viviu. Con tiempo ta fer o suyo repertorio sin que dimpués venise atra colla, chugando en casa y con un publico entregau, Els Catarres contrimostró lo dominio que tienen d’o scenario. O buen rollo transmitiu no nomás veniba por as letras sino tamién por a complicidat entre os miembros d’a colla, y por o creixient protagonismo, mosical y personal, d’a sección de vientos.

L’atro concierto prencipió con uns esconoixius ta nusatros EAM: Exercit d’Alliberament Musical. Uns rappers que fan servir catalán y castellano en as suyas cantas, que recitan tres hombres y una muller que, con un estilo bien diferent, marca una mica o punto orichinal d’a colla. O soniu suyo tien bell punto “Rage against the machine”. Sin estar una colla que conoixesenos nian una canta, o concierto nos fació blincar y no nos aburrió ni un minuto, asinas que aprebau con nota. Una colla a seguir, sin dubda.

Pero a lo que hebanos iu yera a viyer a Zoo. A colla de l’anyo. Con nomás un disco editau ya tienen ta un show bien digno. Gracias tamién a las versions libres que han feito d’Esbarzes de La Gossa Sorda y Camins, de Obrint Pas, y a las escenes quotidianes que fan en La Tuerka y que ya suenan tamién en os conciertos. Sin un segundo t’alentar, Zoo lo tocó tot. Y nusatras lo diemos tot tamién. O publico, de tot diferent a qui yeranos o diya d’antes en Els Catarres, y con as entradas acotoladas dende feba una semana, blinquemos, bailemos y chilemos todas as propuestas d’os valencians. Panxo y os suyos lo petoron bien petau, con uns pogos sobrebuenos y una prebatina, fracasada pero muit bien intencionada, de Wall of death. Deseyando somos ya de sentir o nuevo disco y, prou que sí, d’una chira por Aragón.

Un gran cabo de semana de mosica, frikismo y cultura, en una tierra siempre acullidera como ye Catalunya, y que aspero tornar a visitar antes con antes.

Por Barcelona. Visita dominguera

Barcelona ye una ciudat que me fa tener sentimientos concaraus. D'una man ye una ciudat graniza, d'ixas que se me minchan y me superan. Encara que toda la mia vida haiga pasau en Zaragoza, a verdat ye que no salgo guaire d'o vico y levo una vida muit "de lugar" en muitas cosas. Asinas que as ciudatz grans, y Barcelona en ye, m'anguian prou. D'atra man, tiengo sobrebuenas alcordanzas de cada vegada que i soi estau. Barcelona, tot y estando ixa gran ciudat, ye bien acullidera. I tiengo tamién grandismos amigos, como Purnas que nos o acullió y he viviu grans experiencias. En estar tant gran, y o feito de que por un regular i voi con o tiempo radiu, nunca no m'heba estau un diya simplament fendo una gambada por a ciudat. Y ixo ye lo que faciemos

Una d'as cosas que siempre me truca lo ficacio de Barcelona ye a poca presencia d'o catalán, contimparau con a resta de Catalunya. En totz os puestos que he estau de Catalunya (y practicament de totz los Països) quasi siempre m'han charrau y he charrau en catalán, en a mida d'as mias posibilidatz. En Barcelona, manimenos, muitisma chent se m'endreza en castellano y mesmo, bella vez quan les charro en catalán me responden en castellano. Ta yo, que una d'as cosas que quereba yera practicar a luenga, siempre me fa burro falso. Con tot y con ixo, tenié arrienda oportunidatz ta parlar y pareixe que voi aprendendo. 

A primer visita que faciemos estió t'o Mercau de Sant Antoni, bella mena de "rastro" pero bien. Puestos con libros, comics, pelis y bella cosa de coleccionismo (Magic, p.e.) a on que se pueden trobar cosas bien pinchas a pres muito baixos. Bi trobemos rebaixaus muitos comics que, si no por os diners que nos hebanos deixau o diya d'antes, nos n'hesenos levau un buen amiro d'ells. Asinas que si tenetz tiempo y sotz por astí, no deixetz de pasar-tos-ie que regular que trobaretz bella choyeta.

Dimpués nos endrecemos ent'a mar, que ya nos aganaba. L'ambient d'os paseus maritimos ye una cosa que siempre me fa goyo de viyer en os lugars con mar, porque gosan de tener firme alegría y siempre fa goyo mirar-se enta ixos horizonts que tantos suenios nos proposan. Diz Mai que ixo ye porque a las miopes se nos descansa la vista en mirar-nos enta l'infinito. Ixo lo habrá de decir bell neurologo u quemisió, pero ye verdat que en casa nuestra siempre nos ha feito goyo. Nos trobemos con una asociación de baile country y nos i estiemos un ratet mirando-nos-los y fendo a riseta asinas que facié un video ta compartir lo que en 50 anyos s'estudiará dende l'anvista antropolochica.

A visita continó por a Ilesia de Santa María d'a mar. Una pieza repolida d'o gotico que me sorprendió a-saber-lo, y que no sé si ye guaire conoixida. A o canto yera o "Fossar de les moreres", un d'os puestos con más significau ta l'independentismo catalán. A plaza que bi ha agora ye costruyida sobre una fuesa común a on que s'apedecoron muitos d'os muertos d'a Guerra de Sucesión a on que os países d'a Corona d'Aragón perdiemos a nuestra independencia definitivament (por agora). Una placa y un monumento remeran a poesía, escrita a finals d'o XIX que diz que "Al fossar de les moreres no s'hi enterra cap traïdor; fins perdent nostres banderes serà l'urna de l'honor." (En a fuesa d'as moreras no se i apedeca garra traidor; mesmo perdendo os nuestros sinyals será a urna d'a honor"). Seguntes me dicioron dimpués, sí que se debió apedecar chent d'os dos bandos. Rai si ye asinas, ye buena cosa que en bell país se remere a Guerra d'a Sucesión y as conseqüencias que tenió. 

Precisament en a plaza d'o "Fossar" bi heba una visita menada en anglés ta uns orientals. Me quedé un ratet ta viyer qué explicaba y porque m'encantan as visitas menadas. Plegué quan recontaba a perda d'a independencia y leis catalanas y pasó a explicar tot lo que heba pasau en zagueras con as reivindicacions independentistas, charrando d'o 9N y de que l'estau espanyol no heba reconoixiu ni a validez ni o resultau. Remató decindo-les que yera un tema firme embolicau y que si preguntaban a cadaguna d'as cinquanta personas que en ixe inte yeranos en a plaza, todas daríanos una versión diferent. Igualico que as de Gozarte, eh?

Ya quasi sin tiempo ta cosa, faciemos una gambada por ixa parte de Barcelona y nos tornemos ta casa. Por a ciudat as bicis iban por as aceras sin matar garra ciego. Tramvías, carrils bici, autos, taxis y atutobuses compartiban calzada sin que La Vanguardia los metese en portalada terne que terne. Trobé dos escusau publicos ubiertos ta todas, de valdes y escocaus. Barcelona ye una ciudat masiau gran ta yo y que m'angunia de cabo ta quan, pero tien cosas maravillosas y aspero tornar-ie a antes con antes ta decubrir-ne más y que Purnas nos amuestre atros puestos menos turisticos pero igual (u más) d'intresants.

Por Barcelona. En o Saló del comic

A pocas de prencipiar a leyer comics de superherois, de bien chiquet, ya me prencipié a fer alufras de bell diya poder visitar o Saló del Comic de Barcelona. Yera en ixas envueltas, y cuento que contina estando-ne, l'evento más important d'o mundo d'o comic en tot l'estau. Por muitos anyos, una cosa u atra nos privaba de poder ie-ie. Manimenos l'anyo pasau a la fin podiemos visitar-lo y iste anyo hemos puesto tornar-ie. 

Igual como l'anyo pasau nos i fotiemos tot lo diya. Dende as 10 d'o maitin, que ubriban puertas, dica las 21 quan nos feban fuera. Nomás en saliemos bella meya hora pa chentar en un parque que bi heba a o canto. Con tot y con ixo, en todas ixas horas nos podiemos viyer a monico quasi tot lo que querebanos. Bella coseta nos quedemos sin viyer-la y belatra habiemos de visitar-la a tot meter. Ixo que estianyo no faciemos guaires ringleras t'as sinyas!

O Saló (AKA Ficomic) ye un evento imprescindible ta qualsiquier que le faiga goyo o comic y as frikadas en cheneral. Arrienda metros quadraus adedicaus a ixas pasions que tanto goyo nos fan. Te mires t'a on que te mires trobas bell tebeo intresant, bella chambreta pincha, bell articlo de coleccionista que te levarías ta casa u bella cosplayera que fotografiar.

En ista edición bi heba qualques tematicas que se i centraba Ficomic. Una d'ellas yera a sciencia, muito más present que no l'anyo pasau. I teneba puesto a Universidat Politecnica de Catalunya, u l'Achencia de l'Espacio Europea, por eixemplo. Tamién bi heba una exposición a on que se feba una lectura scientifica de bells topicos d'o comic. Se i charraba, por eixemplo, d'os alazetz scienficios d'os apocalipsis por radiactividat, d'a intelichencia robotica u d'as limitacions teoricas a los superpoders d'os herois, fendo obligada referencia a o libro La Fisica de los superheroes de James Kakalios. Tamién bi heba unatro puesto adedicau a experimentos scientificos facils, endrezau más que más t'as chiquetas, y un puesto de Zero2infinity. Iste ye un prochecto ta poder portiar a turistas t'a estratosfera, sin periglos ni emisions contaminants. M'estié firme rato charrando con un d'os que atendeban qui m'explicó como funcionaba y me quedé sin sangre en a pocha. O prochecto ye superintresant y a ideya brillant. Tos recomiendo de viyer a pachina suya y os retes socials, que i penchan videos y fotos bien pinchas.

Chuego de tronos yera atro d'os puntos fuertes d'iste Saló, encara que no pas tanto como quereba y creyeba. M'estié un ratet en a charrada de Tania Sánchez sobre un libro que editoron charrando d'os paralelismos entre Chuego de tronos y a politica espanyola. Encara que me pareixe intresant como traza de fer plegar en a politica a chent que, a priori, no i sería guaire intresada, os analisis yeran una mica forzaus, simples u inocents. Con tot y con ixo, disfruté d'o debat que tenioron entre Tania y o suyo presentador, pues siempre bi ha ganas de charrar y ascuitar reflexions sobre tant magna obra. Bell diya talment faiga yo tamién bella reflexions sobre ixos forzaus paralelismos, ya que me dioron ta pensar-ie.

Charrando de chuego de tronos, no podeba faltar-ie o trono de fierro ta fer-se-ie a tipica foto posau. Antimás teneban achustaus a quatre figurants que se i meteban a daria pa fer-se a foto. I yeran Petyr Baelish, Melissandre y Ygritte, pero qui más goyo me fació estió qui iba vistiu de Robert Baratheon de choven, concretament con l'armadura y ropache que portiaba en a baralla d'o Trident, quan mató a Rhaegar Targaryen. 

Me quedé tamién enarcau en viyer os cuadros de Corominas, l'ilustrador que fa as portaladas d'as edicions espanyolas de Canta de chelo y fuego. No me feban guaire goyo, pero a verdat ye que en a grandaria orichinal y sobre lienzo ganan prou. A la fin nos anuncioron, por cierto, que The World of ice and fire en castellano, lo podremos mercar o venient 8 de mayo. Ya caleba!

Encara que no soi guaire fan fatale ta ixo d'as sinyas, siempre fa goyo que bella autora d'as que admiras te faiga un monyaquet. Ye antimás una enchaquia perfecta ta pillar-te un comic sin remordimientos por deixar-te o fascal de diners que caye en cada Salón d'o comic. Asinas, consiguié que Fonollosa me sinyase un Ultragato, comprebando en a ringlera, una vegada más, que as más frikis d'entre as frikis, somos as que tenemos gato. Asinas m'enteré tamién de que antes de publicar "Toñín" le'n pasó a lo suyo albeitar por si meteba bella error. Muito bien por a suya parte! 

O stand d'os Malavida ye visita obligada. Como no heba puesto ir t'a presentación d'as zaguers novedatz que facioron en A Flama, aprofeité ta mercar-las astí. Veo por tí de Chema Cebolla y Roberto Malo y Barra libre de Chefo. Antimás, nos levemos os zaguers fanzines, que siempre te'n esmelicas. Un sobre a lei Wert, atro sobre O segundo sexo de Simone de Bouvoir y unatra entrega de Gervasio mantel, de su chorra amigo fiel. Prou que sí, nos facioron un debuixet y nos ridiemos a-saber-lo  con ells. Tamién bi habió presencia aragonesa en a entrega de premios a on que o Thermozero, revista que chusto deixó de publicar-se fa poco, ganó un muito mereixiu premio a lo millor fanzine.

Nos sinyoron tamién Pedro Vera, a suya replega de RancioFacts, os autors de NoLands Comics, u Jan, ta qui Arale se tornó a foter dos horas de ringlera, con o suyo SuperLópez baixo lo brazo. A zaguer compra la faciemos d'un par de posters d'Edicions Babylon, una colla d'artistazas que tienen obras realment impresionants, y que antimás son os creyadors de Mimitos.

D'os vistius, disbraces, cosplays, u como les queratz decir, poco que charrar. Ye una d'as cosas que más ambienta lo Saló. En alparcear cinco minutos por a web u os retz socials trobaretz arrienda fotos y abaixo tos pencho un video de l'Asociación Catalana de Star Wars fendo una gambadeta por o Saló. Ixa chent son muito grans! Me'n fería de goyo que bi hese qualcosa parellana en Aragón! Con atra anvista de tot diferent, Melgares de Malavida perpetró o video que dimpués penchoron y que millor que charrar-ne ye viyer-lo.

Rematemos escruixinaus y encara nos faltó d'haber iu ta bella charrada más y de mirar-nos a monico y con ficacio beluna d'as exposicions, pero yera imposible de fer más en un diya. Agora tenemos un amiro de comics ta leyer, una patacada de fotos ta amostrar y atra colección de buenas alcordanzas que alzar. 

L'aragonés ye bien vivo (abril 2013)

Penica que fa, pero cal prencipiar una atra vegada “L’aragonés ye bien vivo” con noticias de lingüicidas. Bien se vale que en l’atro cabo continamos as que luitamos por l’aragonés sin minar a dengún y prebando de pensar en a luenga y no pas en os concietos y delerias personals que tiengamos. Remeratz que L'aragonés ye bien vivo ye una sección d'o programa La Enredadera de Radio Topo y que podetz ascuitar-lo en iste vinclo.

Subvencion ta “l’aragonés oriental”Arredol daba la noticia d’a concesión d’una subvención ta un libro de l’asociación FACAOista Lo timó (no feré o chiste facil...). O libro, titulau Antolochía Lliteraria en Aragonés Oriental II” ye editau por ista asociación que esfiende que lo que charran en Altorricón (Aragón) ye una luenga diferent a lo que se charra en Almacelles (Catalunya) nomás porque en o meyo bi ha una muga administrativa (sisquiá estatal). A lo catalán charrau astí le claman aragonés oriental en contra de qualsiquier criterio scientifico y filolochico. En realidat no ye que una cortina de fumo ta lo pior espanyolismo que s’alimenta y muito d’a catalanofobia que bi ha tan estendillada en iste país.

O gubierno fa asinas más esclatero encara o suyo refirme ta ista mena d’asociacions y ta ixe discurso espanyolista, antiscientifico y catalanofobo que ye o que a inspirau a suya quiesta lei de no luengas. Cal decir, ta estar chustos, que l’anterior gubierno ya subvencionó a primer parti d’o libro, asinas que Marcelino y cía tampoco no son libres de culpa. En ixa mesma subvención, ya prou retallada bi heba atra mena de prochectos, como os de Rolde d’Estudios Aragoneses que sí se levoron subvencion, u muitas atras asociacions en esfensa d’a luenga que se’n quedoron difuera.

Como siempre, recomiendo o blog Lo cacao de la FACAO ta qui no conoixca guaire qui ye ista chentucia.

"L’afer Ferrando"
En Arredol tamién veniba a reacción t’as parolas de Ferrando. Ta qui no lo sepa, Maria Jose Ferrando ye qui coordina la ponencia d’a lei de no luengas. Ye decir ye a persona encargada de coordinar o debat y as esmiendas en un foro a on que son representants d’os cinco partius politicos con representación en as Cortz. En presentar as esmiendas a oposición, a diputada d’o PP, fació unas declaracions decindo que ixas esmiendas plenarían de “pinganillos” Aragón y que a lei de luengas que quereba PSOE-CHA-IU costaría decenas de millons d’euros. No alportó garra dato ni estudio de como heba plegau en ixas cifras, ni en la d’os 1500 traductors que caldría (quasi dos por cada municipio aragonés).

Dende a oposiciónas criticas no tardoron guaire. Totz os partius demandoron sincusas y CHA, IU y Puyalón a dimisión d’a diputada como coordinadera d’a ponencia. Prou que ista no dimitió y fa poco PSOE, CHA y IU deixoron a ponencia. Isto no sirve que ta conservar a dignidat, que ya ye prou, pero a lei de no luengas continará o suyo curso. De feito, en eixemplos como lo d’os premios literarios ya se vei como han prencipiau a aplicar-lo.

Diya de l’argüello diaple
O pasau 6 d'abril se fació o diya de l’argüello diaple, una chornada ta conoixer y reconoixer a faina d’ista colla de diaples que han levau a polvora, a mosica y l’espectaclo por tot Aragón y dillá d’as nuestras mugas. Vinte anyadas son fendo en 2013. Mientres tot lo diya facioron chuegos tradicionals en a ribera de l’Ebro, charradas en o local social Treziclo, recontando a suya historia y os suyos prochectos, entre os que bi ye a producción d’un video sobre istas 20 anyadas.

Chornadas arredol de l’aragonés
En a Casa Aragonesa de Barcelona bi ha prou movimiento en as zaguers anyadas. No ye raro que totz os anyos bi haiga dos, tres u quatre chornadetas con mosica, presentacions. En ista ocasión, en as chornadas "Luenga biba" (sic), organizada por a Colla de charradors “O Corrinche”, o Rolde Aragonés de Barcelona y Can Basté – TASC se fació se tractaba d’una lectura de poemas, a prochección de Cosetas d’adentro (curtometrache en aragonés ribagorzano) y o concierto de Prau y Gaire, con una sesión de DJ Valle Nato. Grandisma programación ta una borina en qualsiquier puesto y cuento que t’os aragoneses que i viven, tot un luxo. Por lo que me han contau, antimás, bi habió un ambient sobrebueno y muita muita borina.

Chornadas en Graus

En Graus y redolada tamién ye a luenga prou viva y entre o 18 y o 20 d’abril celebran as Chornadas d’as luengas d’o Pirineu, antismas Chornadas d’as luengas d’a Ribagorza. En ista edición bi habrá un taller de lectura, se presentará o numer 4-5 de De Lingua Aragonensi y o Metodo de Gaita de boto, se ferá a entrega de premios d’o XII concurso Condau de Ribagorza y rematarán con un concierto de man de Carbonell y Eduardo Paz, aprofeitando-se, como siempre, d’a figura de Labordeta, en lo que entienden como un homenache. 

Que se faigan istas chornadas dignificando a luenga en os lugars a on que se charra vale un valer. Asperemos que continen muitas anyadas y que en totz os lugars a on que no se fan, s’enceten iniciativas parellanas.

Concurso de cuentetz y falordias ta ninos

L’asociación O Trango, que fa cursos d’aragonés en Zaragoza, organiza por primer anyada, un concurso prou orichinal, en estar, que yo sepa, o primer endrezau ta ninas y ninos, d’entre 6 y 12 anyadas. Cal ninviar un texto chiquet, de nomas 2 a 6 pachinas, en aragonés. Os premios son dentradas ta Parques d’Atraccions que a mainada se gronxiará a-saber-lo. Me pareix una traza sobrebuena d’acostumbrar a las zagalas dende chicotas a escribir y a fer-lo en aragonés.

A canta en aragonés

O programa lo querié rematar con Ixo Rai. Ya han pasau por “L’aragonés ye bien vivo” arrienda collas que han feito bella canta en aragonés y encara no heba charrau d’uns d’os pioners. No cal presentar-los, cuento que tot lo mundo los conoix, pero si que cal remerar que estioron d’os primers en reivindicar as particularidatz d’o castellano d’Aragón y con “A fuesa universal” nos facioron conoixer l’aragonés a muitismas personas. Encara beluna más en aragonés y una atra “Molt de soroll”, en catalán. Mesmo les vagó de traducir María ta l’asturiano, que ye como la sintié yo en muitos d’os suyos conciertos, amostrando ixa sensibilidat por a cultura y as luengas minorizatas que teneban. Entalto Ixo Rai! Como tos trobamos a faltar.....

Remero que ista anyada o reto de L'aragonés ye bien vivo ye que bella colla faiga una canta en aragonés. Qualsiquier colla, de qualsiquier puesto, en qualsiquier estilo. Si tos cal aduya, contatz con la mía ta traducir u adaptar lo que calga.

Concierto, versión y peli

Tres videos traigo en momentos de fer o cinqueno cabo d'anyo d'iste cabo a on que tos cuento as mias movidetas.

O primer, d'un concierto. O que fació iste cabo de semana a mitica colla The Sisters of Mercy en Barcelona. Quan creyeba que nunca no conseguiría viyerlos a chira d' suyo treinteno cabo d'anyo les trayó dica Catalunya y be-te-me que mesmo me pilló con diners ta pagar-lo y sin haber de treballar o cabo de semana. O concierto estió increyible. Tanyoron (quasi) todas as miticas. Brutals First & Last & always, This Corrosion, Dominion, Alice... Y d'espectaclo en saber fer. A boira de "chelo ixuto" que a escape los amagó daba un look muito "Sisters". A sala, la Razzmatazz, a-saber-lo de pincha. Antis d'o concierto teneban un par de pantallas chigants a on que meteban imachens de cintas de manga, sciencia ficción clasica u beluna de Kubrick. Dimpués, as Lizards, una colla d'astí, facioron un conciertet bien pincho. Colla muito recomendable. O puesto ye impresionant y, lo malo, os pres. Tremolemos quan indo a bosar bi heba debant de nusatros una zagala quitando a tarcheta de credito. Seis euros una biera. Cheta, un tercio. Meyana, que le i dicen. Hibo! Buena cosa de perras que nos i deixemos.... Con tot y con ixo prou que bien que se'n valió.

Continando con mosica, en un ratet d'ixos que no tiens guaire faina en o treballo, me trobé con a colla catalana Lax'n'busto. Entre atras muitas cantas, una me trucó o ficacio a-saber-lo. Talment muitas conoixesetz d'a suya existencia pero yo la descubrié ista semana. T'estimo molt, se diz, y ye una versión d'o Maite Zaitut que cantaban Pirritx eta Porrotx. Si tampoco no conoixes Maite Zaitut, mira-la en Youtube tamién.

Y o zaguer video que pencho, me lo remeroron os companyers de Fendo Orella, fa un par de programas. Amanece que no es poco ye prebablement una d'as millors cintas que nunca no haiga visto. Plena de intes que remerar y con muita más medolla que no'n pareix. Con isto d'as eleccions espanyolas, Fendo Orella meitoron en o programa o troz que pencho contino. Muito gran!

Tres videos d'o 15 M

Muitas cosas, y muito intresants con pasando dende o 15 de mayo. A velocidat con que pasa tot, me fa no escribir, pues sé que malas que lo escriba deixará d'estar noticia u pasará bella cosa que torne a cambiar a mia anviesta. Asinas que nos aconortaremos con bella mica de producción audiovisual que se ye fendo muita y muito buena.
O primer video ye sobre l'acampada de Zaragoza. Gracias por meter tan repolida la plaza!
O segundo unatro montache sobre as enrestidas policials en Barcelona.
O tercer, son imachens tamién d'as enrestidas en Barna. Con un d'ixos intes machicos quan a policia rebla y marcha de bell puesto. As imachens me facioron remerar o diya que se tornó a okupar o CSO Kike Mur...
Ta rematar, a canta Barcelona, d'o nuevo disco d'Obrin Pas, que muitos deciban por o twitter (sí, agora tamién tiengo twitter) que sentioron ixe diya...

Acampada Barcelona y enrestidas policials

Acampada Zaragoza

Mossos espardindo democracia real

Obrint Pas, un dia qualsevol a Barcelona

Más combocatorias

Con Setiembre plegan os buenos deseyos cara t’o curso. Prenzipiamos l’año lectibo con rasmia y empentando proyeutos de toda mena, beluns bien pinchos. Dende Nogara ufren un curso d’aragonés a distanzia que se ferá por o rete. Ya no tenez mica sincusa de orarios u de bibir luen de Zaragoza, ya podez aprender aragonés bibaz an que bibaz y treballez as oras que treballez.

Tamién se ye parando una trobada de fabloggers ta la fin de Setiembre. Encara no ye guaire platero an se ferá pero ya caleba bella cosa asinas. Que nos beigamos y charremos d’o nuestro “treballo” y, más que más, que nos conoxcamos y faigamos, prou que sí, unas bieretas.

En iste berano no he puesto escribir guaire en o blog, como ye de dar, y no he charrau d’atras cosetas que s’han feito, como o II Carrasca Rock en Exulbe que, por lo que sé, estió muito bien. Podez trobar una cronica en Labrándonos en la sombra.

Dende o Zentro Aragonés de Barzelona, os aragoneses que i biben han presto una chornada de Cultura y, más que más, mosica aragonesa. Podez beyer o cartel penchau en iste mesmo afer. Tos dixo con o bideo d'a trobada de fabloggers.