Indiana, Tony y la propiedat privada

L’atro día feban la tercera d'Indiana Jones en a tele. La d'o gredal. Ye hipnotica. La he vista un ciento de vegadas, me sé los dialogos punto por agulla, pero con tot y con ixo, siempre que lo zapping me i leva, me quedo mirando-me-la. Lo menos bel rato, dica que Indi le fote bel punyazo a un nazi, que ixo siempre fa goi. Creixié, como tantos atros quintos míos, con l’arqueologo como heroi. Lo teneba tot. Barrachaba lo caracter aventurer con o conoiximiento academico y, pa forro’i bota, trestucaba a las mullers que se regalaban por lo doctor.

Pero amás, Indiana teneba atra caracteristica que t’a part d’alavez no en parabanos cuenta y que agora pienso que talment fuese mas important que no me pensaba en a mía formación. L’enemigo suyo yeran los nazis, y ixo hue ya ye de destacar. Pero en teneba unatro, d’enemigo. ¿Cuántas vegadas sintiemos en ixas cintas d’os ueitanta ixo de «isto habría d’estar en un museu»? Indiana Jones luitaba contra la privatización d’o patrimonio artistico. Los «malos» yeran cudiciosos traficants d'arte que agora clamarían «emprendedors». Si hue s’estrenase a fe que sería acusada de woke y de propaganda anticapitalista.

No en faré un afalago acritico. Las pelis d’Indiana Jones tienen un mensache colonialista y una pudor masclista de mal amagar. Ixo, tan común en as produccions d'alavez, lo deixamos t'atro post. Lo que me clama l’atención, cada vegada que lo veigo, ye ixa defensa d’o común.

No ye lo solo eixemplo de mensaches, cutianos en o cine y la cultura popular d’os ueitanta y primers novanta, que han dispareixiu de tot. En aquellas envueltas, dende Los Goonies a l’Equipo A pasando por Scooby-doo, los especuladors immobiliarios yeran prototipo recurrent de «malo»: l’antagonista que no teneba mica escruplo en joder-les la vida a los protagonistas y a qui pertocase.

Dos decadas dimpués d’ixa zaguer cruzada d’Indi arribaba t’os cines un heroi bien diferent: Iron man. Tony Stark tamién yera seductor, intelichent y aventurer. Pero no yera un profesor universitario sino un interpresario d’exito que amuntonaba diners a pur de vender armas por lo mundo. En Iron man 2, l’hombre de fierro va ta un chuicio a on que l’estau le demanda que meta la suya tecnolochía a lo servicio d’o gubierno d’os EE.UU. y astí ye la gran escena que define lo cambio cultural, cuan debant d’os representants d’a cambra diz ixo de «¿Quieren la mía propiedat. No pueden tener-la. Pero les he feito una gran favor: he privatizau con exito la paz mundial». Me pienso que no puet existir una frase ni una escena que represiente millor lo neoliberalismo y l’individualismo. Y Iron Man en ista peli ye la suya personificación.

Ye verdat que dimpués lo personache fa tot un viache de l’heroi. Caye en o pozo, tien problemas con l’alcohol y acaba cambiando lo negocio d’a fabricación d’armas por lo d’a producción d’enerchía, como si no bi hese tamién aspectos eticos y morals en ixo. (Aviso de spoilers de pelis de fa una decada). Seguindo la saga, l'amigo Anthony fa un chiro de 180 graus cuan empara la iniciativa de rechistro superheroico pa que la chent con poders pase a pender d’un control estatal (Captain America: Civil war) y en Avengers: Endgame acaba sacrificando-se por salvar a la humanidat. Entremistanto, refusa la suya vida de playboy millonario pa marchar a vivir con o suyo amor con qui tien una filla.

Ni lo chiro ideolochico ni la posterior redención, tot muit opinable, ye lo que lo fan meyo d’Iron man remera. Sí pas ixo d’a privatización d’a paz mundial, las fiestas en a suya torre, los autos de luxo y la manera de vivir d’ixas primers cintas, antes que le entre una mica de talento.

Contraeiexemplos, n’i habrá a brozuecos. Iste no ye unatro post de viello de «los 80 yeran millor». Ixa decada, como todas, tien cosas que fan muita pampurria. Ye una experiencia personal que creigo que me marcó mas que no pienso y dezaga d’a que probablement i hai una manera anterior de veyer la vida y de buscar en a ficción los mensaches que me reafirmen en las mías ideyas. U talment ye un simple «Indiana mola mas que Tony». Qué me sé yo.

Treballar, ¿pa qué? 3. Vida furtada

Empecipié ista serie de posts con unas declaracions de Yolanda Díaz sobre la identidat laboral. Astí aclariba que treballamos pa vivir y no pas de revés. Lo siguié con un articlo sobre lo teatret que a sobén nos toca de fer, sobre tot en oficinas, porque la chornada ye de cuaranta horas tot y que la fayena pueda fer-se en muito menos tiempo. I feba referencia, en toz dos, a la nueva lechilación archentina, que implementa condicions draconianas pa las treballadoras d’ixe país. Y hue me devanto con unatra noticia sobre un posible futuro laboral que, si no nos ne guardamos, nos tocará de patir.

La protagonista ye una zagala d’Estaus Unius de vintiún anyos, una treballadora de banca que fichó una interpresa de fusions y adquisicions. Kathryn, que asinas se diz, teneba diagnosticada ansiedat y fació un achuste con os suyos chefes: le respetarían nueu horas de descanso pa dormir-ne ueito a truca d’estar disponible las atras quince d’o día, toda la semana, de luns a domingo. Bella semana dimpués de l’achuste la interpresa miró de fer-la fuera porque les pareixeba que ixa disponibilidat no’n yera prou. La cosa acabó en chuicio y s’ha resuelto con un acuerdo economico. 

Diz que ye cutiano en ixe sector, lo d’a banca, disponibilidat 24/7 y chornadas eternas. A los mainates no les pareixeba prou que «nomás» fuese quince horas disponible cada día. Ye decir que vivise pa treballar, sin sisquiá poder dormir como cal. Que ixo s'haiga normalizau, que siga debatible, ye la mayor victoria d'o capitalismo. 

En l’atro cabo d’a escala laboral, a on que no se gana garra chanflonada, i ye lo cambreramen. Manimenos, las exichencias horarias son parellanas y la patronal mesmo se’n fa argüellosa. Remeremos cómo normalizaba José Luis Yzuel, president d’os hostelers, las 12 horas con aquella chanza cunyada de «toda la vida en hostelería, meya chornada: de doce a doce». En o mesmo negocio, Jordi Cruz, presentador de Master Chef en Perro TV, defendeba que fer catorce horas d’una tongada yera «cualcosa bonica».

Con referents asinas, la consecuencia lochica de veyer la vida (la d'otri, no pas la de qui lechisla) como una serie de chornadas a l’arreu, sin garra atra actividat que minchar y dormir lo chusto pa enganchar a l’atro’l día, ye la debantdita lechislación archentina, la d’as doce horas de chornada laboral con que aquel Secretario de treballo se preguntaba ¿pa qué querebanos fer-ne menos? U la manca de regulación laboral d’os yankees que por cada día va a mas.

Las personas que viven pa treballar y no l’han eslechiu son arrienda. En agricultura y hostelería las cuaranta horas semanals son minoritarias. Las condicions laborals en ixos sectors y en muitas interpresas d’atros, se pasan por l’arco d’o triunfo toda la lechislación laboral. La inspección laboral no adube. Los chueces y la mayoría d’os politicos protechen lo sistema. Nomás cal veyer como trató Azcón a FCC dimpués de que Zaragoza en Común y Cubero deixasen visteras las malas practicas d’a interpresa y les fotesen bella pinyora.

Ixa semiesclavitut que, de feito, ya se permite por istas tierras, quieren levar-la a toda la clase treballadora. Vulcar los pocos controls que i hai. Tener-nos ocupaus tot lo día, que no podamos vivir y muito menos organizar-nos. Y no ye cualcosa que yo barrunte porque soi un chenial analista politico. Lo dicen claro y raso. No fa tanto d’aquella declaración d’Abascal en Libertad Digital: «Quiero que los espanyols sepan que si podemos fer-lo en solitario somos disposaus a fer las cosas punto por agulla como las son fendo en Estaus Unius y como las son fendo en Archentina». Avisadas somos.

Treballar ¿pa qué? 2: La historia d'os americanos

En o post d’ahiere, lo Secretario de Treballo archentino se preguntaba pa qué querebanos treballar menos, sin trobar-le sentiu ni utilidat a las nuestras actividaz extralaborals. Pero ¿cuántas vegadas nos hemos preguntau qué hostias febanos en o treballo?

Empecipiaré con una chanada, que ixo gosa fer goyo. 

En as practicas de FP, que como cuasi todas no teneba mica a veyer con lo que hebanos aprendiu los dos anyos d’antes, un d’os treballos que estié fendo por bel mes yera montar u modificar ordinadors. Nos veniban palets de maquinas, les cambiabanos u anyadibanos components, talment instalabanos bel software y los re-empaquetabanos con destín a qué me sé yo a ón. Por un regular tenebanos fayena arrienda. Pocos días febanos menos de diez horas de chornada, chentabanos en o treballo y acababanos escamallaus. Pero de cabo ta cuan, no entraba material. Ixos días febanos fayenas de control u, si l'encargau no heba veniu, montabanos corridas de traspaleta por la nau u nos posabanos en bella caixa y simplament charrutiabanos dica que arribase bel mandau. Un d’ixos días vinioron «los americans», que cuento que serían los que pagaban aquello. No tenebanos mica fayena a fer. L’encargau, que se foteba horas y horas chugando a lo solitario de l’ordinador, yera que no sabeba qué fer. Le caleba impresionar a «los americans» y a lo parient que le heba colocau en ixe puesto. Asinas que nos dició de desfer un d’os palets que hebanos montau lo día d’antes y que, mientras «los americans» feban la gambadeta por la nuestra parte, metesenos y quitasenos bel component de l’ordinador que tenesenos debant. Estió poco rato. Bels vinte minutos a on que l’encargau explicaba, con o suyo anglés de academia barateta de finals d’os novanta, cómo treballabanos y a on que me vagó de montar y desmontar cuantas vegadas los dos discos duros d’un servidor entre risetas y complicidat de toda la plantilla.

Ixe momento l’he remerau un ciento de vegadas dimpués en a mía vida laboral. En toz los treballos que he teniu i hai momentos que «vienen los americanos», ye decir, que no tiens fayena, ni brenca ni meya, pero que has de fer como que sí porque ye mal visto reconoixer que no i hai treballo. Porque encargaus y chefes no pueden aguantar que te descanses u t'adediques a las cosas tuyas en horario laboral cuan no i hai labor que fer. 

Pende muito d’as caracteristicas d’o puesto, ye claro, pero ixe fenomeno ye bien común. La pandemia, que obligó a tanta chent a teletreballar, sin que los chefes podesen cusirar la fayena, deixó claro pa muitas que los quefers en que ocupamos ueito horas, a sobén se pueden ventilar en muito menos tiempo. Que sin controls, la mayoría de treballadoras no nomás cumplimos, sino que lo femos mas contentas y en menos tiempo.

¿Cuántas rutinas absurdas? ¿Cuántas reunions que podrían haber-se solucionau con un mail? ¿Cuánta papelamenta sin sentiu? ¿Cuántas horas de mover mouses, de emplir caixetas d'excel pa vuedar-las dimpués, de scrollear pdfs fendo como si los leyeses? ¿Cuántas horas malfurriadas nomás pa que lo caporal se sienta realizau?

«¿Qué conyo foi aquí?» ye cualcosa que m’he preguntau a saber-las vegadas. Calentar siellas ye un d’os quefers que mantiene la chornada laboral en ixas malditas cuaranta horas que muitos treballos no amenistan. Asinas que la mía pregunta pa lo carnuz archentino sería «treballar cuaranta horas semanals, ¿pa qué? Enganchar a las nosecuantas d’o maitín ¿pa fer qué? ¿Pa que nos veigan los americanos?».

Treballar ¿pa qué?

Habe si fa u no fa un anyo, Yolanda Díaz fació una rueda de prensa sobre la desconexión dichital. Astí, con un tono prou —talment masiau— pedagochico aclariba «No vivimos pa treballar. Treballamos pa vivir». Pareixería tan evident que no caldría explicar-lo, pero ya sabemos que no ye asinas. Anyadiba dimpués una reflexión que me pareixe bien interesant:

«Lo treballo (...) nos define tanto (...) que nos definimos a traviés d’a nuestra profesión: yo soi avogada, vustés son periodistas. Cuan, lochicament, lo important son as nuestras vidas. No’n ye lo tiempo que ocupamos en una actividat profesional».

No puedo estar-ie mas d’acuerdo. Pero me temo que ixo no ye tan cheneralizable como nos faría goyo.

D’o ciento de napas d’identidat que tenemos todas, la laboral no deixa d’estar-ne una, y de bien important. No pas en o caso mío, por eixemplo. A la pregunta «¿qué yes?» nunca no respondería, de manera espontania, «administrativo». Ni sisquiera «inchenier», que ye la titulación academia que tiengo. La mía profesión, en no tener mica vocación, nunca no m’ha definiu. Pero sí a muitas personas. A la fin pasamos la mayor parte d’o día en a nuestra fayena y ixo nos influye queramos u no.

Regular que en conoixez, de chent que se define a traviés d’o treballo suyo. Mesmo puet estar que sigaz una d’ixas personas, que la suya identidat principal ye la suya profesión. Y ixo no ye malo per sé. Lo topico diz que qui treballa en lo que le fa goyo, ye como si no treballase. Pero mesmo lo mas apasionau por la suya fayena, lo mas vocacional, tendrá días que no le agane, que siga murria u malauda u cansa y que, manimenos, no le quede atra que enganchar pa pagar las facturas.

Atro caso son qui, vocacionals u no pas, acaban tan adictas a lo suyo treballo, tan alienadas, que se torna la suya vida. Las suyas relacions socials chiran arredol d’a oficina, la suya conversa no conoixe atro tema, tot lo que pasa dillá d’a chornada laboral no tien mica importancia. Talment porque a pur d’horas no conciben atra manera de vivir. Talment porque l’alternativa, la suya vida no laboral, ye mesmo pior. Lo caso ye que la suya identidat ye nomás la laboral. Son avogadas u periodistas, en l’eixemplo d’a ministra, y nomás ixo.

Que cadaún viva la suya identidat como quiera. Por misteriosos que se me faigan los mecanismos, no he d’entender-los, nomás respetar-los. De vez, caldría que ixo se fese de revés y que se respetase y protechese legalment a la mayoría amplisma de chent que no tenemos la nuestra identidat laboral como principal u que dreitament, no’n tenemos, d’ixa identidat. Los que treballamos pa vivir y nomás pa vivir. Y no queremos adedicar-le-ie ni un solo minuto mas d’o que calga pa la nuestra supervivencia.

En l’atro cabo de Yolanda Díaz, tanto cheograficament como politica, i ye Julio Cordero, lo Secretario de Treballo d’o gubierno archentino. En rueda de prensa sobre la nueva lechislación laboral que meteba midas esclavistas se preguntaba:

«Vusté quier treballar menos ¿pa qué? ¿pa ir difuera a fer qué?»

U ye un actor de pistón u planteyaba la pregunta, en veras, como un enigma indescifrable. Se feba cruces de que cualcún podese tener una vida difuera d’o treballo. Descansar-se, tener vida cultural u familiar, relacions socials… ¡conye, mesmo consumir pa seguir fendo chirar la maquinaria capitalista que le ha levau ta ixe puesto!: tot ixo no entra en o suyo tozuel de fanatico d’a superstición neoliberal.

Si no fuese porque tien responsabilidaz, porque ixe pensamiento joderá la vida de millons d’archentinas, porque aquí tenemos chent que opina lo mesmo con posibilidaz de gubernar (u gubernando), sentiría pena. Pena de que cualcún pueda tener lo cerebro tan esmarchinau, tan incapable de veyer las realidaz a lo suyo arredol, d’empatizar con a immensa mayoría de personas que nomás treballamos pa vivir.

U talment sí que siga un buen actor y l’entienda perfectament y se toque las bolas tot lo día y no siga adicto a lo treballo y lo que quier, precisament, ye que la resta treballemos d’estrela a estrela pa mantener lo suyo status.

No ye opinión, ye superstición (Editorial de TdB11x07)

Faigamos un exercicio de conchunta. Esmachinemos que manyana dispareixe d’a Tierra toda la humanidat, fueras d’os borches. Que dispareixe tamién tot repui d’a nuestra civilización: los libros, los edificios, las infraestructuras… Tot esborrau. Un reset total. Ixos ninos que han sobreviviu creixen salvaches, sobreviven, medran y china-chana repueblan lo planeta. Tardan cien, doscientos, mil anyos, que me sé yo… en fer la suya propia y nueva civilización. ¿Cómo serían las suyas relichions, en lo probable caso de que en creyasen? Los dioses tendrían atros nombres, talment la mayoritaria fuese una politeísta, puet estar que lo fenomeno relichioso fuese minoritario, los rituals serían diferents, igual como los mitos, se prohibirían practicas u birollas diferents y asinas-asinas. A fe que tendrían puntos en común con las que conoixemos, igual como en tienen todas las creyencias espirituals, pero tamién de diverchents, y no pas pocos.

¿Y cómo sería la ciencia? Exactament igual. Antes u dimpués s’explicaría la gravedat. Se tornaría a comprebar los mesmos calculos, la g tornaría a estar 9,8 metros por segundo a lo cuadrau. Tamién la velocidat d’a luz u la d’o soniu en l’aire serían la mesma. Los paleontologos arribarían a las mesmas conclusions en bel momento sobre l’orichen d’os dinosarios, una nueva Marie Curie empecipiaría a explicar la radiactividat d’a mesma manera que lo fació la que conoixemos y un nuevo Arquimedes trobaría como medir los volumens. Y, prou que sí, antes u dimpués, s’arribarían a las conclusions d’a Teoría d’a Evolución por Selección Natural.

Entiendo, tot y que ni lo vivo ni lo comparto, lo fenomeno d’a espiritualidat. Entiendo que se busquen respuestas a la preguntas que, por agora, no en tienen. Entiendo, prou que sí, la identidat colectiva que ixo chenera y que convierte ixa espiritualidat individual en sistemas de creyencias y relichions organizadas. Vivo rodiau de supersticiosas de toda mena, ya sigan d’as que simplament piensan que lo troz de luna que viyemos u la posición que teneban las estrelas fa decenas de sieglos influye en las nuestras vidas, ya sigan qui creyen que un troz de pan se metamorfoseya en carne humana adintro d’a suya fonsera si lo prene d’a man d’un mosén. No voi a dar mas ferrete con las razons d’os ateus que, d’atra man, a sobén somos prou cansos con la nuestra retolica.

La muga ye a on que las creyencias de cada ún preban d’esdevenir lei universal que afecte a qui no i creyemos.

En istos días se chuntaba en lo Senau espanyol una clica de supersticiosos. Inauguraba la trobada Jaime Mayor Oreja con un discurso a on que cuestionaba lo feito d’a Evolución. A l’arreu, supersticiosos de tot lo mundo facioron intervencions a on que deixaban claras las suyas linias ideolochicas: la luita contra la libertat d’as personas pa trigar cuántos fillos tener, u mesmo si tener-ne, contra la libertat pa amar a qui quieran, contra la libertat pa esleixir dica cuán y cómo vivir, contra la libertat pa mover-te y residir a on que t’agane… la luita contra la libertat cutiana, la de toz los días.

Lo feban en una estrania alianza, u no pas tanto, con los sectors ultraliberals d’a economía. Ixos que quieren que l’estau no regule cosa en lo economico y tot en lo social, ixuplidando los orichens d’o liberalismo decimononico. Tamién i hai superstición en creyer que lo libre mercau millorará las condicions de vida d’a población, dimpués de decadas contrimostrando-se que a menor regulación economica mayor desigualdaz socials.

Astí, en ixe edificio que todas y toz pagamos, por pura galvana d’uns politicos que nian se leyen lo que firman, se chuntó lo mas representativo d’ixa internacional faixista: representants politicos de tot lo planeta que van a mirar de imposar-nos las suyas supersiticions irracionals y que tienen una relación simbiotica con los poders economicos. Uns creyan una identidat colectiva basada en lo refús a toda ideolochía que pueda oposar-se a los atros. Una adscripción incondicional que permite a ixos poders economicos imposar medidas en contra d’a mayoría y que sigan aplaudidas simplament pa que no gubierne lo socialcomunismo, lo bolivarianismo, la dictadura woke u cualsequier atra etiqueta que faigan servir pa antagonizar-nos.

La mía manera de vivir, d’amar, de relacionar-me no les afecta, a istos supersticiosos. Que yo no tienga fillos no les priva de creyer en Dios, lo Valhalla, lo zodiaco u Alá. La suya manera de veyer lo mundo, pleno de miedos, brempas y menazas que s’esmachinan, igual como esmachinan los suyos sers y enerchías sobrenaturals, sí que m’afecta a yo. Son una menaza real pa la mía libertat, pa la nuestra libertat.

La nuestra identidat s’alazeta en la libertat individual pa lo personal y en la responsabilidat colectiva pa que ixa libertat no deixe difuera a dengún. Las nuestras ideyas politicas permiten la suya existencia, las suyas nos afogan, reprimen y mesmo matan. La nuestra etica y moral aculle a todas las personas, rai d’a on que viengan u lo que creigan. La suya excluye a tot qui no piense como els y imposa codigos de conducta contra las libertaz.

Mayor Oreja representó muit bien cual ye l’enemigo real, cual ye la suya fuella de ruta y qui son los suyas aliaus. Contra els, racionalismo, contundencia, alternativas, libetat y treballo colectivo. Y prou que sí, Radios libres, medios libres y muita Tierra de barrenaus.

Lo que cal saber ye...

¿Qué cal amostrar a las nuestras ninas y ninos? ¿Qué contenius ha de tener l’amostranza obligatoria? Istas qüestions son debatz continos en la nuestra sociedat y ixo ye normal y bueno. Lo mundo va cambiando y con ell las tecnolochías, las necesidatz y las valors socials y culturals, asinas que la ensenyanza en totz los suyos libels s’ha d’ir adaptando a ixos cambios.

I hai -u i heba- una concepción de l’amostranza como una manera d’adquirir conoiximiento “puro”, aluenyada d’os propositos utilitaristas u mercantilistas tan ixemenaus agora. I hai unatra corrient, cada vegada mas potent, que considera a la chovenalla como mano d’obra con mayor u menor qualificación seguntes nivel educativo y que totz los conoiximientos han d’ir enfilaus a fer d’ellas y ells buens y eficaces treballadors. En lo meyo y como siempre, tot un Arco de Sant Chuan d’opinions. En lo caso mío, si m’he de calar en bell puesto d’ixa escala, sería bien cerqueta d’ixa primer concepción. 

Tot conoiximiento ye valido. Tot conoiximiento ye util. Seguntes qui sigamos, quals sigan los nuestros intreses y cómo nos relacionemos con lo nuestro entorno en aprecisaremos uns u atros. A yo me resultaba absurdo que la chent se sabese las alineacions d’os vinte equipos de futbol de primera división dica que belún me fació notar que yo conoixeba tots los miembros d’os X-Men en orden d’ingreso en la escuela. Y que ixe conoiximiento, a yo, me yera tant util y valioso como a ell l'alienación d'o Reyal Zaragoza d'a Recopa. Por ixo me pareixe prou penible la chanceta ixa que amaneixe de cabo ta quan que diz “atro día que no foi servir lo mínimo común multiplo” (mcm), u lo suyo equivalent “de letras”: “atro día que no foi servir lo complemento circumstancial de tiempo” (CCT). Contino con lo ferrete de que ixa división entre sciencias y letras ye una d’as piors decisions que ha preso la sociedat occidental, pero ye que antimás, en la mía vida cutiana, sí que foi servir totz dos conoiximientos. Ye mas, cuento que muitas d’as personas que lo dicen y que comparten la gracieta, tamién lo fan servir, tot y que lo faigan de manera inconscient.

Las materias y contenius que s’estudien en las educación publica obligatoria han de consensuar-se entre toda la sociedat y, en la mía opinión, han de desarrollar qüestions basicas que nos permitan dimpués afundar autonomament en los conoiximientos que deseyemos. Lo mcm y lo CCT entran de tot en ixa definición y son parte alazetal d’as suyas respectivas materias. Sí que ye important estudiar-los y sí que s’aplican en la vida cutiana. 

En ixa concepción ultrautilitarista de l’amostranza, tuitaba con exito una persona fa bell día:

“Os imagináis salir del instituto sabiendo cómo hacer la declaración de la renta, darse de alta en hacienda, reclamar cosas que creemos que nos han sancionado mal, entender una hipoteca o hacer papeleos de aduanas, por ejemplo? La fantasía.”

Pa yo, ixos conoiximientos me resultan tant utils como l’alineación de l’Osasuna d’o 85. Beluns lo he adquiriu quan m’ha pertocau y belatro no l'he aprecisau en la mía vida. Manimenos, le tiengo prou aprecio a los mcm y lo CCT que cuento que despreciará ista tuitera que pareixe concebir la vida como una papelamenta contina.

Si fese yo un tuit asinas, podrías decir: “Tos esmachinatz salir de l’instituto con una buena comprensión lectora y expresión escrita, dominando totz los rechistros comunicativos, sabendo organizar-se de manera colectiva y entendendo las relacions de poder d’as nuestras sociedatz? La fantasía”. Son habilidatz que me pareixe que no se treballan prou en l’amostranza, que pienso que farían buena honra y que me faría goyo que se i fese mas ficancia. 

Pasa parellano con las luengas, que a escape se dividen entre utils y inutils. Las primeras: anglés, alemán y poco mas. En las segundas, toda la resta, que qui las aprende lo fa por un raro concieto y malfurriando un tiempo que podría adedicar a veyer First Dates u practicar lo metodo Marie Kondo, tot muito mas util a los uellos de belún que aprender latín, aragonés u mesmo arabe, que, tot y que lo parla lo doble de personas que l’alemán, como son en la suya mayoría pobres que no te van a dar treballo, ye tamién una perda de tiempo. La utilidat que le da a l’anglés la mayor parte d’a chent que bi invierte horas y diners arrienda no plega ni a un sacre de tot lo que m’ha dau a yo l’aragonés u lo catalán. Vete-me, antimás, que ixo no m’ha empachau de aprender y fer servir anglés y francés de cabo ta quan.

Las zagalas y zagals ya tienen un curriclo bien amplo. Pa cada cosa que querramos que aprendan, cal sacar beluna d’as que son aprendendo. U estirar l’amostranza obligatoria dica los trenta, que me sé yo. Lo debat sobre qué temarios se i anyaden y quals se’n quitan ye menester. Pero no entiendo ixa tendencia a fer de menos bells conoiximientos que, pa forro de bota, me pareixen qüestions basicas pa la vida. Las hooligans d’as sciencias fan de menos los conoiximientos de letras y eliminarían la filosofía, la metat d’o temario d’historia y tot l’analís sintactico. Las hooligans d’as letras sacarían los molestosos castiellos de fraccions y toda ixa inutil formulación quimica. Y asinas, entre uns y atros podríanos aspirar a una ensenyanza obligatoria a on que aprendesenos a fer papelamenta y presentar los nuestros trimestres de falsos autonomos.

Asinas, con ixas concepcions d’o saber, s’ha iu convertindo la universidat en una fabrica de treballadors hiperespecializaus, con un conoximiento d’a suya chiqueta aria tant gran como la ignorancia de toda la resta.

No entiendo mica d’economía. M’aburro nomás d’escribir ixa parola. Cada vegada que veigo apuntes d’asignaturas de Contabilidat, que por lo mío treballo me toca de cabo ta quan, se me fa como si fuese leyendo lo Necronomicón, y temo invocar, por error, un Cthulhu con la forma d’Adam Smith. Se me fa de mal entender que belún quiera voluntariament estudiar ixo. Pero cuento que a toda ixa parrafiquera de chent que imple la Facultat d’Economía y Interpresa se le fará rarismo que leve vinte anyos aprendendo aragonés, que invierta tantismas horas en escribir articlos que dengún no leye, u que contine flipando con la serie de Cosmos de Sagan y la suya nueva versión de Neil de Grasse Tyson. 

He teniu la suerte d’haber estudiau lo mcm y lo CCT, lo goyo de seguir entendendo lo que son, pa qué se fan servir y aplicar-lo de manera conscient y inconscient a la mía vida. Talment los fillos d’os míos sobrins en cuenta de Mates, Luenga y Historia tiengan “Formularios”, “Teleoperaduría”, “Carnet de Conducir” y “Mensachería” que les aprestarán muito mas pa la vida moderna. De toda manera, cuento que acabarán aprendendo lo que ye lo mcm y lo CCT en bell tutorial de Youtube.

Superman no paga impuestos (Clark Kent sí)

¿Quántas vegadas ha salvau lo mundo Superman? ¿Quánta chent de l'universo DC le debe la vida suya? ¿De quántas menazas nos habrá librau? A qualsiquier que gosase ir t'a Fortaleza d'a Soledat a trucar a la puerta y demandar-le que pague los trimestres se lo mincharía la sociedat. ¿Como s'atrive un burocrata, un funcionario, a exichir-le tributo a lo salvador d'a humanidat? No, Superman no paga impuestos si no quiere. Atra qüestión ye Clark Kent, que nomás ye un periodista, que va ta l'oficina d'o Daily Planet, fa las suyas 8 (u 9, u 10, u ....) horetas, que probablement siga como falso autonomo y, como ciudadan que ye, ha de pagar como todas y totz. Son la mesma persona. La sola diferencia entre ells ye lo trache y, sobre tot, la manera en que los percibe la sociedat.

En lo nuestro universo, ixe a on que dengún no vuela, ni fa rayos con los uellos, ni controla l'orache, lo magnetismo u garra atra fuerza d'a naturaleza, no tenemos superherois. No i hai dengún que repeleixca las enrestidas alienichenas ni las invasions infernals. Asinas que pa que seguntes que personas no paguen impuestos cal fer-les lo trache de superheroi, cal dar-les lo superpoder d'o capitalismo, que consiste en creyar d'a no-cosa un elemento machico que se diz "puestos de treballo" y que, tamién por artes arcanas, produz diners. Con ixe poder SuperAmancioOrtega u JeffBezosMan consiguen la mesma licencia que tien Superman en lo suyo universo: no estar sucheto a las leis humanas ni haber de pagar impuestos ni costodias si no quieren. Las suyas capas y armaduras no las fa Reed Richards con traches de moleculas inestables, ni son teixius con tecnolochía d'atros planetas. Las fan los suyos medios de comunicación que financian, por eixemplo, con los diners que s'escusan de no pagar ixos impuestos. 

Mesmo n'i hai de superherois mas afortunaus. Porque a la fin, Superman y Clark Kent son la mesma persona y, a lo menos un d'ells, ha de presentar lo 303, pero antimás de que Batman salve lo mundo, barrunto que Bruce Wayne ye tant evasor d'impuestos como qualsequier miembro d'a reyaleza d'as monarquías terrestres. Porque si yes un Wayne, u un Stark, nos dicen que la tuya riqueza tien lo suyo orichen en que yes un "chenio d'a tecnolochía" y no pas en tener una familia con mas cauquerré que PIB tien bell país chicot, como s'encargan de recontar-nos en los comics d'una y atra d'as casas d'o mainstream. Y si les pilla hicienda, ya trobarán bella manera d'enguerar-les lo marrón a Alfred u a Jarvis, que los ricos, de leyaltat, la chusta. Ni lo Capitán America con lo Mjolnir, ni Thor clavando-le l'astral a Thanos, ni garra atra scena d'o Universo Cinematografico Marvel puet competir con la sinceridat de Tony Stark declarando debant d'o mundo que "ha privatizau con exito la paz mundial".

Asinas que, quan salga en la tele lo rico de turno explicando quánto aporta a la sociedat u que va a donar no se qué equipos a un hespital, u que van a plantar una parrafiquera d'arbols pa compensar lo CO2 que fan las suyas interpresas, nos cal fer servir la kriptonita, sacar-le los suyos poders y lo vestuache de coloretas, y convertir-lo en un simple Clark Kent que, como totz, ha de contribuyir con la parte que le pertoque a la vida en común.

En la ringlera d'o banco

No soi guaire amigo de definir-me como «consumidor» u «usuario» ya que son categorías que me califican nomás por la mía capacidat o potencialidat de mercar un producto u emplegar un servicio. Pero, a efectos practicos, en soi, asinas que, de cabo ta quan, he habiu de desfender los mios dreitos de consumidor u usuario. D’interpresas zaborreras, cuento que totz n’hemos conoixiu a trompicuesco y regular que en un petén podremos remerar bella chanada que nos haiga pasau con beluna. Totz los anyos, en ixos informes que presientan las asociacions de consumidors y usuarios, dende ya fa bell lustro, i amaneixen en los primers puestos de queixas las companyías de telefonía y los bancos. D’as de telefonía, n’he charrau quantas vegadas ya, y probablement tornaré a fer-lo bell día. Los bancos protagonizan lo post de hue.

No por la suya naturaleza usurera. Ni por lo criminal d’os suyos desfuizamientos. Ni por financiar guerras. U partius d’extrema dreita. U por imposar las politicas economicas d’os estaus. Tot ixo ye muito mas fundo, n’i hai literatura a boticiegas y lo ciudadano meyo, si se lo planteya. A sobén se carga de huembros y piensa que no i hai solución, que lo mundo ye asinas y que lo poder d’os bancos que, a la fin, son los amos d’o dios diners, ye d’imposible vulcar.

Pa qüestionar lo papel y lo poder d’os bancos cal qüestionar tot lo sistema politico y economico y ixo, la mayoría d’as personas que tenemos a lo nuestro arredol, no lo fa. Asinas que imos a asumir lo sistema y los bancos como parte d’ell. Y antimás lo imos a fer dende la envista d’ixe ciudadano meyo que no vei que sigan millor u pior que qualsequier atra interpresa d’ixas que, por la suya propia naturaleza, no existen so que pa fer perras.

Mesmo dende ixa envista, me sigo fendo cruces d’a poca quimera que i hai contra los bancos dende la ciudadanía entendida como conchunto de consumidoras. Un servicio que tien uns horarios radius, nomás de maitins, los días de cada día, y, pa bell mes a l’anyo, las tardes d’os chueves. En un mundo a on que los supermercaus ubren mas de dotze horas cada día, de lunes a sabado, y muitas personas se queixan de que no se pueda ubrir los domingos, ¿cómo no i hai hordas de consumidors exichindo que los bancos (que recuerdo que, igual como los supermercaus, femos servir quasi lo 100 % d’as personas) ubran, no digo los domingos ni los sabados, sino bell día de tardes, u en un horario mas amplo? No tiengo garra problema pa fer la compra los días de cada día pero, cada vegada que he de fer un papelot t’o banco – por un regular pa queixar-me-ne porque online u por telefono no me fan ni caso – m’he de buscar las manyas pa fer fuina d’o treballo, ir-ie bell día que zarremos u demandar-le un ratet a la mía chefa, lo que nunca no me fa mica gracia y menos si ye pa fateras asinas.

Pa forro de bota, si quiers fer seguntes qué cosas, no t’atienden que bell día en unas horas absurdas que, por un regular mete en un papel apegau con un celo en bella columna d’adintro d’a oficina. Que d’os prestamos que nunca no demandaré, en tiengo información pa fartar-me cien vegadas, pero pa saber l’horario d’ingresar cauquerré, cal fer una escape room. ¿Tos entrefilatz, por seguir con lo simil con los supermercaus, que la sección de fruitería nomás servise los martes de 10 a 12? Las queixas ubrirían los telediarios, la Ana Rosa y sería trending topic a l’inte.

Facié uellos, fa bell tiempo, quan uns amigos nos comentoron que lo suyo banco siempre les feba bella estrena pa nadal. Un detallico, no guaire cosa. En facié, de uellos, porque ixas personas tienen lo mesmo banco que la mía parella y yo. Tamién con una hipoteca – probablement una d’as mayors errors d’a mía vida – los seguros, las nominas y tot lo pack. Ixo sí, con arrienda diners mas que no nusatros, que totz dos tienen treballos millors pagaus. Pero no me puedo esmachinar – y sí, torno t’o super – a la caixera dando-le un par de uegos kinder a qui emplise lo carro con pernil d’o bueno y vin d’os que tienen alarma. La resta d’a ringlera la lincharía.

Entre que los bancos tiengan a Dios d’a garra será bien difícil que deixen de fer lo que les pete con tot. Dende qüestions serias y grieus como los esfuizamientos dica fateras que t’embolican innecesariament lo día, como los suyos horarios, comisions inchustificadas, tracto discriminatorio, etc.

Cuento que será posible, en istas latitutz y en iste momento historico, vivir sin garra vinclo a un banco, pero a fe que ye bien embolicau y, lo menos yo, no he trobau la manera. Lo día que pueda, prou que lo faré. Lo día que acabe de pagar la hipoteca, regular que marcho d’o banco que soi agora y miro bella alternativa que no faiga tanta pampurria, que n’i hai.

Si, entre que asperamos – ora et labora – la revolución, podemos dar-les una mica de ferrete como usuarias, lo menos nos desafogaremos una miqueta y, como he conseguiu en mas d’una ocasión, nos furtarán bell duro menos. Ixo sí, recordatz que las treballadoras no tienen la culpa y que las pobronas no son que fendo lo que totz: vender la suya fuerza de treballo pa sobrevivir un mes mas. Contundencia, sí. Empatía y educación con las personas, tamién.

Candidaturas, protagonismos, partitocracia y sentius de voto

Lo n-eno tierratremol plega en la politica espanyola con tot l’empandullo de Murcia, fendo remerar ixa canción de Cistits & the pajer. En una d’as replicas, Pablo Iglesias amaneixe de rapiconté y se presienta pa president de Madrit, que como vale un valer, igual le tiene una administración que atra. Que vicepresidida una, vicepresididas todas. Como a tantas atras personas, la maniobra m’ha pareixiu intelichent, conseguindo fer revilcar lo partiu en un puesto a on que yera en las tres pedretas y esbarrando lo debat ent’os intreses de Podemos, que bien dificil yera. Precisament ixe feito, lo cambio de tendencia derivau d’un simple cambio de candidato, ye una d’as cosas que m’ha trucau mas l’atención dende fa muito. En ista ocasión por no identificar-me-ie, y entender malament ixos cambios tant radicals en lo sentiu de voto porque i haiga un candidato u atro. No recuerdo haber cambiau nunca en la mía vida lo voto porque lo primer puesto d’a lista lo ocupase fuleno u mengueno. Manimenos, ye qualcosa bien común y que puet fer chirar de tot lo panorama politico. De reflexions sobre lo tema, no me’n falta.

¿Qué ye lo que importa, la candidata u lo programa? Si lo que votamos son unas ideyas, un prochecto politico, que la papelamenta la faiga una u atra persona, a priori, habría de tener-nos igual. En lo sistema partitocratico que tenemos - u patimos - se suposa que se treballa en equipos. Por un regular asesoraus por tecnicas que conoixen l’aria de treballo. Ixo fa posible que chent sin relación profesional son la medicina pueda estar consellera u ministra de sanidat sin que ixo signifique que lo faiga millor u pior que una sanitaria. ¿Qué aporta alavez la primer persona d’a lista electoral? ¿Ye nomás una imachen? ¿Bella mena d’actriz? ¿Una comercial encargada de vender un producto? ¿Una comunicadora, una divulgadora que simplifique lo embolicau luengache politico a termins que l’espectador meyo de Sálvames, Ana Rosas y Hormigueros pueda entender?

Lo debantdito sistema, lo partitocratico, tien como totz virtutz y defectos. Una d’as primeras, en la mía opinión, ye precisament que tienga igual qui represiente a lo partiu, ya que i hai una ideolochía y una linia politica dezaga. Las personas pueden cambiar d’opinión en un petén, se pueden mercar, u simplament, reblar debant d’as dificultatz d’a politica. Las personas que representan a los partius han de (u habrían de) respectar la voluntat d’a organización y d’as votants y aplicar lo programa. Manimenos, en ixe mesmo sistema, lo cargo perteneixe a la persona y no pas a la organización. Isto provoca problemas como lo transfuguismo que tant bien conoixen tanto en Madrit con Tamayo como en Aragón con Gomáriz, y que agora entre Ciudadants ye una pasa que s’apega mas que la covid anglesa. Las listas ubiertas se proposan a ormino como solución, ya que sí que votaríamos a la persona candidata. Con lo mas que probable periglo que ixo esdevenise un concurso de popularidat. Pocas vegadas, no sé porqué, se proposa un cambio a l'inversa, que los puestos perteneixcan a lo partiu y no pas a la persona. Tamién tendría conseqüencias indeseyebales, asinas que talment ista siga una solución de compromís.

Baixando t’a realidat, a on que la teoría empecipia a fallar, nos trobamos con la estructura interna d’os partius, organizaus en familias, corrients u como se le quieran clamar. Astí ye a on que empecipia a prener mas forma la importancia d’a candidata, representando por un regular a la famiglia que tienga la mayoría interna, habendo ganau lo congreso, asembleya u lo que cada organización tienga. Lo PSOE ye particularment curioso en iste aspecto, tenendo una variación ideolochica interna prou gran, tanto a nivel discursivo como estetico. A sobén me foi cruces de que Javier Lambán, Roberto Fernández u Grande-Marlaska compartan organización con Ximo Puig, Cristina Narbona u Marcelino Iglesias que, sin tener-les mica aprecio, tienen perfils bien diferents a los tres primers. En la izquierda a la zurda d’o PSOE, que la familia que gane lo proceso siga una u atra puet mesmo trencar la organización y orichinar una nueva opción que pareixe radicalment diferent pero actua estraniament igual en quasi tot.

Izquierdas y dreitas se diferencian en lo suyo comportamiento electoral de muitas maneras. Una d’ellas, la disciplina de voto. Lo blog de societat anonima escribió fa anyos un articlo a on que postulaba que la dreita espanyola votaría a un ornitorrinco y i soi d’alcuerdo de tot. Lo PP podría meter de candidato a lo mesmo Bárcenas u a una inanimada barra de carbono que tendría, si fa u no fa, lo mesmo resultau. La izquierda, manimenos, nos la pillamos con papel de fumar una vegada mas, y nos cal una candidata immaculada, que vienga refirmada por un proceso participativo alto u baixo representativo, que arrocle a toda la militancia y que traiga sangre d’unicornio d’a tuca mas alta de Mont Excelencia. Y si, en cuentas d'a primera ye la segunda tuca en altaria, ya nos pensamos si votar-le u no.

Asinas que, encara que no lo entienda, l’afer d’una candidata potent ye important. Bien important. En la izquierda mas que no en la dreita. Y por ixo, porque los partius lo saben, s’ha feito servir arrienda lo recurso de meter en los primers puestos d’as listas a personas y personaches independients, con reputación, fama y/u trascendencia, que puedan movilizar ixe dificil voto de l’exquisito votant cucho. Las campanyas se centran alavez en la persona y no pas en lo partiu u lo prochecto ideolochico. Y ya no votas a CHA, que votas a Labordeta. Ni a Podemos u a Mas País, que votas a “lo codetas” u a Errejón. Mesmo las siglas mutan de PSOE a ZP quan lo nombre d’o partiu ye una mica por tierra. Bella vegada, ixas candidaturas estrela sisquiá son militants d’o partiu, con la lochica carranya d’a chent que i leva treballando a saber qué anyos. ¿Qué diz d’una organización haber d’ir a escar a la persona que la represiente difuera d’as suyas filas? ¿Cómo le parla ixe comportamiento a la suya militancia?

Que a mes y meyo d’unas eleccions, un simple cambio de candidatura pueda fer chirar lo scenario electoral ye qualcosa que me cuesta entender pero que pareixe prou cutiano. Lo mundo politico d’agora funciona a una velocidat prou mayor que no antes. La trachectoria de Ciudadanos en ye buen eixemplo. Las enqüestas no valen ni brenca ni meya debant d’un electorau que, a ritmo de twitter, fa trending topic una u atra opción politica d’un día t’atro. Los candidatos y candidatas son mas influencers que ideologas, mas presentadoras que teoricas, mas show-women que chestoras.

Talment isto no siga ni bueno ni malo, sino simplement una circumstancia que cal asumir. Si l’equipo, las personas que prenerían las responsabilidatz de chestión, son las adequadas, ¿qué importa si se destina a una d’as personas d’a candidatura a un papel nomás mediatico? ¿No ye nomás unatra especialización mas en ixa tendencia antirenacentista que vivimos habe tiempo? Levando-lo un poquet mas enta alla, ¿no se podría profesionalizar de tot y que la candidata sisquiá plegase a tener cargo politico? ¿Que s’ocupase de fer mitins y entrevistas pero no ocupase lo suyo posiento en l’administración que la trigase?

Seguiré sin entender ni compartir que s’apueste tanto por los personalismos en los partius, ni por candidatas estrela. Pero lo feito ye que ye una manera de movilizar voto que funciona muito y bien. Las personas que militamos en organizacions d’izquierdas habríanos de preguntar-nos cómo y por qué. Y si queremos cambiar-lo, por coherencia u estratechia, cómo habríanos de fer-lo, u mesmo si ixo ye posible. Tanimientres, entre que trobamos atras ferramientas millors, habremos de fer servir las que tenemos.

Repartir precariedat

Amaneixe por lo mío timeline un executivo d’os d’agora. D’ixos que ya no levan ni truqueta y s’aluenyan d’a imachen d’antes mas. Coleguita, con una chambra de quadros, barba y un pomo de biera. Cuento que ixo, la imachen, ye la parte “neo” d’o neoliberalismo. Estió un d’os fundadors d’una interpresa de reparto que prebó de fer pasar por autonomos a los suyos treballadors y que, afortunadament, los chuzgaus le dicioron fa bell mes que no colaba. Que ixos teneban d’autonomos lo que yo d’inuit.

Lo troz de entrevista, de tasament un minuto de durada, ye una choya a nivel d’entender cómo funciona lo mundo laboral d’istos zaguers anyos, y cómo farán que funcione si no lo evitamos.

Empecipia fablando de flexibilidat. Lo luengache nunca no ye inocent. Las treballadoras gosamos de querer flexibilidat y, como l’empresariau lo saber, no deixa d’incluyir ixe concepto en las suyas ufiertas de treballo. Ye cabolioso que no nos referimos a lo mesmo. Pa que dimpués digan que no i hai conflicto de clases, quan lo veyemos mesmo en la interpretación d’una paroleta. Pa una treballadora la flexibilidat ye poder modificar horarios u turnos si lo aprecisa por las suyas necesidatz extralaborals. U mesmo laborals, tamién. Pa los suyos chefes, que siga las vintiquatre horas disposada a treballar quan creigan que la interpresa lo aprecisa. U quan les rote, l’aprecise la interpresa u no. Si en cuenta de charrar d’horarios flexibles charramos d’autonomía laboral, la cosa cambea a-saber-lo. ¿Qué capacidat tien la treballadora pa chestionar lo suyo tiempo? Ixa ye la flexibilidat que queremos, no pas l’atra.

Diz que ye bueno que qualsequier persona pueda fer comandas a qualsequier hora, y en primeras cuela, claro. ¿Qui se va a oposar a que puedas fer comandas quan quieras? Pues qualsequier que sienta solidaridat y empatía por los suyos concheners. Me vienen t’a memoria las imachens d’os repartidors en bici portiando pizzas d’un cabo t’atro d’as ciudatz plenas de nieu d’istos días d’o plomazo de Filomena. Pero ¿dica que punto podemos culpar a los consumidors? Nos bombardeyan terne que terne con que tenemos lo dreito a tener lo que queramos, quan queramos, a tot trance, sin mover un dido. Toda la resta d’o mundo ye astí pa cumplir los tuyos deseyos si pagas prou. Ye tant comodo que ye de mal adubir-se-ne. D’atra man, ye precisament la precariedat laboral y ixa malentendida flexibilidat horaria interpresarial - u millor dito, falta d’autonomía en la chestión d’o tiempo propio - la que nos obliga a sobén a fer comandas en horarios absurdos. A chenta qualsequier minchanga a metat tarde posau en un banco en un ratet que tiens libre entre un treballo y atro.

La tendencia ye de tener dos u tres treballos, sigue comentando con cenyo de creyer-se-lo de verdat. La mayor tendencia d’a humanidat, dende siempre, ye la de prebar de no treballar. Yo no treballo porque me faiga goyo. Lo puedo detestar mas u menos, y prou que prebaré de tener una fayena que m’agrade lo maximo posible. Pero lo solo motivo pa treballar ye la subsistencia. Si puedo tener las mías necesidatz cubiertas con un treballo de ueito horas, no en preneré dos. Y, personalment, si las podese tener con nomás quatre, tampoco no en prenería unatro. Qui combina dos u tres treballos, por un regular, ye porque con uno, tot y que siga de quaranta horas semanals, no adube a pagar casa y birolla. Lo sé, entre atras cosas, porque a diferencia d’o executivo, yo sí he combinau tres treballos fendo mas de sisanta horas semanals, y conoixco quantas atras personas arredol mío que han pasau por la mesma circumstancia. Dos u tres treballos, prou que sí, con las suyas dos u tres flexibilidatz interpresarials y los suyos tiempos no remuneraus de desplazamiento d’un t’atro. Ye decir, estar-te tot lo día pendient de dos u tres chefes. No, sinyor d’a chambra a quadros: las treballadoras no queremos tener dos u tres fayenas “pa no aburrir-nos”. Las tenemos porque con una no podemos pagar lo loguero.

Remata ista choyeta de troz d’entrevista con atro d’os mitos que, en iste caso, le conecta de tot con la no-pas-tant-colegui CEOE quan en l’anterior crisi nos ninviaba a las treballadoras ta Laponia si nos i ufriban bella fayena. Lo capitalismo ye culpable de l’exodo rural. Ye culpable de que las treballadoras con mayor qualificación profesional(1) haigan ixopau ta qualsequier puesto d’o mundo en no trobar treballo aquí. Y ixo lo venden, de nuevas y como toda la resta de conceptos - la flexibilidat, la combinación de treballos…- como qualcosa voluntaria. La mayoría d’as personas queremos vivir en un puesto. La nuestra ciudat u lugar, la redolada, como muito. Lo de viachar nos fa goyo, prou que sí, pero quan decidamos y pa lo que queramos, no pas t’a on que la interpresa aprecise ni pa fer lo que calga. ¿Por qué iba a querer yo tener luent a la chent que quiero? ¿A la mía familia u amigas?

Un d’os que creigo que ye d’os grans problemas que tenemos en la sociedat actual ye l’individualismo derivau d’a falta de sentimiento - y experiencia vital- de comunidat. Desenradigar a las personas d’o suyo entorno, antiparte d’os contrimostraus problemas de salut fisica y mental, contribuye prou a ixe individualismo que tanta honra le fa a lo sistema.

La estabilidat laboral, tanto en qüestions de tiempos - horarios - como d’espacios - sin cambiar de localización terne que terne - ye periglosa pa lo chiringuito que tienen montau. L’autonomía d’horarios y la creación de comunidat nos permite conoixer los problemas comuns d’as nuestras companyeras y vecinas y sobre tot, nos permite organizar-nos pa combatir-los. Y por ixo no quieren que en tiengamos.

I hai una obsesión dende fa tiempo con la seguridat. Personalment, he sentiu inseguridat por muitos anyos. Pero no pas por vivir en un d’os barrios mas periglosos d’a ciudat, seguntes remeran los medios de cabo ta quan. Ye por pender de tot d’os concietos d’una clase interpresarial que decide quántas horas he de fer y en qué ciudat pa poder minchar totz los días. La seguridat no ye instalar una alarma en casa tuya. La seguridat ye no haber de mirar cada día la tuya cuenta bancaria. Ye saber que a l’atro mes, y a l’atro anyo, tendrás unas condicions previsibles d’horarios y puesto de treballo. Ye poder chestionar lo tuyo tiempo, laboral y extralaboral.

Desgraciadament, lo cuento modernet d’a libertat laboral ye colando. Tenemos a la prensa importando terne que terne parolas en anglés pa conceptualizar de forma cuqui no poder independizar-te u no poder fer cosa en lo cabo de semana. De cabo ta quan, conseguimos ficar con falca los debatz que sí que nos intresan y que habrían d’estar la prioridat absoluta de qualsequier partiu u organización que prebe de representar los intreseses d’a clase treballadora. La reducción d’as chornadas laborals, d’os días de fayena, d’a edat de chubilación u la necesidat d’una inspección laboral masiva que acabe con todas las practicas ilegals tant ixemenadas son reivindicacions basicas y que dengún no puet estar-ne en contra.

Ye prioritario que chentucia como lo modernet d’a chambra a quadros no imposen los termens d’o debat y que recuperemos la iniciativa. Quiero treballar menos horas, menos días y menos anyos, quiero que una chornada laboral y un chornal standard guarencien que puedo pagar loguero y birolla comodament. Quiero que los míos dreitos laborals sigan cusiraus por l’estau y que garra intepresario pueda tener sisquiá la tentación de blincar-se las leis. Lo treballo, sinyor moderno, ye una obligación que prebaré de vivir lo millor posible y de disfrutar en la mida que pueda. No ye una “aventura” ni una “experiencia”. No preben de convencer-nos de que somos chugando u fendo turismo. Ixo lo faré como quiera y con qui quiera en lo tiempo que no tos siga vendendo.

(1) Tal como s’entiende popularment lo concepto de qualificación profesional, que no i soi d’alcuerdo, pero no ye lo debat que pertoca en iste post.

Lo pre d'un malaudo

Allá ta marzo, quan la pasa va empecipiar a correr por la peninsula, bi habió un consenso social alto u baixo gran en que caleba encadar-nos si querebanos salvar las vidas de muita chent. Bi habió, prou que sí, voces que no i yeran d’alcuerdo. La mayoría yeran mas en contra de bella mida concreta que de l’esprito cheneral d’as leis que se facioron en aquellas envueltas. Pasau l’espanto primero, que nos deixó acollonadas en casa rodiadas de papel de culo, tornemos a salir t’as carreras, en una desescalada que acceleroron porque los pixautos iban encarranyaus y que acabó en la clamada “nueva normalidat”.

Una d’as cosas “normals” en ista “nueva normalidat” ye que muera chent. Ya somos anestesiadas. Las muertas ya no son que una inquesta estadistica. Nos molesta mas haber de portiar la mascareta que las UCIS plenas.

Eixemplo d’a desconexión con la vida d’ista nueva etapa coronavirica son los titulars que i hai en bell medio. “Zarrar Madrit costará nosequantas perras”, diz lo clickbait d’un prestichioso periodico monarquico. No pasaría cosa si ixa información fuese ixo, información, y no una campanya en contra de nuevas midas contra la pasa. Se discute y se debate sobre qué perdas economicas causarán los decretos u sobre las molestias que patirá la población. Pero pocas rufiertas veigo sobre las vidas que se salvan u se deixan de salvar.

Talment, dende la envista purament electoralista, Sánchez y Iglesias s’entivocoron. Talment no hese caliu las midas de metat de marzo. ¿Hese muerto muita mas chent? A fe que sí. Pero la economía no sería tant malament y, pa forro de bota, hese muerto un porcentache considerable de chubilaus que le cuestan diners a l’estau. I hai noticias totz los días sobre los diners que se pierden con tal u qual mida politica. Imos tot lo día chafando basas de glarimas d’os interpresarios que han de "malfurriar" chanfles en EPIs y que malfian de que treballemos dende casa pagando-nos luz, calefacción y wifi. Sería intresant que s’estudiase quántas vidas se salvoron por quedar-nos encadadas ixos meses. Quántas se salvan por cada día que s’aplican midas contra la covid. Y tamién, prou que sí, quántas ha costau ubrir Madrit antes de que tocase, quántas las condicions laborals en lo campo iste verano u amuntonar-nos en los medios de transporte masivo d’as ciudatz. Lo que pierde la economía ye de buen quantificar y le’n acumularán a lo gubierno. No pas las vidas salvadas. Qui quiera “salvar la economía”, que nos explique quántas vidas cuesta fer-lo. U quántas ye disposau a sacrificar.

Ye important la economía, prou que sí. Entre atros motivos porque ixo tamién suposa muertes a la fin. Pero queda pasa pa firme tiempo y creigo que somos perdendo la perspectiva de que isto se tracta de vidas. De chent que muere u chent que se salva. Y que la suya vida pende fundamentalment d’os recursos que tiengamos en la sanidat y d’as midas que se prenga dende l’administración. ¿A quántos euros va lo muerto?

En leyendo... La mano invisible, de Isaac Rosa

I pasamos ueito horas, u mas, cada día. I pensamos terne que terne. Si no en tenemos, nos anguniamos, y si en tenemos, lo patimos. Diz que dignifica y que no querer-ne ye de galvans. Ye una d'as partes mas importants d'as nuestras vidas y manimenos, qué poco pensamos en la naturaleza d'o treballo.

Las relacions laborals condicionan la manera en qué vivimos y todas querríanos millorar-las. Pero los debatz publicos, las rufiertas en los medios y en los bars, las polemicas en los retz socials son atras. D'o treballo, se'n charra bien poco y en termins poco fundos. Se prenen como naturals u inevitables qüestions que no'n son u no habrían d'estar-ne. Y quan queremos charrar-ne nos trobamos con toda una literatura de manuals economicos y socials de mal leyer con los uellos de qui no ye docto en la materia. Asinas que un libro como La mano invisible de Isaac Rosa, me pareixe esencial.

En ista obra, los protagonistas son una colla de treballadors, quasi totz "de baixa qualificación", que empecipian a fer la suya fayena en una nau con publico. I hai un mecanico, una administrativa, una teleoperadora, un piquer y asinas-asinas. Lo suyo treballo no saben pa qué vale. Lo piquer, por eixemplo, ha de devantar un muro y dimpués espaldar-lo, pagando-le por fer-lo. A traviés d'os suyos uellos, conoixemos los mundos laborals de cadaún, cómo han viviu las suyas fayenas anteriors, cómo ye la relación con los mainates y entre ells, quals son las suyas aspiracions...

Isaac Rosa, articulista en medios como Eldiario.es, Publico u El Jueves, ha publicau tamién a-saber-las novelas que han conseguiu premios arrienda. Ista ye una chiqueta choya que s'habría d'ixemenar por tot. Una reflexión sobre lo mundo d'o treballo bien valiosas y de muit buen leyer. En lo Tierra de barrenaus radio 6x19 en leyié iste trocet que me plegó en un momento a on que yera pasando por una situación laboral bien pareixida. Qualsiquier que haigatz treballau mas d'un mes en la vuestra vida, regular que trobaretz a-saber-los trozos que tos i podretz sentir identificadas.

Ella s’obligaba a pensar, porque le ixorrontaba la ment en blanco, sabeba que no existiba, que siempre se piensa en qualcosa, tot y que siga la seqüencia, trianglo, rectanglo, trianglo, rectanglo, pero le deprimiba quan dimpués de siet horas y meya plegaba en casa suya y, en la ducha, miraba de remerar en qué heba pensau ixe día, miraba de recuperar un solo pensamiento y no en yera capable, s’heba estau una día entero sin pensar-ie, concentrada en lo cenyo, prener la tola, meter-la en la maquina, preta lo botón, taladrar, chitar t’o contenedor, redonda, quadrada, redonda, quadrada, por ixo s’obligaba a pensar entre que treballaba, planeyaba lo que iba a fer en salir d’a fabrica, pensaba en lo cabo de semana, organizaba fayenas de casa, repasaba la lista d’a crompa, u remeraba, s’encerrinaba en fer memoria, igual recuerdos importants como banals, remeraba momentos d’a vida suya, s’obligaba a pensar y remerar porque ixo teneba muito d’obligau, d’aforzau, de decir-se a si mesma voi a pensar en isto u ixo, por contra no i pensaba, u nomás pensaba lo movimiento, agafar, amanar, aparar, taladrar, triangular, rectangular, triangular, rectangular y tot y que s’obligaba, lo pensamiento s’iba afeblindo, se disipaba u se tornaba repetitivo, se quedaba entrascada en un mesmo pensamiento circular, sin abanzar. Yera como nadar en una piscina: bi habió un tiempo que bi iba dos dias por semana, le feba honra pa la suya esquena, siempre menazada de ciatica por la postura en lo treballo: yera una piscina chiqueta, sisanta largos, y entre que feba brazadas, paraba cuenta de que lo suyo tozuel funcionaba como en la fabrica, nadar yera la mesma mena d’automatismo que taladrar piezas de tola, brazo dreito abanza, brazo cucho abanza entre que brazo dreito torna ta zaga, redonda, quadrada, redonda, quadrada; uno no piensa en los movimientos entre que nada, no diz agora voi a pasar debant lo brazo dreito, agora lo cucho, lo cuerpo nadaba solo y lo tozuel se desentendeba, acababa tamién calculando, contando largos, multiplicando pa saber quántos metros nadaba y en quánto tiempo lo feba, a qué velocidat, qué distancia heba recorriu en un mes, en una anyada, porque pensar baixo l’augua yera como pensar entre que treballaba, si cantaba se quedaba entrascada en l’estribillo, planificaba qualcosa que heba de fer y tampoco no abanzaba, triangular, rectangular, triangular, rectangular. Bella vegada le’n preguntó a un companyer en salir, lo solo momento pa charrar ya que las pausas en la fabrica yeran programadas pa que los treballadors no s’encertasen, no podesen parlar entre ells, los incheniers explicaban que yera la manera de que no s’aturase la producción, que las maquinas pateixen d’amortar-las y enchegar-las y tampoco no se pueden deixar tanto tiempo en marcha sin actividat, pero ella barruntaba que en realidat yera pa escusar-se que compartisen queixas y acabasen organizando asembleyas, seccions sindicals y vacas. Redonda, quadrada, redonda, quadrada. En l’autobús enta casa le’n preguntó a un companyer, en qué piensas entre que treballas, y l’atro se fació la riseta, dubdó, no entendeba la pregunta, en qué pienso me preguntas en qué pienso. Sí, qué tiens en lo tozuel entre que i yes, repetindo los mesmos movimientos terne que terne, t’alcuerdas de bella cosa u de belún, piensas en las cosas que farás quan en salgas, cantas, fas la cuenta d’o que has produciu, te cagas en los muertos d’a dirección u nomás te concentras en lo que yes fendo, di-me: pero l’atro, sin sacar-se la riseta que le deixaba cara d’apamplau se salvó porque plegó la suya aturada, y si no en yera eslampó igual, dica manyana. Triangular, rectangular, triangular, rectangular. Atra companyera que feba lo mesmo que ella pero seqüenciando manillas de puerta y tapes de deposito en cuenta de retrovisors, le contó en salir que ella no pensaba en cosa, que simplament feba la suya fayena, pero que no le importaba no pensar, ella sabeba que ixo yera un treballo y que heba de fer-lo pa ganar diners, pero no deixaba que le amargase la vida, difuera d’allí teneba maneras d’entretener-se, de curar-se la cansera y l’aburrimiento, yera feliz con lo suyo novio, lo pasaba bien los cabos de semana, veyeba a-saber-las cintas, y antimás yera estudiando a distancia puericultura, le encantaban los ninos, asinas que no le importaba fer siet u ueito horas astí adintro, no yera infeliz, no baruquiaba, asinas lo dició, yo no baruqueyo, ye un treballo y prou, y antimás no le feba goyo de charrar-ne, no yera disposada a dedicar-le un minuto d’o suyo tiempo difuera d’a fabrica, sabeba que bi heba chent que plegaba en casa y contaba como le heba iu, lo que heba feito en lo dia, los problemas que heba teniu, pero yera porque teneban cosas intresants que contar, treballaban en cosas mas intresants que no ista, como lo suyo novio, por eixemplo, que yera comercial y siempre teneba bella cosa a contar, pero ella no, no teneba cosa que responder si lo novio suyo le preguntaba como heba iu lo día, como siempre, igual como ahiere y como manyana, cada chornada yera identica a la anterior y nunca no bi heba novedatz, asinas que pa qué charrar-ne, la fabrica que mereixeba que ella le dedicase ni un segundo d’a vida suya, ni un sacre de preocupación adintro u difuera d’allí. Se despidioron, y ella no le dició lo que le pareixeba, pa no emprenyar-la, pero le habría feito goyo d’explicar-le que lo suyo yera una trachedia, que lo suyo embrutecimiento yera total y que yera la maquina perfecta, la maquina de carne que la interpresa buscaba.

La teorica superioridat moral d'a izquierda

S'acusa a sobén a las militants d'a cucha politica de bambiar-nos d'una suposada superioridat moral. D'eixemplos, n'i hai bells quantos, y no poco vergonyosos. Ye verdat que puet estar que siga un d'os nuestros defectos, que tamién en tenemos. Pero no'n ye menos que dende lo facherío deixan bien facil situar-se en ixos planos quan contrimuestran que la manca de moral ye un exe principal d'a suya ideolochía.

Dende la man invisible d'Adam Smith qui ya reconoixeba lo "natural egoísmo y anglucia" d'os ricos, dica ixa ilustradera "ye lo mercau, amigo" de Rodrigo Rato, ye de tot asumiu y instalau en la conciencia colectiva que lo nuestro sistema capitalista ye de tot amoral. Que las interpresas, y los suyos chefes no tienen por qué amostrar garra mena de comportamiento etico ent'as suyas plantillas. Tot vale, a qualsequier pre, si ye pa que la interpresa creixca y lo caporal amontine mas diners en la suya cuenta. Si dimpués le da por repartir-ne bella micaza, pa forro de bota, se le aplaude porque se considera que no tien porqué. Que tot ixo que ha ganau ye por bell toque divino u un inchenio supremo. Ye verdat, en ocasions, que ixos interpresarios han arrisgau los suyos diners y, por tanto, medios de subsistencia. Pero que les haiga saliu bien, por un regular, no pende d'ixa suposada visión estratechica sino de factors a-saber-los que poco u mica tienen a veyer con las suyas capacidatz. Mesmo si las tenesen, ixo tampoco no les faría mereixedors d'un tracto legal u social diferenciau.

Las leis, pa qui tien diners y recursos a man, se doblan como chuncos. S'adaptan a la manca d'etica suya y d'o propio sistema. Pa qui no en tien, manimenos, son duras, inflexibles y mesmo absurdas. Asinas se torna a confundir "legal" con "etico" y veteme que qui, legalment, explota a las suyas plantillas, paga impuestos a on que millor le convienga y produce a on que le agana, ye bien visto. Entremistanto qui, por circumstancias a on que la mayoría podemos trobar-nos en qualsequier momento, deixa de pagar una factura, le caye tot lo peso d'o sistema en forma d'os cuerpos y fuerzas de seguridat de l'estau que no dubdarán en abatanar-le a no estar que "quiera ir ta misa" u "siga companyer".

La sociedat capitalista, la nuestra, ixa a on que femos la nuestra vida, podría exichir comportamientos eticos, dillá d'a legalidat, a los suyos mainates y liders que ye mas la clase empresarial que no pas la politica. Podría demandar-les que los chornals s'adapten a las necesidatz d'as treballadoras, que se millorasen las condicions de vida, que deixasen d'amontinar bells pocos diners, no guaires, pa que todas en difrutasenos d'un troz mas de tarta. "Legal" no ye "obligatorio". Tot empresario puet esleixir pagar por dencima de convenio a la suya plantilla. U no levar-se la producción ta paises d'o tercer mundo u pagar los impuestos en paradisos fiscals. Que pueda fer-lo no significa que haiga de fer-lo y en ixa elección ye la suya moralidat. Se puet demandar comportamientos morals y eticos a los empresarios, mesmo adintro d'o capitalismo. Pero no se fa. Porque i hai muitos que son deseyando estar en ixe costau egoista d'a sociedat y tener los mesmos comportamientos. Pero sobre tot porque a lo propio sistema le cal ixa falta de moral y etica pa sobrevivir.

Ye cabolioso que no parlo de personas individuals. Chent de mierda, n'i hai a bando en totz dos costaus d'a contienda politica. Me refiero a los prencipios que richen la suya ideolochía y practica politica. Las que fan humor relichioso gosan desfender-se d'a ira d'o fanatismo decindo que "si no quiers que nos faigamos la mofla d'as tuyas creyencias, no tiengas creyencias tant ridiculas". Bella cosa pareixida se i podría aplicar a ista qüestión: si no quieren que nos bambiemos d'una hipotetica superioridat moral, que no tiengan un sistema moral tant infimo".

No ye lo mobil, Ruavieja

D'entre todas las cosas que me molestan d'o Nadal, lo sentimentalismo no ye d'as que mas. Me fa goyo lo que me truca en lo corazonet, las cancions romanticas, las historias d'amor y amistatz eternas... tot ixo. En istos diyas, las publicistas preban de fer servir ixe lechitimo sentimiento pa enguerar-nos lo suyo producto. Eixemplo claro, gosa d'estar-ne los anuncios de lotería, siempre mirando de tocar la fibra sensible pa vender-nos la remota posibilidat de fer-nos millonarios y poder malfurriar en capazos de coca una buena patacada de diners, como va pasar por aquí cerqueta fa bell anyo.

Iste anyo le ha tocau a Ruavieja la venda d'a moto. Lo suyo spot, ya viral, chunta a parellas de personas que se quieren muito. Se les convida a reflexionar sobre lo tiempo que pasan chuntas entre que se charra de totz los minutos que pasamos con lo mobil u l'ordinador. Dimpués de preguntar-les por la freqüencia con que se troban fisicament, se les calcula lo tiempo que les queda de pasar chuntas y empecipia la mar de glarimas. Porque, ye claro, les queda prou menos que no se pensaban. Bella decena de diyas en los millors casos.

Anuncio impecable. Bien realizau, con variedat de perfils pa que i pueda sentir-se identificau practicament qualsiquier, una mosica que acompanya a las emocions... Ni un pero le puedo meter. Ye un buen treballo de Ruavieja. Y d'o capitalismo, l'actual sistema de producción, u como le queratz decir.

M'encanta pasar tiempo fisicament con los mios sers querius. M'encantaría de pasar-ne muito mas. En paso a-saber-lo en retes socials, veyendo series u "mirando-me ent'a pantalla". Pero no culpo a la tecnolochía d'ixo. De feito, la mayor parte d'o tiempo que paso "enchegau", le'n saco a atras actividatz, no pas a estar con las amigas.

Manimenos, cada diya he de treballar ueito horas. Tiengo la "suerte" de treballar a "nomas" vinte minutos de casa mía, asinas que lo treballo me saca quasi nueu horas. Muitas viven prou aluenyadas d'a suya fayena. U han de fer extras a embute, remuneradas u no. U compatibilizar qualques minijobs, con horarios marcianos, pa poder pagar las facturas. Asinas que, lo menos en lo mio entorno, soi d'as que menos tiempo adedica a lo suyo treballo. Si sumamos las horas de dormir, minchar, cudiar la casa, etc. lo tiempo libre se va quedando en no cosa. Ixo yo, que no tiengo borches. Lo tiempo que adedico a la mia militancia social, politica u cultural tamién podría acumular-le-ne a lo sistema, ya que si tenese los mios dreitos y necesidatz garantizadas, no me caldría estar tantas horas reivindicando-los.

¿Quántas horas a la semana podríanos decir que tiengo libres? ¿Libres de verdat? Pa trobar-me con atra persona querida, cal coincidir en lo tiempo y l'espacio. Gracias a ixa maravilla que claman flexibilidat laboral, gracias a toda la chent que va t'as botigas en festivo, la variedat d'horarios de fayena ye por cada diya mas gran, asinas que con muitas personas me ye quasi imposible de quedar por un simple problema d'horarios. Gracias tamién a que "cal acceptar treballos encara que sigan en Laponia", muitos d'os mios sers querius han habiu de marchar d'o país. Asinas que trobar-me con ells requiere un gasto d'un tiempo y diners que no tiengo.

¿La culpa ye d'o mobil? ¿Pasabanos mas tiempo con la chent fa diez anyos? ¿U vinte? ¿U cinquanta? En ixe caso, ¿por qué? Deixo la ideya aquí, por si dengún quiere prener-la: Faigamos ixe mesmo exercicio que fa Ruavieja, pero en cuenta de contar las horas que pasamos veyendo series, u tuiteando fateras, contemos las horas de treballar, las que no cobramos, las que pasamos indo-ie y tornando-ne, los viaches que nos hemos de pretar pa veyer a la familia u los amigos que han habiu d'ixopar a ganar-se las lentillas t'a quinta forca, lo tiempo que pasan en los tramvías toda una cheneración que la especulación inmobiliaria fació fuera d'a ciudat consolidada.

Contemos todas ixas horas, realment malfurriadas, y no pas las que me paso veyendo series, u leyendo, u disfrutando d'o mio tiempo libre solo. Porque ixe tiempo, encara que siga solet, sí que lo disfruto.

Ixa mesma tecnolochía que se suposa que ye culpable de que no pase tiempo con las amigas ye, manimenos, la que fa que contine en contacto con muitas. De chovenon, de muit chovenon, facié un viache ta Irlanda a on que conoixié una burguilada de chent que m'hese feito a-saber-lo goyo de mantener lo contacto. A soben pienso que si hesenos teniu en aquellas envueltas Facebook u WhatsApp, hue seguiríanos charrando-nos y quedando de cabo ta quan. Con muitas d'as amigas d'agora que han habiu de marchar luent, u que viven difuera de Zaragoza, mantiengo un contacto regular gracias a ixas tecnolochías. Nos contamos d'as nuestras vidas, nos redimos chuntas, nos recontamos las desgracias, y nos felicitamos quan pertoca. Gracias a ixas tecnolochías, lo contacto ye muito mas simple y inmediato que fa vinte anyos. Y si bell diya tornan ta Zaragoza, u trobo bell cabo de semana y chunto bellas perras pa ir t'a on que vivan, no seremos dos desconoixidas.

No, Ruavieja. L'entrepuz pa veyer a las mias amigas y personas queridas no ye lo mobil. Ye lo treballo. Ye lo modelo capitalista. Ye tener menos dreitos laborals por cada diya. Ye que muitas han habiu de deixar la tierra suya. Ye que muita chent, simplament, no tien tiempo libre.

L'exercicio ye de facil fer. Cuenta cada diya los minutos que adedicas a cada cosa, y dimpués mira-te a veyer si la culpa la tien lo tuyo mobil u las tuyas condicions laborals y las d'as personas que quiers. 

Exiliadas. Tierra de barrenaus radio 1x05

No sé si haber viviu toda la mia vida en Zaragoza ye una suerte u una desgracia. Ye verdat que no he visto tanto mundo como atras, que no he viviu ixas experiencias tant fundas que te cambean por adintro, que soi bien niquitoso con o minchar u que me cuesta a-saber-lo pasar a muga d'o Coso. Ya no ye que siempre haiga viviu en Zaragoza, ye que as dos casas que he habitau son a 200 metros a una de l'atra. Pero ye lo que he esleixiu.

He quiesto vivir aquí, y siempre lo he conseguiu. Facilita las cosas no tener una vocación clara, ni ganas de fer una carrera profesional. Ir treballando de "lo que salga" y, porque no decir-lo, una mica de suerte, tamién aduyan. Pero o caso ye que tiengo a grandisma suerte de poder vivir an que quiero. 

Atras, muitas atras, han de marchar d'os suyos lugars. En a familia mia bi'n ha habiu casos. Mis pais, antes de naixer yo, y a mia chirmana, dende fa ya quantos anyos. Arredol de yo, son decenas as amigas que han habiu d'espipar, en busca de treballos millors, u simplament de treballo. Tot ixo ya pasaba antes de 2008, pero yera repuyal. Quasi, cosa de hippies, que quereban buscar aventuras u experiencias. Pero dende ixe anyo, a inmesa mayoría d'a chent que he visto marchar lo he feito porque no le'n quedaba atra.

Quan acusas a o poder d'haber creyau as condicions ta que haigamos de hopar, as respuestas son prepotents y toda una faltada a la intelichencia. Nos demandan que marchemos chent que puede esleixir-lo tot. Que puede tener casas en cada país, u dormir en hotels de luxo, entre que as chovens treballadoras han de pasar de tot pa trobar treballos en condicions penibles, entre que troban a faltar casa suya.

Pocas cosas me pareixen más inchustas que l'exilio. Haber de deixar casa tuya habría d'estar un castigo d'os piors d'o mundo, y no una cosa asumida con tanta normalidat. Cambiar ixa "normalidat" costará prou, pero caldrá ir ficando-lo con más importancia en os discursos d'as cuchas, que talment lo tiengan una mica ixublidau.

De tot isto charremos en o cinqueno Tierra de barrenaus radio, con tres compas que habioron de marchar. Dos d'ellas ya son tornadas, entre que l'atro contina en Manchester bien a la tisva de lo que pasa por aquí. 

T'atro programa me deixo l'exilio interior. Ixe que fació, fa y me pienso que continará fendo que muitas haigan de marchar d'os suyos lugars ent'as ciudatz, deixando un Aragón quasi vuedo y una Zaragoza rebutient. 

Ascuita-lo u descarga-te-lo aqui mesmo.

El Corte Inglés y yo

A soben soi treballando en arrienda articlos de vez, y los deixo totz a un costau ta fer-ne unatro que siga de actualidat de tot. Ixe ye o caso de hue, quan a muerte de Isidoro Álvarez, mainates d'os mainates de El Corte Inglés, ye muerto, con toda la rosca que l'han feito medios y periodistas de todas as colors (azulas).

Si en bella cosa tienen razón ye que El Corte Inglés ha influyiu y influye en a cultura en l'estau espanyol y en a mercadotecnia. Muitismo. Y en estar tant present, mesmo yo remero buena cosa d'historias y de opinions sobre iste eixemplo d'o capitalismo más furo. D'experiencias personals y belatra cosa charraré pues, siempre arredol de El Corte Inglés.

Nino

De chicot, El Corte Inglés yera bella mena de paradiso. Encara que me pareixeba que yera a-saber-lo luen de casa mía, os nadals, y t'os cabos d'anyos mios, gosaba de visitar-lo ta viyer totz ixos repalmars plens de chuguetes. A soben mis pais me deixaban en a planta de chuguetes entre que se miraban ropa u simplament alparceaban. Ixe ye o zaguer buen recosiro que tiengo d'o centro comercial.

Preadolescent

Un poquet más mayor, yera en a preadolescencia. Como totz os "rebeldes" d'o mio cole catolico, nos feba goyo d'ir ta botigas a prebar de furtar bella cosa. Yera más bella traza de "paso t'a vida adulta" que furtar porque nos mancase bella cosa. De feito yo particularment furtaba cosas prou inutils. Un d'os puestos favoritos nuestros yera El Corte Inglés, porque teneba de tot, y yera de facil furtar. Encara que tenebanos a los seguratas siempre a la tisva, te les amagabas de camín. U se feban os fatos, nunca no lo he sabiu.

O caso ye que un diya, con uns amigos, hebanos furtau bells rotuladors. Viyé uns altavoces t'a Game Boy y pensé en furtar-los ta revender-los en o patio, pues en casa mia mala explicación teneba que m'hese feito con ixo de baldes. Malas que me lo amagué en a chaqueta, una man me dio en o huembro. Un segurata de paisano, d'os que sí que disimulaban bien m'heba pillau. Tot y estando acollonau de tot, pues siempre soi estau bien gabacho ta istas cosas, me vagó de deixar os altavoces en o repalmar en un inte que lo guardia se chiró a preguntar-les a los mios companyers si ells heban furtau qualcosa. 

Me dentroron en una cambra y habié de deixar totz os rotus. No plegaba ni a 500 ptas y me dicioron que heba de tornar a pagar-lo u charrarían con mis pais. Torné a l'atro diya con os diners, pero sin mis pais y me dicioron que no valeba si no veniban ells. Asinas que decidié fuyir entabant, No les dicié cosa a mis pais y no torné os diners.

Dos u tres diyas dimpués, sono o "telefonillo" en casa mia. Quan pregunté qui yera, una voz respondió "El Corte Inglés". A sangre se me cheló. Yo, que yerrea más bueno que o pan, que en casa mia totz se creyeban que yera un santo, iba a haber de responder por un furto. Y por mentir. Caricacho, m'endrecé ta mai y le dicié "mai, vienen uns sinyors de El Corte Inglés". Sin deixar-me continar, ¡y bien se vale!, mi mai me dició "ah sí, que vienen a prener midas d'as finestras". En ixe inte alenté fundo y marché t'a cambra mia a leyer-me ya bien tranquilo un tebeo, que probablement les hese furtau tamién a ells.

Adulto

El Corte Inglés, dende aquello no teneba ya guaire intrés ta yo. Cosas caras, un segurata siempre dezaga dando mal, ...asinas que la mia relación con o centro comercial practicament desapareixió.

Dica que prencipié a intresar-me por a politica y se facioron vagas chenerals. En as primers no entendeba guaire bien porque yera tant important que El Corte Inglés zarrase. Dimpués lo comprendié perfectament. 

El Corte Inglés ye tot un sinyal d'o capitalismo espanyol. Ye o primer centro comercial "patrio" gran, con condicions de treballo que se adebantoron quasi decadas a las doctrinas más neoliberals. Os dreitos sindicals menos que nulos, o sexismo en l'achuste y condicions laborals d'as treballadoras, a uniformidat absurda, ... 

Remero muitas enrestidas d'a policia. Una policia espanyola que ninvia efectivos por decenas ta guarenciar que ubre. Ta guarenciar que todas ixas Sinyoras y Sinyors (asinas, con mayusclas) plens de laca y gomina pueden tener o concieto de ir a mercar ixe diya, "porque ye o suyo dreito". Remero ixos cenyos de complicidat entre os mainates de El Corte Inglés de Independencia y o chefe d'a policía espanyola, mesmo fendo-se a riseta un ratet dimpués de foter buenos trucazos a qui bi yeranos ta prebar de guarenciar os dreitos d'a plantilla.

Cada vegada que, en acercar-se una vaga cheneral, me charran d'a hipotetica presión d'os sendicatos t'os treballadors ta que no vaigan a treballar, u d'ixas "coaccions", l'eixemplo de El Corte Inglés me vien ta l'esmo. Un puesto a on que SABES que no puetz fer vaga. Que mesmo ixe diya te i has d'estar un ratet antes ta escusar-te os piquetes. Sin cobrar-lo, prou que no. Isidoro Álvarez y totz os mainates de El Corte Inglés, habrían d'estar chuzgaus por extorsión y coacción a la suya plantilla en todas y cadaguna d'as vagas que s'han feito en l'Estau espanyol.

Porque El Corte Inglés, ixe centro que tanto pareixe que ha feito por Espanya y por dar treballo a la chent, seguntes podemos leyer istos diyas, ye o paradigma d'a explotación. Ye o mirallo a on que se miran a resta d'interpresarios ta viyer si pueden explotar bell poquet más a las treballadoras que les permiten levar o tren de vida que levan.

Cada vegada que siento ixas falcas de radio que me informan de totz os centros de El Corte Inglés que ubren os domingos (¿Por qué nunca no ubre o de Ademuz, por cierto?), pienso en toda la pobra chent que les toca de treballar, y en totz os interpresarios que piensan en fer-les lo mesmo a las suyas plantillas. 

Clasista, explotador, animador y complice necesario de enrestidas policials, sinyal d'o capitalismo, estricallador de dreitos laborals, .... El Corte Inglés ye un d'os contraeixemplos perfectos d'a sociedat que yo quiero.