Cromos y violencia. Historias d'un cole de mosens XIV

En los 80 las coleccions de cromos yeran bien diferents a las d’agora. Los albums yeran de papel u cartulina, igual como los propios cromos y mesmo caleba fer servir pegamin pa fixar-los en las suyas pachinas. Dimpués plegarían los apegallos, escusando-nos l’uso d’as puerquizas barras d’Imedio. Pero lo que siempre se me fació bien curioso yera la manera que teneban de promocionar-lo. Igual como con la droga, que diz que la primera dosi ye de baldes, de quan en vez amaneixeba un choven en la puerta d’o cole y nos regalaba l’album y bell par de sobres d’a colección que pertocase. Ya podetz contar, si no i yeratz, que l’empandullo que se feba en salir de clase yera de categoría. Los críos, que ya por naturaleza yeranos de arramplar con qualsequier cosa que fuese de bufanya, nos tricolotiabanos por conseguir totz los sobres que podesenos. Cada cromo que pillasenos en ixe ritual yera un menos que habríanos de pedigoniar a los nuestros pais dimpués. Si te lo montabas bien y conseguibas que lo mozo te’n dase prous, u, en bell despiste, furtar-le-ne un zarpau d’a mochila a on que los guardaba, tenebas meyo album completo. 

Empecipié coleccions d’ixas a brozuecos, pero no en rematé guaires. No en remero que dos: una d’avions y la de Monstruos, que encara conservo. D’a d’o mundial d’o 86 no me’n faltó que lo cromo de Juan Señor, con lo que ixo hodeba. Pero n’i hai unatro album que me’n alcuerdo perfectament y a on que no apegué ni un cromo: lo de Mafalda.

Un día mas salié de clase y sintié, a lo fundo, l’estrapalucio que febanos la cachimalla quan veniban los repartidors de cromos. Corrié sin saber lo que repartiban. ¿A quí le importaba, si yera de baldes? Agafé l’album y creigo que mesmo bell sobre, pero poca cosa. Ixe día hebanos saliu un poquet mas tarde. Dimpués d’a cacera, quan lo mozo heba rematau con lo ritual y amostraba las mans vuedas prebando d’explicar-nos que ya no teneba cosa mas pa dar-nos, me miré lo resultau. Yera un album de Mafalda, un personache que nunca no m’ha feito guaire gracia y menos en ixos anyos, en un entorno de cole de mosens no mixto, a on que un personache femenino y con ixe conteniu yera “cosa de chicas”. Asinas que le’n ufrié a Santi (nombre ficticio), un d’os mesaches que veniba enta casa con yo porque yeranos vecins d’a mesma carrera. Lo pilló, se lo miró, y lo fue a aventar t’a vasuera. Yo le’n dicié que no, que si no lo quereba que me lo quedaba yo que ya le daría bell uso. Siempre he teniu bell poquet de sindrome de Diochenes y d’atra man yera pensando en ufrir-le-ne a belatra persona que sí que le fese aprecio. Ell se negó a tornar-me-lo. S’estimaba mas de fer-lo micazas. La cosa acabó con una baralla que me deixó por tierra, plorando y habendo recibiu buen amiro de lapos.

No yera lo primer sobo que me foteba. No en estió lo zaguer. Bi habió un tiempo que se tornó un costumbre suyo. M’acompanyaba dica casa, me daba buen batán y se’n tornaba tranquilo t’a suya. Prenió caracter quasi ritual. Bell día se le fue la man, u mis pais me viyoron pior que de cutio, u decidié de chivar-me-ne u quemisió - tiengo ixos anyos un poquet foscos en la mia memoria - pero lo caso ye que charroron con lo pai de Santi pa explicar-le lo que yera pasando. Tot y que la cosa se calmó, los sobos continoron, tot y que con menos freqüencia. Sisquiá quan totz dos marchemos d’o cole, yo ta entrar en lo Medina Albaida y ell no sé t’a on, acabó aquello. Pa forro de bota, a los dos nos feba goyo la mesma mesacha y quan empecipié a festellar con ella, sabeba que en qualsequier momento se le podeba ir la flama y que ella, yo u totz dos acabasenos estando victima d’a suya violencia. Afortunadament ixo no pasó y, china-chana, perdiemos lo contacto de tot. Fa decadas que no sé cosa d’ell.

Pero lo que con los anyos me deixa enarcau ye que en tot ixe tiempo nunca no lo identifiqué como violencia u maltracto. A pesar d’os lapos y los sobos, seguiba acompanyando-lo voluntariament dia sin atro ta casa suya. Nos deixabanos tebeos, compartibanos lo mesmo club de rol, iba ta casa suya a chugar y ell veniba ta casa mía. En la cambra suya ascuité por primer vegada a Barricada u Tako, las primers collas de rock duro que conoixié. Quan empecipiemos a salir de bars, ibanos chuntos t’o Planta Baja l’Agujero Negro u lo DeVizio. Tardé a saber qué anyos en parar cuenta de lo que m’heba feito. Y quan digo muitos, digo que en estié conscient fa bien poco.

Tenebanos normalizada de tot la violencia fisica. Parte veniba de man d’os mosens que no dubdaban mica en fer-la servir. Pero entre los propios ninos yera luengache cutiano.Yo tamién repartié bella vegada. Levaba lunetas dende los seis anyos y si belún se’n feba la mofla yera la millor manera que conoixeba de desfender-me. Atras vegadas, yo no empecipiaba las barallas, pero no me quedaba recibindo.

Cuento que no me quedó garra trauma, u lo menos no n’he parau cuenta, por creixer en un entorno asinas. Ni por los batans que recibié ni por lo cutiano d’a violencia. Pero luent de creyer que ixo forcha no sé qué costodias que dicen por astí, creigo que lo deseyable ye reducir a la minima expresión la violencia vivida en las aulas, vienga d’a on que vienga. Por ixo, totz los programas y actividatz que se fan agora enfiladas a acabar con lo bullying, l’acoso y todas las formas de violencia me pareixen que fan a saber que falta y cada euro invertiu fa d’a sociedat nuestra un puesto millor a on que vivir.

Cómo conoixié a los superherois

Quan me miro la mía colección de tebeos, cosa que foi a sobén, goso pensar dos cosas. La una, a ón ficar tot lo que contino mercando y que fa anyos que no i culle. La casa ye chiqueta y por cada anyo tiengo menos espacio. La segunda ye toda la historia y historias que i hai adintro y arredol de muitos d’ixos comics. Sobre tot, d’os primers, que son d’os que hue quiero charrar.

En casa mía no leyeba tebeos de superherois dengún. Manimenos, sí que tenebanos mortadelos a embute. Viellos, con mas d’un zancocho y maniaus por la decena de personas que los heban leyius. Cuento que ixos serían los míos primers comics, chunto con bell Zipi y zape, los Don Mikis y cosas asinas. En la Biblioteca d’Aragón, la que i hai encara en la carrera Dr. Cerrada, teneban una parte infantil que yera un lamín. Astí conoixié a Asterix y quantos atros comics, como Tintín, encara que iste nunca no me fació guaire goyo. No sería la zaguer vegada que ixa biblioteca sería bien important en la mía vida, pero ixa ye atra historia que ya recontaré…

Dende que los superherois blincoron t’o cine con X-Men, Iron Man y lo Spiderman de Raimi, empecipioron a fer-se mainstream y ya no i hai dengún que no n’haiga sentiu parlar. Pero en aquellas envueltas no yera tant cutiano. Tot y que los tebeos m’encantaban, lo d’os superherois estió qualcosa de tot desconoixida pa yo, dica ixe día que mi mai fue a mercar lo suyo paquet de Ducados ta una botiga de Cambrils.

Coleccionaba G.I.Joes, los monyacos ixos de soldaus americanos. En teneba buen trapacil y podeba estar-me horas chugando con ells. Entré con mai t’a botiga. Yera la tipica de placha que lo mesmo te venden prensa, que flotadors, refrescos u lunetas de sol. Entre que se pillaba lo tabaco aproveité, como teneba costumbre, pa alparciar las revistas. Abaixo de tot bi heba un muntonet a on que bi heba paquetz de quatre publicacions: dos de pasatiempos y dos comicscon un plastico que los agafaba y un papelot que indicaba que tot valeba quatre perras. Astí vide por primer vegada un comic d’os G.I.Joe. No sabeba nian que existiban asinas que facié uellos de camín. ¡Un tebeo a on que los míos chuguetes cobraban vida! A escape le’n demandé a mai, que me lo mercó. Sabeba perfectament que con ixo sería entreteniu firme rato. Prenié lo paquet, le dié a mai tot lo que no yera lo tebeo d’os soldadetz, y me lo leyié de punta ta coda. ¡Qué me sé yo quantas vegadas me lo leyería! Astí yeran Ojos de Serpiente y Sombra fendo cosas ninja y yo ixuplidaba la Mediterrania que teneba debant pa concentrar-me en chupir-me d’as suyas aventuras. Pero bi heba unatro tebeo en ixe blister. Un numero de Los nuevos vengadores. Habendo-me leyiu tantas vegadas lo G.I. Joe y tot y que no m’intresaban ixos personaches que encara desconoixeba, decidié de dar-les una oportunidat. Astí yeran Ojo de Halcón, Iron Man, Tigra, la Bestia u Pájaro Burlón, entre atros, ubrindo-me un nuevo mundo encara que yo no lo sabese.

Poco tiempo dimpués, acompanyando a mai atra vegada t’a mesma botiga, me facié con unatro G.I.Joe que, en ista ocasión iba acompanyau por un numero de Capa y Puñal. Ixos quatre estioron los míos primers comics Marvel, que leyeba terne que terne ya que, t’a part d’alavez, yeran toda la mía coleccción.

Descubrié, en lo colechio, que bell companyer de clase tamién leyeba tebeos de superherois. Mas que no me pensaba. Empecipié a chuntar-me mas con ixos mozos, pa charrar de tebeos y chugar a rol, que tamién lo conoixié en ixe tiempo. S’encertó antimás que cadaún teneba preferencias bien diferents: Sergio yera d’o Motorista Fantasma, Pablo de Los Vengadores y lo Capitán América, Javi de Lobezno, Edu de La Masa, antes que empecipiasenos a decir-le Hulk y Toño, como teneba diners a capazos, se lo mercaba tot. Lochicament, compartibanos tebeos - sobre tot con Toño - y asinas conoixebanos a lo superheroi que le flipaba a l’otri. Antimás, en lo Club Choven(2), tamién bi heba bell tebeo de Marvel en la minibiblioteca que teneban.

Cuento que sería en bell tebeo d’ixos que conoixié lo Taj Mahal. Los tebeos encara se vendeban sobre tot en quioscos, papelerías y botigas, pero adintro d’as suyas pachinas amaneixeba un listau de librerías especializadas de tot l’estau. Mas que mas, n’i heba en Madrit y Barcelona pero, a la fin d’ixe listau, yera Zaragoza con nomás un nombre, Taj Mahal, y una adreza en la carrera Juan Pablo Bonet. La mía ciudat d’alavez yera muito mas chiqueta. Tasament heba pasau d’a Glorieta Sasera quan ibanos ta El Corte Inglés a pasar la tarde d’o sabado en la planta de chuguetes. Asinas que quedar con los míos amigos pa ir-ie, y estando tant chiquetz pa forro de bota, estió toda una aventura. Trobemos la botiga, muito mas chiqueta que no nos pensabanos. Allá t’a on que te mirases una ripa de supersers te cusiraba. No yera como los quioscos u las botigas, a on que hebas de rechirar entre lo Pronto y la Vale pa trobar un numero random de La Patrulla - X. Astí los teneban totz, bien ordenadicos y visteros. En lo fundo d’a librería mesmo bi heba comics en anglés, traitos dreitament d’os USA, y fendo-te spoiler d’o que leyeríanos bell anyo mas tarde ya que las traduccions tardaban a-saber-lo y lo gap con la edición yankee yera bien gran. La botiga feba una ulor que nunca no heba sentiu, y que nunca no ixuplidaré, que automaticament me trayeba t’o tozuel la ripa d’historias que leyeba entre las pachinas d’ixos tebeos. Lo suyo amo siempre sabeba trobar lo que le demandases y nos atendeba de pistón a pesar d’o catenazos que yeranos y de tot lo tiempo que nos fotebanos astí adintro alparciando. Muito tiempo dimpués, facioron casamuda una mica mas t’alla en lo local que hue contina ubierto. Agora son los suyos fillos qui lo levan y qui me furneixen d’a mia dosi superheroica trenta anyos dimpués.

En ixa primer visita, u talment a l’atra, me merqué los dos numeros que de verdat me farían un coleccionista de comics: los numeros 1 d’as segundas edicions de La Patrulla - X* y Los Vengadores*, que se correspondeban con lo Giant Size X-Men #1 (la segunda chenesi (3)) y con Avengers #164, la primer parte d’a saga d’o Conde Nefaria, que iba chusto antes d’a saga de Korvac. Con ixos dos, feban la primer meya dotzena d’una colección que hue a fe que blinca los tres mil numeros USA.

No teneba cauquerré pa mercar tot lo que quereba y adubiba a leyer, asinas que heba de buscar-me las manyas d’atras maneras. Lo debantdito Toño y la suya colección estioron una buena fuent de material. Visitaba a sobén las bibliotecas municipals que empecipiaban tamién a tener comics en los suyos repalmars. Y encara plegué a vivir una mena de negocio que hue ha dispareixiu de tot, lo menos en Zaragoza.

En lo Coso, bien cerca d’a carrera San Lorenzo, bi heba una librería de viello bien chiqueta. Amuntonaba una ripa de material composau sobre tot por las noveletas ixas d’aventuras u d’amor que se vendeban a pres baratismos. Entre toda ixa parrafiquera de librotz teneban una parte adedicaba a los comics con lo mesmo radiu criterio. Igual te trobabas un Hazañas belicas que un Mortadelo que lo que a nusatros nos intresaba, que yeran los comics de superherois. Yeran usaus y bien usaus. Beluns en un estau penible. Podebas mercar-los, prou que sí, pero a lo que ibanos ta ixa botiga yera a cambiar-los. Si les ne levabas un d’os tuyos y pagabas bella perra - no m’alcuerdo quanto, pero yera muito poco - te’n daban un d’os que teneban. Asinas s’iba esviellando lo muntón de tebeos con lo que iba deixando-ie la mozardalla d’o barrio. T’a part d’alavez yo ya yera bien fetichista y me costaba a-saber-lo desfer-me de qualsequier d’os mios quiestos tebeos por malo que fuese, pero bell cambio sí que facié. Y sobre tot, me leyeba totz los que cambiaba Edu, que dimpués de leyer-los no quereba conservar-los como tresoros y a qui siempre le tenió igual ixo de coleccionar.

Bibliotecas, librerías de viello y l’intercambio con los amigos: asinas podié leyer tantas y tantas aventuras que hue encara remero. En las reedicions que se fan agora, y que afortunadament ya me puedo permitir, trobo toda aquella machia que sintié en ixos anyos. Lo tiempo ha pasau y bella historia me sigue encantando. Con atras me foi cruces de cómo me las podié trusquir en lo suyo día. En qualsequier caso, siempre agradeixeré que mai decidise mercar lo paquet de tabaco d’aquell día en ixa botiga de Cambrils que, sin saber-lo, m’ubriba tot un mundo fantastico que contino disfrutando por cada día.

En leyendo... Anatomía de la lengua, de Elena Álvarez

No sé si le pasará a mas chent u si ye cosa d'as mías inquietutz y intreses, pero de tot lo profesorau que he teniu en la mía etapa escolar, lo que millor recuerdo, pa bien y pa mal, ye lo de luenga. Por un regular, pa mal. Ye evident que la materia m'intresa, y muito. En l'instituto tenié la que estió la millor profesora mía de totz ixos anyos, ya tos lo reconté. Pero toda la resta estioron prou penibles.

En Corazonistas en tenié un d'os primers. Feba de l'asignatura un catenazo. Una d'as cosas que hebanos de fer yera unas fichetas d'ixas blancas que bi heba antes mas, con una doble ringlera roya alto que amugaba l'espacio d'o titol d'a ficha, y bella ringlera simpla azula abaixo. Las hebanos d'emplir con parolas y la suya definición. En casa teneba un diccionario Iter Sopena que le foteba buen ferrete. M'encantaba ixe libret. Asinas que de todas la ixautadas que febanos en clase, lo menos con ixa pasaba lo rato. Aquell anyo vide Ghostbusters, tornando-se a l'inte una d'as mías cintas favoritas. Asinas que a aquell mosén le facié ficha de toda parola que i amaneixese. 

En l'instituto, en iste aspecto, la cosa no milloró guaire. Las dos primeras personas que me facioron clase de luenga tornaban con toda ixa retolica de l'analí sintactico que tanta bola se me feba. Sisquiá yera que me pareixese embolicau. De feito se me daba alto u baixo bien adedicando-le muito menos tiempo que a atras materias. Aquello, antimás d'aburriu como quasi tot lo que aprendebanos, se me feba inutil de tot. No le trobaba sentiu. 

Me calió deixar l'instituto, empecipiar a intresar-me por las luengas - en plural - yo mesmo, trobar chent que de verdat le apasionase lo tema y, sobre tot, haber d'explicar-las yo quan prencipié a fer clases en Nogara pa trobar pa qué valeba tot ixo de l'analís sintactico. Y pocos anyos mas pa parar cuenta de que, pedagochicament, tien una utilidat prou radida a la hora d'explicar las luengas a la mayoría de chent.

Fa bell día, acabé de leyer Anatomía de la lengua, de Elena Álvarez Mellado. En la contraportalada amaneixe lo siguient texto "¿Por qué en el cole no nos contaban estas cosas" Esta pregunta retórica se la hace la autora cuando está a punto de terminar el libro que ha escrito. Se la hace ella y también se la formulará todo aquel que lea esta obra. ¿Por qué? No puedo trobar millor texto pa resumir lo que pensé en rematar-lo. 

Anatomía de la lengua fa un recorriu por tot lo funcionamiento basico d'as luengas d'una manera bien entretenida y fendo que no podamos zarrar un libro que se leye en un petén. Parte d'o texto se centra en lo castellano, pero con la proximidat lingüistica que tenemos, muito ye aplicable a l'aragonés. L'autora espalda muitos d'os puestos comuns en las conversas sobre luenga que amaneixen de cabo ta quan en las rufiertas de televisión, a on que lo convidau d'o día igual t'opina sobre l'euskera que sobre hidrolochía, y que dimpués se reproducen memeticament en cenas familiars, puestos de treballo y barras de bar.

Igual como aprendié mas fisica con Asimov y Sagan que en las endormisquiaderas practicas d'a universidat, los articlos y libros de divulgación lingüistica d'Elena Álvarez y atras autoras me dispiertan muito mas intrés que aquells horribles libros de texto. Y sobre tot dan una buena envista a qui quiera fer un paso mas dimpués ent'os manuals mas tecnicos a on que sí que caldrá aguantar toda la terminolochía tecnica y la condescendencia de tantos autors.

Lo libro ye mas que recomendable pa qui quiera ficar-se en lo mundo d'as luengas y no tienga guaires conoiximientos. A qui ya en tienga, no le descubrirá masa de nuevo, pero disfrutará de curiosidatz que talment no sabese y, sobre tot, trobará una sobrebuena manera de comunicar la luenga y de fer-la intresant. En lo caso de que no hese leyiu nunca a l'autora, conoixerá antimás a una d'as millors divulgadoras lingüisticas d'o momento. Muitos d'os suyos articlos publicaus en Eldiario.es fan buena honra de tener-los a man pa quan lo cunyau d'o día diz sanseladas por retz u en lo mundo fisico. En un tema tant polemico y que tanto se'n charra, y con tant pocos conoiximientos, caldría muita mas divulgación lingüistica pa crebar tantos mitos que se repiten terne que terne y que son de facil vulcar si sabemos cómo. 

Que m'entivoqué d'estudios universitarios ye qualcosa que tiengo bien claro fa anyos. Que en lo costau d'as "letras" tampoco no trobaba guaire que me clamase l'atención, tamién. Talment si hese leyiu de chiquet libros como iste, y quantos atros que he conoixiu ya de gran, las cosas hesen cambiau. Nunca no lo sabré.

L'amigo rico. Historias d'un cole de mosens XIII

Corazonistas, como quasi totz los colechios privaus pagaus por todas y totz, yera un cole pa chent con diners. Como tantos atras, feban servir toda mena de trucos pa que ixo no fuese evident ya que, en teoría, no pueden trigar a l'alumnau por lo suyo poder adquisitivo. La realidat yera que lo nivel economico d'a chent que bi estudiabanos yeran meyo-alto como poco.

Con tot y con ixo, bell "pobre" se les colaba. Recuerdo que tenebanos en clase un mozo que la suya familia no yera "de perras". No portiaba las zaguers maripis modernas de moda que bi hese, gosaba d'heredar ropa d'os chirmans y cosas asinas que en lo cole s'acumulaban a chent sin recursos. Estió tamién un d'os primers que empecipió a furtar en El Corte Inglés y en atras botigas mas como esporte que como nesecidat. Y qui les amostró como fer-lo a muitos atros. A soben se le clamaba "chitano" como faltada, asinas que quan leyiemos un diya en clase "Muerte de Antoñito el Camborio", un poema de Lorca que charraba de l'asesinato d'un chitán, a ixe mozo le cayió la embotada de "Camborio" pa la resta d'anyos que pasó en Coras.

En l'atro costau d'o nivel economico de clase mía yera Paco (nombre falso), lo mio "amigo rico". La mia familia teneba bell vinclo con la suya, no sé encara quál, y lo caso ye que empecipiemos a quedar chuntos. Ell viviba en un callizo d'Independencia, en un pisazo gran de tot. Le feban goyo las mesmas cosas que yo, asinas que a escape faciemos pacha. Yo coleccionaba G.I.Joes, uns monyacos de soldadetz que yeran bien de moda en ixos anyos. Cada monyaco costaba bellas 400 pezetas, si no me'n alcuerdo mal. Pero teneban tamién avions, autos y vehiclos hiperbizarros de toda mena, que valeban diners a embute. Yo en teneba belun, d'os chiquetz. Iste mozo los teneba quasi totz, incluyidas no una sino DOS Rolling Thunder, que yera como la mega ultra super nau d'os GIJoes. Un  zarrio a on que podebas calar soldadetz a trompicuesco. Me lo pasaba de bitibomba en casa suya, ya que en tener-ne dos, siempre me deixaba levar-ne una en las batalletas que febanos.

Dimpués empecipié con los tebeos. Yo me feba bell par de coleccions. Ell, todas. Gracias a ixo me podié leyer coleccions enteras, y entender muito millor un universo Marvel que en los ueitanta encara se podeba adubir a comprender de tot. Quan arriboron las consolas t'o nuestro universo ludico, prou que la cosa continó igual. Dimpués de buen ferrete, consiguié en unos reis que me mercasen la Game Boy. La viella, sin colors, y con lo chuego d'o Tetris que durant muito tiempo estió lo unico que tenié. Pacó la tenió malas que salió. Igual como la NES, la Master System, la MegaDrive, ... y mesmo la NeoGeo, la sola que arribé a tocar en la mia vida. Su pai guiaba un Toyota Supra, que a yo me pareixeba millor que Kitt, l'auto de "El coche fantástico".

Quan salibanos t'os recreativos, conoixié con ell por primer vegada lo concepto de "convidar" entre personas d'a mesma edat. Dengún no m'heba convidau nunca a cosa, y tardaría muito en tornar a fer-lo. Paco siempre me pagaba bella partida a dobles en las maquinetas quan yo ya heba acotolau feba tiempo los diners que me daban en casa. Y mesmo bella vegada dimpués nos febanos un refresco y bella laminería a o suyo cargo. A yo no me feba guaire goyo aquello, me pareixeba una mica humillant, pero con ixa edat ¿qui le diz que no a unatra partida y bell par de regalicias?

En casa mia nunca no me faltó de cosa. Quan dimpués ixamplé en l'instituto lo mio universo personal, paré cuenta que, de feito, yo veniba d'una familia "afortunada" en lo plano economico. Pero en lo cole, yo teneba "lo normal" de chuguetes y, pa forro de bota, compartiba amistat con uno que teneba un nivel economico a anyos luz d'o mio. No entendeba como aquell zagal podeba permitir-se totz aquellos chuguetes, comics, consolas y videochuegos, y a yo se me negaba l'acceso a tot aquello. Ni por qué mi pai heba trigau tener un R-19 en cuentas d'ixe Toyota tant pincho. Con las explicacions que me daban, me pasaba como con las que me daban sobre la relichión, que no les veyeba mica sentiu. 

En pasar ta l'instituto, me trobé con la realidat. Astí convivié con chent con muitismos menos recursos que la familia mia, y con beluno que mesmo teneba muitas mas perras que Paco, pero de familia de royos que heban decidiu que estudiase en la publica. Tamién tenié profesoras y profesors que me dioron las ferramientas pa poder deducir por qué unas personas tienen uns nivels economicos y de vida y atras, atros. Probablement si hese acabau BUP y COU en Coras, hese tardau muito mas a tener ixa envista, a conoixer ixa atra parte d'a realidat. U mesmo talment no la hese conoixida nunca. 

Coras, como totz los coles privaus, trigaba y triga a los alumnos por nivel economico familiar. Ixo, antimás de inchusto, niega a lo suyo alumnau lo contacto con toda una realidat socioeconomica en una etapa de l'aprendizache a on que la empatía con atras personas menos favorecidas habría d'estar fundamental. Pior educación, y financiada por todas.

Lo rol. Historias d'un cole de mosens XII

No tiengo guaire claro qui, quán ni cómo arribó t'a mia vida lo rol, pero se i estió quantos anyos, ocupando muitas horas d'o mio entretenimiento. Empecipié a chugar en Corazonistas, con los amigos que teneba alavez, y la cosa duró dica l'instituto quan dos factors acaboron con ixa afición: Magic y l'alcohol. ¿En qué grau? No sabría decir-lo.

Agora ye una mena de chuegos prou popular y conoixida, pero en la Zaragoza de zaguers d'os 80 y primers d'os 90, chugar a rol yera qualcosa bien rara. Cuento que la primera partida, me la faría a Lord of the rings, que yera d'os pocos que existiban en castellano en aquellas envueltas, y que le feba a saber qué goyo a un d'os mios amigos. Pero quan de verdat me i aficioné estió con lo Runequest. No porque lo chuego fuese millor u pior, encara que en la mia opinión yera prous nivels por dencima de Lord of the rings, sino sobre tot, porque empecipié a fer de master. Lo rol me feba a-saber-la honra pa dar salida a una d'as mias grans falagueras: esmachinar historias fantasticas. L'universo Runequest teneba un ciento de razas, monstruos, armas, fetizos, .... y un sistema de chuego bien dinamico. ¡La d'historias que viviemos chugando-ie! Si tenese millor memoria, u hese guardau por bell cabo totz los argumentos d'ixas aventuras, ¡quántas cosas i trobaría!.

Con ixe Runequest entré en lo mundo rolero. T'a part d'alavez quasi no bi heba manuals de rol en castellano. Lo poco que s'heba traduciu yera, antimás, bien caro pa las pochas vuedas de zagalons de tasament una decena d'anyos. Asinas que lo que mas febanos yera tirar d'os libros que bi heba en las bibliotecas zaragozanas. Siempre bi heba bell pai u mai que treballaba con una fotocopiadora cercana y nos copiaba las partes que nos fesen falta. U mesmo manuals enteros. Encara en conservo belún d'ixos, feito a pur de chirar fuellas d'un libro amprau en los ratos libres d'uns amants pais de frikis.

S'iba metendo de moda y no sé cómo, pero mesmo nos faciemos con bell manual en anglés. La primer vegada que chugué a Vampire u a Cyperpunk encara tenebanos las fichas de personache en ixa luenga. Lo nuestro radiu conoiximiento en ista tierra de argüellosa ignorancia monolingüe, feba que a soben nos hesenos d'inventar, u "interpretar librement", tal u qual regla de chuego.

Ixos chuegos los conoixié sobre tot en las primeras chornadas de rol que se feban en la ciudat. Por las casas de choventut y centros civicos se'n iba organizando por cada diya mas. Yeran los nuestros momentos de trobada de muita chent de totz los barrios, que compartibanos la pasión por superherois, monstruos, sers fantasiosos, naus galacticas y distopías futuristas. Lo mas friki que saliba por la tele yera los Cazafantasmas, asinas que encara yeranos raros de verdat. En ixas chornadas, prebé chuegos a embute: Star Wars, Marvel Cthulhu, Stormbringer, Blood & bowl, Warhammer, ... En unas que se facioron en Sant Chusé vide por primer vegada un capitol de Bola de drac en catalán, entre atras cosas porque no los tenebanos en garra atra luenga. Belún los heba grabau, porque pillaba lo sinyal de TV3, y nusatros nos quedabanos embabiecaus veyendo por primer vegada a Son Goku fendo un Kame Hame Ha.

Taj Mahal, la botiga de comics que encara contina ubierta, yera la que nos furniba de material las pocas vegadas que en mercabanos. Y de dados, claro. Yera d'os pocos puestos a on que podebas mercar-ne. Totz prebabanos de tener-ne de bien pinchos. Poco dimpués d'empecipiar a chugar, ubrioron Ludo-Z, botiga especializada nomás en rol. Belatra vinió dimpués. Todas de curta vida. No debeba d'estar guaire rendible, ixo de tener-nos horas arrienda chugando en los espacios que nos habilitaban, pero sin gastar ni una perra.

Chugabanos a rol en las casas de cadaún de nusatros, y tamién en los recreyos. Siempre que tenebanos bell rato, encara que no fuese que la meya hora d'o descanso, i chugabanos. A la fin faciemos lo paso lochico que fa qualsiquier rolero que de verdat s'emocione con los chuegos: fundemos un club de rol. Lo local, nos lo consiguió un mozo que viviba en Reina Fabiola. En la parroquia d'a ilesia se feban qualques actividatz. I heba mesmo un local d'ensayo pa collas de mosica. En una d'as salas, bien gran, teneban montau un taller de costura, u bella cosa pareixida, pero que lo heban albandonau. Lo mosen d'a ilesia nos deixaría lo local a truca de que lo escocasenos y lo deixasenos bien presto.

Como tot lo nuevo, lo rol alarmaba a los sectors mas conservadors d'a sociedat. A traviés d'articlos en revistas y de reportaches en televisión, los medios de comunicación espantaviellas ixorrontaban a las nuestras familias decindo-les que nos creyebanos las partidas y que remataríanos totz alunaus de vivir en ixe universo ficticio. Nusatros nos desfendebanos explicando-les que en atros puestos d'o mundo ixos chuegos heban arribau a saber qué anyos antes, que no heban suposau garra problema, que mesmo se potenciaban qüestions como la empatía, ... En ixe ambient fundemos lo club. 

Lo mosen heba amostrau una mica de preocupación por tot lo que heba sentiu por la tele, pero hebanos feito bien lo nuestro treballo y le hebanos feito venir a plego. Ya tenebanos local. Quedemos, pillemos bell par d'escopallos y badils y nos metiemos a deixar tot aquello bien pincho. Mesmo un vecín mio se baixó un radiocasete y metiemos una cinta d'os Manowar a tot estrús entre que apanyabanos lo local. L'alegría de tener un puesto pa chugar, lo heavy sonando entre ixe paradiso que yeranos escobando y lo feito d'estar preadolescents fació que en bell momento las nuestras escobas esdevenisen espadas y pretasenos a blincar por toda la cambra barallando-nos como caballers. Yeranos Lancelots, Aragorns, Luke Skywalkers,... de mesa en mesa desfendendo Camelot, Gondor u la Nueva Republica. Quan, de bote y voleyo, lo mosen ubrió la puerta y nos trobó asinas. Con capa casco y espada u trapo, pozal y escoba, seguntes la envista. Nos quedemos chelaus, pensando en como tornar a explicar-le que no nos creyebanos las aventuras que chugabanos y que no nos yeranos tornando varrenaus. Y baixemos la radio, claro.

A la fin, no pasó cosa aquella vegada. Lo club existió qualques anyos. Se dició Excalibur en primeras y Darkhold dimpués. Nos chuntabanos totz los domingos de maitins pa chugar a tot lo que se nos ocurriba. A soben febanos tarde en casa a la hora de chentar tot y que quasi totz vivibanos bien cerca. 

En ixe tiempo fuemos creixendo y, como he dito en empecipiar, arriboron los dos factors que facioron que s'acabase lo club de rol y la mia afición a ixa mena de chuegos. D'una man, Magic. Aquell chuego de cartas lo implió tot. De nuevas, las primers versions las chuguemos en anglés. Por bella BBS (lo mas pareixiu a un foro d'internet que existiba alavez) heba leyiu sobre la suya existencia. Un chuego que yera revolucionando los USA y que moveba a saber que diners. Me pillé un primer faixo en Taj Mahal, que continaba estando la botiga de referencia pa tot isto. China-chana totz acabemos aprendendo a chugar y participando en los primers torneus que se facioron en Zaragoza. Lo primer d'ells, a on que tenié la suerte de participar, se celebró en l'Hotel Palafox. Debant d'as eternas partidas de qualsiquier chuego de rol, que nos podeban levar meses y que exichiban que fuesenos totz presents, Magic levaba bells minutos y no te feba falta que unatra persona.

Ixo se combinó con l'adolescencia. Ya hebanos pasau ueiteno y muitos hebanos empecipiau a zorriar. Yeranos chovens y agora firmaría por tener las resacas d'alavez, pero a nusatros nos pareixeban horribles. Los domingos de maitins ya no tenebanos ganas de rol. Febanos tarde, baixabanos lo faixo de Magic, nos febanos bell par de partidas, y ta casa a aguardar a que bell amigo nos gritase pa alparciar de tot lo que heba pasau la nueit d'antes.

Lo club de rol duró poco mas. Encara, de cabo ta quan, me trobo con belún d'os que febanos parte y recordamos las nuestras partidas como si fuesen cosas que nos hesen pasau de verdat: "la vegada aquella que prebés de disparar dos flechas de vez y faciés pifia", "quan t'habiés de buquir a un orco pa que nos deixase pasar", "aquell master que vinió convidau y que s'encarranyaba porque le matabanos totz los personaches principals",... ya podetz contar. Historias de lolos frikis. 

Lo rol ocupó una parte muit important d'a mia vida y estió la primer manera que tenié de contar historias fantasticas. Lo recuerdo con muito carinyo, pero con ixa sensación d'incomprensión de man d'un adultos que reaccionaban con refús debant d'as cosas nuevas. Hue lo rol ye mas conoixiu y no tien tantos tabús como alavez, pero la reacción d'os adultos debant d'as novedatz sigue estando la mesma.

Las mozas. Historias d'un cole de mosens XI

Un ser imachinario charró a los chefes d'o mio colechio y les dició que lo millor pa la nuestra educación yera que nos separasen d'a mitat d'a población, trigando como criterio los nuestros chenitals. Ixo, que los chueces fachas d'un estau aconfesional han decidiu que paguemos entre todas, tien conseqüencias educativas muit grieus, como que me plantase con tretze anyos sin haber puesto creixer con zagalas d'a mia edat y tener alavez un problema de relacions prou grieu con ellas, dica que me i facié.

Las mesachas nos embabiecaban a muitos de nusatros dende crietz. T'a part d'alavez sí que yeran ixos "sers misteriosos" que diz lo topico masclista. Sers que no hesen estau misteriosos si hesenos creixiu sin troixar-nos. Pero como no las tenebanos en casa, hebanos d'ir a buscar-las por la redolada.

Lo primer colechio an que nos aventuremos, como Livinsgtones preadolescents, estió lo Gascón y Marín. Un companyer de clase - no me preguntetz cómo lo aconsiguió- festellaba con una zagaleta d'ixa escuela. Con ixa enchaquia, una colla d'amigos quedabanos con los dos y marchabanos ta un callizo d'o Paseyo la Mina, an que viyebanos como se besuquiaban toda la tarde. Totz dos levaban aparato dental, y siempre febanos chanzas con las posibilidat de que las suyas ferrallas d'enganchasen y no podesen desbesar-se, habendo d'avisar a sus pais pa que venisen y los descubrisen pecando. La resta mirabanos de charrar con las mesachas, avergonyaus de tot, mirando de fer-nos con una novia, sin saber guaire bien lo que ixo yera.

Las siguients expedicions nos levoron ta Carmelitas. Astí conoixeba a una zagaleta, filla d'uns amigos de mis pais. Pasabanos por la puerta quan en saliban a viyer si escunzabanos con la que nos fese goyo. Pa quan feban fiesta d'o cole, y bella tarde que las monchas andasen espisguardadas, gosabanos de colar-nos-ie pa alparciar qué podeba haber-ie de diferent en aquell patio misterioso freqüentau nomas por zagalas. Las dificultatz pa entrar-ie, y lo feito de que me pareixeban una mica pixautas, fació que a escape chirasenos t'o tercer destin en lo nuestro viache en busca de companyía femenina.

Asinas pleguemos en lo que mas nos duró. Lo colechio publico Miraflores. Lo tenebanos bien cerqueta y lo patio suyo yera a ran d'a carrera y d'o parque. Una cleta nos separaba, pero nos apanyabanos, charrando a lo tuyo traviés, u mesmo pasando-nos los libros de textos pa que nos i sinyasen y nos metesen bella ixautada de crietas. Ya faríanos once u dotze anyos y, tot y estando encara bien patantons, las hormonas empecipiaban a alticamar-se. Ellas, ye claro, se nos ne rediban. No yeran como las de Carmelitas, pixautas y d'un cole no mixto. Yeran bien feitas a lo contacto con atros ninos. No febanos que decir fateretas propias d'ixa edat y con que nos adedicasen bella floreta, ya marchabanos de tornada ta casa a dos palmos de tierra.

Las mesachas me ubrioron, en ixos zaguers anyos de cole y en los primers d'instituto, un mundo diferent, an que las relacions entre las personas no teneban ixa pudor de masto violento marcando territorio que tanto se cautivaba en Corazonistas. Quan a la fin en conoixié y podié tener las relacions normals que habría de tener qualsiquier choven, trobé una companyía muito millor en ellas que no pas en ells. La mia cuadrilla, durant muitos anyos, yera formada muit mayoritariament por zagalas. Una opción que la educación segregada, trigada por mis pais, desfendida por la ilesia, y subvencionada encara hue por los impuestos de todas, me negó.

En marchar t'o instituto publico, s'encertó que beluna d'ixas mesachas d'o Miraflores fue con yo ta clase. Mesmo con bell par contino tenendo amistanza dimpués de tantas anyadas. No puedo evitar fer-me a riseta cada vegada que recuerdo ixos meyodiyas en lo parque, charrutiando de fateras, con miedo mesmo a acercar-nos-ie. Ni evitar pensar en tot lo diferent que hese estau la mia vida d'haber puesto relacionar-me con mesachas d'una manera normal durant los mios primers anyos d'existencia.

A chimnasia. Historias d'un cole de mosens X

Estié un crio bien moviu. Malas que viyeba quatre arbols y una costera, pretaba a puyar-los u a tirar-me costera t'abaixo. Con a bici, feba cada cosa, que si m'hese visto mi mai por un foradet, le hese dau un mal. Chugaba a futbol, a baloncesto, a balón prisioner, a la WWF, a pillar, a "polis y cacos",... a lo que calese. No me feba galvana lo de mover-me. Pero mesmo una cosa de tant facil querer pa un crio como yo, facioron que me fese fastio. Os mosens son asinas.

As clases de chimnasia bien luego pasoron de simplament chugar, a estar una serie de prebas - tortura sin guaire sentiu. La metat d'o tiempo nos lo fotebanos blincando por dencima de trastes rarizos, que iban puyando seguntes los blincabanos. Lo potro, lo caballo, lo plinto,... Tamién caleba fer bella pintacoda, dobles blincos, ... tot sin atro motivo que cumplir una serie de tablas que maniaban os profesors.

Tenebanos un chimnasio bien amplo. Como dubdo que en tenesen, de pareixiu, en a mayoría de centros publicos. D'o teito penchaban quantas cuerdas. Dos d'ellas con nyudos, pa que fuesen de millor puyar. De toda aquella "torturamenta", a cuerda yera a sola cosa que me feba goyo. Cuento que porque se me daba muit bien. Malas que aprendié a fer bien la presa con os pietz, me la podeba puyar todas las vegadas que calese. Tres sin tocar tierra, que yera un diez en ixa preba. Asinas iba aprebando, porque en a resta pasaba radiu, u nian ixo.

A chimnasia yera a clase mas dura socialment. Podebas estar un ignorant en socials, mates, naturals, ... tot ixo importaba igual. Pero ai de tu si dimpués de pillar vencida t'aturabas antes d'o plinto, u t'esmorrabas en blincar-lo! La metat d'a clase se te feba la rialleta en clase. Igual como en as ramadas, quedabas sinyalau como un miembro feble d'a comunidat y, alavez, presa facil pa os cazataires que yeran a la molta.

L'atra falaguera que teneban os mosens yera fer-nos correr sin sentiu. ¡Como si no bi hese trazas de fer correr a un zagal con un proposito claro!. Y limpio fer vueltas a lo patio! Nos caleba estar nosequantos minutos correndo, y ya nos aprendebanos astrucias pa escusar-nos bella vuelta. No por galbana que dimpués correbanos muito mas en o recreu. Yera pura rebeldía chovenil. Bi heba dos puestos perfectos pa amagar-se. Os dos a l'atro cabo d'an que o mosen se quedaba con o cronometro. Un, yera un arbol. Muit gran, pero que de cabo ta quan ibas a amagar-te-ie, y te trobabas con que ya bi heba quatre u cinco compas en ringlera. L'atro yera un rinconet que quedaba difuera d'a envista d'o mosen. Astí i cullibanos borches arrienda, y asperabanos un ratet redindo-nos d'a nuestra dreza. Si belun yera malaudo u con bell ueso crebau, y no heba de correr, ya se preocupaba de fer que o mosen s'espisguardase pa que no nos pillase.

De profes de chimnasia (que asinas le clamabanos totz a la Educación Fisica), en teniemos bells quantos. Un d'ells, le decibanos Chuache, por Schwartzenegger. Yera choven y con mas musclos que un debuixo de Rob Liefeld. Con ixe profe no febanos mala pacha. Mesmo en una ocasión, que me facié un zancocho en o cuello blincando un d'os trastes aquells, me tractó prou bien, tot y que yo yera espantau de tot de lo mal que me feba la foyeta. Aquell mozo, que no yera mosen, hopó de Coras. O diya que se despediba nos charró d'a persona que le sustituyiría. Ex-paracaidista, monitor d'esqui, ... un curriculum rebutient de cosas apasionants, que a aquella clica de criallos impresionables, nos pareixeba que ise a venir un G.I. Joe a entrenar-nos pa luitar contra Cobra. Y ixo, antimás, lo deciba una persona mas fuerte que totz os nuestros pais chuntos.

A l'atro'l diya, totz yeranos en candeletas aguardando a lo nuevo profe. Un sinyor viello, baixet, y con voz aguda apareixió por a puerta decindo que yera ell aquell impresionant eixemplar que esmachinabanos. No nos adubibanos d'a risa. As alufras que nos hebanos feito, tot pa trobar-nos con un sinyor que Raúl, o repetidor de clase, yera mas altero, y muito mas fuerte. Ya a los mosens "chungos" les costaba que les respetasenos, asinas que podetz contar que a iste le febanos de tot. En una pleitina con o debantdito Raúl, habiemos de meter-nos a separar-los porque quasi le fote un sobo, l'animal.

Antiparte d'as clases de chimnasia, l'actividat fisica yera muit present en a mia vida d'aquellas envueltas. Bi heba bella mena de liga interna de futbol, an que yo, que no me feba mica goyo estar-me quieto, me i apunté. Yera mas malo que malo, pero me lo pasaba de bitibomba. No feba que correr, porque en que pillaba o balon, lo perdeba u me lo furtaban. As pocas vegadas que facié bell gol, me gronxiaba pa tot lo mes. De puntuacions, bi'n heba dos clasificacions. La una yeran os puntos por ganar u empatar, como en a liga de futbol profesional. L'atra yera por "esportividat", ye decir, te deban puntos si no febas guaires faltas, y no yeras marrullero. D'a primera siempre me quedaba bien abaixo, pero de medallas a la esportividat, encara en guardo beluna en casa mai.

En tercero nos ufrioron de federar-nos. Aquello sonaba superguay. Yera como profesionalizar-nos. Estar como Juan Señor u Drazen Petrovic, pero sin cromo. Chugarianos contra atros colechios, y nos farían fotos que pencharían en totz ixos almarios plenos de trofeus que empliban os corredors d'o cole. O primer anyo nomas te podebas federar en balonmano. Yera un esporte que m'aburriba muitismo, asinas que, en plegar en quarto me pasé a baloncesto. Astí ya sí que me lo pasaba de bitibomba.

En l'equipo yeranos dotze zagals. D'ells, atro y yo yeranos prou malos, pero a pur de entrenar fuemos aprendendo. Tenebanos un entrenador bien simpatico, y que yera de buen viyer. ¡As nuestras chirmanas mayors nunca no heban veniu tanto a viyer-nos entrenar! Antimás d'ixo, yera una persona que sabeba fer-nos participar. Tot y que yera d'os piors de l'equipo, chugaba como poco un quarto en totz os partius d'a liga. Yeranos competitivos, prou que sí, pero totz participabanos y nos ayudabanos entre nusatros. Aquell anyo de baloncesto ye un d'os millors recuerdos que tiengo d'ixos tiempos.

En cinqueno, cambioron l'entrenador. A os cinco millors de l'equipo se los levoron ta equipos de mayor nivel. Aquell anyo, uno d'ells s'estricalló lo chenullo pa cutio. De vez, i entroron nuevos zagals. Yo continaba estando prou malo, pero heba aprendiu muito en l'anyo anterior, y ixo se notaba. Teneba, antimás, muita complicidat con a resta de companyers d'o curso pasau. Asinas que, a priori, me pensaba que chugaría tanto como l'anyo anterior. Pero os primers partius pasaban y ni yo, ni a mayoria d'os nuevos chugabanos. No ye que no chugasenos guaire. No chugabanos mica. Nos quedabanos en a cadiera, alufrando como "os buenos" d'adedicaban a ganar partius. Os entrenamientos, de vez, yeran muito mas tecnicos, fendo mas exercicios y chugando menos. Ta Nadal, ya me'n heba fartau y les demandé a mis pais que me quitasen d'aquella actividat que tant aburrida s'heba tornau. En ista ocasión sí que me facioron caso. L'anyo anterior hebanos quedau segundos, con un ambient grandismo y chugando mesmo los piors. Ixe anyo, rematoron quartos y con quantas baixas en l'equipo a metat de curso.

Dimpués entendié cómo se conseguiban totz aquells trofeus. A pur de deixar por o camin a qui no yeranos a ran d'o que caleba pa ganar competicions. L'esporte, pa muitas mais y pais, ye una parte muit important pa os suyos fillos. Coras, a la fin, no ye que un negocio, y ha d'aprofitar un espacio de publicidat tant buenismo como ye l'esporte d'elite, pa fer-se vistero. Cada torneu ganau ye publicidat de baldes y si pa ixo cal que os crios mas zampos deixen de fer esporte, ¿qué importa?

A mosica. Historias d'un cole de mosens IX

Encara que soi un apasionau d'a mosica, soi negau pa fer-ne. Siempre que he prebau de fer sonar bell traste lo he feito muit malament. Con 14 u 15 anyos, como tantos atros zagals, me merqué una guitarra. Heba feito pocha dende bell anyo antes y a la fin teneba os diners que caleba. De vez, me apunté ta un curso que se feba en l'instituto. Fracaso total. A profesora yera buena, como contrimostroron toda la resta de l'alumnalla que sí que aprendió a tanyer a guitarra. Yera yo l'incapable d'aprender. Prebatinas posteriors con a percusión no millororon o diagnostico: pa la mosica, soi un zero.

Como en tantas atras cosas, ya en o cole se barruntaba iste feito. A educación mosical, como tot, yera prou penible. En aquellas envueltas pendeba en chuflar con una flauta dulza una ripa de partituras, cadaguna más abominable que l'anterior. Viyé a craba roya pa fer sonar qualcosa parellana a ixo de "dos elefantes se balanceaban" asinas que ya podetz contar as estrucias que teneba. O libro prencipiaba con cosetas simplas como a debantdita y remataba con una parrafiquera de corcheas y semicorcheas tant imposibles de leyer pa yo como un orichinal de Sun Tzu.

Manimenos, teneba una media de notable gracias a la parte teorica. Aprendebanos solfeo y bell poquet d'historia d'a mosica (clasica, prou que sí). Como o conteniu yera poquet y de buen aprender, teneba siempre buena nota y, a pur de repeticions, aprebaba radiu lo de chuflar a flauteta.

Con tot, as clases de mosica no yeran as piors pa yo. Nos movebanos de l'aula, que ixo siempre feba goyo, y baixabanos en formación de a dos ta l'aula mosical. Astí nos posabanos en bancadas y ibanos chuflando a daria. Como yeranos bien enchugardius, gosabanos de dar prou mal y dia par d'atro a clase remataba a metat y tornabanos a puyar ta l'aula a copiar licions u qualcosa pareixida.

Tamién en isto os mosens teneban criterios absurdos. Y ixo que qui nos feba clase yera "civil". Quan ya hebanos creixiu bell poquet, os más agudos de mosica prencipioron a tanyer atros trastes. China chana se fue formando un chiquet coro pa tanyer en misa y pa fer funcions d'ixas a lo yankee ta Nadal. O criterio pa estar-ie estioron as notas que se teneba en l'asignatura de mosica asinas que, como en ixo yo iba bien, me tocó fer-me d'o coro. Astí conoixié os diferents libels d'a inutilidat mosical.

Prencipié con a pandereta, creyendo que sería de buen aprender. Ya empecipiaba bien abaixo, pero como qualsiquier atro inutil mosical que haiga prebau de tanyer-la habrá comprebau, ye más dificil que no pareixe. Asinas que a escape baixé t'o siguient libel: o triangulo. Guarda que ye dificil d'entivocar-se con ixo, que nomas has d'asperar a lo momento chusto. Pues vete-me que tamién la cagaba. Asinas que continé baixando. As voces. Nomás heba d'aprender-me a letra y ta part d'alavez teneba millor memoria. Pa forro de bota, yeranos como ueito u diez zagals cantando. Asinas que en o coro, me i estié dica plegar a obra.

O salón d'actos yera plen de pais y mais, en una d'ixas inexplicables torturas que lis feban. No lo recuerdo como qualcosa traumatica y sisquiera m'alcuerdo de si mai y pai bi yeran. A yo tot aquello me la bufaba prou, si tos soi sincero. Cosas d'a memoria, recuerdo perfectament que chustó antes de puyar-se o telón me prencipió una picazón o tozuelo y me graté firme y a tot meter chusto antes que puyase. O caso ye que un ratet antes de que salisenos t'o scenario, o mainate d'o coro nos suchirió a atro zagal, inutil como yo, y a yo mesmo que, en cuenta de cantar, simplament movesenos a boca. Me pareixió bien, porque yera seguro de fer un estricallo en caso de cantar.

O coro cantó y salió tot lo bien que les puet salir a una colla de zagalons d'a E.Ch.B. cantando putos villancicos. Como en tantas atras aventuras corazonistas, no lo recuerdo como un trauma, pero si como un sinsentiu. No sé encara que pintaba yo en aquell coro, talment furtando-le a plaza a bell galban que no querese estudiar-se a teoría mosical, pero que sí tenese talento. No sé como tenioron a barra de demandar-me que no cantase en ixe zaguer momento. Como he dito, a yo me la bufaba, pero a la mayoría de crios d'ixos anyos, les hese floriu prou.

No creigo que de haber teniu atra educación mosical, agora estase dencima d'os scenarios, cumplindo un d'os mios suenios. Cadagun tien as capacidatz que tien. Pero regular que aquello no aduyó. Pero lo pior estió que dimpués de no sé quantos anyos de asignatura de mosica, en salié sin haber aprendiu ni un sacre de mosica

Criterios y arbitrariedat (2): A historia d'Adrián. Historias d'un cole de mosens VIII

Que no totz os alumnos son iguals yera qualcosa evident en Coras. Pero no por una atención personalizada, u por un cudiau a la diferencia. Adrián en estió l'eixemplo más claro. Yera un mocet royo y una mica baixo. Yera muit traveset, y encara que yera bien agudo, lo d'estudiar no le feba guaire goyo, asinas que suspendeba os examens a l'arreu. Siempre chustet, se libraba en o zaguer momento de repetir. Tardé tiempo a fer pacha con ell. De feito nos faciemos más amigos en l'instituto que nos encertemos dimpués, que no en os ueito anyos de mosens.

Antimás de mal estudiant, Adrián estió d'as primeras personas que se me definió como anarquista, d'os primers companyers que prencipió a fumar y a zorriar, a ascuitar punk y rock, y mesmo a portiar un pendient d'ixos de rolde en a orella cucha. Prou que ,como qualsiquier cosa que s'esvarraba bell poco d'o modelo de "nino Coras", le vedoron de portiar-lo.

Creigo que yera enta seiseno u sieteno de E.Ch.B, que a bell mosen le dió lo barrunto de fer d'as tutorías qualcosa más que no una hora pa fer quefers. En a primer clase nos fació una charrada sobre o dialogo que prebaría de empentar, y que ixe espacio sería pa que debatisenos y charrasenos de lo que nos preocupase. En una d'as primers clases, Adrián, posau en a zaguer ringlera de sillas, devantó a man y preguntó porque le vedaban de portiar lo pendient que tanto goyo le feba. Mosen respondió, fendo a retolica sobre as trazas y os modos, y decindo que a chent heba de venir acotraciada. Adrián, con toda la mielsa que teneba quan quereba, fació un cenyo de superioridat y respulió, muit tranquilo, preguntando qual yera a razón de que as ninas sí podesen levar-ne. Aquell anyo u l'anterior, no lo remero, yera o primer que entraban chicas en a escuela. Mosen, a qui yo creyeba con más astrucias dialecticas, se quedó sin tartir. Bell largo segundo dimpués, bien niervudo, dició que s'acababa lo debat y que totz a leyer. Aquell dia tamién aprendié muito. De Adrián, claro.

Ni Adrián ni yo querebanos estar-nos-ie. Igual como muitos atros lo tenebanos bien claro. En seiseno les demandé por primer vez a mis pais que me cambiasen ta un publico, pero no lo consiguié dica ueiteno. A diferencia entre Adrián y yo yera en as notas. As mias de notable alto, as suyas d'uns aprebaus radius y conseguius a pur de repetir examens. Mesmo pa la mia marcha / liberación de Coras, os mosens me teneban alzada una sorpresa.

O feito de que muitos nos i sentisenos engarcholaus, se viyó enfortiu quan prencipioron a devantar o IES Medina Albaida. Dende o nuestro recreu podebanos viyer como abanzaban as obras a traviés d'a cleta que nos ne separaba. Cada vegada que saliba encarranyau t'o patio, m'aconhortaba mirando-me ent'o Gasometro - como le decibanos en ixas envueltas - y feba la cuenta d'os dias que me i quedaban. En primeras, qui bi marchabanos, charrabanos a escuchetes entre nusatros, d'os tramites que caleba fer y d'as asperanzas que tenebanos en ixa fuyida. Quan as listas salioron publicadas ya no podebanos continar con o secretismo y se fació publico os tretze - de quaranta - que en ixopabanos. Entre ells, Adrián y yo. 

Antes que ixo estase definitivo, bell mosen, no recuerdo qual, venió y prebó de convencer-me de que me i quedase. No entedeba por qué quereba marchar d'o cole, si teneba unas notas tant buenas. No le dié explicacions. No las mereixeba. Yera a primer vez en muito tiempo que s'intresaban por a mia opinión y ya feban tarde. Con tot y con ixo, me quedé una mica percutiu. En o siguient recreu lo charré con a resta d'os tretze. Nomás heban charrau con atro y yo, os dos con una media de notable alto. Rai a resta. Adrián y yo, y quasi totz, nos encertemos en o Medina Albaida y m'aseguroron que no heban charrau tampoco dimpués con ells. 

En l'instituto, en o primer anyo, facié un gran amigo, que tamién heba sufriu a los corazonistas. Ell yera un anyo mayor que yo pero repetiba 1º de BUP, pasando-se a 3º ESO (yera quan prencipiaba a aplicar-se a LOGSE). Charrín charrán, le charré d'os mios zaguers dias en Coras y ell me contó a suya propia historia. Yera un tarambana y en ueiteno le'n cayoron quatre. Asinas que heba de repetir curso. Sus pais marchoron a charrar con os mosens y le dicioron que l'aprebarían tot a truca de que le levasen t'atro centro. Asinas lo facioron. Con poco exito ya que me lo trobé repetindo a l'atro curso.

Adrián continó estando un estudiant penible y dimpués de suspender no se quantas en 3º d'ESO, tornó a cambiar de IES, asinas que le perdié la pista. A zaguer vegada que charré con ell iba ta un cole de l'Opus y aprebaba tot a pur de "os chanfles de pai", en as suyas propias parolas.

Un nino de 11 anyos evidenció a falta d'argumentos d'un mosen de ciquanta y tantos. A diferencia de tracto enta ell y enta yo, deixó claras a etica y as practicas inmorals - y probablement ilegals - de l'amostranza catolica que todas, Adrián y yo tamién, financiamos.

Criterios y arbitrariedat: O "pai" Reollo. Historias d'un cole de mosens VII

Os camins d'o Sinyor son inescrutables. Os criterios d'os mosens a soben tamién. U no pas tanto. Una d'as tantas cosas que me feban encarranyar-me en os anyos que estié en Coras, estió l'absoluta falta de lochica y l'arbitrariedat en a mayoría d'as decisions que preneban os mosens.

Un d'os mosens con qui no feba pacha ni pa dios, se deciba Reollo. O nombre no lo recuerdo, porque entre atras cosas absurdas, allí totz nos clamabanos por l'apelliu. Y a os mosens con un "pai" u "chirmán" por debant. Dende chiquet he teniu problemas con a esquena y me cuesta d'estar-me muito rato en una mesma postura. Asinas que en clase yera una sargantana, movendo-me terne que terne, prebando de trobar una posición que me fuese comoda en aquellas sillas de tortura que tenebanos. A ormino m'acoflaba como podeba, deixando-me esbarar silla t'abaixo. O Reollo, m'encarranyaba y me deciba que guardase a postura "buena", que yera la de "nino-maquina" con a esquena dreita, as mans sobre a mesa y a uellada entabant t'atender a las suyas aburridas explicacions (Ye a sola vegada en a mia vida que a Historia me la ha bufau). Como no podeba estar-me quieto, yera bien cutiano que yo rematase a clase forachitau, contando as recholas d'os pasillos, u copiando a lición en belatra aula. Si yera por a quimera que teneba u porque me perdeba la metat d'as clases, no lo sé, pero aprebaba con un "sufi" la suya asignatura, y gracias.

Pero tot aquello cambió un diya. O Reollo nos heba mandau copiar bella lición u qualcosa d'ixas tant educativas que feban os mosens quan no les aganaba de fer clase. Totz yeranos en silencio, escribindo u estudiando u lo que fuese. Ell iba caminando por cada ringlera de sillas, como siempre con as mans en a esquena. S'acercó t'o puesto mio y s'acochó. Yo ya yera pensando-me que m'iba a cayer por bell cabo. No recordaba haber feito cosa mal, pero con os mosens nunca no se sabe. Sino has pecau, yes a pocas de fer-lo, y sino, ya s'inventarán bella cosa ta castigar-te. S'acochó enta yo y me dició:

- Ahiere te viyé salir d'un puesto que me fació muito goyo.

En ixas envueltas yo acababa de fer-me socio d'a Biblioteca d'a D.Ch.A. que bi ha en Dr. Cerrada. Aquello me pareixeba una maravilla y me i foteba firme rato leyendo con anglucia cadagún d'os libros y tebeos que i teneban. Yera o solo puesto que se m'ocurriba que m'hese puesto viyer salir-ne.

- A biblioteca? - le pregunté, con una mica de miedo, por si fallaba y me cayeba bell lapo.
- No. D'o Pilar. - y continó lo camín entre ringlera y ringlera de silla, con as mans en a esquena, como siempre, pero con una sonrisa en a cara.

Creigo que, dimpués d'o mio baltizo, nomás heba pisau dos vegadas a basilica d'o Pilar. A tercera estió fa poco tiempo. Pero chusto s'encertó que bell diya antes heba acompanyau a mi pai a agradeixer-le a la virchen bella cosa d'o treballo suyo, creigo. Y Reollo me viyó salindo-ne.

No creigo en as coincidencias, asinas que o feito de que dende ixe diya y dica la fin d'o curso, a mia nota no baixase de notable y os viaches ta fuera de clase se viyesen quasi anulaus, cuento que tien bella relación con ixa imachen mia en o Pilar.

Rai a biblioteca. Ni me'n preguntó. Yo teneba muita inquietut y ganas de leyer y d'aprender cosas. A Biblioteca d'Aragón ye una d'as millors cosas que me pasó en a mia nineza, y m'ha continau acompanyando dica hue. O Pilar, pa viyer-lo y tal, ye majo, pero de conoiximiento poco en trobarás. Lo que yo sabese u deixase de saber sobre historia u as inquietutz que tenese, no contaban tanto, como haber-me visto salindo d'a basilica. Con ixos criterios, y remerando o viache d'estudios que feríanos bell anyo dimpués, ¿cómo creyetz que nos explicaban a historia?

O viache d'estudios de 8º. Historias d'un cole de mosens VI

Sin dubda, de todas as historias que recuento de Coras, con la que más flipa la chent ye quan les charro d'o mio viache d'estudios de 8eno d'EChB. Conceptos como diversión u mesmo aprendizache, son de mal asumir t'os mosens, por lo que podié comprobar mientres aquells ueito anyos y, sobre tot, en iste viache. Atra cosa que me i quedó clara estió que a relación entre a ilesia catolica y a dictadura franquista continó muito dimpués d'a muerte d'o dictador y d'o cambio de rechimen,

Por motivos que no cal comentar aquí, yo no heba viachau guaire. A mia vida en 8eno d'EChB heba transcurriu quasi de tot entre Zaragoza y a casa que tenebanos en Cambrils, an que pasabanos buena parte de l'estiu. Nomás bell viache ta Chaca u Candanchu d'hibierno y bella curseta más. Asinas que en ixas envueltas no heba visto guaire mundo, y m'aganaba a-saber-lo deixar bell diya la mia ciudat. Antimás, como ye lochico en ixas edatz, m'ilusionaba prou no tener a la familia cusirando-me. O viache de cabo de curso s'acercaba y me feba buenas alufras.

O viache, nos heban dito que ibanos ta Madrit. Que no ye Cancún. Sisquiá Salou, que ye lo que quiers con 13 anyos. Pero m'importaba igual porque t'a part d'alavez yo no i yera estau nunca y quereba conoixer-lo. Ya preixinaba que guaire borina no bi'n habría, pero no m'asperaba trobar-me con aquello. O primer puesto que fuemos estió o "Valle de los caídos". Lochicament no nos estioron charrando d'os presos politicos que lo facioron, ni d'a represión franquista, ni d'os muertos, ni cosa. Nomás viyer ixa "choya arquitectonica". Mesmo un companyer de clase, que ya prencipiaba a chuntar-se con nazis, levó un camatón de flors t'a fuesa de Franco.

De nueitz, dormibanos en unas cambras granizas que teneban os Coras por Madrit. Dimpués d'un diya de aburrimiento total, pues o Valle de los caidos, antimás de faixista ye un puto catenazo, nos hese feito firme goyo de poder chugar bell rato u lo menos, estar-nos de capazo dica las mil. Pero lo mosen que nos tocó a nusatros yera un viello con horario de gallina. Asinas que nos chitabanos antes d'o que lo febanos en casa. Prou que prebabanos de blincar-nos ixe toque de queda y as cursas de nueitz ta fer bella trazonada estioron una constant. Os coles de mosens, atra cosa no tendrán, pero te fan aprender a fer-te o pre ta blincar-te todas as suyas normas absurdas.

A l'atro diya fuemos t'o Museu d'o Prado. Quasi lo millor de tot lo viache y regular que a sola cosa educativa que faciemos. A pintura no ye precisament l'arte que más goyo me fa y, con tretze anyos muito menos, asinas que no sabié fer-le aprecio a lo que teneba debant d'os mios uellos. Nos i fotiemos firme rato y, encara que a la fin rematabanos aburrius de tot, a fe que bella cosa buena nos ne levemos.

Dimpués fuemos ta Toledo. A yo me pareixió repoliu. Murallas, carreras medievals, ... A yo que no conoixeba ni Lobarre, ixo se me feba un castiello d'os clics en escala 1:1. Yera encantau de tot. Os zagals, en ixe anyo, chugabanos muito con as "mariposas", ixas navallas que o mango se dividiba en dos y que o rafe se quitaba y s'amagaba fendo un cenyo con a man. Qui no en teneba, porque en casa no le deixaban, sabeba maniar-la perfectament, pues nos estabanos meyo recreu aprendendo a fer-las servir. Toledo yera un paradiso ta nusatros y recorrebanos as botigas en busca de nuevas navallas, y viyendo con uellos laminers toda ixa ripa d'espadas en un tiempo an que lo d'os mercaus medievals no yera tant cutiano como agora.

M'hese feito goyo de viyer un rato más ixa ciudat, pero hebanos d'ixopar-ne porque nos iban a recontar una historia de valor, fe y prencipios morals. Un rato dimpués yeranos en l'Alcazar de Toledo. Por si bella lectora no lo sabe, mientres a Guerra Civil espanyola, l'Alcazar estió sitiau por as tropas republicanas. A leyenda diz que l'exercito heba preso a o fillo d'o militar a o mando de l'alcazar, o Coronel Moscardó. Le gritoron por telefono y diz que a conversa estió a siguient:

Son vustés responsables d'os crimens y de tot lo que ye pasando en Toledo, y le doi un plazo de diez minutos ta que faiga reblar l'Alcazar, y de no fer-lo fusilaré a lo fillo suyo Luis que lo tiengo aqui a lo mio costau.
Coronel Moscardó: ¡Lo creigo!
Chefe de milicias: Y ta que veigas que ye verdat, agora se mete a l'aparato
Luis Moscardó Guzmán: ¡Papa!
Coronel Moscardó: ¿Que tal, fillo mio?
Luis Moscardó Guzmán: Nada, que diz que me van a fusilar si l'Alcázar no rebla, pero no te'n faigas por yo.
Coronel Moscardó: Si ye cierto encomienda l'alma tuya a Dios, da un entalto a Cristo Rey y a Espanya y será un heroi que muere por ella. ¡Adios, fillo mio, un beso muit fuerte!
Luis Moscardó Guzmán: ¡Adiós, papa, un beso muit fuerte!
Torna a pillar l'aparato Candido Cabello
Coronel Moscardó: Puet escusar-se o plazo que m'ha dau y fusilar a o mio fillo. L'Alcazar no reblará nunca.

Isto lo sentibanos en a sala an que se suposa que pasó, con una interpretación gravada en audio. Ninos de 13 anyos presenciando una pura apolochía d'o franquismo. En rematar, una gambadeta por un museu militar feba "o completo". 

En ixas envueltas no yera de tot conscient de lo que yeran prebando de fer-nos. De tot lo que significaba en realidat lo que i hebanos visto. Simplament me'n torné ta casa con a sensación d'haber perdiu a oportunidat de fer un viache an que podese haber pasau ratos sobrebuenos con os mios amigos y haber conoixiu cosas intresants.

¿Se podeba fer un viache menos educativo? Ye dificil. Cuento que tanto os mosens que programoron ixe viache, como a mayoría d'os pais y mais que consintioron de ninviar a la suya cachimalla ta ixe FrancoTour, son d'os que s'alticaman porque l'asignatura de "Educación t'a ciudadanía" ye adoctrinar. U mesmo t'esfenderán que os coles catolicos "educan en valors". Con razón, porque en ixe viache yo aprendié muito sobre valors. Concretament sobre as valors d'o faixismo.

O sexo. Historias d'un cole de mosens V

No sé guaire bien en qué momento d'a historia, a ilesia catolica prencipió a centrar buena parte d'o suyo mensache en decidir qué practicas sexuals yeran aprebadas por o sinyor de l'espacio y quals no. O caso ye que hue, un d'os alazetz d'o suyo mensache pende precisament en ixo, condenando a l'infierno a qualsiquier persona que esbarre una miquirrina d'o suyo modelo de familia. Un modelo que ya nian os supuestos catolicos cumplen. Tamién en bell momento historico belun decidió que yera normal, u mesmo bueno, que chent que en teoría no ha practicau nunca o sexo nos explicase a la resta como fer-lo. U millor dito, como no fer-lo.

Os mios primers impulsos sexuals, como los de tot lo mundo, prencipioron en a EChB. Afortunadament, a mia chirmana s'ocupó d'explicar-me bella coseta y mesmo recuerdo como me deixaba viyer a la Dra. Ochoa en aquell "Hablemos de sexo", lo más pareixiu que tenié a una verdadera educación sexual.

Ya he contau como en a catequesi esbrazada de Club Choven, nos explicoron que a homosexualidat yera una malotía. Que antimás, favoreixeba que s'ixemenase a SIDA. Ixa yera toda la información que teneba yo sobre o tema. Pero a primer lición sobre sexo, como de cutio en Coras, me plegó en forma de trucazo en o tozuelo. O cabo d'anyo de 1987 nos deixó a muitos ninos marcaus por as popas de Sabrina blincando d'a suya brusa, y trucando-nos en os uellos, l'esmo y os balons. Belun pilló una TeleIndiscreta u bella revista de l'estilo, an que regalaban un colgallo d'ixos que, seguntes como le de la luz, amuestra una imachen u atra. I saliba Sabrina y, si lo movebas, a popa tornaba a acucutar por aquella chaqueta de cuer. Os zagaletz andabanos alticamaus y pasandonos-lo a daria ta revivir aquel inte. Tant emocionau yera que no paré cuenta que por dezaga de yo veniba, silencioso como un gatet, o pai fulanico. O suyo punyo zarrau, con a falanche d'o cordial sobresalindo un poquet, cayendo sobre o mio tozuelo, me dispertó d'o suenyo pseudoerotico y me tornó t'a realidat d'os foscos corredors d'a escuela.

Prou que me furtoron o colgallo, deixando-nos a toda la clase sin esbastadera t'a resta d'o maitin. Dimpués me menazoron con os cient mil infiernos, charroron con mis pais, que tot aquello se la bufaba prou y, como no, me tocó bell painuestro.

L'ausencia de zagalas en clase yera atro d'os feito con que conviviba. En ixos anyos d'experimentación y de descubrimiento d'os cuerpos, nos hebanos de fer o pre dillá d'aquellas aulas, ta conoixer o cuerpo femenino. Tot y que yo teneba bella amiga difuera d'o cole, as mullers me pareixeban tot un misterio que, en creixer, habiemos d'ir descubrindo en as revistas porno que furtabanos en a papelería. U en bell Jueves u Interviu que pillabanos de casa nuestra.

A masturbación yera, prou que sí, una practica vedada de tot. Pero en ixas edatz, muito miedo t'han de fer ta que deixes de sobatir-te-la terne que terne. Lo primer, como siempre, yera l'infierno. Chesús, o pai Policarpo (fundador de Coras), os anchels, os santos y quemisio quanta chent más, se nos miraban dende o ciel, invadindo a intimidat nuestra de cambras y escusaus. Como lo mio ateismo naixió quasi de vez que la mia sexualidat, aquello no m'importaba guaire. Cuento que os mosens lo sabeban, porque a lo mensache divino antimasturbatorio, l'adhibiban a menaza medica. No nos quedaríanos ciegos. Ixo no colaba. Pero sí que se nos fería micazas. Por cada palla que cayeba, s'acercaba l'inte de que o nuestro recient descubierto tocho de placer s'esboldregase, deixando-nos ta cutio sin entretenimiento.

A culpabilidat yera una mormor contina en que remataba con "a faina" y me deciba a yo mesmo que heba de tardar bell tiempo a fer-me-ne unatra, y asinas no se me cayería. Pero a la fin no m'adubiba y a ixa, le'n seguiba unatra en bien poco tiempo. A la fin, ya viyé que aquello aguantaba lo que calese y a culpabilidat fue china chana desapareixendo, pero me fació pasar muit malos ratos d'una forma de tot innesezaria.

A la fin, un diya, nos dicioron que nos tocaba A clase. Con mayuscula. A clase, porque no bi'n habría que una, d'educación sexual. Ya yeranos pavos de tot, y a escape prencipiemos a sonyar que nos meterían una porno, que viyerianos bien de carne femenina. Pero, lo menos yo, antimás de tot ixo, teneba dubdas. Prous. Quereba que me'n aclarisen beluna, que fesen una mica de luz en toda ixa foscor que yera la sexualidat.

Ixe diya yo andaba emocionau asperando que en ixa sesión de dos horas radidas, m'explicasen totz los mecanismos d'o mio cuerpo, de como funcionaba tot ixo que tanto goyo me feba, que confirmasen u desmentisen lo de que se te cayeba a micazas, que me decisen como iba tot lo que viyeba en Hutslers y Penthouses y que no adubiba a entender de tot,... Me'n feba d'alufras! Decepción ye decir poco. Amor, matrimonio, dios y poco más. Ni un radiu pene esquematico. Ni una imachen d'una natura que a la fin arrullase luz sobre o tema. Fillos, casorios, pecau. Ni cómo, ni por a on, ni quan, ni cosa. A belun, que ya iba t'a charrada quasi con a picha en a man, le fació ganchet en viyer ixe publireportache de la COPE.

D'aquella chornada, en salié con as mesmas dubdas, pero carranyau por a oportunidat perdida. Habié d'aguardar, como con tantas atras cosas, a la escuela publica, ta tener qualcosa pareixida a la educación sexual. Afortunadament a evolución nos ha dau firmes ferramientas ta ir descubrindo ixas cosas sin que nos calga guaires libros y quiero creyer que aprendo aprisa. Pero no totz tienen ixa suerte y, sobre tot, muitos creixioron sin datos u mesmo con datos erronios. Si as mias primers relacions yeran como yeran, no quiero nian pensar en atros que continoron confiando a suya educación sexual a lo cristianamen de Coras.