Una decada barrenada

En fer servir a base 10 pa contar, a nuestra cultura tien ixa tendencia a celebrar os multiplos de 5 y de 10 con especial ficancia. Y como me pareixe un momento tan bueno como qualsiquier atro pa fer una uellada a iste tiempo de treballo, lo aprofitaré.

A primer cosa que cal, ye agradeixer a toda la chent que leye o blog, ascuita o programa, y me sigue en os retes socials. Más que más a qui interactuatz con yo, que ye pa lo que se inventó isto de internet; pa comunicar-se.

A segunda, demandar perdon si a belun l'he feito mal sin querer. Sé que he teniu os mios momentos más ronyazas u encarranyaus, y que no siempre he sabiu navegar-me bien con ixo d'a diplomacia y a empatía. Aspero continar millorando como creigo que lo he feito en iste tiempo.

Quan se fa a uellada ent'o pasau, se gosa dar bella cifra, asinas que tampoco en isto fuyiré d'os topicos y las daré. A dia de hue, van publicadas 728 entradas en o blog. O programa de radio, l'atro gran proyecto de TdB leva 22 programas emitius con bellas 50 horas de radio en aragonés. Antes, ya en heba feito quantas mas en as colaboracions de La Enredadera con a sección de L'aragonés ye bien vivo u en Fendo Orella, an que colaboré durant una temporada. Tanto lo programa como as colaboracions, las puetz trobar en a canal de Ivoox.

En Flickr ya van quasi 400 fotos puyadas. No pretendo que dengun creiga que son buenas fotos. Las tiengo basicament como soporte grafico d'o blog. Pero creigo que bi'n ha, de buenas, y a fe que de curiosas.  Quanto a Youtube, ya son mas de 100 videos compartius. Isto ha viviu muita actividatz en zagueras con a ideya d'as #videofateras, que tanto exito ye tenendo (adintro d'o que se considera "exito" en o mundet de l'aragonés). Pa rematar, he quiesto fer o fanzine, pa tener qualcosa en soporte fisico, con a doble ideya de tener un recuerdo y de financiar o programa de radio.

Cifras aparte, me quedo con diez anyos de aprendizache individual y colectivo. Ya he dito muitas vegadas que iste blog (y tot lo que le rodía) nomás tien sentiu adintro d'un movimiento de defensa d'a luenga y d'una manera de entender a comunicación que comparto con bellas quantas personas. Aspero que continemos treballando todas nusatras por un Aragón y un mundo diferent, más variau, chusto y poliu y que continemos tamién compartindo ixos raticos tan rebuenos.

Microcronica de vacanzas

Por primer vegada dende 2008, quan me quede sin treballo, m’he puesto pillar 10 diyas (sí, sí, en sistemas decimal, no binario) de vacanzas. He aprofeitau ta ir t’o Tamborile y dimpués bells diyas t’a parti de Sanabria en Zamora (País Lliones) y un poquet por Portugal, comprobando como ye ixo d’a independencia... Como buen catenazo que soi y como d’inspiración no me’n sobra agora mesmo, pencho contino bellas fotos d’o viache.

A primer, feita en o Tamborilé, ye Cigomanband, un hombre-orquesta que sonaba rebien. No me pensaba yo que m’ise a fer tanto goi. A resta d’o Tamborile simplament chenial. Podiemos fer-nos una turuta amostraus por Eugenio Arnau, rondar con os Astí queda ixo y bailar dica quedar-nos sin pietz con toda a resta de collas. Norabuena ta la organización. Cada anyada lo fetz millor!

A segunda un troz de río muito pincho que trobemos mirando de plegar en a Laguna de Sotillo. Nos entiboquemos de camín y trobemos iste puesto que yera bien pincho. Ixo y un mapa militar que s’heba deixau belun. Ye una d’as gambadetas que faciemos por Sanabria. Saliba dende Sotillo de Sanabria, (¡Qué lugaron mama mía!) y puyaba entre una selva de carvallos (Quercus robur) dica plegar, a más altaria, en un brezal con uns arbols parellanos a l’aliaga muito pinchos. A laguna, a la fin, yera un fake, pos yera un entibo, pero lo camín yera bien pincho. A metat tamien bi yera a cascada de Sotillo, repolida. Lo pior de tot, a sinyalización que yera penible, y que fació que nos cacegasenos bellas quantas vegadas.

A tercer foto, d’un fardacho, la he meso por tot o bestiamen que viyemos. En a parti d’o parque natural de Sanabria, en a Sarra d’a Culebra y mesmo en Bragança. Birabolas, fardachos, purputz, esparvers, alicas, escarabaixos, ciervos, milenta muixons más, un bicho que encara no sabemos o qué ye... y rastros de lupo, prou que sí.

A cuartena, ye d’una carnicería de Puente, un lugar d’a redolada. Por tot i viyemos bellas cosas surrealistas, pero ista estió la que más nos trucó lo ficacio, y la que podiemos fer-le foto. Habiemos de mirar-nos-ie trenta vegadas antis de creyer lo que meteba y de pretar a esmelicar-nos. Ignacio, yes muito gran, mocet!

Pues ixo son, si fa u no fa, as mias vacanzas. Si queretz saber-ne mas, me clamatz y tos amuestro as atras trescientas y pico fotos, con cacas de lupo incluyidas..

.

Ampraus 045

Antis de marchar t'o PIR me veigo quasi obligau a dar bellas noticietas y convocatorias que aspero tos faigan goi.

Atenco: O pasau 30 de chunio estión declaraus inocents os 12 presos por os sucesos de Atenco que levaban en a garchola dende 2006. Ista noticia estió recibida por os colectivos zapatistas de tot lo mundo con muito enfuelgo pos ye a reconoixedura no ya d'a suya inocencia sino tamién de todas as irregularidatz d'os primers chuicios. A noticia ye penchada en Europa Zapatista. A la fin una victoria dimpués de tantas y tantas rebaixadas que os movimientos por a dignidat en Mexico.

L'aragonés contina vivo y os movimientos socials que lo esfienden no reblan. Mientres iste verano podetz aprender-lo, por eixemplo, en a escuela d'aragonés Nogara, que fa cursos intensivos de verano. Son tres horas cada diya mientres tot lo mes de chulio (y talment bell diya d'agosto). D'atra man, l'academia de l'aragonés a la fin ha publicau o listau d'esmiendas y a proposa ortografica final en a suya web. Podetz visitar-la punchando aqui, ta ir conoixendo-la y aplicando-la.

S'amana lo festival Esfendemos a tierra que será en Artieda lo venient 18 de chulio. ¿Cómo? ¿Que no tiens auto ta puyar-ie? No te'n faigas, moceta! A saputa organización ha meso un autobús que esnavesará o país, dende Calatayub dica Artieda, pasando por Zaragoza, Uesca y Chaca (creigo). Tos i podetz apuntar en a web u en A Flama, si vivitz en Zaragoza.

Fotos. Ya tos dicié que tos fería a tana con as fotos d'as vacanzas mías. Arale y yo estiemos bells diyas por a Vall de Benás y prou que bi faciemos arrienda fotos. Podetz viyer-ne cinco d'ellas en Flickr de Barrenaus y a d'a marmoteta aqui mesmo....

Una (atra) de convocatorias

Ya ye primavera de tot y hibo si se nota! Quasi no s'adube a penchar todas as convocatorias. En pencho as que he iu conoixendo mientres istos diyas.

Marcha t'a macrogarchola de Zuera: Cal continar denunciando a politica de garcholas de l'Estau espanyol y ista marcha ya ye asaber-lo de consolidada como un referent d'as protestas y propuestas sobre iste afer. Os actos prencipian ya o viernes 9 y duran dica o domingo que se fa a marcha dica Zuera. Más info aqui.

Chornadas d'as luengas d'Aragón: Estianyo ya ye a decisetena edición y vienen a rebutir de actos y charradas prou intresants. O programa lo tenetz aqui. Dende o viernes 9 dica o diya 17 se i charrará de toda mena de qüestions relacionadas con l'aragonés: mosica, naturaleza, amostranza, a lei de luengas.... y rematará con un concierto de La Orquestina del Fabirol y Biella Nuei. Tamién en Tarazona se ferá una charradeta o diya 17.

Carboneros: Ixe mesmo cabo de semana, d'o 16 t'o 18, en Cerveruela bi habrá una trobada de carboneros con arrienda actos. Presentación d'un libro, azoque d'artesanía, gaiters, corrida de pollos... y un conciertazo de La Ronda de Boltaña, China chana y Gen. BRUT! Podetz trobar más info en o blog d'a trobada.

Chornadas por o Galligo: Un atra anyada se fan as chornadas por o río Galligo. Ya en he charrau bella vegada y podetz viyer bella foto en Flickr de Barrenaus. En tres diyas s'adube a conoixer un poquet a redolada, tastar muitos d'os fruitos que ofreix (entre atros un sobrebuen vin), viyer como se fan as navatas y, emocionar-se viyendo-las baixar dende Morillo dica Biscarrués. Un más que recomendable cabo de semana, más que más si encara no i yes ida nunca y, una sobrebuena traza de reivindicar a vida d'os ríos y d'os suyos ecosistemas, os humanos tamién.

Sincusatz todas as que haigatz convocau cualcosa y l'haiga ixublidau. Tos remero, de todas trazas, que si queretz que publique qualsiquier noticia, convocatoria u paranoia podetz escribir-me a tierradebarrenaus@gmail.com.

Retes en rete. Una cronica subchetiva

Mientres istas vacanzas de Semana Santa se celebró en Ruesta una trobada de retes en rete que miraba de trobar alternativas a o capitalismo. A pregunta que prebaba de responder-se-ie yera ¿podemos vivir sin capitalismo? Tanto por a tematica como por atras qüestions (pasar quatre diyas en o Pirineu siempre ye un buen plan) decidié d'ir-ie sin guaires asperanzas, en un primer inte. Con tot y con ixo le dié una oportunidat a la trobada y prencipié a participar-ie. Mala ideya, mocetas! Istas son bellas impresions que m'he traito d'ixa trobada.

A birolla: No soi o más indicau ta criticar as trazas de minchar de dengún, pues soi bien rarizo en o mío minchar cutiano. M'importa igual si a chent ye vechetariana, vegana, macrobiotica, carnivora u nomás mincha Fresquitos. Personalment creigo que cadagún ha de minchar o que quiera y o que le prebe bien. Lo que no me fa mica goi ye trobar-me con un texto que chustifica unas trazas de minchar porque asinas -traduzco literalment d'o pasquín- nos reconecta con a Primera Fuent, ye la Traza Sagrada de Minchar, cal tornar t'a Unidat con o Creyador y con a Creyación y asinas asinas. Lo siento, pero m'importa igual si as fateras relichiosas son alacetadas en o que dició un chodigo fa 2000 anyadas u en un indio hopi, u un Na'vi u qui siga. Ta yo ye a mesma vasuera por muito new age que siga. Ta yo como si hese bendeciu a mesa un mosén.

Debat transversal sobre treballos: Estió un d'os tallers a on que participé. Sí que'n surtión de buena ideyas pero terne que terne se centraba en as ecoaldeas. Parixeba que qui vivibamos en as ciudatz lo febanos porque no nos ne quedaba atra, porque yeranos masiau falsos ta marchar ta un lugar u bella cosa parellana. En iste caso parixeba que caleba cambiar a pregunta de ¿podemos vivir sin capitalismo? por ¿podemos fuyir d'o capitalismo?. As ecoaldeas me parixen una ideya sobrebuena y creigo que cal refirmar-las dende os lugars y as ciudatz. Creigo que son una buena cosa ta fuyir d'o capitalismo y fer vistero que se puede funcionar d'atras trazas. Pero, ¿se puede fuyir d'o capitalismo ta cutio? Si bell diya as ecoaldeas se tornasen inquestas, ¿no remataría o capitalismo con ellas de camín? Creigo que o capitalismo no tien medrana d'as ecoaldeas porque no son guaire menaza (a lo menos por agora). Cal luitar en muitos frents y ixe prou que puet estar-ne uno, pero a o capitalismo va a caler espaldar-lo, y tamién dende as ciudatz.

Marcha t'Artieda: Probablement o millor que se i fació. Una d'as poquetas cosas que remeraba a on se feba a trobada, antimás d'os espiellos que bell una dixó en a “botiga de baldes”. Se fació una curseta dica a ermita de San Juan de Maltray amán de l'entibo, que rebutiba d'augua, a on que no explicoron a nueva campanya que son fendo. Aprofitando l'anyo Xacobeo han dixau un fascal de cantals pintaus d'azul en os puestos menazaus por o recreiximiento de Yesa. A ideya ye que ixos cantals vaigan dixando-se por tot lo Camín de San Chaime ta fer vistera a luita contra Yesa. A noticia podetz leyer-la aqui. Tamién estioron explicando a suya luita y, chusto quan se prencipiaba a charrar d'a mercantilización de l'augua y a suya consideración como un bien de mercau igual como qualsiquier atro, un atro iluminau de tantos que bi'n heba pretó a charrar de no se qué d'os druidas y d'os celtas, ixublidando o debat important. A la CHE, os druidas rai. Y a o capitalismo tamién. Dimpués a mesma infumable colleta prencipió a acarrazar a tierra u lo sol u fer bell saludo cosmico, mientres a minoritara resta encetabamos o camín enta Artieda.

Carne de secta: Garra cruz, ni estrelas de David, ni chent rezando cara t'a Meca ni cosa parellana. Y con tot y con ixo, pocos puestos tan relichiosos he visto como ista trobada. Un pasquin m'informaba de que a mía firma astronomica m'ubriba a s puertas de l'espacio cuatridimensional (sic). Unatro de que m'heba de conectar con a Primera Fuent y a Creyación (viyer más alto). Un taller o sabado de tardis prebaba de convencer-me de que bi heba una filosofía china que chuntaba l'astrolochía y a fisica quantica. A yo, que as relichions, as supersticions y as sectas ye tot lo mesmo, me parixeba estar en un campamento de Corazonistas.

Lo positivo: Prou que me'n levo d'experiencias positivas. 1. As companyeras que estiemos chuntas y con qui faciemos buens ratos y buena pacheta. Conoixer más a las companyeras de luitas siempre ye bueno. 2. Tamién i conoixié chent que no yera barrenada y que aspero tornar a escunzar-me. 3. Conoixer un puesto tan repoliu como Ruesta que nunca no i yera estau y viyer como quedan os lugars eshabitaus por os entibos. Tenetz fotos penchadas en Flickr de Barrenaus y aqui alto. 4. Saber con qué mena de chent no se puet contar en caso de revolución y conoixer un poco más a ixe ente clamau humanidat... 5. Viyer naixer una protorelichión, que siempre ye curioso. 6. Haber espardiu luitas como l'aragonés u os entibos entre chent de muitos cabos d'ista parti d'Europa (bi heba dende andaluces, portugueses u extremenyos, dica alemans u mesmo bell australiano espisguardau...)

A tamás de todas as queixas a valuración cheneral no ye mala de tot. Cuento, y aspero, que toda a crica de barrenadas que bi habió d'entre ixas cincocientas personas que bi estiemos, yeran minoría y que sí que bi ha chent treballadera entre a hippiealla (fote con o neolochismo!). Y tot lo aprendiu a ran d'organización y de trazas de treballar podría aplicar-se perfectament a todas as luitas anticapitalistas dende atra ambiesta y atras dembas. Si bella vegada se tornase a repetir i tornaría, ixo sí, sabendo lo que i trobaré y parando un taller titulau "misticismo y relichión, a mesma mierda ye".

Ampraus 040

Ateismo: Feba tiempo que no'n charraba y ista vegada no soi yo qui ubre o fuego sino qui lo segundia. Un tal Juan Manuel Aragüés charraba ayer d'o respeto entre ateas y catolicas en iste articlo que titula “Creyentes pasivos”. Curtet y o tema da ta muito más, pero prou como ta explicar lo que muitas sentimos. O termino de creyents pasivos m'ha feito, antimás arrienda de goi. Remero que mis pais teneban un amigo que iba ta misa por a muller suya que yera catolica y que se definiba como “practicant no creyent”, de revés que todas ixas “catolicas” que, con toda a barra d'o mundo, se definen como “creyent no practicant”. Por cierto, si tenetz un ratet y prou paciencia, tos convido a leyer os comentarios que m'aduyan a refirmar o que deciba sobre o respeto entre cuchas y dreitas en ¿Qué ye pasando? 2 y 3.

China: Y asinas s'acotolan as luengas. Leyié de casualidat iste articlo de Publico sobre o mandarín y o cantonés y como a politica d'o gubierno chino ye acotolando o segundo. Ye de dar que una luenga con 80.000.000 de fablants no ye en periglo, pero proporcinalment, dicen en un comentario, que ye a situación de l'euskera u lo gallego. Tamién i remeran a toda a resta de luengas charradas en China que son en pior situación. Prou curioso y eixemplificador d'as politicas de cultura unica que bi ha en tot lo mundo.

Gallocanta: Se i fació fa poco o festival d'as grudas. En istos zaguers diyas de febrero cuento que encara i serán istas aves que nos visitan en o suyo viachar t'o Norte, an que pasarán primavera y verano. Bi estiemos pasando o diya y he penchau bellas fotos en Flickr de Barrenaus. A calidat ye la que ye, que contino sin tener ni ideya de fotografía, pero aspero que tos faigan goi.

Videos: En tiengo dos, y os dos d'a chent d'Oregón TV. O primer, d'o primer voluntario d'as Olimpiadas d'hibierno, que ya estió voluntario d'ExpoNabo. (Belloch quier acotolar a las viellas a pur de fer-las treballar de baldes en Expos y Olimpiadas, soi seguro). O segundo, un video d'o Comando Almugavar an que aparixen os Lurte. (M.O., cal que m'avises d'istas cosas que sino no m'entero!)

Primer voluntario d'as olimpiadas:

Lurte en Oregón TV:

Ampraus 034

L’agüerro ya ye plegau y con qué trazas! Que’n fa de fredor...! Ixo sí, nos dixa paisaches repinchos como o d’a foto penchada, feita en Bezas, redolada d’a Sierra d’Albarrazín. Podetz biyer-ne más en Flickr de Barrenaus.

Torturas taurinas: As torturadoras ya no saben ni qué nuebas trazas de torturar creyar. Seguntes informaba Publico, en Galapagos (Castiella) fan bella mena de safari con autos encorrendo toros dica que se cansan (as umanas) y lo matan fotendo-le un tiro. Como cuasi siempre ista colla de salbaches tamién son biolentas con as umanas y a las periodistas y actibistas las menazaron, mesmo plegando a cremar l’auto d’un mozo d’o lugar que, seguntes ellas, estió qui informó a PACMA y a las TB’s. Prou que con a pasibidat d’a resta d’o lugar y d’a guardia zibil. Penible. En ista web tenetz más info sobre o caso de Galapagos que se suma a tantas y tantas atrás barbaridatz feitas a os animals y consentidas y mesmo subenzionadas por l’Estau espanyol.

O PAR ye una mafia. Ixo ye vox populi dende fa muitos y muitos años. Ya cuasi ye parti d’o imachinario colectibo aragonés. Ixa mena de Status Quo no gosa d’estar denunziau, pero leyié (en l’Eraldo!) que PP y CHA demandaban esplicazions por a chestión d’Ordesa. Podrían demandar-las por tantas y tantas cosas... pero a lo menos ye un primer trango. Cuento que no irá guaire dillá, porque totz os partius quieren fer lo mesmo cuan tiengan o poder, pero que a lo menos aigan de disimular bel poquet. Bergüeña de país...!

D’Estrasburgo plegan buenas notizias t’a libertat de todas. A lo menos as instituzions europeas tienen un poquet más platero ixo d’as libertatz relichiosas, porque aquí continan los cruzifixos por totz os cabos. En istos diyas de fundamentalismo catolico, siempre nos quedará Estrasburgo. Y MHUEL, que organiza, de cabo ta cuan, apostasías masibas. A pachina web suya feba tiempos que no me la miraba y ban adibindo-ie arrienda contenius repinchos. Un d’els, un Howto de l’apostasía. Por lo que charré con ellas, por ista bía no te dan guaire mal y en poco tiempo se consigue apostatar. Grazias, MHUEL, por empentar istas iniziatibas que tanto calen.

Ta rematar un zaguer binclo a un articlo que penchó Florencio en Desde Banarús sobre l’Alakrana. O caso iste ye tot un eixemplo de l’ipocresía y l’esconoiximiento d’o mundo que tien a más grand parti d’a chent. De bideos, tos ne pencho un de recosiros. As que tiengatz si fa u no fa a edat mía ista canta tos ne trayerá ambute, de recosiros.

Nobedatz

Dimpués d’istos pocos diyas de descanso, torno con muita rasmia, ganas de fer cosas y bellas nobedatz. A mía ideya cuan prenzipié con Tierra de Barrenaus yera basicament esbastar un ratet cada diya y aprofeitar ta espardir combocatorias y gomecar bellas ideyas que me dondiaban por l’esmo terne que terne. China chana Tierra de Barrenaus s’ha combertiu en cualcosa más ta yo. Muitos sé que me liyetz asobent. Atros, más de cabo ta cuan. Y atros simplament biyetz os bideos que pencho.

Lo que quiero agora ye dar-tos bella cosa más. Ta prenzipiar tos boi a ufrir una adreza electronica tierradebarrenaus@gmail.com que, dende agora será a d’o blog. Podetz imbiar-me-ie todas as combocatorias que quieratz u cualsiquier cosa que tos agane que publique u que esparda. Antimás, dende agora imbiaré de cabo ta cuan un boletín informatibo ta tot qui quiera. T’apuntar-se-ie imbiatz-me un mensache a o debandito correu indicando-ie que queretz rezibir o boletín. Que i saldrá? Pues as zaguers nobedatz de Tierra de Barrenaus, combocatorias de toda mena (culturals, politicas...), bideos de lemurs y asinas asinas.

A segunda nobedat ye una nueba cuenta de Flickr. Bella mena de Flickr de Barrenaus. Si belún no conoix ista web, ye basicament, un puesto an que penchar fotos. No soi guaire buen fotografo. De feito soi penible, pero me fa muitismo goi de tirar fotos de totz os puestos y mobidas que i soi. Asinas que talmén no i trobetz amanixers gloriosos, pero de seguras que i trobaretz fotos de manis siñaleras u puestos bien pinchos. Por agora bi ha tres albums tematicos: Aragón, an que pencharé fotos d’os puestos t’an que boi; Cultura aragonesa con mosica, tradizions y asinas asinas. Y Luitas, con fotos de toda mena de lutias sozials, culturals y politicas d’iste país y de dillá d’a güega.

Aspero que tos faigan goi as nobedatz y que las prenzipietz a fer serbir antis con antis. Asinas que ya podetz ir imbiando os buestros parixers t’a nueba adreza (tierradebarrenaus@gmail.com) y en bels pocos diyas prenzipiaré a imbiar info. Tos dixo con unatro bideo de lemurs. En primerías parix que ye un monchón, pero be-te-me que no! Que ye un lemur de berdat! Que'n ye de pincho! Igual como un mixín, pero en mono...