Esfendemos a tierra, Instituto de l'aragonés y podrufierta politica. Tierra de barrenaus 4x11

¡Buen mes rusient que hemos teniu iste chunyo! Bien se vale que arriba lo verano ya, y tendretz bell diya libre. Y digo "tendretz", en segunda persona, porque yo ya he acotolau las vacanzas y precisament por ixo bi ha habiu tant poqueta actividat en lo blog. Pero a partir d'agora, aspero poder escribir, a lo menos, con lo ritmo cutiano.



Arriban tres de los millors diyas de l'anyo. Ixos tres diyas an que alentamos libertat, soberanía y desfensa d'a tierra, rodiaus d'as companyeras d'aqui, d'asti y d'alli. Arriba Esfendemos a tierra, lo festival que se celebra d'o 20 t'o 22 de chulio en Artieda y que en ista edición combina clasicos incombustibles como la Llitera Tropical y Els bocs de Can Rosés, con bandas nuevas y quantas novedatz. Pa charrar-ne, estié con Miguel, de Purna, qui recontó todas las actividatz que i podremos fer.

La DGPL, dimpués de deixar claro que no derogará la lei d'o LAPAPYP, contina encerrinada en fer efectivo l'academia zancochera que preveye ixa lei feita contra la diversidat lingüistica, y que lo mesmo director cheneral calificó de "cajón de(sastre)" y dició que podría provocar "la desparición a medio del plazo (sic) del aragonés". Nogara emitió un comunicau sobre iste afer, que podetz leyer en Arainfo, y que Dabi nos explica en lo programa, alportando antimás un intresant marco historico, lechislativo y politico.

Pa rematar lo programa, arriba una nueva edición d'a Podrufierta. Lo curso politico 18/19 se presienta intresant a-saber-lo y prebemos de fer d'endevinadors con las nuestras previsions pa iste curso. Tanto a nivel municipal, como nacional y estatal. ¿Acertaremos? Cal que no. Pasemos un buen rato y reflexionemos sobre l'actualidat politica? A fé que sí.

De nuevas, aspero que tos faiga goyo y que me faigatz arribar los vuestros comentarios, propuestas, faltadas, etc..

Festivals de verano. Tierra de barrenaus radio 1x03

En que l'orache bueno plega, ya prencipio a barruntar festivals. Tot l'anyo voi ta conciertos, prou que sí, pero os festivals de verano son un trango dillá d'o simple concierto en salas. Antimás de arroclar arrienda collas en una sesión mosical, l'ambient y o flow que se i fa ye ta yo una d'as millors sensacions que bi ha en ista vida. Ixos ratetz de libertat absoluta que tant poco a soben podemos disfrutar. Asinas que malas que s'acerca lo verano, me foto buena parte d'o tiempo mirando as programacions d'os festivals.  Iste yera un d'os primers programas que pensé en fer y dimpués d'o sobrebuen rato que pasemos, regular que bi habrá una segunda parte charrando d'atros festivals. Agora puetz ascuitar-lo pretando lo play d'abaixo, u descargar-te-lo en iste vinclo.



Tanimientres, o primer d'o calendario, y o más gran que nunca he estau ye o Viñarock. Mitico festival que ha feito vinte edicions y que ye referencia festivalera obligatoria. Sobre a XIX edición escribié bell par d'articlos, un a modo de cronica y unatro con consellos. Viñarock ye una chiqueta ciudat de bellas decenas de millars d'habitants, por bell diya y bi ha tanto que recontar que daría ta qualques programas. Con tot y con ixo, Cherardo, Tamara, Carlos y yo prebemos de transmitir una parte de ixa gran borina que se celebra cada anyo en Villarobledo.

Un d'os primers festivals d'o rollo folki qu7e visité, estió lo PIR. Dende aquella primer edición que fue, en Aragüés, fa  más d'una decada, repetié totz os anyos. Mesmo los que treballaba en a hostelería. Mesmo l'anyo que treballé en a Expo con os suyos draconianos horarios. I descubrié muitas mosicas d'os paises pirinencos y esdevenió una d'ixas citas anyals a on que te trobas siempre con amigas con qui compartes pasions, militancias, borinas, ... ¡Quantos bailes m'habrán aguantau as plazas d'Aragües, Chasa, Ansó y Echo! Y quantas capuzadas nos habremos fotiu en as pozas d'a redolada! O festival ye esbafando-se cada vegada más. L'anyo pasau sisiquiá i fue,y iste anyo encara soi pensando-ie. Con tot y con ixo, o PIR ye un festival de referencia, encara que nomás sia por a suya historia. Dabi, Cherardo, Tamara y yo estiemos charrando d'o festival, d'o bueno, d'o malo y d'o regular.

O programa remató con atro d'os festivals obligatorios en o mio calendario. O más choven d'os tres. Esfendemos a tierra, festival imperdible ta l'independentismo aragonés y ta muita atra chent que, encara que no comparta l'independentismo, nos acompanya en muitas d'as suyas luitas medioambientals, culturals, u socials. U simplament quiera estar-se-ie de borina bell par de diyas. D'o festival artiedano, escribié isto fa bell diya, remerando belunas d'as sensacions que tenemos qui tanto queremos iste lugar y iste festival. Antimás, tenié a suerte de poder contar con dos d'as organizadoras d'o festival. Con Armando y Laura estiemos charrando de todas as cosas que se i fan en tasament dos diyas, como o Lipdub que podetz viyer una miqueta más abaixo en iste post.

Esfendemos a tierra (Salindo de l'almario indepe)

Tot lo mundo ye d'una minoría. Lo sepan u no pas. Beluns somos parte de muitas minorías. Pareixería quasi que en colecccionamos. Por unas nos dicen frikis, por atras  decheneraus. Por as mias ideyas politicas, m'han faltau de tantas y tantas formas que tendría pa qualques articlos. En estar parte de qualsiquier minoría, siempre fa firme goyo trobar-te con atras personas que'n fan parte. En un ambient favorable, a on que te puedas expresar, a on que puedas estar tu mesmo sin problemas. Lo que agora le dicen salir de l'almario. En o caso d'a mia identidat politica, que por un regular levo d'amagatons ta escusar-me problemas, bi ha tres diyas que salgo de l'almario y entro en Artieda, en o festival Esfendemos a tierra.

Artieda ya ye más que no un lugar. Ye tot un sinyal de muitas cosas. D'a luita por a dignidat, por a defensa d'o territorio, d'un movimiento choven como pocos lugars en tot lo mundo conoixen,... y ta muitas de nusatras ye ixe puesto a on que nos sentimos en casa siempre. Y tres diyas cada anyada, en a gloria.

Prou que os conciertos, as charradas, as actividatz, etc... que se fan en Esfendemos a tierra son importants. Sin tot ixo no bi habría festival, ye platero. Pero cuento que lo que a todas nos motiva ta ir-ie ye o feito de trobar-te con (quasi) todas as companyeras, vivan a on que vivan y sigan d'a on que sigan, y poder intercambiar ideyas, borinas, propuestas, penas, alegrías, .... Un puesto a on que charrar aragonés u catalán siga una avantalla y no pas un entrepuz u a on que l'adchectivo "nacional" signifique, por defecto, "aragonés" en todas as conversas.

Vivir Esfendemos a tierra, u qualsiquier atra salida de l'almario d'as mias identidatz compartidas por pocas, me fa entender millor por qué a mayoría d'a chent busca estar d'as mayorías. Ixe sentir-te acubillau, ixe estar parte d'a tribu tant ancestral u mesmo evolutivo, ye una sensación calida y aconortadera. Toda una puyada de drogas d'ixas que chita o cerebro en o nuestro cabal sanguinio pa que nos estemos goyosos. Yo tasament puesto disfrutar-lo bella vez a l'anyo, asinas que poder tener-lo diya par d'atro be d'estar grandismo. Cuento que qui ye totz os diyas "parte d'a tribu" tampoco no sabe fer-le aprecio, ni chestionar quan deixa d'estar-ne, que a la fin, siempre te ha de tocar bella vez.

Unatro Esfendemos a tierra s'acerca. Tornaré a bailar, a zorriar, a mantener debatz absurdos u no, dica la maitinada, a viyer a las amigas d'aqui y d'alla, y a fer-ne de nuevas, que siempre se'n troba. A emocionar-me con a resistencia de como un lugarón de bell centenar de personas desafia por cada diya a toda la maquinaria de l'estau y d'as grans interpresas. A conoixer luitas y luitadoras. A pillar capazos en aragonés y catalán. A abrazar-nos y redir-nos. A cocinar, a compartir, a chugar, a cantar dica perder a voz. A estar plena yo mesma por dos diyas y meyo.

Cosas que cal fer remerar a la policía y a qui les refirman

Vinyeta Orichinal de Fontdevilla

L'actuación policial ye a sobén discutida por as cuchas alternativas. Ye una d'as cosas de pior entender t'a chent que no ye embrecada en ixas zurdas, u en os movimientos socials  que gosan estar represaliaus. Creigo que dende as reprimidas talment habríanos de fer un poder pedagochico y explicar millor porque protestamos tanto y con tantisma razón contra la policía y as suyas actuacions.

Ta prencipiar cal remerar que, teoricament, a policía ye ta guarenciar os dreitos de todas y totz os ciudadans. Dreitos como o de vaga, u o de manifestación. Quan a policía va ta una manifestación, se suposa que va, entre atras cosas, ta protecher o dreito d'os manifestants a expresar-se. Ta que masas furas de antimanifestants no les empachen d'exercer ixe dreito. ¿Por qué, alavez, todas ixas identificacions "aleatorias" a los manifestants? ¿Por qué ixe amedranamiento? Garra persona que no siga identificada terne que terne por fer farcha de lo que sía puede entender isto. Hemos de fer-les comprender a toda ixa chent lo inchusto de istas situacions. Lo que ye que no puedas fer una gambada por a tuya ciudat quan bi ha una manifestación, rai si bi vas u no, sin que a cada trango, un policía de muitas malas trazas por un regular, te considere sospeitosa de lo que sía.

"¡No faigas ixa farcha si no quiers que te aturen! No vaigas ta manis periglosas... " Todas, u muitas, hemos sentiu de familiars y amigas frases parellanas. Han deixau que o dreito a vestir como m'agane u a ir t'as manis que quiera, lo decreten os concietos d'una policía, u millor dito, una politica d'acoso y criminalización d'a cucha.

Atra d'as cosas que siempre contamos y que a resta d'a chent pocas vegadas entiende, u nian se creye, ye l'afer d'as infiltradas. D'antes mas yera dificil tener prebas d'a infiltración d'as policía. A resta d'o mundo heba de confitar en a tuya parola. Agora mesmo bi ha toneladas de fotos, testimonios y prebas de que en muitas manis, y más que más, en as más conflictivas, a presencia d'infiltradas ye más que cutiana. Ixas prebas cal amostrar-las a toda la chent que no nos creye. Cal fer-les viyer que, antimás, a suya faina ye a más puerca de todas y que, a soben, incluye provocar os disturbios que dan "razons" a la policía ta enrestir contra os ciudadans. ¿Cómo podemos saber que, en qualsiquier manifestación que bi haiga disturbios, no los ha provocau a mesma policía, mientres no se rematen ista "infiltración masiva"? En a mani y post mani d'o pasau 25 de chinero, s'identificoron seis policías infiltraus. Seis que les descubriemos. ¿Quantos bi'n habría de verdat? ¿Cómo sabemos que qui creba un veire u vulca un contenedor no ye un policía? En o "rodia lo congreso" quasi bi heba más polis que manifestants. No ixublidemos aquell ya mitico "que soi companyer"... Istas historias cal documentar-las y espardir-las de traza adequada.

¿Y si bi ha disturbios? Ye verdat que una d'as fainas teoricas d'a policía ye esfender o dreito a la propiedat. Publica y privada. Ye decir que sí, han de prebar de que dengún no prete fuego a las cosas, ni estricalle veires. Pero caldrá fer-lo con talento, digo yo. En Zaragoza bi ha cientos de manifestacions cada anyo. Quan a policía no i va u tien una actitut de simplament "estar-se-ie por si un caso", no gosa de pasar cosa. Quan a policía va "a liar-la", quan fan carranyar-se a la chent con identificacions aleatorias con "por aquí no", con "puya t'a cera" con "a manifestación ye dica ista ringlera porque yo lo digo" y asinas asinas, pues gosa rematar malament. A soben tienen orden, y todas lo sabemos, de provocar os disturbios. Saben perfectament qué NO cal fer ta que tot vaiga tranquilament. Si a policía no estase endizcando terne que terne a os manifestants, no bi habría os pocos disturbios que bi ha. (1 Nota a la fin) Si no tenesen ixa actitut, charraríanos d'atra traza y bi habría más respeto. Pero sobre tot, ¿dica qué punto se puede plegar ta protecher un veire u un contenedor? ¿Ta protecher quatre veires d'un supermercau, que antimás regular que ye asegurau, cal sitiar tot un vico, prebar de meter miedo a toda la chent que i ye vivindo u de borina? Cal, unatra vegada, fer identificacions aleatorias, chitar pelotas que pueden deixar ciega a la chent u abataniar a qualsiquier que pilles con a porra? Porque no se ye castigando a qui la fa, que sería atra discusión. Se castiga a qui pillan. Rai si tien culpa u no pas. Se represalía a qui pasa por astí. Y todas en conoixemos historias parellanas. Recontemos-las terne que terne. Serenament.y con toda seriosidat y sin alticamar-nos, proque si no, no nos creyerán.

Os "servidors publicos" que se suposa que son, s'avergüenyan siempre publicament d'a suya faina. Siempre amagaus con as suyas capuchas, encara que faya 40 graus en o paco. Siempre prebando de que os periodistas no puedan gravar todas as barbaridatz que fan y, siempre, prou que sí, amagando u no dando o numer de placa ni garra identificación. ¿Que han de amagar si o suyo treballo ye tant eixemplar como se suposa que'n ye? ¿Cómo se puede confitar en que faigan cumplir una lei que no cumplen ni ells mesmos? ¿A on ye a libertat de prensa? Quan a una periodista no le deixan gravar imachens d'una detención u d'una enrestida policial u l'esborran a tarcheta, no solo son violando os dreitos d'a detenida y d'a periodista, son estricallando de tot o dreito a la información que tenemos todas las ciudadanas.

Ta forro de bota, as poquetas vegadas que a la policía se le condena por torturas, abusos u montaches (cal remerar l'eixemplo paradigmatico d'o caso 4F, que remató con a muerte d'una d'as acusadas), o sistema, en no pocas vegadas remata quitando-les d'a garchola con indultos. Indultos que pocas vegadas viyemos en qualsiquier pena inchusta.

Muitas actuacions policials, a mayoría, antimás de faixistas son absurdas. En reconto belunas como eixemplo:

Orichinal de Vergara

En una manifestación antitaurina i fuemos una crica d'amigas. Ibanos bella mica pifolas, que yeran Pilars. A mani prencipió, como de cutio, arredol d'a Plaza de tortura de toros y continó baixando por a carrera Conde Aranda. Como que yeran Pilars, en bells intes "salibanos" d'a mani ta dentrar en bella botiga u bar a pillar biera. Una d'as zagalas prebó de fer lo mesmo a lo que un d'os policías le dició que no podeba salir-ne. Que heba d'ir con a mani dica la fin. A zagala no querió dar-le más importancia y tornó t'a mani carranyada. A mani remató en a Plaza d'a Diputación Provincial a on que se leyeba o manifiesto. Un policía decidió, porque os suyos collons le'n dicioron, que a manifestación plegaba dica a on que yera ell. Arale, que iba con yo, decidió que ella se metería a on que querese. Pleitiando pletiando, dengún d'os dos se'n vinió a plego y Arale consiguió quedar-se a on que quereba y a on que podeba. No yera molestando a dengún, ni fendo estorbo t'a circulación d'a chent. Simplament yera desobedeixendo una orden de tot concietera y d'ixas de "aquí soi yo l'autoridat". ¿Por qué no le deixoron salir d'a mani a l'atra zagala? No correba garra periglo. Preba en ye, que muitas atras personas se'n saliban y bi tornaban sin mica problema. Porque les cal amostrar a suya autoridat. Les cal remerar-nos que si nos manifestamos ye porque nos deixan. Pero ixo no ye asinas. Nos manifestamos porque ye o nuestro dreito. Y no'n ye porque lo meta en a constitución. En ye porque somos personas y ciudadanas.

En Artieda no cal contar guaire d'as enrestidas que sufriemos de man de l'exercito espanyol. Porque cal remerar tamién que a Guardia Civil espanyola ye parte de l'exercito. Ye l'unico cuerpo policial militarizau d'Europa, mida d'o civilizau que ye l'estau espanyol. Tot un lugar que se mete en metat d'a carretera ta protestar contra qui preban d'afogar o suyo futuro. Se monta un operativo exacherau y absurdo de tot, que incluye autobuses de picolos y helicopteros. S'enriste contra ciudadanas abataniando a muitas d'ellas, con muitas posibilidatz de que hese pasau bella cosa mesmo más grieu que no'n pasó. Y tot ¿ta que? ¿Ta un tramite, un puto papelico, que se podeba fer sin acceder a lo lugar? ¿Que de feito ya s'ha feito? ¿Ta ixo nos gastamos un trapacil de diners en trayer helicopters y autobuses d'achents y abataniamos a pacificos ciudadans? ¿Ta ixo metemos en risque as suyas vidas y as d'os militars que les abatanioron? ¿Qué i buscaba ixa enrestida? Nomás contrimostrar o poder de Gustavo Alcalde. Amostrar que, si quieren, fan lo que les agana. Y como antimás controlan os medios de comunicación, ta forro de bota, nos dicen que as violentas somos la resta. Y como tamién controlan os chueces, preban de engarcholar y meter pinyoras a qui resistió, d'aforro y abarcas, como podió debant d'una colla de militars armaus con porras, escudos, chalecos y cascos.

Cuanto a la legalidat d'as manifestacions: Ye una d'as excusas que se mete ta fer lo que les pete. Cal saber explicar que o dreito de manifestación no pende d'a opinión u concieto que tienga un delegau de gubierno (3). As manifestacions se COMUNICAN, no se legalizan. Y mesmo nian cal comunicar-las, pues o dreito de manifestación y de libre expresión ye un dreito contemplau en a Carta Universal d'os Dreitos Humans. Dito isto, suposemos que imos a estar buenos y que comunicamos as manifestacions. A la fin, tot lo poder de decisión queda en mans d'a Delegación d'o gubierno espanyol, ocupau agora en Aragón por un paranoico faixista como todas hemos puesto comprebar.

Foto de Jose Luis Roca

L'actuación policial en agosto de 2011 en Madrit ye un clarismo eixemplo de como a policía se fa servir de man d'o capitalismo ta encorrer politicament y fisicament a tot qui no'n ye d'alcuerdo. Una manifestación COMUNICADA LEGALMENT y con os permisos que demanda o poder, estió reprimida ta protecher unatra que no yera comunicada y que empachó de celebrar a primera. Cal remerar que a primera yera laicista y a segunda yera d'o cristianamen que implió y ocupó as carreras d'aquella ciudat mientres bells diyas, por a visita d'o Chefe de l'Estau Vaticano, Joseph Ratzinger. As imachens d'aquells diyas estioron bien furas, deixando imachens d'enrestidas y trucazos y arrienda censura tamién en reprimir a buena cosa d'as periodistas que cubriban lo que i pasaba. Atros eixemplos podemos trobar en qualsiquier manifestación u acto d'a extrema dreita, como en Blanquerna u a charrada por a paz en Euskal Herrria en a Universidat de Zaragoza a on que a policía s'adedicó, unatra vegada más, a identificar a los que yeran en a charrada y no pas a los nazis que la reventoron. Como experiencia personal, una vegada que vinió a policía espanyola a "protecher-nos" d'una más que posible agresión nazi, quan nos acubillabanos en un bar, en que i plegoron s'adedicoron tamién a identificar a bells quantos comunistas que heban saliu d'a siede d'o PCE a esfender-nos. Penible.

Con iste tema d'a policía ye prou dificil "desprogramar" a las ciudadanas que no lo sufren diya par d'atro. Cal tener muita paciencia, fer muita pedagochía y prebar de reducir a la minima expresión a demagochia que nos podemos permitir en atros temas. Bi ha cientos de testimonios y de prebas graficas en internet. Todas hemos sufriu u conoixemos a beluna que ha sufriu ixa actitut, como poco, de farute d'a mayoría d'a policía, y as suyas conseqüencias en forma de menazas, intimidacions, detencions, faltadas, trucazos y batans. Comuniquemos-lo lo millor que podamos a toda la chent que creye que son "inventos d'etarras".

Ixample: 
(1) Entre que escribiba iste articlo se fació a manifestación d'o 25 de chinero contra os Sitios policials de Zaragoza. Manifestación que marchó por un recorriu no comunicau, sin provocar garra problema que no fuese de trafico. Ni un solo disturbio, ni un veire estricallau, en una manifestación a on que a policía no i estió en garra inte y con os mesmos manifestants d'os diyas d'antes. ¿Calen más prebas?

(2) Encara que en quasi tot l'articlo charro d'a policía espanyola, ye de dar que isto vale t'os picolos y ta buena parte d'a policía local, en especial os UAPO qui, entre que escribiba isto, le fotioron un batán a un mozo, ¡por fer-se un fumarro en o CMA Las Armas!. Istos desucaus estioron creyaus en 2008 con a enchaquia d'a Expo y ta que Belloch se fese o pichafura y tenese un cuerpo policial. Como se nota o suyo pasau y a suya paranoia!. Si bi ha de sobras motivos ta disolver a UIP, ni te quiero contar a UAPO....

(3) Dimpués de tanta polemica con os escraches, ista semana pareixe que ni sisquiá os chueces creyen que ixo siga garra delito ni falta. Dolores Serrat, manimenos, contina privatizando a carrera Alfonso.

V Festival por Chiapas

"¿Ascuitoron? Ye o soniu d'o suyo mundo esvoldregando-se?". Con istas parolas que dicioron os zapatistas o pasau 21 d'avento quan se'n baixoron ta cinco ciudatz d'o sur mexicano, prencipiaba Daniel Rabanaque a presentación d'o V Festival de teatro solidario con Chiapas, organizau por o Caracol Zaragoza.

O festival, como todas as anyadas estió a-saber-lo de divertiu, con as actuacions de Teatro Arbolé, Nostraxladamus y Lü de Lürdes, en a sesión de maitins t'a catrinalla, y Wuatu, Nostraxladamus, Bufacalibos, China Chana, Juako Malavirgen y a Escuela Comica Suicida de tardis. Entre as actuacions Daniel Rabanaque nos leyó bells poemas suyos y d'otri, un d'ells en aragonés.

En ista edición convidoron a quatre luitas en Aragón a presentar-ie as suyas reivindicacions. A luita contra os transchenicos, a Coordinadera Antifaixista, l'aragonés y a luita contra o recreiximiento de Yesa estioron as esleixidas. Igual como todas as anyadas anteriors, o festival estió un espacio de borina, pero en ista edición o caracter politco y a reivindicación estioron muito más visteras que en anteriors anyadas.

As dos personas que representoron a las luitas por l'aragonés leyoron un chiquet texto y prochectoron un video. Os chovens d'Artieda tamién en prochectoron uno, dimpués d'explicar un poquet  sitación suya y leyer un comunicau. Contino pencho o texto que se leyó en aragonés y bells videos d'as intervencions.

Deciba Galeano de “Los nadies” que no charran luengas sino dialectos, que no tienen cultura sino folklore, y ixe ye o mensache que quieren fer-nos creyer as administracions aragonesa y espanyola. Que a nuestra luenga y a nuestra cultura no valen ta o mundo que quieren creyar. Un mundo a on que nomás as luengas d’os imperios economicos tienen dreito a existir, entre que a resta hemos de charrar as nuestras luengas d’amagatons, acubillaus en un cado ta que dengún no pueda sentir-nos.

As rebaixadas que sufre a nuestra luenga son continas y ya vienen de fa tiempos. Pero en zagueras somos vivindo como a luita contra l’aragonés ye más fura que no nunca. Viyemos como lo gubierno aragonés fa recular os pocos y chiquetz trangos enta debant que s’heban feito en as zaguers anyadas. A zaguer modificación d’a lei de luengas imposa a luenga unica, o castellano, ta todas. Sisquiá clama por o suyo nombre a las luengas d’Aragón, pretendendo que no son que un “conchunto de fablas locals”.

Bien se vale que qui charramos l’aragonés ya somos feitas a que l’administración no nos refirme. No asperamos cosa d’ells que no siga o reconoiximiento d’unos dreitos que no tenemos porque lo diga tal u qual gubierno, sino que son nuestros por o simple feito d’existir como personas y como comunidat lingüistica. Por muito que a beluns no les faiga goi.

Asinas que, a tamás d’os suyos entrepuces, as y os aragonesofablants continaremos fendo tot lo posible por que a nuestra luenga perviva, por que o legau de cheneracions contine vivo y por poder vivir en aragonés.

De Pilars: 11-14 d'octobre

 11 octobre

Prencipiaba a parti más fura d’os Pilars. O zaguer cabo de semana, a on que se da tot lo que’n queda, se recibe a las foranas, se visita a la familia y se queda una escruixinada ta toda la semana venient. Como Arale treballaba y yo ya prencipiaba a estar-me bien canso, pasé a tardi en casa viyendo-me Prometheus que, dimpués d’haber sentiu tantas vegadas que pudiba (u talment chusto por ixo), no me pareixió una mala cinta. No ta tirar codetes, pero se puet viyer.

Más tranquilet me’n baixé a trobar-me con as chents d’Artieda, que baixoron a estar-se por aquí bell ratet y con a resta de buenas chents que yeran por as barras d’o BIC. A las 23:00 prencipiaba o concierto de Rojo Cancionero qui repasoron bells quantos temas de muitos cantautors y bells quantos suyos prou pinchos. Sobrebuena traza d’empecipiar una nueit que apuntaba iba a estar epica. Y en estió. Poco que recontar, porque estió d’ixas nueitz que no fas que charrutiar y apanyar lo mundo con l’uno y con l’atro y capaciando con tot qui te trobas. Rematemos en o Lambrote, que rebutiba y a on que, encara no se guaire bien como, nos chuntemos de quaranta collas d’amigas diferents, barrachando-nos y rematando una rebuena nueit. Arale encara cundió un ratet más con as visitants fatas y asturianoaragoneses que rematoron por casa minchando uegos fritos.

12 octobre

Escruixinadas de tot, nos debantemos chustet ta plegar ta chenta obligatoria d’istos diyas con a familia. A tot estrús chentemos, nos recontemos lo que hebanos viviu y visto en as fiestas y malas que podiemos nos ne tornemos t’o leito a viyer si nos descansabanos bell porquet antis d’a que se nos veniba...

Siempre me deixo un diya de fiestas ta mirar de socializar con amigos de normal-landia (que ye ixa tierra a on no somos todas indepes y/u anticapitalistas) y iste anyo nos chuntemos buena cosa de chent de dos u tres colletas ta ir t’a Fiesta d’a biera que se fa en Val d’Espartera. A verdat ye que quan i fue por primer vegada l’anyo pasau no me atrayeba ni brenca ni meya, pero reblé y bi fué y he de decir que pasé una nueit rebuena. Ista anyada, os mosicos no yeran tan divertius, ni bi heba tantas chetas (u siga, caleba fer más ringleras...) pero con tot y con ixo pasemos una atra sobrebuena nueit entre amigos, ein prosit, juchifrins y a resta de fateras que se fan en ixos puestos. Si nunca no bi sotz estadas y tos fa bien de goi a biera, no tos quedetz sin tastar-lo bella anyada. En salir-ne, como canasticos, marchemos ta casa, no sin fer una aturadeta en un kebab ta que Arale fese esponcha.

13 d’octobre

Prencipiabanos o maitin en as tres pedretas... Un suco y una birosta con mermelada dimpués nos ne baixabanos t’o nuevo local pedalaire que bi ha a on que yera d’antismas Nogara (C / Palafox con C / Gavín). Se i feba un socalce y nos i trobemos con una Jam Session de Txalaparta con o chenio Euchenio y atros compas que acompanyoron a Txalaparta con saxo, donzaina, darbuca y lo que se pillaba por astí. En una d’as paretz, o cartel t’apuntar-se t’o GoldSprint, una corrida en bici estatica a viyer qui feba en menos tiempo 300 metros. Ixo, dimpués de ueito diyas de fiesta be d’estar mortal. Con tot y con ixo bi heba arrienda de chent apuntada. Pena de no haber-lo visto. Dimpués gambadeta con a familia y ta casa que caleba despertar a escape.

Y ye que no viyemos o Goldsprint porque a las 19:00 prencipiaba o Kabaret Dada. Cinco euros por quasi siet horas de mosica, clown, teyatro, vedette, monologos, humor, rock... qué más se puet demandar? Pues un ambient granizo, una borina total, buena cosa d’amigos alto y abaixo d’o scenario, risetas, biera, y una final apoteosica como nomas Dada puet fer-la con a fiesta scientifica!!! Grans Don Nadie, Jorge Asín, Juako Malavirgen, Marian Nadal, Dada... y toda a chent que pasó por astí, que me’n deixo a la metat. Tot isto a tamás d’un chiquet problema en a fonsera que tenié y que fació que me pasase bellas quantas actuacions en l’escusau.

Encara que remató a una hora decent (as 1:30 si fa u no fa), de capazo en capazo, a lo que pleguemos t’as barras d’o BIC yeran zarrando ta pena nuestra. Habiemos de fer-nos una(s) zaguera(s) en un local a on que nos fotiemos buenas risas bailando y prebando de apanyar una maquineta estricallada.

Ta rematar a nueit faciemos a error de dentrar en un bar. En Pilars! Concretament, en a Botica, que ye muito bien, pero rebutiba y quasi no se podeba ni alentar. Ni fotos decents podié fer-ie. Aguantemos lo que podiemos y, dimpués d’una aturadeta en o puesto ixe en a carrera Manifestación que fan panpizzas tan rebuenas y que siempre ye trancau, pleguemos en casa.

14 d’octobre

O día yayo. Ya escruixinadas y sin poder ni alentar, lo unico que quedaba yera fer una gambadeta por os puestos de Gran Vía. Lo de todas as anyadas. A lo menos nos ixoriemos un poquet y rematemos fendo-nos un chicolate con churricos en La Fama (C / Prudencio). Ta cenar nos metiemos Sombras tenebrosas y asinas despidiemos os Pilars dica l’anyada venient. No sé si por que se remataban os Pilars u porque hebanos visto a 14ena versión de Bitelchús (una atraTimburtonada) a Arale le dió una d’as suyas terrors de nueitz y nos fació foter un blinco a Kurt y a moi que ta qué.

A la fin lo he conseguiu. Totz os Pilars cronicaus. Aspero que muestras d’ego como istas no se tornen a repetir en iste blog. Tos deixo con bells videos... Dica os Pilars venients!!!

Rojo Cancionero. Banderas rotas



Txalaparta Jam Session



Dadá y Diego Peña Reggae lechionario

De Pilars: 8, 9 y 10 d'octobre

 

8 d'octobre

En o diya más heavy marchemos t'o concierto d'Azero, Metalurgica y Iron Maños. En plegar t'o Ternasco chusto yeran empecipiando Azero con Cona repela y nusatras creyendo que yera a prebatina de soniu porque yeran as 19:30 y creyebanos que prencipiaba a las 20:00. Bien se vale que i estiemos antis, porque viyemos o que, en a mia opinión, ye o millor concierto que ha feito Azero en as zaguers anyadas. U que le haiga visto yo, a lo menos. Y ixo que feba una calor ta morir-se. Temazos de totz os discos, que ya'n tienen prous y dedicatorias t'Artieda u t'os miners. Dimpués, Metalurgica y Iron Maños, floixetz... Encara que de los Iron Maños tampoco no'n remero guaire pues, gracias a los mios companyers de l'instituto que me i trobé, me la pillé monumental. En rematar o concierto m'han dito que estiemos por as barras y o Pottoka, pero ixo no tos lo puedo guaranciar....

 

9 d'octobre

Prencipiemos con Nafarroako fendo un buen socalce en El Coscurro y viyendo a exposición que tien Fablans en a Casa d'os Morlans. Muitos recosiros de conciertos y chambretas. De nueitz, decidiemos a la fin d'ir ta Los Artistas del gremio. Ya sé que tanyeba La Ronda, pero en Pilars, con tantisma chent, pasabanos un poco. En o Ternasco de nuevas tornemos a viyer un gran concierto. A charanga d'Os Artistas estió prou divertida en un primer pase que facioron antis de fer un show con artistas d'o rollo de circo. Un mozo con un diavolo fendo de tot, un par de zagalas puyando por unas cintas y fendo figuretas, ... muito espectacular, a verdat. En rematar un atro pase de Los Artistas del gremio, que remató con "churro, media manga, manga entera", ta goi d'Arale. Como a l'atro'l diya caleba amaitinar ta ir t'Artieda, nos faciemos a zaguera en Erzo y t'o leito.

10 d'octobre
Como cuento que ya todas lo hetz leyiu y visto, en Arredol, Arainfo, Heraldo, el Periodico, u Aragón Televisión, no cuento que calga adhibir cosa sobre lo d'Artieda. Bi estiemos, esfendendo con ellas a dignidat d'un pueblo y resistindo-nos a la suya "democracia" que no ye que dar palos a lo pueblo que s'esfiende contra o suyos intreses capitalistas y absurdos.

De tornada ta Zaragoza caleba parar a brenda de Nogara. Bocaus de choriceta, hummus, tortiella de trunfas y bella coseta más ta celebrar de conchunta os Pilars con un(atro) capazo en aragonés. I pasemos un buen ratet charrando d'o que heba pasau de maitins, d'os Pilars y de todas as cosas que imos a fer en iste curso 2012-2013.

Con a plevia heban zarrau as barras d'o BIC, asinas que nos faciemos buena rondeta por Pottoka, A Flama, el Detalle y a barra d'o PCE ta rematar marchando ta casica, que ya no yeran horas y bi heba cansera de tanta faina. Un diya que a fe a fe no ixublidaré nunca... Gracias Artieda

Artieda y atros lipdubs

Talment yes estada de vacanzas, luen d'Aragón y sin internet. Talment t'ha tocau de treballar firme y ni ta mirar-te lo correu t'ha vagau. Talment plegas agora d'una dimensión paralela a on que nunca no se fació l'entibo de Yesa... que me se yo. No trobo garra motivo ta que no haigas visto ya o Lip dub de Artieda que facioron en o zaguer Esfendemos a Tierra, pero si ye asinas, contino lo tiens penchau ta que lo veigas ya. 

Presentacions que no caleban antiparti, o lipdub d'Artieda ye toda una alfaya que s'ha conseguiu fer en Aragón. Antimás d'haber teniu un resultau sobrebueno, más que más, si se para cuenta d'os meyos que se teneba, qui bi participemos pasemos un rato rebueno. 

A experiencia d'os lipdubs reivindicativos ya leva buen camín. En atros países chirmans han feito atras obras d'arte. Y he pensau de compartir-ne dos que quasi seguro que habretz visto, pero que siempre fa goi de remerar-los. O primer, ye o lipdub indepe de Vic, que alavez consiguió o record de más chent participando en un lipdub plenando a plaza d'o lugar, que ye bien gran. O segundo, o lipdub d'o centro okupau Kukutza de Bilbo, hue desaloixau, a on que amostraban toda a casa. 

A mosica d'os tres videos no podría estar millor. Tres temazos tres de Mallacán, Obrint Pas y Zea mays.¿Qué más podríanos demandar?

Tres luengas, tres nacions, tres lipdubs

Aragón

Catalunya

Euskal Herria

Araleachenda de verano 2012

Todas as anyadas, Arale, ta istas calendatas s'organiza lo suyo verano. O suyo y o mio, en a mida d'o posible. Y ya de paso les n'invía a las suyas amistatz. En primeras se'n feban a mofla, pero agora ya ye quasi un ritual y, si tarda bell poco, le carranyan en trobar-se-la por a carrera. No digamos si se deixa bell festival u evento. 

Como cuento que ye una información d'intrés ta todas as lectoras d'o blog, feré un resumen de l'Araleachenda 2012 con bells comentarios míos y suyos:

Fiestas d'a Madalena: 15 a 24 de chunio. Vico d'a Madalena, Zaragoza. As fiestas d'o millor vico d'o mundo. Qué más decir? Incluyida la chera de Sant Chuan, que en ista anyada toca en sabado, y muitas actividatz alternativas ta prencipiar o verano con borina y reivindicación.

Tamborilé: 16 de chunio, Mezquita de Exarc (Cuencas mineras). Festival de mosica en a carrera. Tot lo diya dezaga d'una banda fendo pasavillas por o lugar, zorriando y bailando. IV edición d'una borinaza ya imprescindible.

Fiestas d'o Gancho: 21-26 de chunio. Vico d'o Gancho, Zaragoza. As fiestas d'o segundo millor vico d'o mundo. Encara no conoixco lo programa, pero siempre i levan buenas cosetas. Todas as anyadas i trobo bella colla de mosica nueva buena.

Poborina folk: 22-24 de chunio Lo Pobo (Comunidat de Teruel). Mitico festival de folk que leva 14 anyadas. Y como todas as anyadas me lo perderé. O nuestro festival maldito.

PIR: 29 de chunio - 1 de chulio Chasa (Chacetania). Toda una tradición. Un d'os millors festivals d'Aragón con una d'as piors programacions. Pero toque qui toque siempre i femos sobrebuenos ratos. Ye lo que tien a buena companyía, as badinas, l'alcohol y a mosica...

Fiestas de l'Anchel: 29 de chunio - 9 de chulio (Teruel)  Si nunca no i yes estada, ya tardas. Muito millor que Sant Lorient en Uesca. Si borina tenese una foto en o diccionario se fería en istas fiestas.

Esfendemos a tierra: 14-16 de chulio. Artieda (Chacetania) A gran borina de l'independentismo. O puesto y os diyas de l'anyada a on que salimos de l'almario y aprofeitamos ta debatir, charrar y, prou que sí, pasar un sobrebuen cabo de semana. Con muitas sorpresas en ista edición.

Carrasca Rock: 20-21 de chulio Exulv (Andorra-Sierra d'Arcos). Tamién se ha iu fendo o suyo espacio d'entre os festivals de verano, dende aquella primer edición fa ya tanto... Y siempre fendo buena faina en a prochección de collas d'a redolada.

Pirineos Sur 13-28 de chulio. Sallent, Val de Tena. O más institucional y comercial de totz os festivals, pero no por ello deixa de trayer asoben artistas intresants. Encara que nunca no i soi estau, tanto Arale como tot qui bi ye iu en ha traito buen sabor de boca.

Trobada de chenero: 17-19 d'agosto Lakabe, Nafarroa. Trobada sobre muller, salut y igualdat en una ecoaldea navarra. Prou intresant.

Fiestas d'Andorra: 7-11 de setiembre. Andorra. A oportunidat de rematar bien o verano y tener a zaguer borina estibera antis de prencipiar o curso. A tamás d'os bars, siempre surten buenas ideyas ta pasar a nueit.

Y ixo ye tot lo que incluyó Arale en a suya achenda t'o verano 2012. Si tenetz más ideyas podetz escribir-las como comentarios. Regular que nos deixamos cosas como estoesloquehay, Gaire, Lagatavajunto, Sant Lorient... Afortunadament a ufierta en Aragón ye cada diya más gran y más intresant.

 
 

Ampraus 057

Ya viyetz que en zagueras no escribo guaire. Asperemos que tornar t'a rutina me faiga centrar-me bell poquet y reprener o blog, que con tanto twitter y facebook lo tiengo prou albandonau. Como siempre que no soi inspirau, pos meto un ampraus...

Prou prou luen ye o titol d'un libro escrito por Tamara Marzo y Carlos García. Lo presentoron fa bells pocos diyas t'a prensa y he sentiu que en bell par de semanas puet estar que bi haiga una atra presentación. Ye un libro ta ninas sobre o meyo ambient que as suyas historias pasan en espacios naturals d'Aragón. Y prou que en aragonés. Caldrá leyer-lo. Hehehe.


Cara d'ababol se le quedó a o nuestro quiesto alcalde capín quan nombroron a Donosti capital cultural de no se que. A iste pobrichón le creix l'enanamen. Dimpués d'as eleccions disapareixió mientres bells diyas. Quasi se queda sin estar alcalde. Ta estar-ne le deixan sin ExpoNabo ni chuegos olimpicos. Habrá de charrutiar con os royos chungos y con os socialdemocratas con cachirulo ta gobernar y agora un os diaples indepes vascos le sacan o zaguer chuguete que le quedaba a ell. Tan catolico y espanyol y no l'ha valiu ta cosa. L'alcalde ploramica se tornó furo y menaza con chuicios y cosas d'ixas. Sobrebueno l'articlo de Purnas sobre iste afer.

O verano ya ye plegau y os festivals con ell. Ya pasó o Tamborilé y o Pobo y en poco tiempo seremos en Ansó en o pior PIR (a priori) que nunca no bi haiga iu. Lo mesmo de todas as anyadas pero con un diya menos de borina. Cada anyada mas penible. A tamas de tot, i pasaremos un buen ratet en as badinas y nos zorriaremos tot lo que bi haiga en a redolada. Dimpués, si sobrevivimos a las fiestas de Teruel, plega a gran fita de l'independentismo aragonés: o festival Esfendemos a Tierra. O contrario d'o PIR. Cada anyada millor. Estianyo Dada, Mallacán, Alkol 96, Eina y Batikano Rojo. Buenismo de tot... Qui quieratz puyar-ie en autobus podetz pillar os viaches en A Flama. Más info en a web d'o festival.


Y sin pena ni gloria despedimos un atro 29 de chunio. Bell articlo en Desde Banarus, bell atro en Purnas. Belloch carranyau, pero por atras cosas y en Aragón ixublidando-nos de qui somos...
Ta despedir l'ampraus, l'ampro a canta a Octubre17. Muitas gracias por dar-me a conoixer a Els Catarres!

Ampraus 045

Antis de marchar t'o PIR me veigo quasi obligau a dar bellas noticietas y convocatorias que aspero tos faigan goi.

Atenco: O pasau 30 de chunio estión declaraus inocents os 12 presos por os sucesos de Atenco que levaban en a garchola dende 2006. Ista noticia estió recibida por os colectivos zapatistas de tot lo mundo con muito enfuelgo pos ye a reconoixedura no ya d'a suya inocencia sino tamién de todas as irregularidatz d'os primers chuicios. A noticia ye penchada en Europa Zapatista. A la fin una victoria dimpués de tantas y tantas rebaixadas que os movimientos por a dignidat en Mexico.

L'aragonés contina vivo y os movimientos socials que lo esfienden no reblan. Mientres iste verano podetz aprender-lo, por eixemplo, en a escuela d'aragonés Nogara, que fa cursos intensivos de verano. Son tres horas cada diya mientres tot lo mes de chulio (y talment bell diya d'agosto). D'atra man, l'academia de l'aragonés a la fin ha publicau o listau d'esmiendas y a proposa ortografica final en a suya web. Podetz visitar-la punchando aqui, ta ir conoixendo-la y aplicando-la.

S'amana lo festival Esfendemos a tierra que será en Artieda lo venient 18 de chulio. ¿Cómo? ¿Que no tiens auto ta puyar-ie? No te'n faigas, moceta! A saputa organización ha meso un autobús que esnavesará o país, dende Calatayub dica Artieda, pasando por Zaragoza, Uesca y Chaca (creigo). Tos i podetz apuntar en a web u en A Flama, si vivitz en Zaragoza.

Fotos. Ya tos dicié que tos fería a tana con as fotos d'as vacanzas mías. Arale y yo estiemos bells diyas por a Vall de Benás y prou que bi faciemos arrienda fotos. Podetz viyer-ne cinco d'ellas en Flickr de Barrenaus y a d'a marmoteta aqui mesmo....

Programacíón estibera

Ya ye plegada a puenda de festivals y a escape podremos prencipiar a marchar cada cabo de semana, de lugar en lugar y de borina en borina... Ista anyada plega a rebutir de proposas. Bi'n ha de viellas y de nuevas. Muitas cosas que he iu replegando, más que más gracias a Arale. Aspero no dixar-me-ne guaires (bell una de seguras que me'n dixaré) y que tos faiga honra toda a información.

Charraire Fest: 12 de chunio. Pandicosa (Alto Galligo). Un festival que naix y que le deseyo que tienga bien de suerte. Actividatz mientres tot lo diya, centradas en as luengas d'Aragón. Teyatro, charradas, conciertos, tallers... un poquet de tot ta todas de todas as edatz. I colaboran antimás toda mena d'asociacions relacionadas con a esfensa d'as luengas d'Aragón. En a pachina suya podetz viyer toda a info.

Tamborile: 12 de chunio en Mezquita de Jarque (Cuencas mineras). Ye a segunda edición d'iste festival de mosica en a carrera. L'anyada pasada nos fotiemos tot lo diya seguindo a la colla que estase bailando y zorriando por tot o lugar. En o blog suyo podetz viyer fotos d'a parti más tranquileta, que de dimpués no bi'n ha y si miratz en youtube, i trobaretz más cosetas.

Fiestas d'a Madalena: 18 a 28 de chunio en o bico d'a Madalena (ciudat de Zaragoza). As fiestas d'iste bico se organizan de conchunta entre os colectivos y personas que i vivimos. O programa no ye publicau encara, pero bi habrá muitas cosetas muito intresants. Coinciden con as fiestas d'atro repoliu bico zaragozano, o Gancho. Quienta descordinación! Habremos de desdoblar-nos t'adubir a tot!

Poborina Folk. 25, 26 y 27 de chunio en El Pobo (Comunidat de Teruel). Primer festival folki d'o verano y ya tot un clasico d'os festivals de verano. Va por a docena edición, por bella cosa será. O programa no ye penchau en escribindo isto, pero ya podetz viyer a web suya a on que regular que lo pencharán a escape.

PIR: 2, 3 y 4 de chulio. Echo (Chacetania). Poco más se sabe por agora d'o PIR d'estianyo. Como repito todas as anyadas, en iste festival importa un poco igual qui bi tanya que siempre i femos sobrebuenos ratetz. D'a programación, como todas as anyadas tamién, no se'n sabrá guaire dica a zaguer semana.

Esfendemos a tierra: 17 y 18 de chulio. Artieda (Chacetania). Con China chana, Prau, Gen y Rebel Spell, Esfendemos a tierra fa a tercer edición ya. A morfuga que se i fa ya de tardis ye total! ¿Cómo ixublidar l'aurresku-breakdance de l'anyo pasau?. En a web d'o festival, que rebute de contenius, podetz conoixer a las collas, a los colectivos que refirman y asinas asinas.

Carrasca Rock: 23 y 24 de chulio. Exulve (Andorra-Sierra de Arcos). Un festival que china chana se ye fendo un clasico. L'anyada pasada, por si no lo remeratz, habió de cambiar a calendata por os fuegos que bi habió por a redolada. En ista edición, ya podetz viyer que tamién replegan ixa reivindicación de cudiar os nuestros monts y no ixublidar lo que i pasó y lo que puede pasar en cualsiquier d'os monts d'o país nuestro. Lo que se conoix por agora d'o cartel ye bien bueno y promete muita borina.

Como he dito antis, de seguras que me soi ixublidando de bella cosa. Sincusatz as organizadoras d'o que sía que ixublide. Encara manca muita d'a programación y tot lo mes d'agosto, asinas que isto no ye que una uelladeta de parti de tot lo que bi habrá iste estiu... Que tos faiga buen prebo y nos viyemos de borina!

Retes en rete. Una cronica subchetiva

Mientres istas vacanzas de Semana Santa se celebró en Ruesta una trobada de retes en rete que miraba de trobar alternativas a o capitalismo. A pregunta que prebaba de responder-se-ie yera ¿podemos vivir sin capitalismo? Tanto por a tematica como por atras qüestions (pasar quatre diyas en o Pirineu siempre ye un buen plan) decidié d'ir-ie sin guaires asperanzas, en un primer inte. Con tot y con ixo le dié una oportunidat a la trobada y prencipié a participar-ie. Mala ideya, mocetas! Istas son bellas impresions que m'he traito d'ixa trobada.

A birolla: No soi o más indicau ta criticar as trazas de minchar de dengún, pues soi bien rarizo en o mío minchar cutiano. M'importa igual si a chent ye vechetariana, vegana, macrobiotica, carnivora u nomás mincha Fresquitos. Personalment creigo que cadagún ha de minchar o que quiera y o que le prebe bien. Lo que no me fa mica goi ye trobar-me con un texto que chustifica unas trazas de minchar porque asinas -traduzco literalment d'o pasquín- nos reconecta con a Primera Fuent, ye la Traza Sagrada de Minchar, cal tornar t'a Unidat con o Creyador y con a Creyación y asinas asinas. Lo siento, pero m'importa igual si as fateras relichiosas son alacetadas en o que dició un chodigo fa 2000 anyadas u en un indio hopi, u un Na'vi u qui siga. Ta yo ye a mesma vasuera por muito new age que siga. Ta yo como si hese bendeciu a mesa un mosén.

Debat transversal sobre treballos: Estió un d'os tallers a on que participé. Sí que'n surtión de buena ideyas pero terne que terne se centraba en as ecoaldeas. Parixeba que qui vivibamos en as ciudatz lo febanos porque no nos ne quedaba atra, porque yeranos masiau falsos ta marchar ta un lugar u bella cosa parellana. En iste caso parixeba que caleba cambiar a pregunta de ¿podemos vivir sin capitalismo? por ¿podemos fuyir d'o capitalismo?. As ecoaldeas me parixen una ideya sobrebuena y creigo que cal refirmar-las dende os lugars y as ciudatz. Creigo que son una buena cosa ta fuyir d'o capitalismo y fer vistero que se puede funcionar d'atras trazas. Pero, ¿se puede fuyir d'o capitalismo ta cutio? Si bell diya as ecoaldeas se tornasen inquestas, ¿no remataría o capitalismo con ellas de camín? Creigo que o capitalismo no tien medrana d'as ecoaldeas porque no son guaire menaza (a lo menos por agora). Cal luitar en muitos frents y ixe prou que puet estar-ne uno, pero a o capitalismo va a caler espaldar-lo, y tamién dende as ciudatz.

Marcha t'Artieda: Probablement o millor que se i fació. Una d'as poquetas cosas que remeraba a on se feba a trobada, antimás d'os espiellos que bell una dixó en a “botiga de baldes”. Se fació una curseta dica a ermita de San Juan de Maltray amán de l'entibo, que rebutiba d'augua, a on que no explicoron a nueva campanya que son fendo. Aprofitando l'anyo Xacobeo han dixau un fascal de cantals pintaus d'azul en os puestos menazaus por o recreiximiento de Yesa. A ideya ye que ixos cantals vaigan dixando-se por tot lo Camín de San Chaime ta fer vistera a luita contra Yesa. A noticia podetz leyer-la aqui. Tamién estioron explicando a suya luita y, chusto quan se prencipiaba a charrar d'a mercantilización de l'augua y a suya consideración como un bien de mercau igual como qualsiquier atro, un atro iluminau de tantos que bi'n heba pretó a charrar de no se qué d'os druidas y d'os celtas, ixublidando o debat important. A la CHE, os druidas rai. Y a o capitalismo tamién. Dimpués a mesma infumable colleta prencipió a acarrazar a tierra u lo sol u fer bell saludo cosmico, mientres a minoritara resta encetabamos o camín enta Artieda.

Carne de secta: Garra cruz, ni estrelas de David, ni chent rezando cara t'a Meca ni cosa parellana. Y con tot y con ixo, pocos puestos tan relichiosos he visto como ista trobada. Un pasquin m'informaba de que a mía firma astronomica m'ubriba a s puertas de l'espacio cuatridimensional (sic). Unatro de que m'heba de conectar con a Primera Fuent y a Creyación (viyer más alto). Un taller o sabado de tardis prebaba de convencer-me de que bi heba una filosofía china que chuntaba l'astrolochía y a fisica quantica. A yo, que as relichions, as supersticions y as sectas ye tot lo mesmo, me parixeba estar en un campamento de Corazonistas.

Lo positivo: Prou que me'n levo d'experiencias positivas. 1. As companyeras que estiemos chuntas y con qui faciemos buens ratos y buena pacheta. Conoixer más a las companyeras de luitas siempre ye bueno. 2. Tamién i conoixié chent que no yera barrenada y que aspero tornar a escunzar-me. 3. Conoixer un puesto tan repoliu como Ruesta que nunca no i yera estau y viyer como quedan os lugars eshabitaus por os entibos. Tenetz fotos penchadas en Flickr de Barrenaus y aqui alto. 4. Saber con qué mena de chent no se puet contar en caso de revolución y conoixer un poco más a ixe ente clamau humanidat... 5. Viyer naixer una protorelichión, que siempre ye curioso. 6. Haber espardiu luitas como l'aragonés u os entibos entre chent de muitos cabos d'ista parti d'Europa (bi heba dende andaluces, portugueses u extremenyos, dica alemans u mesmo bell australiano espisguardau...)

A tamás de todas as queixas a valuración cheneral no ye mala de tot. Cuento, y aspero, que toda a crica de barrenadas que bi habió d'entre ixas cincocientas personas que bi estiemos, yeran minoría y que sí que bi ha chent treballadera entre a hippiealla (fote con o neolochismo!). Y tot lo aprendiu a ran d'organización y de trazas de treballar podría aplicar-se perfectament a todas as luitas anticapitalistas dende atra ambiesta y atras dembas. Si bella vegada se tornase a repetir i tornaría, ixo sí, sabendo lo que i trobaré y parando un taller titulau "misticismo y relichión, a mesma mierda ye".