O millor d'a semana 027

O bico en fiestas. A la fin son prenzipiadas as fiestas d’a Madalena y parix que se podrá fer a chera de solstizio. Ta qui no lo sepatz, ixo no estió tan platero mientres a semana pasada. En momentos de prenzipiar as fiestas os bezins nos trobemos con o parque meyo cletau. Parti d’ixas cletas yeran chunto a l’espazio an que se ferá a chera. Preguntando a las autoridatz dengún no sabeba dezir-nos cosa segura. De “Parques y Jardines” ta “Servicios Públicos” y d’un cabo t’atro. O caso ye que encara no sabemos guaire bien o qué ferán en o parque. Parix seguro que ban a cambiar a traza de ruxiar-lo y os camins, pero poco más sabemos.
Antiparti d’a manca d’informazión, ye penible que en un parque se faigan obras mientres o berano. Igual como as carreras s’apañan de berano, si cal fer cosa en un parque, que se faiga en nobiembre que dengún no lo fa serbir. A rispuesta ye que as obras se son fendo con diners de o plan E ta creyar treballo y que han d’estar feitas antis d’abiento. Alabez a culpa será d’o conzello que no ha trobau garra atra obra en a ziudat que se pueda fer en berano. Fuens de parques y chardins, como informa Eraldo, mesmo han prebau de fer serbir a solidaridat con os treballadors como arma contra os bezins. Nusatros continaremos achuntando-nos todas as tardis ta reibindicar o parque. Si iste ye o conzepto de partizipazión ziudadana que tiene o conzello imos bien... Por tot isto cal que ista chera de San Chuan sia a rebutir de chent. Antiparti de porque ye una fiesta bien dibertida, porque estiaño cal que se beiga que somos muitos os usuarios d’o parque que queremos continar fendo-lo serbir y que tenemos o dreito d’opinar sobre o qué ferán astí.
Antimás d’iste afer cal remerar que continamos de fiestas dica o domingo benien. O programa lo podetz consultar aquí.

Desde Banarús. Se me adebantó en dos articlos en a mesma semana un bideo de Juan Carlos Moreno Cabrera y bellas fotos sobre as rondas negras italianas. D’o primer poco más que dizir-ne. En fa de goi ascuitar a ixe ombre! Ye tot un argumentario. D’o segundo parix una rispuesta a la pregunta de “La ola”. Isto podría tornar a pasar. Pues sí. Prou que sí. Y cal estar a la tisba pues muitos meyos de comunicazión son refirmando midas parellanas en toda Europa. Nomás cal biyer a cantidat de notizias que cheneran casos tipo Marta del Castillo. Qui no conoixcaz a notizia, aquí tenetz a bersión de Rebelión y de Público.

Biscarrués: Que como bien dizen ye un lugar, no pas un entibo. Continan as mobilizazions contra o entibo. Mientres toda a semana se fan charradas y actos ta informar y ta protestar contra ista sinrazón. O programa y muita más informazión lo podetz leyer en http://www.riogallego.org/.

Magic: Diz que cambiarán os regles con a plegada de M10, a nueba edizión basica. No he puesto leyer os cambios, pero ascuitando o programa de Magic Madrid, no me han feito mica goi. A más gran parti son fateras que no cambiarán guaire o chuego, pero as modificazions en a mecanica d’a fase de combate son penibles. Basicament, se rematón as pirulas tipo Fanatico Mogg u un simple Creiximiento chigant. Muito mal t’os siñors de WotC. Como bien dizen en o debandito programa, si Magic ye masiau difizil ta belún, que no i chugue. Imos ent'a Idiocrazia, remeratz-lo... A dificultat d’os regles y todas as posibilidatz que ixo da, ye una d’as grazias de Magic. Sin ixo o chuego se queda en baco. Asperemos que se lo piensen unatra bez u cambeen de camín d’opinión.

De bideos, tos ne pencho un de Mezquita de Jarque. Puestar que belúns bi beigatz a bel zorrizo bailando que se parix muito a un serbidor. Qué malo ye ixo de que tot o mundo tienga una camara de bideo!

O millor d'a semana 026

Dos cosetas he bisto iste cabo de semana y bien diferents. La primer lo millor d’a semana y la segunda o más penible. Entre que aguardamos a la plegada d’as fiestas madaleneras, charremos d’o que organizan por atros cabos:

Tamborilé: Un granizo festibal. En nomás un diya consiguión achuntar un camatón d’actibidatz que no podiemos cuasi nian alentar. De maitins, entre partidas de borra y os puestos d’artesanía, pasemos un ratet sobrebueno. Ya de tardis, os gaiters d’Estercuel nos fazión bailar con un pasabillas por as carreras de Mezquita de Jarque. En rematar ya yeran prestos en a Plaza a “Banda de gaitas de boto aragonesas”. Que’n estió d’emozionant! Quinze gaiters quinze tañendo de bez. Acompañaus, antimás, por unos tabals bien pinchos. Con Brincadeira y Bandarra Street Orkestra nos fartemos de bailar. Con tot y con ixo encara teniemos rasmia ta chugar a balonzesto bel poquet. Y ixo que encara eba de prenzipiar Lurte, que, a tamás de l’aturada y d’os cambeos que han teniu, continan estando sobrebuenos. Dende aquí muitas felizidatz a la organizazión que lo fazió tot muito bien y nos cudió muito.

Mercau Goyesco: Cuantisma barra que cal tener! Ta qui no lo sepa, iste cabo de semana bi ha abiu en l’antiga arboleda de Macanaz, un clamau “Mercau goyesco”. Por tot ixo d’os sitios y tal, cuento que se fería. En que sentié que lo feban me pensé que yera una fatera de Belloch en bel pasote. Cuan i fue me trobé con o mercau meyebal que s’eba feito a semana pasada, cambiau de puesto. Pero sin disimular ni cosa. Os puestos igual como yeran a semana d’antis. Con a mesma chent bistida d’a mesma traza. Os mercaus meyebals no gosan tener guaire rigor istorica, pero ye que lo d’iste yera increyible. Mesmo trobemos uns colgallos de Hannah Montana. Muit d’o sieglo XIX, sí siñor.

Contacto y lo que quieratz en tierradebarrenaus@gmail.com

O millor d'a semana 025

A semana d’a ¿relegalizazión? ¿desilegalizazión? Quemisió. Una semana rara. Lo de Iniziatiba Internazionalista ye ta pensar-ie y muito. Porqué l’han dixau presentar-se y, porque en primeras la ilegalizón? Cuento que no ye porque funzione a chustizia española, asinas que caldrá continar pensando-ie. Más entabán lo feré... A info sobre II ye de fazil trobar en o blog suyo u en lo de Cucha Independentista que son sobrebuenos y rebuten d’informazión. Asinas que yo charraré d’atras cosas, que tamién pasan por istas y atras tierras.

Catolicos: Taaaaaaan fazil lo dixan.... En tot lo mundo funzionan igual. En Italia portan esvasticas. En Irlanda paran cuenta que os mosens que han estau abataniando, biolando abusando d’a catrinalla dende fa decadas. Manimenos a ilesia contina terne que terne con que os omosecsuals ban contranatura y fan que as familias sigan en periglo. A unica conducta sexual contra a naturaleza d’os sers umanos ye no fer sexo, asinas que qui tien una malotía? Fa nomás 19 años a omosexualidat estió quitada d’o listau de malotías. Cuan se i ficará o “mosenismo”? A yo m’importa igual lo que faiga cadagún. Si bi ha barrenaus que no quieren fer foriquetas, mientres no faigan mal a dengún, como si les da por coleczionar güeñas. O pior de tot ye que ista chentuzia s’adedica a dezir cómo, con qui y ta qué emos de fer foriquetas a resta. Y mesmo bi ha qui les fa caso y nos diz a la resta que no tenemos moral.

Asustante: D’acollonar. Por muito menos que no isto estiemos fendo-nos a mofla d’Esperanza Aguirre tot un año. A cruzada contra a Cultura enzetada por os corsarios d’a $GA€ y continada por l’actual Ministra de Cultura plega en puestos periglosos. A la nueba ministra le parix asustante que os libros sigan de baldes. Prou que’n ye. Que s’imbente parolas rai, pero que os libros sían de baldes ye asabelo perigloso. Y si la chent leyese? Qué podría pasar? Mesmo podría dixar de mercar a basuera que meten bien bistera en os repalmars de El Corte Inglés. Ta lo mío prochecto de cabo de carrera abié de consultar más de doszientas fuens. Muitas d’ellas lo fazié en o rete. Ye de dar que soi un periglo y que soi furtando arrienda diners a, por eixemplo, Ignacio Jordan de Asso. D’atra man, no beigo yo a la chent que nos fa goyo de leyer, fendo-lo en u ordinador. Cosa no puede sustituyir a un libro. A lo menos por agora.

Concierto contra la tortura: Zaragoza rebelde quiere estar muito más que no o libro, a exposizión y a web. Iste cabo de semana lo contrimostran fendo un conzierto sobrebueno que o esquilmen suyo será t'ASAPA. Contra a tortura polizial en garcholas y tozineras.

El ultimo aragonés vivo: Ye un curto que m’imbión bien majo y que pencho contino. Ta fer-se unas risetas.

MdaS024

A semana que remata ha rebutiu d’actos an que l’aragonés ye estau present. Bien en o zentro, bien más de bislai, pero present. Una semana goyosa y trista de bez, pos a las buenas notizias en l’aragonesismo cultural se i adiben malas, y bien malas, en o pulitico.

Manifestazión por as luengas d’Aragón: Una manifestazión bien maja, (y capazera) que, manimenos, en os meyos de comunicazión no ha teniu guaire presenzia. Podetz leyer todas as notizias en a triga de binclos que ha feito Estricalla. De bergüeña l’articlo en l’Eraldo con o comentario de “el "reconocimiento legal de las tres lenguas de Aragón", que consideran son el castellano, el catalán y el aragonés.”. Remeratz como charraban fa poco d'a manifestazión d'a FACAO. Me quedo con o buen ambient que bi abió y a cantidat de chent que nos i chuntemos. Que ixo, en fablilandia ya ye bien difizil. Cuento que cal felizitar a la organizazión pues tot lo que se fazió dimpués con a barra, os entropans, a mosica, o teyatro y asinas asinas estió prou bien pensau. Pena de trobar-me tan canso que abié de jopar enta casa... De diez. Asperemos que toda a rasmia emplegada tienga fruitos y faiga buena onra ta l’aragonés toda ista mobilizazión.

Iniziatiba Internazionalista: O suenio que nos quieren estricallar. A candidatura ilegalizada, se presentó en Zaragoza o sabado de tardis. A cambra an que se fazió se quedó chicorrona de tot. Toz os posientos se plenón y mesmo muita chent abió de biyer-la quillaus en a zaguer ringlera. Trobé l’acto una mica jauto, pero cuento que l’inte no yera guaire bueno. Totz nos sabebanos ilegalizaus y ixo no anima guaire. Con tot y con ixo, como se i dizió, isto no ye que o prenzipio de cualcosa que puestar muito buena.

Bilingüismos: Os que no nos dixan botar, asobent se dizen esfensors d’o bilingüismo. Y asobent son monolingües, en castellano prou que sí. Ixe ye o caso de Mayor Oreja que, en una charradeta de tasamen tres minutos consiguió dixar bien platera a suya ideya de bilingüismo. Agora entiengo millor o suyo conzepto de democrazia.

Ta rematar, un bideo de lemurs. Primer de toda una serie que iré penchando china chana. Debán d'as rebaixadas suyas, lemurs y luita!

Tres luengas y dos bideos. MdaS 023

En plegando o diya, o gran, diya d’a manifestazión d’as tres luengas, qué millor que charrar un poquet de cadaguna.

Aragonés: Encara contina bibo y me pienso que l’intrés d’os aragoneses por a suya cultura no retacula. Ye berdat que as clases continan con alto u baixo a mesma chent que fa diez años, pero cada diya bi ha menos refús sozial enta l’aragonés, y os aragoneses chino chano ban tenendo as cosas más plateras. A lo menos l’antroponimia aragonesa parix que perbibirá u ixo ye d’o que charraba iste articlo d’o 20 minutos. Ye curioso, porque en a edizión de papel o titular lo feban con Jesús y Chesús, que por ixo me trucó lo ficazio. Os nombres aragoneses parix que son de moda. Prou que a chent de l’aragonesismo a los ninos y ninas suyos les mete os nombres en aragonés, pero tamién muitisma atra chent y cada diya se biyen más Ixeyas, Izarbes, Loriens y Lizers.

Catalán: De tot lo que os bloggers publicamos, a más gran parti son custions informatibas u articlos prou zaborreros. Manimenos de cabo ta cuan trobas articlos como iste en Lo finestró del Gràcia, sobrebuenos sobre o catalán y os FACAOS. Ye d’ixos que se pueden fer serbir mientres fa muitos años ta esplicar o empandullo lingüistico aragonés a qui no sabe cosa sobre as luengas d’Aragón. Igual como foi serbir tamién aquel mitico “L’aragonés nieu zanzera”.

Castellano: A luenga de l’imperio, como ya dizió Nebrija, y que o rei aseguró que nunca no s’imposó a dengún. Iste articlo de Publico sobre Hernán Cortés fazió muito mal a os españolistas y se contrimuestra leyendo os comentarios que i han meso. A cantidat de barbaridatz que i dizen ye ta ixorrontar-se. Si l’articlo ese estau más furo y no pas solament descriptibo, talmén esen ilegalizau o periodico... En que remeras un poquet como s'espardió a luenga y a cultura española bi ha tantos que tremolan...

De cabo d’articlo tos pencho dos bideos. Un an que se bei o prenzipio d’a baixada de nabatas por a Galliguera y l’atro o bideo d’a nueba canta de Mallacán que cuento que abretz bisto ya totz pero que prou que cal penchar ta espardir-lo bella mica.

O millor d'a semana 022

Dimpués de l’aturada d’a semana pasada torno a fer MdaS o domingo y con a estructura “normal”. Como encara teneba bellas cosetas que escribir y no podié fer-lo, iste post quedará una mica antigo, pero prometo actualizar-me antis con antis.

NHC y los meyos: Charré d’a manifestazión azientifica y ultranazionalista d’os NHC fa bels diyas por l’articlo que les adedicó lo Heraldo. Un eixemplo de cómo no abría de fer as cosas un periodista imparzial. Que más que un articlo parixeba un pasquín de Falange. Bels diyas dimpués leyé a bersión d’o Periodico de Aragón, que, sin estar una alfaya, ye millor que no l’atro. Nomás cal contimparar as dos notizietas.

Transchenicos: A manifestazión en Zaragoza contra os transchenicos, que se fazió o mesmo diya que a d’os de NHC contra o catalán, y que, como ye de dar, i arrocló a muitisma más chent, estió un exito. No sé si tendrá efectos en as almenistrazions, pero a lo menos a chent nos ha bisto y ha feito preguntas. Ye l’eixemplo d’una compañera de treballo que me demandó informazión. Mirando-ne trobé, antimás de l’articlo que fazió Publico sobre a mani, ista pachina mexicana, que me fazió muito goi por a suya simplizidat. Un sobrebuen puesto an que informar-se sobre l’afer d’os transchenicos.

Cucha Independentista: Dimpués d’un par d’eleczions an que boté por botar, sin guaire gana u mesmo con mala gana, a la fin me torna a fer bella mica de deleria ir a botar. A candidatura Iniziatiba Internazionalista, que en Aragón tien a la rezién naixida Cucha Independentista, cada begada me fa más goi. En leyer os comunicaus suyos y ir conoixendo a la chent que bi ye, m’agana más de botar-les. Antimás por primer begada no botaré en Corazonistas, que me feba asabelo de fastio d’ir-ie. Como m’empadroné, ya boto en o Pedro de Luna, que cuento que no pudirá a mosén.
Como deziba Aragonando, toda a blogosfera nazional ye charrando de Cucha Independentista y yo no seré qui no lo faiga, pues me pienso que ye a notizia -y l’asperanza- de l’año. Asperemos que isto pueda continar dillá d’as eleczions europeyas. Dende güe, antimás bi abrá un binclo permanent t’a web suya an que goso de meter os binclos (a la dreita tuya, amigo lector).

Mundialet Antirrazista: Qui me conoix dende fa menos de quinze años, puestar que nunca no m’aiga bisto fer esporte. Talmén peteniar por os mons u menar a bizi, pero ixo ta yo no ye que mober-se d’un cabo enta atro, asinas que no lo cuento como esporte. Manimenos, iste cabo de semana tendretz a oportunidat de biyer-me chugando a futbol. Y tot porque s’ha organizau un Munidalet Antirrazista. Bueniza ideya. Ya se i han apuntau una patacada d’equipos y, biyendo os nombres, regular que feremos buenas risas. Os partius se chugarán o 9 de mayo en o C.D.M ACTUR, asinas que, chuguez u no, pasatz-tos-ie que i feretz un buen ratet.

Alara Renaixida: Con isto d’a crisis, no he puesto chugar a Magic (nian mercar-me cartas) dende a presentazión de Conflux. Contino sin tener diners, pero una presentazión ye una presentazión, asinas que ista tardi tornaré a chugar en o booster d’as launch parties de Alara Renaixida. No m’ha bagau de leyer guaire o suyo listau, asinas que boi cuasi en coritatis, pero como ya sabetz, a yo con chugar ya ye prou. Que si nomás querese ganar ya lo ese dixau fa tiempos.

Ta rematar tos remero que podetz continar partizipando en a frikiencuesta, que sé que lo etz leyiu y no dezitz cosa, so boques!

O millor d'a semana 020

O diya d'Aragón -pero no guaire- s'amana sin guaire animo. Sin trasbase ya no ye lo mesmo. Ya no nos cal esfender Aragón. Antis de tornar a ascuitar a Carbonell cantando ¡Que bonita que coqueta, la peseta! y biyer una orrible performance por o Paseu Autonomía - que ba entre a Plaza España 1 y a Plaza España 2-, podrez leyer iste blog ta esbastar un poquet antis d'o frikiarticlo-encuesta que publicaré ista tardi si me baga.

Catolicos: Prexinaz que en cualsiquier puesto de treballo metese "nomás ombres", "nomás blancos", "nomás catalans" u "nomás marxistas"? Jibo! Titulars y titulars! Manimenos en iste catolizismo banal se puede fer lo que se quiera y no pasa cosa. Mesmo se sienten menazaus si les custionas. En a Universidat San Jorge, les cal un nuebo rector catolico, en un esclatero caso de discriminazión. Y lo dizen bien argüellosos. Asinas que ya sabez. Si iz t'a misa (en aragonés tamién bale), si tos fan fastio u medrana os omosexuals de Telezinco, si soz bien catolicos y de zienzias (encara que me pienso que ixo importará menos) podez presentar-tos a rector! Que en tiempos de crisi ye un buen treballo. Por agora no diz cosa de que calga estar afiliau a o PAR u empadronau en La Muela, pero por si un caso, yo me afiliaría....

Periodismo: No soi periodista y no fazié que o curso que feba antismas Juanjo de la Iglesia en l'antigo CQC. Con tot y con ixo, bi ha casos de manipoliazión que no cal ni a EGB. U ixo me pienso yo, porque dimpués trobas chen que se crei seguntes que titulars. En un orgasmo d'incultura Heraldo Colonial feba iste articlo. O titular "Concentración a favor del aragonés en Zaragoza" (jodo petaca!) m'entibocó. Yo que creyeba que yera ta Mayo! Que'n soi d'aqueferau que ya ni sé cuan son as manifestazions! Pero no. Resulta que yera a manifestazión de No Hablamos Catalán (Ni yo bulgaro), que de l'aragonés no diz cosa o nombre suyo. A foto ye rara, no? Bi ha 2000 manifestans y fan ixa foto an que tasamen i sale una dezena. Con lo goyo que fa a los periodistas ixas fotos de milenta tozuels! Pero en ista multitudinaria manifestazion fan un plano curto de 10 personas y cuatre pancartas. No i sale tampoco, mica d'os siñals españols que bi eba. Si que'n sale d'Aragón. Ui, ui, ui, ui.... Belún abría de tornar t'a facultat u ta CCC u t'an que sía que consiguió lo titol, si ye que'n tien.

Tamién sobre l'eixerzizio d'o periodismo publicoron un articlo en Publico. Quereba escribir-ne uno yo parellano. Como, por un regular, cualsiquier que sepa fer serbir un ordinador u un lapiz escribe millor que no yo, pencho iste articlo sobre l'emplego d'a parola antisistema. Antimás podié remerar a Frito, ixe compañer de treballo que tiengo que ye omofobo, sexista y fato, antimás d'atras cosas. Pues tamién fa serbir ixe discurso. A que lo querez conoixer toz?

Partius y eleczions europeas: CHA ha cambiau de logo. Diz que iste ye o zaguer trango de l'esbielle. Asinas que se suposa que lo eban prenzipiau. Pues bien. Charrando d'isto fa bels meses, me dizió un aragonesista (no remero si encara contina en CHA) que "cuan no se sabe enta do ir fas cosas como istas". Pues ixo. Como no saben que fer, como s'ha quedau buedo o mensache, cambean o logo, que ye lo millor que pueden fer. Ixo sí, tien una de birtuz! T'as europeas s'han chuntau con atros independentistas. Ya sabez que si yes independentista d'atro país que no sía Aragón, puez chuntar-te con Chunta, pero si yes independentista aragonés yes malo, malo. Bi son ERC, BNG, Eusko Alkartasuna, Aralar y atros. Buena, mala y pior chen, toz mezclotiau. He sentiu que puestar que bi aiga unatra lista con atros partius aragonesistas. D'ixo cuento que ascape tendremos más info. O PAR, dreitamén, pasa. Y a gran asperanza la he trobau en Iniciativa Internacionalista. Ye una coalizión de organizazions soberanistas y independentistas y de cucha anticapitalista. O suyo manifiesto ye asabelo de majo. Podez biyer a presentazión suya en iste binclo de Kaos en la Red. Encara abré d'informar-me-ne bel poco más, pero por agora tien todas as papeletas ta que les bote...

Belloch: L'aragonesista que nombraba antis con lo d'o logo, me dizió unatro diya que me lo trobé por a carrera "El Belloch este está desatado". Lo deziba por os 10000 pisos que quereba costruyir en As Fuens. Belloch ha resultau estar más barrenau que no nos creyebanos dengún y agora no quiere que dengún custione os suyos chuguetes. Ni as ziudat-Gran Chirmán an que ta buquir abremos de fer edredoning, ni ExpoNabo, ixe ebento que a la fin meterá Zaragoza en o puesto que se mereix. A femera. Belloch ye triste porque no respetamos ExpoNabo. Pobrichón! Pasará as nueis plorando, y nusatros de borina. Que poco corazón tenemos! Como dizió a nina de Montesusín "Pues que le den por..."

O millor d'a semana 019

A fredor trayó a plebia, y a plebia as glarimas en tantos y tantos cristianos. En Andorra mesmo nieu y un lazo blanco en una d’as imachens. Bien por els! Antis de marchar a rezar por esfender o dreito d’as mullers a eslexir sobre o cuerpo suyo, tos escribo istas ringleretas.

Relichión y España: Purnas remeraba en

Aragón Colonial ista semana a españolidat de Dios y ye que a relichión catolica ye una parti bital y alazetal de l’españolismo cultural y politico. Como eixemplo, a nueba presidenta d’o parlamento bascoespañol. Española, catolica y d’o PP. Una declarada opositora d’o emplego d’o condón, ye dezir, que le fa goyo que a chen contine morindo por a SIDA u por tantas atrás enfermedaz. U que simplamen bi aiga más bidas esmicazadas: as mais y pais que no quieren ninos y os ninos no quiestos por os pais suyos. Diz que ha bibiu siempre baixo lo mandato d’o PNV. Ixe mesmo PNV que agora parix que ha encorriu a qui no charraba euskera. Pero beteme que ista muller nian lo charra. Que le cal fer un poder ta leyer bellas ringleretas y con tot y con ixo, limpio en os meyos a felizitar-le por o poder que ha feito. Qué sensibilidat que contrimuestra con os bascofablans... En charrar d’Euskal Herria a los meyos se les bei de camín de que coda son.
Sobre a relichión más abstracta y como conzepto, charrón en Publico o Biernes Santo. Un articlo tipicamen ateista que tos recomiendo que leigaz, encara que o suyo luengache siga una mica pedan. Se tetuló El timo de la religión y no lo he puesto trobar en a edizión dichital, asinas que abrez de fer serbir a emeroteca. Sobre España y a bandierota quillada en l’antiga Pza Aragón, leyez iste articlo de Purnas... Cuantismo nazionalismo banal! Y ixo que ye o Periodico de España, digo, de Aragón....

Cultura Libre: Tantos y tantos poders que fa a industria por acotolar o suenio d’a cultura libre, unibersal y de baldes! De cabo ta cuan tienen bella chicota redota, bel trango entazaga que emos de aprofitar ta escatumbar o suyo tarabidau. En Franzia o sentiu común ha ganau y Sarkozy se quedará sin poder engarcholar a qui baixe de l’Emule o zaguer disco d’a suya quiesta muller. Manimemos ZP, en unatro zeño t’os Ramonzines, Bautistas y atros culturetas fracasaus, ha nombrau como ministra de cultura a una zineasta fime en contra d’a espardidura d’a cultura. (Guarda si sonaría rara ixa frase a os ilustraus! Os biellos, no pas os “nuebos”). Iste blog se suma en l’inte de publicar iste post a la demanda de dimisión suya. Grazias por tot.
En una semana an que no he teniu internet que tres diyas, no he puesto leyer guaires cosas, asinas que tos pencho bellas fotos de Andorra con nieu que tiré iste cabo de semana. Aspero que tos faigan goyo!

O millor d'a semana 018

En ista semana soi estau mesmo más aqueferau que por un regular, asinas que cuasi ni he adubiu a leyer bel periodico. Con tot y con ixo pencho bel par de cosetas, ta que no se diga. Como o chuebes ya marcho t'Andorra, cuento que i tendré más tiempet ta escribir, leyer y tot lo que cal ta que iste blog contine con contenius una miajeta más curiosez.

Catolicos: De cabo ta cuan fan onra articlos como iste, an que remeran o pasau d'a Ilesia Catolica. Un pasau no tan pasau, pues no fa que trenta año encara continaban pensando asinas ofizialmen. Agora a más gran parti lo fan extraofizialmen. Os tiempos cambean y agora les cal disbrazar-se y prener custions como l'aborto como os alazez d'as suyas superstizions.

Chornadas por as luengas d'Aragón: No he puesto ir-ie garra diya pero, por lo que he sentiu plenón as cambras a rebutir. A calidat d'os combidaus yera buena de tot y aspero que belún lo aiga grabau... De cronicas no'n he trobau que ista. En bels poquez diyas podremos charrar-ne en persona pues diz que ye en momentos de plegar a XI Borina por l'aragonés, borinaza an que poder practicar l'aragonés. Tot isto mientres se contina parando a manifestazión por a lei de luengas. L'aragonés ye bibo, y cómo!

Manubles bibo: Os que no sepaz o qué fer en istos diyas de Semana Santa, podez ir ta Billalengua, an que unatro año, fan o conzierto de resistenzia contra a mina de Borobia. I tañerán, entre atros, Azero y Muskaria, y prou que se i fan toda mena d'actibidaz. Tenez o programa en o blog d'o festibal y si querez saber más sobre o problema aquí podez leyer sobre a mina.

O millor d'a semana 017

A biblioteca Fida Kahlo zelebró iste biernes a debantadera d’una nueba siede. Se troba en Cantín y Gamboa, 16 ta qui queraz fer-la sebir. En a debantadera se fazió un conzierto con China Chana, que tamién los podrez biyer en menos d’una semana en o Conzierto solidario por Bolibia, y Dada, una colla sobrebuena que no conoixeba y que me fazión asabelo de goyo. Y que bersión de AC /DC!. Un borinón!

Publico y os toros: Mientres escribiba Lo millor d’a semana 016, leyié en Publico un articlo sobre un lugar an que s’iban a sacar as subenzions t’as torturas de toros. Dimpués lo merqué y trobé que no yera que un d’os articlos sobre o tema que ocupaba dos fuellas. I charraban sobre a dudosa rentabilidat economica d’as debanditas torturas y como, en sacar as subenzions dixan de fer-se. China chana bels meyos prenzipian a dar espazio a os mobimientos en esfensa d’os dreitos d’os animals. Asperemos que continemos medrando. Norabuena a Publico por l’articlo y asperemos que ascape prenzipien a prener l’eixemplo os lugars y ziudaz aragonesas. A Colla Antitaurina Oszense tamién en ha dau treslau.

A ilesia lo dixa taaaaaaan fazil. Diz Arale que ha sentiu iste maitín en a radio (notizia en Publico) que un bispe de Orleans eba dito que o birus d’a SIDA podeba atrabesar o latex porque yera más chicorrón que no un espermatozoide. En ixe caso o suyo zelebro tamién podría atrabesar o latex. Atros, fendo contimparazions odiosas entre os dreitos d’un zarpau de celulas y os d’un d’os poquez linzes que, encara y a tamás de tot, remanen bibos. A Semana Santa, ixa “tradizión cultural” se combertirá en una manifestazión antiabortista. BIEEEEEEN!!!! D’ista chen ban bendendo ebanchelios, por bels puestos..... Tanimientres os ateos podemos aconortar-nos beyendo iste poliu cartel que han penchau en Zaragoza y que trobé grazias a Esconxuradero.

eXgae: Yera custión de tiempo que, con tantos chuizios que orichina a $GA€, naixese cualcosa como eXgae. Ye una entidat que preba d’esfender-nos debán d’as rebaixadas d’istos enatizos, que ya caleba. Intresán iniziatiba que aspero que nos aduye a poder concarar-nos con ixa chentota.

La Muela: Diz que Boné ye alicamau. Un compañer de treballo diz muito asoben que a mierda flota. Y guarda si’n tien de razón! Güe ye La Muela, pero maitín puede aparixer un caso parellano en tantos y tantos lugars d’Aragón. A mierda, en puyar, le fa goyo de puyar bien alto. Y mesmo puestar que plegue en a D.Ch.A. A Alcapone lo prenión por Fizienda, qui sabe porque custión prenerán a atros...
D’o caso y a suya curiosa eboluzión, me trucón o ficazio un par de cosetas. A primera a declarazión de belún –no remero qui, pero creigo que yera d’o PAR- dizindo que no se biyeba benir. Cuantismo burniego. Bienga toz a ubrir opticas que, de negozio, bi’n ha asabelo. A segunda estió un articlo de pachina completa en l’Eraldo adedicau de raso a desbincular a l’alcaldesa d’A Muela d’o PAR. Buenismo. I parixeba que l’alcaldesa nomás ese pasau por astí y de casualidat se fazió d’o PAR. Pero que no la quereba dengún, e? Ta esmelicar-se sino estase tot tan penible.

Curiosidat y despedida: A curiosidat, a d’a foto trobada en “Todo final es un principio” que podez biyer en iste binclo. A despedida son dos bideos de Beyonce que yo creyeba que toz eban bisto, pero que charrín charrán con os míos amigos y conoixius resulta que no ye asinas. O primer, que lo podez biyer punchando aquí (no me dixa embedear-lo) ye o bideo orichinal. Bien pincha la coreografía. O segundo, penchau más t’abaixo, a bersión “tuneada” que tos combido a biyer ta que tos n’arrigaz bel ratet....

O millor d'a semana 016

Como deziba en o post d’antis, a primabera trai arrienda faina y, en alparzear bella mica por internet trobas más y más cosas que fer y leyer. Pencho abaixo, como todas as semanas, Lo millor d’a semana.

The Pirate Bay: Ista biñeta –si bi punchaz, s’enampla- la trobé mirando atras cosetas, y me fazió firme goyo. Cuantas begadas o mundo d’a industria mosical y de bideo han chilau que beniba l’apocalipsis y todas han estau mentira. Porqué ba a estar berdat agora? China chana, son conseguindo que baixar una peli de l’Emule siga un acto reboluzionario. Como deziba belún, a mosica esistiba antis que no a industria discografica y continará esistindo cuan muera. Ta qui no entienda anglés a traduczión la podez leyer en iste binclo.

Frikazo!: Remeraz que fa tiempo reté a os fabloggers a fer un articlo más friki que no uno que penché? Diaple replegó ixe reto y en fazió uno prou friki. Con tot y con ixo, no’n yera guaire. U a lo menos yera opinable qué articlo yera o más friki. Manimenos he de reblar debán d’o que fazió ista semana. Una replega de bersions d’as cantas de Star Wars con trastes de toda mena. M’achenullo debán de tú, Diaple. Malamen puedo ganar-le a isto. Has ganau.... por agora (risa maligna).

Combocatorias: Os fungos continan surtindo y, en rematar d’escribir l’anterior post he trobau dos combocatorias, diferens y parellanas de bez. En Zaragoza, somos menazaus, unatra bez, por una Expo. A clamada ExpoNabo que diz que se ferá por o bico d’As Fuens. Agora, que ya sabemos millor como ba tot isto d’as Expos, a Coordinadera Zaragoza Ziudat Compacta, s’ha concarau con ExpoNabo y continará o lunes con as chornadas Expo Paisajes 2014: Un nuevo derroche frente a las prioridades sociales y ambientales de Zaragoza. Serán en o zentro Joaquín Roncal y aspero que siga a simién ta enzetar tot un mobimiento ziudadano en contra de dixar que continen fendo o fato con a nuestra ziudat. Que ye inmortal, pero no tanto!

Atros que tamién esfienden a sostenibilidat y a balura cultural, sozial y meyoambiental d’o meyo, son a Coordinadera Biscarrués-Mallos de Riglos y que d’o 23 t’o 26 d’Abril fan as VII chornadas por o Rio Galligo con baixada de nabatas. L’año pasau i estié y cal ir-ie a lo menos bella bez. Se i pasa un rato sobrebueno y te metes bien barucoso cuan biyer baixar as nabatas. Borina, cultura, meyo ambién, reibindicazión... y mesmo gastronomía en un par de diyas... Que más querez. Miraz-tos o programa que de seguras que nos i biyeremos.

Periodistas abataniaus: Os gossos d’esquadra abatanión istos diyas a un fascal d’estudiants y a bels periodistas. Como os estudians importan igual, a prensa s’ha zentrau más que más en os suyos compañers abataniaus. Qué de fura sería a baralla ta que rezibisen tantos periodistas y tantos ziudadans que no feban que pasar-ie... Os gossos, pobrichons, deziban que les eban enristiu con siñals indepes que feban serbir igual como lanzas. Que si estasen siñals españols, tira! Pero as senyeras amb estrella fan muitismo más mal... Como siempre o tratamiento d’a informazión ha estau penible mientres istos diyas. Nomás una pregunta: Si agora un periodista u un estudian estricallase toz os beires d’una comisaría d’os mossos, serían tan comprensibos y solidarios como con o mozo aquel –eroe, le deziban- de Lazkao? Cuento que rezibir tantos palos como les fotión tamién carraña tanto u más que si t’estricallan a casa.

Mancusos: Ta rematar un poquet más tranquilo iste post, pencho contino un bideo de Los Mancusos, una colla de teyatro, que podiemos biyer o biernes en o Zentro Zibico Unibersidat y que tos recomiendo de biyer en que podaz. T’arreguir-se-ne bel poquet que asobén nos cal...

Chentuzias... y diez mil más. MdaS015

Ista semana ye de contradiczions por toz os cabos. Aragoneses que no ben d’estar-ne, donans de sangre que torturan u cristianos masclistas. Bueno, ista zaguera no ye una contradiczión pues en o suyo libro sagrau queda bien platero cómo han d’estar as relazions con as mullers.

Labadora liberadera: O Baticano ye enzerrinau de tot en dar-me notizietas como ista que podez leyer en Publico y en o blog an que la trobé de casualidat. Si soz tan chandros de no punchar-ie ta leyer-la tos ne comento. O periodico d’o Baticano publicó, en o diya d’a muller, que l’imbento que más eba feito por a suya –y tamién a nuestra- liberazión yera estau a labadora. Remeré cuan lo leyé un chiste masclista que no escribiré aquí pero que de seguras que a más gran parti conoixez. O problema ye que istos no yeran fendo chanzas. Que lo piensan! Y lo escriben, que ye mesmo pior! Contimparando a imbenzión d’a labadora con a incorporazión d’a muller t’o treballo remunerau u a pildora. Cal remerar que se suposa que o Papa charra dreitamen con Dios. Cuento que iste l’abrá dito que nos comunique reflesions tan intresans como ista. Con tot y con ixo, continará abendo mullers cristianas y feministas cristianos y cristianas. Yo no entiendo ni pon ya...

Concurso de españols: Parix que’n han feito uno y no en ebanos parau cuenta. Bergoñoso ye l’articlo publicau o pasau 10 de Marzo en El Periodico. En ye por tantas cosas que caldrá fer trestallos diferens. A primer l’articlo y a traza d’escribir-lo. "As bozes más libres de l’aragonesismo". Aquí fan serbir a parola aragonesismo que, en primeras nomás aplican que t’o PAR, pues CHA siempre ye o partiu nazionalista, no pas aragonesista. Pero cuan ye ta charrar mal de CHA, Labordeta ye aragonesista (y bueno) y no nazionalista (y alabez, malo). Istos dos, antimás, son as bozes más libres. Y en son porque tienen unas posizions ideolochicas más españolas que no dengún en os suyos partius. Os independentistas u mesmo os criticos de CHA, somos radicals antiespañols. Bozes libres no. Que be d’estar que belún nos ha engarcholau os garganchons nuestros. Manimenos si, te fotes güeito años representando a un partiu nazionalista y dimpués dizes istas cosas, en cuenta d’estar un ipocrita yes una boz libre. Bien y brabo! Adedicar una pachina completa a isto me parix prou penible. Que en istas calendatas y con tot lo que ha plebiu continen beyendo-se opinions asinas en chen que se suposa que esfiende Aragón... Jibo! Que miedo! De Hipolito poco que charrar. En o PAR me pienso que a más gran parti piensa igual como él. Si a la fin no botan en contra d’a lei de luengas no será por ganas si no por remanir en o gubierno de conchunta con o PSOE y pillando bel troz de cualcosa que les darán.

Deumil: Diez mil independentistas catalans marchón por Bruselas. Istas bozes puestar que t’os periodistas no sían libres y en cuenta d’estar catalanistas serán periglosos independentistas que tienen os mesmos obchetibos que ETA... A notizia la conoixie en o blog d’Aragonando -muito recomendable de leyer asobén- y me sorprendió asabelo. Sisquiá en Aragón podesenos chuntar diez mil indepes en Zaragoza. Mesmo fendo a proporzión de poblazión (alto u baixo 1/5) con chuntar dos mil en bel acto... China chana. Bel diya....

Tot bale?: En istos diyas he conoixiu de dos iniziatibas que me fan un poco de pena. A primer, que la sentié en a radio, pos estión dando muitismo mal, ye a tortura de toros a fabor d’os donans de sangre. L’atra una colaborazión d’UNICEF con Aramón. Cuento que a las personas que repleguen l’aduya d’UNICEF u a sangre donada les importará prou poco como s’aiga conseguiu. Bale tot? Me pienso que no. Entidaz como istas han de tener unas trazas una mica eixemplars mesmo en dembas que no son de tot suyas.Bi ha muitismas atras trazas de conseguir diners que no cal torturar a dengún u colaborar con una interpresa que ye estricallando meyo Pirineu (y l’atro meyo, ya biyeremos...).

Anunzio de Deumil:

Dios ye carlista. MdaS 014

Entre unas cosas u atras, no he aturau en istos zaguers cuatro diyas. Asinas me trobo güe, escamallau y con una galbana que ta qué...

Zincomarzada: Dios be d’estar carlista, porque en zagueras parix imposible de fer una zincomarzada como as de más d’antis. Soi estau en ziento zincomarzadas. Dende que teneba catorze años si fa u no fa. Y remero que por un regular l’orache yera bueno. Manimenos dende l’ataque d’o camal ta l’alcalde tenemos unas zincomarzadas con bien de zierzo y mesmo plebia. Agora diz o PP de fer una consulta popular por si a chen querese cambiar-lo de calendata. Ta fateras siempre bi ha diners. No se consulta sobre la Expo u lo siñal español chigan, pero sí ta cambiar a calendata d’a zincomarzada. De todas trazas cuento que será una bomberada de tantas atras que se dizen. Lo que caldría sería reprener o Parque d'o Tío Jorge y dixar de ir dondiando por toda a ziudat.

Diya d’a muller treballadera: Con un socalze se zelebraba en a plaza Asso o diya d’a muller treballadera. S’aprofitaba tamién ta presentar un nuebo portal www.unahabitacionpropia.org, que de seguras que plenarán ascape de buenos contenius. Se i ha feito una obreta de teyatro con as actrizes puyadas en as balconadas y en o tarabidau d’as obras d’a Plaza. A tamás de l’azento andaluz de beluns d’os personaches, que no yera menister, a obra ye estada bien pincha y nos n’emos rediu asabelo. Mientres implen o portal nuevo en iste blog podrez trobar tamién cosas sobre o feminismo.

Conzierto de Mularroya: Que’n son de buenos Los Draps!!! Conziertazo que fazión. A resta de collas tamién sonón asabelo bien. Sorpresa ta yo, os Alkol 96, que no los conoixeba y me fazión muito goyo. Asperemos que faigan antis con antis o suyo disco ta poder tornar a sentir a bersión punk de l’abanera trista. (Sí, ez leyiu bien. Fazión una bersión punk de l’abanera trista).

De cuernos y ipocresías. MdaS 013

Escruxinau dimpués d’o cabo de semana fobano, y d’a primer semana de treballo, poqueta cosa tiengo ta charrar. Nomás tres cosetas, con un poquet de tot, y d’as eleczions y d’a Fueba en charraremos más entabán si cal.

Ipocresía: O exerzizio d’ipocresía que s’ha bisto mientres toda ista semana en os meyos de comunicazión ha feito mesmo más bistero a lei de l’embasador que tienen cuasi toz os periodistas y meyos. Soi charrando, ye de dar, d’a notizia de l’ombre ixe que enristió contra una Herriko dimpués de que una bomba estricallase a casa suya. Encara que muitos deziban que no yera chustificable -atros nian ixo- de camín pretaban a chustificar-lo. Entiendo as razons que teneba l’ombre ta crebar os beires d’o bar y fer o chandrío que fazió. Igual como entiendo a os treballadors d’os astilleros de Xixón u a la chen que enristió contra as siedes d’o PP a nuei d’o 13-M. Manimenos toz aquels gosan estar cuasi terroristas y o mozo de Lazkao ye un eroe. Penible si no estase por que ye lo que piensa a más gran parti d’a”chen normal”.

Bucardo: Iste articlo que leyé en Publico sobre o bucardo me parixió prou intresán. I charran d’a clonazión que consiguió fer-se de Celia, a zaguer bucarda que morió zabucada por un camal. No bibió que diez minutos pos naixió con una malotía grau, pero con tot y con ixo, ye un gran paso entabán. En o mesmo articlo, i charran tamién d’atras espezies acotoladas que se ye pensando de prebar de clonar.

Divine vs. Demonic: Ye o nombre d’un nuebo pack de dos mazos tematicos en a linia ya prenzipiada por Elfos vs goblins y continada por Jace vs. Chandra. As cartas-estrela d’os mazos son dos clasicazos: Akroma y Lord of the Pit. Como o titol d’o pack diz, en os dos mazos se concaran o bien y o mal, ripresentaus por anchels y diaples. Ya he dito belatra begada que istos packs me parixeban un sobrebueno producto con buena relazión calidat-pre. Exemplo d’una buena ideya y no a que han teniu en Wizards con toz os cambios que trayerá a onzena edizión. Ta prenzipiar nian se dirá asinas, que será Magic 2010. Pero antimás ta dixas bien lasas as nuestras pochas bi aparixerán cartas nuebas, contina a rareza mitica y toz os años bi abrá una nueba edizión basica. No sé si serán estirando masiai... Tanimientes podré aconortar-me con o Criptic Command y o Hypnotic Specter que me han plegau güe d’o MPR.

Cultura, tecnolochía y atros. MdaS 012

Treballaré. En un puesto majo y an que no me dixaré os güellos debán d’un monitor, mientres me foto güeito oras con a baba cayendo y o zelebro amortau. Prou que ta yo ixo ye o millor d’a semana. Trobar treballo en istos tiempos ye bien difizil. Pero trobar-ne uno que te faiga goyo, con un orario bueno, no guaire luen de casa y que i ripesten os festibos... Ixo ye cuasi un siñal de que FSM esiste!!! Asinas que, agora, con más tranquilidat y más tiempo, podré –aspero- actualizar más a soben iste blog, buestro y de yo, que tanto goyo me fa y tan poco puedo cudiar...

The pirate bay: Ye o nombre d’un puesto web an que fazilitan l’intercambio d’informazión y cultura. Prou que ixo no fa goyo a os de siempre. En iste caso no son os $GA€s, que o suyo largo brazo encara no pasa os Pirineus. Son as productoras audiobisuals as carrañadas. Como antimás istos de TPB son bien farutes, se bei que s’adedicaban entre atrás cosas a publicar as cartas d’as discograficas y as ripuestas d’els ta redir-se-ne. Agora les son chuzgando por fer más fazil que a chen pueda compartir o conoiximiento. A notizia me parix sobrebuena, pues me pienso que ye imposible que les condenen y asinas a industria audiobisual tornará a fer o fato y feremos unatro trango entabán en a esfensa d’a unibersalidat d’a cultura. Si Guttemberg imbentase güe a imprenta, a colla de boques capitalistas ixa l’encorrería de camín. Aquí tenez os binclos -uno y dos- t’as notizias publicadas en Publico.

Cargadors unibersals: Bi ha muitas cosas que ta toz parixen de sentiu común, pero t’atros no. O capitalismo, de sentiu común, no ba sobrau. De feito, le’n manca asabelo. Asinas que dan como una bueniza notizia a de que, dende 2012, toz os cargadors de mobil serán iguals. Lo que a toz nos parixeba lochico, istos siñors han tardau bels bente años en parar-ne cuenta. Con tot y con ixo, cal zelebrar ista notizia. D’una man por a comodidat y por poder abentar o calaixo rebutien d’os cargadors d’os mobils antigos. D’atra man por que ixo suposará un poquet d’aliento t’o meyo ambién, en fer-se menos cargadors. O estandar que diz que ban a fer serbir ye, como no, o micro-USB, que ya fan serbir muitos modelos de mobil. Por exemplo l’Alcatel C701 que ye o que tiengo yo. Ye ixa una d’as cosas que más goyo me fa d’iste mobil, pues si caziegas o cargador con mercar un cable USB y tener amán un puerto ya puez cargar-lo. En iste mundo de güe, conoixez bel puesto an que no bi aiga un puerto USB en 100 metros arredol? (Un urbanita dixit).

Carnet Choben: Se feban bente años dende que se prenzipió a fer serbir o Carnet Choben. Una buena ideya que muitos emos feito serbir, más que más ta mercar bel libro u ir t’o zine. Dezidión de zelebrar-lo fendo un conzierto. Y qué conzierto! 3monos, Juako Malavirgen, Azero, Jah'sta y Los Gandules. Buenismo. Tan bueno estió o conzierto como mala a organizazión. Cuan i fuemos bi eba arrienda zagals fendo botellada en a puerta, que ixo ye normal. Tamién me parix bien que dixasen dentrar bebida en a Multiusos u a lo menos que se mirasen enta atro cabo. Pero lo que no entiendo ye que dixasen dentrar-ie beires. Biyemos un buen fascal de litronas de Ambar y con toda a colla de adoleszens, muitos d’els bien fatos, que bi eba, podese aber pasau cualsiquier cosa. T’os mosicos y t’o publico. No estando prou ixo, malas que o conziero remató, a ixo d’a una, trancón os escusaus cuan encara se podeba sentir as zaguers notas d’a zaguer canta de Los Gandules. O que pretendeban con ixo no lo sé. O que conisguión sí. Un trapazil de chobens bien carrañaus y con muita razón y que os arredols d’a Multiusos pudisen a pichaus mientres una semana a lo menos. De seguras que a l’atro’l diya bi abió bien de chen que dizió que os chobens somos/son una colla puercos. 10 t’os mosicos. 0 t’o carné choben. Abaixo tenez un bideo de Jah’sta, por si no lo ebaz bisto u si nian los conoixez.

Belloch: Guarda si ye penible lo de Escrivá de Balaguer que mesmo en España paran cuenta d’a notizia ta fer-se a mofla de nusatros. En iste binclo t’o blog d’A Enrestida, podez biyer a biñeta que fazió Fontdevilla en Publico.

Teruel ye bien pincho. MdaS 011

Estar esqueferau y aqueferau de bez ye cada begada más cutiano en ista bida mía, asinas que en ista semana tasamen he puesto leyer bella coseta que no sían os zaguers cambios d’o mio prochecto de cabo de carrera y o libro que tiengo ta leyer en o bus. Asinas que o millor d’a semana se quedará en un par de fotos d’o cabo de semana y poco más.

Amantes: As fotos d’o cabo de semana las he preso en Teruel, en a fiesta d’os amantes t’an que i soi iu como toz os años dende en fa ya seis. Estiaño cal dezir que de buens conziertos, no bi’n ha abiu tantos ni tan buenos como atros años. Con tot y con ixo, o sabado de nueis ascuitemos una colleta que, encara que en primeras parixeba una mica aburrida, a la fin nos fazió pasar un ratet sobrebueno. As fotos son la una d’a Torre de San Salbador. L’atra d’un puesto de birolla que bi eba (no apto ta bechetarians).

Belloch: En estar en Teruel no podié ir t’a manifestazión en contra d’as barquichotas de Belloch, pero asperemos que istas zaguers fateras que ye fendo faigan rebellar a la chen. Aquí podez leyer a notizia en El Periodico. En Soitu he trobau un articlo asabelo de somarda sobre Belloch feito por Purnas. Asinas tot chunto parix mesmo pior alcalde, y guarda si’n ye de difizil...

Groma, groma! (Yayo bolador dixit) MdaS 010

Con a resaca –metaforica y reyal- d’o conzierto por Castanesa, escribo güe. Buena chen, que se deziba, y bien buena, he d’adibir. Un conziertazo o que fazión ayer a chen de Frutas y Verduras, Mallacán, Comando Cucaracha y toda la crica de raperos que i estión. L’inte “Isla Aneto” como siempre, nos metió os pels punchudos. Ixas gaitas, en son d’emozionans! Antiparti d’o conzierto, y como ye de dar, se i metión mesas informatibas de bels colectibos. A triga estió curioseta. Bi yeran os Enrestidos, Greenpeace, A republica independien de Torrero, Caracol Zaragoza, La Pantera Rossa, as chens de Sieso y muitos atros que en iste inte de perder neuronas no puedo remerar guaire bien. Parix que por isto d’as montañas nos mobemos chen de toda mena y no nomás os cuatro aragonesistas de siempre, cremaus como tozas d’ibierno. He sentiu que mesmo se quedó chen sin poder dentrar-ie, asinas que en Castanesa abrán replegau buena cosa de perras, que menister ye. Prou que o conzierto ye o millor d’a semana, pero tamién han pasau atrás cosetas.

- Wyoming. Que tien as cosas suyas... Con tot y con ixo me parix simpatico y ye de dar que ye un sobrebueno showman. A suya carrera ye plena de programas sobrebuenos como “El peor programa de la semana” u o primer CQC. Agora, rodiau d’un equipo que bien querrían muitos –Usun Yun y Beatriz Montañez me parixen de lo millor que tien La Sexta- le’n ha colau a Intereconomía TV. Que ye de muito bien biyer, cal dezir. Yo, que soi d’os que de cabo ta cuan nos desayunamos con Federico t’arreguir-nos-ne, tamién goso biyer-la asobén. A istoria cuento que la conoixerez pos se’n ha charrau muito. Aparixió un bideo an que Wyoming carrañaba de mui malas trazas a una becaria. Ixe bideo, amás de penchar-se en Youtube, como no, estió emitiu ascape por Intereconomía TV, que yeran encantaus d’aber-se conoixiu. Pero be-te-me que a l’atro’l diya aparixió Wyoming contrimostrando que tot yera mentira, que les eban presto a trampa y bi eban caito. Tot, incluyiu a rispuesta d’Intereconomía lo pencho abaixo. Wyoming, unatra bez s’ha superau y ha dixau a Intereconomía como lo que ye. En o programa no sabeban nian que dezir. Dimpués de dar-se tanta bamba... M’ese feito firme goyo biyer por un foradet a lo barrenau ixe cuan s’enteró de que le’n eban colau. Continaz asinas, Wyoming y La Sexta que iz en una buena endrezera...

- Galactica. SLQH, El Intermedio, Los Simpsons y House son d’as pocas cosas que contino biyendo en a TB. Me pienso que a tamás, u talmén por culpa de, tantas canals, a TB ye cada diya pior. Antena 3 contina abatanando as buenas series que tien. 24 u numbers no duran ni dos capitols en o mesmo diya d’emisión ni a la mesma ora. Telecinco pude masiau a reality y alparzeyos. TVE ye TVE. Dengún no en aspera cosa. Asinas que, en estar un fricazo y o feito de que son repetindo a primer puenda de Los Simpsons, he abiu de mirar por internet bella cosa que biyer de meyodiyas mientres chento. En http://www.seriesyonkis.com/ podez trobar cuasi tot lo que podaz prexinar. Yo tos recomiendo de biyer The Big Bang Theory que ye una sitcom sobre una parella de fisicos que comparten piso. Antimás he prenzipiau a biyer atrás dos series que, por agora, me son fendo asabelo de goyo y que as dos son remakes de series de antimas. La una ye Doctor Who que ye bien curiosa. L’atra Battlestar Galactica. D’ista nomás en he bisto lo piloto, pero ya soi deseyando d’empapuzar-me. L’argumento ye clasico. Robots carrañaus con los umanos que quieren acotolar-nos. Con tot y con ixo ye feita de una traza muito orichinal. Biyez o piloto y ya me contarez que tos parix.

- En o planeta Aragón tanimientres, os soberanistas continamos estando notizia. Federico I nos fazió famosos –Grazias Fede!- y mesmo o BOA charra de nusatros. En reportache a toda pachina! Talmén siamos más importans que no creyemos? A berdat ye que, me pienso que china chana, imos enfortindo un mobimiento sozial y politico que puede plegar en bel puesto dillá d’a Madalena. Encara que por agora aigamos de remanir-ie y continar treballando a moniquet. En o blog de Aragonando podez leyer l’articlo.

- Darwin. Por Desde Banarús, atro compañer blogger m’enteré d’as chornadas que fan en Bilbo sobre Darwin. Asperemos que se pare bella cosa parellana en Zaragoza. En os USA, que ixo sí que ye Tierra de Barrenaus, os creazionistas chuntan asabelo perras y chen, mesmo ta creyar institutos de ¿imbestigazión?. No sé guaire bien si redir-me, plorar u tremolar con lo que mete en iste articlo de Publico. Que istos son os nuestros emperadors, cal remerar (os españols no son que os encargaus, cal remerar-lo).Entre que paran y no as chornadas sobre Darwin tos pencho contino os bideos d’a groma de Wyoming. Que baiga bueno!