Sin lei de luengas

Ya ye feito. A lei de luengas ya ye vulcada. L’espanyolismo, que no ye atra cosa, torna a ganar. Encara que me pienso que, en o fundo, ya heba ganau o diya que nos metioron o lamín d’a lei y deixemos de luitar ta prencipiar a “pasteleyar”.

Ta la etnocida Dolores Serrat no ye prou con estar complice de as retalladas en educación. Antimás puet pasar t’a historia como a que acotoló l’aragonés y o catalán en Aragón. Dimpués que no plore si le tornan a chilar y faltar por a carrera. Que no dubde que yo lo feré. Porque si a ella le flore que le chilen u le falten a yo me flore muitismo que me digan que la mía no ye una luenga, que no tiengo dreito a que se reconoixca a suya existencia, a que tienga as mesmas posibilidatz de sobrevivir que a resta, a que as mias sobrinas la puedan fer servir y aprender en a escuela. Vusté, sinyora Serrat, y vustetz sinyoras d’o PP, PAR (y tamién muitas d’a resta de partius)  son colaborando en que a humanidat siga un poco más inculta. Y lo fetz por puro nacionalismo. ¿Qué problema bi habría sino en clamar catalán a lo catalán sino en tenetz garra en clamar-le castellano a lo castellano?

Pero igual que tenebanos una ministra de sanidat portiando una powerbalance, tenemos una consellera que s’ocupa d’os afers lingüisticos que no entiende a diferencia entre luenga, modalidat lingüistica y dialecto. U que talment lo entiende masiau bien. Que se deixen de fateras y de mentiras. Que no digan que quieren esfender no se qué modalidatz. Que caigan ya todas as mascarotas y deixen a Vadillo reubrir o suyo blog y decir lo que en reyalidat en piensan: que isto de l’aragonés y o catalán ye como lo klingon, que no tienen mica respeto por as nuestras luengas, por o nuestro patrimonio milenario y que lo que quieren fer ye callar-nos, silenciar a nuestra luenga y as nuestras voces.

Tant y mientres, en fablilandia continaremos barallando-nos por as bes altas u baixas u por si o mio premio brila más que no lo tuyo. Hemos fracasau. Todas. Somos aduyando a apedecar a nuestra luenga. Maitin, ni a semana venient, ni en tornando d’o verano, bi habrá garra manifestación. Todas seremos muito aqueferadas mirando-nos lo melico, esconfitando as unas d’as atras, malmetendo por que fulanica escribe no se como... Asperemos que a chent d’o catalán s’organice y pueda ir ta lo que quiera que faigan en protesta. Como si me cal ir ta Vall de Roures

Isto se puet cambiar. Igual como nos chuntemos fa no tanto y t'a part d'alavez tenebanos tamién as nuestras movidas, podemos superar-las agora y ir de conchunta ta que, a lo menos, no perdamos a dignidat Prou que sí, cal tener ganas de entender que l'enemigo no escribe l'aragonés con b u v, escribe nomas en espanyol y quier que toda a resta d'o mundo lo faiga.


Bi ha una sección en La Enredadera que se diz L’aragonés ye bien vivo. Aspero que contine estando-ne muitas anyadas. Lo que ya no sé si son tan vivas as aragonesofablants. Podemos fer más cosas que no escribir carranyadas en un blog. Y ixo va tamién por yo. Nos viyemos en as carreras.

Araleachenda de verano 2012

Todas as anyadas, Arale, ta istas calendatas s'organiza lo suyo verano. O suyo y o mio, en a mida d'o posible. Y ya de paso les n'invía a las suyas amistatz. En primeras se'n feban a mofla, pero agora ya ye quasi un ritual y, si tarda bell poco, le carranyan en trobar-se-la por a carrera. No digamos si se deixa bell festival u evento. 

Como cuento que ye una información d'intrés ta todas as lectoras d'o blog, feré un resumen de l'Araleachenda 2012 con bells comentarios míos y suyos:

Fiestas d'a Madalena: 15 a 24 de chunio. Vico d'a Madalena, Zaragoza. As fiestas d'o millor vico d'o mundo. Qué más decir? Incluyida la chera de Sant Chuan, que en ista anyada toca en sabado, y muitas actividatz alternativas ta prencipiar o verano con borina y reivindicación.

Tamborilé: 16 de chunio, Mezquita de Exarc (Cuencas mineras). Festival de mosica en a carrera. Tot lo diya dezaga d'una banda fendo pasavillas por o lugar, zorriando y bailando. IV edición d'una borinaza ya imprescindible.

Fiestas d'o Gancho: 21-26 de chunio. Vico d'o Gancho, Zaragoza. As fiestas d'o segundo millor vico d'o mundo. Encara no conoixco lo programa, pero siempre i levan buenas cosetas. Todas as anyadas i trobo bella colla de mosica nueva buena.

Poborina folk: 22-24 de chunio Lo Pobo (Comunidat de Teruel). Mitico festival de folk que leva 14 anyadas. Y como todas as anyadas me lo perderé. O nuestro festival maldito.

PIR: 29 de chunio - 1 de chulio Chasa (Chacetania). Toda una tradición. Un d'os millors festivals d'Aragón con una d'as piors programacions. Pero toque qui toque siempre i femos sobrebuenos ratos. Ye lo que tien a buena companyía, as badinas, l'alcohol y a mosica...

Fiestas de l'Anchel: 29 de chunio - 9 de chulio (Teruel)  Si nunca no i yes estada, ya tardas. Muito millor que Sant Lorient en Uesca. Si borina tenese una foto en o diccionario se fería en istas fiestas.

Esfendemos a tierra: 14-16 de chulio. Artieda (Chacetania) A gran borina de l'independentismo. O puesto y os diyas de l'anyada a on que salimos de l'almario y aprofeitamos ta debatir, charrar y, prou que sí, pasar un sobrebuen cabo de semana. Con muitas sorpresas en ista edición.

Carrasca Rock: 20-21 de chulio Exulv (Andorra-Sierra d'Arcos). Tamién se ha iu fendo o suyo espacio d'entre os festivals de verano, dende aquella primer edición fa ya tanto... Y siempre fendo buena faina en a prochección de collas d'a redolada.

Pirineos Sur 13-28 de chulio. Sallent, Val de Tena. O más institucional y comercial de totz os festivals, pero no por ello deixa de trayer asoben artistas intresants. Encara que nunca no i soi estau, tanto Arale como tot qui bi ye iu en ha traito buen sabor de boca.

Trobada de chenero: 17-19 d'agosto Lakabe, Nafarroa. Trobada sobre muller, salut y igualdat en una ecoaldea navarra. Prou intresant.

Fiestas d'Andorra: 7-11 de setiembre. Andorra. A oportunidat de rematar bien o verano y tener a zaguer borina estibera antis de prencipiar o curso. A tamás d'os bars, siempre surten buenas ideyas ta pasar a nueit.

Y ixo ye tot lo que incluyó Arale en a suya achenda t'o verano 2012. Si tenetz más ideyas podetz escribir-las como comentarios. Regular que nos deixamos cosas como estoesloquehay, Gaire, Lagatavajunto, Sant Lorient... Afortunadament a ufierta en Aragón ye cada diya más gran y más intresant.

 
 

Ficción LGTB (II) : Series de TV

(AVISO: PUET TENER SPOILERS DE GAME OF THRONES Y TRUE BLOOD)

Renly Baratheon, de Game of thrones

Soi de Renly. Qué le voi a fer. Creigo que habría d’haber ocupau o trono de fierro. Ye o que más refirmes teneba, o que más posibilidatz teneba de ganar a guerra rapedament, o que más chusto hese estau con a ciudadanalla y o que hese puesto pacificar Westeros, respetando os dreitos d’o Norte. A suya muerte nomas sirvió ta prolargar una guerra por o tozola de Stannis. Pero be-te-me que conoixco bien poqueta chent que’n siga partidaria. Con a chira que facioron as de Canal + con o trono de fierro por as Fnac, se viyeba a la chent portiando estandartes de totz. ¡Mesmo de Joffrey!. Pero bien poquetz portiaban o de Renly. Cal remerar que en a serie, quan o Trono yera ‘de chira’ por as Fnac’s Renly yera vivo. Y creigo que, en buena parti ye por a suya homosexualidat.

Bi ha habiu voces carranyadas por o tractamiento d’o personache de Renly en a serie. Ye verdat que en o libro, en garra inte diz esclaterament que siga homosexual y que as scenas d’a serie son inventadas. Manimenos George Martin sí que lo deixa entreviyer y, de feito, en una entrevista sobre iste afer, declaró que Renly yera homosexual tamién en os libros. En ixa entrevista, que tos recomiendo leigatz, afunda un poquet mas sobr l’afer y quita de d’almario a un atro personache (iste bisexual) de “Tronada d’espadas”.

En La órbita de Endor amostraban o suyo refús t’a homosexualidat de Renly. En iste podcast enciertan muito en bells afers, pero a verdat ye que os programas sobre Canta de Chelo y Fuego y sobre os Hombres-X fan prou penica y contrimuestran que u no tienen guaire ideya d’ixos afers u que no en han entendiu mica. O podcast archentino sobre Chuego de tronos ye bien diferent y tractan a homosexualidat de Renly como bella cosa lochica y natural.

Lafayette Reynolds

En True blood, os personaches no heteros son por totz os cabos. Dos d’os personaches homosexuals, antimás, son bien furos. Lafayette, un d’os personaches favoritos mios, alterna os suyos intes carinyosos, bien romanticos, con una personalidat bien fura quan cal. En a mia opinión ye un d’os personaches millor construyius d’a serie. Antimás de que se le pilla carinyo a escape y de que ye cocinero, que ta yo siempre ye un punto positivo... Atro personache gay ye Russell Edgington, qui antimás ye psicopata, sociopata, chenocida en potencia, y un barrenau, ra resumir. Toda ixa borrumbada ye controlada si fa u no fa y no pasa d’estar un personache bien farute dica que Eric mata a la suya parella, inte a on que deixa eslampar toda a suya furia y ye quan mata en directo a un presentador de telediarios rancando-le l’esquinazo. Granizo inte d’a tercer temporada, cal decir...

Me fa muito goi personalment o tractamiento d’os personaches en ista serie que creigo que no caye en topicos. Y en particlar o tractamiento d’o sexo, tanto en humanos como en os sers sobrenaturals.

Atra serie que da un tractamiento curioso como poco, ye Caprica, a precuela de Battlestar Galactica. D’atra man ye d’as pocas cosas buenas d’una serie prou aburrida. Ya en BSG 2003 se viyeba que no existiban os tabus de separación de cheneros. Hombres y mullers se cambian de ropa chuntos, fan servir os mesmos escusaus, … peor no i afunda más. En Caprica, que debuixa a sociedat en ixa planeta antis d’a enrestida d’os cylons, no bi ha garra heterocentrismo. Sam Adama, o personache mafioso, o “duro” d’a serie, ye homosexual. A poligamia masculina y femenina y as familias poliparentals son qualcosa cutiana y vista como normal. Totz os tabus d’agora no i tienen mica sentiu. Caprica debuixa, a lo menos en ixa demba, una sociedat perfecta y armonizada.

Sam Adama, de Caprica

Contino sorprendendo-me que chent d’a mia edat, d’as mia cheneración, contine escandalizando-se con istas cosas. Que les cause refús que Renly siga gay, que no les cuadre que Sam Adama siga homosexual y “o chungo” d’a serie de vez,... Cosas asinas nomas las puedo explicar u dende a homofobia latent que bi ha en l’ambient u dende a pluma hetero que os hombres amuestran tan asoben.

Una anecdoteta ta rematar, sobre os personaches gays y a reacción d’o publico. Quan feba FP, un diya nos metioron en clase Full Monty. No preguntetz porqué. Ent’a fin d’a cinta dos personaches masculinos s’enreligan. A yo me pareixeba una scena prou tierna entre que a resta d’a clase -vinte y tantos mozos varons, no bi teneba muller en clase- feban cenyos y sonius de fastio. Enlucerné, pues no heba conoixiu t’a part d’alavez ixa pudor a testosterona que bella vegada en he charrau.

Continará?

Ficción gay I: comics de superheroes

Fa bell pocos diyas m’enteraba de que, a la fin, Northstar va a casar-se.Vinte anyadas dimpués de salir de l’almario, y de superar totz os problemas que bi habió con os editors d’a Marvel ta que se reconoixese explicitament que bell personache yera gay. A tamás d’ixa salida de l’almario, a homosexualidat u a no heterosexualidat, más en cheneral, ye estau un tema tabú en os comics mainstream.

Muitas vegadas en a historia Marvel bi ha habiu insinuacions de que tal u qual personache yeran gays. Pero asoben por culpa d'o Comics Code, censura u mesmo autocensura no han puesto declarar ubiertament a suya sexualidat. O caso que millor me conoixco ye o de Shatterstar (Estrela rota) y Rictor, totz dos de l’universo mutant y que coincidioron en X-Force. Nunca no tenié garra dubda de que os dos yeran homosexuals y parella, pero tampoco no consiguié leyer un comic a on que lo decisen de traza esclatera. En as etapas de Fabian Nicieza y Scott Lobdell lo deixan entreviyer pero no s’explicita. Entre os dos nomas bi ha una gran-gran amistat, como repiten terne que terne en os comics. Dimpués, en as pachinas de X-Factor, o chenial Peter David, a la fin les fació salir de l’almario y declarar-se os suyos mutuos sentimientos con un beso. Diz que a Rob Liefeld, creyador de Shatterstar no le ha feito guaire goi ixa evolución d’o personache, por cierto. A yo me pareix perfecta y o criterio de RobLiefeld... en fin. Ista relación recibió o premio GLAAD (Gay and Lesbian Alliance Against Defamation).

Northstar, d’atra man, sí que consiguió declarar a suya homosexualidat antis mas, en 1992. Con tot y con ixo John Byrne, primer y Scott Lobdell dimpués habioron de pleitiar con os mainates d’a factoría d’ideyas ta fer-les venir a plego cuanto a fer publica a homosexualidat d’o superheroe canadiense. Agora se nos casa. Bella repunyetera, deciba de traza somarda que, encara que Marvel feba una boda gay, a parella yera formada por un canadiense y un chaponés, no pas por garra estadounidense.

Atras relacions homosexuals s’han insinuau en a Marvel como a posible, seguntes bells guionistas, entre Juggernaut y Black Tom Cassidy u entre Mistica y Destino (creigo que ista tamién se fació publica). Como que os tiempos china chana van cambiando, en a ya-no-tan-nueva colección de os Chovens vengadors dos d’os personaches protagonistas, Wiccan y Hulkling son gays y parella, y ye publico dende o prencipio d’a serie. Por isto, Young Avengers se levó un atro premio GLAAD.

Alan Moore ye un caso prou diferent en estar más independient que no os comics ‘tradicionals’ Marvel /DC. En Watchmen bi ha tres personaches homosexuals: Capitán Metropolis, Silueta y Hooded Justice, iste zaguer antimas sadomasoquista. En l’atro canto ye Rorschach, declarau homofobo. Tamién beluns dicen que bi ha razons ta pensar que o personache de Ozymandias yera gay.

L’afer d’a homosexualidat tamién ye central en toda la chustificación moral d’a Vendetta en ‘V de Vendetta’. A historia que leye Eve quan V la engarchola ye la que le de o zaguer empentón ta rebelar-se contra o sistema. Y ixa historia ye a d’una lesbiana, incomprendida por a familia suya, que dimpués troba a felicidat con a suya parella, ta que, a la fin as leis represoras d’o gubierno rematen con ella engarcholada y muerta. Por o feito de querer a una persona d’o mesmo chenero.

Pero Alan Moore va dillá de incluyir personaches homosexuals y ye un activista en favor d’os dreitos suyos. Ixo le levó a publicar l’antolochía "AARGH" siglas de "Artists Against Rampant Goverment Homophobia" (Artistas contra a rampant homofobia d’o gubierno). L’esquilmen d’a obra fué t’a Organisation for Lesbian and Gay Action.

Me deixo muitas cosas, como a boda entre Apollo y Midnighter de DC, y atras muitas historietas que desconoixco, pero isto no preba d’estar que una uelladeta por d’alto. Tamién ye una traza de convidar-tos a que, d’entre todas alportemos atras cosetas en a visión d’a sexualidat no hetero de man d’o comic superheroico. En bells diyas, tendretz una segunda parti sobre personaches no heteros en series de ficción ta TV.

Rato, un tio muito bueno

Quan yera bien chicot, a mai d'una amiga yera leyendo una revista a on que apareixeba en a portalada Mario Conde. Yo le pregunté que qui yera ixe sinyor y a muller me respondió "Mario Conde. Ye un sinyor muito intelichent y saputo. ¿No quiers estar como ell de mayor?". T'a part d'alavez yo quereba estar como Yuri Gagarin u Neil Armstrong. Talment como Carl Sagan, no remero que anyadas teneba, pero a fe a fe que no como aquel viello repeinau d'a revista.
 
Mario Conde yera 'un sinyor muito intelichent y saputo' ta aquella muller. En estió ta muitisma chent mientres muitismas anyadas. Dica que lo pilloron furtando a paladas en Banesto y lo engarcholoron. Pasó d'estar un modelo ta millons de personas a rematar como rufierter en os programas apolochetas de l'alcohol d'Intereconomia. Nomas os quatre fans estalentaus continan admirando a un sinyor acotolau. Con más diners que'n tendré yo en toda a mia vida, pero con a mesma dignidat d'una recholeta.

Fa bellas quantas anyadas ya un chenio, un saputo, tot un profesional y un sinyor serio-serio plegó en o Ministerio d'Economía d'Espanya. Se deciba Rodrigo Rato y tot lo mundo, mesmo muitos socialdemocratas, deciban que 'sabeba muito'. 'Un perfil tecnico'. En ixas anyadas fació a Lei d'a tierra (Ley del suelo, en castellano), un d'os orichens de la bombolla inmobiliaria y culpable en buena parti de que a economía espanyola siga hue como ye. Privatizó bien d'interpresas como Repsol, Tabacalera, Argentaria, Endesa, .. Tot un chenio que feba posible 'o miraglo espanyol'. Todas yeran d'alcuerdo. ¡Qué gran ministro!. En ganar os 'socialistas' marchó t'o FMI y todas as personas que lo heban afalagau, dobloron os suyos afalagos. '¿Viyes? -deciban - si será bueno que se lo leva o FMI!' Mientres as anyadas en as que Rato estió Director Cherent d'o FMI a crisi creixeba sin que'n parase cuenta y sin que tartise. O chenio d'a economía no la viyó venir, pero continaba estando un gran saputo y muito intelichent. Tanto que, por aimor t'a suya patria, se'n tornó ta Espanya ta menar Bankia y, bellas pocas anyadas dimpués deixar-la feita mierda.
 
Rodrigo Rato, o gran saputo, o creyador d'o miraglo economico ya prencipia a estar un mierdas mesmo t'a chent de dreitas. Si prencipian a investigar en lo de Bankia, no sería guaire raro que le pillasen bell renuncio y haiga de rematar fendo vins con o d'o parche d'Intereconomía. No nos ferá o morro cló.
 
Quan o PP ganó as zaguers eleccions espanyolas, entre que nombraban a los ministros, plegué un diya t'o treballo. Una companyera mía ye votant declarada d'o PSOE y charrin charran me dició que heba sentiu que lo nuevo ministro de economía yera 'un tío muito bueno'. Lo mesmo que Mario Conde. Lo mesmo que Rodrigo Rato. ¿Cada vegada que un neoliberal s'ocupa de afers economicos bi ha bell encargau de repetir en totz os meyos de comunicación que 'ye un tío muito bueno'? ¿Porque lo repite tanta chent terne que terne sin tener ni puta ideya ni de economía ni de o pasau u la qüalificación tecnica d'o sucheto en qüestion?
 
Cada vegada que siento que, en os afers economicos 'un tio ye muito bueno' preto a tremolar....

En leyendo: Os chuegos d'a fambre

A vida de qualsiquier de nusatras tien intes importants t'a tuya formación ideyolochica. Cosas que pasan arredol de tu que te fan parar cuenta de que yeras entibocada en bella cosa u que reafirman as tuyas razons ta pensar qualcosa. Intes que te dan a rasmia y los motivos ta luitar. Puet estar que no'n tiengas que uno u que'n tiengas milenta. Con más u con menos intensidat. Soi seguro que todas as lectoras, en pensando dos segundetz, en trobarán beluno. Katniss, a protagonista de "Los chuegos d'a fambre" (TIEN SPOILERS, SI QUIERS LEYER O LIBRO NO CONTINES LEYENDO) en tien uno, a lo menos en o troz que he leyiu dica agora. Y como lo narra l'autora me pareix tot un encierto. Ye muito chiquet pero reflexa de tot ixa chicota rebelión, ixa rabia que todas hemos entiu bella vegada.... Ah, y gracias a qui deixa en bookcrossing libros tan pinchos!!!

Amprau y traduciu dende o castellano de "Los juegos del hambre". Suzanne Collins, 2008.Traducción t'o castellano: Pilar Ramírez Tello. Ed. Círculo de Lectores P.246-247

No puedo deixar de mirar-me a Rue. Pareix más chicorrona que no nunca, un cadiello acochau en un niedo de retes. Me ye imposible albandonar-la asinas; encara que ya no vaiga a sufrir más mal, ¿da a impresión? d’estar de raso indefensa. O chico d’o Distrito 1 tamién pareix vulnerable, agora que ye muerto, asinas que me niego a odiar-lo; a qui odio ye a o Capitolio por fer-nos tot isto.

Siento a voz de Gale; os suyos barafundios sobre o Capitolio ya no me pareixen inutils, ya no puedo no fer-les caso. A muerte de Rue m’ha obligau a concarar a mia furia contra a crueleza, contra a sinchusticia que nos chusmeten. Manimenos, aquí me siento mesmo más impotenet que no en casa, pues no bi ha traza de vengar-me d’o Capitolio, ¿verdat?

Alavez remero as parolas de Peeta en o tellau: “Pero deseyaría de poder trobar una traza de.. de contrimostrar-le a o Capitolio que no le pereteneixco, que soi qualcosa más que no una pieza d’os chuegos suyos”

Por primer vegada, entiendo o qué significa.

Quiero fer bella cosa agora mesmo, aquí mesmo, bella cosa que los avergüenye, que los faiga responsables, que les contrimuestre que importa igual lo que faigan u lo que nos faigan fer, porque siempre bi habrá una parti de cadagún de nusatros que no será suya. Han de saber que Rue yera qualcosa más que no una pieza d’os chuegos suyos, igual como yo mesma.

En ascuitando: Aniversari

En un viache ta Sant Miquel, octubre17 me fació conoixer a una colla de mosica que no heba ascuitau antismás. Manel ye tot un fenomeno en Catalunya y, de feito, ye a colla que ha conseguiu que un disco grabau de tot en catalán haiga plegau t'o más altero d'as listas de vendas de l'estau espanyol, lo que no pasaba dende os tiempos de Lluis Llach y o primer Serrat, seguntes he sentiu por astí. No se guaire bien como definir a suya mosica y como tampoco no me fan goi as etiquetas, tos deixo a vusatras ixa faina. Lo que sí sé ye que ye una d'as collas más orichinals que he sentiu dende fa muito tiempo. 

D'una d'as cantas favoritas mías, en han feito un video que tamién ye toda una obra d'arte. Ta glarimeta de lo polida que ye. Contino tenetz video y letra traducida a l'aragonés. En catalán y castellano la podetz leyer en a suya web a on que trobaretz atras alfayas como a versión en catalán de un clasicazo como 'Common People' de Pulp. Va por Arale, por compartir ixa mesma sensibilidat mosical.


As luces s'han amortau, han quitau o pastel
aplaudiban os pais, os tietz, os amigos,
totz de vegada, chuntos en un unico chilo,
'que demande un deseyo, que demande un deseyo'
Y tú, niervuda, como siempre que te pertoca estar
o centro de atención,
te miras fito fito ta un punto impreciso d'o minchador
un segundo, dos segundos, tres segundos, quatre y cinco.
Os uellos tuyos calbalgaban mirando un deseyo,
as velas se cremaban y bells amigos
te enfocaban como camaras de retratar,
una voz comentaba 'ay, que polida ye'
y yo, en o fundo, remataba a copa decidiu
a trobar un cantonet ta fer-me chicot, chiquet.
D'a grandaria d'una mosca, d'a grandaria d'un mosquito
Ta en estar achiquiu,baixo as escamilletas
y a mesa alargada por dos caballetz
fer tranya china chana por un entramau
de calcero d'hibierno, de confetti escachau
y esprintar maldecindo a largaria d'os mios nuevos tranguetz
y amagar-me entre un zuro y a paret
chusto a tiempo de que no me minche o maldau mixinet.
Y escalar as cenefas d'o vistiu tuyo
y fer falca con o piet cucho en un escusiu
y plegar en a espalda tuya y posar-me en un botón
y alentar un poquet y d'un blinquet,
acarrazar-te un pel y empentar-me
en un zaguer blinco final.
y acceder t'o deseyo tuyo esnavesando a paret d'o glarimal.
¡Agora un piet! ¡Agora un barzo! ¡Agora o torso! ¡Agora o tozuelo!
Y ya aintro d'o deseyo, viyer si bi ha un buen ambient,
espardir bellas tarchetas, estar amable con a chent
y con trazas de choven discreto y educau
presentar os mios respetos ta l'autoridat,
ascuitar con ficacio baralletas curiosas a los más viellos,
fer-me fotos graciosas con atros ilustres viachers
y con un hombre con truqueta que no sé qui ye.
Y en o nublo de suenios que tiens a mán
y entre atros que, lo siento, pero ya no vivirás nunca,
detectar un caminet que me aluenye d'a colla
u una uembra tranquila a on, sin que dengún no pare cuenta de yo,
chitar-me un ratet y , a la fin, relaxar-me celebrando
o placer indescriptible que ye estar con tu, hue que te fas mayor,
entre que dillá d'o uello as velas se van amortando.