Barrenau pregunta: Boso a hipoteca?

Pareix que en zagueras muitas d'as lectoras d'ista y atras pachinas en aragonés son prou activas fendo correccions. Ixe debat me pareix sobrebueno ta que todas podamos afundar más en o conoiximiento de l'aragonés y ta que se faigan publicament debatz cuanto a lo modelo de standard y a l'aragonés charrau.

Creigo que ye chusto remerar o debat sobre o verbo reblar que ya bi habió en un anterior Barrenau pregunta, y que he ubierto una nueva sección sobre l'aragonés, que en o suyo primer articlo alportó bell poquet vocabulario.

As dubdas que hue me preocupan (ye un decir, que duermo muito bien) chiran arredol d'os pisos. D'una man, reubro, si bella vegada se trancó, o debat sobre o vebo 'bosar'. En escribindo isto, bi ha un debat en una noticia de Arredol sobre a ilesia catolica y l'IBI sobre iste verbo. Seguntes lo que yo sé, 'bosar' significa vomecar u mesmo escupir, por lo que me dicioron os mios mayestros. Antimás, bi ha dubdas sobre si tamién se puet fer servir como 'pagar' y, en ixe caso, en que contexto y como d'estendillau ye por o dominio de l'aragonés. Ta qualsiquier que viva en a Zaragoza aragonesofablant (sí, ixo existe) o verbo bosar ye d'emplego cutiano pero, ¿en ye por una atra error historica u lo femos servir bien?. Ala, ubierto lo debat que queda.

D'atra man, y como l'academia contina sin tartir, caldrá ir adaptando de traza popular os neolochismo y cultismos. Sobre a vivienda bi'n ha muitos que no sé guaire bien como traducir, asinas que tos ne deixo bells quantos ta que m'aduyetz: hipoteca, dación, desahucio.

Barrenau pregunta: Yo, indeciso

En zaguerias soi prou "preguntaire", pero ye que as dubdas me surten por totz os cabos. Antimás pareix que iste trestallo ye tenendo prou exito. Nomas cal viyer a cantidat de comentarios (y a calidat) en o post sobre reblar...

Como no podeba estar d'atra traza en istos diyas a mia consulta ye sobre as eleccions. Y ye tan simpla como que no sé a qui votar. Dandaleyo entre bellas candidaturas, u votar nulo. En primeras no he pensau votar en blanco ni abstener-me, pero aspero que me detz razons. Asinas que ixa ye a pregunta ¿A qui voto y por qué?

Como siempre, respuestas razonadas, por favor. Voto en Zaragoza, asinas que nomas puedo votar a os partius que se i presentan.

Aspero as vuestras respuestas...

Barrenau pregunta: Revlo?

Los que me leigatz asoben, ya habretz visto que m'ha dentrau un troll en o blog. Ye un troll bueno y por ixo le publico os comentarios. No fa que dar mal con as erratas, faltas graficas, lexicas y cosas d'ixas. Cosa que l'agradeixco prou, porque sin conoixer y reconoixer as errors ye imposible tirar enta debatnt. Bellas vegadas l'he dau a razón y he cambiau lo que pertocaba y bellas atras no pas. Pero bi ha habiu una vegada que no he sabiu o qué responder.


En un post me deciba:" Agora sí t'he pillau! reblar bien de "revirare" en latín, asina que abrías d'escribir-lo con v" Ya viyetz que fa servir grafía d'o 87. O caso ye que, en no tener n.p.i. de etimolochía, no sé si isto ye asinas u no, y, en ixe caso de si cal escribir reblar u revlar....


Asinas que ista ye a pregunta: ¿Reblar con b u con v y por qué? Prou que seguntes a grafía ACAR. Abstener-se de contestar "con b porque ye a grafía buena y tal y qual..." Aspero as vuestras respuestas

Barrenau pregunta: porra electoral

Una nueva sección, que ya levaba bell mes sin fer-ne denguna nueva. Barrenau pregunta prebará de fer iste blog un poco mas participativo, de replegar as vuestras opinions y sumar-se a ixa moda-esprito d'o 2.0, u a lo menos d'o 1.5.


A primer, que fa a debantadera d'a sección ye sobre as eleccions que son en momentos de fer-se. Quan queda tasament 40 diyas, tos convido a esdevenir en Rappels y Aramises y contestar ¿qual creyetz que será o resultau electoral en as Cortes d'Aragón y en o Concello de Zaragoza? Lo imos a fer en plan porra, ye decir no se puet repetir o resultau de una que lo haiga dito antis y qui encierte se levará un premio. O premio será una biera (u refresco) pagada por moi, en A Flama, trigada por a ganadora d'entre todas as que i venden, incluyidas as d'importación.


Ta participar-ie, hetz de deixar como comentario o resultau ta Cortesy t'o concello, por partius y diputadas / concellers. Ya sé que ye inchusto ta qui no viva en Zaragoza, pero asinas ye mas dificil d'encertar. Ta ganar cal encertar exactament os dos resultaus. Si dengún no endevina os dos, ganará qui en haiga endevinau uno. Y si no gana dengún, me feré yo a biera a la vuestra salut con qui quiera acompanyar-me.


Prou que o mio pronostico va a estar o primer. Astí va:


Cortes d'Aragón:
PP: 30, PSOE: 24, PAR: 7, IU: 3, CHA: 3


Concello de Zaragoza:
PSOE: 12, PP: 12, CHA: 3, IU: 2, PAR: 2


Lo he escrito por orden que creigo que tendrán de votos. Tamién me permito o luxo de apostar (isto no dentra en a porra) que, encara que UPyD no conseguirá representación, será o partiu más votau d'os extraparlamentarios.


Remeratz que ye o resultau que creyetz que bi habrá, no o que queretz que bi haiga...
Faigan as suyas apuestas!