La importancia d'as luengas

Dició istos días una dirichent d’un partiu de dreitas que l’espanyol yera la “segunda luenga mas important d’o mundo”. No pas la mas charrada u la mas aprendida. La mas important. Como lo luengache no ye mica inocent, u millor dito, como qui lo femos servir no somos mica inocents, me faría goyo de pensar-ie una miqueta y preguntar-nos a on reside la “importancia” d’una luenga.

Talment lo decise por lo mantra de que ye la segunda luenga mas parlada d’o mundo, en competición dende habe anyos con l’anglés, lo chino y l’hindi. Podríanos preguntar-nos cómo se consiguen ixos datos, qué dialectos se consideran constitutivos d’a luenga, qué grau de competencia s’exiche pa incluyir-te en lo censo de fabladors u si, como barrunto, se fica en la cuenta a toda la población de qualsequier país que tienga lo castellano como oficial. Pero rai tot ixo. Si no fuese la segunda sería la tercer, quarta u cinquena que, en un mundo a on que se considera que existen 6000 luengas vivas, ye un puesto sobrebueno. Todas las luengas s’acumulan por un regular mas numeros de fabladors que no en tienen en realidat. Encara que en l’aragonés pareixe que haigamos renunciau a ixa estratechia de supervivencia y i hai una corrient encerrinada en fer la cuenta “a la baixa”.

¿Pero ye lo numbro de fablants sinonimo d’importancia? No pas pa yo. La cantidat de parladors ye un feito contabilizable. La importancia ye una cualidat subchetiva. ¿Qué animal consideraría la mayoría d’a chent mas “important”: lo lince iberico u la rata? De ratas n’i hai a trompicuesco, pero a degún no se le ocurriría que cal protecher-la d’o lince. Tot de revés, se fan a-saber-los poders pa protecher a una especie que, precisament por lo suyo radiu numbro d’exemplars, ye important. Porque en queda pocos.

Podríanos considerar l’euskera la luenga mas important d’o nuestro entorno. No tien “familia” conoixida y ixo la fa unica. Pa yo ye tot un privilechio poder convivir con un idioma como ixe, de tot diferent y solo testimonio d’una manera de veyer lo mundo. Podríanos considerar la mas important a l’aragonés que, si no lo conseguimos evitar, será la siguient luenga europea en dispareixer. Lo cornico represienta pa muitas un eixemplo de que se puet fer reviscolar una luenga mesmo dimpués de que haiga muerto la suya zaguer fablant. Latín y griego han serviu de base pa lo luengache scientifico de buena parte d’o planeta. U, por qué no, muitas pueden considerar l’esperanto la mas important, ya que pa ellas sigue representando una asperanza pa tener una luenga universal no vinclada a garra nación. Todas podrían estar "la luenga mas important".

Si nos centramos en criterios economicistas u utilitaristas, l’anglés contina estando la luenga de l’imperio y la mas parlada con diferencia en internet. Si lo chino consigue empecipiar a desplazar-la d’ixos dos puestos ye qualcosa que podremos presenciar probablement en la siguient decada, con tot lo cambio lingüistico y cultural que ixo puet suposar en occident. En qualsequier caso, l’espanyol no chuga en ixa liga, u lo menos no lo fa en ixos primers puestos.

Me pienso que la importancia ye de tot subchectiva y pende d’a experiencia vital de cadaún. ¿Qué importancia puet tener en la mía vida cutiana l’hindi y los suyos cientos de millons de fabladoras? Manimenos, l’aragonés, que la mayoría d’a población d’o planeta - incluyindo muitas aragonesas- morirá sin saber nian que existe, ye pa yo la luenga mas important d’o mundo, y sisquiá ye la mía luenga materna. Diga, sinyora de dreitas, que l’espanyol ye la segunda luenga mas parlada. Si manipula bien las cifras mesmo puet fer-lo puyar a la primera. Pero, como en tantas atras ocasions s'entivoca d'achectivo. A no estar que sepa que lo castellano no ye la segunda luenga mas parlada d'o mundo y precisament faiga servir la parola "important" pa poder fer servir los datos que mas honra faigan a las conclusions que vusté y tantas atras nacionalistas espanyolas emplegan como enchaquia pa las suyas politicas lingüicidas.

Victoria Invent plora quan le leyen en catalán

Prener-se dos minutos pa comprebar si las cosas que se leyen tienen alazetz de verdat, u si puet haber-ie bella motivación ye una cosa bien sana. Si antimás lo que leyemos ye en Twitter, ixe puesto fosco, pleno de respuestas facils, slogans y grometas de buena circulación y replicación, ye quasi obligación. Lo que se presienta como un drama personal y conmovedor, un patir de man d’una entregada mai que nomás quiere lo millor pa la suya cachimalla, en que esfonsas bell poquet, esdevien una campanya lingüicida. No sé guaire bien cómo, n’amaneixió fa bell día en lo mio timeline iste buen eixemplo.

Lo drama empecipia con una persona que tuitea:

Acabo de tener esta conversación con una amiga. Para que entendáis lo que padecen los niños castellanohablantes en una escuela donde no se les permite dar rienda suelta a su lengua materna. Nadie les pregunta a los que verdaderamente sufren la maldita inmersión lingüística.
Hoy tenía que leerle dos libros a Victoria, uno en castellano y otro en catalán. Cuando le he leído el primero, estaba súper atenta, ponía esa carita inocente que ponen los niños pequeños, como la de un bebé cuando descubre algo interesante. Ha estado escuchado con mucho interés e incluso entusiasmada hasta el final.
Cuando he empezado con el segundo, no había llegado a la segunda página que ya estaba dispersa, nerviosa, no quería escucharme. Incluso me ha dicho “no me gusta”. Y entonces me he puesto en su preciosa piel y me ha dolido pensar lo que sufren en el colegio, teniendo que familiarizarse todo el día, desde que entran hasta que salen, escuchando todo el día una lengua con la que no se identifica.

¡Qué manera de pasar d’Arcadia ta Mordor! Lo primero que piensa un, quan leye cosas asinas ye que ye un INVENT como los mallos de Riglos de gran. Piensa tamién, en si la criatura no sufre con las mates. Si le “entusiama y escucha con mucho interés” lo calculo, pero pateixe l’alchebra en estar una parte d’as matematicas con la que no s’identifica. ¡Maldita inmersión matematica!

Historias como istas, a on que las fillas y fillos de belun se fan servir como vehiclo pa ixemenar ideolochía, n’hemos viviu quantas ya. Todas recordaretz lo mitico “no te lo perdonaré jamás, Carmena” u las charradas entre Rocío Monasterio y la suya filla sobre l’Achencia Tributaria.

Conmoviu por lo relato, y por “l’acoso faixista” de man d’os independentistas que denunciaba en lo siguient tweet, siguié leyendo iste intresant relato. Me preocupaba la salut de Victoria seriament. No habié d’aguardar guaire, pocos tweets mas abaixo trobaba la respuesta a qualsiquier dubda que tenese. Ella mesma me confirmaba qual yera lo problema real d’a nina en istas parolas:

A todos los que me decís que cuando aprenda inglés va a flipar:
No, el inglés es una lengua útil y necesaria al contrario del catalán, que se ha convertido en un arma arrojadiza al servicio del nacionalismo. Ah, y suena cacofonico.

Lo problema no ye que la nina “pateixca la inmersión lingüistica”. Si fuese en anglés, no tendría garra problema. Probablement, mesmo se’n fese la bamba. Lo problema ye lo catalán, ixa luenga que, igual como l’aragonés, l’asturiano, lo vasco u lo gallego, “son inutils y innecesarios y nomás existen como armas a lo servicio d’o nacionalismo”. Si a la nina le leyes lo cuento en anglés, entenderá dende “Once upon a time” que ixa luenga ye necesaria y util y que no sirve a lo nacionalismo de dengún. Probablement faiga "ixa careta inocent que fan los ninos quan descubren qualcosa superintresant". Y, qui sabe, igual amaneix Mary Poppins y se meten a ordenar la cambra cantando Spoon full of sugar.

Lo que le pasa a ista persona tien un nombre, que ye catalanofobia. Y que si vivise en lo país nuestro sería aragonesofobia, en EH, vascofobia y asinas-asinas. Porque la sola luenga, cultura y identidat nacional que permite, mesmo la sola que talment concibe, ye la espanyola. Lo castellano, pa ella no ye un arma, a pesar d’o que ya le deciba Nebrija a la reina Isabel de Castiella en 1492, que “siempre la lengua fue compañera del imperio”.

Pa ista persona, toda la resta de luengas d’a peninsula, y si le’n preguntasenos muitas atras d’a resta d’o mundo, son cosas inutils y innecesarias. Y las cosas inutils y innecesarias ya cal fer-las dispareixer, que no fan que estorbo. Tot ixe patimonio, que ha conseguiu sobrevivir a sieglos y sieglos d’aculturación d’una manera quasi miraglosa, ye un entrepuz. Como en ye un repoliu conchunto arquitectonico industrial de finals d’o XIX, podendo fer-ie un util bloque de pisos. U un chacimiento arqueolochico d’o neolitico a on que podría fer-se un cumo pa lo bestiar.

Si dimpués continas leyendo los suyos tweets te trobas, cada vegada con menos sorpresa, una ripa de afalagos a partius y organizacions d’extrema dreita. Pero pa ixo, cal fer clic. Cal perder ixe minuto que la mayoría no pierde. Lo primer tuit que comentaba a fe que ha circulau por collas de WhatsApp de AMPAS y equipos de futbol de ninos, denunciando lo “salvache adoctrinamiento” d’a escuela catalana. Dibuixando un país pleno de ninos plorando cada vegada que lo mayestro les diz “obriu el llibre per la pàgina…”.

Cal saber lo que bi ha en lo fundo d’istos argumentos y, malas que fas dos u tres preguntas, se fa evident que lo crío, la cultura u lo patrimonio, les tiene igual. Que lo que se quiere ye acotolar qualsiquier expresión cultural que no encaixe en la suya chiqueta envista d’o mundo. No nos callemos. Los suyos argumentos son de culicaiga y de muit buen desmontar. Y ye tant simple como recurrir a la comparación con l’anglés. Si lo que les pareixe bien en castellano u anglés les pareixe mal en una luenga minorizada, ye por simple y puro nacionalismo lingüistico.

Accentos "neutros" y medios

Lo retz bullioron, y no sin razón, en veyer lo "Taller de acento neutro castellano" que ofriba una interpresa de Madrit, enfilau mas que mas a actors y actrices, pero tamién a comercials y qualsiquier atro que querese fer dispareixer ixos molestosos rasgos dialectals d'o suyo espanyol. Tallers asinas son muit sinyalers d'a concepción d'a luenga que se tien en l'estau espanyol y d'ixe odio a la diversidat que tant ixemenau ye. No nomás se quier que la castellana siga la sola luenga con presencia publica, si no que antimás se preba de que totz en charren una variedat muit concreta.

La primer qüestión a comentar habría d'estar caboliosa ya dende la escuela: no existe l'accento neutro. En garra luenga. Concretament en lo caso d'o castellano, l'accento que claman neutro se correspondería con lo un aria d'o norte de Castiella y que, alavez, no puet estar neutro, si no d'ixa parte de Castiella. Ye l'accento de prestichio, lo que s'imposa en los medios de comunicación de masas espanyols, en lo cine, series, radio, etc. pero no ye neutro. Evidentement, un curso de "Taller de acento vallisoletano" ye de pior vender, pero quier decir exactament lo mesmo. Ye una simpla qüestión de marketing. ¿Por qué ixe accento y no pas l'andaluz, lo cubano, u mesmo lo de Madrit? Lo castellano, ixa luenga de chococientos millons de fabladors, se charra de maneras muit diferents y tien accentos bien variaus, como todas las luengas d'o mundo. Pero pa beluns la variabilidat y la diversidat, ye mala mesmo adintro d'a luenga. A la uniformización cultural que se preba d'imposar le estorba tot.

Como gosa de pasar, lo pior no ye que se faigan cursos de qualsiquier loquería. Cada ún ye libre de proposar la chorrada que se le ocurra y de pasar lo suyo tiempo como le agane. Lo pior ye que ixe curso tien a-saber-la demanda. Y como ixe, n'i hai  a boticiegas. La razón ye clara: hemos asumiu como colectividat que en televisión, radio y cine y en qualsiquier medio a on que se charre castellano s'ha de fer en ixa variedat concreta, con ixe accento concreto. Si quiers treballar-ie, u charras asinas u marchas t'os medios "autonomicos", a on que no clames tanto l'atención. ¿Cómo sería posible si no que todas las locutoras de radio y todas las presentadoras d'informativos charren igual? La resta de maneras de charrar lo castellano nomás se fan servir ta qüestions folkloricas u quan, en ficción, quiers deixar claro que un personache ye de bell puesto, por un regular forzando ixe accento dica lo ridiculo.

Manimenos, en lo "podcasting popular" por buscar-le bell nombre a toda la chent que somos gravando-nos programetas con los recursos que nos permite l'accesibidat a la tecnolochía, sí que podemos sentir toda la variedat sonora d'o castellano. Bi ha toda una ripa de programas bien populars que los suyos locutors no han amagau nunca la suya manera natural de parlar. Ye un placer poder sentir lo castellano d'Andalucía de Carlos u Myrcella, de Podcast de hielo y fuego, u l'accento aragonés d'os integrants de Charrando de TBOs, por decir-ne nomás dos eixemplos.Si bella investigadora querese saber cómo se charra lo castellano en l'Estau espanyol en 2019, en trobaría muita mas información en Ivoox que en Antena 3.

Si ye inchustificable en los medios de l'Estau espanyol, mas en ye en los "autonomicos". ¿Qué sentiu tien que un aragonés en la televisión publica aragonesa cambee la suya manera de parlar? Ye unatro sinyal, como tantos que tenemos arredol, d'o grau d'aculturación que tenemos en lo país. Lo aragonés, mesmo si s'expresa en castellano, nomás fa honra pa fiestas, humor y folklore. Si queremos charrar de cosas serias, charramos en lo "formato prestichio" d'o castellano.

Desgraciadament tamién en las carreras nos trobamos a sobén con chent que, en seguntes que entornos, amaga u disimula tot lo posible ixe accento. Yo, que en tiengo y muito, no lo he amagau nunca, y me he trobau con bella persona que se n'ha arreguiu u n'ha feito chanza. Asinas que entiendo perfectament que, como en tantos atros aspectos lingüisticos, bi haiga chent que reble y decida impostar l'accento castellano pa escusar-se ixos problemas. Tenemos fayena por debant: fer entender a la sociedat que no existe un accento neutro, y que totz los accentos tamién son riqueza lingüistica; exichir a los medios que no s'afuerce a la chent a cambiar la suya manera de charrar; y sobre tot, aduyar a qui no se sienta seguro con lo suyo accento a que pierda ixos miedos, a que prenga como argüello lo que ye una parte d'a suya identidat.