Mostrando entradas con la etiqueta MHUEL. Mostrar todas las entradas
Mostrando entradas con la etiqueta MHUEL. Mostrar todas las entradas

martes, 15 de enero de 2013

A mía apostasía

Ahiere me plegó en casa a carta de l'arzobispau a on que m'informaban de que a la fin yeran os tramites d'a mia apostasía remataus y que heban feito l'anotación que pertocaba y que me confirma como apostata. O camín ha estau raro y muito largo, encara que he de decir que más por galvana que por os entrepuces que me han meso, que no'n son estaus guaires. Igual como me pasa con os bancos, a priori me fa fastio tractar con mosens y alavez siempre lo deixaba ta más enta debant. A la fin, iste nadal tenié bells diyas libres y decidié de rematar os tramites costase lo que costase. Ista ye a historia d'a mia apostasía por si tos fa honra y ta que sepatz como se fa.

Lo dubdo, pero talment bi haiga bella lectora que no sepa lo que ye l'apostasía. Resumiu, ye fer constar que, a tamás d'os sacramentos que t'haigan imposau, u mesmo que haigas preso d'antismas, no yes catolico (u de qualsiquier atra relichión, prou que sí) y demandas que no sigas incluyida en qualsiquier base de datos u fichero que pueda tener a ilesia. En iste articlo de Europa Laica tiens a explicación más razonada y os modelos que cal presentar.

Ixe ye o primer trango que cal fer. Has d'imprentar un d'os debanditos modelos, u fer-te-ne uno propio con lo que quieras comunicar-ie. En o mio caso fue nomás con ixo t'os bispau de Zaragoza, en a Plaza d'a Seu. En a puerta 100 (primer piso) ye a Secretaría que ye a on que t'inviarán quan digas que quiers presentar bell papel. Yo no m'amagué y ya en recepción pregunté a on s'apostataba y me indicoron ixa puerta. Por alparciar un poquet, tos diré que l'edificio ye de flipar.

Ya en secretaría me dicioron que si quereba que se quedaban con o papel que les heba entregau yo, pero que les caleba una copia d'a mia fe d'o baltizo. T'a part d'alavez yo no sabeba a on m'heban baltizau y les demandé que ixa faina la fesen ells. De feito creigo que si tenese muito más tiempo y bell advogau, hese puesto conseguir que ixo siga a suya responsabilidat. No ye o mio caso pero, ¿y si no hese teniu garra parient vivo que lo sabese? ¿No hese puesto apostatar? ¿Y si hese quiesto a fe d'o baltizo ta casar-me por a ilesia no la hesen mirada?

Les deixé a carta y, efectivament, a los pocos diyas me plegó a respuesta decindo que les caleba a fe d'o baltizo. Alparceyo numer 2: l'hombre que s'encarga d'istas cosas dobla as fuellas de revés que a resta d'a chent. Primer lo dobla por costau largo y dimpués por o curto. ¿Sabetz si ye una movida cristiana u ye nomás un concieto d'o barrenau iste?

A la fin reblé y, por no dar un disguto a mai, le'n pregunté a la mia chirmana, qui m'informó que m'heban baltizau en o Pilar. Preguntando en o bispau me dicioron que alavez me caleba ir t'o despacho parroquial que tienen en a carrera Alfonso. Un piso viello en un edificio viello, pero que barato no será. L'horario, por cierto, ye una mierda.

Astí m'atendió un hombre de bellas 50-60 anyadas. Le dicié que quereba a fe d'o baltizo y me preguntó que ta qué. En primeras no querié responder-le y le dicié que yeran datos mios y que teneba dreito a acceso y modificación d'os mesmos en virtut d'a lei de protección de datos y tal. Me respondió que pendeba ta que yera, m'heba de dar un papel u atro. No me quedé guaire convenciu, pero le dicié que yera t'apostatar. L'hombre fació mala cara, pero no dició guaire más. Lochicament, no sé en que calendata m'heban baltizau. Cuento que nian mis pais lo saben. Pero por un regular gosa estar bellas semana dimpués de naixer. Con os mios apellius y a calendata de naixencia trobó l'archivo d'o mio baltizo. Me fació confirmar una patacada de datos como nombre de pai y mai y os yayos maternos y paternos. Una atra vegada, yo me los sabeba, pero no tot lo mundo puet decir lo mesmo. Dimpués de tot ixe ferret y de tener-me-ie buen rato, pues l'hombre picaba os datos bien a monico, me imprentó o papel que me caleba y... me demandó tres euros.

Aquí me carranyé bell poco. Lo primer porque no quiero dar-le un euro más t'a ilesia antimás de totz los que me'n sacan d'os impuestos mios. Lo segundo porque dica que o papel no yera feito, no m'heba dito ni pon de pagar ni una perra. Le dicié que no m'heba avisau y que no teneba intención de pagar mica. Que antimás no sabeba porque heba de pagar tres euros porque me diesen una copia en papel (normalico, DIN-A4 blanco) d'uns datos que son mios d'un sacramento que nunca no demandé. Me explicó que yera un acto administrativo, que ell yera voluntario (-alavez no t'he de pagar, ababol! - pensé) y que si no quereba que no pagase, que alla yo con o mio esmo. Astí me lo deixó a uego. O mio esmo, precisament ye lo que fa que no quiera dar ni un euro t'a ilesia. Asinas que amablement me'n despidié y marché.

Muito tiempo dimpués, como he comentau alto, iste nadal tenié bells diyas libres y, entre atras cosas, torné t'o bispau a viyer si ya con a fe d'o baltizo me tramitaban l'apostasía u no pas. Bi dentré, tornando a preguntar a on se feba, pues ya lo heba ixublidau y plegué t'a secretaría a on continaba a mesma muller que m'heba atendiu bells meses antis. Me dició que heba d'haber demandau cita previa (como en a ITV), pero que miraría a viyer si o mosen teneba un ratet. Dimpués de dentrar en o suyo despacho, me dició que tornase en meya horeta y que le deixase os papels. Le demandé una copia que, con lo que me heba costau de conseguir a punyetera fe, como ta tornar a por una atra. Carranyada se me miró y me dició que si apostataba ya no me valeba ta cosa. "Bueno, pero ye mia"- le respondié. Como ta fiar-me d'a ilesia en a suya propia siede. Tamién se fació una copia d'o mio DNI, asinas que remeratz de levar-lo dencima.

Quan yera fendo a fotocopia, a muller paró cuenta en a calendata d'expedición y me dició que o papel que portiaba teneba una validez de nomas seis meses y que'n heban pasau más. Ya me creyeba que habría de tornar a fer-lo tot. Le'n pregunté y me dició que le preguntaría a o mosén.

Marché t'o mercau a fer-ie una gambada y bell mandau y quan torné m'atendió o mosen de turno. Me dio un papel ta sinyar, yo con un boli bic que m'ufrió y ell con una pluma recollonuda. O despacho suyo ye bien pincho con unas vistas t'a frontera d'a Seu repolidas. En ixo pasé o ratet entre que feba uns papels. Ya con tot sinyau me dio una carta (doblada raro de nuevas) a on que daban fe (nunca no millor dito, hehe) de que recibiban a mia apostasía y de que yo "renunciaba a la fe ta la que heba accediu en o baltizo". Asinas que sí, ta ells yo yera cristiano. Que dimpués bi ha chent que diz que dica que no te confirmas no'n yes. Pues t'a ilesia sí que'n yes. Me dició que en que fesen l'anotación en a marguin d'o libro d'a parroquia (que ye l'acto administrativo con o que apostatas) que me plegaría ta casa a notificación.

D'ixo en ferá bellas tres semanas. Ahiere recibié a notificación en casa y me sintié un poco más coderent y descargau d'as errors de mis pais y d'a sociedat y a cultura que les fació baltizar-me. Ta qualsiquiera que no quiera tener cosa que viyer con ista colla de supersticiosos y mafiosos y quiera deixar-lo esclatero, tien muita información en a web d'Europa Laica. En Zaragoza, tamién puetz contactar con MHUEL (Movimiento enta un estau laico), qui antimás han feito bella campanya d'apostasía masiva.

P.D.: Ista ye estada a mia experiencia. En bells atros puestos sé que meten más entrepuces, que cobran más diners por fer os papels y que se miran de torear-te. Si no yes de Zaragoza, u no bi yes baltizau, mira de contactar con bella asociación laicista d'a redolada que te podrán aduyar y decir como i funcionan as cosas. D'información en internet, en tiens un trapazil. Simplament googleya "apostasía" y farta-te de leyer.

P.P.D.: En escribindo isto, he parau cuenta de que he apostatau con 33 anyadas y en nadal. ¿Un sinyal de l'apocalipsis u bella cosa? A fe a fe que sí....

viernes, 1 de octubre de 2010

De manifestacions y sinyals

Bi ha muitas valuracions que fer d'a manifestación d'a plataforma "Que a crisi la bosen os ricos" y se son fendo por totz os cabos. Muita chent, muito esferent, una alternativa, una gran compleganza de movimientos socials "d'abaixo y a la cucha" que dicen as zapatistas y asinas asinas. Podetz leyer-las en blogs, webs, "feisbus" y tot ixo que se'n ye charrando muito. O mío analís no cambiaría guaire d'o que se i ye fendo, en totz ixos puestos, asinas que poco a adibir en tiengo. Manimenos sí que bi ha un aspecto que me'n fería goi de charrar, pues quereba escribir bella cosa sobre isto dende feba muito y no sabeba guaire bien cómo. No ye que a "simbolochía" que se i fació servir.

Dende que prencipiaba a dentrar en os movimientos politicos y en a cucha alternativa, por clamar-la de bella traza, bi ha habiu debatz perens. Que si violencia sí u no pas y en que grau, que qui apareix en as cabeceras, que si deixamos a los tal u qual organización dentrar en tal u qual plataforma, que si legalizamos a manifestación.... y prou que si en a manifestación que pertocase se podeban levar sinyals y quals.

De chicorrón gosaban as anarquistas queixar-se por os sinyals nacionals d'Aragón en as manifestacions. Os suyos sinyals, os anarquistas, pareixeba que no yeran "trapos de colors", que nomás en yeran os nuestros. Dimpués muita chent se queixaba d'os sinyals de partius u d'organizacions, por un regular más grans que no la que perteneixeba a persona que se queixaba. En as manis d'a segunda guerra Iraq-USA, o lema oficial yera que dengún no i levase garra identificación de garra mena.

Ye una opción respectable y, prou que si una asambleya u plataforma que organiza una manifestación diz de no levar-ne lo respectaré, como facié en a mani d'as luengas, y no i portaré cosa. Pero no ye una decisión que me faiga goi. Por un regular me fa muito más goi de viyer qui va ta una manifestación. Me fa goi de viyer todas as colors politicas refleixadas. Que siga platero qui bi ye y qui no pas. No veigo porqué una persona ha d'amagar a suya opción politica y expresar-la visualment en una manifestación. Y más si ye una manifestación convocada por organizacions tan diferents como en as debanditas u en a vada d'o 29-S. Que OSTA quieren ir todas chuntas en plan lechión romana, en formación, con chalecos y sinyals ta todas? Pues bien, que faigan lo que les pete. Que a resta hemos iu en colletas mezcloteyadas a on que se viyeban en poquetz metros sinyals anarquistas, comunistas y independentistas? Pues ye a nuestra opción igual de respectable. Y en a mía opinión prou polida. Que se i viyesen pegallos de todas as organizacions, sinyals de todas as opcions politicas. Que tanyesen quasi de conchunta batucadas y donzainas. Tot ixo ta yo no ye oportunismo politico u proselitismo, que tamién puet estar seguntes cómo se faiga. Ta yo ye muito enriquidor. Ye un sinyal de que somos plurals, de que tenendo esferents ideyas y motivacions podemos meter-nos d'alcuerdo, en bells minimos a lo menos. De que todas, de conchunta, y repectando as nuestras esferencias, podemos prencipiar a construyir un mundo esferent. No portar garra sinyal nos fa a todas iguals y ixo no ye necesariament bueno.

Muitas dicen que bi ha organizacions que no van t'as manifestacions que ta fer nuevas socias, afiliadas, militants u lo que sía. Lo primer, yo no sé qué piensan en as organizacions que no i soi, asinas que habríanos de estar prudents en fer seguntes que valuracions. Segundo, si una organización X crei en una luita, ha de fer tot lo posible por arroclar a más chent en ixa luita. Y dentrar en ixa organización X ye una traza de fer-lo. Ta qui ye en X, de seguras que ye a millor traza de luitar, asinas que ¿por qué no ha de convidar a fulana u mengana a que luite y a que luite en a suya organización?. Una afiliada, socia, militant... más ye una persona más que va a tener información, que va a estar organizada, que va a ir t'as manifestacions y convocatorias de X y de todas as plataformas y asambleyas a on que sía X. Que va a conoixer a chent d'atras organizacions y de tot lo teixiu social zaragozano y aragonés. En a mía opinión, hemos de sacar-nos os complexos y hemos de fer vistero a que organización u movimiento social perteneixemos todas (si queremos, prou que sí, que bi ha chent que simplament no quier que a resta lo sepa).

Antimás, l'actitut d'una organización en una manifestación ye sinyalera d'a organización en si mesma. Si son disciplinadas u no pas, horizontals u verticals, combativas u sozmesas, ubiertas a las resta d'ideyas u zarradas a toda influyencia exterior y prou que si a luita les importa más u menos que a organización, tot ixo se vei platero en as manifestacions. Y cal que se veiga.

Tamién siempre bi ha habiu chent queixando-se de que s'esparda información d'atras qüestions en as manifestacions. En ista d'a vada, me plegoron pasquins de as organizacions en esfensa d'o Sahara, de una convocatoria de manifestación que fa MHUEL por un estau laico o venient 23 d'octobre, d'as actividatz en o C.S.O. "La vieja escuela"... Por qué no s'ha d'aprofeitar una manifestación por os dreitos laborals ta fer plegar atros mensaches que pueden estar intresants ta qui bi ye? Muitas d'as que i yeranos somos intresadas por todas ixas causas tamién. Qual ye o problema?

A manifestación d'o 29-S, y tot lo que se fació de maitins tamién, estió, ta yo, eixemplar de muitas cosas. Una d'ellas ixas. Que de goi que me fació viyer-ie toda ixa ripa de siglas, sinyals, chapas, chambretas... se esferents sensibilidatz, de conchunta por una mesma causa. Si todas estasen asinas, millor iríanos... Gracias a todas qui hetz feito posible ista compleganza d'organizacions, movimientos socials y chent de toda mena.

sábado, 6 de febrero de 2010

Ampraus 039

Cuasi a l'arreu de Ampraus 038 he trobau prous cosetas como ta fer-ne uno nuevo, asinas que astí van.

MHUEL, que en zagueras ye muito activa, se queixó por o volumen d'o “Bendita” que fan dende o Pilar totz os diyas tres vegadas cada diya. As que vivimos bien amanadas t'o Pilar lo hemos d'ascuitar nos faiga goi u no, sigamos cristianos u no. Me parix prou lochico que demanden que nomás s'ascuite que aintro d'o Pilar y antimás creigo que han estau muito correctos en as trazas de fer-lo publico. Manimenos o Heraldo d'Aragón, u a lo menos una d'as periodistas suyas, ha feito un articlo que s'estudiará en as facultatz de periodismo como l'eixemplo de qué no ye información. O titular ya lo diz tot: “Casi nadie quiere silenciar el Bendita y Alabada”. Dos mentiras en ueito parolas. En leyendo l'articlo no trobo garrar referencia a encuestas u datos estadisticos que digan si a chent ye a favor u en contra d'a medida proposada por MHUEL. Simplament que han saliu t'a carrera, t'a plaza d'o Pilar y a chent que i yera en a suya mayoría no yeran a favor d'isto. (Que ves-te-ne tú a saber como les n'han explicau...). Y unatra mentira. A verdat ye que dengún no quiere silenciar o Bendita. Lo que quieren ye que no se sienta difuera d'o Pilar. Que ye muito diferent. Baixar o volumen no ye silenciar. Os pior de tot os comentarios emplius d'odio que bi ha en a noticia. Chent decindo que si a los de MHUEL no les fa goi que se'n vaigan de Zaragoza, que si cusirarán si les dan subvencions, que si a virchen ye lo más aragonés que bi ha.... Ta gomecar. Tot por un articlo que se suposa ye de información y no ye que un pasquín catolico. ¿Tendrá bella cosa que viyer con tot isto que una d'as personas visteras de MHUEL siga Antonio Aramayona, qui escribe un diya par d'atro, en a competencia d'o Heraldo, o Periodico d'Aragón? Remeratz, tamién, aquella campanya que se fació fa anyadas de Opus s'escribe con H (igual como Heraldo).

Homeopatia O circulo esceptico, organización que no conoixeba dica fa poco organizó, de conchunta con una iniciativa anglesa, un suicidio colectivo o pasau 30 de chenero. ¿Cómo? - te preguntarás quiesta lectora. O caso ye que ta denunciar que a “merecina” homeopatica en reyalidat no vale ta cosa, decidioron de grabar-se prenendo una sobredosis de medicamentos homeopaticos. O video tos lo pencho más t'abaixo y tos recomiendo de viyer a suya web que tien cosas muito intresants (y atras que no pas tanto, pero dengún no ye perfecto)

Haití A verdat ye que no he visto guaires noticias sobre Haiti y, alavez no he puesto viyer como trataban o tema os mass media. A reyalidat ye que cuasi no veigo noticias d'os mass media por manca de tiempo y d'intrés. Sí que he leyiu iste sobrebueno articlo en Rebelión de Pascual Serrano. Una visión sobre o tierratremo de Haiti y cómo s'ha desinformau, con datos ampraus d'os mass media espanyols.

A clau roya ye una organización de mullers independentistas que ye naixida fa poco. O venient 26 de febrero fan un acto de presentación t'a sociedat. Podetz viyer o cartel d'a charrada que organizan con UCA y o BIC, alto d'iste articlo. Buena suerte ta las recién naixidas y aspero viyer-tos en a charrada.

Sobredosis homeopatica

domingo, 29 de noviembre de 2009

Ampraus 035

Un d'os primers articlos d'iste blog estió sobre a XII FLA. Quí m'iba a decir t'a part d'alavez que tres años dimpués continaría vivo o blog ta poder charrar d'a quincena edición.

XV FLA: Creigo que ye una d'as millors ferias que se fan en tot lo país y que siempre cal ir-ie. Con tot y con ixo, tamién tiengo cuasi siempre bella queixa. Cuasi totz os años i aparix a chentucia d'os FACAOS. Bi'n ha habiu d'años an que os conciertos yeran prou penibles u an que sacoron o tren d'a cultura. Estiaño a unica queixa, por agora ye por o cartel. Sino veigo mal (si ye asinas correchiz-me) en o cartel i sale bien d'aragonesas ilustres: Goya, Ramón y Cajal, Joaquín Costa, Agustina d'Aragón... y a o canto d'ellas Escrivá de Balaguer. Un personache que no alportó cosa t'a cultura y que estió o ideyologo y creyador d'una d'as sectas fanaticas más periglosas d'o cristianismo. Secta que refirmó y s'arpofitó d'o franquismo y que contina fendo-lo güe. Tos convido a ir t'a Feria, viyer os conciertos, mercar bel buen libro ta ixublidar o Nadal y queixar-tos a la organización d'o cartel. En esfensa d'a FLA cal decir que tornan a fer o tren d'a cultura y que os conciertos d'ista edición son buenismos.

A SGAE torna a perder un
chuicio. Unatro. Y van quemisió yo cuantos... Suerte que a muitos chueces parix que no les fa goi a SGAE, (porque en a chusticia no confío mica) y de cabo ta cuan les foten una d'istas. Publico, ves-te-ne tú a saber porqué, siempre da treslau d'istas noticias. Ye un d'os pocos meyos an que nos podemos enterar d'istas cosetas. Un d'os pocos que no be d'estar pleno de clients agradeixius d'os inquisidors istos.

UPyD: Publico ye tamién ye un d'os pocos meyos que
critica ubiertament a UPyD. Mesmo ye un d'os pocos meyos espanyols que charran nunca d'espanyolismo. Afortunadament, parix que a UPyD, como totz os partius ya l'han creixiu de criticos (cuento que a la dreita de Rosa Díez). ¿Podrá continar vivo un partiu choven (en tiempo de vida) que ya rebute de criticos y arribistas? Asperemos que no.

Zeus no existe. Ni Dios ni garra d'as invencions d'as falsas. En ixo somos d'alcuerdo l'autor d'o blog homonimo y yo. Charrando d'o tema, tos remero que MHUEL, contina vivo y que podetz trovar cómo apostatar en a suya web.

Tres videos ta rematar: O primer, inviau por Bercimuelles, sobre a tourné de Lurte por tierras d'Oc u Oil (no sé aón exactament). O segundo una canta heavy de Stravaganza, una colla que me recomendó un compañer de treballo. Cuento que a letra tos sonará. O tercer, un rapero friki que consigue rimar condensador de fluzo. Muito gran.
Lurte en l'Estau francés:

Stravaganzza:

Shogun XL:

domingo, 8 de noviembre de 2009

Ampraus 034

L’agüerro ya ye plegau y con qué trazas! Que’n fa de fredor...! Ixo sí, nos dixa paisaches repinchos como o d’a foto penchada, feita en Bezas, redolada d’a Sierra d’Albarrazín. Podetz biyer-ne más en Flickr de Barrenaus.


Torturas taurinas: As torturadoras ya no saben ni qué nuebas trazas de torturar creyar. Seguntes informaba Publico, en Galapagos (Castiella) fan bella mena de safari con autos encorrendo toros dica que se cansan (as umanas) y lo matan fotendo-le un tiro. Como cuasi siempre ista colla de salbaches tamién son biolentas con as umanas y a las periodistas y actibistas las menazaron, mesmo plegando a cremar l’auto d’un mozo d’o lugar que, seguntes ellas, estió qui informó a PACMA y a las TB’s. Prou que con a pasibidat d’a resta d’o lugar y d’a guardia zibil. Penible. En ista web tenetz más info sobre o caso de Galapagos que se suma a tantas y tantas atrás barbaridatz feitas a os animals y consentidas y mesmo subenzionadas por l’Estau espanyol.


O PAR ye una mafia. Ixo ye vox populi dende fa muitos y muitos años. Ya cuasi ye parti d’o imachinario colectibo aragonés. Ixa mena de Status Quo no gosa d’estar denunziau, pero leyié (en l’Eraldo!) que PP y CHA demandaban esplicazions por a chestión d’Ordesa. Podrían demandar-las por tantas y tantas cosas... pero a lo menos ye un primer trango. Cuento que no irá guaire dillá, porque totz os partius quieren fer lo mesmo cuan tiengan o poder, pero que a lo menos aigan de disimular bel poquet. Bergüeña de país...!


D’Estrasburgo plegan buenas notizias t’a libertat de todas. A lo menos as instituzions europeas tienen un poquet más platero ixo d’as libertatz relichiosas, porque aquí continan los cruzifixos por totz os cabos. En istos diyas de fundamentalismo catolico, siempre nos quedará Estrasburgo. Y MHUEL, que organiza, de cabo ta cuan, apostasías masibas. A pachina web suya feba tiempos que no me la miraba y ban adibindo-ie arrienda contenius repinchos. Un d’els, un Howto de l’apostasía. Por lo que charré con ellas, por ista bía no te dan guaire mal y en poco tiempo se consigue apostatar. Grazias, MHUEL, por empentar istas iniziatibas que tanto calen.


Ta rematar un zaguer binclo a un articlo que penchó Florencio en Desde Banarús sobre l’Alakrana. O caso iste ye tot un eixemplo de l’ipocresía y l’esconoiximiento d’o mundo que tien a más grand parti d’a chent. De bideos, tos ne pencho un de recosiros. As que tiengatz si fa u no fa a edat mía ista canta tos ne trayerá ambute, de recosiros.