De suspensos propios y aprebaus d'otri

He suspendiu l’examen de certificación d’o nivel B2 d’aragonés. Concretament por la parte d’a comprensión oral, habendo superau la resta de destrezas. Podría meter un ciento de sincusas, acumular-le la culpa a diferents factors, chuntos u separaus. Podría qüestionar lo proceso. Podría demandar revisión a los dioses de l’aragonés. Pero no. Toda critica que fese quedaría, con razón, tacada por la sospeita de que nomás la foi por haber supendiu.En lo momento que me i presenté accepté de facto las reglas d’o chuego, lo tribunal y todas las conseqüencias. Y la conseqüencia ye un suspenso.

No diré que no me fa triste. Muito. Y m’encarranya y me pareixe inchusto. Sé que tiengo ixe nivel, y en doi fe cada diya que foi servir ista luenga. Practicament tot lo que foi ye publico y platero. Tretze anyos de blog, con toda la evolución que ha teniu, cinco de radio, mas d’una decena de profesor y muitas colaboracions de toda mena en diferents puestos. No seré yo qui me chuzgue. Todas y totz sabetz lo que foi y tenetz la vuestra opinión prou formada. Si suspendo u aprebo un examen no cambiará lo que opinetz. A qui no le feba goyo u consideraba que lo mio aragonés no ye bueno, puro u achustau a que me sé yo que normas no escritas, continará fendo-lo. Aspero que a qui le agradase lo que foi no deixe de seguir-me por iste entrepuz.

De vez que triste, tamién me foi contento. Por toda la chent que quiero, u que hemos compartiu prochectos, aulas, actividatz y a la finitiva, vida. Pero sobre tot, por todas las alumnas y alumnos que han pasau por las mias clases y que hue tienen ixa certificación d’os conoiximientos que en parte aprendioron de yo. N’i hai decenas y la millor cosa que me levo d’iste proceso ye veyer-les aprebar l’examen y estar fablants con una muit buena competencia lingüistica.

A pesar de que no s’ha feito como yo lo hese feito, y de todas las pegas que le pueda meter a lo proceso de certificación, torno a decir que en presentar-me-ie accepté ixas reglas. Y lo facié porque creigo que yera una d’as reivindicacions urchents y nesezarias pa l’aragonés, por la que levo luitando anyos arrienda. Se podeba haber feito millor, sí. Y pior tamién. Yera la primer vegada y si n’i hai de posteriors aspero que se corrichan los problemas que bi ha habiu.

Oficialidat, unidat d’a luenga d’Ansó ta Benás, reconoiximiento de dreitos a toda la comunidat lingüistica, certificacions oficials de nivel, standar y grafía consensuadas y d’ampla representación, academia independient, representativa y operativa, amostranza de y en la luenga… son reivindicacions vitals pa que la nuestra luenga tienga una minima oportunidat de sobrevivir. Manyana, igual como hue, igual como ahiere seguiré treballando dende toda la honestidat que tiengo por conseguir totz ixos obchectivos y fer que l’aragonés veiga ixamplau lo suyo numbro de fabladoras.